ନୂଆଦିଲ୍ଲୀ: ଆଉ କିଛି ବର୍ଷ ପରେ ବଦଳିଯିବ ବିଶ୍ବ। ମନୁଷ୍ୟ ନୁହେଁ, ରୋବୋଟ ପୃଥିବୀରେ ରାଜ୍ କରିବେ। ଏମାନେ ମନୁଷ୍ୟକୁ ଗୋଲାମ ବନାଇ ରଖିବେ। ଅନେକ ଚଳଚ୍ଚିତ୍ରରେ ଏବଂ ବିଜ୍ଞାନ ଭିତ୍ତିକ ପୁସ୍ତକରେ ଏଭଳି ଆଶଙ୍କା ପ୍ରକାଶ କରାଯାଇଥିଲା। ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ) ଆସିବା ପରେ ଏହି ଆଶଙ୍କା ସତ୍ୟ ହେବାରେ ଲାଗିଛି। ଚିକିତ୍ସା, ଚିତ୍ରକଳା, ଗୀତ ଗାଇବା, ଅଭିନୟ ଏବଂ ସମ୍ବାଦ ପରିବେଷଣ ଆଦି କାର୍ଯ୍ୟ ଏଆଇ ଦ୍ବାରା ହେଉଥିବାରୁ ହଜାର ହଜାର ଲୋକଙ୍କ ଚାକିରି ବିପଦରେ ପଡ଼ିଛି। ସାଧାରଣତଃ ପୁରୁଷ ପ୍ରଧାନ କୁହାଯାଉଥିବା ଏହି ସମାଜ ଏବଂ ସାମାଜିକ ବ୍ୟବସ୍ଥା ପାଇଁ ମହିଳା ରୋବୋଟ ଆହ୍ବାନ ସୃଷ୍ଟି କରିଛନ୍ତି। ରୋବୋଟ ଦୁନିଆରେ ଏହି ମହିଳା ରୋବୋଟଙ୍କ କର୍ତ୍ତୃତ୍ବ ବଢ଼ିବାରେ ଲାଗିଛି। ବର୍ତ୍ତମାନ ସମୟରେ ବିଶ୍ବର ପ୍ରମୁଖ ହ୍ୟମାନଏଡ୍ ରୋବୋଟଙ୍କ ମଧ୍ୟରେ ସର୍ବାଧିକ ମହିଳା ରୋବୋଟ ରହିଛନ୍ତି। ଏମାନେ ଆଗାମୀ ଦିନରେ ପୁରୁଷ ପ୍ରାଧାନ୍ୟ ସମାଜର ସାମାଜିକ ବ୍ୟବସ୍ଥାକୁ ବଦଳାଇ ଦେବେ ବୋଲି କୁହାଯାଉଛି। ମହିଳା ରୋବୋଟ ମହିଳଙ୍କ ଅସ୍ତିତ୍ବକୁ ଆହ୍ବାନ ଦେଉଛନ୍ତି। ୨୦୫୦ ସୁଦ୍ଧା ମହିଳା ରୋବୋଟ ପୁରୁଷଙ୍କ ସହ ସମ୍ବନ୍ଧ ରଖିପାରିବେ ଏବଂ ବାହା ହୋଇପାରିବେ ବୋଲି ଏକ ରିପୋର୍ଟ ପ୍ରକାଶ ପାଇଛି। ସ୍କଟଲାଣ୍ଡ ଲେଖକ ଡେଭିଡ ଲେଭି ନିଜ ପୁସ୍ତକରେ ମଧ୍ୟ ସମାନ ଆଶଙ୍କା କରିଥିଲେ।

ଫୁଡ୍‌ ଡେଲିଭରି କମ୍ପାନିଗୁଡ଼ିକ ଏବେ ଟେକ୍ନୋଲୋଜିର ବେଶ୍‌ ଫାଏଦା ଉଠାଇଛନ୍ତି। ମୋବାଇଲ୍‌ରେ କ୍ଲିକ୍‌ କରି ଲୋକେ ନିଜ ମନ ପସନ୍ଦର ଖାଦ୍ୟକୁ ଘରେ ପାଇ ପାରୁଛନ୍ତି। ଏଭଳି ଅନ୍‌ଲାଇନ୍ ସର୍ଭିସ୍‌ ଯୋଗାଉଥିବା କମ୍ପାନିଗୁଡ଼ିକ ନୂଆ ନୂଆ ବୈଷୟିକ କୌଶଳ ଦ୍ବାରା ଅଧିକ ସଂଖ୍ୟାରେ ଗ୍ରାହକଙ୍କୁ ନିଜ ସହିତ ଯୋଡ଼ିବା ପାଇଁ ଚେଷ୍ଟା କରୁଛନ୍ତି। ଏହି କ୍ରମରେ ‘ପିଜାହଟ୍‌’ କମ୍ପାନି ରୋବୋଟ୍‌ ଦ୍ବାରା ପିଜା ଡେଲିଭରି କରାଇବା ପାଇଁ ପ୍ରସ୍ତୁତି ଆରମ୍ଭ କରି ଦେଇଛି। ଏହି ପାଇଲଟ୍ ପ୍ରୋଜେକ୍ଟର ଆରମ୍ଭ ଭ୍ୟାଙ୍କୋଭର୍‌(କାନାଡା) ରୁ ହୋଇଛି। ରୋବୋଟ୍‌ ମାଧ୍ୟମରେ ଡେଲିଭରି ସେବା ପ୍ରଦାନର ଟ୍ରାଏଲ୍‌ କରାଯାଇଛି। ଟ୍ବିଟର୍‌ରେ ‘ପିଜାହଟ୍ କାନାଡା’ ପକ୍ଷରୁ ଏହି ସୂଚନା ଦିଆଯାଇଛି। ସର୍ଭ ରୋବଟିକ୍ସ, ପିଜା ଡେଲିଭରି ରୋବୋଟ୍‌ ବିକଶିତ କରିଛି। ଏହା ରୋଜଗାର ହ୍ରାସ କରିବା ପରିବର୍ତ୍ତେ ଶ୍ରମାଭାବ ଶୂନ୍ୟସ୍ଥାନକୁ ପୂରଣ କରିବାରେ ସାହାଯ୍ୟ କରିବ ବୋଲି କହିଛନ୍ତି ସର୍ଭ ରୋବଟିକ୍ସର ସିଇଓ ଅଲି କଷାନି।

