ବଲାଙ୍ଗୀର: ବଲାଙ୍ଗୀର ଜିଲ୍ଲାର ଗୁମ୍ଫା ଡ୍ୟାମ ଜଳପ୍ରପାତରେ ଏକ ବଡ଼ ଧରଣର ଦୁର୍ଘଟଣା ଘଟିଛି। ଜଳପ୍ରପାତରେ ଗାଧୋଉଥିବା ସମୟରେ ପାଖାପାଖି ୬୦୦ ମିଟର ଗଭୀର ଖାଲକୁ ଖସିପଡ଼ି ଅଚେତ ହୋଇଯାଇଥିବା ଦୁଇଜଣ କଲେଜ ଛାତ୍ରଙ୍କୁ ବଙ୍ଗୋମୁଣ୍ଡା ଅଗ୍ନିଶମ ବାହିନୀ ବିଳମ୍ବିତ ରାତିରେ ସଫଳତାର ସହ ଉଦ୍ଧାର କରିଛି। ଉଦ୍ଧାର ହୋଇଥିବା ଦୁଇ ଜଣ ଛାତ୍ର ହେଉଛନ୍ତି ନୂଆପଡ଼ା ଜିଲ୍ଲା ଖଡ଼ିଆଳ କଲେଜର ଦେବାଶିଷ ପ୍ରଧାନ (କୋମନା) ଏବଂ କାହ୍ନା ଦଣ୍ଡସେନା (ତିମନପୁର) ।

ସୂଚନା ଅନୁଯାୟୀ, ନୂଆପଡ଼ା ଜିଲ୍ଲା ଖଡ଼ିଆଳ କଲେଜର ଚାରିଜଣ ସାଙ୍ଗ ବଲାଙ୍ଗୀର ଜିଲ୍ଲା ଝୁରାବନ୍ଧ ପଞ୍ଚାୟତ ଅନ୍ତର୍ଗତ ଛତ୍ରଙ୍ଗା ଗ୍ରାମ ନିକଟସ୍ଥ ଛତ୍ରଦଣ୍ଡୀ ଜଙ୍ଗଲ ପାଦଦେଶରେ ଥିବା ଗୁମ୍ଫା ଡ୍ୟାମ ଜଳପ୍ରପାତ ବୁଲିବାକୁ ଯାଇଥିଲେ । ଜଳପ୍ରପାତରେ ଗାଧୋଉଥିବା ସମୟରେ ଅସାବଧାନତା ବଶତଃ ଦେବାଶିଷ ଓ କାହ୍ନା ପ୍ରାୟ ୬୦୦ ମିଟର ତଳକୁ ଖସିପଡ଼ି ଗୁରୁତର ହୋଇ ଅଚେତ ହୋଇଯାଇଥିଲେ । ସେମାନଙ୍କ ସାଙ୍ଗରେ ଥିବା ଅନ୍ୟ ଦୁଇ ସାଙ୍ଗ ତୁରନ୍ତ ଏ ସମ୍ପର୍କରେ ବଙ୍ଗୋମୁଣ୍ଡା ଅଗ୍ନିଶମ ବାହିନୀକୁ ଖବର ଦେଇଥିଲେ ।

ଖବର ପାଇ ଅଗ୍ନିଶମ ବାହିନୀର ଓଆଇସି ରଞ୍ଜିତ କେରକେଟାଙ୍କ ନେତୃତ୍ୱରେ ଏକ ଟିମ୍ ଘଟଣାସ୍ଥଳରେ ପହଞ୍ଚିଥିଲେ । ରାତିର ଅନ୍ଧକାର ମଧ୍ୟରେ ଷ୍ଟ୍ରେଚର୍ ଧରି ପ୍ରାୟ ୩ କିଲୋମିଟର ଘଞ୍ଚ ଜଙ୍ଗଲ ରାସ୍ତା ଅତିକ୍ରମ କରି ଅଗ୍ନିଶମ କର୍ମଚାରୀମାନେ ଦୁର୍ଘଟଣାସ୍ଥଳରେ ପହଞ୍ଚିଥିଲେ । ଏହି ଉଦ୍ଧାର କାର୍ଯ୍ୟରେ ଅଗ୍ନିଶମ କର୍ମଚାରୀ ଦିଲେଶ୍ୱର ସେଠିଆ, ଅଶୋକ କୁମାର ନାୟକ, ଦୁଷ୍ମନ୍ତ ମାଝୀ, ବୃଷଭ ସାହୁ ଏବଂ ରାଜକୁମାର ମାଝୀ ସାମିଲ ହୋଇଥିଲେ । ବିଳମ୍ବିତ ରାତି ପର୍ଯ୍ୟନ୍ତ ଚାଲିଥିବା ଏହି ଅପରେସନ ପରେ ଉଭୟ ଛାତ୍ରଙ୍କୁ ସୁରକ୍ଷିତ ଉଦ୍ଧାର କରାଯାଇ ନୂଆପଡ଼ା ଜିଲ୍ଲାର ଖଡ଼ିଆଳ ଡାକ୍ତରଖାନାରେ ଭର୍ତ୍ତି କରାଯାଇଛି ।

