ରାଉରକେଲା: ଦୁର୍ଗାପୁର ପାହାଡ଼ ଉପରେ ଥିବା ନିଲମ୍ବିତ ଯୁବ ବିଜେପି ନେତା ପ୍ରକାଶ ପାଶୱାନଙ୍କ ବେଆଇନ କାର୍ଯ୍ୟାଳୟକୁ ଭାଙ୍ଗି ଦେଇଛି ବନ ବିଭାଗ । ଜଙ୍ଗଲ ଜମି ଜବରଦଖଲ ଅଭିଯୋଗରେ ପ୍ରଶାସନ ପକ୍ଷରୁ ଏହି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।

ଜଣେ ମାଜିଷ୍ଟ୍ରେଟ୍, ବରିଷ୍ଠ ପୋଲିସ ଅଧିକାରୀ, ୫ ଜଣ ଆଇଆଇସି (IIC), ପାନପୋଷ ଏସଡିପିଓ ଏବଂ ରାଉରକେଲା ବନଖଣ୍ଡ କର୍ମଚାରୀଙ୍କ ଉପସ୍ଥିତିରେ ଏହି ଉଚ୍ଛେଦ ପ୍ରକ୍ରିୟା ସମ୍ପନ୍ନ ହୋଇଛି। ରାଉରକେଲା ଏସିଏଫ୍ (ACF) ଗଜେନ୍ଦ୍ର ପାଲ ସିଂହ ମାଥୁର କହିଛନ୍ତି ଯେ, ଏହି ଢାଞ୍ଚାଟି ଦୁର୍ଗାପୁର ସଂରକ୍ଷିତ ଜଙ୍ଗଲ ମଧ୍ୟରେ ଅବସ୍ଥିତ ଥିଲା ଏବଂ ଏଥିପାଇଁ ମିଳିଥିବା ଅନୁମତିଠାରୁ ଅଧିକ ଜମିରେ ବେଆଇନ ନିର୍ମାଣ ହୋଇଥିବା ଜଣାପଡିଥିଲା।

ଅଧିକାରୀଙ୍କ ସୂଚନାନୁସାରେ, ୨୦୨୩ ମସିହାରେ ଏହି ସ୍ଥାନରେ କେବଳ ୦.୦୧ ଡେସିମିଲ୍ ଜମି ପାଇଁ ଅନୁମତି ମିଳିଥିଲା। ମାତ୍ର ଏହାକୁ ବେଆଇନ ଭାବେ ୦.୦୧୫ ଡେସିମିଲକୁ ବୃଦ୍ଧି କରାଯାଇଥିଲା। ଏନେଇ ନୋଟିସ୍ ଜାରି କରାଯାଇଥିଲେ ହେଁ ଅଗଷ୍ଟ ୩୧ ସୁଦ୍ଧା କେହି ଏହାର ଉତ୍ତର ରଖିନଥିଲେ କିମ୍ବା ମାଲିକାନା ଦାବି କରିନଥିଲେ। ତେଣୁ ରାଉରକେଲା ଡିଏଫଓଙ୍କ ନିର୍ଦ୍ଦେଶକ୍ରମେ ଏହି ବେଆଇନ ନିର୍ମାଣକୁ ଭାଙ୍ଗି ଦିଆଯାଇଛି ଏବଂ ସେଠାରୁ କାଗଜପତ୍ର ସମେତ ଅନ୍ୟାନ୍ୟ ସାମଗ୍ରୀ ଜବତ କରାଯାଇ ଏକ ତାଲିକା ପ୍ରସ୍ତୁତ କରାଯାଇଛି।

