ଜାତୀୟ ପରୀକ୍ଷା ଏଜେନ୍ସି (NTA) ଦ୍ୱାରା ପରିଚାଳିତ ଆଉ ଏକ ପରୀକ୍ଷାରେ ବଡ଼ ଧରଣର ବିଭ୍ରାଟ ସାମ୍ନାକୁ ଆସିଛି। ଅଗଷ୍ଟ ୨୨ ତାରିଖରେ ଜୟପୁରର ଏକ ପରୀକ୍ଷା କେନ୍ଦ୍ରରେ ଅଲ୍ ଇଣ୍ଡିଆ ଆୟୁଷ ପିଜି ଏଣ୍ଟ୍ରାନ୍ସ ପରୀକ୍ଷା (AIAPGET 2026) ଚାଲିଥିବା ବେଳେ ହଠାତ୍ ବିଦ୍ୟୁତ୍ କାଟ ହେବାରୁ ପରୀକ୍ଷା ବାଧାପ୍ରାପ୍ତ ହୋଇଥିଲା। ଅନ୍‌ଲାଇନ୍ ମାଧ୍ୟମରେ ହେଉଥିବା ଏହି ପରୀକ୍ଷା ସମୟରେ ଲାଇନ୍ ଚାଲିଯିବାରୁ କମ୍ପ୍ୟୁଟର ବନ୍ଦ ହୋଇଯାଇଥିଲା, ଯାହା ଫଳରେ ଛାତ୍ରଛାତ୍ରୀମାନେ ତୀବ୍ର ଅସନ୍ତୋଷ ବ୍ୟକ୍ତ କରିବା ସହ କେନ୍ଦ୍ର ବାହାରେ ହଙ୍ଗାମା କରିଥିଲେ।

ପରୀକ୍ଷା କେନ୍ଦ୍ରରେ ଘୋର ଅବ୍ୟବସ୍ଥା

ସୂଚନା ଅନୁଯାୟୀ, ଜୟପୁରର ଟ୍ରାନ୍ସପୋର୍ଟ ନଗର ସ୍ଥିତ ଶ୍ରୀ ସତ୍ୟସାଇ ପିଜି କଲେଜରେ ଏହି ପ୍ରବେଶିକା ପରୀକ୍ଷା ଚାଲିଥିଲା। ପ୍ରଥମ ସିଫ୍ଟ ପରୀକ୍ଷା ସକାଳ ୧୦ଟାରୁ ଆରମ୍ଭ ହୋଇଥିବା ବେଳେ ମାତ୍ର ୧୫ ମିନିଟ୍ ପରେ ଅର୍ଥାତ୍ ୧୦:୧୫ ମିନିଟ୍‌ରେ ଲାଇନ୍ କଟିଯାଇଥିଲା। ପରୀକ୍ଷା କେନ୍ଦ୍ରରେ ବିଦ୍ୟୁତ୍ ବ୍ୟାକ୍‌ଅପ୍‌ର କୌଣସି ସୁବିଧା ନଥିଲା। ପ୍ରଶାସନ ପକ୍ଷରୁ ଜେନେରେଟର ଚଲାଇବାକୁ ଚେଷ୍ଟା କରାଯାଇଥିଲେ ମଧ୍ୟ ସେଥିରେ ଡିଜେଲ ନଥିବା ଜଣାପଡ଼ିଥିଲା। ଏହି ଘୋର ଅବ୍ୟବସ୍ଥା କାରଣରୁ ପରୀକ୍ଷାର୍ଥୀମାନେ ଘଣ୍ଟା ଘଣ୍ଟା ଧରି ଅପେକ୍ଷା କରିବା ପରେ କେନ୍ଦ୍ର ବାହାରେ ବିକ୍ଷୋଭ ପ୍ରଦର୍ଶନ କରିଥିଲେ। ସ୍ଥିତି ନିୟନ୍ତ୍ରଣ କରିବା ପାଇଁ ପୋଲିସ ଏବଂ ପ୍ରଶାସନିକ ଅଧିକାରୀମାନଙ୍କୁ ହସ୍ତକ୍ଷେପ କରିବାକୁ ପଡ଼ିଥିଲା।

