ଅଲୱର: ରାଜସ୍ଥାନର ରାସ୍ତାରେ ଚାଲୁଥିଲା ୟୁନିଭର୍ସିଟି। ଏକ କାର ପାଲଟିଥିଲା ଚଳନ୍ତା ବିଶ୍ବବିଦ୍ୟାଳୟ। ଟଙ୍କା ଦେବା ମାତ୍ରେ ମିଳୁଥିଲା ଗ୍ରାଜୁଏସନ ଠାରୁ ନେଇ ଏମସିଏ, ଡିଇଡି, ପଲିଟେକ୍ନିକ ଏବଂ ଲାଇବ୍ରେରିଆନ ପର୍ଯ୍ୟନ୍ତ ଡିପ୍ଲୋମା-ଡିଗ୍ରୀ ପ୍ରମାଣପତ୍ର। ରାଜସ୍ଥାନ ଅଲୱରରୁ ଏପରି ବେଆଇନ କାର୍ଯ୍ୟ ଚଲାଇଥିବା ତିନି ଯୁବକ ଗିରଫ ହୋଇଛନ୍ତି। ଅଲୱର ଏନଇବି ପୁଲିସ ଶନିବାର ଶାହଜହାପୁରର ସୁଧୀର କୁମାର ଯାଦବ, ପୂର୍ଣ୍ଣିଆର ସୁଜୀତ କୁମାର ଏବଂ ବିହାର କୃଷ୍ଣା କଲୋନୀର ସଚିନ କୁମାରଙ୍କୁ ଗିରଫ କରିଛି। ସେମାନଙ୍କ କାର୍‌କୁ ମଧ୍ୟ ଜବତ କରାଯାଇଛି। ଏମାନେ ଏ ପର୍ଯ୍ୟନ୍ତ କେତେ ଡିଗ୍ରୀ ପ୍ରମାଣପତ୍ର ଦେଲେଣି ଏବଂ କେତେ ଟଙ୍କା ଆଦାୟ କଲେଣି ତାହାର ଯାଞ୍ଚ ଜାରି ରହିଛି। ଏହି ଚେର ଅନେକ ଘରୋଇ ୟୁନିଭର୍ସିଟିକୁ ଲମ୍ବିଥିବା ଆଶଙ୍କା କରାଯାଉଛି।

ଜବତ କାର୍‌ରୁ ନାମଲେଖା ଫର୍ମଠାରୁ ନେଇ ପରୀକ୍ଷା ପ୍ରଶ୍ନୋତ୍ତର, ଡିଗ୍ରୀ, ଡିପ୍ଲୋମା ସହିତ ଅଧିକାରୀଙ୍କ ମୋହର ମିଳିଛି। ଡାଏରୀରେ ଟଙ୍କା ନେଇ ବଣ୍ଟାଯାଇଥିବା ଡିଗ୍ରୀ ପ୍ରମାଣପତ୍ରର ହିସାବ ରହିଛି। ଗିରଫ ଯୁବକଙ୍କ ଅନୁଯାୟୀ ଅଲୱର ସହିତ ରାଜ୍ୟ ଏବଂ ପ୍ରଦେଶର ଅନେକ ଘରୋଇ ବିଶ୍ବବିଦ୍ୟାଳୟ ସହ ସେମାନଙ୍କର ସହବନ୍ଧନ ରହିଛି। ଡିଗ୍ରୀ ଏବଂ ଡିପ୍ଲୋମା ପ୍ରମାଣପତ୍ର ଦେବା ପରେ ସେମାନେ ସମ୍ବନ୍ଧିତ ବିଶ୍ବବିଦ୍ୟାଳୟକୁ କାଗଜପତ୍ର ପଠାଇଥାନ୍ତି। ରେକର୍ଡ ଅପଡେଟ କରିବା ପାଇଁ ଏପରି କରାଯାଇଥାଏ। ବିଏସ୍‌ସି, ବିବିଏ, ବିକମ୍‌, ପିଜିଡିସିଏ, ଏମସିଏ, ଡିଇଡି, ପଲିଟେକ୍ନିକ ଏବଂ ଲାଇବ୍ରେରିଆନ ସହିତ ଅନେକ ଡିଗ୍ରୀ ଏବଂ ଡିପ୍ଲୋମା ପ୍ରମାଣପତ୍ର ସେମାନେ ଦେଉଥିଲେ। ଟଙ୍କା ଦେବାର କିଛି ସମୟ ପରେ ଉତ୍ତର ଖାତା ପୂରଣ କରିବାକୁ ପଡିଥାଏ। ଜାଲିଆତି ଧରା ନ ପଡିବା ଲାଗି ରେକର୍ଡକୁ ବିଶ୍ବବିଦ୍ୟାଳୟକୁ ପଠଯାଇଥାଏ। ଏମାନେ ପରେ ୟୁନିଭର୍ସିଟିରେ ରେକର୍ଡ ଅପଡେଟ କରୁଥିଲେ। ଏଥିରୁ ଅନେକ ଘରୋଇ ବିଶ୍ବବିଦ୍ୟାଳୟ ସହ ଯୁବକଙ୍କ ଲିଙ୍କ ରହିଛି ବୋଲି ଜଣାପଡିଛି। ଅଭିଯୁକ୍ତଙ୍କ ନିକଟରୁ ବିଭିନ୍ନ ୟୁନିଭର୍ସିଟିର ୪୩୯ ଉତ୍ତର ଖାତା, ଖାଲିଥିବା ୮୫୦ ଉତ୍ତର ଖାତା, ୯୩ ମାଇଗ୍ରେସନ ପ୍ରମାଣପତ୍ର, ୪୧ କଲେଜ ପ୍ରମାଣ ପତ୍ର, ଟିସି ଏବଂ ୯୧ ମାର୍କସିଟ୍‌, ୨୬ଟି ପ୍ରୋଭିଜନାଲ ସାର୍ଟିଫିକେଟ, ଖାଲିଥିବା ୪ଟି ପ୍ରୋଭିଜନାଲ ସାର୍ଟିଫିକେଟ, ଖାଲିଥିବା ୧୧୮ଟି ମାଇଗ୍ରେସନ ପ୍ରମାଣପତ୍ର, ୨୨ ଫି ରସିଦ, ୧୦ଟି ଏଟିଏମ କାର୍ଡ, ୭ କ୍ରେଡିଟ କାର୍ଡ, ଗୋଟିଏ ଲ୍ୟାପଟପ, ଚୁରୁ ସ୍ଥିତ ଓପିଜେଏସ ୟୁନିଭର୍ସିଟିର ୧୮ଟି ଲେଟର ପ୍ୟାଡ, ୩ଟି ଖାଲି ସତ୍ୟପାଠ, ଏକ ଟାବ୍‌ଲେଟ, ହିସାବ ପତ୍ର ଥିବା ୪ଟି ଡାଏରୀ, ୪ ଷ୍ଟାମ୍ପ ଆଦି ମିଳିଛି।

ଏହା ଜଣାପଡିବା ପରେ ବି ପୁଲିସ ବିଶ୍ବବିଦ୍ୟାଳୟ ଗୁଡିକର ନାମ ପ୍ରଘଟ କରୁନାହିଁ। କେବଳ ଚୁରୁ ସ୍ଥିତ ବିଶ୍ବବିଦ୍ୟାଳୟର ନାମ କହିଛି। ଅଲୱର ସହିତ ଅନ୍ୟ ବିଶ୍ବବିଦ୍ୟାଳୟ ଗୁଡିକର ନାମ ଉଲ୍ଲେଖ କରିବାକୁ ପୁଲିସ ପଛଘୁଞ୍ଚା ଦେଉଛି। ତଦନ୍ତ ଏବେ ଜାରି ରହିଥିବା ଥାନାଧିକାରୀ ସୁରେଶ କୁମାର କହିଛନ୍ତି। ଉତ୍ତରଖାତା ସହିତ ଡିଗ୍ରୀ ଏବଂ ଡିପ୍ଲୋମା ପ୍ରମାଣପତ୍ରରେ ବିଶ୍ବବିଦ୍ୟାଳୟ ଗୁଡିକର ନାମ ରହିଛି। ଏହା ସତ୍ତ୍ବେ ପୁଲିସ ଏ ବିଷୟରେ କୌଣସି ତଥ୍ୟ ଦେଉନାହିଁ। ଏହାକୁ ନେଇ ପୁଲିସ ଉପରେ ସନ୍ଦେହ ଘନୀଭୂତ ହେବାରେ ଲାଗିଛି। ତେବେ ଠକାମିର ଶିକାର ନ ହେବାକୁ ପୁଲିସ ଯୁବ ବର୍ଗଙ୍କୁ ପରାମର୍ଶ ଦେଇଛି। ଜାଲ ପ୍ରମାଣପତ୍ର ଦେଇ କରିଥିବା ଚାକିରି ମଧ୍ୟ ଚାଲି ଯାଇଥାଏ ବୋଲି କୁହାଯାଇଛି।