ଭୁବନେଶ୍ୱର: ମଙ୍ଗଳବାର ମଧ୍ୟରାତ୍ରିରେ ଶେଷ ହୋଇଛି ବିଧାନସଭାର ବଜେଟ୍‌ ଅଧିବେଶନ । ନିର୍ଦ୍ଧାରିତ ୫ଟିି କାର୍ଯ୍ୟ ଦିବସ ପୂର୍ବରୁ ବାଚସ୍ପତି ସୁରମା ପାଢୀ ଗୃହକୁ ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ ଘୋଷଣା କରିଛନ୍ତି। ଶେଷ ଦିନରେ ଦୀର୍ଘ ତର୍କବିତର୍କ ପରେ ଓଡ଼ିଶାର ସମସ୍ତ ସରକାରୀ ବିଶ୍ୱବିଦ୍ୟାଳୟ ଶିକ୍ଷକ (କ୍ୟାଡର ସଂରକ୍ଷଣ) ବିଧେୟକ-୨୦୨୬ ପାରିତ ହୋଇଛି। ଅନୁରୂପ ଭାବରେ ମନ୍ତ୍ରୀ, ବାଚସ୍ପତି, ଉପବାଚସ୍ପତି, ବିଧାୟକଙ୍କ ଦରମା ଓ ଭତ୍ତା, ପୂର୍ବତନ ବିଧାୟକମାନଙ୍କ ପେନସନ ବୃଦ୍ଧି ସଂକ୍ରାନ୍ତ  ୪ଟି ବିଲକୁ ସରକାର ପ୍ରତ୍ୟାହାର କରିନେଇଛନ୍ତି। 

ମଙ୍ଗଳବାର ବ୍ୟୟ ମଞ୍ଜୁରୀ ବିଲ୍‌ ପାରିତ ପରେ  ଗୃହରେ ଉପସ୍ଥାପିତ ହୋଇଥିବା ଓଡ଼ିଶାର ସମସ୍ତ ସରକାରୀ ବିଶ୍ୱବିଦ୍ୟାଳୟ ଶିକ୍ଷକ (କ୍ୟାଡର ସଂରକ୍ଷଣ) ବିଧେୟକ-୨୦୨୬ ଉପରେ ଦୀର୍ଘ ଆଲୋଚନା ଆରମ୍ଭ ହୋଇଥିଲା। ରାତି ପ୍ରାୟ ସାଢେ ୧୨ ପର୍ଯ୍ୟନ୍ତ ଏହି ବିଲ୍‌ ଉପରେ ସରଗରମ ଆଲୋଚନା ହୋଇଥିଲା। ଉଭୟ ଶାସକ ଓ ବିରୋଧୀ ସଦସ୍ୟମାନେ ଏହି ବିଲ୍‌ ଉପରେ ଆଲୋଚନା କରିବା ପରେ ଧ୍ୱନୀମତରେ ଗୃହର ଅନୁମୋଦନ ଲାଭ କରିଛି। ଏହାପରେ ବାଚସ୍ପତି ଗୃହକୁ ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ ଘୋଷଣା କରିଛନ୍ତି।

ଭୁବନେଶ୍ୱର: ହାତୀ ମଣିଷ ଲଢେ଼ଇରେ ଗଡୁଛି ମଣିଷ ମୁଣ୍ଡ । ତିନି ବର୍ଷରେ ହାତୀ ଆକ୍ରମଣରେ ଗଲାଣି ୪୪୩ ଜଣଙ୍କ ଜୀବନ । ୫୧ଟି ବନଖଣ୍ଡରେ ଏହି ମୃତ୍ୟୁ ସଂଖ୍ୟା ସାମ୍ନାକୁ ଆସିଛି । ସର୍ବାଧିକ ଢେଙ୍କାନାଳ ବନଖଣ୍ଡରେ ୯୧ ଜଣଙ୍କ ଜୀବନ ଯାଇଛି । ସେହିପରି ୫୫୮୭ଟି ଘର ଆଂଶିକ ଭାଙ୍ଗିଥିବା ବେଳେ ୧୦୫୦ ଘର ସମ୍ପୂର୍ଣ୍ଣ ନଷ୍ଟ ହୋଇଛି । ବାରିପଦା ବନଖଣ୍ଡ ଅଞ୍ଚଳରେ ସର୍ବାଧିକ ୧୩୨୬ଟି ଘର ଆଂଶିକ ନଷ୍ଟ ହୋଇଥିବା ବେଳେ କେନ୍ଦୁଝରରେ ୧୫୪ଟି ଘର ସମ୍ପୂର୍ଣ୍ଣ ନଷ୍ଟ ହୋଇଛି । ହାତୀଙ୍କ ପାଇଁ ୪୭ ହଜାର ୪୯୯.୧୨ ଏକର ଫସଲ ନଷ୍ଟ ହୋଇଛି । ଏନେଇ ବିଧାନସଭାରେ ଲିଖିତ ଉତ୍ତର ରଖିଛନ୍ତି ଜଙ୍ଗଲ ଓ ପରିବେଶ ବିଭାଗ ମନ୍ତ୍ରୀ ଗଣେଶ ରାମ ସିଂ ଖୁଣ୍ଟିଆ । 

ସେହିପରି ଗତ ତିନି ବର୍ଷରେ ରାଜ୍ୟରେ ୨୬୪ଟି ହାତୀଙ୍କ ମୃତ୍ୟୁ ଘଟିଥିବା ବେଳେ ୧୩୨ଟି ପ୍ରାକୃତିକ କାରଣ ଦ୍ୱାରା ଏବଂ ୧୩୨ଟି ହାତୀ ଅପ୍ରାକୃତିକ କାରଣରୁ ପ୍ରାଣ ହରାଇଛନ୍ତି । ସେହି ସମୟ ମଧ୍ୟରେ ୪ଟି ମହାବଳ ବାଘ, ୨୫ଟି କଲରା ପତରିଆ ବାଘ, ୧୪୨୬ଟି ଅନ୍ୟାନ୍ୟ ବନ୍ୟଜନ୍ତୁଙ୍କ ମୃତ୍ୟୁ ହୋଇଛି । ସେଥିରୁ କେବଳ ଶିକାରୀଙ୍କ ଦ୍ୱାରା ୪୪୭ ବନ୍ୟଜନ୍ତୁଙ୍କ ମୃତ୍ୟୁ ହୋଇଛି ବୋଲି ମନ୍ତ୍ରୀ କହିଛନ୍ତି । 

