ଭୁବନେଶ୍ୱର: ଆଜି ‘ନନ୍ଦିଘୋଷ ଟିଭି’ର ୫ମ ସ୍ୱନକ୍ଷତ୍ର। ସ୍ଥାନୀୟ ସ୍ୱସ୍ତି ପ୍ରିମିୟମ ହୋଟେଲଠାରେ ଅନୁଷ୍ଠିତ ହେବାକୁ ଥିବା ଏହି କାର୍ଯ୍ୟକ୍ରମକୁ ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀଦଳ ନେତା ନବୀନ ପଟ୍ଟନାୟକ ଉଦ୍‌ଘାଟନ କରିବେ। ଏହି ଅବସରରେ ୫ଟି ପର୍ଯ୍ୟାୟରେ ‘ଏକ ରାଷ୍ଟ୍ର-ଏକ ନିର୍ବାଚନ’, ‘ବିତର୍କ: ୩୬ ପାଇଁ ବିକାଶ ନକ୍ସା’, ‘ହାସ୍ୟ ଅଭିନୟ: ଦିଗ୍‌ବଳୟ ଯାଏ’, ‘ନାରୀ: ନୁହେଁ ଦୁଇ ଅକ୍ଷର’, ୟୁଟ୍ୟୁବ୍‌: ରୋଜଗାରର ମାଧ୍ୟମ’ ଆଦି ପ୍ରସଙ୍ଗରେ ଆଲୋଚନା ହେବ। ରାଜନୈତିକ ପ୍ରସଙ୍ଗରେ ଅତିଥି ବକ୍ତା ରୂପେ ସି-ଭୋଟର ପ୍ରତିଷ୍ଠାତା ଯଶବନ୍ତ ଦେଶମୁଖ, ବିଶିଷ୍ଟ ଲେଖିକା ତଥା ରାଜ୍ୟସଭା ସାଂସଦ ଡ. ମହୁଆ ମାଜି ଯୋଗଦେବେ।

ସେହିପରି ଅନ୍ୟାନ୍ୟ ପ୍ରସଙ୍ଗରେ ଅନୁଷ୍ଠିତ ହେବାକୁଥିବା ପ୍ୟାନେଲ ଆଲୋଚନାରେ ବଲିଉଡ଼୍‌ ହାସ୍ୟ ଅଭିନେତା ବରୁଣ ଶର୍ମା, ସିୱାଇଏସ୍‌ଡି ସହ ପ୍ରତିଷ୍ଠାତା ଜଗଦାନନ୍ଦ, ପୂର୍ବତନ ମନ୍ତ୍ରୀ ପଞ୍ଚାନନ କାନୁନଗୋ, ବରିଷ୍ଠ ସାମ୍ବାଦିକ ଦିଲ୍ଲୀପ ବିଶୋୟୀ, ମେୟର ସୁଲୋଚନା ଦାସ, ଅଭିନେତ୍ରୀ ପୁଷ୍ପା ପଣ୍ଡା, ବିଧାୟିକା ସୋଫିଆ ଫିରଦୋଶ୍‌, ଡିଜିଟାଲ କ୍ରିଏଟର ସୁଧାଂଶୁ ଶେଖର ସାହୁ, ସୁଶ୍ରୀସଙ୍ଗୀତା ମିଶ୍ର, ସତ୍ୟନାରାୟଣ ଦାଶ ପ୍ରମୁଖ ଯୋଗଦେବାର କାର୍ଯ୍ୟକ୍ରମ ରହିଛି ।

