ନୂଆଦିଲ୍ଲୀ: ଏମ୍‌ଏମ୍‌ଡ଼ିଆର୍‌ ସଂଶୋଧନ ବିଲ୍‌କୁ ରାଜ୍ୟସଭାରେ ତୀବ୍ର ବିରୋଧ କରିଛି ବିଜେଡି । ଆଲୋଚନା ସମୟରେ ସାଂସଦ ମାନସ ମଙ୍ଗରାଜ ବିଲ୍‌କୁ ବିରୋଧ କରିବା ସହ ଏହା ଓଡ଼ିଶା ଓ ଅନ୍ୟ ଖଣିଜ ସମ୍ପଦପୂର୍ଣ୍ଣ ରାଜ୍ୟଗୁଡ଼ିକର ସ୍ୱାର୍ଥ ବିରୋଧୀ ବୋଲି ଅଭିହିତ କରିଛନ୍ତି। ଏହା ସହ ବିଲ୍‌କୁ ସିଲେକ୍ଟ କମିଟିକୁ ପଠାଇବାକୁ ମଧ୍ୟ ସେ ଦାବି କରିଛନ୍ତି । ଆଲୋଚନାରେ ଭାଗ ନେଇ ସେ କହିଛନ୍ତି ଯେ ଓଡ଼ିଶା ଦେଶର ଅନ୍ୟତମ ପ୍ରମୁଖ ଖଣିଜ ଉତ୍ପାଦନକାରୀ ରାଜ୍ୟ୤ ଲୁହାପଥର, ବକ୍ସାଇଟ୍‌, ମାଙ୍ଗାନିଜ୍‌ ସମେତ ବିଭିନ୍ନ ଖଣିଜ ସମ୍ପଦ ଦେଶର ଶିଳ୍ପ ବିକାଶରେ ବଡ଼ ଅବଦାନ ରଖୁଛି। କିନ୍ତୁ ଖଣି ଅଞ୍ଚଳର ଲୋକମାନେ ଦୀର୍ଘଦିନ ଧରି ପରିବେଶୀୟ ଓ ସାମାଜିକ କ୍ଷତିର ବହୁମୂଲ୍ୟ ଦେଇ ଆସୁଛନ୍ତି । 

ବିଲ୍‌ରେ ଧାରା-୯ (ଡ଼ି)ର ବ୍ୟବସ୍ଥା ଅନୁସାରେ ଖଣିଜ ଅଧିକାର ଓ ଖଣିଜ ସମ୍ପଦ ଥିବା ଜମି ଉପରେ ରାଜ୍ୟ ସରକାରଙ୍କ ଦ୍ୱାରା କର, ସେସ୍‌ କିମ୍ବା ଅନ୍ୟାନ୍ୟ ଲେଭି ଲଗାଇବାର କ୍ଷମତା ଉପରେ କେନ୍ଦ୍ରୀୟ ନିୟନ୍ତ୍ରଣ ବଢ଼ିପାରେ। ଏହା ଫଳରେ ଖଣିଜ ସମୃଦ୍ଧ ରାଜ୍ୟଗୁଡ଼ିକର ଆର୍ଥିକ ସ୍ୱାୟତ୍ତତା ଓ ରାଜସ୍ୱ ସଂଗ୍ରହର କ୍ଷମତା ସୀମିତ ହେବ। ଓଡ଼ିଶା ପରି ଖଣିଜ ସମୃଦ୍ଧ ରାଜ୍ୟ ପାଇଁ ଖଣିଜ ରାଜସ୍ୱ କେବଳ ସରକାରୀ ଆୟର ଏକ ସ୍ରୋତ ନୁହେଁ। ଖଣି ପ୍ରଭାବିତ ଅଞ୍ଚଳରେ ରାସ୍ତା, ଶିକ୍ଷା, ସ୍ୱାସ୍ଥ୍ୟ, ପୁନର୍ବାସ, ଜୀବିକା ଓ ପରିବେଶ ପୁନରୁଦ୍ଧାର ଭଳି କାର୍ଯ୍ୟରେ ଏହି ରାଜସ୍ୱର ଗୁରୁତ୍ୱ ରହିଛି। ତେଣୁ ଏହି ଆର୍ଥିକ କ୍ଷେତ୍ରକୁ ସଂକୁଚିତ କରାଗଲେ ଏହାର ସିଧାସଳଖ ପ୍ରଭାବ ରାଜ୍ୟର ବିକାଶ ଓ ଖଣି ଅଞ୍ଚଳର ଲୋକଙ୍କ ଉପରେ ପଡ଼ିବ ବୋଲି ଶ୍ରୀ ମଙ୍ଗରାଜ କହିଛନ୍ତି । ସେ ପୁଣି କହିଛନ୍ତି ଯେ ବିଲ୍‌ଟି ସଂଘୀୟ ବ୍ୟବସ୍ଥାକୁ ମଧ୍ୟ ଦୁର୍ବଳ କରିବାର ଆଶଙ୍କା ରହିଛି । ଖଣିଜ ସମ୍ପଦ ସମ୍ପର୍କିତ ରାଜ୍ୟଗୁଡ଼ିକର ଆର୍ଥିକ ଓ ସାମାଜିକ ପରିସ୍ଥିତି ଭିନ୍ନ। ଓଡ଼ିଶାର ଖଣି ଅଞ୍ଚଳରେ ଆଦିବାସୀ ସମୁଦାୟ, ସ୍ଥାନୀୟ ଜନସାଧାରଣ ଓ ପରିବେଶୀୟ ସମସ୍ୟା ସହ ଜଡ଼ିତ ଅନେକ ସ୍ୱତନ୍ତ୍ର ପ୍ରସଙ୍ଗ ରହିଛି। ଏପରି ସ୍ଥିତିରେ ଗୋଟିଏ ସମାନ କେନ୍ଦ୍ରୀୟ ନୀତି ଦ୍ୱାରା ସବୁ ରାଜ୍ୟର ସମସ୍ୟା ସମାଧାନ କରିବା ବାସ୍ତବସମ୍ମତ ନୁହେଁ । ନିବେଶ ବୃଦ୍ଧି  ଓ ଇଜ୍‌ ଅଫ୍‌ ଡ଼ୁଇଂ ବିଜିନେସନ ନାମରେ ଖଣି କ୍ଷେତ୍ରର ସଂସ୍କାରକୁ ଆମେ ବିରୋଧ କରୁନାହୁଁ । ମାତ୍ର କୌଣସି ମୂଲ୍ୟରେ ରାଜ୍ୟର ନ୍ୟାୟସଙ୍ଗତ ରାଜସ୍ୱ ଅଧିକାର କିମ୍ବା ଖଣି ପ୍ରଭାବିତ ଲୋକଙ୍କ ସ୍ୱାର୍ଥ ସହ ସାଲିସ କରାଯାଇ ପାରିବ ନାହିଁ।

 ଖଣି ଉତ୍ତୋଳନ ଓ ଶିଳ୍ପ ବିକାଶକୁ ଓଡ଼ିଶା ସମର୍ଥନ କରିଆସିଛି; କିନ୍ତୁ ଖଣିଜ ସମ୍ପଦରୁ ଖଣିଜ ସମୃଦ୍ଧ ରାଜ୍ୟ ଓ ସ୍ଥାନୀୟ ଲୋକଙ୍କୁ ନ୍ୟାୟସଙ୍ଗତ ଏବଂ ଦୀର୍ଘସ୍ଥାୟୀ ଲାଭ ମିଳିବା ଆବଶ୍ୟକ। ତେଣୁ ବିଲ୍‌ଟିକୁ ତରବରିଆ ଭାବେ ପାସ୍‌ ନ କରି ରାଜ୍ୟଗୁଡ଼ିକ ସହ ବ୍ୟାପକ ପରାମର୍ଶ ଓ ସାମ୍ବିଧାନିକ ଯାଞ୍ଚ ପାଇଁ ସିଲେକ୍ଟ କମିଟିକୁ ପଠାଯିବା ଉଚିତ୍‌ ହେବ ବୋଲି ଶ୍ରୀ ମଙ୍ଗରାଜ କହିଛନ୍ତି । 

ନୂଆଦିଲ୍ଲୀ/ ଭୁବନେଶ୍ୱର: ବ୍ୟାଙ୍କିଙ୍ଗ ବ୍ୟବସ୍ଥା ଦ୍ରୁତ ଡିଜିଟାଲ ହେଉଥିବାରୁ ଆଇନଗତ ବ୍ୟବସ୍ଥାକୁ ମଧ୍ୟ ସେହି ଅନୁସାରେ ଆଧୁନିକୀକରଣ କରିବା ଆବଶ୍ୟକ ବୋଲି ରାଜ୍ୟସଭାରେ ବ୍ୟାଙ୍କର୍ସ ବୁକ୍ସ ଏଭିଡେନ୍ସ ବିଲ୍‌ ୨୦୨୬ ଉପରେ ଆଲୋଚନା ବେଳେ ପ୍ରସ୍ତାବ ଦେଇଛନ୍ତି ସାଂସଦ ମାନସ ମଙ୍ଗରାଜ। ବିଲ୍‌ ସଂକ୍ରାନ୍ତ ଆଲୋଚନାରେ ଭାଗ ନେଇ ସେ କହିଛନ୍ତି ଯେ ଏହି ବିଲ୍‌କୁ ଆମେ ସମର୍ଥନ ଜଣାଉଛୁ; ମାତ୍ର ଏହା ସହ ଡିଜିଟାଲ ବ୍ୟାଙ୍କିଙ୍ଗ ରେକର୍ଡର ସୁରକ୍ଷା, ପ୍ରାମାଣିକତା ଓ ଗୋପନୀୟତା ଉପରେ ବିଶେଷ ଗୁରୁତ୍ୱ ଦେବା ଆବଶ୍ୟକ।

