ଭୁବନେଶ୍ୱର: ଜୁଲାଇ ୨୦ରୁ ଅନୁଷ୍ଠିତ ହେବ ସଂସଦର ମୌସୁମୀ ଅଧିବେଶନ। ଏହାର ଅବ୍ୟବହିତ ପୂର୍ବରୁ ୧୯ ତାରିଖରେ ସର୍ବଦଳୀୟ ବୈଠକ ବସିବ। ସୂଚନା ଅନୁସାରେ ଏହି ଅଧିବେଶନରେ କେନ୍ଦ୍ର ସରକାର ଏକାଧିକ ଗୁରୁତ୍ୱପୂର୍ଣ୍ଣ ବିଲ୍‌ ଆଗତ କରିବାର ସମ୍ଭାବନା ରହିଛି। ମୌସୁମୀ ଅଧିବେଶନ ପୂର୍ବରୁ ଆଜି ବସିବ ବିଜେଡ଼ି ସଂସଦୀୟ ଦଳ ବୈଠକ । ଦଳର ସଂସଦୀୟ ବୋର୍ଡ ଅଧ୍ୟକ୍ଷ ତଥା ବିରୋଧୀଦଳ ନେତା ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଆଜି ସନ୍ଧ୍ୟାରେ ନବୀନ ନିବାସରେ ଏହି ବୈଠକ ଅନୁଷ୍ଠିତ ହେବ । 

ଆସନ୍ତା ମୌସୁମୀ ଅଧିବେଶନରେ ଦଳର ରଣନୀତି ଓ ରାଜ୍ୟ ପ୍ରସଙ୍ଗଗୁଡ଼ିକ ସମ୍ପର୍କରେ ଶ୍ରୀ ପଟ୍ଟନାୟକ ଦଳୀୟ ସାଂସଦମାନଙ୍କ ସହ ଆଲୋଚନା କରିବେ । ବିଭିନ୍ନ ଯୋଜନାରେ କେନ୍ଦ୍ର ସରକାରଙ୍କ ଅନୁଦାନ ହ୍ରାସ,  କୋଇଲା ରାଜଭାଗ ବୃଦ୍ଧି, ବିପର୍ଯ୍ୟୟ ପ୍ରତିରୋଧୀ ବିଦ୍ୟୁତ ଭିତ୍ତିଭୂମି, ରାଜପଥ ସମ୍ପ୍ରସାରଣ, ଉପକୂଳ ରାଜପଥ ପ୍ରସଙ୍ଗ, ସହରାଞ୍ଚଳରେ ପ୍ରଧାନମନ୍ତ୍ରୀ ଆବାସ ଅନୁଦାନ ବୃଦ୍ଧି ଆଦି ଅନେକ ପ୍ରସଙ୍ଗରେ ବିଜେଡି ନିରନ୍ତର କେନ୍ଦ୍ରର ଦୃଷ୍ଟି ଆକର୍ଷଣ କରି ଆସୁଛି । ସେହିପରି ରାଜ୍ୟର ଡ଼ିଜିଟାଲ ଭିତ୍ତିଭୂମି ବିକାଶ, ଅପହଞ୍ଚ ଅଞ୍ଚଳରେ ଇଣ୍ଟରନେଟ୍‌ ଓ ବ୍ୟାଙ୍କ ସେବା ପାଇଁ ମଧ୍ୟ ବାରମ୍ବାର ଦାବି ହୋଇଛି । ଏହି ସବୁ ପ୍ରସଙ୍ଗରେ ମଧ୍ୟ ବିଜେଡି ସୁପ୍ରିମୋ ଦଳର ସାଂସଦମାନଙ୍କୁ ଗୁରୁମନ୍ତ୍ର ଦେଇପାରନ୍ତି ବୋଲି କୁହାଯାଉଛି ।

ଭୁବନେଶ୍ୱର: ପୁଣି ଅଶାନ୍ତ ହେଲା ଭୁବନେଶ୍ୱରର ରାଜଧାନୀ କଲେଜ୍ । ଦୁଇ ଛାତ୍ର ଗୋଷ୍ଠୀଙ୍କ ମଧ୍ୟରେ ଉତ୍ତେଜନା ଓ ମାରପିଟ । ମାରପିଟ ଯୋଗୁଁ ଉଭୟ ଗୋଷ୍ଠୀର ଏକାଧିକ ଛାତ୍ର ଆହତ ହୋଇଥିବା ସୂଚନା । ଆହତମାନଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି । ହେଲ୍ପଡେସ୍କ କ୍ୟାମ୍ପରେ ନିଆଁ ଲଗାଇବାକୁ ନେଇ ହୋଇଥିଲା ଉତ୍ତେଜନା । ଗଣ୍ଡଗୋଳରେ ସଂପୃକ୍ତ ଜଣେ ଛାତ୍ରଙ୍କୁ ପୁଲିସ କଲେଜ କ୍ୟାମ୍ପସରୁ ଉଠାଇ ନେଇଛି । ଗଣ୍ଡଗୋଳ ପରେ କଲେଜ କ୍ୟାମ୍ପସରେ ପୁଲିସ ମୁତୟନ କରାଯାଇଛି ।

ଭୁବନେଶ୍ୱର: ଆନ୍ଧ୍ରପ୍ରଦେଶରେ ପୁଣି କାୟା ମେଳାଇଲାଣି କୋଭିଡ ମହାମାରୀ । ଆନ୍ଧ୍ରପ୍ରଦେଶରେ ଦୁଇ କୋଭିଡ୍ ମୃତ୍ୟୁ ପରେ ଓଡିଶା ସୀମାରେ ହାଇଆଲର୍ଟ ପାଇଁ ନିର୍ଦ୍ଦେଶ ଜାରି ରହିଛି। ରାଜ୍ୟରେ ସବୁ ସମୟରେ କୋଭିଡ ସତର୍କତା ରହିଛି ବୋଲି କହିଛନ୍ତି ଜନସ୍ବାସ୍ଥ୍ୟ ନିର୍ଦ୍ଦେଶକ । ସବୁବେଳେ ଟେଷ୍ଟ ହେଉଛି । ଆନ୍ଧ୍ର ସୀମାନ୍ତ ଓଡ଼ିଶାର ସମସ୍ତ ଜିଲ୍ଲାର CDMOଙ୍କୁ କୋଭିଡ ଟେଷ୍ଟ ପାଇଁ ନିର୍ଦ୍ଦେଶ ଦିଆଯାଇଛି । ଜିଲ୍ଲା ମୁଖ୍ୟାଳୟ ହସ୍ପିଟାଲରେ ଟେଷ୍ଟ କରନ୍ତୁ । ଲକ୍ଷଣ ଦେଖାଗଲେ କୋଭିଡ ନିୟମ ଅନୁସାରେ ଚିକିତ୍ସା ହେବ ବୋଲି କହିଛନ୍ତି ଜନସ୍ବାସ୍ଥ୍ୟ ନିର୍ଦ୍ଦେଶକ ରବୀନ୍ଦ୍ରନାଥ ମିଶ୍ର ।ସୀମାନ୍ତ ଅଞ୍ଚଳରେ ଯାତାୟାତ ଉପରେ ମଧ୍ୟ ନଜର ରଖାଯାଉଛି । କରୋନାର ନୂଆ ସଂକ୍ରମଣକୁ ନେଇ ଲୋକଙ୍କୁ ସଚେତନ ରହିବା ସହ ସ୍ୱାସ୍ଥ୍ୟ ନିୟମ ପାଳନ କରିବାକୁ ପରାମର୍ଶ ଦିଆଯାଇଛି । 