ସେହିପରି ହାତୀ ଓ ଅନ୍ୟାନ୍ୟ ବନ୍ୟଜନ୍ତୁଙ୍କ ଦ୍ଵାରା ୫୨୩ ଜଣଙ୍କ ଜୀବନ ଯାଇଥିବା ବେଳେ ୧୩୯୧ ଜଣ ଆହତ ହୋଇଛନ୍ତି । ବନ୍ୟଜନ୍ତୁ ଶିକାର ଅଭିଯୋଗରେ ୩୦୭୪ ଜଣ ଶିକାରୀ ଗିରଫ ହୋଇଛନ୍ତି । ହାତୀଙ୍କ ଗୀତିବିଧି ଉପରେ ନଜର ରଖିବା ପାଇଁ ବିଭିନ୍ନ ବନ ଖଣ୍ଡରେ ୧୪୨୦ ଗୋଟି ପ୍ରାକ ସତର୍କତା ବ୍ୟବସ୍ଥା ଲାଗୁ କରାଯାଇଛି ।

ଭୁବନେଶ୍ୱର: ବିଧାନସଭା ଆରମ୍ଭରୁ ଗୃହରେ ବିଜୁ ଝଡ଼ । ଭାରତର ବରପୁତ୍ର ବିଜୁ ବାବୁଙ୍କ ଉପରେ ବିଜେପି ସାଂସଦ ନିଶିକାନ୍ତ ଦୁବେ ଦେଇଥିବା ବିଭ୍ରାନ୍ତିକର ମନ୍ତବ୍ୟକୁ ନେଇ ଗୃହ ମଧ୍ୟରେ ବିରୋଧୀ ସଦସ୍ୟଙ୍କ ପ୍ରବଳ ହଟ୍ଟଗୋଳ । ଉଭୟ ବିଜେଡି ଓ କଂଗ୍ରେସ ଗୃହର ମଧ୍ୟଭାଗକୁ ଆସି ପ୍ରତିବାଦ କରିବା ସହ ନାରାବାଜି କରିଥିଲେ । ‘ବିଜୁ ବାବୁଙ୍କୁ ଅପମାନ ଚଳିବ ନାହିଁ’ । 'ବିଜୁ ବାବୁ ଅମର ରହେ' ନାରା ଦେବା ସହ ଓଡ଼ିଆ ଅସ୍ମିତା କୁଆଡେ ଗଲା ପ୍ରଶ୍ନ କରିଛି ବିଜେଡି । ବିରୋଧୀଙ୍କ ନାରାବାଜି ଏବଂ ହଟ୍ଟଗୋଳ ଯୋଗୁ ଗୃହ ମୁଲତବୀ କଲେ ବାଚସ୍ପତି । 

ଭୁବନେଶ୍ୱର: ବିଧାନସଭାରେ ଉପସ୍ଥାପିତ ହେଲା ଗୃହ ବିଭାଗର ଶ୍ୱେତପତ୍ର । ୨୦୨୫ରେ ରାଜ୍ୟର ଅପରାଧିକ ସ୍ଥିତି ନେଇ ଏହି ଶ୍ବେତ ପତ୍ର ପ୍ରକାଶ ପାଇଛି । ତେବେ ୨୦୨୪ ତୁଳନାରେ ୨୦୨୫ରେ ଧର୍ତ୍ତବ୍ୟ ଅପରାଧ ସଂଖ୍ୟା ବୃଦ୍ଧି ପାଇଛି ବୋଲି ଜଣାପଡିଛି । ସରକାରୀ ତଥ୍ୟ ହିସାବରେ ୨୦୨୫ରେ ଧର୍ତ୍ତବ୍ୟ ଅପରାଧରେ ୭.୩୬% ବୃଦ୍ଧି ପାଇଥିବା ଶ୍ୱେତପତ୍ରରେ ପ୍ରକାଶ ପାଇଛି । ଚୋରି, ଡକାୟତି ସାଙ୍ଗକୁ ମହିଳା ଦୁଷ୍କର୍ମ ଘଟଣା ପ୍ରତିବର୍ଷ ବଢ଼ିବାରେ ଲାଗିଛି । ମହିଳାଙ୍କ ପ୍ରତି ଦୁଷ୍କର୍ମ ଘଟଣା ଚିନ୍ତାଜନକ ସ୍ଥିତିରେ ରହିଛି । ୨୦୨୪ରେ ୨ ଲକ୍ଷ ୧୪ ହଜାର ୧୧୩ ଅପରାଧ ହୋଇଥିଲା। ସେହିପରି ୨୦୨୫ରେ ଏହି ସଂଖ୍ୟା ୨ ଲକ୍ଷ ୨୯ ହଜାର ୮୮୧କୁ ବୃଦ୍ଧି ପାଇଛି। ଆଇନ ଶୃଙ୍ଖଳା ଦୃଷ୍ଟିରୁ ବାଲେଶ୍ବର ଜିଲ୍ଲା ସବୁଠୁ ସମ୍ବେଦନଶୀଳ । ଦେଶର ମିଜାଇଲ ଜିଲ୍ଲା ଭାବେ ପରିଚିତ ଏହି ଉପକୂଳ ଜିଲ୍ଲା ହତ୍ୟା, ଡକାୟତି ଓ ଦୁଷ୍କର୍ମରେ ରେକର୍ଡ କରିଛି । 

୨୦୨୪ ନିର୍ବାଚନୀ ବର୍ଷ ତୁଳନାରେ ୨୦୨୫ରେ ଅଧିକ ସଂଖ୍ୟାରେ ହତ୍ୟାକାଣ୍ଡ, ଚୋରୀ ଓ ମୋଟରଯାନ ଦୁର୍ଘଟଣା ଘଟିଛି । ୨୦୨୪ରେ ରାଜ୍ୟର ବିଭିନ୍ନ ଥାନାରେ ୧୨୫୮ ହତ୍ୟା, ୧୭ ହଜାର ୮୦୫ ଚୋରୀ ଓ ୧୨ହଜାର ୩୭୫ ମୋଟରଜାନ ଦୁର୍ଘଟଣା ମାମଲା ପଞ୍ଜିକୃତ ହୋଇଥିଲା । ୨୦୨୫ରେ ୧୩୦୪ ହତ୍ୟା, ୨୧ହଜାର ୧୯୨ ଚୋରୀ ଓ ୧୨ହଜାର ୭୮୨ ମୋଟରଜାନ ଦୁର୍ଘଟଣା ମାମଲା ପଞ୍ଜୀକୃତ ହୋଇଛି । ସେହିଭଳି ୨୦୨୫ରେ ୩୫୨ ଡକାୟତି, ୧୮୦୨ ଲୁଟ ଓ ୧୦୯୫ ଦଙ୍ଗା ହୋଇଛି ।

