ନୂଆଦିଲ୍ଲୀ: କ୍ୱିକ୍ କମର୍ସ ପ୍ଲାଟଫର୍ମଗୁଡ଼ିକ ଏବେ ଗ୍ରାହକଙ୍କୁ "୧୦ ମିନିଟ୍ ଡେଲିଭରି"ର ପ୍ରତିଶ୍ରୁତି ଦେବେ ନାହିଁ। କେନ୍ଦ୍ରମନ୍ତ୍ରୀ ମନସୁଖ ମାଣ୍ଡଭିୟଙ୍କ ହସ୍ତକ୍ଷେପ ପରେ ପ୍ରମୁଖ ଇ-କମର୍ସ କମ୍ପାନୀଗୁଡ଼ିକ ଏହି ସେବା ହଟାଇବାକୁ ସହମତି ପ୍ରକାଶ କରିଛନ୍ତି। ଡେଲିଭରି ପାର୍ଟନରଙ୍କ ସୁରକ୍ଷାକୁ ଦୃଷ୍ଟିରେ ରଖି ଏହି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି।

କେନ୍ଦ୍ର ସରକାରଙ୍କ ପକ୍ଷରୁ ବ୍ଲିଙ୍କିଟ୍ (Blinkit), ଜେପ୍ଟୋ (Zepto), ସ୍ୱିଗି (Swiggy) ଏବଂ ଜୋମାଟୋ (Zomato) ଭଳି କମ୍ପାନୀର ଅଧିକାରୀଙ୍କ ସହ ଆଲୋଚନା କରାଯାଇଥିଲା। ଏହି ବୈଠକରେ ମନ୍ତ୍ରୀ ମାଣ୍ଡଭିୟ ପରାମର୍ଶ ଦେଇଥିଲେ ଯେ, ତରବରିଆ ଡେଲିଭରି ପାଇଁ ଡେଲିଭରି ବୟଙ୍କ ଜୀବନ ପ୍ରତି ବିପଦ ସୃଷ୍ଟି ହେଉଛି। ତେଣୁ ବ୍ରାଣ୍ଡ ବିଜ୍ଞାପନ ଏବଂ ସୋସିଆଲ ମିଡିଆରୁ କଠୋର ଡେଲିଭରି ସମୟ ସୀମା ସମ୍ବନ୍ଧୀୟ ଦାବି ହଟାଇବାକୁ କମ୍ପାନୀଗୁଡ଼ିକୁ କୁହାଯାଇଛି।

ରିପୋର୍ଟ ଅନୁଯାୟୀ, ସରକାରଙ୍କ ନିର୍ଦ୍ଦେଶ ପରେ Blinkit ତୁରନ୍ତ ଏହାର ବ୍ରାଣ୍ଡିଂରୁ ୧୦ ମିନିଟ୍ ଡେଲିଭରି ପ୍ରତିଶ୍ରୁତି ହଟାଇ ଦେଇଛି। ଅନ୍ୟ କମ୍ପାନୀଗୁଡ଼ିକ ମଧ୍ୟ ଖୁବଶୀଘ୍ର ଏହି ନିୟମ ପାଳନ କରିବେ ବୋଲି ସରକାରଙ୍କୁ ଆଶ୍ୱାସନା ଦେଇଛନ୍ତି। ଏହି ପଦକ୍ଷେପ ଦ୍ୱାରା ଗିଗ୍ ୱାର୍କର୍ସ ବା ଡେଲିଭରି କର୍ମଚାରୀଙ୍କ କାର୍ଯ୍ୟ ପରିବେଶରେ ଉନ୍ନତି ଆସିବା ସହ ସଡ଼କ ସୁରକ୍ଷା ନିଶ୍ଚିତ ହୋଇପାରିବ।

