ସୋସିଆଲ ମିଡିଆର ଅପବ୍ୟବହାର ଏବଂ ପିଲାମାନଙ୍କ ମାନସିକ ସ୍ୱାସ୍ଥ୍ୟ ଉପରେ ଏହାର କୁପ୍ରଭାବକୁ ଦୃଷ୍ଟିରେ ରଖି ଏକ ବଡ଼ ପଦକ୍ଷେପ ନିଆଯାଇପାରେ। ୧୩ ବର୍ଷରୁ କମ୍ ବୟସର ପିଲାମାନଙ୍କୁ ସୋସିଆଲ ମିଡିଆ ଏବଂ ଅନଲାଇନ୍ ଗେମିଂ ପ୍ଲାଟଫର୍ମ ବ୍ୟବହାରରୁ ନିବୃତ୍ତ କରିବା ପାଇଁ ସଂସଦରେ ଏକ ଘରୋଇ ସଦସ୍ୟ ବିଲ୍ (Private Member's Bill) ଆଗତ କରିବାକୁ ପ୍ରସ୍ତୁତି ଚାଲିଛି। ବରିଷ୍ଠ ବିଜେପି ନେତା ତଥା କେନ୍ଦ୍ରାପଡ଼ା ସାଂସଦ ବୈଜୟନ୍ତ ପଣ୍ଡା ଏହି ସ୍ୱତନ୍ତ୍ର ବିଲ୍‌ ପ୍ରସ୍ତୁତ କରିଛନ୍ତି, ଯାହାର ଉଦ୍ଦେଶ୍ୟ ହେଉଛି ଡିଜିଟାଲ୍ ଦୁନିଆରେ ନାବାଳକମାନଙ୍କୁ ସୁରକ୍ଷା ପ୍ରଦାନ କରିବା।

ସିଲ୍ଡ (SHIELD) ବିଲ୍ ୨୦୨୫ର ମୁଖ୍ୟ ଉଦ୍ଦେଶ୍ୟ

ଏହି ପ୍ରସ୍ତାବିତ ଆଇନର ନାମ ରଖାଯାଇଛି ଦି ସେଫଗାର୍ଡିଂ ହେଲଦି ଇଣ୍ଟରନେଟ୍ ଏନଭାଇରନମେଣ୍ଟ୍ସ ଫର ଲିଟିଲ ଡିଜିଟାଲ ନେଟିଭ୍ସ (SHIELD) ବିଲ୍, ୨୦୨୫। ଏହି ବିଲ୍ ଅନୁଯାୟୀ, ୧୩ ବର୍ଷରୁ କମ୍ ପିଲାମାନେ ନିଜ ପିତାମାତାଙ୍କ ସତ୍ୟାପିତ ସମ୍ମତି ବିନା ସୋସିଆଲ ମିଡିଆରେ ଆକାଉଣ୍ଟ ଖୋଲିପାରିବେ ନାହିଁ। ଏହା ସହିତ ସୂଚନା ପ୍ରଯୁକ୍ତିବିଦ୍ୟା (ଆଇଟି) ଆଇନରେ ସଂଶୋଧନ ଆଣି ପିଲାମାନଙ୍କ ଡାଟା ସଂଗ୍ରହ, ସେମାନଙ୍କୁ ଟାର୍ଗେଟ୍ କରି ଦିଆଯାଉଥିବା ବିଜ୍ଞାପନ ଏବଂ ପ୍ରୋଫାଇଲିଂ ଉପରେ ରୋକ୍ ଲଗାଇବାକୁ ପ୍ରସ୍ତାବ ଦିଆଯାଇଛି। ପିଲାମାନଙ୍କ ଡିଜିଟାଲ ସୁରକ୍ଷା ପାଇଁ ପ୍ଲାଟଫର୍ମଗୁଡ଼ିକରେ ଏକ 'ରିପୋର୍ଟ ଚାଇଲ୍ଡ ହାର୍ମ' (Report Child Harm) ବଟନ୍ ରହିବା ବାଧ୍ୟତାମୂଳକ କରାଯିବ। ଅଶ୍ଳୀଳତା, ହିଂସା କିମ୍ବା ନିଶା ସମ୍ବନ୍ଧୀୟ କଣ୍ଟେଣ୍ଟକୁ ମାତ୍ର ୩୬ ଘଣ୍ଟା ମଧ୍ୟରେ ଏବଂ ଶିଶୁ ଯୌନ ନିର୍ଯାତନା ସମ୍ବନ୍ଧୀୟ ବିଷୟବସ୍ତୁକୁ ୨୪ ଘଣ୍ଟା ଭିତରେ ହଟାଇବାକୁ ନିର୍ଦ୍ଦେଶ ଦିଆଯିବ।

ସଂସଦରେ ବାରମ୍ବାର ବିଳମ୍ବ

ଦେଶରେ ଶିଶୁ ସୁରକ୍ଷା ଦୃଷ୍ଟିକୋଣରୁ ଏହା ଏକ ଗୁରୁତ୍ୱପୂର୍ଣ୍ଣ ବିଲ୍ ହୋଇଥିଲେ ମଧ୍ୟ ସଂସଦରେ ଏହାକୁ ଆଗତ କରିବାରେ ବାରମ୍ବାର ବାଧା ଉପୁଜିଛି। ଲୋକସଭାରେ ବିରୋଧୀଙ୍କ ହଟ୍ଟଗୋଳ ଏବଂ ଗୃହ ମୁଲତବୀ କାରଣରୁ ଏହି ବିଲ୍ ଉପସ୍ଥାପନ ହୋଇପାରିନାହିଁ। ସାଂସଦ ବୈଜୟନ୍ତ ପଣ୍ଡା ଏହାକୁ ନେଇ କ୍ଷୋଭ ପ୍ରକାଶ କରିବା ସହ କହିଛନ୍ତି ଯେ ବିରୋଧୀଙ୍କ ବିନା କାରଣରେ ହଟ୍ଟଗୋଳ ଯୋଗୁଁ ଜନସ୍ୱାର୍ଥ ସମ୍ବଳିତ ଗୁରୁତ୍ୱପୂର୍ଣ୍ଣ ଆଇନ ପ୍ରଣୟନ ପ୍ରଭାବିତ ହେଉଛି। ବିଗତ ଶୀତକାଳୀନ ଅଧିବେଶନରେ ମଧ୍ୟ ସମାନ ପରିସ୍ଥିତି କାରଣରୁ ଏହା ଆଗତ ହୋଇପାରିନଥିଲା।

ଅନଲାଇନ୍ ସୁରକ୍ଷାର ଆବଶ୍ୟକତା

ବର୍ତ୍ତମାନ ସମୟରେ ପିଲାମାନଙ୍କ ମଧ୍ୟରେ ମୋବାଇଲ୍ ସ୍କ୍ରିନ୍ ନିଶା ଓ ଅନଲାଇନ୍ ଗେମିଂର କୁପ୍ରଭାବ ଚିନ୍ତାର ବିଷୟ ପାଲଟିଛି। ଗାଜିଆବାଦରେ ୩ ଜଣ ନାବାଳିକାଙ୍କ ଆତ୍ମହତ୍ୟା ଘଟଣା ସାମ୍ନାକୁ ଆସିବା ପରେ ସୋସିଆଲ ମିଡିଆର କୁପ୍ରଭାବକୁ ନେଇ ସାରା ଦେଶରେ ଉଦ୍‌ବେଗ ପ୍ରକାଶ ପାଇଛି। ଅଷ୍ଟ୍ରେଲିଆ ଭଳି ଦେଶରେ ପିଲାମାନଙ୍କ ପାଇଁ ସୋସିଆଲ ମିଡିଆ ବ୍ୟବହାର ଉପରେ କଡ଼ା କଟକଣା ଲାଗୁ କରାଯାଇଥିବା ବେଳେ, ଭାରତରେ ମଧ୍ୟ ସମାନ ଧରଣର ଆଇନ ଆଣିବାକୁ ଶିଶୁ ଅଧିକାର କର୍ମୀ ଏବଂ ଅଭିଭାବକ ସଙ୍ଘ ପକ୍ଷରୁ ଦାବି ଜୋର ଧରିଛି। ତେଣୁ ଶିଲ୍ଡ (SHIELD) ବିଲ୍ ଆଗାମୀ ଦିନରେ ଭାରତୀୟ ପିଲାଙ୍କ ଡିଜିଟାଲ ସୁରକ୍ଷା କ୍ଷେତ୍ରରେ ଏକ ମାଇଲଖୁଣ୍ଟ ସାବ୍ୟସ୍ତ ହୋଇପାରେ।

ନୂଆଦିଲ୍ଲୀ: ଦୁଇ ଦିନ ଧରି ଚାଲିଥିବା ତୀବ୍ର ବିତର୍କ ପରେ ଆଜି ଲୋକସଭାରେ ପବ୍ଲିକ୍ ଏକ୍ସାମିନେସନ୍ସ (ପ୍ରିଭେନ୍ସନ୍ ଅଫ୍ ଅନଫେୟାର ମିନ୍ସ) ସଂଶୋଧନ ବିଲ୍, ୨୦୨୬ ବାଚନିକ ଭୋଟରେ ପାରିତ ହୋଇଛି। ଏହି ବିଲ୍ ପାରିତ ହେବା ଫଳରେ ପ୍ରଶ୍ନପତ୍ର ଲିକ୍ ଏବଂ ପରୀକ୍ଷା ଜନିତ ଅନିୟମିତତାକୁ ରୋକିବା ପାଇଁ କଡ଼ା ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାର ପଥ ପରିଷ୍କାର ହୋଇଛି। ସଂସଦରେ ଏହି ବିଲ୍ ଆଗତ ହେବା ସମୟରେ ଶାସକ ଦଳ ଏବଂ ବିରୋଧୀ ସଦସ୍ୟଙ୍କ ମଧ୍ୟରେ ପ୍ରବଳ କଥାକଟାକଟି ଦେଖିବାକୁ ମିଳିଥିଲା।