ସ୍ଥାନୀୟ ବାସିନ୍ଦାଙ୍କ କହିବା ଅନୁଯାୟୀ, ଏହି ପ୍ରାକୃତିକ ସୌନ୍ଦର୍ଯ୍ୟଭରା ଜଳପ୍ରପାତକୁ ଦେଖିବା ପାଇଁ ପ୍ରତିଦିନ ଅନେକ ପର୍ଯ୍ୟଟକ ଆସିଥାନ୍ତି । ଅନେକ ସମୟରେ ପର୍ଯ୍ୟଟକମାନେ ଧାରରେ ଠିଆ ହୋଇ ସେଲଫି ଏବଂ ଭିଡିଓ ଉତ୍ତୋଳନ କରିଥାନ୍ତି, ଯାହା ଦ୍ୱାରା ଏଠାରେ ବାରମ୍ବାର ଦୁର୍ଘଟଣା ଘଟୁଛି । ଏହି ଜଳପ୍ରପାତ ନିକଟରେ ସୁରକ୍ଷା ବାରିକେଡ୍ ଏବଂ ସଚେତନତା ସୂଚନା ଫଳକ ଲଗାଇବା ପାଇଁ ସ୍ଥାନୀୟ ପ୍ରଶାସନ ନିକଟରେ ଦାବି ହୋଇଛି ।

କୋରାପୁଟ: ବଲାଙ୍ଗୀରର ଲୋୟର ସୁକତେଲ ପ୍ରକଳ୍ପରେ ଅବସ୍ଥାପିତ ଥିବା ଓଡ଼ିଶା କନଷ୍ଟ୍ରକ୍ସନ କର୍ପୋରେସନ ଲିମିଟେଡ୍ (OCCL) ର ନିର୍ବାହୀ ଯନ୍ତ୍ରୀ ସଞ୍ଜୟ କୁମାର କିସପଟ୍ଟାଙ୍କ ଠିକଣା ଉପରେ ଓଡ଼ିଶା ଭିଜିଲାନ୍ସ ବିଭାଗ ପକ୍ଷରୁ ଚଢ଼ାଉ କରାଯାଇଛି। ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ହୋଇଥିବା ଏହି ଚଢ଼ାଉରେ ବିପୁଳ ପରିମାଣର ସମ୍ପତ୍ତି ଠାବ କରାଯାଇଛି।

ଭିଜିଲାନ୍ସ ଅଧିକାରୀଙ୍କ ସର୍ଚ୍ଚ ଅପରେସନ ବେଳେ କୋରାପୁଟ ସହରରେ ୮,୦୦୦ ବର୍ଗଫୁଟ ଅଞ୍ଚଳରେ ବ୍ୟାପ୍ତ ଥିବା ଏକ ୪ ମହଲା ବିଶିଷ୍ଟ ବାଣିଜ୍ୟିକ ଲଜ୍ (ଯେଉଁଥିରେ ୨୩ଟି ରୁମ୍ ରହିଛି) ଠାବ ହୋଇଛି। ଏହା ସହିତ ଏକ ନିର୍ମାଣାଧୀନ ବାସଭବନ ଏବଂ କୋରାପୁଟ, ରାଉରକେଲା ଓ ଭୁବନେଶ୍ୱରରେ ଥିବା ୮ଟି ମୂଲ୍ୟବାନ ପ୍ଲଟ୍ ଜବତ ହୋଇଛି। ଏହି ଚଢ଼ାଉରେ ଗୋଟିଏ ଇନୋଭା କ୍ରିଷ୍ଟା କାର୍, ଗୋଟିଏ ଦୁଇଚକିଆ ଯାନ ଏବଂ ସୁନା ଅଳଙ୍କାର ଜବତ କରାଯାଇଛି। ବର୍ତ୍ତମାନ ଭିଜିଲାନ୍ସ ଟେକ୍ନିକାଲ୍ ୱିଙ୍ଗ ଦ୍ୱାରା ବ୍ୟାଙ୍କ ଜମା ଏବଂ ଆର୍ଥିକ ବିନିଯୋଗର ଯାଞ୍ଚ କରାଯାଉଛି।

ସୂଚନା anusare, ୨୦୧୧ ମସିହାରେ ଜଳ ସମ୍ପଦ ବିଭାଗ ଅଧୀନରେ ଥିବା ନାରାୟଣପାଟଣା ବ୍ଲକରେ ମାସିକ ୯,୩୦୦ ଟଙ୍କା ଦରମାରେ ସହକାରୀ ଯନ୍ତ୍ରୀ ଭାବେ ସରକାରୀ ଚାକିରିରେ ଯୋଗ ଦେଇଥିଲେ ସଞ୍ଜୟ କୁମାର କିସପୋଟ୍ଟା । ୨୦୧୬ ମସିହାରେ ତାଙ୍କ ଚାକିରି ନିୟମିତ ହୋଇଥିଲା ଏବଂ ପରବର୍ତ୍ତୀ ସମୟରେ ସେ ପଟାଙ୍ଗି ବ୍ଲକ ଏବଂ ଆଇଟିଡିଏ (ITDA) କୋରାପୁଟରେ ସହକାରୀ ନିର୍ବାହୀ ଯନ୍ତ୍ରୀ ଭାବେ କାର୍ଯ୍ୟ କରିଥିଲେ। ୬ ମାର୍ଚ୍ଚ ୨୦୨୬ରେ ସେ ନିର୍ବାହୀ ଯନ୍ତ୍ରୀ ଭାବେ ପଦୋନ୍ନତି ପାଇ ଭୁବନେଶ୍ୱର ସ୍ଥିତ ଓସିସି ଲିମିଟେଡରେ ଅବସ୍ଥାପିତ ହୋଇଥିଲେ। ସେ ନିଜ କାର୍ଯ୍ୟକାଳର ପ୍ରାୟ ୧୫ ବର୍ଷ କୋରାପୁଟ ଜିଲ୍ଲାରେ ବିତାଇଛନ୍ତି।

ବର୍ତ୍ତମାନ ଭିଜିଲାନ୍ସ ବିଭାଗ ପକ୍ଷରୁ ସମ୍ପତ୍ତିର ଆକଳନ ଜାରି ରହିଛି। ଦୁର୍ନୀତିଗ୍ରସ୍ତ ସରକାରୀ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାରେ ଏହା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ଅଧିକାରୀମାନେ ପ୍ରକାଶ କରିଛନ୍ତି।

ବଲାଙ୍ଗୀର: ଓଡ଼ିଶାର ବଲାଙ୍ଗୀର ଜିଲ୍ଲାରେ ଏକ ଅତ୍ୟନ୍ତ ଦୁଃଖଦ ତଥା ଅଭାବନୀୟ ଘଟଣା ସାମ୍ନାକୁ ଆସିଛି। ଜିଲ୍ଲାର ପାଟଣାଗଡ଼ ଅଞ୍ଚଳରେ ଏକ ବିବାହ ଶୋଭାଯାତ୍ରା ସମୟରେ ବାଜୁଥିବା ଡିଜେ (DJ)ର ପ୍ରଚଣ୍ଡ ଶବ୍ଦ କାରଣରୁ ଜଣେ ମହିଳାଙ୍କର ମୃତ୍ୟୁ ଘଟିଥିବା ଅଭିଯୋଗ ହୋଇଛି। ମୃତ ମହିଳାଙ୍କ ନାମ ଲୋଚନା ବାହୁକ ଏବଂ ତାଙ୍କ ଘର ପାଟଣାଗଡ଼ ଥାନା ଅନ୍ତର୍ଗତ ବ୍ରହ୍ମପୁରା ଗାଁରେ ବୋଲି ଜଣାପଡ଼ିଛି।

ମିଳିଥିବା ସୂଚନା ଅନୁଯାୟୀ, ଘଟଣା ଦିନ ଲୋଚନା ରାସ୍ତା କଡ଼ରେ ଥିବା ଏକ ନଳକୂପ ନିକଟରେ ନିଜ ନାତୁଣୀଙ୍କୁ ଗାଧୋଇ ଦେଉଥିଲେ। ସେହି ସମୟରେ ସେହି ରାସ୍ତା ଦେଇ ଏକ ବିବାହ ଶୋଭାଯାତ୍ରା ଯାଉଥିଲା, ଯେଉଁଥିରେ ଅତ୍ୟଧିକ ଶବ୍ଦରେ ଡିଜେ ବାଜୁଥିଲା। ଏହି କାନଫଟା ଶବ୍ଦ କାରଣରୁ ତାଙ୍କୁ ପ୍ରବଳ କଷ୍ଟ ଅନୁଭବ ହୋଇଥିଲା। ପରିବାର ଲୋକଙ୍କ କହିବା ଅନୁଯାୟୀ, ସେ ଡିଜେ ବଜାଉଥିବା ବ୍ୟକ୍ତିଙ୍କୁ ଶବ୍ଦ କମାଇବା ପାଇଁ ବାରମ୍ବାର ନିବେଦନ କରିଥିଲେ ମଧ୍ୟ ସେମାନେ ଏହାକୁ ଖାତିର କରିନଥିଲେ।

ଡିଜେର କାନଫଟା ଶବ୍ଦରେ ଗୁରୁତର ଅସୁସ୍ଥ ହୋଇପଡ଼ିବା ପରେ ତାଙ୍କୁ ତୁରନ୍ତ ପାଟଣାଗଡ଼ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ପରେ ତାଙ୍କ ଅବସ୍ଥା ସଙ୍କଟାପନ୍ନ ହେବାରୁ ଉନ୍ନତ ଚିକିତ୍ସା ପାଇଁ ତାଙ୍କୁ ବଲାଙ୍ଗୀର ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା। ତେବେ ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି। ପରିବାର ଲୋକଙ୍କ ଅଭିଯୋଗ ଅନୁଯାୟୀ, ଡିଜେର ଅତ୍ୟଧିକ ଶବ୍ଦ ଯୋଗୁଁ ତାଙ୍କ ମସ୍ତିଷ୍କର ଶିରା ଫାଟିଯିବାରୁ (ବ୍ରେନ୍ ହେମରେଜ୍) ତାଙ୍କର ମୃତ୍ୟୁ ହୋଇଛି। ତାଙ୍କର ଏଭଳି ଅକାଳ ମୃତ୍ୟୁ ପରେ ସମ୍ପୂର୍ଣ୍ଣ ପରିବାର ଭାଙ୍ଗିପଡ଼ିବା ସହ ଅସହାୟ ହୋଇପଡ଼ିଛି। ଘଟଣାକୁ ନେଇ ସ୍ଥାନୀୟ ବାସିନ୍ଦା ଗଭୀର ଶୋକ ପ୍ରକାଶ କରିବା ସହ ଶୋଭାଯାତ୍ରାରେ ବିନା ନିୟନ୍ତ୍ରଣରେ ଉଚ୍ଚ ଡେସିବେଲ୍ ଡିଜେ ମ୍ୟୁଜିକ୍ ବ୍ୟବହାରକୁ ନେଇ ପ୍ରଶ୍ନ ଉଠାଇଛନ୍ତି।

