ଭୁବନେଶ୍ଵର: ଭିଜିଲାନ୍ସ ଜାଲରେ ସରକାରୀ ବନ ଅଧିକାରୀ । ଲାଞ୍ଚ ନେଲାବେଳେ ଭିଜିଲାନ୍ସ ପଞ୍ଝାରେ ପଡିଲେ ବ୍ରଜରାଜନଗର ରେଞ୍ଜ ବନ୍ଧବାହାଲ ସେକ୍ସନର ବନ ଅଧିକାରୀ ଗୌରାଙ୍ଗ ସାହୁ । ଜଣେ ବ୍ୟକ୍ତିଙ୍କଠାରୁ ୫ ହଜାର ଟଙ୍କା ଲାଞ୍ଚ ନେବାବେଳେ ଗୌରାଙ୍ଗ ସାହୁଙ୍କୁ ମାଡିବସିଲା ଭିଜିଲାନ୍ସ ବିଭାଗ । ଏକ ମାମଲା ରୁଜୁ କରି ଗୌରାଙ୍ଗଙ୍କ ଦୁଇଟି ସ୍ଥାନରେ ଚଢାଉ କରିଛି ଭିଜିଲାନ୍ସ ।

ସୂଚନାନୁଯାୟୀ, ଜଣେ ବ୍ୟକ୍ତିଙ୍କୁ ତାଙ୍କ ଜମିରୁ ଶୁଖିଲା ନୀଳଗିରି ଗଛ କାଟିବା ଏବଂ ପରିବହନ ପାଇଁ ଅନୁମତି ଦେବା ପାଇଁ ୫ ହଜାର ଟଙ୍କା ଲାଞ୍ଚ ମାଗିଥିଲେ ବନ୍ଧବାହାଲ ସେକ୍ସନର ଫରେଷ୍ଟର ଗୌରାଙ୍ଗ ସାହୁ । ଉକ୍ତ ବ୍ୟକ୍ତି ଜଣଙ୍କ ଭିଜିଲାନ୍ସର ଦ୍ଵାରସ୍ଥ ହୋଇଥିଲେ। ପୂର୍ବ ପ୍ରସ୍ତୁତି ମୁତାବକ ଆଜି ଫରେଷ୍ଟର ଗୌରାଙ୍ଗ ସାହୁ ଜମି ମାଲିକଙ୍କ ଠାରୁ ଲାଞ୍ଚ ନେବା ବେଳେ ଭିଜିଲାନ୍ସର ଏକ ଟିମ୍ ମାଡ଼ି ବସିଥିଲା। ଭିଜିଲାନ୍ସ ଫରେଷ୍ଟରଙ୍କ ଠାରୁ ଲାଞ୍ଚ ଟଙ୍କା ଜବତ କରିବା ସହ ତାଙ୍କୁ ଅଟକ ରଖିଛି। ଏକ ମାମଲା ରୁଜୁ କରି ଦୁଇଟି ସ୍ଥାନରେ ଚଢାଉ କରିଛି।

ବ୍ରଜରାଜନଗର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଭିଡିଓ କନ୍‌ଫରେନ୍‌ସିଂ ଜରିଆରେ ପୂର୍ବତନ ବାଚସ୍ପତି ସ୍ୱର୍ଗତ କିଶୋର ମହାନ୍ତିଙ୍କ ପ୍ରତିମୂର୍ତ୍ତି ଉନ୍ମୋଚନ କରିଛନ୍ତି। ବ୍ରଜରାଜନଗରରେ ସ୍ୱର୍ଗତ କିଶୋର ମହାନ୍ତିଙ୍କ ଏହି ପ୍ରତିମୂର୍ତ୍ତି ଉନ୍ମୋଚିତ ହୋଇଛି ।

ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି ଯେ କିଶୋର ବାବୁଙ୍କ ସରଳତା ତାଙ୍କର ବଡ ପରିଚୟ ଥିଲା। ଦଳମତ ନିର୍ବିଶେଷରେ ସେ ସମସ୍ତଙ୍କର ପ୍ରିୟପାତ୍ର ହୋଇପାରିଥିଲେ। ତୃଣମୂଳ ସ୍ତରରୁ ରାଜନୀତି ଆରମ୍ଭ କରି ସେ ସରକାରୀ ମୁଖ୍ୟ ସଚେତକ, ସାଂସଦ, ପଶ୍ଚିମ ଓଡିଶା ବିକାଶ ପରିଷଦର ଅଧ୍ୟକ୍ଷ ଏବଂ ରାଜ୍ୟ ବିଧାନ ସଭାର ବାଚସ୍ପତି ମଧ୍ୟ ହୋଇଥିଲେ। ବିଜୁ ଜନତା ଦଳର ସେ ଜଣେ ଦକ୍ଷ ସଂଗଠକ ଓ ନେତା ଥିଲେ। ଦଳକୁ ମଜବୁତ କରିବାରେ ତାଙ୍କର ବହୁତ ଅବଦାନ ଥିଲା।

କାର୍ଯ୍ୟକ୍ରମରେ ସ୍ୱାସ୍ଥ୍ୟମନ୍ତ୍ରୀ ନବ ଦାସ ଯୋଗ ଦେଇ କହିଛନ୍ତି ଯେ ସ୍ୱର୍ଗତ କିଶୋର ବାବୁଙ୍କ ସହିତ ତାଙ୍କର ଘନିଷ୍ଠ ସଂପର୍କ ଥିଲା। ସେ ସମସ୍ତଙ୍କର ପ୍ରିୟପାତ୍ର ଥିଲେ । ପଶ୍ଚିମ ଓଡିଶା ବିକାଶ ପରିଷଦର ଅଧ୍ୟକ୍ଷ ଭାବରେ ସେ ଅନେକ ଉନ୍ନୟନମୂଳକ କାମ କରିଯାଇଛନ୍ତି।

ବିଧାୟକ ତଥା ସ୍ୱର୍ଗତ ମହାନ୍ତିଙ୍କ ପତ୍ନୀ ଅଳକା ମହାନ୍ତି ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ପ୍ରକାଶ କରି କହିଛନ୍ତି ଯେ ସ୍ୱର୍ଗତ କିଶୋର ମହାନ୍ତି ବ୍ରଜରାଜନଗର ତଥା ସମଗ୍ର ପଶ୍ଚିମ ଓଡିଶାର ଲୋକଙ୍କ ହୃଦୟରେ ସବୁ ଦିନ ପାଇଁ ଅମର ହୋଇ ରହିବେ।

ବ୍ରଜରାଜନଗର: ବ୍ରଜରାଜନଗର ଉପନିର୍ବାଚନରେ ବିଜେଡିର ବାଜିମାତ । ବୃହତ ବିଜୟ ହାସଲ କରିଛନ୍ତି ବିଜୁ ଜନତା ଦଳର ପ୍ରାର୍ଥୀ ଅଳକା ମହାନ୍ତି । ୬୬ ହଜାର ୧୨୨ ଭୋଟରେ ବିଜୟ ଲାଭ କଲେ ବିଜେଡି ପ୍ରାର୍ଥୀ ଅଳକା ମହାନ୍ତି । ବିଜୟ ପରେ ବିଜୟ ଉତ୍ସବ ମନାଉଛନ୍ତି ବିଜେଡି କର୍ମୀ । କଂଗ୍ରେସ ପ୍ରାର୍ଥୀ କିଶୋର ପଟେଲଙ୍କୁ ହରାଇଲେ ଅଳକା । ବିଜେପି ପ୍ରାର୍ଥୀ ରାଧାରାଣୀ ପଣ୍ଡା ତୃତୀୟ ସ୍ଥାନରେ ରହିଛନ୍ତି ।