ଏହି ସଂଶୋଧିତ ଆଇନ ଅନୁଯାୟୀ ସାର୍ବଜନୀନ ପରୀକ୍ଷାରେ ସ୍ୱଚ୍ଛତା ଏବଂ ଉତ୍ତରଦାୟିତ୍ୱ ଆଣିବା ଉପରେ ଗୁରୁତ୍ୱ ଦିଆଯାଇଛି। ନୂତନ ବ୍ୟବସ୍ଥା ଅନୁସାରେ ପ୍ରଶ୍ନପତ୍ର ଲିକ୍ ମାମଲାରେ ଦୋଷୀ ସାବ୍ୟସ୍ତ ହେଲେ ୧୦ ବର୍ଷ ପର୍ଯ୍ୟନ୍ତ ଜେଲ୍ ଦଣ୍ଡ ସହିତ ୧୦ କୋଟି ଟଙ୍କା ପର୍ଯ୍ୟନ୍ତ ଜୋରିମାନା ଏବଂ ସମ୍ପତ୍ତି ବାଜ୍ୟାପ୍ତି କରାଯିବାର ବ୍ୟବସ୍ଥା ରହିଛି। ଏହା ସହିତ ଏହି ପ୍ରକାର ମାମଲାଗୁଡ଼ିକର ବିଚାର ଯେପରି ତିନି ମାସ ମଧ୍ୟରେ ଶେଷ ହେବ, ସେ ନେଇ ଏକ ବ୍ୟବସ୍ଥା ମଧ୍ୟ କରାଯାଇଛି। ସେହିପରି ପରୀକ୍ଷା ରାକେଟ୍ ଚଳାଉଥିବା ସିଣ୍ଡିକେଟ୍ ମାନଙ୍କ ପାଇଁ ସର୍ବନିମ୍ନ ଜେଲ୍ ଦଣ୍ଡକୁ ୫ ବର୍ଷରୁ ବୃଦ୍ଧି କରି ୭ ବର୍ଷ କରାଯାଇଛି।

ଏହି ବିଲ୍ ଏଭଳି ଏକ ସମୟରେ ପାରିତ ହୋଇଛି ଯେତେବେଳେ ନିଟ୍ (NEET) ପ୍ରଶ୍ନପତ୍ର ଲିକ୍ ଓ ଅନ୍ୟାନ୍ୟ ପରୀକ୍ଷା ଅନିୟମିତତାକୁ ବିରୋଧ କରି ଜୁଲାଇ ୨୦ ତାରିଖରେ ନୂଆଦିଲ୍ଲୀଠାରେ ଛାତ୍ରମାନଙ୍କ ଦ୍ୱାରା 'ସଂସଦ ଚଲୋ' ଆନ୍ଦୋଳନ କରାଯାଇଥିଲା। ଏହି ବିଶାଳ ଆନ୍ଦୋଳନ ପରେ ତତ୍କାଳୀନ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବି ଜୋର୍ ଧରିଥିଲା, ଯାହା ଫଳରେ ଜୁଲାଇ ୨୫ ତାରିଖରେ ଶ୍ରୀ ପ୍ରଧାନ ନିଜ ପଦରୁ ଇସ୍ତଫା ଦେଇଥିଲେ।

ଏହି ବିଲ୍ ଉପରେ ଆଲୋଚନା ସମୟରେ ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀ ଛାତ୍ର ଆନ୍ଦୋଳନକୁ ସମର୍ଥନ ଜଣାଇବା ସହ ଆରଏସଏସ (RSS) ଏବଂ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ଉପରେ ବର୍ଷିଥିଲେ। ପ୍ରତିବାଦକାରୀ ଛାତ୍ରଛାତ୍ରୀଙ୍କ ଉପରେ ଅତ୍ୟଧିକ ପୋଲିସ କାର୍ଯ୍ୟାନୁଷ୍ଠାନ ଏବଂ ପେଲେଟ୍ ଗନ୍ ବ୍ୟବହାର କରାଯାଇଥିବା ନେଇ ସେ ଗୃହମନ୍ତ୍ରୀଙ୍କୁ ଟାର୍ଗେଟ କରିଥିଲେ। ତେବେ ରାହୁଲଙ୍କ ଏହି ଅଭିଯୋଗକୁ ବିଜେପି ପକ୍ଷରୁ ଦୃଢ଼ ବିରୋଧ କରାଯାଇଥିଲା। ଅନ୍ୟପକ୍ଷରେ କଂଗ୍ରେସ ସାଂସଦ ପ୍ରିୟଙ୍କା ଗାନ୍ଧୀ, ସମାଜବାଦୀ ପାର୍ଟି ସଭାପତି ଅଖିଳେଶ ଯାଦବ, ବିଜେପି ନେତା ଅନୁରାଗ ଠାକୁର, ତେଜସ୍ୱୀ ସୂର୍ଯ୍ୟ ଓ ଏନସିପିର ସୁପ୍ରିୟା ସୁଲେ ପ୍ରମୁଖ ଏହି ବିତର୍କରେ ଅଂଶଗ୍ରହଣ କରିଥିଲେ।

ନୂଆଦିଲ୍ଲୀ: ପରୀକ୍ଷା ପ୍ରଶ୍ନପତ୍ର ଲିକ୍ ଏବଂ ଅନିୟମିତତା ମାମଲାରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ କେନ୍ଦ୍ର ସରକାର ଏକ ବଡ଼ ପଦକ୍ଷେପ ନେଇଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପ୍ରତିଶ୍ରୁତି ଅନୁଯାୟୀ, ଶୁକ୍ରବାର ଦିନ କେନ୍ଦ୍ର କ୍ୟାବିନେଟ୍ ଏକ ନୂତନ ବିଲ୍ ଏବଂ ଏହାର ଆନୁଷଙ୍ଗିକ ବ୍ୟବସ୍ଥାକୁ ଅନୁମୋଦନ କରିଛି। ଏହି ବିଲ୍ ମାଧ୍ୟମରେ ଫାଷ୍ଟ-ଟ୍ରାକ୍ କୋର୍ଟ ଗଠନ ସହିତ ଦୋଷୀମାନଙ୍କୁ କଠୋର ଦଣ୍ଡ ପ୍ରଦାନ କରାଯିବ।

ସରକାରୀ ସୂତ୍ରରୁ ପ୍ରକାଶ ଯେ, ଏହି ପ୍ରସ୍ତାବିତ ବିଲ୍ ଆସନ୍ତା ସପ୍ତାହରେ ସଂସଦରେ ଆଗତ ହେବାର ସମ୍ଭାବନା ରହିଛି। ବିଲ୍‌ରେ ଥିବା ପ୍ରସ୍ତାବ ଅନୁଯାୟୀ, ଗଠନ ହେବାକୁ ଥିବା ଫାଷ୍ଟ-ଟ୍ରାକ୍ କୋର୍ଟଗୁଡ଼ିକ ମାତ୍ର ୩ ମାସ ମଧ୍ୟରେ ବିଚାର ପ୍ରକ୍ରିୟା ଶେଷ କରି ରାୟ ଶୁଣାଇବା ପାଇଁ ବାଧ୍ୟତାମୂଳକ କରାଯିବ। ଗୁରୁବାର ଦିନ ପ୍ରଧାନମନ୍ତ୍ରୀ ମୋଦୀ ଏକ ଭିଡିଓ ବାର୍ତ୍ତା ଜରିଆରେ ସଂସଦରେ ଏକ କଠୋର ବିଲ୍ ଆଗତ କରାଯିବ ବୋଲି ଘୋଷଣା କରିବାର ଠିକ୍ ପରେ ଏହି ବିକାଶମୂଳକ ପଦକ୍ଷେପ ନିଆଯାଇଛି।

ପେପର ଲିକ୍ ଯୋଗୁଁ ଛାତ୍ରଛାତ୍ରୀ ଏବଂ ସେମାନଙ୍କ ପରିବାର ଲୋକେ ଭୋଗୁଥିବା ଦୁର୍ଦ୍ଦଶା ଉପରେ ଚିନ୍ତା ବ୍ୟକ୍ତ କରି ପ୍ରଧାନମନ୍ତ୍ରୀ କହିଛନ୍ତି ଯେ, ବିଗତ ଦୁଇ-ଅଢ଼େଇ ମାସ ମଧ୍ୟରେ କେନ୍ଦ୍ର ସରକାର ଏକାଧିକ ପଦକ୍ଷେପ ନେଇଛନ୍ତି। ଏହି କ୍ରମରେ ଅନେକ ଦୋଷୀଙ୍କୁ ଗିରଫ କରାଯାଇ ଜେଲ୍ ପଠାଯାଇଛି। ସେ ନିଜର ଅଫିସିଆଲ୍ 'ଏକ୍ସ' ଖାତାରେ ଲେଖିଛନ୍ତି ଯେ, କ୍ୟାବିନେଟ୍ ନିଷ୍ପତ୍ତି ପରେ ପେପର ଲିକ୍ ବିରୋଧରେ ଆହୁରି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।

