ଭାରତର ପ୍ରିମିୟମ୍ ଟ୍ରେନ୍ ବନ୍ଦେ ଭାରତ ଏକ୍ସପ୍ରେସ (Vande Bharat Express) ରେ ପୁଣି ଥରେ ଖାଦ୍ୟର ମାନକୁ ନେଇ ବିବାଦ ସୃଷ୍ଟି ହୋଇଛି। ବାରାଣସୀରୁ ଦେଓଘର ଯାତ୍ରା କରୁଥିବା ଜଣେ ମହିଳା ଅଭିଯୋଗ କରିଛନ୍ତି ଯେ ଟ୍ରେନରେ ଦିଆଯାଇଥିବା ଖାଦ୍ୟ ଖାଇବା ପରେ ତାଙ୍କୁ ଗୁରୁତର ଆଲର୍ଜି ହୋଇଥିଲା ଏବଂ ତାଙ୍କର ଦୁଇ ବର୍ଷର ପୁଅକୁ ଝାଡ଼ା ବା ଡାଇରିଆ ହୋଇଥିଲା। ଏହି ଘଟଣାର ଚିତ୍ର ଏବଂ ମେଡିକାଲ୍ ରିପୋର୍ଟ ସୋସିଆଲ୍ ମିଡିଆରେ ଭାଇରାଲ୍ ହେବା ପରେ ଆଇଆରସିଟିସି (IRCTC) ପକ୍ଷରୁ ସ୍ପଷ୍ଟୀକରଣ ଦିଆଯାଇଛି।

କ'ଣ ଥିଲା ପୂରା ଘଟଣା?

ରାଞ୍ଚିର ବାସିନ୍ଦା ଆୟୁଷୀ ସିଂହ ନାମକ ଜଣେ ମହିଳା ସୋସିଆଲ୍ ମିଡିଆ ପ୍ଲାଟଫର୍ମ 'ଏକ୍ସ' (X) ରେ ନିଜର ଅନୁଭୂତି ବାଣ୍ଟିଥିଲେ। ଗତ ମାର୍ଚ୍ଚ ୨୭ ତାରିଖରେ ସେ ଟ୍ରେନ୍ ନମ୍ବର ୨୨୫୦୦ ବନ୍ଦେ ଭାରତ ଏକ୍ସପ୍ରେସ ର କୋଚ୍ ଇ୧ (E1) ରେ ବାରାଣସୀରୁ ଦେଓଘର ଯାତ୍ରା କରୁଥିଲେ। ସେ ଅଭିଯୋଗ କରିଛନ୍ତି ଯେ ଟ୍ରେନରେ ଦିଆଯାଇଥିବା ମଧ୍ୟାହ୍ନ ଭୋଜନ ଖାଇବା ପରେ ତାଙ୍କ ଓଠ ଫୁଲି ଯାଇଥିଲା ଏବଂ ଶରୀରରେ ଆଲର୍ଜି ହୋଇଥିଲା। ଏଥିସହ ସମାନ ଖାଦ୍ୟ ଖାଇବା କାରଣରୁ ତାଙ୍କର ଦୁଇ ବର୍ଷର ପୁଅ ମଧ୍ୟ ଡାଇରିଆରେ ଆକ୍ରାନ୍ତ ହୋଇଥିଲା। ସେ ରାଞ୍ଚିସ୍ଥିତ ମା' ରାମ ପ୍ୟାରୀ ସୁପରସ୍ପେସିଆଲିଟି ହସ୍ପିଟାଲ୍ ର ଡାକ୍ତରୀ ପ୍ରେସକ୍ରିପସନ୍ ଏବଂ ନିଜର ଫୁଲିଥିବା ଓଠର ଫଟୋ ସେୟାର କରି ରେଳବାଇର ଖାଦ୍ୟ ମାନ ଉପରେ ପ୍ରଶ୍ନ ଉଠାଇଥିଲେ।

ଷ୍ଟାଫଙ୍କ ବ୍ୟବହାର ଓ ପାନୀୟ ଜଳ ଉପରେ ପ୍ରଶ୍ନ

ଆୟୁଷୀ କେବଳ ଖାଦ୍ୟ ନୁହେଁ, ବରଂ ଟ୍ରେନରେ ଦିଆଯାଉଥିବା ପାନୀୟ ଜଳର ସ୍ୱାଦ ଖରାପ ଥିବା ମଧ୍ୟ ଅଭିଯୋଗ କରିଛନ୍ତି। ଏହା ସହିତ ସେ ରେଳ କର୍ମଚାରୀଙ୍କ ଅସମ୍ବେଦନଶୀଳ ମନୋଭାବକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି। ଅଭିଯୋଗ ଶୁଣିବା ପରେ କର୍ମଚାରୀମାନେ ଉପଯୁକ୍ତ ସହଯୋଗ କରିନଥିବା ସେ ନିଜ ପୋଷ୍ଟରେ ଉଲ୍ଲେଖ କରିଛନ୍ତି। ଠିକ୍ ସମୟରେ ଚିକିତ୍ସା ମିଳିନଥିଲେ ପରିସ୍ଥିତି ଆହୁରି ବିଗିଡ଼ି ଯାଇଥାନ୍ତା ବୋଲି ସେ ପ୍ରକାଶ କରିଛନ୍ତି।

