ସମ୍ବଲପୁର: ସମ୍ବଲପୁର କାମଲିବଜ଼ରରେ ଥିବା ଏକ କପଡା ହୋଲସେଲ ଗୋଦାମରେ ଜିଏସଟି ରେଡ୍ । ଦୀର୍ଘଦିନ ହେବ ଏହି କପଡା ହୋଲସେଲ ଦୋକାନି ଜିଏସଟି ଫାଙ୍କୁଥିବା ନେଇ ଅଭିଯୋଗ ହୋଇଥିଲା । ଆଜି ଦିନ ପ୍ରାୟ ୧୨ଟା ସମୟରେ କମଳିବଜ଼ାରରେ ଥିବା ମିତ୍ତଳ ଏଜେନସିରେ ହଠାତ ଏକ ୧୫ ଜଣିଆ ଟିମ ଚଢ଼ାଉ କରିଥିଲେ । ଏକାକାଳୀନ ଏହି ଏଜେନ୍ସିର ୫ଟି ସ୍ଥାନରେ ୧୫ ଟିମ ଚଢ଼ାଉ କରିଥିଲେ ।

ସୂଚନା ମୁତାବକ, କୋଟି କୋଟି ଟଙ୍କାର ଜିଏସଟି ଫାଙ୍କିବାର ଅଭିଯୋଗ ଆସିବା ପରେ ସିଟି ଜିଏସଟି ବିଭାଗର ବହୁ ଅଧିକାରୀ ଏହି ରେଡରେ ସାମିଲ ଥିଲେ ।

ବାରିପଦା: ମୟୁରଭଞ୍ଜ ଓ ବାଲେଶ୍ବର ଜିଲ୍ଲା ବାଣିଜ୍ୟକର ବିଭାଗ ପକ୍ଷରୁ ବାରିପଦା ସହରର ଜନୈକ ପ୍ରତିଷ୍ଠିତ ବ୍ୟବସାୟୀଙ୍କ ପ୍ରତିଷ୍ଠାନ ଉପରେ ଜିଏସଟି ଚଢ଼ାଉ ହୋଇଛି। ସହରରର ଜଣାଶୁଣା ଲୁଗା ବ୍ୟବସାୟୀ ଅମ୍ବିକା ଶାଢ଼ୀ ହାଉସର ମାଲିକଙ୍କ ଘର ସମେତ ୮ଟି ସ୍ଥାନରେ ଏକସଙ୍ଗେ ଜିଏସଟି ଚଢ଼ାଉ ଜାରି ରହିଛି ବୋଲି ମୟୂରଭଞ୍ଜ ଜିଲ୍ଲା ଜିଏସଟି ଡେପୁଟି କମିଶନର କୁଳମଣି ମଲ୍ଲିକ ସୂଚନା ଦେଇଛନ୍ତି।

ସମ୍ପୃକ୍ତ ଲୁଗା ବ୍ୟବସାୟୀଙ୍କ ବାରିପଦା ସହରରେ ଥିବା ୫ଟି ଲୁଗା ଦୋକାନ, ବାସଗୃହ, ପେଟ୍ରୋଲ ପମ୍ପ, କଲ୍ୟାଣ ମଣ୍ଡପ, ଅଟୋପାର୍ଟସ ଦୋକାନ ଆଦିରେ ଏକ ସଙ୍ଗରେ ତଦନ୍ତ ଆରମ୍ଭ ହୋଇଛି। ଏଥିରେ ମୟୁରଭଞ୍ଜ ଓ ବାଲେଶ୍ଵର ଜିଏସଟି ବିଭାଗର ଅଧିକାରୀ ଏବଂ କର୍ମଚାରୀମାନେ ନିୟୋଜିତ ହୋଇଛନ୍ତି ବୋଲି ମୟୂରଭଞ୍ଜ ଜିଲ୍ଲାର ଡେପୁଟି କମିଶନର କହିଛନ୍ତି।