୪୯ ଜଣ ପରୀକ୍ଷାର୍ଥୀଙ୍କ ପାଇଁ ପୁନଃ ପରୀକ୍ଷା

ଏହି ବିଦ୍ୟୁତ୍ ବିଭ୍ରାଟ କାରଣରୁ କେନ୍ଦ୍ରରେ ଉପସ୍ଥିତ ଥିବା ମୋଟ ୧୯୨ ଜଣ ପରୀକ୍ଷାର୍ଥୀଙ୍କ ମଧ୍ୟରୁ ୪୯ ଜଣ ସେମାନଙ୍କର ପରୀକ୍ଷା ଶେଷ କରିପାରିନଥିଲେ। NTA ପକ୍ଷରୁ ଏହି ଘଟଣାକୁ ଗମ୍ଭୀରତାର ସହ ନିଆଯାଇଛି। କେବଳ ପ୍ରଭାବିତ ହୋଇଥିବା ଏହି ୪୯ ଜଣ ପରୀକ୍ଷାର୍ଥୀଙ୍କ ପାଇଁ ପୁନର୍ବାର ପରୀକ୍ଷା କରାଯିବ ବୋଲି ଏଜେନ୍ସି ଘୋଷଣା କରିଛି। ଅବଶିଷ୍ଟ ଛାତ୍ରଛାତ୍ରୀମାନେ ଲାଇନ୍ ଆସିବା ପରେ ନିଜର ପରୀକ୍ଷା ସମ୍ପୂର୍ଣ୍ଣ କରିଥିଲେ।

ସେପ୍ଟେମ୍ବର ୧ରେ ହେବ ପରୀକ୍ଷା

ଏହି ପ୍ରଭାବିତ ଛାତ୍ରଛାତ୍ରୀଙ୍କ ପାଇଁ ଆସନ୍ତା ସେପ୍ଟେମ୍ବର ୧ ତାରିଖ ସକାଳ ୧୦ଟା ସମୟରେ ପୁନଃ ପରୀକ୍ଷା ଅନୁଷ୍ଠିତ ହେବ। ଏଥିପାଇଁ ଜୟପୁରର ରାଜସ୍ଥାନ କଲେଜ୍ ଅଫ୍ ଇଞ୍ଜିନିୟରିଂ ଫର୍ ଓମେନ୍କୁ ନୂଆ ପରୀକ୍ଷା କେନ୍ଦ୍ର ଭାବରେ ସ୍ଥିର କରାଯାଇଛି। ପରୀକ୍ଷାର୍ଥୀମାନଙ୍କ ପାଇଁ ଖୁବଶୀଘ୍ର ନୂତନ ଆଡମିଟ୍ କାର୍ଡ ଜାରି କରାଯିବ ବୋଲି ନ୍ୟାସନାଲ ଟେଷ୍ଟିଂ ଏଜେନ୍ସି ସ୍ପଷ୍ଟ କରିଛି। ସୂଚନାଯୋଗ୍ୟ ଯେ, ଦେଶବ୍ୟାପୀ ୨୦୦ଟି କେନ୍ଦ୍ରରେ ମୋଟ ୩୫,୮୩୭ ଜଣ ପ୍ରାର୍ଥୀ ଏହି ଆୟୁଷ ପିଜି ଏଣ୍ଟ୍ରାନ୍ସ ପରୀକ୍ଷା ଦେଇଥିଲେ।

ରାଜକନିକା : ଉତ୍ତମ ସେବା ଓ ଉନ୍ନତଧରଣର ବିଦ୍ୟୁତ୍ ସ˚ଯୋଗ ଲକ୍ଷ୍ୟରେ ରାଜ୍ୟ ସରକାର ଟାଟା ପାୱାର୍‌କୁ ବିଦ୍ୟୁତ୍ ସେବା ପରିଚାଳନା ଦାୟିତ୍ବ ହସ୍ତାନ୍ତର କରିଥିଲେ। ଟାଟା ପାୱାର୍ ଦାୟିତ୍ବ ନେବା ପରେ ଅସଜଡ଼ା ଭିତ୍ତିଭୂମି ପୁଣି ସଜଡ଼ାଯିବ। ଆଉ ଉନ୍ନତମାନର ନିରବଚ୍ଛିନ୍ନ ସେବା ମିଳିବ ବୋଲି କେନ୍ଦ୍ରାପଡା ଜିଲ୍ଲାର ରାଜକନିକା ବ୍ଲକବାସୀ ଆଶା ବାନ୍ଧିଥିଲେ। ଏହାସହ ଭିତ୍ତିଭୂମି ବିକାଶ ପରେ ଗ୍ରୀଷ୍ମରେ କୌଣସି ପରିସ୍ଥିତିରେ ବି ପାୱାରକଟ୍ ହେବନି ବୋଲି ମଧ୍ୟ ଟାଟା ପାୱାର୍‌ ପ୍ରତିଶ୍ରୁତି ଦେଇଥିଲା କିନ୍ତୁ ରାଜକନିକା ଅଞ୍ଚଳରେ ଠିକ ତାର ଓଲଟା ଦେଖିବାକୁ ମିଳୁଛି।