ପରୀକ୍ଷାର୍ଥୀଙ୍କ ଭବିଷ୍ୟତକୁ ସୁରକ୍ଷିତ କରିବା କେନ୍ଦ୍ର ସରକାରଙ୍କ ପ୍ରାଥମିକତା ବୋଲି ଦର୍ଶାଇ ପ୍ରଧାନମନ୍ତ୍ରୀ କହିଛନ୍ତି ଯେ ପ୍ରାୟ ୨୨ ଲକ୍ଷ ଛାତ୍ରଛାତ୍ରୀଙ୍କ ପାଇଁ ବିନା ବିଳମ୍ବରେ ପରୀକ୍ଷା ପରିଚାଳନା କରିବାକୁ ସମସ୍ତ ସମ୍ବଳର ଉପଯୋଗ କରାଯାଇଥିଲା। ତେବେ ପରୀକ୍ଷା ଅନିୟମିତତାରେ ସମ୍ପୃକ୍ତ ବ୍ୟକ୍ତିଙ୍କ ପାଇଁ ଫାଷ୍ଟ-ଟ୍ରାକ୍ କୋର୍ଟ ଏବଂ କଠୋର ଦଣ୍ଡବିଧାନ ନିମନ୍ତେ ପ୍ରଧାନମନ୍ତ୍ରୀ ନିଜେ ଏକ ଦୃଢ଼ ପ୍ରସ୍ତାବ ପ୍ରସ୍ତୁତ କରିଛନ୍ତି ବୋଲି ସୂଚନା ଦେଇଛନ୍ତି।

ଭୁବନେଶ୍ୱର: ଆସନ୍ତାକାଲିଠାରୁ ମୌସୁମୀ ଅଧିବେଶନରେ ଓଡ଼ିଶାର ସ୍ୱାର୍ଥ ସହ ଜଡ଼ିତ ଏକାଧିକ ପ୍ରସଙ୍ଗକୁ ସଂସଦରେ ଉଠାଇବ ବିଜେଡି।  ରାଜ୍ୟର ବିପର୍ଯ୍ୟସ୍ତ ଆଇନଶୃଙ୍ଖଳା ପରିସ୍ଥିତି, ବିଜେପି ସରକାରଙ୍କ ଦୁଇ ବର୍ଷର ବିଫଳତା, କୋଇଲା ରୟାଲଟି ବୃଦ୍ଧି, ପାଠ୍ୟପୁସ୍ତକରେ ରହିଥିବା ତ୍ରୁଟି, କୃଷି ଓ କୃଷକଙ୍କ ସମସ୍ୟା ସହ ଓଡ଼ିଶା ଏବଂ ଦେଶର ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ସରକାରଙ୍କୁ ଘେରିବାକୁ ନିଷ୍ପତ୍ତି ହୋଇଥିବା ନେଇ ରାଜ୍ୟସଭାରେ ବିଜେଡି ସଂସଦୀୟ ଦଳ ନେତା ମାନସ ମଙ୍ଗରାଜ ସୂଚନା ଦେଇଛନ୍ତି। ମୌସୁମୀ ଅଧିବେଶନ ପୂର୍ବରୁ ରବିବାର ଦିଲ୍ଲୀରେ ଆୟୋଜିତ ସର୍ବଦଳୀୟ ବୈଠକରେ ଶ୍ରୀ ମଙ୍ଗରାଜ ଦଳ ପକ୍ଷରୁ ଓଡ଼ିଶାର ସ୍ୱାର୍ଥ ସମ୍ବନ୍ଧୀୟ ଏକାଧିକ ଦାବି ଉପସ୍ଥାପନ କରିବା ସହ ଏହି ସବୁ ପ୍ରସଙ୍ଗ ଉପରେ ସଂସଦରେ ସ୍ୱତନ୍ତ୍ର ଆଲୋଚନା ପାଇଁ ଦାବି କରିଛନ୍ତି। ଏହା ସହ ଗତ ଦୁଇ ବର୍ଷ ଧରି ଓଡ଼ିଶାରେ ବିଜେଡି ସାଂସଦମାନଙ୍କ ହାତପାଣ୍ଠି ବ୍ୟୟ କ୍ଷେତ୍ରରେ ଦିଆଯାଉଥିବା ବାଧା ଓ ସୃଷ୍ଟି କରାଯାଉଥିବା ପ୍ରତିବନ୍ଧକ ସମ୍ପର୍କରେ ମଧ୍ୟ ସଂସଦୀୟ ଦଳ ବୈଠକରେ ଉଠାଇଛନ୍ତି। ବୈଠକରେ ଉପସ୍ଥିତ ଶାସକଦଳର ତିନି ପ୍ରତିନିଧି ତଥା ବରିଷ୍ଠ ମନ୍ତ୍ରୀ ରାଜନାଥ ସିଂହ, ଜଗତପ୍ରକାଶ ନଡ୍ଡା ଓ କିରଣ ରିଜ୍ଜିଜୁ ଏହି ପ୍ରସଙ୍ଗକୁ ଅତ୍ୟନ୍ତ ଗମ୍ଭୀରତାର ସହ ଗ୍ରହଣ କରିଛନ୍ତି। 

ଗଣମାଧ୍ୟମକୁ ସୂଚନା ଦେଇ ଶ୍ରୀ ମଙ୍ଗରାଜ କହିଛନ୍ତି ଯେ, ବିଜେଡି ପକ୍ଷରୁ ଦକ୍ଷିଣ ଏସିଆର ବର୍ତ୍ତମାନର ଯୁଦ୍ଧ ପରିସ୍ଥିତି, ଅହେତୁକ ଦରବୃଦ୍ଧି, ପେଟ୍ରୋଲରେ ଇଥାନଲ ମିଶ୍ରଣ ଫଳରେ ଗାଡ଼ିର ଇଞ୍ଜିନରେ ସୃଷ୍ଟି ହେଉଥିବା ସମସ୍ୟା ଆଦି ପ୍ରସଙ୍ଗ ସଂସଦରେ ଉଠାଇବ। ସେହିପରି ଓଡ଼ିଶା ସମ୍ବନ୍ଧୀୟ ବିଭିନ୍ନ ଜନସ୍ୱାର୍ଥ ପ୍ରସଙ୍ଗରେ କେନ୍ଦ୍ର ସରକାରଙ୍କୁ ମଧ୍ୟ ଦଳ ପ୍ରଶ୍ନ କରିବ। ରାଜ୍ୟରେ ବିଜେପି ସରକାରର ଦୁଇ ବର୍ଷର ବିଫଳତାକୁ ବିଜେଡି ଏଥର ମୌସୁମୀ ଅଧିବେଶନର ପ୍ରମୁଖ ପ୍ରସଙ୍ଗ କରିବ। ନୂତନ ଶିକ୍ଷା ନୀତି ଅନୁଯାୟୀ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପ୍ରକାଶିତ ପାଠ୍ୟପୁସ୍ତକରେ ଅନେକ ତ୍ରୁଟି ରହିଛି। ଏହି ତ୍ରୁଟି ଯୋଗୁଁ ୪୦ ଲକ୍ଷରୁ ଅଧିକ ଛାତ୍ରଛାତ୍ରୀଙ୍କ ପାଠପଢ଼ା ପ୍ରଭାବିତ ହୋଇଛି। ଏହା ପରି ଏକ ଗୁରୁତର ପ୍ରସଙ୍ଗକୁ ରାଜ୍ୟ ସରକାର ଅତ୍ୟନ୍ତ ହାଲୁକା ଭାବରେ ନେଉଥିବାରୁ ରାଜ୍ୟସଭାରେ ଏହା ଉପରେ ଆଲୋଚନା ପାଇଁ ବିଜେଡି ଦାବି କରିଛି। ପୁନଶ୍ଚ ଓଡ଼ିଶାରୁ ଦେଶର ସର୍ବାଧିକ ପରିମାଣର କୋଇଲା ଉତ୍ତୋଳନ ହେଉଥିବା ସତ୍ତେ୍ୱ ରାଜ୍ୟ ଯଥୋଚିତ କୋଇଲା ରୟାଲଟିରୁ ବଞ୍ଚିତ ହେଉଛି। ଏହା ସହ କୃଷକଙ୍କ ସମସ୍ୟା, କୃଷି ସଙ୍କଟ ଓ ରାଜ୍ୟର ବିପର୍ଯ୍ୟସ୍ତ ଆଇନଶୃଙ୍ଖଳା ପରିସ୍ଥିତି ନେଇ ସଂସଦରେ ସ୍ୱତନ୍ତ୍ର ଆଲୋଚନା କରିବାକୁ ବିଜେଡି ଦାବି କରିଛି।

ସେ ପୁଣି କହିଛନ୍ତି ଯେ ବୈଠକରେ ଅନେକ ସାଂସଦ  ହାତପାଣ୍ଠିକୁ ୫ କୋଟିରୁ ଅଧିକ ବୃଦ୍ଧି କରିବାକୁ ଦାବି କରିଛନ୍ତି। ମାତ୍ର ବର୍ତ୍ତମାନର ମିଳୁଥିବା ହାତପାଣ୍ଠିର ଉପଯୋଗ ଠିକରେ ହୋଇପାରୁ ନାହିଁ। ଓଡ଼ିଶାରେ ବିଜେପି ସରକାର ବିରୋଧୀ ଦଳର ସାଂସଦମାନଙ୍କ ହାତପାଣ୍ଠି ବ୍ୟୟ କରିବାରେ ଯୋଜନାବଦ୍ଧ ଭାବେ ବାଧା ସୃଷ୍ଟି କରୁଛନ୍ତି। ଫଳରେ ଉନ୍ନୟନମୂଳକ କାର୍ଯ୍ୟ ବାଧାପ୍ରାପ୍ତ ହେଉଛି।  ସେ ନିଜେ ଏହାର ଭୁକ୍ତଭୋଗୀ। ଚିଲିକା ଅଞ୍ଚଳର ବିଭିନ୍ନ ଉନ୍ନୟନମୂଳକ ପ୍ରକଳ୍ପ ପାଇଁ ସାଂସଦ ହାତପାଣ୍ଠିରୁ ଅର୍ଥ ମଞ୍ଜୁର ହୋଇଥିଲେ ମଧ୍ୟ ତାହାର ସଠିକ୍‌ ବ୍ୟୟ ହେଉନାହିଁ। କେତେକ ସ୍ଥାନରେ ସାଂସଦ ହାତପାଣ୍ଠିରେ କାମ ହେଉଥିଲେ ମଧ୍ୟ ଉଦ୍ଘାଟନ ଫଳକରେ ସ୍ଥାନୀୟ ମନ୍ତ୍ରୀଙ୍କ ନାମ ଉଲ୍ଲେଖ କରାଯାଉଛି। ଏହି ପ୍ରସଙ୍ଗରେ ସେ ପୂର୍ବରୁ ସଂସଦର ସ୍ୱାଧିକାର କମିଟି ନିକଟରେ ଅଭିଯୋଗ କରିଥିଲେ। ଆଲୋଚନା ହୋଇଥିଲେ ମଧ୍ୟ ଏପର୍ଯ୍ୟନ୍ତ କୌଣସି ଠୋସ ପଦକ୍ଷେପ ଗ୍ରହଣ କରାଯାଇନାହିଁ।

