ଭାଲେଣ୍ଟାଇନ୍‌ସ ଡେ’ ବା ପ୍ରେମ ଦିବସ ପାଳନ ଏକ ପାଶ୍ଚାତ୍ୟ ସଂସ୍କୃତି ହୋଇଥିଲେ ବି ଆମ ଦେଶରେ ବେଶ୍‌ କିଛି ବର୍ଷ ହେବ ଏହା ଖୁବ୍‌ ପ୍ରଭାବ ବିସ୍ତାର କରିଛି। ପ୍ରେମ ଦିବସ ସିନା ଗୋଟାଏ ଦିନ, ତାହା ପୂର୍ବରୁ ଆହୁରି ୬ଟି ଦିନକୁ ପ୍ରେମୀଯୁଗଳ ପାଳନ କରିଥାନ୍ତି । ପୂରା ୭ ଦିନ ଧରି ଏହି ପ୍ରେମ ସପ୍ତାହ ପାଳନ କରାଯାଏ। ପ୍ରେମକୁ ପରିପ୍ରକାଶ କରିବା ପାଇଁ ପ୍ରତିବର୍ଷ ଫେବୃଆରୀ ୭ ତାରିଖରୁ ୧୪ ତାରିଖ ପର୍ଯ୍ୟନ୍ତ ପ୍ରେମ ସପ୍ତାହ ପାଳନ କରାଯାଏ।

‘ପ୍ରେମ’ ଅଢ଼େଇ ଅକ୍ଷରର ଏହି ଶବ୍ଦଟି ଏକ କ୍ଷଣିକ ଆବେଗ। ପ୍ରେମ ସାହିତ୍ୟ ଭଳି ସରଳ ଓ ଗଣିତଠୁ ଅଧିକ ଜଟିଳ ହେଇପାରେ। ପ୍ରେମ ହିସାବ କିତାବ କରି କରାଯାଏନା, କି ପ୍ରେମରେ କାରଣ ଖୋଜାପଡ଼େନା । ପ୍ରେମ ବେବାକ୍ କରାଯାଏ। ହୃଦୟ ଦେଇ କରାଯାଏ। ଏଥିରେ ଲାଭକ୍ଷତିର ହିସାବ କରାଯାଏ ନାହିଁ ଯାହାକୁ ଅନୁଭବ ତ କରିହୁଏ, ହେଲେ ଦେଖିହୁଏନି କି ଦେଖେଇ ହୁଏନି। ପ୍ରେମକୁ ବର୍ଷ-ମାସ-ଦିନରେ ବାନ୍ଧି ହୁଏନି।

ଆଜି ହେଉଛି ପ୍ରେମ ସପ୍ତାହର ପ୍ରଥମ ଦିନ । ଆଜି ଗୋଲାପ ଦିବସ ବା ରୋଜ୍ ଡେ। ପ୍ରେମିକ ପ୍ରେମିକମାନେ ଏହି ଦିନଟିକୁ ବର୍ଷ ସାରା ଅପେକ୍ଷା କରି ରହିଥାନ୍ତି। ଆଉ ଆଜି ରୋଜ୍‌ ଡେ’ ରେ ପରସ୍ପରକୁ ଗୋଲାପ ଦେଇ ନିଜ ମନର ଭାବନା ପରିପ୍ରକାଶ କରିଥାଆନ୍ତି ପ୍ରେମୀ ଯୁଗଳ। ନିଜ ହୃଦୟରେ ଥିବା ପ୍ରେମକୁ ପ୍ରକାଶ ପାଇଁ ଗୋଲାପ ସବୁଠାରୁ ଭଲ ମାଧ୍ୟମ ବୋଲି ଧରା ଯାଉଥିବା ବେଳେ ଗୋଲାପ ଦିବସ ଅବସରରେ ଏହାର ଗୁରୁତ୍ବ ଅଧିକ ବଢ଼ିଯାଇଥାଏ। ଲାଲ୍‌ ଗୋଲାପକୁ ପ୍ରେମର ପ୍ରତୀକ ବୋଲି କୁହାଯାଏ। ତେଣୁ ପ୍ରେମ ସପ୍ତାହରେ ଲାଲ୍‌ ଗୋଲାପର ଚାହିଦା ସବୁଠାରୁ ଅଧିକ ଥାଏ। ଗୋଲାପର ରକ୍ତିମ ପାଖୁଡ଼ା ପରି ପ୍ରେମର ଗଭୀରତା ସେମିତି ଚମକୁଥାଉ ବୋଲି ପ୍ରେମୀଯୁଗଳ ଏହିଦିନରେ ପରସ୍ପରକୁ ପ୍ରତିଶ୍ରୁତି ଦେଇଥାନ୍ତି। ଗ୍ରୀକ୍‌ ପୁରାଣ ଅନୁସାରେ, ପ୍ରେମର ଦେବୀ ଭେନସ୍‌ ଗୋଲାପ ଫୁଲକୁ ଖୁବ୍‌ ପସନ୍ଦ କରନ୍ତି । ଏହିଦିନ ଗୋଲାପ ଫୁଲଟିଏ ପରି ସାଥୀଙ୍କ ଜୀବନ ସୁବାସିତ କରିବାକୁ ସଂକଳ୍ପ ନେଇଥାନ୍ତି ପ୍ରେମୀଯୁଗଳ। ସାମାଜିକ ଗଣମାଧ୍ୟମ ମଧ୍ୟ ରୋଜ୍‌ ଡେ’ ଶୁଭେଚ୍ଛାରେ ଚଳଚଞ୍ଚଳ ହୋଇ ଉଠିଛି।

ପ୍ରେମ ସବୁବେଳେ ଶାଶ୍ୱତ । ପ୍ରେମର ଅନୁଭବ ମଧ୍ୟ ବେଶ୍‌ ନିଆରା । ପ୍ରେମ କରି ଶିଖିଲେ ତାହା ଚକଲେଟ୍ ପରି ମିଠା । ଅନେକଙ୍କ କ୍ଷେତ୍ରରେ ଚକଲେଟ୍ ଦିଆନିଆରୁ ହିଁ ପ୍ରେମ ଆରମ୍ଭ ହୋଇଥାଏ । ଏହା ହିଁ କହିଦିଏ ପ୍ରେମ କେତେ ମିଠା । ଯେଉଁ ବ୍ୟକ୍ତି ପ୍ରେମରେ ପଡ଼ିଥାଏ, ସେ ଜୀବନର ସବୁ ମୁହୂର୍ତ୍ତଗୁଡ଼ିକୁ ପ୍ରେମମୟ କରିବାକୁ ଚାହିଁଥାଏ । ଭାଲେଣ୍ଟାଇନ୍ସ ସପ୍ତାହର ତୃତୀୟ ଦିନକୁ ଚକ୍‌ଲେଟ୍‌ ଡେ’ ଭାବେ ପାଳନ କରାଯାଏ। ଏହିଦିନ ପ୍ରେମୀଯୁଗଳ ପରସ୍ପରକୁ ଚକଲେଟ୍‌ ଖୁଆଇ ସମ୍ପର୍କ‌ରେ ଆହୁରି ମଧୁରତା ଆଣିବାକୁ ଚେଷ୍ଟା କରିଥାନ୍ତି ।

ପ୍ରଥମ ଦୁଇ ଦିନ ଗୋଲାପ ଦେଇ ଏବଂ ପ୍ରେମ ନିବେଦନ କରି ପ୍ରେମ ଜାହିର କରିଥିବା ବେଳେ ତୃତୀୟ ଦିନ ଚକଲେଟ୍‌ ଦିଆନିଆ କରନ୍ତି ପ୍ରେମୀ ଯୁଗଳ । ପ୍ରେମିକଟିଏ ପ୍ରେମିକାକୁ ଉପହାରରେ ଚକଲେଟ୍‌ ଦେଇ ତାର ମନ କଥା କହିଥାଏ। କଥାରେ ଅଛି, ଚକଲେଟ୍ ହେଉଛି ଝିଅଙ୍କର ପ୍ରଥମ ପସନ୍ଦ । ପ୍ରେମିକାର ମନରେ ଯେତେ ଦୁଃଖ ବା ରାଗ ଥିଲେ ପ୍ରେମିକ, ପ୍ରେମିକାକୁ ଚକଲେଟ୍‌ଟିଏ ଦେଇଦେଲେ ସେ ସବୁ ରାଗ ଅଭିମାନ ଭୁଲିଯାଏ। କିଏ ନିଜ ପ୍ରେମିକାକୁ ହୃଦୟ ଆକୃତିର ଚକଲେଟ୍ ଦେଇଥାଏ ତ ଆଉ କିଏ ଗୋଲ ଚକଲେଟ୍। ଏହାବାଦ୍‌ ବିଗତ ୨୦୦ ବର୍ଷ ହେଲାଣି ଚକଲେଟ୍‌ ଆମ ଜୀବନର ଏକ ଅଂଶ ହୋଇଯାଇଛି। କିଏ ମୁଡ୍‌ ଭଲ କରିବା ପାଇଁ ଚକଲେଟ୍‌ ଖାଇ ଥାଏ ତ ଆଉ କିଏ ପ୍ରେମିକାକୁ ମନାଇବା ପାଇଁ ଚକଲେଟ୍‌ ଦେଇଥାଏ। ଭାଲେଣ୍ଟାଇନ୍ସ ସପ୍ତାହର ତୃତୀୟ ଦିନରେ ଚକଲେଟ୍‌ ଡେ’ ପାଳନର ଉଦ୍ଦେଶ୍ୟ ପ୍ରେମ ସମ୍ପର୍କ ଚକଲେଟ୍‌ ଭଳି ମଧୁମୟ ହେଉ।

ବସନ୍ତର ଆଗମନ ସହ ଏବେ ଚାରିଆଡ଼ ପ୍ରେମମୟ ହୋଇ ଉଠିଛି। ଇତିମଧ୍ୟରେ ଭାଲେଣ୍ଟାଇନ୍ସ ସପ୍ତାହ ଆରମ୍ଭ ହୋଇଯାଇଛି। ଗୋଲାପ ଦିଆ ନିଆତ ସରି ଯାଇଛି । ଏବେ ମନର ମଣିଷକୁ  ମନକଥା ଖୋଲି କହିବାକୁ ମନ ଚାହୁଁଛି ।  ସେ ପୁଣି ଶାଶ୍ୱତ ଓ ଚିରନ୍ତନ ପ୍ରେମର କଥା । ଆଜି ହେଉଛି ପ୍ରେମ ସପ୍ତାହର ଦ୍ୱିତୀୟ ଦିନ ପ୍ରପୋଜ ଡେ’ । ମନର ମଣିଷକୁ  ଗୋଲାପ ଦେବାପରେ, ହୃଦୟରେ ଚାପିରଖିଥିବା କଥାକୁ ପରସ୍ପର ଆଗରେ ପ୍ରକାଶ କରିବାକୁ,ଏହା ହେଉଛି ସବୁଠାରୁ ଭଲ ସୁଯୋଗ । ହୃଦୟରେ ଅନେକ ଦିନରୁ ସାଇତି ରଖିଥିବା ସେଇ ପ୍ରେମଭରା କେଇ ପଦ କଥା କହି ପ୍ରେମୀ ଯୁଗଳମାନେ ଏହି ଦିନଟିକୁ ପାଳନ କରିଥାନ୍ତି। ଗତକାଲି ପ୍ରେମୀ ଯୁଗଳମାନେ ଗୋଲାପ ସହ ରୋଜ ଡେ’ ପାଳନ କରିଥିବା ବେଳେ ଆଜି ସେହି ଗୋଲାପ ଦେଇ ପରସ୍ପରକୁ ପ୍ରେମ ନିବେଦନ କରିବେ। ବର୍ଷକର କୌଣସି ଦିନ ଜଣେ ଜଣକୁ ପ୍ରେମ ନିବେଦନ କରିପାରିବେ। କିନ୍ତୁ ଭାଲେଣ୍ଟାଇନ୍ସ ସପ୍ତାହର ଦ୍ବିତୀୟ ଦିବସକୁ ପ୍ରପୋଜ୍‌ ଡେ’ ଭାବେ ପାଳନ କରାଯାଏ। ଏହି