ବାରିପଦା: ଜିଏସ୍‌ଟି ଠକେଇ ମାମଲାରେ ବାରିପଦା ସହରର ଦୁଇ ବ୍ୟବସାୟ ପ୍ରତିଷ୍ଠାନ ଉପରେ ଜିଏସ୍‌ଟି ଯାଞ୍ଚ ଚାଲିଛି। ଦୁଇ ବ୍ୟବସାୟ ପ୍ରତିଷ୍ଠାନ ୪ଟି ଫାର୍ମ ନାମରେ ବ୍ୟବସାୟ ଚଳାଉଥିବା ଜଣା ପଡିଛି । ସେମାନଙ୍କ ଦୋକାନ ଓ ଗୋଦାମ ଗୃହକୁ ମିଶାଇ ୭ଟି ସ୍ଥାନରେ ଏକକାଳୀନ ଯାଞ୍ଚ ଚାଲିଛି । ବାରିପଦା ସହରର ମୁଖ୍ୟ ମାର୍କେଟର ଇଲେକ୍ଟ୍ରିକ୍ ଦୋକାନ କେ କେ ଏ ରପ୍ରାଇସ୍ ଓ ଟେକ୍ନୋ ଟ୍ରେଡିଂର ଦୁଇଟି ଦୋକାନ ଏବଂ ୩ ଟି ଗୋଦାମ ଗୃହରେ ରେଡ ଚାଲିଥିବା ବେଳେ ବାରିପଦା ୱାର୍ଡ ନମ୍ବର ୯ ଉଦଳା ରୋଡ୍‌ର ଏସ୍ଏସ୍ ଇଲେକ୍ଟ୍ରିକାଲ ଦୋକାନ ଓ ଗୋଦାମ ଗୃହରେ ଏକକାଳୀନ ଚଢାଉ ଜାରି ରହିଛି । ବାଲେଶ୍ବର ସିଟି ଜିଏସ୍‌ଟି ପ୍ରବର୍ତ୍ତନ ବା ଏନ୍‌ଫୋରର୍ସମେଣ୍ଟ ୟୁନିଟର ୭ଟି ଦଳ ଏହି ଚଢାଉ ଜାରି ରଖିଛି।

ବାରିପଦା କାର୍ଯ୍ୟାଳୟର ଡେପୁଟି କମିଶନର କୁଳମଣି ମଲ୍ଲିକଙ୍କ ସୂଚନା ଅନୁସାରେ, ଚଢାଉ ସମୟରେ ବହୁ ଗୁରୁତ୍ବପୂର୍ଣ୍ଣ କାଗଜ ପତ୍ର ଜବତ କରାଯିବା ସହ ଲକ୍ଷାଧିକ ଟଙ୍କାର ଟ୍ୟାକ୍ଟ ଠକେଇ ହୋଇଥିବା ବିଭାଗ ପକ୍ଷରୁ ସୂଚନା ଦେଇଛନ୍ତି। ବିଭିନ୍ନ ନାମିଦାମୀ କମ୍ପାନୀର ବିଦ୍ୟୁତ ସାମଗ୍ରୀ ଉଭୟ ପ୍ରତିଷ୍ଠାନ ବହୁଳ ପରିମାଣରେ ଗୋଦାମ ମାନଙ୍କରେ ଗଚ୍ଛିତ ରଖିଥିବାରୁ ସେ ସବୁ ଯାଞ୍ଚ ପାଇଁ ବିଳମ୍ବ ହେଉଛି । ଯାଞ୍ଚ ପ୍ରକ୍ରିୟା ସରିଲେ ଉଭୟ ବ୍ୟବସାୟୀ କେତେ ପରିମାଣ ଟ୍ୟାକ୍ସ ଫାଙ୍କି ଛନ୍ତି ଜଣାପଡିବ । ତଦନୁସାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଶ୍ରୀ ମଲ୍ଲିକ କହିଛନ୍ତି ।

ଠାକୁରମୁଣ୍ଡା: ମୟୁରଭଞ୍ଜ ଜିଲ୍ଲା ଠାକୁରମୁଣ୍ଡା ବଜାରରେ ଶୁକ୍ରବାର ଦିନ ସିଟି ଏଣ୍ଡ ଜିଏସଟି ବିଭାଗ ପକ୍ଷରୁ ୫ଟି ବ୍ୟବସାୟିକ ପ୍ରତିଷ୍ଠାନ ଉପରେ ଚଢ଼ାଉ କରାଯାଇଛି। ବାଲେଶ୍ୱର ଜିଏସଟି ଡେପୁଟି କମିଶନର କୁଳମଣି ମଲ୍ଲିକଙ୍କ ନେତୃତ୍ୱରେ ବାଲେଶ୍ଵର ଓ ବାରିପଦା ଜିଏସଟି ବିଭାଗ ର କର୍ମଚାରୀମାନେ ଚଢ଼ାଉରେ ସାମିଲ ଥିଲେ। ସୁରକ୍ଷା ଦୃଷ୍ଟିରୁ ଚଢ଼ାଉ ସମୟରେ ପୁଲିସ ଫୋର୍ସ ମୃତୟନ ଥିଲେ। ଠାକୁରମୁଣ୍ଡାରେ ଥିବା ନ୍ୟୁ ଫେସନ ପ୍ଳାଜା, ବୋଲବମ ଷ୍ଟୋର, ବୋଲବମ ଏଣ୍ଟରପ୍ରାଇଜ, ଶିବଶକ୍ତି ହାର୍ଡ ଓ୍ବୋୟାର ଏଣ୍ଡ ଫୋର୍ନିଚର, ସାଇରାମ ହାର୍ଡ ଓ୍ବୋୟାର ବ୍ୟବସାୟୀ ପ୍ରତିଷ୍ଠାନ ଓ ଗୋଦାମ ଗୃହ ଉପରେ ଦିନ ୧୨ ଟା ଠାରୁ ରାତି ପର୍ଯ୍ଯନ୍ତ ଚଢ଼ାଉ ଜାରି ରହିଛି।

ଚଢ଼ାଉ ସମ୍ପର୍କରେ ଜିଏଟି ଡେପୁଟି କମିଶନର କୁଳମଣି ମଲ୍ଲିକ କହିଛନ୍ତି ଯେ, ଏ ସମସ୍ତ ବ୍ୟବସାୟିକ ପ୍ରତିଷ୍ଠାନ ଗୁଡିକ ଉପରେ ପୂର୍ବରୁ ଟିକସ ଫାଙ୍କି ନେଇ ଅଭିଯୋଗ ରହିଥିଲା। ୨୦୧୭ ମସିହା ଠାରୁ ଆଜି ପର୍ଯ୍ଯନ୍ତ ପ୍ରତିଷ୍ଠାନ ଗୁଡିକ ର ସମସ୍ତ କାଗଜପତ୍ର ଯାଞ୍ଚ କରାଯାଉଛି। ଯାଞ୍ଚ ପରେ କେତେ ଟଙ୍କାର ଟିକସ ଫାଙ୍କି ହୋଇଛି ତାହା ଜଣାପଡିବ।ଜିଏସଟି ଚଢ଼ାଉ ଦେଖି ଠାକୁରମୁଣ୍ଡା ବଜାରର ଅନେକ ଦୋକାନ ବନ୍ଦ ହୋଇଯାଇଥିଲା।

ବାରିପଦା: ଟିକସ ଫାଙ୍କିବା ଅଭିଯୋଗରେ ଦୁଇ ଗୋଟି ଟ୍ରକ୍‌କୁ ଦୁଇ କୋଟିରୁ ଉର୍ଦ୍ଧ୍ବ ଟଙ୍କାର ଜୋରିମାନା କରିଛନ୍ତି ସେଣ୍ଟ୍ରାଲ ଏକ୍ସସାଇଜ ଓ ଜିଏସ୍‌ଟି ଟିମ। ସୂଚନା ଅନୁଯାୟୀ, ଦିଲ୍ଲୀରୁ ଭୁବନେଶ୍ୱର ଅଭିମୁଖେ ଗୁଟକା ଓ ପାନ ମସଲା ଆଦି ବୋଝେଇ କରି ଯାଉଥିଲା ଉକ୍ତ ଟ୍ରକ ଦ୍ୱୟ। ବିଶ୍ୱସ୍ତସୂତ୍ରରୁ ଖବର ପାଇ ବାରିପଦା ଓ ରାଉରକେଲା ସେଣ୍ଟ୍ରାଲ ଏକ୍ସସାଇଜ ଓ ଜିଏସ୍‌ଟି ବିଭାଗର ଏକ ସତନ୍ତ୍ର ୧୦ଜଣିଆ ଟିମ ମାଡି ବସିଥିଲେ। ଉକ୍ତ ୨ ଟ୍ରକ୍‌କୁ ଅଟକ ରଖିବା ସହ ଜରିମାନା ନେଇ ନିର୍ଦ୍ଦେଶ ଦେଇଛନ୍ତି।

