କଟକ: ଆସନ୍ତା ପାର୍ବଣ ଋତୁରେ ବେଆଇନ କାର୍ଯ୍ୟକଳାପ, ଚାନ୍ଦା ଆଦାୟ ଏବଂ ଅଭ୍ୟାସଗତ ଅପରାଧୀଙ୍କ ବିରୋଧରେ କମିଶନରେଟ୍ ପୋଲିସ ପକ୍ଷରୁ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ମଙ୍ଗଳବାର ଦିନ କଟକ ଡିସିପି ଖିଲାରୀ ହୃଷୀକେଶ ଜ୍ଞାନଦେଓ ଏହି ସୂଚନା ଦେଇଛନ୍ତି। ସହରରେ ଶାନ୍ତିପୂର୍ଣ୍ଣ ଭାବେ ପୂଜା ଉତ୍ସବ ପାଳନ କରିବା ପାଇଁ ପୋଲିସ ପକ୍ଷରୁ ପ୍ରସ୍ତୁତି ଜୋରଦାର କରାଯାଇଛି।

ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ କ୍ରମେ ବେଆଇନ କାର୍ଯ୍ୟରେ ଲିପ୍ତ ଥିବା ବ୍ୟକ୍ତିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏଥିପାଇଁ ପୋଲିସ ପକ୍ଷରୁ ପୂର୍ବରୁ ଅପରାଧିକ ମାମଲାରେ ସମ୍ପୃକ୍ତ ଥିବା ଏବଂ ଗିରଫ ହୋଇଥିବା ବ୍ୟକ୍ତିମାନଙ୍କର ଏକ ତାଲିକା ପ୍ରସ୍ତୁତ କରାଯାଇଛି। ପାର୍ବଣ ସମୟରେ ଯେପରି ସେମାନେ କୌଣସି ଅଶାନ୍ତି ସୃଷ୍ଟି ନକରନ୍ତି, ସେଥିପାଇଁ ସେମାନଙ୍କ ବିରୋଧରେ ଆଗୁଆ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଡିସିପି କହିଛନ୍ତି।

ପୂଜା ସମୟରେ ଚାନ୍ଦା ଆଦାୟ ଘଟଣା ଉପରେ ତୀକ୍ଷ୍ଣ ନଜର ରଖାଯିବ। ଯଦି କେହି ଜୋରଜବରଦସ୍ତ ଚାନ୍ଦା ମାଗନ୍ତି କିମ୍ବା କୌଣସି ବେଆଇନ କାର୍ଯ୍ୟକଳାପ ନଜରକୁ ଆସେ, ତେବେ ତୁରନ୍ତ ନିକଟସ୍ଥ ପୋଲିସ ଷ୍ଟେସନରେ ଅଭିଯୋଗ କରିବାକୁ ଜନସାଧାରଣଙ୍କୁ ନିବେଦନ କରାଯାଇଛି। ଏହାଛଡ଼ା ଲୋକଙ୍କ ସୁବିଧା ପାଇଁ ଏକ ଟୋଲ୍-ଫ୍ରି ହେଲ୍ପଲାଇନ୍ ନମ୍ବର ଜାରି କରାଯିବାର ଯୋଜନା ରହିଛି। ଜରୁରୀକାଳୀନ ପୋଲିସ ସହାୟତା ପାଇଁ ୧୧୨ (112) ନମ୍ବର ମଧ୍ୟ ଉପଲବ୍ଧ ରହିବ।

ପ୍ରମୁଖ ପୂଜା ମଣ୍ଡପ ଏବଂ ସମ୍ବେଦନଶୀଳ ସ୍ଥାନଗୁଡ଼ିକରେ ଲଗାଯାଇଥିବା ସିସିଟିଭି (CCTV) କ୍ୟାମେରାଗୁଡ଼ିକୁ ସକ୍ରିୟ କରାଯିବ। ପୂଜା କମିଟି କର୍ମକର୍ତ୍ତା ଓ ଅନ୍ୟାନ୍ୟ ବିଭାଗ ସହ ଆଲୋଚନା ପରେ ଚୂଡ଼ାନ୍ତ ସୁରକ୍ଷା ବ୍ୟବସ୍ଥା ଗ୍ରହଣ କରାଯିବ। ଖୁବ୍‌ଶୀଘ୍ର ଆୟୋଜକ ଏବଂ ପୋଲିସ ଅଧିକାରୀଙ୍କ ମଧ୍ୟରେ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହେବ ବୋଲି ପୋଲିସ ପକ୍ଷରୁ ସୂଚନା ମିଳିଛି।

କଟକ: କଟକ ରେଳ ଷ୍ଟେସନରୁ ଗତ ଶନିବାର ଅପହୃତ ହୋଇଥିବା ଜଣେ ୭ ବର୍ଷୀୟା ନାବାଳିକାଙ୍କୁ ସୋମବାର କମିଶନରେଟ୍ ପୋଲିସ ସୁରକ୍ଷିତ ଭାବେ ଉଦ୍ଧାର କରିଛି। ଏହି ଘଟଣାରେ ସମ୍ପୃକ୍ତ ଥିବା ସନ୍ଦେହରେ ଜଣେ ବୃଦ୍ଧଙ୍କୁ ଅଟକ ରଖି ପୋଲିସ ତରଫରୁ ପଚରାଉଚରା କରାଯାଉଛି। ନାବାଳିକାଙ୍କ ଉଦ୍ଧାର ପରେ ପରିବାର ଲୋକେ ଆଶ୍ୱସ୍ତି ଲାଭ କରିଛନ୍ତି।

କମିଶନରେଟ୍ ପୋଲିସ, ସରକାରୀ ରେଳବାଇ ପୋଲିସ (ଜିଆରପି), ରେଳ ସୁରକ୍ଷା ବଳ (ଆରପିଏଫ୍) ଏବଂ ଶିଶୁ କଲ୍ୟାଣ ସମିତି (ସିଡବ୍ଲ୍ୟୁସି) ର ମିଳିତ ଉଦ୍ୟମରେ କଟକର ବାଲିକୁଦା ଅଞ୍ଚଳରୁ ନାବାଳିକାଙ୍କୁ ଉଦ୍ଧାର କରାଯାଇଛି। ନାବାଳିକା ନିଖୋଜ ହେବା ପରେ ତାଙ୍କୁ ଠାବ କରିବା ଓ ସନ୍ଦିଗ୍ଧ ବ୍ୟକ୍ତିଙ୍କୁ ଚିହ୍ନଟ କରିବା ପାଇଁ ପୋଲିସ ପକ୍ଷରୁ ୧୦ଟି ସ୍ୱତନ୍ତ୍ର ଟିମ୍ ଗଠନ କରାଯାଇଥିଲା।

ରେଳ ଷ୍ଟେସନ ଏବଂ ଆଖପାଖ ଅଞ୍ଚଳର ସିସିଟିଭି ଫୁଟେଜ୍ ଯାଞ୍ଚ କରିବା ପରେ ଜଣେ ବୃଦ୍ଧ ନାବାଳିକାଙ୍କୁ ସାଥିରେ ନେଇଯାଉଥିବାର ଦୃଶ୍ୟ ପୋଲିସର ହସ୍ତଗତ ହୋଇଥିଲା। ଏହି ସିସିଟିଭି ଫୁଟେଜ୍ ଏବଂ ଅନ୍ୟାନ୍ୟ ବୈଷୟିକ ପ୍ରମାଣକୁ ଆଧାର କରି ପୋଲିସ ସନ୍ଦିଗ୍ଧଙ୍କ ଗତିବିଧି ଟ୍ରାକ୍ କରିବାରେ ସଫଳ ହୋଇଥିଲା। ଶେଷରେ ବାଲିକୁଦା ଅଞ୍ଚଳରେ ରହୁଥିବା ଉକ୍ତ ବୃଦ୍ଧଙ୍କୁ ଧରିବା ସହ ତାଙ୍କ ପାଖରୁ ନାବାଳିକାଙ୍କୁ ଉଦ୍ଧାର କରାଯାଇଥିଲା।

