ପଶ୍ଚିମବଙ୍ଗ: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଦଳ ତୃଣମୂଳ କଂଗ୍ରେସ (ଟିଏମସି)ରେ ଇସ୍ତଫା ପର୍ବ ଅବ୍ୟାହତ ରହିଛି। ବରିଷ୍ଠ ନେତ୍ରୀ ସୁସ୍ମିତା ଦେବଙ୍କ ଇସ୍ତଫାର ମାତ୍ର ୨୪ ଘଣ୍ଟା ମଧ୍ୟରେ ଅନ୍ୟ ଜଣେ ଟପ୍ ନେତା ତଥା ରାଜ୍ୟସଭା ସାଂସଦ ପ୍ରକାଶ ଚିକ ବରାଇକ ଦଳରୁ ଇସ୍ତଫା ଦେଇଛନ୍ତି। ଗୋଟିଏ ସପ୍ତାହ ମଧ୍ୟରେ ଇସ୍ତଫା ଦେବାରେ ସେ ହେଉଛନ୍ତି ତୃତୀୟ ଟିଏମସି ସାଂସଦ।

ଉତ୍ତର ବଙ୍ଗ ବିଶ୍ୱବିଦ୍ୟାଳୟରୁ ବାଣିଜ୍ୟରେ ସ୍ନାତକ ଡିଗ୍ରୀ ହାସଲ କରିଥିବା ପ୍ରକାଶ ଚିକ ବରାଇକ ରାଜନୀତିରେ ପ୍ରବେଶ କରିବା ପୂର୍ବରୁ ଜଣେ ଚା' ବଗିଚା କର୍ମଚାରୀ ଭାବରେ କାର୍ଯ୍ୟ କରୁଥିଲେ। ଗ୍ରାମପଞ୍ଚାୟତ ସ୍ତରରୁ ନିଜର ରାଜନୈତିକ କ୍ୟାରିୟର ଆରମ୍ଭ କରିଥିବା ପ୍ରକାଶ ମାତ୍ର ୫ ବର୍ଷ ମଧ୍ୟରେ ରାଜ୍ୟସଭା ସାଂସଦ ହେବାର ଗୌରବ ହାସଲ କରିଥିଲେ। ତାଙ୍କୁ ଟିଏମସି ସାଧାରଣ ସମ୍ପାଦକ ଅଭିଷେକ ବାନାର୍ଜୀଙ୍କ ଅତ୍ୟନ୍ତ ଅନୁଗତ ବୋଲି ବିବେଚନା କରାଯାଏ।

ବୁଧବାର ଦିନ ଟିଏମସି ନେତ୍ରୀ ସୁସ୍ମିତା ଦେବ ମଧ୍ୟ ଦଳ ଏବଂ ନିଜ ରାଜ୍ୟସଭା ଆସନରୁ ଇସ୍ତଫା ଦେଇଥିଲେ। ବ୍ୟକ୍ତିଗତ ଏବଂ ରାଜନୈତିକ କାରଣରୁ ସେ ଏହି ନିଷ୍ପତ୍ତି ନେଇଥିବା ସ୍ପଷ୍ଟ କରିବା ସହ ନିଜ ରାଜ୍ୟ ଆସାମରେ ରାଜନୈତିକ କାର୍ଯ୍ୟ ଜାରି ରଖିବେ ବୋଲି ପ୍ରକାଶ କରିଛନ୍ତି। ତାଙ୍କ ପୂର୍ବରୁ ବରିଷ୍ଠ ନେତା ତଥା ପ୍ରତିଷ୍ଠାତା ସଦସ୍ୟ ସୁଖେନ୍ଦୁ ଶେଖର ରାୟ ଏବଂ ପୂର୍ବତନ ସାଂସଦ ଶାନ୍ତନୁ ସେନ ମଧ୍ୟ ଦଳ ଛାଡିଥିଲେ। ସେହିପରି ମହିଳା କଂଗ୍ରେସ ମୁଖ୍ୟ ପଦରୁ ବରିଷ୍ଠ ନେତ୍ରୀ କାକୋଳି ଘୋଷ ଦସ୍ତିଦାର ମଧ୍ୟ ଇସ୍ତଫା ଦେଇଛନ୍ତି।

ମେ' ୪ ତାରିଖ ନିର୍ବାଚନ ଫଳାଫଳ ପରେ ତୃଣମୂଳ କଂଗ୍ରେସ ତାର ସବୁଠାରୁ ବଡ଼ ଆଭ୍ୟନ୍ତରୀଣ ସଙ୍କଟ ଦେଇ ଗତି କରୁଛି। ଦଳର ୮୦ ଜଣ ବିଧାୟକଙ୍କ ମଧ୍ୟରୁ ୫୮ ଜଣ ଦଳୀୟ ନେତୃତ୍ୱଙ୍କ ନିଷ୍ପତ୍ତି ବିରୋଧରେ ବିଦ୍ରୋହ କରିଛନ୍ତି। ବହିଷ୍କୃତ ବିଧାୟକ ଋତବ୍ରତ ବାନାର୍ଜୀଙ୍କ ନେତୃତ୍ୱରେ ଏହି ବିଦ୍ରୋହୀ ଗୋଷ୍ଠୀ ବିଧାନସଭାରେ ପ୍ରମୁଖ ବିରୋଧୀ ଦଳର ମାନ୍ୟତା ହାସଲ କରିଛନ୍ତି। ଏଥିସହ ଫିରହାଦ ହାକିମ (କୋଲକାତା), କୃଷ୍ଣା ଚକ୍ରବର୍ତ୍ତୀ (ବିଧାନନଗର), ରାମ ଚକ୍ରବର୍ତ୍ତୀ (ଚନ୍ଦନନଗର) ଏବଂ କମଳାକାନ୍ତ ଚକ୍ରବର୍ତ୍ତୀ (କାଟୁଆ)ଙ୍କ ଭଳି ଅତି କମରେ ୪ ଜଣ ପ୍ରମୁଖ ମେୟର ନିଜ ପଦରୁ ଇସ୍ତଫା ଦେଇଛନ୍ତି।

ଏହି ବଢୁଥିବା ସଙ୍କଟ ମଧ୍ୟରେ ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀ ବିରୋଧୀ ମେଣ୍ଟର ସମର୍ଥନ ଲୋଡିଛନ୍ତି। ନିକଟରେ ସେ କଂଗ୍ରେସ ନେତ୍ରୀ ସୋନିଆ ଗାନ୍ଧୀଙ୍କୁ ଭେଟି 'ଇଣ୍ଡିଆ' (INDIA) ମେଣ୍ଟର ଭବିଷ୍ୟତ ଏବଂ ସମନ୍ୱୟ ନେଇ ଆଲୋଚନା କରିଛନ୍ତି।

ପଶ୍ଚିମବଙ୍ଗ ରାଜନୀତିରେ ତୃଣମୂଳ କଂଗ୍ରେସ (TMC) ପାଇଁ ସଙ୍କଟ ଘନୀଭୂତ ହେବାରେ ଲାଗିଛି। ଦଳ ଭିତରେ ଚାଲିଥିବା ମହାବିଦ୍ରୋହ ମଧ୍ୟରେ ଏବେ ୧୯ ଜଣ ବିଦ୍ରୋହୀ ସାଂସଦଙ୍କ ଏକ ତାଲିକା ସାମ୍ନାକୁ ଆସିଛି। ସବୁଠାରୁ ଆଶ୍ଚର୍ଯ୍ୟର କଥା ହେଉଛି, ଏହି ତାଲିକାରେ ବଲିଉଡ୍ ଅଭିନେତାରୁ ନେତା ପାଲଟିଥିବା ଶତ୍ରୁଘ୍ନ ସିହ୍ନା ଏବଂ ପୂର୍ବତନ କ୍ରିକେଟର ୟୁସୁଫ ପଠାନଙ୍କ ଭଳି ହାଇ-ପ୍ରୋଫାଇଲ୍ ନେତାଙ୍କ ନାମ ମଧ୍ୟ ସାମିଲ ରହିଛି। ଏହି ସାଂସଦମାନେ ଏକ ଅଲଗା ସଂସଦୀୟ ଗୋଷ୍ଠୀ ଗଠନ କରିବା ସପକ୍ଷରେ ସ୍ୱାକ୍ଷର କରିଥିବା ଦାବି କରାଯାଉଛି।