ରାଜ୍ୟ ସରକାରଙ୍କ ଇଙ୍ଗିତରେ ଅଧିକାରୀମାନେ ବିଜେଡି ସାଂସଦମାନଙ୍କ ହାତପାଣ୍ଠି ବ୍ୟୟ କରିବାକୁ ଦେଉନାହାନ୍ତି ଏବଂ ଗତ ଦୁଇ ବର୍ଷ ଧରି ଏହି ପାଣ୍ଠିକୁ ଅଟକାଇ ରଖିଛନ୍ତି। ଏହି ପ୍ରସଙ୍ଗରେ ସଂସଦରେ ସ୍ୱତନ୍ତ୍ର ଆଲୋଚନା ପାଇଁ ସେ ସର୍ବଦଳୀୟ ବୈଠକରେ ଦାବି କରିଛନ୍ତି । ପୁନଶ୍ଚ ଓଡ଼ିଶାର ସ୍ୱାର୍ଥ ସହ ଜଡ଼ିତ ଅନେକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ରହିଥିବାରୁ ବିଜେଡି ସଂସଦରେ ସେଗୁଡ଼ିକୁ ଦୃଢ଼ତାର ସହ ଉପସ୍ଥାପନ କରିବ। ସାମ୍ବିଧାନିକ ବିଧିବ୍ୟବସ୍ଥା ଓ ସଂସଦୀୟ ପରମ୍ପରାକୁ ସମ୍ମାନ ଦେଇ ବିଜେଡି ରାଜ୍ୟ ସ୍ୱାର୍ଥ ସମ୍ପର୍କିତ ପ୍ରତ୍ୟେକ ପ୍ରସଙ୍ଗରେ ସରକାରଙ୍କୁ ଉତ୍ତରଦାୟୀ କରିବ ବୋଲି ସେ କହିଛନ୍ତି । 

ନୂଆଦିଲ୍ଲୀ: ଆସନ୍ତା ଜୁଲାଇ ୨୦ ତାରିଖରୁ ଆରମ୍ଭ ହେବାକୁ ଯାଉଛି ସଂସଦର ମୌସୁମୀ ଅଧିବେଶନ। କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ କିରେନ ରିଜିଜୁ ଏହି ସୂଚନା ଦେଇଛନ୍ତି। ଏହି ଅଧିବେଶନ ଅଗଷ୍ଟ ୧୩ ପର୍ଯ୍ୟନ୍ତ ଚାଲିବ। ଦେଶର ଗୁରୁତ୍ୱପୂର୍ଣ୍ଣ ପ୍ରସଙ୍ଗଗୁଡ଼ିକ ଉପରେ ଅର୍ଥପୂର୍ଣ୍ଣ ବିତର୍କ ଏବଂ ନିଷ୍ପତ୍ତି ନେବା ପାଇଁ ଉଭୟ ଗୃହକୁ ଡାକିବାକୁ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଅନୁମୋଦନ ଦେଇଛନ୍ତି।

ଆଗାମୀ ମୌସୁମୀ ଅଧିବେଶନରେ ସାମ୍ବିଧାନିକ ସଂସ୍କାର, ଶାସନରେ ଉତ୍ତରଦାୟିତ୍ୱ ଏବଂ ପ୍ରତିରକ୍ଷା ସମ୍ବନ୍ଧୀୟ ବିବାଦ ଉପରେ ସରଗରମ ବିତର୍କ ଦେଖିବାକୁ ମିଳିବ ବୋଲି ଆଶା କରାଯାଉଛି। ଅଧିବେଶନ ପୂର୍ବରୁ ଜେପିସି ରିପୋର୍ଟ ଉପସ୍ଥାପନ ହେବାକୁ ଥିବାରୁ ସଂସଦରେ ବର୍ଷର ସବୁଠାରୁ ବିବାଦୀୟ ଆଲୋଚନା ହେବାର ସମ୍ଭାବନା ରହିଛି।

ବାଂଲାଦେଶରେ ଏକ ବଡ଼ ଧରଣର ଆତଙ୍କବାଦୀ ଆକ୍ରମଣର ଆଶଙ୍କା କରି ଶନିବାର ଦିନ ସାରା ଦେଶରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି। ଗୁଇନ୍ଦା ରିପୋର୍ଟ ଅନୁଯାୟୀ, ଦେଶର ସଂସଦ ଭବନ ସମେତ ବିଭିନ୍ନ ଗୁରୁତ୍ୱପୂର୍ଣ୍ଣ ସ୍ଥାନ ଉପରେ ଆତଙ୍କବାଦୀମାନେ ଆକ୍ରମଣ କରିବାର ସମ୍ଭାବନା ରହିଛି। ଏହି ଗୁଇନ୍ଦା ସୂଚନା ଆଧାରରେ ପ୍ରଧାନମନ୍ତ୍ରୀ ତାରିକ ରହମାନଙ୍କ ସରକାରଙ୍କ ପକ୍ଷରୁ ସାରା ଦେଶରେ ସୁରକ୍ଷା ସତର୍କତା ଜାରି କରାଯାଇଛି। ଏହି ସତର୍କତାକୁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଏବଂ ଗୋପନୀୟ ବୋଲି ବିବେଚନା କରାଯାଇ ସୁରକ୍ଷା ବଳକୁ ଆଲର୍ଟ ରହିବାକୁ ନିର୍ଦ୍ଦେଶ ଦିଆଯାଇଛି।

ପ୍ରମୁଖ ଟାର୍ଗେଟରେ ଗୁରୁତ୍ୱପୂର୍ଣ୍ଣ ପ୍ରତିଷ୍ଠାନ

ବାଂଲାଦେଶର ପ୍ରମୁଖ ଖବରକାଗଜ ପ୍ରଥମ ଆଲୋର ରିପୋର୍ଟ ଅନୁଯାୟୀ, ପୁଲିସ ମୁଖ୍ୟାଳୟ ପକ୍ଷରୁ ଜାରି କରାଯାଇଥିବା ଏକ ଚିଠିରେ ସଂସଦ ପରିସର, ପୂଜାସ୍ଥଳ, ମନୋରଞ୍ଜନ କେନ୍ଦ୍ର, ସାମରିକ ତଥା ପୁଲିସ ପ୍ରତିଷ୍ଠାନ ଉପରେ ସମନ୍ୱିତ ଆକ୍ରମଣ ହେବାର ଚେତାବନୀ ଦିଆଯାଇଛି। ଏହା ସହିତ ଅସ୍ତ୍ରାଗାରଗୁଡ଼ିକୁ ମଧ୍ୟ ସମ୍ଭାବ୍ୟ ଟାର୍ଗେଟ ତାଲିକାରେ ରଖାଯାଇଛି। ଡେଲି ଷ୍ଟାର ଏବଂ ଅନ୍ୟାନ୍ୟ ଗଣମାଧ୍ୟମ ରିପୋର୍ଟ ଅନୁଯାୟୀ, ନିକଟରେ ଏକ ନିଷିଦ୍ଧ ଆତଙ୍କବାଦୀ ସଂଗଠନର ସଦସ୍ୟ ଇସ୍ତିଆକ୍ ଅହମ୍ମଦ ସାମି ଓରଫ ଆବୁ ବକ୍କରଙ୍କୁ ଗିରଫ କରାଯିବା ପରେ ଏହି ଆଲର୍ଟ ଜାରି କରାଯାଇଛି। ଅଭିଯୋଗ ରହିଛି ଯେ ତାଙ୍କର ଦୁଇ ଜଣ ବହିଷ୍କୃତ ସେନା କର୍ମଚାରୀଙ୍କ ସହ ଘନିଷ୍ଠ ସମ୍ପର୍କ ରହିଛି।

ସୁରକ୍ଷା ବଳଙ୍କୁ କଡ଼ା ନିର୍ଦ୍ଦେଶ

ଏହି ଚିଠିରେ ସମ୍ଭାବ୍ୟ ଆକ୍ରମଣ ପଛରେ ଥିବା ଦୁଇ ଜଣ ପ୍ରମୁଖ ଯୋଜନାକାରୀଙ୍କ ପ୍ରୋଫାଇଲ୍ ଉଲ୍ଲେଖ କରାଯାଇଥିଲେ ମଧ୍ୟ କୌଣସି ନିର୍ଦ୍ଦିଷ୍ଟ ସଂଗଠନର ନାମ ପ୍ରକାଶ କରାଯାଇନାହିଁ। ସନ୍ଦିଗ୍ଧ ଆକ୍ରମଣକାରୀମାନେ ଦେଶର ସାମଗ୍ରିକ ସୁରକ୍ଷା ପାଇଁ ଅତ୍ୟନ୍ତ ବିପଜ୍ଜନକ ବୋଲି ବର୍ଣ୍ଣନା କରାଯାଇଛି ଏବଂ ସେମାନେ ବିଭିନ୍ନ ପଦ୍ଧତିରେ ଆକ୍ରମଣ କରିପାରନ୍ତି ବୋଲି ଚେତାବନୀ ଦିଆଯାଇଛି। ପରିସ୍ଥିତିକୁ ଦୃଷ୍ଟିରେ ରଖି ପୁଲିସ ମୁଖ୍ୟାଳୟ ପକ୍ଷରୁ ସିଆଇଡି (CID), ସ୍ପେଶାଲ୍ ବ୍ରାଞ୍ଚ (SB) ଏବଂ କାଉଣ୍ଟର ଟେରୋରିଜିମ୍ ଆଣ୍ଡ୍ ଟ୍ରାନ୍ସନ୍ୟାସନାଲ୍ କ୍ରାଇମ୍ସ (CTTC) ୟୁନିଟ୍ ସମେତ ସମସ୍ତ ସ୍ୱତନ୍ତ୍ର ପୁଲିସ ୟୁନିଟ୍‌କୁ ଅଧିକ ସତର୍କ ରହିବାକୁ ନିର୍ଦ୍ଦେଶ ଦିଆଯାଇଛି। ସାରା ଦେଶରେ ସାଧାରଣ ପୁଲିସ ବିଭାଗକୁ ମଧ୍ୟ ହାଇ ଆଲର୍ଟରେ ରଖାଯାଇଛି।