ଆଇଆରସିଟିସି (IRCTC) ର ସ୍ପଷ୍ଟୀକରଣ

ସୋସିଆଲ୍ ମିଡିଆରେ ଏହି ପୋଷ୍ଟଟି ଭାଇରାଲ୍ ହେବା ପରେ ଆଇଆରସିଟିସି (Indian Railway Catering and Tourism Corporation) ପକ୍ଷରୁ ଏହାର ଉତ୍ତର ରଖାଯାଇଛି। ଆଇଆରସିଟିସି କହିଛି ଯେ, "ମାର୍ଚ୍ଚ ୨୭, ୨୦୨୬ ତାରିଖ ଦିନ ଟ୍ରେନ୍ ନମ୍ବର ୨୨୫୦୦ ବନ୍ଦେ ଭାରତ ଏକ୍ସପ୍ରେସ (BSB-DGHR) ର କୋଚ୍ ଇ୧ ରେ ଦିଆଯାଇଥିବା ମଧ୍ୟାହ୍ନ ଭୋଜନର ଯାଞ୍ଚ କରାଯାଇଥିଲା ଏବଂ ତାହା ସମ୍ପୂର୍ଣ୍ଣ ସନ୍ତୋଷଜନକ ଥିଲା। ସେହିଦିନ ଖାଦ୍ୟର ଗୁଣବତ୍ତା କିମ୍ବା ସ୍ୱଚ୍ଛତାକୁ ନେଇ ଅନ୍ୟ କୌଣସି ଯାତ୍ରୀଙ୍କଠାରୁ ଅଭିଯୋଗ ମିଳିନାହିଁ।" ତଥାପି ଘଟଣାର ଅଧିକ ତଦନ୍ତ ପାଇଁ ଆଇଆରସିଟିସି ଆୟୁଷୀଙ୍କଠାରୁ ତାଙ୍କର ପିଏନଆର (PNR) ନମ୍ବର ଏବଂ ମୋବାଇଲ୍ ନମ୍ବର ମାଗିଛି।

ଭାରତୀୟ ରେଳବାଇ (Indian Railways) ଏକ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ପ୍ରିମିୟମ୍ ଟ୍ରେନ୍ ବନ୍ଦେ ଭାରତ ଏକ୍ସପ୍ରେସ (Vande Bharat Express) ରେ ଯାତ୍ରୀମାନଙ୍କୁ ଖରାପ ଗୁଣବତ୍ତାର ଖାଦ୍ୟ ପରଷିବା ମାମଲାରେ ରେଳବାଇ କଠୋର ଆଭିମୁଖ୍ୟ ଗ୍ରହଣ କରିଛି। ଏହି ଘଟଣାରେ ଇଣ୍ଡିଆନ୍ ରେଲୱେ କ୍ୟାଟରିଂ ଆଣ୍ଡ୍ ଟୁରିଜିମ୍ କର୍ପୋରେସନ୍ (IRCTC) ଉପରେ ୧୦ ଲକ୍ଷ ଟଙ୍କା ଏବଂ ଖାଦ୍ୟ ଯୋଗାଣକାରୀ ସଂସ୍ଥା ବା କ୍ୟାଟରିଂ କଣ୍ଟ୍ରାକ୍ଟର ଉପରେ ୫୦ ଲକ୍ଷ ଟଙ୍କା ର ଜୋରିମାନା ଲଗାଇଛି। ଏହା ସହ ଉକ୍ତ ଭେଣ୍ଡରର ଚୁକ୍ତିନାମାକୁ ମଧ୍ୟ ତୁରନ୍ତ ବାତିଲ କରିଦିଆଯାଇଛି।

ଭାଇରାଲ୍ ଭିଡିଓ ଏବଂ ଯାତ୍ରୀଙ୍କ ଅଭିଯୋଗ

ସୂଚନା ଅନୁଯାୟୀ, ଗତ ମାର୍ଚ୍ଚ ୧୫, ୨୦୨୬ ତାରିଖରେ ପାଟନା-ଟାଟାନଗର ବନ୍ଦେ ଭାରତ ଏକ୍ସପ୍ରେସ (ଟ୍ରେନ୍ ନମ୍ବର ୨୧୮୯୬) ରେ ଏହି ଘଟଣା ଘଟିଥିଲା। ଟ୍ରେନରେ ଯାତ୍ରା କରୁଥିବା ଜଣେ ଯାତ୍ରୀଙ୍କୁ ଦିଆଯାଇଥିବା ଦହି ଏବଂ ଡାଲିରେ ଜୀବନ୍ତ ପୋକ ବାହାରିଥିଲା। ଯାତ୍ରୀ ଜଣକ ଏହାର ଏକ ଭିଡିଓ ରେକର୍ଡ କରିଥିଲେ ଯେଉଁଥିରେ ପୋକ ବୁଲୁଥିବାର ସ୍ପଷ୍ଟ ଦେଖିବାକୁ ମିଳିଥିଲା। ଆଶ୍ଚର୍ଯ୍ୟର କଥା ହେଉଛି, ଯେତେବେଳେ ଯାତ୍ରୀ ଜଣକ ଟ୍ରେନ୍ ଆଟେଣ୍ଡାଣ୍ଟଙ୍କୁ ଏ ସମ୍ପର୍କରେ ଦେଖାଇଥିଲେ, ସେ ପୋକଗୁଡ଼ିକୁ 'କେଶର (Saffron)' ବୋଲି କହି ପ୍ରସଙ୍ଗକୁ ଏଡ଼ାଇବାକୁ ଚେଷ୍ଟା କରିଥିଲେ। ଏହି ଭିଡିଓଟି ସୋସିଆଲ ମିଡିଆରେ ଖୁବ୍ ଭାଇରାଲ୍ ହେବା ପରେ ଲୋକେ ତୀବ୍ର ଅସନ୍ତୋଷ ବ୍ୟକ୍ତ କରି କଠୋର କାର୍ଯ୍ୟାନୁଷ୍ଠାନ ଦାବି କରିଥିଲେ।

