ଭୁବନେଶ୍ୱର: ସ୍ୱତନ୍ତ୍ର ସଘନ ସଂଶୋଧନ (ଏସଆଇଆର) ପ୍ରକ୍ରିୟାରେ ସ୍ୱଚ୍ଛତା ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି।  ବିଜେପି ଇଙ୍ଗିତରେ ଏସଆଇଆରରେ ରାଜ୍ୟର ୨୭ ଲକ୍ଷ ୫୦ ହଜାର ଭୋଟରଙ୍କୁ ବାଦ ଦିଆଯାଇଛି ବୋଲି ସାଂଘାତିକ ଅଭିଯୋଗ କରିଛି ବିଜେଡି।  ଶୁକ୍ରବାର ଶଙ୍ଖ ଭବନରେ ଆୟୋଜିତ ସାମ୍ୱାଦିକ ସମ୍ମିଳନୀରେ ଦଳର ବରିଷ୍ଠ ସାଧାରଣ ସମ୍ପାଦକ ଭୃଗୁ ବକ୍ସିପାତ୍ର, ସାଧାରଣ ସମ୍ପାଦକ ବିଜୟ ନାୟକ ଓ ମୁଖପାତ୍ର ତଥା ଗଣମାଧ୍ୟମ ସଂଯୋଜକ ଡ. ଲେନିନ ମହାନ୍ତି  ଏସ୍‌ଆଇଆର୍‌ ପ୍ରସଙ୍ଗରେ ଡ଼ବଲ ଇଞ୍ଜିନ୍‌ ସରକାର ଉପରେ ପ୍ରବଳ ବର୍ଷିଛନ୍ତି । 

ଭୃଗୁ ବକ୍ସିପାତ୍ର କହିଛନ୍ତି ଯେ ଡବଲ ଇଞ୍ଜିନ ସରକାରଙ୍କ ନିର୍ଦ୍ଦେଶକ୍ରମେ ରାଜ୍ୟରେ ବିଜେପିକରଣରେ ଏସଆଇଆର ପ୍ରକ୍ରିୟା ସମ୍ପାଦିତ ହୋଇଛି। ବିଜେପି ଇଙ୍ଗିତରେ ନିର୍ବାଚନ ଅଧିକାରୀ ସମସ୍ତ ନିୟମକୁ ଅବମାନନା କରି ଏହାକୁ ସମ୍ପାଦନ କରିଛନ୍ତି। ଯୋଗ୍ୟ ଭୋଟର ଯେପରି ଭୋଟର୍‌ ତାଲିକାରୁ ବାଦ୍‌ ନ ପଡିବେ, ସେନେଇ ବିଜେଡି ଲଢେଇ ଜାରି ରଖିଛି। ବର୍ତ୍ତମାନ ସାରା ଦେଶରେ ଏସଆଇଆର ପ୍ରକ୍ରିୟାରେ ଅନିୟମିତତା ହୋଇଥିବା ଅଭିଯୋଗ ହେଉଛି। ଦେଶର ମୁଖ୍ୟ ନିର୍ବାଚନ କମିଶନର ଏସଆଇଆର ପ୍ରକ୍ରିୟାକୁ ଅଗଣତାନ୍ତ୍ରିକ ଭାବେ ସମ୍ପାଦନ କରିଛନ୍ତି। ତେଣୁ ଇସିଆଇ ତୁରନ୍ତ ଇସ୍ତଫା ପ୍ରଦାନ କରନ୍ତୁ ବୋଲି ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ ପ୍ରତିକ୍ରିୟାରେ କହିଛନ୍ତି। ଅନ୍ୟପକ୍ଷରେ ନିର୍ବାଚନ ଅଧିକାରୀଙ୍କ ପାଇଁ ସଫେଇ ଦେଇ ବିଜେପି ମୁଖପାତ୍ରମାନେ ଗଣମାଧ୍ୟମରେ ପ୍ରତିକ୍ରିୟା ଦେଉଛନ୍ତି।  ଏସ୍‌ଆଇଆର ପ୍ରକ୍ରିୟାରେ ହୋଇଥିବା ଅନିୟମିତତା ବିଜେପି ଇଙ୍ଗିତରେ ହୋଇଥିବା ଏଥିରୁ ସ୍ପଷ୍ଟ ହୋଇଛି। ଏସ୍‌ଆଇଆରରେ ଦେଶରେ ୧୩ କୋଟି ଓ ରାଜ୍ୟରେ ୨୭ ଲକ୍ଷ ୫୦ ହଜାର ଭୋଟରଙ୍କ ନାମ ତାଲିକାରୁ ବାଦ୍‌ ଦିଆଯାଇଛି। 

ବିଜୟ ନାୟକ କହିଥିଲେ ଯେ ଏସଆଇଆର ପ୍ରକ୍ରିୟା ଆରମ୍ଭରୁ ରାଜ୍ୟ ନିର୍ବାଚନ ଅଧିକାରୀଙ୍କ ପ୍ରତିନିଧି ରାଜ୍ୟରୁ ୯ ଲକ୍ଷ ୮୦ ହଜାର ଭୋଟରଙ୍କ ନାମ ବାଦ୍‌ ପଡିଥିବା ନେଇ ଚିଠି ଦେଇଥିଲେ।   ଯେଉଁମାନେ ବିଜେପିକୁ ଭୋଟ୍‌ ଦେଉନାହାନ୍ତି, ତାଙ୍କ ନାମକୁ ଭୋଟର ତାଲିକାରୁ ବାଦ୍‌ ଦିଆଯିବ ବୋଲି ଟିଟିଲାଗଡ ବିଧାୟକ ନବୀନ ଜୈନ ଯାହା କହିଥିଲେ; ତାହା ଏବେ ସତ୍ୟ ବୋଲି ପ୍ରମାଣିତ ହୋଇଛି। ପ୍ରକ୍ରିୟା ସମୟରେ ପ୍ରାୟ ୯୦ ପ୍ରତିଶତ ଲୋକଙ୍କୁ ପରିଗଣନା ଫର୍ମ ମିଳିଲା ନାହିଁ। ଏହାକୁ ନେଇ ବିଜେଡି ଅଭିଯୋଗ କରିବା ପରେ ମଧ୍ୟ କୌଣସି ପଦକ୍ଷେପ ଗ୍ରହଣ କରାଗଲା ନାହିଁ। ଆପତ୍ତି ଓ ଅଭିଯୋଗ ପ୍ରଦାନ କରିବା ସମୟରେ ରାଜନୈତିକ ଦଳମାନଙ୍କ ସହ ନିର୍ବାଚନ ଅଧିକାରୀ ଆଲୋଚନା ଓ ବୈଠକ କରିବାର ନିୟମ ରହିଥିବା ବେଳେ ନିର୍ବାଚନ ଅଧିକାରୀ କୌଣସି ବୈଠକ କି ଆଲୋଚନା କଲେ ନାହିଁ। ଫର୍ମ ୭ ଜରିଆରେ ଲୋକେ ଗଦାଗଦା ଅଭିଯୋଗ କରିବା ସତ୍ତ୍ବେ କୌଣସି ପଦକ୍ଷେପ ଗ୍ରହଣ କରାଗଲା ନାହିଁ। ଜୀବିତ ଲୋକମାନଙ୍କୁ ଫର୍ମ ୭ ଜରିଆରେ ବାଦ୍‌ ଦିଆଯାଇଛି। 

ଡ. ଲେନିନ ମହାନ୍ତି କହିଥିଲେ ଯେ ରାଜ୍ୟରେ ପ୍ରାୟ ୨୭ ଲକ୍ଷ ୫୦ ହଜାର ଭୋଟର ତାଲିକାରୁ ବାଦ୍‌ ପଡିଥିବାରୁ ସନ୍ଦେହ ସୃଷ୍ଟି ହେଉଛି। ନିର୍ବାଚନ ଅଧିକାରୀଙ୍କ ନାମରେ ଅଭିଯୋଗ ହେଲେ ବିଭାଗୀୟ ଅଧିକାରୀମାନେ ଉତ୍ତର ଦେବା କଥା, କିନ୍ତୁ ବିଜେପି ମୁଖପାତ୍ର ଉତ୍ତର ଦେଉଛନ୍ତି। ଯାହାକି ଆହୁରି ସନ୍ଦେହ ସୃଷ୍ଟି କରୁଛି। ଏସଆଇଆର ପ୍ରକ୍ରିୟା ଏବଂ ଗତ ୨୦୨୪ ସାଧାରଣ ନିର୍ବାଚନ ମଧ୍ୟ ସନ୍ଦେହ ଘେରରେ ରହିଛି। ଭୋଟର ତାରତମ୍ୟ ନେଇ ବିଜେଡି ପକ୍ଷରୁ ତଥ୍ୟ ଓ ପ୍ରମାଣ ସହ ରାଷ୍ଟ୍ର ମୁଖ୍ୟ ନିର୍ବାଚନ ଅଧିକାରୀଙ୍କୁ ଅଭିଯୋଗ କରାଯାଇଥିଲା, କିନ୍ତୁ ପଦକ୍ଷେପ ଗ୍ରହଣ କରାଗଲା ନାହିଁ। ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସର୍ବଦା ଭୋଟର ଯୋଡ଼ିବାକୁ ଗୁରୁତ୍ୱ ଦେଉଥିବା ବେଳେ ବିଜେପି ଭୋଟର ତାଲିକାରୁ ନାମ ବାଦ୍‌ ଦେଉଛି। ସରକାରୀ ସଂସ୍ଥା ଗୁଡ଼ିକୁ ଲଗାଇ ନିର୍ବାଚନ ଜିତିଛି ବିଜେପି। ସମ୍ପୂର୍ଣ୍ଣ ଏସଆଇଆର ପ୍ରକିୟାର ପୁନଃ ଯାଞ୍ଚ କରାଯାଉ ବୋଲି ସେ ଦାବି କରିଛନ୍ତି।