ଭୁବନେଶ୍ବର: ସ୍ବପ୍ନର ଘର ପାଇଁ ସମସ୍ତଙ୍କ ଥାଏ ଇଚ୍ଛା । ଖାସ କରି ଭୁବନେଶ୍ବରରେ ଘରଟିଏ ପାଇଁ ସମସ୍ତେ ସ୍ବପ୍ନ ଦେଖିଥାନ୍ତି । ଚଣ୍ଡିଗଡ଼ ସିଟି ପରି ଗୋଟିଏ ପ୍ଲାନ ସିଟି ହୋଇଥିଲା ଭୁବନେଶ୍ବର । ମାତ୍ର ୪୦ ହଜାର ଲୋକଙ୍କ ପାଇଁ ସେତେବେଳେ ହୋଇଥିଲା ପ୍ଲାନ । ୟୁନିଟ୍ ୧ରୁ ୟୁନିଟ୍ ୯ ଯାଏଁ ହୋଇଥିଲା ସିଟିପ୍ଲାନ । ଏବେ ଏହାର କଳେବର ବଢି ୧୮୬ ବର୍ଗ କିଲୋମିଟରରେ ପହଞ୍ଚିଛି । ୧୫ ଲକ୍ଷ ଲୋକ ବଢିଛନ୍ତି । ଆଖପାଖ ପଞ୍ଚାୟତ ମଧ୍ଯ ଭୁବନେଶ୍ବର ସହ ମିଶି ସମସ୍ତ ସୁବିଧା ପାଇବାକୁ ଚାହୁଁଛନ୍ତି । ହେଲେ ଅନେକ ସମୟରେ ଠକି ଯାଉଛନ୍ତି । ଆଜି ନନ୍ଦିଘୋଷ ଟିଭି ପକ୍ଷରୁ ଆୟୋଜିତ ରିୟଲ ଇଷ୍ଟେଟ କନକ୍ଲେଭ ଓ ଆୱାର୍ଡରେ ମୁଖ୍ଯ ଅତିଥି ଭାବେ ଯୋଗଦେଇ ଏହା କହିଛନ୍ତି ଭୁବନେଶ୍ବର ମେୟର ସୁଲୋଚନା ଦାସ । ତେବେ ସାଧାରଣ ଲୋକ କିପରି ସୁବିଧା ପାଇବ ସେଥିପାଇଁ ବିଏମସି ସବୁବେଳେ ଚେଷ୍ଟା କରୁଛି ବୋଲି ସେ କହିଛନ୍ତି ।

କାର୍ଯ୍ଯକ୍ରମରେ ସାମିଲ ହୋଇ ଓରେରା ସଦସ୍ଯ ପ୍ରଦୀପ ବିଶ୍ବାଳ ନନ୍ଦିଘୋଷ ଟିଭିକୁ ଏପରି ଏକ କାର୍ଯ୍ଯକ୍ରମ ପାଇଁ ଧନ୍ଯବାଦ ଜଣାଇବା ସହ ଏ କ୍ଷେତ୍ରରେ ସରକାରଙ୍କ ଭୂମିକା ଅପରିହାର୍ଯ୍ଯ ବୋଲି ମତ ଦେଇଛନ୍ତି । ଏହାସହ ବିଲଡରମାନଙ୍କୁ ଏଥିକାଲ ବିଜନେସ ପାଇଁ ପରାମର୍ଶ ଦେଇଛନ୍ତି । ରିଏଲ ଇଷ୍ଟେଟ ସେକ୍ଟର ଆମ ଅର୍ଥନୀତିର ଏକ ମୁଖ୍ଯ ଅଂଶ । ୨୦୨୧ରେ ଏଥିରୁ ଆମ ସାମଗ୍ରୀର ଘରୋଇ ଉତ୍ପାଦନ ଡିଜିପିର ୭ ପ୍ରତିଶତ ଆସୁଥିଲା । ୨୦୨୫ ସୁଦ୍ଧା ଏହା ୧୩ ପ୍ରତିଶତ ଆଶା କରାଯାଉଥିବାବେଳେ ୨୦୩୦ ବେଳକୁ ଏହା ୧୫ ପ୍ରତିଶତରେ ପହଞ୍ଚିବ ବୋଲି କହିଛନ୍ତି ପ୍ରଦୀପ । କୃଷି ପରେ ନିଯୁକ୍ତି ସୁଯୋଗ ସୃଷ୍ଟି କରିବା ସହ ରିଏଲ ଇଷ୍ଟେଟ ଅଧିକ ଅନ୍ନ ସଂସ୍ଥାନ ଯୋଗାଉଛି । ତେବେ ଏହାକୁ ଯେପରି ପ୍ରାଧାନ୍ଯ ଦେବା କଥା ତାହା ଦିଆଯାଇ ପାରୁନାହିଁ । ଜମିଜମା ସମସ୍ଯା ଓ ସ୍ମାଲ ହୋଲଡିଂ ଯୋଗୁଁ ଓଡ଼ିଶାରେ ଏହି ଶିଳ୍ପ ପ୍ରଗତି କରିପାରୁ ନାହିଁ । ତେଣୁ ସରକାର ଯଦି ଏଥିପ୍ରତି ଦୃଷ୍ଟି ଦିଅନ୍ତେ ତେବେ ଏହା ଅଧିକ ଉନ୍ନତି ହୋଇପାରନ୍ତା ବୋଲି କହିଛନ୍ତି ପ୍ରଦୀପ ।