ଜିଲ୍ଲାର ୧୮ ନଂ ଜାତୀୟ ରାଜପଥର କୁଲିଅଣା ଟୋଲ ପ୍ଲାଜା ନିକଟରେ ଦୁଇଟି ଟ୍ରକକୁ ଜବତ କରାଯାଇଛି। ବାରିପଦା ସ୍ଥିତ କାର୍ଯ୍ୟାଳୟକୁ ଆଣିବା ସହ ତଦନ୍ତ ପ୍ରକ୍ରିୟା ଆରମ୍ଭ କରିଥିଲେ। ଟ୍ରକ୍ ଦୁଇଟିରେ ପ୍ରାୟ ୬ଶହରୁ ଊର୍ଦ୍ଧ୍ୱ ପେଟି ପାନ ମସଲା ଥିବା ବେଳେ ସେମାନଙ୍କର କାଗଜପତ୍ର ଯାଞ୍ଚ ବେଳେ କେନ୍ଦ୍ରୀୟ ଟିକସ ଦିଆଯାଇ ନ ଥିବା ଜଣାପଡିଥିଲା। ଏହାପରେ ଜିଏସ୍‌ଟି ବିଭାଗ ପକ୍ଷରୁ ଦୁଇ କୋଟିରୁ ଉର୍ଦ୍ଧ୍ବ ଟଙ୍କା ଜରିମାନା ନିର୍ଦ୍ଦେଶ ଦିଆଯାଇଛି। ତେବେ ଏହି ଟ୍ରକ୍‌ ଦ୍ୱୟ ପ୍ରକୃତରେ କେଉଁ ଠାରୁ ଆସି କେଉଁ ମାଲିକ ପାଖକୁ ଯାଉଥିଲା ତାର ପ୍ରକୃତ ତଦନ୍ତ ଚାଲୁଥିବା କେନ୍ଦ୍ରୀୟ ଜିଏସ୍‌ଟି ବିଭାଗ ପକ୍ଷରୁ କୁହାଯାଇଛି। ତଦନ୍ତ ସମ୍ପୂର୍ଣ୍ଣ ହେବା ପରେ ସବିଶେଷ ତଥ୍ୟ ପ୍ରଦାନ କରାଯାଇ ପାରିବ ବୋଲି ବିଭାଗୀୟ ଅଧିକାରୀ କହିଛନ୍ତି

ଭୁବନେଶ୍ୱର: ପଦମପୁର ଉପନିର୍ବାଚନକୁ ନେଇ ବିଜେଡିର ପ୍ରେସମିଟ୍ । ଜିଏସଟି ରେଡ୍ ବେଳେ ବିଜେପି ଦ୍ୱାରା ହୋଇଥିବା ଆକ୍ରମଣକୁ ନିନ୍ଦା କରିଛି ବିଜେଡି । ବିଜେଡି ସାଂସଦ ସସ୍ମିତ ପାତ୍ର, ଗୌତମବୁଦ୍ଧ ଦାସ, ଇପ୍ସିତା ସାହୁ ପ୍ରେସମିଟ୍ କରି ବିଜେପିକୁ ଭର୍ତ୍ସନା କରିଛନ୍ତି । ସସ୍ମିତ କହିଛନ୍ତି ପଦମପୁରରେ ହିଂସା ରଚୁଛି ବିଜେପି । ଜିଏସଟି ରେଡ୍ ବେଳେ ସରକାରୀ ଅଧିକାରୀଙ୍କୁ ଆକ୍ରମଣ ନିନ୍ଦନୀୟ । ମହିଳା କର୍ମଚାରୀଙ୍କୁ ବି ଛାଡିଲେନି ଦୁର୍ବ୍ୟବହାର କଲେ ବିଜେପି କର୍ମୀ ।

ଓଡ଼ିଶା ଭଳି ଶାନ୍ତି ପ୍ରିୟ ରାଜ୍ୟରେ ଏପରି ଗୁଣ୍ଡାଗର୍ଦ୍ଦି ବରଦାସ୍ତ କରାଯିବନି । ସିଇଓଙ୍କ ନିକଟରେ ଦାବି କରୁଛୁ ଯେ ସେ ତୁରନ୍ତ ଏହା ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରନ୍ତୁ । ଏଥିସହିତ ଠାକୁର ରଞ୍ଜିତ ଦାସଙ୍କୁ ପ୍ରଚାରରୁ ବ୍ୟାନ କରାଯାଉ ଏବଂ ବିଜେପି ନେତ୍ରୀ ପିଙ୍କି ପ୍ରଧାନଙ୍କୁ କ୍ୟାମ୍ପେନ କରିବାକୁ ନଦିଆଯାଉ ବୋଲି ଦାବି କରିଛି ବିଜେଡି । ପ୍ରାଚର ବେଳେ ଏମାନେ ବିଜେପି କର୍ମୀଙ୍କ ସହ ହିଂସା ରଚୁଛନ୍ତି ।