ଭୁବନେଶ୍ୱର: ଓଡ଼ିଶା ବିଧାନସଭାର ମୌସୁମୀ ଅଧିବେଶନ ଆରମ୍ଭ ହେବାକୁ ଯାଉଥିବା ବେଳେ ରାଜନୈତିକ ଉଷ୍ମତା ବୃଦ୍ଧି ପାଇଛି। ବାଚସ୍ପତି ସୁରମା ପାଢ଼ୀଙ୍କ ଦ୍ୱାରା ଡକାଯାଇଥିବା ସର୍ବଦଳୀୟ ବୈଠକ ପରେ ଶାସକ ବିଜେପି ଏବଂ ବିରୋଧୀଙ୍କ ମଧ୍ୟରେ ବିବାଦୀୟ ବୟାନବାଜି ଦେଖିବାକୁ ମିଳିଛି। ଶାସକ ଦଳ ୬ଟି ବିଲ୍ ଏବଂ ରାଜ୍ୟର ପ୍ରମୁଖ ସମସ୍ୟା ଉପରେ ଆଲୋଚନା ପାଇଁ ପ୍ରସ୍ତୁତ ଥିବା କହୁଥିବାବେଳେ, ବିରୋଧୀ ଦଳ ବିଜେଡି ଏବଂ କଂଗ୍ରେସ MMDR ଆଇନ ସଂଶୋଧନ, ମହାନଦୀ ଜଳ ବିବାଦ ଏବଂ ପାଠ୍ୟପୁସ୍ତକ ତ୍ରୁଟି ପ୍ରସଙ୍ଗରେ ସରକାରଙ୍କୁ ଘେରିବାକୁ ପ୍ରସ୍ତୁତ ହେଉଛନ୍ତି।

ସର୍ବଦଳୀୟ ବୈଠକ ପରେ ସରକାରଙ୍କ ନିୟମିତ ପ୍ରତିଶ୍ରୁତିକୁ ନେଇ ବିରୋଧୀ ଅସନ୍ତୋଷ ବ୍ୟକ୍ତ କରିଛନ୍ତି। ବିରୋଧୀ ଦଳର ମୁଖ୍ୟ ସଚେତକ ପ୍ରମିଳା ମଲ୍ଲିକ ସ୍ପଷ୍ଟ କରିଛନ୍ତି ଯେ ଗୃହ ପରିଚାଳନାରେ ସେମାନଙ୍କର ସହଯୋଗ ଜନସ୍ୱାର୍ଥ ପ୍ରସଙ୍ଗର ଆଲୋଚନା ଉପରେ ନିର୍ଭର କରେ। MMDR ଆଇନ ସଂଶୋଧନ ଯୋଗୁଁ ଓଡ଼ିଶା ସମ୍ମୁଖୀନ ହେଉଥିବା ସମ୍ଭାବ୍ୟ କ୍ଷତି ସମ୍ପର୍କରେ ଏକ ସ୍ୱତନ୍ତ୍ର ଆଲୋଚନା ପାଇଁ ଦଳ ବିଧିବଦ୍ଧ ଭାବେ ଦାବି କରିଥିବା ସେ ଗୁରୁତ୍ୱାରୋପ କରିଛନ୍ତି। ସେହିପରି କଂଗ୍ରେସ ବିଧାୟକ ଅଶୋକ ଦାସ ମଧ୍ୟ ସମାନ ମତ ପୋଷଣ କରିଛନ୍ତି। ସେ ଦର୍ଶାଇଛନ୍ତି ଯେ କଂଗ୍ରେସ ଦଳ MMDR ଆଇନ ଏବଂ ସ୍କୁଲ ପାଠ୍ୟପୁସ୍ତକରେ ହୋଇଥିବା ତ୍ରୁଟି ପ୍ରସଙ୍ଗକୁ ଦୃଢ଼ତାର ସହ ଉଠାଇବ ଏବଂ ଏଥିପାଇଁ ତୁରନ୍ତ ସମୟ ଆବଣ୍ଟନ କରିବାକୁ ଦାବି କରିବ।

ଛତିଶଗଡ଼ ସହ ଦୀର୍ଘ ଦିନ ଧରି ଲାଗି ରହିଥିବା ମହାନଦୀ ଜଳ ବିବାଦ ପ୍ରସଙ୍ଗରେ ଶାସକ ବିଜେପି ସରକାର ଉପରେ ବିରୋଧୀ ତୀବ୍ର ଆକ୍ରମଣ କରିଛନ୍ତି। ରାଜ୍ୟ ଏବଂ କେନ୍ଦ୍ର ରାଜନୈତିକ ସମୀକରଣକୁ ନେଇ କଟାକ୍ଷ କରି ତଥାକଥିତ 'ଟ୍ରିପଲ୍-ଇଞ୍ଜିନ୍ ସରକାର' କିପରି ଓଡ଼ିଶାର ସ୍ୱାର୍ଥ ରକ୍ଷା କରିବାରେ ବିଫଳ ହେଉଛନ୍ତି, ସେହି ପ୍ରସଙ୍ଗରେ ବିରୋଧୀ ସରକାରଙ୍କୁ ଘେରିବା ପାଇଁ ରଣନୀତି ପ୍ରସ୍ତୁତ କରିଛନ୍ତି।

ନୂଆଦିଲ୍ଲୀ: ପଞ୍ଜାବ ଡ୍ରାଫ୍ଟ ଭୋଟର ତାଲିକାରୁ କଟିଲା ରାଘବ ଚଢ଼ାଙ୍କ ନାଁ । ରାଜ୍ୟସଭା ସାଂସଦ ତଥା ଭାରତୀୟ ଜନତା ପାର୍ଟି (ବିଜେପି) ନେତା ରାଘବ ଚଢ଼ା ପଞ୍ଜାବ ସରକାରଙ୍କ ଉପରେ ଆଣିଲେ ରାଜନୈତିକ ଷଡ଼ଯନ୍ତ୍ରର ଅଭିଯୋଗ । ପଞ୍ଜାବର ଡ୍ରାଫ୍ଟ ଭୋଟର ତାଲିକାରେ ତାଙ୍କ ନାମକୁ "ସିଫ୍ଟେଡ୍" ବା ସ୍ଥାନାନ୍ତରିତ ବର୍ଗରେ ରଖାଯାଇଥିବା ନେଇ ସେ ଆମ୍ ଆଦ୍‌ମୀ ପାର୍ଟି (ଆପ୍) ସରକାରଙ୍କୁ ଦାୟୀ କରିଛନ୍ତି। ଏହା ଏକ ରାଜନୈତିକ ଷଡ଼ଯନ୍ତ୍ର ଏବଂ ପ୍ରତିହିଂସାମୂଳକ ପଦକ୍ଷେପ ବୋଲି ସେ ଦାବି କରିଛନ୍ତି।

ଗତ ଏପ୍ରିଲ ମାସରେ ଆପ୍ ଛାଡ଼ି ବିଜେପିରେ ଯୋଗ ଦେଇଥିବା ୧୦ ଜଣ ରାଜ୍ୟସଭା ସାଂସଦଙ୍କ ମଧ୍ୟରୁ ୭ ଜଣଙ୍କ ଭିତରେ ରାଘବ ଚଢ଼ା ଅନ୍ୟତମ। ସେ ଦୀର୍ଘ ଦିନରୁ ମୋହାଲିର ଜଣେ ପଞ୍ଜୀକୃତ ଭୋଟର ରହିଆସିଛନ୍ତି। ଦଳ ଛାଡ଼ିଥିବା ନେତାମାନଙ୍କୁ ଟାର୍ଗେଟ୍ କରିବା ଉଦ୍ଦେଶ୍ୟରେ ଏଭଳି କରାଯାଇଛି ବୋଲି ସେ ଅଭିଯୋଗ କରିଛନ୍ତି।

ତାଙ୍କ ନାମକୁ ସ୍ଥାନାନ୍ତରିତ କରିବାରେ ବୁଥ୍ ସ୍ତରୀୟ ଅଧିକାରୀ (BLOs), ସହକାରୀ ନିର୍ବାଚନ ପଞ୍ଜୀକରଣ ଅଧିକାରୀ (AEROs) ଏବଂ ମୁଖ୍ୟ ନିର୍ବାଚନ ଅଧିକାରୀ (CEO) ସମ୍ପୃକ୍ତ ଥିବା ସେ ଦାବି କରିଛନ୍ତି। ସେ କହିଛନ୍ତି ଯେ, ନିର୍ବାଚନ ଡ୍ୟୁଟି ଶେଷ ହେବା ପରେ ବଦଳି ଏବଂ ପୋଷ୍ଟିଂ ରାଜ୍ୟ ସରକାରଙ୍କ ନିୟନ୍ତ୍ରଣରେ ଥିବାରୁ ଅଧିକାରୀମାନେ ଚାପରେ ଅଛନ୍ତି। ଏହାବ୍ୟତୀତ ଆପ୍ ଛାଡ଼ିଥିବା ଅନ୍ୟ ପୂର୍ବତନ ସାଂସଦମାନଙ୍କୁ ମଧ୍ୟ ପଞ୍ଜାବ ପୋଲିସ ଓ ପ୍ରଶାସନ ସମାନ ଢଙ୍ଗରେ ଟାର୍ଗେଟ୍ କରୁଥିବା ସେ ଅଭିଯୋଗ କରିଛନ୍ତି। 

