ଗତ ରାତିରେ ୟୁକ୍ରେନ ଉପରେ ଋଷିଆ ପକ୍ଷରୁ କରାଯାଇଥିବା ଭୟଙ୍କର କ୍ଷେପଣାସ୍ତ୍ର ଓ ଡ୍ରୋନ୍ ଆକ୍ରମଣରେ ଜଣେ ଭାରତୀୟ ନାଗରିକଙ୍କ ସମେତ ମୋଟ ୧୨ ଜଣଙ୍କର ମୃତ୍ୟୁ ଘଟିଛି। ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ମଙ୍ଗଳବାର ଦିନ ନିଜେ ସୋସିଆଲ ମିଡିଆ ମାଧ୍ୟମରେ ଏହି ସୂଚନା ପ୍ରଦାନ କରିଛନ୍ତି। ଏହି ଆକ୍ରମଣରେ ଅନ୍ୟ ଡଜନ ଡଜନ ଲୋକ ଆହତ ମଧ୍ୟ ହୋଇଛନ୍ତି।

କେଉଁ ଅଞ୍ଚଳରେ ହୋଇଛି ଆକ୍ରମଣ?

ଜେଲେନସ୍କିଙ୍କ ସୂଚନା ଅନୁଯାୟୀ, ଋଷିଆ ସେନା କିଭ୍ (Kyiv) ସମେତ ୟୁକ୍ରେନର ପ୍ରାୟ ୧୦ଟି ଅଞ୍ଚଳ ଉପରେ ବାଲିଷ୍ଟିକ୍ କ୍ଷେପଣାସ୍ତ୍ର ଏବଂ ଜେଟ୍-ଚାଳିତ ଡ୍ରୋନ୍ ଜରିଆରେ ଆକ୍ରମଣ କରିଥିଲା। ଏହି ତାଲିକାରେ ଓଡେସା, ଖେରସନ, ଡୋନେସ୍କ, ଜାପୋରିଜିଆ, ଖାର୍କିଭ୍, ଚେର୍ନିହିଭ୍, ସୁମି ଏବଂ ଡ୍ନିପ୍ରୋପେଟ୍ରୋଭସ୍କ ଆଦି ସ୍ଥାନ ରହିଛି। ବିଶେଷ କରି କିଭ୍‌ର ଏକ ରେଳ ଡିପୋ ଉପରେ ହୋଇଥିବା ଷ୍ଟ୍ରାଇକ୍‌ରେ ୭ ଜଣଙ୍କର ମୃତ୍ୟୁ ଘଟିଥିବା ବେଳେ ବୋରିସ୍‌ପିଲ୍ (Boryspil) ସହରରେ ଏକ ୫ ମହଲା ଆବାସିକ କୋଠା ଏବଂ ବ୍ୟବସାୟିକ ପ୍ରତିଷ୍ଠାନ ଉପରେ ହୋଇଥିବା ଆକ୍ରମଣରେ ୪ ଜଣ ପ୍ରାଣ ହରାଇଛନ୍ତି ଏବଂ ୧୩ ଜଣ ଆହତ ହୋଇଛନ୍ତି। ସେଠାରୁ ପ୍ରାୟ ୫୦ ଜଣଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି।

ଭିତ୍ତିଭୂମିର ବ୍ୟାପକ କ୍ଷତି ଓ ଉଦ୍ଧାର କାର୍ଯ୍ୟ

ଏହି ବର୍ବରୋଚିତ ଆକ୍ରମଣ କାରଣରୁ ୟୁକ୍ରେନର ବ୍ୟାପକ ସାଧାରଣ ଓ ଆବାସିକ ଭିତ୍ତିଭୂମି ନଷ୍ଟ ହୋଇଛି। ଓଡେସା ଏବଂ ଆଖପାଖ ଅଞ୍ଚଳରେ ଡ୍ରୋନ୍ ଓ ବୋମା ମାଡ଼ ଯୋଗୁଁ ହଜାର ହଜାର ପରିବାର ବିଦ୍ୟୁତ୍ ସେବାରୁ ବଞ୍ଚିତ ହୋଇଛନ୍ତି ଏବଂ ବିଦ୍ୟୁତ୍ ସରବରାହ ସ୍ୱାଭାବିକ କରିବାକୁ ଉଦ୍ୟମ ଜାରି ରହିଛି। ଏହାସହ ରୋମାନିଆ ସୀମା ନିକଟରେ ଥିବା ଏକ ଚେକପୋଷ୍ଟ୍ ଏବଂ ରପ୍ତାନି ଭିତ୍ତିଭୂମି ମଧ୍ୟ କ୍ଷତିଗ୍ରସ୍ତ ହୋଇଛି।

ୟୁକ୍ରେନର ଉଦ୍ଧାରକାରୀ ଦଳ ଯୁଦ୍ଧକାଳୀନ ଭିତ୍ତିରେ ଉଦ୍ଧାର କାର୍ଯ୍ୟ ଚଳାଇଛନ୍ତି। କେବଳ କିଭ୍ ଅଞ୍ଚଳରେ ଆଖପାଖର ବିଭିନ୍ନ ସ୍ଥାନରେ ପ୍ରାୟ ୩୫୦ ଜଣ ଅଗ୍ନିଶମ ଓ ଉଦ୍ଧାରକାରୀ ନିୟୋଜିତ ହୋଇଛନ୍ତି। ନିଜର ଶୋକବାର୍ତ୍ତାରେ ମୃତକଙ୍କ ପରିବାରକୁ ସମବେଦନା ଜଣାଇବା ସହ, ଜେଲେନସ୍କି ପାଶ୍ଚାତ୍ୟ ଦେଶଗୁଡ଼ିକୁ ସାମରିକ ସହାୟତା ଓ ବାୟୁ ପ୍ରତିରକ୍ଷା ବ୍ୟବସ୍ଥା (Air defense systems) ଆହୁରି ମଜବୁତ କରିବା ପାଇଁ ନିବେଦନ କରିଛନ୍ତି। ସେ ସ୍ପଷ୍ଟ କରିଛନ୍ତି ଯେ, ଋଷିଆ କେବଳ ଧନଜୀବନ ନଷ୍ଟ କରିବାକୁ ଲକ୍ଷ୍ୟ ରଖିଛି, ତେଣୁ ୟୁକ୍ରେନକୁ ମିଳୁଥିବା ସହାୟତା ପ୍ୟାକେଜ୍ ଉପରେ ହିଁ ଏହି ଯୁଦ୍ଧର ଭବିଷ୍ୟତ ନିର୍ଭର କରୁଛି।

ରୁଷିଆ ଓ ୟୁକ୍ରେନ୍ ମଧ୍ୟରେ ଜାରି ରହିଥିବା ଯୁଦ୍ଧ ଏବେ ଏକ ନୂଆ ମୋଡ଼ ନେଇଛି। ୟୁକ୍ରେନ୍ ନିଜର ସୀମାଠାରୁ ପ୍ରାୟ ୧,୨୦୦ କିଲୋମିଟର ଦୂରରେ ଥିବା ରୁଷିଆର ତାତାରସ୍ତାନ ଅଞ୍ଚଳର ନିଜନେକାମସ୍କ (Nizhnekamsk) ସହର ଉପରେ ଏକ ବଡ଼ ଧରଣର ଡ୍ରୋନ୍ ଆକ୍ରମଣ କରିଛି। ସୋମବାର ସକାଳେ ହୋଇଥିବା ଏହି ଆକ୍ରମଣରେ ଅତିକମରେ ୧୨ ଜଣଙ୍କର ମୃତ୍ୟୁ ଘଟିଥିବା ବେଳେ ୩୯ ଜଣ ଆହତ ହୋଇଛନ୍ତି ବୋଲି ସ୍ଥାନୀୟ ପ୍ରଶାସନ ପକ୍ଷରୁ ସୂଚନା ଦିଆଯାଇଛି।