ଚଳିତ ଉପନିର୍ବାଚନରେ ବିଜେପିକୁ ପଛରେ ପକାଇ ବ୍ରଜରାଜନଗରରେ ଦ୍ବିତୀୟ ସ୍ଥାନରେ ରହିଛି କଂଗ୍ରେସ । ଗଣତି ପରଠାରୁ ଦ୍ବିତୀୟ ସ୍ଥାନ ପାଇଁ ବିଜେପି ଓ କଂଗ୍ରେସ ମଧ୍ୟରେ କଡ଼ା ମୁକାବିଲା ହୋଇଥିଲା । ତେବେ ବିବେକର ଏହି ମୁକାବିଲାରେ କଂଗ୍ରେସ ଆଗେଇ ଦ୍ବିତୀୟ ସ୍ଥାନ ହାସଲ କରିଛି । କଂଗ୍ରେସ ବ୍ରଜରାଜନଗରରେ ଏକ ହୋଇ ଲଢ଼େଇ କରିଥିଲା । ସବୁ ବିଧାୟକ ଗାଁ ଗାଁ ବୁଲି ପ୍ରଚାର କରିଥିଲେ । ଯାହାର ଫଳ ବ୍ରଜରାଜନଗର ଉପନିର୍ବାଚନରେ ଦେଖିବାକୁ ମିଳିଛି । ଉଭୟ ବିଜେପି ଓ କଂଗ୍ରେସ କେନ୍ଦ୍ରୀୟ ନେତାଙ୍କ ଉପରେ ଭରସା କରିଥିଲେ ମଧ୍ୟ ବିଜେପିକୁ ଲୋକ ସଂପୂର୍ଣ୍ଣ ପ୍ରତ୍ୟାଖ୍ୟାନ କରିଛନ୍ତି । କଂଗ୍ରେସକୁ ପ୍ରଚାରର ଫଳ ମିଳିଥିବା ଦଳ କହିଛି ।

ସ୍ୱର୍ଗତ ବିଧାୟକ କିଶୋର କୁମାର ମହାନ୍ତିଙ୍କ ଧର୍ମପତ୍ନୀ ହେଉଛନ୍ତି ଅଳକା ମହାନ୍ତି । ବିଜେଡି ବିଧାୟକ କିଶୋର କୁମାର ମହାନ୍ତିଙ୍କ ଅକାଳ ବିୟୋଗ ପରେ ବ୍ରଜରାଜନଗର ବିଧାନସଭା ପାଇଁ ଉପନିର୍ବାଚନ ହୋଇଥିଲା । ମେ ୩୧ ତାରିଖରେ ମତଦାନ ହେବା ପରେ ଆଜି ଉପନିର୍ବାଚନର ଫଳାଫଳ ପ୍ରକାଶ ପାଇଛି। ବିପୁଳ ସମର୍ଥନରେ ବିଜେଡି ପ୍ରାର୍ଥୀ ଅଳକା ବାଜିମାତ୍ କରିଛନ୍ତି।

ଭୁବନେଶ୍ୱର : ଚଳିତ ମାସ ୩୧ ତାରିଖରେ ଝାରସୁଗୁଡ଼ା ଜିଲ୍ଲା ବ୍ରଜରାଜନଗର ବିଧାନସଭା ଆସନରେ ଉପନିର୍ବାଚନ ଅନୁଷ୍ଠିତ ହେବାକୁ ଯାଉଛି। ଏହି ପରିପ୍ରେକ୍ଷୀରେ ରବିବାର ପ୍ରଚାର ଶେଷ ହେଉଛି। ନିର୍ବାଚନ ପ୍ରକ୍ରିୟାକୁ ସମ୍ପୂର୍ଣ୍ଣ ସ୍ୱଚ୍ଛ, ଅବାଧ କରିବା ଉପରେ ମୁଖ୍ୟ ନିର୍ବାଚନ କମିସନର(ସିଇଓ) ସୁଶୀଲ କୁମାର ଲୋହାନୀ ଗୁରୁତ୍ୱାରୋପ କରିଛନ୍ତି। ଶ୍ରୀ ଲୋହାନୀ ଶନିବାର ନିର୍ବାଚନ ପ୍ରକ୍ରିୟା ସମ୍ପର୍କିତ ସମୀକ୍ଷା କରିଛନ୍ତି। ଶ୍ରୀ ଲୋହାନୀ ଭିଡିଓ କନଫରେନ୍ସିଂ ମାଧ୍ୟମରେ ଝାରସୁଗୁଡ଼ା ଜିଲ୍ଲା ପ୍ରଶାସନର ବରିଷ୍ଠ ଅଧିକାରୀମାନଙ୍କ ସହ ନିର୍ବାଚନ ପ୍ରସ୍ତୁତି ସଂକ୍ରାନ୍ତ ଆଲୋଚନା କରିଛନ୍ତି।

