ପୁରୀ: ଶ୍ରୀମନ୍ଦିର କ୍ୟାଲେଣ୍ଡରରେ ତ୍ରୁଟି ! ପୁରୀ ଶ୍ରୀମନ୍ଦିର ପ୍ରଶାସନର ୨୦୨୬ କ୍ୟାଲେଣ୍ଡରରେ ଗୁରୁତର ତ୍ରୁଟି ହୋଇଥିବା ଅଭିଯୋଗ । କ୍ୟାଲେଣ୍ଡରରେ ମହାପ୍ରଭୁଙ୍କର ଯେଉଁ ଚିତ୍ର ସ୍ଥାନିତ କରାଯାଇଛି ସେଥିରେ ଗୁରୁତର ତ୍ରୁଟି ଥିବା ପରିଲକ୍ଷିତ ହୋଇଛି । ମହାପ୍ରଭୁ ଶ୍ରୀଜଗନ୍ନାଥଙ୍କ ସ୍ଥାନରେ ପ୍ରଭୁ ବଳଭଦ୍ର ଏବଂ ବଳଭଦ୍ରଙ୍କ ସ୍ଥାନରେ ଶ୍ରୀଜଗନ୍ନାଥଙ୍କ ଚିତ୍ର ଥିବା ଏକ ଫଟୋକୁ ଶ୍ରୀମନ୍ଦିର ପ୍ରଶାସନ କ୍ୟାଲେଣ୍ଡର ୨୦୨୬ ରେ ସ୍ଥାନ ଦିଆଯାଇଛି । ଜଗନ୍ନାଥ ସଂସ୍କୃତିର ପ୍ରଚାର ପ୍ରସାର କରୁଥିବା ଶ୍ରୀମନ୍ଦିର ପ୍ରଶାସନ ନିଜେ କରିଛି ଏପରି ଅକ୍ଷମଣିୟ ତ୍ରୁଟି ।

ସେହିପରି ରଥଯାତ୍ରାର ଏକ ଫଟୋ ମଧ୍ୟ କ୍ୟାଲେଣ୍ଡରରେ ରହିଥିବା ବେଳେ ସେଥିରେ ମଧ୍ୟ ତ୍ରୁଟି ଦେଖିବାକୁ ମିଳିଛି। ପ୍ରଥମେ ସୁଭଦ୍ରାଙ୍କ ରଥ, ପରେ ଜଗନ୍ନାଥଙ୍କ ରଥ ଏବଂ ଶେଷରେ ଶ୍ରୀବଳଭଦ୍ରଙ୍କ ରଥ ଟଣା ଯାଉଥିବାର ସମ୍ପର୍କିତ ଚିତ୍ରର ଏକ ଫଟୋ ମଧ୍ୟ କ୍ୟାଲେଣ୍ଡର ରେ ସ୍ଥାନ ପାଇଛି। ତେବେ ଶ୍ରୀମନ୍ଦିର ପ୍ରଶାସନ ପକ୍ଷରୁ ପ୍ରକାଶିତ ୨୦୨୬ କ୍ୟାଲେଣ୍ଡର ରେ ଏଭଳି ତ୍ରୁଟିକୁ ଜଗନ୍ନାଥପ୍ରେମୀ ଓ ଶ୍ରୀମନ୍ଦିର ସେବାୟତ ସମାଲୋଚନା କରିଛନ୍ତି । କ୍ୟାଲେଣ୍ଡର ଛପା ହେବା ପୂର୍ବରୁ କାହା ପରାମର୍ଶରେ ଶ୍ରୀମନ୍ଦିର ପ୍ରଶାସନ ଏଭଳି ତ୍ରୁଟିପୂର୍ଣ୍ଣ ଫଟୋ କ୍ୟାଲେଣ୍ଡର ରେ ସ୍ଥାନ ଦେଇଛି ତାକୁ ନେଇ ସେବାୟତ ମାନେ ପ୍ରଶ୍ନ ଉଠାଇଛନ୍ତି। ଜଗନ୍ନାଥ ସଂସ୍କୃତିକୁ ବିକୃତ କରୁଥିବା ଅନୁଷ୍ଠାନ ଓ ବ୍ୟକ୍ତି ବିଶେଷ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି ଶ୍ରୀମନ୍ଦିର ପ୍ରଶାସନ ପକ୍ଷରୁ ନିଷ୍ପତ୍ତି ହୋଇଥିବାବେଳେ ଖୋଦ୍ ଶ୍ରୀମନ୍ଦିର ପ୍ରଶାସନ ଏହାକୁ ଉଲ୍ଲଘଂନ କରିବା ସାଧାରଣରେ ଚର୍ଚ୍ଚାର ବିଷୟ ହୋଇଛି। ତୁରନ୍ତ ଏହି ତ୍ରୁଟିପୂର୍ଣ୍ଣ କ୍ୟାଲେଣ୍ଡର କୁ ଶ୍ରୀମନ୍ଦିର ପ୍ରଶାସନ ପ୍ରତ୍ୟାହାର କରିନେବାକୁ ଦାବି ଜୋର ଧରିଛି। କେଉଁ ଅଧିକାରୀଙ୍କ ଦାୟିତ୍ବହୀନତାରେ ଏଭଳି ତ୍ରୁଟି ହୋଇଛି ତାହାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଜଗନ୍ନାଥପ୍ରେମୀ ଓ ସେବାୟତ ଦାବି କରିଛନ୍ତି।

