ସମାଜବାଦୀ ପାର୍ଟି (ଏସପି) ର ବରିଷ୍ଠ ନେତା ଆଜମ ଖାନଙ୍କ ଅଡୁଆ ପୁଣି ବଢିଛି। ୨୦୧୯ ମସିହା ଲୋକସଭା ନିର୍ବାଚନ ପ୍ରଚାର ସମୟରେ ଜିଲ୍ଲା ପ୍ରଶାସନିକ ଅଧିକାରୀଙ୍କ ବିରୋଧରେ ବିବାଦୀୟ ବୟାନ ଦେବା ମାମଲାରେ ଉତ୍ତରପ୍ରଦେଶ ରାମପୁରର ଏକ ଏମପି-ଏମଏଲଏ (MP-MLA) କୋର୍ଟ ତାଙ୍କୁ ଦୋଷୀ ସାବ୍ୟସ୍ତ କରିଛନ୍ତି। କୋର୍ଟ ତାଙ୍କୁ ୨ ବର୍ଷର ଜେଲଦଣ୍ଡ ଶୁଣାଇବା ସହ ୫,୦୦୦ ଟଙ୍କାର ଜୋରିମାନା ଲଗାଇଛନ୍ତି।

୨୦୧୯ ମସିହାର ମାମଲା

ସୂଚନା ଅନୁଯାୟୀ, ୨୦୧୯ ଲୋକସଭା ନିର୍ବାଚନ ପ୍ରଚାର ବେଳେ ମହମ୍ମଦ ଆଜମ ଖାନ ଜିଲ୍ଲା ପ୍ରଶାସନର ଅଧିକାରୀମାନଙ୍କ ବିରୋଧରେ ଆପତ୍ତିଜନକ ତଥା ଅପମାନଜନକ ଶବ୍ଦ ବ୍ୟବହାର କରିଥିଲେ। ସେ ଏକ ଉତ୍ତେଜନାମୂଳକ ଭାଷଣ ଦେଇଥିଲେ, ଯେତେବେଳେ କି ନିର୍ବାଚନ ଆଦର୍ଶ ଆଚରଣ ବିଧି ଲାଗୁ ହୋଇସାରିଥିଲା। ଆଇନଜୀବୀ ସ୍ୱଦେଶ ଶର୍ମାଙ୍କ କହିବା ଅନୁଯାୟୀ, ସେହି ସମୟରେ ନିର୍ବାଚନ ଆୟୋଗ ତାଙ୍କ ପ୍ରଚାର ଉପରେ କଟକଣା ମଧ୍ୟ ଲଗାଇଥିଲେ ଏବଂ ସେ ଲିଖିତ କ୍ଷମା ପ୍ରାର୍ଥନା କରିବା ପରେ ମଧ୍ୟ ପୁନର୍ବାର ସମାନ ବ୍ୟବହାର ଦୋହରାଇଥିଲେ। ଯାହା ଫଳରେ ତାଙ୍କ ନାମରେ ଅପରାଧିକ ମାମଲା ରୁଜୁ ହୋଇଥିଲା।