ଭୁବନେଶ୍ୱର: ବିଧାନସଭା ପ୍ରଶ୍ନକାଳ ଆରମ୍ଭରୁ ବିରୋଧୀଙ୍କ ପ୍ରବଳ ହଟ୍ଟଗୋଳ । କଳା ଟି-ସାର୍ଟ ପିନ୍ଧି ବିରୋଧୀ ବିଧାୟକଙ୍କ ନାରାବାଜି । ଏସସିବି ଅଗ୍ନିକାଣ୍ଡ ଘଟଣାକୁ ନେଇ ବିରୋଧୀ କରିଛନ୍ତି ଅଭିନବ ପ୍ରତିବାଦ। ଦୁର୍ବଳ ମୁଖ୍ୟମନ୍ତ୍ରୀ- ଶକ୍ତିଶାଳୀ ସ୍ଵାସ୍ଥ୍ୟ ମନ୍ତ୍ରୀ ଲେଖାଥିବା କଲା ଟି-ଶାର୍ଟ ପିନ୍ଧି ହୋହଲ୍ଲା କରିଛନ୍ତି ବିରୋଧୀ। ପ୍ରଶ୍ନକାଳ ଆରମ୍ଭରୁ ଗୃହ ମଧ୍ୟଭାଗକୁ ଆସି ବିରୋଧୀ କରିଛନ୍ତି ନାରାବାଜି। ହଟ୍ଟଗୋଳନ ହେବାରୁ ଗୃହକୁ ୧୧.୩୦ ଯାଏ ଗୃହ ମୁଲତବୀ ଘୋଷଣା କରିଥିଲେ ବାଚସ୍ପତି। କଟକ ଏସସିବି ମେଡିକାଲ ଅଗ୍ନିକାଣ୍ଡ ଘଟଣାରେ ସ୍ବାସ୍ଥ୍ୟମନ୍ତ୍ରୀ କାହିଁକି ଇସ୍ତଫା ନଦେବେ, ସେନେଇ ପ୍ରଶ୍ନ କରିଛନ୍ତି ବିରୋଧୀ।

ଭୁବନେଶ୍ୱର: ସ୍ୱାସ୍ଥ୍ୟମନ୍ତ୍ରୀଙ୍କ ଇସ୍ତଫା ଦାବିରେ ବିରୋଧୀ ଦଳ ଅଡ଼ି ବସିଛନ୍ତି। ଫଳରେ ଗୃହକାର୍ଯ୍ୟ ସ୍ୱାଭାବିକ ହୋଇପାରୁ ନାହିଁ। ଆଜି ମଧ୍ୟ ସମାନ ସ୍ଥିତି ସୃଷ୍ଟି ହୋଇଛି। ତେବେ ଗୃହ ଅଚଳାବସ୍ଥା ଭିତରେ ବିରୋଧୀ ଦଳ ନେତା ତଥା ବିଜେଡି ସଭାପତି ନବୀନ ପଟ୍ଟନାୟକଙ୍କ ପାଠଶାଳା ଚର୍ଚ୍ଚା ସୃଷ୍ଟି କରିଛି। ସାଧାରଣତଃ ଅଳ୍ପ କଥା କହୁଥିବା ଓ ସବୁବେଳେ ଗମ୍ଭୀର ରହୁଥିବା ନବୀନ ଗୃହ ମୁଲତବୀ ପରେ ମଧ୍ୟ ଗୃହ ଭିତରେ ଅନେକ ସମୟ ଧରି ବସି ରହିବା ଓ ଦଳର ବିଧାୟକମାନଙ୍କ ସହ ଦୀର୍ଘ ଆଲୋଚନା କରିବା ଦେଖିବାକୁ ମିଳିଥିଲା ।

ଆଜି ଶୂନ୍ୟକାଳରେ ହୋହଲ୍ଲା ଯୋଗୁଁ ବାଚସ୍ପତି ଗୃହକୁ ମୁଲତବୀ କରିଥିଲେ। ଏହାପରେ ବିଭିନ୍ନ ଦଳର ସଦସ୍ୟମାନେ ଗୃହ ବାହରକୁ ଚାଲି ଯାଇଥିଲେ। ତେବେ ବିଜେଡି ସଭାପତି ନବୀନ ପଟ୍ଟନାୟକ ନିଜ ଆସନରେ ବସି ରହିଥିଲେ। ଏହା ପରେ ଅନ୍ୟ ବିଧାୟକମାନେ ନବୀନଙ୍କ ଆସନ ନିକଟକୁ ଆସିଥିଲେ। ଧୀରେ ଧୀରେ ନବୀନ ବିଧାୟକମାନଙ୍କ ସହିତ କଥପୋକଥନ ଆରମ୍ଭ କରିଥିଲେ। ଏହି ଆଲୋଚନା ସମୟରେ ହାସ୍ୟରୋଳ ସ୍ଥିତି ମଧ୍ୟ ସୃଷ୍ଟି ହୋଇଥିଲା। ଦଳର ବିଧାୟକ ଓ ବିଧାୟିକାମାନଙ୍କୁ ଇତିହାସ ସମ୍ପର୍କିତ ବିଭିନ୍ନ ପ୍ରସଙ୍ଗରେ ବିସ୍ତୃତ ଭାବେ ନବୀନ ସୂଚନା ଦେଇଥିଲେ। ବରିଷ୍ଠ ଓ କନିଷ୍ଠ ବିଧାୟକମାନେ ଆଜ୍ଞାଧୀନ ଛାତ୍ରଛାତ୍ରୀଙ୍କ ପରି ଗଭୀର ଆଗ୍ରହରେ ନବୀନଙ୍କ କଥା ଶୁଣୁଥିବା ଦେଖାଯାଇଥିଲା। ଉପସ୍ଥିତ ବିଧାୟକମାନଙ୍କ ମଧ୍ୟରେ ବିଧାୟିକା ପ୍ରମିଳା ମଲ୍ଲିକ, ଗଣେଶ୍ୱର ବେହେରା, ସାରଦା ପ୍ରସନ୍ନ ଜେନା, ପ୍ରଦୀପ ଦିଶାରୀ, ଅଧିରାଜ ପାଣିଗ୍ରାହୀ, ବର୍ଷା ସିଂ ବରିହା, ଯୋଗେଶ ସିଂହ, ରୂପେଶ ପାଣିଗ୍ରାହୀ, ସୁଜାତା ସାହୁ, ସୁଦର୍ଶନ ହରିପାଲ, ଧ୍ରୁବ ସାହୁ, ରମେଶ ବେହେରା, ରୋମାଞ୍ଚ ରଞ୍ଜନ ବିଶ୍ୱାଳ ଓ ଗୌତମବୁଦ୍ଧ ଦାଶ ପ୍ରମୁଖ ନବୀନଙ୍କ ସିଟ୍‌ ପାଖରେ ଛିଡା ହୋଇ ତାଙ୍କ କଥାକୁ ଧ୍ୟାନର ସହ ଶୁଣୁଥିଲେ। ପ୍ରାୟ ୨୪ ମିନି୍‌ଟ୍‌ ଧରି ନବୀନ ଓ ବିଧାୟକମାନଙ୍କ ସହ ଏହି ଆଲୋଚନା ଚାଲିଥିଲା। 