ରେଳ ମନ୍ତ୍ରଣାଳୟର କଠୋର କାର୍ଯ୍ୟାନୁଷ୍ଠାନ

ଏହି ଘଟଣାକୁ ଗମ୍ଭୀରତାର ସହ ନେଇ ରେଳ ମନ୍ତ୍ରଣାଳୟ (Ministry of Railways) ଏକ ତଦନ୍ତ ନିର୍ଦ୍ଦେଶ ଦେଇଥିଲା। ତଦନ୍ତ ପରେ ମନ୍ତ୍ରଣାଳୟ ପକ୍ଷରୁ ସ୍ପଷ୍ଟ କରାଯାଇଛି ଯେ, ଖାଦ୍ୟ ପ୍ରସ୍ତୁତିରେ ନିମ୍ନମାନର ସାମଗ୍ରୀ ବ୍ୟବହାର କରାଯାଇଛି ଏବଂ ସ୍ୱଚ୍ଛତା ପ୍ରତି ଧ୍ୟାନ ଦିଆଯାଇନାହିଁ। ଏଥିପାଇଁ ନୋଡାଲ୍ ଏଜେନ୍ସି ଭାବରେ କାର୍ଯ୍ୟ କରୁଥିବା ଆଇଆରସିଟିସି (IRCTC) ଉପରେ ୧୦ ଲକ୍ଷ ଟଙ୍କା ଏବଂ ଉକ୍ତ ପ୍ରାଇଭେଟ୍ କ୍ୟାଟରିଂ ସଂସ୍ଥା ଉପରେ ଏକ ବଡ଼ ଅଙ୍କର ବା ୫୦ ଲକ୍ଷ ଟଙ୍କା ର ଜୋରିମାନା ଲଗାଯାଇଛି। କେବଳ ସେତିକି ନୁହେଁ, ଭବିଷ୍ୟତ ପାଇଁ ଉକ୍ତ କମ୍ପାନୀର ଠିକା ରଦ୍ଦ କରାଯାଇଛି ଏବଂ ବ୍ଲାକଲିଷ୍ଟ ମଧ୍ୟ କରାଯାଇଛି।

ଯାତ୍ରୀଙ୍କ ସୁରକ୍ଷା ସର୍ବୋଚ୍ଚ ପ୍ରାଥମିକତା

ଭାରତୀୟ ରେଳବାଇର ଜଣେ ମୁଖପାତ୍ର କହିଛନ୍ତି ଯେ, ଯାତ୍ରୀମାନଙ୍କ ସୁରକ୍ଷା, ପରିଚ୍ଛନ୍ନତା ଏବଂ ଖାଦ୍ୟର ମାନ ରକ୍ଷା କରିବା ହେଉଛି ଆମର ସର୍ବୋଚ୍ଚ ପ୍ରାଥମିକତା। ବନ୍ଦେ ଭାରତ ଭଳି ପ୍ରିମିୟମ୍ ଟ୍ରେନରେ ଏଭଳି ଅବହେଳା ପାଇଁ ଆମର ଆଭିମୁଖ୍ୟ 'ଜିରୋ ଟୋଲରାନ୍ସ' (Zero Tolerance) ରହିଛି। ନିକଟରେ ରେଳ ବୋର୍ଡ ପକ୍ଷରୁ ଟ୍ରେନ୍‌ରେ ଖାଦ୍ୟର ମାନ ବୃଦ୍ଧି ପାଇଁ ଅନେକ ନୂତନ ସୁଧାର ଅଣାଯାଇଥିଲା। ଏହି ଘଟଣା ପରେ ପ୍ରତିଟି ଜୋନ୍‌ରେ ଖାଦ୍ୟ ଯାଞ୍ଚକୁ ଅଧିକ କଡ଼ାକଡ଼ି କରିବାକୁ ବିଭାଗ ପକ୍ଷରୁ ନିର୍ଦ୍ଦେଶ ଦିଆଯାଇଛି।

ଭାରତୀୟ ରେଳବାଇରେ (Indian Railways) ଯାତ୍ରା କରିବା ପାଇଁ ଟିକେଟ୍ ବୁକିଂ କରିବା ସମୟରେ ଅନେକ ଥର ଆମକୁ ୱେଟିଂ ଲିଷ୍ଟ (Waiting List) ର ସାମ୍ନା କରିବାକୁ ପଡ଼ିଥାଏ। ଆପଣ ନିଶ୍ଚୟ ଲକ୍ଷ୍ୟ କରିଥିବେ ଯେ କେବେ କେବେ ୬୦ ରୁ ୭୦ ୱେଟିଂ ଥିବା ଟିକେଟ୍ ଖୁବ୍ କମ୍ ଦିନରେ କନଫର୍ମ ହୋଇଯାଏ, କିନ୍ତୁ ଅନେକ ସମୟରେ ମାତ୍ର ୫ କିମ୍ବା ୧୦ ୱେଟିଂ ଥିବା ଟିକେଟ୍ ଶେଷ ପର୍ଯ୍ୟନ୍ତ କନଫର୍ମ ହୋଇପାରେ ନାହିଁ। ଏହାକୁ ନେଇ ଯାତ୍ରୀମାନଙ୍କ ମନରେ ଅନେକ ପ୍ରଶ୍ନ ଉଠିଥାଏ। କେହି କେହି ଏହାକୁ ଭାଗ୍ୟର ଖେଳ ବୋଲି ଭାବୁଥିବା ବେଳେ, ପ୍ରକୃତରେ ଏହା ପଛରେ ରେଳବାଇର ଏକ ସ୍ୱତନ୍ତ୍ର ଗାଣିତିକ ଫର୍ମୁଲା ବା ସିଷ୍ଟମ୍ କାମ କରିଥାଏ। ଆସନ୍ତୁ ଜାଣିବା ଭାରତୀୟ ରେଳବାଇ କେଉଁ ଆଧାରରେ ଯାତ୍ରୀମାନଙ୍କୁ ସିଟ୍ ଆବଣ୍ଟନ କରିଥାଏ।