ସୂଚନାଯୋଗ୍ୟ ଯେ, ନିକଟରେ ଗିଗ୍ ୱାର୍କର୍ସ ୟୁନିୟନ ପକ୍ଷରୁ ଦେଶବ୍ୟାପୀ ଧର୍ମଘଟ ଡାକରା ଦିଆଯାଇଥିଲା। ଇଣ୍ଡିଆନ୍ ଫେଡେରେସନ୍ ଅଫ୍ ଆପ୍-ବେସଡ୍ ଟ୍ରାନ୍ସପୋର୍ଟ ୱାର୍କର୍ସ (IFAT) ନେତୃତ୍ୱରେ ହୋଇଥିବା ଏହି ଆନ୍ଦୋଳନରେ ୧୦ ମିନିଟ୍ ଡେଲିଭରି ସେବା ବନ୍ଦ କରିବା ଏବଂ ପୁରୁଣା ପେ-ଆଉଟ୍ ବ୍ୟବସ୍ଥା ଲାଗୁ କରିବାକୁ ଦାବି କରାଯାଇଥିଲା।

ନୂଆଦିଲ୍ଲୀ: କେନ୍ଦ୍ର ଶ୍ରମ ମନ୍ତ୍ରଣାଳୟ କର୍ମଚାରୀ ଭବିଷ୍ୟନିଧି ପାଣ୍ଠି ସଂଗଠନ( ଇପିଏଫ୍‌ଓ)ସଦସ୍ୟଙ୍କ ପାଇଁ ଟଙ୍କା ଉଠାଣ ଏଟିଏମ୍‌ କିମ୍ବା ୟୁପିଆଇ ଜରିଆରେ କରିବାର ସୁବିଧା ପ୍ରଦାନ କରିବାକୁ ଯାଉଛି। ଏହି ପରିବର୍ତ୍ତନ ୨୦୨୬ ମାର୍ଚ୍ଚରୁ କାର୍ଯ୍ୟକାରୀ ହୋଇପାରେ। କେନ୍ଦ୍ର ଶ୍ରମ ମନ୍ତ୍ରୀ ମନସୁଖ ମାଣ୍ଡଭିଆଙ୍କ ଅନୁଯାୟୀ, ସଦସ୍ୟମାନେ ଏବେ ବି ସେମାନଙ୍କର ଇପିଏଫ୍‌ ବାଲାନ୍ସର ୭୫ ପ୍ରତିଶତ ଉଠାଣ କରିପାରିବେ। ଭବିଷ୍ୟତରେ ଏହି ଉଠାଣ ପ୍ରକ୍ରିୟାକୁ ଆହୁରି ସରଳ କରାଯିବ। ଲକ୍ଷ୍ୟ ହେଉଛି ଲୋକମାନଙ୍କୁ ସେମାନଙ୍କର କଠିନ ପରିଶ୍ରମର ଟଙ୍କା ଶୀଘ୍ର ଏବଂ ସହଜରେ ଉପଲବ୍ଧ କରାଇବା।