ଆକ୍ରମଣର ଲକ୍ଷ୍ୟ ଏବଂ କ୍ଷୟକ୍ଷତି

ନିଜନେକାମସ୍କର ମେୟର ରାଡମିର୍ ବେଲୟାୟେଭ୍ଙ୍କ ସୂଚନା ଅନୁଯାୟୀ, ଏହି ଡ୍ରୋନ୍ ଆକ୍ରମଣରେ ମୁଖ୍ୟତଃ ଔଦ୍ୟୋଗିକ ଏବଂ ବେସାମରିକ ସୁବିଧାଗୁଡ଼ିକୁ ଟାର୍ଗେଟ୍ କରାଯାଇଛି। ସୋସିଆଲ୍ ମିଡିଆରେ ଭାଇରାଲ୍ ହେଉଥିବା ଭିଡିଓରେ ତେଲ ରିଫାଇନାରୀ ଅଞ୍ଚଳରୁ କଳା ଧୂଆଁ ବାହାରୁଥିବା ଦେଖିବାକୁ ମିଳିଛି। ଏହି ସହର ରୁଷିଆର ଏକ ପ୍ରମୁଖ ତେଲ ବିଶୋଧନାଗାର କେନ୍ଦ୍ର ଭାବରେ ପରିଚିତ। ଏଠାରେ ଦୁଇଟି ପ୍ରମୁଖ ତେଲ ରିଫାଇନାରୀ ଏବଂ ଏକ ପେଟ୍ରୋକେମିକାଲ୍ ପ୍ଲାଣ୍ଟ ରହିଛି, ଯେଉଁଥିରେ ରୁଷିଆର ସବୁଠାରୁ ଉନ୍ନତ ଟ୍ୟାନେକୋ (TANECO) ରିଫାଇନାରୀ ମଧ୍ୟ ସାମିଲ ଅଛି। ଆକ୍ରମଣ ପରେ ତାତାରସ୍ତାନର ମୁଖ୍ୟ ରୁସ୍ତମ୍ ମିନ୍ନିଖାନୋଭ୍ ରାଜ୍ୟରେ ଶୋକ ଘୋଷଣା କରିଛନ୍ତି।

ୟୁକ୍ରେନର ରଣନୀତି ଏବଂ ରୁଷିଆର ପ୍ରତିକ୍ରିୟା

ଗତ କିଛି ମାସ ହେବ ୟୁକ୍ରେନ୍ କ୍ରମାଗତ ଭାବରେ ରୁଷିଆର ତେଲ ରିଫାଇନାରୀଗୁଡ଼ିକ ଉପରେ ଲମ୍ବା ଦୂରଗାମୀ ଡ୍ରୋନ୍ ମାଧ୍ୟମରେ ଆକ୍ରମଣ କରୁଛି। ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର୍ ଜେଲେନସ୍କିଙ୍କ ମତରେ, ଏହି ଆକ୍ରମଣଗୁଡ଼ିକର ମୁଖ୍ୟ ଉଦ୍ଦେଶ୍ୟ ହେଉଛି ରୁଷିଆର ରାଷ୍ଟ୍ରପତି ଭ୍ଲାଦିମିର୍ ପୁଟିନଙ୍କୁ ଆଲୋଚନା ଟେବୁଲକୁ ଆଣିବା ଏବଂ ଯୁଦ୍ଧ ବନ୍ଦ କରିବା ପାଇଁ ବାଧ୍ୟ କରିବା। ଏହି ଧାରାବାହିକ ଆକ୍ରମଣ ଯୋଗୁଁ ରୁଷିଆରେ ଇନ୍ଧନ ଅଭାବ ଦେଖାଦେବା ସହ ରିଫାଇନିଂ କ୍ଷମତା ହ୍ରାସ ପାଇଛି। ଅନ୍ୟପକ୍ଷରେ, ରୁଷିଆର ପ୍ରତିରକ୍ଷା ମନ୍ତ୍ରଣାଳୟ ଦାବି କରିଛି ଯେ ସେମାନେ ନିଜ ଆକାଶମାର୍ଗରେ ପ୍ରାୟ ୪୫୬ଟି ୟୁକ୍ରେନୀୟ ଡ୍ରୋନ୍ କୁ ଅଟକାଇ ନଷ୍ଟ କରିଦେଇଛନ୍ତି।

ୟୁକ୍ରେନ ପକ୍ଷରୁ ଋଷର ବିଭିନ୍ନ ତୈଳ ଡିପୋ ଏବଂ ସମୁଦ୍ରରେ ଥିବା ତୈଳ ଟ୍ୟାଙ୍କର ଉପରେ ବଡ଼ ଧରଣର ଡ୍ରୋନ୍ ଆକ୍ରମଣ କରାଯାଇଛି। ବୁଧବାର ଓ ଗୁରୁବାର ରାତିରେ ହୋଇଥିବା ଏହି ଘନଘନ ଆକ୍ରମଣରେ ଆଜୋଭ୍ ସାଗରରେ ଥିବା ୨ଟି ତୈଳ ଟ୍ୟାଙ୍କରରେ ନିଆଁ ଲାଗିଯାଇଛି। ଏହି ଘଟଣା ଏବେ ଋଷ ଏବଂ ୟୁକ୍ରେନ ମଧ୍ୟରେ ଥିବା ଯୁଦ୍ଧ ପରିସ୍ଥିତିକୁ ଆହୁରି ଉତ୍ତେଜନାପୂର୍ଣ୍ଣ କରିଦେଇଛି।

ବିଭିନ୍ନ ଅଞ୍ଚଳରେ ହୋଇଛି ଆକ୍ରମଣ

ଋଷର ଅନେକ ଅଞ୍ଚଳ ଯଥା ଟ୍ଭେର୍ (Tver), ଷ୍ଟାଭ୍ରୋପୋଲ୍ କ୍ରାଇ (Stavropol Krai) ଏବଂ ରୋସ୍ତୋଭ୍ (Rostov) ଅଞ୍ଚଳରେ ଏହି ଡ୍ରୋନ୍ ମାଡ଼ ହୋଇଛି। ଟ୍ଭେର୍ ଏବଂ ଷ୍ଟାଭ୍ରୋପୋଲ୍ ଠାରେ ଥିବା ତୈଳ ଗଚ୍ଛିତ କେନ୍ଦ୍ର (ଅଏଲ୍ ଡିପୋ)ରେ ଭୟାବହ ଅଗ୍ନିକାଣ୍ଡ ଘଟିଛି। ସ୍ଥାନୀୟ ପ୍ରଶାସନର କହିବା ଅନୁଯାୟୀ, ନିଆଁକୁ ଆୟତ୍ତ କରିବା ପାଇଁ ଉଦ୍ୟମ ଜାରି ରହିବା ସହ ସୁରକ୍ଷା ଦୃଷ୍ଟିରୁ ଆଖପାଖ ଅଞ୍ଚଳର ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି। ଆଜୋଭ୍ ସାଗରରେ ଆକ୍ରମଣର ଶିକାର ହୋଇଥିବା ଦୁଇଟି ଯାକ ଟ୍ୟାଙ୍କରର କର୍ମଚାରୀଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି ବୋଲି ରୋସ୍ତୋଭ୍ ଗଭର୍ଣ୍ଣର ୟୁରି ସ୍ଲ୍ୟୁସର୍ ପ୍ରକାଶ କରିଛନ୍ତି।

ଋଷର ସାମରିକ ଯୋଗାଣ କାଟିବାକୁ ଉଦ୍ୟମ

ୟୁକ୍ରେନ୍ ସେନା ପକ୍ଷରୁ ସ୍ପଷ୍ଟ କରାଯାଇଛି ଯେ, ଋଷର ସାମରିକ ଏବଂ ଅର୍ଥନୈତିକ କ୍ଷମତାକୁ ହ୍ରାସ କରିବା ପାଇଁ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଆଜୋଭ୍ ସାଗରରେ ମୋଟ୍ ୧୨ଟି ଋଷୀୟ ଟ୍ୟାଙ୍କର, ଗୋଟିଏ ଟଗବୋଟ୍ ଏବଂ ଗୋଟିଏ କାର୍ଗୋ ଜାହାଜ ଉପରେ ୟୁକ୍ରେନ ସଫଳତାର ସହ ଟାର୍ଗେଟ୍ କରିଛି। ଏହି ସବୁ ଜାହାଜ ଗୁଡ଼ିକ ଋଷ ସେନାକୁ ଇନ୍ଧନ ଏବଂ ଅନ୍ୟାନ୍ୟ ସାମଗ୍ରୀ ଯୋଗାଇବା ପାଇଁ ବ୍ୟବହାର ହେଉଥିଲା। ଏହି ଧାରାବାହିକ ଆକ୍ରମଣ ଫଳରେ ଋଷର ଅନେକ ଅଞ୍ଚଳରେ ଇନ୍ଧନ ଅଭାବ ଦେଖାଦେବା ସହ ଗାଡ଼ି ଚାଳକମାନେ ଘଣ୍ଟା ଘଣ୍ଟା ଧରି ପେଟ୍ରୋଲ୍ ପମ୍ପରେ ଲାଇନ ଲଗାଉଥିବା ଦେଖିବାକୁ ମିଳିଛି।