ପୋଲିସର ସୂଚନାନୁସାରେ, ଉଦ୍ଧାର ହୋଇଥିବା ନାବାଳିକାଙ୍କ ସ୍ୱାସ୍ଥ୍ୟବସ୍ଥା ଭଲ ଅଛି। ନିୟମ ଅନୁଯାୟୀ ତାଙ୍କୁ ସିଡବ୍ଲ୍ୟୁସିକୁ ହସ୍ତାନ୍ତର କରାଯାଇଛି ।

ସୂଚନାଯୋଗ୍ୟ ଯେ, କେନ୍ଦ୍ରାପଡ଼ା ଜିଲ୍ଲା ଆଳି ଅଞ୍ଚଳର ଆଈ ଏବଂ ଅଜା ନାବାଳିକାଙ୍କୁ ଧରି ଅନୁଗୋଳ ଜିଲ୍ଲାର ପାଲଲହଡ଼ା ଯିବା ପାଇଁ ଶନିବାର ଅପରାହ୍ନରେ କଟକ ରେଳ ଷ୍ଟେସନରେ ଟ୍ରେନ୍ ଅପେକ୍ଷାରେ ଥିଲେ। ଏହି ସମୟରେ ନାବାଳିକା ଜଣକ ହଠାତ୍ ଷ୍ଟେସନ ପରିସରରୁ ନିଖୋଜ ହୋଇଯାଇଥିଲେ।

ବହୁ ଖୋଜାଖୋଜି ପରେ ମଧ୍ୟ ନାତୁଣୀର କୌଣସି ପତ୍ତା ନ ମିଳିବାରୁ ସେମାନେ ପ୍ରଥମେ ଜିଆରପି ନିକଟରେ ପହଞ୍ଚିଥିଲେ। ପରେ ଜିଆରପିଙ୍କ ପରାମର୍ଶ କ୍ରମେ ଆଈ ଚାଉଳିଆଗଞ୍ଜ ଥାନାରେ ଏକ ନିଖୋଜ ମାମଲା ରୁଜୁ କରିଥିଲେ। ଅଭିଯୋଗ ପାଇବା ପରେ ପୋଲିସ ତତ୍ପରତା ଦେଖାଇ ୨ ଦିନର ତଲାସି ଅଭିଯାନ ପରେ ଏହି ସଫଳତା ହାସଲ କରିଛି ଏବଂ ଘଟଣାର ଅଧିକ ତଦନ୍ତ ଜାରି ରଖିଛି।

ଭୁବନେଶ୍ୱର: କ୍ଷମା ପ୍ରାର୍ଥନା କଲା ସ୍ମାର୍ଟ ସିଟି ଅନଲାଇନ ଅଟୋ ଟ୍ୟାକ୍ସି ଡ୍ରାଇଭର ସଂଘ। ଭୁବନେଶ୍ୱରର ମାଷ୍ଟର କ୍ୟାଣ୍ଟିନ୍ ଛକରେ ଘଟିଥିବା ବ୍ୟାପକ ହିଂସାକାଣ୍ଡ ଘଟଣାରେ ନୀରବତା ଭାଙ୍ଗିଛନ୍ତି ଅନ୍‌ଲାଇନ୍ ଅଟୋ ସଂଘର ସଭାପତି ଦୀନବନ୍ଧୁ ନାୟକ। ଏହି ଘଟଣାରେ ସାଧାରଣ ଲୋକଙ୍କୁ ହୋଇଥିବା ଅସୁବିଧା ପାଇଁ ସେ କ୍ଷମା ପ୍ରାର୍ଥନା କରିଛନ୍ତି। 

ଏକ ୧୪ ମିନିଟର ଭିଡିଓ ବାର୍ତ୍ତା ଜାରି କରି ଦୀନବନ୍ଧୁ ନାୟକ ଏହି ହିଂସାକାଣ୍ଡକୁ ନେଇ ଦୁଃଖ ପ୍ରକାଶ କରିବା ସହ ଯାତ୍ରୀମାନେ ଭୋଗିଥିବା ହଇରାଣ ହରକତ ପାଇଁ ନିଜର ଦୋଷ ସ୍ୱୀକାର କରିଛନ୍ତି। ସେ ସ୍ପଷ୍ଟ କରିଛନ୍ତି ଯେ, ଡ୍ରାଇଭରମାନଙ୍କ ଆନ୍ଦୋଳନ ପଛରେ କୌଣସି ରାଜନୈତିକ ଉଦ୍ଦେଶ୍ୟ ନଥିଲା। ସେମାନଙ୍କର ଦୀର୍ଘ ଦିନର ଦାବି ପୂରଣ ପାଇଁ ହିଁ ଏହି ବିକ୍ଷୋଭ କରାଯାଇଥିଲା। ଏହା ସହିତ ସେ ଡ୍ରାଇଭରମାନଙ୍କୁ ସମର୍ଥନ କରି କହିଛନ୍ତି ଯେ, ସେମାନଙ୍କ ସମସ୍ୟାର ସମାଧାନ ନ ହେବାରୁ ସେମାନେ ବାଧ୍ୟ ହୋଇ ଆନ୍ଦୋଳନକୁ ଓହ୍ଲାଇଥିଲେ।

ଅନ୍ୟପକ୍ଷରେ, ଏହି ହିଂସାକାଣ୍ଡ ମାମଲାରେ ପୋଲିସ କଠୋର ଆଭିମୁଖ୍ୟ ଗ୍ରହଣ କରିଛି। ବର୍ତ୍ତମାନ ସୁଦ୍ଧା ହିଂସାକାଣ୍ଡରେ ସମ୍ପୃକ୍ତ ଥିବା ୧୧୩ ଜଣଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି। ସେହିପରି ମୋଟ ୩୫୪ଟି ଗାଡ଼ି ଜବତ ହୋଇଥିବା ବେଳେ ଖାରବେଳ ନଗର ଥାନାରେ ୭ଟି ଏଫଆଇଆର୍ (FIR) ରୁଜୁ କରାଯାଇଛି। ପ୍ରଶାସନ ପକ୍ଷରୁ ଟ୍ୟାକ୍ସି ଆସୋସିଏସନ କାର୍ଯ୍ୟାଳୟ ଉପରେ ମଧ୍ୟ ବୁଲଡୋଜର ଚଲାଯାଇ ବେଆଇନ ନିର୍ମାଣକୁ ଭଙ୍ଗାଯାଇଛି। ଅଭିଯୁକ୍ତ ଗାଡ଼ି ମାଲିକମାନଙ୍କ ଗାଡ଼ିର ପରମିଟ୍ ଏବଂ ରେଜିଷ୍ଟ୍ରେସନ୍ ସାର୍ଟିଫିକେଟ୍ (RC) କାହିଁକି ବାତିଲ କରାଯିବ ନାହିଁ, ସେ ନେଇ ପରିବହନ ବିଭାଗ ପକ୍ଷରୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି।

ଏହି ମାଷ୍ଟର କ୍ୟାଣ୍ଟିନ୍ ହିଂସାକାଣ୍ଡ ପରଠାରୁ ସଂଘ ସଭାପତି ଦୀନବନ୍ଧୁ ନାୟକ ଫେରାର୍ ଥିବା ଜଣାପଡିଛି। ତାଙ୍କୁ ଖୋଜି ବାହାର କରିବା ଏବଂ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ କମିଶନରେଟ୍ ପୋଲିସ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି।

