ନୂଆଦିଲ୍ଲୀ : ଉତ୍ତରପ୍ରଦେଶର ଲକ୍ଷ୍ମୀପୁର ଖେରୀ ମାମଲାର ମୁଖ୍ୟ ଅଭିଯୁକ୍ତ ଆଶିଷ ମିଶ୍ରଙ୍କୁ ସୁପ୍ରିମକୋର୍ଟ ସର୍ତ୍ତ ମୂଳକ ଜାମିନ ଦେଇଛନ୍ତି। କେନ୍ଦ୍ର ମନ୍ତ୍ରୀ ଅଜୟ ମିଶ୍ରଙ୍କ ପୁଅ ଆଶିଷଙ୍କୁ ତାଙ୍କର ଅସୁସ୍ଥ ମା ଏବଂ ଝିଅର ଯତ୍ନ ନେବା ପାଇଁ ତାଙ୍କୁ ଏହି ଆଶ୍ୱସ୍ତି ଦିଆଯାଇଛି। ଏହାପୂର୍ବରୁ ଜାନୁଆରୀ ମାସରେ ଆଶିଷ ମିଶ୍ରଙ୍କୁ ଆଠ ସପ୍ତାହ ପାଇଁ ମଧ୍ୟବର୍ତ୍ତୀକାଳୀନ ଜାମିନ ମିଳିଥିଲା।

ମଧ୍ୟବର୍ତ୍ତୀକାଳୀନ ଜାମିନ ଆବେଦନ ଶୁଣିବା ପରେ ଜଷ୍ଟିସ ସୂର୍ଯ୍ୟ କାନ୍ତ ଏବଂ ଦୀପଙ୍କର ଦତ୍ତଙ୍କ ଏକ ବେଞ୍ଚ ତାଙ୍କୁ କୌଣସି ସାଧାରଣ କାର୍ଯ୍ୟରେ ଯୋଗଦେବାକୁ କିମ୍ବା ଏହି ମାମଲାରେ ଗଣମାଧ୍ୟମକୁ ସମ୍ବୋଧିତ ନ କରିବାକୁ ନିର୍ଦ୍ଦେଶ ଦେଇଛନ୍ତି। ତାଙ୍କ ମାଙ୍କୁ ନୂଆଦିଲ୍ଲୀର ଡକ୍ଟର ରାମ ମନୋହର ଲୋହିଆ ହସ୍ପିଟାଲରେ ଭର୍ତ୍ତି କରାଯାଇଛି। ଏହି ସମୟରେ ତାଙ୍କ ଝିଅର ଗୋଡର ଚିକିତ୍ସା ଚାଲିଛି।

ଖେରି: ବହୁଚର୍ଚ୍ଚିତ ଲଖିମପୁର ଖେରି ମାମଲାର ବିଚାର ପାଇଁ ଲାଗିଯିବ ପ୍ରାୟ ୫ ବର୍ଷ। ନିମ୍ନ କୋର୍ଟର ବିଚାରପତିଙ୍କ ଠାରୁ ମିଳିଥିବା ରିପୋର୍ଟ ଆଧାରରେ ଏହା କହିଛନ୍ତି ସୁପ୍ରିମକୋର୍ଟ। କେନ୍ଦ୍ର ସରକାରଙ୍କ ୩ କୃଷି ଆଇନ ପ୍ରତ୍ୟାହାର ଦାବିରେ ଆନ୍ଦୋଳନ ଚାଲିଥିବାବେଳେ ଆନ୍ଦୋଳନକାରୀ ଚାଷୀଙ୍କ ଉପରେ କେନ୍ଦ୍ରମନ୍ତ୍ରୀ ଅଜୟ କୁମାର ମିଶ୍ରାଙ୍କ ପୁଅ ଆଶିଷ ଗାଡି ଚଢାଇଦେବା ନେଇ ହୋଇଥିଲା ଗୁରୁତର ଅଭିଯୋଗ । ଏହି ମାମଲାରେ ବି ଅନ୍ୟତମ ଅଭିଯୁକ୍ତ ଅଛନ୍ତି ଆଶିଷ ।