ସେ କହିଛନ୍ତି ଯେ ବର୍ତ୍ତମାନ ବ୍ୟାଙ୍କର ଅଧିକାଂଶ ରେକର୍ଡ ଇଲେକ୍‌ଟ୍ରୋନିକ୍‌ ଭାବେ ସୃଷ୍ଟି ଓ ସଂରକ୍ଷିତ ହେଉଛି। ତେଣୁ ଏହି ଡିଜିଟାଲ ରେକର୍ଡକୁ ଆଇନଗତ ପ୍ରମାଣ ଭାବେ ସ୍ୱୀକୃତି ଦେବା ସମୟୋପଯୋଗୀ ପଦକ୍ଷେପ। ତେବେ ବ୍ୟାଙ୍କିଙ୍ଗ ତଥ୍ୟରେ ଗ୍ରାହକଙ୍କ ଅତ୍ୟନ୍ତ ସମ୍ବେଦନଶୀଳ ଆର୍ଥିକ ଓ ବ୍ୟକ୍ତିଗତ ସୂଚନା ରହୁଥିବାରୁ ଏହାର ଅନଧିକୃତ ବ୍ୟବହାର, ତଥ୍ୟ ଚୋରି ଓ ସାଇବର ଆକ୍ରମଣ ରୋକିବାକୁ କଡ଼ା ସୁରକ୍ଷା ବ୍ୟବସ୍ଥା ଜରୁରୀ। ଏହି ଅବସରରେ ସେ  ଡିଜିଟାଲ ରେକର୍ଡର ପ୍ରାମାଣିକତା ନେଇ ମଧ୍ୟ ସେ ଚିନ୍ତା ପ୍ରକାଶ କରିଛନ୍ତି। ଅଦାଲତରେ ଉପସ୍ଥାପିତ ରେକର୍ଡ ଯେ ପ୍ରକୃତ ଓ ଅପରିବର୍ତ୍ତିତ, ତାହା ନିଶ୍ଚିତ କରିବାକୁ ପ୍ରମାଣୀକରଣ, ସୁରକ୍ଷିତ ସଂରକ୍ଷଣ, ଟାଇମ୍‌ଷ୍ଟାମ୍ପ ଓ ଅଡିଟ୍‌ ଟ୍ରେଲ୍‌ ଭଳି ବ୍ୟବସ୍ଥା ରହିବା ଆବଶ୍ୟକ। ଏଥିସହ ବିଚାରପତି, ତଦନ୍ତକାରୀ ସଂସ୍ଥା, ବ୍ୟାଙ୍କ ଅଧିକାରୀ ଓ ଆଇନ ପ୍ରବର୍ତ୍ତନକାରୀଙ୍କୁ ଡିଜିଟାଲ ପ୍ରମାଣ ପରିଚାଳନା ନେଇ ଆବଶ୍ୟକ ପ୍ରଶିକ୍ଷଣ ପ୍ରଦାନ ମଧ୍ୟ ଆବଶ୍ୟକ। ଗ୍ରାମୀଣ ଓ ଦୁର୍ଗମ ଅଞ୍ଚଳରେ ଏବେ ବି ଅନେକ ଲୋକ ପାରମ୍ପରିକ ବ୍ୟାଙ୍କିଙ୍ଗ ସେବା ଉପରେ ନିର୍ଭରଶୀଳ ଥିବାରୁ ଡିଜିଟାଲ ବ୍ୟବସ୍ଥା ଲାଗୁ କରିବା ବେଳେ ସେମାନଙ୍କ ସମସ୍ୟାକୁ ମଧ୍ୟ ଧ୍ୟାନ ଦେବା ଆବଶ୍ୟକ ବୋଲି ଶ୍ରୀ ମଙ୍ଗରାଜ କହିଛନ୍ତି। 

ଶ୍ରୀ ମଙ୍ଗରାଜଙ୍କ ଉଦ୍‌ବେଗକୁ ଦୃଷ୍ଟିରେ ରଖି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି ଯେ  ଏହି ବିଲ୍‌ ଅନୁସାରେ ବ୍ୟାଙ୍କିଂ ରେକର୍ଡଗୁଡ଼ିକୁ ଆବଶ୍ୟକତା ଅନୁଯାୟୀ ଭୌତିକ କିମ୍ୱା ଇଲେକ୍ଟ୍ରୋନିକ୍‌ ରୂପରେ ଅଦାଲତରେ ଉପସ୍ଥାପନ କରାଯାଇପାରିବ। ଆସୁଥିବା ଏହି ନୂଆ ବିଲ୍‌ ମାଧ୍ୟମରେ ଏହି ବ୍ୟବସ୍ଥାକୁ ପୂର୍ବରୁ ହିଁ ସକ୍ଷମ କରାଯାଇଛି। ଏହି ବିଲ୍‌ ଆଇନଗତ ପ୍ରକ୍ରିୟାରେ ବ୍ୟାଙ୍କିଂ ରେକର୍ଡର ବ୍ୟବହାର ପାଇଁ ଏକ ସ୍ପଷ୍ଟ, ସୁରକ୍ଷିତ ଏବଂ ସ୍ୱଚ୍ଛ ଆଇନଗତ ଢାଞ୍ଚା ପ୍ରଦାନ କରି ସାଧାରଣ ଲୋକଙ୍କ ଆସ୍ଥାକୁ ଆହୁରି ମଜବୁତ କରିଥାଏ। ଏଥିସହିତ ଗ୍ରାହକମାନଙ୍କର ଗୋପନୀୟତା ଏବଂ ତଥ୍ୟର ଗୁପ୍ତତାକୁ ସମ୍ପୂର୍ଣ୍ଣ ଭାବେ ସୁରକ୍ଷିତ ରଖାଯାଇଛି ବୋଲି ଶୀମତୀ ସୀତାରମଣ ଆଶ୍ୱାସନା ଦେଇଛନ୍ତି।

ନୂଆଦିଲ୍ଲୀ: ଓଡ଼ିଶାରେ ଚଳିତ ଖରିଫ ଋତୁରେ କୃଷକଙ୍କ ପାଇଁ ୟୁରିଆ, ଡିଏପି ଏବଂ ଏନପିକେଏସ୍‌ ସାରର କୌଣସି ଅଭାବ ନଥିବା କେନ୍ଦ୍ର ସରକାର ସ୍ପଷ୍ଟ କରିଛନ୍ତି। ରାଜ୍ୟସଭାରେ ସାଂସଦ ମାନସ ରଞ୍ଜନ ମଙ୍ଗରାଜ ପଚାରିଥିବା ଏକ ଅଣତାରକା ପ୍ରଶ୍ନର ଉତ୍ତରରେ କେନ୍ଦ୍ର ରସାୟନ ଓ ସାର ମନ୍ତ୍ରଣାଳୟର ରାଜ୍ୟମନ୍ତ୍ରୀ ଅନୁପ୍ରିୟା ପଟେଲ ଏହି ସୂଚନା ଦେଇଛନ୍ତି। ସାଂସଦ ଶ୍ରୀ ମଙ୍ଗରାଜ ଓଡ଼ିଶା ପାଇଁ ୟୁରିଆ, ଡିଏପି ଏବଂ ଏନପିକେ ସାରର ବଣ୍ଟନ, ରାଜ୍ୟର ଚାହିଦା ପୂରଣ ହୋଇଛି କି ନାହିଁ, କୌଣସି ଅଭାବ ରିପୋର୍ଟ ହୋଇଛି କି ନାହିଁ ଏବଂ ଧାର୍ଯ୍ୟ ସମୟରେ ସାର ଯୋଗାଣ ପାଇଁ ସରକାର କେଉଁ ପଦକ୍ଷେପ ନେଇଛନ୍ତି ସେ ସମ୍ପର୍କରେ ପ୍ରଶ୍ନ କରିଥିଲେ।

କେନ୍ଦ୍ର ମନ୍ତ୍ରୀ ଶ୍ରୀମତୀ ପଟେଲ୍‌  ସଂସଦରେ ଦେଇଥିବା ତଥ୍ୟ ଅନୁଯାୟୀ, ୧ ଏପ୍ରିଲ୍‌ ୨୦୨୬ରୁ ୨୯ ଜୁଲାଇ ୨୦୨୬ ପର୍ଯ୍ୟନ୍ତ ଓଡ଼ିଶାରେ ସମସ୍ତ ପ୍ରମୁଖ ସାରର ଉପଲବ୍ଧତା ରାଜ୍ୟର ଆବଶ୍ୟକତାଠାରୁ ଅଧିକ ରହିଛି। ୟୁରିଆର ଆବଶ୍ୟକତା ୩.୧୧ ଲକ୍ଷ ମେଟ୍ରିକ ଟନ୍‌ ଥିବା ବେଳେ ୪.୪୭ ଲକ୍ଷ ମେଟ୍ରିକ ଟନ୍‌ ସାରା ଉପଲବ୍ଧ କରାଯାଇଛି। ଏହାସହିତ ଡିବିଟି ମାଧ୍ୟମରେ ୨.୦୮ ଲକ୍ଷ ମେଟ୍ରିକ ଟନ୍‌ ବିକ୍ରି କରାଯାଇଥିବା ବେଳଏ ୨୯ ଜୁଲାଇ ସୁଦ୍ଧା  ଅବଶିଷ୍ଟ ୨.୪୦ ଲକ୍ଷ ମେଟ୍ରିକ ଟନ୍‌ ମହଜୁଦ୍‌ ରହିଛି। ସେହିପରି ଡିଏପିର ଆବଶ୍ୟକତା ୧.୩୯ ଲକ୍ଷ ମେଟ୍ରିକ ଟନ୍‌ ଓ ଉପଲବ୍ଧ ପରିମାଣ ୧.୬୨ ଲକ୍ଷ ମେଟ୍ରିକ ଟନ୍‌ ରହିଛି। ୦.୯୬ ଲକ୍ଷ ମେଟ୍ରିକ ଟନ୍‌ ବିକ୍ରି ହେବା ସହ ୦.୬୬ ଲକ୍ଷ ମେଟ୍ରିକ ଟନ୍‌ ମହଜୁଦ ଅଛି। ଏନପିକେଏସ୍‌ର ଆବଶ୍ୟକତା ୧.୯୦ ଲକ୍ଷ ମେଟ୍ରିକ ଟନ ଥିବା ବେଳେ ୨.୨୯ ଲକ୍ଷ ମେଟ୍ରିକ ଟନ ଉପଲବ୍ଧ ରହିଛି। ୧.୦୧ ଲକ୍ଷ ମେଟ୍ରିକ ଟନ୍‌ ବିକ୍ରି ହୋଇ ସାରିଥିବା ବେଳେ ଅବଶିଷ୍ଟ ୧.୨୯ ଲକ୍ଷ ମେଟ୍ରିକ ଟନ୍‌ ମହଜୁଦ୍‌ ରହିଛି। 

