ନୟାଗଡ: ବାଲିଅନ୍ତା ପରେ ନୟାଗଡ ଓଡଗାଁରେ ବର୍ବର ହତ୍ୟାକାଣ୍ଡ । ଚୋରା ମାଙ୍କଡ଼ା ପଥର ବୋଝେଇ ଗାଡିକୁ ଅଟକାଇବାରୁ ଅତି ଅମାନୁଷିକ ଭାବେ ଯୁବକଙ୍କ ହାତ ଗୋଡ଼ ହାଣି ହତ୍ୟା କଲେ ଖଣି ମାଫିଆ। ନୟାଗଡ଼ ଜିଲ୍ଲା ଓଡ଼ଗାଁ ଥାନା କଦଳୀବନ୍ଧରେ ଘଟିଛି ଏଭଳି ଅମାନୁଷିକ କାଣ୍ଡ । ପୋଲିସ ଘଟଣାସ୍ଥଳରେ ପହଞ୍ଚି ଆରମ୍ଭ କରିଛି ତଦନ୍ତ। 

ସୂଚନା ଅନୁଯାଇ ବିଳମ୍ବିତ ରାତିରେ ରୋହିବାଙ୍କରୁ ଓଡ଼ଗାଁକୁ ବେଆଇନ ଭାବେ ମାଙ୍କଡା ପଥର ଚୋରା ଚାଲଣ କରୁଥିଲେ । ଓଡଗାଁ ଥାନା ଶିଳ୍ପୀନଗର ଅଂଚଳର କିଛି ଯୁବକ ମିଶି ଗାଡିକୁ ଅଟକାଇବା ସହ ବିରୋଧ କରିଥିଲେ । ଏହାପରେ ପଥର ମାଫିଆଙ୍କ ସହ ତାଙ୍କର ଯୁକ୍ତିତର୍କ ହୋଇଥିଲା । ପରେ ଖଣି ମାଫିଆ ମାନେ ଆକ୍ରମଣ କରିଥିବା ବେଳେ ଦୁଇ ଜଣ ଖସି ଯାଇଥିଲେ, କିନ୍ତୁ ଓଡ଼ଗାଁ ବିଜୟ ମଣ୍ଡପ ସାହିର ଅଜିତ ସାହୁଙ୍କୁ ମାଫିଆ ମାନେ ଅତି ନିର୍ଦ୍ଦୟ ଭାବେ ହତ୍ୟା କରିଛନ୍ତି । ରାସ୍ତା ମଝିରେ ରକ୍ତାକ୍ତ ଅବସ୍ଥାରେ ଅଜିତଙ୍କ ମୃତଦେହ ପଡ଼ି ରହିଥିବା ଦେଖିବାକୁ ମିଳିଥିଲା । ଖବର ପାଇ ଘଟଣା ସ୍ଥଳରେ ଓଡଗାଁ ପୋଲିସ ପହଂଚି ତଦନ୍ତ ଜାରି ରଖିଛି । 

ଗଞ୍ଜାମ: ନ୍ୟାୟ ପାଇଁ ପ୍ରେମିକ ଘର ଆଗରେ ଧାରଣାରେ ବସିଥିଲେ ପ୍ରେମିକା । ଟାଙ୍ଗିଆରେ ହାଣି ହତ୍ୟା କଲା ପ୍ରେମିକର ସାନ ଭାଇ । ହିଞ୍ଜିଳି ଥାନା ଖିରିଡ଼ା ଗାଁରେ ଘଟିଛି ରପରି ବୀଭତ୍ସ ହତ୍ୟାକାଣ୍ଡ । ହିଞ୍ଜିଳି ପୋଲିସ ଅଭିଯୁକ୍ତ ସାନ ଭାଇଙ୍କୁ ଗିରଫ କରି ଘଟଣାର ଅଧିକ ତଦନ୍ତ କରୁଛି। 

ସୂଚନା ଅନୁସାରେ, ମୃତ ମହିଳାଙ୍କ ଘର ରମ୍ବା ଥାନା ଅଗସ୍ଥି ନୁଆଗାଁରେ। ତିନି ବର୍ଷ ତଳେ ସୋସିଆଲ ମିଡିଆରୁ ତାଙ୍କର କେ. ଖରିଡ଼ା ଗ୍ରାମର ଚିଣ୍ଟୁ ଗୌଡ଼ଙ୍କ ସହ ପ୍ରେମ ସମ୍ପର୍କ ଗଢ଼ିଉଠିଥିଲା। ପ୍ରଥମେ ଅନଲାଇନରେ କଥାବାର୍ତ୍ତା ପରେ ମିଳାମିଶା କରିଥିଲେ। ଏହା ପରେ ସେମାନେ ମନ୍ଦିରରେ ବିବାହ କରିଥିଲେ। ଉଭୟଙ୍କର ତିନି ବର୍ଷର କନ୍ୟା ସନ୍ତାନ ଥିବା ବେଳେ, ମହିଳା ଜଣକ ଛଅ ମାସର ଗର୍ଭବତୀ ମଧ୍ୟ ଥିଲେ।

ତେବେ ପ୍ରାୟ ଛଅ ମାସ ହେଲା ଉଭୟ ପୁରୀରେ ଭଡ଼ାରେ ରହୁଥିଲେ। କିନ୍ତୁ ୧୫ ଦିନ ତଳେ ଚିଣ୍ଟୁ ମହିଳାଙ୍କୁ ତାଙ୍କ ଘରଲୋକଙ୍କ ସହ ଦେଖା କରାଇବାକୁ କହି ବ୍ରହ୍ମପୁର ଷ୍ଟେସନରେ ଛାଡ଼ି ଚାଲିଯାଇଥିଲେ। ଏନେଇ ହିଞ୍ଜିଳି ଥାନାର ଦ୍ଵାରସ୍ଥ ହୋଇଥିଲେ ଉକ୍ତ ମହିଳା । ହେଲେ ନ୍ୟାୟ ନମିଳିବାରୁ ଗତକାଲି ଠାରୁ ପ୍ରେମିକଙ୍କ ଘର ଆଗରେ ଧାରଣାରେ ବସିଥିଲେ। କିନ୍ତୁ ଆଜି ଚିଣ୍ଟୁ ଗୌଡ଼ର ସାନ ଭାଇର ଟାଙ୍ଗିଆ ଚୋଟରେ ତାଙ୍କର ଜୀବନ ଯାଇଛି। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିବା ସହ ଅଭିଯୁକ୍ତକୁ ଗିରଫ କରି ଅଧିକ ତଦନ୍ତ ଜାରି ରଖିଛି । 

ସୋର: ମହଙ୍ଗା ପଡ଼ିଲା ପ୍ରେମ ନିବେଦନ । ଏକ ତରଫା ପ୍ରେମ ବ୍ୟାପାରକୁ ନେଇ ଯୁବକକୁ ପିଟି ପିଟି ମାରିଦେଲେ ଝିଅର ପରିବାର ଲୋକେ l ମୃତ ଯୁବକ ହେଲେ ବାଲେଶ୍ୱର ଜିଲ୍ଲା ସିମୁଳିଆ ଥାନା ପୁରୁଷୋତ୍ତମ ଗାଁର ସୁଦର୍ଶନ ସୁତାରଙ୍କ ପୁଅ ସୁବାସ ସୁତାର । ସୂଚନା ଅନୁସାରେ, ସୁବାସ ଜଣେ ଯୁବତୀଙ୍କୁ ମୋବାଇଲରେ ପ୍ରେମ ନିବେଦନ କରିଥିଲେ । ପରବର୍ତ୍ତୀ ସମୟରେ ଝିଅର ପରିବାର ଲୋକେ ଏହା ଜାଣି ସୁବାଷଙ୍କୁ ଟେକି ନେଇ ବିରବ୍ରହ୍ମପୁର ସ୍କୁଲ ପରିସରରେ ଥିବା ଅଙ୍ଗନବାଡ଼ିର ଏକ ଖୁଣ୍ଟରେ ବାନ୍ଧି ନିର୍ଧୁମ ପିଟିଥିଲେ । ପରେ ସୁବାଷଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ସିମୁଳିଆ ମେଡିକାଲରେ ଭର୍ତ୍ତି କରାଯାଇଥିଲା । ଅବସ୍ଥା ଗୁରୁତର ଥିବାରୁ ଭଦ୍ରକ ମେଡିକାଲକୁ ସ୍ଥାନାନ୍ତରିତ କରାଯାଇଥିଲା । ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଅଭିଯୋଗ ପରେ ସିମୁଳିଆ ପୋଲିସ ଝିଅର ଭଣଜାକୁ ଅଟକ ରଖି ଅଧିକ ତଦନ୍ତ ଚଳାଇଛି ।

