ନୂଆଦିଲ୍ଲୀ: ନେପାଳରେ ଆସିଥିବା ଭୟଙ୍କର ବନ୍ୟା ପରିସ୍ଥିତିକୁ ନେଇ ବିଶ୍ୱର ବିଭିନ୍ନ ଦେଶର ନେତାମାନେ ଗଭୀର ଶୋକ ପ୍ରକାଶ କରିବା ସହ ସହାୟତାର ପ୍ରତିଶ୍ରୁତି ଦେଇଛନ୍ତି। ଏହି ପ୍ରାକୃତିକ ବିପର୍ଯ୍ୟୟରେ ୧୬୦ରୁ ଅଧିକ ଲୋକଙ୍କର ମୃତ୍ୟୁ ଘଟିଥିବା ବେଳେ ବିଦେଶୀ ନାଗରିକଙ୍କ ସମେତ ଶତାଧିକ ଲୋକ ନିଖୋଜ ଅଛନ୍ତି।

ରିପୋର୍ଟ ଅନୁଯାୟୀ, ଏହି ବିପର୍ଯ୍ୟୟ ପରେ ୩୯୧ ଜଣ ବିଦେଶୀ ପର୍ଯ୍ୟଟକ ଏବଂ ୯୩ ଜଣ ନେପାଳୀ ପର୍ଯ୍ୟଟକ ନିଖୋଜ ଅଛନ୍ତି ଏବଂ ସେମାନଙ୍କ ସହ କୌଣସି ଯୋଗାଯୋଗ ହୋଇପାରୁନାହିଁ। ବିଭିନ୍ନ ରାଷ୍ଟ୍ର ଏବେ ନିଜ ନାଗରିକମାନଙ୍କୁ ଉଦ୍ଧାର କରିବା ପାଇଁ ଉଦ୍ୟମ ଜାରି ରଖିଛନ୍ତି।

ବନ୍ୟା ପ୍ରଭାବିତ ଲୋକଙ୍କ ପ୍ରତି ଗଭୀର ସମବେଦନା ଜଣାଇ ଅଷ୍ଟ୍ରେଲିଆର ପ୍ରଧାନମନ୍ତ୍ରୀ ଆନ୍ଥୋନୀ ଆଲବାନିଜ୍ କହିଛନ୍ତି ଯେ ଅଧିକାରୀମାନେ ଅଷ୍ଟ୍ରେଲିଆ ନାଗରିକଙ୍କ ସୁରକ୍ଷା ନିଶ୍ଚିତ କରିବା ପାଇଁ ଜରୁରୀକାଳୀନ ଭିତ୍ତିରେ କାର୍ଯ୍ୟ କରୁଛନ୍ତି। ଏହି ବିପର୍ଯ୍ୟୟରେ ଅତିକମରେ ୩୪ ଜଣ ଅଷ୍ଟ୍ରେଲୀୟ ନିଖୋଜ ଥିବା ସୂଚନା ମିଳିଛି। 

ସେହିପରି ୨୪ ଜଣ କାନାଡା ନାଗରିକ ନିଖୋଜ ଥିବା ବେଳେ, କାନାଡାର ପ୍ରଧାନମନ୍ତ୍ରୀ ମାର୍କ କାର୍ନି ଆଶ୍ୱାସନା ଦେଇଛନ୍ତି ଯେ ତାଙ୍କ ସରକାର ସ୍ଥିତି ଉପରେ ତୀକ୍ଷ୍ଣ ନଜର ରଖିଛନ୍ତି। ସେ କାନାଡା ନାଗରିକମାନଙ୍କୁ ଆରଓସିଏ (ROCA) ସିଷ୍ଟମରେ ତୁରନ୍ତ ପଞ୍ଜୀକୃତ କରିବାକୁ ଅନୁରୋଧ କରିଛନ୍ତି। ଏହା ସହ ଉଦ୍ଧାର କାର୍ଯ୍ୟରେ ଯେକୌଣସି ପ୍ରକାର ସହାୟତା ପାଇଁ କାନାଡା ପ୍ରସ୍ତୁତ ବୋଲି ସେ ଏକ୍ସ (X) ମାଧ୍ୟମରେ ସୂଚନା ଦେଇଛନ୍ତି।