ସେହିପରି କାଳନ୍ଦୀ ସାମଲ ଓ କୁସୁମ ଟେଟେଙ୍କୁ ମଧ୍ୟ କ୍ୟାମ୍ପେନରୁ ବାଦ୍ ପାଇଁ ଦାବି କରାଯାଇଛି । ଆଇଟି ରେଡକୁ ବିଜେଡି ନେତା ଓ କର୍ମୀ ସମ୍ମନା ଦେଇଥିବା ବେଳେ ଜିଏସଟି ରେଡ୍ ବେଳେ ବିଜେପି କର୍ମୀ ଓ ନେତା ବାଧା ଦେବା ସହ ଗୁଣ୍ଡାଗର୍ଦ୍ଦି କାହିଁକି କଲେ? ଜିଏସଟି ରେଡକୁ କାହିଁକି ବିରୋଧ? କାହିଁକି ରେଡ୍ ବେଳେ ଅଧିକାରୀଙ୍କଠୁ କାଗଜ ଛଡ଼ାଇଲେ ବୋଲି ପ୍ରଶ୍ନ କରିଛି ବିଜେଡି ।

ସସ୍ମିତ ପାତ୍ର କହିଛନ୍ତି, ଗତକାଲି ବିଜେପି କର୍ମୀ ଟଙ୍କା ବାଣ୍ଟିବା ବେଳେ ଧରାପଡ଼ିବା ପରେ କିଡନାପ ଥିଓରୀ ରଚିଥିଲେ । ବିଜେଡିକୁ ବଦନାମ କରିବା ପାଇଁ କିଡନାମ କରାଯାଇଥିବା ଅଭିଯୋଗ କରିଥିଲା ବିଜେପି । ହେଲେ ନିଜେ ଉକ୍ତ କର୍ମୀ ମାନିଛନ୍ତି ଯେ ଟଙ୍କା ବାଣ୍ଟିବା ବେଳେ ଧରାପଡ଼ିବା ପରେ ସେ ଏପରି ଥିଓରୀ ରଚିଥିଲେ । ଏପରି ରାଜନୀତି ବନ୍ଦ କରିବାକୁ ସସ୍ମିତ କହିଛନ୍ତି ।

ହାରିବା ଭୟରେ ବିଳିବିଳେଇ ହୋଇ ବିଜେପି ହିଂସାତ୍ମକ ପନ୍ଥା ଆପଣେଇଛି । ପଦମପୁରବାସୀ ଏହାର ଜବାବ ୫ ତାରିଖରେ ଦେବେ । ଗତକାଲି ଜିଏସଟି ରେଡ୍ ବେଳେ ବିଜେପି ବିଧାୟିକା କୁସୁମ ଟେଟେ ଗୁଣ୍ଡାଗର୍ଦ୍ଦି କରିଥିଲେ । ଶହେ କର୍ମୀଙ୍କୁ ନେଇ ଜିଏସଟି ରେଡ୍ ବେଳେ ଧମକାଇଥିଲେ । ଗୋବର୍ଦ୍ଧନ ଅଗ୍ରୱାଲଙ୍କ ଘରେ ପଶି GST ଅଧିକାରୀଙ୍କୁ ବାରଣ କରିଥିଲେ ।

ପଦ୍ମପୁର: ପଦ୍ମପୁରରେ ଆସନ୍ନ ପରାଜୟ ଭୟରେ ରକ୍ତମୁଖା ହୋଇଛି ଭାରତୀୟ ଜନତା ପାର୍ଟି । ଦଳର ନେତାଙ୍କ ହତାଶା ସେମାନଙ୍କ ଆଚରଣରେ ପ୍ରତିଫଳିତ ହୋଇଛି । ସୋମବାର ସନ୍ଧ୍ୟାରେ ଟିକସ ଫାଙ୍କି ଅଭିଯୋଗରେ ଜିଏସ୍‌ଟି ପକ୍ଷରୁ ବିଭିନ୍ନ ସ୍ଥାନରେ ଚଢ଼ଉ ଚାଲିଥିବା ସମୟରେ ଭୁବନେଶ୍ୱରରୁ ଆମଦାନୀ ବିଜେପି ନେତାମାନେ ଯେପରି ଉଚ୍ଛୃଙ୍ଖଳ କାର୍ଯ୍ୟ କରିଛନ୍ତି ସେଥିରୁ ଦଳର ଆଭିମୁଖ୍ୟ ସ୍ପଷ୍ଟ ହୋଇ ଯାଇଛି ।

