ଚେନ୍ନଇ: ଚଳିତ ଆଇପିଏଲ୍‌‌ରେ ୫୧ ଦିନ ଓ ୭୦ ମ୍ୟାଚ୍‌‌ ଖେଳାଯିବ ପରେ ପ୍ଲେ ଅଫ୍‌‌କୁ ୪ଟି ଦଳ ଯୋଗ୍ୟତା ଅର୍ଜନ କରିଛନ୍ତି। ସ୍ଥାନୀୟ ଏମ୍‌‌ଏ ଚିଦାମ୍ବରମ ଷ୍ଟାଡିୟମରେ ମହେନ୍ଦ୍ର ସିଂ ଧୋନିଙ୍କ ଚେନ୍ନାଇ ସୁପରକିଙ୍ଗ୍‌‌ସ ଓ ହାର୍ଦ୍ଦିକ ପାଣ୍ଡ୍ୟାଙ୍କ ନେତୃତ୍ୱାଧୀନ ଗୁଜରାଟ ଟାଇଟନ୍ସ କ୍ୱାଲିଫାୟର-୧ରେ ପରସ୍ପର ସହ ମୁକାବିଲା କରିବେ। ଏହି ନିର୍ଣ୍ଣାୟକ ମ୍ୟାଚ୍‌‌ର ବିଜୟୀ ଦଳ ସିଧାସଳଖ ଫାଇନାଲ ମ୍ୟାଚ୍‌‌ ଖେଳିବ। ଦୁଇ ଦଳ ପଏଣ୍ଟ ତାଲିକାର ପ୍ରଥମ ଦୁଇଟି ସ୍ଥାନରେ ରହି ପ୍ଲେ-ଅଫ୍‌‌ରେ ପ୍ରବେଶ କରିଥିଲେ। ଗୁଜରାଟ ୧୪ଟି ମ୍ୟାଚ୍‌‌ ଖେଳି ୧୦ ବିଜୟ ଓ ୪ ପରାଜୟ ସହ ୨୦ ପଏଣ୍ଟ ପାଇ ଶୀର୍ଷରେ ରହିଥିଲା। ସେହିପରି ଚେନ୍ନାଇ ୧୪ ମ୍ୟାଚ୍‌‌ ଖେଳି ୮ ବିଜୟ, ୫ ପରାଜୟ ସହ ୧୭ ପଏଣ୍ଟ ପାଇ ଉନ୍ନତ ନେଟ୍‌‌ ରନରେଟ୍‌‌ରେ ଲକ୍ଷ୍ନୌ ସୁପରଜାଏଣ୍ଟସକୁ ପଛରେ ପକାଇ ଦ୍ୱିତୀୟ ସ୍ଥାନରେ ରହିଥିଲା। ରବିବାର ଏହି ପ୍ରତିଯୋଗିତାର ଫାଇନାଲ ଖେଳାଯିବ।

ପ୍ଲେ- ଅଫ୍‌‌ରେ ଉଭୟ ଦଳର ରେକର୍ଡ ଭଲ
ପ୍ଲେ ଅଫ୍‌‌ରେ ଗୁଜରାଟର ଶତ ପ୍ରତିଶତ ବିଜୟ ରେକର୍ଡ ରହିଛି। ଗତ ୨୦୨୨ରେ ଗୁଜରାଟ ପଦାର୍ପଣ କରିଥିଲା। ଗତ ବର୍ଷ ପ୍ଲେ ଅଫ୍‌‌ରେ ୨ଟି ମ୍ୟାଚ୍‌‌ ଖେଳି ଗୁଜରାଟ ଦୁଇଟିରେ ବିଜୟୀ ହୋଇ ଫାଇନାଲରେ ପ୍ରବେଶ କରି ଶେଷରେ ଚାମ୍ପିଅନ ବିବେଚିତ ହୋଇଥିଲା। ଚେପକ୍‌‌ ଷ୍ଟାଡିୟମରେ ଗୁଜରାଟ କୌଣସି ମ୍ୟାଚ୍‌‌ ଖେଳିନାହିଁ। କିନ୍ତୁ ଲିଗ ପର୍ଯ୍ୟାୟରେ ଉଭୟ ଦଳ ମଧ୍ୟରେ ୩ଥର ମୁକାବିଲା ହୋଇଛି। ଏ ସମସ୍ତ ମୁକାବିଲାରେ ଗୁଜରାଟ ପ୍ରତିଦ୍ୱନ୍ଦ୍ୱୀ ଚେନ୍ନାଇକୁ ପରାସ୍ତ କରିଛି। ଏଠାରେ ଦୁଇ ପୂର୍ବ ଚାମ୍ପିଅନ ଦଳ ପରସ୍ପରକୁ ପ୍ରଥମଥର ପାଇଁ ଭେଟିବେ। ଅନ୍ୟପଟେ ଚେନ୍ନାଇ କେବଳ ଦୁଇଥର ୨୦୨୦ ଓ ୨୦୨୨ରେ ପ୍ଲେ- ଅଫ୍‌‌ରେ ପ୍ରବେଶ କରିପାରି ନଥିଲା। ଏହି ଦୁଇଟି ସଂସ୍କରଣରେ ଚେନ୍ନାଇ ସେକେଣ୍ଡ ଲାଷ୍ଟ ସ୍ଥାନରେ ରହିଥିଲା। ପ୍ଲେ ଅଫ୍‌‌ରେ ଚେନ୍ନାଇ ମୋଟ୍‌‌ ଉପରେ ୨୪ଟି ମ୍ୟାଚ୍‌‌ ଖେଳି ୧୫ଟିରେ ବିଜୟୀ ହୋଇଥିବା ବେଳେ ୯ଟିରେ ପରାଜୟ ବରଣ କରିଛି। ଅର୍ଥାତ ଚେନ୍ନାଇ ପ୍ଲେ ଅଫ୍‌‌ରେ ୬୨.୫ ପ୍ରତିଶତ ମ୍ୟାଚ୍‌‌ ଜିତିଛି। ଏହି ଦଳ ୨୦୧୦, ୨୦୧୧, ୨୦୧୮ ଓ ୨୦୨୧ରେ ଚାମ୍ପିଅନ ହୋଇଥିଲା। ସେହିପରି ୨୦୦୮, ୨୦୧୨, ୨୦୧୩ ଓ ୨୦୧୫ରେ ଫାଇନାଲରେ ପରାସ୍ତ ହୋଇ ରନର୍ସଅପ ହୋଇଥିଲା। ୨୦୧୧ରେ ପ୍ରଥମଥର ପାଇଁ ପ୍ଲେ- ଅଫ୍‌‌ ପ୍ରଣାଳୀ ଲାଗୁ ହୋଇଥିଲା।

ଗିଲ୍‌‌, ଋତୁରାଜଙ୍କ ଉପରେ ନଜର
ଲିଗ୍‌‌ ପର୍ଯ୍ୟାୟରେ ଦମ୍‌‌ଦାର ପ୍ରଦର୍ଶନ କରି ଉଭୟ ଦଳ ଏହି ନିର୍ଣ୍ଣାୟକ ମ୍ୟାଚ୍‌‌ ପାଇଁ ସମ୍ପୂର୍ଣ୍ଣ ଭାବେ ପ୍ରସ୍ତୁତ ଅଛନ୍ତି ବୋଲି ସୂଚନା ଦେଇଛନ୍ତି। ଉଭୟ ଦଳରେ ଦକ୍ଷ ଓ ପ୍ରତିଭାସମ୍ପର୍ଣ୍ଣ ଖେଳାଳିମାନେ ରହିଛନ୍ତି। ଘରୋଇ ପରିବେଶରୁ ଦର୍ଶକଙ୍କ ସମର୍ଥନ ପାଇ ଚେନ୍ନାଇ ନିଶ୍ଚିତ ଭାବେ ଫାଇଦାରେ ରହିବ। ଧୋନିଙ୍କ ବିଚକ୍ଷଣ ନେତୃତ୍ୱ ଓ ପାଣ୍ଡ୍ୟାଙ୍କ ଆକ୍ରମଣାତ୍ମକ ଆଭିମୁଖ୍ୟ ମଧ୍ୟରେ ଲଢ଼େଇ ଦେଖିବାକୁ ମିଳିବ। ଗୁଜରାଟ ଯୁବ ଓପନର ଶୁବମାନ ଗିଲ୍‌‌ ଜବରଦସ୍ତ ଫର୍ମରେ ରହିଥିବାରୁ ଧୋନି ନିଶ୍ଚିତଭାବେ ଚିନ୍ତିତ ଥିବେ। ତେଣୁ ଗିଲଙ୍କ ଉପରେ ସମସ୍ତଙ୍କ ନଜର ରହିବ। ଚେନ୍ନାଇ ପାଇଁ ଅଧିନାୟକ ଧୋନିଙ୍କ ସମେତ ଡେଭନ କନୱେ, ଋତୁରାଜ ଗାଏକ୍ୱାଡ ଓ ଶିବମ ଦୁବେଙ୍କ ବ୍ୟାଟିଂ ଉପରେ ସମସ୍ତଙ୍କ ନଜର ରହିବ। ସେହିପରି ବୋଲିଂରେ ମାଥିସା ପତିରାଣା ଓ ତୁଷାର ଦେଶପାଣ୍ଡେ ନିର୍ଣ୍ଣାୟକ ଭୂମିକା ଗ୍ରହଣ କରିବେ। ଅଲରାଉଣ୍ଡର ରବୀନ୍ଦ୍ର ଜାଡେଜା ମଧ୍ୟ ନିଜ ପ୍ରଦର୍ଶନ ବଳରେ ମ୍ୟାଚ୍‌‌ ନିଜ ସପକ୍ଷରେ ନେଇପାରିବେ। ଅନ୍ୟପଟେ ଗୁଜରାଟ ପାଇଁ ବ୍ୟାଟିଂରେ ଗିଲଙ୍କ ସମେତ ପାଣ୍ଡ୍ୟା ମ୍ୟାଚ୍‌‌ ବିଜୟୀ ପ୍ରଦର୍ଶନ କରିବେ ବୋଲି ଆଶା କରାଯାଉଛି। ସେହିପରି ବୋଲିଂରେ ମହମ୍ମଦ ସାମି ଓ ରସିଦ ଖାନ ଗୁଜରାଟ ପାଇଁ ପୁଣିଥରେ ଉପଯୋଗୀ ସାବ୍ୟସ୍ତ ହେବେ ବୋଲି ଆଶା କରାଯାଉଛି। ଟସ୍‌‌ ବଜୟୀ ଦଳ ପ୍ରଥମେ ଫିଲ୍ଡିଂ କରିବାକୁ ନିଷ୍ପତ୍ତି ନେବ ଓ ରନ ଚେଜ୍‌‌ କରିବାକୁ ପସନ୍ଦ କରିବ। ମୋଟାମୋଟି ଉପରେ ଏହି ମ୍ୟାଚ୍‌‌ରେ ସଂଘର୍ଷ ଦେଖିବାକୁ ମିଳିବ ଓ କ୍ରିକେଟ ପ୍ରଶଂସକ ମନୋରଞ୍ଜନ ଜବରଦସ୍ତ ଖୋରାକ ପାଇବେ ବୋଲି ଆଶା କରାଯାଉଛି।

ଅହମ୍ମଦାବାଦ: ଆଇପିଏଲ ୨୦୨୩ର ପ୍ରଥମ ମ୍ୟାଚ୍‌ରେ ଚେନ୍ନାଇକୁ ହରାଇ ବାଜିମାତ କରିଛି ଡିଫେଣ୍ଡିଂ ଚାମ୍ପିୟନ ଗୁଜରାଟ ଟାଇଟନ୍ସ। ହାର୍ଦ୍ଦିକ ପାଣ୍ଡ୍ୟାଙ୍କ ଗୁଜରାଟ ଟାଇଟନ୍ସ ୫ ୱିକେଟରେ ଚେନ୍ନାଇ ସୁପର କିଙ୍ଗସକୁ ପରାସ୍ତ କରିଛି । ପ୍ରଥମେ ବ୍ୟାଟିଂ କରି ୧୭୮ ରନ୍ କରିଥିଲା ଚେନ୍ନାଇ ସୁପରକିଙ୍ଗସ । ୧୭୯ରନର ବିଜୟ ଲକ୍ଷ୍ୟକୁ ୧୯.୨ ଓଭରରେ ୫ୱିକେଟ୍ ବିନିମୟରେ ହାସଲ କରିନେଇଛି ଗୁଜରାଟ । ଆଇପିଏଲର ୧୬ତମ ସଂସ୍କରଣର ପ୍ରଥମ ମ୍ୟାଚରେ ବିଜୟ ସହ ଅଭିଯାନ ଆରମ୍ଭ କରିଛି ଗୁଜରାଟ ଟାଇଟନ୍ସ ।