ରିଅଲ ଇଷ୍ଟେଟ କନକ୍ଲେଭ ଓ ଆୱାର୍ଡସର ପ୍ରଥମ ଅଧିବେଶନରେ ଟପିକ ଥିଲା ଓଡ଼ିଶା ରିଅଲ ଇଷ୍ଟେଟ ପ୍ରମିସେସ ପୋଟେନସିଆଲ ଆଣ୍ଡ ପ୍ରସ୍ପରିଟି । ଏହି ସେସନରେ ଭାଗ ନେଇ ନିଜର ମତ ରଖିଥିଲେ ଓରେରାର ସଦସ୍ଯ ପ୍ରଦୀପ ବିଶ୍ବାଳ, SPD କାର୍ଯ୍ଯନିର୍ବାହୀ ନିର୍ଦ୍ଦେଶକ ଚିରାଗ ଖଇତାନ, ବାରବାଟୀ କଟକ ବିଧାୟିକା ସୋଫିଆ ଫିରଦୌସ ଓ ଚାର୍ଟାର୍ଡ ଆକାଉଣ୍ଟାଣ୍ଟ ଏକେ ସାବତ ।

ଗୋଟିଏ ସହରର ପରିଚୟ ହେଉଛି ଏହାର ବିଲ୍ଡିଂ । ସିଙ୍ଗଲ ୱିଣ୍ଡୋ କ୍ଲିୟରାନ୍ସ ସିଷ୍ଟମ ଏହାକୁ ଅଧିକ ସହଜ କରିପାରିବ । ପ୍ରପର ମାଷ୍ଟର ପ୍ଲାନ ହେବା ଆବଶ୍ଯକ । ମୌଳିକ ସମସ୍ଯାର ସମାଧାନ ହେଲେ ଲୋକେ ଅଧିକ ସୁବିଧା ପାଇବେ ବୋଲି କହିଥିଲେ ବାରବାଟୀ କଟକ ବିଧାୟିକା ସୋଫିଆ ଫିରଦୌସ । ଏଥିପାଇଁ ସରକାର ଓ ରିୟଲ ଇଷ୍ଟେଟ ମଧ୍ଯରେ ତାଳମେଳ ଓ ନୀତି ନିର୍ଦ୍ଧାରଣ ଆବଶ୍ଯକ । ଇନଫ୍ରାଷ୍ଟ୍ରକ୍ଚରରେ ଉନ୍ନତି ହେଲେ ଭୁବନେଶ୍ବର ଉପରେ ଚାପ କମିବ ବୋଲି ସେ ମତ ରଖିଥିଲେ ।

ସେହିପରି ବିଲଡରର ମାନେ ବ୍ଯକ୍ତିଗତ କାମରୁ ବାହାରି ସାମୂହିକ ଚିନ୍ତା କଲେ ଏହି ସେକ୍ଟରକୁ ଏମଏସଏମଇର ମାନ୍ଯତା ମିଳିପାରିବ ବୋଲି କହିଥିଲେ ଓରେରାର ସଦସ୍ଯ ପ୍ରଦୀପ ବିଶ୍ବାଳ । ଏହାଦ୍ବାରା ପ୍ରାଇଭେଟ ଇନଭେଷ୍ଟମେଣ୍ଟ ବଢିବ, ଘର କଷ୍ଟ କମିବ, ରିୟଲ ଇଷ୍ଟେଟର ଭବିଷ୍ଯତ ଉଜ୍ବଳ ହେବ ବୋଲି ସେ ମତ ଦେଇଥିଲେ ।

ଓଡ଼ିଶାରେ ଆଫର୍ଡେବଲ ହାଉସ ସମ୍ଭବ କି ପ୍ରଶ୍ନର ଉତ୍ତର ଦେବାକୁ ଯାଇ ଚାର୍ଟାର୍ଡ ଆକାଉଣ୍ଟାଣ୍ଟ ଏକେ ସାବତ ଘରର କ୍ବାଲିଟିକୁ ମହତ୍ବପୂର୍ଣ୍ଣ ବୋଲି ମତ ଦେଇଥିଲେ । ଲୋକେ ବିଲଡରଙ୍କ ପରଚିୟ ଦେଖି ଘର କିଣନ୍ତି । ଇନଫ୍ରାଷ୍ଟ୍ରକ୍ଟର ଉନ୍ନତି ଓ ଟ୍ଯାକ୍ସ ବେନିଫିଟ ମିଳିଲେ ଏହା ଅଧିକ ଉନ୍ନତି ହେବ ବୋଲି ସେ ମତ ଦେଇଥିଲେ ।

ସେହିପରି ଭୁବନେଶ୍ବରରେ ଯେଉଁ ସୁବିଧା ମିଳୁଛି ତାହା ଅନ୍ଯ ସବୁ ସହରର ଅପେକ୍ଷା ଅଧିକ ସୁବିଧାଜନକ ବୋଲି କହିଥିଲେ SPD କାର୍ଯ୍ଯନିର୍ବାହୀ ନିର୍ଦ୍ଦେଶକ ଚିରାଗ ଖଇତାନ । ଏଠାରେ ସୁଲଭ ମୂଲ୍ଯରେ ଘର ମିଳିପାରୁଛି । ପୂର୍ବ ସରକାରଙ୍କ ପ୍ରୟାସରୁ ଏଠାରୁ କଞ୍ଚାମାଲ ମଧ୍ଯ ଅତି କମ ଦରରେ ମିଳି ପାରୁଛି ବୋଲି ସେ କହିଥିଲେ ।

କାର୍ଯ୍ଯକ୍ରମରେ ସାଂସଦ ମାନସ ରଞ୍ଜନ ମଙ୍ଗରାଜ, ସାଂସଦ ସୁଲତା ଦେଓ, ନନ୍ଦିଘୋଷ ଟିଭିର ସିଓଓ ଜବର ସିଂ ପନୱର, ମୁଖ୍ଯ ସମ୍ପାଦକ ଶିଶିର ଭଟ୍ଟମିଶ୍ର, ସକାଳର ସିଇଓ ସୁବ୍ରତ ଦାସ, ପ୍ରକାଶକ ଅମିତ ମଲ୍ଲିକଙ୍କ ସହ ରିୟଲ ଇଷ୍ଟେଟର ଅନେକ ବ୍ଯକ୍ତିତ୍ବ ସାମିଲ ହୋଇଥିଲେ । ଏହି ଅବସରରେ ସମସ୍ତଙ୍କୁ ସମ୍ମାନୀତ କରିଥିଲେ ନନ୍ଦିଘୋଷ ଟିଭିର ଅଧ୍ଯକ୍ଷ ତଥା ସାଂସଦ ମାନସ ରଞ୍ଜନ ମଙ୍ଗରାଜ । ଏହାପରେ ସାଂସଦ ସୁଲତା ଦେଓ, ବେଗୁନିଆ ବିଧାୟକ ପ୍ରଦୀପ ସାହୁ ଉପସ୍ଥିତ ରହି ରିୟଲ ଇଷ୍ଟେଟ କ୍ଷେତ୍ରରେ କୃତିତ୍ବ ଲାଗି କିଛି ପ୍ରତିଭାଙ୍କୁ ସମ୍ମାନିତ କରିଥିଲେ ।

ସମ୍ବଲପୁର: ସମ୍ବଲପୁରରେ ଆରମ୍ଭ ହୋଇଛି ଦୈନିକ ଖବରକାଗତ ‘ସକାଳ’ ଏବଂ ନନ୍ଦିଘୋଷ ଟିଭି ପକ୍ଷରୁ ଆୟୋଜିତ ସ୍ବତନ୍ତ୍ର କାର୍ଯ୍ୟକ୍ରମ ‘ଦହନା’ । ଯାହାର ବିଷୟ ବସ୍ତୁ ରହିଛି ‘ପ୍ରୟାସ ବିକାଶର ଏକ ନୂଆ ଅଧ୍ୟାୟ ପାଇଁ’ । ଯେଉଁଥିରେ ବିକାଶକୁ ଅଧିକ ତ୍ବରାନ୍ବିତ କରିବାକୁ ପ୍ରସ୍ତୁତ ହେଉଛି ରୋଡମ୍ୟାପ୍ । ଗୋଟିଏ ମଞ୍ଚରେ ଏକାଠି ହୋଉଛନ୍ତି ଅଭିଜ୍ଞ ରାଜନେତା, ସମାଜସେବୀ, ଅଭିନେତା, ଅଭିନେତ୍ରୀ ଓ ମାନ୍ୟଗଣ୍ୟ ବ୍ୟକ୍ତି ବିଶେଷ । ପଶ୍ଚିମାଞ୍ଚଳର ବିକାଶ ରଥକୁ ଆହୁରି ଆଗକୁ ନେବାକୁ ଚାଲିଛି ମାନସମନ୍ଥନ । ଗୋଷ୍ଠୀ ଓ ରାଜନୀତିରୁ ଊର୍ଦ୍ଧ୍ବକୁ ଉଠି ପ୍ରସ୍ତୁତ ହେବ ନୂଆ ବିକାଶର ନୀଳନକ୍ସା । ଅପରାହ୍ନରେ ମା’ ସମଲେଶ୍ବରୀଙ୍କ ବନ୍ଦନାରୁ କାର୍ଯ୍ୟକ୍ରମ ଆରମ୍ଭ ହୋଇଥିଲା ।