ସଂସଦରେ ସ୍ୱତନ୍ତ୍ର ଗୋଷ୍ଠୀ ଗଠନ ପାଇଁ ପ୍ରସ୍ତୁତି

ସୂଚନା ଅନୁଯାୟୀ, ବରିଷ୍ଠ ନେତ୍ରୀ ତଥା ସାଂସଦ କାକୋଲି ଘୋଷ ଦସ୍ତିଦାରଙ୍କ ନେତୃତ୍ୱରେ ଲୋକସଭାରେ ଟିଏମସିର ଏକ ବଡ଼ ଗୋଷ୍ଠୀ ବିଦ୍ରୋହ କରିଛନ୍ତି। ପ୍ରାୟ ୨୦ ଜଣ ସାଂସଦ ଲୋକସଭା ବାଚସ୍ପତି ଓମ୍ ବିର୍ଲାଙ୍କୁ ଚିଠି ଲେଖି ଏକ ସ୍ୱତନ୍ତ୍ର ଦଳ ଭାବରେ ସ୍ୱୀକୃତି ପ୍ରଦାନ କରିବାକୁ ଦାବି କରିଛନ୍ତି। ବିଧାନସଭା ନିର୍ବାଚନରେ ଶୋଚନୀୟ ପରାଜୟ ପରେ ଦଳର ନେତାମାନେ ଗୋଟିଏ ପରେ ଗୋଟିଏ ମମତା ବାନାର୍ଜୀଙ୍କ ହାତ ଛାଡ଼ିବାରେ ଲାଗିଛନ୍ତି, ଯାହା ଫଳରେ ଦଳର ଅସ୍ତିତ୍ୱ ଉପରେ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି।

ବଡ଼ ନେତାଙ୍କ ବିଦ୍ରୋହ ଓ ପ୍ରତିକ୍ରିୟା

ଏହି ବିଦ୍ରୋହ ସମୟରେ ଶତ୍ରୁଘ୍ନ ସିହ୍ନା ସମ୍ପୂର୍ଣ୍ଣ ନୀରବତା ଅବଲମ୍ବନ କରିବା ଅନେକ ପ୍ରଶ୍ନ ସୃଷ୍ଟି କରିଛି। ଅନ୍ୟପଟେ କିର୍ତ୍ତୀ ଆଜାଦ୍ ଅଭିଯୋଗ କରିଛନ୍ତି ଯେ, କେନ୍ଦ୍ରୀୟ ତଦନ୍ତକାରୀ ସଂସ୍ଥା (ଇଡି ଏବଂ ସିବିଆଇ)ର ଭୟ ଦେଖାଇ ବିଜେପି ୟୁସୁଫ ପଠାନଙ୍କ ଭଳି ସାଂସଦମାନଙ୍କୁ ବ୍ଲାକମେଲ୍ କରୁଛି। ତେବେ ଲୋକସଭା ସହ ରାଜ୍ୟସଭାରେ ମଧ୍ୟ ଦଳକୁ ଝଟକା ଲାଗିଛି। ବରିଷ୍ଠ ନେତ୍ରୀ ସୁସ୍ମିତା ଦେବ ରାଜ୍ୟସଭାରୁ ଇସ୍ତଫା ଦେଇଛନ୍ତି ଏବଂ ସେ ବିଜେପିରେ ସାମିଲ ହେବା ନେଇ ଚର୍ଚ୍ଚା ଜୋର ଧରିଛି।

ମମତାଙ୍କ ପାଇଁ ବଢ଼ୁଛି ଅଡ଼ୁଆ

ଗୋଟିଏ ପଟେ ଦିଲ୍ଲୀରେ ମମତା ବାନାର୍ଜୀ ଏବଂ ଅଭିଷେକ ବାନାର୍ଜୀ ଇଣ୍ଡିଆ (INDIA) ମେଣ୍ଟର ବୈଠକରେ ଯୋଗ ଦେଉଥିବା ବେଳେ, ଅନ୍ୟପଟେ ତାଙ୍କ ଦଳର ୧୪ ଜଣ ସାଂସଦ ପଶ୍ଚିମବଙ୍ଗର ବିଜେପି ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କୁ ଭେଟିବା ଦଳ ପାଇଁ ବଡ଼ ବିପଦର ସଙ୍କେତ ଦେଇଛି। ଏହା ପୂର୍ବରୁ ବିଧାନସଭାରେ ଟିଏମସିର ୫୮ ଜଣ ବିଧାୟକ ମଧ୍ୟ ବିଦ୍ରୋହ କରି ରିତବ୍ରତ ବାନାର୍ଜୀଙ୍କୁ ବିରୋଧୀ ଦଳ ନେତା ଭାବେ ସମର୍ଥନ ଜଣାଇଥିଲେ। ୧୯୯୮ ମସିହାରେ କଂଗ୍ରେସରୁ ଅଲଗା ହୋଇ ଗଠନ ହୋଇଥିବା ତୃଣମୂଳ କଂଗ୍ରେସ ଏବେ ୨୮ ବର୍ଷ ପରେ ସବୁଠାରୁ ବଡ଼ ଭାଙ୍ଗନର ସମ୍ମୁଖୀନ ହୋଇଛି।

ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ତଥା ତୃଣମୂଳ କଂଗ୍ରେସ (ଟିଏମସି) ସୁପ୍ରିମୋ ମମତା ବାନାର୍ଜୀଙ୍କ ପାଇଁ ଦିଲ୍ଲୀରେ ବଡ଼ ଅଡ଼ୁଆ ସୃଷ୍ଟି ହୋଇଛି। ଇଣ୍ଡିଆ (INDIA) ମେଣ୍ଟର ବୈଠକରେ ଯୋଗ ଦେବା ପାଇଁ ସେ ଦିଲ୍ଲୀରେ ପହଞ୍ଚିଥିବା ବେଳେ ଦଳରେ ଏକ ବଡ଼ ଧରଣର ଫାଟ ଦେଖାଦେଇଛି। ଟିଏମସିର ଲୋକସଭା ସାଂସଦଙ୍କ ଏକ ଗୋଷ୍ଠୀ ଦଳରୁ ଅଲଗା ହୋଇ ଏନଡିଏ (NDA) କୁ ସମର୍ଥନ ଦେବାକୁ ଘୋଷଣା କରିଛନ୍ତି।

ନେତୃତ୍ୱ ପରିବର୍ତ୍ତନ ପାଇଁ ଦାବି

ମିଳିଥିବା ସୂଚନା ଅନୁଯାୟୀ, ୨୦ ଜଣ ସାଂସଦଙ୍କୁ ନେଇ ଗଠିତ ଏହି ବିଦ୍ରୋହୀ ଗୋଷ୍ଠୀ ଲୋକସଭାରେ ନେତା ପରିବର୍ତ୍ତନ ଚାହୁଁଛନ୍ତି। ସେମାନେ ବର୍ତ୍ତମାନର ନେତା ଅଭିଷେକ ବାନାର୍ଜୀଙ୍କ ଉପରେ ଅସନ୍ତୋଷ ବ୍ୟକ୍ତ କରିଛନ୍ତି। ତାଙ୍କ ବଦଳରେ ବରିଷ୍ଠ ନେତ୍ରୀ କାକୋଲି ଘୋଷଙ୍କୁ ସଂସଦରେ ନିଜର ନେତା କରିବାକୁ ସେମାନେ ଦାବି ରଖିଛନ୍ତି। ନେତୃତ୍ୱକୁ ନେଇ ଏହି ଅସନ୍ତୋଷ ଦଳ ଭିତରେ ଥିବା ଆଭ୍ୟନ୍ତରୀଣ କନ୍ଦଳକୁ ପଦାରେ ପକାଇଛି।

ଜାତୀୟ ରାଜନୀତିରେ ହଲଚଲ

ଗୋଟିଏ ପଟେ ମମତା ବାନାର୍ଜୀ କେନ୍ଦ୍ରରେ ବିରୋଧୀ ମେଣ୍ଟକୁ ମଜବୁତ କରିବାକୁ ପ୍ରୟାସ କରୁଥିବା ବେଳେ, ନିଜ ଦଳ ଭିତରେ ଏଭଳି ବିଦ୍ରୋହ ତାଙ୍କ ପାଇଁ ଏକ ଶକ୍ତ ଧକ୍କା ବୋଲି ରାଜନୈତିକ ବିଶେଷଜ୍ଞମାନେ ମତ ଦେଉଛନ୍ତି। ଏକାଥରକେ ୨୦ ଜଣ ସାଂସଦ ଏକାଠି ହୋଇ ଏନଡିଏକୁ ସମର୍ଥନ କରିବା ନିଷ୍ପତ୍ତି ଜାତୀୟ ରାଜନୀତିରେ ନୂଆ ସମୀକରଣ ସୃଷ୍ଟି କରିଛି। ଏହି ଘଟଣା ପରେ ଟିଏମସି ହାଇକମାଣ୍ଡ କି ପଦକ୍ଷେପ ନେଉଛନ୍ତି, ତାହା ଉପରେ ସମସ୍ତଙ୍କ ନଜର ରହିଛି।