ପ୍ରାୟ ବର୍ଷେ ହେବ ରାଜକନିକା ବିଜୁଳି ସେକସନକୁ ଟାଟା ପାୱାର୍‌ ନେବା ପରଠୁ ସାରା କନିକାରେ ବିଜୁଳିକୁ ନେଇ ଅକଥନୀୟ ଦୁର୍ଦ୍ଦଶା ଓ ଶୋଷଣରେ ଉପଭୋକ୍ତା ତ୍ରାହି ତ୍ରାହି ଡାକ ଛାଡିଲେଣି । ସ୍ଥିତି ଏମିତି ହୋଇଛି ଯେ ରାଜକନିକା ଭଳି ଗ୍ରାମାଞ୍ଚଳରେ ଅଧିକରୁ ଅଧିକ ପାୱାରର ବିଜୁଳି ଯୋଗାଇବାକୁ ଓଳାଭର ଠାରେ ଗ୍ରୀଡ ସ୍ଥାପନ,ନହୁଲିଆରେ ଷ୍ଟ୍ରକଚର ନିର୍ମାଣ ସହ ମୁଖ୍ୟ ସରବରାହ ରାଜକନିକା ସେକସନରେ ଉନ୍ନତିକରଣ ପରେ ବି ସ୍ଥିତିରେ ସାମାନ୍ୟ ପରିବର୍ତ୍ତନ ହୋଇନାହିଁ । ଗଛରେ ପତ୍ର ହଲିଲେ କିମ୍ବା ଆକାଶରେ ବିଜୁଳି ଦେଖିବା ମାତ୍ରକେ ସାରା କନିକାକୁ ଅନ୍ଧାର କରିଦେଉଛି ଟାଟା ପାୱାର। ଆଉ ଥରେ ବିଜୁଳି ଗଲେ ଆସିବାକୁ ବି ୩ ରୁ ୪ ଘଣ୍ଟା ସମୟ ନେଉଛି। କେବଳ ସେତିକି ନୁହେଁ ପୂର୍ବରୁ ଘୋଷଣା ନ କରି ପ୍ରତିଦିନ ରାଜକନିକା ଅଞ୍ଚଳରେ ୫ ରୁ ୬ ଘଣ୍ଟା ବିଜୁଳି କଟାଯାଉଛି। ଅଘୋଷିତ ବିଦ୍ୟୁତ କାଟ୍‌ ନେଇ ବିଭାଗୀୟ ଅଧିକାରୀଙ୍କୁ କଲ୍‌ କେଲ ଖୁଣ୍ଟ ଓ ତାର ପରିବର୍ତ୍ତନ କିମ୍ବା ମରାମତି ହେଉଛି କହି ସଫେଇ ଦେଉଛନ୍ତି। ମରାମତି ନାଁରେ ପ୍ରାୟ ପ୍ରତିଦିନ ଘଣ୍ଟା ଘଣ୍ଟା ବିଜୁଳିକାଟ ହେବା ଫଳରେ ବିଜୁଳି ଅଭ୍ୟସ୍ତ ସମସ୍ତ ସେବା ମଧ୍ୟ ପ୍ରତିହତ ହେବାରେ ଲାଗିଛି ।

