ପାକିସ୍ତାନରେ ଆତଙ୍କବାଦୀଙ୍କ ଉପରେ ଆକ୍ରମଣ ଜାରି ରହିଛି। ଆତଙ୍କବାଦୀ ସଙ୍ଗଠନ ଲସ୍କର-ଇ-ତୋଏବା (LeT) ର ପ୍ରତିଷ୍ଠାତା ସଦସ୍ୟ ତଥା ମୋଷ୍ଟ ୱାଣ୍ଟେଡ୍ ଆତଙ୍କବାଦୀ ଆମୀର ହମଜା ଉପରେ ଲାହୋରରେ ଗୁଳିମାଡ଼ ହୋଇଛି। କିଛି ଅଜ୍ଞାତ ବନ୍ଧୁକଧାରୀ ତାଙ୍କୁ ଲାହୋର ସ୍ଥିତ ଏକ ନ୍ୟୁଜ୍ ଚ୍ୟାନେଲ୍ ଅଫିସ୍ ବାହାରେ ଆକ୍ରମଣ କରିଥିଲେ। ଗୁରୁତର ଅବସ୍ଥାରେ ତାଙ୍କୁ ସ୍ଥାନୀୟ ଏକ ଡାକ୍ତରଖାନାରେ ଭର୍ତ୍ତି କରାଯାଇଛି।

ନ୍ୟୁଜ୍ ଚ୍ୟାନେଲ୍ ବାହାରେ ହେଲା ଆକ୍ରମଣ

ମିଳିଥିବା ସୂଚନା ଅନୁଯାୟୀ, ଗୁରୁବାର ଆମୀର ହମଜା ଲାହୋରର ଏକ ନ୍ୟୁଜ୍ ଚ୍ୟାନେଲ୍ କାର୍ଯ୍ୟାଳୟ ବାହାରେ ଥିବା ସମୟରେ ଅଚାନକ କିଛି ଅଜ୍ଞାତ ବ୍ୟକ୍ତି ଆସି ତାଙ୍କ ଉପରକୁ ଆଖିବୁଜା ଗୁଳିମାଡ଼ କରିଥିଲେ। ଗୁଳିମାଡ଼ ପରେ ଆକ୍ରମଣକାରୀମାନେ ଘଟଣାସ୍ଥଳରୁ ଫେରାର ହୋଇଯାଇଥିଲେ। ରକ୍ତାକ୍ତ ଅବସ୍ଥାରେ ହମଜାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି ଏବଂ ବର୍ତ୍ତମାନ ତାଙ୍କ ଅବସ୍ଥା ଅତ୍ୟନ୍ତ ସଙ୍କଟାପନ୍ନ ରହିଥିବା କୁହାଯାଉଛି। ସୂଚନାଯୋଗ୍ୟ ଯେ, ଗୋଟିଏ ବର୍ଷ ମଧ୍ୟରେ ଏହା ତାଙ୍କ ଉପରେ ଦ୍ୱିତୀୟ ପ୍ରାଣଘାତୀ ଆକ୍ରମଣ। ଗତବର୍ଷ ମେ ମାସରେ ମଧ୍ୟ ତାଙ୍କ ବାସଭବନ ବାହାରେ ତାଙ୍କ ଉପରେ ଗୁଳିମାଡ଼ କରାଯାଇଥିଲା।

କିଏ ଏହି ଆମୀର ହମଜା?

ଆମୀର ହମଜା ହେଉଛି ଲସ୍କର-ଇ-ତୋଏବାର ମୁଖ୍ୟ ରଣନୀତିକାର ଏବଂ କୁଖ୍ୟାତ ଆତଙ୍କବାଦୀ ହାଫିଜ୍ ସୟିଦର ଅତ୍ୟନ୍ତ ଘନିଷ୍ଠ। ୧୯୮୫ ରୁ ୧୯୮୬ ମସିହା ମଧ୍ୟରେ ସେ ହାଫିଜ୍ ସୟିଦ ସହ ମିଶି ଲସ୍କର-ଇ-ତୋଏବାର ପ୍ରତିଷ୍ଠା କରିଥିଲା। ଭାରତରେ ହୋଇଥିବା ବିଭିନ୍ନ ଆତଙ୍କବାଦୀ ଆକ୍ରମଣ, ବିଶେଷକରି ୨୦୦୫ ବେଙ୍ଗାଲୁରୁ ଆଇଆଇଏସସି (IISc) ଆକ୍ରମଣର ମୁଖ୍ୟ ଷଡ଼ଯନ୍ତ୍ରକାରୀ ଭାବେ ସେ ଜଣାଶୁଣା। ଏହାବ୍ୟତୀତ ସେ ଆତଙ୍କବାଦୀ ସଙ୍ଗଠନ ପାଇଁ ପାଣ୍ଠି ସଂଗ୍ରହ, ନୂଆ ଯୁବକମାନଙ୍କୁ ଆତଙ୍କବାଦରେ ସାମିଲ କରିବା ଏବଂ ବିଭିନ୍ନ ଆତଙ୍କବାଦୀ କାର୍ଯ୍ୟକଳାପକୁ ପରିଚାଳନା କରୁଥିଲା।