ରେଳବାଇର ସିଟ୍ ଆବଣ୍ଟନ ପ୍ରଣାଳୀ

ଅଧିକାଂଶ ଲୋକ ଭାବନ୍ତି ଯେ ଟ୍ରେନରେ ଯେତିକି ସିଟ୍ ଥାଏ, ରେଳବାଇ ସେତିକି ଟିକେଟ୍ ବିକ୍ରି କରେ ଏବଂ ତା'ପରେ ୱେଟିଂ ଲିଷ୍ଟ ଦେଖାଇବା ଆରମ୍ଭ କରେ। କିନ୍ତୁ ବାସ୍ତବରେ ରେଳବାଇର ସିଷ୍ଟମ୍ ଏପରି କାମ କରେ ନାହିଁ। ରେଳବାଇ କେବଳ ସମୁଦାୟ ସିଟ୍ ବିକ୍ରି କରେ ନାହିଁ ବରଂ ରୁଟ୍ (Route) ଆଧାରରେ ସିଟ୍ ବିକ୍ରି କରିଥାଏ। ଉଦାହରଣ ସ୍ୱରୂପ, ଦିଲ୍ଲୀରୁ ମୁମ୍ବାଇ ଯାଉଥିବା ଏକ ଟ୍ରେନର ସିଟ୍ ଗୁଡ଼ିକ ମଝିରେ ପଡ଼ୁଥିବା ପ୍ରତ୍ୟେକ ଷ୍ଟେସନ୍ ପାଇଁ ଅଲଗା ଅଲଗା ଭାଗରେ ବିଭକ୍ତ କରାଯାଇଥାଏ। ଏହି କାରଣରୁ ଗୋଟିଏ ଟ୍ରେନରେ କିଛି ଷ୍ଟେସନରୁ ଟିକେଟ୍ କନଫର୍ମ ମିଳିଯାଏ ଏବଂ ଅନ୍ୟ କିଛି ଷ୍ଟେସନରୁ ଟିକେଟ୍ ୱେଟିଂ ଦେଖାଇଥାଏ।

ଟିକେଟ୍ କନଫର୍ମ ହେବାର ମୁଖ୍ୟ ଆଧାର

ରେଳ ଯାତ୍ରୀମାନଙ୍କ ପାଇଁ ସିଟ୍ କୋଟା (Seat Quota) ସେମାନଙ୍କର ଷ୍ଟେସନ୍ ଆଧାରରେ ନିର୍ଦ୍ଧାରଣ କରାଯାଇଥାଏ। ଅର୍ଥାତ୍ ଆପଣ କେଉଁ ଷ୍ଟେସନରୁ ଟିକେଟ୍ ବୁକ୍ କରୁଛନ୍ତି ଏବଂ ସେହି ଷ୍ଟେସନ ପାଇଁ କେତୋଟି ସିଟ୍ ସଂରକ୍ଷିତ ଅଛି, ତାହା ଉପରେ ଟିକେଟ୍ କନଫର୍ମେସନ୍ ନିର୍ଭର କରେ। ଏହା ବ୍ୟତୀତ ଆପଣଙ୍କ ଯାତ୍ରାର ଗନ୍ତବ୍ୟ ଷ୍ଟେସନ୍ (Destination Station), ସେହି ରୁଟରେ ଟ୍ରେନରେ ଥିବା ଉପଲବ୍ଧ ସିଟ୍, ଅନ୍ୟ ଯାତ୍ରୀମାନଙ୍କର ବୁକିଂ ସ୍ଥିତି, କୋଟା ଲିମିଟ୍ (Quota Limit) ଏବଂ କ୍ୟାନ୍ସଲେସନ୍ ପ୍ୟାଟର୍ଣ୍ଣ (Cancellation Pattern) କୁ ମଧ୍ୟ ହିସାବକୁ ନିଆଯାଏ। ଏହି ସମସ୍ତ ବିଷୟକୁ ତର୍ଜମା କରିବା ପରେ ହିଁ ୱେଟିଂ ଟିକେଟ୍ କନଫର୍ମ ହୋଇଥାଏ।

ଗୋଟିଏ ସିଟର ଏକାଧିକ ବ୍ୟବହାର

ରେଳବାଇର ଏହି ସିଷ୍ଟମ୍ ମାଧ୍ୟମରେ ସବୁବେଳେ ପ୍ରୟାସ କରାଯାଏ ଯେ ଗୋଟିଏ ସିଟ୍ କିପରି ଅଧିକରୁ ଅଧିକ ଲୋକଙ୍କ କାମରେ ଆସିପାରିବ। ଉଦାହରଣ ସ୍ୱରୂପ, ଯଦି ଜଣେ ଯାତ୍ରୀଙ୍କୁ ଦିଲ୍ଲୀରୁ ଜୟପୁର ପାଇଁ ଏକ ସିଟ୍ ମିଳିଲା, ତେବେ ସେହି ସମାନ ସିଟ୍ ଜୟପୁରରୁ ଆବୁ (Abu Road) ପର୍ଯ୍ୟନ୍ତ ଅନ୍ୟ ଜଣେ ଯାତ୍ରୀଙ୍କୁ ଦିଆଯାଇପାରିବ। ପୁଣି ସେହି ସିଟ୍ ଅନ୍ୟ କୌଣସି ଯାତ୍ରୀଙ୍କ ପାଇଁ ସୁରଟରୁ ମୁମ୍ବାଇ ପର୍ଯ୍ୟନ୍ତ ବ୍ୟବହାର କରାଯାଇପାରିବ। ଏହି ବ୍ୟବସ୍ଥା ଯୋଗୁଁ ଅନେକ ସମୟରେ ବଡ଼ ଧରଣର ୱେଟିଂ ଲିଷ୍ଟ ମଧ୍ୟ ସହଜରେ କ୍ଲିୟର୍ ବା କନଫର୍ମ ହୋଇଯାଏ, ଅଥଚ ଛୋଟ ରୁଟ୍ କିମ୍ବା ନିର୍ଦ୍ଦିଷ୍ଟ କୋଟାରେ ଥିବା ଛୋଟ ୱେଟିଂ ଲିଷ୍ଟ ମଧ୍ୟ ଅଟକି ରହିଯାଏ।