କେନ୍ଦ୍ର ସରକାର କହିଛନ୍ତି, ସାରର ଉପଲବ୍ଧତା ଆବଶ୍ୟକତାଠାରୁ ଅଧିକ ଥିବା ଏବଂ ଉପଲବ୍ଧତା ବିକ୍ରିଠାରୁ ମଧ୍ୟ ଅଧିକ ରହିଛି। ଓଡ଼ିଶାରେ ସାରର ସ୍ଥିତି ସନ୍ତୋଷଜନକ ରହିଛି ଓ କୌଣସି ଅଭାବର ରିପୋର୍ଟ ନାହିଁ ବୋଲି କୁହାଯାଇଛି। ଏହା ବ୍ୟତୀତ ଚାଷୀଙ୍କ ଆବଶ୍ୟକତାକୁ ଧ୍ୟାନରେ ରଖି ସମୟସୀମା ଅନୁଯାୟୀ ପର୍ଯ୍ୟାପ୍ତ ସାର ଯୋଗାଇ ଦିଆଯାଇଛି। ସମୟମତେ ସାର ଯୋଗାଣ ପାଇଁ କେନ୍ଦ୍ର ସରକାର ୬ଟି ପ୍ରମୁଖ ପଦକ୍ଷେପ ଗ୍ରହଣ କରୁଛନ୍ତି ବୋଲି ମନ୍ତ୍ରୀ କହିଛନ୍ତି। ଚାହିଦା ଅନୁଯାୟୀ ସାର ଯୋଗାଣ ସୁନିଶ୍ଚିତ କରାଯାଇଥିବାରୁ କୃଷକମାନେ ସାର ଅଭାବର ସମ୍ମୁଖୀନ ହୋଇନାହାନ୍ତି ବୋଲି ସଂସଦରେ ସରକାର ସ୍ପଷ୍ଟ କରିଛନ୍ତି। ଏହା ସହ ଆଗାମୀ ଦିନରେ ମଧ୍ୟ କେନ୍ଦ୍ର ଓ ରାଜ୍ୟ ସରକାରଙ୍କ ସମନ୍ୱରେ ସାର ଯୋଗାଣ ବ୍ୟବସ୍ଥାକୁ ଆହୁରି ସୁଦୃଢ଼ ରଖାଯିବ ବୋଲି ସରକାର ସୂଚନା ଦେଇଛନ୍ତି।

ଭୁବନେଶ୍ୱର: ଓଡ଼ିଶାରେ ସାର ଉତ୍ପାଦନକୁ ସୁଦୃଢ଼ କରିବା ଦିଗରେ କେନ୍ଦ୍ର ସରକାର ତାଳଚେରରେ ଏକ ନୂତନ ଗ୍ରୀନଫିଲ୍ଡ ୟୁରିଆ କାରଖାନା ସ୍ଥାପନ କରୁଛନ୍ତି। ଫର୍ଟିଲାଇଜର କର୍ପୋରେସନ ଅଫ୍‌ ଇଣ୍ଡିଆ ଲିମିଟେଡ୍‌ର ତାଳଚେର ୟୁନିଟ୍‌ର ପୁନଃକାର୍ଯ୍ୟକ୍ଷମ ପରେ ଯୁଗ୍ମ ଉଦ୍ୟମ (ଜଏଣ୍ଟ ଭେଞ୍ଚର) ମାଧ୍ୟମରେ ତାଳଚେର ଫର୍ଟିଲାଇଜର ଲିମିଟେଡ୍‌ (ଟିଏଫ୍‌ଏଲ୍‌) ପକ୍ଷରୁ ବର୍ଷକୁ ୧୨.୭ ଲକ୍ଷ ମେଟ୍ରିକ ଟନ୍‌ ୟୁରିଆ ଉତ୍ପାଦନ କ୍ଷମତା ବିଶିଷ୍ଟ ନୂତନ କାରଖାନା ନିର୍ମାଣ କରାଯାଉଛି ବୋଲି ରାଜ୍ୟସଭାରେ ସାଂସଦ ମାନସ ରଞ୍ଜନ ମଙ୍ଗରାଜଙ୍କ ଏକ ଅଣତାରକା ପ୍ରଶ୍ନର ଉତ୍ତର ଦେଇ ରସାୟନ ଓ ସାର ମନ୍ତ୍ରଣାଳୟର ରାଜ୍ୟମନ୍ତ୍ରୀ ଅନୁପ୍ରିୟା ପଟେଲ ଏହି ସୂଚନା ଦେଇଛନ୍ତି।

ସାଂସଦ ଶ୍ରୀ ମଙ୍ଗରାଜ ରାଜ୍ୟସଭାରେ ଓଡ଼ିଶାରେ ସାର ଉତ୍ପାଦନ ୟୁନିଟ୍‌ ସ୍ଥାପନ କିମ୍ୱା ପୁରୁଣା ସାର କାରଖାନାର ପୁନଃରୁଦ୍ଧାର ପାଇଁ ସରକାରଙ୍କର କୌଣସି ପ୍ରସ୍ତାବ ରହିଛି କି? ଯଦି ହଁ, ତେବେ ସେହି ପ୍ରସ୍ତାବଗୁଡ଼ିକର ବିସ୍ତୃତ ବିବରଣୀ ପ୍ରଦାନ କରିବାକୁ ପ୍ରଶ୍ନ କରିଥିଲେ। ଏହାସହ ସେହି ପ୍ରସ୍ତାବଗୁଡ଼ିକର ବର୍ତ୍ତମାନ ସ୍ଥିତି, ଏହି ପ୍ରକଳ୍ପଗୁଡ଼ିକ ଦ୍ୱାରା କେତେ ପରିମାଣରେ ରୋଜଗାର ସୁଯୋଗ ସୃଷ୍ଟି ହେବାର ସମ୍ଭାବନା ରହିଛି ଆଦି ଜଣାଇବାକୁ ପ୍ରଶ୍ନ କରିଥିଲେ।  ଏହାର ଉତ୍ତରରେ ମନ୍ତ୍ରୀ କହିଛନ୍ତି, ୩୦ ଜୁନ୍‌ ୨୦୨୬ ସୁଦ୍ଧା ପ୍ରକଳ୍ପର ସାମଗ୍ରିକ ଅଗ୍ରଗତି ୭୨.୫୬ ପ୍ରତିଶତରେ ପହଞ୍ଚିଛି। ଏହି ପ୍ରକଳ୍ପର ନିର୍ମାଣ ପର୍ଯ୍ୟାୟରେ ଅଣକୁଶଳୀ, ଅର୍ଦ୍ଧକୁଶଳୀ, କୁଶଳୀ ଶ୍ରମିକଙ୍କ ସହ ଅଭିଜ୍ଞ ବୃତ୍ତିଗତ କର୍ମଚାରୀଙ୍କ ପାଇଁ ରୋଜଗାର ସୁଯୋଗ ସୃଷ୍ଟି ହେଉଥିବା ସରକାର ସୂଚନା ଦେଇଛନ୍ତି।

ଅନ୍ୟପକ୍ଷରେ ଫସଫେଟିକ ଓ ପୋଟାସିକ ସାର କ୍ଷେତ୍ରରେ ୧ ଏପ୍ରିଲ୍‌ ୨୦୧୦ରୁ ପୋଷକ ଭିତ୍ତିକ ସବସିଡି ଯୋଜନା କାର୍ଯ୍ୟକାରୀ ରହିଛି। ଏହି ଯୋଜନା ଅନୁସାରେ ‘ପିଏଣ୍ଡକେ’ ସାର ଓପେନ୍‌ ଜେନେରାଲ୍‌ ଲାଇସେନ୍ସ ଅଧୀନରେ ରହିଥିବାରୁ କମ୍ପାନୀମାନେ ନିଜ ବ୍ୟବସାୟିକ ଆବଶ୍ୟକତା ଓ ରଣନୀତି ଅନୁଯାୟୀ ସାର ଆମଦାନି, ଉତ୍ପାଦନ କିମ୍ୱା ନୂତନ କାରଖାନା ସ୍ଥାପନ ଏବଂ ପୁରୁଣା କାରଖାନାର ପୁନରୁଦ୍ଧାର କରିବାର ବ୍ୟବସ୍ଥା ରହିଛି ବୋଲି ମନ୍ତ୍ରୀ ସୂଚନା ଦେଇଛନ୍ତି।