ସୁପ୍ରିମକୋର୍ଟ ନିକଟରେ ରିପୋର୍ଟ ଦାଖଲ କରି ଅତିରିକ୍ତ ଦୌରାଜଜ କହିଛନ୍ତି- ଏହି ମାମଲାରେ ୨୦୮ ଜଣ ସାକ୍ଷୀ ଥିବାବେଳେ ୧୭୧ଟି ନଥି ଓ ୨୭ଟି ଫରେନସିକ ସାଇନସ୍ ଲାବରେଟୋରୀ ରିପୋର୍ଟ ରହିଛି । ମାମଲାର ଅଗ୍ରଗତି ନେଇ ସୁପ୍ରିମକୋର୍ଟ ରିପୋର୍ଟ ତଲବ କରିବା ପରେ ଏହି ରିପୋର୍ଟ ଦାଖଲ ହୋଇଛି । ଏସବୁକୁ ଯାଞ୍ଚ କରିବା ସହ ମାମଲାର ବିଚାର ଶେଷ ଲାଗି ୫ ବର୍ଷ ଲାଗିବ ବୋଲି କହିଛନ୍ତି ଜଷ୍ଟିସ ସୂର୍ଯ୍ୟ କାନ୍ତ ଓ ଜଷ୍ଟିସ ଭି. ରାମସୁବ୍ରମଣ୍ୟମଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି ।

ଗତ ୨୦୨୧ ଅକ୍ଟୋବର ୩ ତାରିଖରେ ଘଟିଥିବା ଘଟଣାରେ ଆଶିଷ ୪ଜଣ କୃଷକ ଓ ଜଣେ ସାମ୍ବାଦିକଙ୍କୁ ଗାଡ଼ି ଚଢାଇ ମାରି ଦେଇଥିବା ଅଭିଯୋଗ ହୋଇଥିଲା । ଏହି ଘଟଣାରେ ୨୦୨୧ ଅକ୍ଟୋବର ୯ ତାରିଖରେ ଗିରଫ ହୋଇଥିଲେ ଆଶିଷ । ମାମଲାରେ ନିମ୍ନକୋର୍ଟ ଆଶିଷ ମିଶ୍ରା ଓ ଅନ୍ୟ ୧୨ ଜଣଙ୍କ ନାମରେ ହତ୍ୟା, ଅପରାଧିକ ଷଡ଼ଯନ୍ତ୍ର ମାମଲା ରୁଜୁ କରିଥିଲା । ସେମାନଙ୍କ ବିରୋଧରେ ଆଇପିସିର ଧାରା ୧୪୭, ୧୪୮, ୧୪୯, ୩୦୨, ୩୦୭, ୩୨୬, ୪୨୭, ୧୨୦-ଖ ଆଦି ଲାଗିଛି । ଏହା ସହ ମୋଟର ଯାନ ଆଇନର ଧାରା ୧୭୭ ବି ଲାଗୁ ହୋଇଛି ।

ନୂଆଦିଲ୍ଲୀ: ଲଖିମପୁର ଖିରି କାଣ୍ଡର ମୁଖ୍ୟ ଅଭିଯୁକ୍ତ ତଥା କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀ ଅଜୟ ମିଶ୍ରାଙ୍କ ପୁଅ ଆଶୀଷ ମିଶ୍ରାଙ୍କୁ ପୁଣି ଜେଲ ଯିବାକୁ ପଡିବ । ସୁପ୍ରିମକୋର୍ଟ୍ ସୋମବାର ଦିନ ଆହ୍ଲାବାଦ ହାଇକୋର୍ଟଙ୍କ ପ୍ରଦତ୍ତ ଜାମିନକୁ ରଦ୍ଦ କରିଦେଇଛନ୍ତି । ଆଶୀଷଙ୍କ ଜାମିନକୁ ରଦ୍ଦ କରି ସୁପ୍ରିମ କୋର୍ଟ ତାଙ୍କୁ ଆଗାମୀ ଏକ ସପ୍ତାହ ମଧ୍ୟରେ ଆତ୍ମସମର୍ପଣ କରିବାକୁ ଆଦେଶ ଦେଇଛନ୍ତି ।