୭୩ଟି ଡ୍ରୋନ୍ ଖସାଇଥିବା ଦାବି କଲା ଋଷ

ଅନ୍ୟପଟେ ଋଷର ପ୍ରତିରକ୍ଷା ମନ୍ତ୍ରଣାଳୟ ଦାବି କରିଛି ଯେ, ସେମାନେ ନିଜର ବାୟୁ ପ୍ରତିରକ୍ଷା ବ୍ୟବସ୍ଥା ଦ୍ୱାରା ୟୁକ୍ରେନର ପ୍ରାୟ ୭୩ଟି ଡ୍ରୋନ୍ କୁ ଆକାଶ ମାର୍ଗରେ ନଷ୍ଟ କରିଦେଇଛନ୍ତି। ସୂଚନାଯୋଗ୍ୟ ଯେ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ୟୁକ୍ରେନକୁ ପ୍ୟାଟ୍ରିଅଟ୍ ବାୟୁ ପ୍ରତିରକ୍ଷା ବ୍ୟବସ୍ଥା ନିର୍ମାଣ ପାଇଁ ଲାଇସେନ୍ସ ଦେବାକୁ ଘୋଷଣା କରିବାର ଗୋଟିଏ ଦିନ ପରେ ୟୁକ୍ରେନ୍ ପକ୍ଷରୁ ଏହି ବଡ଼ ଧରଣର ଆକ୍ରମଣ କରାଯାଇଛି। ଏହା ଋଷ ପାଇଁ ଏକ ବଡ଼ ଝଟକା ବୋଲି ସାମରିକ ବିଶେଷଜ୍ଞମାନେ ମତ ଦେଇଛନ୍ତି।

ନୂଆଦିଲ୍ଲୀ(ଏଜେନ୍ସି): ଗିରଫ ହୋଇପାରନ୍ତି ରୁଷ୍‌ ରାଷ୍ଟ୍ରପତି ଭ୍ଲାଦିମିର୍ ପୁଟିନ୍। ୟୁକ୍ରେନରେ ଯୁଦ୍ଧ ଅପରାଧକୁ ନେଇ ରୁଷ୍‌ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ବିରୋଧରେ ଇଣ୍ଟରନ୍ୟାସନାଲ କ୍ରିମିନାଲ କୋର୍ଟ (ଆଇସିସି) ଗିରଫ ପରୱାନା ଜାରି କରିଛନ୍ତି। ୟୁକ୍ରେନରେ ଶିଶୁଙ୍କ ଅପହରଣ ଏବଂ ବେଆଇନ ଚାଲାଣ ପାଇଁ ପୁଟିନ୍ ଦାୟୀ ବୋଲି କୋର୍ଟ କହିଛନ୍ତି। ୟୁକ୍ରେନ ଉପରେ ଆକ୍ରମଣ କରି ବଡ଼ ଅପରାଧ କରିଛନ୍ତି ପୁଟିନ । ୟୁକ୍ରେନ ଉପରେ ଆକ୍ରମଣ ଯୋଗୁଁ ହଜାର ହଜାର ଶିଶୁ, ମହିଳା ଓ ସାଧାରଣ ଲୋକଙ୍କର ମୃତ୍ୟୁ ହୋଇଥିବା ବେଳେ ଏଥିପାଇଁ ଦାୟୀ ପୁଟିନ୍। ତାଙ୍କୁ ଗିରଫ କରିବାର ଆବଶ୍ୟକତା ରହିଛି ବୋଲି ଇଣ୍ଟରନ୍ୟାସନାଲ କ୍ରିମିନାଲ କୋର୍ଟ କହିଛନ୍ତି । ମାନବାଧିକାର ସଂଗଠନଗୁଡିକ କୋର୍ଟଙ୍କ ଏହି ନିଷ୍ପତ୍ତିକୁ ସ୍ବାଗତ କରିଛନ୍ତି। ରିପୋର୍ଟ ଅନୁଯାୟୀ ଆଇସିଜେର ପ୍ରି-ଟ୍ରାଏଲ ଚ୍ୟାମ୍ବରରେ ପୁଟିନଙ୍କ ସମେତ ରୁଷିଆର ଶିଶୁ ଅଧିକାର କମିଶନର ମାରିୟା ଆଲେକ୍ସୟେଭନା ଲଭୋଭା-ବେଲୋଭାଙ୍କ ବିରୋଧରେ ଗିରଫ ପରୱାନା ଜାରି କରାଯାଇଛି।

ରୁଷ୍‌ ଓ ୟୁକ୍ରେନ୍ ମଧ୍ୟରେ ବିବାଦକୁ ନେଇ ଶୁଣାଣି ହୋଇଥିବା ବେଳେ କୋର୍ଟ ଏହି ରାୟ ଦେଇଛନ୍ତି । କୋର୍ଟ କହିଛନ୍ତି ଯେ ରୁଷ୍‌ ରାଷ୍ଟ୍ରପତି ଅକ୍ତିଆର କରିଥିବା ୟୁକ୍ରେନ ଅଞ୍ଚଳରୁ ରୁଷକୁ ବେଆଇନ ଭାବେ ଲୋକଙ୍କ ସ୍ଥାନାନ୍ତରଣର ଯୁଦ୍ଧ ଅପରାଧ ପାଇଁ କଥିତ ରୂପେ ଦାୟୀ ଅଟନ୍ତି । ଅନ୍ୟପଟେ ୟୁକ୍ରେନ ବିରୋଧରେ ଆକ୍ରମଣକୁ ଯୁଦ୍ଧ ବୋଲି କହିବାକୁ ନେଇ ଅସନ୍ତୋଷ ପ୍ରକାଶ କରିଛି ରୁଷ୍‌ । ଏହା ଏକ ଯୁଦ୍ଧ ନୁହେଁ ବରଂ ୟୁକ୍ରେନ ରୁଷ୍‌ ବିରୋଧରେ ନେଇଥିବା ବିଭିନ୍ନ ପଦକ୍ଷେପର ଜବାବ ଦିଆଯାଇଛି ବୋଲି କହିଛନ୍ତି । ରୁଷ୍‌ ଆକ୍ରମଣ କରିବା ପରେ ଲକ୍ଷାଧିକ ଲୋକଙ୍କ ଘର ଉଜୁଡି ଯାଇଛି । ଏହାକୁ ଓ୍ବାର କ୍ରାଇମ ବୋଲି କହିଛନ୍ତି ଇଣ୍ଟରନ୍ୟାସନାଲ କ୍ରିମିନାଲ କୋର୍ଟ ।