ଭୁବନେଶ୍ୱର: ମାନସ ମଙ୍ଗରାଜଙ୍କୁ ବିଜେଡି ପକ୍ଷରୁ ନୂଆ ଦାୟିତ୍ୱ । ରାଜ୍ୟସଭାରେ ବିଜେଡିର ସଂସଦୀୟ ଦଳ ନେତା ହେଲେ ମାନସ ରଞ୍ଜନ ମଙ୍ଗରାଜ । ସେହିଭଳି ସୁଲତା ଦେଓଙ୍କୁ ବିଜେଡି ସଂସଦୀୟ ଦଳର ଉପନେତା ସହ ମୁଖ୍ୟ ସଚେତକର ଦାୟିତ୍ୱ ମିଳିଛି। ମାନସ ରଞ୍ଜନ ମଙ୍ଗରାଜ ଏବେ ମୁଖ୍ୟ ସଚେତକ ଦାୟିତ୍ୱରେ ଥିବାବେଳେ ପୂର୍ବରୁ ସୁଲତା ଦେଓ ମୁଖ୍ୟ ସଚେତକ ଦାୟିତ୍ୱ ତୁଲାଇ ଥିଲେ। ଏହି ଦୁଇ ଜଣଙ୍କ ଚୟନକୁ ଅନୁମୋଦନ ଦେବାକୁ ରାଜ୍ୟସଭା ଅଧ୍ୟକ୍ଷଙ୍କୁ ଚିଠି ଲେଖିଛନ୍ତି ବିଜେଡି ସଭାପତି ନବୀନ ପଟ୍ଟନାୟକ। 

ଭୁବନେଶ୍ୱର: ରାଜ୍ୟରେ ବିମାନ ସଂଯୋଗୀକରଣର ଆଶାନୁରୂପକ ସଫଳତା ମିଳିପାରୁ ନାହିଁ। ବିଶେଷକରି ଦକ୍ଷିଣ ଓଡ଼ିଶାରେ ବିମାନ ସଂଯୋଗୀକରଣ ସ୍ଥିତି ଅତ୍ୟନ୍ତ ଖରାପ ହେବାରୁ ଅସୁବିଧା ସୃଷ୍ଟି ହେଉଛି। ଅଧିକାଂଶ ପ୍ରକଳ୍ପ ଆଗକୁ ଯାଇ ପାରୁ ନାହିଁ। ଯାହାକୁ ନେଇ ଉଦ୍‌ବେଗ ପ୍ରକାଶ କରିଛନ୍ତି ରାଜ୍ୟସଭା ସାଂସଦ ମାନସ ରଞ୍ଜନ ମଙ୍ଗରାଜ। ଏହାକୁ ନେଇ ଶ୍ରୀ ମଙ୍ଗରାଜ ରାଜ୍ୟସଭାରେ ବେସାମରିକ ବିମାନ ଚଳଚଳ ମନ୍ତ୍ରୀ ମୁରଲୀଧର ମୋହୋଲଙ୍କୁ ପ୍ରଶ୍ନ କରିଛନ୍ତି ଯେ ଦକ୍ଷିଣ ଓଡ଼ିଶାରେ ଦୁର୍ବଳ ବିମାନ ସଂଯୋଗୀକରଣ, ଜରୁରୀକାଳୀନ ଚିକିତ୍ସା ଜନିତ ସ୍ଥାନାନ୍ତର, ବିପର୍ଯ୍ୟୟ ପ୍ରତିକ୍ରିୟା (ବିଶେଷକରି ଉପକୂଳ ଜିଲ୍ଲାଗୁଡ଼ିକରେ ଘୂର୍ଣ୍ଣିଝଡ଼) ଏବଂ ବାମପନ୍ଥୀ ଉଗ୍ରବାଦ ପ୍ରଭାବିତ ଜିଲ୍ଲାଗୁଡ଼ିକରେ ବିକାଶକୁ ପ୍ରଭାବିତ କରେ ବୋଲି ସରକାର ସ୍ୱୀକାର କରୁଛନ୍ତି କି ନାହିଁ। ଓଡ଼ିଶା ରାଜ୍ୟର ପଛୁଆ ଏବଂ ଆଦିବାସୀ ବହୁଳ ଜିଲ୍ଲାଗୁଡ଼ିକ ପାଇଁ କୌଣସି ସ୍ୱତନ୍ତ୍ର ବିମାନ ଚଳାଚଳ ପ୍ୟାକେଜ୍‌ ବିଚାର କରାଯାଉଛି କି। ଏହାସହ ରାଜ୍ୟର ସମସ୍ତ ଅଞ୍ଚଳରେ ସମାନ ଆଞ୍ଚଳିକ ବିମାନ ସଂଯୋଗୀକରଣ ସୁନିଶ୍ଚିତ କରିବା ପାଇଁ ଅବଶ୍ୟକୀୟ ସମୟସୀମା ରହିଛି କି ନାହିଁ। 

ଏହାର ଉତ୍ତରରେ ମନ୍ତ୍ରୀ ଶ୍ରୀ ମୋହୋଲ କହିଛନ୍ତି, ଆର୍‌ସି ସୁଦାନ ଯୋଜନା ଅଧୀନରେ ସରକାର ଓଡ଼ିଶାରେ ଆଞ୍ଚଳିକ ବିମାନ ସଂଯୋଗକୁ ବୃଦ୍ଧି କରୁଛନ୍ତି। ଝାରସୁଗୁଡ଼ା, ରାଉରକେଲା, ଉତ୍କେଲା ଏବଂ ଜୟପୁର ଭଳି ଚାରିଟି ବିମାନବନ୍ଦରକୁ କାର୍ଯ୍ୟକ୍ଷମ କରାଯାଇଛି। ଏହା ବ୍ୟତୀତ, ରଙ୍ଗେଇଲୁଣ୍ଡା, ଅମର୍ଦ୍ଦା ଏବଂ ରାଇରଙ୍ଗପୁର ବିମାନ ବନ୍ଦରଗୁଡ଼ିକୁ ବିକାଶ ପାଇଁ ଚିହ୍ନଟ କରାଯାଇଛି। ଏପର୍ଯ୍ୟନ୍ତ ରାଜ୍ୟରେ ୩୨ଟି ଆର୍‌ସିଏସ୍‌ ରୁଟ୍‌ କାର୍ଯ୍ୟକ୍ଷମ ହୋଇଛି। ଭିଜିଏଫ୍‌ ଭାବରେ ୨୧୫ କୋଟି ଟଙ୍କା ପ୍ରଦାନ କରାଯାଇଛି। ଅନୁଗୋଳ, ବଡ଼ବିଲ, ବିରାସାଲ, ଗୁଡ଼ାରି, ହୀରାକୁଦ, ଜୟପୁର, ଲାଞ୍ଜିଗଡ଼, ନୱାପାରା, ପଦମ୍‌ପୁର, ରାଇସୁଆଁ, ସୁକିନ୍ଦା, ଥେରୁବାଲି, ତୁଷରା, ମାଲକାନଗିରି, ବାରିପଦା ଏବଂ କୋଣାର୍କ ସମେତ ଅନେକ ବିମାନ ବନ୍ଦରକୁ ‘ଉଡ଼ାନ’ ଯୋଜନା ଅଧୀନରେ ଅଣସେବାପ୍ରାପ୍ତ ବିମାନ ବନ୍ଦର ଭାବରେ ତାଲିକାଭୁକ୍ତ କରାଯାଇଛି। ଏହି ଯୋଜନା ଅଧୀନରେ ବିମାନ ବିଡ୍‌ ଆଧାରରେ ରୁଟ୍‌ ଗୁଡ଼ିକୁ ବିଚାର କରାଯାଇପାରିବ। ‘ଉଡ଼ାନ୍' ଅଧୀନରେ ସଂଯୋଗୀକରଣର ବିସ୍ତାର ଚାଲୁଥିବା ଏବଂ ଚାହିଦା-ଚାଳିତ ପ୍ରକ୍ରିୟା, ଯାହା ଜମିର ଉପଲବ୍ଧତା, ଭିତ୍ତିଭୂମି, ନିୟାମକ ଅନୁମୋଦନ ଏବଂ ବିମାନ ଯୋଗଦାନ ଉପରେ ନିର୍ଭର କରେ। ସରକାର ୧୨୦ଟି ନୂତନ ଗନ୍ତବ୍ୟସ୍ଥଳକୁ ସଂଯୋଗ କରିବା, ଆଗାମୀ ୧୦ ବର୍ଷ ମଧ୍ୟରେ ୪ କୋଟି ଯାତ୍ରୀଙ୍କୁ ସେବା ଯୋଗାଇବା ଏବଂ ପାହାଡ଼ିଆ, ଆକାଂକ୍ଷୀ ଏବଂ ଉତ୍ତର-ପୂର୍ବ କ୍ଷେତ୍ର ଜିଲ୍ଲାଗୁଡ଼ିକରେ ହେଲିପ୍ୟାଡ୍‌ ଏବଂ ଛୋଟ ବିମାନବନ୍ଦରକୁ ସମର୍ଥନ କରିବା ପାଇଁ ଏକ ସଂଶୋଧିତ ଉଡ଼ାନ୍‌ ଯୋଜନା ମଧ୍ୟ ଘୋଷଣା କରିଛନ୍ତି। ଏହି ଯୋଜନା ବର୍ତ୍ତମାନ ଅନୁମୋଦନ ପର୍ଯ୍ୟାୟରେ ରହିଛି ବୋଲି ମନ୍ତ୍ରୀ ଶ୍ରୀ ମୋହୋଲ ରାଜ୍ୟସଭାରେ ସୂଚନା ଦେଇଛନ୍ତି। 

ଭୁବନେଶ୍ୱର: ରାଜ୍ୟସଭା ନିର୍ବାଚନରେ ବିଜେପି ସମର୍ଥିତ ପ୍ରାର୍ଥୀ  ସ୍ୱାଧୀନ ପ୍ରାର୍ଥୀଙ୍କ ବିଜୟ ପରେ ରାଜ୍ୟର ଦୁଇ ପୁରୁଖା ନେତା ବିଜୟ ମହାପାତ୍ର ଓ  ପ୍ରଭାତ ତ୍ରିପାଠୀଙ୍କ ଉଲ୍ଲାସକୁ ନେଇ କଟାକ୍ଷ କରିଛି ବିଜେଡି।  ୧୯୯୫ ମସିହାରେ ବିଜୁ ଦ୍ୱିତୀୟ ଥର ପାଇଁ ମୁଖ୍ୟମନ୍ତ୍ରୀ ଓ ୧୯୯୬ ମସିହାରେ ଦେଶର ପ୍ରଧାନମନ୍ତ୍ରୀ ଭାବେ ଦାୟିତ୍ୱ ନେବାର ସୁଯୋଗକୁ ଭଣ୍ଡୁର କରିବାରେ ଯେଉଁ ଚକ୍ରାନ୍ତ ହୋଇଥିଲା, ସେଥିରେ ଏଇ ଦୁଇ ନେତାଙ୍କ ସମ୍ପୃକ୍ତି ଥିଲା ବୋଲି ବିଜେଡି ଅଭିଯୋଗ କରିଛି। ଏହା ସହ ସମ୍ପ୍ରତି ଜନ ଆକ୍ରୋଶରୁ ନିଜକୁ ରକ୍ଷା କରିବାକୁ କଳଙ୍କିତ ନେତାମାନେ ବିଜୁ ଲିଗାସୀକୁ ଢ଼ାଲ କରିଛନ୍ତି ବୋଲି ମଧ୍ୟ ବିଜେଡି କଟାକ୍ଷ କରିଛି। ଶଙ୍ଖ ଭବନରେ ସୋମବାର ଆୟୋଜିତ ସାମ୍ୱାଦିକ ସମ୍ମିଳନୀରେ ବିଜେଡି ବିଧାୟକ ଦଳର ମୁଖ୍ୟ ସଚେତକ ପ୍ରମିଳା ମଲ୍ଲିକ, ବିଧାୟକ ବ୍ୟୋମକେଶ ରାୟ ଓ ଧ୍ରୁବ ଚରଣ ସାହୁ ପ୍ରମୁଖ ବିଜୟ ଓ ପ୍ରଭାତଙ୍କ ରାଜନୈତିକ ଇତିହାସ ଗଣମାଧ୍ୟମ ସମ୍ମୁଖରେ ବର୍ଣ୍ଣନା କରିଛନ୍ତି ।   ବ୍ୟୋମକେଶ ରାୟ କହିଛନ୍ତି ଯେ୧୯୯୫ ମସିହାରେ ବିଜୁ ପଟ୍ଟନାୟକଙ୍କ ସପକ୍ଷରେ ହାୱା ଥିବାବେଳେ ଓ ସେ ଲଗାତର ଭାବେ ଦ୍ୱିତୀୟ ଥର ପାଇଁ ମୁଖ୍ୟମନ୍ତ୍ରୀ ହେବା ନିଶ୍ଚିତ ବୋଲି ବିଚାର କରାଯାଉଥିଲା। ସେତେବେଳେ ନିଜ ଉଚ୍ଚକାଂକ୍ଷା ପୂରଣ ପାଇଁ ବିଜୟ ମହାପାତ୍ର ଓ ତାଙ୍କର ତତ୍‌କାଳୀନ ସହଯୋଗୀ ପ୍ରଭାତ ତ୍ରିପାଠୀ ଅନେକ ସ୍ଥାନରେ ସମାନ୍ତରାଳ ପ୍ରାର୍ଥୀ ଦେଇ ବିଜୁଙ୍କ ଦ୍ୱିତୀୟବାର ମୁଖ୍ୟମନ୍ତ୍ରିତ୍ୱ ପଥରେ ପ୍ରତିବନ୍ଧକ ସାଜିଥିଲେ। ଦଳକୁ ପରାଜୟର ସ୍ୱାଦ ଚଖାଇଥିଲେ। ୧୯୯୬ ମସିହାରେ ବିଜୁ ବାବୁ ଦେଶର ପ୍ରଧାନମନ୍ତ୍ରୀ ହେବାର ସୁଯୋଗ ସୃଷ୍ଟି ହୋଇଥିଲା; ମାତ୍ର ଓଡ଼ିଶାର କିଛି ନେତା ତାଙ୍କୁ ପ୍ରଧାନମନ୍ତ୍ରୀ କରାଇ ନଦେବା ପାଇଁ ଏକ ଚକ୍ରାନ୍ତ ରଚିଥିଲେ, ସେତେବେଳର ସେହି କୁଚକ୍ରୀ ଗୋଷ୍ଠୀଙ୍କ ମଧ୍ୟରେ ଏହି ଦୁଇ ନେତା ମଧ୍ୟ ସାମିଲ ଥିଲେ ବୋଲି ବ୍ୟୋମକେଶ କହିଛନ୍ତି । 

 ଧ୍ରୁବ ଚରଣ ସାହୁ କହିଛନ୍ତି ଯେ ବିଜୁ ବାବୁଙ୍କ ବିରୋଧରେ ଚକ୍ରାନ୍ତ ରଚୁଥିବା ନେତାମାନେ ଆଜି ବିଜୁ ଲିଗାସୀ କଥା କହୁଛନ୍ତି । ନବୀନ ନିବାସରେ ପ୍ରଭାତ ବିଶ୍ୱାଳଙ୍କ ବିଶୃଙ୍ଖଳିତ ଆଚରଣ ପ୍ରାୟୋଜନ ପଛରେ ବିଜୟ ମହାପାତ୍ରଙ୍କ ହାତ ଥିଲା ଓ ପ୍ରଭାତ ତ୍ରିପାଠୀ ସେଥିରେ ସାମିଲ ଥିଲେ। ସମ୍ପୂର୍ଣ୍ଣ ଘଟଣାର ନକ୍ସା ବିଜୟ ମହାପାତ୍ର ପ୍ରସ୍ତୁତ କରିଥିଲେ । କ୍ରସ ଭୋଟିଂ ପାଇଁ ବିପୁଳ ଟଙ୍କା କାରବାର ହୋଇଛି ଏବଂ  ଲୋକ ଆକ୍ରୋଶରୁ ରକ୍ଷା ପାଇବା ନିମନ୍ତେ ବିଜୁ ଲିଗାସୀକୁ ଏମାନେ ଢ଼ାଲ କରିଛନ୍ତି । ଯଦି ଏମାନେ ବିଜୁ ଲିଗାସୀକୁ ଏତେ ଆଦର କରନ୍ତି, ତେବେ ଗତ ଦୁଇ ବର୍ଷ ଧରି ବିଜୁ ପଟ୍ଟନାୟକଙ୍କ ନାଁ ଲିଭାଇ ଦେବାକୁ ସରକାରୀସ୍ତରରେ ପ୍ରାୟୋଜିତ ଷଡ଼ଯନ୍ତ୍ର ସମୟରେ ଏମାନେ କାହିଁକି ଚୁପ୍‌ ଥିଲେ ବୋଲି ଧ୍ରୁବ ପ୍ରଶ୍ନ କରିଛନ୍ତି ।  ସେ ଆହୁରି ମଧ୍ୟ କହିଛନ୍ତି ଯେ  ତିନି ମାସ ତଳୁ ବିଜୁ ଜନତା ଦଳକୁ ଭାଙ୍ଗିବା ପାଇଁ ଚକ୍ରାନ୍ତ କରାଯାଇଥିବା ବିଜୟ ମହାପାତ୍ରଙ୍କ ମନ୍ତବ୍ୟରୁ ସ୍ପଷ୍ଟ।  ବିଜୁ ବାବୁଙ୍କ ବିରୋଧରେ ଚକ୍ରାନ୍ତ କରିଥିବା ଲୋକ ନବୀନଙ୍କ ବିରୋଧରେ ଚକ୍ରାନ୍ତ ରଚୁଛନ୍ତି। ୧୯୯୨ ମସିହାରେ ମଦ ମୃତ୍ୟୁ ମାମଲାରେ ମୁଖ୍ୟତଃ ବିଜୟ ମହାପାତ୍ର ଓ ପ୍ରଭାତ ତ୍ରିପାଠୀ ସମ୍ପୃକ୍ତ ଥିଲେ। ମଦ ମୃତ୍ୟୁ ଘଟଣାରେ ନିଜକୁ ରକ୍ଷା କରିବା ପାଇଁ ବିଜୟଙ୍କ ପ୍ରରୋଚନାରେ ପ୍ରଭାତ କ୍ରସ ଭୋଟିଂ କରିଥିଲେ। ବିଜୁ ବାବୁ ଏଥିରେ କ୍ଷୁବ୍ଧ ହୋଇଥିଲେ ଓ ବିଜୟଙ୍କୁ ମୁଖ୍ୟ ସଚେତକ ପଦରୁ ବିଦା କରିଥିଲେ ଓ ପ୍ରଭାତଙ୍କୁ ନିଲମ୍ବିତ କରିଥିଲେ। ଦଳରେ ବିଶୃଙ୍ଖଳା ସୃଷ୍ଟି କରିବା ପାଇଁ ପ୍ରଭାତ ଦୁଇ ଦୁଇ ଥର ନିଲମ୍ବିତ ହୋଇଥିଲେ । ମଦ ମୃତ୍ୟୁର ପାପ  ବୋଝକୁ ଦୁହେଁ ଏଯାଏ ବୋହି ଚାଲିଛନ୍ତି । ତେଣୁ ସଇତାନର ବେଦପାଠ ପରି ଏବେ ଏମାନେ ବିଜୁ ଲିଗାସୀ କଥା କହୁଛନ୍ତି ବୋଲି ଧ୍ରୁବ କହିଛନ୍ତି। 