ରାଜକନିକା ବ୍ଲକର ବିଭିନ୍ନ ଗ୍ରାମଞ୍ଚଳରେ ଘନ ଘନ ଘନ ପାୱାରକଟ୍ ସାଙ୍ଗକୁ ଲୋଭୋଲଟେଜ୍ ଏକ ପ୍ରମୁଖ ସମସ୍ୟା ଭାବେ ଉଭା ହୋଇଛି। ଗୋଟିଏ ପଟେ ଠିକ୍ ସମୟରେ ବିଲ୍ ପୈଠ କରିବାକୁ ଖାଉଟିଙ୍କ ଉପରେ ଚାପ ପଡ଼ୁଥିବା ବେଳେ ଅନ୍ୟପଟେ ଟାଟା ପାୱାର୍‌ର ଏଭଳି ମନମୁଖି କାର୍ଯ୍ୟକଳାପକୁ ନେଇ ଅସନ୍ତୋଷ ପ୍ରକାଶ ପାଇଛି। ମାଳ ମାଳ ଯନ୍ତ୍ରୀ ଥାଇ ବି କୌଣସି ସମସ୍ୟାର ସ୍ଥାୟୀ ସମାଧାନ ହୋଇପାରୁନି। ଏହାରି ମଧ୍ୟରେ ଗତ କିଛି ଦିନ ହେବ ରାଜକନିକା ଆୟତନ କ୍ୟାମ୍ପ ଅଧିନରେ ଥିବା ଗ୍ରାମ ଗୁଡିକରେ ଦିନକୁ ୨୪ ଘଣ୍ଟାରୁ ପ୍ରାୟ ୨୦ ଘଣ୍ଟା ପାୱାରକଟ୍ କରାଯାଉଛି ବୋଲି ଲୋକମାନେ ଅଭିଯୋଗ କରିଛନ୍ତି। ଆୟତନ କ୍ୟାମ୍ଭ ଅଧିନରେ ତ୍ରୈଲକପୁର, କୋଇଲିପୁର,କାଟଣା ପଞ୍ଚାୟତର ସମସ୍ତ ଗ୍ରାମ ଗୁଡିକ ଆସୁଥିବା ବେଳେ ଏପରି ପାୱାରକଟ୍ ପରେ ଲୋକ ନାହିଁନଥିବା ଅସୁବିଧାର ସମ୍ମୁଖିନ ହେଉଛନ୍ତି। ଏହି ଅଞ୍ଚଳରେ ୧୦ ମିନିଟ ଲାଇନ ଆସିଲେ ୨ ଘଣ୍ଟା କାଟି ଦେଉଛନ୍ତି, ପୁଣି ୧୦ ମିନିଟ ଦେଇ ସମାନ ଢଙ୍ଗରେ ୨ ଘଣ୍ଟା କାଟୁଛନ୍ତି। ରାତ୍ରୀ ସମୟରେ ଏହି ଅଞ୍ଚଳବାସୀଙ୍କୁ ଟାଟା ପାୱାର୍‌ ଅଧିକ ଯନ୍ତ୍ରଣା ଦେଉଛି। ରାତିରେ ଲଗାତର ଭାବେ ଲାଇନ କାଟାଯାଉଛି। ମଝିରେ ମଝିରେ ଟିକେ ଆଲୁଅ କରି ରାତି ୨ଟା ପରେ ଟୋଟାଲ  ଲାଇନ କଟାଯାଉଛି। ଯାହା ଫଳରେ ଲୋକ ରାତିରେ ଶୋଇପାରୁନାହାନ୍ତି।