ଦିନରେ ଯୁବପିଢ଼ି ପ୍ରେମକୁ ସ୍ୱୀକାର କରିବା ପାଇଁ ଆକର୍ଷଣୀୟ ଫୁଲ ଓ ଉପହାର ସହ ପ୍ରେମିକ/ପ୍ରେମିକାଙ୍କୁ ପ୍ରେମ ନିବେଦନ କରିଥାନ୍ତି । ପ୍ରେମ କରିବା ସହଜ, କିନ୍ତୁ ସାଥୀଙ୍କୁ ପ୍ରେମ ନିବେଦନ କରିବା ବଡ଼ କଷ୍ଟକର କାମ। ଅନେକ ଲୋକ ନିଜ ମନର କଥା କହି ନ ପାରି ନିଜ ଈପ୍‌ସିତ ପ୍ରେମିକ ବା ପ୍ରେମିକାଙ୍କୁ ହରେଇ ବସିଥାନ୍ତି। ଅବଶ୍ୟ ସୋସିଆଲ ମିଡିଆର ଅଭ୍ୟୁଦୟ ଫଳରେ ପ୍ରେମ ନିବେଦନ କରିବା ସହଜ ହୋଇଛି। ପ୍ରେମିକ ପ୍ରେମିକମାନେ ମେସେଜ୍‌ ଦ୍ବାରା ନିଜର ମନର କଥା କହିପାରୁଛନ୍ତି।

ପ୍ରେମୀଯୁଗଳମାନେ ନିଜ ପ୍ରେମକୁ ପରିପ୍ରକାଶ କରିବାକୁ ପାଳିଥାନ୍ତି ଭାଲେଣ୍ଟାଇନ୍ସ ସପ୍ତାହ। ଫେବୃଆରୀ ୭ ତାରିଖରୁ ରୋଜ୍‌ ଡେ’ ସହିତ ଭାଲେଣ୍ଟାଇନ୍ସ ଡେ’ର ଆରମ୍ଭ ହୋଇଥାଏ। ଏହିଦିନ ପ୍ରେମୀଯୁଗଳ ପରସ୍ପରକୁ ବିଭିନ୍ନ ରଙ୍ଗର ଗୋଲାପ ଦେଇ ଭାବର ଆଦାନପ୍ରଦାନ କରିଥା’ନ୍ତି। ପ୍ରତ୍ୟେକ ରଙ୍ଗର ଗୋଲାପର ଭିନ୍ନ ଭିନ୍ନ ଅର୍ଥ ରହିଛି। ତେବେ କେଉଁ ରଙ୍ଗର ଗୋଲାପ କ’ଣ କହେ ଆସନ୍ତୁ ଜାଣିବା…

• ଲାଲ୍‌ ଗୋଲାପ ହେଉଛି ପ୍ରେମର ପ୍ରତୀକ। ଯଦି କାହାକୁ ଆପଣ ଭଲ ପାଉଛନ୍ତି କିମ୍ବା କାହାକୁ ପ୍ରେମ ନିବେଦନ କରୁଛନ୍ତି, ତେବେ ତାଙ୍କୁ ଲାଲ୍‌ ରଙ୍ଗର ଗୋଲାପ ଦେଇପାରିବେ।
• ହଳଦିଆ ଗୋଲାପ ହେଉଛି ବନ୍ଧୁତା, ଖୁସି ଓ ନୂତନତ୍ବର ପ୍ରତୀକ। ରୋଜ୍‌ ଡେ’ରେ ସାଙ୍ଗମାନଙ୍କୁ ହଳଦିଆ ରଙ୍ଗର ଗୋଲାପ ଦେଇହେବ। ଯଦି କାହା ସହିତ ନୂତନ ଭାବରେ ବନ୍ଧୁତା ସ୍ଥାପନ କରିବାକୁ ଚାହୁଁଛନ୍ତି, ତେବେ ହଳଦିଆ ଗୋଲାପ ଦିଅନ୍ତୁ। ଏହି ଗୋଲାପ କାହାକୁ ଦେଇ ନିରାମୟତାର ଶୁଭକାମନା ମଧ୍ୟ କରିପାରିବେ।