ପଶ୍ଚିମବଙ୍ଗ ବିଧାନସଭାରେ ଘଟିଥିବା ବଡ଼ ଧରଣର ବିଦ୍ରୋହ ପରେ ଏବେ ତୃଣମୂଳ କଂଗ୍ରେସ (TMC) ସୁପ୍ରିମୋ ମମତା ବାନାର୍ଜୀ ଏକ ନୂଆ ସଙ୍କଟର ସମ୍ମୁଖୀନ ହୋଇଛନ୍ତି। ରାଜ୍ୟ ରାଜନୀତିରେ ଦେଖାଦେଇଥିବା ଏହି ଅସ୍ଥିରତା ଏବେ ଲୋକସଭା ଏବଂ ରାଜ୍ୟସଭାକୁ ବ୍ୟାପିବାର ଆଶଙ୍କା ଦେଖାଦେଇଛି, ଯାହାକି ଦଳ ପାଇଁ ଏକ ବଡ଼ ଚିନ୍ତାର କାରଣ ପାଲଟିଛି।

ସଂସଦରେ ବିଦ୍ରୋହର ଆଶଙ୍କା

ପଶ୍ଚିମବଙ୍ଗ ବିଧାନସଭାରେ ରିତବ୍ରତ ବାନାର୍ଜୀଙ୍କ ନେତୃତ୍ୱରେ ପ୍ରାୟ ୫୮ ଜଣ ବିଧାୟକ ବିଦ୍ରୋହ କରିବା ପରେ ଏବେ ଦଳର ସାଂସଦମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ସୂତ୍ରରୁ ପ୍ରକାଶ ଯେ, ପ୍ରାୟ ୨୦ ରୁ ୨୩ ଜଣ ସାଂସଦ ବିଦ୍ରୋହୀ ଗୋଷ୍ଠୀଙ୍କ ସହ ଯୋଗାଯୋଗରେ ଅଛନ୍ତି। ଯଦି ଏହି ସାଂସଦମାନେ ଦଳ ଛାଡ଼ନ୍ତି, ତେବେ ତାହା ଜାତୀୟ ସ୍ତରରେ ଟିଏମସି ପାଇଁ ଏକ ବଡ଼ ଝଟକା ହେବ।

ଅଭିଷେକ ବାନାର୍ଜୀଙ୍କ କାର୍ଯ୍ୟଶୈଳୀକୁ ନେଇ ଅସନ୍ତୋଷ

ଏହି ବିଦ୍ରୋହର ମୁଖ୍ୟ କାରଣ ଭାବରେ ଦଳର ସାଧାରଣ ସମ୍ପାଦକ ଅଭିଷେକ ବାନାର୍ଜୀଙ୍କ ପ୍ରଭାବ ଏବଂ କାର୍ଯ୍ୟଶୈଳୀକୁ ଦାୟୀ କରାଯାଉଛି। ଦଳର ଅନେକ ବରିଷ୍ଠ ନେତା ଏବଂ ସାଂସଦ ତାଙ୍କ ନେତୃତ୍ୱକୁ ନେଇ ଖୋଲାଖୋଲି ଭାବରେ ଅସନ୍ତୋଷ ବ୍ୟକ୍ତ କରୁଛନ୍ତି। ବିଭିନ୍ନ ଅଭିଯୋଗ ଏବଂ ଦଳ ଭିତରେ ବଢ଼ୁଥିବା ଅନ୍ତର୍ଦ୍ୱନ୍ଦ୍ୱ ଯୋଗୁଁ ମମତା ବାନାର୍ଜୀଙ୍କ ନେତୃତ୍ୱ ପ୍ରତି ମଧ୍ୟ ପ୍ରଶ୍ନବାଚୀ ସୃଷ୍ଟି ହୋଇଛି।

ଦଳ ବଞ୍ଚାଇବାକୁ ଆରମ୍ଭ ହେଲା ପ୍ରୟାସ

ଦଳକୁ ଏହି ବଡ଼ ସଙ୍କଟରୁ ରକ୍ଷା କରିବା ପାଇଁ ମମତା ବାନାର୍ଜୀ ଏବେ ସକ୍ରିୟ ହୋଇପଡ଼ିଛନ୍ତି। ସେ ଅସନ୍ତୁଷ୍ଟ ବିଧାୟକ ଏବଂ ସାଂସଦମାନଙ୍କ ସହ ବ୍ୟକ୍ତିଗତ ଭାବେ କଥା ହେଉଥିବା ଜଣାପଡ଼ିଛି। ତେବେ ଦଳ ଭିତରେ ଆରମ୍ଭ ହୋଇଥିବା ଏହି ବିଦ୍ରୋହକୁ ରୋକିବାରେ ସେ କେତେଦୂର ସଫଳ ହେବେ, ତାହା ଆଗାମୀ ଦିନରେ ସ୍ପଷ୍ଟ ହେବ। କିନ୍ତୁ ବର୍ତ୍ତମାନ ପରିସ୍ଥିତିରେ ଦିଲ୍ଲୀରେ ମଧ୍ୟ ଏକ ନୂଆ ରାଜନୈତିକ ଖେଳ ଦେଖିବାକୁ ମିଳିପାରେ ବୋଲି ରାଜନୈତିକ ବିଶେଷଜ୍ଞମାନେ ମତ ଦେଇଛନ୍ତି।

ପଶ୍ଚିମବଙ୍ଗ ବିଧାନସଭା ନିର୍ବାଚନ ୨୦୨୬ରେ ଭାରତୀୟ ଜନତା ପାର୍ଟି (ବିଜେପି) ଠାରୁ ଶୋଚନୀୟ ପରାଜୟର ସାମ୍ନା କରିବା ପରେ ପୂର୍ବତନ ମୁଖ୍ୟମନ୍ତ୍ରୀ ତଥା ତୃଣମୂଳ କଂଗ୍ରେସ (ଟିଏମସି) ସୁପ୍ରିମୋ ମମତା ବାନାର୍ଜୀ ନିଜ ଦଳର ନେତାମାନଙ୍କୁ ଏକ କଡ଼ା ବାର୍ତ୍ତା ଦେଇଛନ୍ତି। ସେ ସ୍ପଷ୍ଟ କରିଛନ୍ତି ଯେ ଯେଉଁମାନେ ଦଳ ଛାଡ଼ିବାକୁ ଚାହୁଁଛନ୍ତି, ସେମାନେ ନିର୍ଦ୍ୱନ୍ଦ୍ୱରେ ଯାଇପାରିବେ। କିନ୍ତୁ ଯେଉଁମାନେ ଦଳରେ ରହିବେ, ସେମାନଙ୍କୁ ନେଇ ସେ ପୁଣିଥରେ ସଂଗଠନକୁ ନୂଆ ରୂପ ଦେବେ।

କାଳୀଘାଟ ବାସଭବନରେ ଗୁରୁତ୍ୱପୂର୍ଣ୍ଣ ବୈଠକ

ଶୁକ୍ରବାର ଦିନ କୋଲକାତା ସ୍ଥିତ ନିଜ କାଳୀଘାଟ ବାସଭବନରେ ଦଳର ପ୍ରାର୍ଥୀମାନଙ୍କ ସହ ଏକ ସମୀକ୍ଷା ବୈଠକ କରିଥିଲେ ମମତା। ଏହି ବୈଠକରେ ଟିଏମସିର ରାଷ୍ଟ୍ରୀୟ ସାଧାରଣ ସମ୍ପାଦକ ଅଭିଷେକ ବାନାର୍ଜୀ ମଧ୍ୟ ଉପସ୍ଥିତ ଥିଲେ। ନିର୍ବାଚନରେ ପରାଜୟ ପରେ ଦଳ ଭିତରେ ଅସନ୍ତୋଷ ବୃଦ୍ଧି ପାଉଥିବାର ଖବର ଆସୁଥିବା ବେଳେ, ମମତା ନେତାମାନଙ୍କୁ ସଂଗଠନର ପୁନର୍ଗଠନ ଉପରେ ଧ୍ୟାନ କେନ୍ଦ୍ରିତ କରିବାକୁ ନିବେଦନ କରିଛନ୍ତି।

'ଯେଉଁମାନେ ଯିବାକୁ ଚାହୁଁଛନ୍ତି, ଯାଇପାରିବେ'

କର୍ମୀମାନଙ୍କୁ ଉତ୍ସାହିତ କରି ମମତା କହିଛନ୍ତି, "ଯେଉଁମାନେ ଅନ୍ୟ ଦଳକୁ ଯିବାକୁ ଚାହୁଁଛନ୍ତି, ସେମାନଙ୍କୁ ଯିବାକୁ ଦିଅ। ମୁଁ ଦଳକୁ ପୁଣି ନୂଆକରି ଗଢ଼ିବି। ଯେଉଁମାନେ ଏହି ଯାତ୍ରାରେ ମୋ ସହ ଅଛନ୍ତି, ମୁଁ ସେମାନଙ୍କୁ କହୁଛି ଯେ କ୍ଷତିଗ୍ରସ୍ତ ହୋଇଥିବା ଦଳୀୟ କାର୍ଯ୍ୟାଳୟଗୁଡ଼ିକୁ ପୁନର୍ନିର୍ମାଣ କର, ରଙ୍ଗ ଦିଅ ଏବଂ ପୁଣିଥରେ ଖୋଲ।" ଏହି ବଡ଼ ପରାଜୟ ସତ୍ତ୍ୱେ ଦଳ ପୁଣିଥରେ ଉଠିବ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି।