ପଞ୍ଜାବର ମୁଖ୍ୟ ନିର୍ବାଚନ ଅଧିକାରୀଙ୍କ କାର୍ଯ୍ୟାଳୟ ରାଜନୈତିକ ଅଭିଯୋଗ ଉପରେ କୌଣସି ମନ୍ତବ୍ୟ ଦେବାକୁ ମନା କରିଦେଇଛନ୍ତି। ତେବେ ସିଇଓ ଅଫିସର ଜଣେ ବରିଷ୍ଠ ଅଧିକାରୀ ସ୍ପଷ୍ଟ କରିଛନ୍ତି ଯେ ଏହା କେବଳ ଏକ ଡ୍ରାଫ୍ଟ ବା ଚିଠା ତାଲିକା ଅଟେ। ଯଦି କୌଣସି ପ୍ରକୃତ ଭୋଟରଙ୍କ ନାମ ବାଦ୍ ପଡ଼ିଥାଏ, ତେବେ ଉଚିତ୍ ପ୍ରକ୍ରିୟା ମାଧ୍ୟମରେ ଏହାକୁ ପୁନର୍ବାର ସାମିଲ କରାଯିବ ବୋଲି ଆଶ୍ୱାସନା ଦିଆଯାଇଛି।

ଆପ୍ ପକ୍ଷରୁ ଏହି ସମସ୍ତ ଅଭିଯୋଗକୁ ଦୃଢ଼ ଭାବରେ ଖଣ୍ଡନ କରାଯାଇଛି। ଦଳ ପକ୍ଷରୁ କୁହାଯାଇଛି ଯେ ଭୋଟର ତାଲିକାର ସ୍ୱତନ୍ତ୍ର ସଂଶୋଧନ ବା ସ୍ପେଶାଲ୍ ଇଣ୍ଟେନ୍ସିଭ୍ ରିଭିଜନ୍ (SIR) ପଞ୍ଜାବ ସରକାରଙ୍କ ଦ୍ୱାରା ନୁହେଁ ବରଂ ଭାରତୀୟ ନିର୍ବାଚନ କମିଶନ (ECI)ଙ୍କ ଦ୍ୱାରା କରାଯାଉଛି। ଓଲଟା ରାଘବ ଚଢ଼ା ଦିଲ୍ଲୀରେ ପୁରୁଣା ତାରିଖ ଦେଇ ନିଜର ଭୋଟର ପଞ୍ଜୀକରଣ କରିବାକୁ ଚେଷ୍ଟା କରୁଥିବା ଆପ୍ ପାଲଟା ଅଭିଯୋଗ କରିଛି ଏବଂ ନିଜର ଭୁଲ୍ ଲୁଚାଇବା ପାଇଁ ପଞ୍ଜାବ ସରକାରଙ୍କ ଉପରେ ଦୋଷ ଲଦୁଛନ୍ତି ବୋଲି ଦଳ କହିଛି। ଏହି ବିବାଦକୁ ନେଇ ବର୍ତ୍ତମାନ ପଞ୍ଜାବ ରାଜନୀତିରେ ଉଷ୍ମତା ଦେଖାଦେଇଛି।

ଭୁବନେଶ୍ବର: କେନ୍ଦ୍ର ଆଦିବାସୀ ବ୍ୟାପାର ମନ୍ତ୍ରୀ ଜୁଏଲ ଓରାମଙ୍କ ଏକ ଭିଡିଓ ବାଇଟ ଆଜି ଭାଇରଲ ହେବା ପରେ ବିଜୁ ଜନତା ଦଳ ଏହା ଉପରେ ବିଜେପିର ଅନ୍ତ କନ୍ଦଳ ଉଗ୍ର ରୂପ ନେଲାଣି ବୋଲି କହିଛି। ବିଜୁ ଜନତା ଦଳ ତରଫରୁ ଜାରି କରା ଯାଇଥିବା ଏକ ପ୍ରେସ ବିବୃତିରେ ଦଳର ମୁଖପାତ୍ର ତଥା ଗଣମାଧ୍ୟମ ସଂଯୋଜକ ଡ଼ ଲେନିନ ମହାନ୍ତି କହିଛନ୍ତି, କେନ୍ଦ୍ର ମନ୍ତ୍ରୀ ଓରାମଙ୍କ ଭାଷାରୁ ସ୍ପଷ୍ଟ ହେଉଛି ଯେ ତାଙ୍କ ବିରୋଧରେ ଏକ ଷଡ଼ଯନ୍ତ୍ର ରଚା ଯାଇଛି, ଯାହାକୁ ନେଇ ସେ ବିବ୍ରତ ଅଛନ୍ତି। ଏହା ସ୍ପଷ୍ଟ କରୁଛି ଯେ, ବିଜେପିରେ ଅନ୍ତଃ କନ୍ଦଳ ଚରମ ସ୍ତରରେ ପହଁଚିଛି। ଏଠାରେ ପ୍ରଶ୍ନ ଉଠୁଛି ଯେ, ଜଣେ କେନ୍ଦ୍ର ମନ୍ତ୍ରୀ ଯଦି ବିବ୍ରତ ହୋଇ ପଡ଼ୁଛନ୍ତି ଓ ନିଜକୁ ଅସୁରକ୍ଷିତ ମନେ କରୁଛନ୍ତି ତାହେଲେ ରାଜ୍ୟର ସାଧାରଣ ନାଗରିକ ନିଜକୁ ସୁରକ୍ଷିତ କିପରି ମଣିବେ? ମନ୍ତ୍ରୀଙ୍କ ମନ୍ତବ୍ୟ ରାଜ୍ୟର ଆଇନ ଶୃଙ୍ଖଳା ସ୍ଥିତି ଉପରେ ପ୍ରଶବାଚୀ ସୃଷ୍ଟି କରିଛି। 

ଡ଼ ମହାନ୍ତି କହିଛନ୍ତି, ମନ୍ତ୍ରୀ ଓରାମ ତାଙ୍କ ବକ୍ତବ୍ୟରେ କହିଛନ୍ତି, ଯିଏ ତାଙ୍କୁ ବଦନାମ କରିବାକୁ ଉଦ୍ୟମ କରୁଛନ୍ତି, ସେ ତାଙ୍କ ହାତକୁ ଓପାଡି ଫୋଫାଡ଼ି ଦେବେ। ମନ୍ତ୍ରୀଙ୍କ ଭାଷାରୁ ତାଙ୍କର  କ୍ରୋଧ ସ୍ପଷ୍ଟ ବାରି ହେଉଛି। ମନ୍ତ୍ରୀ ନିଜେ ଆଇନକୁ ହାତକୁ ନେବେ ବୋଲି ସ୍ପଷ୍ଟ ଘୋଷଣା କରୁଛନ୍ତି, ତାହା କେତେଦୂର ଯୁକ୍ତି ଯୁକ୍ତ? ଡ଼ ମହାନ୍ତି ଆହୁରି କହିଛନ୍ତି, ରାଉରକେଲା ସର୍କିଟ ହାଉସରୁ ଅସ୍ତ୍ର ଶସ୍ତ୍ର ଜବତ ଘଟଣାରେ ମନ୍ତ୍ରୀ ଜୁଏଲ ଓରାମଙ୍କ ପ୍ରତିନିଧି ତଥା ରାଜ୍ୟ ବିଜେପି ଯୁବମୋର୍ଚାର ସମ୍ପାଦକ ପ୍ରକାଶ ପାଶ୍ୱାନଙ୍କ ସମ୍ପୃକ୍ତି ଅଭିଯୋଗ ଓ ପରେ ତାଙ୍କର ଗିରଫ, ବିଜେପିରେ ଥିବା ଅନ୍ତଃ କନ୍ଦଳକୁ ପଦାରେ ପକାଇଛି। ବିଜେପି ଯୁବ ନେତା ପାଶ୍ୱାନ ବିଭିନ୍ନ ଅସାମାଜିକ କାର୍ଯ୍ୟରେ ଲିପ୍ତ ଥିଲେ ବୋଲି ଅଭିଯୋଗ ହେଉଛି। ଏହି ଘଟଣାରେ ମନ୍ତ୍ରୀ ଓରାମ ଯୁବ ନେତା ପାଶ୍ୱାନଙ୍କୁ ସୁରକ୍ଷା ଦେଉଥିଲେ ବୋଲି ବିଜେପିର ଗୋଟିଏ ଗୋଷ୍ଟି ଅଭିଯୋଗ କରି ଆସୁଥିଲେ। ତେବେ  ମନ୍ତ୍ରୀ ଓରାମଙ୍କ ଆଜିର ମନ୍ତବ୍ୟ ବିଜେପି ଦଳରେ ଗୋଷ୍ଟି କନ୍ଦଳର ଉଗ୍ର ରୁପକୁ ପ୍ରଦର୍ଶିତ କରୁଛି।

କଂଗ୍ରେସ ନେତା ତଥା ଷ୍ଟାର୍ ରେସଲର୍ ଭିନେଶ ଫୋଗାଟ ଭାରତୀୟ କୁସ୍ତି ମହାସଂଘ (WFI) ର ପୂର୍ବତନ ଅଧ୍ୟକ୍ଷ ବ୍ରିଜଭୂଷଣ ଶରଣ ସିଂହ ଏବଂ କ୍ଷମତାସୀନ ବିଜେପି ବିରୋଧରେ ପୁଣିଥରେ କଡ଼ା ଆକ୍ରମଣ କରିଛନ୍ତି। ହରିୟାଣାର ଜିନ୍ଦଠାରେ ଆୟୋଜିତ ଏକ ରାଜନୈତିକ କାର୍ଯ୍ୟକ୍ରମରେ ଯୋଗଦେଇ ସେ ବ୍ରିଜଭୂଷଣଙ୍କୁ ‘ଗୁଣ୍ଡା ଏବଂ ଅପରାଧୀ’ ବୋଲି ଅଭିହିତ କରିବା ସହ ତାଙ୍କୁ ସମର୍ଥନ କରୁଥିବାରୁ ବିଜେପି ସରକାରଙ୍କୁ ତୀବ୍ର ସମାଲୋଚନା କରିଛନ୍ତି।