ଏହି ଆଲୋଚନା ସମ୍ପର୍କରେ ସୂଚନା ଦେଇ ଗୌତମ ବୁଦ୍ଧ ଦାସ କହିଛନ୍ତି, ନବୀନ ପଟ୍ଟନାୟକ ଜଣେ ଅତ୍ୟନ୍ତ ଦରଦୀ ହୃଦୟର ମଣିଷ। ଆମେ ନୂଆ ବିଧାୟକ ହୋଇ ମଧ୍ୟ ସେ ଆମ ସହ ବହୁ ସମୟ କଟାଉଛନ୍ତି। ବିଭିନ୍ନ ବିଷୟରେ ଖୋଲା ଆଲୋଚନା କରୁଛନ୍ତି। ଆଜି ଗୃହ ମୁଲତବୀ ପରେ ଆମ ସହ ମନଖୋଲା ଆଲୋଚନା କଲେ। ଥଟ୍ଟା ମଜା କରି ହସାଇଲେ। ଏହାସହିତ ବର୍ତ୍ତମାନ ପାର୍ଟିରୁ ବାହାରି କିଛି ଲୋକ ବିଜୁ ଲିଗାସୀ କଥା କହୁଥିବା ପ୍ରସଙ୍ଗ ପଡ଼ିବାରୁ ନବୀନ ବାବୁ ହସିଲେ ଓ ବିଜୁ ଲିଗାସୀର ଇତିହାସ ସମ୍ପର୍କରେ ସମସ୍ତଙ୍କୁ ଜାଣିବାକୁ କହିଲେ। କିପରି ସେ ସମୟରେ ମଧ୍ୟ ବିଶ୍ୱାସଘାତକ କରାଯାଇଥିଲା, ସେ ସମ୍ପର୍କରେ ମଧ୍ୟ କିଛି ସୂଚନା ଦେଇଥିଲେ। 

ସେହିପରି ବିଧାୟକ ସାରଦା ପ୍ରସନ୍ନ ଜେନା କହିଛନ୍ତି, ନବୀନ ବାବୁ ଆଜି ଅତ୍ୟନ୍ତ ‘ଜଲି ମୁଡ୍‌’ରେ ଥିଲେ। ଆମ ମାନଙ୍କ ସହିତ ଦଳ ଗଠନଠାରୁ ଆରମ୍ଭ କରି ଦଳର ଜୟଯାତ୍ରା ବିଷୟରେ ଆଲୋଚନା କରିଥିଲେ। ଏହାସହିତ କେଉଁମାନେ ତାଙ୍କ ପଛରୁ ଛୁରିକାଘାତ କରୁଛନ୍ତି, ସେ ବିଷୟରେ କହିଥିଲେ। ବିଧାୟକ ରୋମାଞ୍ଚ ରଞ୍ଜନ ବିଶ୍ୱାଳ କହିଛନ୍ତି, ନବୀନ ବାବୁ ଦଳ ଗଠନର ପୂର୍ବ କଥା କହିଥିଲେ। ଆମେ ତାଙ୍କଠାରୁ ଅନେକ ପୁରୁଣା କଥା ଜାଣିଲୁ ବୋଲି ସେ କହିଛନ୍ତି।

ଭୁବନେଶ୍ୱର: ବର୍ଷକରେ ୩୨ହଜାର ମହିଳା ବିରୋଧୀ ହିଂସା । ଗୋଟିଏ ବର୍ଷରେ ୩୨ ହଜାର ୬୮୭ ମହିଳା ବିରୋଧୀ ହିଂସା ପଞ୍ଜିକୃତ ହୋଇଥିବା ନେଇ ଗୃହରେ ଲିଖିତ ଉତ୍ତର ରଖିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ୨୦୨୫ ମସିହାର ମହିଳା ବିରୋଧୀ ଅପରାଧର ତଥ୍ୟ ରଖିଛନ୍ତି ମୁଖ୍ୟମନ୍ତ୍ରୀ । ୭୩୭୮ ଜଣ ମହିଳାଙ୍କୁ ଅପହରଣ କରାଯାଇଥିବାବେଳେ  ୭୩୮୨ ଜଣଙ୍କୁ ଅସଦାଚରଣ କରାଯାଇଥିବା କେଶ ପଞ୍ଜିକୃତ ହୋଇଛି । ୧୧୮୩ଟି  ଯୌନ ନିର୍ଯ୍ୟାତନା, ୫୪୧୯ ଅଣ ଯୌତୁକ ଜନିତ ନିର୍ଯାତନା, ୪୩୬୧ ଯୌତୁକଜନିତ ନିର୍ଯାତନା ସାମିଲ ଅଛି । ୨୯୯୪ଟି  ଧର୍ଷଣ ମାମଲା ପଞ୍ଜିକୃତ ହୋଇଥିବାବେଳେ ରାଜ୍ୟରେ ଆଇନ ଶୃଙ୍ଖଳା ବ୍ୟବସ୍ଥା ନେଇ ପ୍ରଶ୍ନ ଉଠିଛି । 

