ନୂଆଦିଲ୍ଲୀ: ଶେଷରେ ଟାଟା ସନ୍ସ ନ୍ୟୁଜିଲ୍ୟାଣ୍ଡର କ୍ୟାମ୍ପବେଲ ୱିଲସନଙ୍କୁ ଏୟାର ଇଣ୍ଡିଆର ସିଇଓ ତଥା ପରିଚାଳନା ନିର୍ଦ୍ଦେଶକ ଭାବରେ ନିଯୁକ୍ତ କରିଛି । ଟାଟା ସନ୍ସ ଦ୍ୱାରା ଜାରି ବିବୃତ୍ତି ଅନୁଯାୟୀ, ୫୦ ବର୍ଷୀୟ କ୍ୟାମ୍ପବେଲ ୱିଲସନଙ୍କର ବିମାନ ଚଳାଚଳ କ୍ଷେତ୍ରରେ ୨୬ ବର୍ଷର ଅଭିଜ୍ଞତା ଥିବାବେଳେ ୱିଲସନ ୨୦୧୧ ମସିହାରେ ସିଙ୍ଗାପୁର ଏୟାରଲାଇନ୍ସର ସ୍ୱଳ୍ପ ମୂଲ୍ୟର କମ୍ପାନୀ ସ୍କୁଟର ପ୍ରତିଷ୍ଠାତା ଥିଲେ ଏବଂ ୨୦୧୬ ପର୍ଯ୍ୟନ୍ତ ଏହି ଦାୟିତ୍ୱରେ ଥିଲେ। ଏହା ପରେ ସେ ସିଙ୍ଗାପୁର ଏୟାରଲାଇନ୍ସର ସେଲସ ଏବଂ ମାର୍କେଟିଂ ବିଭାଗର ବରିଷ୍ଠ ଉପସଭାପତି ଭାବରେ ମଧ୍ୟ କାର୍ଯ୍ୟ କରିଥିଲେ । କ୍ୟାମ୍ପବେଲ ୱିଲସନଙ୍କ ନିଯୁକ୍ତିକୁ ନେଇ ଏୟାର ଇଣ୍ଡିଆର ଚେୟାରମ୍ୟାନ୍ ଏନ ଚନ୍ଦ୍ରଶେଖରନ୍ କହିଛନ୍ତି ଯେ ୱିଲସନ ଜଣେ ଇଣ୍ଡଷ୍ଟ୍ରି ଭେଟେରାନ୍ ଯିଏ ପ୍ରମୁଖ ବିଶ୍ୱ ବଜାରରେ କାର୍ଯ୍ୟ କରିଛନ୍ତି।

କ୍ୟାମ୍ପବେଲ ୱିଲସନ ୧୯୯୬ରେ ସିଙ୍ଗାପୁର ଏୟାରଲାଇନ୍ସରେ ତାଙ୍କ କ୍ୟାରିଅର୍ ଆରମ୍ଭ କରିଥିଲେ । ସେତେବେଳେ ସେ ନ୍ୟୁଜିଲାଣ୍ଡରେ ଜଣେ ମ୍ୟାନେଜମେଣ୍ଟ ଟ୍ରେନି ଥିଲେ । ପରେ କମ୍ପାନି ତାଙ୍କୁ କାମ କରିବାକୁ କାନାଡା, ହଂକଂ ଏବଂ ଜାପାନକୁ ପଠାଇଥିଲା । ଏହା ପରେ ସେ ୨୦୧୧ରେ ସେ ସିଙ୍ଗାପୁରକୁ ଫେରିଥିଲେ ଏବଂ ‘ସ୍କୁଟ’ର ଆରମ୍ଭରୁ ୨୦୧୬ ପର୍ଯ୍ୟନ୍ତ କମ୍ପାନୀର ସିଇଓ ଥିଲେ । ସ୍କୁଟ ହେଉଛି ସିଙ୍ଗାପୁର ଏୟାରଲାଇନ୍ସର ଏକ ସ୍ୱଳ୍ପ ମୂଲ୍ୟର ସେବା ଯୋଗାଉଥିବା ସହାୟକ କମ୍ପାନି ।