ପ୍ରମିଳା ମଲ୍ଲିକ କହିଛନ୍ତି ଯେ ରାଜ୍ୟସଭା ନିର୍ବାଚନ ପରେ କିଛି ନେତା ବିଜୁ ଲିଗାସୀ ବିଷୟରେ କହୁଛନ୍ତି । 
ଯେଉଁମାନେ ଆଜି ବିଜୁ ବାବୁଙ୍କ ଲିଗାସୀ କଥା କହୁଛନ୍ତି, ସେହିମାନେ ବିଜୁଙ୍କୁ ପ୍ରଧାନମନ୍ତ୍ରୀ କରେଇ ନଦେବା ଚକ୍ରାନ୍ତରେ ସାମିଲ ଥିଲେ। କ୍ରସ ଭୋଟିଂ କରିଥିବା ବିଧାୟକ ମାନେ କେବଳ ଟିକେଟ ନେଇ କ୍ଷମତା ଉପଭୋଗ କରିବା ପାଇଁ ବିଜୁ ଜନତା ଦଳରେ ଥିଲେ। ସେମାନଙ୍କୁ ନିଲମ୍ବିତ କରି ନବୀନ ବାବୁ ଉଚିତ ପଦକ୍ଷେପ ନେଇଛନ୍ତି । ଜନ ଆକ୍ରୋଶରୁ ରକ୍ଷା ପାଇବା ପାଇଁ, ବିଜୁ ଲିଗାସୀ କଥା କହୁଛନ୍ତି। ଯଦି ସେମାନଙ୍କର ସତ ସାହସ ଅଛି, ନିଜ ବିଧାୟକ ପଦରୁ ଇସ୍ତଫା ଦେଇ ସାନି ନିର୍ବାଚନ ଲଢ଼ନ୍ତୁ। ସେମାନଙ୍କ ବିଧାୟକ ପଦକୁ ରଦ୍ଦ କରିବା ପାଇଁ ବିଜୁ ଜନତା ଦଳ ଆଇନଗତ ପଦକ୍ଷେପ ନେବ ବୋଲି ଶ୍ରୀମତୀ ମଲ୍ଲିକ କହିଛନ୍ତି । 

ନୂଆଦିଲ୍ଲୀ: ଲୋକସଭା ପରେ ରାଜ୍ୟ ସଭାରେ ୱାକଫ୍ ବିଲ୍ ପାସ୍ । ବିଲ୍ ସପକ୍ଷରେ ୧୨୮ଟି ଭୋଟ୍ ପଡ଼ିଥିବା ବେଳେ ବିପକ୍ଷରେ ୯୫ଟି ଭୋଟ୍ ପଡ଼ିଥିଲା। ସଂଖ୍ୟାଲଘୁ ବ୍ୟାପାର ମନ୍ତ୍ରୀ କିରଣ ରିଜଜୁ ରାଜ୍ୟସଭାରେ ଏହି ବିଲ୍ ଆଗତ କରିଥିଲେ। ଦୀର୍ଘ ୧୨ ଘଣ୍ଟା ଧରି ଆଲୋଚନା ପରେ ରାଜ୍ୟସଭାରେ ବିଲ୍ ପାସ୍ ହୋଇଛି । ଏହାସହିତ ସଂସଦ ଏହି ବିଲକୁ ଅନୁେମାଦନ କରିଛି । ଏବେ ଏହି ବିଲ ରାଷ୍ଟ୍ରପତିଙ୍କ ପାଖକୁ ଯିବ । ସେ ଦସ୍ତଖତ କରିବା ପରେ ଏହା ଆଇନରେ ପରିଣତ ହୋଇଯିବ । ଦୀର୍ଘ ସମୟ ଧରି ଆଲୋଚନା ପରେ ଗତକାଲି ରାତିର ତୃତୀୟ ପ୍ରହରରେ ବିଲ୍‌ ଉପରେ ମତଦାନ କରାଯାଇଥିଲା । ବିଲ୍ ସପକ୍ଷରେ ୧୨୮ ସାଂସଦ ମତଦାନ କରିଥିବା ବେଳେ ୯୫ ସାଂସଦ ଏହାର ବିରୋଧ କରିଥିଲେ ।

ଆଲୋଚନା ବେଳେ ସରକାର ଏହି ବିଲ୍ ସପକ୍ଷରେ ଦୃଢ଼ ଯୁକ୍ତି ଦର୍ଶାଇଥିବା ବେଳେ ବିରୋଧୀ ଦଳ ଏହାର ଜୋରଦାର ବିରୋଧ କରିଥିଲେ । ରାଜ୍ୟସଭାରେ ବିଲ୍ ଆଗତ କରିଥିବା କେନ୍ଦ୍ର ସଂଖ୍ୟାଲଘୁ ବ୍ୟାପାର ମନ୍ତ୍ରୀ କିରଣ ରିଜିଜୁ ଆେଲାଚନାର ଉତ୍ତର ମଧ୍ୟ ଦେଇଥିଲେ । ସେ କହିଥିଲେ ଯେ ସଂଶୋଧିତ ୱାକଫ୍ ଆଇନ ମୁସଲମାନଙ୍କ ଧାର୍ମିକ ଅଧିକାର ଛଡ଼ାଇ ନେବ ବୋଲି ଯାହା କୁହାଯାଉଛି, ତାହା ଠିକ୍ ନୁହେଁ । ବିରୋଧୀ ଦଳ କେବଳ ବିଭ୍ରାନ୍ତି ସୃଷ୍ଟି କରୁଛନ୍ତି । ମୁସଲିମ ସଂପ୍ରଦାୟର ସ୍ବାର୍ଥର ସୁରକ୍ଷା ସହିତ ମୁସଲିମ ମହିଳା ସଶକ୍ତୀକରଣ ହେଉଛି ଏହାର ମୁଖ୍ୟ ଉଦ୍ଦେଶ୍ୟ । ସେ କହିଲେ ଯେ ୱାକଫ୍ ସଂପତ୍ତିର ସୁପରିଚାଳନା ଲାଗି ୱାକଫ ବୋର୍ଡ ଓ ପରିଷଦରେ ଅଣ ମୁସଲିମଙ୍କୁ ସଭ୍ୟ ରଖାଯାଇଛି । ବୋର୍ଡ/ପରିଷଦରେ ଏମାନଙ୍କ ସଂଖ୍ୟା ସୀମିିତ ରହିବ । ଅଧିକାଂଶ ସଭ୍ୟ ମୁସଲିମ ସଂପ୍ରଦାୟରୁ ହିଁ ରହିବେ । ସେମାନଙ୍କ ଧାର୍ମିକ କାର୍ଯ୍ୟରେ ହସ୍ତକ୍ଷେପ କରାଯିବାର ପ୍ରଶ୍ନ ଉଠୁନାହିଁ ।

କିନ୍ତୁ ସରକାରଙ୍କ ଯୁକ୍ତି ସହ ସହମତ ହୋଇନାହାନ୍ତି ବିରୋଧୀ । ବିଲ୍‌ର ଜୋରଦାର ବିରୋଧ କରି ବିରୋଧୀ ଦଳର ସଭ୍ୟମାନେ କହିଥିେଲ ଯେ ସମାଜରେ ବିଭାଜନ ସୃଷ୍ଟି କରିବା ଲାଗି ସରକାର ଏଭଳି ବିଲ୍ ଆଣିଛନ୍ତି । ଏହାଦ୍ବାରା ମୁସଲମାନଙ୍କ ସ୍ବାର୍ଥ କ୍ଷତିଗ୍ରସ୍ତ ହେବ । ଅନେକ ବିରୋଧୀ ସଭ୍ୟ କଳାବ୍ୟାଜ୍ ପିନ୍ଧି ବିଲକୁ ବିରୋଧ କରିଥିଲେ । ମୁସଲିମ ଲିଗ୍ ଏବଂ ଏଲଡିଏଫ୍ ସାଂସଦ ଅଭିଯୋଗ କରିଥିଲେ ଯେ ମୁସଲମାନଙ୍କୁ ଅପମାନିତ କରିବା ସହିତ ଧର୍ମ ଭିତ୍ତିରେ ବିଭାଜନ ସୃଷ୍ଟି କରିବାକୁ ସରକାର ବଡ଼ ଧରଣର ଷଡ଼ଯନ୍ତ୍ର ଚଳାଇଛନ୍ତି । କଂଗ୍ରେସ ଅଧ୍ୟକ୍ଷ ତଥା ରାଜ୍ୟସଭାରେ ବିରୋଧୀ ଦଳର ନେତା ମଲ୍ଲିକାର୍ଜୁନ ଖଡ଼ଗେ କହିଥିଲେ ଯେ ସଂଖ୍ୟାଲଘୁ ସଂପ୍ରଦାୟକୁ ହଇରାଣ କରିବା ଲାଗି ସରକାର ଏଭଳି ବିଲ୍ ଆଣିଛନ୍ତି । କଂଗ୍ରେସ ସାଂସଦ ସୟଦ ନସିର ହୁସେନ କହିଥିଲେ ଯେ ଏହି ବିଲ ହେଉଛି ଅସାମ୍ବିଧାନିକ ଏବଂ ଏହା ଜରିଆରେ ମୁସଲିମ ସଂପ୍ରଦାୟକୁ ଟାର୍ଗେଟ କରାଯାଉଛି । ତୃଣମୂଳ କଂଗ୍ରେସ, ଡିଏମକେ, ଆରଜେଡି ଏବଂ ଆପ୍ ସାଂସଦ ମଧ୍ୟ ବିଲ୍‌ର ବିରୋଧ କରିଥିଲେ ।