ଭୁବନେଶ୍ୱର: ବିଧାନସଭା ପ୍ରଶ୍ନକାଳ ଆରମ୍ଭରୁ ବିରୋଧୀଙ୍କ ହୋହଲ୍ଲା । ସ୍ୱାସ୍ଥ୍ୟମନ୍ତ୍ରୀଙ୍କ ଇସ୍ତଫା ଦାବିରେ ଗୃହ ମଧ୍ୟ ଭାଗରେ ବିରୋଧୀ ସଦସ୍ୟଙ୍କ ହଟ୍ଟଗୋଳ ଓ ନାରାବାଜି । SCB ମେଡିକାଲରେ ନିଆଁ ଯୋଗୁଁ ରୋଗୀ ମୃତ୍ୟୁ ଘଟଣାରେ ସ୍ୱାସ୍ଥ୍ୟମନ୍ତ୍ରୀଙ୍କ ଇସ୍ତଫା ଦାବି କରୁଛନ୍ତି ବିରୋଧୀ ବିଜେଡି ଓ କଂଗ୍ରେସ । ଗୃହ ମଧ୍ୟ ଭାଗରେ ପୋଷ୍ଟର, ପ୍ଲାକାର୍ଡ ଧରି ପ୍ରତିବାଦ କରୁଛନ୍ତି ବିରୋଧୀ । ଗତକାଲି ଭଳି ଆଜି ମଧ୍ୟ ଗୃହରେ ଅଚଳାବସ୍ଥା ଦେଖା ଦେଇଛି । ଫଳରେ ଗୃହକୁ ମୁଲତବୀ କରିଖିଲେ ବାଚସ୍ପତି ।

ଭୁବନେଶ୍ୱର: SCB ଅଗ୍ନିକାଣ୍ଡକୁ ନେଇ ବିଧାନସଭା ଆରମ୍ଭରୁ ବିରୋଧୀଙ୍କ ନାରାବାଜି । ଏସସିବି ନିଆଁ ତାତିରେ ହୁଲୁସ୍ତୁଲୁ ଗୃହ । ପ୍ରତୀକାତ୍ମକ କୋକେଇ ଧରି ବୁଲିଲେ ବିରୋଧୀ। 'ରାମ ନାମ ସତ୍ୟ ହେ' ନାରାବାଜିରେ କମ୍ପିଲା ବିଧାନସଭା। ଆଜିର ଗୃହ କାର୍ଯ୍ୟ ଆରମ୍ଭ ହେବା ମାତ୍ର ମଧ୍ୟଭାଗକୁ ଆସି ହୋହାଲ୍ଲା ଏବଂ ନାରାବାଜି କରିଥିଲେ ବିରୋଧୀ କଂଗ୍ରେସ ଏବଂ ବିଜେଡି । ସ୍ୱାସ୍ଥ୍ୟମନ୍ତ୍ରୀଙ୍କ ଇସ୍ତଫା ଦାବିରେ ଅଡ଼ି ବସିଥିଲେ ବିରୋଧୀ । ଯେଉଁଥିପାଇଁ ସାଢ଼େ ୧୧ଟା ଯାଏ ଗୃହକୁ ମୁଲତବୀ ଘୋଷଣା କରିଥିଲେ ବାଚସ୍ପତି ସୁରମା ପାଢ଼ୀ । 

ବିଧାନସଭା ମୁଲତବୀ ପରେ ବି ଥମିନଥିଲା ବିରୋଧୀଙ୍କ ବିରୋଧ ପ୍ରଦର୍ଶନ । ଗୃହ ବାହାରେ ବିରୋଧୀ ସଦସ୍ୟମାନେ କୋକେଇ ଶୋଭାଯାତ୍ରା ଆରମ୍ଭ କରିଥିଲେ । ରାମ୍‌ ନାମ୍‌ ସତ୍ୟ ହେ ନାରାରେ କମ୍ପିଥିଲେ ବିଧାନସଭା ପରିସର  । ବିଜେଡି ସଦସ୍ୟମାନେ ପ୍ରତିକାତ୍ମକ କୋକେଇ କରି ବିରାଟ ଶୋଭାଯାତ୍ରା କରିଥିଲେ । 

ରାଜ୍ୟରେ ସ୍ଵାସ୍ଥ୍ୟ ବିଭାଗ ସମ୍ପୂର୍ଣ୍ଣ ଭୁଶୁଡ଼ି ଯାଇଥିବା ବିରୋଧୀ ଅଭିଯୋଗ କରିଛି। ଆୟୁଷ୍ମାନ ଯୋଜନା ନୁହେଁ ତ ଶ୍ମଶାନ ଯୋଜନା କହି ବିଜେଡି ବିଧାୟକ ଅରୁଣ ସାହୁ ସରକାରଙ୍କୁ କଟାକ୍ଷ କରିଛନ୍ତି। ସ୍ଵାସ୍ଥ୍ୟ ବିଭାଗ ଏବେ ଲୋକଙ୍କ ପାଇଁ ମରିଯାଇଛି ବୋଲି ବିରୋଧୀ ଅଭିଯୋଗ ଆଣିଛନ୍ତି।  

ଭୁବନେଶ୍ୱର: ଦକ୍ଷିଣରେ ଆନ୍ଧ୍ର କୋଟିଆ ମାଡ଼ି ବସିବାକୁ ଷଡ଼ଯନ୍ତ୍ର ଚଳାଇଛି। କୋଟିଆକୁ ନିଜ ଅଞ୍ଚଳ ବୋଲି ଦାବି କରୁଛି। ଉତ୍ତର ବାଲେଶ୍ୱରର ଭୋଗରାଇ ବ୍ଲକ୍‌ ଅଞ୍ଚଳରେ ସୁବର୍ଣ୍ଣରେଖା ନଦୀ ତଟ ଅଞ୍ଚଳକୁ ପଶ୍ଚିମବଙ୍ଗ ଦଖଲକୁ ବୋକୁ ଉଦ୍ୟମ କରୁଛି। ଓଡ଼ିଶା ଅଞ୍ଚଳରେ ସଡ଼କ ନିର୍ମାଣ କରୁଛି। ଏବେ ପଡେ଼ାଶୀ ଛତିଶଗଡ଼ ପଶ୍ଚିମ ଓଡ଼ିଶାର ଝାରସୁଗୁଡ଼ା ଜିଲ୍ଲାର ୩ କିଲୋମିଟର ରାସ୍ତା ଜବରଦଖଲ କରି ସାରିଛନ୍ତି। ମାତ୍ର ସରକାରଙ୍କ ନିଦ ଭାଙ୍ଗୁନାହିଁ, ଝାରସୁଗୁଡ଼ା ପ୍ରଶାସନ ମଧ୍ୟ ଏପରି ସ୍ପର୍ଶକାତର ପ୍ରସଙ୍ଗରେ ନିରବ ରହିଛି। ଯାହାକୁ ନେଇ ଗତକାଲି ଧାନସଭାରେ କ୍ଷୋଭ ପ୍ରକାଶ ସହ ସରକାରୀ ଅପାରଗତାକୁ ସମାଲୋଚନା କରିଛି ବିଜେଡି। ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ ବିଧାନସଭାର ଶୂନ୍ୟକାଳରେ ଏହି ପ୍ରସଙ୍ଗ ଉଠାଇବା ସହ ସରକାର ତୁରନ୍ତ ତତ୍ପରତା ପ୍ରକାଶ କରିବାକୁ ଦାବି କରିଛନ୍ତି।