ବଲାଙ୍ଗୀର: ବଲାଙ୍ଗୀରରେ ପୋଖରୀ ପୁନରୁଦ୍ଧାର କାମକୁ ନେଇ ବିଜେଡି-କଂଗ୍ରେସ ମୁହାମୁହିଁ । ମାଟି କାମ ଚାଲିଥିବା ସ୍ଥାନରେ ମୁହାଁମୁଁହି ପରିସ୍ଥିତି ସୃଷ୍ଟି ହୋଇଥିବା ବେଳେ ଘଟଣାସ୍ଥଳରେ ଚାପା ଉତ୍ତେଜନା ପ୍ରକାଶ ପାଇଥିବା ଦେଖିବାକୁ ମିଳିଛି। ପରିତ୍ୟକ୍ତ ଅବସ୍ଥାରେ ଥିବା ସହରର ୧୧ଟି ବନ୍ଧର ପୁନରୁଦ୍ଧାର ବଲାଙ୍ଗୀର ପୌରପରିଷଦ ପକ୍ଷରୁ କରାଯାଉଥିବା ବେଳେ, ଏହାକୁ ନେଇ ନଗର କଂଗ୍ରେସ ତରଫରୁ ଆନ୍ଦୋଳନ କରାଯାଇଛି। ତେବେ ଏହି ଆନ୍ଦୋଳନକୁ ନେଇ ଏବେ ସ୍ଥାନୀୟ ଅଞ୍ଚଳରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। କଂଗ୍ରେସର ଦୁର୍ନୀତି ଅଭିଯୋଗକୁ ବିଜେଡି ସମେତ ହଜାର ହଜାର ସ୍ଥାନୀୟ ଲୋକେ ଖୋଲାଖୋଲି ବିରୋଧ କରିଛନ୍ତି।

ଆଜି କରଙ୍ଗାକଣ୍ଟା ବନ୍ଧ ଆଡିରେ ମହିଳା କଂଗ୍ରେସ ପକ୍ଷରୁ ଚାଲିଥିବା ଆନ୍ଦୋଳନ ସ୍ଥଳକୁ ବିଜେଡି କର୍ମୀ ଓ ସାଧାରଣ ଲୋକେ ଧସେଇ ପଶିଥିଲେ। ଫଳରେ ସେଠାରେ କଂଗ୍ରେସ ଓ ବିଜେଡି କର୍ମୀ ମୁହାମୁହିଁ ହୋଇଛନ୍ତି। ବିଶେଷ କରି ସ୍ଥାନୀୟ ମହିଳାମାନେ ସହରର ବିକାଶ କାମରେ ବାଧା ସୃଷ୍ଟି କରାଯାଉଥିବା ଦର୍ଶାଇ କଂଗ୍ରେସର ଏହି ଆନ୍ଦୋଳନକୁ ଜୋରଦାର ବିରୋଧ କରିଛନ୍ତି। ପରିସ୍ଥିତି ଏପରି ହୋଇଥିଲା ଯେ ଉଭୟ ଦଳର ନାରାବାଜି ଭିତରେ ସ୍ଥିତି ନିୟନ୍ତ୍ରଣ କରିବାକୁ ଯାଇ ପୋଲିସ ପ୍ରଶାସନକୁ ନାକେଦମ୍ ହେବାକୁ ପଡ଼ିଛି।

ଏହି ବିବାଦ ଭିତରେ ବିଜେଡି ପକ୍ଷରୁ କଂଗ୍ରେସର ବରିଷ୍ଠ ନେତା ନରସିଂହ ମିଶ୍ରଙ୍କୁ ତୀବ୍ର ସମାଲୋଚନା କରାଯାଇଛି। ସେ ବଲାଙ୍ଗୀରର ବିକାଶ ଚାହୁଁନାହାନ୍ତି ଏବଂ ସେ ଜଣେ “ବଲାଙ୍ଗୀର ବିରୋଧୀ” ବୋଲି ବିଜେଡି ଅଭିଯୋଗ ଆଣିଛି।

ମିଳିଥିବା ସୂଚନା ଅନୁଯାୟୀ, ବନ୍ଧର ମାଟି ଖୋଳା ଓ ପୁନରୁଦ୍ଧାର କାର୍ଯ୍ୟ ଏବେ ପ୍ରାଥମିକ ପର୍ଯ୍ୟାୟରେ ଚାଲିଛି। ଏହି କାର୍ଯ୍ୟ ପାଇଁ ଏପର୍ଯ୍ୟନ୍ତ ଟଙ୍କାଟିଏ ମଧ୍ୟ ବିଲ୍ ହୋଇନାହିଁ। ତେଣୁ ବିଲ୍ ନହୋଇ ଦୁର୍ନୀତି କିଭଳି ହେଲା ବୋଲି ପ୍ରଶ୍ନ ଉଠିଛି।

ରାଜନୈତିକ ଫାଇଦା ହାସଲ କରିବା ପାଇଁ ଏବଂ ଉଦ୍ଦେଶ୍ୟମୂଳକ ଭାବେ ବିକାଶମୂଳକ କାର୍ଯ୍ୟକୁ ବନ୍ଦ କରିବାକୁ କଂଗ୍ରେସ ଏଭଳି ମିଥ୍ୟା ଦୁର୍ନୀତି ଅଭିଯୋଗ ଆଣି ଆନ୍ଦୋଳନ କରୁଥିବା ସାଧାରଣରେ ଚର୍ଚ୍ଚା ହେଉଛି। ଏହି ଘଟଣା ପରେ ବଲାଙ୍ଗୀର ସହରରେ ରାଜନୈତିକ ପାରଦ ବେଶ୍‌ ବୃଦ୍ଧି ପାଇଛି।