ଭୁବନେଶ୍ୱର: ରାଜଧାନୀରେ ଚାଲିଥିବା ଅନଲାଇନ୍ କ୍ୟାବ୍ ଡ୍ରାଇଭରଙ୍କୁ ଧର୍ମଘଟ ମଧ୍ୟରେ ଯାତ୍ରୀଙ୍କ ସମସ୍ୟାକୁ ଦୃଷ୍ଟିରେ ରଖି ଏକ ବଡ଼ ପଦକ୍ଷେପ ନେଇଛି ଭୁବନେଶ୍ୱର-କଟକ କମିଶନରେଟ୍ ପୋଲିସ। ବିମାନବନ୍ଦରରେ ଓହ୍ଲାଉଥିବା ଯାତ୍ରୀମାନଙ୍କୁ ବିଶେଷ କରି ସ୍ୱାସ୍ଥ୍ୟଗତ ଜରୁରୀକାଳୀନ ପରିସ୍ଥିତିରେ ଡାକ୍ତରଖାନାରେ ପହଞ୍ଚାଇବା ପାଇଁ ବିଜୁ ପଟ୍ଟନାୟକ ଆନ୍ତର୍ଜାତୀୟ ବିମାନବନ୍ଦରରେ ପିସିଆର (PCR) ଭ୍ୟାନ୍ ମୁତୟନ କରାଯାଇଛି।

ଆପ୍-ଭିତ୍ତିକ କ୍ୟାବ୍ ସେବା ବ୍ୟାହତ ହୋଇଥିବାରୁ ଅନେକ ଯାତ୍ରୀ ଯାତାୟାତରେ ଘୋର ଅସୁବିଧାର ସମ୍ମୁଖୀନ ହେଉଛନ୍ତି। ଏଭଳି ସ୍ଥିତିରେ କୌଣସି ବି ଯାତ୍ରୀ ଯେପରି ଜରୁରୀ ସ୍ୱାସ୍ଥ୍ୟ ସେବାରୁ ବଞ୍ଚିତ ନହୁଅନ୍ତି, ସେଥିପାଇଁ ପୋଲିସ ପକ୍ଷରୁ ଏହି ବିଶେଷ ବ୍ୟବସ୍ଥା କରାଯାଇଛି। ଯଦି କୌଣସି ଯାତ୍ରୀଙ୍କର ଜରୁରୀକାଳୀନ ଚିକିତ୍ସା ଆବଶ୍ୟକ ହୁଏ, ତେବେ ସେମାନଙ୍କୁ ତୁରନ୍ତ ଡାକ୍ତରଖାନାରେ ପହଞ୍ଚାଇବାର ଦାୟିତ୍ୱ ନେବେ ବିମାନବନ୍ଦରରେ ମୁତୟନ ଥିବା ପିସିଆର ଗାଡ଼ି।

ଏହି ପଦକ୍ଷେପ ସମ୍ପର୍କରେ ସୂଚନା ଦେଇ କମିଶନରେଟ୍ ପୋଲିସ ତାର ଅଫିସିଆଲ୍ ଏକ୍ସ (X) ଆକାଉଣ୍ଟରେ ଉଲ୍ଲେଖ କରିଛି ଯେ, ସାଧାରଣ ଜନତାଙ୍କ ସେବା ପାଇଁ ପୋଲିସ ସର୍ବଦା ପ୍ରତିବଦ୍ଧ। ପୋଲିସ ନିଜର ବାର୍ତ୍ତା ଦେଇ କହିଛି: "ଆମେ ଆପଣଙ୍କ ସହିତ ଅଛୁ। ସବୁବେଳେ, ପ୍ରତିଟି ସମୟରେ, ସବୁଠାରେ"। ଏହି ବ୍ୟବସ୍ଥା ଦ୍ୱାରା, ସ୍ୱାସ୍ଥ୍ୟ ସମସ୍ୟାରେ ପଡ଼ିଥିବା କୌଣସି ଯାତ୍ରୀ ବିମାନବନ୍ଦରରେ ଅଟକି ନରହି ଠିକ୍ ସମୟରେ ଚିକିତ୍ସା ସୁବିଧା ପାଇପାରିବେ। ଆବଶ୍ୟକ ଥିବା ଯାତ୍ରୀମାନେ ସିଧାସଳଖ ପିସିଆର ଗାଡ଼ି ନିକଟକୁ ଯାଇ ସାହାଯ୍ୟ ମାଗିବାକୁ ପୋଲିସ ପକ୍ଷରୁ ପରାମର୍ଶ ଦିଆଯାଇଛି।

ଭୁବନେଶ୍ୱର: ଶବ୍ଦ ପ୍ରଦୂଷଣ ରୋକିବା ପାଇଁ ଭୁବନେଶ୍ୱର-କଟକ କମିଶନରେଟ୍ ପୋଲିସ ପକ୍ଷରୁ ଏକ କଠୋର ପଦକ୍ଷେପ ଗ୍ରହଣ କରାଯାଇଛି। ଆଇନ ଉଲ୍ଲଂଘନ କରି ଅତ୍ୟଧିକ ଏବଂ ଅଯଥା ଶବ୍ଦ କରୁଥିବା ମୋଡିଫାଏଡ୍ ସାଇଲେନ୍ସର ବ୍ୟବହାର କରୁଥିବା ଗାଡ଼ିଗୁଡ଼ିକ ବିଷୟରେ ସିଧାସଳଖ ଅଭିଯୋଗ କରିବାକୁ ପୋଲିସ ପକ୍ଷରୁ ସାଧାରଣ ଜନତାଙ୍କୁ ଏକ ସାର୍ବଜନୀନ ବିଜ୍ଞପ୍ତି ଜରିଆରେ ନିବେଦନ କରାଯାଇଛି।

କମିଶନରେଟ୍ ପୋଲିସ ଦ୍ୱାରା ଜାରି କରାଯାଇଥିବା ବିଜ୍ଞପ୍ତି ଅନୁଯାୟୀ, ବର୍ତ୍ତମାନ ସାଧାରଣ ଲୋକମାନେ ଶବ୍ଦ ପ୍ରଦୂଷଣକୁ ନିୟନ୍ତ୍ରଣ କରିବାରେ ସାହାଯ୍ୟ କରିପାରିବେ। ନିୟମ ଉଲ୍ଲଂଘନକାରୀ ଗାଡ଼ିର ଫଟୋ କିମ୍ବା ଭିଡିଓ ଉତ୍ତୋଳନ କରି ଲୋକମାନେ ସିଧାସଳଖ ପୋଲିସକୁ ପଠାଇ ପାରିବେ। ଏଥିପାଇଁ ପୋଲିସ ପକ୍ଷରୁ ଏକ ସ୍ୱତନ୍ତ୍ର ହ୍ୱାଟ୍ସଆପ୍ ନମ୍ବର +୯୧ ୮୨୮୦୩ ୩୮୩୦୨ (+91 82803 38302) ଜାରି କରାଯାଇଛି। ଲୋକମାନେ ଉକ୍ତ ଗାଡ଼ିର ରେଜିଷ୍ଟ୍ରେସନ୍ ନମ୍ବର ସହିତ ପ୍ରମାଣ ସ୍ୱରୂପ ଫଟୋ ବା ଭିଡିଓ ଏହି ନମ୍ବରରେ ସେୟାର କରିବାକୁ କୁହାଯାଇଛି।

ଶବ୍ଦ ପ୍ରଦୂଷଣକୁ ନିୟନ୍ତ୍ରଣ କରିବା ଏବଂ ସହରକୁ ସମସ୍ତଙ୍କ ପାଇଁ ସୁରକ୍ଷିତ ତଥା ଶାନ୍ତମୟ ପରିବେଶରେ ପରିଣତ କରିବା ଉଦ୍ଦେଶ୍ୟରେ ଏହି ଉଦ୍ୟମ ଆରମ୍ଭ ହୋଇଛି। ଏହି ପ୍ରସଙ୍ଗରେ ସୂଚନା ପ୍ରଦାନ କରୁଥିବା ବ୍ୟକ୍ତିଙ୍କ ପରିଚୟ ସମ୍ପୂର୍ଣ୍ଣ ଗୋପନ ରଖାଯିବ ବୋଲି ପୋଲିସ ପକ୍ଷରୁ ପ୍ରତିଶ୍ରୁତି ଦିଆଯାଇଛି। ମିଳିଥିବା ସୂଚନା ଆଧାରରେ ପ୍ରଶାସନ ଉକ୍ତ ଗାଡ଼ି ଚାଳକଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବ। ଏହି ଅଭିଯାନକୁ ସଫଳ କରିବା ପାଇଁ କମିଶନରେଟ୍ ପୋଲିସ ସାଧାରଣ ଜନତାଙ୍କ ପୂର୍ଣ୍ଣ ସହଯୋଗ କାମନା କରିଛି।