୨୦୨୬ ନିର୍ବାଚନରେ ଟିଏମସିର ପରାଜୟ

ସୂଚନାଯୋଗ୍ୟ ଯେ, ନିକଟରେ ଶେଷ ହୋଇଥିବା ପଶ୍ଚିମବଙ୍ଗ ବିଧାନସଭା ନିର୍ବାଚନରେ ଟିଏମସିର ୧୫ ବର୍ଷ ଶାସନର ଅନ୍ତ ଘଟିଛି। ବିଜେପି ଏହି ନିର୍ବାଚନରେ ବହୁମତ ସହ ବୃହତ ବିଜୟ ହାସଲ କରିଥିବା ବେଳେ ଟିଏମସିକୁ ଏକ ବଡ଼ ଝଟକା ଲାଗିଛି। ଲଗାତାର ତିନିଥର କ୍ଷମତାରେ ରହିବା ପରେ ବିରୋଧୀ ଆସନରେ ବସିବାକୁ ଯାଉଥିବା ଟିଏମସି ପାଇଁ ଏହା ଏକ କଠିନ ସମୟ ପାଲଟିଛି।

ପଶ୍ଚିମବଙ୍ଗର କ୍ଷମତାସୀନ ତୃଣମୂଳ କଂଗ୍ରେସ (TMC) ଦଳରେ ଆଭ୍ୟନ୍ତରୀଣ କନ୍ଦଳ ତୀବ୍ର ହେବାରେ ଲାଗିଛି। ସମ୍ପ୍ରତି ନିର୍ବାଚନରେ ଦଳର ନୈରାଶ୍ୟଜନକ ପ୍ରଦର୍ଶନ ପରେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ପୁତୁରା ତଥା ଦଳର ସର୍ବଭାରତୀୟ ସାଧାରଣ ସମ୍ପାଦକ ଅଭିଷେକ ବାନାର୍ଜୀ ଏବଂ ଦଳର ବରିଷ୍ଠ ନେତାମାନଙ୍କ (ଓଲ୍ଡ ଗାର୍ଡ) ମଧ୍ୟରେ ଫାଟ ଆହୁରି ବଢ଼ିଯାଇଛି।

ବରିଷ୍ଠ ନେତାଙ୍କ ଉପରେ ମମତାଙ୍କ ଭରସା

ନିର୍ବାଚନରେ ଆଶାନୁରୂପ ଫଳାଫଳ ନମିଳିବା ପରେ ଏବେ ମୁଖ୍ୟମନ୍ତ୍ରୀ ମମତା ବାନାର୍ଜୀ ନିଜର ପୁରୁଣା ତଥା ବିଶ୍ୱସ୍ତ ନେତାମାନଙ୍କ ଉପରେ ଅଧିକ ନିର୍ଭର କରୁଥିବା ଦେଖିବାକୁ ମିଳିଛି। ବିଧାନସଭା ଟିମ୍ ଗଠନ ବେଳେ ଅଭିଷେକ ବାନାର୍ଜୀଙ୍କ ଗୋଷ୍ଠୀର ଅନେକ ଯୁବ ନେତାମାନଙ୍କୁ ବାଦ୍ ଦିଆଯାଇଛି। ଦଳୀୟ ସୂତ୍ର ଅନୁଯାୟୀ, ବିଧାନସଭାର କାର୍ଯ୍ୟଶୈଳୀକୁ ଭଲଭାବେ ବୁଝୁଥିବା ଅଭିଜ୍ଞ ବିଧାୟକମାନଙ୍କର ଏବେ ଦଳ ପାଇଁ ଅଧିକ ଆବଶ୍ୟକତା ରହିଛି। ଏହା ପୂର୍ବରୁ ଅନେକ ବରିଷ୍ଠ ନେତାଙ୍କ ଟିକେଟ୍ କାଟି ନୂଆ ମୁହଁଙ୍କୁ ସୁଯୋଗ ଦେବା ପାଇଁ ଅଭିଷେକ ଜିଦ୍ ଧରିଥିଲେ, ଯାହାକୁ ନେଇ ସେତେବେଳେ ମଧ୍ୟ ଅସନ୍ତୋଷ ପ୍ରକାଶ ପାଇଥିଲା।

ନିଶାନାରେ ଆଇ-ପ୍ୟାକ୍ (I-PAC) ଓ ଯୁବ ଗୋଷ୍ଠୀ

ଦଳର ପରାଜୟ ପାଇଁ ରାଜନୈତିକ ପରାମର୍ଶଦାତା ସଂସ୍ଥା ଆଇ-ପ୍ୟାକ୍ (I-PAC)ର ଭୂମିକାକୁ ନେଇ କଡ଼ା ସମାଲୋଚନା ଆରମ୍ଭ ହୋଇଛି। ସୂଚନାଯୋଗ୍ୟ ଯେ, ଅଭିଷେକ ବାନାର୍ଜୀ ହିଁ ଦଳରେ ଏହି ସଂସ୍ଥାକୁ ଗୁରୁତ୍ୱପୂର୍ଣ୍ଣ ଦାୟିତ୍ୱ ଦେଇଥିଲେ। ହେଲେ ଶ୍ରୀରାମପୁର ସାଂସଦ କଲ୍ୟାଣ ବାନାର୍ଜୀ ଏକ ସାକ୍ଷାତକାରରେ ସିଧାସଳଖ ଆଇ-ପ୍ୟାକର ତ୍ରୁଟିପୂର୍ଣ୍ଣ ନିର୍ବାଚନ ପରିଚାଳନାକୁ ଏହି ବିପର୍ଯ୍ୟୟ ପାଇଁ ଦାୟୀ କରିଛନ୍ତି। ସେ ଅଭିଯୋଗ କରିଛନ୍ତି ଯେ ମୂଳ ଦଳୀୟ ସଂଗଠନ ଏବଂ କର୍ମୀଙ୍କୁ ଅଣଦେଖା କରି କେବଳ ଗୋଟିଏ ସଂସ୍ଥାକୁ ଅଧିକ ଗୁରୁତ୍ୱ ଦେବା ଦଳ ପାଇଁ ମହଙ୍ଗା ପଡ଼ିଲା।

ପୂର୍ବରୁ ମଧ୍ୟ ଦଳରେ 'ଓଲ୍ଡ ଗାର୍ଡ' ଏବଂ ଯୁବ ନେତାମାନଙ୍କ ମଧ୍ୟରେ କ୍ଷମତା ଜାହିରକୁ ନେଇ ଶୀତଳ ଯୁଦ୍ଧ ଲାଗି ରହିଥିଲା। ତେବେ ବର୍ତ୍ତମାନର ସଙ୍କଟ ସମୟରେ ବିଶ୍ୱସ୍ତ ବରିଷ୍ଠ ନେତାମାନେ ପୁଣିଥରେ ସାମ୍ନାକୁ ଆସିଥିବା ବେଳେ ଯୁବ ଗୋଷ୍ଠୀ କୋଣଠେସା ହୋଇଥିବା ଚର୍ଚ୍ଚା ହେଉଛି। ଏହି ଆଭ୍ୟନ୍ତରୀଣ ଝଡ଼କୁ ମମତା ବାନାର୍ଜୀ ଆଗାମୀ ଦିନରେ କିପରି ସମ୍ଭାଳୁଛନ୍ତି, ତାହା ଉପରେ ସମସ୍ତଙ୍କ ନଜର ରହିଛି।

ପଶ୍ଚିମବଙ୍ଗ ରାଜନୀତିରେ ଏବେ ଏକ ଅଭୂତପୂର୍ବ ସାମ୍ବିଧାନିକ ସଙ୍କଟ ଦେଖାଦେଇଛି। ୨୦୨୬ ବିଧାନସଭା ନିର୍ବାଚନରେ ଭାରତୀୟ ଜନତା ପାର୍ଟି (ବିଜେପି) ଠାରୁ ପରାଜୟ ବରଣ କରିବା ପରେ ମଧ୍ୟ ମୁଖ୍ୟମନ୍ତ୍ରୀ ତଥା ତୃଣମୂଳ କଂଗ୍ରେସ (ଟିଏମସି) ସୁପ୍ରିମୋ ମମତା ବାନାର୍ଜୀ ନିଜ ପଦରୁ ଇସ୍ତଫା ଦେବାକୁ ରୋକଠୋକ୍ ମନା କରିଦେଇଛନ୍ତି। ଗୁରୁବାର, ୭ ମେ ମଧ୍ୟରାତ୍ରିରେ ବର୍ତ୍ତମାନର ବିଧାନସଭା କାର୍ଯ୍ୟକାଳ ଶେଷ ହେବାକୁ ଯାଉଥିବା ବେଳେ ରାଜ୍ୟପାଳ ଆର. ଏନ୍. ରବି କି ପଦକ୍ଷେପ ନେବେ, ତାହା ଉପରେ ସମସ୍ତଙ୍କ ନଜର ରହିଛି।