ଏବକା ସମୟରେ ମଣିଷ ଜୀବନର ଗୁରୁତ୍ବପୂର୍ଣ୍ଣ ଅଂଶ ପାଲଟିଛି କ୍ୟାଲେଣ୍ଡର। କେଉଁ ଦିନ କେଉଁ କାର୍ଯ୍ୟ କରାଯିବ ତାହାକୁ ପୂର୍ବରୁ କ୍ୟାଲେଣ୍ଡର ମାଧ୍ୟମରେ ନିର୍ଦ୍ଧାରଣ କରାଯିବା ସହ ସେହି ଅନୁସାରେ ସେସବୁ ପରିଚାଳିତ କରାଯାଉଛି। ତେବେ ପୂର୍ବରୁ କ୍ୟାଲେଣ୍ଡର କୃଷି କାର୍ଯ୍ୟ ପାଇଁ ଗୁରୁତ୍ବ ବହନ କରୁଥିଲା। କୃଷି କାର୍ଯ୍ୟ ପରିଚାଳନା ପାଇଁ ପ୍ରାଚୀନ ମିଶରର ରାଜାମାନେ ପ୍ରଥମେ ତିଆରି କରିଥିଲେ କ୍ୟାଲେଣ୍ଡର। ଅବଶ୍ୟ ମିଶରବାସୀଙ୍କ ଦ୍ବାରା ତିଆରି କରାଯାଇଥିବା କ୍ୟାଲେଣ୍ଡର ପ୍ରଥମ କ୍ୟାଲେଣ୍ଡର କହିଲେ ଭୁଲ୍‌ ହେବ ନାହିଁ। ଏହା ହିଁ ମିଶରର କୃଷକଙ୍କ ଜୀବନରେ ପ୍ରମୁଖ ଭୂମିକା ନିର୍ବାହ କରୁଥିଲା। କ୍ୟାଲେଣ୍ଡର ଉପରେ ସେମାନଙ୍କ ଜୀବନ ଓ ଜୀବିକା ଥିଲା ସମ୍ପୂର୍ଣ୍ଣ ନିର୍ଭରଶୀଳ।

ମିଶରକୁ ନୀଳନଦୀର ଦାନ କୁହାଯାଏ। ପ୍ରତିବର୍ଷ ନୀଳ ନଦୀରେ ଦେଖା ଦେଇଥାଏ ବନ୍ୟା। ଆଉ ତାହାକୁ ଜାଣିବା ଦିଗରେ କୃଷକଙ୍କୁ ସାହାଯ୍ୟ କରୁଥିଲା ଏହି କ୍ୟାଲେଣ୍ଡର। କେବଳ ସେତିକି ନୁହେଁ, ଜଳସ୍ତର କମିବା ତଥା ଠିକ୍‌ ସମୟରେ ଜମିରେ ଜଳସେଚନ କରିବା ଦିଗରେ କ୍ୟାଲେଣ୍ଡର ହିଁ ସେତେବେଳେ ସହାୟକ ହେଉଥିଲା। ଫଳରେ ସେମାନଙ୍କ କୃଷିକାର୍ଯ୍ୟ ପ୍ରଭାବିତ ହେଉ ନଥିଲା। ଏପରିକି ଅନାହାରର ଶିକାର ହେବାକୁ ପଡ଼ୁ ନ ଥିଲା।

ସେହି ସମୟରେ କ୍ୟାଲେଣ୍ଡରରେ ଥିଲା ୧୨ ମାସ। ପ୍ରତି ମାସରେ ଥିଲା ୩୦ ଦିନ। ସେହିପରି ବର୍ଷ ଶେଷରେ ଅତିରିକ୍ତ ପାଞ୍ଚଦିନକୁ ଅନ୍ତର୍ଭୁକ୍ତ କରାଯିବାରୁ ଏହା ୩୬୫ ଦିନରେ ପରିଣତ ହେଉଥିଲା। ବଳକା ୫ ଦିନକୁ ମିଶରବାସୀ ଅଶୁଭ ଭାବୁଥିଲେ। ଅନ୍ୟପଟେ ଅଧିବର୍ଷ ପରିକଳ୍ପନା ମଧ୍ୟ ପ୍ରାଚୀନ ମିଶରରୁ ଆସିଛି। ଯେଉଁଥିପାଇଁ ପ୍ରତ୍ୟେକ ଚାରିବର୍ଷରେ ଅତିରିକ୍ତ ଗୋଟିଏ ଦିନକୁ ଅନ୍ତର୍ଭୁକ୍ତ କରାଯାଉଥିଲା।