ଶ୍ରୀ ଆଚାର୍ଯ୍ୟ କହିଛନ୍ତି ଯେ  ବହୁ ସଂଘର୍ଷ ପରେ ୧୯୩୬ ମସିହାରେ ସ୍ୱତନ୍ତ୍ର ଓଡ଼ିଶା ପ୍ରଦେଶ ଗଠନ ହୋଇଥିଲା। ୧୯୫୬ ମସିହା ସୀମା ନିର୍ଦ୍ଧାରଣ ସମୟରେ ଓଡ଼ିଶା ଅବହେଳାର ଶିକାର ହେଲା। ଖରସୁଅାଁ ଓ ଷଢେ଼ଇକଳା ଭଳି ବହୁ ଅଞ୍ଚଳ ଓଡ଼ିଶାରେ ରହିପାରିଲା ନାହିଁ। ଏହି ସମସ୍ୟା ସମାଧାନ ହୋଇନାହିଁ। ମାତ୍ର ଏହି ମୟରେ  ଓଡ଼ିଶାକୁ ବିକଳାଙ୍ଗ କରିବାକୁ  ପୁଣି ଆରମ୍ଭ ହୋଇଛି। ଆନ୍ଧ୍ର ପ୍ରଦେଶ ସରକାର କୋଟିଆରେ ବେଆଇନ ପ୍ରବେଶ କରୁଛନ୍ତି। ତାଙ୍କ ସରକାରଙ୍କର ମନ୍ତ୍ରୀମାନେ ସେଠାରେ ସଭା ସମିତି କରୁଛନ୍ତି। ପଞ୍ଚାୟତ ନିର୍ବାଚନ କରିବା ପାଇଁ ପ୍ରୟାସ କରୁଥିଲେ। ଏବେ ଛତିଶଗଡ଼ ମଧ୍ୟ ଏହି ଉଦ୍ୟମ ଆରମ୍ଭ କରିଛି। ଆମର ପଡେ଼ାଶୀ ଛତିଶଗଡ଼ ସହ ଝାରସୁଗୁଡ଼ା, ବରଗଡ଼ ଓ ଅନ୍ୟ ଜିଲ୍ଲାର ସୀମା ଲାଗି ରହିଛି। ଏବେ ଝାରସୁଗୁଡ଼ା ଜିଲ୍ଲାର କନକତୋରାରେ ଛତିଶଗଡ ସରକାର ବେଆଇନ ଅନୁପ୍ରବେଶ କରୁଛି। କନକତୋରା ଗାଁର ୩ କିଲୋମିଟର ରାସ୍ତାକୁ ଅକ୍ତିଆର କରାଯାଇଛି। କନକତୋରା-ଛତିଶଗଡ଼ର ଏକତାରା ପର୍ଯ୍ୟନ୍ତ ରାସ୍ତା ରହିଛି। ଏଠାରେ ଓଡ଼ିଶାର ପ୍ରାୟ ୩ କିମି ରାସ୍ତା ଅଛି। କନକତୋରା ଲୋକେ ୧୯୯୨-୯୩ରେ ନିଜ ଜମି ଦାନ କରିଥିଲେ। ଏହି ଦାନ ଜମିରେ ଓଡ଼ିଶା ସରକାର ରାସ୍ତା ନିର୍ମାଣ କରିଛନ୍ତି। ମାତ୍ର ସେହି ରାସ୍ତାରେ  ଏବେ ଛତିଶଗଡ଼ ଅନଧିକାର ପ୍ରବେଶ କରିଛି। ସେଠାରେ ଛତିଶଗଡ଼ ପ୍ରଶାସନ ପକ୍ଷରୁ ଗାଡ଼ି ଚେକିଂ କରାଯାଉଛି। ଧାନ ଗାଡ଼ିକୁ ମଧ୍ୟ ଅଟକାଯାଉଛି। 

ଏବେ ସେଠାରେ ୪ ଲେନ୍‌ ରାସ୍ତା ନିର୍ମାଣ ପାଇଁ ଛତିଶଗଡ଼ ସରକାର ଯୋଜନା କରୁଛନ୍ତି। ସ୍ଥାନୀୟ ଲୋକ ଏହାକୁ ବିରୋଧ କରୁଛନ୍ତି। ମାତ୍ର ଜିଲ୍ଲା ପ୍ରଶାସନ ଏହି ପ୍ରସଙ୍ଗରେ ସମ୍ପୂର୍ଣ୍ଣ ନିରବ ରହିଛି। ଓଡ଼ିଶା ସରକାର ଏହି ପ୍ରସଙ୍ଗରେ ତୁରନ୍ତ ତତ୍ପରତା ଦେଖାଇବା ଆବଶ୍ୟକତା ରହିଛି। ସେଠାରେ ଅନଧିକାର ପ୍ରବେଶକୁ ଅଟକାଯିବା ଦରକାର। ଉପ ମୁଖ୍ୟମନ୍ତ୍ରୀ ଗୃହରେ ଅଛନ୍ତି। ପ୍ରସଙ୍ଗରେ ସେ ହସ୍ତକ୍ଷେପ କରନ୍ତୁ ବୋଲି ଶ୍ରୀ ଆଚାର୍ଯ୍ୟ ନିବେଦନ କରିଛନ୍ତି। ଏହାସହିତ ବାଚସ୍ପତି ମଧ୍ୟ ଏହି ପ୍ରଙ୍ଗରେ ନିର୍ଦ୍ଦେଶ ଦିଅନ୍ତୁ ବୋଲି ଦାବି କରିବା ସହ ଏହା ସରକାରଙ୍କ ପାଇଁ ସତର୍କବାଣୀ ବୋଲି ଶ୍ରୀ ଆଚାର୍ଯ୍ୟ କରିଛନ୍ତି। ସରକାର ଯଦି ଏହି ପ୍ରସଙ୍ଗରେ ନିରବ ରୁହନ୍ତି, ତେବେ ଘାତକ ହେବ ବୋଲି ପ୍ରସନ୍ନ ଆଚାର୍ଯ୍ୟ ଚେତାଇଛନ୍ତି। 