ଉପନିର୍ବାଚନ ନେଇ ଅତିରିକ୍ତ ବୁଥ୍‍ ସ୍ଥାପନ, ସୁରୁଖୁରୁରେ ସେଣ୍ଟର ଗୁଡ଼ିକୁ ନିର୍ବାଚନ ସାମଗ୍ରୀ ପ୍ରେରଣ, ଭୋଟର ଏବଂ ନିର୍ବାଚନ ପ୍ରକ୍ରିୟାରେ ସାମିଲ ଥିବା କର୍ମଚାରୀଙ୍କ ପାଇଁ ପାନୀୟ ଜଳ ବ୍ୟବସ୍ଥା ସମ୍ପର୍କରେ ସେ ପଚାରି ବୁଝିଛନ୍ତି। ପ୍ରତି ବୁଥ୍‍ରେ ପର୍ଯ୍ୟାପ୍ତ ସୁରକ୍ଷା କର୍ମୀ ମୁତୟନ, ଦିବ୍ୟାଙ୍ଗ ଭୋଟରଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା, ମଡେଲ ବୁଥ୍‍ ପ୍ରସ୍ତୁତି, ଭୋଟଦାନ ପୂର୍ବରୁ ସମସ୍ତ ମଦ ଦୋକାନ ସିଲ୍‍ କରିବା ବିଷୟରେ ଆଲୋଚନା କରାଯାଇଥିଲା। ବୈଠକରେ ଝାରସୁଗୁଡ଼ା ଜିଲ୍ଲାପାଳ ସରୋଜ କୁମାର ସାମଲ, ରିଟର୍ଣ୍ଣିଂ ଅଧିକାରୀ ଦୟାମୟ ପାଢ଼ୀ, ଅତିରିକ୍ତ ଜିଲ୍ଲାପାଳ, ଆରକ୍ଷୀ ଅଧୀକ୍ଷକ, ସିଡିଏମଓ ଏବଂ ଅତିରିକ୍ତ ମୁଖ୍ୟ ନିର୍ବାଚନ ଅଧିକାରୀ ପ୍ରମୁଖ ଉପସ୍ଥିତ ରହିଥିଲେ।

ଭୁବନେଶ୍ୱର :  ବ୍ରଜରାଜନଗର ମହାସମର ପାଇଁ ପ୍ରସ୍ତୁତ ହୋଇଛି କ୍ଷେତ୍ର। ରାଜ୍ୟର ୩ ପ୍ରମୁଖ ରାଜନୈତିକ ଦଳ ବିଜେଡି, ବିଜେପି ଓ କଂଗ୍ରେସ ନିଜନିଜ ପ୍ରାର୍ଥୀଙ୍କ ନାମ ଘୋଷଣା କରିବା ପରେ ବଢ଼଼ିଛି ରାଜନୈତିକ ଉଷ୍ଣତା। ପରଲୋକଗତ ବିଧାୟକ କିଶୋର ମହାନ୍ତିଙ୍କ ଅବର୍ତ୍ତମାନରେ ତାଙ୍କ ପତ୍ନୀ ଅଳକାଙ୍କୁ ପ୍ରାର୍ଥୀ ଘୋଷଣା କରିଥିବାବେଳେ ପୂର୍ବତନ ବିଧାୟିକା ରାଧାରାଣୀ ପଣ୍ଡା ବିଜେପି ଓ କିଶୋର ମହାନ୍ତି କଂଗ୍ରେସର ପ୍ରାର୍ଥୀ ଭାବରେ ମନୋନୀତ ହୋଇଛନ୍ତି। ଏହି ପରିପ୍ରେକ୍ଷୀରେ ଆଗାମୀ ଉପନିର୍ବାଚନ ଅତ୍ୟନ୍ତ ରୋଚକ ହେବା ସମ୍ଭାବନା ସୃଷ୍ଟି ହୋଇଛି। ରାଧାରାଣୀଙ୍କ ପ୍ରାର୍ଥିତ୍ୱକୁ ନେଇ ବିଜେପିରେ କନ୍ଦଳ ସୃଷ୍ଟି ହୋଇଛି ଏବଂ ଦିନକ ତଳେ ଜିଲ୍ଲା ସଭାପତି ନିଜ ପଦରୁ ଇସ୍ତଫା ଦେଇଛନ୍ତି। ଅନୁରୂପ ଭାବରେ ଦୀର୍ଘଦିନ ଧରି ସ୍ଥାନୀୟ ରାଜନୀତିର ଅନ୍ତର୍ଧାନ କିଶୋର ପଟେଲଙ୍କ ପୁନଃ ଆବିର୍ଭାବ ସ୍ଥାନୀୟ କଂଗ୍ରେସ ସଙ୍ଗଠନକୁ ପୁନର୍ଜୀବିତ କରିବାର ସମ୍ଭାବନା ଆରମ୍ଭରୁ ବିଜେଡିକୁ ସୁବିଧାଜନକ ସ୍ଥିତିରେ ପହଞ୍ଚାଇଛି। ଯେଉଁଥିପାଇଁ ଗତ ନିର୍ବାଚନରେ କିଶୋର ପାଇଥିବା ୮୦ ହଜାର ଭୋଟକୁ ଚଳିତ ଉପନିର୍ବାଚନରେ ଅନ୍ୟୂନ ଲକ୍ଷେରେ ପହଞ୍ଚାଇବାକୁ ବିଜେଡି ରଣନୀତି ପ୍ରସ୍ତୁତ କରିଛି।