ଜାମିନ ରଦ୍ଦ କରି ସୁପ୍ରିମ କୋର୍ଟ କହିଛନ୍ତି ଯେ, ଆହ୍ଲାବାଦ ହାଇକୋର୍ଟ୍ ଦ୍ୱାରା ଦିଆଯାଇଥିବା ଜାମିନ ତରବରିଆ ନିଷ୍ପତ୍ତି ଥିଲା । ହାଇକୋର୍ଟ ପୀଡିତ ପକ୍ଷକୁ ନଶୁଣି ଏକତରଫା ଜାମିନ ଦେଇଥିଲେ ବୋଲି ସର୍ବୋଚ୍ଚ ଅଦାଲତ କହିଛନ୍ତି । ପୀଡିତ ପକ୍ଷ ଓ ଅନ୍ୟ ବିନ୍ଦୁ ଉପରେ ବିଚାର କରି ସର୍ବୋଚ୍ଚ ଅଦାଲତ ତୁରନ୍ତ ଜାମିନ ରଦ୍ଦ କରିବାକୁ କହିଥିଲେ ।

ଆଶୀଷ ମିଶ୍ରାଙ୍କୁ ମଧ୍ୟ ମିଳିଲା ଆଶ୍ୱସ୍ତି
ତେବେ ଆଶୀଶ ମିଶ୍ରାଙ୍କ ପାଇଁ ଆଶ୍ୱସ୍ତିର ଖବର ହେଉଛି ଯେ, ସେ ପୁଣିଥରେ ଜାମିନ ପାଇଁ ଆବେଦନ କରିପାରିବେ । ସୁପ୍ରିମକୋର୍ଟ ତାଙ୍କୁ ହାଇକୋର୍ଟରେ ପୁଣିଥରେ ଜାମିନ ଆବେଦନ କରିବାକୁ କହିଛନ୍ତି । ଅର୍ଥାତ ଆଶୀଷଙ୍କ ପାଇଁ ଏବେ ମଧ୍ୟ ଗୋଟିଏ ଦ୍ୱାରା ଖୋଲା ଅଛି ।

ସୁପ୍ରିମକୋର୍ଟଙ୍କୁ ଧନ୍ୟବାଦ କହିଲେ ଟିକାଏତ
ଆଶୀଷଙ୍କ ଜାମିନ ଆବେଦନ ରଦ୍ଦ ସଂକ୍ରାନ୍ତୀୟ ଆଦେଶ ପାଇଁ ଚାଷୀ ନେତା ରାକେଶ ଟିକାଏତ ସୁପ୍ରମକୋର୍ଟଙ୍କୁ ଧନ୍ୟବାଦ ଜଣାଇଛନ୍ତି । ସେ କହିଛନ୍ତି ଯେ, ଏକ ସଠିକ ନିଷ୍ପତ୍ତି ନେଇଥିବା ସୁପ୍ରିମକୋର୍ଟଙ୍କୁ ଆମେ ଧନ୍ୟବାଦ ଜଣାଇବାକୁ ଚାହୁଁଛୁ । ସରକାରଙ୍କ ତରଫରୁ ନରମନୀତି ଆପଣାଯାଇଥିଲା । ସରକାର ମନ୍ତ୍ରୀଙ୍କ ସପକ୍ଷରେ ଛିଡା ହୋଇଛି ।

୧୨୯ ଦିନ ଥିଲେ ଜେଲରେ
ଆହ୍ଲାବାଦ ହାଇକୋର୍ଟ ଫେବ୍ରୁଆରୀ ୧୦ ତାରିଖରେ ଆଶୀଷଙ୍କୁ ଜାମିନ ଦେଇଥିଲେ । ଫେବ୍ରୁଆରି ୧୫ ତାରିଖରେ ଆଶୀଷ ୧୨୯ ଦିନ ଜେଲରେ ରହିବା ପରେ ବାହାରକୁ ଆସିଥିଲେ । ସୂଚନାଯୋଗ୍ୟ ଯେ, ଲଖିମପୁର ଖୀରିର ତିକୁନିଆରେ ଅକ୍ଟୋବର ୩ ତାରିଖ ଦିନ ଆନ୍ଦୋଳନକାରୀ ଚାଷୀଙ୍କ ଉପରେ ଗାଡି ଚଢିଯାଇଥିଲା । ତିନୋଟି ଗାଡି ଚାଷୀଙ୍କ ଉପରକୁ ମାଡିଯାଇଥିଲା । ଏହି ଗାଡି ମଧ୍ୟରୁ ଗୋଟିକରେ ଆଶୀଷ ଥିଲେ । ଯେଉଁଥିର ୪ ଜଣ ଚାଷୀଙ୍କ ସହିତ ୮ ଜଣ ପ୍ରାଣ ହରାଇଥିଲେ ।