ଇସ୍ତଫା ନଦେବାକୁ ଛିଡ଼ା ହେଲେ ମମତା

ବିଜେପିର ବିପୁଳ ବିଜୟ ସତ୍ତ୍ୱେ ମମତା ବାନାର୍ଜୀ ଏହି ନିର୍ବାଚନ ଫଳାଫଳକୁ ଅସ୍ୱୀକାର କରିଛନ୍ତି। ସେ ଅଭିଯୋଗ କରିଛନ୍ତି ଯେ ଇଭିଏମ୍ ହେରଫେର ଏବଂ ହିଂସା ମାଧ୍ୟମରେ ବିଜେପି ନିର୍ବାଚନ ଜିତିଛି। ନିଜର ଏହି ପଦକ୍ଷେପକୁ ଏକ 'ସାଙ୍କେତିକ ପ୍ରତିବାଦ' ବୋଲି ଦର୍ଶାଇ ସେ ଇସ୍ତଫା ନଦେବାକୁ ଜିଦ୍ ଧରିଛନ୍ତି। ଏହାସହ ନିର୍ବାଚନ ଫଳାଫଳ ବିରୋଧରେ ଟିଏମସି ଅଦାଲତର ଦ୍ୱାରସ୍ଥ ହେବ ବୋଲି ଘୋଷଣା କରିଛି। ସୂଚନାଯୋଗ୍ୟ ଯେ, ମମତା ନିଜର ପାରମ୍ପରିକ ଆସନ ଭବାନୀପୁରରୁ ମଧ୍ୟ ବିଜେପି ପ୍ରାର୍ଥୀ ଶୁଭେନ୍ଦୁ ଅଧିକାରୀଙ୍କ ଠାରୁ ପରାସ୍ତ ହୋଇଛନ୍ତି।

ଆଜି ସରୁଛି ବିଧାନସଭା କାର୍ଯ୍ୟକାଳ

ସମ୍ବିଧାନର ଅନୁଚ୍ଛେଦ ୧୭୨ ଅନୁଯାୟୀ, ରାଜ୍ୟ ବିଧାନସଭାର କାର୍ଯ୍ୟକାଳ ୫ ବର୍ଷ ପାଇଁ ନିର୍ଦ୍ଧାରିତ। ୭ ମେ ରାତି ୧୨ଟା ବାଜିବା କ୍ଷଣି ପଶ୍ଚିମବଙ୍ଗର ପୁରୁଣା ବିଧାନସଭା ସ୍ୱତଃ ଭଙ୍ଗ ହୋଇଯିବ। ସାମ୍ବିଧାନିକ ବିଶେଷଜ୍ଞଙ୍କ ମତରେ, ବିଧାନସଭାର କାର୍ଯ୍ୟକାଳ ଶେଷ ହେବା ମାତ୍ରେ ମୁଖ୍ୟମନ୍ତ୍ରୀ ଏବଂ ତାଙ୍କ ମନ୍ତ୍ରିମଣ୍ଡଳର ବୈଧାନିକ ଅଧିକାର ଆପେ ଆପେ ଶେଷ ହୋଇଯିବ। ଯଦି ମମତା ବାନାର୍ଜୀ ଇସ୍ତଫା ନ ଦିଅନ୍ତି, ତେବେ ରାଜ୍ୟପାଳ ଆର. ଏନ୍. ରବିଙ୍କ ପାଖରେ ମନ୍ତ୍ରିପରିଷଦକୁ ବରଖାସ୍ତ କରିବାର କ୍ଷମତା ରହିଛି।

ନୂଆ ସରକାର ଗଠନ ପାଇଁ ପ୍ରସ୍ତୁତି

ଏସବୁ ଭିତରେ ନୂଆ ସରକାର ଗଠନ ପାଇଁ ପ୍ରକ୍ରିୟା ଆରମ୍ଭ ହୋଇଯାଇଛି। ରାଜ୍ୟର ମୁଖ୍ୟ ନିର୍ବାଚନ ଅଧିକାରୀ ମନୋଜ କୁମାର ଅଗ୍ରୱାଲ ରାଜ୍ୟପାଳ ଆର. ଏନ୍. ରବିଙ୍କୁ ଭେଟି ବିଜୟୀ ପ୍ରାର୍ଥୀମାନଙ୍କର ଗେଜେଟ୍ ନୋଟିଫିକେସନ୍ ପ୍ରଦାନ କରିଛନ୍ତି। ଏହା ଫଳରେ ସଂଖ୍ୟାଗରିଷ୍ଠତା ହାସଲ କରିଥିବା ବିଜେପିକୁ ସରକାର ଗଠନ ପାଇଁ ଆମନ୍ତ୍ରଣ କରିବା ରାସ୍ତା ସଫା ହୋଇଯାଇଛି। ଆସନ୍ତା ୯ ମେରେ ନୂତନ ସରକାର ଶପଥ ଗ୍ରହଣ କରିବାର କାର୍ଯ୍ୟକ୍ରମ ରହିଛି।

ପଶ୍ଚିମବଙ୍ଗ: ପଶ୍ଚିମବଙ୍ଗ ବିଜେପି ନେତା ସୁଭେନ୍ଦୁ ଅଧିକାରୀଙ୍କ ବ୍ୟକ୍ତିଗତ ସହାୟକ (ପିଏ) ଚନ୍ଦ୍ରନାଥ ରଥଙ୍କୁ ବୁଧବାର ରାତିରେ ଗୁଳି କରି ହତ୍ୟା କରାଯାଇଛି। ମଧ୍ୟମଗ୍ରାମ ନିକଟରେ ଥିବା ଏକ ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି। ଏହି ଘଟଣାକୁ ନେଇ ଜଣେ ପ୍ରତ୍ୟକ୍ଷଦର୍ଶୀ ବଡ଼ ଖୁଲାସା କରିଛନ୍ତି। ତାଙ୍କ ମତରେ ଆତତାୟୀମାନେ ଅତି ନିକଟରୁ ଗୁଳି ଚଳାଇଥିଲେ ଏବଂ ଏହି ଆକ୍ରମଣ ସମ୍ପୂର୍ଣ୍ଣ ରୂପେ "ପୂର୍ବ ଯୋଜନାବଦ୍ଧ" ଥିଲା ବୋଲି ସନ୍ଦେହ କରାଯାଉଛି।

ଗଣମାଧ୍ୟମ ଏଜେନ୍ସି ଏଏନଆଇ (ANI) ଅନୁଯାୟୀ, ପ୍ରତ୍ୟକ୍ଷଦର୍ଶୀ ଜଣକ କହିଛନ୍ତି, "ଚନ୍ଦ୍ରନାଥଙ୍କ କାର୍ ମୋ କାର୍ ଅତିକ୍ରମ କରିବା ମାତ୍ରେ ହଠାତ୍ ଅଧା ରାସ୍ତାରେ ଅଟକି ଯାଇଥିଲା। ଏହାପରେ ବାଇକ୍‌ରେ ଆସିଥିବା ଜଣେ ବ୍ୟକ୍ତି କାର୍‌ର ବାମ ପାର୍ଶ୍ୱରୁ ଗୁଳି ଚଳାଇବା ଆରମ୍ଭ କରିଥିଲେ।" ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ, ଗୁଳି ଚଳାଇଥିବା ବ୍ୟକ୍ତି ଜଣକ ଖୁବ୍ ପାରଙ୍ଗମ ଥିଲେ ଏବଂ ଘଟଣାସ୍ଥଳରୁ ତୁରନ୍ତ ଫେରାର ହୋଇଯାଇଥିଲେ। ରାତି ୧୦:୩୦ ରୁ ୧୧ ଟା ମଧ୍ୟରେ ଡାକ୍ତରଖାନାରୁ ପ୍ରାୟ ୨୦୦ ରୁ ୩୦୦ ମିଟର ଦୂରରେ ଏହି ଘଟଣା ଘଟିଥିଲା। ସେ ଦୁଇ ରାଉଣ୍ଡ ଗୁଳି ଶବ୍ଦ ଶୁଣିଥିଲେ। ଲୋକମାନେ ତୁରନ୍ତ ପୀଡ଼ିତଙ୍କୁ ଡାକ୍ତରଖାନା ନେଇଥିଲେ। ଏହି ଆକ୍ରମଣରେ କାର୍‌ର ଡ୍ରାଇଭର ମଧ୍ୟ ଗୁଳିମାଡ଼ର ଶିକାର ହୋଇଛନ୍ତି।