ପ୍ରଦୀପ ପ୍ରଜ୍ବଳନ କରି ଏହି କାର୍ଯ୍ୟକ୍ରମକୁ ଶୁଭାରମ୍ଭ କରିଥିଲେ ବରିଷ୍ଠ କଂଗ୍ରେସ ନେତା ନରସିଂହ ମିଶ୍ର, ସାଂସଦ ପ୍ରସନ୍ନ ଆଚାର୍ଯ୍ୟ ଓ ସୁରେଶ ପୂଜାରୀ, ସକାଳ ଓ ନନ୍ଦିଘୋଷ ଗ୍ରୁପ୍ ଅଧ୍ୟକ୍ଷ ମାନସ ରଂଜନ ମଙ୍ଗରାଜ । ଏହାପରେ  ‘ଦହନା’ର ପ୍ରଥମ ଅଧିବେଶନ ଆରମ୍ଭ ହୋଇଥିଲା। ପ୍ରଥମ ଅଧିବେଶନର ବିଷୟ ବସ୍ତୁ ରହିଥିଲା ‘ପଶ୍ଚିମ ଓଡ଼ିଶା ବିକାଶର ନକ୍ସା’ । ଏଥିରେ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର, ସାଂସଦ ପ୍ରସନ୍ନ ଆଚାର୍ଯ୍ୟ ଏବଂ ସୁରେଶ ପୂଜାରୀ ସାମିଲ ହୋଇଛନ୍ତି । ନନ୍ଦିଘୋଷ ଟିଭି ମୁଖ୍ୟ ସଂପାଦକ ଶିଶିର ଭଟ୍ଟମିଶ୍ର ଏହାକୁ ସଂଯୋଜନା କରିଛନ୍ତି ।