ଭୁବନେଶ୍ୱର: ଭୁବନେଶ୍ୱର ମହିଳା ଥାନା ପୋଲିସ ହେପାଜତରୁ ଖସି ପଳାଇଥିବା ଜଣେ ଦୁଷ୍କର୍ମ ଅଭିଯୁକ୍ତକୁ କମିଶନରେଟ୍ ପୋଲିସ ବେଙ୍ଗାଲୁରୁରୁ ଗିରଫ କରିଛି। ପୋଲିସ କ୍ୟାଣ୍ଟିନରୁ ଫେରାର୍ ହେବା ପରେ ଆରମ୍ଭ ହୋଇଥିବା ଖୋଜାଖୋଜିର ଅନ୍ତ ଘଟିଛି। ଗିରଫ ଅଭିଯୁକ୍ତର ନାମ ରୁଦ୍ର ପ୍ରସାଦ ସୂତାର ବୋଲି ଜଣାପଡ଼ିଛି।

ଏକ ସ୍ୱତନ୍ତ୍ର ପୋଲିସ ଟିମ୍ କର୍ଣ୍ଣାଟକର ରାଜଧାନୀ ବେଙ୍ଗାଲୁରୁରେ ଅଭିଯୁକ୍ତକୁ ଗିରଫ କରିବା ସହ ସେଠାକାର ଏକ ସ୍ଥାନୀୟ ଅଦାଲତରେ ହାଜର କରିଥିଲା। ଆଇନଗତ ପ୍ରକ୍ରିୟା ଶେଷ ହେବା ପରେ ଶୁକ୍ରବାର ସକାଳେ ତାଙ୍କୁ ଟ୍ରେନ୍ ଯୋଗେ ଭୁବନେଶ୍ୱର ଅଣାଯାଇଛି ଏବଂ ଆଜି ତାଙ୍କୁ ସ୍ଥାନୀୟ କୋର୍ଟରେ ହାଜର କରାଯିବାର କାର୍ଯ୍ୟକ୍ରମ ରହିଛି।

କିଛି ଦିନ ପୂର୍ବରୁ ଜଣେ ମହିଳାଙ୍କ ଅଭିଯୋଗ ଆଧାରରେ ରୁଜୁ ହୋଇଥିବା ଏକ ଦୁଷ୍କର୍ମ ମାମଲାରେ ଭଦ୍ରକରୁ ମହିଳା ପୋଲିସ ଅଭିଯୁକ୍ତଙ୍କୁ ଗିରଫ କରିଥିଲା। ପୋଲିସର ସୂଚନାନୁସାରେ, ଅଭିଯୁକ୍ତ ଜଣକ ପୋଲିସ ହେପାଜତରେ ଥିବା ବେଳେ ଏକ କ୍ୟାଣ୍ଟିନରେ ଜଳଖିଆ ଖାଉଥିବା ସମୟରେ ଚକମା ଦେଇ ଖସି ପଳାଇବାରେ ସକ୍ଷମ ହୋଇଥିଲା। ଏହି ଘଟଣା ପରେ କ୍ୟାପିଟାଲ୍ ଥାନାରେ ଏକ ପୃଥକ୍ ମାମଲା ରୁଜୁ ହେବା ସହ ତାଙ୍କୁ ଧରିବା ପାଇଁ ତୀବ୍ର ସର୍ଚ୍ଚ ଅପରେସନ୍ ଆରମ୍ଭ ହୋଇଥିଲା।

କମିଶନରେଟ୍ ପୋଲିସ କହିଛି ଯେ ଅଭିଯୁକ୍ତ ଫେରାର୍ ହେବାର ମାତ୍ର ଗୋଟିଏ ଦିନ ମଧ୍ୟରେ ତାଙ୍କୁ ଟ୍ରାକ୍ କରାଯାଇ ବେଙ୍ଗାଲୁରୁରେ ଠାବ କରାଯାଇଥିଲା। ଦୁଷ୍କର୍ମ ମାମଲା ଏବଂ ହେପାଜତରୁ ଫେରାର୍ ହେବା ଘଟଣାର ଅଧିକ ତଦନ୍ତ ଜାରି ରହିଛି ବୋଲି ପୋଲିସ ଅଧିକାରୀମାନେ ପ୍ରକାଶ କରିଛନ୍ତି।

ଭୁବନେଶ୍ୱର: କମିଶନରେଟ୍ ପୋଲିସ ପକ୍ଷରୁ କରଦାତାମାନଙ୍କ ପାଇଁ ଏକ ସାଇବର ଆଡଭାଇଜରି ଜାରି କରାଯାଇଛି। ବିଳମ୍ବିତ ଆୟକର ରିଟର୍ଣ୍ଣ ବା ଆଇଟିଆର (ITR) ଫାଇଲିଂ ସମୟର ସୁଯୋଗ ନେଇ ସାଇବର ଠକମାନେ ହ୍ୱାଟ୍ସଆପରେ ନକଲି ଆୟକର ନୋଟିସ୍ ପଠାଉଥିବା ନେଇ ପୋଲିସ ସତର୍କ କରାଇଛି।

ଆଡଭାଇଜରି ଅନୁଯାୟୀ, ଠକମାନେ ନିଜକୁ ଆୟକର ବିଭାଗ ବୋଲି ପରିଚୟ ଦେଇ ଲୋକଙ୍କୁ ହ୍ୱାଟ୍ସଆପରେ ବିଭ୍ରାନ୍ତିକର ମେସେଜ୍, ନକଲି ଟ୍ୟାକ୍ସ ନୋଟିସ୍, ସନ୍ଦେହଜନକ ଲିଙ୍କ୍ ଏବଂ ଫାଇଲ୍ ଆଟାଚମେଣ୍ଟ ପଠାଉଛନ୍ତି। ଏହି ମେସେଜଗୁଡ଼ିକ ଏପରି ଭାବରେ ପ୍ରସ୍ତୁତ କରାଯାଇଛି ଯେ ଲୋକମାନେ ତୁରନ୍ତ ଫାଇଲ୍ ଡାଉନଲୋଡ୍ କରିବାକୁ କିମ୍ବା ନିଜର ଗୁରୁତ୍ୱପୂର୍ଣ୍ଣ ବ୍ୟକ୍ତିଗତ ଓ ଆର୍ଥିକ ତଥ୍ୟ ପ୍ରଦାନ କରିବାକୁ ପ୍ରବର୍ତ୍ତାଉଛନ୍ତି। ଅଜଣା ଉତ୍ସରୁ ଆସୁଥିବା .zip କିମ୍ବା .exe ଏକ୍ସଟେନସନ୍ ଥିବା ଫାଇଲ୍ ଡାଉନଲୋଡ୍ ନକରିବାକୁ ପୋଲିସ ପରାମର୍ଶ ଦେଇଛି, କାରଣ ଏଥିରେ ମାଲୱେର୍ ଥାଇପାରେ ଯାହା ଆପଣଙ୍କ ମୋବାଇଲ୍ ଓ କମ୍ପ୍ୟୁଟରକୁ ନିୟନ୍ତ୍ରଣ କରି ଆକ୍ରାନ୍ତ କରିପାରେ।