ନୂଆଦିଲ୍ଲୀ: ସଂସଦ ଓ ରାଜ୍ୟ ବିଧାନସଭାରେ ମହିଳାମାନଙ୍କ ପାଇଁ ୩୩ ପ୍ରତିଶତ ଆସନ ସଂରକ୍ଷଣ ଏବଂ ନିର୍ବାଚନମଣ୍ଡଳୀ ସୀମା ପୁନଃନିର୍ଦ୍ଧାରଣ  ସଂକ୍ରାନ୍ତ ବହୁପ୍ରତୀକ୍ଷିତ ଏବଂ ବିତର୍କିତ ୧୩୧ ସମ୍ବିଧାନ ସଂଶୋଧନ ବିଲ୍ ଆଜି ଲୋକସଭାରେ କାଟ୍ ଖାଇଯାଇଛି । ସରକାର ପାଖରେ ଆବଶ୍ୟକ ସଂଖ୍ୟା ନଥିବା ସତ୍ତ୍ବେ ଏହି ବିଲ୍ ଆଗତ କରାଯାଇଥିଲା ଏବଂ ବିରୋଧୀ ଦଳ ଏହାର ଜୋରଧାର ବିରୋଧ କରିଥିଲେ । ବିରୋଧୀ ଦଳମାନଙ୍କୁ ମନାଇବା ଲାଗି ସରକାର ଶେଷ ମୁହୂର୍ତ୍ତ ପର୍ଯ୍ୟନ୍ତ ଉଦ୍ୟମ କରିଥିଲେ ମଧ୍ୟ ସଫଳ ହୋଇନଥିଲେ । ବିଲ୍ କାଟ୍ ଖାଇଯିବା ଯୋଗୁଁ କେନ୍ଦ୍ର ସରକାର ସଂସଦରେ ଅପ୍ରୀତିକର ପରିସ୍ଥିତିର ସମ୍ମୁଖୀନ ହୋଇଛନ୍ତି । କେନ୍ଦ୍ରରେ ମୋଦୀ ସରକାର ଅମଳରେ କୌଣସି ବିଲ୍ ଗୃହରେ କାଟ ଖାଇବାରେ ଏହା ପ୍ରଥମ ଘଟଣା ବୋଲି କୁହାଯାଉଛି ।

ଏହି ବିଲ୍ ଉପରେ ଆଲୋଚନା ଏବଂ ଅନୁମୋଦନ ପାଇଁ ଗତକାଲି ଠାରୁ ଆରମ୍ଭ ହୋଇଛି ସଂସଦର ସ୍ବତନ୍ତ୍ର ଅଧିବେଶନ । ଆଜି ଆେଲାଚନା ଶେଷ ହେବାପରେ ସନ୍ଧ୍ୟାରେ ବିଲ୍ ଉପରେ ମତଦାନ କରାଯାଇଥିଲା । ପ୍ରଥମେ ମହିଳା ସଂରକ୍ଷଣ ବିଲ୍ (ନାରୀ ଶକ୍ତି ବନ୍ଦନ ଅଧିନିୟମ) ଉପରେ ମତଦାନ ହୋଇଥିଲା । ମତଦାନ ବେଳେ ଲୋକସଭାରେ ୫୨୮ ସଭ୍ୟ ଉପସ୍ଥିତ ଥିବା ବେଳେ ଏହା ସପକ୍ଷରେ ୨୯୮ ଜଣ ଭୋଟ୍ ଦେଇଥିଲେ । ୨୩୦ ଜଣ ସାଂସଦ ଏହାର ବିରୋଧ କରିଥିଲେ । ଏହି ସମ୍ବିଧାନ ସଂଶୋଧନ ବିଲ୍ ଅନୁମୋଦନ ପାଇଁ ଉପସ୍ଥିତ ସାଂସଦମାନଙ୍କ ମଧ୍ୟରୁ ଦୁଇ ତୃତୀୟାଂଶ ସଭ୍ୟଙ୍କ (୩୫୨)  ସମର୍ଥନ ଦରକାର ଥିବା ବେଳେ ଏଥିରୁ ୫୪ ଭୋଟ୍ କମ୍ ପଡ଼ିଥିଲା । ଫଳରେ ବିଲ୍ କାଟ୍ ଖାଇଯାଇଥିଲା ।  ବିଲ୍ କାଟ୍ ଖାଇଯିବା ପରେ ସରକାର ଆଉ ଅନ୍ୟ ଦୁଇଟି ବିଲ୍ ଉପରେ ମତଦାନ କରିବାରୁ ଓହରିଯାଇଥିଲେ । ସଂସଦୀୟ ବ୍ୟାପାର ମନ୍ତ୍ରୀ ରିଜିଜୁ କହିଥିଲେ ଯେ ମହିଳା ବିଲ୍ କାଟ୍ ଖାଇଯିଥିବାରୁ ଅନ୍ୟ ଦୁଇଟି ବିଲ୍ (ସୀମା ପୁନଃନିର୍ଦ୍ଧାରଣ ଏବଂ କେନ୍ଦ୍ର ଶାସିତ ଅଞ୍ଚଳ)କୁ ମତଦାନ ପାଇଁ ଆଗତ କରାଯିବ ନାହିଁ । କାରଣ  ଏହି ଦୁଇଟି ବିଲ୍ ସମ୍ବିଧାନ ସଂଶୋଧନ ବିଲ୍ ସହିତ ଯୋଡ଼ି ହୋଇ ରହିଥିଲା । ଏହାପରେ ବାଚସ୍ପତି ଗୃହକୁ ମୁଲତବୀ କରିଦେଇଥିଲେ ।

ମହିଳା ସଂରକ୍ଷଣ ସହିତ ସୀମା ପୁନଃନିର୍ଦ୍ଧାରଣ ଯୋଡ଼ି ସରକାର ୧୩୧ତମ ସମ୍ବିଧାନ ସଂଶୋଧନ ବିଲ୍ ଆଣିଥିଲେ । ସରକାର ଏହି ବିଲ୍ ଜରିଆରେ ପ୍ରସ୍ତାବ ଦେଇଥିଲେ ଯେ ସୀମା ପୁନଃନିର୍ଦ୍ଧାରଣ ଦ୍ବାରା ଲୋକସଭା ସଭ୍ୟସଂଖ୍ୟା ୫୪୩ରୁ ୮୫୦କୁ ବୃଦ୍ଧି ପାଇବ । ଏଥିରେ ମହିଳାମାନଙ୍କ ପାଇଁ ୩୩ ପ୍ରତିଶତ ଆସନ ସଂରକ୍ଷିତ ରହିବ୤ ଏହା ଆଜି ଅନୁମୋଦିତ ହୋଇଥିଲେ ୨୦୨୯ ସାଧାରଣ ନିର୍ବାଚନରୁ କାର୍ଯ୍ୟକାରୀ ହୋଇଥାଆନ୍ତା୤ କିନ୍ତୁ ବିରୋଧୀ ଦଳ ଏହି ଦୁଇଟି ବିଲକୁ ଯୋଡ଼ାଯାଇଥିବାରୁ ଏହାର ବିରୋଧ କରିଥିଲେ । ସେମାନେ ମହିଳା ସଂରକ୍ଷଣ ବିଲକୁ ସମର୍ଥନ କରିଥିଲେ ମଧ୍ୟ ସୀମା ପୁନଃନିର୍ଦ୍ଧାରଣକୁ ବିରୋଧ କରିଥିଲେ । ୨୦୧୧  ଜନଗଣନାକୁ ଆଧାର କରି ସୀମା ପୁନଃନିର୍ଦ୍ଧାରଣ କରାଯାଇପାରିବ ନାହିଁ ଏବଂ ଏଥିପାଇଁ ୨୦୨୭ ଜନଗଣନା ପର୍ଯ୍ୟନ୍ତ ଅପେକ୍ଷା କରିବାକୁ ସେମାନେ ଦାବି କରିଥିଲେ ।
 