ଏହି ଆଲୋଚନାରେ ପଶ୍ଚିମ ଓଡ଼ିଶା ବିକାଶ ପାଇଁ କଣ କରାଯାଇଛି, ଆଗକୁ କଣ ଆବଶ୍ୟକ ରହିଛି ତାହା ଉପରେ ବିଶେଷ ଭାବେ ଆଲୋଚନା କରାଯାଇଥିଲା। ଏହି ଅବସରରେ ବରିଷ୍ଠ କଂଗ୍ରେସ ନେତା  ନରସିଂହ ମିଶ୍ର ତାଙ୍କର ମତ ରଖି କହିଥିଲେ ଯେ  ଶିକ୍ଷା, ସ୍ବାସ୍ଥ୍ୟ ଓ ଜଳସେଚନକୁ ଅଗ୍ରାଧିକାର ଦେଲେ ପଶ୍ଚିମ ଓଡ଼ିଶାର ବିକାଶ ହେବ । କେବଳ ସହରାଞ୍ଚଳ ନୁହଁ, ସବୁ ଅଞ୍ଚଳର ବିକାଶ ହେଲେ ଯାଇ ଆମେ ପୂର୍ଣ୍ଣାଙ୍ଗ ବିକାଶ ବୋଲି କହିପାରିବା। ସେହିପରି ବରଗଡ ସାଂସଦ ସୁରେଶ ପୂଜାରୀ ‘ପଶ୍ଚିମ ଓଡ଼ିଶା ବିକାଶର ନକ୍ସା’ ଉପରେ ତାଙ୍କର ମତ ରଖି କହିଥିଲେ ଯେ ବୀର ସୁରେନ୍ଦ୍ର ସାଏ ବିଶ୍ବବିଦ୍ୟାଳୟକୁ ସରକାର ଅଧିକ ଫୋକସ୍ କରିବା ଜରୁରୀ । ପଶ୍ଚିମ ଓଡ଼ିଶାରେ ଖଣି ଅଛି ମାତ୍ର ମାଇନିଂ କଲେଜଟିଏ ନାହିଁ । ଏ ଅଞ୍ଚଳରେ ଅଧିକ ବୈଷୟିକ ଶିକ୍ଷାନୁଷ୍ଠାନ ଆବଶ୍ୟକତା ରହିଛି। ସରକାର ପଶ୍ଚିମ ଓଡ଼ିଶାର ବିକାଶ ପାଇଁ ଆଉଟିକେ ପ୍ରୟାସ କରିବା ଆବଶ୍ୟକ ବୋଲି ସେ କହିଥିଲେ। ଏଥି ସହିତ ଏହି ଆଲୋଚନାର ଅନ୍ୟତମ ବକ୍ତା ତଥା ରାଜ୍ୟସଭା ସାଂସଦ ପ୍ରସନ୍ନ ଆଚାର୍ଯ୍ୟ ପଶ୍ଚିମ ଓଡ଼ିଶା ଶିକ୍ଷାର ବିକାଶ ଉପରେ ନିଜର ମନ୍ତବ୍ୟ ଦେଇ କହିଛନ୍ତି, ରାଜ୍ୟ ସରକାର ପଶ୍ଚିମ ଓଡ଼ିଶାରେ ଶିକ୍ଷାର ବିକାଶ ପାଇଁ ବହୁ ପଦକ୍ଷେପ ନେଉଛନ୍ତି। ଗଙ୍ଗାଧର ମେହେର କଲେଜକୁ ସରକାର ବିଶ୍ବବିଦ୍ୟାଳୟ କରିଛନ୍ତି । ରାଜେନ୍ଦ୍ର ମହାବିଦ୍ୟାଳୟକୁ ମଧ୍ୟ ବିଶ୍ବବିଦ୍ୟାଳୟ କରିଛନ୍ତି ରାଜ୍ୟ ସରକାର । ଶିକ୍ଷାରେ ବିକାଶ ହୋଇଛି, ଗୁଣାତ୍ମକ ବିକାଶର ଆବଶ୍ୟକତା ରହିଛି । ରାଜ୍ୟ ସରକାରଙ୍କୁ ଧନ୍ୟବାଦ ସେ ପଶ୍ଚିମ ଓଡ଼ିଶା ଶିକ୍ଷାର ବିକାଶ ପାଇଁ ବହୁ କାର୍ଯ୍ୟ କରୁଛନ୍ତି। ଆଗକୁ ମଧ୍ୟ ବିଭିନ୍ନ ଉନ୍ନୟନମୂଳକ କାର୍ଯ୍ୟ କରାଯିବ ବୋଲି କହିଛନ୍ତି ରାଜ୍ୟସଭା ସାଂସଦ ପ୍ରସନ୍ନ ଆଚାର୍ଯ୍ୟ ।

ଦୈନିକ ଖବରକାଗତ ‘ସକାଳ’ ଏବଂ ନନ୍ଦିଘୋଷ ଟିଭି ପକ୍ଷରୁ ଆୟୋଜିତ ସ୍ବତନ୍ତ୍ର କାର୍ଯ୍ୟକ୍ରମ ‘ଦହନା’ରେ  ସମ୍ବଲପୁରୀ କ୍ଷୁଦ୍ର ନାଟକ ପରିବେଷଣ କରାଯିବ । ସାଢ଼େ ୫ଟାରେ ଅନୁଷ୍ଠିତ ହୋଇଛି ଦ୍ୱିତୀୟ ଅଧିବେଶନ । ଯାହାର ଶୀର୍ଷକ ରହିଛି ‘ଓଡ଼ିଆ ସିନେମାକୁ ପଶ୍ଚିମ ଓଡ଼ିଶାର ଅବଦାନ’ । ଆଲୋଚନାଚକ୍ରରେ ବରିଷ୍ଠ ସିନେ ନିର୍ଦ୍ଦେଶକ ସବ୍ୟସାଚ୍ଚୀ ମହାପାତ୍ର, ଅଭିନେତା ସବ୍ୟସାଚ୍ଚୀ ଓ ଅଭିନେତ୍ରୀ ଅର୍ଚ୍ଚିତା ଯୋଗ ଦେଇଛନ୍ତି । ଏହି ଅଧିବେଶନକୁ ସଂଯୋଜନା କରିଛନ୍ତି ନନ୍ଦିଘୋଷ ଟିଭି ଉପସ୍ଥାପକ ଅବିନାଶ ଷଡ଼ଙ୍ଗୀ ।