ଆଠଗଡ଼: ନୃଶଂସ ପାଲଟିଲା ଜନ୍ମ କଲା ପୁଅ । ଘରୋଇ କଳିକୁ ନେଇ ଶିଳପୁଆରେ ଛେଚି ବାପାକୁ ହତ୍ୟା କଲା ଜନ୍ମ କଲା ପୁଅ । ଆଠଗଡ଼ ଥାନା ଅନ୍ତର୍ଗତ ଜାଗିଆପଡା ହରିଜନ ସାହିରେ ଘଟିଛି ଏପରି ଅଭାବନୀୟ ଘଟଣା । ଘଟଣା ସ୍ଥଳରେ ଆଠଗଡ଼ ପୋଲିସ ପହଞ୍ଚି ପିତୃହନ୍ତା ପୁଅକୁ କାବୁ କରିବା ସହ ଘଟଣାର ଅଧିକ ତଦନ୍ତ କରୁଛି ।

ସୂଚନା ଅନୁସାରେ, ବଡଭୂଇଁ ପଞ୍ଚାୟତ ଜାଗିଆପଡା ରଘୁନାଥପୁର ଗ୍ରାମର ଭୂତି ନାଏକ ନିଶାସକ୍ତ ଅବସ୍ଥାରେ ଘରକୁ ଆସିଥିଲେ। କୌଣସି କାରଣକୁ ନେଇ ବାପା ବିକଳ ନାଏକଙ୍କ ସହ ତାଙ୍କର ପାଟିତୁଣ୍ଡ ହୋଇଥିଲା। ଫଳରେ ଉତ୍ତ୍ୟକ୍ତ ହୋଇ ଭୂତି ନାଏକ ମଦ ନିଶାରେ ବିକଳଙ୍କୁ ଏକ ଶିଳପୁଆରେ ଛେଚି ହତ୍ୟା କରିଥିଲା। ଗ୍ରାମବାସୀ ଅଭିଯୁକ୍ତ ପୁଅକୁ କାବୁ କରି ବିଦ୍ୟୁତ୍ ଖୁଣ୍ଟରେ ବାନ୍ଧି ପୁଲିସକୁ ଖବର ଦେଇଥିଲେ। ଆଠଗଡ଼ ପୁଲିସ ଘଟଣାସ୍ଥଳରେ ପହଞ୍ଚି ଶବ ଜବତ କରିବା ସହ ପୁଅକୁ ଗିରଫ କରି ତଦନ୍ତ କରୁଛି। 

ଜଗତସିଂହପୁର: ସରିଥିଲା ନିର୍ବନ୍ଧ, ଆଉ ମାତ୍ର କିଛି ଦିନ ପରେ ପଡିଥାନ୍ତା ହାତଗଣ୍ଠି । ହେଲେ ବିବାହ ପୂର୍ବରୁ ସବୁକିଛି ହୋଇଗଲା ଓଲଟପାଲଟ । ବାହାଘର ପୂର୍ବରୁ ଯୁବତୀଙ୍କୁ ବୀଭତ୍ସ ହତ୍ୟା । ବିଲରୁ ଉଦ୍ଧାର ହେଲା ଯୁବତୀଙ୍କ ଅର୍ଦ୍ଧଉଲଗ୍ନ ମୃତଦେହ । ଅତି ନିର୍ମମ ଭାବେ ଯୁବତୀଙ୍କ ବେକ କାଟି ହତ୍ୟା ପରେ ବିଲରେ ଫିଙ୍ଗିଦେଇଥିବା ଅନୁମାନ କରାଯାଉଛି । ଜଗତସିଂହପୁର ସଦର ଥାନା ଅନ୍ତର୍ଗତ କାଠିଆପଡ଼ା ଗାଁରେ ଘଟିଛି ଏପରି ହତ୍ୟାକାଣ୍ଡ । 