ବର୍ତ୍ତମାନର ରାଜନୈତିକ ସମୀକରଣ, ଦଳୀୟ ସ୍ଥିତି ସର୍ବୋପରି ଭୋଟରଙ୍କ ମାନସିକତାକୁ ଦେଖିଲେ ପରଖିଲେ ଶାସକ ଦଳର ପ୍ରାର୍ଥୀ ଅଳକା ମହାନ୍ତି ନିଜର ପ୍ରତିଦ୍ୱନ୍ଦୀଙ୍କଠାରୁ ଯଥେଷ୍ଟ ଆଗରେ ରହିଛନ୍ତି। ନିକଟରେ ଅନୁଷ୍ଠିତ ଉଭୟ ପଞ୍ଚାୟତ ଓ ପୌର ନିର୍ବାଚନରେ ଦଳର ବିପୁଳ ବିଜୟ ବିଜେଡି ପାଇଁ ଅନୁକୂଳ ପରିବେଶ ସୃଷ୍ଟି କରିଛି। ଅନ୍ୟପକ୍ଷରେ ପରଲୋକଗତ ବିଧାୟକ କିଶୋର ମହାନ୍ତିଙ୍କ ଲୋକପ୍ରିୟତା ଏବଂ ତାଙ୍କ ଅବର୍ତ୍ତମାନରେ ପତ୍ନୀ ଅଳକାଙ୍କ ପ୍ରତି ସୃଷ୍ଟି ହୋଇଥିବା ଅନୁକମ୍ପା ଦଳ ପାଇଁ ଉପଯୋଗୀ ହେବା କୁହାଯାଉଛି। ସର୍ବୋପରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଭାବମୂର୍ତ୍ତି ଆଗରେ ବିରୋଧୀଙ୍କ ସବୁ ରଣନୀତି ଫେଲ୍‍ ମାରୁଥିବା ବେଳେ ସରକାରଙ୍କ ବିକାଶମୂଳକ କାର୍ଯ୍ୟକ୍ରମ ଦଳକୁ ସହଜ ଏବଂ ବିପୁଳ ବିଜୟ ଆଣିଦେବ ବୋଲି ଦଳୀୟ କର୍ମୀମାନେ ଦୃଢ଼ୋକ୍ତି ପ୍ରକାଶ କରିଆସିଛନ୍ତି।

ବ୍ରଜରାଜନଗରର ନିର୍ବାଚନୀ ଇତିହାସ ଦେଖିଲେ ଗତ ୨୦୧୯ ପର୍ଯ୍ୟନ୍ତ ବିଜେଡି ସେଠାରେ କେବେବି ବିଜୟର ସ୍ୱାଦ ଚାଖିନଥିଲା। ୨୦୦୯ ମସିହାରେ କଂଗ୍ରେସ ପ୍ରାର୍ଥୀ ଅନୁପ ସାଏ ଏଠାରୁ ବିଧାୟକ ଭାବେ ନିର୍ବାଚିତ ହୋଇଥିବା ବେଳେ ୨୦୧୪ରେ ରାଧାରାଣୀ ପଣ୍ଡା ବିଧାୟିକା ଭାବେ ବିଧାନସଭାକୁ ଆସିଥିଲେ। ତେବେ ୨୦୧୯ ମସିହା ପରଠାରୁ ବ୍ରଜରାଜନଗରରେ ବଦଳିଥିବା ରାଜନୈତିକ ସମୀକରଣ ବିଜେଡି ପାଇଁ ଖୁବ୍‍ ଅନୁକୂଳ ସାବ୍ୟସ୍ତ ହୋଇଛି। ୨୦୧୪ ମସିହାରେ ବିଜେପିର ରାଧାରାଣୀ ପଣ୍ଡା ଏହି ଆସନରେ ବିଜେଡି ପ୍ରାର୍ଥୀ ଅନୁପ ସାଏଙ୍କୁ ସାଢ଼େ ୬ ହଜାରରୁ ଅଧିକ ଭୋଟରେ ହରାଇଥିଲେ। ରାଧାରାଣୀ ୫୦୭୩୬ ଖଣ୍ଡ ଭୋଟ ପାଇଥିବା ବେଳେ ଅନୁପଙ୍କୁ ୪୩୯୪୮ ଖଣ୍ଡ ଭୋଟ ମିଳିଥିଲା। ସେହିପରି କଂଗ୍ରେସର କିଶୋର ପଟେଲ ୩୮୧୭୫ ଖଣ୍ଡ ଭୋଟ ପାଇଥିଲା। ତେବେ ୨୦୧୯ ମସିହା ସାଧାରଣ ନିର୍ବାଚନରେ ବିଜେଡିର କିଶୋର ମହାନ୍ତି ୮୦୧୫୨ ଖଣ୍ଡ ଭୋଟ ପାଇଥିଲା ବେଳେ ବିଜେପିର ରାଧାରଣୀ ପଣ୍ଡା ୬୮୧୫୩ ଖଣ୍ଡ ଭୋଟ ପାଇ ପରାଜିତ ହୋଇଥିଲେ। କଂଗ୍ରେସ ସମର୍ଥନ ସତ୍ତ୍ବେ ଏହି ନିର୍ବାଚନରେ ସିପିଆଇକୁ ମାତ୍ର ୯୩୫୦ ଖଣ୍ଡ ଭୋଟ ମିଳିଥିଲା। ଅର୍ଥାତ୍‍ ୨୦୧୪ ନିର୍ବାଚନରେ ଉଭୟ ଦଳକୁ ମିଳିଥିବା ଭୋଟ ତୁଳନାରେ ୨୦୧୯ ସାଧାରଣ ନିର୍ବାଚନରେ ପ୍ରାୟ ୩୫ ହଜାର କମ୍‍ ଭୋଟ ମିଳିଥିଲା। ଯେଉଁ ଭୋଟ ଉଭୟ ବିଜେଡି ଓ ବିଜେପି ଖାତାକୁ ଯାଇଛି।

ତେବେ ୨୦୧୯ ପରଠାରୁ ବ୍ରଜରାଜନଗରରେ ସ୍ୱର୍ଗତଃ କିଶୋର ମହାନ୍ତିଙ୍କ ବିପୁଳ ଲୋକପ୍ରିୟତା ବିଜେପି ତୁଳନାରେ ବିଜେଡିର ଭୋଟହାରକୁ ବୃଦ୍ଧି କରିଥିବା ରାଜନୈତିକ ସମୀକ୍ଷକମାନେ ମତ ଦେଇଛନ୍ତି। ଯାହାର ଝଲକ ଗତ ପଞ୍ଚାୟତ ଓ ପୌର ନିର୍ବାଚନରେ ମିଳିଛି। ଉଭୟ ନିର୍ବାଚନରେ ବିଜେଡିର ପ୍ରାଧାନ୍ୟ ଦେଖିବାକୁ ମିଳିଥିବା ବେଳେ ଉଭୟ ବିରୋଧୀ ବିଜେପି ଓ କଂଗ୍ରେସ ଏଠାରେ ମାଟି କାମୁଡ଼ିଛନ୍ତି। ପୁନଶ୍ଚ ରାଧାରାଣୀଙ୍କୁ ଦଳୀୟ ଟିକଟ ମିଳିବା ପରେ ଏଥିରେ ଅସନ୍ତୁଷ୍ଟ ହୋଇ ଦଳର ଜିଲ୍ଲା ସଭାପତି ଦଳରୁ ଇସ୍ତଫା ଦେଇଥିବା ବେଳେ ଦଳର ବହୁ ଜିଲ୍ଲ୍‍ାସ୍ତରୀୟ ନେତା ମଧ୍ୟ ସମାନ ପନ୍ଥା ଆପଣେଇବାକୁ ବିଚାର କରୁଥିବା ଜାଣିବାକୁ ମିଳିଛି। ଏପରି ହେଲେ ବିଜେପି ଚଳିତ ଉପ ନିର୍ବାଚନରେ ଏକ ବଡ଼ ବିପର୍ଯ୍ୟୟର ସାମ୍ନା କରିପାରେ ବୋଲି ରାଜନୈତିକ ବିଶାରଦମାନେ ଆଶଙ୍କା ପ୍ରକାଶ କରିଛନ୍ତି।