ଟସ୍ ହାରି ବ୍ୟାଟିଂ ପାଇଁ କ୍ରୀଜକୁ ଓହ୍ଲାଇଥିବା ଚେନ୍ନାଇ ସୁପରକିଙ୍ଗସର ଆରମ୍ଭ ଖରାପ ରହିଥିଲା । ଡେଭୋନ କନୱେ ତୃତୀୟ ଓଭରରେ ହିଁ ମହମ୍ମଦ ସାମୀଙ୍କ ଓଭରରେ ଆଉଟ୍ ହୋଇଯାଇଥିଲେ । ତାଙ୍କ ପରେ ମୋଇନ ଅଲୀ ଟିମକୁ ଭଲ ଆରମ୍ଭ ଦେଇଥିଲେ । ୧୭ ଟିଲରେ ସେ ୨୩ ରନ୍ ସଂଗ୍ରହ କରିଥିଲେ । ପାୱାର ପ୍ଲେର ଶେଷ ଓଭରରେ ମୋଇନ ଅଲୀ ରଶିଦ ଖାନଙ୍କ ବଲରେ ଆଉଟ୍ ହୋଇଯାଇଥିଲେ । ଏହାପରେ ଦଳ ୬ ଓଭରରେ ୨ ୱିକେଟ ବିନିମୟରେ ୫୧ ରନ୍ ସଂଗ୍ରହ କରଥିଲା । ହେଲେ ଋତୁରାଜ ଗାୟକ୍ୱାଡ ବିସ୍ଫୋରକ ପାରି ଜାରି ରଖିଥିଲେ । ୫୦ ଟି ବଲ୍ ଖେଳି ଗାୟକ୍ୱାଡ ଦ୍ରୁତତମ ୯୨ ରନ୍ ସଂଗ୍ରହ କରିଥିଲେ । ଅଲଜାରିଙ୍କ ଓଭରରେ ସେ କ୍ୟାଚ୍ ଆଉଟ୍ ହୋଇ ପାଭେଲିଅନ୍ ଫେରିଯାଇଥିଲେ । ଅନ୍ୟମାନଙ୍କ ମଧ୍ୟରେ ଅମ୍ବାତି ରାୟୁଡୁ ୧୨ ରନ୍ ଏବଂ ଶିଭମ ଦୁବେ ୧୯ ରନ୍ କରିଥିଲେ । ଶେଷରେ ଧୋନୀ ୭ ଟି ବଲରେ ୧୪ ରନ୍ କରି ଅପରାଜିତ ରହିଥିଲେ ।

୧୭୯ରନର ବିଜୟ ଲକ୍ଷ୍ୟକୁ ପିଛା କରି ଗୁଜରାଟ ପକ୍ଷରୁ ରିଦ୍ଧିମାନ ଶାହା ଏବଂ ଶୁଭମନ ଗିଲ୍ ପ୍ରାରମ୍ଭିକ ବ୍ୟାଟର ଭାବେ କ୍ରୀଜକୁ ଓହ୍ଲାଇଥିଲେ । ଦୁଇ ବ୍ୟାଟ୍ସମ୍ୟାନ ଦଳକୁ ଭଲ ଆରମ୍ଭ ଦେଇଥିଲେ । ୧୬ ଟି ବଲରେ ୨୫ ରନ୍ କରି ଶାହା ରାଜବର୍ଦ୍ଧନଙ୍କ ଓଭରରେ ଆଉଟ୍ ହୋଇଯାଇଥିଲେ । ତାଙ୍କ ସ୍ଥାନରେ ସାଇ ସୁଦର୍ଶନ ଆସି ଗିଲଙ୍କ ସହ କିଛି ସମୟ ପାଇଁ ପାର୍ଟନସିପ୍ କରିଥିଲେ । ୧୭ ଟି ବଲ୍ ଖେଳି ସେ ୨୨ ରନ୍ କରି ଆଉଟ୍ ହୋଇଯାଇଥିଲେ । ଶୁଭମନ ଗିଲ୍ କିନ୍ତୁ ଦଳୀୟ ସ୍ଥିତିକୁ ଆଗକୁ ବଢ଼ାଇଥଲେ । ୩୬ ଟି ବଲରେ ସେ ଦ୍ରୁତତମ ୬୩ ରନ୍ ସଂଗ୍ରହ କରିଥିଲେ । ଅନ୍ୟମାନଙ୍କ ମଧ୍ୟରେ ବିଜୟ ଶଙ୍କର ୨୧ ଟି ବଲରେ ୨୭ ରନ୍ କରିଥଲେ । ଶେଷ ଭାଗରେ ରାହୁଲ ତେୱାଟିଆ ଏବଂ ରଶିଦ୍ ଖାନ ଚମତ୍କାର ପାର୍ଟନରସିପ୍ କରି ଦଳକୁ ବିଜୟୀ କରାଇଥିଲେ । ରାହୁଲ ତେୱାଟିଆ ୧୪ ଟି ବଲରେ ୧୫ ରନ୍ ଏବଂ ରଶିଦ ଖାନ୍ ୩ ଟି ବଲରେ ୧୦ ରନ୍ କରି ଅପରାଜିତ ରହିଥିଲେ । ଚେନ୍ନାଇ ପକ୍ଷରୁ ରାଜବର୍ଦ୍ଧନ ସର୍ବାଧିକ ୩ ଟି ୱିକେଟ୍ ଅକ୍ତିଆର କରିଥିଲେ ।

ଅହମ୍ମଦାବାଦ୍‌‌: ଗତଥରର ଚାମ୍ପିଅନ୍‌‌ ଗୁଜରାଟ ଟାଇଟନ୍ସ ଓ ଶକ୍ତିଶାଳୀ ଚେନ୍ନାଇ ସୁପର କିଙ୍ଗ୍‌‌ସ ମଧ୍ୟରେ ଇଣ୍ଡିଆନ ପ୍ରିମିୟର ଲିଗ୍‌‌-୨୦୨୩ର ଉଦ୍‌‌ଘାଟନୀ ମୁକାବିଲା ବିଶ୍ୱର ସର୍ବବୃହତ୍‌‌ ନରେନ୍ଦ୍ର ମୋଦୀ କ୍ରିକେଟ ଷ୍ଟାଡିୟମ୍‌‌ରେ ଖେଳାଯିବ। ଅଭିଜ୍ଞତାରେ ଭରପୁର ମହେନ୍ଦ୍ର ସିଂ ଧୋନିଙ୍କ ନେତୃତ୍ୱରେ ଚେନ୍ନାଇ ବନାମ ଉତ୍ସାହୀ ହାର୍ଦ୍ଦିକ ପାଣ୍ଡ୍ୟାଙ୍କ ନେତୃତ୍ୱରେ ଗଠିତ ଗୁଜରାଟ ଟିମ୍‌‌ ମଧ୍ୟରେ ମୁକାବିଲା ଖୁବ୍‌‌ ରୋମାଞ୍ଚକ ହେବ ବୋଲି ଆଶା କରିବା ସ୍ୱାଭାବିକ୍‌‌। ଅନ୍ତର୍ଜାତୀୟ କ୍ରିକେଟରୁ ଅବସର ନେବା ପରେ ଧୋନି ଏହି ପ୍ରତିଯୋଗିତା ଲାଗି ଜୋରଦାର ପ୍ରସ୍ତୁତି କରିଛନ୍ତି। ଅନ୍ୟପକ୍ଷରେ ଭାରତୀୟ ଦଳ ସହ ଖେଳି ହାର୍ଦ୍ଦିକ ନିଜକୁ ଫିଟ୍‌‌ ରଖିଛନ୍ତି। ଦୀର୍ଘ ୪ ବର୍ଷ ପରେ ଘରୋଇ ସମର୍ଥକଙ୍କ ଆଗରେ ଏହି ପ୍ରତିଯୋଗିତା ଖେଳାଯାଉଥିବାରୁ ଏହାକୁ ନେଇ ଉଭୟ ଖେଳାଳି ଓ ସମର୍ଥକ ବେଶ ଉତ୍ସାହିତ ଅଛନ୍ତି।