ଗତ ଅଗଷ୍ଟ ୧୫ ତାରିଖରେ ରାଉରକେଲା ସର୍କିଟ୍ ହାଉସରୁ ଦୁଇ ଜଣ ସଶସ୍ତ୍ର ଅପରାଧୀଙ୍କୁ ବିପୁଳ ଅସ୍ତ୍ରଶସ୍ତ୍ର ସହ ଗିରଫ କରାଯିବା ଘଟଣାରେ ସମ୍ପୃକ୍ତ ଥିବା ଅଭିଯୋଗରେ ପ୍ରକାଶ ପାଶୱାନ ବର୍ତ୍ତମାନ ଜେଲରେ ଅଛନ୍ତି। ପୋଲିସର ସୂଚନା ଅନୁଯାୟୀ, ୩୫ ବର୍ଷୀୟ ପାଶୱାନ ହିଁ ସର୍କିଟ୍ ହାଉସରେ ଅପରାଧୀମାନଙ୍କୁ ଆଶ୍ରୟ ଦେଇଥିଲେ ଏବଂ ସେ ଏହି ଘଟଣାର ମୁଖ୍ୟ କାର୍ପଟଦାର। ସେ ଫେରାର ଥିବା ବେଳେ ଗତ ଅଗଷ୍ଟ ୨୭ ତାରିଖରେ ତାଙ୍କୁ ବିହାରର ସମସ୍ତିପୁରରୁ ଗିରଫ କରାଯାଇଥିଲା। ଅଭିଯୁକ୍ତର ଅପରାଧିକ ସାମ୍ରାଜ୍ୟ ଉପରେ ରୋକ୍ ଲଗାଇବା ପାଇଁ ପ୍ରଶାସନ ପକ୍ଷରୁ ଏହି ବୁଲଡୋଜର ଆକ୍ସନ ନିଆଯାଇଥିବା ଚର୍ଚ୍ଚା ହେଉଛି ।

ଗଞ୍ଜାମ: ଗଞ୍ଜାମ ଜିଲ୍ଲା କବିସୂର୍ଯ୍ୟନଗର ଥାନା ଅନ୍ତର୍ଗତ ଜରଡ଼ା ଗାଁ ନିକଟରେ ଏକ ଗଛରେ ଝୁଲନ୍ତା ଅବସ୍ଥାରେ ଏକ କଲରାପତରିଆ ବାଘର ମୃତଦେହ ଉଦ୍ଧାର କରାଯାଇଛି। ବାଘଟିର କିପରି ମୃତ୍ୟୁ ଘଟିଲା, ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇପାରି ନାହିଁ। ସ୍ଥାନୀୟ ଲୋକମାନେ ପ୍ରଥମେ ଗଛରେ ଏହି ବାଘର ମୃତଦେହଟିକୁ ଝୁଲୁଥିବାର ଦେଖିଥିଲେ। ଏହା ପରେ ସେମାନେ ତୁରନ୍ତ ସ୍ଥାନୀୟ ପୋଲିସ ଏବଂ ବନ ବିଭାଗ ଅଧିକାରୀଙ୍କୁ ଖବର ଦେଇଥିଲେ। ସୂଚନା ପାଇବା ମାତ୍ରେ ପ୍ରଶାସନିକ ଅଧିକାରୀମାନେ ଘଟଣାସ୍ଥଳରେ ପହଞ୍ଚିଥିଲେ।

ଘଟଣାସ୍ଥଳରେ କବିସୂର୍ଯ୍ୟନଗର ପୋଲିସ ଏବଂ ପୋଲସରା ବନ ବିଭାଗର ଅଧିକାରୀମାନେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ମୃତଦେହକୁ ଜବତ କରାଯାଇ ବ୍ୟବଚ୍ଛେଦ ପାଇଁ ପଠାଯାଇଛି। ଏହା ଏକ ଶିକାର ଜନିତ ହତ୍ୟାକାଣ୍ଡ ନା ଏହା ପଛରେ ଅନ୍ୟ କୌଣସି କାରଣ ରହିଛି, ସେ ନେଇ ବନ ବିଭାଗ ଅଧିକାରୀମାନେ ଅନୁସନ୍ଧାନ କରୁଛନ୍ତି। ବନ ବିଭାଗ ସ୍ପଷ୍ଟ କରିଛି ଯେ ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ଜଣାପଡ଼ିବ ଏବଂ ଯଦି ଏଥିରେ କାହାର ସମ୍ପୃକ୍ତି ଥିବା ପ୍ରମାଣିତ ହୁଏ, ତେବେ ଦୋଷୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।