ବଲାଙ୍ଗିର: ଭିଜିଲାନ୍ସ ଜାଲରେ ବଙ୍ଗୋମୁଣ୍ଡା ତହସିଲ୍‌ ଅମିନ ନିର୍ମଳେନ୍ଦୁ କବି । ଜମି ପଟ୍ଟା କରାଇ ଦେବା ପାଇଁ ୧୫ ହଜାର ଟଙ୍କା ଲାଞ୍ଚ ନେଲା ବେଳେ ମାଡିବସିଲା ଭିଜିଲାନ୍ସ ଟିମ୍‌ । ସୂଚନା ଅନୁସାରେ, ବଲାଙ୍ଗୀର ଜିଲ୍ଲା ବଙ୍ଗୋମୁଣ୍ଡା ତହସିଲଦାରର ଅମିନ ନିର୍ମଳେନ୍ଦୁ ଜଣେ ଆବେଦନକାରୀଙ୍କଠାରୁ ସ୍କେଚ୍ ମ୍ୟାପ୍ ପ୍ରସ୍ତୁତ କରିବା ଏବଂ ସେମାନଙ୍କର ଜମି ସମ୍ପତ୍ତି ବିଭାଜନ ଏବଂ ସମ୍ପୃକ୍ତ ଅଂଶୀଦାରଙ୍କ ସପକ୍ଷରେ ନୂତନ ROR ପ୍ରଦାନ ପାଇଁ ଫାଇଲ୍ ପ୍ରକ୍ରିୟାକରଣ କରିବା ପାଇଁ ୧୫,୦୦୦ ଟଙ୍କା ଲାଞ୍ଚ ଦାବି କରିଥିଲେ । ହେଲେ ଆବେଦନକାରୀ ଲାଞ୍ଚ ଦେବାକୁ ଅସମର୍ଥ ହୋଇ, ଭିଜିଲାନ୍ସ କର୍ତ୍ତୃପକ୍ଷଙ୍କ ନିକଟକୁ ଯାଇଥିଲେ। ପୂର୍ବ ଯୋଜନା ମୁତାବକ ଓଡ଼ିଶା ଭିଜିଲାନ୍ସର ଏକ ଟିମ୍ ଆଜି ଅମିନ ନିର୍ମଳେନ୍ଦୁ କବିଙ୍କୁ ଆବେଦନକାରୀଙ୍କଠାରୁ ୧୫,୦୦୦ ଟଙ୍କା ଲାଞ୍ଚ ନେଉଥିବା ସମୟରେ ଗିରଫ କରିଛି। ଅଭିଯୁକ୍ତ  ଅମିନଙ୍କ ନିକଟରୁ ସମସ୍ତ ଲାଞ୍ଚ ଟଙ୍କା ଜବତ କରାଯାଇଛି ।

ଟିଟିଲାଗଡ଼: ପିକ୍ଅପ୍-ବାଇକ୍ ଧକ୍କାରେ ଚାଲିଗଲା ୩ ଜଣ ଛୁଆଙ୍କ ଜୀବନ । ଟିଟିଲାଗଡ଼ ଥାନା ଲେସୁନବାହାଲି ଗାଁ ମାରଲାଡ୍‌ ବ୍ରିଜ୍ ନିକଟରେ ଘଟିଛି ଏପରି ମର୍ମନ୍ତୁଦ ସଡକ ଦୁର୍ଘଟଣା । ପିକଅପ ଭ୍ୟାନ୍ ଓ ବାଇକ୍ ମଧ୍ୟରେ ଦୁର୍ଘଟଣା ଯୋଗୁଁ  ୩ଜଣ ମୃତ୍ୟୁବରଣ କରିଥିବାବେଳେ ୬ ଶିଶୁ ସମେତ ୮ ଗୁରୁତର ମେଡିକାଲରେ ଭର୍ତ୍ତି ହୋଇଛନ୍ତି । 

ସୂଚନା ଅନୁସାରେ, ଆଜି ମଧ୍ୟାହ୍ନରେ ଏକ ବିବାହ ଭୋଜି ପାଇଁ ପାଣି ପାଉଚ ନେବାପାଇଁ କିଛି ଯୁବକ ସହ ଛୋଟ ଛୋଟ ପିଲାମାନେ ପାଖ ମାର୍ଲାଡ ଗାଁକୁ ଆସୁଥିଲେ । ଏହି ସମୟରେ ସାମ୍ନା ପଟୁ ଆସୁଥିବା ଏକ ବାଇକ ସହ ଧକ୍କା ହୋଇଥିଲା । ଫଳରେ ଭାରସାମ୍ୟ ହରାଇ ପିକଅପ ଭ୍ୟାନଟି ଓଲଟି ପଡ଼ିଥିଲା । ଘଟଣାସ୍ଥଳରେ ଜଣଙ୍କ ମୃତ୍ୟୁ ଘଟିଥିବା ବେଳେ ଡାକ୍ତରଖାନାରେ ୨ ଜଣଙ୍କ ମୃତ୍ୟୁ ଘଟିଛି ।

ବଲାଙ୍ଗୀର: ଟଙ୍କା ପାଇଁ ମଦ ନିଶାରେ ANM ସ୍ତ୍ରୀକୁ ହତ୍ୟା ପରେ ପୋଡି ଘଟଣା I ଚିକିତ୍ସାଧିନ ଅବସ୍ଥାରେ ଭୀମ ଭୋଇ ମେଡିକାଲ କଲେଜ ହସ୍ପିଟାଲରେ ଅଭିଯୁକ୍ତ ସ୍ଵାମୀ ଉପେନ୍ଦ୍ର କାଲସାଏଙ୍କ ମୃତ୍ୟୁ I ଘରୋଇ କଳିରୁ ପତ୍ନୀକୁ ପିଟିପିଟି ସ୍ବାମୀ ହତ୍ୟା କରିଥିବା ଜଣାପଡିଛି । ପେଟ୍ରୋଲ ଢାଳି ନିଆଁରେ ପୋଡ଼ିବା ବେଳେ ନିଜେ ଜଳି ଯାଇଥିଲା ।