ଏନେଇ ରାଜକନିକା ଜେଇ ଦୁର୍ଗା ଚରଣ ବେହେରାଙ୍କ ଯୋଗାଯୋଗ କରିବାରୁ ବହୁତ ଚେଷ୍ଟା ପରେ କଲ୍‌ ରସିଭ୍‌ କରିଥିଲେ। ଆୟତନ କ୍ୟାମ୍ପ ଅଧିନରେ ଏପରି ଅଘୋଷିତ ବିଦ୍ୟୁତ କାଟ୍‌ ନେଇ ତାଙ୍କୁ ପଚରାଯିବାରୁ ସେ କହିଥିଲେ ଯେ କାମ ଚାଲିଛି ସେଥିପାଇଁ ଲାଇନ୍‌ କଟାଯାଉଛି। ଆୟତନ କ୍ୟାମ୍ପ ଅଧିନରେ ଥିବା ଗ୍ରାମ ଗୁଡିକରେ ଦିନକୁ ୨୪ ଘଣ୍ଟାରୁ ପ୍ରାୟ ୨୦ ଘଣ୍ଟା ପାୱାରକଟ୍ କରାଯାଉଛି ବୋଲି ଲୋକମାନେ ଅଭିଯୋଗ ବିଷୟରେ ପଚରାଯିବାରୁ କହିଥିଲେ ଯେ ନହୁଲିଆରେ ଷ୍ଟ୍ରକଚରେ ଗୋଟିଏ ଟ୍ରାସ୍‌ଫର୍ମର ପୋଡି ଯାଇଛି, ଆଉ ଗୋଟିଏ ନୂଆ ଲାଗିବା ପର୍ଯ୍ୟନ୍ତ ଏପରି ସମସ୍ୟା ଲାଗିରହିବ। ତେବେ ଏଭଳି ଗ୍ରୀଷ୍ମ ଗୁଳୁଗୁଳିରେ ଲୋକମାନେ ହାଇରାଣ ହେଉଥିବା ବେଳେ ଟାଟା ପାୱାର୍‌ର ଏପରି ମନମୁଖୀ ଭାବେ କାମ କରିବାକୁ ଅଞ୍ଚଳବାସୀ ଘୋର ନିନ୍ଦା କରିଛନ୍ତି।

ଅନ୍ୟପଟେ ରାଜକନିକା ଅଞ୍ଚଳରେ ବିଜୁଳି ବିଲରେ ମାତ୍ରାଧିକ ପରିମାଣର ଶୋଷଣ ଏବେ ଉପଭୋକ୍ତାଙ୍କୁ ଅଡୁଆରେ ପକାଇଛି । ବଢି ଚାଲିଥିବା ବିଜୁଳିବିଲକୁ ନେଇ ଦୈନିକ ରାଜକନିକା ଓ ଓଳାଭର ସେକସନରେ ପାଟିତୁଣ୍ଡ ଗାଁ ଗାଁରେ ଲାଇନମ୍ୟାନକୁ ଅଟକାଯିବା ଭଳି ଘଟଣାର କୌଣସି ବିଜୁଳି ଫଳପ୍ରଦ ସମାଧାନ ନ ହେବାରୁ ବିଜୁଳି ଅଭ୍ୟସ୍ତ ଜନଜୀବନ ଏବେ ଆତଙ୍କରେ ଦିନ କାଟୁଛି । ଯେଉଁ ଉପଭୋକ୍ତାମାନେ ୮ ମାସ ପୁର୍ବରୁ ସମାନ ୟୁନିଟର ବିଜୁଳି ବ୍ୟବହାର କରି ୩୦୦ ରୁ ୬୦୦ ଟଙ୍କା ମଧ୍ୟରେ ବିଲ ଦେଇଥିଲେ ,ସେହି ଉପଭୋକ୍ତା ଏବେ ସମାନ ଧରଣର ବିଜୁଳି ବୟବହାରରେ ଅହେତୁକ ଭାବରେ ୧୭ ଶହରୁ ୨୬ ଶହ ଟଙ୍କାର ବିଲ ପାଇ ଜଳକା ହୋଇ ଯାଉଛନ୍ତି । ସେପଟେ ବିଜୁଳି ବିଲ ଆଦାୟରେ ବିଳମ୍ବ ହେଉ ବା ଅଧିକ ୱାଟର ବିଜୁଳି କାହିଁକି ସଂଯୋଗ କରିନାହଁ ଦର୍ଶାଯାଇ ତଥାକଥିତ ସ୍କ୍ୱାଡର ଚଢାଉ ମଧ୍ୟ ଆତଙ୍କ ସୃଷ୍ଟି କରିଛି । ବିନା ନୋଟିସରେ ଘରେ ଝିଅବୋହୁ ଥିବା ବେଳେ ଏହି ସବୁ ସ୍କ୍ୱାଡ ଘରେ ପଶି ହଠାତ ଜୁଲମ କରିବା ମନଇଚ୍ଛା ଫାଇନ ଧାର୍ଯ୍ୟ କରି ବ୍ରିଟିଶରାଜ ଚଳାଇଛି ।