ପାକିସ୍ତାନରେ ଭୟଭୀତ ଆତଙ୍କବାଦୀ

ଗତ କିଛି ମାସ ଧରି ପାକିସ୍ତାନ ମାଟିରେ ଲୁଚି ରହିଥିବା ବିଭିନ୍ନ ଆତଙ୍କବାଦୀଙ୍କୁ ଟାର୍ଗେଟ୍ କରାଯାଉଛି। ଏକାଧିକ କୁଖ୍ୟାତ ଆତଙ୍କବାଦୀ ଅଜ୍ଞାତ ଆକ୍ରମଣକାରୀଙ୍କ ଗୁଳିରେ ନିହତ ହୋଇସାରିଛନ୍ତି। ଆମେରିକାର ଟ୍ରେଜେରୀ ବିଭାଗ ପକ୍ଷରୁ ଆମୀର ହମଜାକୁ ବିଶ୍ୱସ୍ତରୀୟ ଆତଙ୍କବାଦୀ ଘୋଷଣା କରାଯାଇଛି। ଏହି ଘଟଣା ପରେ ପାକିସ୍ତାନୀ ପୋଲିସ ସ୍ଥାନୀୟ ଅଞ୍ଚଳରେ ହାଇ ଆଲର୍ଟ ଜାରି କରି ସର୍ଚ୍ଚ ଅପରେସନ ଆରମ୍ଭ କରିଛି।

ନୂଆଦିଲ୍ଲୀ: ପାକିସ୍ତାନର ଶିକ୍ଷା କ୍ଷେତ୍ରରେ ଏକ ଐତିହାସିକ ପଦକ୍ଷେପ ଦେଖିବାକୁ ମିଳିଛି। ୧୯୪୭ ମସିହାର ଦେଶ ବିଭାଜନ ପରେ ପ୍ରଥମ ଥର ପାଇଁ ପାକିସ୍ତାନର ଏକ ବିଶ୍ୱବିଦ୍ୟାଳୟରେ ସଂସ୍କୃତ ଭାଷା ଶିକ୍ଷା ଆରମ୍ଭ ହୋଇଛି। ଲାହୋର ସ୍ଥିତ ଲାହୋର ୟୁନିଭର୍ସିଟି ଅଫ୍ ମ୍ୟାନେଜମେଣ୍ଟ ସାଇନ୍ସେସ୍ (LUMS) ଏହି ପାଠ୍ୟକ୍ରମ ଆରମ୍ଭ କରିଛି, ଯାହାକୁ ନେଇ ଶିକ୍ଷାବିତ୍ ଏବଂ ଛାତ୍ରଛାତ୍ରୀଙ୍କ ମଧ୍ୟରେ ବେଶ୍ ଉତ୍ସାହ ଦେଖିବାକୁ ମିଳିଛି।

 କେମିତି ଆରମ୍ଭ ହେଲା ଏହି ପାଠ୍ୟକ୍ରମ?