ସୂଚନା ଅନୁସାରେ, ଗତକାଲି ରାତିରେ ଧାର ଟଙ୍କା ପରିଶୋଧ କରିବା ପାଇଁ ସ୍ତ୍ରୀ ଟଙ୍କା ନଦେବାରୁ ପିଟିପିଟି ହତ୍ୟା କରିଥିଲା ନୃସଂଶ ସ୍ଵାମୀ ଉପେନ୍ଦ୍ର I ହତ୍ୟାକୁ ଆତ୍ମହତ୍ୟାର ରୂପ ଦେବାପାଇଁ ପେଟ୍ରୋଲ ଢାଳି ମୃତଦେହରେ ନିଆଁ ଲଗାଇ ଦେଇଥିଲା ରାକ୍ଷସ ସ୍ୱାମୀ I ନିଆଁ ବ୍ୟାପିବାରୁ ଅଭିଯୁକ୍ତ ଉପେନ୍ଦ୍ର ମଧ୍ୟ ଗୁରୁତର ଅବସ୍ଥାରେ ମେଡିକାଲରେ ଭର୍ତ୍ତି କରାଯାଇଥିଲା I ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଥିବା ନେଇ ବଲାଙ୍ଗୀର ପୋଲିସ ପକ୍ଷରୁ ସୂଚନା ମିଳିଛି ।

ବଲାଙ୍ଗୀର: ନିଆଁରେ ଜଳି ANM ଜୀବନ୍ତଦଗ୍ଧ । ସ୍ତ୍ରୀକୁ ବଞ୍ଚାଇବାକୁ ଯାଇ ନିଆଁରେ ପୋଡି ସ୍ଵାମୀ ଗୁରୁତର ଆହତ । ମୃତ ANM ହେଲେ ବଲାଙ୍ଗୀର ଜିଲ୍ଲା ଦେଓଗାଁ ଥାନା ରାମଚନ୍ଦ୍ରପୁର ଗାଁର ଦମୟନ୍ତୀ ବାରିକ। ସ୍ଵାମୀ ଉପେନ୍ଦ୍ର କାଳସୀଏକୁ ଗୁରୁତର ଅବସ୍ଥାରେ ବଲାଙ୍ଗୀର ଭୀମ ଭୋଇ ମେଡିକାଲ କଲେଜ ହସ୍ପିଟାଲରେ ଭର୍ତ୍ତି କରାଯାଇଛି । ଦମୟନ୍ତୀ ବାରିକ ଦେଓଗାଁ ରାମଚନ୍ଦ୍ରପୁର ସ୍ୱାସ୍ଥ୍ୟ ଉପ କେନ୍ଦ୍ରରେ କାମ କରୁଥିଲେ। ଗତକାଲି ବିଳମ୍ବିତ ରାତିରେ ଘଟିଛି ଅଘଟଣ । ତେବେ ନିଆଁ କିପରି ଲାଗିଲା ଏବଂ ସ୍ବାସ୍ଥ୍ୟକର୍ମୀ କେମିତି ଜଳିଗଲେ ତାହା ଅସ୍ପଷ୍ଟ ଥିବା ବେଳେ ପାରିବାରିକ କଳହରୁ ଏପରି ଅଭାବନୀୟ ଘଟଣା ଘଟିଥିବା ଜଣାପଡିଛି । ଏହା ଅଘଟଣ ନା ଏକ ସୁଚିନ୍ତିତ ହତ୍ୟାକାଣ୍ଡ, ତାକୁ ନେଇ ପୋଲିସ ତଦନ୍ତ କରୁଛି। 

ଓଡ଼ିଶା ପୋଲିସ ପାଇଁ ଏକ ଐତିହାସିକ ସଫଳତା। ରାଜ୍ୟର ଆଉ ଦୁଇଟି ଜିଲ୍ଲା ବଲାଙ୍ଗୀର ଏବଂ ବରଗଡ଼କୁ ଆନୁଷ୍ଠାନିକ ଭାବେ ମାଓମୁକ୍ତ ଘୋଷଣା କରାଯାଇଛି। ପୋଲିସ ମହାନିର୍ଦ୍ଦେଶକ (ଡିଜିପି) ୱାଇ.ବି. ଖୁରାନିଆ ରବିବାର ଦିନ ଏହି ଘୋଷଣା କରିଛନ୍ତି। ଏହି ଦୁଇ ଜିଲ୍ଲାରେ ସକ୍ରିୟ ଥିବା ମାଓବାଦୀମାନେ ଆତ୍ମସମର୍ପଣ କରିବା ପରେ ଏହି ବଡ଼ ପଦକ୍ଷେପ ନିଆଯାଇଛି।

ଛତିଶଗଡ଼ରେ ୧୫ ମାଓବାଦୀଙ୍କ ଆତ୍ମସମର୍ପଣ

ସୂଚନା ଅନୁଯାୟୀ, ବରଗଡ଼-ବଲାଙ୍ଗୀର-ମହାସମୁନ୍ଦ ଡିଭିଜନରେ ସକ୍ରିୟ ଥିବା ପ୍ରାୟ ୧୫ ଜଣ ମାଓବାଦୀ ଛତିଶଗଡ଼ର ମହାସମୁନ୍ଦ ଜିଲ୍ଲାରେ ପୋଲିସ ନିକଟରେ ଆତ୍ମସମର୍ପଣ କରିଥିଲେ। ଏହି କାର୍ଯ୍ୟକ୍ରମରେ ଓଡ଼ିଶା ପୋଲିସର ତିନିଜଣ ବରିଷ୍ଠ ଅଧିକାରୀ ମଧ୍ୟ ଉପସ୍ଥିତ ଥିଲେ। ଏହି ଆତ୍ମସମର୍ପଣ ପରେ ଦୁଇ ଜିଲ୍ଲାରେ ମାଓବାଦୀ କାର୍ଯ୍ୟକଳାପ ସମ୍ପୂର୍ଣ୍ଣ ରୂପେ ବନ୍ଦ ହୋଇଯାଇଥିବା ଡିଜିପି ସ୍ପଷ୍ଟ କରିଛନ୍ତି।