ମୃତକ ହେଲେ ଡଲି ଓରଫ୍ ସସ୍ମିତା ଦାସ । ମୃତ ଯୁବତୀ ପଡିଶା ଘରକୁ ଯାଉଥିବା କହି ଆଉ ଘରକୁ ଫେରିନଥିଲେ । ପରିବାର ଲୋକ ବହୁ ଖୋଜାଖୋଜି କରିବା ପରେ ଗାଁର ଏକ ବିଲରେ ତାଙ୍କ ମୃତଦେହ ସନ୍ଦେହଜନକ ଅବସ୍ଥାରେ ପଡିଥିବା ଦେଖିବାକୁ ପାଇଥିଲେ । ତେବେ ଝିଅକୁ କେହି ହତ୍ୟା କରିଥିବା ପରିବାର ଲୋକ ଅଭିଯୋଗ କରିଛନ୍ତି । ଘଟଣାସ୍ଥଳରେ ପୋଲିସ ଓ ସାଇଣ୍ଟିଫିକ୍ ଟିମ୍ ତନାଘନା ଆରମ୍ଭ କରିଛି । 

ନବରଙ୍ଗପୁର: ନବରଙ୍ଗପୁର ରାଇଘର ଥାନା ବରଗାଁରେ ବୀଭତ୍ସ ହତ୍ୟାକାଣ୍ଡ । ସ୍ତ୍ରୀକୁ ହତ୍ୟା କରି ପାଇଖାନା ଟାଙ୍କିରେ ଲୁଚେଇ ରଖିଥିଲା ନୃଶଂସ ସ୍ୱାମୀ। ଚରିତ୍ରକୁ ସନ୍ଦେହ କରି ପତ୍ନୀକୁ ପିଟି ପିଟି ମାରି ଦେବାପରେ ପ୍ରମାଣ ଲୁଚାଇବାକୁ ଯାଇ ସ୍ୱାମୀ ଜଣକ ଏକ ପାଇଖାନା ଟାଙ୍କିରେ ମୃତଦେହକୁ ପୋତି ଦେଇଥିଲା । ବାପାର ଏଭଳି ଜଘନ୍ୟ କାଣ୍ଡର ପର୍ଦ୍ଦାଫାସ୍ କରିଛି ୪ ବର୍ଷର ପୁଅ। ହତ୍ୟାକାରୀ ସ୍ୱାମୀ ସୁବାସ ଗଣ୍ଡକୁ ଥାନାରେ ଅଟକ ରଖିଛି ରାଇଘର ପୋଲିସ୍ । ମୃତକ ହେଲେ ମନେଇ ଗଣ୍ଡ ।