ନୂଆଦିଲ୍ଲୀ: ଦେଶବ୍ୟାପୀ ଦେଖାଦେଇଥିବା ଏଲପିଜି (LPG) ସିଲିଣ୍ଡରର ଅଭାବ ଭାରତୀୟ ରେଳବାଇ କ୍ୟାଟରିଂ ଏବଂ ଟୁରିଜିମ୍ କର୍ପୋରେସନ୍ (IRCTC) ର ସେବା ଉପରେ ଗଭୀର ପ୍ରଭାବ ପକାଇଛି। ଏହି ସଙ୍କଟ କାରଣରୁ ଟ୍ରେନରେ ଯାତ୍ରୀମାନଙ୍କୁ ଦିଆଯାଉଥିବା ରନ୍ଧା ଖାଦ୍ୟ ସେବାକୁ ସାମୟିକ ଭାବରେ ବନ୍ଦ କରିବାକୁ ରେଳବାଇ ବିଚାର କରୁଛି। ଯେଉଁ ଯାତ୍ରୀମାନେ ଟିକେଟ୍ ସହିତ ପୂର୍ବରୁ ଖାଦ୍ୟ ବୁକ୍ କରିଛନ୍ତି, ସେମାନଙ୍କୁ ଟଙ୍କା ଫେରସ୍ତ ବା ରିଫଣ୍ଡ ପ୍ରଦାନ କରିବାକୁ ନିଷ୍ପତ୍ତି ନିଆଯାଇପାରେ। ଯାତ୍ରୀମାନଙ୍କ ପାଇଁ ନିରବଚ୍ଛିନ୍ନ ଖାଦ୍ୟ ସେବା ବଜାୟ ରଖିବାକୁ ଆଇଆରସିଟିସି ଏହାର କ୍ୟାଟରିଂ ଲାଇସେନ୍ସପ୍ରାପ୍ତ ସଂସ୍ଥାଗୁଡ଼ିକୁ ବିକଳ୍ପ ଯୋଜନା ପ୍ରସ୍ତୁତ କରିବାକୁ ନିର୍ଦ୍ଦେଶ ଦେଇଛି। ଗ୍ୟାସ୍ ବଦଳରେ ମାଇକ୍ରୋ ଓଭେନ ବ୍ୟବହାର କରିବାକୁ ଖାଦ୍ୟ ଯୋଗାଣକାରୀ ସଂସ୍ଥାକୁ ଆଇଆରସିଟିସି ପରାମର୍ଶ ଦେଇଛି ।

ପଶ୍ଚିମ ଏସିଆରେ ଦେଖାଦେଇଥିବା ବିବାଦ କାରଣରୁ ହର୍ମୁଜ୍ ପ୍ରଣାଳୀ ଦେଇ ହେଉଥିବା ପରିବହନ ବାଧାପ୍ରାପ୍ତ ହୋଇଛି, ଯାହା ଫଳରେ ଏଭଳି ଗ୍ୟାସ୍ ସଙ୍କଟ ଉପୁଜିଛି। ସରକାର ପ୍ରାକୃତିକ ଗ୍ୟାସର ବଣ୍ଟନକୁ ସୀମିତ କରିବା ସହ ଘରୋଇ ପାଇପ୍ ଗ୍ୟାସ୍ ଏବଂ ସିଏନଜି (CNG) ଚାଳିତ ଯାନଗୁଡ଼ିକୁ ପ୍ରାଥମିକତା ଦେବାକୁ ନିଷ୍ପତ୍ତି ନେଇଛନ୍ତି। ରେଳବାଇ ଅଧିକାରୀଙ୍କ ସୂଚନା ଅନୁଯାୟୀ, ଗ୍ୟାସ୍ ଅଭାବ ସିଧାସଳଖ ଆଇଆରସିଟିସି ର ବେସ୍ କିଚେନ୍ (ମୂଳ ରୋଷେଇ ଘର) ଗୁଡ଼ିକୁ ପ୍ରଭାବିତ କରୁଛି। ପ୍ୟାଣ୍ଟ୍ରି କାରଗୁଡ଼ିକ କେବଳ ଖାଦ୍ୟ ବଣ୍ଟନ ଓ ଗରମ କରିବା ପାଇଁ ବ୍ୟବହୃତ ହେଉଥିବା ବେଳେ ଏଠାରେ ଏଲପିଜି ସିଲିଣ୍ଡର ରହେ ନାହିଁ। କିନ୍ତୁ ବେସ୍ କିଚେନରେ ରୋଷେଇ ବାଧାପ୍ରାପ୍ତ ହେଉଥିବାରୁ ଦୂରଗାମୀ ଟ୍ରେନଗୁଡ଼ିକରେ ଖାଦ୍ୟ ପ୍ରସ୍ତୁତି ସିଧାସଳଖ ପ୍ରଭାବିତ ହେଉଛି।

ଗତ ମାର୍ଚ୍ଚ ୧୦ ତାରିଖ (ମଙ୍ଗଳବାର) ଦିନ ଏକ ଚିଠି ମାଧ୍ୟମରେ, ଆଇଆରସିଟିସି ସମସ୍ତ ରେଳ ଷ୍ଟେସନରେ ଥିବା ଫୁଡ୍ ପ୍ଲାଜା, ରିଫ୍ରେସମେଣ୍ଟ୍ ରୁମ୍ ଏବଂ ଜନ ଆହାର ଆଉଟଲେଟ୍‌ଗୁଡ଼ିକୁ ଏଲପିଜି ଅଭାବ ସମୟରେ ରୋଷେଇର ବିକଳ୍ପ ମାଧ୍ୟମ ଆପଣାଇବାକୁ ନିର୍ଦ୍ଦେଶ ଦେଇଛି। ପଶ୍ଚିମ ଏସିଆ ସଙ୍କଟ ଯୋଗୁଁ ବ୍ୟବସାୟିକ ଏଲପିଜି ଯୋଗାଣ ପ୍ରଭାବିତ ହେଉଥିବାରୁ କ୍ୟାଟରିଂ ସେବା ଯେପରି ବାଧାପ୍ରାପ୍ତ ନହୁଏ, ତାହା ସୁନିଶ୍ଚିତ କରିବା ଅତ୍ୟନ୍ତ ଜରୁରୀ ବୋଲି ଚିଠିରେ ଉଲ୍ଲେଖ କରାଯାଇଛି। ସ୍ୱାଭାବିକ ଖାଦ୍ୟ ସାମଗ୍ରୀ ସହିତ ଯାତ୍ରୀମାନଙ୍କ ଚାହିଦା ପୂରଣ କରିବା ପାଇଁ ପର୍ଯ୍ୟାପ୍ତ ପରିମାଣର ରେଡି-ଟୁ-ଇଟ୍ (RTE) ବା ସିଧାସଳଖ ଖାଇବାକୁ ପ୍ରସ୍ତୁତ ଥିବା ଖାଦ୍ୟ ମହଜୁଦ ରଖିବାକୁ କୁହାଯାଇଛି।