ସାକ୍ଷୀ ଓ ପ୍ରମାଣ

ଏହି ମାମଲାଟି ପ୍ରଥମେ ସିଭିଲ୍ ଲାଇନ୍ସ ପୋଲିସ ଷ୍ଟେସନରେ ରୁଜୁ ହୋଇଥିଲା ଏବଂ ପରେ ମାନକାରା ଗାଁରେ ଘଟିଥିବା କାରଣରୁ ଭୋଟ୍ ପୋଲିସ ଷ୍ଟେସନକୁ ସ୍ଥାନାନ୍ତର କରାଯାଇଥିଲା। ତଦନ୍ତକାରୀ ଅଧିକାରୀ ଋଷି ପାଲ ସିଂହ ଏହି ମାମଲାରେ ଚାର୍ଜସିଟ୍ ଦାଖଲ କରିଥିଲେ। ଅଭିଯୋଗ ପକ୍ଷରୁ ସମୁଦାୟ ୮ ଜଣ ସାକ୍ଷୀ କୋର୍ଟରେ ହାଜର ହୋଇଥିଲେ, ଯେଉଁମାନେ ସମସ୍ତେ ସରକାରୀ ଅଧିକାରୀ ଥିଲେ। ତତ୍କାଳୀନ ଏସଡିଏମ (SDM) ଘନଶ୍ୟାମ ତ୍ରିପାଠୀ ଏହି ମାମଲା ଦାଏର କରିଥିଲେ। ପ୍ରତ୍ୟକ୍ଷଦର୍ଶୀଙ୍କ ବୟାନ ସହ ଘଟଣାର ଭିଡିଓ ଫୁଟେଜ୍ ପ୍ରମାଣ ଭାବରେ କୋର୍ଟରେ ଉପସ୍ଥାପନ କରାଯାଇଥିଲା। ଏହି ସମସ୍ତ ଦଲିଲ ଏବଂ ପ୍ରମାଣକୁ ଭିତ୍ତି କରି ନ୍ୟାୟାଳୟ ତାଙ୍କୁ ଦୋଷୀ ସାବ୍ୟସ୍ତ କରି ଦଣ୍ଡାଦେଶ ଶୁଣାଇଛନ୍ତି। ସୂଚନାଯୋଗ୍ୟ ଯେ, ଆଜମ ଖାନ ଅନ୍ୟ ମାମଲାରେ ପୂର୍ବରୁ ହିଁ ରାମପୁର ଜେଲରେ ବନ୍ଦୀ ଅଛନ୍ତି।

ସମାଜବାଦୀ ପାର୍ଟି (SP)ର ପ୍ରତିଷ୍ଠାତା ତଥା ପୂର୍ବତନ ମୁଖ୍ୟମନ୍ତ୍ରୀ ସ୍ୱର୍ଗତ ମୁଲାୟମ ସିଂହ ଯାଦବଙ୍କ ସାନ ପୁଅ ଏବଂ ଅଖିଳେଶ ଯାଦବଙ୍କ ସାବତ ଭାଇ ପ୍ରତୀକ ଯାଦବଙ୍କର ବୁଧବାର ଲକ୍ଷ୍ନୌଠାରେ ପରଲୋକ ଘଟିଛି। ମୃତ୍ୟୁ ବେଳକୁ ତାଙ୍କୁ ୩୮ ବର୍ଷ ବୟସ ହୋଇଥିଲା। ସେ ଭାରତୀୟ ଜନତା ପାର୍ଟି (BJP) ନେତ୍ରୀ ଅପର୍ଣ୍ଣା ଯାଦବଙ୍କ ସ୍ୱାମୀ ଥିଲେ। ତାଙ୍କର ଅକାଳ ବିୟୋଗ ରାଜନୈତିକ ମହଲରେ ଶୋକର ଛାୟା ଖେଳାଇ ଦେଇଛି।

ହଠାତ୍ ବିଗିଡ଼ିଲା ସ୍ୱାସ୍ଥ୍ୟବସ୍ଥା

ମିଳିଥିବା ସୂଚନା ଅନୁଯାୟୀ, ବୁଧବାର ଭୋର ପ୍ରାୟ ୫ଟା ସମୟରେ ପ୍ରତୀକଙ୍କ ସ୍ୱାସ୍ଥ୍ୟବସ୍ଥା ଅଚାନକ ବିଗିଡ଼ି ଯାଇଥିଲା। ଖବର ପାଇ ଡାକ୍ତରୀ ଦଳ ତାଙ୍କ ବାସଭବନରେ ପହଞ୍ଚିଥିଲେ। ଅବସ୍ଥା ଗୁରୁତର ଥିବାରୁ ତାଙ୍କୁ ତୁରନ୍ତ ଲକ୍ଷ୍ନୌର ସିଭିଲ୍ ହସ୍ପିଟାଲ୍କୁ ନିଆଯାଇଥିଲା, ଯେଉଁଠାରେ ସକାଳ ୫.୫୫ ମିନିଟ୍ରେ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ। ସେ ଦୀର୍ଘ ଦିନ ଧରି ଫୁସଫୁସ ଜନିତ ସମସ୍ୟାରେ ପୀଡ଼ିତ ଥିଲେ ଏବଂ ତାଙ୍କ ଫୁସଫୁସରେ ରକ୍ତ ଜମାଟ ବାନ୍ଧିଥିବାରୁ ଚିକିତ୍ସା ଚାଲିଥିଲା ବୋଲି ଜଣାପଡ଼ିଛି। ମୃତ୍ୟୁର ପ୍ରକୃତ କାରଣ ଜାଣିବା ପାଇଁ ବର୍ତ୍ତମାନ ଶବ ବ୍ୟବଚ୍ଛେଦ କରାଯାଉଛି।