କିଭ: ରୁଷ ଏବଂ ୟୁକ୍ରେନ ଯୁଦ୍ଧ ଥମିବାର ନାଁ ଧରୁନି । ଏହା ଏବେ ବର୍ଷେ ପୂରିବାକୁ ଯାଉଛି। ଆମେରିକା ରାଷ୍ଟ୍ରପତି ଜୋ ବାଇଡେନ ଠିକ ଏହା ପୂର୍ବରୁ ୟୁକ୍ରେନ ଗସ୍ତରେ ଯିବା ସମସ୍ତଙ୍କୁ ଆଶ୍ଚର୍ଯ୍ଯ କରି ଦେଇଛି । ୨୪ ଫେବୃୟାରୀ ୨୦୨୨ରେ ୟୁକ୍ରେନ ଉପରେ ରୁଷ ଆକ୍ରମଣ କରିଥିଲା । ଯୁଦ୍ଧ ପରେ ପ୍ରଥମ ଥର ପାଇଁ ବାଇଡେନ ଏଠାରେ ପହଞ୍ଚିଛନ୍ତି । ଆମେରିକା ଏବଂ ଅନ୍ୟ ୟୁରୋପୀୟ ଦେଶଗୁଡିକ ୟୁକ୍ରେନକ ଅସ୍ତ୍ର ଶସ୍ତ୍ର ଓ ସୈନ୍ୟ ସହଯୋଗ କରି ଆସୁଛନ୍ତି । ରୁଷ ବର୍ଷ ପୂରଣ ଅବସରରେ ୟୁକ୍ରେନ ଉପରେ ବଡ ଧରଣର ଆକ୍ରମଣ କରିବାକୁ ଯାଉଥିବା ବିଭିନ୍ନ ଗୋଇନ୍ଦା ବିଭାଗ ସୂଚେଇ ଥିଲେ । ରୁଷ ଯେପରି ୟୁକ୍ରେନକୁ ଦୁର୍ବଳ ନ ଭାବିବ ସେଥିପାଇଁ ବାଇଡେନ କିଭ ଯାଇଥିବା ଅନୁମାନ କରାଯାଉଛି ।

ୟୁକ୍ରେନରେ ପହଞ୍ଚିବା ପରେ ବାଇଡେନ ଯୁଦ୍ଧ ଦ୍ୱାରା ପ୍ରଭାବିତ ଦେଶକୁ ଅଧିକ ସହାୟତା କରିବାକୁ ଘୋଷଣା କରିଛନ୍ତି। ୟୁକ୍ରେନକୁ ସେ ଅଧିକରୁ ଅଧିକ ନୂତନ ଅସ୍ତ୍ର ଯୋଗାଇବେ ବୋଲି କହିଛନ୍ତି। ୟୁକ୍ରେନକୁ ସୁରକ୍ଷା ଦେବା ପାଇଁ ସେ ଏୟାର ସର୍ଭେଲାନ୍ସ ରାଡାର ଦେବାକୁ ଘୋଷଣା କରିଛନ୍ତି।

ୟୁକ୍ରେନକୁ ୫୦୦ ମିଲିୟନ ଡଲାର ସାମରିକ ସହାୟତା ଯୋଗାଇବ ଆମେରିକା:

ୟୁକ୍ରେନର ରାଷ୍ଟ୍ରପତି ଜେଲେନସ୍କି କହିଛନ୍ତି ଯେ, ଆମେରିକାର ରାଷ୍ଟ୍ରପତିଙ୍କ କିଭ ଗସ୍ତ ୟୁକ୍ରେନ ପାଇଁ ସମର୍ଥନର ଏକ ଗୁରୁତ୍ୱପୂର୍ଣ୍ଣ ସଙ୍କେତ ଅଟେ। ନ୍ୟୁଜ୍ ଏଜେନ୍ସି ରାଉଟର୍ସ ଅନୁଯାୟୀ, ବାଇଡେନ ମଙ୍ଗଳବାର ୟୁକ୍ରେନକୁ ୫୦୦ ମିଲିୟନ ଡଲାର ସାମରିକ ସହାୟତା ଘୋଷଣା କରିବେ। ଆମେରିକାର ରାଷ୍ଟ୍ରପତି କିଭ ଗସ୍ତ ସମୟରେ କହିଛନ୍ତି। ୟୁକ୍ରେନର ଗଣତନ୍ତ୍ର, ସାର୍ବଭୌମତ୍ୱ ଏବଂ ଆଞ୍ଚଳିକ ଅଖଣ୍ଡତା ପ୍ରତି ଆମର ଅଦମ୍ୟ ପ୍ରତିବଦ୍ଧତାକୁ ନିଶ୍ଚିତ କରିବାକୁ ମୁଁ କିବରେ ଅଛି।

ଆମେରିକାର ରାଷ୍ଟ୍ରପତି କହିଛନ୍ତି ଯେ, ଏକ ବର୍ଷ ପୂର୍ବେ ଯେତେବେଳେ ପୁଟିନ ୟୁକ୍ରେନ ଉପରେ ଆକ୍ରମଣ କରିଥିଲେ ସେତେବେଳେ ସେ ଭାବିଥିଲେ ଯେ ୟୁକ୍ରେନ ଦୁର୍ବଳ ଏବଂ ପାଶ୍ଚାତ୍ୟ ବିଭାଜିତ ହୋଇଛି । କିନ୍ତୁ ସେ ଭାବିବା ଭୁଲ୍ ଥିଲା। ଗତ ଏକ ବର୍ଷ ମଧ୍ୟରେ ଆମେରିକା ୟୁକ୍ରେନକୁ ସାମରିକ, ଅର୍ଥନୈତିକ ଏବଂ ମାନବିକ ସହାୟତା ଯୋଗାଇ ଦେଇଛି। ଏହି ସମର୍ଥନ ଜାରି ରହିବ।

କିଭ୍: ଶକ୍ତିଶାଳୀ ହେବ ୟୁକ୍ରେନ ସେନା । ଏଣିକି ୟୁକ୍ରେନକୁ ଟକ୍କର ଦେବା ଋଷ ପକ୍ଷେ ହୋଇପାରେ କଷ୍ଟକର । କାରଣ ଖୁବ୍ ଶୀଘ୍ର ଆମେରିକାଠାରୁ ୟୁକ୍ରେନ ପାଇବ ୩୧ଟି ଶକ୍ତିଶାଳୀ M1 ଆବ୍ରାହମସ୍ ଟ୍ୟାଙ୍କ । ଏନେଇ ଘୋଷଣା କରିଛି ଆମେରିକା । ସେପଟେ ଲିଓପାର୍ଡ ଟ୍ୟାଙ୍କ ଯୋଗାଇବାକୁ ବି ଜର୍ମାନୀ ଘୋଷଣା କରିଛି । ଯୁଦ୍ଧ ପ୍ରସଙ୍ଗରେ ଅନୁଷ୍ଠିତ ପ୍ରମୁଖ ୟୁରୋପୀୟ ରାଷ୍ଟ୍ରଙ୍କ ବୈଠକରେ ୟୁକ୍ରେନକୁ ଟ୍ୟାଙ୍କ ଯୋଗାଣ ନେଇ ଘୋଷଣା କରିଛନ୍ତି ଆମେରିକା ରାଷ୍ଟ୍ରପତି ଜୋ ବାଇଡେନ । ଏହି ଟ୍ୟାଙ୍କ ଯୋଗାଣ ପୂର୍ବରୁ ପ୍ରଶିକ୍ଷଣ କାର୍ଯ୍ୟକ୍ରମ ଆରମ୍ଭ ହେବ । ୧୯୮୦ ଦଶକରେ ପ୍ରଥମ ଥର ଲାଗି ଏହି ଧରଣର ଟ୍ୟାଙ୍କର ବ୍ୟବହାର କରିଥିଲା ଆମେରିକା । ୧୨୦ ମିଲିମିଟିର ମେନ୍ ଗନ ଓ ୫୦ କାଲିବର କ୍ଷମତା ବିଶିଷ୍ଟ ଟ୍ୟାଙ୍କର ୧୫୦୦ ହର୍ଷ ପାଓ୍ବାର ଟର୍ବାଇନ ଇଞ୍ଜିନ ରହିଛି ।

