ଆମେରିକାର ଟ୍ରମ୍ପ ପ୍ରଶାସନ ପେରୁକୁ ଏକ କଡ଼ା ଚେତାବନୀ ଦେଇଛି। ବୁଧବାର ଦିନ ଆମେରିକା ପକ୍ଷରୁ କୁହାଯାଇଛି ଯେ, ଚୀନର ବିପୁଳ ନିବେଶ ପେରୁର ସାର୍ବଭୌମତ୍ୱ ପ୍ରତି ବିପଦ ସୃଷ୍ଟି କରୁଛି। ବିଶେଷ କରି ଚୀନ ନିର୍ମିତ ଚାଙ୍କେ (Chancay) ବନ୍ଦର ଉପରେ ପେରୁ ସରକାରଙ୍କ ନିୟନ୍ତ୍ରଣ ହ୍ରାସ ପାଉଥିବାରୁ ଆମେରିକା ଗଭୀର ଚିନ୍ତା ପ୍ରକଟ କରିଛି।

"ଶସ୍ତା ଚୀନୀ ଅର୍ଥର ମୂଲ୍ୟ ସାର୍ବଭୌମତ୍ୱ"

ଆମେରିକା ବୈଦେଶିକ ବିଭାଗର ପଶ୍ଚିମ ଗୋଲାର୍ଦ୍ଧ ବ୍ୟାପାର ବ୍ୟୁରୋ ସୋସିଆଲ ମିଡିଆରେ ଏକ ବିବୃତ୍ତି ଜାରି କରି କହିଛି ଯେ, "ଆମେରିକା ପେରୁର ନିଜ ମାଟିରେ ଗୁରୁତ୍ୱପୂର୍ଣ୍ଣ ଭିତ୍ତିଭୂମି ତଦାରଖ କରିବାର ଅଧିକାରକୁ ସମର୍ଥନ କରେ। ଏହା ସମଗ୍ର ଅଞ୍ଚଳ ଏବଂ ବିଶ୍ୱ ପାଇଁ ଏକ ସତର୍କ ଘଣ୍ଟି ହେଉ ଯେ: ଶସ୍ତା ଚୀନୀ ଅର୍ଥର ମୂଲ୍ୟ ଦେଶକୁ ନିଜ ସାର୍ବଭୌମତ୍ୱ ହରାଇବାକୁ ପଡ଼ିପାରେ।" ନିକଟରେ ପେରୁର ଏକ କୋର୍ଟ ଚାଙ୍କେ ବନ୍ଦରକୁ ସ୍ଥାନୀୟ ନିୟାମକ ସଂସ୍ଥା (Ositran) ର ତଦାରଖ ପରିସରରୁ ବାଦ୍ ଦେବା ପରେ ଆମେରିକା ଏହି ପ୍ରତିକ୍ରିୟା ଦେଇଛି।

ବିବାଦୀୟ ଚାଙ୍କେ ବନ୍ଦର ଓ ଚୀନର ପ୍ରଭାବ

ରାଜଧାନୀ ଲିମା ଠାରୁ ଉତ୍ତରରେ ଅବସ୍ଥିତ ଏହି $୧.୩ ବିଲିୟନ ଡଲାରର ବନ୍ଦର ପ୍ରକଳ୍ପଟି ଲାଟିନ୍ ଆମେରିକାରେ ଚୀନର ବଢୁଥିବା ପ୍ରଭାବର ଏକ ପ୍ରତୀକ ପାଲଟିଛି। ଏହି ବନ୍ଦରର ମାଲିକାନା ଚୀନର ସରକାରୀ କମ୍ପାନୀ COSCO Shipping ହାତରେ ରହିଛି। ୨୦୨୪ ମସିହାରେ ଚୀନ ରାଷ୍ଟ୍ରପତି ସି ଜିନପିଙ୍ଗ ଏହାକୁ ଉଦଘାଟନ କରିଥିଲେ। ଆମେରିକା ଆଶଙ୍କା କରୁଛି ଯେ, ଭବିଷ୍ୟତରେ ଚୀନ ଏହି ବନ୍ଦରକୁ ସାମରିକ ଉଦ୍ଦେଶ୍ୟରେ ବ୍ୟବହାର କରିପାରେ ଏବଂ ଏହା ପେରୁ ସରକାରଙ୍କ ନିୟନ୍ତ୍ରଣ ବାହାରକୁ ଚାଲିଯାଇପାରେ।

