ନୂଆଦିଲ୍ଲୀ: ଫିନଲାଣ୍ଡ ଖୁବଶୀଘ୍ର ନାଟୋ ମେଣ୍ଟରେ ସାମିଲ ହେବାକୁ ଘୋଷଣା କରିବା ପରେ ରୁଷ-ଫିନଲାଣ୍ଡ ମଧ୍ୟରେ ତିକ୍ତତା ବଢିବାରେ ଲାଗିଛି। ଯଦି ଫିନଲାଣ୍ଡ ନାଟୋରେ ସାମିଲ ହୁଏ ତେବେ ଠିକଣା ଜବାବ ଦିଆଯିବ ବୋଲି ରୁଷ ରାଷ୍ଟ୍ରପତି ପୁତିନ ଦୁଇ ଦିନ ତଳେ ଧମକ ଦେଇଥିଲା ବେଳେ ଶନିବାର ଫିନଲାଣ୍ଡକୁ ବିଦ୍ୟୁତ ଯୋଗାଣ ବନ୍ଦ କରିଛନ୍ତି। ଆଗକୁ ଆହୁରି ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ନେଇ ମଧ୍ୟ ପୁତିନ ସଙ୍କେତ ଦେଇଛନ୍ତି। ଏକ ପଡ଼ୋଶୀ ରାଷ୍ଟ୍ର ଭାବେ ଫିନଲାଣ୍ଡ ନାଟୋ ମେଣ୍ଟରେ ସାମିଲ ହେବା ରୁଷ ପ୍ରତି ବିପଦ କହି ଏଥିପାଇଁ ବୈଷୟିକ ଏବଂ ସାମରିକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଥିଲେ। ଏଭଳି ମନ୍ତବ୍ୟ ଜାରି କରିବାର କିଛି ଘଣ୍ଟା ନ ପୂରୁଣୁ ପୁତିନ ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ଏହାକୁ ନେଇ ପୁଣିଥରେ ପୂର୍ବ ୟୁରୋପରେ ସ୍ଥିତି ବିଗିଡିବାର ଆଶଙ୍କା ସୃଷ୍ଟି ହୋଇଛି। ନାଟୋରେ ସାମିଲ ହେବା ଘଟଣାକୁ ନେଇ ରୁଷ ୟୁକ୍ରେନ ବିରୋଧରେ ଯୁଦ୍ଧ ଜାରି ରଖିଛି। ବର୍ତ୍ତମାନ ଫିନଲାଣ୍ଡ ଏବଂ ସ୍ବିଡେନ ନାଟୋରେ ସାମିଲ ହେବାକୁ ଘୋଷଣା କରିଥିବାରୁ ଏହା ପୁତିନଙ୍କ ଚିନ୍ତା ବଢାଇଛି। ତେଣୁ କୌଣସି ମୁହୂର୍ତ୍ତରେ ରାଷ୍ଟ୍ରପତି ପୁତିନ ଏହି ଦୁଇ ରାଷ୍ଟ୍ରଙ୍କ ବିରୋଧରେ କିଛି ବି ପଦକ୍ଷେପ ନେ Cଇପାରନ୍ତି ବୋଲି କୁହାଯାଉଛି। ସେପଟେ ଏହି ଦୁଇ ରାଷ୍ଟ୍ର ନାଟୋରେ ସାମିଲ ହେବା ପ୍ରସ୍ତାବକୁ ତୁର୍କୀ ବିରୋଧ କରିଛି। ତୁର୍କୀ ନାଟୋ ମେଣ୍ଟର ଅନ୍ୟତମ ସଦସ୍ୟ ରହିଛି। କିନ୍ତୁ ଫିନଲାଣ୍ଡ ଏବଂ ସ୍ବିଡେନ କୁର୍ଦ୍ଦିସ ଆତଙ୍କବାଦୀ ଗୋଷ୍ଠୀଙ୍କୁ ସମର୍ଥନ କରୁଥÒବାରୁ ଏଗୁଡିକୁ ନାଟୋରେ ସାମିଲ କରାଯାଇ ପୁଣିଥରେ ଭୁଲ କରାଯିବା ଉଚିତ ନୁହେଁ ବୋଲି ତୁର୍କୀ ରାଷ୍ଟ୍ରପତି ଏର୍ଦୋଗାନ କହିଛନ୍ତି।