ଗୁଜରାଟ ଟାଇଟନ୍ସର ଏହା ହୋମ୍‌‌ ଗ୍ରାଉଣ୍ଡ। ଗତବର୍ଷ ଏହି ଦଳ ଆଇପିଏଲ୍‌‌ରେ ଲକ୍ଷ୍ନୌ ସୁପର ଜ୍ୟାଣ୍ଟସ ସହ ପଦାର୍ପଣ କରିଥିଲା। ହାର୍ଦ୍ଦିକ ପାଣ୍ଡ୍ୟାଙ୍କ ନେତୃତ୍ୱରେ ଗୁଜରାଟ ଟାଇଟନ୍ସ ପଦାର୍ପଣ ଋତୁରେ ଚାମ୍ପିଅନ୍‌‌ ହୋଇ ଅନେକ ସମାଲୋଚକଙ୍କ ମୁହଁ ବନ୍ଦ କରିବା ସହ ଇତିହାସ ସୃଷ୍ଟି କରିଥିଲା। ଗତଥର ଚେନ୍ନଇ ବିପକ୍ଷରେ ଦୁଇଟିଯାକ ମୁକାବିଲାକୁ ମଧ୍ୟ ଗୁଜରାଟ ଜିତିନେଇଥିଲା। ଏକ ଲକ୍ଷ ଦର୍ଶକଙ୍କ ସମ୍ମୁଖରେ ଗତବର୍ଷ ଖେଳାଯାଇଥିବା ଫାଇନାଲରେ ରାଜସ୍ଥାନ ରୟାଲ୍ସକୁ ହରାଇ ଟାଇଟଲ ଜିତିବା ପରେ ଏହି ଦଳଠାରୁ ଅନେକ କିଛି ଆଶା କରାଯାଉଛି। ଏହି ମୁକାବିଲାରେ ମଧ୍ୟ ଗୁଜରାଟକୁ ଫେବରାଇଟ ବିବେଚନା କରାଯାଉଛି। ଏଭଳି ସମୟରେ ପାଣ୍ଡ୍ୟା ବନାମ ଧୋନି ମୁକାବିଲା ରୋମାଞ୍ଚକ ହେବ ବୋଲି କୁହାଯାଇପାରେ।

ଆୟୋଜକ ବିସିସିଆଇ ଏଥର ପ୍ରତିଯୋଗିତାରେ କିଛି ନୂଆ ନିୟମ ପ୍ରଣୟନ କରିଛି। ଏହାକୁ ଦଳ ଗୁଡ଼ିକ କିପରି ବିନିଯୋଗ କରିବେ, ତାହା ଉପରେ ମ୍ୟାଚ୍‌‌ର ସ୍ଥିତି ମଧ୍ୟ ନିର୍ଭର କରୁଛି। ରଣନୀତି ପ୍ରସ୍ତୁତ କରିବାରେ ଚେନ୍ନାଇ ଅଧିନାୟକ ଧୋନି ଜଣେ ବିଶେଷଜ୍ଞ। ଏହା ବାଦ୍‌‌ ସେ ସମସ୍ତ ପ୍ରକାର ପରିସ୍ଥିତି ସହ ଖାପ୍‌‌ ଖୁଆଇବାରେ ମଧ୍ୟ ସିଦ୍ଧହସ୍ତ। ମିଡିଆ ରିପୋର୍ଟକୁ ବିଶ୍ୱାସ କଲେ ଧୋନିଙ୍କର ଏହା ଶେଷ ଆଇପିଏଲ୍‌‌। ଏଣୁ ସେ ଚତୁର୍ଥ ଟାଇଟଲ ଜିତି ସମ୍ମାନର ସହ ବିଦାୟ ନେବାକୁ ନିଶ୍ଚୟ ଯୋଜନା କରିଥିବେ। ଏଣୁ ତାଙ୍କ ଲାଗି ଏହି ଶେଷ ପ୍ରତିଯୋଗିତା ବେଶ ଗୁରୁତ୍ୱ ବହନ କରୁଛି। ଖେଳାଳି ନିଲାମ ପରେ ଦଳରେ ଅନେକ ପରିବର୍ତ୍ତନ ହୋଇଛି। ଏହା ସହ ଇମ୍ପାକ୍ଟ ପ୍ଲେୟରଙ୍କ ବ୍ୟବହାର ଏହି ସଂସ୍କରଣରେ ନୂଆ ସମୀକରଣ ସୃଷ୍ଟି କରିବ। ଦଳର ଆବଶ୍ୟକତା ଅନୁଯାୟୀ ମ୍ୟାଚ୍‌‌ର ଯେ କୌଣସି ସମୟରେ ଏହି ଇମ୍ପାକ୍ଟ ପ୍ଲେୟର ବ୍ୟାଟିଂ କିମ୍ବା ବୋଲିଂ କରିବାକୁ ଆସିପାରିବେ। ଏଣୁ ରଣନୀତିରେ ମାହିର ଧୋନି ଇମ୍ପାକ୍ଟ ପ୍ଲେୟରଙ୍କୁ କିପରି ବିନିଯୋଗ କରି ଫାଇଦା ଉଠାଇବେ ତାହା ଉପରେ ଦଳର ସଫଳତା ନିଶ୍ଚିତ ନିର୍ଭର କରିବ।

ଅନ୍ୟପକ୍ଷରେ ଅଭିଜ୍ଞ ଓ ଯୁବ ଖେଳାଳିମାନଙ୍କୁ ନେଇ ଗଠିତ ଗୁଜରାଟ ଦଳ ବେଶ ଆତ୍ମବିଶ୍ୱାସୀ ହୋଇପଡ଼ିଛି। ଏଭଳି କ୍ଷେତ୍ରରେ ପାଣ୍ଡ୍ୟାଙ୍କ ଦଳକୁ ହରାଇବାକୁ ହେଲେ ପ୍ରତିପକ୍ଷ ଦଳକୁ ନିଶ୍ଚିତଭାବେ ଉନ୍ନତମାନର ଖେଳ ପ୍ରଦର୍ଶନ କରିବାକୁ ପଡ଼ିବ। କେନ୍‌‌ ୱିଲିୟମ୍‌‌ସନ, ଜୀବନରେ ଶ୍ରେଷ୍ଠ ଫର୍ମରେ ଥିବା ଶୁବମାନ ଗିଲ ଯେ କୌଣସି ସମୟରେ, ଯେ କୌଣସି ଦଳ ବିପକ୍ଷରେ ମ୍ୟାଚ୍‌‌ ନିଜ ସପକ୍ଷରେ ନେବାର ଦକ୍ଷତା ରଖିଛନ୍ତି। ବୋଲିଂରେ ମଧ୍ୟ ନିୟନ୍ତ୍ରିତ ଖେଳାଳି ଦଳର ସଫଳତାର ଜୋରଦାର ଯୋଗଦାନ ଦେଇଛନ୍ତି। ପାଣ୍ଡ୍ୟାଙ୍କ ଅଲରାଉଣ୍ଡ ପ୍ରଦର୍ଶନ ତାଙ୍କ ଟିମ୍‌‌କୁ ଫାଇଦାରେ ରଖିବ ବୋଲି ଆଶା କରିବା ସ୍ୱାଭାବିକ୍‌‌।

ଚେନ୍ନାଇ ସୁପର କିଙ୍ଗ୍‌‌ସ: ମହେନ୍ଦ୍ର ସିଂ ଧୋନି (ଅଧିନାୟକ ଓ ୱିକେଟରକ୍ଷକ), ଡେଭନ କନୱେ, ଋତୁରାଜ ଗାଏକ୍ୱାଡ, ଅମ୍ବତି ରାୟୁଡୁ, ମୋଇନ ଅଲ୍ଲୀ, ବେନ୍‌‌ ଷ୍ଟୋକ୍ସ, ଶିବମ ଦୁବେ, ରବୀନ୍ଦ୍ର ଜାଡେଜା, ଡ୍ୱେନ୍‌‌ ପ୍ରିଟୋରିଓସ, ଦୀପକ ଚହର, ଆଜିଙ୍କ୍ୟ ରାହାଣେ, ଶୁଭ୍ରାଂସୁ ସେନାପତି, ମିଚେଲ ସାଣ୍ଟନର, ତୁଷାର ଦେଶପାଣ୍ଡେ ଓ ସମରଜିତ ସିଂ।