ଥରେ ଏହି ମାଲୱେର୍ ଇନଷ୍ଟଲ୍ ହୋଇଗଲେ ସାଇବର ଅପରାଧୀମାନେ ବ୍ୟାଙ୍କିଙ୍ଗ୍ ତଥ୍ୟ, ପାସୱାର୍ଡ ଓ ଅନ୍ୟାନ୍ୟ ଗୁପ୍ତ ତଥ୍ୟ ଚୋରି କରି ଆର୍ଥିକ ଠକେଇର ଶିକାର କରିପାରିବେ। ଟ୍ୟାକ୍ସ ରିଫଣ୍ଡ ପାଇବା କିମ୍ବା ଜରିମାନାରୁ ବର୍ତ୍ତିବା ପାଇଁ ଆସୁଥିବା କୌଣସି ଜରୁରୀ ମେସେଜର ଉତ୍ତର ନଦେବାକୁ ନାଗରିକମାନଙ୍କୁ ସତର୍କ କରାଯାଇଛି। କୌଣସି ବି ପଦକ୍ଷେପ ନେବା ପୂର୍ବରୁ କେବଳ ସରକାରୀ ୱେବସାଇଟ୍ ଓ ଚ୍ୟାନେଲ୍ ମାଧ୍ୟମରେ ଆୟକର ନୋଟିସ୍ ବା ଲିଙ୍କର ସତ୍ୟତା ଯାଞ୍ଚ କରିବାକୁ ପରାମର୍ଶ ଦିଆଯାଇଛି।

ଡିଜିଟାଲ୍ ସୁରକ୍ଷା ଉପରେ ଗୁରୁତ୍ୱ ଦେଇ ନିଜର ବ୍ୟାଙ୍କ୍ ଡିଟେଲ୍ସ, ପାସୱାର୍ଡ, ଓଟିପି (OTP) ଏବଂ ଅନ୍ୟାନ୍ୟ ବ୍ୟକ୍ତିଗତ ତଥ୍ୟ କାହା ସହ ସେୟାର୍ ନକରିବାକୁ ପୋଲିସ କରଦାତାମାନଙ୍କୁ ନିବେଦନ କରିଛି। କମିଶନରେଟ୍ ପୋଲିସର ନିରନ୍ତର ସାଇବର ସଚେତନତା ଅଭିଯାନର ଅଂଶବିଶେଷ ସ୍ୱରୂପ ଏହି ଆଡଭାଇଜରି ଜାରି କରାଯାଇଛି।

"ସାଇବର ଠକେଇରୁ ବର୍ତ୍ତିବା ପାଇଁ ସଚେତନତା ହିଁ ସର୍ବୋତ୍ତମ ଅସ୍ତ୍ର। ସତର୍କ ରୁହନ୍ତୁ, ସୁରକ୍ଷିତ ରୁହନ୍ତୁ," ବୋଲି କମିଶନରେଟ୍ ପୋଲିସ ପକ୍ଷରୁ କୁହାଯାଇଛି। ଠକାମିର ଶିକାର ହେଲେ କିମ୍ବା ସନ୍ଦେହଜନକ ମେସେଜ୍ ଆସିଲେ ତୁରନ୍ତ ସମ୍ପୃକ୍ତ ଅଧିକାରୀ ବା ସାଇବର ସେଲକୁ ରିପୋର୍ଟ କରିବାକୁ କୁହାଯାଇଛି।

ଭୁବନେଶ୍ୱର: ରାଜଧାନୀ ଭୁବନେଶ୍ୱରରେ ସୁରକ୍ଷା ବ୍ୟବସ୍ଥାକୁ ନେଇ ପୁଣି ଉଠିଛି ପ୍ରଶ୍ନ। ଶୁକ୍ରବାର ବିଳମ୍ବିତ ରାତିରେ ଲକ୍ଷ୍ମୀସାଗର ଅଞ୍ଚଳରେ ଜଣେ ବିଲ୍ଡରଙ୍କ ଘରୁ ଦୁର୍ବୃତ୍ତମାନେ ପ୍ରାୟ ୨ କୋଟି ଟଙ୍କାରୁ ଅଧିକ ମୂଲ୍ୟର ସମ୍ପତ୍ତି ଲୁଟି ନେଇଥିବା ଅଭିଯୋଗ ହୋଇଛି। ପୋଲିସର ସୂଚନା ଅନୁଯାୟୀ, ଦୁର୍ବୃତ୍ତମାନେ ବିଲ୍ଡର ପ୍ରୀତମ ଜେନାଙ୍କ ଘରର ମୁଖ୍ୟ ଫାଟକ ଭାଙ୍ଗି ଭିତରେ ପ୍ରବେଶ କରିଥିଲେ। ସେମାନେ ଘର ଭିତରେ ଥିବା ସୁନା ଅଳଙ୍କାର, ନଗଦ ଟଙ୍କା, ଦାମୀ ଘଣ୍ଟା ଏବଂ ଏକ ହୀରା ଖଚିତ ବ୍ରେସଲେଟ୍ ଲୁଟି ନେଇଛନ୍ତି। ରାତି ପ୍ରାୟ ୧୦ଟାରୁ ୧୧ଟା ମଧ୍ୟରେ ଏହି ଚୋରି ହୋଇଥିବା ସନ୍ଦେହ କରାଯାଉଛି।

ପ୍ରମାଣ ନଷ୍ଟ କରିବା ଉଦ୍ଦେଶ୍ୟରେ ଅଭିଯୁକ୍ତମାନେ ଘରେ ଲାଗିଥିବା ସିସିଟିଭି ସର୍ଭିଲାନ୍ସ ସିଷ୍ଟମ୍‌ର ହାର୍ଡ ଡିସ୍କ ମଧ୍ୟ ସାଥୀରେ ନେଇଯାଇଛନ୍ତି। ଯାହା ଫଳରେ ଅଭିଯୁକ୍ତଙ୍କୁ ଚିହ୍ନଟ କରିବା ପୋଲିସ ପାଇଁ ଏକ ବଡ଼ ଚ୍ୟାଲେଞ୍ଜ ସୃଷ୍ଟି କରିଛି। ଖବରପାଇ ଲକ୍ଷ୍ମୀସାଗର ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ପୋଲିସ ବିଭିନ୍ନ ଦିଗରୁ ତଦନ୍ତ କରୁଥିବା ବେଳେ ଲୁଟେରାମାନଙ୍କୁ ଧରିବା ପାଇଁ ଉଦ୍ୟମ ଜାରି ରଖିଛି। ତେବେ କମିଶନରେଟ୍ ପୋଲିସ ଅଞ୍ଚଳରେ ନିୟମିତ ପାଟ୍ରୋଲିଂ ସତ୍ତ୍ୱେ ଏତେ ବଡ଼ ଧରଣର ଲୁଟ୍ କିପରି ସମ୍ଭବ ହେଲା, ତାହାକୁ ନେଇ ସ୍ଥାନୀୟ ବାସିନ୍ଦା ଉଦ୍‌ବେଗ ପ୍ରକାଶ କରିଛନ୍ତି।

ଭୁବନେଶ୍ୱର: ଆଇଆଇସି ବିୟୁଟି ମହାନ୍ତିଙ୍କ ସନ୍ଦେହଜନକ ମୃତ୍ୟୁ ଘଟଣାର ତଦନ୍ତ ପ୍ରକ୍ରିୟା ଜୋରଦାର ହୋଇଛି। କମିଶନରେଟ୍ ପୋଲିସ ରାଜ୍ୟ ଫୋରେନ୍ସିକ୍ ସାଇନ୍ସ ଲାବୋରେଟୋରୀରୁ ତାଙ୍କର ଗୋଟିଏ ମୋବାଇଲ୍ ଫୋନର କଲ୍ ବିବରଣୀ ହସ୍ତଗତ କରିଛି। ତେବେ ବର୍ତ୍ତମାନ ସୁଦ୍ଧା ମୃତ୍ୟୁର ପ୍ରକୃତ କାରଣ ସମ୍ପର୍କରେ କୌଣସି ସ୍ପଷ୍ଟ ସୂଚନା ମିଳିପାରି ନାହିଁ।