ଆଗକୁ ରଥଯାତ୍ରା ଭଳି ବଡ଼ ଧାର୍ମିକ ସମାଗମ ଥିବାରୁ ସଂକ୍ରମଣ ରୋକିବା ଦିଗରେ ସ୍ୱାସ୍ଥ୍ୟ ବିଭାଗ ଅଧିକ ସତର୍କ ରହିଛି । ବିଶେଷ କରି ଜ୍ୱର, କାଶ, ଗଳାବ୍ୟଥା କିମ୍ବା ଶ୍ୱାସକଷ୍ଟ ଭଳି କୋଭିଡ ଲକ୍ଷଣ ଦେଖାଦେଲେ ତୁରନ୍ତ ପରୀକ୍ଷା କରାଇବାକୁ ପରାମର୍ଶ ଦିଆଯାଇଛି । ସଂକ୍ରମଣ ଚିହ୍ନଟ ହେଲେ ପ୍ରଚଳିତ କୋଭିଡ ନିୟମାବଳୀ ଅନୁସାରେ ଚିକିତ୍ସା ଓ ଆବଶ୍ୟକ ପଦକ୍ଷେପ ଗ୍ରହଣ କରାଯିବ ।

ଭୁବନେଶ୍ୱର: ଆମରଣ ଅନଶନରେ ବସିଲେ ତିଖିରୀ ସରପଞ୍ଚ ଚାମେଲୀ ଓଝା । ମହାକାଳପଡ଼ା BDO ଓ IICଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଦାବିରେ ଭୁବନେଶ୍ୱର ଲୋୟର ପିଏମଜିରେ ଆମରଣ ଅନଶନରେ ବସିଛନ୍ତି ଚାମେଲୀ ଓଝା । ତାଙ୍କ ପ୍ରତି ହୋଇଥିବା ଅନ୍ୟାୟ ଓ ଅତ୍ୟାଚାରର ବିଚାର ଦାବି କରି ଅନଶନ ଆରମ୍ଭ କରିଛନ୍ତି ଚାମେଲୀ । ମହାକାଳପଡ଼ା ବିଡିଓ ରବି ନାରାୟଣ ଆଚାର୍ଯ୍ୟଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଏବଂ ମହାକାଳପଡ଼ା ଆଇଆଇସି ମାନସ ମଲ୍ଲିକଙ୍କ ବିରୋଧରେ ତୁରନ୍ତ ଆଇନଗତ କାର୍ଯ୍ୟାନୁଷ୍ଠାନ ସହ ନ୍ୟାୟ ପ୍ରଦାନ କରିବାକୁ ଦାବି କରିଛନ୍ତି । ଦାବି ପୂରଣ ନହେବା ପର୍ଯ୍ୟନ୍ତ ଆମରଣ ଅନଶନ ଜାରି ରହିବ ବୋଲି କହିଛନ୍ତି ଚାମେଲି ।

ସୂଚନାଯୋଗ୍ୟ, ଚାମେଲି ଓଝା ସରପଞ୍ଚ ଉନ୍ନୟନ କାର୍ଯ୍ୟ ବିଷୟରେ ବିଡିଓଙ୍କ ସହିତ ଆଲୋଚନା କରିବାକୁ ଆସିଥିବାବେଳେ ମହାକାଳପଡ଼ା ବ୍ଲକ କାର୍ଯ୍ୟାଳୟରେ କିଛି ଲୋକ ଚାମେଲିଙ୍କ ମୋବାଇଲ ଛଡ଼ାଇବା ସହିତ ଗାଳିଗୁଲଜ କରିଥିଲେ  । ବିଡିଓ ଅଫିସ୍‌ରେ ତାଙ୍କ ଉପରେ  ଆକ୍ରମଣ ହୋଇଥିବା ମଧ୍ୟ ସେ ଅଭିଯୋଗ କରିଥିଲେ । 

ପାପଡାହାଣ୍ଡ: ଗାଁକୁ ପହଞ୍ଚି ପାରିଲାନି ଆମ୍ୱୁଲାନ୍ସ। ଟ୍ରାକ୍ଟରରେ ବୁହାହେଲେ ଗର୍ଭବତୀ। ଆଣୁଥିବା ଟ୍ରାକ୍ଟରରେ ଶିଶୁ କନ୍ୟା ଜନ୍ମ ହୋଇଛି। ଏଭଳି ଦୃଶ୍ୟ ଦେଖିବାକୁ ମିଳିଛି ନବରଙ୍ଗପୁର-କଳାହାଣ୍ଡି ଜିଲ୍ଲା ସୀମାନ୍ତ କଳାହାଣ୍ଡି ଜିଲ୍ଲା ଜୟପାଟଣା ବ୍ଲକ ଅମଲାଭଟ୍ଟା ପଞ୍ଚାୟତ ଦାବିରିଘାଟି ଗାଁରେ। 

ସୂଚନା ଅନୁସାରେ, ଗାଁର ଡୋମୁ ମାଝୀଙ୍କ ସ୍ତ୍ରୀ ଉମିଳା ମାଝୀ ଗର୍ଭ ଯନ୍ତ୍ରଣା ହେବାରୁ ରାତି ୧୧ଟା ୩୦ ସମୟରେ ଆମ୍ୱୁଲାନ୍ସକୁ ଯୋଗାଯୋଗ କରିଥିଲେ। କିନ୍ତୁ ଏହି ଗାଁକୁ ଭଲ ରାସ୍ତା ନ ଥିବାରୁ ଗାଁକୁ ଆମ୍ୱୁଲାନ୍ସ ଯାଇ ପାରିନଥିଲା। ଆମ୍ୱୁଲାନ୍ସଟି ଚଚରାଗୁଡା ଗାଁରେ ଅଟକି ଯାଇଥିଲା। ଗର୍ଭ ଯନ୍ତ୍ରଣା ଅଧିକ ହେବାରୁ ଟ୍ରାକ୍ଟର ସାହାଯ୍ୟରେ ୧୦ କି.ମି ଦୂର ଚଚରାଗୁଡା ଗ୍ରାମକୁ ଆଣିଥିଲେ। ହେଲେ ରାସ୍ତା ମଝିରେ ପ୍ରସବ ବେଦନା ଅସହ୍ୟ ହୋଇପଡ଼ିବାରୁ ଟ୍ରାକ୍ଟର ଉପରେ ହିଁ ମହିଳା ଏକ କନ୍ୟା ସନ୍ତାନକୁ ଜନ୍ମ ଦେଇଥିଲେ। ପରେ ଚଚରାଗୁଡାରୁ ଆମ୍ବୁଲାନ୍ସ ଯୋଗେ ମା' ଓ ନବଜାତକୁ ମୈଦଲପୁର ମେଡିକାଲକୁ ନିଆଯାଇଥିଲା। ପ୍ରସୂତୀଙ୍କ ନବରଙ୍ଗପୁର ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ବର୍ତ୍ତମାନ ମା' ଓ ଶିଶୁକନ୍ୟା ଉଭୟ ସୁସ୍ଥ ଥିବା ସୂଚନା ମିଳିଛି।

