ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମେନେଇଙ୍କ ମୃତ୍ୟୁ ପରେ ପାକିସ୍ତାନରେ ପରିସ୍ଥିତି ଅଣାୟତ୍ତ ହୋଇପଡ଼ିଛି। ଆମେରିକା ଏବଂ ଇସ୍ରାଏଲର ଏୟାର ଷ୍ଟ୍ରାଇକରେ ଖାମେନେଇଙ୍କ ମୃତ୍ୟୁ ଖବର ପ୍ରଚାରିତ ହେବା ପରେ ପାକିସ୍ତାନର ବିଭିନ୍ନ ସ୍ଥାନରେ ଉତ୍ତେଜନା ଦେଖାଦେଇଛି। ବିଶେଷକରି କରାଚି ସ୍ଥିତ ଆମେରିକା ବାଣିଜ୍ୟ ଦୂତାବାସ (US Consulate) ବାହାରେ ବିକ୍ଷୋଭକାରୀ ଏବଂ ସୁରକ୍ଷାକର୍ମୀଙ୍କ ମଧ୍ୟରେ ହୋଇଥିବା ରକ୍ତାକ୍ତ ସଂଘର୍ଷରେ ଅନ୍ୟୂନ ୨୩ ଜଣଙ୍କର ମୃତ୍ୟୁ ଘଟିଥିବା ରିପୋର୍ଟ ମିଳିଛି।

କରାଚିରେ ରକ୍ତାକ୍ତ ସଂଘର୍ଷ

ରବିବାର ଦିନ ଶତାଧିକ ଉତ୍ତ୍ୟକ୍ତ ବିକ୍ଷୋଭକାରୀ କରାଚିର ହାଇ-ସିକ୍ୟୁରିଟି ଜୋନରେ ଥିବା ଆମେରିକା ବାଣିଜ୍ୟ ଦୂତାବାସ ଆଡ଼କୁ ଅଗ୍ରସର ହୋଇଥିଲେ। ବିକ୍ଷୋଭକାରୀମାନେ ଦୂତାବାସର ବାହ୍ୟ ପାଚେରୀ ଭାଙ୍ଗିବାକୁ ଚେଷ୍ଟା କରିବା ସହ ପୋଲିସ ଉପରକୁ ପଥରମାଡ଼ କରିଥିଲେ। ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ପୋଲିସ ଲୁହ ବୁହା ଗ୍ୟାସ ଏବଂ ଗୁଳି ଚାଳନା କରିଥିଲା। ରିପୋର୍ଟ ଅନୁଯାୟୀ, ଦୂତାବାସର ସୁରକ୍ଷା ଦାୟିତ୍ୱରେ ଥିବା ଆମେରିକୀୟ ସୁରକ୍ଷାକର୍ମୀମାନେ ମଧ୍ୟ ଭିଡ଼କୁ ଘଉଡ଼ାଇବା ପାଇଁ ଗୁଳି ଚଳାଇଥିବା କୁହାଯାଉଛି। ଏହି ଘଟଣାରେ ବହୁ ସଂଖ୍ୟାରେ ଲୋକ ଆହତ ହୋଇଛନ୍ତି ଏବଂ ସେମାନଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି।

ଦେଶବ୍ୟାପୀ ବ୍ୟାପିଲା ହିଂସା

କେବଳ କରାଚି ନୁହେଁ, ପାକିସ୍ତାନର ଅନ୍ୟାନ୍ୟ ସହରରେ ମଧ୍ୟ ହିଂସାତ୍ମକ ପରିସ୍ଥିତି ସୃଷ୍ଟି ହୋଇଛି। ଉତ୍ତର ପାକିସ୍ତାନର ସ୍କାର୍ଦୁ (Skardu) ଅଞ୍ଚଳରେ ବିକ୍ଷୋଭକାରୀମାନେ ଏକ ଜାତିସଂଘ (UN) କାର୍ଯ୍ୟାଳୟରେ ନିଆଁ ଲଗାଇ ଦେଇଛନ୍ତି। ଇସଲାମାବାଦ ଏବଂ ଲାହୋରରେ ମଧ୍ୟ ଆମେରିକା ବିରୋଧୀ ସ୍ଲୋଗାନ ଦେଇ ହଜାର ହଜାର ଲୋକ ରାସ୍ତାକୁ ଓହ୍ଲାଇଛନ୍ତି। ବିକ୍ଷୋଭକାରୀମାନେ ଇରାନ ସପକ୍ଷରେ ଏବଂ ଆମେରିକା-ଇସ୍ରାଏଲ ବିରୋଧରେ ନାରାବାଜି କରିବା ସହ ଅନେକ ସରକାରୀ ସମ୍ପତ୍ତି ନଷ୍ଟ କରିଛନ୍ତି।