ଆମେରିକା ଫାଷ୍ଟ ନୀତି ଓ ଲାଟିନ୍ ଆମେରିକା

୨୦୨୬ରେ ଟ୍ରମ୍ପ ପ୍ରଶାସନ ଲାଟିନ୍ ଆମେରିକାରେ ନିଜର ପ୍ରଭାବ ବିସ୍ତାର କରିବାକୁ ଲକ୍ଷ୍ୟ ରଖିଛି, ଯେଉଁଠାରେ ଚୀନ ବାଣିଜ୍ୟ ଓ ଋଣ ମାଧ୍ୟମରେ ନିଜର ସ୍ଥିତି ମଜବୁତ କରିସାରିଛି। ପେରୁ ସରକାରଙ୍କ କୋର୍ଟ ରାୟ ଅନୁଯାୟୀ, ବନ୍ଦର ପରିଚାଳନାରେ ସରକାରୀ ହସ୍ତକ୍ଷେପକୁ ସୀମିତ କରାଯାଇଛି, ଯାହାକୁ ଆମେରିକା 'ପ୍ରିଡେଟରୀ' ବା ଶୋଷଣକାରୀ ଚୀନୀ ନୀତି ବୋଲି ଅଭିହିତ କରିଛି। ତେବେ ବନ୍ଦର କର୍ତ୍ତୃପକ୍ଷ ଏହି ଅଭିଯୋଗକୁ ଖଣ୍ଡନ କରି କହିଛନ୍ତି ଯେ ପେରୁର ଆଇନ ଅନୁଯାୟୀ ସମସ୍ତ କାର୍ଯ୍ୟ ଚାଲିଛି।

ପେରୁ: ଉଡ଼ାଣ ଭରୁଥିବା ସମୟରେ ରନଓ୍ଵେରେ ଦମକଳଗାଡି ସହିତ ଧକ୍କା ହେଲା ବିମାନ । ବିମାନ ଧକ୍କା ହେବା ଫଳରେ ଟ୍ରକରେ ଥିବା ଦୁଇ ଜଣ ଦମକଳ କର୍ମଚାରୀଙ୍କ ମୃତ୍ୟୁ ଘଟିଛି। ପେରୁର ରାଜଧାନୀ ଲିମାର କା‌ଲାଓସ୍ଥିତ ବିମାନ ବନ୍ଦରରେ ଘଟିଛି ଏହି ଦୁର୍ଘଟଣା । ଦୁର୍ଘଟଣା ଏତେ ଅଧିକ ମାତ୍ରାରେ ଥିଲା ଯେ, ଟ୍ରକଟି ଧକ୍କା ହେବା ପରେ ବିମାନରେ ନିଆଁ ଲାଗି ଯାଇଥିଲା। ତେବେ ବିମାନରେ ଥିବା ସମସ୍ତ ଯାତ୍ରୀ ସୁରକ୍ଷିତ ରହିଛନ୍ତି । ବିମାନରେ ୧୦୨ଜଣ ଯାତ୍ରୀ ଓ ୬ଜଣ ପରିଚାରକ ଥିଲେ।

ପେରୁର ଲାଟାମ୍‌ ଏୟାରଲାଇନ୍ସର ବିମାନ ଉଡାଣ ଭରିବା ସମୟରେ ରନଓ୍ଵେରେ ବୀପରିତ ଦିଗରୁ ଆସୁଥିବା ଟ୍ରକ ସହ ଧକ୍କା ହୋଇଥିଲା। ବିମାନର ଗୋଟିଏ ଡେଣା ଟ୍ରକ ସହ ଘସି ହୋଇ ଯାଇଥିଲା ଏବଂ ବିମାନରେ ନିଆଁ ଲାଗି ଯାଇଥିଲା। ସମସ୍ତ ଯାତ୍ରୀ ନିଶ୍ଚିତ ଏକ ବଡ ଦୁର୍ଘଟଣାରୁ ବର୍ତ୍ତି ଯାଇଛନ୍ତି । ତେବେ କିଭଳି ପରିସ୍ଥିତିରେ ଏହି ଦୁର୍ଘଟଣା ଘଟିଲା ସେନେଇ ତଦନ୍ତ ଜାରି ରହିଛି।

In PERU 🇵🇪
A #LATAM Airlines plane taking off from Lima’s international airport struck a firetruck on the runway and caught fire on Saturday. Authorities said the plane’s passengers and crew were all safe, but two firefighters in the truck were killed. #Twitter #latamperu pic.twitter.com/ErXhhwvwZ5