ଗୁଜରାଟ ଟାଇଟନ୍ସ: ହାର୍ଦ୍ଦିକ ପାଣ୍ଡ୍ୟା (ଅଧିନାୟକ), ଶୁବମାନ ଗିଲ୍‌‌, କେନ୍‌‌ ୱିଲିୟମସନ, ମାଥ୍ୟୁ ୱେଡ୍‌‌ (ୱିକେଟ ରକ୍ଷକ), ରଶିଦ୍‌‌ ଖାନ୍‌‌, ଅଲଜରୀ ଯୋଶେଫ୍‌‌, ଓଡିଆନ ସ୍ମିଥ୍‌‌, ଯୋଶୁଆ ଲିଟ୍ଟଲ, ଶ୍ରୀକର ଭରତ, ମହମ୍ମଦ୍‌‌ ସାମି, ରାହୁଲ ତେୱାତିଆ, ଆର୍‌‌ ସାଇ କିଶୋର, ସାଇ ସୁଦର୍ଶନ, ବିଜୟ ଶଙ୍କର ଓ ଶିବମ ମାଭି।

ମୁମ୍ବାଇ: ଚଳିତ ଆଇପିଏଲ୍‌ର ୨୯ତମ ଲିଗ୍‌ ମ୍ୟାଚରେ ମୁହାଁମୁହିଁ  ହୋଇଛନ୍ତି ଚେନ୍ନାଇ ସୁପରକିଙ୍ଗ୍‌ସ ଓ ଗୁଜରାଟ ଟାଇଟନ୍ସ । ମୁକାବିଲାରେ ଟସ୍ ଜିତି ଗୁଜରାଟ ଟାଇଟନ୍ସ ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଛି। ଫଳରେ ଚେନ୍ନାଇ ପ୍ରଥମେ ବ୍ଯାଟି କରି ୧୬୯ ରନ କରିଛି। ଏହି ମ୍ଯାଚକୁ ଜିତିବାକୁ ହେଲେ ଗୁଜରାଟ ଟାଇଟନ୍ସକୁ  ୧୭୦ ରନର ଆବଶ୍ଯକତା ରହିଛି।

ଚେନ୍ନାଇ ସୁପର କିଙ୍ଗ୍ସ ପକ୍ଷରୁ ରବିନ୍ ଉଥାପ୍ପା ୩ରନ କରି ଆଉଟ ହୋଇଥିବା ବେଳେ ମୋଇନ ଅଲ୍ଲୀ ୧ ରନ କରି ଆଉଟ ହୋଇଥିଲେ। ପରେ ପାରିକୁ ରୁତୁରାଜ ଗାଏକୱାଡ ଓ ଅମ୍ବାତି ରାୟୁଡୁ ସମ୍ଭାଳିଥିଲେ। ରୁତୁରାଜ ଗାଏକୱାଡ ୪୮ ବଲରେ ୭୩ ରନ କରି ଆଉଟ ହୋଇଥିଲେ। ଅମ୍ବାତି ରାୟୁଡୁ ୩୧ ବଲରେ ୪୧ ରନ କରି ଆଉଟ ହୋଇଥିଲେ।  ଶିବମ ଦୁବେଙ୍କ ସହ ମିଶି ରବିନ୍ଦ୍ର ଜାଡେଜା ପୁଣିଥରେ ପାରିକୁ ସମ୍ଭାଳିଥିଲେ। ଶିବମ ଦୁବେ ୧୭ ବଲରେ ୧୯ ରନ କରି ରନ ଆଉଟ ହୋଇଥିଲେ। ରବିନ୍ଦ୍ର ଜାଡେଜା ୧୨ ବଲରେ ୨୨ ରନ କରି ଅପରାଜିତ ରହିଥିଲେ।

ଗୁଜୁରାଟ ଟାଇଟାନ୍ସ ପକ୍ଷରୁ ଅଲଜାରି ଜୋସେଫ ୨ଟି ୱିକେଟ ନେଇଥିବା ବେଳେ ୟଶ ଦୟାଲ ଓ ମହମ୍ମଦ ଶାମି ଗୋଟିଏ ଲେଖାଏଁ ୱିକେଟ ନେଇଥିଲେ।