ପରିସ୍ଥିତିକୁ "ହୃଦୟବିଦାରକ" ବୋଲି ବର୍ଣ୍ଣନା କରି ନ୍ୟୁଜିଲ୍ୟାଣ୍ଡର ପ୍ରଧାନମନ୍ତ୍ରୀ କ୍ରିଷ୍ଟୋଫର ଲକ୍ସନ୍ କହିଛନ୍ତି ଯେ ତାଙ୍କ ସରକାର ନେପାଳ କର୍ତ୍ତୃପକ୍ଷଙ୍କ ସହ ନିରନ୍ତର ଯୋଗାଯୋଗରେ ଅଛନ୍ତି। ଏହି ବନ୍ୟାରେ ୫ ଜଣ ନ୍ୟୁଜିଲ୍ୟାଣ୍ଡ ନାଗରିକ ନିଖୋଜ ଥିବା ଜଣାପଡିଛି। ସେ ନାଗରିକମାନଙ୍କୁ ଜରୁରୀକାଳୀନ ସ୍ଥିତିରେ କନସୁଲାର୍ ହେଲ୍ପଲାଇନ ସହ ଯୋଗାଯୋଗ କରିବାକୁ ପରାମର୍ଶ ଦେଇଛନ୍ତି।

ଅନ୍ୟପକ୍ଷରେ, ବନ୍ୟା ପରେ ୧୯ ଜଣ ମାଲେସିୟା ନାଗରିକ ନିଖୋଜ ଥିବା ଖବର ମିଳିଛି। ମାଲେସିୟାର ପ୍ରଧାନମନ୍ତ୍ରୀ ଅନୱାର ଇବ୍ରାହିମ୍ ଗଭୀର ସମବେଦନା ଜଣାଇବା ସହ ନେପାଳରେ ଥିବା ମାଲେସିୟା ଦୂତାବାସ ପ୍ରଭାବିତ ନାଗରିକଙ୍କୁ ସାହାଯ୍ୟ କରିବା ପାଇଁ ସ୍ଥାନୀୟ ପ୍ରଶାସନ ସହ ଘନିଷ୍ଠ ଭାବରେ କାର୍ଯ୍ୟ କରୁଛି ବୋଲି ପ୍ରକାଶ କରିଛନ୍ତି। ସେ ନିଜ ମିଶନକୁ ସମସ୍ତ ଆବଶ୍ୟକୀୟ ସମ୍ବଳ ଯୋଗାଇଦେବାକୁ ନିର୍ଦ୍ଦେଶ ଦେଇଛନ୍ତି।

ଆମେରିକା ଏବଂ ଇରାନ ମଧ୍ୟରେ ଚାଲିଥିବା ତିକ୍ତତା ଭିତରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଏକ ବଡ଼ ଝଟକା ଲାଗିଛି। ହର୍ମୁଜ୍ ପ୍ରଣାଳୀ (Strait of Hormuz) ଅବରୋଧ କରିବାକୁ ଆମେରିକାର ନିଷ୍ପତ୍ତିକୁ ସମର୍ଥନ କରିବାକୁ ସିଧାସଳଖ ମନା କରିଦେଇଛି ଅଷ୍ଟ୍ରେଲିଆ। ପର୍ଯ୍ୟାପ୍ତ ସୂଚନାର ଅଭାବ ତଥା ପୂର୍ବ ପ୍ରସ୍ତୁତି ନଥିବା ଦର୍ଶାଇ ଅଷ୍ଟ୍ରେଲିଆର ପ୍ରଧାନମନ୍ତ୍ରୀ ଆନ୍ଥୋନୀ ଆଲବାନିଜ୍ (Anthony Albanese) ସ୍ପଷ୍ଟ କରିଛନ୍ତି ଯେ, ଏହି ଅବରୋଧରେ ସାମିଲ ହେବା ପାଇଁ ଆମେରିକା ପକ୍ଷରୁ ସେମାନଙ୍କୁ କୌଣସି ଔପଚାରିକ ଅନୁରୋଧ କରାଯାଇନାହିଁ।