ପୁରୀ: ବିଶ୍ୱପ୍ରସିଦ୍ଧ ରଥଯାତ୍ରା ପାଖେଇ ଆସୁଥିବା ବେଳେ ଭକ୍ତଙ୍କ ଭାବାବେଗକୁ ନେଇ ଠକେଇ କରିବା ପାଇଁ କିଛି ଫ୍ରଡ୍‌ ଆପ୍‌ ସକ୍ରିୟ ହୋଇଛନ୍ତି। “ଶ୍ରୀମନ୍ଦିର’ ନାମକ ଏକ ଆପ୍‌ ଏବେ ସୋସିଆଲ ମିଡିଆରେ ଭାଇରାଲ ହୋଇ ଲୋକଙ୍କୁ ବିଭ୍ରାନ୍ତ କରୁଛି। ଏହି ଆପ୍‌ରେ ଦାବି କରାଯାଇଛି ଯେ ମାତ୍ର ୧୨୧ ଟଙ୍କା ଦେଇ ରଥଯାତ୍ରା ପାଇଁ ଖେଚୁଡ଼ି ବଣ୍ଟନ ସେବାରେ ଭାଗ ନେଇପାରିବେ। ବିଜ୍ଞାପନରେ କୁହାଯାଇଛି, ଶ୍ରୀଗୁଣ୍ଡିଚାର ପ୍ରଥମ ଦିନରେ ୧୦୧ କିଲୋର ଖେଚୁଡ଼ି ବଣ୍ଟନ ହେବ ଏବଂ ଏହି ସେବାରେ ଯେ କେହି ବି ୧୨୧ ଟଙ୍କା ଦାନ କରି ସାମିଲ୍‌ ହୋଇପାରିବେ। ଏହାସହ ଶ୍ରୀମନ୍ଦିର ଆପ୍‌ ନାଁରେ ବିଭିନ୍ନ ପୂଜା ଓ ସେବାର ବିଜ୍ଞାପନ ମଧ୍ୟ ଦିଆଯାଇଛି। ଏହି ପୋଷ୍ଟ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଅନେକ ଭକ୍ତ ପ୍ରକୃତ ସେବା ଭାବି ଏଥିରେ ଟଙ୍କା ଦେବାକୁ ମଧ୍ୟ ଆଗ୍ରହ ଦେଖାଉଛନ୍ତି।

ଏନେଇ ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. ଅରବିନ୍ଦ ପାଢ଼ୀ କହିଛନ୍ତି, ଏହା ଏକ ଫ୍ରଡ୍‌ ହୋଇପାରେ। ଶ୍ରୀମନ୍ଦିର ପ୍ରଶାସନ ପକ୍ଷରୁ ଏପରି କୌଣସି ଆପ୍‌ ମାଧ୍ୟମରେ ଖେଚୁଡ଼ି ବଣ୍ଟନ ସେବା ପାଇଁ ୧୨୧ ଟଙ୍କାର ବିଜ୍ଞାପନ ଦିଆଯାଇନାହିଁ। ଭକ୍ତମାନଙ୍କୁ ଏଭଳି ମିଥ୍ୟା ଆପ୍‌ ଓ ଲିଙ୍କ୍‌ରେ ଟଙ୍କା ନ ଦେବା ପାଇଁ ସେ ଅପିଲ୍‌ କରିଛନ୍ତି। ରଥଯାତ୍ରା ପାଖେଇ ଆସୁଥିବା ସମୟରେ ଏଭଳି ଶହଶହ ମିଥ୍ୟା ବିଜ୍ଞାପନ ସୋସିଆଲ ମିଡିଆରେ ଭାଇରାଲ ହେଉଛି। ପୂର୍ବରୁ ମଧ୍ୟ ଅନେକ ଫ୍ରଡ୍‌ ସଂସ୍ଥା ଜଗନ୍ନାଥ ଭକ୍ତଙ୍କ ଭାବାବେଗ ସହ ଖେଳି ଠକେଇ କରି ଆସୁଛନ୍ତି। ଶ୍ରୀମନ୍ଦିର ପ୍ରଶାସନ ପକ୍ଷରୁ କୁହାଯାଇଛି ଯେ ପୂଜା, ସେବା ଓ ଦାନ ପାଇଁ କେବଳ ଶ୍ରୀମନ୍ଦିରର ଅଫିସିଆଲ ୱେବ୍‌ସାଇଟ୍‌ ଓ କାଉଣ୍ଟର ମାଧ୍ୟମରେ ହିଁ କାର୍ଯ୍ୟ କରନ୍ତୁ। ଅନ୍ୟ କୌଣସି ତୃତୀୟ ଆପ୍‌, ୱେବ୍‌ସାଇଟ୍‌ ବା ସୋସିଆଲ ମିଡିଆ ଲିଙ୍କ୍‌ରେ ଟଙ୍କା ଦେବା ପୂର୍ବରୁ ଶ୍ରୀମନ୍ଦିର କାର୍ଯ୍ୟାଳୟରେ ଯାଞ୍ଚ କରନ୍ତୁ। 

ପ୍ରଶାସନ ଏ ବିଷୟରେ ସାଇବର ସେଲକୁ ମଧ୍ୟ ଅବଗତ କରାଇଛି। ଏଭଳି ଫ୍ରଡ୍‌ ଆପ୍‌ ବିରୋଧରେ ଆଇନଗତ ପଦକ୍ଷେପ ନିଆଯିବ ବୋଲି କୁହାଯାଇଛି। ରଥଯାତ୍ରା ଭଳି ବଡ଼ ପର୍ବରେ ଭକ୍ତଙ୍କ ସେବା ମନୋଭାବକୁ ନେଇ ଠକେଇ କରୁଥିବା ଏଭଳି ଲୋକଙ୍କ ପ୍ରତି ସତର୍କ ରହିବାକୁ ପ୍ରଶାସନ ପକ୍ଷରୁ ଅନୁରୋଧ କରାଯାଇଛି।