ତେବେ ୟୁକ୍ରେନରେ ଆବ୍ରାହମସ ଟ୍ୟାଙ୍କ ବ୍ୟବହାରର ଯଥାର୍ଥତାକୁ ନେଇ ସନ୍ଦେହ ବ୍ୟକ୍ତ କରିଛନ୍ତି ଆମେରିକୀୟ ପ୍ରତିରକ୍ଷା କର୍ମକର୍ତ୍ତା । ଇନ୍ଧନର ପର୍ଯ୍ୟାପ୍ତ ଆବଶ୍ୟକତା ଓ ତାଲିମ ପ୍ରଦାନ କଷ୍ଟକର ହୋଇଥିବାରୁ ସେମାନେ ଟ୍ୟାଙ୍କ ଯୋଗାଣକୁ ନେଇ ପ୍ରଶ୍ନ କରିଛନ୍ତି । ସେପଟେ ୟୁକ୍ରେନର ବାରମ୍ବାର ଅନୁରୋଧ ଓ ସହଯୋଗୀ ରାଷ୍ଟ୍ରର ଚାପ ଯୋଗୁ ୧୪ଟି ଲିଓପାର୍ଡ ୨ A6 ଟ୍ୟାଙ୍କ ଯୋଗାଇବାକୁ ଜର୍ମାନୀ ଘୋଷଣା କରିଛି । ଏହି ଟ୍ୟାଙ୍କ ପରିଚାଳନା ଲାଗି ଜର୍ମାନୀରେ ପ୍ରଶିକ୍ଷଣ କାର୍ଯ୍ୟକ୍ରମ ହେବ ବୋଲି କହିଛନ୍ତି ଚାନସେଲର ଓଲାଫ ସ୍କଜ । ସେପଟେ ଫିନଲ୍ୟାଣ୍ଡ ଓ ପୋଲାଣ୍ଡ ମଧ୍ଯ ୟୁକ୍ରେନକୁ ଅସ୍ତ୍ର ଦେବାକୁ ଘୋଷଣା କରିଛନ୍ତି । ତେଣେ ଏହି ଟ୍ୟାଙ୍କ ଯୋଗାଣ ଘୋଷଣାକୁ ବିରୋଧ କରିଛନ୍ତି କ୍ରେମଲିନ ମୁଖପାତ୍ର ଦିମିତ୍ରି ପେସକୋଭ ।

ୟୁକ୍ରେନ: ରୁଷ-ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧ ଥମିବାର ନାଁ ଧରୁନାହିଁ । ଲଗାତାର ୧୧ମାସ ହେବ ଜାରି ରହିଥିବା ରୁଷ ୟୁକ୍ରେନ୍ ଯୁଦ୍ଧରେ ଆକ୍ରମଣ ପ୍ରତିଆକ୍ରମଣ ଜାରି ରହିଛି । ରୁଷ ଲଗାତାର ୟୁକ୍ରେନ୍ ଉପରେ ମିଜାଇଲ୍ ତୋପ ମାଡ କରୁଥିବା ବେଳେ ଏହାର ପ୍ରତିଜଵାବ ଦେଉଛି ୟୁକ୍ରେନ୍ । ରୁଷ ସେନା ଉପରେ ୟୁକ୍ରେନ୍ ପ୍ରତି ଆକ୍ରମଣ କରୁଛି । ରୁଷୀୟ ଯବାନଙ୍କ ଉପରେ ଭାରି ପଡୁଛି ୟୁକ୍ରେନକୁ ଆମେରିକା ଦେଇଥିବା ମିଜାଇଲ୍ । ଏହି ଅସ୍ତ୍ର ସାହାଯ୍ୟରେ ୟୁକ୍ରେନ୍ ସେନା ରୁଷ ସେନା ଉପରେ ଘାତକ ଆକ୍ରମଣ କରିଛି । ଯେଉଁଥିରେ ରୁଷର ପାଖାପାଖି ୬୩ ସୈନିକ ମୃତ୍ୟୁବରଣ କରିଛନ୍ତି ।

ଏକ ଜାତୀୟ ଗଣମାଧ୍ୟମରେ ପ୍ରକାଶ ପାଇଥିବା ସୂଚନା ଅନୁସାରେ, ୟୁକ୍ରେନର ଏକ ସହର ମକିଭାକ୍ ରୁଷର କବ୍ଚାରେ ରହିଛି । ସେଠାରେ ରୁଷ ସେନା ଏକ ସେନା ବେସ୍ ନିର୍ମାଣ କରିଥିଲା । ଆଉ ଏହି ସେନା ବେସ୍ ଉପରେ ଗତ ସୋମବାର ୟୁକ୍ରେନ୍ ମିଜାଇଲ୍ ମାଡ କରିଛି । ଯେଉଁଥିରେ ୟୁକ୍ରେନର ୬୩ ଯବାନ ପ୍ରାଣ ହରାଇଛନ୍ତି । ଏହି ଘଟଣା ନେଇ ରୁଷର ପ୍ରତିରକ୍ଷା ମନ୍ତ୍ରାଳୟ କହିଛି, ୟୁକ୍ରେନ୍ ସେନା ପକ୍ଷରୁ ଋଷର ଅସ୍ଥାୟୀ ସେନା କ୍ୟାମ୍ପ ଉପରେ ମିଜାଇଲ୍ ଆଟାକ୍ କରାଯାଇଛି । ଏହି ଆକ୍ରମଣରେ ଋଷର ୬୩ଯବାନଙ୍କ ମୃତ୍ୟୁ ହୋଇଛି । ତେବେ ଏହି ଆକ୍ରମଣରେ କେତେ ଯବାନ ପ୍ରାଣ ହରାଇଛନ୍ତି ତାହା ସଠିର୍ ଭାବେ ସ୍ପଷ୍ଟ ହୋଇନଥିବା ବେଳେ ଆକ୍ରମଣରେ ରୁଷର ପାଖାପାଖି ୪୦୦ ଯବାନ ପ୍ରାଣ ହରାଇଥିବା ୟୁକ୍ରେନ୍ ଦାବି କରିଛି । ଆକ୍ରମଣରେ ବ୍ୟବହାର ହୋଇଥିବା ଅସ୍ତ୍ରଟି ହେଉଛି ‘ଏମ୍.ଏଲ୍.ଆର୍.ଏସ୍ ହିମରସ୍’ । ଏହି ଅସ୍ତ୍ର ଆମେରିକା ୟୁକ୍ରେନକୁ ପ୍ରଦାନ କରିଥିବା ଜଣାପଡିଛି ।

ନୂଆଦିଲ୍ଲୀ: ୟୁକ୍ରେନର ବିଭିନ୍ନ ସହର ଉପରେ ଋଷର ଭୟାନକ ଆକ୍ରମଣ । ଯୁଦ୍ଧ ଆରମ୍ଭରୁ ଆଜିଯାଏ ହୋଇଥିବା ଆକ୍ରମଣ କ୍ଷେତ୍ରରେ ଏହା ସବୁଠାରୁ ବଡ଼ ଓ ଭୟାନକ ବୋଲି ସୂଚନା ମିଳିଛି । ୟୁକ୍ରେନର ବିଭିନ୍ନ ସହରରେ ୭୦ରୁ ଅଧିକ ମିସାଇଲ ହିଟ୍ କରିଛି ଋଷ । ସାରା ଦେଶରେ ଜରୁରୀ ବ୍ଲାକ ଆଉଟ ଘୋଷଣା କରିବା ଲାଗି ୟୁକ୍ରେନକୁ ବାଧ୍ୟ କରିବା ସକାଶେ ଏହି ହମଲା ହୋଇଛି ।

ଖାରକିବ, ଖେରସନ, କ୍ରିଭିର ଆଦି ସହରରେ ବିପୁଳ ଧନ ସମ୍ପଦ କ୍ଷତି ଘଟିଛି । ରାଜଧାନୀ କିବରେ ବି ଜଳ ଓ ବିଦ୍ୟୁତ ଯୋଗାଣ ବାଧାପ୍ରାପ୍ତ ହୋଇଛି । ପ୍ରବଳ ଶୀତ ମଧ୍ୟରେ ଏହି ହମଲା ୟୁକ୍ରେନକୁ ଗଭୀର ସଙ୍କଟକୁ ଠେଲି ଦେଇଛି । ଏହି ଆକ୍ରମଣକୁ ୟୁକ୍ରେନ ରାଷ୍ଟ୍ରପତି ଭୋଲୋଦିମିର ଜେଲେନସ୍କି ତୀବ୍ର ବିରୋଧ କରିବା ସହ ତୁରନ୍ତ ୟୁକ୍ରେନକୁ ସହାୟତା ଦେବା ଲାଗି ସହଯୋଗୀ ରାଷ୍ଟ୍ରଙ୍କୁ ଆହ୍ବାନ ଜଣାଇଛନ୍ତି ।