ଏହାପରେ ସମ୍ମାନ ଓ ସମ୍ବଦ୍ଧର୍ନା କାର୍ଯ୍ୟକ୍ରମ ଅନୁଷ୍ଠିତ ହେବ । ‘ବିକାଶ ରାସ୍ତାରେ ନାରୀ’ ଶୀର୍ଷକ ଆଲୋଚନାରେ ଅଂଶ ଗ୍ରହଣ କରିବେ ବର୍ଷା ପ୍ରିୟଦର୍ଶିନୀ ଓ ଜୟନ୍ତୀ ଏକ୍କା । ଏହାକୁ ସଂଯୋଜନା କରିବେ ନନ୍ଦିଘୋଷ ଟିଭି ଉପସ୍ଥାପିକା ଶୁଭଶ୍ରୀ ମହାପାତ୍ର । ସନ୍ଧ୍ୟା ୭ଟା ରେ ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେବ । ଏହି ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ରେ ପପୁ ପମପମ୍, ଅଭିଜିତ ମଜମୁଦାର, ଅନ୍ତରା ଚକ୍ରବର୍ତ୍ତୀ, ଶୀତଲ ଓ ଶାନ୍ତନୁ ପ୍ରମୁଖ ଯୋଗଦେବେ ।

ଭୁବନେଶ୍ବର : ସରିଲା ସହର ଭୋଟ, ବୁଥରେ ଭୋଟ ପଡିବା ପରେ ଆସିଲା ଜନମତ । ଦୈନିକ ଖବର କାଗଜ ସକାଳ ଓ ନନ୍ଦିଘୋଷ ଟିଭି ପକ୍ଷରୁ ହୋଇଥିବା ବୁଥ ବାହୁଡ଼ା ମତ ଅର୍ଥାତ ଏକଜିଟ ପୋଲ ପ୍ରକାଶ ପାଇଛି । ରାଜ୍ୟର ୧୦୩ ପୌରାଞ୍ଚଳ ଓ ୩ ମହାନଗର ନିଗମ ପାଇଁ ମତଦାନ ହୋଇଛି । ରାଉରକେଲା, ପୁରୀ, ସମ୍ବଲପୁର, ହିନ୍ଦୋଳ ଓ ଅତାବିରାକୁ ଛାଡ଼ି ରାଜ୍ୟର ଅନ୍ୟ ସମସ୍ତ ସହରବାସୀ ବାଛିଛନ୍ତି ନେତା । ଆଜି ସକାଳ ୮ଟାରୁ ଆରମ୍ଭ ହୋଇଥିବା ମତଦାନ ପ୍ରକ୍ରିୟା ସଂଧ୍ୟା ୫ଟାରେ ଶେଷ ହୋଇଛି । ଏବେ ଅପେକ୍ଷା କେବଳ ରହିଛି ଆସନ୍ତା ଶନିବାରକୁ । ଗଣତି କହିବ କିଏ ପିନ୍ଧୁଛନ୍ତି କେଉଁ ସହରର ତାଜ୍ । ପ୍ରଥମ ଥର ପାଇଁ ଏଥର ଅଧ୍ୟକ୍ଷ ଓ ମେୟରଙ୍କୁ ଜନତା ସିଧାସଳଖ ଭୋଟ ଦେଇ ବାଛିବାର ସୁଯୋଗ ପାଇଛନ୍ତି । । କେଉଁ ଦଳ କରିବ ମହାନଗର ନିଗମ, ମ୍ୟୁନିସିପାଲିଟି ଓ ଏନଏସିକୁ ଦଖଲ କରିବ, ପଢନ୍ତୁ ଆମ ବୁଥ ବାହୁଡ଼ା ମତ ।

ବୁଥ୍ ବାହୁଡ଼ା ମତ ଅନୁସାରେ ଏଥର ଭୁବନେଶ୍ୱର, କଟକ ଓ ବ୍ରହ୍ମପୁରର ତିନୋଟି ଯାକ ମେୟର ଆସନ ଦଖଲ କରିବ ବିଜେଡି । ଭୁବନେଶ୍ୱରର ୬୭ଟି ୱାର୍ଡ ମଧ୍ୟରୁ ବିଜେଡି ୫୭ଟି ୱାର୍ଡରେ ବିଜୟ ସମ୍ଭାବନା ପକ୍କା ହୋଇଛି । ବିଜେପି ୪ଟି ଆସନରେ ଜିତି ପାରେ । ତେବେ ୪ଟି ଆସନରେ ବିଜେଡି ବନାମ ବିଜେଡି ବଦ୍ରୋହୀ ପ୍ରାର୍ଥୀଙ୍କ ମଧ୍ୟରେ ହେବ । ୨ଟି ଆସନରେ ବିଜେଡି ଓ ବିଜେପି ମଧ୍ୟରେ ଟକ୍କର ହେବାର ସମ୍ଭାବନା ରହିଛି। ସେହିପରି କଟକର ୫୯ଟି ୱାର୍ଡ ମଧ୍ୟରୁ ୪୮ଟିକୁ ବିଜେଡି ଦଖଲ କରିବା ଏକଜିଟ୍ ପୋଲ୍ ସର୍ଭେ କହୁଛି । ୬ଟି ଆସନରେ କଂଗ୍ରେସ, ବିଜେପି ଗୋଟିଏରେ ଓ ସ୍ୱାଧୀନ ପ୍ରାର୍ଥୀଙ୍କ ଖାତାକୁ ଯିବ ଦୁଇଟି ଆସନ । ଗୋଟିଏ ଆସନରେ ବିଜେଡି ଓ କଂଗ୍ରେସ୍ ମଧ୍ୟରେ ଓ ଅନ୍ୟ ଏକ ଆସନରେ ବିଜେଡି ଓ ବିଜେପି ମଧ୍ୟରେ କଡା ଟକ୍କର ହେବାର ସମ୍ଭାବନା ରହିଛି ।