ନୂତନ ଭୋଟର ଭାବେ ନାମ ପଞ୍ଜୀକରଣ କରିବାକୁ ଚାହୁଁଥିବା ନାଗରିକମାନଙ୍କ ପାଇଁ ଭାରତୀୟ ନିର୍ବାଚନ କମିଶନ (ଇସିଆଇ) ଏକ ବଡ଼ ନିୟମ ଲାଗୁ କରିଛନ୍ତି। ଏଣିକି ଭୋଟର ତାଲିକାରେ ନାମ ସାମିଲ କରିବାକୁ ଆବେଦନ କରୁଥିବା ନୂଆ ଆବେଦନକାରୀଙ୍କୁ ନିଜ ପିତାମାତାଙ୍କର ଏସ୍‌ଆଇଆର୍ (SIR) ବା ସ୍ୱତନ୍ତ୍ର ସଘନ ସଂଶୋଧନ ସ୍ଥିତିର ବିବରଣୀ ପ୍ରଦାନ କରିବାକୁ ପଡ଼ିବ। ଅନଲାଇନ୍ ମାଧ୍ୟମରେ ଫର୍ମ-୬ (Form 6) ପୂରଣ କରିବା ବେଳେ ଏହି ନୂତନ ଘୋଷଣାନାମା ଦେବା ଏବେ ବାଧ୍ୟତାମୂଳକ କରାଯାଇଛି।

ନୂଆ ନିୟମ ଅନୁଯାୟୀ, ଆବେଦନକାରୀମାନେ ନିଜ ପିତାମାତା କିମ୍ବା ଜେଜେବାପା ଓ ଜେଜେମାଆଙ୍କ ନାମ ପୂର୍ବ ଏସ୍‌ଆଇଆର୍ ତାଲିକାରେ କିପରି ଥିଲା, ତାହାର ସଠିକ୍ ତଥ୍ୟ ପ୍ରଦାନ କରିବେ। ଏଥିସହିତ ନିର୍ବାଚନମଣ୍ଡଳୀ ନମ୍ବର, ବୁଥ୍ ନମ୍ବର (ପାର୍ଟ ନମ୍ବର) ଏବଂ ଭୋଟର ତାଲିକାର କ୍ରମିକ ସଂଖ୍ୟା ମଧ୍ୟ ଦେବାକୁ ପଡ଼ିବ। ଓଡ଼ିଶା ଏବଂ ପଶ୍ଚିମବଙ୍ଗ ଭଳି ରାଜ୍ୟରେ ଆବେଦନକାରୀଙ୍କୁ ୨୦୦୨ ମସିହାର ଏସ୍‌ଆଇଆର୍ ତାଲିକା ତଥ୍ୟ ଆଧାରରେ ନିଜର ପାରିବାରିକ ଲିଙ୍କ୍ ଦେବାକୁ କୁହାଯାଇଛି। ବିନା ଏହି ଘୋଷଣାନାମାରେ ଅନଲାଇନ୍‌ରେ ନୂଆ ଆବେଦନ ପ୍ରକ୍ରିୟା ଆଗକୁ ବଢ଼ିପାରିବ ନାହିଁ କିମ୍ବା ସମ୍ପୂର୍ଣ୍ଣ ହୋଇପାରିବ ନାହିଁ ବୋଲି ଇସିଆଇ ପକ୍ଷରୁ ସ୍ପଷ୍ଟ କରାଯାଇଛି।

କାହିଁକି ଲାଗୁ ହେଲା ଏହି ନୂଆ ନିୟମ?

ନିର୍ବାଚନ କମିଶନଙ୍କ ଅଧିକାରୀଙ୍କ ସୂଚନା ଅନୁଯାୟୀ, ନୂଆ ଭୋଟରଙ୍କୁ ପରିବାରର ପୁରୁଣା ରେକର୍ଡ ସହିତ ସଠିକ୍ ଭାବରେ ଯୋଡ଼ିବା (ମ୍ୟାପିଂ କରିବା) ପାଇଁ ଏହି ପଦକ୍ଷେପ ନିଆଯାଇଛି। ଏହାଦ୍ୱାରା ଯାଞ୍ଚ ପ୍ରକ୍ରିୟା ସହଜ ହେବା ସହ ଆବେଦନକାରୀଙ୍କୁ ଅଯଥା ଅଧିକ ପ୍ରମାଣପତ୍ର ଓ କାଗଜପତ୍ର ଦେବାରୁ ମୁକ୍ତି ମିଳିବ। ଏହାସହିତ ଭୋଟର ତାଲିକାରୁ ନକଲି, ସ୍ଥାନାନ୍ତରିତ, ବିଦେଶୀ ଏବଂ ମୃତ ଭୋଟରଙ୍କ ନାମକୁ ସହଜରେ ଚିହ୍ନଟ କରି ହଟାଇବା ସହ ଏକ ସ୍ୱଚ୍ଛ ଏବଂ ତ୍ରୁଟିଶୂନ୍ୟ ତାଲିକା ପ୍ରସ୍ତୁତ କରିବାରେ ଏହି ନିୟମ ବିଶେଷ ସହାୟକ ହେବ।

ଓଡ଼ିଶାରେ ଚାଲିଛି ସ୍ୱତନ୍ତ୍ର ସଘନ ସଂଶୋଧନ (SIR)

ବର୍ତ୍ତମାନ ଓଡ଼ିଶା ସମେତ ଦେଶର ବିଭିନ୍ନ ରାଜ୍ୟରେ ଏସ୍‌ଆଇଆର୍ ପ୍ରକ୍ରିୟା ଜାରି ରହିଛି। ସୂଚନାଯୋଗ୍ୟ ଯେ, ନିକଟରେ ଓଡ଼ିଶାରେ ଚିଠା ଭୋଟର ତାଲିକା ପ୍ରକାଶ ପାଇଥିଲା, ଯେଉଁଥିରେ ତ୍ରୁଟିପୂର୍ଣ୍ଣ ଓ ଅଯୋଗ୍ୟତା କାରଣରୁ ରାଜ୍ୟର ପ୍ରାୟ ୨୦ ଲକ୍ଷରୁ ଊର୍ଦ୍ଧ୍ୱ ଭୋଟରଙ୍କ ନାମ ତାଲିକାରୁ କାଟି ଦିଆଯାଇଛି। ଯେଉଁମାନଙ୍କ ନାମ ବାଦ୍ ପଡ଼ିଛି କିମ୍ବା ନୂଆ ନାମ ଯୋଡିବାର ଅଛି, ସେମାନେ ଅଗଷ୍ଟ ୪ ତାରିଖ ସୁଦ୍ଧା ଆବେଦନ କରିପାରିବେ ଏବଂ ଆସନ୍ତା ସେପ୍ଟେମ୍ବର ୬ ତାରିଖରେ ଚୂଡ଼ାନ୍ତ ଭୋଟର ତାଲିକା ପ୍ରକାଶ ପାଇବ। ଏଭଳି ସମୟରେ ନୂଆ ଭୋଟରଙ୍କ ପାଇଁ ପିତାମାତାଙ୍କ ତଥ୍ୟ ବାଧ୍ୟତାମୂଳକ କରିବା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ତେବେ କାଗଜପତ୍ର (ଅଫଲାଇନ୍) ଫର୍ମ-୬ରେ କୌଣସି ଆଇନଗତ ସଂଶୋଧନ ହୋଇନଥିଲେ ମଧ୍ୟ ଇସିଆଇର ଅନଲାଇନ୍ ପୋର୍ଟାଲରେ ଏହି ନିୟମକୁ କଡ଼ାକଡ଼ି ଭାବେ ଲାଗୁ କରାଯାଇଛି ଓ ଏହାକୁ ନେଇ ସାଧାରଣରେ ଚର୍ଚ୍ଚା ମଧ୍ୟ ଦେଖିବାକୁ ମିଳୁଛି |