ମନ୍ତ୍ରଣାଳୟ ମଧ୍ୟ ଇପିଏଫ୍‌ ଉଠାଣକୁ ୟୁପିଆଇ ସହିତ ଲିଙ୍କ୍ କରିବ। ଏହି ନୂତନ ପଦକ୍ଷେପର ଲକ୍ଷ୍ୟ ସଦସ୍ୟମାନଙ୍କ ପାଇଁ ପାଣ୍ଠି ଉଠାଣକୁ ଯଥାସମ୍ଭବ ସହଜ କରିବା। ଲୋକମାନେ ଆଜିକାଲି ଦୈନନ୍ଦିନ ଆର୍ଥିକ କାରବାର ପାଇଁ ଏଟିଏମ୍‌ ଏବଂ ୟୁପିଆଇ ବ୍ୟବହାର କରନ୍ତି, ତେଣୁ ଇପିଏଫ୍‌କୁ ସମାନ ଭାବରେ ଲିଙ୍କ୍ କରିବା ଯୋଜନା ରହିଛି।  ସେ କହିଛନ୍ତି ଯେ, ଏହା ସଦସ୍ୟମାନଙ୍କୁ ଅନଲାଇନ୍ ପୋର୍ଟାଲ୍ କିମ୍ବା ନିଯୁକ୍ତିଦାତାଙ୍କ ଉପରେ ନିର୍ଭର କରିବାଠାରୁ ମୁକ୍ତ କରିବ। ଦାବି ସମାଧାନରେ ବିଳମ୍ବ ମଧ୍ୟ ହ୍ରାସ ପାଇବ। ବର୍ତ୍ତମାନ, ଇପିଏଫ୍‌ ଉଠାଣ ପାଇଁ ଏକାଧିକ ଫର୍ମ ପୂରଣ କରିବାକୁ ପଡୁଛି।  ଅନେକ ସଦସ୍ୟ ଏହି ପ୍ରକ୍ରିୟାକୁ କଷ୍ଟକର ମନେ କରନ୍ତି, ଯାହା ଉଠାଣରେ ବିଳମ୍ବ କରେ। ଏହି ସମସ୍ୟାର ସମାଧାନ ପାଇଁ, ସରକାର ଏଟିଏମ୍‌ ଏବଂ ୟୁପିଆଇ ଉଠାଣ ବିକଳ୍ପ ପ୍ରଚଳନ କରୁଛନ୍ତି। ଏହି ବୈଶିଷ୍ଟ୍ୟ ଦୈନନ୍ଦିନ ବ୍ୟାଙ୍କିଙ୍ଗ ଅଭ୍ୟାସ ସହିତ ସମନ୍ୱିତ ହେବ। ସଦସ୍ୟମାନଙ୍କୁ ଆଉ ଦୀର୍ଘ ସମୟ ଅପେକ୍ଷା କରିବାକୁ ପଡିବ ନାହିଁ କିମ୍ବା ଅନେକ ଡକ୍ୟୁମେଣ୍ଟ ଦାଖଲ କରିବାକୁ ପଡିବନାହିଁ। ପାଣ୍ଠି ସିଧାସଳଖ ସେମାନଙ୍କ ପଞ୍ଜିକୃତ ବ୍ୟାଙ୍କ ଆକାଉଣ୍ଟରେ ଜମା କରାଯିବ।

ଭୁବନେଶ୍ବର: ବାହାନଗା ଟ୍ରେନ ଦୁର୍ଘଟଣାରେ ଆହତଙ୍କ ଜୀବନ ବଞ୍ଚାଇବାକୁ ଚାଲିଛି ସମସ୍ତ ପ୍ରକାର ଚେଷ୍ଟା । ଦିଲ୍ଲୀ ଏମ୍ସ ସମେତ ବିଭିନ୍ନ ପ୍ରତିଷ୍ଠାନରୁ ବିଶେଷଜ୍ଞ ଡାକ୍ତରୀ ଟିମ ଆସି ଭୁବନେଶ୍ବରରେ ପହଞ୍ଚିଛନ୍ତି । ଏନେଇ ସୂଚନା ଦେଇଛନ୍ତି କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମନସୁଖ ମାଣ୍ଡଭୀୟ ।

ସେ କହିଛନ୍ତି ଯେ, ‘ଦିଲ୍ଲୀ ଏମ୍ସ, ଲେଡି ହାର୍ଡିଂସ ତଥା ଅନ୍ୟାନ୍ୟ ପ୍ରତିଷ୍ଠାନର ବିଶେଷଜ୍ଞମାନେ ଅତ୍ୟାଧୁନିକ ଯନ୍ତ୍ରପାତି ସହ ଭୁବନେଶ୍ବରରେ ପହଞ୍ଚି ସାରିଛନ୍ତି । ବିଶେଷଜ୍ଞ ଟିମ ସହ ସବିଶେଷ ଆଲୋଚନା ହୋଇଛି । କେଉଁ ସ୍ଥାନରେ କେଉଁ ବିଶେଷଜ୍ଞ ଡାକ୍ତର ନିୟୋଜିତ ହେବେ ତାହାର ନିର୍ଦ୍ଧାରଣ କରାଯାଇଛି । ଏଥିଲାଗି ଓ୍ବାର୍କିଂ ପ୍ଲାନ ମଧ୍ୟ କରାଯାଇଛି । ବିଭିନ୍ନ ହସ୍ପିଟାଲରେ ଚିକିତ୍ସା ହେଉଥିବା ରୋଗୀଙ୍କୁ ଚିକିତ୍ସାରେ ସହଯୋଗ କରିବେ । ଏହାସହ ମୃତ ଶରୀର ଚିହ୍ନଟ ପ୍ରକ୍ରିୟାରେ ମଧ୍ୟ ସହଯୋଗ କରିବେ । ସାଙ୍ଗରେ ପର୍ଯ୍ୟାପ୍ତ ପରିମାଣର ଔଷଧ ଏବଂ ଅତ୍ୟାଧୁନିକ ସରଂଜାମ ନେଇ ଆସିଛନ୍ତି। ୧୦୦ରୁ ଅଧିକ ଆହତଙ୍କ ଲାଗି କ୍ରିଟିକାଲ କେୟାର ବ୍ୟବସ୍ଥା ଜରୁରୀ ହୋଇଛି । ଅଧିକରୁ ଅଧିକ ଲୋକଙ୍କ ଜୀବନ ରକ୍ଷା ଲାଗି ଶତଚେଷ୍ଟା କରାଯାଉଛି ବୋଲି କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମନସୁଖ ମାଣ୍ଡଭୀୟ କହିଛନ୍ତି।