ଆଲୋଚନାରେ ଅଂଶଗ୍ରହଣ କରି ବିଜେପି ଅଧ୍ୟକ୍ଷ ତଥା ଗୃହର ନେତା ଜେପି ନଡ୍ଡା କଂଗ୍ରେସ ଉପରେ ବର୍ଷିଥିଲେ । ସେ କହିଥିଲେ ଯେ କ୍ଷମତାରେ ଥିବା ବେଳେ କଂଗ୍ରେସ ମୁସଲମାନଙ୍କର କ୍ଷତି କରିଛି । ଏହା ମୁସଲିମ ମହିଳାଙ୍କୁ ଦ୍ବିତୀୟ ଶ୍ରେଣୀ ନାଗରିକ କରିଦେଇଥିଲା । ମୁସଲିମ ମହିଳା ସଶକ୍ତୀକରଣ ହେଉଛି ବିଲର ଉଦ୍ଦେଶ୍ୟ ବୋଲି ଉଲ୍ଲେଖ କରି ସେ କହିଲେ ଯେ ଜାତୀୟ ସ୍ବାର୍ଥ ଦୃଷ୍ଟିରୁ ଏହା ଜରୁରି ଥିଲା ।

ଅନ୍ୟପକ୍ଷରେ ବିଜେପିର ସହଯୋଗୀ ନୀତୀଶ କୁମାରଙ୍କ ଜେଡିୟୁ ଏହି ବିଲକୁ ସମର୍ଥନ କରିଥିବାରୁ ଦଳ ଭିତରେ ବିଦ୍ରୋହ ଦେଖାଦେଇଛି । ଜେଡିୟୁ ନିଷ୍ପତ୍ତିର ପ୍ରତିବାଦ ଜଣାଇ ଆଜି ଦୁଇ ଜଣ ବରିଷ୍ଠ ନେତା ଦଳରୁ ଇସ୍ତଫା ଦେଇଛନ୍ତି । ସେହିଭଳି ତାମିଲନାଡ଼ୁ ମୁଖ୍ୟମନ୍ତ୍ରୀ ଏମ୍‌କେ ଷ୍ଟାଲିନ ୱାକଫ୍ ବିଲକୁ ସୁପ୍ରିମ କୋର୍ଟରେ ଚାଲେଞ୍ଜ କରିବାକୁ ଘୋଷଣା କରିଛନ୍ତି । ସବୁଠାରୁ ଆଶ୍ଚର୍ଯ୍ୟର ବିଷୟ ଯେ ତାଙ୍କୁ ସମର୍ଥନ ଜଣାଇଛି ବିଜେପିର ଅନ୍ୟତମ ସହଯୋଗୀ ଆନ୍ନାଡିଏମ୍‌କେ । ୱାକଫ ବିଲକୁ ପ୍ରତ୍ୟାହାର କରିବା ପାଇଁ ଏହି ଦଳ ଦାବି କରିଛି ।

ସୂଚନାଯୋଗ୍ୟ ଯେ ଗତକାଲି ଲୋକସଭାରେ ୨୮୮-୨୩୨ ଭୋଟରେ ଗୃହୀତ ହୋଇଥିବା ଏହି ବିଲ୍ ଆଜି ରାଜ୍ୟସଭାରେ ମଧ୍ୟ ପାସ୍ ହୋଇଛି । ସରକାରୀ ମେଣ୍ଟ ଏନ୍‌ଡିଏ ପାଖରେ ବିଲ୍ ପାସ୍ କରାଇବାକୁ ଆବଶ୍ୟକ ସଂଖ୍ୟା ରହିଥିଲା । ୨୩୬ ସଭ୍ୟ ବିଶିଷ୍ଟ ରାଜ୍ୟସଭାରେ ବିଲ୍ ପାସ୍‌ କରାଇବାକୁ ୧୧୯ ସଭ୍ୟଙ୍କ ସମର୍ଥନ ଦରକାର ଥିବା ବେଳେ ଏନଡିଏ ପାଖରେ ରହିଛି ୧୨୫ ସଭ୍ୟଙ୍କ ସମର୍ଥନ । ଏନ୍‌ଡିଏ ପାଖରେ ଆବଶ୍ୟକ ଠାରୁ ଦୁଇ କମ୍ ସଭ୍ୟ (୧୧୭) ଥିବା ବେଳେ ଦୁଇ ଜଣ ମନୋନୀତ ସଭ୍ୟ ଏବଂ ୬ ଜଣ ସ୍ବାଧୀନ ସାଂସଦ ବିଲ୍‌ ସପକ୍ଷରେ ସମର୍ଥନ ଘୋଷଣା କରିଛନ୍ତି । ମେଣ୍ଟରେ ବିଜେପିର ୯୮ ସଭ୍ୟ ଥିବା ବେଳେ ଜେଡିୟୁର ୪, ଏନ୍‌ସିପିର ୩, ଟିଡିପିର ୨, ଅନ୍ୟ ଦଳର ୧୦ ସଭ୍ୟ ଅଛନ୍ତି । ଅନ୍ୟପକ୍ଷରେ ବିରୋଧୀ ଶିବିରରେ ମାତ୍ର ୮୮ ସଭ୍ୟ ରହିଛନ୍ତି । ଏଥିରେ କଂଗ୍ରେସର ୨୭,ଟିଏମସିର ୧୩, ଡିଏମ୍‌କେର ୧୦ ଓ ଆପ୍‌ର ୧୦ ସାଂସଦ ଅଛନ୍ତି । ୨୩ ଜଣ ସାଂସଦ ନିରପେକ୍ଷ ରହିଛନ୍ତି । ସେମାନେ ସରକାର କିମ୍ବା ବିରୋଧୀ ଶିବିରରେ ନାହାନ୍ତି ।

ଭୁବନେଶ୍ବର: ୱାକଫ ବିଲ ନେଇ ରାଜ୍ୟସଭାରେ ହୁଇପ ଜାରି କରି ନାହିଁ ବିଜୁ ଜନତା ଦଳ । ଏନେଇ ସୂଚନା ଦେଇଛନ୍ତି ଦଳର ବରିଷ୍ଠ ସାଂସଦ ସସ୍ମିତ ପାତ୍ର । ସେ କହିଛନ୍ତି, ଧର୍ମନିରପେକ୍ଷତା ଓ ଅନ୍ତର୍ଭୁକ୍ତିକରଣ ନୀତିକୁ ବିଜୁ ଜନତା ଦଳ ଗୁରୁତ୍ବ ଦେଉଛି । ସମସ୍ତ ସମ୍ପ୍ରଦାୟର ଅଧିକାରର ସୁରକ୍ଷାକୁ ଦଳ ପ୍ରାଧାନ୍ୟ ଦେଉଛି । ଏହାସହ ସଂଖ୍ୟାଲଘୁ ସମ୍ପ୍ରଦାୟର ଭାବନାକୁ ଦଳ ସର୍ବଦା ସମ୍ମାନ ଦେଇଥାଏ ।

ୱାକଫ ସଂଶୋଧନ ବିଲ-୨୦୨୪ ପ୍ରସଙ୍ଗରେ ସେ କହିଛନ୍ତି, ଏହି ସବୁ ବିଷୟକୁ ଗୁରୁତ୍ବର ସହ ବିଚାର କରି ଦଳ ଏହି ନିଷ୍ପତ୍ତି ଗ୍ରହଣ କରିଛି । ସମସ୍ତ ସମ୍ପ୍ରଦାୟକୁ ନ୍ୟାୟ, ସଂହତି ଓ ଅଧିକାର ପ୍ରସଙ୍ଗରେ ଦଳର ରାଜ୍ୟସଭା ସାଂସଦମାନଙ୍କ ଦାୟିତ୍ବବୋଧ ଓ ଅନ୍ତର ଅଭିବ୍ୟକ୍ତି ଉପରେ ନ୍ୟସ୍ତ କରାଯାଇଛି । ବିଲ୍ ପ୍ରସଙ୍ଗରେ ଭୋଟ ନେଇ ଦଳ ପକ୍ଷରୁ ହୁଇପ ଜାରି କରାଯାଇନାହିଁ ।

ନୂଆଦିଲ୍ଲୀ: ଲୋକସଭା ଓ ବିଧାନସଭା ନିର୍ବାଚନ ଏକ ସଙ୍ଗେ କରାଇବା ନେଇ ‘ଏକ ଦେଶ ଏକ ନିର୍ବାଚନ’ ବିଧେୟକ ଉପରେ ଆଲୋଚନା ପାଇଁ ଯୁଗ୍ମ ସଂସଦୀୟ କମିଟି(ଜେପିସି) ଗଠନ ହୋଇଛି। ଏହି କମିଟିର ଅଧ୍ୟକ୍ଷତା କରିବେ ଲୋକସଭାର ବିଜେପି ସାଂସଦ ପିପି ଚୌଧୁରୀ। ଜେପିସିରେ ପୂର୍ବରୁ ଲୋକସଭାରୁ ଓଡ଼ିଶାର ଦୁଇ ସାଂସଦ ଭର୍ତ୍ତୃହରି ମହତାବ ଓ ଡ. ସମ୍ବିତ ପାତ୍ର ରହିଛନ୍ତି। ସେହିପରି ରାଜ୍ୟସଭାରୁ ଓଡ଼ିଶାର ସାଂସଦ ମାନସ ରଞ୍ଜନ ମଙ୍ଗରାଜଙ୍କୁ ମନୋନୀତ କରାଯାଇଛି। ମାନସ ମଙ୍ଗରାଜଙ୍କ ସମେତ ରାଜ୍ୟସଭାର ୧୨ ଜଣ ସଦସ୍ୟ ଏହି କମିଟିରେ ରହିଛନ୍ତି। ଏହା ପୂର୍ବରୁ ଏକ ଦେଶ ଏକ ନିର୍ବାଚନ ବିଧେୟକକୁ ଲୋକସଭାରେ ସ୍ଵୀକାର କରାଯିବା ପରେ ଏହାକୁ ଜେପିସିକୁ ପଠାଇ ଦିଆଯାଇଛି।

ଜେପିସିରେ ଥିବା ରାଜ୍ୟସଭା ସାଂସଦ:

୧-ଘନଶ୍ୟାମ ତ୍ବିୱାରୀ
୨-ଭୁବନେଶ୍ବର କଲିତା
୩- ଡ. କେ ଲକ୍ଷ୍ମଣ
୪- କବିତା ପଟିଦାର
୫- ସଞ୍ଜୟ କୁମାର ଝାଆ
୬- ରଣଦୀପ ସିଂହ ସୂର୍ଯ୍ୟେୱାଲା
୭- ମୁକୁଲ ବାଲକ୍ରିଷ୍ଣ ୱାସନିକ
୮-  ସକେତ ଗୋଖଲେ
୯- ପି ୱିଲସନ
୧୦- ସଞ୍ଜୟ ସିଂହ
୧୧- ମାନସ ରଞ୍ଜନ ମଙ୍ଗରାଜ
୧୨- ଭି. ବଜୟସାଇ ରେଡ୍ଡୀ

ଭୁବନେଶ୍ୱର: ରାଜ୍ୟସଭା ପ୍ରାର୍ଥୀ ଭାବେ ନାମାଙ୍କନ ଭରିଲେ ଅଶ୍ୱିନୀ ବୈଷ୍ଣବ । ବିଜେପିରୁ ରାଜ୍ୟସଭା ପ୍ରାର୍ଥୀ ହୋଇଛନ୍ତି ଅଶ୍ବିନୀ ବୈଷ୍ଣବ । ତାଙ୍କୁ ସମର୍ଥନ ଘୋଷଣା କରିଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ। ରାଜ୍ୟର ବୃହତ୍ତର ସ୍ବାର୍ଥ ଦୃଷ୍ଟିରୁ ସମର୍ଥନ ଘୋଷଣା କରିଛି ବିଜେଡି।

ତେବେ ଓଡ଼ିଶାର ସ୍ଵାର୍ଥ ସହ କୌଣସି ସାଲିସ କରାଯିବନି। ସଂଘୀୟ ବ୍ଯବସ୍ଥାରେ ବିକାଶ ପ୍ରକ୍ରିୟା ଜାରି ରହିବ। ଏହି କାରଣରୁ ଅଶ୍ଵିନୀଙ୍କୁ ସମର୍ଥନ କରିବାକୁ ମୁଖ୍ଯମନ୍ତ୍ରୀଙ୍କ ନିଷ୍ପତ୍ତି ସ୍ବାଗତଯୋଗ୍ଯ । ରାଜ୍ଯରେ ରେଳ ଓ ଟେଲିକମ ସେବାର ବୃହତ୍ତର ବିକାଶ ପାଇଁ ଦଳ ସମର୍ଥନ କରିଛି। ବିଜେପିରୁ ଅଶ୍ଵିନୀଙ୍କୁ ଜିତିବାକୁ ହେଲେ ୩୭ ବିଧାୟକଙ୍କ ସମର୍ଥନ ଆବଶ୍ୟକ। ବିଜେପି ପାଖରେ ଅବଶ୍ଯ ସଂଖ୍ଯା ନାହିଁ। ବିଜେପିର ବର୍ତ୍ତମାନ ୨୨ ଜଣ ବିଧାୟକ ଅଛନ୍ତି ।

୨୦୧୯ରେ ବିଜେଡି ସମର୍ଥନରେ ରାଜ୍ୟସଭାକୁ ଯାଇଥିଲେ ଅଶ୍ବିନୀ। ୨୦୨୧ ମସିହା ଜୁଲାଇ ମାସରେ ମୋଦି ସରକାରଙ୍କ କ୍ୟାବିନେଟ୍ ଅଦଳବଦଳରେ ଅଶ୍ବିନୀ ବୈଷ୍ଣବଙ୍କୁ ମନ୍ତ୍ରିମଣ୍ଡଳରେ ସାମିଲ କରାଯାଇଥିଲା। ଏଥିସହ ତାଙ୍କୁ ଗୁରୁତ୍ୱପୂର୍ଣ୍ଣ ରେଳ ତଥା ଇଲେକଟ୍ରୋନିକ, ସୂଚନା ପ୍ରଯୁକ୍ତି ଓ ଯୋଗାଯୋଗ ମନ୍ତ୍ରଣାଳୟର ଦାୟିତ୍ୱ ଦିଆଯାଇଥିଲା। ୩ଟି ରାଜ୍ୟସଭା ଆସନ ପାଇଁ ବିଜେଡିରୁ ନାମାଙ୍କନ ପତ୍ର ଦାଖଲ କରିଛନ୍ତି କଟକର ପୂର୍ବତନ ବିଧାୟକ ଦେବାଶିଷ ସାମନ୍ତରାୟ ଓ ପୁରୀର ଯୁବ ବିଜେଡି ଉପସଭାପତି ଶୁଭାଶିଷ ଖୁଣ୍ଟିଆ।

ଭୁବନେଶ୍ବର: ରାଜ୍ୟସଭାରେ ବିଜେଡ଼ି ସାଂସଦ ମାନସ ମଙ୍ଗରାଜ, ପ୍ରଶାନ୍ତ ନନ୍ଦ ଓ ସୁଲତା ଦେଓ ମହାନଦୀରେ ଅବର୍ଜନା ପକାଇବା ପ୍ରସଙ୍ଗ ଉଠାଇଛନ୍ତି। ମିଳିତ ଭାବେ ଏକ ଅଣତାରକା ପ୍ରଶ୍ନ ଜରିଆରେ ଏହି ପ୍ରସଙ୍ଗ ଉତ୍ଥାପନ କରିଛନ୍ତି।

ଏହାର ଉତ୍ତରରେ କେନ୍ଦ୍ର ଜଙ୍ଗଲ, ପରିବେଶ ଓ ଜଳବାୟୂ ପରିବର୍ତ୍ତନ ବିଭାଗ ରାଷ୍ଟ୍ରମନ୍ତ୍ରୀ ଆଶ୍ବିନୀ ଚୌବେ କହିଛନ୍ତି ଯେ, ଜଳ ପ୍ରଦୂଷଣକୁ ରୋକିବା ବା ନିୟନ୍ତ୍ରଣ କରିବା ରାଜ୍ୟ ବା ଲୋକାଲ୍ ବଡି ଓ ଶିଳ୍ପସଂସ୍ଥା ଗୁଡିକର ଦାୟିତ୍ବ ଅଟେ ଶିଳ୍ପସସ୍ଥାରୁ ନିର୍ଗତ ଜଳ ନଦୀ ଯିବା ପୂର୍ବରୁ ତାହା ପ୍ରଦୂଷିତ ନୁହଁ ବୋଲି ସେହି ନିର୍ଦ୍ଦିଷ୍ଟ ସସ୍ଥା ସୁନିଶ୍ଚିତ କରିଥିଏ।

ଓଡ଼ିଶା ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡରୁ ମିଳିଥିବା ସୂଚନା ଅନୁଯାୟୀ, ମହାନଦୀ ନଦୀ କୂଳରେ ଅଳିଆ ଆବର୍ଜନା ପକାଇବାର କୌଣସି ଘଟଣା ଦେଖାଯାଇ ନାହିଁ। କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ସମ୍ପୃକ୍ତ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ସହିତ ମିଳିତ ଭାବରେ ଜାତୀୟ ଜଳ ଗୁଣବତ୍ତା ମନିଟରିଂ ପ୍ରୋଗ୍ରାମ କାର୍ଯ୍ୟକାରି କରିଥାଏ । ଛତିଶଗଡ,ମଧ୍ୟପ୍ରଦେଶ ଓ ଓଡ଼ିଶାରେ ମହାନଦୀର ୪୪୮୪ ଟି ଜଳ ଉତ୍ସ ଉପରେ ଏହି କମିଟି ନଜର ରଖିଛି।

NGT ଦୁଇଟି ଯୁଗ୍ମ କମିଟି ଗଠନ କରି ମହାନଦୀ ନଦୀ ଶଯ୍ୟାରେ ବେଆଇନ ନିର୍ମାଣ ଏବଂ ବାଲି ଭରିବା କାର୍ଯ୍ୟର ଅଭିଯୋଗ ଉପରେ ନଜର ରଖିଛି। ଏହି କମିଟିଗୁଡିକ ମହାନଦୀ ନଦୀ ଅବବାହିକାର ଚିହ୍ନିତ ଷ୍ଟ୍ରେଚ୍ ପାଇଁ ବନ୍ୟାଞ୍ଚଳ ଜୋନିଂ ଅଧ୍ୟୟନ କରିଥିଲେ ଏବଂ ଚିହ୍ନଟ ହୋଇଥିବା ବନ୍ୟାଞ୍ଚଳର ପରିବେଶ ଏବଂ ହାଇଡ୍ରୋଲୋଜିକାଲ୍ ଦିଗ ଏବଂ ଦୁର୍ବଳତା ମୂଲ୍ୟାଙ୍କନ ଉପରେ ଅଧ୍ୟୟନ କରିଥିଲେ। ଏହା ପରେ, କମିଟି ରିପୋର୍ଟର ସୁପାରିଶକୁ ଆଧାର କରି ୨୦୨୨ ମସିହା ୨୧ ସେପ୍ଚେମ୍ବର ଠାରୁ  ଆଦେଶକୁ ପାଳନ କରିବା ପାଇଁ ମାନ୍ୟବର ଟ୍ରିବ୍ୟୁନାଲ ଦ୍ୱାରା ଓଡ଼ିଶା ରାଜ୍ୟକୁ ନିର୍ଦ୍ଦେଶ ଦିଆଯାଇଥିଲା ବୋଲି ମନ୍ତ୍ରୀ ଗୃହକୁ ଜଣାଇଛନ୍ତି।