ବ୍ରିଜଭୂଷଣ ଜଣେ ଗୁଣ୍ଡା ଓ ଅପରାଧୀ

ହରିୟାଣାର ଜୁଲାନା ବିଧାନସଭା ଆସନରୁ ବିଧାୟକ ଥିବା ୩୧ ବର୍ଷୀୟା ଭିନେଶ ଫୋଗାଟ ପ୍ରଶ୍ନ କରିଛନ୍ତି ଯେ, ଏଭଳି ଜଣେ ବ୍ୟକ୍ତିଙ୍କୁ ଏତେ ସମ୍ମାନ କାହିଁକି ଦିଆଯାଉଛି? ସେ କହିଛନ୍ତି ଯେ, "ବ୍ରିଜଭୂଷଣ ଜଣେ ଗୁଣ୍ଡା ଓ ଅପରାଧୀ।" ଏହା ସହିତ ସେ ଗୋଣ୍ଡାରେ ଜମି ଦଖଲ, ତାଙ୍କର ଆୟର ଉତ୍ସ ଏବଂ ମହିଳା କୁସ୍ତିଗିରମାନଙ୍କ ସହ ଜଡିତ ବିବାଦକୁ ନେଇ ଅନେକ ପ୍ରଶ୍ନ ଉଠାଇଛନ୍ତି।

ଟଙ୍କା ବଳରେ ଝିଅମାନଙ୍କ ଉପରେ ଅତ୍ୟାଚାର

ମହିଳା କୁସ୍ତିଗିରଙ୍କ ଯୌନ ନିର୍ଯାତନା ପ୍ରସଙ୍ଗରେ ଭିନେଶ ସିଧାସଳଖ ବ୍ରିଜଭୂଷଣଙ୍କୁ ଟାର୍ଗେଟ୍ କରିଛନ୍ତି। ସେ ଅଭିଯୋଗ କରିଛନ୍ତି ଯେ, ଟଙ୍କା ଓ କ୍ଷମତା ବଳରେ ଝିଅମାନଙ୍କ ଉପରେ ଅତ୍ୟାଚାର କରାଯାଉଛି ଏବଂ ଏହା ହିଁ ବିଜେପିର ପ୍ରକୃତ ସତ୍ୟ। ସେ ୨୦୨୩ ମସିହାରେ ହୋଇଥିବା କୁସ୍ତିଗିର ଆନ୍ଦୋଳନ କଥା ମନେ ପକାଇ କହିଛନ୍ତି ଯେ, "ଆନ୍ଦୋଳନ ସମୟରେ ପୋଲିସ ଆମ ସହ ଯେପରି ବ୍ୟବହାର କରିଥିଲା, ସମାନ ଆଚରଣ ଜନ୍ତର-ମନ୍ତରରେ ବିରୋଧ ପ୍ରଦର୍ଶନ କରୁଥିବା ଆମର ଝିଅମାନଙ୍କ ସହିତ ମଧ୍ୟ କରାଯାଇଛି।" ଆଗକୁ ଏହି ନ୍ୟାୟିକ ଲଢ଼େଇ ସୁପ୍ରିମକୋର୍ଟରେ ଜାରି ରହିବ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି।

ବିଜେପି ଉପରେ ଏକଚ୍ଛତ୍ରବାଦର ଆରୋପ

କେବଳ କୁସ୍ତିଗିରଙ୍କ ପ୍ରସଙ୍ଗ ନୁହେଁ, ବରଂ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାଡ଼ଗେଙ୍କ ଉତ୍ତରାଖଣ୍ଡ ଗସ୍ତ ସମୟରେ ହୋଇଥିବା କଥିତ 'ଶୁଦ୍ଧିକରଣ' ବିବାଦ ଉପରେ ମଧ୍ୟ ଭିନେଶ ପ୍ରତିକ୍ରିୟା ରଖିଛନ୍ତି। ଜଣେ ଦଳିତ ନେତାଙ୍କର କୌଣସି ସ୍ଥାନକୁ ଯିବାର ଅଧିକାର ନାହିଁ କି ବୋଲି ସେ ପ୍ରଶ୍ନ କରିଛନ୍ତି। ଯେଉଁ ବିଚାରଧାରାକୁ ଖତମ କରିବା ପାଇଁ କଂଗ୍ରେସ ସଂଘର୍ଷ କରୁଛି, ଆଜି ବିଜେପି ସେହି ଏକଚ୍ଛତ୍ରବାଦୀ ନୀତିକୁ ପ୍ରୋତ୍ସାହିତ କରୁଛି ବୋଲି ସେ ଗୁରୁତର ଆରୋପ ଲଗାଇଛନ୍ତି।

ଭୁବନେଶ୍ୱର: ରାଜ୍ୟରେ ଖୁବଶୀଘ୍ର ନୂଆ ଲୋକାୟୁକ୍ତ ନିଯୁକ୍ତ ହେବେ ବୋଲି ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ସୂଚନା ଦେଇଛନ୍ତି। ରାଜ୍ୟରେ ଏହି ଦୁର୍ନୀତି ନିବାରଣ ସଂସ୍ଥା ଅନେକ ଦିନ ଧରି କାର୍ଯ୍ୟକ୍ଷମ ନଥିବାରୁ ବିରୋଧୀଙ୍କ ସମାଲୋଚନା ମଧ୍ୟରେ ସରକାର ଏହି ପଦକ୍ଷେପ ନେବାକୁ ଯାଉଛନ୍ତି।

ମନ୍ତ୍ରୀ ସୁରେଶ ପୂଜାରୀ କହିଛନ୍ତି ଯେ, ମୁଖ୍ୟମନ୍ତ୍ରୀ, ବାଚସ୍ପତି ଏବଂ ବିରୋଧୀ ଦଳ ନେତାଙ୍କୁ ନେଇ ଗଠିତ ତିନି ଜଣିଆ ଚୟନ କମିଟିର ପ୍ରଥମ ବୈଠକ ଅନୁଷ୍ଠିତ ହୋଇଛି। ଏହାର ଅର୍ଥ ନୂଆ ଲୋକାୟୁକ୍ତ ନିଯୁକ୍ତି ପ୍ରକ୍ରିୟା ଆରମ୍ଭ ହୋଇସାରିଛି। ଏହିସବୁ ନିଯୁକ୍ତି ସର୍ବସମ୍ମତି କ୍ରମେ କରାଯାଇଥାଏ, ତେଣୁ ଓଡ଼ିଶା ଖୁବଶୀଘ୍ର ଜଣେ ନୂଆ ଲୋକାୟୁକ୍ତ ପାଇବ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି। 

ଗତ ୨୦୨୪ ମସିହା ମାର୍ଚ୍ଚ ୧୯, ମାର୍ଚ୍ଚ ୩୦, ଏପ୍ରିଲ ୩ ଏବଂ ଅଗଷ୍ଟ ୮ ତାରିଖରେ ଯଥାକ୍ରମେ ଲୋକାୟୁକ୍ତଙ୍କ ଅଧ୍ୟକ୍ଷ, ଜଣେ ନ୍ୟାୟିକ ସଦସ୍ୟ ଏବଂ ଅନ୍ୟ ଦୁଇଜଣ ସଦସ୍ୟ ଅବସର ଗ୍ରହଣ କରିଥିଲେ। ସେବେଠାରୁ ଏହି ଦୁର୍ନୀତି ନିବାରଣ ସଂସ୍ଥା ଏକପ୍ରକାର ଅଚଳ ହୋଇପଡ଼ିଛି। ଓଡ଼ିଶା ଲୋକାୟୁକ୍ତ ଆଇନ, ୨୦୧୪ର ଧାରା ୬ ଅନୁଯାୟୀ, ଅଧ୍ୟକ୍ଷ ଏବଂ ଅନ୍ୟ ସଦସ୍ୟମାନଙ୍କ କାର୍ଯ୍ୟକାଳ ଶେଷ ହେବାର ଅତି କମରେ ତିନି ମାସ ପୂର୍ବରୁ ରାଜ୍ୟପାଳଙ୍କ ଦ୍ୱାରା ନିଯୁକ୍ତି ପ୍ରକ୍ରିୟା ଆରମ୍ଭ କରାଯିବା ଆବଶ୍ୟକ। ଚଳିତ ବର୍ଷ ଜାନୁଆରୀରେ ଲୋକାୟୁକ୍ତ ଅଧ୍ୟକ୍ଷ ଓ ୫ ଜଣ ସଦସ୍ୟଙ୍କୁ ନିଯୁକ୍ତ କରିବା ପାଇଁ ରାଜ୍ୟ ସରକାରଙ୍କୁ ଓଡ଼ିଶା ହାଇକୋର୍ଟ ୬ ସପ୍ତାହର ସମୟ ପ୍ରଦାନ କରିଥିଲେ।

ଉଚ୍ଚ ପଦପଦବୀରେ ଥିବା ବ୍ୟକ୍ତିବିଶେଷ ଓ ସରକାରୀ ପଦାଧିକାରୀଙ୍କ ବିରୋଧରେ ଆସୁଥିବା ଦୁର୍ନୀତି ଅଭିଯୋଗର ତଦନ୍ତ କରିବା ପାଇଁ ୨୮ ଫେବୃଆରୀ ୨୦୧୯ରେ ଲୋକାୟୁକ୍ତ ଗଠନ କରାଯାଇଥିଲା। ତଥ୍ୟ ଅନୁଯାୟୀ, ୨୦୨୪ ମସିହାରେ ଲୋକାୟୁକ୍ତରେ ୪୪୪ଟି ମାମଲା ପଞ୍ଜିକୃତ ହୋଇଥିଲା, ଯେଉଁଥିରୁ ୧୪୯ଟିର ଫୈସଲା କରାଯାଇଥିଲା। ତେବେ ୨୦୨୫ ମସିହାରେ (ମେ ୩୧ ସୁଦ୍ଧା) ୮୩ଟି ନୂଆ ମାମଲା ପଞ୍ଜିକୃତ ହୋଇଥିବା ବେଳେ ପ୍ୟାନେଲ୍ ଅଚଳ ଥିବା କାରଣରୁ ସମସ୍ତ ମାମଲା ପଡ଼ିରହିଛି।