ଆଲୋଚନା ବିଫଳ ପରେ ଟ୍ରମ୍ପଙ୍କ ଏକତରଫା ନିଷ୍ପତ୍ତି

ସୂଚନାଯୋଗ୍ୟ ଯେ, ପାକିସ୍ତାନର ରାଜଧାନୀ ଇସଲାମାବାଦଠାରେ ଆମେରିକା ଏବଂ ଇରାନ ମଧ୍ୟରେ ଚାଲିଥିବା ଶାନ୍ତି ଆଲୋଚନା କୌଣସି ନିଷ୍କର୍ଷ ବିନା ଶେଷ ହୋଇଥିଲା। ଇରାନ ନିଜର ଆଣବିକ କାର୍ଯ୍ୟକ୍ରମ ବନ୍ଦ କରିବାକୁ ମନା କରିବା ପରେ, ରାଷ୍ଟ୍ରପତି ଟ୍ରମ୍ପ ଏକତରଫା ଭାବେ ଗୁରୁତ୍ୱପୂର୍ଣ୍ଣ ବ୍ୟବସାୟିକ ମାର୍ଗ ହର୍ମୁଜ୍ ପ୍ରଣାଳୀକୁ ଅବରୋଧ କରିବା ନେଇ ଘୋଷଣା କରିଥିଲେ। ଆମେରିକୀୟ ନୌସେନା ଏହି ମାର୍ଗ ଦେଇ ଯାଉଥିବା ସମସ୍ତ ଜାହାଜ ଉପରେ କଟକଣା ଲଗାଇବ ଏବଂ ଏଥିରେ ଅନ୍ୟ ଦେଶମାନେ ମଧ୍ୟ ସାମିଲ ହେବେ ବୋଲି ସେ ଦୃଢ଼ୋକ୍ତି ପ୍ରକାଶ କରିଥିଲେ।

ଅଷ୍ଟ୍ରେଲିଆର ସ୍ପଷ୍ଟୀକରଣ ଏବଂ ଶାନ୍ତି ପାଇଁ ଆହ୍ୱାନ

ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ଆଲବାନିଜ୍ ଏହି ପ୍ରସଙ୍ଗରେ ପ୍ରତିକ୍ରିୟା ରଖି କହିଛନ୍ତି ଯେ, "ଆମକୁ କୌଣସି ଅନୁରୋଧ ମିଳିନାହିଁ ଏବଂ ରାତିଅଧିଆ ନିଆଯାଇଥିବା ଏହି ନିଷ୍ପତ୍ତି ସମ୍ପୂର୍ଣ୍ଣ ଏକତରଫା ଅଟେ।" ଏହା ସହିତ ଅଷ୍ଟ୍ରେଲିଆର ପ୍ରତିରକ୍ଷା ଶିଳ୍ପ ମନ୍ତ୍ରୀ ପାଟ୍ କନରୟ ସ୍ପଷ୍ଟ କରିଛନ୍ତି ଯେ ଅଷ୍ଟ୍ରେଲିଆ ଏହି ଅବରୋଧରେ ସାମିଲ ହେବାକୁ ଆଦୌ ବିଚାର କରୁନାହିଁ। ସେହିପରି ଦେଶର ସମ୍ବଳ ମନ୍ତ୍ରୀ ମାଡେଲିନ୍ କିଙ୍ଗ୍ ମଧ୍ୟ ସତର୍କ କରାଇ କହିଛନ୍ତି ଯେ ଆମେରିକାର ଏହି ଅବରୋଧ ନିଷ୍ପତ୍ତି ବିଶ୍ୱ ବାଣିଜ୍ୟ ପାଇଁ ଏକ "ବହୁତ କଷ୍ଟକର" ସ୍ଥିତି ସୃଷ୍ଟି କରିବ।