• ଗୋଲାପି ରଙ୍ଗର ଗୋଲାପ ଖୁସି, ନମ୍ରତା ଓ ଭବ୍ୟତାର ପ୍ରତୀକ। ଯଦି କୌଣସି ବ୍ୟକ୍ତିର ଗୁଣ ଭଲ ଲାଗୁଛି କିମ୍ବା କାହାକୁ ଧନ୍ୟବାଦ ଦେବାକୁ ଚାହୁଁଛନ୍ତି, ତେବେ ଉକ୍ତ ବ୍ୟକ୍ତିଙ୍କୁ ଗୋଲାପି ରଙ୍ଗର ଗୋଲାପ ଦିଅନ୍ତୁ। ସାଙ୍ଗ କିମ୍ବା ଭଲ ଲାଗୁଥିବା କୌଣସି ବ୍ୟକ୍ତିଙ୍କୁ ଗୋଲାପି ରଙ୍ଗର ଗୋଲାପ ଦେଇପାରିବେ।
• କମଳା ରଙ୍ଗ ହେଉଛି ଉତ୍ସାହ ଓ ଶକ୍ତିର ପ୍ରତୀକ। ଯଦି କୌଣସି ବ୍ୟକ୍ତିଙ୍କୁ ହୃଦୟରେ ଭଲ ପାଉଛନ୍ତି, ତେବେ ତାଙ୍କୁ କମଳା ରଙ୍ଗର ଗୋଲାପ ଦେଇ ନିଜର ଭାବନାକୁ ବ୍ୟକ୍ତ କରିପାରିବେ।
• ଧଳା ରଙ୍ଗର ଗୋଲାପ ହେଉଛି ପବିତ୍ରତା, ଚପଳାମି ଓ ଶାନ୍ତିର ପ୍ରତୀକ। କାହାକୁ କ୍ଷମା ମାଗିବାକୁ ଚାହୁଁଥିଲେ, ଧଳା ରଙ୍ଗର ଗୋଲାପ ଫୁଲ ଦେଇ ‘ସରି’ କହିପାରିବେ। ଶୁଭକାମନା ଦେବା ପାଇଁ ଧଳା ରଙ୍ଗର ଗୋଲାପ ଫୁଲର ଆବଶ୍ୟକତା ରହିଛି।
• ବାଇଗଣୀ ରଙ୍ଗର ଗୋଲାପ ଆସକ୍ତି ଭାବକୁ ବ୍ୟକ୍ତ କରିବା ପାଇଁ ‘ଲଭ୍‌ ଆଟ୍‌ ଫାଷ୍ଟ ସାଇଟ୍’ ଭାବେ ଦିଆଯାଏ।

ପ୍ରେମ ନିଃସ୍ବାର୍ଥ ଆଉ ଶାଶ୍ୱତ। ପ୍ରେମ ମାନେନା ବୟସ, ଜାତି, ସୀମା ସରହଦ। ଏହା ସର୍ବଦା ସଦ୍ୟ ନୂତନ। ପ୍ରକୃତିର ସିନା ଛଅ ଋତୁ, ହେଲେ ସେଥିରେ ପ୍ରେମର ଋତୁ ମିଶିଲାପରେ ହୋଇଯାଏ ସାତ ଋତୁ। ପ୍ରେମ ସଫଳ ବା ବିଫଳ ହୋଇପାରେ, ମାତ୍ର ଏହାର ଅନୁଭବ ନିଶ୍ଚିତ ଭାବେ ଅନନ୍ୟ । ପ୍ରାପ୍ତି ଓ ଅପ୍ରାପ୍ତିର ଦୋଛକିରେ ସବୁବେଳେ ମନ ଖୋଜୁଥାଏ ସାଥୀଟିଏ। ସାମାଜିକ ଆକଟ ଯୋଗୁଁ ପ୍ରେମ କେବେ ଯନ୍ତ୍ରଣାଦାୟକ ହୋଇଉଠେ ତ କେବେ ପୁଣି ବସନ୍ତର ମଳୟ ସ୍ପର୍ଶରେ ପୁଲକିତ ହୋଇ ଉଠେ । ସେ ଯାହା ହେଉ ନା କାହିଁକି, ପ୍ରେମ ଏକ ଭାବନା, ଏକ ସମର୍ପଣ ।