ମିଳିଥିବା ସୂଚନା ଅନୁସାରେ ଆଜି ପଦ୍ମପୁର ଭେଉଁରିଆ ଛକଠାରେ ସୁନୀଲ ଅଗ୍ରୱାଲ ନାମକ ଜଣେ ବ୍ୟକ୍ତିଙ୍କ ଜଗଦମ୍ବା କ୍ଲଥ୍‌ ଷ୍ଟୋରରେ ଜିଏସ୍‌ଟି ଯାଞ୍ଚ ପାଇଁ ଅଧିକାରୀମାନେ ପହଞ୍ଚିଥିବା ବେଳେ ବିଜେପି ଯୁବ ନେତା ଠାକୁର ରଣଜିତ୍‌, ପିଙ୍କି ପ୍ରଧାନ, କାଳନ୍ଦୀ ସାମଲ ପ୍ରମୁଖ ଏହାର ବିରୋଧ କରିଥିଲେ । ଜିଏସ୍‌ଟି ଅଧିକାରୀମାନଙ୍କ କାର୍ଯ୍ୟରେ ବାଧା ଦେବା ସହ ସେମାନଙ୍କ ସହ ପାଟିତୁଣ୍ଡ କରିଥିଲେ । ମାତ୍ର ଏହା ଏକ ସରକାରୀ କାର୍ଯ୍ୟ ଓ ନିର୍ଦ୍ଦିଷ୍ଟ ଅଭିଯୋଗ ଆଧାର ରେ ଏହି ଚଢ଼ଉ କରାଯାଇଥିବା ନେଇ ଅଧିକାରୀମାନେ ବୁଝାଇବାକୁ ଚେଷ୍ଟା କରିଥିଲେ ମଧ୍ୟ ବିଜେପି ନେତାମାନେ ଏହାକୁ ବୁଝିବାକୁ ପ୍ରସ୍ତୁତ ନ ଥିଲେ ।

ଘଟଣା କେବଳ ଏଇଠାରେ ଶେଷ ହୋଇ ନ ଥିଲା । ସୁନୀଲଙ୍କ ବ୍ୟବସାୟିକ ପ୍ରତିଷ୍ଠାନରେ ଚଢ଼ଉ ହେଉଥିବା ସମ୍ପର୍କରେ ବିଜେପି ନେତାମାନେ ସ୍ଥାନୀୟ ଅଞ୍ଚଳର ବିଜେପି କର୍ମୀମାନଙ୍କୁ ସୂଚନା ଦେଇ ଘଟଣାସ୍ଥଳକୁ ଡ଼ାକିଥିଲେ । ଏପରିକି ତଦନ୍ତ କାର୍ଯ୍ୟରେ ନିୟୋଜିତ ଜଣେ କାର୍ଯ୍ୟରତ ମହିଳା ଅଧିକାରୀଙ୍କୁ ବିଜେପି କର୍ମୀମାନେ ରାସ୍ତାରେ ଗୋଡେ଼ଇ ଗୋଡେ଼ଇ ପିଟିବାକୁ ଦେଖାଯାଇଛି । ଜଣେ ମହିଳା ଓ ସରକାରୀ କର୍ମଚାରୀଙ୍କୁ ପିଟିବା ସହ ଯେପରି ବିଜେପି କର୍ମୀମାନେ ଅଶାଳୀନ ଆଚରଣ ପ୍ରଦର୍ଶନ କରିଛନ୍ତି, ତାକୁ ନେଇ ବିଭିନ୍ନ ମହଲରେ ତୀବ୍ର ପ୍ରତିକ୍ରିୟା ସୃଷ୍ଟି ହୋଇଛି । ସୁନୀଲ ଅଗ୍ରୱାଲ, ତାଙ୍କର ସମ୍ପର୍କୀୟ ଓମ୍‌ପ୍ରକାଶ ଅଗ୍ରୱାଲ, ଗୋବର୍ଦ୍ଧନ ଅଗ୍ରୱାଲ ସୁରେଶ ଅଗ୍ରୱାଲ, ରାଜେଶ ସାହୁ ନାମକ ବ୍ୟକ୍ତିମାନଙ୍କର ବ୍ୟବସାୟିକ ପ୍ରତିଷ୍ଠାନରେ ବିପୁଳ ଟିକସ ଫାଙ୍କି ହୋଇଥିବା ଅଭିଯୋଗ ହୋଇଥିଲା । ଏହି ଅଭିଯୋଗ ଆଧାରରେ ଚଢ଼ଉ ପାଇଁ ଯାଇଥିବା ଅଧିକାରୀଙ୍କୁ ବିଜେପି ବିରୋଧ କରିବା ଓ ଅଭିଯୁକ୍ତଙ୍କୁ ସୁରକ୍ଷା ଦେବା ପଛରେ କେଉଁ ରହସ୍ୟ ରହିଛି ତାକୁ ନେଇ ପ୍ରଶ୍ନ ଉଠିଛି ।