ବିଶ୍ୱ ଅର୍ଥନୀତି ଉପରେ ପ୍ରଭାବ ଆଶଙ୍କା

ହର୍ମୁଜ୍ ପ୍ରଣାଳୀ ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ସାମୁଦ୍ରିକ ବାଣିଜ୍ୟ ମାର୍ଗ ମଧ୍ୟରୁ ଗୋଟିଏ। ଦୈନିକ ବିଶ୍ୱର ପ୍ରାୟ ୨୦ ପ୍ରତିଶତ ତୈଳ ଯୋଗାଣ ଏହି ମାର୍ଗ ଦେଇ ହିଁ ହୋଇଥାଏ। ଇରାନ-ଆମେରିକା ଉତ୍ତେଜନା କାରଣରୁ ଏହି ଅଞ୍ଚଳ ଦେଇ ଅଶୋଧିତ ତୈଳ ଏବଂ ତରଳ ପ୍ରାକୃତିକ ଗ୍ୟାସ (LNG) କାରବାର ବହୁଳ ମାତ୍ରାରେ ବାଧାପ୍ରାପ୍ତ ହୋଇଛି, ଯାହା ଫଳରେ ସାରା ବିଶ୍ୱରେ ଏକ ବଡ଼ ଶକ୍ତି ସଙ୍କଟ ଦେଖାଦେଇଛି। ଏହି ବିବାଦର ତୁରନ୍ତ ଶାନ୍ତିପୂର୍ଣ୍ଣ ସମାଧାନ ପାଇଁ ଉଭୟ ଦେଶ ପୁଣିଥରେ ଆଲୋଚନା ଟେବୁଲକୁ ଫେରିବା ଉଚିତ୍ ବୋଲି ଅଷ୍ଟ୍ରେଲିଆ ସରକାର ଆହ୍ୱାନ ଦେଇଛନ୍ତି।

ନୂଆଦିଲ୍ଲୀ: ଅଷ୍ଟ୍ରେଲିଆକୁ ମିଳିବ ନୂଆ ପ୍ରଧାନମନ୍ତ୍ରୀ । ପ୍ରାୟ ଗୋଟିଏ ଦଶନ୍ଧି ଧରି କ୍ଷମତାରେ ଥିବା ଅଷ୍ଟ୍ରେଲିଆର କଞ୍ଜରଭେଟିଭ ପ୍ରଧାନମନ୍ତ୍ରୀ ସ୍କଟ ମୋରିସନ ନିର୍ବାଚନରେ ପରାଜୟ ସ୍ୱୀକାର କରିଛନ୍ତି। ତାଙ୍କ ଦଳ ଜଳବାୟୁ ପରିବର୍ତ୍ତନକୁ ଗୁରୁତ୍ୱ ଦେଉ ନଥିବାରୁ ଭୋଟରମାନେ ମୋରିସନଙ୍କ ବିରୋଧରେ ଆଜି ଭୋଟ ଦେଇଛନ୍ତି। ମୋରିସନ ମଧ୍ୟ ଜନମତକୁ ଗ୍ରହଣ କରି ଚୂଡ଼ାନ୍ତ ଫଳାଫଳ ଆସିବା ପୂର୍ବରୁ ନିଜର ପରାଜୟ ସ୍ୱୀକାର କରି ନେଇଛନ୍ତି।