ମହାରାଷ୍ଟ୍ର: ବାଘ ଆକ୍ରମଣରେ ୪ ମହିଳା ମୃତ । କେନ୍ଦୁପତ୍ର ସଂଗ୍ରହ ପାଇଁ ଜଙ୍ଗଲକୁ ଯାଇଥିବା ବେଳେ ଆକ୍ରମଣ କଲା ବାଘ । ମହାରାଷ୍ଟ୍ରର ଚନ୍ଦ୍ରପୁର ଜିଲ୍ଲାରେ ଜଙ୍ଗଲକୁ କେନ୍ଦୁ ପତ୍ର ସଂଗ୍ରହ କରିବାକୁ ଯାଇଥିବା ୪ ଜଣ ମହିଳାଙ୍କୁ ଗୋଟିଏ ବାଘ ଆକ୍ରମଣ କରି ମାରିଦେଇଥିବା ନେଇ ବନ ବିଭାଗ ଅଧିକାରୀ ସୂଚନା ଦେଇଛନ୍ତି। ବାଘ ଆତଙ୍କ ପରେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଛି ।

ଏହି ଆକ୍ରମଣ ଜିଲ୍ଲା ମୁଖ୍ୟାଳୟଠାରୁ ପ୍ରାୟ ୭୦ କିଲୋମିଟର ଦୂର ସିନ୍ଦେୱାହି ତହସିଲ ଅନ୍ତର୍ଗତ ଗୁଞ୍ଜେୱାହି ଗ୍ରାମ ନିକଟସ୍ଥ ଜଙ୍ଗଲରେ ଘଟିଛି। ସୂଚନା ଅନୁଯାୟୀ, କିଛି ମହିଳା ବିଡ଼ି ତିଆରି ପାଇଁ ବ୍ୟବହୃତ ହେଉଥିବା କେନ୍ଦୁ ପତ୍ର ତୋଳିବାକୁ ଏକ ଜଙ୍ଗଲିଆ ଅଞ୍ଚଳକୁ ଯାଇଥିଲେ। ସେମାନେ ପତ୍ର ସଂଗ୍ରହରେ ବ୍ୟସ୍ତ ଥିବା ବେଳେ ହଠାତ୍ ଏକ ବାଘ ସେମାନଙ୍କ ଉପରେ ଆକ୍ରମଣ କରିଥିଲା। ଏହି ଭୟଙ୍କର ଆକ୍ରମଣରେ ୪ ଜଣ ମହିଳାଙ୍କର ମୃତ୍ୟୁ ହୋଇଛି।

ମୃତ ମହିଳାମାନେ ହେଲେ କୱାଡାବାଇ ମୋହୁର୍ଲେ (୪୫), ଅନିତାବାଇ ମୋହୁର୍ଲେ (୪୦), ସୁନିତା ମୋହୁର୍ଲେ (୩୮) ଏବଂ ସଂଗୀତା ଚୌଧୁରୀ (୫୦)। ଏହି ସମସ୍ତ ମୃତକ ଗୁଞ୍ଜେୱାହି ଗ୍ରାମର ବାସିନ୍ଦା ବୋଲି ଜଣାପଡିଛି। ତେବେ ବାଘଟି ଏହି ଚାରି ଜଣଙ୍କୁ ଗୋଟିଏ ସ୍ଥାନରେ ଏକାସାଙ୍ଗରେ ଆକ୍ରମଣ କରିଛି ନା ଅଲଗା ଅଲଗା ସ୍ଥାନରେ ଶିକାର କରିଛି, ତାହା ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇପାରି ନାହିଁ।