ଭୁବନେଶ୍ୱର: ଗୃହରେ ଗ୍ୟାସ ତାତି । ଗ୍ୟାସ ଅଭାବକୁ ନେଇ ବିଧାନସଭା ଆରମ୍ଭରୁ ଗୃହରେ ବିରୋଧୀଙ୍କ ପ୍ରବଳ ହଟ୍ଟଗୋଳ। ଚାଲିପାରୁନି ବିଧାନସଭା ବଜେଟ ଅଧିବେଶନ ପ୍ରଶ୍ନକାଳ । ଗୃହ ମଧ୍ୟଭାଗରେ ପ୍ଲାକାର୍ଡ ଧରି ବିରୋଧୀ ସଦସ୍ୟଙ୍କ ହଙ୍ଗାମା ଓ ନାରାବାଜି ।  ଗୃହ କାର୍ଯ୍ୟ ଚାଲନପାରିବାରୁ ପୂର୍ବାହ୍ଣ ପ୍ରଥମେ ୧୧ଟା୩୦ ଯାଏ ଗୃହ ମୁଲତବି ରଖିଥିଲେ ବାଚସ୍ପତି ।  ପୁଣି ଦିନ ୧୨ ଟା ୧୦ ଯାଏ ଗୃହ ମୁଲତବି ରଖିଥିଲେ ବାଚସ୍ପତି ।  ଗୃହ ଆରମ୍ଭରୁ ହଟ୍ଟଗୋଳ କରୁଛନ୍ତି କଂଗ୍ରେସ ବିଧାୟକ । LPG ଗ୍ୟାସ ଅବ୍ୟବସ୍ଥl, ଗ୍ୟାସ ମିଳୁ ନଥିବାରୁ ଲୋକ ହନ୍ତସନ୍ତ ନେଇ ଗୃହରେ ହୋହାଲ୍ଲା କଲେ ବିରୋଧୀ । ମୁଖ୍ୟମନ୍ତ୍ରୀ ଆସି  ଗୃହରେ ବିବୃତି ରଖନ୍ତୁ ବୋଲି ଦାବି କଲେ ବିରୋଧୀ । 

ଭୁବନେଶ୍ୱର: ଚାଷୀଙ୍କୁ ଧାନ କ୍ୱିଣ୍ଟାଲ ପିଛା ୧୦୦ ଟଙ୍କା ବୋନସ ଦେବ ବୋଲି ବିଜେଡି ଘୋଷଣା କରିଥିଲେ ବି ତାହାକୁ କାର୍ଯ୍ୟକାରୀ କରିବାରେ ବାଧା ସୃଷ୍ଟି କରିଥିଲେ କେନ୍ଦ୍ର ସରକାର। ଓଡ଼ିଶା ସରକାରଙ୍କୁ କେନ୍ଦ୍ରର ବିଜେପି ସରକାର ଧମକ ଦେଇଥିଲେ। ରାଜ୍ୟ ସରକାର ବୋନସ ଦେଲେ ଏଫ୍‌ସିଆଇ ଓଡ଼ିଶାରୁ ଚାଉଳ ଉଠାଯିବ ନାହିଁ ବୋଲି ନାଲି ଆଖି ଦେଖାଇଥିଲେ।  ସେତେବେଳେ ଓଡିଶା ପ୍ରତି କେନ୍ଦ୍ରର ବିଜେପି ସରକାର ଯେଉଁ ଆଭିମୁଖ୍ୟ ପୋଷଣ କରିଥିଲା, ଏବେ କେରଳ ପରି ରାଜ୍ୟ ପ୍ରତି ସେହିପରି ଆଭିମୁଖ୍ୟ ଦେଖାଉଛି। ଧାନରେ ସବସିଡ଼ି ଦେଲେ ଏଫ୍‌ସିଆଇ ଚାଉଳ ଉଠାଇବ ନାହିଁ ବୋଲି ଚେତାବନୀ ଦେଇଛି। ଓଡ଼ିଶାରେ ଡ଼ବଲ ଇଞ୍ଜିନ୍‌ ସରକାର ବୋଧହୁଏ ଏ କଥା ହେଜି ନାହାନ୍ତି, ଆଜି ନ ହେଲେ ବି ଆସନ୍ତା କାଲି ଏପରି ନୋଟିସ ଓଡ଼ିଶାକୁ ଆସିବ । ଓଡ଼ିଶାରେ ବି ଚାଷୀଙ୍କୁ ୮୦୦ ଟଙ୍କା ରିଆତି ମିଳିବ ନାହିଁ।  ଆଠଶହ ଟଙ୍କିଆ ସବସିଡ଼ି କଥା କହି ବିଜେପି ନେତା ଓ ସରକାର ଯେଉଁ ବାହା ପିଟୁଛନ୍ତି, ସେତେବେଳେ ଏହାକୁ ନେଇ ମୁଣ୍ଡ ପିଟିବେ ବୋଲି ବିଧାନସଭାରେ ସରକାରଙ୍କୁ କଟାକ୍ଷ କରିଛନ୍ତି ବିଜେଡି ବିଧାୟକ ଦଳ ଉପନେତା ପ୍ରସନ୍ନ ଆଚାର୍ଯ୍ୟ ।

ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗର ଖର୍ଚ୍ଚ ଦାବି ଆଲୋଚନା ବେଳେ ଶ୍ରୀ ଆଚାର୍ଯ୍ୟ କହିଛନ୍ତି ଯେ ଚଳିତ ବର୍ଷ ଧାନ ପଞ୍ଜିକରଣରେ ଜଟିଳ ପ୍ରଣାଳୀ ଯୋଗୁଁ ଲକ୍ଷ ଲକ୍ଷ ଚାଷୀ ପଞ୍ଜିକରଣରୁ ବଞ୍ଚିିତ ହେଲେ। ଜଟିଳ ପ୍ରକ୍ରିୟା ସତ୍ତ୍ୱେ ଯେଉଁ ଚାଷୀ ପଞ୍ଜିକରଣ କରିଥିଲେ, ସେମାନଙ୍କ ମଧ୍ୟରୁ ଦେଢ଼ ଲକ୍ଷ ଚାଷୀଙ୍କୁ କାଟି ଦିଆଗଲା। ଲକ୍ଷ ଲକ୍ଷ ଚାଷୀ ଆନ୍ଦୋଳନକୁ ଓହ୍ଲାଇଲେ। ପରେ ଚାଷୀମାନଙ୍କର ୧୦୦କୁଇଣ୍ଟାଲ ଧାନ ଥିଲେ ବି ସରକାର ୫୦କୁଇଣ୍ଟାଲ ଧାନ ପାଇଁ ଟୋକନ ଦେଉଛନ୍ତି। ସରକାରୀ ବ୍ୟବସ୍ଥାରେ ଚାଷୀ ଆଜି ଯନ୍ତ୍ରଣାରେ ଅଛନ୍ତି। ଡାଳୁଅ ଚାଷ ଆରମ୍ଭ ହେଲାଣି। ହେଲେ ୩ମାସ ହେବ ରାଜ୍ୟ ସରକାର ଚାଷୀଙ୍କ ଧାନ କିଣିପାରୁନାହାନ୍ତି। ଚାଷୀ ମନ ନିଆଁରେ ସରକାର ଜଳିବେ ବୋଲି ଶ୍ରୀ ଆଚାର୍ଯ୍ୟ ଚେତାବନୀ ଦେଇଛନ୍ତି ।

ବିରୋଧୀଦଳ ଉପମୁଖ୍ୟ ସଚେତକ ପ୍ରତାପ କେଶରୀ ଦେବ ମଧ୍ୟ ସରକାରଙ୍କ ବଜେଟ୍‌କୁ ବିରୋଧ କରିବା ସହ ସରକାରଙ୍କ ଧାନ କିଣା ପ୍ରକ୍ରିୟାକୁ ସମାଲୋଚନା କରିଛନ୍ତି। ପଶ୍ଚିମ ଓଡ଼ିଶାରେ ଜାନୁଆରୀ ମାସ ଶେଷ ସୁଦ୍ଧା ଧାନ କିଣା ପ୍ରକ୍ରିୟା ଶେଷ ହୋଇଯାଏ। ହେଲେ ଚଳିତ ବର୍ଷ ଏବେ ବି ଧାନ କିଣା ଜାରି କରିଛି। ୨୦୦୨ ମସିହାରେ ମାତ୍ର ୬ ଲକ୍ଷ ମେଟ୍ରିକ ଟନ୍‌ ଧାନ ସଂଗ୍ରହ ହେଉଥିବା ବେଳେ ଏବେ ଏହା ୯୪ ଲକ୍ଷ ମେଟ୍ରିକ ଟନ୍‌ରେ ପହଞ୍ଚିଛି। ଚାଷୀଙ୍କ ମୁହଁରେ ହସ ଫୁଟିଛି। ଏ ସବୁ ରାତାରାତି ହୋଇଯାଇ ନାହିଁ। ସରକାର ଏବେ ଯେଉଁ ୮୦୦ ଟଙ୍କା ଇନପୁଟ ସହାୟତା ଦେଉଛନ୍ତି, ଏଥିପାଇଁ ୫ ବର୍ଷରେ ୩୦ ହଜାର କୋଟି ଟଙ୍କା ଖର୍ଚ୍ଚ କରିବାକୁ ପଡ଼ିବ। ଏହି ଅର୍ଥ କେଉଁଠୁ ଆସିବ ବୋଲି ଶ୍ରୀ ଦେବ ପ୍ରଶ୍ନ କରିଛନ୍ତି। ବିଜେଡି ବିଧାୟକ ଦିିବ୍ୟଶଙ୍କର ମିଶ୍ର ମଧ୍ୟ ଆଲୋଚନାରେ ଭାଗ ନେଇ ଓଡ଼ିଶା ୨୪ ବର୍ଷରେ ୧୨ ଗୁଣା ଅଧିକ ଧାନ ଉତ୍ପାଦନକ୍ଷମ ହୋଇଥିବା ବେଳେ ଏହି ସମୟରେ ୧୨ ଲକ୍ଷ ହେକ୍ଟରରୁ ୨୫ ଲକ୍ଷ ହକ୍ଟର ଚାଷ ଜମିକୁ ଜଳସେଚନ ବ୍ୟବସ୍ଥା କରାଯାଇଛି ବୋଲି କହିଛନ୍ତି। 

କଂଗ୍ରେସ ପକ୍ଷରୁ ବିଧାୟକ ଅଶୋକ ଦାସ ସରକାର ୮୦୦ ଟଙ୍କା ବଦଳରେ ୭୩୧ ଟଙ୍କା ଇନପୁଟ ସହାୟତା ଦେଇ ଚାଷୀଙ୍କୁ ଠକୁଛନ୍ତି ବୋଲି କହିଛନ୍ତି। ଏହାସହିତ ଚାଷୀଙ୍କୁ ସରକାର ଅଖା ଯୋଗାଇ ପାରୁ ନ ଥିବା ବେଳେ ୧୫ ଦିନ ଟୋକନ ଅବଧି ବୃଦ୍ଧି ସତ୍ତେ୍ୱ ଚାଷୀ ଧାନ ବିକ୍ରି କରିପାରୁ ନାହାନ୍ତି ବୋଲି କହିଛନ୍ତି। ତେଣୁ ବର୍ତ୍ତମାନ ସରକାରରେ ସବକା ସାଥ୍‌, ଦଳକା ବିକାଶ ଓ ଉପଭୋକ୍ତାଙ୍କ ସର୍ବନାଷ ହୋଇଛି ବୋଲି ଶ୍ରୀ ଦାସ କହିଛନ୍ତି। କଂଗ୍ରେସ ଦଳର ମଙ୍ଗୁ ଖିଲ ମଧ୍ୟ ସରକାରଙ୍କୁ ସମାଲୋଚନା କରିବା ସହ ଶାସକ ଦଳ ପକ୍ଷରୁ ସନ୍ତୋଷ ଖଟୁଆ, ପଦ୍ମଲୋଚନ ପଣ୍ଡା, ଅଶ୍ୱିନୀ କୁମାର ଷଡ଼ଙ୍ଗୀ ଓ ପୂର୍ଣ୍ଣଚନ୍ଦ୍ର ସେଠୀ ପ୍ରମୁଖ ସରକାରଙ୍କ ବଜେଟ ସପକ୍ଷରେ ମତ ରଖିଛନ୍ତି।