ଦ ଅଷ୍ଟ୍ରେଲିଆନ ଖବର କାଗଜ ନ୍ୟୁଜପୋଲ୍ ଅନୁଯାୟୀ ୫୩ ପ୍ରତିଶତ ସମର୍ଥନ ସହ ଲେବର ପାର୍ଟି ଆଗୁଆ ରହିଥିବା ବେଳେ ସ୍କଟ ମରିସନ ନିର୍ବାଚନ ହାରିଛନ୍ତି। ଏନେଇ ସ୍କଟ ମରିସନ ପରାଜୟ ସ୍ଵୀକାର କରି ବିରୋଧୀ ନେତା ଆନ୍ଥୋନୀ ଅଲବାନିସଙ୍କୁ ଶୁଭକାମନା ଜଣାଇଛନ୍ତି। ଅଲବାନିସ ଅଷ୍ଟ୍ରେଲିଆର ନୂତନ ପ୍ରଧାନମନ୍ତ୍ରୀ ହେବା ଯଥେଷ୍ଟ ସମ୍ଭାବନା ରହିଛି।

ନିଜର ନିର୍ବାଚନ ସ୍ଵୀକାର କରି ପ୍ରଧାନମନ୍ତ୍ରୀ ସ୍କଟ୍ ମରିସନ କହିଛନ୍ତି, ଜନତା ପ୍ରମୁଖ ଦଳକୁ ସମର୍ଥନ ଦେଇ ନାହାନ୍ତି। ତେଣୁ ଆମେ ପରାଜୟ ସ୍ଵୀକାର କରୁଛୁ। ଗଣମାଧ୍ୟମକୁ ସମ୍ବୋଧିତ କରି ସ୍କଟ ମରିସନ ଭାବୁକ ହୋଇ ପଡିଥିଲେ। ସେ କହିଛନ୍ତି, ଆମେ ନିର୍ବାଚନ ହାରିଥିଲେ ମଧ୍ୟ ପରିବର୍ତ୍ତୀ ନିର୍ବାଚନରେ ପୁଣି ଥରେ ନିଜ ପାର୍ଟିର ନୀତିକୁ ନେଇ ଜନତାଙ୍କ ଗହଣକୁ ଯିବୁ। ତାଙ୍କୁ ପୂରା ଭରସା ଯେ, ଜନତା ପୁନର୍ବାର ତାଙ୍କ ପାର୍ଟିକୁ ବିପୁଳ ଭୋଟ୍ ଦେଇ ଜିତାଇବେ। ଏବେଠୁ ତିନି ବର୍ଷ ପରେ ମୁଁ ମେଣ୍ଟ ସରକାରର ପ୍ରତ୍ୟାବର୍ତ୍ତନକୁ ଅପେକ୍ଷା କରିବି। ମୋତେ ଭରସା ଯେ, ଜନତାଙ୍କୁ ଆମକୁ ପୁଣି ଥରେ କ୍ଷମତାସୀନ କରାଇବେ।

ଅପରପକ୍ଷେ ଲେବର ପାର୍ଟି ଜିତିବା ପରେ ପିଲା ଏବଂ ବରିଷ୍ଠ ନାଗରିକଙ୍କ ଉନ୍ନତି ପାଇଁ ଅଧିକ ଖର୍ଚ୍ଚ କରିବ ଏବଂ କଲ୍ୟାଣକାରୀ ଯୋଜନା ଲାଗୁ କରିବାକୁ ପ୍ରତିଶ୍ରୁତି ଦେଇଛି। ଏହା ବାଦ୍ ଅଷ୍ଟ୍ରେଲିଆରେ ବଢୁଥିବା ବିତ୍ତୀୟ ଘାଟାକୁ କମ କରିବା ଏବଂ ଅର୍ଥବ୍ୟବସ୍ଥା ସମ୍ଭାଳିବା ବୋଲି ପ୍ରତିଶ୍ରୁତି ଦେଇଛି ଲେବର ପାର୍ଟି।