ଭୁବନେଶ୍ୱର: ପ୍ରଥମରୁ ଅଷ୍ଟମ ଶ୍ରେଣୀର ବହିରେ ବ୍ୟାପକ ତ୍ରୁଟି ହେବାକୁ ନେଇ ସରକାର କ୍ରାଇମବ୍ରାଞ୍ଚକୁ ତଦନ୍ତ କରିବାକୁ ଦେଇଥିବା ବେଳେ ବିଜେପି ପକ୍ଷାନ୍ତରେ ବହିରେ ତ୍ରୁଟି ଥିବା କଥା ସ୍ୱୀକାର କରିଛି। ଏହି ଘଟଣା ପ୍ରାୟ ଏକମାସ ହୋଇ ଯାଇଥିବା ବେଳେ ବିଜେପି ପକ୍ଷରୁ ପ୍ରଥମ ଥର ପାଇଁ ଆଜି ପ୍ରତିକ୍ରିୟାରେ ପ୍ରକାଶିତ ବହିରେ ତ୍ରୁଟି ଥିବା କଥା ସ୍ୱୀକାର କରାଯାଇଛି । ବିଜେପିର ଏହି ପ୍ରତିକ୍ରିୟା ଉପରେ ବିଜୁ ଜନତା ଦଳ ବିଜେପି ଓ ରାଜ୍ୟ ସରକାରକୁ ଘେରିଛି। ତ୍ରୁଟିଶୂନ୍ୟ ବହି ଛାତ୍ରଛାତ୍ରୀମାନଙ୍କୁ କେବେ ପ୍ରଦାନ କରାଯିବ ତାର ସ୍ପଷ୍ଟୀକରଣ ଦେବାକୁ ଦାବି କରିଛି ବିଜେଡି।

ଶଙ୍ଖ ଭବନରେ  ଆୟୋଜିତ ସାମ୍ୱାଦିକ ସମ୍ମିଳନୀରେ ଦଳର ମୁଖପାତ୍ର ଲେନିନ ମହାନ୍ତି କହିଛନ୍ତି ଯେ ପିଲାମାନଙ୍କ ବହିରେ ବ୍ୟାପକ ତ୍ରୁଟି ଥିବା କଥାକୁ ବିଜେପି ପ୍ରବକ୍ତା ବିଳମ୍ୱରେ ହେଲେ ମଧ୍ୟ ସ୍ୱୀକାର କରିଥିବାରୁ ଆମେ ତାଙ୍କୁ ସାଧୁବାଦ ଦେଉଛୁ । କିନ୍ତୁ ତ୍ରୁଟି ସଂଶୋଧନ କରି ନୂତନ ପୁସ୍ତକ ପିଲା ମାନଙ୍କୁ କେବେ ପ୍ରଦାନ କରାଯିବ, ସେନେଇ ପ୍ରବକ୍ତା  କୌଣସି ସୂଚନା ଦେଇ ନାହାନ୍ତି। ତେଣୁ ପିଲା ମାନଙ୍କୁ କେବେ ତ୍ରୁଟିଶୂନ୍ୟ ବହି ଯୋଗାଇ ଦିଆଯିବ ତାର ସୂଚନା ତୁରନ୍ତ ପ୍ରବକ୍ତା ଦିଅନ୍ତୁ ବୋଲି ଡ.ମହାନ୍ତି ଦାବି କରିଛନ୍ତି। ବିଜେପି ପ୍ରବକ୍ତା ତାଙ୍କ ବକ୍ତବ୍ୟରେ କହିଛନ୍ତି ଯେ କ୍ରାଇମବ୍ରାଞ୍ଚକୁ ତଦନ୍ତ ଭାର ଦିଆଯାଇଛି ଓ ଏଥିରେ ସମ୍ପୃକ୍ତ ବାବୁ ମାନଙ୍କୁ ଛଡ଼ାଯିବ ନାହିଁ । ଏଠାରେ ପ୍ରଶ୍ନ ଉଠୁଛି ଯେ କେବଳ ବାବୁ ମାନେ କାହିଁକି, ଏଥିପାଇଁ ଦାୟୀ ଅଣ ବାବୁ ତଥା କୋର କମିଟି ସଦସ୍ୟଙ୍କୁ କାହିଁକି ତଦନ୍ତ ପରିସରଭୁକ୍ତ କରାଯିବନାହିଁ। ସେହିପରି ବହି ଓଡ଼ିଶାରେ ନା ଓଡ଼ିଶା ବାହାରେ ପ୍ରିଣ୍ଟ କରାଯାଇଛି ତାର ମଧ୍ୟ ସ୍ପଷ୍ଟୀକରଣ ଦେବା ଆବଶ୍ୟକ ରହିଛି। ଯଦି ଏହା ଓଡିଶା ବାହାରେ ପ୍ରିଣ୍ଟ କରାଯାଇଛି, ତାହେଲେ ପ୍ରଶ୍ନ ଉଠୁଛି ଯେ ଓଡ଼ିଶାରେ କଣ ପ୍ରିଣ୍ଟିଂ ବ୍ୟବସ୍ଥା ନଥିଲା କି? ରାଜ୍ୟ ସରକାରଙ୍କ ପ୍ରିଣ୍ଟିଂ ହାଉସରେ ପ୍ରିଣ୍ଟ ନ କରି ରାଜ୍ୟ ବାହାରର ଯଥା ଏକ ଗୁଜୁରାଟି ସଂସ୍ଥାକୁ ପ୍ରଦାନ କରିବା କାହା ନିର୍ଦ୍ଦେଶରେ ହୋଇଥିଲା, ତାହା ମଧ୍ୟ ଅନୁସନ୍ଧାନ ସାପେକ୍ଷ। ବିଜେପି ବିରୋଧୀ ଦଳରେ ଥିବା ସମୟରେ ସମସ୍ତ ପ୍ରସଙ୍ଗରେ ସିବିଆଇ ତଦନ୍ତ ପାଇଁ ଦାବି କରୁଥିଲା। କିନ୍ତୁ ଏବେ ସିବିଆଇ ଅପେକ୍ଷା କ୍ରାଇମବ୍ରାଞ୍ଚ ତଦନ୍ତ ଉପରେ ଅଧିକ ଭରସା କରୁଛନ୍ତି। କିନ୍ତୁ ପ୍ରଶ୍ନ ଉଠୁଛି ଯେ ଗତ ଦୁଇ ବର୍ଷରେ ବିଭିନ୍ନ ପ୍ରସଙ୍ଗରେ ରାଜ୍ୟ ସରକାର ଦେଇଥିବା ତଦନ୍ତ ନିର୍ଦ୍ଦେଶ ମଧ୍ୟରୁ କୌଣସି ଗୋଟିଏ ମାମଲାରେ ଏପର୍ଯ୍ୟନ୍ତ ରିପୋର୍ଟ ଆସିପାରି ନାହିଁ ବୋଲି ସେ କ୍ଷୋଭ ପ୍ରକାଶ କରିଛନ୍ତି।

ଭୁବନେଶ୍ୱର: ବିଜେପି ନିଜର ରାଜନୈତିକ ଫାଇଦା ହାସଲ ପାଇଁ ଶିଶୁ ମାନଙ୍କୁ ମଧ୍ୟ ଛାଡୁନାହିଁ । ରାଜନୈତିକ ଶୋଭାଯାତ୍ରାରେ ଶିଶୁ ମାନଙ୍କୁ ସାମିଲ୍ କରୁଛି ବିଜେପି । ବିଜେପି ଦଳର ଶୀର୍ଷ ନେତୃମଣ୍ଡଳୀଙ୍କ ଉପରେ କାର୍ଯ୍ୟାନୁଷ୍ଠାନ ଦାବିରେ ରାଜ୍ୟ ଶିଶୁ ସୁରକ୍ଷା ଅଧିକାର ଆୟୋଗର ହସ୍ତକ୍ଷେପ ଲୋଡ଼ିଛି ବିଜେଡି ପ୍ରତିନିଧି ମଣ୍ଡଳୀ । ଗତ ୧୨ ଜୁଲାଇରେ ଭୁବନେଶ୍ୱର ଠାରେ ପୂର୍ବତନ ବିଧାୟକ ଶ୍ରୀ ପ୍ରଭାତ ରଞ୍ଜନ ବିଶ୍ୱାଳ ବିଜେପିରେ ଯୋଗଦେବା କାର୍ଯ୍ୟକ୍ରମ ଆୟୋଜନ କରାଯାଇଥିଲା । ଉକ୍ତ କାର୍ଯ୍ୟକ୍ରମରେ ଆୟୋଜିତ ରାଜନୈତିକ ଶୋଭାଯାତ୍ରାରେ ଶିଶୁଙ୍କୁ ସାମିଲ୍ କରାଯାଇଛି । ବିଜେପି ନିଜର ଦଳୀୟ ପ୍ରଚାର ଓ ପ୍ରସାର ପାଇଁ ଶିଶୁ ମାନଙ୍କୁ ମଧ୍ୟ ଛାଡୁନାହିଁ । କାର୍ଯ୍ୟକ୍ରମ ଏବଂ ଶୋଭାଯାତ୍ରାରେ ନାବାଳକ ଶିଶୁ ମାନଙ୍କୁ ବ୍ୟବହାର କରାଯାଇଛି । ସେମାନଙ୍କୁ ଦଳୀୟ ଟୋପି, ଉତ୍ତରୀୟ ପିନ୍ଧାଇ ଦଳୀୟ ପତାକା, ପ୍ଲାକାର୍ଡ ଏବଂ ବ୍ୟାନର୍ ଧରାଇଥିଲା ବିଜେପି । ଏହା ଶିଶୁ ମାନଙ୍କ ଅଧିକାର ଏବଂ ସୁରକ୍ଷାକୁ ବିପନ୍ନ କରୁଛି, ଯାହାକି ଅତ୍ୟନ୍ତ ଚିନ୍ତାଜନକ ବୋଲି ବିଜେଡି କହିଛି ।