ନୂଆବର୍ଷ ପ୍ରାରମ୍ଭରେ ୟୁକ୍ରେନ ବିରୋଧରେ ଜୋରଦାର ହମଲା କରିବା ଲାଗି ଋଷ ଯୋଜନା କରୁଥିବାବେଳେ ଏହି ଆକ୍ରମଣ ୟୁକ୍ରେନକୁ ଥରହର କରିଛି । ଆକ୍ରମଣରେ ବିଶେଷ କରି ୯ରୁ ଅଧିକ ଶକ୍ତି ଭିତ୍ତିଭୂମି ଧ୍ବଂସ ହୋଇଛି । ଶକ୍ତି ପ୍ରକଳ୍ପ ଧ୍ବଂସ ହେବା ଯୋଗୁ ଅଧିକାଂଶ ସହରର ୮୫ ଭାଗ ଅଞ୍ଚଳରେ ଅନ୍ଧକାର ଛାଇ ଯାଇଛି ।

କିଭ୍‌: ତାଲିବାନ ଯୁଦ୍ଧଠାରୁ ୟୁକ୍ରେନ ଯୁଦ୍ଧ ଅଧିକ ବିପଜ୍ଜନକ ପାଲଟି ଯାଇଛି। ୟୁକ୍ରେନରେ ରୁଷ୍‌ ଦିନକୁ ଯେତିକି ଗୁଳିମାଡ଼ କରୁଛି ତାହା ଆଫଗାନିସ୍ତାନରେ ମାସେ ସହ ସମାନ ଥିଲା। ତାଲିବାନ ବିରୋଧରେ ରୁଷ୍‌ ଦିନକୁ ୩୦୦ ରାଉଣ୍ଡ ଗୁଳି ମାଡ଼ କରୁଥିଲା। କିନ୍ତୁ ୟୁକ୍ରେନ୍‌ ଉପରେ ଦିନକୁ ୪୦ରୁ ୫୦ ହଜାର ରାଉଣ୍ଡ ଗୁଳିମାଡ଼ କରାଯାଇଥିଲା। ଏହି ସମୟରେ ୟୁକ୍ରେନ ରୁଷ୍‌ ଉପରେ ୬ରୁ ୭ ହଜାର ରାଉଣ୍ଡ ଗୁଳି ବର୍ଷଣ କରୁଥିଲା। ୟୁରୋପିଆନ କାଉନସିଲର ପ୍ରତିରକ୍ଷା ବିଶେଷଜ୍ଞ କ୍ୟାମିଲେ ଗ୍ରାଣ୍ଡ ଏହି ସୂଚନା ଦେଇଛନ୍ତି। ନାଟୋ ଅଧିକାରୀଙ୍କ ଅନୁଯାୟୀ ଖେରସନ୍‌ରୁ ତଡା ଖାଇବା ପରେ ରୁଷ୍‌ କ୍ରମାଗତ ଭାବେ ୟୁକ୍ରେନ ଉପରେ କ୍ଷେପଣାସ୍ତ୍ର ଆକ୍ରମଣ କରିବାରେ ଲାଗିଛି। ଏଥିଯୋଗୁଁ ୟୁକ୍ରେନରେ ବିଦ୍ୟୁତ ଯୋଗାଣ ଠପ୍‌ ହୋଇଯାଇଛି। ତେବେ ୭୫ ପ୍ରତିଶତ ସିଷ୍ଟମର ପୁନରୁଦ୍ଧାର ହୋଇସାରିଛି। ଏହା ସତ୍ତ୍ବେ ୟୁକ୍ରେନକୁ ସମସ୍ୟାର କଳା ବାଦଲ ଛାଇ ରହିଛି।

ରୁଷ୍‌ ଏୟାର ଷ୍ଟ୍ରାଇକ୍‌ର ସାମ୍‌ନା କରିବା ପାଇଁ ୟୁକ୍ରେନ୍‌ ପାଖରେ ଅସ୍ତ୍ରଶସ୍ତ୍ରର ଅଭାବ ଦେଖାଦେଇଛି। ୟୁକ୍ରେନ ପାଖରେ ଆର୍ଟିଲାରୀ, ଅସ୍ତ୍ରଶସ୍ତ୍ର ଏବଂ ଏୟାର ଡିଫେନ୍ସ ସିଷ୍ଟମ ବହୁତ କମ୍‌ ରହିଛି। ଆମେରିକାରେ ମଧ୍ୟ ଅସ୍ତ୍ରଶସ୍ତ୍ର ଅଭାବ ଦେଖାଦେଇଛି। ଏଥିଯୋଗୁଁ ପେଣ୍ଟାଗନ୍‌ ୟୁକ୍ରେନକୁ ଅସ୍ତ୍ରଶସ୍ତ୍ର ସହାୟତା ଦେଇପାରୁନାହିଁ। ଆମେରିକା ଅସ୍ତ୍ରଶସ୍ତ୍ରର ଏକ ବଡ଼ ଭାଗ ଏବେ ତାଇୱାନ ଏବଂ ଦକ୍ଷିଣ କୋରିଆରେ ରହିଛି। ଚୀନ୍‌ର ଆକ୍ରାମକ ଆଭିମୁଖ୍ୟ ଯୋଗୁଁ ଏହି ଅସ୍ତ୍ରଶସ୍ତ୍ରକୁ ସେଠାରୁ ହଟାଇବା ବି ସମ୍ଭବ ନୁହେଁ।

ଅନ୍ୟପକ୍ଷରେ ରୁଷ୍‌ରେ ମଧ୍ୟ ଅସ୍ତ୍ରଶସ୍ତ୍ର ସମସ୍ୟା ଦେଖାଦେଇଛି। ଏଥିଯୋଗୁଁ ମସ୍କୋ ପୁରୁଣା ଏବଂ ଦୁର୍ବଳ ଆର୍ଟିଲାରୀ ବ୍ୟବହାର କରୁଛି। ରିପୋର୍ଟ ଅନୁଯାୟୀ ରୁଷ୍‌ ଉତ୍ତର କୋରିଆରୁ କ୍ଷେପଣାସ୍ତ୍ର ଏବଂ ଇରାନରୁ ଶସ୍ତା ଡ୍ରୋନ କିଣିବାକୁ ପ୍ରୟାସ କରୁଛି।

କିବ୍: ଦକ୍ଷିଣ ୟୁକ୍ରେନର ପ୍ରମୁଖ ତଥା ବାଣିଜ୍ୟିକ ଖେରସନ ସହରରୁ ରୁଷର ସୈନ୍ୟ ପ୍ରତ୍ୟାହାର ପ୍ରକ୍ରିୟା ସଂପୂର୍ଣ୍ଣ ହୋଇଛି। ଏନେଇ ରୁଷ ପକ୍ଷରୁ ସ୍ପଷ୍ଟ କରାଯାଇଛି। ରୁଷର ସୈନ୍ୟମାନେ ଡିନିପ୍ରୋ ନଦୀର ଅପରପାର୍ଶ୍ବକୁ ଚାଲିଯାଇଥିଲା ବେଳେ ୟୁକ୍ରେନ ସେନା ପୁଣି ଏହି ସହରରେ ପ୍ରବେଶ କରିବା ଆରମ୍ଭ କରିଥିବା ଜଣାପଡ଼ିଛି। ଏଠାକାର ନାଗରିକ ୟୁକ୍ରେନ ସୈନ୍ୟଙ୍କୁ ସ୍ବାଗତ କରିବା ସହ ୟୁକ୍ରେନ ପତାକା ଉଡ଼ାଉଥିବା ଦେଖାଯାଇଛି। ଗତ ୯ ତାରିଖରେ ଖେରସନରୁ ସୈନ୍ୟ ପ୍ରତ୍ୟାହାର ସଂପର୍କରେ ରୁଷ ଘୋଷଣା କରିଥିଲା।