ମହିଳାମାନଙ୍କ ସ୍ବାର୍ଥ ପାଇଁ ୩୩ ଭାଗ ସଂରକ୍ଷଣ ଜରୁରୀ ଏବଂ ସୀମା ପୁନଃନିର୍ଦ୍ଧାରଣ ପ୍ରକ୍ରିୟାରେ କୌଣସି ଦକ୍ଷିଣ ରାଜ୍ୟର ପ୍ରତିନିଧିତ୍ବ କମିବ ନାହିଁ ବୋଲି ସରକାର ବିରୋଧୀଙ୍କୁ ଆଶ୍ବାସନା ଦେଇଥିଲେ । ଏପରିକି ଏଥିପାଇଁ ଲିଖିତ ପ୍ରତିଶ୍ରୁତି ଦେବାକୁ ମଧ୍ୟ ସ୍ବରାଷ୍ଟ୍ର ମନ୍ତ୍ରୀ ଅମତି ଶାହ କହିଥିଲେ । ସେହିଭଳି ନାରୀମାନଙ୍କ ସ୍ବାର୍ଥ ଦୃଷ୍ଟିରୁ ଏଭଳି ଐତିହାସିକ ସୁଯୋଗ ହାତଛଡ଼ା ନକରିବା ଲାଗି ପ୍ରଧାନମନ୍ତ୍ରୀ ମୋଦୀ ସମସ୍ତ ସାଂସଦଙ୍କୁ ବ୍ୟକ୍ତିଗତ ଭାବେ ଅନୁରୋଧ କରିଥିଲେ ।  ତେବେ ବିଲ୍ କାଟ ଖାଇଲା ପରେ ସରକାର ବିରୋଧୀଙ୍କର ତୀବ୍ର ସମାଲୋଚନା କରି ସେମାନଙ୍କୁ ନାରୀ ସଂରକ୍ଷଣ ବିରୋଧୀ ବୋଲି କହିଛନ୍ତି । ବିଲ୍ ପରାଜୟ ଲାଗି ଅମିତ ଶାହ କଂଗ୍ରେସ, ଟିଏମସି, ଡିଏମକେ ଏବଂ ସମାଜବାଦୀ ପାର୍ଟିକୁ ଦାୟୀ କରି କହିଛନ୍ତି ଯେ ମହିଳାଙ୍କ ସମ୍ମାନ ଲାଗି ସରକାର ଉଦ୍ୟମ ଜାରି ରଖିବେ ।

 ଅନ୍ୟପକ୍ଷେରେ ବିରୋଧୀ ଦଳର ନେତା ରାହୁଲ ଗାନ୍ଧୀ କହିଛନ୍ତି ଯେ ମହିଳାଙ୍କ ନାମରେ ସମ୍ବିଧାନକୁ ଭାଙ୍ଗିବା ଲାଗି ସରକାର ଅସାମ୍ବିଧାନିକ କାର୍ଯ୍ୟ କରୁଥିଲେ ଏବଂ ବିରୋଧୀ ସେହି ଚକ୍ରାନ୍ତକୁ ବ୍ୟର୍ଥ କରିଦେଇଛନ୍ତି । ଏହି ବିଲ୍‌ ଜରିଆରେ ସରକାର ଦେଶର ନିର୍ବାଚନ ଚିତ୍ର ବଦଳାଇବାକୁ ଉଦ୍ୟମ କରିଥିଲେ ।  ମହିଳାମାନଙ୍କ ବିକାଶ ଏହି ବିଲ୍‌ର ଉଦ୍ଦେଶ୍ୟ ନଥିଲା । ମହିଳାଙ୍କ ସ୍ବାର୍ଥର ସୁରକ୍ଷା ପାଇଁ ଯଦି ସରକାରଙ୍କର ଆନ୍ତରିକତା ରହିଛି, ତାହାେହଲେ  ମହିଳା ସଂରକ୍ଷଣ ବିଲ୍-୨୦୨୩କୁ କାର୍ଯ୍ୟକାରୀ କରନ୍ତୁ ଏବଂ ସମଗ୍ର ବିରୋଧୀ ଦଳ ଏଥିରେ ପୂର୍ଣ୍ଣମାତ୍ରାରେ ସହଯୋଗ କରିବାକୁ ପ୍ରସ୍ତୁତ ଅଛନ୍ତି ବୋଲି ରାହୁଲ କହିଛନ୍ତି ।
 
ଇତିମଧ୍ୟରେ ବିଜେପି ପକ୍ଷରୁ ଘୋଷଣା କରାଯାଇଛି ଯେ ମହିଳା ସଂରକ୍ଷଣ ବିଲକୁ ପରାଜିତ କରିଥିବା କଂଗ୍ରେସ ବିରୋଧରେ ଦେଶବ୍ୟାପୀ ପ୍ରତିବାଦ କରାଯିବ । ବିଲ୍ କାଟ୍ ଖାଇବା ପରେ ଏନଡିଏର ମହିଳା ସାଂସଦ ସଂସଦ ପରିସରରେ ଧାରଣା ଦେଇଥିଲେ ।

ନୂଆଦିଲ୍ଲୀ: ଆଜି ସଂସଦର ସ୍ୱତନ୍ତ୍ର ଅଧିବେଶନରେ ଆଗତ ହୋଇଛି ୩ଟି ଗୁରୁତ୍ୱପୂର୍ଣ୍ଣ ବିଲ୍ । ୩ଟି ବିଲ୍‌ ଆଗତ କରିଛନ୍ତି ଆଇନ ମନ୍ତ୍ରୀ ଅର୍ଜୁନ ରାମ ମେଘୱାଲ୍ । ମହିଳା ସଂରକ୍ଷଣକୁ ନେଇ ୧୩୧ ତମ ସମ୍ବିଧାନ ସଂଶୋଧନ ବିଲ୍ ଆଗତ ହୋଇଛି । ନାରୀ ଶକ୍ତି ବନ୍ଦନ ଅଧିନିୟମ' ସଂଶୋଧନ ବିଲ୍ ଉପସ୍ଥାପନ ପ୍ରସ୍ତାବ । ଏହା ସହିତ ଲୋକସଭା ଆସନ ସୀମାପୁନଃନିର୍ଦ୍ଧାରଣ ବିଲ ୨୦୨୬ ଏବଂ କେନ୍ଦ୍ରଶାସିତ ଅଞ୍ଚଳ ନିୟମ (ସଂଶୋଧନ) ବିଲ ୨୦୨୬ ମଧ୍ୟ ଆଗତ ହୋଇଛି । ଏହି ତିନିଟି ଯାକ ବିଲର ଉଦ୍ଦେଶ୍ୟ ହେଲା ବିଧାନସଭା ଓ ସଂସଦରେ ମହିଳାଙ୍କ ପାଇଁ ୩୩ ପ୍ରତିଶତ ଆସନ ସଂରକ୍ଷଣ । ବିଲ୍ ଆଗତ ପରେ ଜୋରସୋର ଚାଲିଛି ଚର୍ଚ୍ଚା ।

ଇଣ୍ଡିଆ ମେଣ୍ଚ ଲୋକସଭାରେ ସୀମା ପୁନଃନିର୍ଦ୍ଧାରଣ ବିଲକୁ ଜୋରଦାର ବିରୋଧ କରିଛି । ଏହା ଦ୍ଵାରା କେତେକ ରାଜ୍ୟର ରାଜନୈତିକ ପ୍ରତିନିଧିତ୍ଵ ବଢୁଥିବା ବେଳେ କେତେକ ରାଜ୍ୟର ପ୍ରତିନିଧିତ୍ଵ ହ୍ରାସ ପାଉଥିବା ଇଣ୍ଡିଆ ମେଣ୍ଚ ଅଭିଯୋଗ କରୁଛି । ବିଶେଷ କରି ଦକ୍ଷିଣର ଯେଉଁ ରାଜ୍ୟଗୁଡ଼ିକ ଜନସଂଖ୍ୟା ହ୍ରାସ ପାଇଁ ପଦକ୍ଷେପ ନେଇଛନ୍ତି, ସେମାନଙ୍କର ପ୍ରତିନିଧିତ୍ଵ କମିବ। ତେଣୁ ସେମାନେ ବିରୋଧ କରୁଛନ୍ତି। ବିଲ ଆଗତ ହେବ କି ନାହିଁ, ତା ଉପରେ ହୋଇଥିଲା ଭୋଟିଂ। ସପକ୍ଷରେ ୨୦୭ ଜଣ ଭୋଟ ଦେଇଥିବା ବେଳେ ବିପକ୍ଷରେ ଭୋଟ ଦେଇଥିଲେ ୧୨୬ ଜଣ। ୮୮ ଜଣ ଅନୁପସ୍ଥିତ କରିଥିଲେ।

ଆନ୍ଧ୍ରପ୍ରଦେଶ: ଆନ୍ଧ୍ରପ୍ରଦେଶର ଏକମାତ୍ର ତଥା ସ୍ଥାୟୀ ରାଜଧାନୀ ଭାବରେ ଅମରାବତୀକୁ ସାମ୍ବିଧାନିକ ମାନ୍ୟତା ମିଳିଛି। ସୋମବାର, ଏପ୍ରିଲ ୭ ତାରିଖରେ ଭାରତ ସରକାରଙ୍କ ପକ୍ଷରୁ ଏକ ଗେଜେଟ୍ ବିଜ୍ଞପ୍ତି ପ୍ରକାଶ ପାଇବା ପରେ ଏହା ବିଧିବଦ୍ଧ ଭାବେ କାର୍ଯ୍ୟକାରୀ ହୋଇଛି। ଗତ ସପ୍ତାହରେ ସଂସଦରେ ଗୃହୀତ ହୋଇଥିବା ଆନ୍ଧ୍ରପ୍ରଦେଶ ପୁନର୍ଗଠନ (ସଂଶୋଧନ) ବିଲ୍, ୨୦୨୬କୁ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଅନୁମୋଦନ ଦେବା ପରେ ଏହି ବିଜ୍ଞପ୍ତି ଜାରି କରାଯାଇଛି।