ରାଜନୀତିରୁ ଦୂରରେ ଥିଲେ ପ୍ରତୀକ

ପ୍ରତୀକ ଯାଦବ ହେଉଛନ୍ତି ମୁଲାୟମ ସିଂହ ଯାଦବଙ୍କ ଦ୍ୱିତୀୟ ପତ୍ନୀ ସାଧନା ଗୁପ୍ତାଙ୍କ ପୁଅ। ରାଜ୍ୟର ଏକ ପ୍ରଭାବଶାଳୀ ରାଜନୈତିକ ପରିବାରରୁ ଆସିଥିଲେ ମଧ୍ୟ ସେ ସକ୍ରିୟ ରାଜନୀତିରୁ ନିଜକୁ ଦୂରେଇ ରଖିଥିଲେ। ଜଣେ ଫିଟନେସ୍ ପ୍ରେମୀ ଭାବରେ ସେ 'ଦି ଫିଟନେସ୍ ପ୍ଲାନେଟ୍' ନାମକ ଏକ ଜିମ୍ ଚଳାଉଥିଲେ। ଏହା ସହିତ ସେ ପ୍ରାଣୀ କଲ୍ୟାଣ ଦିଗରେ ମଧ୍ୟ କାର୍ଯ୍ୟ କରୁଥିଲେ ଏବଂ ବୁଲା କୁକୁରଙ୍କ ଉଦ୍ଧାର ତଥା ଯତ୍ନ ପାଇଁ 'ଜୀବ ଆଶ୍ରୟ' ନାମକ ଏକ ସଂସ୍ଥା ପ୍ରତିଷ୍ଠା କରିଥିଲେ। ତାଙ୍କ ପତ୍ନୀ ଅପର୍ଣ୍ଣା ଯାଦବ ବର୍ତ୍ତମାନ ଉତ୍ତରପ୍ରଦେଶ ରାଜ୍ୟ ମହିଳା କମିଶନଙ୍କ ଉପାଧ୍ୟକ୍ଷା ଭାବେ କାର୍ଯ୍ୟରତ ଅଛନ୍ତି।

ମୁଖ୍ୟମନ୍ତ୍ରୀ ଏବଂ ଆଖିଲେଶଙ୍କ ଶୋକ ପ୍ରକାଶ

ପ୍ରତୀକଙ୍କ ବିୟୋଗରେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଗଭୀର ଶୋକ ପ୍ରକାଶ କରିବା ସହ ଏହାକୁ ଅତ୍ୟନ୍ତ ଦୁଃଖଦାୟକ ବୋଲି ବର୍ଣ୍ଣନା କରିଛନ୍ତି। ସେହିପରି ସମାଜବାଦୀ ପାର୍ଟି ମୁଖ୍ୟ ତଥା ତାଙ୍କ ଭାଇ ଅଖିଳେଶ ଯାଦବ ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ (X) ରେ ଶୋକବାର୍ତ୍ତା ଦେଇ ଲେଖିଛନ୍ତି, “ଶ୍ରୀ ପ୍ରତୀକ ଯାଦବ ଜୀଙ୍କ ପରଲୋକ ଅତ୍ୟନ୍ତ ଦୁଃଖଦାୟକ। ଈଶ୍ୱର ଦିବଂଗତ ଆତ୍ମାକୁ ଶାନ୍ତି ପ୍ରଦାନ କରନ୍ତୁ। ବିନମ୍ର ଶ୍ରଦ୍ଧାଞ୍ଜଳି!”।