ଘଟଣାର ସର୍ବଶେଷ ସୂଚନା ଦେଇ କଟକ ଡିସିପି ଋଷିକେଶ ଖିଲାରୀ କହିଛନ୍ତି ଯେ, ଗୋଟିଏ ଫୋନର କଲ୍ ଡାଟା ବିଶ୍ଳେଷଣ କରାଯାଇଥିବା ବେଳେ ଦ୍ୱିତୀୟ ମୋବାଇଲ୍ ଫୋନର ରିପୋର୍ଟକୁ ଅପେକ୍ଷା କରାଯାଇଛି। ବର୍ତ୍ତମାନ ୩ ଟି ସ୍ୱତନ୍ତ୍ର ଟିମ୍ ଏହି ମାମଲାର ତଦନ୍ତ କରୁଛନ୍ତି। ଅଧିକାରୀଙ୍କ ମୃତ୍ୟୁର କାରଣ ଖୋଜିବା ପାଇଁ ପୋଷ୍ଟମର୍ଟମ ରିପୋର୍ଟ, କଲ୍ ରେକର୍ଡ, ଡିଜିଟାଲ୍ ପ୍ରମାଣ ଏବଂ ଅନ୍ୟାନ୍ୟ ଫୋରେନ୍ସିକ୍ ତଥ୍ୟର ତର୍ଜମା କରାଯାଉଛି।

ଏହା ସହିତ ତଦନ୍ତକାରୀ ଦଳ ମୃତ ଅଧିକାରୀଙ୍କ ବ୍ୟାଙ୍କ ଆକାଉଣ୍ଟ ଏବଂ ଆର୍ଥିକ କାରବାରର ମଧ୍ୟ ଯାଞ୍ଚ କରୁଛନ୍ତି। ପୋଲିସର ସୂଚନାନୁସାରେ, ଏପର୍ଯ୍ୟନ୍ତ କୌଣସି ସନ୍ଦେହଜନକ ଆର୍ଥିକ କାରବାର ଧରାପଡ଼ି ନାହିଁ। ଘଟଣା ଘଟିବା ପୂର୍ବରୁ ବିଉଟି ମହାନ୍ତିଙ୍କ ସହିତ ବାରମ୍ବାର ଟେଲିଫୋନରେ କଥା ହୋଇଥିବା ବ୍ୟକ୍ତିମାନଙ୍କୁ ପୋଲିସ ପଚରାଉଚରା କରୁଛି। ସେମାନଙ୍କର ବୟାନ ତଦନ୍ତରେ ସହାୟକ ହେବ ବୋଲି ଆଶା କରାଯାଉଛି। ଅଧିକ ଫୋରେନ୍ସିକ୍ ରିପୋର୍ଟ ଆସିବା ପରେ ପୋଲିସ ଏକ ନିର୍ଦ୍ଦିଷ୍ଟ ନିଷ୍କର୍ଷରେ ପହଞ୍ଚିପାରିବ ବୋଲି ଜଣାପଡିଛି।

ଭାରତର ଉପରାଷ୍ଟ୍ରପତି ସି. ପି. ରାଧାକୃଷ୍ଣନ ଆସନ୍ତାକାଲି ଅର୍ଥାତ ଜୁଲାଇ ୯ ତାରିଖରେ ଓଡ଼ିଶା ଗସ୍ତରେ ଆସୁଛନ୍ତି। ଉପରାଷ୍ଟ୍ରପତିଙ୍କ ଏହି ଗସ୍ତକୁ ଦୃଷ୍ଟିରେ ରଖି ରାଜଧାନୀ ଭୁବନେଶ୍ୱରରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି। ଭିଆଇପି କନଭୟର ସୁଗମ ଯାତାୟାତ ପାଇଁ କମିଶନରେଟ୍ ପୋଲିସ ପକ୍ଷରୁ ସହରର ବିଭିନ୍ନ ପ୍ରମୁଖ ରାସ୍ତାରେ ଟ୍ରାଫିକ୍ କଟକଣା ଜାରି କରାଯାଇଛି। ଏହି କଟକଣା ମୁଖ୍ୟତଃ ଏୟାରପୋର୍ଟ ଛକ ଠାରୁ ଆରମ୍ଭ କରି ଓୟୁଏଟି (OUAT) ଛକ ଏବଂ ଖୋର୍ଦ୍ଧା ସ୍ଥିତ ନାଇଜର (NISER) ପର୍ଯ୍ୟନ୍ତ ଲାଗୁ ହେବ।

କେଉଁ ସମୟରେ କେଉଁ ରାସ୍ତା ରହିବ ବନ୍ଦ?

କମିଶନରେଟ୍ ପୋଲିସ ପକ୍ଷରୁ ଜାରି କରାଯାଇଥିବା ଆଡଭାଇଜରି ଅନୁଯାୟୀ, ଗୁରୁବାର ଦିନ ଭିନ୍ନ ଭିନ୍ନ ପର୍ଯ୍ୟାୟରେ ଟ୍ରାଫିକ୍ ନିୟନ୍ତ୍ରଣ କରାଯିବ:

* ସକାଳ ୧୦:୨୫ ରୁ ୧୦:୪୫ ମିନିଟ୍: ଏହି ସମୟ ମଧ୍ୟରେ ଏୟାରପୋର୍ଟ ଛକ, ହସ୍ପିଟାଲ ଛକ, ଏଜି ଛକ, ଲୋକଭବନ ଛକ, ଗୋପବନ୍ଧୁ ଛକ ଏବଂ ଓୟୁଏଟି ଛକ ରାସ୍ତାରେ ସାଧାରଣ ଯାନବାହନ ଚଳାଚଳ ବନ୍ଦ ରହିବ।

* ଦିନ ୧୨:୨୫ ରୁ ୧୨:୪୦ ମିନିଟ୍: ଏହି ସମୟରେ ଓୟୁଏଟି ଛକରୁ ଲୋକଭବନ ଛକ ଏବଂ ଗୋପବନ୍ଧୁ ଛକ ଦେଇ ଯାଉଥିବା ରାସ୍ତାରେ କଟକଣା ଲାଗୁ ହେବ।

* ଅପରାହ୍ଣ ୧:୪୦ ରୁ ୨:୩୦ ମିନିଟ୍: ଏହି ଅବଧିରେ ଲୋକଭବନ ଛକ, ପାୱାର ହାଉସ୍ ଛକ, ୧୨୦ ବାଟାଲିୟନ ଛକ, ଶାସ୍ତ୍ରୀ ନଗର ଛକ, ବେହେରା ସାହି ଛକ, ଜୟଦେବ ବିହାର, ଏନଏଚ୍-୧୬ ଖୋର୍ଦ୍ଧା ବାଇପାସ୍ ରାସ୍ତା, କାର୍ମେଲ ସ୍କୁଲ ଛକ, ଖୋଳଦ୍ୱାର ଛକ, ପଦନପୁର ଛକ ଏବଂ ନାଇଜର (NISER) ରାସ୍ତାରେ ଟ୍ରାଫିକ ବନ୍ଦ ରହିବ।

* ଅପରାହ୍ଣ ୩:୫୫ ରୁ ୫:୨୫ ମିନିଟ୍: ଉପରାଷ୍ଟ୍ରପତିଙ୍କ ପ୍ରତ୍ୟାବର୍ତ୍ତନ ସମୟରେ ନାଇଜରରୁ ଏୟାରପୋର୍ଟ ଛକ ପର୍ଯ୍ୟନ୍ତ ଉପରୋକ୍ତ ସମସ୍ତ ରାସ୍ତାରେ ସମାନ କଟକଣା ବଳବତ୍ତର ରହିବ।