ପୌରାଣିକ କଥା ହେଉ କି ଇତିହାସ ସବୁଥିରେ ସ୍ବତନ୍ତ୍ର ସ୍ଥାନ ପାଇଛି ପ୍ରେମ। ପ୍ରେମକୁ ପରିପ୍ରକାଶ କରିବା ପାଇଁ ପ୍ରତିବର୍ଷ ଫେବୃଆରୀ ୭ ତାରିଖରୁ ୧୪ ତାରିଖ ପର୍ଯ୍ୟନ୍ତ ପ୍ରେମ ସପ୍ତାହ ପାଳନ କରାଯାଏ। ଆଜି ହେଉଛି ପ୍ରେମ ସପ୍ତାହର ପ୍ରଥମ ଦିନ । ଆଜି ଗୋଲାପ ଦିବସ ବା ରୋଜ୍ ଡେ’। ପ୍ରେମିକ ପ୍ରେମିକମାନେ ଏହି ଦିନଟିକୁ ବର୍ଷ ସାରା ଅପେକ୍ଷା କରି ରହିଥାନ୍ତି। ପ୍ରେମର ପ୍ରତୀକ ହେଉଛି ଗୋଲାପ । ରୋଜ୍‌ ଡେ’ ରେ ପରସ୍ପରକୁ ଗୋଲାପ ଦେଇ ନିଜ ମନର ଭାବନା ପରିପ୍ରକାଶ କରିଥାଆନ୍ତି ପ୍ରେମୀ ଯୁଗଳ । ସାମାଜିକ ଗଣମାଧ୍ୟମ ମଧ୍ୟ ରୋଜ୍‌ ଡେ’ ଶୁଭେଚ୍ଛାରେ ଚଳଚଞ୍ଚଳ ହୋଇ ଉଠିଛି।

ଭୁବନେଶ୍ବର: ଚାଲିଛି ପ୍ରେମ ସପ୍ତାହ ବା ଭାଲେଣ୍ଟାଇନ୍‌ ୱିକ୍। ସମୟ ସହ ବଢିଛି ମୋବାଇଲର ବ୍ଯବାହାର ।  ସୋସିଆଲ ମିଡିଆରେ ଅଭ୍ୟୁଦୟ ଫଳରେ ପ୍ରେମ ନିବେଦନ କରିବା ସହଜ ହୋଇଛି। ପ୍ରେମିକ ପ୍ରେମିକମାନେ ମେସେଜ୍‌ ଦ୍ବାରା ନିଜର ମନର କଥା କହିବା ସହ ଅନଲାଇନରେ ଉଭୟ ଉଭୟଙ୍କୁ ଗିଫ୍ଟ ଦେଇଥାନ୍ତି । ଫଳରେ ଅନଲାଇନ କାରବାର ବଢିଥାଏ । ଅନଲାଇନ କାରବାର ସମୟରେ ସାଇବର ଠକେଇ ଆଶଙ୍କା ରହିଛି। ଏ ନେଇ ସତର୍କ କରାଇଛି କ୍ରାଇମ୍‌ବ୍ରାଞ୍ଚ୍‌। କୌଣସି ସମୟରେ ଆପଣଙ୍କୁ ସାଇବର ଠକ ମାନେ ଚୂନ ଲଗାଇପାରନ୍ତି। ଠକ ମାନେ ଚାତକ ଭଳି ଚାହିଁ ରହିଛନ୍ତି। ସାଇବର ଠକେଇ ଆଶଙ୍କା କରି ସତର୍କ କରାଇଛି କ୍ରାଇମ୍‌ବ୍ରାଞ୍ଚ୍‌ । ଅଜଣା କଲ୍ ଓ ଗିଫ୍ଟ ଆଦି ନେବା ଓ ଦେବାରେ ସତର୍କ ରହିବାକୁ ପରାମର୍ଶ ଦେଇଛି କ୍ରାଇମ୍‌ବ୍ରାଞ୍ଚ୍‌।