ଲକ୍ଷ୍ନୌ: ଉତ୍ତରପ୍ରଦେଶର ମୈନପୁରୀ ଲୋକସଭା ଆସନରୁ ସମାଜବାଦୀ ପାର୍ଟିର ପ୍ରାର୍ଥୀ ଡିମ୍ପଲ ଯାଦବ ବଡ଼ ବିଜୟ ହାସଲ କରିଛନ୍ତି । ଏହି ଆସନରେ ବିଜୟଲାଭ କରି ଶ୍ୱଶୁର ମୁଲାୟମ ସିଂ ଯାଦବଙ୍କ ସମ୍ମାନ ରଖିଛନ୍ତି ବୋହୂ ଡିମ୍ପଲ ଯାଦବ । ସମାଜବାଦୀ ପାର୍ଟି ପ୍ରତିଷ୍ଠାତା ମୁଲାୟମ ସିଂହ ଯାଦବଙ୍କ ନିଧନ ପରେ ମୈନପୁରୀରେ ହୋଇଥିବା ଉପନିର୍ବାଚନରେ ସପା ପ୍ରାର୍ଥୀ ଡିମ୍ପଲ ଯାଦବ ନୂଆ କୀର୍ତ୍ତିମାନ ବନାଇଛନ୍ତି । ସେ ୨.୮୦ ଲକ୍ଷରୁ ଅଧିକ ଭୋଟ ବ୍ୟବଧାନରେ ବିଜେପିର ରଘୁରାଜ ସିଂହ ଶାକ୍ୟଙ୍କୁ ପରାଜିତ କରିଛନ୍ତି । ଏହି ଐତିହାସିକ ବିଜୟ ସହ ଡିମ୍ପଲ ଯାଦବ ମୈନପୁରୀ ଲୋକସଭା ଆସନରୁ ପ୍ରଥମ ମହିଳା ସାଂସଦ ହୋଇଛନ୍ତି ।

ସପା ପ୍ରାର୍ଥୀ ଡିମ୍ପଲ ଯାଦବ ୬୧୭୬୨୫ ଭୋଟ ପାଇଥିବାବେଳେ ରଘୁରାଜ ସିଂ ୩୨୯୪୮୯ ଭୋଟ୍ ପାଇଛନ୍ତି। ଅର୍ଥାତ୍ ଡିମ୍ପଲ୍, ବିଜେପି ପ୍ରାର୍ଥୀଙ୍କୁ ୨୮୮୧୩୬ ଭୋଟରେ ପରାସ୍ତ କରିଛନ୍ତି। ସମାଜବାଦୀ ପାର୍ଟି ପକ୍ଷରୁ ଡିମ୍ପଲ ଯାଦବ ଓ ବିଜେପିରୁ ରଘୁରାଜ ସିଂହ ଶାକ୍ୟଙ୍କ ସହିତ ୬ ଜଣ ପ୍ରାର୍ଥୀ ନିର୍ବାଚନ ଲଢୁଥିଲେ। ଗୁରୁବାର ସକାଳ ୮ଟା ବେଳେ ଭୋଟଗଣତି ଆରମ୍ଭ ହୋଇଥିଲା। ଆରମ୍ଭରୁ ଡିମ୍ପଲ ଆଗୁଆ ଥିଲେ, ଯାହାକି ଭୋଟ ଗଣତି ଶେଷ ହେବାପରେ ବଡ ବିଜୟରେ ପରିଣତ ହୋଇଥିଲା।ପ୍ରକାଶଥାଉକି ୧୯୯୬ ପରେ ମୁଲାୟମ ସିଂହ ଯାଦବ ମୈନପୁରୀ ଲୋକସଭା ଆସନରୁ ନିର୍ବାଚନ ଲଢ଼ିଥିଲେ ଏବଂ ସେବେଠୁ ଏପର୍ଯ୍ୟନ୍ତ ସମାଜବାଦୀ ପାର୍ଟି କେବେ ବି ଏହି ଆସନରେ ପରାଜିତ ହୋଇନାହିଁ ।