ରେଳ ବିଭାଗର ତଥ୍ୟ ଅନୁଯାୟୀ, ଆଇଆରସିଟିସି ଏହାର ବେସ୍ କିଚେନ୍ ଏବଂ ଅନ୍-ବୋର୍ଡ କ୍ୟାଟରିଂ ସେବା ମାଧ୍ୟମରେ ଦେଶବ୍ୟାପୀ ଦୈନିକ ପ୍ରାୟ ୧୭ ଲକ୍ଷ ଖାଦ୍ୟ ଯୋଗାଇଥାଏ। ଯୋଗାଣ ଶୃଙ୍ଖଳରେ ବାଧା ସୃଷ୍ଟି ହେଲେ ମଧ୍ୟ ଯାତ୍ରୀମାନଙ୍କୁ ଯେପରି ଅସୁବିଧାର ସମ୍ମୁଖୀନ ହେବାକୁ ନପଡ଼େ, ସେଥିପାଇଁ ଏହି ସତର୍କତାମୂଳକ ପଦକ୍ଷେପ ଗ୍ରହଣ କରାଯାଇଛି। ଯଦି କୌଣସି ଜୋନ୍‌ରେ ଏଲପିଜି ଯୋଗାଣ ବାଧାପ୍ରାପ୍ତ ହୁଏ, ତେବେ ତୁରନ୍ତ କର୍ତ୍ତୃପକ୍ଷଙ୍କୁ ଜଣାଇବାକୁ କ୍ୟାଟରର୍ସମାନଙ୍କୁ କଡ଼ା ନିର୍ଦ୍ଦେଶ ଦିଆଯାଇଛି।

ନୂଆଦିଲ୍ଲୀ: ଭାରତୀୟ ରେଳ କ୍ୟାଟରିଂ ଆଣ୍ଡ ଟୁରିଜିମ୍ କର୍ପୋରେସନ୍ (ଆଇଆରସିଟିସି) ରେ ଆଜି ସକାଳୁ ଟିକେଟ ବୁକିଂ ବାଧାପ୍ରାପ୍ତ ହୋଇଛି। IRCTC ୱେବସାଇଟ୍‌ରେ ସାମୟିକ ବୈଷୟିକ ତ୍ରୁଟି ଘଟିଛି। ଏହି ତ୍ରୁଟି ଯୋଗୁଁ ଇ-ଟିକେଟ ବୁକିଂ ବାଧାପ୍ରାପ୍ତ ହୋଇଛି। ଫଳରେ ଯାତ୍ରୀ ହନ୍ତସନ୍ତ ହୋଇଛନ୍ତି। ବୈଷୟିକ ଟିମ୍‌ ସଜାଡୁଛନ୍ତି । ଶୀଘ୍ର ବୁକିଂ ଉପଲବ୍ଧ ହେବ ହୋଲି ଆଇଆର୍‌ସିଟିସି କର୍ତ୍ତୃପକ୍ଷ ସୂଚନା ଦେିଛନ୍ତି।

ନୂଆଦିଲ୍ଲୀ:  ରେଳ ଯାତ୍ରୀଙ୍କ ପାଇଁ ବଡ଼ ଗୁରୁତ୍ବପୂର୍ଣ୍ଣ ଖବର। ଯଦି ଆପଣ ରାଜଧାନୀ, ଶତାବ୍ଦୀ ଏବଂ ଦୁରୋନ୍ତୋ ଭଳି ପ୍ରିମିୟର ଟ୍ରେନରେ ଯାତ୍ରା କରୁଥାନ୍ତି ତେବେ ଏହି ସୂଚନା ଆପଣଙ୍କ ପାଇଁ ବେଶ ଜୁରୁରୀ। କାରଣ ଆଗାମୀ ଦିନରେ ଏହି ତିନି ଟ୍ରେନ୍‌ ରେଳପଥ ପାଇଁ ଇତିହାସ ପାଲଟିଯିବ। ରେଳପଥ ଏହି ତିନୋଟି ପ୍ରିମିୟମ୍ ଟ୍ରେନର ଚଳାଚଳ ବନ୍ଦ କରିବାକୁ ଯୋଜନା କରୁଥିବା ଜଣାଯାଇଛି। ତେବେ ଏହି ତିନି ଟ୍ରେନ ସ୍ଥାନରେ ସରକାର ସେମି ହାଇ ସ୍ପିଡ୍ ଟ୍ରେନ୍ ‘ବନ୍ଦେ ଭାରତ’ ଏକ୍ସପ୍ରେସ ଚଳାଇବେ। ‘ବନ୍ଦେ ଭାରତ’ ଟ୍ରେନର ବେଗ ଘଣ୍ଟା ପ୍ରତି ୧୬୦ରୁ ୨୪୦ କି.ମି. ରହିବ। ଏ ନେଇ ରେଳପକ୍ଷ ପକ୍ଷରୁ ଏକ ରୋଡ୍ ମ୍ୟାପ୍ ପ୍ରସ୍ତୁତ କରାଯାଇଛି।