ନୂଆଦିଲ୍ଲୀ: ରୁଷ-ୟୁକ୍ରେନ ଯୁଦ୍ଧର ପରିବର୍ତ୍ତିିତ ପରିସ୍ଥିତ ପୁଣିଥରେ ରୁଷ ରାଷ୍ଟ୍ରପତି ପୁତିନଙ୍କ ଚିନ୍ତା ବଢାଇଛି। ରୁଷର ଉତ୍ତର ପଶ୍ଚିମ ସୀମାକୁ ଲାଗି ରହିଥିବା ଫିନଲାଣ୍ଡ ଯଥାଶୀଘ୍ର ସମ୍ଭବ ନାଟୋ ମେଣ୍ଟରେ ଯୋଗ ଦେବାକୁ ଗୁରୁବାର ଘୋଷଣା କରିଛି। କେବଳ ଫିନଲାଣ୍ଡ ନୁହେଁ , ଏହା ପରେ ପରେ ସ୍ବିଡେନ ମଧ୍ୟ ଏହି ମେଣ୍ଟରେ ଯୋଗ ଦେବାକୁ ପ୍ରସ୍ତୁତ ହେଉଥିବା ଜଣାପଡ଼ିବା ପରେ ପୁତିନଙ୍କ କ୍ଷୋଭ ଦ୍ବିଗୁଣିତ ହୋଇଛି। ଏଭଳି ସ୍ଥିତିରେ ରୁଷ ପକ୍ଷରୁ କଡ଼ା ଜବାବ ଦିଆଯିବ ବୋଲି ପୁତିନ ଗୁରୁବାର ଘୋଷଣା କରିଛନ୍ତି। ୟୁକ୍ରେନ ଭଳି ଫିନଲାଣ୍ଡ ନାଟୋ ମେଣ୍ଟରେ ସାମିଲ ହେବା ରୁଷର ରାଷ୍ଟ୍ରୀୟ ସୁରକ୍ଷା ପ୍ରତି ସିଧାସଳଖ ବିପଦ ବୋଲି କହି ଏଥିପାଇଁ ଆମେ ଠିକଣା ଜବାବ ଦେବାକୁ ପ୍ରସ୍ତୁତ ବୋଲି ସେ କହିଛନ୍ତି। ଏପରିକି ଫିନଲାଣ୍ଡ ବିରୋଧରେ ସାମରିକ ଏବଂ ବୈଷୟିକ ସ୍ତରରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପୁତିନ ପରୋକ୍ଷ ଧମକ ଦେଇଛନ୍ତି।

ଏଭଳି ସ୍ଥତି କେବଳ ୟୁକ୍ରେନ ଯୁଦ୍ଧ ନୁହେଁ, ବରଂ ବିଶ୍ବ ଯୁଦ୍ଧ ପାଇଁ ବାଟ କଢାଇବ ବୋଲି ଆଶଙ୍କା ପ୍ରକାଶ ପାଇଛି। କାରଣ ଫିନଲାଣ୍ଡ ଏବଂ ସ୍ବିଡେନ ନାଟୋରେ ସାମିଲ ହେଲେ ପୂରା ପୂର୍ବ ୟୁରୋପ ସହ ରୁଷିଆର ତିକ୍ତତା ବଢିବ ଏବଂ ଏହା ପରବର୍ତ୍ତୀ ସମୟରେ ମହାଯୁଦ୍ଧରେ ପରିଣତ ହେବାର ଆଶଙ୍କା ରହିଛି। ରୁଷିଆର ପଶ୍ଚିମ ସୀମାକୁ ଲାଗି ରହିଥିବା କିମ୍ବା ଏହାର ନିକଟବର୍ତ୍ତୀ ପଡୋଶୀ ପ୍ରାୟ ସମସ୍ତ ରାଷ୍ଟ୍ର ପୂର୍ବରୁ ନାଟୋ ମେଣ୍ଟରେ ସାମିଲ ହୋଇସାରିଛନ୍ତି। ଏହାର ପଶ୍ଚିମ ସୀମାରେ ଥିବା ଏକମାତ୍ର ରାଷ୍ଟ୍ର ବେଲାରୁଷକୁ ବାଦ୍‌ଦେଲେ ପୂର୍ବରୁ ଇସ୍ତୋନିଆ, ଲାଟିଭିଆ ,ଲିଥୁଆନିଆ ଏବଂ ପୋଲାଣ୍ଡ ଆଦି ରାଷ୍ଟ୍ର ନାଟୋ ମେଣ୍ଟରେ ରହିଛନ୍ତି। ୟୁକ୍ରେନ ଏହିକ୍ରମରେ ସାମିଲ ହେବାକୁ ଉଦ୍ୟମ କରିବା ପରେ ଯୁଦ୍ଧର ସୂତ୍ରପାତ ହୋଇଥିଲା। କିନ୍ତୁ ଶୀତଳ ଯୁଦ୍ଧ ସମୟରୁ ନିରପେକ୍ଷତା ଅବଲମ୍ବନ କରି ଆସିଥିବା ଦୁଇ ନର୍‌ଡିକ ରାଷ୍ଟ୍ର ଫିନଲାଣ୍ଡ ଏବଂ ସ୍ବିଡେନ ନାଟୋରେ ସାମିଲ ହେବାର ପ୍ରସ୍ତୁତି ରୁଷ ପାଇଁ ଆହୁରି ଚିନ୍ତା ବଢାଇଛି। କାରଣ ୟୁକ୍ରେନ ସମେତ ଏହି ଦୁଇ ରାଷ୍ଟ୍ର ଯଦି ନାଟୋରେ ସାମିଲ ହୁଅନ୍ତି ତେବେ ରୁଷିଆର ପଶ୍ଚିମ ସୀମାରେ ନାଟୋ ଶକ୍ତି ସଶକ୍ତ ହୋଇପଡ଼ିବ। ପୂର୍ବରୁ ୟୁକ୍ରେନକୁ ଆମେରିକା ସମେତ ପାଶ୍ଚାତ୍ୟ ରାଷ୍ଟ୍ରମାନଙ୍କ ଅସ୍ତ୍ରଶସ୍ତ୍ର ଯୋଗାଣକୁ ନେଇ ରାଷ୍ଟ୍ରପତି ପୁତିନ କ୍ଷୁବ୍ଧ ରହିଥିଲା ବେଳେ ୟୁକ୍ରେନ ଉପରେ ଶେଷ ଅସ୍ତ୍ର ଭାବେ ଆଣବିକ ଅସ୍ତ୍ର ପ୍ରୟୋଗ କରିବାକୁ ପୁତିନ ସଙ୍କେତ ଦେଇସାରିଛନ୍ତି। ତେବେ ଆଜିର ଘଟଣା ପରେ ପୁତିନ ପୁଣି ମୁହଁ ଖୋଲିବା ସହିତ ଏହା ଆମ ରାଷ୍ଟ୍ରୀୟ ସୁରକ୍ଷା ପ୍ରତି ବିପଦ ଆସିଛି ବୋଲି କହିଛନ୍ତି। ତେଣୁ କେଉଁ ମୁହୂର୍ତ୍ତରେ ସେ କଠିନ ପଦକ୍ଷେପ ଉଠାଇପାରନ୍ତି ବୋଲି କୁହାଯାଉଛି। ଏହିକ୍ରମରେ ଗୁରୁବାର ରୁଷ ସେନା ୟୁକ୍ରେନର ବିଭିନ୍ନ ଅଞ୍ଚଳରେ ଆକ୍ରମଣ ଜୋରଦାର କରିଛି। ଲୁହାନସ୍କ ସହରରେ ଗତ ୨୪ ଘଣ୍ଟା ମଧ୍ୟରେ ୨୬ ବୋମାମାଡ଼ କରାଯାଇଥÒଲା ବେଳେ ଚେର୍ନୋହିବସ୍ଥିତ ୟୁକ୍ରେନର ଦୁଇଟି ପ୍ରମୁଖ ଅସ୍ତ୍ର ଡିପୋ ଉପରେ ମଧ୍ୟ ଆକ୍ରମଣ କରାଯାଇଥÒବା ଜଣାପଡ଼ିଛି।