ଲକ୍ଷ୍ନୌ : ଉତ୍ତର ପ୍ରଦେଶ ବିଧାନସଭା ନିର୍ବାଚନ ପୂର୍ବରୁ ବିଜେପି ଏବଂ ଯୋଗୀ ଆଦିତ୍ୟନାଥଙ୍କ ହାତ ଛାଡିଥିବା କ୍ୟାବିନେଟ ମନ୍ତ୍ରୀ ଦାରା ସିଂ ଚୌହାନ ଆଜି ସମାଜବାଦୀ ପାର୍ଟିରେ ଯୋଗ ଦେଇଛନ୍ତି। ଯୋଗୀ ଆଦିତ୍ୟନାଥ କ୍ୟାବିନେଟର ପୂର୍ବତନ ମନ୍ତ୍ରୀ ଦାରା ସିଂ ଚୌହାନ ରବିବାର ଦିନ ସମାଜବାଦୀ ପାର୍ଟିରେ ଏହାର ଜାତୀୟ ସଭାପତି ଅଖିଳେଶ ଯାଦବଙ୍କ ଉପସ୍ଥିତିରେ ଯୋଗ ଦେଇଛନ୍ତି। ସ୍ୱାମୀ ପ୍ରସାଦ ମୌର୍ଯ୍ୟ ଏବଂ ଧର୍ମ ସିଂ ସାଇନିଙ୍କ ପରେ ଦାରା ସିଂ ଚୌହାନ ହେଉଛନ୍ତି ତୃତୀୟ ମନ୍ତ୍ରୀ ଅଟନ୍ତି; ଯିଏକି ନିର୍ବାଚନ ପୂର୍ବରୁ ଭାରତୀୟ ଜନତା ପାର୍ଟି (ବିଜେପି) ଛାଡି ଅଖିଳେଶ ଯାଦବଙ୍କ ନେତୃତ୍ୱାଧୀନ ସମାଜବାଦୀ ପାର୍ଟି (ସପା)ରେ ଯୋଗ ଦେଇଛନ୍ତି।

ଅଖିଳେଶ ଯାଦବଙ୍କ ନେତୃତ୍ୱାଧୀନ ସମାଜବାଦୀ ପାର୍ଟିରେ ଯୋଗ ଦେବା ଅବସରରେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀଙ୍କ କ୍ୟାବିନେଟରେ ଜଙ୍ଗଲ ଓ ପରିବେଶ ମନ୍ତ୍ରୀ ଥିବା ଦାରା ସିଂ ଚୌହାନ କହିଛନ୍ତି ଯେ ଅଖିଳେଶଙ୍କୁ ଅଟକାଇବା ପାଇଁ ବିଜେପି ପ୍ଲାନ କରୁଛି। ଯେପରି ମହାଭାରତରେ ଅଭିମନ୍ୟୁଙ୍କୁ ଅଟକାଇବା ପାଇଁ ବଡ ବଡ ରଥୀମହାରଥି ଲାଗିପଡିଥିଲେ। ସେହିପରି ଚଳିତ ୟୁପି ବିଧାନସଭା ନିର୍ବାଚନ ପୂର୍ବରୁ ଅଖିଳେଶ ଯାଦବଙ୍କୁ ଅଟକାଇବା ପାଇଁ ବିଜେପି ଉଦ୍ୟମ କରୁଛି, କିନ୍ତୁ ବିଜେପି ତାର ଉଦ୍ୟମରେ କେବେ ସଫଳ ହେବ ନାହିଁ। କାରଣ ଅଖିଳେଶ  ସେ ସବୁକୁ ଅତିକ୍ରମ କରିସାରିଛନ୍ତି। ଏଥର ନିର୍ବାଚନରେ ବିଜେପିର ସବୁ ପ୍ଲାନ ଫେଲ ମାରିବ ଆଉ ସମାଜବାଦୀ ପାର୍ଟିର ବିଜୟ ହେବ।