ଏହି ଘଟଣା ପରେ ପଶ୍ଚିମବଙ୍ଗ ବିଜେପି ନେତ୍ରୀ ଅଗ୍ନିମିତ୍ରା ପଲ୍ ଏହା ପଛରେ ରାଜନୈତିକ ଉଦ୍ଦେଶ୍ୟ ଥିବା ଅଭିଯୋଗ କରିଛନ୍ତି। ସେ କହିଛନ୍ତି ଯେ, ସିସିଟିଭି (CCTV) ଫୁଟେଜ୍ ଯାଞ୍ଚ କରାଯାଉଛି। ଭବାନୀପୁରରେ ମମତା ବାନାର୍ଜୀଙ୍କ ପରାଜୟର ଏହା ଏକ ପରିଣାମ ହୋଇପାରେ ବୋଲି ସେ ଆଶଙ୍କା ପ୍ରକାଶ କରିଛନ୍ତି। ଅଗ୍ନିମିତ୍ରା ପଲ୍ କହିଛନ୍ତି ଯେ, ଚନ୍ଦ୍ରନାଥ ଜଣେ ବିଶ୍ୱସ୍ତ ବ୍ୟକ୍ତି ଥିଲେ ଏବଂ ବିରୋଧୀ ଦଳ ନେତାଙ୍କ କାର୍ଯ୍ୟାଳୟର ସମସ୍ତ ଦାୟିତ୍ୱ ତୁଲାଉଥିଲେ। ସାଧାରଣ ଜନତା ଏବଂ ଦଳୀୟ କର୍ମୀଙ୍କ ମଧ୍ୟରେ ଏହି ହତ୍ୟାକାଣ୍ଡକୁ ନେଇ ପ୍ରବଳ ଅସନ୍ତୋଷ ଦେଖାଦେଇଛି। ସେହିପରି ବିଜେପି ନେତା ସୁଭେନ୍ଦୁ ଅଧିକାରୀ ଏହାକୁ ଏକ ସୁଚିନ୍ତିତ ଷଡ଼ଯନ୍ତ୍ର ବୋଲି ବର୍ଣ୍ଣନା କରିବା ସହ ଦୋଷୀଙ୍କୁ କଠୋର ଦଣ୍ଡ ଦିଆଯିବ ବୋଲି ପ୍ରତିଶ୍ରୁତି ଦେଇ ଦଳୀୟ କର୍ମୀଙ୍କୁ ଶାନ୍ତି ବଜାୟ ରଖିବାକୁ ନିବେଦନ କରିଛନ୍ତି।

ଅନ୍ୟପକ୍ଷରେ, ଶାସକ ଦଳ ତୃଣମୂଳ କଂଗ୍ରେସ (TMC) ଏହି ଘଟଣାକୁ ଦୃଢ଼ ନିନ୍ଦା କରିଛି ଏବଂ ଏହାର ସିବିଆଇ (CBI) ତଦନ୍ତ ଦାବି କରିଛି। ଟିଏମସି ନିଜ ସୋସିଆଲ୍ ମିଡିଆ ହ୍ୟାଣ୍ଡେଲ୍ 'ଏକ୍ସ' (X) ରେ ଲେଖିଛି ଯେ, "ମଧ୍ୟମଗ୍ରାମରେ ଚନ୍ଦ୍ରନାଥ ରଥଙ୍କ ନୃଶଂସ ହତ୍ୟାକାଣ୍ଡକୁ ଆମେ କଡ଼ା ନିନ୍ଦା କରୁଛୁ।" ଏହା ସହ ଟିଏମସି ଅଭିଯୋଗ କରିଛି ଯେ ଗତ ତିନି ଦିନ ମଧ୍ୟରେ ଆଦର୍ଶ ଆଚରଣ ବିଧି ଲାଗୁ ହୋଇଥିଲେ ମଧ୍ୟ ବିଜେପି ସମର୍ଥିତ ଦୁର୍ବୃତ୍ତଙ୍କ ଦ୍ୱାରା ନିର୍ବାଚନ ପରବର୍ତ୍ତୀ ହିଂସାରେ ଅନ୍ୟ ତିନିଜଣ ଟିଏମସି କର୍ମୀଙ୍କୁ ମଧ୍ୟ ହତ୍ୟା କରାଯାଇଛି। ଏହି ଘଟଣାରେ କୋର୍ଟଙ୍କ ତତ୍ତ୍ୱାବଧାନରେ ସିବିଆଇ ତଦନ୍ତ ସହିତ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ଟିଏମସି ଦାବି କରିଛି।

ପଶ୍ଚିମବଙ୍ଗ: ପଶ୍ଚିମବଙ୍ଗ ବିଧାନସଭା ନିର୍ବାଚନ ୨୦୨୬ରେ ପରାଜୟର ସମ୍ମୁଖୀନ ହେବା ପରେ ବିଦାୟୀ ମୁଖ୍ୟମନ୍ତ୍ରୀ ମମତା ବାନାର୍ଜୀ ମଙ୍ଗଳବାର ଦିନ ଏକ ସାମ୍ବାଦିକ ସମ୍ମିଳନୀ କରିଛନ୍ତି। ସେ ଘୋଷଣା କରିଛନ୍ତି ଯେ ସେ ନିଜ ପଦରୁ ଇସ୍ତଫା ଦେବେ ନାହିଁ କିମ୍ବା ରାଜଭବନ ଯିବେ ନାହିଁ। ନିର୍ବାଚନରେ ବ୍ୟାପକ ଜାଲିଆତି ହୋଇଥିବା ଦାବି କରି ସେ ଭାରତୀୟ ଜନତା ପାର୍ଟି (ବିଜେପି) ଉପରେ ଇଭିଏମ୍ ଲୁଟିଥିବା ଏବଂ ତାଙ୍କ ସହ ଦୁର୍ବ୍ୟବହାର କରିଥିବା ଅଭିଯୋଗ ଆଣିଛନ୍ତି। 'ଦିଦି' କହିଛନ୍ତି ଯେ ତୃଣମୂଳ କଂଗ୍ରେସ (ଟିଏମସି) ଏବଂ ଇଣ୍ଡିଆ ମେଣ୍ଟର ଅନ୍ୟ ନେତାମାନେ ତାଙ୍କ ସହ ଦୃଢ଼ ଭାବରେ ଠିଆ ହୋଇଛନ୍ତି।

ମୁଖ୍ୟ ନିର୍ବାଚନ କମିଶନରଙ୍କୁ କଡ଼ା ସମାଲୋଚନା କରି ମମତା କହିଛନ୍ତି ଯେ ସେ ଏହି ନିର୍ବାଚନର ଖଳନାୟକ ସାଜିଛନ୍ତି। ଭୋଟ୍ ସରିବା ପରେ ବି ଇଭିଏମରେ ୮୦-୯୦% ଚାର୍ଜ କିପରି ରହିପାରିବ ବୋଲି ସେ ପ୍ରଶ୍ନ କରିଛନ୍ତି। ତାଙ୍କ ଅଭିଯୋଗ ଅନୁଯାୟୀ, ନିର୍ବାଚନର ଦୁଇ ଦିନ ପୂର୍ବରୁ ଟିଏମସି କର୍ମୀଙ୍କୁ ଗିରଫ କରାଯାଇଥିଲା ଏବଂ ଚଢ଼ାଉ କରାଯାଇଥିଲା। ବହୁ ଆଇଏଏସ (IAS) ଓ ଆଇପିଏସ (IPS) ଅଧିକାରୀଙ୍କୁ ବଦଳାଇ ଦିଆଯାଇଥିଲା। ସେ ଆହୁରି ମଧ୍ୟ କହିଛନ୍ତି ଯେ ପ୍ରଧାନମନ୍ତ୍ରୀ ଏବଂ ଗୃହମନ୍ତ୍ରୀ ଏହି ପ୍ରକ୍ରିୟାରେ ସିଧାସଳଖ ହସ୍ତକ୍ଷେପ କରିଛନ୍ତି ଏବଂ ୯୦ ଲକ୍ଷ ଲୋକଙ୍କ ନାମ ଭୋଟର ତାଲିକାରୁ କାଟି ଦିଆଯାଇଥିଲା, ଯଦିଓ କୋର୍ଟଙ୍କ ହସ୍ତକ୍ଷେପ ପରେ ୩୨ ଲକ୍ଷ ନାମ ପୁଣି ସାମିଲ କରାଯାଇଥିଲା।