ଭୁବନେଶ୍ୱର: ପଶ୍ଚିମବଙ୍ଗ ଉପକୂଳ ବଙ୍ଗୋପସାଗରରେ ଏକ ମାଛଧରା ଟ୍ରଲର ବୁଡ଼ିଯିବା ଯୋଗୁଁ ଏକ ବଡ଼ ଧରଣର ଅଘଟଣ ଘଟିଛି। ଏହି ଦୁର୍ଘଟଣାରେ ୯ ଜଣ ମତ୍ସ୍ୟଜୀବୀଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ ୬ ଜଣ ନିଖୋଜ ଅଛନ୍ତି। ନିଖୋଜ ଥିବା ମତ୍ସ୍ୟଜୀବୀଙ୍କ ମଧ୍ୟରୁ ୩ ଜଣ ଓଡ଼ିଶାର ବାଲେଶ୍ୱର ଜିଲ୍ଲାର ହୋଇଥିବାରୁ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗଭୀର ଶୋକ ପ୍ରକାଶ କରିଛନ୍ତି।

ସୂଚନା ଅନୁଯାୟୀ, ବଙ୍ଗୋପସାଗରର କାକଦ୍ୱୀପ ନିକଟରେ ମାଛ ଧରିବାକୁ ଯାଇଥିବା ‘ମା କାଳୀ’ ନାମକ ଏକ ଟ୍ରଲର ବୁଡ଼ି ଯାଇଥିଲା। ଏହି ଘଟଣାରେ ପ୍ରାଣ ହରାଇଥିବା ଏବଂ ନିଖୋଜ ଥିବା ବ୍ୟକ୍ତିମାନଙ୍କ ପାଇଁ ଉଭୟ ଓଡ଼ିଶା ଓ ପଶ୍ଚିମବଙ୍ଗର ଉପକୂଳବର୍ତ୍ତୀ ଅଞ୍ଚଳରେ ଶୋକର ଛାୟା ଖେଳିଯାଇଛି। ଓଡ଼ିଶାରୁ ନିଖୋଜ ଥିବା ୩ ଜଣ ମତ୍ସ୍ୟଜୀବୀ ହେଲେ ବାଲେଶ୍ୱର ଜିଲ୍ଲା ଭୋଗରାଇ ବ୍ଲକର ଉଲୁଡ଼ା ଗ୍ରାମର ତିନି ଭାଇ- ରବୀନ୍ଦ୍ର ମାଝୀ, ଜଗନ୍ନାଥ ମାଝୀ ଏବଂ ଜୟରାମ ମାଝୀ।

https://twitter.com/Naveen_Odisha/status/2076543602050899985

ଏହି ହୃଦୟ ବିଦାରକ ଘଟଣାକୁ ନେଇ ବିଜେଡି ସୁପ୍ରିମୋ ତଥା ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଜର ଏକ୍ସ (X) ହ୍ୟାଣ୍ଡେଲରେ ଦୁଃଖ ପ୍ରକାଶ କରିଛନ୍ତି। ସେ ଲେଖିଛନ୍ତି ଯେ, ବଙ୍ଗୋପସାଗରର କାକଦ୍ୱୀପ ନିକଟରେ ମାଛ ଧରିବାକୁ ଯାଇଥିବା ଅନେକ ମତ୍ସ୍ୟଜୀବୀଙ୍କ ସମୁଦ୍ରରେ ନିଖୋଜ ହେବା ଖବର ଶୁଣି ସେ ମର୍ମାହତ। ନିଖୋଜ ଥିବା ମତ୍ସ୍ୟଜୀବୀଙ୍କ ମଧ୍ୟରୁ ତିନିଜଣ ଓଡ଼ିଶାର ବୋଲି ଜାଣି ସେ ଚିନ୍ତା ପ୍ରକାଶ କରିଛନ୍ତି। ଏହା ସହ ସେ ମୃତ ମତ୍ସ୍ୟଜୀବୀଙ୍କ ଅମର ଆତ୍ମାର ସଦ୍‌ଗତି କାମନା କରିବା ସହ ନିଖୋଜ ମତ୍ସ୍ୟଜୀବୀଙ୍କ ସୁରକ୍ଷିତ ଉଦ୍ଧାର ପାଇଁ ପ୍ରାର୍ଥନା କରିଛନ୍ତି ଏବଂ ଶୋକସନ୍ତପ୍ତ ପରିବାରବର୍ଗଙ୍କୁ ଗଭୀର ସମବେଦନା ଜଣାଇଛନ୍ତି।

ଉଦଳା: ମେଡିକାଲରେ ପୋକରା ଔଷଧ ମିଳୁଥିବା ଅଭିଯୋଗ । ମେଡ଼ିସିନ ଷ୍ଟ୍ରିପରୁ ବାହାରିଲା ପୋକ ସହିତ ପୋକରା ଔଷଧ । ମୟୁରଭଞ୍ଜ ଜିଲ୍ଲା ଉଦଳା ଥାନା ବେଗୁନିଆଡିହା ଅଂଚଳରୁ ସାମ୍ନାକୁ ଆସିଛି ଏପରି ଘଟଣା । ଗାଁର  ଜଣେ ନାବାଳକଙ୍କ ଥଣ୍ଡା ଜ୍ୱର ହୋଇଥିଲା । ପରେ ସେ ଗତ ୮ ତାରିଖ ସେ ଉଦଳା ମେଡିକାଲରେ ଡାକ୍ତର ଦେଖାଇ ନିରାମୟରୁ ଔଷଧ ନେଇ ଘରକୁ ଫେରିଥିଲେ । ଡାକ୍ତରଙ୍କ ନିର୍ଦ୍ଦେଶ ମୁତାବକ ଔଷଧ ଖାଉଥିଲେ । ହେଲେ ତିନି ଦିନ ପରେ ଅଚାନକ ସକାଳୁ ଔଷଧ ଖାଇବା ସମୟରେ ଆଣ୍ଟିଵାୟୋଟିକ ଔଷଧ ସିଲ ଖୋଲି ବଟିକା ବାହାର କରିଥିଲେ । କିନ୍ତୁ ମେଡ଼ିସିନ ଷ୍ଟ୍ରିପରୁ ପୋକ ବାହାରିଥିଲା । ଏପରିକି ବଟିକାରେ ଗାତ ମଧ୍ୟ ହୋଇଯାଇଥିଲା । ଯାହା ଦେଖିବା ପରେ ପରିବାର ଲୋକେ ଔଷଧ ଖାଇବାକୁ ବାରଣ କରିଥିଲେ ଏବଂ ସେବେଠାରୁ ତାଙ୍କର ଔଷଧ ଖାଇବା ବନ୍ଦ ହୋଇଛି । ତେବେ ଏଭଳି ପୋକରା ଔଷଧ ନିରାମୟ କେନ୍ଦ୍ରରୁ ମିଳିବାକୁ ନେଇ ପ୍ରଶ୍ନ ଉଠାଇଛନ୍ତି ପରିବାର ଲୋକେ ।