ଖବର ପାଇବା ମାତ୍ରେ ବନ ବିଭାଗର ଏକ ଟିମ୍ ଘଟଣାସ୍ଥଳରେ ପହଞ୍ଚିଛି। ଚନ୍ଦ୍ରପୁର ସର୍କଲର ମୁଖ୍ୟ ବନ ସଂରକ୍ଷକ ଆର. ଏମ୍. ରାମାନୁଜମ୍ କହିଛନ୍ତି ଯେ ଅଧିକାରୀମାନେ ତଦନ୍ତ ଆରମ୍ଭ କରିଛନ୍ତି ଏବଂ 'ପଞ୍ଚନାମା' ଶେଷ ହେବା ପରେ ଏହି ଘଟଣା ସମ୍ପର୍କରେ ଅଧିକ ତଥ୍ୟ ସାମ୍ନାକୁ ଆସିବ। ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଥିବା ବେଳେ ଲୋକଙ୍କ ମଧ୍ୟରେ କୋକୁଆ ଭୟ ସୃଷ୍ଟି ହୋଇଛି।

ଅନୁଗୁଳ: ଆରମ୍ଭ ହେଲା ବନ ବିଭାଗର ଅପରେସନ୍‌ 'ଜୀବେ ଦୟା' । ଅନୁଗୁଳରେ ବୋମା ଖାଇ ହାତୀ ମୃତ୍ୟୁ ପରେ ବନ ବିଭାଗର ତତ୍ପରତା ପ୍ରକାଶ ପାଇଛି । ବନ୍ୟଜନ୍ତୁଙ୍କ ସୁରକ୍ଷା ପାଇଁ ଆରମ୍ଭ ହେଲା 'ଜୀବେ ଦୟା' ଅପରେସନ । ଅନୁଗୁଳ ବନ ମଣ୍ଡଳ ଅନ୍ତର୍ଗତ ଅନୁଗୁଳ, ଢେଙ୍କାନାଳ, କଟକ ଜିଲ୍ଲାରେ ଚାଲିଛି କୁମ୍ବିଂ ଅପରେସନ । RCCF ଡକ୍ଟର ସଞ୍ଜୟ କୁମାର ସ୍ୱାଇଁଙ୍କ ନେତୃତ୍ୱରେ ବନମଣ୍ଡଳର ୭ଟି ଯାକ ବନଖଣ୍ଡରେ ଏକକାଳୀନ ସର୍ଚ୍ଚ ଅପରେସନ ଛାଲିଛି । ଶିକାରୀ ମୁକ୍ତ ଜଙ୍ଗଲ ଓ ବନ୍ୟଜନ୍ତୁଙ୍କ ସୁରକ୍ଷା ପାଇଁ ଆରମ୍ଭ ହୋଇଛି ଅପରେସନ । ଗାଁ ଗାଁରେ ଘର ଘର ବୁଲି ଯାଞ୍ଚ କରୁଛି ବନ ବିଭାଗ । ଅପରେସନ ଜୀବେ ଦୟାର ପ୍ରଥମ ଦିନ ଚଢାଉ ବେଳେ ବନ ବିଭାଗ ଜବତ କରିଛି ବ୍ୟାପକ ବିସ୍ଫୋରକ, ବନ୍ଧୁକ । ଅନୁଗୋଳ ଜରପଡା ରେଞ୍ଜ ଅଧୀନରୁ ୮ଟି ହରିଣ ସିଙ୍ଗ, ଶିକାରୀ ସାମଗ୍ରୀ, ଫାସ, ଟାଙ୍ଗିଆ, ଲାଇଟ ସହ ବିସ୍ପୋରକ ଓ ଦୁଇଟି ବନ୍ଧୁକ ଜବତ କରିଛି । 