ଗତ ଏପ୍ରିଲ ୨ ତାରିଖରେ ସଂସଦରେ ଏହି ସଂଶୋଧନ ବିଲ୍‌କୁ ଚୂଡ଼ାନ୍ତ ମଞ୍ଜୁରୀ ମିଳିଥିଲା। ଲୋକସଭାରେ ପାରିତ ହେବାର ଗୋଟିଏ ଦିନ ପରେ ରାଜ୍ୟସଭାରେ ଏହାକୁ ଧ୍ୱନି ଭୋଟ୍ ମାଧ୍ୟମରେ ଗୃହୀତ କରାଯାଇଥିଲା। ଏହି ଆଇନ ପ୍ରଣୟନ ଫଳରେ ୨୦୧୪ ମସିହାରେ ରାଜ୍ୟ ବିଭାଜନ ପରେ ରାଜଧାନୀକୁ ନେଇ ଲାଗି ରହିଥିବା ଅନିଶ୍ଚିତତା ଏବଂ ରାଜନୈତିକ ବିବାଦର ଅନ୍ତ ଘଟିଛି। ଏହା ସହିତ ପୂର୍ବରୁ ପ୍ରସ୍ତାବିତ ତିନୋଟି ରାଜଧାନୀ ମଡେଲ୍‌କୁ ସବୁଦିନ ପାଇଁ ବାତିଲ୍ କରିଦିଆଯାଇଛି।

ସଂସଦର ଉଭୟ ଗୃହରେ ମୋଟ ୩୫ ଜଣ ସାଂସଦ ଏହି ବିଲ୍ ଉପରେ ଆଲୋଚନାରେ ଅଂଶଗ୍ରହଣ କରିଥିଲେ। କେବଳ ୱାଇଏସଆର କଂଗ୍ରେସ ପାର୍ଟି (YSRCP) ର ଦୁଇ ଜଣ ସାଂସଦଙ୍କ ବ୍ୟତୀତ ଅନ୍ୟ ସମସ୍ତେ ଏହାକୁ ସମର୍ଥନ କରିଥିଲେ। ରାଜଧାନୀ ପାଇଁ ଜମି ଦେଇଥିବା ଚାଷୀଙ୍କ ସମସ୍ୟା ସମାଧାନ ହୋଇନଥିବା ଦର୍ଶାଇ ୱାଇଏସଆରସିପି ଏହି ବିଲ୍‌କୁ ବିରୋଧ କରିଥିଲା। ସୂଚନାଯୋଗ୍ୟ ଯେ, ୨୦୧୫ ମସିହାରେ ତେଲୁଗୁ ଦେଶମ୍ ପାର୍ଟି (TDP) ସରକାର ଥିବା ବେଳେ ଅମରାବତୀର ମୂଳଦୁଆ ପଡ଼ିଥିଲା। ତେବେ ୨୦୧୯ରେ ୱାଇଏସଆରସିପି କ୍ଷମତାକୁ ଆସିବା ପରେ କାମ ବନ୍ଦ କରି ତିନୋଟି ରାଜଧାନୀ ଗଠନ ପାଇଁ ପ୍ରସ୍ତାବ ଦେଇଥିଲା। ବର୍ତ୍ତମାନ ୨୦୨୪ରେ ଏନଡିଏ ମେଣ୍ଟ ସରକାର କ୍ଷମତାକୁ ଫେରିବା ପରେ ଅମରାବତୀକୁ ଏକମାତ୍ର ରାଜଧାନୀ ଭାବେ ବିକଶିତ କରିବାକୁ ନିଷ୍ପତ୍ତି ନେଇଛି ଏବଂ ଗତବର୍ଷ ଏହି ପ୍ରକଳ୍ପ କାମ ପୁନର୍ବାର ଆରମ୍ଭ ହୋଇଛି।

ବଲିଉଡ୍ ଅଭିନେତ୍ରୀ ପରିଣୀତି ଚୋପ୍ରା (Parineeti Chopra) ନିଜ ସ୍ୱାମୀ ତଥା ଆମ୍ ଆଦମୀ ପାର୍ଟି (AAP) ସାଂସଦ ରାଘବ ଚଢ଼ା (Raghav Chadha)ଙ୍କୁ ନେଇ ଗର୍ବିତ ବୋଲି ପ୍ରକାଶ କରିଛନ୍ତି। ନିକଟରେ ସଂସଦରେ 'ପିତୃତ୍ୱ ଅବକାଶ' (Paternity Leave) କୁ ଏକ ଆଇନଗତ ଅଧିକାର ଭାବରେ ମାନ୍ୟତା ଦେବା ପ୍ରସଙ୍ଗରେ ରାଘବ ସ୍ୱର ଉଠାଇଥିଲେ। ଏହା ପରେ ପରିଣୀତି ନିଜ ଇନଷ୍ଟାଗ୍ରାମରେ ଏକ ଭାବପୂର୍ଣ୍ଣ ପୋଷ୍ଟ ଶେୟାର କରି ତାଙ୍କ ସ୍ୱାମୀଙ୍କ ଏହି ପ୍ରୟାସକୁ ଉଚ୍ଚ ପ୍ରଶଂସା କରିଛନ୍ତି।

ସଂସଦରେ ରାଘବ ଚଢ଼ାଙ୍କ ଯୁକ୍ତି

ରାଜ୍ୟସଭାରେ ଉଦବୋଧନ ଦେବାବେଳେ ରାଘବ ଚଢ଼ା ଦାବି କରିଥିଲେ ଯେ, ପିତାମାନଙ୍କ ପାଇଁ ପିତୃତ୍ୱ ଅବକାଶ ଏକ ଆଇନଗତ ଅଧିକାର ହେବା ଉଚିତ୍। ସେ କହିଥିଲେ ଯେ, "ଜଣେ ପିତା ନିଜର ନବଜାତ ଶିଶୁର ଯତ୍ନ ନେବା ଏବଂ ଚାକିରି ବଜାୟ ରଖିବା ମଧ୍ୟରୁ କେବଳ ଗୋଟିଏକୁ ବାଛିବା ଉଚିତ୍ ନୁହେଁ। ସେହିପରି ଜଣେ ମା' ନିଜ ସ୍ୱାମୀଙ୍କ ସମର୍ଥନ ବିନା ପ୍ରସବ ଏବଂ ଏଥିରୁ ସୁସ୍ଥ ହେବା କଷ୍ଟ ସହିବା ଉଚିତ୍ ନୁହେଁ।" ତାଙ୍କର ଏହି ପ୍ରସ୍ତାବ ଭାରତରେ ପିତାମାତାଙ୍କ ସମାନ ଦାୟିତ୍ୱବୋଧକୁ ନେଇ ଏକ ନୂଆ ବିତର୍କ ସୃଷ୍ଟି କରିଛି। ବର୍ତ୍ତମାନ କେବଳ କିଛି ସରକାରୀ କର୍ମଚାରୀଙ୍କୁ ୧୫ ଦିନର ପିତୃତ୍ୱ ଅବକାଶ ମିଳୁଥିବା ବେଳେ, ସମସ୍ତ କ୍ଷେତ୍ରରେ ଏହାକୁ ଲାଗୁ କରିବାକୁ ସେ ଦାବି କରିଛନ୍ତି।

'ପ୍ୟାରେଣ୍ଟିଂ ଏକ ମିଳିତ ଦାୟିତ୍ୱ' - ପରିଣୀତି

ରାଘବଙ୍କ ଏହି ପଦକ୍ଷେପକୁ ନେଇ ପରିଣୀତି ଚୋପ୍ରା ନିଜ ସୋସିଆଲ୍ ମିଡିଆ ହ୍ୟାଣ୍ଡେଲରେ ଏକ ଲମ୍ବା ନୋଟ୍ ଲେଖିଛନ୍ତି। ସେ ଲେଖିଛନ୍ତି, "ମୋର ପ୍ରିୟ ସ୍ୱାମୀ, ଆଜି ତୁମକୁ କେବଳ ଜଣେ ସାଂସଦ ଭାବରେ ନୁହେଁ ବରଂ ଆମ ପିଲାର ପିତା ଭାବରେ କହୁଥିବାର ଦେଖି ମୁଁ ବହୁତ ଗର୍ବିତ। ତୁମେ ବୁଝିଛ ଯେ ପିଲା ଲାଳନପାଳନ (Parenting) କେବଳ କାହାକୁ ଦିଆଯାଇଥିବା କାମ ନୁହେଁ, ଏହା ଏକ ମିଳିତ ଦାୟିତ୍ୱ।" ସୂଚନାଯୋଗ୍ୟ ଯେ, ଏହି ଦମ୍ପତି ନିଜର ପ୍ରଥମ ସନ୍ତାନ 'ନୀର' (Neer) କୁ ସ୍ୱାଗତ କରିଥିଲେ। ସେବେଠାରୁ ରାଘବ ଜଣେ ଦାୟିତ୍ୱବାନ ପିତା ଭାବରେ ନିଜର କର୍ତ୍ତବ୍ୟ ତୁଲାଉଥିବା ପରିଣୀତି ପ୍ରକାଶ କରିଛନ୍ତି।

ମା'ମାନଙ୍କ ଏକାକୀପଣ ଦୂର କରିବାର ପ୍ରୟାସ

ନିଜ ପୋଷ୍ଟରେ ପରିଣୀତି ଆହୁରି ମଧ୍ୟ ଉଲ୍ଲେଖ କରିଛନ୍ତି ଯେ, ସମାଜରେ ଏମିତି ଅନେକ ମା' ଅଛନ୍ତି ଯେଉଁମାନେ ପରିବାର କିମ୍ବା ସ୍ୱାମୀଙ୍କ ସମର୍ଥନ ବିନା ଏକୁଟିଆ ପିଲା ଛୁଆଙ୍କ ଦାୟିତ୍ୱ ନେଉଛନ୍ତି। ସଂସଦରେ ଏହି ପ୍ରସଙ୍ଗ ଉଠାଇ ରାଘବ ସେହି ମା'ମାନଙ୍କ ଏକାକୀପଣକୁ ସାମ୍ନାକୁ ଆଣିଛନ୍ତି ବୋଲି ପରିଣୀତି କହିଛନ୍ତି। ଯଦି ଏହି ପ୍ରସଙ୍ଗ ଆଗାମୀ ଦିନରେ ନୀତିଗତ ପରିବର୍ତ୍ତନ ଆଣେ, ତେବେ ଏହା ସମଗ୍ର ଦେଶର ମା' ଏବଂ ପରିବାର ପାଇଁ ଏକ ବଡ଼ ବିଜୟ ହେବ ବୋଲି ସେ ଆଶା ବ୍ୟକ୍ତ କରିଛନ୍ତି।