ପ୍ରଥମେ ଏହା ଏକ ତିନି ମାସିଆ ‘ୱିକେଣ୍ଡ୍ ୱାର୍କସପ୍’ (ସପ୍ତାହନ୍ତ କର୍ମଶାଳା) ଭାବରେ ଆରମ୍ଭ ହୋଇଥିଲା। କିନ୍ତୁ ଛାତ୍ରଛାତ୍ରୀଙ୍କ ଅଦ୍ଭୁତପୂର୍ବ ଆଗ୍ରହକୁ ଦେଖି ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ଏହାକୁ ଏକ ପୂର୍ଣ୍ଣାଙ୍ଗ ୪-କ୍ରେଡିଟ୍ ବିଶିଷ୍ଟ ପାଠ୍ୟକ୍ରମରେ ପରିଣତ କରିଛନ୍ତି। ଏହି ପାଠ୍ୟକ୍ରମର ନେତୃତ୍ୱ ନେଉଛନ୍ତି ଡକ୍ଟର ଶାହିଦ ରସିଦ, ଯିଏକି ଫୋରମ୍ୟାନ୍ ଖ୍ରୀଷ୍ଟିୟାନ୍ କଲେଜର ସୋସିଓଲୋଜି ବିଭାଗର ଆସୋସିଏଟ୍ ପ୍ରଫେସର ଅଟନ୍ତି। ସେ ନିଜେ ଅନଲାଇନ୍ ମାଧ୍ୟମରେ ବିଦେଶୀ ପଣ୍ଡିତଙ୍କଠାରୁ ସଂସ୍କୃତ ଶିକ୍ଷା କରିଥିଲେ।

ଗୀତା ଓ ମହାଭାରତ ମଧ୍ୟ ପଢ଼ାଯିବ

କେବଳ ସଂସ୍କୃତ ଭାଷା ନୁହେଁ, ବିଶ୍ୱବିଦ୍ୟାଳୟର ଗୁରମାନି ସେଣ୍ଟରର ନିର୍ଦ୍ଦେଶକ ଡକ୍ଟର ଅଲି ଉସମାନ କାସମି ସୂଚନା ଦେଇଛନ୍ତି ଯେ, ଆଗାମୀ ଦିନରେ ଏହି ପାଠ୍ୟକ୍ରମ ଅଧୀନରେ ମହାଭାରତ ଏବଂ ଶ୍ରୀମଦ୍ ଭଗବଦ୍ ଗୀତା ଭଳି ପ୍ରାଚୀନ ଗ୍ରନ୍ଥଗୁଡ଼ିକ ଉପରେ ମଧ୍ୟ ପାଠପଢ଼ା ହେବ। ସେ ଆଶା ପ୍ରକାଶ କରିଛନ୍ତି ଯେ, ଆଗାମୀ ୧୦-୧୫ ବର୍ଷ ମଧ୍ୟରେ ପାକିସ୍ତାନରେ ମହାଭାରତ ଏବଂ ଗୀତା ଉପରେ ଗବେଷଣା କରୁଥିବା ସ୍ଥାନୀୟ ବିଦ୍ୱାନମାନେ ବାହାରିବେ।

ପୁରାତନ ପାଣ୍ଡୁଲିପିର ସଂରକ୍ଷଣ ଲକ୍ଷ୍ୟ

ଏହି ପଦକ୍ଷେପର ଅନ୍ୟତମ ମୁଖ୍ୟ ଉଦ୍ଦେଶ୍ୟ ହେଉଛି ପାକିସ୍ତାନରେ ଥିବା ପ୍ରାଚୀନ ସଂସ୍କୃତ ପାଣ୍ଡୁଲିପିଗୁଡ଼ିକର ଅଧ୍ୟୟନ। ଡକ୍ଟର କାସମିଙ୍କ ଅନୁଯାୟୀ, ଲାହୋରର ପଞ୍ଜାବ ବିଶ୍ୱବିଦ୍ୟାଳୟ ଲାଇବ୍ରେରୀରେ ସଂସ୍କୃତର ବହୁ ମୂଲ୍ୟବାନ ପାଣ୍ଡୁଲିପି ଗଚ୍ଛିତ ଅଛି, କିନ୍ତୁ ୧୯୪୭ ପରଠାରୁ କୌଣସି ପାକିସ୍ତାନୀ ଗବେଷକ ଏହା ଉପରେ କାର୍ଯ୍ୟ କରିନାହାନ୍ତି। କେବଳ ବିଦେଶୀ ଗବେଷକମାନେ ଏହାର ବ୍ୟବହାର କରୁଥିଲେ। ଏବେ ସ୍ଥାନୀୟ ଛାତ୍ରଛାତ୍ରୀମାନେ ସଂସ୍କୃତ ଶିଖିବା ଦ୍ୱାରା ଏହି ଅମୂଲ୍ୟ ସମ୍ପଦର ଉପଯୁକ୍ତ ବ୍ୟବହାର ଏବଂ ସଂରକ୍ଷଣ ହୋଇପାରିବ।