ଭୁବନେଶ୍ୱର: ମିଶନ ଶକ୍ତି ସମ୍ୱନ୍ଧୀୟ ସରକାରୀ ୱେବସାଇଟରୁ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଫଟୋ ଓ ତଥ୍ୟ ହଟାଇବାର ପ୍ରୟାସକୁ କଟୁ ସ୍ୱରରେ ସମାଲୋଚନା କରିଛି ବିଜେଡି।  ନବୀନ ସରକାରଙ୍କ ସମୟରେ ପ୍ରତିଷ୍ଠିତ ହୋଇଥିବା ମିଶନ ଶକ୍ତିର ଗୌରବମୟ ଇତିହାସକୁ ବିଜେପି ଲିଭାଇବାର ବୃଥା ପ୍ରୟାସ କରୁଛି ଓ ଏହା ବର୍ତ୍ତମାନର ସରକାରଙ୍କ ଅସୁରକ୍ଷିତ ମନୋଭାବକୁ ପ୍ରଦର୍ଶିତ କରିଛି ବୋଲି ବିଜେଡି କହିଛି । 

ଶଙ୍ଖ ଭବନରେ ବିଧାନସଭାରେ ବିଜେଡି ମୁଖ୍ୟ ସଚେତକ ପ୍ରମିଳା ମଲ୍ଲିକ, ସାଂସଦ ସୁଲତା ଦେଓ, ପୂର୍ବତନ ମନ୍ତ୍ରୀ ଟୁକୁନି ସାହୁ ଓ ପୂର୍ବତନ ରାଜ୍ୟ ମହିଳା କମିସନର ଲୋପାମୁଦ୍ରା ବକ୍ସିପାତ୍ର ପ୍ରମୁଖ ମିଶନଶକ୍ତି ସମ୍ପର୍କରେ ରାଜ୍ୟସରକାରଙ୍କ ହୀନମନ୍ୟତାକୁ କଟୁ ସମାଲୋଚନା କରିଛନ୍ତି । ଏହି ନେତ୍ରୀମାନେ କହିଛନ୍ତି ଯେ ଯେଉଁ ସରକାର ଇତିହାସ ସୃଷ୍ଟି କରିବାର କ୍ଷମତା ରଖନ୍ତି, ସେ ଇତିହାସକୁ ସଂରକ୍ଷଣ କରନ୍ତି। ମାତ୍ର ଇତିହାସ ସୃଷ୍ଟି କରିବାରେ ଅକ୍ଷମ ସରକାର ଇତିହାସକୁ ଲିଭାଇବାର କରିଥାଏ। ବର୍ତ୍ତମାନର ସରକାର  ଇତିହାସକୁ ଲିଭାଇବାକୁ ଅପଚେଷ୍ଟା କରୁଛନ୍ତି । ଯେଉଁ ସରକାର ନିଜ କାର୍ଯ୍ୟଦକ୍ଷତା ଓ ସଫଳତାକୁ ଲୋକଙ୍କ ସାମ୍ନାରେ ରଖିବା ପରିବର୍ତ୍ତେ ପୂର୍ବତନ ସରକାରଙ୍କ କାର୍ଯ୍ୟର ଚିହ୍ନଗୁଡ଼ିକୁ ଲିଭାଇବାରେ ବ୍ୟସ୍ତ ରହେ, ସେ ପ୍ରକୃତରେ ନିଜ ବିଫଳତାକୁ ସ୍ୱୀକାର କରୁଛି ବୋଲି କହିଲେ ଅତ୍ୟୁକ୍ତି ହେବ ନାହିଁ । ଏହା ସ୍ପଷ୍ଟ କରୁଛି ଯେ ବର୍ତ୍ତମାନ ସରକାର ପୂର୍ବତନ ସରକାରଙ୍କ ଉତ୍ତରାଧିକାର ସହ ପ୍ରତିସ୍ପର୍ଦ୍ଧା କରିବାରେ ଅସମର୍ଥ। 

ମିଶନ ଶକ୍ତି କୌଣସି ଦଳୀୟ ପ୍ରକଳ୍ପ ନୁହେଁ; ଏହା ଓଡ଼ିଶାର ଲକ୍ଷ ଲକ୍ଷ ମହିଳା, ସ୍ୱୟଂ ସହାୟକ ଗୋଷ୍ଠୀ ଓ କ୍ଷେତ୍ରସ୍ତରୀୟ କର୍ମୀଙ୍କ ଦୀର୍ଘ ବର୍ଷର ପରିଶ୍ରମ ଏବଂ ନବୀନ ପଟ୍ଟନାୟକଙ୍କ ନେତୃତ୍ୱରେ ଗଢ଼ିଉଠିଥିବା ଏକ ଜନ ଆନ୍ଦୋଳନ। ଏହି ଇତିହାସକୁ ଲିଭାଇବାର ଅର୍ଥ ହେଉଛି ଓଡ଼ିଶାର ମହିଳାମାନଙ୍କ ଅବଦାନକୁ ଅସ୍ୱୀକାର କରିବା। ଫଟୋ ହଟାଇଦେଲେ ଲୋକଙ୍କ ସ୍ମୃତି ମଧ୍ୟ ଲିଭିଯିବ ବୋଲି ବିଜେପି ସରକାର ସମ୍ଭବତଃ ମନେ କରୁଛନ୍ତି। କିନ୍ତୁ ଓଡ଼ିଶାର ମହିଳାମାନଙ୍କୁ କିଏ ସଶକ୍ତ କରିଥିଲେ, କିଏ ମିଶନ ଶକ୍ତିକୁ ଏକ ଜନ ଆନ୍ଦୋଳନରେ ପରିଣତ କରିଥିଲେ, କିଏ ଲକ୍ଷ ଲକ୍ଷ ମହିଳାଙ୍କୁ ଆର୍ଥିକ ସ୍ୱାବଲମ୍ବୀ କରି ସମ୍ମାନ ଓ ସଶକ୍ତ କରିଥିଲେ; ସେ କଥା ରାଜ୍ୟର ମହିଳାମାନେ ଭଲଭାବରେ ଜାଣିଛନ୍ତି । ରାଜ୍ୟର ମହିଳାମାନଙ୍କ ସଫଳତା ଓଡ଼ିଶାର ଇତିହାସରେ ଚିରସ୍ଥାୟୀ ହୋଇ ରହିବ। ସରକାରୀ ବିଭାଗ ଓ ପ୍ଲାଟଫର୍ମ ଗୁୃଡ଼ିକ କୌଣସି ରାଜନୈତିକ ଦଳର ସମ୍ପତ୍ତି ନୁହେଁ; ସେଗୁଡ଼ିକ ଓଡ଼ିଶାର ଜନସାଧାରଣଙ୍କ ସମ୍ପତ୍ତି। ସେଗୁଡ଼ିକର ଉଦ୍ଦେଶ୍ୟ ହେଉଛି ସଂସ୍ଥାଗତ ଇତିହାସକୁ ସଂରକ୍ଷଣ କରିବା, ଦଳୀୟ ପ୍ରଚାରର ମାଧ୍ୟମ ହେବା ଆଦୌ ନୁହେଁ। 