ଶାନ୍ତ ହେଲା ଗନ୍ଧମାର୍ଦ୍ଦନ ପାହାଡ଼

ଏହି ଘୋଷଣା ସହ ଐତିହାସିକ ଗନ୍ଧମାର୍ଦ୍ଦନ ପାହାଡ଼ ଅଞ୍ଚଳ ଏବେ ସମ୍ପୂର୍ଣ୍ଣ ଶାନ୍ତିପୂର୍ଣ୍ଣ ହୋଇପାରିଛି। ଦୀର୍ଘ ଦିନ ଧରି ମାଓବାଦୀମାନେ ଏହି ପାହାଡ଼ିଆ ଅଞ୍ଚଳକୁ ନିଜର ଆଡ୍ଡାସ୍ଥଳୀ କରି ରଖିଥିଲେ। ତେବେ ପୋଲିସର ନିରନ୍ତର ଅପରେସନ୍, ସଠିକ୍ ଗୁଇନ୍ଦା ତଥ୍ୟ ଏବଂ ସ୍ଥାନୀୟ ଲୋକଙ୍କ ସହଯୋଗ ଯୋଗୁଁ ଏହି ସଫଳତା ମିଳିପାରିଛି ବୋଲି ଶ୍ରୀ ଖୁରାନିଆ କହିଛନ୍ତି।

୭ଟି ଜିଲ୍ଲା ହେଲା ମାଓମୁକ୍ତ

ବର୍ତ୍ତମାନ ସୁଦ୍ଧା ରାଜ୍ୟର ମୋଟ ୭ଟି ଜିଲ୍ଲାକୁ ମାଓମୁକ୍ତ ଘୋଷଣା କରାଯାଇଛି। ସେଗୁଡ଼ିକ ହେଲା: ନୂଆପଡ଼ା, ନବରଙ୍ଗପୁର, କୋରାପୁଟ, ମାଲକାନଗିରି, ବୌଦ୍ଧ, ବଲାଙ୍ଗୀର ଏବଂ ବରଗଡ଼। ତେବେ କନ୍ଧମାଳ, ରାୟଗଡ଼ା ଏବଂ କଳାହାଣ୍ଡି ଭଳି ତିନୋଟି ଜିଲ୍ଲାର କିଛି ଅଞ୍ଚଳରେ ଏବେ ମଧ୍ୟ ମାଓବାଦୀଙ୍କ ଗତିବିଧି ରହିଥିବା ପୋଲିସ ସୂଚନା ଦେଇଛି।

ବଲାଙ୍ଗୀର: ବିବାହର ୧୦ଦିନ ପରେ ନିଜ ସ୍ୱାମୀକୁ ଛାଡି ପ୍ରେମିକ ସହ ଫେରାର ହୋଇଗଲା ଯୁବତୀ । ବଲାଙ୍ଗୀର ଜିଲ୍ଲା କଣ୍ଟାବାଞ୍ଜି ସହରର ଏହି ଘଟଣା ସାରା ଅଂଚଳରେ ଚର୍ଚ୍ଚାର ବିଷୟ ପାଲଟିଛି। ଗତ ଫେବୃଆରୀ ମାସ ୮ ତାରିଖରେ ହିନ୍ଦୁ ରୀତି ନୀତିରେ ମୁରିବାହଲ ଥାନା କର୍ଲା ଗାଁର ମୁକେଶ ବିଶ୍ୱାଳ (ମିଲନ) କଣ୍ଟାବାଞ୍ଜି ସହରର ଧୋବାପଡାର ବଳଦେବ ବେହେରାଙ୍କ ଝିଅ ବିନୀ ବେହେରା ସହ ବିବାହ କରିଥିଲେ । ତେବେ ଗତ ୧୮ ତାରିଖ ଦିନ ଝିଅର ଦୁଇ ଭାଇ କଣ୍ଟାବାଞ୍ଜିକୁ ଲେଉଟାଣି ପାଇଁ ଆଣି ଆସିଥିଲେ । ଏହା ପରେ ଗତ ୨୨ ତାରିଖ ଦିନ ବିନି ନିଜ ପ୍ରେମିକା ସହ ଫେରାର ମାରିଥିବା ପରିବାର ଲୋକେ ଜାଣିବାକୁ ପାଇଥିଲେ।  

ନବ ବିବାହ କରିଥିବା ମିଲନ ଙ୍କ ପରିବାର ଏବେ ଦୁଃଖ ରେ ଅଛନ୍ତି। ଲକ୍ଷାଧିକ ଟଙ୍କାର ସୁନା ଗହଣା ଟଙ୍କା ନେଇ ଫେରାର ମାରିଥିବା ନେଇ ମୁରିବାହାଲ ଥାନାରେ ଲିଖିତ ଭାବେ ଜଣାଇଛନ୍ତି। ତେବେ ଉଭୟ ଯୁବକ ଓ ଯୁବତୀଙ୍କ ପରିବାରବର୍ଗ କଣ୍ଟାବାଞ୍ଜି ଥାନାରେ ଏକ ଘୋଷଣାପତ୍ର ମଧ୍ୟ ଦସ୍ତଖତ କରିଛନ୍ତି ଯେଉଁଥିରେ ବିବାହ ସମୟରେ ପୁଅ ପକ୍ଷରୁ ଦିଆଯାଇଥିବା ସୁନା ଅଳଙ୍କାର ମଧ୍ୟ ଯୁବତୀ ସାଙ୍ଗରେ ନେଇ ଯାଇଥିବା ଜଣାପଡିଛି । ପ୍ରାୟ ୩ ଲକ୍ଷ ଟଙ୍କାର ସୁନା ଓ ୨୦ ହଜାର ଟଙ୍କା ସାଙ୍ଗରେ ନେଇ ଯୁବତୀ ଫେରାର ହୋଇଥିବା ଘୋଷଣାପତ୍ରରୁ ଜଣାପଡିଛି । ଝିଅଙ୍କ ପରିବାର ଲୋକେ କଣ୍ଟାବାଞ୍ଜି ଥାନାରେ ଯୁବତୀଙ୍କ ନିଖୋଜ ହୋଇଯାଇଥିବା ନେଇ ଏତଲା ଦେବା ସହ ପଡାର ପ୍ରଶାନ୍ତ ମଜଖଣ୍ଡ ନାମକ ଜଣେ ଯୁବକ ନେଇଯାଇଥିବା ନେଇ ଏତଲା ଦେଇଛନ୍ତି ଯୁବତୀଙ୍କ ପରିବାର।