ୟୁକ୍ରେନ ଯୁଦ୍ଧ ଦାୟିତ୍ବରେ ଥିବା ରୁଷର କମାଣ୍ଡର ଜେନେରାଲ ସର୍ଗେଇ ସୁରୋଭିକିନଙ୍କ ପରାମର୍ଶକ୍ରମେ ରୁଷ ପ୍ରତିରକ୍ଷା ମନ୍ତ୍ରୀ ଏହି ନିଷ୍ପତ୍ତି ନେଇଥିଲେ। ଅନ୍ୟପକ୍ଷରେ ଏହା ରୁଷ ସୈନ୍ୟଙ୍କ ପରାଜୟ ବୋଲି ୟୁକ୍ରେନ କହିଛି। ୟୁକ୍ରେନ ସୈନ୍ୟଙ୍କ ପ୍ରବଳ ଆକ୍ରମଣ ଯୋଗୁଁ ରୁଷ ସୈନ୍ୟ ପଳାୟନ କରିଛନ୍ତି ବୋଲି ୟୁକ୍ରେନ କହିଛି। ୟୁକ୍ରେନ ସୈନ୍ୟ ଗୋରଦାର ଆକ୍ରମଣ କରି ରୁଷ ସୈନ୍ୟଙ୍କ କବଳରୁ ଖେରସନର ୧୨ଟି ଜନବସତିକୁ ମୁକ୍ତ କରିଛି ବୋଲି କହିଛି। କିନ୍ତୁ ୟୁକ୍ରେନର ଅନ୍ୟ ବହୁ ପ୍ରମୁଖ ଅଞ୍ଚଳରେ ଏବେ ମଧ୍ୟ ରୁଷର କ୍ଷେପଣାସ୍ତ୍ର ଓ ଡ୍ରୋନ ଆକ୍ରମଣ ଜାରି ରହିଛି।

ତେବେ ଖେରସନରୁ ରୁଷର ସୈନ୍ୟ ପ୍ରତ୍ୟାହାର ଯୁଦ୍ଧକୁ ଏକ ନୂଆ ମୋଡ଼ ଦେବାର ସମ୍ଭାବନା ରହିଛି ବୋଲି ଆକଳନ କରାଯାଇଛି। ବର୍ତ୍ତମାନ ସୁଦ୍ଧା ଯୁଦ୍ଧରେ ରୁଷ ଏକ ଲକ୍ଷରୁ ଅଧିକ ସୈନ୍ୟ ହରାଇଛି ବୋଲି ଆମେରିକା କହିଥିଲାବେଳେ ଏହାକୁ ଦୃଷ୍ଟିରେ ରଖି ରୁଷ ପଛଘୁଞ୍ଚା ଦେଇଛି ବୋଲି କହିଛି। କିନ୍ତୁ ଖେରସନ ଅଞ୍ଚଳରୁ ରୁଷର ସେନା ପ୍ରତ୍ୟାହାର ପଛରେ ଅନ୍ୟ କିଛି କାରଣ ରହିଛି ବୋଲି ସାମରିକ ବିଶେଷଜ୍ଞମାନେ ଆକଳନ କରୁଛନ୍ତି। ଅନ୍ୟପକ୍ଷରେ ୟୁକ୍ରେନକୁ ସଶକ୍ତ କରିବା ଲାଗି ଆମେରିକା ଆଉ ୪୦୦ ନିୟୁତ ଡଲାର ସହାୟତା ଯୋଗାଇ ଦେଇଛି।

କିଭ୍‌: ୟୁକ୍ରେନର ବହୁ ସହର ଉପରେ ରୁଷ ସେନା ସୋମବାର ଘନ ଘନ କ୍ଷେପଣାସ୍ତ୍ର ମାଡ଼ କରିଛି। ରାଜଧାନୀ କିଭ୍‌ ସମେତ ଖାରକିଭ୍‌, ଚେରକାସୀ, ଭିନିସିଆ ଏବଂ ଜାପୋରିଝିଆ ଆଦି ସହରକୁ ଟାର୍ଗେଟ କରି ୫୦ କ୍ଷେପଣାସ୍ତ୍ର ମାଡ଼ କରାଯାଇଛି। କେବଳ ଖାରକିଭ୍‌ ସହର ଉପରେ ୪୦ରୁ ଅଧିକ କ୍ଷେପଣାସ୍ତ୍ର ମାଡ଼ କରାଯାଇଛି ବୋଲି ୟୁକ୍ରେନ ପକ୍ଷରୁ କୁହାଯାଇଛି। ବର୍ତ୍ତମାନ ଯୁଦ୍ଧକ୍ଷେତ୍ରକୁ ବାଦ୍‌ ଦେଇ ରୁଷ ସେନା ଜନବସତି ଏବଂ ୟୁକ୍ରେନର ପ୍ରମୁଖ ଭିତ୍ତିଭୂମିକୁ ଟାର୍ଗେଟ କରିଛି।

ସୋମବାର ହୋଇଥିବା ଆକ୍ରମଣରେ ପ୍ରାୟ ୩.୫୦ ଲକ୍ଷ ଆପାର୍ଟମେଣ୍ଟ କ୍ଷତିଗ୍ରସ୍ତ ହୋଇଛି ବୋଲି ୟୁକ୍ରେନ ବୈଦେଶିକ ମନ୍ତ୍ରୀ ଦିମିତ୍ରୋ କୁଲେବା କହିଛନ୍ତି। ଏହାବ୍ୟତୀତ ଜନବସତିକୁ ମଧ୍ୟ ରୁଷ ସେନା ଛାଡୁ ନାହାନ୍ତି ବୋଲି ସେ କହିଛନ୍ତି। ତେବେ ସୋମବାର ହୋଇଥିବା ଆକ୍ରମଣରେ ମୃତାହତଙ୍କ ସମ୍ପର୍କରେ ୟୁକ୍ରେନ ପକ୍ଷରୁ କିଛି କୁହାଯାଇ ନାହିଁ। କିନ୍ତୁ କିଭ୍‌ ଏବଂ ଖାରକିଭ୍‌ର ସର୍ବାଧିକ ଅଞ୍ଚଳ ଏବେ ଅନ୍ଧକାରମୟ ହୋଇପଡ଼ିଛି। ଏହି ସହରଗୁଡିକର ବିଦ୍ୟୁତ କେନ୍ଦ୍ର ସମେତ ଅନ୍ୟ ପ୍ରମୁଖ ପ୍ରତିଷ୍ଠାନଗୁଡିକ ଉପରେ ଘନ ଘନ କ୍ଷେପଣାସ୍ତ୍ର ମାଡ଼ କରାଯାଇ ଧ୍ବସ୍ତବିଧ୍ବସ୍ତ କରି ଦିଆଯାଇଥିବା କୁହାଯାଇଛି। ଫଳରେ ୟୁକ୍ରେନର ସ୍ଥିତି ପୂର୍ବାପେକ୍ଷା ଆହୁରି ଜଟିଳ ହେବାରେ ଲାଗିଛି।

ଅନ୍ୟପକ୍ଷରେ ରୁଷିଆର ଏକ କ୍ଷେପଣାସ୍ତ୍ରକୁ ୟୁକ୍ରେନ ସେନା ମାଡ଼ କରି ଖସାଇ ଦେଇଥିଲାବେଳେ ଏହା ମାଲଡୋଭା ଗ୍ରାମାଞ୍ଚଳରେ ପଡ଼ିଛି। ତେବେ ଏହି ଘଟଣାରେ କେହି ମୃତାହତ ହୋଇ ନାହାନ୍ତି। କ୍ଷେପଣାସ୍ତ୍ର ବ୍ୟତୀତ ରୁଷ ସେନା ପକ୍ଷରୁ ବିଭିନ୍ନ ସହରରେ ଡ୍ରୋନ ଦ୍ବାରା ମଧ୍ୟ ଆକ୍ରମଣ ଜାରି ରହିଛି। କୃଷ୍ଣ ସାଗରରେ କ୍ରିମଆ ନିକଟରେ ରହିଥିବା ରୁଷିଆର ଏକ ଯୁଦ୍ଧ ଜାହାଜ ଉପରେ ୟୁକ୍ରେନ ପକ୍ଷରୁ ଡ୍ରୋନ ଆକ୍ରମଣ କରାଯିବା ପରେ ରୁଷ ସେନା ପ୍ରତିଶୋଧ ପରାୟଣ ହୋଇ ସୋମବାର ଏଭଳି ଆକ୍ରମଣ କରିଛି ବୋଲି ୟୁକ୍ରେନ ପକ୍ଷରୁ କୁହାଯାଇଛି।