କରାଚୀ: ପାକିସ୍ତାନର ଲାହୋର ପରେ ଏବେ ଦେଶର ଆର୍ଥିକ ରାଜଧାନୀ କରାଚୀରେ ଡ୍ରୋନ ବିସ୍ଫୋରଣର ଖବର ପୂରା ଦେଶରେ ଆତଙ୍କ ସୃଷ୍ଟି କରିଛି। ପାକିସ୍ତାନୀ ଗଣମାଧ୍ୟମ ଅନୁଯାୟୀ, କରାଚୀର ଶରାଫୀ ଗୋଥ ମାଲିର ଅଞ୍ଚଳରେ ଡ୍ରୋନ ମାଧ୍ୟମରେ ବିସ୍ଫୋରଣ ଘଟିଛି। ଏହି ଘଟଣା ପରେ ସମଗ୍ର ଅଞ୍ଚଳକୁ ସିଲ୍‌ କରାଯାଇଛି ଏବଂ ପାକିସ୍ତାନୀ ସେନା ଏହାକୁ ନିୟନ୍ତ୍ରଣକୁ ନେଇଛି। ବିସ୍ଫୋରଣ ପରେ ଅଞ୍ଚଳରେ ଆତଙ୍କ ଓ ଅଶାନ୍ତିର ବାତାବରଣ ସୃଷ୍ଟି ହୋଇଛି। କରାଚୀ ହେଉଛି ପାକିସ୍ତାନର ଏକ ଗୁରୁତ୍ୱପୂର୍ଣ୍ଣ ସହର, ଯେଉଁଠାରେ ଦେଶର ସମସ୍ତ ପରମାଣୁ ଅସ୍ତ୍ର ଭଣ୍ଡାର ରହିଛି। ଏଭଳି ପରିସ୍ଥିତିରେ କରାଚୀରେ ଡ୍ରୋନ ବିସ୍ଫୋରଣ ପାକିସ୍ତାନର ସୁରକ୍ଷା ବ୍ୟବସ୍ଥାରେ ବଡ଼ ତ୍ରୁଟି ଦେଖିବାକୁ ମିଳିଛି।

ପାକିସ୍ତାନର କରାଚୀ, ଗୁଜରାନୱାଲା, ଲାହୋର, ଚକୱାଲ, ଘୋଟକୀ ଏବଂ ଉମରକୋଟରେ ଡ୍ରୋନ ଆକ୍ରମଣର ଖବର ମିଳିଛି। ଏହି ଆକ୍ରମଣ ଯୋଗୁଁ ଏହି ଅଞ୍ଚଳଗୁଡ଼ିକରେ ଜରୁରୀ ପରିସ୍ଥିତି ଘୋଷଣା କରାଯାଇଛି। ଏହି ଡ୍ରୋନଗୁଡ଼ିକ କେଉଁଠୁ ଆସିଛି ତାହା ସମ୍ପର୍କରେ ପାକିସ୍ତାନ ସରକାର କିମ୍ବା ସେନା ଏପର୍ଯ୍ୟନ୍ତ କୌଣସି ସ୍ପଷ୍ଟ ବୟାନ ଦେଇନାହାନ୍ତି। ଏହାଛଡ଼ା ଏହି ଆକ୍ରମଣରେ ନିଜକୁ ଏପର୍ଯ୍ୟନ୍ତ କେହି ଦାୟୀ କରିନାହାନ୍ତି।