ରେଳପଥ ଯୋଜନା ମୁତାବକ, ଆସନ୍ତା ଦୁଇ ବର୍ଷ ମଧ୍ୟରେ ଦିଲ୍ଲୀ-ମୁମ୍ବଇ ଏବଂ ଦିଲ୍ଲୀ-କଲକାତା ମଧ୍ୟରେ ସେମି ହାଇ ସ୍ପିଡ୍ ଟ୍ରେନ୍ ଚଳାଚଳ ଆରମ୍ଭ କରାଯିବ। ଅମୃତ କାଳରେ ଦେଶର ମେଟ୍ରୋ ଏବଂ ବଡ ସହରଗୁଡିକୁ ସଂଯୋଗ କରିବା ପାଇଁ ରେଳପଥ ଏକ ଲକ୍ଷ୍ୟ ସ୍ଥିର କରିଛି। ଏ ସମ୍ପର୍କରେ ରେଳପଥର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ଏକ ସେମି ହାଇ ସ୍ପିଡ୍ ଟ୍ରେନ୍ ଚଳାଇବା ପାଇଁ ବିଦ୍ୟୁତ୍, ସିଗନାଲ୍ ସିଷ୍ଟମ୍, ଟ୍ରାକ୍ ଏବଂ ରୋଲିଂ ଷ୍ଟକ୍ ସବୁ ପରିବର୍ତ୍ତନ ହେବା ଆବଶ୍ୟକ। ସେମି-ହାଇ ସ୍ପିଡ୍ ଟ୍ରେନ୍ କମ୍ ସମୟ ମଧ୍ୟରେ ଦୀର୍ଘ ଦୂରତ୍ବ ଯାତ୍ରା କରିପାରିବ। ରେଳ ଅଧିକାରୀଙ୍କ ମତରେ ଆଇସିଏଫ୍ ଏବଂ ଏଲ୍ଏଚ୍‌ବି କୋଚ୍ ଏବେ ପୁରୁଣା ଟେକ୍ନୋଲୋଜିରେ ପରିଣତ ହୋଇଛି। ରାଜଧାନୀ, ଶତାବ୍ଦୀ, ଦୁରନ୍ତୋ ଏବଂ ସୁପରଫାଷ୍ଟ ଟ୍ରେନକୁ ‘ବନ୍ଦେ ଭାରତ’ ଏକ୍ସପ୍ରେସ ସହିତ ବଦଳାଇବାକୁ ଯୋଜନା କରାଯାଇଛି।

ଏକ ସୂତ୍ରରୁ ପ୍ରକାଶ ଯେ, ରେଳପଥ ଆଗାମୀ ଦିନରେ ଦେଶରେ ୫୨୪ ‘ବନ୍ଦେ ଭାରତ’ ଟ୍ରେନ୍‌ର ସେଟ୍ ନିର୍ମାଣ ପାଇଁ କରିବ। ସରକାର ଏଥିପାଇଁ ୪୦ ହଜାର କୋଟିରୁ ଅଧିକ ଟଙ୍କା ବିନିଯୋଗ କରିବାକୁ ଯାଉଛନ୍ତି। ୧୫ ଅଗଷ୍ଟ ୨୦୨୩ ସୁଦ୍ଧା ୭୫ ‘ବନ୍ଦେ ଭାରତ’ ଟ୍ରେନ୍ ଚଳାଇବାକୁ ଏକ ପ୍ରସ୍ତୁତି ଚାଲିଛି। ବର୍ତ୍ତମାନ ଦିଲ୍ଲୀରୁ କାଟ୍ରା ଏବଂ ଦିଲ୍ଲୀରୁ ବନାରସ ମଧ୍ୟରେ ଚାଲୁଥିବା ‘ବନ୍ଦେ ଭାରତ’ ଟ୍ରେନର ଗତି ଘଣ୍ଟା ପ୍ରତି ୧୬୦ କି.ମି. ରହିଛି। ଅପରପକ୍ଷେ ନୂତନ ‘ବନ୍ଦେ ଭାରତ’ ଟ୍ରେନର ବେଗ ୧୮୦ କି.ମି. ରହିବ। ନୂଆ ଭର୍ସନ୍‌ର ‘ବନ୍ଦେ ଭାରତ’ ଟ୍ରେନ୍‌ର ଘଣ୍ଟା ପ୍ରତି ବେଗ ପର୍ଯ୍ୟାୟକ୍ରମେ ୨୦୦,୨୨୦,୨୪୦ ଏବଂ ୨୬୦ କି.ମି.କୁ ବୃଦ୍ଧି କରାଯିବା ଯୋଜନା ରହିଛି। ଜଣେ ରେଳ ଅଧିକାରୀଙ୍କ ମତରେ, ବନ୍ଦେ ଭାରତର ପ୍ରତ୍ୟେକ ନୂତନ ସଂସ୍କରଣ ସହିତ ଏହାର ଗତି, ପ୍ରଯୁକ୍ତିବିଦ୍ୟା ଏବଂ ଯାତ୍ରୀଙ୍କ ସୁବିଧା ବୃଦ୍ଧି ପାଇବ। ଉଭୟ ମାର୍ଗରେ ଟ୍ରାକର ନବୀକରଣ କାର୍ଯ୍ୟ ଶେଷ ହୋଇଛି। ଏହାବ୍ୟତୀତ ମାର୍ଗରେ ଆସୁଥିବା ସେତୁକୁ ମଜବୁତ କରାଯାଉଛି। ଏଥିପାଇଁ ୧୮ ହଜାର କୋଟି ଟଙ୍କା ମଞ୍ଜୁର ହୋଇସାରିଛି।