ଆଜି ସକାଳୁ ଆୟକର ବିଭାଗ ପକ୍ଷରୁ ୩ ଜଣ ବିଜେଡି ନେତାଙ୍କ ଘର, ଚାଉଳକଳରେ ଚଢ଼ଉ କରାଯାଇଥିଲା । ସଶସ୍ତ୍ର ପୁଲିସ ଉପସ୍ଥିତିରେ ଏହି ଚଢ଼ଉ ହୋଇଥିଲା, ମାତ୍ର ଘଟଣାସ୍ଥଳରେ ଜଣେ ବି ବିଜେଡି କର୍ମୀଙ୍କୁ ଦେଖିବାକୁ ମିଳି ନ ଥିଲା । ଆୟକର ଅଧିକାରୀମାନେ ବିନା ପ୍ରତିରୋଧରେ ସେମାନଙ୍କ କାର୍ଯ୍ୟ କରିଥିଲେ ଏବଂ ବିଜେଡି ନେତାଙ୍କ ପରିବାରର ଲୋକମାନେ ଏ କ୍ଷେତ୍ରରେ ସେମାନଙ୍କୁ ପୂର୍ଣ୍ଣ ସହଯୋଗ କରିଥିଲେ । ମାତ୍ର ବିଜେପି ସହ ସମ୍ପୃକ୍ତ କୁହାଯାଉଥିବା ବ୍ୟବସାୟୀଙ୍କ ବ୍ୟବସାୟିକ ପ୍ରତିଷ୍ଠାନ ଉପରେ ଚଢ଼ଉ ବେଳେ ଦଳୀୟ ନେତା ଯେପରି ଆଚରଣ ପ୍ରଦର୍ଶନ କରିଛନ୍ତି, ଅଧିକାରୀଙ୍କୁ ଆକ୍ରମଣ କରିଛନ୍ତି ତାହାକୁ ନେଇ ବିଭିନ୍ନ ମହଲରେ ବିସ୍ମୟ ସୃଷ୍ଟି କରିଛି । ବିଜେପି କାହିଁକି ଏପରି ଆଚରଣ କରୁଛି ତାହାକୁ ନେଇ ମଧ୍ୟ ସାଧାରଣ ଲୋକ ବି ପ୍ରଶ୍ନ କରିବା ଆରମ୍ଭ କରିଛନ୍ତି ।

ବରଗଡ଼: ଜିଏସଟି ଫାଙ୍କି ଅଭିଯୋଗରେ ୬ଟି ସ୍ଥାନରେ ଜିଏସଟି ବିଭାଗ ପକ୍ଷରୁ ଚଢାଉ କରାଯାଇଛି। ବରଗଡ଼, ପଦମପୁର, ପାଇକମାଳ, ବରେଇକେଲରେ ଚଢ଼ାଉ ଜାରି ରହିଛି। ପଦମପୁର ଗୋବର୍ଦ୍ଧନ ଅଗ୍ରୱାଲଙ୍କ ଘରେ ଚାଲିଛି ରେଡ୍। ଗୋବର୍ଦ୍ଧନଙ୍କ ପାଇକମାଳ ସ୍ଥିତ ପେଟ୍ରୋଲ ପମ୍ପ ଓ ପାଇକମାଳ ନୃସିଂହ ମେଡିକାଲ ଷ୍ଟୋରରେ ମଧ୍ୟ ରେଡ୍ । ସୁନୀଲ ଅଗ୍ରୱାଲଙ୍କ ପଦମପୁର ଜଗଦମ୍ବା କ୍ଲଥ ଷ୍ଟୋରରେ ରେଡ୍ । ବରଗଡ଼ ସହରରେ ଥିବା ସୁନୀଲଙ୍କ ଘରେ ମଧ୍ୟ ରେଡ୍ ହୋଇଛି । ଗୋବର୍ଦ୍ଧନ ଅଗ୍ରୱାଲଙ୍କ ପୁତୁରା ହେୁଛନ୍ତି ସୁନୀଲ । ରାଜେଶ ସାହୁଙ୍କ ବରେଇକେଲ ଗ୍ୟାସ ଏଜେନ୍ସିରେ ଚଢ଼ାଉ । ରାଜ୍ୟ ଜିଏସଟି ଅଧିକାରୀମାନେ ଚଢ଼ାଉରେ ସାମିଲ ଅଛନ୍ତି । ଏହି ସବୁ ସ୍ଥାନରେ ଜିଏସଟି ଅଧିକାରୀ ତଦନ୍ତ କରୁଛନ୍ତି ।