ଏନେଇ ବିଜୁ ଜନତା ଦଳ ପକ୍ଷରୁ ଓଡ଼ିଶା ରାଜ୍ୟ ଶିଶୁ ସୁରକ୍ଷା ଅଧିକାରୀ ଆୟୋଗ (ଙଝଉଚଉଜ)ର ଅଧ୍ୟକ୍ଷା ବବିତା ପାତ୍ରଙ୍କୁ ଅଭିଯୋଗ ପତ୍ର ପ୍ରଦାନ କରାଯାଇଛି । ଘଟଣାର ତଦନ୍ତ କରି ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ, ବିଜେପି ରାଜ୍ୟ ସଭାପତି ଶ୍ରୀ ମନମୋହନ ସାମଲ ଓ ପୂର୍ବତନ ବିଧାୟକ ଶ୍ରୀ ପ୍ରଭାତ ରଞ୍ଜନ ବିଶ୍ୱାଳଙ୍କୁ ନୋଟିସ୍ ଜାରି କରିବାକୁ ଅଭିଯୋଗ ପତ୍ରରେ ଦର୍ଶାଯାଇଛି । ରାଜନୈତିକ ଶୋଭାଯାତ୍ରା ଓ କାର୍ଯ୍ୟକ୍ରମରେ ପିଲା ମାନଙ୍କୁ ସାମିଲ କରାଯାଇଥିବାରୁ ଆୟୋଗର ତୁରନ୍ତ ହସ୍ତକ୍ଷେପ ଏବଂ ଶିଶୁ ଅଧିକାର ସୁରକ୍ଷା ପାଇଁ ଉପଯୁକ୍ତ କାର୍ଯ୍ୟାନୁଷ୍ଠାନ ତୁରନ୍ତ ଗ୍ରହଣ କରିବାକୁ ବିଜେଡି ପ୍ରତିନିଧି ମଣ୍ଡଳୀ ଦାବି କରିଛି । ବିଜେଡି ପ୍ରତିନିଧି ମଣ୍ଡଳୀରେ ସୁମିତ୍ରା ଜେନା, ପୁଷ୍ପାଞ୍ଜଳି ରଣା, ଜ୍ୟୋତ୍ସ୍ନାମୟୀ ପରିଡ଼ା, ବନଜା ମହାନ୍ତି, ଈଲା ସ୍ୱାଇଁ, ଅଂଶୁ ତ୍ରିପାଠୀ, ଭାଗ୍ୟଶ୍ରୀ ଜେନା ଏବଂ ଡ଼ ପ୍ରିୟବ୍ରତ ମାଝୀ ପ୍ରମୁଖ ସାମିଲ ଥିଲେ ।

ମହାରାଷ୍ଟ୍ରରେ ସମାନ ନାଗରିକ ସଂହିତା (UCC) ଲାଗୁ କରିବା ପ୍ରସଙ୍ଗକୁ ନେଇ ବିଧାନସଭାରେ ସରଗରମ ଚର୍ଚ୍ଚା ଦେଖିବାକୁ ମିଳିଛି। ୟୁସିସି ବିଲ୍ ଆଲୋଚନା ସମୟରେ ଏନସିପି ବିଧାୟିକା ସନା ମଲିକ ବହୁବିବାହ ଏବଂ ଧାର୍ମିକ ଅଧିକାରକୁ ନେଇ ଦେଇଥିବା ବୟାନ ଉପରେ ମହାରାଷ୍ଟ୍ରର ଗୃହ ରାଷ୍ଟ୍ରମନ୍ତ୍ରୀ ଯୋଗେଶ କଦମ କଡ଼ା ପ୍ରତିକ୍ରିୟା ବ୍ୟକ୍ତ କରିଛନ୍ତି। ସେ ସ୍ପଷ୍ଟ କରିଛନ୍ତି ଯେ ଦେଶରେ କୌଣସି ଆଇନ କୌଣସି ଧର୍ମଗ୍ରନ୍ଥ ଆଧାରରେ ପ୍ରସ୍ତୁତ କରାଯାଏ ନାହିଁ।

ମନ୍ତ୍ରୀ ଯୋଗେଶ କଦମଙ୍କ କଡ଼ା ଜବାବ

ବିଧାୟିକା ସନା ମଲିକଙ୍କ ବୟାନର ଜବାବ ଦେଇ ମନ୍ତ୍ରୀ ଯୋଗେଶ କଦମ କହିଛନ୍ତି ଯେ, "ମୋର ମନେହୁଏ ସେ ଗୋଟିଏ କଥା ବୁଝିବା ଉଚିତ୍ ଯେ, କୌଣସି ଆଇନ କୌଣସି ଧର୍ମଗ୍ରନ୍ଥ ଉପରେ ଆଧାରିତ ହୋଇ ପ୍ରସ୍ତୁତ କରାଯାଏ ନାହିଁ। ଆମେ କୌଣସି ଧର୍ମ କିମ୍ବା ପନ୍ଥକୁ ଆଧାର କରି ନିଷ୍ପତ୍ତି ନେଉନାହୁଁ। ଯଦି ସମାଜରେ କାହା ପ୍ରତି କୌଣସି ଅନ୍ୟାୟ ହେଉଛି, ତେବେ ତାହାକୁ ଦୂର କରି ନ୍ୟାୟ ପ୍ରଦାନ କରିବା ପାଇଁ ହିଁ ଏହି ନୂତନ ଆଇନ ପ୍ରଣୟନ କରାଯାଉଛି।" ଏହାସହ ସମାଜରେ ଯେପରି କାହାକୁ ଅସୁବିଧାର ସମ୍ମୁଖୀନ ହେବାକୁ ନପଡ଼େ, ତାହା ନିଶ୍ଚିତ କରିବା ସରକାରଙ୍କ ପ୍ରାଥମିକତା ବୋଲି ସେ କହିଛନ୍ତି।

କ'ଣ କହିଥିଲେ ସନା ମଲିକ?

ୟୁସିସି ବିଲ୍ ଉପରେ ଚର୍ଚ୍ଚା ବେଳେ ବିଜେପି ବିଧାୟିକା ଦେବଯାନୀ ଫରାନ୍ଦେ ତିନି ତଲାକ୍ ପୀଡ଼ିତାଙ୍କ ପ୍ରସଙ୍ଗ ଉଠାଇଥିଲେ। ଏହାର କାଉଣ୍ଟର କରି ସନା ମଲିକ କହିଥିଲେ ଯେ ମହିଳାମାନଙ୍କ ଉପରେ ହେଉଥିବା ଅତ୍ୟାଚାରକୁ କେବଳ ଧର୍ମ ଦୃଷ୍ଟିକୋଣରୁ ଦେଖିବା ଉଚିତ ନୁହେଁ। କେବଳ ମୁସଲମାନ ମହିଳାମାନେ ହିଁ ଅତ୍ୟାଚାରର ଶିକାର ହେଉଛନ୍ତି କି ଏବଂ ବହୁବିବାହ କ'ଣ କେବଳ ଇସଲାମରେ ଅଛି କି ବୋଲି ସେ ପ୍ରଶ୍ନ କରିଥିଲେ। ଏଥିସହ ୟୁସିସି ଆଲୋଚନା ବେଳେ ବିନା କାରଣରେ 'ପାକିସ୍ତାନ'ର ଉଦାହରଣ ଦିଆଯାଉଥିବା ନେଇ ସେ ତୀବ୍ର ଆପତ୍ତି ଜଣାଇଥିଲେ। ସନା ମଲିକ କହିଥିଲେ ଯେ, "ଆମେ ସମସ୍ତେ ଭାରତୀୟ ମୁସଲମାନ ଏବଂ ଭାରତର ସମ୍ବିଧାନ ଆମକୁ ଆମର ଧର୍ମ ପାଳନ କରିବାର ପୂର୍ଣ୍ଣ ଅଧିକାର ଦେଇଛି। ତେଣୁ କେବଳ ଆଇନର ମୂଳ ବିଷୟ ଉପରେ ହିଁ ଆଲୋଚନା ହେବା ଦରକାର।"