— -🇦🇺|🇺🇸- (@KINGDEMANACATOS) November 19, 2022

ଦୁର୍ଘଟଣା ପରେ ପରେ ତୁରନ୍ତ ଉକ୍ତ ଯାତ୍ରୀବାହୀ ବିମାନକୁ ଅବତରଣ କରାଇ ଦିଆଯାଇଥିଲା। ଉଦ୍ଧାର କାର୍ଯ୍ୟ ନିମନ୍ତେ ‘ଏମର୍ଜେନ୍‌ସି ସର୍ଭିସ୍‌’ ତୁରନ୍ତ ସେଠାକୁ ଧାଇଁ ଯାଇଥି‌ଲା। ତୁରନ୍ତ ପଦକ୍ଷେପ ନିଆଯାଇ ସମସ୍ତ ଯାତ୍ରୀଙ୍କୁ ସୁରକ୍ଷିତ ବାହାର କରାଯାଇଥିବା ବିମାନ ବନ୍ଦରର ଜଣେ ଅଧିକାରୀ କହିଛନ୍ତି। ଦୁର୍ଘଟଣା ମାତ୍ରେ ବିମାନ ବନ୍ଦରର ଅଧିକାରୀ ଏବଂ ଉଦ୍ଧାରକାରୀ ଦଳ ଘଟଣାସ୍ଥଳରେ ପହଞ୍ଚି ଯାଇଥିଲେ। ଦମକଳବାହିନୀ ତୁରନ୍ତ ନିଆଁକୁ ନିୟନ୍ତ୍ରଣ କରିବାକୁ ଉଦ୍ୟମ କରିଥିଲେ। ଅପରାହ୍ଣ ୩.୨୫ରେ ଏହି ଦୁର୍ଘଟଣା ଘଟିଥିବା ‌ରିପୋର୍ଟ କରାଯାଇଛି।

ବୈଚିତ୍ରମୟ ବିଶ୍ବ ବ୍ରହ୍ମାଣ୍ଡ। ତା’ଭିତରେ ଏମିତି କିଛି କିଛି ଘଟଣା ଘଟେ, ଯାହାକୁ କେହି ସହଜରେ ବିଶ୍ବାସକୁ ନିଅନ୍ତି ନାହିଁ। ସେମିତି ଏକ ଅବିଶ୍ବନୀୟ ଘଟଣା ଘଟିଥିଲା ପେରୁରେ। ତାହା ଥିଲା ଜଣେ ପାଞ୍ଚବର୍ଷର ଶିଶୁ କନ୍ୟାର ମାତୃତ୍ବଲାଭ।

ପେରୁ ନିବାସୀ ଲୀନା ମଦିନା ୧୯୩୯ରେ ମାତ୍ର ୫ ବର୍ଷ ବୟସରେ ଏକ ପୁତ୍ର ସନ୍ତାନର ଜନନୀ ହୋଇଥିଲେ। ଅବଶ୍ୟ ଏହି ଖବର ସେତେେବଳେ ଦୁନିଆ ଲାଗି ଚର୍ଚ୍ଚାର ପ୍ରସଙ୍ଗ ପାଲଟିଥିଲା। ଚିକିତ୍ସା ବିଜ୍ଞାନ କ୍ଷେତ୍ରରେ ଏହା ଥିଲା ବିରଳ ଘଟଣା। ୧୯୩୩ ସେପ୍ଟେମ୍ବର ୨୭ରେ ସେ ପେରୁର ତ୍ରିକୋପାରେ ଜନ୍ମଗ୍ରହଣ କରିଥିଲେ। ପାଞ୍ଚ ବର୍ଷ ବୟସ ହୋଇଥିବା ବେଳେ ତାଙ୍କ ପେଟର ଆକାର ଅହେତୁକ ବୃଦ୍ଧି ପାଇଥିଲା। ଏହାକୁ ଦେଖି ତାଙ୍କ ବାପାମାଆ ଭାବିଲେ ଟ୍ୟୁମର୍‌ ଯୋଗୁଁ ପେଟର ଆକାର ବଢ଼ୁଥାଇପାରେ। ସେଥିପାଇଁ ତାଙ୍କର ଡାକ୍ତରୀ ପରୀକ୍ଷା କରାଯାଇଥିଲା।