ରାଉରକେଲା: ରାଉରକେଲାରେ କେନ୍ଦ୍ରୀୟ ଜିଏସଟି ବିଭାଗ ପକ୍ଷରୁ ଚଢ଼ାଉ ହୋଇଛି। କୁଆଁରମୁଣ୍ଡା ଅଞ୍ଚଳରେ ଥିବା ଟପ୍‌ ଟେକ୍‌ ଷ୍ଟିଲ ପ୍ରାଇଭେଟ ଲିମିଟେଡ କାରଖାନାରେ ଜିଏସଟି ବିଭାଗର ଚଢ଼ାଉ କରିଛି । ୧୦ କୋଟିରୁ ଅଧିକ ଟଙ୍କାର ଜିଏସଟି ଫାଙ୍କିବା ଅଭିଯୋଗ ଚାଲିଛି ରେଡ୍ । ଏହି କମ୍ପାନୀର ଦୁଇ ନିର୍ଦ୍ଦେଶକ ଶ୍ୟାମ ବିହାରୀ ପ୍ରସାଦ ଓ ଅନିଲ ପାଣ୍ଡେଙ୍କ ସିଭିଲ ଟାଉନସିପ ବାସଭବନ ଓ କାର୍ଯ୍ଯାଳୟରେ ଜାରି ରହିଛି ଚଢ଼ାଉ । ରାଉରକେଲା ଡିଡିଜିଆଇ ସ୍ୱତନ୍ତ୍ର ଟିମ୍ ପଷରୁ ଚଢ଼ାଉ । ଏହି ରେଡ୍ ସମୟରେ ବହୁ ଗୁରୁତ୍ୱପୂର୍ଣ୍ଣ କାଗଜପତ୍ର ଓ ହାର୍ଡଡିସ୍କ ଜବତ ହୋଇଛି । ତେବେ ଏହି ରେଡରେ କେତେଜଣ ଅଫିସର ସାମିଲ ହୋଇଛନ୍ତି ତା’ର ସୂଚନା ଏପର୍ଯ୍ଯନ୍ତ ମିଳିପାରିନାହିଁ ।

ଭୁବନେଶ୍ୱର: ଭାରତ ମୋଟର୍ସର ବିଭିନ୍ନ ବ୍ରାଞ୍ଚରେ ଜିଏସ୍‌ଟି ଚଢାଉ। ଜିଏସ୍‌ଟିର ପାଞ୍ଚ ଜଣିଆ ଟିମ୍‌ ଏହି ଚଢାଉରେ ସାମିଲ ହୋଇଛନ୍ତି । ଭୁବନେଶ୍ୱର ମଞ୍ଚେଶ୍ୱର, ପାହାଳ, କଟକ ରୋଡ଼ରେ ଚଢ଼ାଉ ଜାରି ରହିଛି।

ସୂଚନା ଅନୁଯାୟୀ, ୨୦୦୮ରୁ ୨୦୧୭ ମଧ୍ୟରେ ଭାରତ ମୋଟର୍ସ ଫାଙ୍କିଥିଲା ଟ୍ୟାକ୍ସ। ଯାହାକୁ ନେଇ ୨୦୧୭ରେ ଭାରତ ମୋଟର୍ସକୁ ୧୧ କୋଟି ୯ ଲକ୍ଷ ଟଙ୍କା ଫାଇନ୍‌ କରିଥିଲା ଜିଏସ୍‌ଟି । ଦାଖଲ ପାଇଁ ବିଭାଗ ପକ୍ଷରୁ ନିର୍ଦ୍ଦେଶ ମଧ୍ୟ ଥିଲେ । ହେଲେ ଏବେ ସୁଦ୍ଧା ସଂସ୍ଥା ପକ୍ଷରୁ ଫାଇନ୍‌ ଅର୍ଥ ଦାଖଲ ହୋଇ ନ ଥିଲା । ବର୍ତ୍ତମାନ ସୁଦ୍ଧା ମୂଳ ଓ ସୁଧ ମିଶି ୩୮ କୋଟି ହେଲାଣି । ଶେଷରେ ଆଜି ଜିଏସ୍‌ଟିର ୫ଟିମ୍‌ ବିଭିନ୍ନ ସ୍ଥାନରେ ଚଢାଉ ଜାରି ରଖିଛି । ଏହି ଚଢାଉରେ ୩୦ ଜଣ ଅଧିକାରୀ ସାମିଲ ଥିବା ସୂଚନା ମିଳିଛି ।  ଚଢାଉରେ ଅନେକ ଗୁରୁତ୍ୱପୂର୍ଣ୍ଣ କାଗଜପତ୍ର ମିଳିଥିବା ସୂଚନା ମିଳିଛି।