ପୋଲିସର ନିବେଦନ ଏବଂ ଜରୁରୀକାଳୀନ ସେବା

ସହରରେ ଟ୍ରାଫିକ ସମସ୍ୟାକୁ ଏଡାଇବା ପାଇଁ ରାଜଧାନୀବାସୀ ଏହି ସମୟରେ ବୈକଳ୍ପିକ ରାସ୍ତା ବ୍ୟବହାର କରିବାକୁ କମିଶନରେଟ୍ ପୋଲିସ ପକ୍ଷରୁ ପରାମର୍ଶ ଦିଆଯାଇଛି। ଯାତ୍ରୀମାନେ ନିଜର ଯାତ୍ରା ପୂର୍ବରୁ ଯୋଜନା କରିବା ସହ ଟ୍ରାଫିକ ପୋଲିସକୁ ସହଯୋଗ କରିବାକୁ ନିବେଦନ କରାଯାଇଛି। ତେବେ ଏହି ସମୟରେ ଆମ୍ବୁଲାନ୍ସ ଏବଂ ଅଗ୍ନିଶମ ଗାଡ଼ି ଭଳି ଜରୁରୀକାଳୀନ ଯାନବାହନ ପାଇଁ କୌଣସି କଟକଣା ରହିବ ନାହିଁ ଏବଂ ସେଗୁଡ଼ିକ ଅବାଧରେ ଯାତାୟାତ କରିପାରିବେ ବୋଲି ପୋଲିସ ସ୍ପଷ୍ଟ କରିଛି।

ଉପରାଷ୍ଟ୍ରପତିଙ୍କ କାର୍ଯ୍ୟକ୍ରମ

ସୂଚନାଯୋଗ୍ୟ ଯେ, ଉପରାଷ୍ଟ୍ରପତି ତାଙ୍କର ଏହି ଗସ୍ତ କାଳରେ ଖୋର୍ଦ୍ଧା ସ୍ଥିତ ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ସାଇନ୍ସ ଏଜୁକେସନ୍ ଆଣ୍ଡ ରିସର୍ଚ୍ଚ (ନାଇଜର)ର ୧୫ତମ ସମାବର୍ତ୍ତନ ଉତ୍ସବରେ ମୁଖ୍ୟ ଅତିଥି ଭାବେ ଯୋଗଦେବେ। ଏହା ସହିତ ସେ ଭାରତୀୟ ପତାକାବାହୀ ଜାହାଜ ମାନଙ୍କ ପାଇଁ ହାଇ-ସି ଫିସିଂ ସମ୍ପର୍କିତ 'ଲେଟର୍ ଅଫ୍ ଅଥରାଇଜେସନ୍'ର ଜାତୀୟ ଶୁଭାରମ୍ଭ କାର୍ଯ୍ୟକ୍ରମରେ ମଧ୍ୟ ଅଂଶଗ୍ରହଣ କରିବାର କାର୍ଯ୍ୟକ୍ରମ ରହିଛି।

ଭୁବନେଶ୍ୱର: ଭୁବନେଶ୍ବର ଡିସିପି ଜଗମୋହନ ମୀନାଙ୍କ ଇସ୍ତଫା । ବ୍ୟକ୍ତିଗତ କାରଣରୁ ଇସ୍ତଫା ଦେଇଥିବା ସୂଚନା । ଭୁବନେଶ୍ୱର ଡେପୁଟି କମିଶନର ଅଫ୍ ପୋଲିସ (ଡିସିପି) ଜଗମୋହନ ମୀନା ରାଜ୍ୟ ସରକାରଙ୍କୁ ନିଜର ଇସ୍ତଫା ପତ୍ର ପ୍ରଦାନ କରିଛନ୍ତି। ସେ ନିଜ ଇସ୍ତଫା ପଛରେ ବ୍ୟକ୍ତିଗତ କାରଣ ଥିବା ଦର୍ଶାଇଛନ୍ତି। ଓଡ଼ିଶା କ୍ୟାଡରର ୨୦୧୩ ବ୍ୟାଚ୍ ଆଇପିଏସ୍ ଅଧିକାରୀ ହେଉଛନ୍ତି ଜଗମୋହନ ମୀନା। 

ଜଗମୋହନ ମୀନା ରାଜ୍ୟ ପୋଲିସ ବିଭାଗରେ ଅନେକ ଗୁରୁତ୍ୱପୂର୍ଣ୍ଣ ପଦବୀରେ କାର୍ଯ୍ୟ କରିଛନ୍ତି। ପୂର୍ବରୁ ସେ ଅନୁଗୋଳ ଏବଂ ଗଞ୍ଜାମ ଜିଲ୍ଲାରେ ଆରକ୍ଷୀ ଅଧୀକ୍ଷକ (ଏସପି) ଭାବେ ଦାୟିତ୍ୱ ତୁଲାଇଛନ୍ତି। ଏହା ସହିତ ସେ କଟକ ସହରାଞ୍ଚଳ ପୋଲିସ ଜିଲ୍ଲାରେ ମଧ୍ୟ ଡିସିପି ଭାବେ କାର୍ଯ୍ୟ କରିଥିଲେ। ଗତ ଫେବୃଆରୀ ୨୮, ୨୦୨୫ ତାରିଖରେ ତାଙ୍କୁ ଭୁବନେଶ୍ୱର ଡିସିପି ଭାବେ ଅବସ୍ଥାପିତ କରାଯାଇଥିଲା।

ରାଜ୍ୟ ସରକାର ଏପର୍ଯ୍ୟନ୍ତ ତାଙ୍କ ଇସ୍ତଫା ଆନୁଷ୍ଠାନିକ ଭାବେ ଗ୍ରହଣ କରିନାହାଁନ୍ତି। କିନ୍ତୁ ତାଙ୍କର ଏହି ହଠାତ୍ ନିଷ୍ପତ୍ତି ପୋଲିସ ମହଲରେ ଆଶ୍ଚର୍ଯ୍ୟ ସୃଷ୍ଟି କରିଛି। ନିକଟରେ ବାଲିଅନ୍ତା ଠାରେ ରେଳ କନଷ୍ଟେବଳ ସୌମ୍ୟ ରଞ୍ଜନ ସ୍ୱାଇଁଙ୍କୁ ଦିନଦ୍ୱିପହରରେ ହତ୍ୟା କରାଯିବା ଘଟଣାକୁ ନେଇ ଭୁବନେଶ୍ୱର-କଟକ କମିଶନରେଟ୍ ପୋଲିସ ଉପରେ ବ୍ୟାପକ ସମାଲୋଚନା ହେଉଛି। ଏହିଭଳି ଏକ ସମ୍ବେଦନଶୀଳ ସ୍ଥିତି ମଧ୍ୟରେ ତାଙ୍କ ଇସ୍ତଫା ପ୍ରଦାନ ସମସ୍ତଙ୍କ ଦୃଷ୍ଟି ଆକର୍ଷଣ କରିଛି। ତେବେ ତାଙ୍କ ନିଷ୍ପତ୍ତିର ପ୍ରକୃତ କାରଣ ଏପର୍ଯ୍ୟନ୍ତ ସରକାରୀ ଭାବେ ଜଣାପଡିନାହିଁ। ତେବେ ତାଙ୍କ ନିଷ୍ପତ୍ତିର ପ୍ରକୃତ କାରଣ ଏପର୍ଯ୍ୟନ୍ତ ସରକାରୀ ଭାବେ ଜଣାପଡିନାହିଁ। ରାଜସ୍ଥାନରେ ଥିବା ଜଣେ ଘନିଷ୍ଠ ସମ୍ପର୍କୀୟଙ୍କର ଏକ ଘରୋଇ କମ୍ପାନୀରେ ସେ ଯୋଗଦେବାର ଯୋଜନା କରୁଥିବା ନେଇ ଚର୍ଚ୍ଚା ହେଉଛି।