ଭୁବନେଶ୍ୱର: ରାଜ୍ୟରେ ଏବେ ବିଦେଶୀ ପକ୍ଷୀଙ୍କ ଆଗମନ ଆରମ୍ଭ ହୋଇଯାଇଛି। ଏହି ପରିପ୍ରେକ୍ଷୀରେ ଆସନ୍ତା ଜାନୁଆରୀ ୬ ତାରିଖରୁ ରାଜ୍ୟରେ ପକ୍ଷୀ ଗଣନା ଆରମ୍ଭ ହେବ। ଏନେଇ ଜଙ୍ଗଲ ଓ ପରିବେଶ ମନ୍ତ୍ରୀ ଗଣେଶ ରାମ ସିଂ ଖୁଣ୍ଟିଆ ସୂଚନା ଦେଇଛନ୍ତି। ଚିଲିକା, ନଳବନ, ମଙ୍ଗଳାଯୋଡ଼ି, ହୀରାକୁଦ ଏବଂ ନନ୍ଦନକାନନ ପରି ପ୍ରମୁଖ ସ୍ଥାନମାନଙ୍କରେ ବିଦେଶୀ ପକ୍ଷୀଙ୍କ ଆଗମନକୁ ନେଇ ଏହି ଗଣନା କାର୍ଯ୍ୟ କରାଯିବ।

ଚଳିତ ବର୍ଷ ପକ୍ଷୀ ଗଣନା କାର୍ଯ୍ୟରେ ଜଙ୍ଗଲ ଓ ପରିବେଶ ବିଭାଗ ସହ ପର୍ଯ୍ୟଟନ ବିଭାଗ ମଧ୍ୟ ସହଯୋଗ କରିବ। ପକ୍ଷୀମାନଙ୍କ ପାଇଁ ଅନୁକୂଳ ପରିବେଶ ସୃଷ୍ଟି କରିବା ଏବଂ ପର୍ଯ୍ୟଟକଙ୍କୁ ଆକୃଷ୍ଟ କରିବା ଲକ୍ଷ୍ୟରେ ଉଭୟ ବିଭାଗ ମିଳିତ ଭାବେ କାର୍ଯ୍ୟ କରିବେ। ରାଜ୍ୟରେ ତାପମାତ୍ରା ୨ରୁ ୩ ଡିଗ୍ରୀ ହ୍ରାସ ପାଇଥିବାରୁ ଜଳବାୟୁ ପରିବର୍ତ୍ତନ ପକ୍ଷୀମାନଙ୍କ ପାଇଁ ବେଶ୍ ଅନୁକୂଳ ହୋଇଛି ବୋଲି ମନ୍ତ୍ରୀ କହିଛନ୍ତି।

ପକ୍ଷୀମାନଙ୍କ ସଂରକ୍ଷଣ ଏବଂ ପର୍ଯ୍ୟଟନର ବିକାଶ ପାଇଁ ସ୍ୱତନ୍ତ୍ର ବ୍ୟବସ୍ଥା ଗ୍ରହଣ କରାଯାଉଛି। ବିଭିନ୍ନ ସ୍ଥାନରେ ଆଧୁନିକ ୱାଚ୍ ଟାୱାର ଏବଂ ଏନକ୍ଲୋଜର ନିର୍ମାଣ କରାଯିବ। ଏହାଦ୍ୱାରା ପର୍ଯ୍ୟଟକମାନେ ସୁବିଧାରେ ପକ୍ଷୀ ଦେଖିପାରିବେ। ଅନ୍ୟପକ୍ଷରେ, ପକ୍ଷୀ ଶିକାର ରୋକିବା ପାଇଁ ବିଭାଗ ପକ୍ଷରୁ କଡ଼ା ପଦକ୍ଷେପ ଗ୍ରହଣ କରାଯିବ। ଶିକାରୀମାନଙ୍କ ଗତିବିଧି ଉପରେ ତୀକ୍ଷ୍ଣ ନଜର ରଖାଯିବ ବୋଲି ମନ୍ତ୍ରୀ ସ୍ପଷ୍ଟ କରିଛନ୍ତି।