ଅନ୍ୟପଟେ ଏହି ରୋବଟ୍‌ ପରିବେଶ ଅନୁକୂଳ। ଡେଲିଭରି ବୟ ଗାଡ଼ିରେ ଖାଦ୍ୟ ଡେଲିଭରି କରିବା ଦ୍ବାରା ଗାଡ଼ିରୁ ନିର୍ଗତ ଧୂଆଁ ଦ୍ବାରା ପରିବେଶ ପ୍ରଦୂଷଣ ହୋଇଥାଏ। ମାତ୍ର ପିଜା ଡେଲିଭରି ରୋବୋଟ୍‌ ଇଲେକ୍‌ଟ୍ରିକ୍ ପରିଚାଳିତ ହୋଇଥିବାରୁ ପରିବେଶ ଦୂଷିତ ହେବାର ଆଶଙ୍କା ନାହିଁ। ଏହାବାଦ୍ ରୋବୋଟ୍‌ ଖାଦ୍ୟ ଡେଲିଭରି ଦେଲେ, ଗ୍ରାହକଙ୍କୁ ଏଥିପାଇଁ ଟିପ୍ ଦେବାକୁ ମଧ୍ୟ ପଡ଼ିବ ନାହିଁ। ତେବେ ଗ୍ରାହକଙ୍କୁ ରୋବୋଟ୍‌ ଦ୍ବାରା ପିଜା ଡେଲିଭରି ପାଇଁ ରୋବୋଟିକ୍‌ ଡେଲିଭରି ଅପସନ୍‌ ଚୟନ କରିବାକୁ ପଡ଼ିବ।

ୱାଶିଂଟନ(ଏଜେନ୍ସି): ରୋବୋଟିକ୍ସ କ୍ଷେତ୍ରରେ ମନୁଷ୍ୟକୁ ବଡ଼ ସଫଳତା ମିଳିଛି। ବିଶ୍ବରେ ପ୍ରଥମ ଥର ପାଇଁ ଏକ ରୋବୋଟ ମନୁଷ୍ୟ ସହାୟତା ବିନା ସଫଳ ଅସ୍ତ୍ରୋପଚାର କରିଛି। ଆମେରିକାର ଜନ୍‌ ହପ୍‌କିନ୍ସ ୟୁନିଭର୍ସିଟିର ସ୍ମାର୍ଟ ଟିସୁ ଅଟୋନମସ ରୋବୋଟ (ଷ୍ଟାର) ଏକ ଘୁଷୁରୀର ସ୍ନାୟୁ ଅସ୍ତ୍ରୋପଚାର କରିବାରେ ସଫଳ ହୋଇଛି। ଗବେଷକଙ୍କ ଅନୁଯାୟୀ ରୋବୋଟିକ୍ସ କ୍ଷେତ୍ରରେ ଏହା ବହୁତ ବଡ଼ ଉପଲବ୍ଧି। ଏହି ରୋବୋଟ ମନୁଷ୍ୟ ତୁଳନାରେ ବହୁତ ଭଲ ଅସ୍ତ୍ରୋପଚାର କରିଥିଲା। ଏହି ଅସ୍ତ୍ରୋପଚାରରେ ରୋବୋଟ ଘୁଷୁରୀ ଅନ୍ତନଳୀର ୨ଟି ସ୍ନାୟୁକୁ ଯୋଡିଥିଲା। ଏ ପର୍ଯ୍ୟନ୍ତ ୪ଟି ପଶୁଠାରେ ଏଭଳି ଅସ୍ତ୍ରୋପଚାର କରାଯାଇଛି। ଏହି ସମୟରେ ରୋବୋଟ ଜଣେ କୁଶଳୀ ଡାକ୍ତର ଭାବେ ଅସ୍ତ୍ରୋପଚାର କରିଥିଲା। ଏହି ଗବେଷଣାର ପ୍ରମୁଖ ଡାକ୍ତର ଏକ୍ସେଲ କ୍ରିଏଗର କହିଛନ୍ତି ଯେ ପେଟ ଭିତରେ ୨ଟି ଅନ୍ତନଳୀକୁ ଯୋଡିବା ଚ୍ୟାଲେଞ୍ଜିଂ କାମ ହୋଇଥାଏ। ଏଥିପାଇଁ ବିଶେଷଜ୍ଞ ଡାକ୍ତରଙ୍କ ଆବଶ୍ୟକତା ପଡ଼ିଥାଏ। ଅସ୍ତ୍ରୋପଚାର ସମୟରେ ସାମାନ୍ୟ ଅସାବଧାନତା ରୋଗୀଙ୍କ ଜୀବନ ପ୍ରତି ବିପଦ ସୃଷ୍ଟି କରିଥାଏ। ଅସ୍ତ୍ରୋପଚାରର ଏକ କଠିନ କାମକୁ ରୋବୋଟ ସଫଳ କରି ଦେଖାଇଛି।