ମସ୍କୋ : ୟୁକ୍ରେନ୍ ଏବଂ ରୁଷ ମଧ୍ୟରେ ଲାଗିଥିବା ଯୁଦ୍ଧ ଥମିବାର ନାଁ ଧରୁନି । ଦିନକୁ ଦିନ ଧମକ ପ୍ରତିଧମକ ମଧ୍ୟରେ ଛାରଖାର ହେଉଛି ୟୁକ୍ରେନ୍ । ତେବେ ଏପରି ସମୟରେ ଆମେରିକା ଓ ତା’ର ସହଯୋଗୀ ଦେଶମାନେ ଯଦି ୟୁକ୍ରେନ ଯୁଦ୍ଧରେ ସାମିଲ ହୁଅନ୍ତି ତେବେ ସେସବୁ ଦେଶମାନଙ୍କ ବେସାମରିକ ସାଟେଲାଇଟଗୁଡ଼ିକୁ କ୍ଷେପଣାସ୍ତ୍ର ମାଡ଼ କରି ଉଡ଼ାଇ ଦେବାକୁ ରୁଷ ଧମକ ଦେଇଛି । ରୁଷ୍ ବୈଦେଶିକ ମନ୍ତ୍ରାଳୟର ନିରସ୍ତ୍ରୀକରଣ ଓ ଅସ୍ତ୍ରଶସ୍ତ୍ର ବିଭାଗର ନିର୍ଦ୍ଦେଶକ କନଷ୍ଟାଂଟିନ୍ ଭୋରୋନଷ୍ଟୋଭ ଏହା କହିଛନ୍ତି । ସେ କହିଛନ୍ତି, ୟୁକ୍ରେନ୍ ଯୁଦ୍ଧରେ ସହାୟତା ପାଇଁ ପାଶ୍ଚାତ୍ୟ ସାଟେଲାଇଟର ବ୍ୟବହାର ଅତ୍ୟନ୍ତ ବିପଜ୍ଜନକ ହୋଇପାରେ । ଆଉ କାର୍ଯ୍ୟାନୁଷ୍ଠାନ ସ୍ୱରୂପ ରୁଷ୍, ଅର୍ଦ୍ଧବେସାମରିକ ସାଟେଲାଇଟ୍ ଗୁଡ଼ିକୁ ଟାର୍ଗେଟ୍ କରିବ । ୟୁକ୍ରେନ ଉପରେ ପ୍ରଥମେ ପରମାଣୁ ଆକ୍ରମଣ ଧମକ । ଆଉ ଏବେ ସାଟେଲାଇଟ୍ ଉଡାଇବାକୁ ଧମକ ଦେବା ପରେ ରୁଷ୍ ଆଗକୁ ଆହୁରି ଆକ୍ରମଣାତ୍ମକ ହେବ ବୋଲି କୁହାଯାଉଛି ।

ଅନ୍ୟପଟେ ୟୁକ୍ରେନ ଉପରେ ପରମାଣୁ ଆକ୍ରମଣ ପାଇଁ ପ୍ରସ୍ତୁତ ହେଉଛି ରୁଷ । ପରମାଣୁ ଆକ୍ରମଣ ଲାଗି ବଡ଼ ଧରଣର ଅଭ୍ୟାସ ଆରମ୍ଭ କରିଛି ରୁଷିଆ ସେନା । କ୍ରେମଲିନ୍ ପକ୍ଷରୁ କୁହାଯାଇଛି, ରାଷ୍ଟ୍ରପତି ପୁଟିନଙ୍କ ନେତୃତ୍ୱରେ ବାଲାଷ୍ଟିକ୍ ଓ କ୍ରୁଜ୍ ମିସାଇଲ୍ ଅଭ୍ୟାସ ଆରମ୍ଭ କରିଛି ରୁଷ ସେନା । ପରମାଣୁ ଅସ୍ତ୍ର ବହନ କରୁଥିବା ମିସାଇଲ ବ୍ୟବହାର ପାଇଁ ଅଭ୍ୟାସ କରାଯାଇଛି । କ୍ଷେପଣାସ୍ତ୍ରଗୁଡିକ ପରୀକ୍ଷଣ ମଧ୍ୟ କରାଯାଇଛି । ବଡ଼ କଥା ହେଉଛି, କଂଟ୍ରୋଲ ରୁମ୍ରେ ବସି ଟିଭିରେ ଏହି ଯୁଦ୍ଧାଭ୍ୟାସର ଅନୁଧ୍ୟାନ କରିଛନ୍ତି ପୁଟିନ୍ । ବୁଡାଜାହାଜରୁ ମିସାଇଲ ପରୀକ୍ଷଣର ଫଟୋଚିତ୍ର ରୁଷିଆ ସରକାରଙ୍କ ଦ୍ୱାରା ପରିଚାଳିତ ଗଣମାଧ୍ୟମ ପକ୍ଷରୁ ଜାରି କରାଯାଇଛି ।

ପ୍ରାୟ ୮ ମାସ ଟପିଥିବା ରୁଷ-ୟୁକ୍ରେନ ଯୁଦ୍ଧ ଏବେ ନୂଆ ରୂପ ନେବାର ଆଶଙ୍କା ଦେଖାଯାଇଛି। ରୁଷ କୌଣସି ମୁହୂର୍ତ୍ତରେ ୟୁକ୍ରେନ ଉପରେ ଆଣବିକ ଯୁଦ୍ଧାସ୍ତ୍ର ପ୍ରୟୋଗ କରିପାରେ ବୋଲି ଆଶଙ୍କା ବଢିଛି। ଏଥିନେଇ ରୁଷ ରାଷ୍ଟ୍ରପତି ପୁତିନ ‘ଡାର୍ଟି ବୋମା’ ଭଳି ଏକ ନୂଆ ଚାଲ ଚଳାଇ ୟୁକ୍ରେନ ଉପରେ ଆକ୍ରମଣ କରିବାକୁ ପ୍ରସ୍ତୁତ ହୋଇଥିବା କୁହାଯାଉଛି। ୟୁକ୍ରେନ ନିକଟରେ ଏହି ବୋମା ରହିଛି ଏବଂ ‘ଡାର୍ଟି ବୋମା’ ପକାଇ ୟୁକ୍ରେନ ରୁଷକୁ ପ୍ରଭାବିତ କରିବାକୁ ଯୋଜନା କରିଛି ବୋଲି ପୁତିନ କହିଛନ୍ତି। ବାସ୍ତବରେ ଡାର୍ଟି ବୋମା ଆଣବିକ ବୋମା ନ ହେଲେ ମଧ୍ୟ ଏହାର ପ୍ରଭାବ କିଛି କମ୍‌ ନୁହେଁ। ଏଥିରେ ରହିଥିବା ଡିନାମାଇଟ୍‌, ଜୈବିକି ଅସ୍ତ୍ର, ମାରାତ୍ମକ ରାସାୟନିକ ପଦାର୍ଥ ଏବଂ ରେଡିଓ ଆକ୍ଟିଭ୍‌ ପାଉଡର ଆଣବିକ ବୋମା ଭଳି ବିସ୍ଫୋରଣ ନ କଲେ ମଧ୍ୟ ପର୍ଯ୍ୟାପ୍ତ କ୍ଷତି ପହଞ୍ଚାଇବା ସହିତ ଲୋକଙ୍କୁ ଅକର୍ମଣ୍ୟ କରି ଦେବାର କ୍ଷମତା ରଖିଛି। ଆଣବିକ ବୋମା ଭଳି ଏହା ମଧ୍ୟ ସମୂହ ବିନାଶ ପାଇଁ ଯଥେଷ୍ଟ। ତେବେ ୟୁକ୍ରେନ ଏଭଳି ବୋମା ବ୍ୟବହାର କରିବା ପଛରେ ପୁତିନଙ୍କ ଦାବି କେତେ ସତ୍ୟ ତାହା ଏବେ ବଡ଼ ପ୍ରଶ୍ନ ହୋଇଛି।