ବଲାଙ୍ଗୀର: ଜ୍ୱାଇଁକୁ କୋଦାଳରେ ପିଟିପିଟି ହତ୍ୟା କଲେ ଶ୍ୱଶୁର ଘର ଲୋକେ । ବଚସା ପରେ ଜ୍ୱାଇଁକୁ ଶ୍ୱଶୁର ଘର ଲୋକେ ହତ୍ୟା କରିଥିବା ନେଇ ଥାନାରେ ଅଭିଯୋଗ ହୋଇଛି । ବଲାଙ୍ଗୀର ଜିଲ୍ଲା ତୁଳସୀ ନଗରପଡ଼ାରେ ଘଟିଛି ଏପରି ଏକ ହତ୍ୟାକାଣ୍ଡ । ମୃତ ବ୍ୟକ୍ତିଙ୍କ ନାଁ ଯଦୁମଣି ବଗର୍ତ୍ତୀ। ସେ କିଛି ଦିନ ହେବ ଶ୍ୱଶୁର ଘରେ ରହୁଥିଲେ। 

ସୂଚନା ଅନୁସାରେ ଗତକାଲି ରାତିରେ କୌଣସି କାରଣକୁ ନେଇ ଯଦୁମଣି ଶାଳକଙ୍କ ପୁଅ ସହିତ ବଚସା ହୋଇଥିଲା। ପାରିବାରିକ ଗଣ୍ଡଗୋଳ ପରେ କୋଦାଳରେ ପିଟି ପିଟି ଯଦୁମଣିକୁ ହତ୍ୟା କରାଯାଇଥିବା ଅଭିଯୋଗ ହୋଇଛି । ଗୁରୁତର ଅବସ୍ଥାରେ ବଲାଙ୍ଗିର ଭୀମଭୋଇ ଡାକ୍ତରଖାନାରେ ଭର୍ତ୍ତି କରାଯାଇଥିଲା l ଚିକିତ୍ସାଧୀନ ଅବସ୍ଥାରେ ବିଳମ୍ବିତ ରାତିରେ ତାଙ୍କର ମୃତ୍ୟୁ ହୋଇଛି l ତେବେ ହତ୍ୟାକାଣ୍ଡରେ କେତେ ଜଣ ସମ୍ପୃକ୍ତ ଅଛନ୍ତି ତାହା ଜଣାପଡ଼ିନାହିଁ। ଟାଉନ ପୋଲିସ ଘଟଣାର ତଦନ୍ତ କରୁଥିବା ବେଳେ ହତ୍ୟାର କାରଣ ଜଣା ପଡ଼ିନାହିଁ ।

ବଲାଙ୍ଗୀର: ବିଶିଷ୍ଟ ଲୋକଗୀତ ଗାୟିକା କୁନି ଛତ୍ରିଆଙ୍କ ପରଲୋକ । ସମ୍ବଲପୁର ବୁର୍ଲ୍ଲା ମେଡିକାଲରେ ଚିକିତ୍ସାଧୀନ ଅବସ୍ଥାରେ ତାଙ୍କର ପରଲୋକ ହୋଇଛି। ମୃତ୍ୟୁ ବେଳକୁ କୁନିଙ୍କୁ ୩୬ ବର୍ଷ ବୟସ ହୋଇଥିଲା। ସେ ଅସୁସ୍ଥ ଅନୁଭବ କରିବାରୁ ତାଙ୍କୁ ପ୍ରଥମେ ବଲାଙ୍ଗୀର ଭୀମ ଭୋଇ ମେଡିକାଲ କଲେଜ ଓ ପରେ ସମ୍ବଲପୁର ବୁର୍ଲା ମେଡ଼ିକାଲକୁ ସ୍ଥାନାନ୍ତର କରାଯାଇଥିଲା। ସେଠାରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି । କୁନିଙ୍କ ଅକାଳ ବିୟୋଗ ଖବର ଶୁଣି ପୁରା ଅଞ୍ଚଳରେ ଶୋକର ଛାୟା ଖେଳିଯାଇଛି । 

କୁନି ଘୁଡୁକାର ସ୍ୱର ଥିଲେ । ଛୋଟ-ବଡ଼ ଘୁଡୁକା ବାଲାଙ୍କ ସ୍ୱର ଥିଲେ କୁନି। ବଲାଙ୍ଗୀର ଜିଲ୍ଲାର ତୁଷୁରାରୁ ଯାଇ ରାଜ୍ୟ ତଥା ରାଜ୍ୟ ବାହାରେ ଘୁଡୁକା ବାଦ୍ୟ କରିବା ସହ ଲୋକଗୀତ ଗାୟିକା ଭାବେ ବେଶ୍ ସୁନାମ ଅର୍ଜନ କରିଥିଲେ କୁନି। ଦେଶ ଓ ବିଦେଶରେ ନିଜର କଳା ପ୍ରଦର୍ଶନ ବେଶ୍ ଖ୍ୟାତି ଅର୍ଜନ କରିଥିଲେ ।