ଏକଦା ଝାରସୁଗୁଡ଼ା ଜିଲ୍ଲାରେ ଅପରାଜେୟ ସାବ୍ୟସ୍ତ ହେଉଥିବା କଂଗ୍ରେସର ସ୍ଥିତି ଏବେ ଅତ୍ୟନ୍ତ ଦୟନୀୟ। ନବ ଦାସ କଂଗ୍ରେସ ଛାଡ଼ି ବିଜେଡ଼ିରେ ଯୋଗ ଦେଇଥିବାବେଳେ ପୂର୍ବତନ ମୁଖ୍ୟମନ୍ତ୍ରୀ ହେମାନନ୍ଦ ବିଶ୍ୱାଳ ଏବେ ପରଲୋକରେ। ସ୍ଥାନୀୟ ରାଜନୀତିରୁ ଏକ ପ୍ରକାର ଅନ୍ତର୍ଧାନ ହୋଇଥିବା କିଶୋର ପଟେଲ ଆଗାମୀ ନିର୍ବାଚନରେ ଦଳକୁ କେତେ ପରିମାଣରେ ପୁନରୁଦ୍ଧାର କରିବାକୁ ସକ୍ଷମ ହେବେ ତାହାକୁ ନେଇ ଦ୍ୱିଧା ତୁଟିନାହିଁ। ଏହା ସତ୍ତ୍ବେ କିଶୋର କଂଗ୍ରେସ ଭୋଟକୁ କିଛି ପରିମାଣରେ ଧୃବୀକରଣ କରିପାରନ୍ତି ବୋଲି ରାଜନୈତିକ ପର୍ଯ୍ୟବେକ୍ଷକମାନେ ମନେ କରୁଛନ୍ତି; ଯାହା ବିଜେପି ପାଇଁ ସମସ୍ୟା ସୃଷ୍ଟି କରିବାର ଆଶଙ୍କା ରହିଛି।

ଅପରପକ୍ଷେ କିନ୍ତୁ ରାଜ୍ୟ ସରକାରଙ୍କ ବିକାଶମୂଳକ କାର୍ଯ୍ୟକ୍ରମ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଛବି ଏବଂ ଅଳକା ମହାନ୍ତିଙ୍କ ପ୍ରତି ଅନୁକମ୍ପା ବିଜେଡିର ବଳକୁ ଚାରିଗୁଣା କରିଛି। ଯାହାଫଳରେ ବିଜେଡି ଉପନିର୍ବାଚନରେ ବେଶ୍‍ ସୁବିଧାଜନକ ସ୍ଥିତିରେ ରହିଛି ବୋଲି ରାଜନୈତିକ ବିଶାରଦମାନେ ମତପୋଷଣ କରିଛନ୍ତି। ଆଗାମୀ ୩୧ ତାରିଖରେ ଉପନିର୍ବାଚନ ପାଇଁ ବ୍ରଜରାଜନଗରବାସୀ ନିଜର ମତାଧିକାର ସାବ୍ୟସ୍ତ କରିବାକୁ ଯାଉଛନ୍ତି। ଭୋଟ ଗଣତି ୩ ତାରିଖରେ ହେବାକୁ ଧାର୍ଯ୍ୟ ହୋଇଥିବା ବେଳେ ବ୍ରଜରାଜନଗରବାସୀ କାହା ଉପରେ ଭରଷିଛନ୍ତି ସେନେଇ ସ୍ପଷ୍ଟ ହେବ।