ବିଜେପିକୁ ଟାର୍ଗେଟ କରି ଦାରା ସିଂ ଚୌହାନ ଆହୁରି ମଧ୍ୟ କହିଛନ୍ତି ଯେ ବିଜେପି ପଛୁଆବର୍ଗଙ୍କ ଅଧିକାରକୁ ହତ୍ୟା କରୁଛି। ସଂରକ୍ଷଣଗୁଡିକ ରଦ୍ଦ କରାଯାଉଛି । ପଛୁଆ ସମାଜର ପିଲାମାନଙ୍କୁ ସେମାନଙ୍କ ସଂରକ୍ଷଣ ସମାପ୍ତ କରି ଶିକ୍ଷାରୁ ବଞ୍ଚିତ କରିବା ପାଇଁ ଏକ ଷଡଯନ୍ତ୍ର ରଚିଛି ବିଜେପି। ଦାରା ସିଂ କହିଛନ୍ତି ଯେ ସେ ଘରକୁ ଫେରିଛନ୍ତି। ସମାଜବାଦୀ ପାର୍ଟି ହେଉଛି ତାଙ୍କର ପୁରୁଣା ଘର । ସମସ୍ତ ଦଳିତ ଏବଂ ପଛୁଆ ସମାଜର ଲୋକମାନେ ବର୍ତ୍ତମାନ ଏକତ୍ରିତ ହୋଇଛନ୍ତି। ଏହି ସୁନାମି ଆରମ୍ଭ ହୋଇଛି ଯାହା ବିଜେପିକୁ ୟୁପିରେ ବୁଡାଇବ। ଏଥର ବିଧାନସଭା ନିର୍ବାଚନରେ ​​ସମାଜବାଦୀ ପାର୍ଟି ସରକାର ଗଠନ କରିବ।

୨୦୧୭ରେ ବିଜେପି ସରକାର ‘ସବକା ସାଥ, ସବକା ବିକାଶ’ର ସ୍ଲୋଗାନ ଦେଇ ସମସ୍ତଙ୍କ ଠାରୁ ସମର୍ଥନ ନେଇଥିଲା। କିନ୍ତୁ ଦଳ କେବଳ ମାତ୍ର ଅଳ୍ପ କିଛି ଲୋକଙ୍କ ବିକାଶ ପାଇଁ କାମ କରିଥିଲା ବୋଲି ଚୌହାନ ଏସପିରେ ଯୋଗଦେବା ପରେ କହିଛନ୍ତି। ଲକ୍ଷ୍ନୌର ମଧୁବନ ନିର୍ବାଚନମଣ୍ଡଳୀର ବିଜେପି ବିଧାୟକ ଆହୁରି ଦାବି କରିଛନ୍ତି ଯେ କେବଳ ପଛୁଆ ବର୍ଗ ଏବଂ ଦଳିତମାନେ ରାଜ୍ୟ ସରକାରଙ୍କ ଉପରେ ଅସନ୍ତୁଷ୍ଟ ନୁହଁନ୍ତି, ବ୍ରାହ୍ମଣମାନେ ମଧ୍ୟ ଏଠାରେ ବିଜେପି ସରକାରରେ ସନ୍ତୁଷ୍ଟ ନୁହଁନ୍ତି। ଅନ୍ୟପକ୍ଷରେ ଏସପି ମୁଖ୍ୟ ଅଖିଳେଶ ଯାଦବ କହିଛନ୍ତି, ମୁଁ ଦାରା ସିଂ ଚୌହାନ ଏବଂ ତାଙ୍କ ସମର୍ଥକମାନଙ୍କୁ ସ୍ୱାଗତ କରୁଛି ଯେଉଁମାନେ ବହୁ ସଂଖ୍ୟାରେ ଆସିଛନ୍ତି। ସେ କହିଛନ୍ତି ଯେ ବିଜେପି ଶାସନ ଅଧୀନରେ ଦଲିତ ଏବଂ ପଛୁଆ ଲୋକମାନେ ରୋଜଗାର ପାଇନାହାଁନ୍ତି। ରାଜ୍ୟର ଯୁବକ ଓ କୃଷକମାନେ ଏକଦା ବିଜେପିକୁ ସମର୍ଥନ କରିଥିଲେ, କିନ୍ତୁ ବିଜେପି ପ୍ରତାରଣା କରିଛି। ଏଥିପାଇଁ ବିଜେପି ଏହାର ମୂଲ୍ୟ ଦେବାକୁ ପଡିବ। ବର୍ତ୍ତମାନ ପ୍ରତ୍ୟେକ ସମାଜର ଲୋକମାନେ ଏସପିଙ୍କ ସହ ଅଛନ୍ତି ବୋଲି ଅଖିଳେଶ ଯାଦବ କହିଛନ୍ତି।