ପରୀକ୍ଷାରୁ ଜଣାପଡ଼ିଲା, ତାହା ଚିକିତ୍ସଙ୍କୁ ବିସ୍ମୟ କରିଦେଇଥିଲା। ଶିଶୁକନ୍ୟାଟି ୮ ମାସର ଗର୍ଭବତୀ ଥିବା ଜଣାପଡ଼ିଲା। ତେବେ ଡାକ୍ତରଙ୍କ ଅନୁସାରେ ସେ ଥିଲେ ପ୍ରିକୋସିୟସ୍ ପ୍ୟୁବର୍ଟିରେ ପୀଡ଼ିତ। ଯେଉଁଥିପାଇଁ ମାତ୍ର ତିନିବର୍ଷ ବୟସରୁ ତାଙ୍କର ଋତୁସ୍ରାବ ଆରମ୍ଭ ହୋଇଥିଲା। ଅନ୍ୟପଟେ ଏତେ କମ୍ ବୟସରୁ ପ୍ରସବ କରିବା ମଧ୍ୟ ଲୀନାଙ୍କ ଜୀବନ ପ୍ରତି ବିପଦ ଥିଲା। ଏହି ସମସ୍ୟାକୁ ଦୃଷ୍ଟିରେ ରଖି ଏକ ଡାକ୍ତରୀ ଦଳ ତାଙ୍କୁ ମାସେ କାଳ ହସ୍‌ପିଟାଲରେ ସ୍ବତନ୍ତ୍ର ପର୍ଯ୍ୟବେକ୍ଷଣରେ ରଖିଥିଲେ।

୧୯୩୯ ମେ ୧୪ରେ ସେ ଏକ ପୁତ୍ର ସନ୍ତାନକୁ ଜନ୍ମ ଦେଲେ। ଲୀନାଙ୍କ ଅପରେସନ୍ କରିଥିବା ଡାକ୍ତରଙ୍କ ନାଁ ଅନୁସାରେ ତାର ନାଁ ରଖାଗଲା ‘ଗେରାଡୋ’। ଏହି ଖବର ସହ ଲୀନାଙ୍କୁ ନେଇ ଚର୍ଚ୍ଚା ଜୋର୍‌ ଧରିଲା। ସେତେବେଳେ ଗେରୋଡୋର ଲାଳନ ପାଳନ ଲୀନାର ଭାଇ ଭାବେ କରାଯାଉଥିଲା। ଯେତେବେଳେ ଗେରୋଡକୁ ୧୦ ବର୍ଷର ହେଲା ଲୀନା ତା’ ଭଉଣୀ ନୁହେଁ, ବରଂ ମା’ ବୋଲି ଜାଣିବାକୁ ପାଇଲା।

୧୯୭୦ରେ ଲୀନାଙ୍କ ବିବାହ ରାଓଲ ଜୁରାଦୋ ନାମକ ଜଣେ ବ୍ୟକ୍ତିଙ୍କ ସହ ହେଲା। ୧୯୭୨ରେ ଦ୍ବିତୀୟ ସନ୍ତାନର ମଧ୍ୟ ଜନନୀ ହେଲେ ଲୀନା। ୧୯୭୯ରେ ତାଙ୍କ ପ୍ରଥମ ସନ୍ତାନ ୪୦ ବର୍ଷ ବୟସରେ ଅସ୍ଥିମଜ୍ଜା ସମସ୍ୟାରେ ଆକ୍ରାନ୍ତ ହୋଇ ପ୍ରାଣ ହରାଇଲେ। ତେବେ ଲୀନାଙ୍କୁ ନେଇ ସବୁଠୁ ବଡ଼ ପ୍ରଶ୍ନ ଉଠିଲା ସେ ଏତେ କମ୍ ବୟସରେ ମା’ ହେଲେ କେମିତି?

ଏହି ଘଟଣାକୁ ନେଇ ଲୀନାଙ୍କ ବାପାଙ୍କୁ ସନ୍ଦେହ କରି ପୋଲିସ୍ ଗିରଫ କରିଥଲା। କିନ୍ତୁ ତାଙ୍କ ବିରୋଧରେ ଠୋସ୍ ପ୍ରମାଣ ଅଭାବରୁ ସେ ଏଥିରୁ ମୁକୁଳି ଯାଇଥିଲେ। ଏପରିକି ଲୀନା ମଧ୍ୟ ଏହି ଘଟଣାକୁ ନେଇ କିଛି ପ୍ରଘଟ କଲେ ନାହିଁ। ଯେଉଁଥିପାଇଁ ଏ ଘଟଣା ଆଜି ଯାଏଁ ରହସ୍ୟମୟ ହୋଇ ରହିଛି।