ୟୁସିସି ପାଇଁ କମିଟି ଗଠନ

ଗୃହରେ ତିନି ତଲାକ୍ ମାମଲାର ପରିସଂଖ୍ୟାନ ରଖି ମନ୍ତ୍ରୀ ଯୋଗେଶ କଦମ ସୂଚନା ଦେଇଛନ୍ତି ଯେ, ମହାରାଷ୍ଟ୍ରରେ ସମାନ ନାଗରିକ ସଂହିତା ଲାଗୁ କରିବା ନେଇ ସରକାର ଶତ ପ୍ରତିଶତ ସକାରାତ୍ମକ ଅଛନ୍ତି। ସରକାରଙ୍କ ନିର୍ଦ୍ଦେଶକ୍ରମେ ୟୁସିସିର ଡ୍ରାଫ୍ଟ ପ୍ରସ୍ତୁତ କରିବା ପାଇଁ ହାଇକୋର୍ଟର ଜଣେ ଅବସରପ୍ରାପ୍ତ ବିଚାରପତିଙ୍କ ଅଧ୍ୟକ୍ଷତାରେ ଏକ କମିଟି ଗଠନ କରାଯାଇଛି। କମିଟିର ରିପୋର୍ଟ ଆସିବା ପରେ ରାଜ୍ୟରେ ୟୁସିସି ଲାଗୁ କରାଯିବ ବୋଲି ମନ୍ତ୍ରୀ ସ୍ପଷ୍ଟ କରିଛନ୍ତି। ବିଧାନସଭାରେ ଉପସ୍ଥାପିତ ତଥ୍ୟ ଅନୁଯାୟୀ, ରାଜ୍ୟରେ ୨୦୨୪ ମସିହାରେ ୪୨ଟି ତିନି ତଲାକ ମାମଲା ରୁଜୁ ହୋଇଥିବା ବେଳେ ୨୦୨୫ ମସିହାରେ ୩୯ଟି ମାମଲା ରୁଜୁ ହୋଇଛି, ଯାହା ଦର୍ଶାଉଛି ଯେ ଏହି ପ୍ରଥା ଏବେ ବି ସମାଜରେ ବଞ୍ଚି ରହିଛି ଏବଂ ନୂତନ ଆଇନର ଆବଶ୍ୟକତା ରହିଛି।

ପଶ୍ଚିମବଙ୍ଗ ରାଜନୀତିରେ ତୃଣମୂଳ କଂଗ୍ରେସ (TMC) ପାଇଁ ସଙ୍କଟ ଘନୀଭୂତ ହେବାରେ ଲାଗିଛି। ଦଳ ଭିତରେ ଚାଲିଥିବା ମହାବିଦ୍ରୋହ ମଧ୍ୟରେ ଏବେ ୧୯ ଜଣ ବିଦ୍ରୋହୀ ସାଂସଦଙ୍କ ଏକ ତାଲିକା ସାମ୍ନାକୁ ଆସିଛି। ସବୁଠାରୁ ଆଶ୍ଚର୍ଯ୍ୟର କଥା ହେଉଛି, ଏହି ତାଲିକାରେ ବଲିଉଡ୍ ଅଭିନେତାରୁ ନେତା ପାଲଟିଥିବା ଶତ୍ରୁଘ୍ନ ସିହ୍ନା ଏବଂ ପୂର୍ବତନ କ୍ରିକେଟର ୟୁସୁଫ ପଠାନଙ୍କ ଭଳି ହାଇ-ପ୍ରୋଫାଇଲ୍ ନେତାଙ୍କ ନାମ ମଧ୍ୟ ସାମିଲ ରହିଛି। ଏହି ସାଂସଦମାନେ ଏକ ଅଲଗା ସଂସଦୀୟ ଗୋଷ୍ଠୀ ଗଠନ କରିବା ସପକ୍ଷରେ ସ୍ୱାକ୍ଷର କରିଥିବା ଦାବି କରାଯାଉଛି।

ସଂସଦରେ ସ୍ୱତନ୍ତ୍ର ଗୋଷ୍ଠୀ ଗଠନ ପାଇଁ ପ୍ରସ୍ତୁତି

ସୂଚନା ଅନୁଯାୟୀ, ବରିଷ୍ଠ ନେତ୍ରୀ ତଥା ସାଂସଦ କାକୋଲି ଘୋଷ ଦସ୍ତିଦାରଙ୍କ ନେତୃତ୍ୱରେ ଲୋକସଭାରେ ଟିଏମସିର ଏକ ବଡ଼ ଗୋଷ୍ଠୀ ବିଦ୍ରୋହ କରିଛନ୍ତି। ପ୍ରାୟ ୨୦ ଜଣ ସାଂସଦ ଲୋକସଭା ବାଚସ୍ପତି ଓମ୍ ବିର୍ଲାଙ୍କୁ ଚିଠି ଲେଖି ଏକ ସ୍ୱତନ୍ତ୍ର ଦଳ ଭାବରେ ସ୍ୱୀକୃତି ପ୍ରଦାନ କରିବାକୁ ଦାବି କରିଛନ୍ତି। ବିଧାନସଭା ନିର୍ବାଚନରେ ଶୋଚନୀୟ ପରାଜୟ ପରେ ଦଳର ନେତାମାନେ ଗୋଟିଏ ପରେ ଗୋଟିଏ ମମତା ବାନାର୍ଜୀଙ୍କ ହାତ ଛାଡ଼ିବାରେ ଲାଗିଛନ୍ତି, ଯାହା ଫଳରେ ଦଳର ଅସ୍ତିତ୍ୱ ଉପରେ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି।

ବଡ଼ ନେତାଙ୍କ ବିଦ୍ରୋହ ଓ ପ୍ରତିକ୍ରିୟା

ଏହି ବିଦ୍ରୋହ ସମୟରେ ଶତ୍ରୁଘ୍ନ ସିହ୍ନା ସମ୍ପୂର୍ଣ୍ଣ ନୀରବତା ଅବଲମ୍ବନ କରିବା ଅନେକ ପ୍ରଶ୍ନ ସୃଷ୍ଟି କରିଛି। ଅନ୍ୟପଟେ କିର୍ତ୍ତୀ ଆଜାଦ୍ ଅଭିଯୋଗ କରିଛନ୍ତି ଯେ, କେନ୍ଦ୍ରୀୟ ତଦନ୍ତକାରୀ ସଂସ୍ଥା (ଇଡି ଏବଂ ସିବିଆଇ)ର ଭୟ ଦେଖାଇ ବିଜେପି ୟୁସୁଫ ପଠାନଙ୍କ ଭଳି ସାଂସଦମାନଙ୍କୁ ବ୍ଲାକମେଲ୍ କରୁଛି। ତେବେ ଲୋକସଭା ସହ ରାଜ୍ୟସଭାରେ ମଧ୍ୟ ଦଳକୁ ଝଟକା ଲାଗିଛି। ବରିଷ୍ଠ ନେତ୍ରୀ ସୁସ୍ମିତା ଦେବ ରାଜ୍ୟସଭାରୁ ଇସ୍ତଫା ଦେଇଛନ୍ତି ଏବଂ ସେ ବିଜେପିରେ ସାମିଲ ହେବା ନେଇ ଚର୍ଚ୍ଚା ଜୋର ଧରିଛି।

ମମତାଙ୍କ ପାଇଁ ବଢ଼ୁଛି ଅଡ଼ୁଆ

ଗୋଟିଏ ପଟେ ଦିଲ୍ଲୀରେ ମମତା ବାନାର୍ଜୀ ଏବଂ ଅଭିଷେକ ବାନାର୍ଜୀ ଇଣ୍ଡିଆ (INDIA) ମେଣ୍ଟର ବୈଠକରେ ଯୋଗ ଦେଉଥିବା ବେଳେ, ଅନ୍ୟପଟେ ତାଙ୍କ ଦଳର ୧୪ ଜଣ ସାଂସଦ ପଶ୍ଚିମବଙ୍ଗର ବିଜେପି ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କୁ ଭେଟିବା ଦଳ ପାଇଁ ବଡ଼ ବିପଦର ସଙ୍କେତ ଦେଇଛି। ଏହା ପୂର୍ବରୁ ବିଧାନସଭାରେ ଟିଏମସିର ୫୮ ଜଣ ବିଧାୟକ ମଧ୍ୟ ବିଦ୍ରୋହ କରି ରିତବ୍ରତ ବାନାର୍ଜୀଙ୍କୁ ବିରୋଧୀ ଦଳ ନେତା ଭାବେ ସମର୍ଥନ ଜଣାଇଥିଲେ। ୧୯୯୮ ମସିହାରେ କଂଗ୍ରେସରୁ ଅଲଗା ହୋଇ ଗଠନ ହୋଇଥିବା ତୃଣମୂଳ କଂଗ୍ରେସ ଏବେ ୨୮ ବର୍ଷ ପରେ ସବୁଠାରୁ ବଡ଼ ଭାଙ୍ଗନର ସମ୍ମୁଖୀନ ହୋଇଛି।

ତାମିଲନାଡୁ ରାଜନୀତିରେ ଏକ ବଡ଼ ଧରଣର ପରିବର୍ତ୍ତନ ଦେଖିବାକୁ ମିଳିଛି। ଦୀର୍ଘ ଦିନର କଳ୍ପନାଜଳ୍ପନାର ଅନ୍ତ ଘଟାଇ ତାମିଲନାଡୁ ବିଜେପିର ପୂର୍ବତନ ରାଜ୍ୟ ସଭାପତି କେ. ଅଣ୍ଣାମଲାଇ ଶୁକ୍ରବାର ଦିନ ଭାରତୀୟ ଜନତା ପାର୍ଟି (ବିଜେପି) ର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଛନ୍ତି। ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ନୀତିନ ନବୀନ ତାଙ୍କ ଇସ୍ତଫାପତ୍ର ଗ୍ରହଣ କରିଛନ୍ତି ବୋଲି ଦଳ ପକ୍ଷରୁ ଏକ ପ୍ରେସ୍ ବିଜ୍ଞପ୍ତିରେ ସ୍ପଷ୍ଟ କରାଯାଇଛି।

ନୂଆ ରାଜନୈତିକ ଦଳ ଗଠନ କରିବା ନେଇ ଚର୍ଚ୍ଚା

ରିପୋର୍ଟ ଅନୁଯାୟୀ, କେ. ଅଣ୍ଣାମଲାଇ ଖୁବଶୀଘ୍ର ଏକ ନୂଆ ରାଜନୈତିକ ଦଳ ବା ସଂଗଠନ ଗଠନ କରିପାରନ୍ତି। ନିକଟରେ ସେ ନୂଆଦିଲ୍ଲୀ ଗସ୍ତ କରି କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଏବଂ ଦଳର ରାଷ୍ଟ୍ରୀୟ ସାଧାରଣ ସମ୍ପାଦକ ବି.ଏଲ୍. ସନ୍ତୋଷଙ୍କ ସମେତ ବରିଷ୍ଠ ନେତାଙ୍କୁ ଭେଟି ନିଜର ଇସ୍ତଫାପତ୍ର ପ୍ରଦାନ କରିଥିଲେ। ବିଜେପିର କେନ୍ଦ୍ରୀୟ ନେତୃତ୍ୱ ତାଙ୍କୁ ଦଳରେ ରହିବାକୁ ବୁଝାଇବା ସହ ନୂଆ ଦାୟିତ୍ୱ ଦେବାକୁ ଚେଷ୍ଟା କରିଥିଲେ ମଧ୍ୟ ସେ ନିଜ ନିଷ୍ପତ୍ତିରେ ଅଟଳ ରହିଥିଲେ।

କାହିଁକି ବିଜେପି ଛାଡିଲେ ଅଣ୍ଣାମଲାଇ?