ବର୍ତ୍ତମାନ ସରକାରଙ୍କର ଯଦି ନିଜ କାର୍ଯ୍ୟଦକ୍ଷତା ଉପରେ ବିଶ୍ୱାସ ଅଛି, ତେବେ ସେମାନେ ନିଜ ସଫଳତାକୁ ଲୋକଙ୍କ ସାମ୍ନାରେ ରଖନ୍ତୁ, ଅନ୍ୟମାନଙ୍କ ସଫଳତାକୁ ଲିଭାଇବାର ବୃଥା ଚେଷ୍ଟା କରନ୍ତୁ ନାହିଁ । ତେବେ ମିଶନ ଶକ୍ତିର ଇତିହାସକୁ ଲିଭାଇବାର ଏହି ପ୍ରୟାସ ଅନ୍ୟଏକ ଦିଗକୁ ଇଙ୍ଗିତ କରିଥି। ନବୀନଙ୍କ ଫଟୋକୁ ବି ଶାସକ ବିଜେପି ଭୟକରୁଛି । ତେବେ ଯେଉଁ  ମହାନ ବ୍ୟକ୍ତିଙ୍କ ଛବି ରାଜ୍ୟର କୋଟିକୋଟି ମହିଳାଙ୍କ ହୃଦୟରେ ଅଛି, ସେ ଛବି ସରକାର କିପରି ସରକାର ହଟାଇବେ ବୋଲି ବିଜେଡି ନେତ୍ରୀମାନେ କହିଛନ୍ତି। 

ଭୁବନେଶ୍ୱର: ରାଜଧାନୀ ଭୁବନେଶ୍ୱରରେ ବଡ ଅଘଟଣ । ନିର୍ମାଣାଧୀନ ପାଇଖାନା ଟାଙ୍କି ଭୁଶୁଡ଼ି ୨ ଶ୍ରମିକ ମୃତ । ବିଜେବି ନଗର ଅଞ୍ଚଳରେ ଘଟିଛି ଏହି ହୃଦୟବିଦାରକ ଅଘଟଣ । ନିର୍ମାଣାଧୀନ ପାଇଖାନା ଟାଙ୍କି ହଠାତ୍ ଭୁଶୁଡ଼ି ପଡ଼ିବାରୁ କାମ କରୁଥିବା ଦୁଇ ଜଣ ଶ୍ରମିକ ଭିତରେ ଚାପି ହୋଇଯାଇଥିଲେ। ଗୁରୁତର ଅବସ୍ଥାରେ ଉଭୟଙ୍କୁ ଉଦ୍ଧାର କରି କ୍ୟାପିଟାଲ ହସ୍ପିଟାଲକୁ ନିଆଯାଇଥିଲା । ମାତ୍ର ଡାକ୍ତର ସେଠାରେ ଉଭୟଙ୍କୁ ମୃତ ଘୋଷଣା କରିଛନ୍ତି। ମୃତ ଶ୍ରମିକମାନଙ୍କର ପରିଚୟ ମିଳି ନ ଥିବା ବେଳେ ପୋଲିସ ଘଟଣାର ତଦନ୍ତ କରୁଛି।

ସୂଚନା ଅନୁସାରେ, ବିଜେବି ନଗର ଅଞ୍ଚଳରେ ଶିଶୁ ମନ୍ଦିର ପଛରେ ଥିବା ଜଣେ ବ୍ୟକ୍ତିଙ୍କ ଘରର ପାଇଖାନା ଟାଙ୍କି ନିର୍ମାଣ କାମ ଚାଲିଥିଲା। ଦୁଇ ଜଣ ଶ୍ରମିକ ଟାଙ୍କି ଭିତରେ କାମ କରୁଥିବା ବେଳେ ହଠାତ୍ ଟାଙ୍କିର କାନ୍ଥ ଓ ଉପର ଅଂଶ ଭୁଶୁଡ଼ି ପଡ଼ିଥିଲା। ଫଳରେ ଉଭୟ ଶ୍ରମିକ ମାଟି ଓ କଂକ୍ରିଟ୍ ତଳେ ଚାପି ହୋଇଯାଇଥିଲେ। ଖବର ପାଇ ଅଗ୍ନିଶମ ବିଭାଗ, ପୁଲିସ ଓ ସ୍ଥାନୀୟ ଲୋକେ ମିଶି ଉଦ୍ଧାର କାର୍ଯ୍ୟ ଚଳାଇଥିଲେ। ପରେ ଦୁଇ ଜଣଙ୍କୁ ଟାଙ୍କି ଭିତରୁ ବାହାର କରାଯାଇ ତୁରନ୍ତ କ୍ୟାପିଟାଲ ହସ୍ପିଟାଲକୁ ପଠାଯାଇଥିଲା। ତେବେ ହସ୍ପିଟାଲରେ ପହଞ୍ଚିବା ପରେ ଡାକ୍ତର ଉଭୟ ଶ୍ରମିକଙ୍କୁ ମୃତ ଘୋଷଣା କରିଥିଲେ। 

ବାରିପଦା: ମୟୂରଭଞ୍ଜ ଜିଲ୍ଲା ସାମ୍ବାଦିକତାର 'ଭୀଷ୍ମ ପିତାମହ' ଭାବେ ପରିଚିତ ସ୍ୱର୍ଗତଃ ଅମରେନ୍ଦ୍ରଲାଲ ବୋଷଙ୍କ ଅମ୍ଳାନ ସ୍ମୃତିରେ ଶନିବାର ଏକ ବାର୍ଷିକ ସ୍ୱେଚ୍ଛାକୃତ ରକ୍ତଦାନ ଶିବିର ସଫଳତାର ସହ ଆୟୋଜିତ ହୋଇଯାଇଛି । ସ୍ଥାନୀୟ ବାରିପଦା ଷ୍ଟାଡିୟମ ସମ୍ମିଳନୀ କକ୍ଷଠାରେ "ଜିଲ୍ଲା ସାମ୍ବାଦିକ ପରିବାର, ମୟୂରଭଞ୍ଜ" ପକ୍ଷରୁ ଆୟୋଜିତ ଏହି ଶିବିରକୁ ମୟୂରଭଞ୍ଜ ଜିଲ୍ଲାପାଳ ହେମକାନ୍ତ ସୟ ଆନୁଷ୍ଠାନିକ ଭାବେ ଉଦଘାଟନ କରିବା ସହ ଏଭଳି ସାମାଜିକ ତଥା ମହତ ପ୍ରୟାସର ଉଚ୍ଚ ପ୍ରଶଂସା କରିଥିଲେ ।