ବର୍ତ୍ତମାନ ତାଙ୍କ ପାଖରେ କୌଣସି ପଦବୀ ନାହିଁ ଏବଂ ସେ ଜଣେ ସାଧାରଣ ନାଗରିକ ବୋଲି ମମତା ବାନାର୍ଜୀ ପ୍ରକାଶ କରିଛନ୍ତି। ସେ କହିଛନ୍ତି, "ମୁଁ ଏବେ ଏକ 'ମୁକ୍ତ ପକ୍ଷୀ' (ଫ୍ରି ବାର୍ଡ)। ମୁଁ ମୋର ସମଗ୍ର ଜୀବନ ଲୋକଙ୍କ ସେବାରେ ଉତ୍ସର୍ଗ କରିଛି। ଗତ ୧୫ ବର୍ଷ ମଧ୍ୟରେ ମୁଁ କେବେହେଲେ ଗୋଟିଏ ପଇସା ପେନସନ୍ କିମ୍ବା ଦରମା ନେଇନାହିଁ। ତେଣୁ ଏବେ ମୁଁ କିଛି ନୂଆ କାମ କରିବି।" ତାଙ୍କର ପରବର୍ତ୍ତୀ ଲକ୍ଷ୍ୟ ଅତି ସ୍ପଷ୍ଟ, ସେ ଖୁବ୍ ଶୀଘ୍ର ଇଣ୍ଡିଆ ମେଣ୍ଟକୁ ଆହୁରି ମଜବୁତ କରିବା ଦିଗରେ କାର୍ଯ୍ୟ ଆରମ୍ଭ କରିବେ ବୋଲି ସ୍ପଷ୍ଟ କରିଛନ୍ତି।

ପଶ୍ଚିମବଙ୍ଗର ଦକ୍ଷିଣ ୨୪ ପରଗନା ଜିଲ୍ଲାର ଏକ ସରକାରୀ ଡାକ୍ତରଖାନାରୁ ବିପୁଳ ପରିମାଣର ନଗଦ ଟଙ୍କା, ସୁନା ଏବଂ ଗୁରୁତ୍ୱପୂର୍ଣ୍ଣ ଜମିଜମା କାଗଜପତ୍ର ଜବତ ହେବା ପରେ ରାଜ୍ୟରେ ଚାଞ୍ଚଲ୍ୟ ଖେଳିଯାଇଛି। ସବୁଠାରୁ ଆଶ୍ଚର୍ଯ୍ୟର କଥା ହେଉଛି, ଏହି ସବୁ ସାମଗ୍ରୀ ଡାକ୍ତରଖାନାର ଅପରେସନ ଥିଏଟର (OT) ଭିତରୁ ଉଦ୍ଧାର କରାଯାଇଛି।

ଅପରେସନ ଥିଏଟରରେ ଲୁଚାଯାଇଥିଲା କଳାଧନ

ସୂଚନା ଅନୁଯାୟୀ, ସରକାରୀ ଡାକ୍ତରଖାନାର ଅପରେସନ ଥିଏଟର ଭିତରୁ ଏହି ବିପୁଳ ପରିମାଣର ନଗଦ ଅର୍ଥ ଓ ସୁନାଗହଣା ମିଳିଛି। ଏହା ସହିତ କିଛି ବେନାମୀ ଜମିର ଦଲିଲ ମଧ୍ୟ ଜବତ କରାଯାଇଛି। ଡାକ୍ତରଖାନା ଭଳି ଏକ ସମ୍ବେଦନଶୀଳ ସ୍ଥାନକୁ କଳାଧନ ଲୁଚାଇବା ପାଇଁ କିପରି ଏବଂ କାହା ନିର୍ଦ୍ଦେଶରେ ବ୍ୟବହାର କରାଯାଉଥିଲା, ତାହାକୁ ନେଇ ପ୍ରଶାସନ ଏବଂ ପୋଲିସ ପକ୍ଷରୁ ତଦନ୍ତ ଆରମ୍ଭ ହୋଇଛି।

ଟିଏମସି ଉପରେ ବର୍ଷିଲା ବିଜେପି

ଏହି ଘଟଣା ସାମ୍ନାକୁ ଆସିବା ପରେ ରାଜ୍ୟ ରାଜନୀତି ସରଗରମ ହୋଇପଡ଼ିଛି। ମୁଖ୍ୟ ବିରୋଧୀ ଦଳ ବିଜେପି (BJP) ଶାସକ ଦଳ ତୃଣମୂଳ କଂଗ୍ରେସ (TMC) ଉପରେ ସିଧାସଳଖ ନିଶାନା ସାଧିଛି। ବିଜେପି ଅଭିଯୋଗ କରିଛି ଯେ, ଟିଏମସି ନେତାମାନେ ନିଜର ଦୁର୍ନୀତିଗ୍ରସ୍ତ ଟଙ୍କା ଏବଂ ବେଆଇନ ସମ୍ପତ୍ତିକୁ ଲୁଚାଇବା ପାଇଁ ସରକାରୀ ଡାକ୍ତରଖାନାକୁ ସୁରକ୍ଷିତ ଆଶ୍ରୟସ୍ଥଳୀ ଭାବେ ବ୍ୟବହାର କରୁଛନ୍ତି। ଏହି ଘଟଣାର ଏକ ନିରପେକ୍ଷ ଏବଂ ଉଚ୍ଚସ୍ତରୀୟ ତଦନ୍ତ ପାଇଁ ବିଜେପି ପକ୍ଷରୁ ଦୃଢ଼ ଦାବି କରାଯାଇଛି।

ପଶ୍ଚିମବଙ୍ଗ: ପଶ୍ଚିମବଙ୍ଗ ବିଧାନସଭା ନିର୍ବାଚନ ୨୦୨୬ରେ ଭାରତୀୟ ଜନତା ପାର୍ଟି (ବିଜେପି) ଐତିହାସିକ ବିଜୟ ହାସଲ କରିବାକୁ ଯାଉଛି। ଭାରତୀୟ ନିର୍ବାଚନ ଆୟୋଗ (ECI)ର ସଦ୍ୟତମ ଟ୍ରେଣ୍ଡ ଅନୁଯାୟୀ, ୨୯୪ ଆସନ ବିଶିଷ୍ଟ ପଶ୍ଚିମବଙ୍ଗ ବିଧାନସଭାରେ ବିଜେପି ୧୮୧ଟି ଆସନରେ ଆଗୁଆ ରହି ବହୁମତ ହାସଲ କରିଛି (ବହୁମତ ସଂଖ୍ୟା ୧୪୮)।

ଏହି ଐତିହାସିକ ବିଜୟ ସହିତ ମମତା ବାନାର୍ଜୀଙ୍କ ନେତୃତ୍ୱାଧୀନ ତୃଣମୂଳ କଂଗ୍ରେସ (ଟିଏମସି)ର ୧୫ ବର୍ଷର ଶାସନର ଅନ୍ତ ଘଟିବାକୁ ଯାଉଛି। କ୍ରମାଗତ ତିନିଥର କ୍ଷମତାରେ ରହିବା ପରେ ଏଥର ଟିଏମସି ତିନି ଅଙ୍କ ଛୁଇଁବା ନେଇ ସଂଘର୍ଷ କରୁଥିବା ଦେଖିବାକୁ ମିଳିଛି। ଶାସନ ବିରୋଧୀ ହାୱା, ଆଇନଶୃଙ୍ଖଳା ପରିସ୍ଥିତି ଏବଂ ଅନୁପ୍ରବେଶ ପ୍ରସଙ୍ଗକୁ ମୁଦ୍ଦା କରି ବିଜେପି ଏହି ବିପୁଳ ସଫଳତା ପାଇଛି। ଏଥର ପଶ୍ଚିମବଙ୍ଗରେ ସ୍ୱାଧୀନତା ପରଠାରୁ ସର୍ବାଧିକ ଭୋଟ୍ ହାର ରେକର୍ଡ କରାଯାଇଛି (ପ୍ରଥମ ପର୍ଯ୍ୟାୟରେ ୯୩.୧୯% ଏବଂ ଦ୍ୱିତୀୟ ପର୍ଯ୍ୟାୟରେ ୯୧.୬୬%)।

ମୁଖ୍ୟମନ୍ତ୍ରୀ ପଦ ପାଇଁ ଦୌଡ଼ରେ ଅଛନ୍ତି କେଉଁ ନେତା?
ପଶ୍ଚିମବଙ୍ଗରେ ବିଜେପି ସରକାର ଗଢ଼ିବା ସ୍ପଷ୍ଟ ହେବା ପରେ ଏବେ ଦଳର ମୁଖ୍ୟମନ୍ତ୍ରୀ ଚେହେରା କିଏ ହେବେ, ତାହାକୁ ନେଇ ଚର୍ଚ୍ଚା ଜୋର୍ ଧରିଛି। ନିର୍ବାଚନ ପ୍ରଚାର ସମୟରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ସୂଚନା ଦେଇଥିଲେ ଯେ ବିଜେପି ଜିତିଲେ ଜଣେ ବଙ୍ଗୀୟ ଏବଂ ବଙ୍ଗଳା କହୁଥିବା ନେତାଙ୍କୁ ମୁଖ୍ୟମନ୍ତ୍ରୀ କରାଯିବ। ମୁଖ୍ୟମନ୍ତ୍ରୀ ଦୌଡ଼ରେ ଥିବା ପ୍ରମୁଖ ନେତାମାନେ ହେଲେ:

ଶୁଭେନ୍ଦୁ ଅଧିକାରୀ: ପୂର୍ବତନ ଟିଏମସି ନେତା ତଥା ବର୍ତ୍ତମାନର ବିଜେପି ନେତା ଶୁଭେନ୍ଦୁ ଅଧିକାରୀଙ୍କୁ ଜଣେ ଲୋକପ୍ରିୟ ଚେହେରା ଏବଂ ଦକ୍ଷିଣ ବଙ୍ଗର ଜଣେ ଶକ୍ତିଶାଳୀ ଜନନେତା ଭାବରେ ବିବେଚନା କରାଯାଏ।

ଦିଲୀପ ଘୋଷ: ପୂର୍ବତନ ରାଜ୍ୟ ବିଜେପି ସଭାପତି ତଥା ଦକ୍ଷ ସଂଗଠକ ଏବଂ ବାଗ୍ମୀ ନେତା ଦିଲୀପ ଘୋଷ ମଧ୍ୟ ଏହି ଦୌଡ଼ରେ ଆଗରେ ଅଛନ୍ତି। ସେହିପରି ମୁକୁଲ ରାୟ ଓ ରାହୁଲ ସିହ୍ନାଙ୍କ ନାମ ମଧ୍ୟ ଚର୍ଚ୍ଚାରେ ରହିଛି।

ରୂପା ଗାଙ୍ଗୁଲି: ସୋନାପୁର ଦକ୍ଷିଣରୁ ପ୍ରାର୍ଥୀ ତଥା ବିଜେପିର ପ୍ରମୁଖ ମହିଳା ଚେହେରା ରୂପା ଗାଙ୍ଗୁଲି। ସେ ବର୍ତ୍ତମାନ ଚାଲିଥିବା ନିର୍ବାଚନ ଗଣତିରେ ଆଗୁଆ ଅଛନ୍ତି ଏବଂ ତାଙ୍କୁ ମୁଖ୍ୟମନ୍ତ୍ରୀ ପଦର ଏକ ଶକ୍ତିଶାଳୀ ଦାବିଦାର ମନେ କରାଯାଉଛି।

ସମୀକ ଭଟ୍ଟାଚାର୍ଯ୍ୟ: ରାଜ୍ୟ ବିଜେପି ସଭାପତି ତଥା ବରିଷ୍ଠ ଆରଏସଏସ ନେତା ସମୀକ ଭଟ୍ଟାଚାର୍ଯ୍ୟ ମଧ୍ୟ ଦୌଡ଼ରେ ଅଛନ୍ତି। ୨୦୨୪ରୁ ରାଜ୍ୟସଭା ସାଂସଦ ଥିବା ସମୀକ, ରାଜ୍ୟରେ ବିଜେପି ସଂଗଠନକୁ ମଜବୁତ କରିବାରେ ପ୍ରମୁଖ ଭୂମିକା ଗ୍ରହଣ କରିଛନ୍ତି।

ନିଶୀଥ ପ୍ରାମାଣିକ: ଉତ୍ତର ବଙ୍ଗର ପ୍ରମୁଖ ଚେହେରା ଏବଂ ପୂର୍ବତନ କେନ୍ଦ୍ରମନ୍ତ୍ରୀ ନିଶୀଥ ପ୍ରାମାଣିକ, ଯିଏକି ବିଶେଷକରି କୁଚବିହାର ଅଞ୍ଚଳରେ ଦଳର ସ୍ଥିତି ମଜବୁତ କରିଛନ୍ତି। ସେ ଏବେ ମାଥାଭାଙ୍ଗାରୁ ନିର୍ବାଚନ ଲଢୁଛନ୍ତି।

ଅଗ୍ନିମିତ୍ରା ପଲ୍: ଆସାନସୋଲ ଦକ୍ଷିଣର ବିଧାୟିକା ତଥା ରାଜ୍ୟ ଉପାଧ୍ୟକ୍ଷା ଅଗ୍ନିମିତ୍ରା ପଲ୍। ଜଣେ ସକ୍ରିୟ ଏବଂ ସ୍ପଷ୍ଟବାଦୀ ମହିଳା ନେତ୍ରୀ ଭାବରେ ସେ ରାଜ୍ୟରେ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଛନ୍ତି।

ଅନ୍ତିମ ଫଳାଫଳ ଆସିବା ପରେ କେନ୍ଦ୍ରୀୟ ନେତୃତ୍ୱ ଏବଂ ନବନିର୍ବାଚିତ ବିଧାୟକଙ୍କ ସହିତ ଆଲୋଚନା କରି ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ମୁଖ୍ୟମନ୍ତ୍ରୀ ଚୟନ ନେଇ ଚୂଡ଼ାନ୍ତ ନିଷ୍ପତ୍ତି ନେବ। ଯଦି ଏହି ଟ୍ରେଣ୍ଡ୍ ଶେଷ ପର୍ଯ୍ୟନ୍ତ କାଏମ ରହେ, ତେବେ ଦଶନ୍ଧି ପରେ ପଶ୍ଚିମବଙ୍ଗ ପ୍ରଥମ ଥର ପାଇଁ ଏକ ଅଣ-ଟିଏମସି ଏବଂ ଅଣ-ବାମପନ୍ଥୀ ସରକାର ଦେଖିବାକୁ ଯାଉଛି।

ପଶ୍ଚିମବଙ୍ଗ: ପଶ୍ଚିମବଙ୍ଗ ବିଧାନସଭା ନିର୍ବାଚନ ୨୦୨୬ର ହାଇ-ଭୋଲଟେଜ୍ ଲଢ଼େଇ ପରେ ଆଜି ସମସ୍ତଙ୍କ ନଜର ଭୋଟ୍ ଗଣତି ଉପରେ ରହିଛି । ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ନେତୃତ୍ୱାଧୀନ ତୃଣମୂଳ କଂଗ୍ରେସ (TMC) ଏବଂ ଭାରତୀୟ ଜନତା ପାର୍ଟି (BJP) ମଧ୍ୟରେ କଡା ମୁକାବିଲା ଦେଖିବାକୁ ମିଳୁଛି । ତେବେ ପ୍ରାଥମିକ ଭୋଟ୍ ଗଣତିରେ ପଶ୍ଚିମବଙ୍ଗରେ ବିଜେପି ୧୬୫ ଆସନରେ ଆଗୁଆ ଥିବାବେଳେ ଟିଏମସି ୧୨୩ ଆସନରେ ଆଗୁଆ ରହିଛି। ସେହିପରି ଅନ୍ୟଦଳ ୩ ଆସନରେ ଆଗୁଆ ରହିଛନ୍ତି। 

ଭାରତର ନିର୍ବାଚନ ଆୟୋଗ (ECI) ଅନୁଯାୟୀ, ସ୍ୱାଧୀନତା ପରେ ପଶ୍ଚିମବଙ୍ଗରେ ଏଥର ସର୍ବାଧିକ ମତଦାନ ରେକର୍ଡ କରାଯାଇଛି । ବର୍ତ୍ତମାନ ସମସ୍ତଙ୍କ ଦୃଷ୍ଟି ଏହି ଫଳାଫଳ ଉପରେ, ଯାହା ରାଜ୍ୟର ରାଜନୈତିକ ଭବିଷ୍ୟତ ନିର୍ଦ୍ଧାରଣ କରିବ । ସବୁଠାରୁ ବଡ଼ ପ୍ରଶ୍ନ ହେଉଛି, ମମତା ବାନାର୍ଜୀ ନିଜର 15 ବର୍ଷର ଶାସନକୁ ବଜାୟ ରଖିବାରେ ସଫଳ ହେବେ ନା ବିଜେପି ତାଙ୍କୁ କ୍ଷମତାରୁ ହଟାଇବାରେ ସକ୍ଷମ ହେବ?

ରାଜ୍ୟରେ ମୋଟ 294 ଟି ବିଧାନସଭା ଆସନ ଥିବାବେଳେ ଆଜି କେବଳ 293 ଟି ଆସନର ଭୋଟ୍ ଗଣତି କରାଯିବ । ଦକ୍ଷିଣ 24 ପ୍ରଗଣା ଜିଲ୍ଲାର ଫଲ୍‌ତା (Falta) ବିଧାନସଭା କ୍ଷେତ୍ରରେ ମେ 21 ତାରିଖରେ ସାନି ମତଦାନ କରାଯିବା ନେଇ ନିର୍ବାଚନ ଆୟୋଗ ଘୋଷଣା କରିଛନ୍ତି । ଏହି ଆସନର ଫଳାଫଳ ମେ 24 ରେ ପ୍ରକାଶ ପାଇବ । 

ପଶ୍ଚିମବଙ୍ଗ ସମେତ ଆଜି ଦେଶର ଅନ୍ୟ କେତେକ ରାଜ୍ୟରେ ମଧ୍ୟ ଭୋଟ୍ ଗଣତି ଚାଲିଛି । ଏଥିରେ ତାମିଲନାଡୁ, କେରଳ, ଆସାମ ଏବଂ କେନ୍ଦ୍ରଶାସିତ ଅଞ୍ଚଳ ପୁଡୁଚେରୀ ସାମିଲ ରହିଛି ।