ନୂଆଦିଲ୍ଲୀ: ସାଧାରଣ ଜନତାଙ୍କ ମୋବାଇଲ୍ ରିଚାର୍ଜକୁ ନେଇ ସଂସଦରେ ବଡ଼ ପ୍ରସଙ୍ଗ ଉଠାଇଛନ୍ତି ଆମ୍ ଆଦମୀ ପାର୍ଟିର ସାଂସଦ ରାଘବ ଚଢା। ପ୍ରିପେଡ୍ ଗ୍ରାହକଙ୍କ ସହିତ ହେଉଥିବା ମନମାନୀ ଏବଂ ଟେଲିକମ୍ କମ୍ପାନୀଙ୍କ ପକ୍ଷରୁ କରାଯାଉଥିବା ଲୁଟ୍ ବିରୋଧରେ ସେ ସ୍ୱର ଉତ୍ତୋଳନ କରିଛନ୍ତି। ସେ କହିଛନ୍ତି ଯେ ଆଜିକାଲିର ଦୁନିଆରେ ମୋବାଇଲ୍ ସେବା କୌଣସି ବିଳାସପୂର୍ଣ୍ଣ ବସ୍ତୁ ନୁହେଁ ବରଂ ଏହା ଏକ ଅପରିହାର୍ଯ୍ୟ ଆବଶ୍ୟକତା ପାଲଟିଛି।

ସଂସଦରେ ନିଜର ବକ୍ତବ୍ୟ ରଖି ସେ କହିଛନ୍ତି ଯେ ଯଦି ଜଣେ ଗ୍ରାହକଙ୍କ ରିଚାର୍ଜ ଅବଧି ଶେଷ ହୋଇଯାଉଛି, ତେବେ ଆଉଟଗୋଇଙ୍ଗ୍ କଲ୍ ବନ୍ଦ ହେବା କଥା ବୁଝାପଡ଼େ। କିନ୍ତୁ ରିଚାର୍ଜ ସରିବା ମାତ୍ରେ ଇନକମିଙ୍ଗ୍ କଲ୍ ବନ୍ଦ କରିଦେବା ସଂପୂର୍ଣ୍ଣ ଭାବେ ଅନ୍ୟାୟ। ଏହାଦ୍ୱାରା ଜଣେ ବ୍ୟକ୍ତି ସହିତ କେହି ଯୋଗାଯୋଗ କରିପାରନ୍ତି ନାହିଁ। ଏପରିକି ବ୍ୟାଙ୍କିଙ୍ଗ୍ କାରବାର ପାଇଁ ଆସୁଥିବା ଓଟିପି ମଧ୍ୟ ବନ୍ଦ ହୋଇଯାଏ, ଯାହା ବିପଦ ସମୟରେ ଜଣେ ସାଧାରଣ ମଣିଷକୁ ସମ୍ପୂର୍ଣ୍ଣ ବେସାହାରା କରିଦିଏ।

Prepaid Recharge Customers के साथ हो रही लूट का मुद्दा आज मैंने Parliament में उठाया।

(a) अगर आपका recharge खत्म हो जाए तो Outgoing Calls बंद होना समझ में आता है, लेकिन Incoming Calls बंद करना मनमानी है।रिचार्ज खत्म होते ही न कोई आपसे संपर्क कर सकता है और न ही आपके फोन पर OTP… pic.twitter.com/VU0LuRohKK

— Raghav Chadha (@raghav_chadha) March 11, 2026

୨୮ ଦିନିଆ ରିଚାର୍ଜ ଯୋଜନାକୁ ସ୍କାମ କହିଲେ ସାଂସଦ

ରାଘବ ଚଢା ଆହୁରି ମଧ୍ୟ କହିଛନ୍ତି ଯେ ୨୮ ଦିନିଆ ରିଚାର୍ଜ ପ୍ଲାନ୍ ଏକ ପ୍ରକାରର ଠକାମି ବା ସ୍କାମ। ବର୍ଷକୁ ୧୨ଟି ମାସ ଥାଏ, କିନ୍ତୁ ଗ୍ରାହକଙ୍କୁ ବର୍ଷକରେ ୧୩ ଥର ରିଚାର୍ଜ କରିବାକୁ ପଡ଼ୁଛି। ୨୮ ଦିନକୁ ଗୋଟିଏ ମାସ ହିସାବରେ ଗଣତି କରାଯିବା ଦ୍ୱାରା ବର୍ଷକରେ ଜଣେ ଗ୍ରାହକ ଅତିରିକ୍ତ ଥରକର ଖର୍ଚ୍ଚ ବହନ କରୁଛନ୍ତି। ଟେଲିକମ୍ କମ୍ପାନୀଗୁଡିକ ରିଚାର୍ଜ ବୈଧତାକୁ କ୍ୟାଲେଣ୍ଡର ମାସ ଅର୍ଥାତ୍ ୩୦ ରୁ ୩୧ ଦିନ ଅନୁସାରେ ନିର୍ଦ୍ଧାରଣ କରିବା ଉଚିତ ବୋଲି ସେ ଦାବି କରିଛନ୍ତି। ଟେଲିକମ୍ କମ୍ପାନୀମାନେ ଗ୍ରାହକଙ୍କ ପ୍ରତି ଏକ ନ୍ୟାୟପୂର୍ଣ୍ଣ ଏବଂ ସ୍ୱଚ୍ଛ ମନୋଭାବ ରଖିବା ଆବଶ୍ୟକ। ସାଧାରଣ ନାଗରିକଙ୍କ ସ୍ୱାର୍ଥକୁ ଦୃଷ୍ଟିରେ ରଖି ଏହି ପ୍ରସଙ୍ଗରେ କଡ଼ା ନିଷ୍ପତ୍ତି ନେବା ପାଇଁ ସେ ସରକାରଙ୍କ ନିକଟରେ ଦାବି ଜଣାଇଛନ୍ତି।

ଭୁବନେଶ୍ୱର: ପାର୍ଲାମେଣ୍ଟ ବାହାରେ ବିଜେଡି ସାଂସଦଙ୍କ ଧାରଣା । ଓଡ଼ିଶାରେ ବିପର୍ଯ୍ୟସ୍ତ ଆଇନ ଶୃଙ୍ଖଳା ପରିସ୍ଥିତି ଓ ଶ୍ରୀମନ୍ଦିର ସୁରକ୍ଷା ବିପନ୍ନ ପ୍ରତିବାଦରେ ପାର୍ଲାମେଣ୍ଟ ପରିସରରେ ଥିବା ଗାନ୍ଧିମୂର୍ତ୍ତି ତଳେ ବିଜେଡି ରାଜ୍ୟସଭା ସାଂସଦଙ୍କ ନାରାବାଜି । ରାଜ୍ୟର ଆଇନଶୃଙ୍ଖଳା ବଜାୟ ରଖିବା କ୍ଷେତ୍ରରେ କ୍ଷମତାସୀନ ସରକାର ବିଫଳ ହୋଇଛନ୍ତି । ଏହାସହ ଶ୍ରୀମନ୍ଦିରକୁ ସୁରକ୍ଷା ଦେବାରେ ମଧ୍ୟ ସରକାର ବିଫଳ ହୋଇଛନ୍ତି । ତେଣୁ ରାଜ୍ୟରେ ଥିବା କ୍ଷମତାସୀନ ସରକାର ତୁରନ୍ତ ଇସ୍ତଫା ଦିଅନ୍ତୁ ବୋଲି ନାରା ଦେଇଛନ୍ତି ବିଜେଡିର ରାଜ୍ୟସଭା ସାଂସଦ ।

ଆଜି ପୂର୍ବାହ୍ନରେ ସାଂସଦ ସସ୍ମିତ ପାତ୍ର, ଦେବାଶିଷ ସାମନ୍ତରାୟ, ମାନସ ରଞ୍ଜନ ମଙ୍ଗରାଜ, ସୁଲତା ଦେଓ, ନିରଞ୍ଜନ ବିଶି ଏବଂ ସୁବାଶିଷ ଖୁଣ୍ଟିଆ ପ୍ଲାକାର୍ଡ ଧରି ପାର୍ଲାମେଣ୍ଟ ପରିସରରେ ଥିବା ଗାନ୍ଧିମୂର୍ତ୍ତି ତଳେ ନାରାବାଜି କରିଥିଲେ । ରାଜ୍ୟରେ ପ୍ରତ୍ୟେକ ଦିନ ନାରୀ ନିର୍ଯାତନା ବୃଦ୍ଧି ପାଇବାରେ ଲାଗିଛି । ହତ୍ୟା, ଚୋରି, ଲୁଣ୍ଠନ ଓ ତସ୍କରୀ ଭଳି ଘଟଣା ଉଦବେଗ ଜନକ ହୋଇଛି । ବିପର୍ଯ୍ୟସ୍ତ ଆଇନ ଶୃଙ୍ଖଳାର ସୁଯୋଗ ନେଇ ନିକଟ ଅତୀତରେ ରାଜ୍ୟସଭା ସାଂସଦ ସୁବାଶିଷ ଖୁଣ୍ଟିଆଙ୍କୁ ପୁରୀରେ ହତ୍ୟା ଧମକ ଦିଆଯାଇଥିଲା । ରାଜ୍ୟକୁ ଠିକରେ ଚଳାଇପାରୁ ନଥିବାରୁ ରାଜ୍ୟରେ କ୍ଷମତାଶୀନ ବିଜେପି ସରକାର ତୁରନ୍ତ ଇସ୍ତଫା ଦିଅନ୍ତୁ ବୋଲି ସାଂସଦମାନେ କହିଛନ୍ତି ।