ଏହି କାର୍ଯ୍ୟକ୍ରମରେ ମୟୂରଭଞ୍ଜ ଏସପି ବରୁଣ ଗୁଣ୍ଟୁପାଲ୍ଲୀ ସମ୍ମାନିତ ଅତିଥି ଭାବେ ଯୋଗଦେଇ ନିଜେ ସ୍ୱେଚ୍ଛାକୃତ ଭାବେ ରକ୍ତଦାନ କରି ଦିବଂଗତ ଶ୍ରୀ ବୋଷଙ୍କ ପ୍ରତି ଗଭୀର ଶ୍ରଦ୍ଧାଞ୍ଜଳୀ ଜ୍ଞାପନ କରିବା ସହ ଅନ୍ୟମାନଙ୍କ ପାଇଁ ଏକ ବଡ଼ ପ୍ରେରଣା ସାଜିଥିଲେ । ଜିଲ୍ଲା ସୂଚନା ଓ ଲୋକ ସମ୍ପର୍କ ଅଧିକାରୀ (DIPRO) ଶିଶିର ମୁନ୍ଦୟାଙ୍କ ଉପସ୍ଥିତିରେ ଆୟୋଜିତ ଏହି ଶିବିର ଅବସରରେ ବରିଷ୍ଠ ସାମ୍ବାଦିକ କଲ୍ୟାଣ କୁମାର ସିହ୍ନାଙ୍କୁ ସାମ୍ବାଦିକତା କ୍ଷେତ୍ରରେ ତାଙ୍କର ଉଲ୍ଲେଖନୀୟ ଅବଦାନ ପାଇଁ ସମ୍ବର୍ଦ୍ଧିତ କରାଯାଇଥିଲା ।

ଶିବିରରେ ବାରିପଦା ନଗରପାଳ କୃଷ୍ଣାନନ୍ଦ ମହାନ୍ତି, ଏମସିସି ବ୍ୟାଙ୍କ ସଭାପତି ସୁବ୍ରମଣ୍ୟମ ମହାନ୍ତି, ବିଶିଷ୍ଟ ସମାଜସେବୀ କଳିଙ୍ଗ କେଶରୀ ଜେନା, ବରିଷ୍ଠ ସାମ୍ବାଦିକ ରାମଚନ୍ଦ୍ର ଦାସ, ସୁକାନ୍ତ କୁମାର ଜିଉ ଓ ସମାଜସେବୀ ଅମର ସେଠୀ ପ୍ରମୁଖ ଉପସ୍ଥିତ ରହି ରକ୍ତଦାତାମାନଙ୍କୁ ଉତ୍ସାହିତ କରିଥିଲେ । ସ୍ୱର୍ଗତ ଅମରେନ୍ଦ୍ର ଲାଲଙ୍କ ଦୀର୍ଘ ୬୦ ବର୍ଷର ନିଷ୍ଠାପର ସାମ୍ବାଦିକତା ପ୍ରତି ସମ୍ମାନ ଜଣାଇ ଜିଲ୍ଲାର କୋଣ-ଅନୁକୋଣରୁ ବହୁ ସଂଖ୍ୟାରେ ସାମ୍ବାଦିକ ଓ ସ୍ୱେଚ୍ଛାକୃତ ରକ୍ତଦାତା ଶିବିରରେ ସାମିଲ ହୋଇ ରକ୍ତଦାନ କରିଥିଲେ ।

ଶିବିରରୁ ମୋଟ ୫୪ ୟୁନିଟ୍ ରକ୍ତ ସଂଗୃହୀତ ହୋଇଥିବା ବେଳେ ସମସ୍ତ ରକ୍ତଦାତାଙ୍କୁ ସାମ୍ବାଦିକ ପରିବାର ପକ୍ଷରୁ ପ୍ରମାଣପତ୍ର, ରକ୍ତଦାତା କାର୍ଡ ଏବଂ ଉତ୍ତରୀୟ ପ୍ରଦାନ ପୂର୍ବକ ଉଚ୍ଛ୍ୱସିତ ସମ୍ବର୍ଦ୍ଧନା ଜ୍ଞାପନ କରାଯାଇଥିଲା । ଅନ୍ୟମାନଙ୍କ ମଧ୍ୟରେ ସୁଜିତ ମହାନ୍ତି, ଦେବାଶିଷ ପାତ୍ର, ଦେବାଶିଷ ମହାନ୍ତି, ଜିତେନ୍ଦ୍ର ମହାନ୍ତି, ଅନନ୍ତ ଦାସ, ପ୍ରଭାତ ମହାନ୍ତି, ସୌମ୍ୟରଞ୍ଜନ ମିଶ୍ର, ରାଜା ଖାନ୍, ବିପ୍ଳବ ଭଞ୍ଜନ ବୁଗୁଡେଇ ଓ ସୁନୀଲ ନାୟକ ପ୍ରମୁଖ ଉପସ୍ଥିତ ରହି ଏହି ମହତ କାର୍ଯ୍ୟକୁ ପ୍ରଶଂସା କରିଥିଲେ ।

ଜିଲ୍ଲା ରକ୍ତ ଭଣ୍ଡାରର ବରିଷ୍ଠ ଡାକ୍ତର ସୌମ୍ୟରଞ୍ଜନ ନାୟକ ଓ ତାଙ୍କ ବୈଷୟିକ ଟିମ୍ ରକ୍ତ ସଂଗ୍ରହ କରିବାରେ ପ୍ରମୁଖ ସହଯୋଗ କରିଥିବା ବେଳେ ସାମ୍ବାଦିକ ସୋମନାଥ ସିଂ, ନିରୋଜ ଲୋଚନ ପୁଥାଳ ଓ ଅସୀମ ଚକ୍ରବର୍ତ୍ତୀ ଶିବିର ପରିଚାଳନାରେ ସକ୍ରିୟ ସହଯୋଗ କରିଥିଲେ । ଆଗାମୀ ଦିନରେ ଏହିପରି ସାମାଜିକ କାର୍ଯ୍ୟଧାରା ଜାରି ରଖିବା ସହ ଆସନ୍ତା ୨୦୨୭ ଜାନୁଆରୀ ୧୭ ତାରିଖରେ ଜିଲ୍ଲାର ଅନ୍ୟତମ ବରିଷ୍ଠ ସାମ୍ବାଦିକ ସ୍ୱର୍ଗତ ମଳୟ ମହାନ୍ତଙ୍କ ସ୍ମୃତିରେ ମଧ୍ୟ ଏକ ବିଶାଳ ରକ୍ତଦାନ ଶିବିର ଅନୁଷ୍ଠିତ ହେବ ବୋଲି ସାମ୍ବାଦିକ ପରିବାର ପକ୍ଷରୁ ସର୍ବସମ୍ମତ ନିଷ୍ପତ୍ତି ନିଆଯାଇଛି ।