ରାଜଧାନୀ ଭୁବନେଶ୍ୱରରେ ଏକ ଚାଞ୍ଚଲ୍ୟକର ହତ୍ୟାକାଣ୍ଡ ଘଟିଛି। ନିଜ ବାନ୍ଧବୀଙ୍କୁ ଏକତରଫା ପ୍ରେମ ଓ ହଇରାଣ କରିବା ଘଟଣାକୁ କେନ୍ଦ୍ର କରି ଦୁଇ ଜଣ ନାବାଳକ ସ୍କୁଲ ଛାତ୍ର ଜଣେ କଲେଜ ଛାତ୍ର ଏବଂ ତାଙ୍କ ବାପାଙ୍କୁ ନିର୍ମମ ଭାବେ ହତ୍ୟା କରିଛନ୍ତି। ଏହି ଘଟଣାରେ ମୃତକଙ୍କ ଭଉଣୀ ମଧ୍ୟ ଗୁରୁତର ଆହତ ହୋଇଛନ୍ତି। ଖଣ୍ଡଗିରି ଥାନା ଅନ୍ତର୍ଗତ କୋଳଥିଆ ଅଞ୍ଚଳରେ ଘଟିଥିବା ଏହି ଡବଲ୍ ମର୍ଡର ମାମଲାରେ କମିଶନରେଟ୍ ପୋଲିସ ଦୁଇ ନାବାଳକ ଅଭିଯୁକ୍ତଙ୍କୁ ଗିରଫ କରିଛି।

ଏକତରଫା ପ୍ରେମରୁ ପ୍ରତିଶୋଧ

ପୋଲିସ ସୂଚନା ଅନୁଯାୟୀ, ମୃତକ ହେଲେ କୃଷ୍ଣ ପ୍ରସାଦ ପାଢ଼ୀ (୨୦) ଏବଂ ତାଙ୍କ ବାପା ହିମାଂଶୁ ପାଢ଼ୀ (୬୫)। କୃଷ୍ଣ ଜଣେ ଯୁକ୍ତ ତିନି ଦ୍ୱିତୀୟ ବର୍ଷର ଛାତ୍ର ଥିଲେ। ସେ ସ୍ଥାନୀୟ ଏକ କୋଚିଂ ସେଣ୍ଟରରେ ପଢ଼ୁଥିବା ବେଳେ ଜଣେ ଛାତ୍ରୀଙ୍କୁ ପ୍ରେମ ନିବେଦନ କରିଥିଲେ। ତେବେ ଛାତ୍ରୀ ଜଣକ ତାଙ୍କ ପ୍ରସ୍ତାବକୁ ପ୍ରତ୍ୟାଖ୍ୟାନ କରିଦେଇଥିଲେ ମଧ୍ୟ ଗତ କିଛି ମାସ ଧରି କୃଷ୍ଣ ତାଙ୍କୁ ଲଗାତାର ହଇରାଣ କରୁଥିଲେ। ଏଥିରେ ଅତିଷ୍ଠ ହୋଇ ଛାତ୍ରୀ ଜଣକ ନିଜର ଦୁଇ ସାଙ୍ଗ (ଯେଉଁମାନେ ଦଶମ ଓ ଦ୍ୱାଦଶ ଶ୍ରେଣୀର ଛାତ୍ର)ଙ୍କୁ ଏ ବିଷୟରେ ଜଣାଇଥିଲେ। ପ୍ରାୟ ୨୦-୨୫ ଦିନ ତଳେ ଦୁଇ ନାବାଳକ କୃଷ୍ଣଙ୍କୁ ଖଣ୍ଡଗିରିର ଏକ ପାର୍କରେ ଭେଟି ବୁଝାଇବାକୁ ଚେଷ୍ଟା କରିଥିଲେ। ମାତ୍ର କୃଷ୍ଣ ଓଲଟା ସେମାନଙ୍କୁ ଆକ୍ରମଣ କରିବା ସହ ଧମକ ଦେଇଥିଲେ, ଯାହା ପରେ ସେମାନେ ପ୍ରତିଶୋଧ ନେବାକୁ ଯୋଜନା କରିଥିଲେ।

ରାତି ଅଧରେ ଘରେ ପଶି ଆକ୍ରମଣ

ଗତ ଜୁନ୍ ୨୮-୨୯ ତାରିଖ ରାତିରେ ଦୁଇ ନାବାଳକ ମୁଖା ପିନ୍ଧିବା ସହ ଲୁହା ରଡ୍ ଓ ଲଙ୍କା ଗୁଣ୍ଡ ଧରି କୃଷ୍ଣଙ୍କ ଘରେ ପହଞ୍ଚିଥିଲେ। ସେମାନେ କାନ୍ଥ ଡେଇଁ ଘରର ମୁଖ୍ୟ କବାଟ ଭାଙ୍ଗି ଭିତରେ ପ୍ରବେଶ କରିଥିଲେ ଏବଂ କୃଷ୍ଣଙ୍କୁ ଲୁହା ରଡରେ ନିର୍ମମ ଆକ୍ରମଣ କରିଥିଲେ। ତାଙ୍କୁ ବଞ୍ଚାଇବାକୁ ଆସିଥିବା ବାପା ହିମାଂଶୁ ଏବଂ ଭଉଣୀ ତାପସୀ (୨୫)ଙ୍କୁ ମଧ୍ୟ ଅଭିଯୁକ୍ତମାନେ ଛାଡ଼ି ନଥିଲେ। ଗୁରୁତର ଅବସ୍ଥାରେ ତିନି ଜଣଙ୍କୁ ତୁରନ୍ତ ଭୁବନେଶ୍ୱର ଏମ୍ସ (AIIMS) ଡାକ୍ତରଖାନାକୁ ନିଆଯାଇଥିଲା, ଯେଉଁଠାରେ ଡାକ୍ତର କୃଷ୍ଣଙ୍କୁ ମୃତ ଘୋଷଣା କରିଥିଲେ। ଚିକିତ୍ସାଧୀନ ଅବସ୍ଥାରେ ମଙ୍ଗଳବାର ଦିନ ବାପା ହିମାଂଶୁଙ୍କର ମଧ୍ୟ ମୃତ୍ୟୁ ଘଟିଥିଲା। ଭଉଣୀ ତାପସୀ ବର୍ତ୍ତମାନ ବି ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି।

ପୋଲିସର କାର୍ଯ୍ୟାନୁଷ୍ଠାନ

ଏହି ଚାଞ୍ଚଲ୍ୟକର ଘଟଣା ପରେ କମିଶନରେଟ୍ ପୋଲିସ, ସାଇଣ୍ଟିଫିକ୍ ଟିମ୍ ଓ ଡଗ୍ ସ୍କ୍ୱାଡ୍ ସହାୟତାରେ ଛାନ୍‌ଭିନ୍ ଆରମ୍ଭ କରିଥିଲା। ଘଟଣାର ୨୪ ଘଣ୍ଟା ମଧ୍ୟରେ ସିସିଟିଭି ଫୁଟେଜ୍ ଓ ଅନ୍ୟାନ୍ୟ ପ୍ରମାଣ ଆଧାରରେ ଟୁଇନ୍ ସିଟି ପୋଲିସ କମିଶନର ଏସ୍. ଦେବଦତ୍ତ ସିଂଙ୍କ ନିର୍ଦ୍ଦେଶକ୍ରମେ ଦୁଇ ନାବାଳକ ଅଭିଯୁକ୍ତ (୧୬ ଓ ୧୭ ବର୍ଷ)ଙ୍କୁ ଧରିବାରେ ପୋଲିସ ସଫଳ ହୋଇଛି। ସେମାନଙ୍କ ନିକଟରୁ ହତ୍ୟାରେ ବ୍ୟବହୃତ ଲୁହା ରଡ୍, ଲଙ୍କା ଗୁଣ୍ଡ ବୋତଲ, ରକ୍ତଭିଜା ପୋଷାକ ଏବଂ ମୋବାଇଲ୍ ଫୋନ୍ ଜବତ କରାଯାଇଛି। ସାମାନ୍ୟ କଥାକଟାକଟିରୁ ଆରମ୍ଭ ହୋଇଥିବା ବିବାଦ ଶେଷରେ ଦୁଇଟି ଜୀବନ ନେବା ଘଟଣା ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳାଇ ଦେଇଛି।