ସେହିପରି ବ୍ରହ୍ମପୁରର ୪୨ଟି ୱାର୍ଡ ମଧ୍ୟରୁ ୩୮ଟି ଯାଉଛି ବିଜେଡି ଖାତାକୁ । ୨ଟିରେ କଂଗ୍ରେସ୍, ଗୋଟିଏରେ ବିଜେପି ଓ ଗୋଟିଏରେ ସ୍ବାଧୀନ ପ୍ରାର୍ଥୀ ଜିତିବାର ସମ୍ଭାବନା ରହିଛି ସେପରେ ରାଜ୍ୟର ୧୦୩ଟି ସହରାଞ୍ଚଳ ମଧ୍ୟରୁ ୯୧ଟିରେ ବିଜେଡି କ୍ଲିନ୍ ସୁଇପ୍ କରିବା ବୁଥ୍ ବାହୁଡ଼ା ମତରୁ ସ୍ପଷ୍ଟ ହେଉଛି । ତେବେ ଅନ୍ୟ ୧୨ଟି ଆସନରେ ବିଜେପି, ବିଜେଡି ଓ କଂଗ୍ରେସ ମଧ୍ୟରେ କଡ଼ା ଟକ୍କର ହେବା । ତେବେ ଏସବୁ ଆସନରେ ମଧ୍ୟ ବିଜେଡି ପ୍ରାର୍ଥୀଙ୍କ ବିଜୟ ସମ୍ଭାବନା ସର୍ବାଧିକ । ମୋଟାମୋଟି କହିବାକୁ ଗଲେ ପଞ୍ଚାୟତ ଭଳି ପୌର ନିର୍ବାଚନରେ ମଧ୍ୟ ବିଜେଡିର ଏକପାଖିଆ ବିଜୟ ସମ୍ଭାବନା ସୁନିଶ୍ଚିତ ହୋଇଯାଇଛି ।

ଦିନ ସାରା ଆଜି ବିଭିନ୍ନ ବୁଥ୍ ସାମ୍ନାରେ ଆମ ସର୍ଭେ ଟିମର ସଦସ୍ୟମାନେ ଭୋଟରଙ୍କ ମୁଡ୍ ପରଖି ଯେଉଁ ରିପୋର୍ଟ ପ୍ରସ୍ତୁତ କରିଛନ୍ତି, ତାହା ଆପଣଙ୍କ ସାମ୍ନାକୁ ଆଣିଛୁ । ସାମ୍ପଲ୍ ସର୍ଭେକୁ ନେଇ ଗତ ପଞ୍ଚାୟତ ନିର୍ବାଚନର ଶେଷ ଦିନ ଆମେ ଏକଜିଟ୍ ପୋଲ୍ ରିପୋର୍ଟ ପ୍ରସାରଣ କରିଥିଲୁ । ଯାହାକି ପରବର୍ତ୍ତି ସମୟରେ ସତ ହୋଇଥିଲା । ସେହି ଭିତ୍ତିରେ ଏଥର ମଧ୍ୟ କରିଛୁ ସାମ୍ପଲ୍ ସର୍ଭେ । ଆଶା କରୁଛୁ ପୁଣି ଆମ ଏକଜିଟ୍ ପୋଲ୍ ରିପୋର୍ଟ ଏକଜାଟ୍ ପୋଲ୍ ରିପୋର୍ଟ ସହ ସମାନ ହେବ ।