ନୂଆଦିଲ୍ଲୀ: କୋଭିଡର ନୂତନ ପ୍ରଜାତି XEକୁ ନେଇ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଡକ୍ଟର ମନସୁଖ ମାଣ୍ଡଭିୟେ ଅଧ୍ୟକ୍ଷତାରେ ବିଶେଷଜ୍ଞ ଓ ପ୍ରମୁଖ ଅଧିକାରୀଙ୍କ ସହ ବୈଠକ ଅନୁଷ୍ଠିତ ହୋଇଯାଇଛି। ନୂତନ ପ୍ରଜାତି ଓ ମାମଲା ଗୁଡିକ ଉପରେ ନଜର ରଖିବା ସହ ବର୍ତ୍ତମାନର ତଦାରଖ ପ୍ରକ୍ରିୟା ଜୋରଦାର କରିବାକୁ ନିର୍ଦ୍ଦେଶ ଦେଇଛନ୍ତି ସ୍ୱାସ୍ଥ୍ୟମନ୍ତ୍ରୀ।

ସ୍ୱାସ୍ଥ୍ୟ ଭିତ୍ତିଭୂମି ଗୁଡିକ ସମୀକ୍ଷା କରି ଡକ୍ଟର ମାଣ୍ଡଭିୟା ଅଧିକାରୀଙ୍କୁ କୋଭିଡ ଉପଚାର ପାଇଁ ଆବଶ୍ୟକୀୟ ଓଷଧ ପତ୍ରର ଉପଲବ୍ଧତା ଉପରେ ଗୁରୁତ୍ୱ ଦେବାକୁ ନିର୍ଦ୍ଦେଶ ଦେଇଥିଲେ । ବର୍ତ୍ତମାନ ଚାଲିଥିବା ଟିକାକରଣ ଅଭିଯାନକୁ ସୁନିଶ୍ଚିତ କରିବା ଉପରେ ଗୁରୁତ୍ୱ ଆରୋପ କରିବା ସହ ପ୍ରତ୍ୟେକ ହିତାଧିକାରୀଙ୍କୁ ଟିକା ଦେବା ଉଚିତ ବୋଲି କହିଥିଲେ।

ଆଜିର ବୈଠକରେ ନୀତି ଆୟୋଗ ସଦସ୍ୟ ଡକ୍ଟର ଭିକେ ପଲ୍। ସ୍ୱାସ୍ଥ୍ୟ ସଚିବ ଶ୍ରୀ ରାଜେଶ ଭୂଷଣ, ଏମ୍ସ ନିର୍ଦ୍ଦେଶକ ଡକ୍ଟର ରଣଦୀପ ଗୁଲେରିଆ, ଆଇସିଏମଆର ଡିଜି ଡକ୍ଟର ବଳରାମ ଭାର୍ଗବ,ଏନଟିଏଜିଆଇ ଡକ୍ଟର ଏକେ ଆରୋରା ଓ ସ୍ୱାସ୍ଥ୍ୟମନ୍ତ୍ରାଳୟର ଅନ୍ୟାନ୍ୟ ବରିଷ୍ଠ ଅଧିକାରୀମାନେ ଯୋଗଦେଇଥିଲେ।