ପାକିସ୍ତାନୀ ଗଣମାଧ୍ୟମ ଅନୁଯାୟୀ, ଏପର୍ଯ୍ୟନ୍ତ ଦେଶରେ ମୋଟ ୧୨ଟି ଡ୍ରୋନ ବିସ୍ଫୋରଣ ଘଟିଛି, ଯେଉଁଥିରୁ ସର୍ବାଧିକ ୩ଟି ବିସ୍ଫୋରଣ ଲାହୋରରେ ହୋଇଛି। ଲାହୋରରେ ସୈନ୍ୟ ଅଡ଼ା ନିକଟରେ ଡ୍ରୋନ ବିସ୍ଫୋରଣର ଖବର ମିଳିଛି। ଏହି ଡ୍ରୋନ ଆକ୍ରମଣଗୁଡ଼ିକୁ ରୋକିବାରେ ପାକିସ୍ତାନର ଏୟାର ଡିଫେନ୍ସ ସିଷ୍ଟମ ସମ୍ପୂର୍ଣ୍ଣ ବିଫଳ ହୋଇଛି।  ଏହି ଡ୍ରୋନ ଆକ୍ରମଣର କାରଣ କ’ଣ ଏବଂ ଏହା ପଛରେ କାହାର ହାତ ଅଛି, ଏସମ୍ପର୍କରେ ପାକିସ୍ତାନ ସରକାର କିମ୍ବା ସେନା କୌଣସି ସ୍ପଷ୍ଟ ସୂଚନା ଦେଇନାହାନ୍ତି।

ଇସଲାମାବାଦ: ପାକିସ୍ତାନର ଲାହୋରରେ ଘଟିଛି ଭୟଙ୍କର ସିରିଜ ବୋମା ବିସ୍ଫୋରଣ। ପାକିସ୍ତାନ ଲାହୋରର ଅନାରକଲି ଅଞ୍ଚଳରେ ଏହି ବିସ୍ଫୋରଣ। ଏକ ଶକ୍ତିଶାଳୀ ବୋମା ବିସ୍ଫୋରଣରେ ୩ ଜଣଙ୍କର ମୃତ୍ୟୁ ହୋଇଥିବାବେଳେ ଅତିକମରେ ୨୦ ଜଣ ଗୁରୁତର ଆହତ ହୋଇଛନ୍ତି। ଆହତ ମାନଙ୍କୁ ଚିକିତ୍ସା ପାଇଁ ସ୍ଥାନୀୟ ମେଡିକାଲରେ ଭର୍ତ୍ତି କରାଯାଇଥିବା ଜଣାପଡିଛି । ଘଟଣାସ୍ଥଳରେ ବହୁ ସଂଖ୍ୟକ ପୋଲିସ ଫୋର୍ସ ଉପସ୍ଥିତ ଅଛନ୍ତି।

ଏହି ବିସ୍ଫୋରଣ ଏତେ ଭୟଙ୍କର ଥିଲା ଯେ, ଆଖପାଖରେ ଥିବା ଦୋକାନ ଏବଂ ବିଲ୍ଡିଂଗୁଡିକ ମଧ୍ୟ କ୍ଷତିଗ୍ରସ୍ତ ହୋଇଛି। ପାଖରେ ଥିବା କେତେକ ଗାଡି ମଟର ମଧ୍ୟ ଖଣ୍ଡ ବିଖଣ୍ଡିତ ହୋଇପଡିଛି । ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁଯାୟୀ, ଲାହୋର ପୋଲିସର ମୁଖପାତ୍ର ରାଣା ଅରିଫ୍ ଘଟଣା ସମ୍ପର୍କରେ ସ୍ପଷ୍ଟ କରିଛନ୍ତି। ବୋମାଟି ଏକ ମୋଟର ସାଇକେଲରେ ଲଗାଯାଇଥିଲା ବୋଲି ସୂଚନା ଦେଇଛନ୍ତି।

ରିପୋର୍ଟ ଆସିବା ପରେ ଘଟଣା ସମ୍ପର୍କରେ ଅଧିକ କିଛି କୁହାଯାଇପାରିବ ବୋଲି କହିଛନ୍ତି ଲାହୋର ପୋଲିସର ଡିଆଇଜି ଅପରେସନ୍ ଅବିଦ ଖାନ୍। ଏହି ବିସ୍ଫୋରଣ ପାଇଁ ୧.୫ କିଲାେଗ୍ରାମର ବିସ୍ଫୋରଣ ସାମଗ୍ରୀ ବ୍ୟବହାର କରାଯାଇଥିଲା । ପ୍ରାଥମିକ ରିପୋର୍ଟ ଅନୁଯାୟୀ ବିସ୍ଫୋରଣ ୧ଟା ୪୪ ମି.ରେ ହୋଇଥିଲା ବେଳେ ଗୋଟିଏ କୋଠା ଭାଙ୍ଗିବା ସହ ୮ଟି ମୋଟର ସାଇକେଲ୍ ପୋଡି ଯାଇଛି ।