ସୂଚନାଯୋଗ୍ୟ ଯେ, ୨୦୨୬ ତାମିଲନାଡୁ ବିଧାନସଭା ନିର୍ବାଚନ ପାଇଁ ଦଳର ରଣନୀତିକୁ ନେଇ କେନ୍ଦ୍ରୀୟ ନେତୃତ୍ୱଙ୍କ ସହ ଅଣ୍ଣାମଲାଇଙ୍କ ମତଭେଦ ସୃଷ୍ଟି ହୋଇଥିଲା। ୨୦୨୪ ଲୋକସଭା ନିର୍ବାଚନରେ ଏକୁଟିଆ ଲଢ଼ି ବିଜେପି ୧୧% ଭୋଟ୍ ହାସଲ କରିଥିବାରୁ, ସେ ବିଧାନସଭାରେ ମଧ୍ୟ ଏକାକୀ ନିର୍ବାଚନ ଲଢ଼ିବାକୁ ଚାହୁଁଥିଲେ। ମାତ୍ର ଦଳୀୟ ହାଇକମାଣ୍ଡ ଏଆଇଏଡିଏମକେ (AIADMK) ସହ ମେଣ୍ଟ କରିବାକୁ ନିଷ୍ପତ୍ତି ନେଇଥିଲେ, ଯାହା ଫଳରେ ନିକଟରେ ଶେଷ ହୋଇଥିବା ନିର୍ବାଚନରେ ବିଜେପିର ଭୋଟ୍ ପ୍ରତିଶତ ୩% କୁ ଖସି ଆସିଥିଲା। ଏହି ମେଣ୍ଟ ନିଷ୍ପତ୍ତିରେ ଅସନ୍ତୁଷ୍ଟ ହୋଇ ସେ ଏପ୍ରିଲ୍ ୨୦୨୫ରେ ରାଜ୍ୟ ସଭାପତି ପଦରୁ ଇସ୍ତଫା ଦେଇସାରିଥିଲେ ଏବଂ ଏବେ ଦଳରୁ ସମ୍ପୂର୍ଣ୍ଣ ରୂପେ ବିଦାୟ ନେଇଛନ୍ତି।

ତାମିଲନାଡୁ: ତାମିଲନାଡୁର ପୂର୍ବତନ ବିଜେପି ସଭାପତି ତଥା ପୂର୍ବତନ ଆଇପିଏସ ଅଧିକାରୀ କେ. ଆନ୍ନାମଲାଇ ଦଳରୁ ଇସ୍ତଫା ଦେଇଛନ୍ତି। ନୂଆଦିଲ୍ଲୀରେ ଦଳର ରାଷ୍ଟ୍ରୀୟ ଅଧ୍ୟକ୍ଷ ନୀତିନ ନବୀନ ଏବଂ ରାଷ୍ଟ୍ରୀୟ ସାଧାରଣ ସମ୍ପାଦକ ବି.ଏଲ୍ ସନ୍ତୋଷଙ୍କୁ ଭେଟିବା ପରେ ସେ ମଙ୍ଗଳବାର ଦିନ ନିଜର ଇସ୍ତଫା ପତ୍ର ପ୍ରଦାନ କରିଛନ୍ତି। ତାଙ୍କର ଏହି ନିଷ୍ପତ୍ତି ତାମିଲନାଡୁ ରାଜନୀତିରେ ନୂଆ ସମୀକରଣର ଚର୍ଚ୍ଚା ସୃଷ୍ଟି କରିଛି।

ଆସନ୍ତା ଜୁନ ୪ ତାରିଖରେ ଆନ୍ନାମଲାଇଙ୍କ ଜନ୍ମଦିନ ଥିବାବେଳେ ତାଙ୍କ ସମର୍ଥକମାନେ କୋଏମ୍ବାଟୁର ସହରରେ ବିଶାଳ ବ୍ୟାନର ଏବଂ ପୋଷ୍ଟର ଲଗାଇଛନ୍ତି। 'ଆମର ନେତା, ଆସ ଏବଂ ଆମକୁ ବାଟ ଦେଖାଅ' ଭଳି ସ୍ଲୋଗାନ ଏବେ ବେଶ୍ ଚର୍ଚ୍ଚାର ବିଷୟ ପାଲଟିଛି। ବିଜେପିର ରାଜ୍ୟ ତଥା କେନ୍ଦ୍ରୀୟ ନେତୃତ୍ୱଙ୍କ ସହ ମତଭେଦ ବଢୁଥିବା ନେଇ ରିପୋର୍ଟ ପ୍ରକାଶ ପାଇବା ମଧ୍ୟରେ ଏହି ଇସ୍ତଫା ସାମ୍ନାକୁ ଆସିଛି।

ଆନ୍ନାମଲାଇ ଏକ ନୂତନ ଜାତୀୟତାବାଦୀ ଦଳ ଗଠନ କରିପାରନ୍ତି ବୋଲି କିଛି ଲୋକ ବିଶ୍ୱାସ କରୁଛନ୍ତି। ଦ୍ରାବିଡ଼ ରାଜନୀତିଠାରୁ ନିଜକୁ ଅଲଗା ରଖି ଆସିଥିବା ଆନ୍ନାମଲାଇ ଏକ ସ୍ୱାଧୀନ ପଥ ବାଛିପାରନ୍ତି। ତାମିଲନାଡୁରେ ଏକ ବିକଳ୍ପ ରାଜନୈତିକ ଶକ୍ତି ଭାବେ ଉଭା ହେବାକୁ ସେ ଲକ୍ଷ୍ୟ ରଖିଥିବା ସ୍ପଷ୍ଟ ଅନୁମେୟ।

୨୦୨୬ ବିଧାନସଭା ନିର୍ବାଚନ ପରେ ତାମିଲନାଡୁ ରାଜନୀତିରେ ଏକ ବଡ଼ ପରିବର୍ତ୍ତନ ଦେଖିବାକୁ ମିଳିଛି। ଅଭିନେତାରୁ ରାଜନେତା ପାଲଟିଥିବା ଥାଲାପତି ବିଜୟଙ୍କ ନେତୃତ୍ୱାଧୀନ ତାମିଝାଗା ଭେତ୍ରି କାଝାଗମ (TVK) ଦଳ ୧୦୮ଟି ଆସନ ଜିତି ସରକାର ଗଠନ କରିବା ପରେ DMK ଏବଂ AIADMK ର ଦଶନ୍ଧି ପୁରୁଣା ଦବଦବା ଭାଙ୍ଗିଯାଇଛି। ଏହି ପରିବର୍ତ୍ତିତ ପରିସ୍ଥିତିରେ ଆନ୍ନାମଲାଇ ନିଜ ପାଇଁ ନୂଆ ସୁଯୋଗ ସୃଷ୍ଟି କରିବାକୁ ପ୍ରୟାସ କରୁଥିବା କୁହାଯାଉଛି। ଏହାଛଡ଼ା କେନ୍ଦ୍ର ସରକାରଙ୍କ ତ୍ରି-ଭାଷା ନୀତିକୁ ସେ ବିରୋଧ କରିବା ମଧ୍ୟ ଦଳୀୟ ନେତୃତ୍ୱଙ୍କ ସହ ତାଙ୍କ ସମ୍ପର୍କରେ ଫାଟ ସୃଷ୍ଟି କରିଥିଲା।

ଆନ୍ନାମଲାଇ ଜଣେ ପୂର୍ବତନ ଆଇପିଏସ (IPS) ଅଧିକାରୀ ଅଟନ୍ତି। କର୍ଣ୍ଣାଟକରେ ୯ ବର୍ଷ କାର୍ଯ୍ୟ କରିବା ପରେ ସେ ୨୦୧୯ ମସିହାରେ ବ୍ୟକ୍ତିଗତ କାରଣ ଦର୍ଶାଇ ଚାକିରିରୁ ଇସ୍ତଫା ଦେଇଥିଲେ। ପରେ ୨୦୨୦ ମସିହାରେ ସେ ବିଜେପିରେ ଯୋଗ ଦେଇ ୨୦୨୧ ରୁ ୨୦୨୫ ପର୍ଯ୍ୟନ୍ତ ତାମିଲନାଡୁ ବିଜେପିର ରାଜ୍ୟ ସଭାପତି ଭାବେ ଦାୟିତ୍ୱ ତୁଲାଇଥିଲେ। ଯୁବଗୋଷ୍ଠୀ ଏବଂ ସୋସିଆଲ ମିଡିଆରେ ତାଙ୍କର ବେଶ୍ ଲୋକପ୍ରିୟତା ରହିଛି।