ଟାଟା ସନ୍ସ ନିକଟରେ ଏୟାର ଇଣ୍ଡିଆକୁ ଅଧିଗ୍ରହଣ କରିଥିଲା । ଏୟାର ଇଣ୍ଡିଆର ସିଇଓ ଭାବେ ପ୍ରଥମେ ତୁର୍କୀର ଇଲ୍କର ଆଇସିଙ୍କୁ ନିଯୁକ୍ତ କରିଥିଲା ଟାଟା ସନ୍ସ । ତେବେ ଭାରତ ବିରୋଧୀ ମନ୍ତବ୍ୟ ପାଇଁ ପରିଚିତ ତୁର୍କୀ ରାଷ୍ଟ୍ରପତି ରିସେପ୍ ତାଇପ ଏର୍ଡୋଗାନଙ୍କ ସହ ତାଙ୍କର ଘନିଷ୍ଠତା ଯୋଗୁଁ ବିବାଦ ସୃଷ୍ଟି ହୋଇଥିଲା । ଏହି କାରଣରୁ ଆଇସି ଏୟାର ଇଣ୍ଡିଆର ସିଇଓ ଅଫର୍ ପ୍ରତ୍ୟାଖ୍ୟାନ କରିଥିଲେ।

ନୂଆଦିଲ୍ଲୀ: ଏୟାର ଇଣ୍ଡିଆକୁ ମିଳିଲା ନୂଆ ସିଇଓ । ତୁର୍କିସ୍ ଏୟାର ଲାଇନ୍ସର ପୂର୍ବତନ ଚେୟାରମ୍ୟାନ୍ ଇଲ୍କାର ଆୟସୀଙ୍କୁ ଏୟାର ଇଣ୍ଡିଆର ନୂଆ ସିଇଓ ଭାବେ ନିଯୁକ୍ତ କରିଛି ଟାଟା ସନ୍ସ । ଇଲ୍କାର ଆୟସୀଙ୍କ ପ୍ରାର୍ଥୀତ୍ୱ ଉପରେ ବିଚାର କରିବାକୁ ଏୟାର ଇଣ୍ଡିଆ ବୋର୍ଡର ଆଜି ଅପରାହ୍ନରେ ଏକ ବୈଠକ ହୋଇଥିଲା। ଏଥିରେ ଟାଟା ସନ୍ସ ଚେୟାରମ୍ୟାନ୍ ଚନ୍ଦ୍ରଶେଖରନ୍ ଏକ ବିଶେଷ ନିମନ୍ତ୍ରଣକାରୀ ଥିଲେ | ଉପଯୁକ୍ତ ବିଚାରବିମର୍ଶ ପରେ ବୋର୍ଡ ଏୟାର ଇଣ୍ଡିଆର ସିଇଓ ତଥା ଏମଡି ଭାବରେ ଇଲ୍କାର ଆୟସୀଙ୍କ ନିଯୁକ୍ତିକୁ ଅନୁମୋଦନ କରିଛି ।

ତେବେ ଦାୟିତ୍ୱଗ୍ରହଣ ପୂର୍ବରୁ ତାଙ୍କ ନାମକୁ ସମସ୍ତ ନିୟନ୍ତ୍ରକଙ୍କଠାରୁ ମଂଜୁରୀ ମିଳିବାର ଆବଶ୍ୟକତା ରହିଛି । ଟାଟା ସନ୍ସ ଏୟାର ଇଣ୍ଡିଆର ଶତ ପ୍ରତିଶତ ସେୟାର ୧୮ ହଜାର ୩ଶହ କୋଟି ଟଙ୍କାରେ କିଣିଥିଲା । ଜାନୁଆରୀ ୨୭ ତାରିଖ ଦିନ ଏୟାର ଇଣ୍ଡିଆ ଟାଟା ହାତକୁ ଯାଇଥିଲା ।

ଇଲ୍କାର ଆୟସୀ ପୂର୍ବରୁ ତୁର୍କୀ ଏୟାରଲାଇନ୍ସର ଚେୟାରମ୍ୟାନ୍ ଥିଲେ। ଏନ ଚନ୍ଦ୍ରଶେଖରନ୍ କହିଛନ୍ତି, ଇଲ୍କାର ଆୟସୀ ଜଣେ ବିମାନ ଶିଳ୍ପପତି ଯାହାଙ୍କ କାର୍ଯ୍ୟକାଳରେ ତୁର୍କୀ ଏୟାରଲାଇନ୍ସର ସଫଳତାର ଉଡ଼ାଣ ଭରିଥିଲା । ଇଲ୍କାର ଆୟସୀଙ୍କୁ ସ୍ଵାଗତ କରି ଆମେ ବେଶ୍ ଖୁସି, ଯେଉଁଠି ସେ ଏୟାର ଇଣ୍ଡିଆର ନୂଆ ଯୁଗର ନେତୃତ୍ବ ନେବେ ।