ଲକ୍ଷ୍ନୌ: ସରଗରମ ହେଉଛି ଉତ୍ତର ପ୍ରଦେଶ ନିର୍ବାଚନ । ଗୁରୁବାର ଭୀମ ସେନା ମୁଖ୍ୟ ଚନ୍ଦ୍ର ଶେଖର ଆଜାଦ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବଙ୍କୁ ଭେଟିଥିଲେ । ଏହା ପରେ ଭୀମ ସେନା ସମାଜବାଦୀ ପାର୍ଟି ସହ ମେଣ୍ଟ କରିବ ବୋଲି ଚର୍ଚ୍ଚା ହେଉଥିଲା । କିନ୍ତୁ ଉତ୍ତରପ୍ରଦେଶ ନିର୍ବାଚନରେ ସମାଜବାଦୀ ପାର୍ଟି ସହ ମେଣ୍ଟ କରିବନି ଭୀମ ସେନା । ଶନିବାର ସାମ୍ବାଦିକ ସମ୍ମିଳନୀ କରି ଭୀମ ସେନା ମୁଖ୍ୟ ଚନ୍ଦ୍ର ଶେଖର ଆଜାଦ କହିଛନ୍ତି କି ତାଙ୍କ ଦଳ ଆଜାଦ ସମାଜ ପାର୍ଟି ଆସନ୍ତା ନିର୍ବାଚନରେ ଏସପି ସହ ମେଣ୍ଟ କରିବ ନାହିଁ । ସମାଜବାଦୀ ପାର୍ଟି ଦଳିତ ଭୋଟ ହାସଲ କରିବାକୁ ଚାହୁଁନି ବୋଲି କହିଛନ୍ତି ଚନ୍ଦ୍ରଶେଖର ।

ଚନ୍ଦ୍ରଶେଖର କହିଛନ୍ତି କି ଦୁଇ ଦଳ ମଧ୍ୟରେ ମେଣ୍ଟ ହେବା ନେଇ ଚର୍ଚ୍ଚା ଚାଲିଥିଲା । କିନ୍ତୁ ଶେଷ ମୁହୂର୍ତ୍ତରେ ଏହା ବିଫଳ ହୋଇଛି । ବର୍ତ୍ତମାନ ସୁଦ୍ଧା ସୁହେଲଦେବ ଭାରତୀୟ ସମାଜ ପାର୍ଟି, ନ୍ୟାସନାଲିଷ୍ଟ କଂଗ୍ରେସ ପାର୍ଟି, ରାଷ୍ଟ୍ରୀୟ ଲୋକଦଳ, ଜନବାଦୀ ପାର୍ଟି, ସମାଜବାଦୀ, ଆପନା ଦଳ- କ୍ରିଷ୍ଣା ପଟେଲ, ପ୍ରଗତିଶୀଳ ସମାଜବାଦୀ ପାର୍ଟି- ଲୋହିୟା ଓ ମହାନ ଦଳ ସହ ସମାଜବାଦୀ ପାର୍ଟି ମେଣ୍ଟ କରିସାରିଛି । ଆସନ୍ତା ଫେବ୍ରୁଆରୀ ୧୦ରୁ ମାର୍ଚ୍ଚ ୭ ମଧ୍ୟରେ ଉତ୍ତରପ୍ରଦେଶରେ ୭ ପର୍ଯ୍ୟାୟରେ ଭୋଟ ଗ୍ରହଣ କରାଯିବ ।