ସରକାରଙ୍କ ପ୍ରତିକ୍ରିୟା

ପାକିସ୍ତାନ ସରକାର ଏହି ଘଟଣାକୁ ଗମ୍ଭୀରତାର ସହ ଗ୍ରହଣ କରିଛନ୍ତି। ଆଭ୍ୟନ୍ତରୀଣ ମନ୍ତ୍ରୀ ମୋହସିନ ନକଭି ଶାନ୍ତି ବଜାୟ ରଖିବାକୁ ଜନସାଧାରଣଙ୍କୁ ନିବେଦନ କରିଛନ୍ତି। ସେ କହିଛନ୍ତି ଯେ ଖାମେନେଇଙ୍କ ମୃତ୍ୟୁରେ ପାକିସ୍ତାନୀମାନେ ମଧ୍ୟ ଦୁଃଖିତ, କିନ୍ତୁ ଆଇନକୁ ହାତକୁ ନେବା ଉଚିତ ନୁହେଁ। ବର୍ତ୍ତମାନ ସମ୍ବେଦନଶୀଳ ଅଞ୍ଚଳଗୁଡ଼ିକରେ ଅତିରିକ୍ତ ପୋଲିସ ଓ ସେନା ମୁତୟନ କରାଯାଇଛି।

କରାଚୀ: ବିସ୍ଫୋରଣରେ ଥରିଲା ପାକିସ୍ତାନ । କରାଚିର ଶେରଶାହ ପାରାଚା ଚୌକ୍ ଅଞ୍ଚଳରେ ଶନିବାର ଅପରାହ୍ନରେ ଏକ ଭୟଙ୍କର ବିସ୍ଫୋରଣ ଘଟିଛି । ଏହି ବିସ୍ଫୋରଣରେ ୧୧ ଜଣଙ୍କ ମୃତ୍ୟୁ ହୋଇଥିବାବେଳେ ୧୨ ଜଣଙ୍କୁ ଗୁରୁତର ଅବସ୍ଥାରେ ମେଡ଼ିକାଲରେ ଭର୍ତ୍ତି କରାଯାିଛି । କୁହାଯାଉଛି ଯେ ଏହି ବିସ୍ଫୋରଣ ଏକ ଘରୋଇ ବ୍ୟାଙ୍କ ନିକଟରେ ଥିବା ସାଇଟ ଅଞ୍ଚଳରେ ଘଟିଥିଲା, ଯେଉଁ କାରଣରୁ ଏହି ଅଞ୍ଚଳରେ ଅବସ୍ଥିତ ଅନ୍ୟ ଅଟ୍ଟାଳିକା ମଧ୍ୟ ନଷ୍ଟ ହୋଇଯାଇଥିଲା। ଖବର ପାଇ ସ୍ଥାନୀୟ ପ୍ରଶାସନ ଓ ଉଦ୍ଧାରକାରୀ ଦଳ ଘଟଣା ସ୍ଥଳରେ ପହଂଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି ।

ଘଟଣା ସ୍ଥଳରେ ତଦନ୍ତ କରୁଥିବା ପୋଲିସ ଅଧିକାରୀ କହିଛନ୍ତି ଏହି ବିସ୍ଫୋରଣ ଏକ ବ୍ୟାଙ୍କ ପାଖରେ ଯାଇଥିବା ନାଳ ନିକଟରେ ଏହି ଘଟଣା ଘଟିଛି । ସ୍ଥାନୀୟ ପ୍ରଶାସନ ଦ୍ୱାରା ନାଳ ସଫା କରାଯାଉଥିଲା । ପୂର୍ବରୁ ଏନେଇ ନୋଟିସ ମଧ୍ୟ ଲଗାଯାଇଥିଲା । ଏହି ସମୟରେ ଏକ ବିସ୍ଫୋରଣ ଘଟିଥିଲା । ଯଦ୍ୱାରା ପାଖରେ ଥିବା ଏକ ବ୍ୟାଙ୍କ ଓ ଏକ ପେଟ୍ରୋଲ ପମ୍ପରେ ବ୍ୟାପକ କ୍ଷତି ଘଟିଛି ।

ପୋଲିସ ଅନୁମାନ କରିଛି ଯେ, କେନାଲ ଭିତରେ କିଛି ବିସ୍ଫୋରକ ସାମଗ୍ରୀ କିମ୍ବା ଗ୍ୟାସ ରହିଥିଲା । ଯଦ୍ୱାରା ଏହି ବିସ୍ଫୋରଣ ଘଟିଛି । ବିସ୍ଫୋରଣର ସୂଚନା ପାଇବା ମାତ୍ରେ ତୁରନ୍ତ ବିସ୍ଫୋରକ ନିରୋଧି ଗ୍ୟାଙ୍ଗ ପହଁଚିଥିଲା । ଘଟଣାସ୍ଥଳର ଚତୁଃର୍ପାଶ୍ୱକୁ ଘେରାବନ୍ଦୀ କରାଯାଇଥିଲା । ଉକ୍ତ ସ୍ଥାନରେ ଥିବା ଗାଡ଼ି ମଟର ଆଦି ଖଣ୍ଡ ବିଖଣ୍ଡିତ ହୋଇ ପଡ଼ିରହିଥିବାବେଳେ ଆବର୍ଜନା ମଧ୍ୟ ଅନ୍ୟତ୍ର ପଡ଼ିଥିବା କହିଛନ୍ତି ପୋଲିସ ଅଧିକାରୀ । ତେବେ କାହିଁକି ଓ କେଉଁ କାରଣରୁ ଏହି ଘଟଣା ଘଟିଛି ଏବଂ ଏହା ପଛରେ କାହାର ହାତ ରହିଛି କି ନାହିଁ, ତାହାର କାରଣ ଖୋଜୁଛି ଏକ ତଦନ୍ତକାରୀ ଟିମ୍ ।