ନୂଆଦିଲ୍ଲୀ: ଯେତେବେଳେ ବି ଦୂର ଦୂରାନ୍ତର ଯାତ୍ରା କଥା ଆସେ, ସର୍ବପ୍ରଥମେ ଲୋକମାନେ ଟ୍ରେନରେ ଯାତ୍ରା କରିବାକୁ ପସନ୍ଦ କରନ୍ତି । ଆମ ଦେଶରେ ପ୍ରତିଦିନ ବହୁ ସଂଖ୍ୟକ ଲୋକ ଟ୍ରେନରେ ଯାତ୍ରା କରନ୍ତି। ରେଳପଥରେ ଯାତ୍ରା କରିବା ଅତ୍ୟନ୍ତ ସହଜ ଏବଂ ଲୋକମାନେ ଏଥିରେ ଅନେକ ସୁବିଧା ମଧ୍ୟ ପାଇଥା’ନ୍ତି।  କିଛି ବର୍ଷ ପୂର୍ବରୁ ଯଦି ଲୋକଙ୍କୁ ଟ୍ରେନରେ ଯାତ୍ରା କରିବାକୁ ପଡୁଥିଲା ତେବେ ଏଥିପାଇଁ ସେମାନଙ୍କୁ ରେଳ କାଉଣ୍ଟରରେ ଘଣ୍ଟା ଘଣ୍ଟା ଅପେକ୍ଷା କରିବାକୁ ପଡିଥଆଏ। କିନ୍ତୁ ବର୍ତ୍ତମାନ ଏହି ସବୁ ଅତି ସହଜ ଏବଂ ଅନଲାଇନ୍ ହୋଇଯାଇଛି। ଆପଣ ଭାରତୀୟ ରେଳ କ୍ୟାଟରିଂ ଏବଂ ଟୁରିଜିମ୍ କର୍ପୋରେସନ୍ ଅର୍ଥାତ୍ IRCTC ର ଅଫିସିଆଲ୍ ୱେବସାଇଟରୁ ଟ୍ରେନ୍ ଟିକେଟ୍ ବୁକ୍ କରିପାରିବେ। ହେଲେ ଦେଖିବାକୁ ମିଳେ ଯେ ଯାତ୍ରୀମାନେ ଟିକେଟ ବୁକିଂ କରିବାର ଦୀର୍ଘ ଦିନ ପରେ ପୁଣି ଟିକେଟ୍ ବୁକିଂ କରିବା କାରଣରୁ ସେମାନେ ଅନେକ ଥର ପାସୱାର୍ଡ ଭୁଲି ଯାଇଥାନ୍ତି ।  ଯଦି ଆପଣ ମଧ୍ୟ ପାସୱାର୍ଡ ସମସ୍ୟା ଦେଇ ଗତି କରୁଛନ୍ତି, ତେବେ ଆପଣଙ୍କୁ ଜାଣାନ୍ତୁ କିପରି ଆପଣ ଆପଣଙ୍କର ପାସୱାର୍ଡକୁ ପୁନଃ ରସେଟ୍ କରିପାରିବେ ।

୧- ଯଦି ତୁମେ ତୁମର IRCTC ଆକାଉଣ୍ଟର ପାସୱାର୍ଡ ଭୁଲି ଯାଇଛ କିମ୍ବା ପାସୱାର୍ଡକୁ ଅନେକ ଥର ଭୁଲ୍ ପ୍ରବେଶ କରିବା ହେତୁ ଏହା ଲକ୍ ହୋଇଯାଇଛି। ତେବେ ଚିନ୍ତତ ହେବା ଆବଶ୍ଯକ ନାହିଁଷ  ଏହାକୁ ପୁଣି ରିସେଟ୍ କରିବା ପାଇଁ ପ୍ରଥମେ ତୁମକୁ IRCTCର ଅଫିସିଆଲ୍ ୱେବସାଇଟ୍ https://www.irctc.co.in/nget/train ପରିଦର୍ଶନ କରିବାକୁ ପଡିବ।  ଏଠାରେ ଆପଣଙ୍କୁ ଆପଣଙ୍କର ଲଗଇନ୍ ଆଇଡି ପ୍ରବେଶ କରିବାକୁ ପଡିବ।

୨- ଏହା ପରେ ଆପଣ ପାସୱାର୍ଡ ଭୁଲିଯିବାର ବିକଳ୍ପ ଦେଖିବେ। ଯାହା ଉପରେ ଆପଣଙ୍କୁ କ୍ଲିକ୍ କରିବାକୁ ପଡିବ। ତା’ପରେ ତୁମର ପଞ୍ଜୀକୃତ ଇମେଲ ଆଡି,  IRCTC  ଆଇଡି, ଜନ୍ମ ତାରିଖ ଏବଂ ପରେ କ୍ୟାପଚା କୋଡ୍ ଦେଇ ପୂରଣ କରିବେ ।

୩- ଆପଣ ଆପଣଙ୍କର ସମସ୍ତ ଆବଶ୍ୟକୀୟ ବିବରଣୀ ପୁରଣ କରିବା ପରେ ପାସୱାର୍ଡ ରିସେଟ କରିବା ପାଇଁ ବିବରଣୀଗୁଡିକ ଆପଣଙ୍କର ପଞ୍ଜୀକୃତ ଇମେଲ୍ ଆଇଡୁକୁ  IRCTC ଦ୍ୱାରା ପଠାଯିବ। ଭୁଲରେ ଏହି ମେଲକୁ ଡିଲିଟ କରନ୍ତୁ ନାହିଁ। କାରଣ ଏହା ବିନା ଆପଣଙ୍କର ପାସୱାର୍ଡ ପୁନଃ ସୃଷ୍ଟି ହୋଇପାରିବ ନାହିଁ |

୪-  ପଞ୍ଜୀକୃତ ହୋଇଥିବା ଇମେଲ ଆଇଡିରେ ଏକ ଲିଙ୍କ ପାଇବେ। ଏହା ଉପରେ ତୁମକୁ କ୍ଲିକ୍ କରିବାକୁ ପଡିବ । ଏହି ଲିଙ୍କ କ୍ଲିକ କରି  ତୁମର IRCTC ଆକାଉଣ୍ଟ ପାଇଁ ଏକ ନୂତନ ପାସୱାର୍ଡ ତିଆରି କରି ଏହାକୁ  ଆପଣ ବ୍ୟବହାର କରିପାରିବେ। ଥରେ ପାସୱାର୍ଡ ତିଆରି ହୋଇଗଲେ ନୂଆ ଯାତ୍ରା ପାଇଁ ସହଜରେ ଘରେ ଟ୍ରେନ୍ ଟିକେଟ୍ ବୁକ୍ କରିପାରିବ।