ସୂଚନା ଅନୁସାରେ, ଗତ ରବିବାର ରାତିରେ ସ୍ବାମୀ ସୁବାଷ ଗଣ୍ଡ ଓ ସ୍ତ୍ରୀ ମନେଇ ଗଣ୍ଡ ପରିବାର ସଦସ୍ୟଙ୍କ ସହ ମିଶି ଏକ ବାହାଘର କାର୍ଯ୍ୟକ୍ରମରେ ଯୋଗ ଦେବାକୁ ଯାଇଥିଲେ । ଘରକୁ ଫେରିବା ପରେ ପତ୍ନୀର ଚରିତ୍ରକୁ ସନ୍ଦେହ କରି ଉଭୟଙ୍କ ମଧ୍ୟରେ ଝଗଡ଼ା ହୋଇଥିଲା । ଝଗଡା ଏତେ ତୀବ୍ର ରୂପ ନେଇଥିଲା ଯେ ପିଲାଙ୍କ ଆଗରେ ସ୍ତ୍ରୀ ମନେଇଙ୍କୁ ହତ୍ୟା କରିଥିଲା ସୁବାଷ । ପ୍ରଣାମ ଲୁଚାଇବାକୁ ଯାଇ ସେହିଦିନ ରାତିରେ ନିଜ ପାଇଖାନା ଟାଙ୍କିରେ ମନେଇର ମର ଶରୀର ପୋତି ଦେଇଥିଲେ । ପରେ ସ୍ତ୍ରୀ କେଉଁଆଡ଼େ ଚାଲିଗଲା ବୋଲି ଗ୍ରାମବାସୀଙ୍କ ଆଗରେ ଅଭିନୟ କରିଥିଲା ସୁବାଷ । ଗ୍ରାମବାସୀ ବହୁ ପଚାରଉଚରା କରିବାରୁ ୪ ବର୍ଷର ପୁଅ ସବୁ ସତକଥା କହିଥିଲା । ଖବର ପାଇ ରାଇଘର ଥାନା ପୋଲିସ ପହଞ୍ଚି ପାଇଖାନା ଟାଙ୍କିରୁ ମୃତଦେହ ଉଦ୍ଧାର କରିବା ସହ ହତ୍ୟାକାରୀ ସ୍ବାମୀକୁ ଗିରଫ କରିଛି । ଅଧିକ ତଦନ୍ତ ପାଇଁ ନବରଙ୍ଗପୁରରୁ ଏକ ସାଇଣ୍ଟି ଫିକ ଟିମ୍ କୁ ଡକାଯାଇଥିବା ସୂଚନା ମିଳିଛି । 

ଛତିଶଗଡ଼ର ରାୟଗଡ଼ ଜିଲ୍ଲାରୁ ଏକ ହୃଦୟ ବିଦାରକ ଘଟଣା ସାମ୍ନାକୁ ଆସିଛି। ଏଠାରେ ଜଣେ ଯୁବକ ନିଜ ସହବାସୀ ବା ଲିଭ୍-ଇନ୍ ପାର୍ଟନରଙ୍କୁ ନିର୍ମମ ଭାବେ ହତ୍ୟା କରିଛନ୍ତି। ସବୁଠାରୁ ଆଶ୍ଚର୍ଯ୍ୟର କଥା ହେଉଛି, ଅଭିଯୁକ୍ତ ଜଣକ ମହିଳାଙ୍କ ବେକରେ ଥିବା ମଙ୍ଗଳସୂତ୍ର ସାହାଯ୍ୟରେ ତାଙ୍କର ତଣ୍ଟିଚିପି ହତ୍ୟା କରିଛି। ପ୍ରଥମେ ଏହାକୁ ଏକ ସ୍ୱାଭାବିକ ମୃତ୍ୟୁର ରୂପ ଦେବାକୁ ଉଦ୍ୟମ କରାଯାଇଥିଲେ ହେଁ, ପୋଷ୍ଟମର୍ଟମ ରିପୋର୍ଟ ଆସିବା ପରେ ପୋଲିସ ଅଭିଯୁକ୍ତକୁ ଗିରଫ କରିଛି।

ଛୋଟ କଳିରୁ ଭୟଙ୍କର ପରିଣତି

ପୋଲିସର ସୂଚନା ଅନୁଯାୟୀ, ମୃତ ମହିଳାଙ୍କ ନାମ ହେଉଛି ଧନେଶ୍ୱରୀ ବିଶ୍ୱକର୍ମା। ତାଙ୍କର ବିବାହ ମନୋଜ ବିଶ୍ୱକର୍ମାଙ୍କ ସହ ହୋଇଥିଲା ଏବଂ ସେମାନଙ୍କର ୩ଟି ସନ୍ତାନ ମଧ୍ୟ ଅଛନ୍ତି। କିନ୍ତୁ ପାରିବାରିକ ବିବାଦ କାରଣରୁ ଗତ ଚାରି ବର୍ଷ ଧରି ସେ ସ୍ୱାମୀଙ୍କଠାରୁ ଅଲଗା ରହୁଥିଲେ। ଏହି ସମୟ ମଧ୍ୟରେ ତାଙ୍କର ପରିଚୟ ଅଭିଯୁକ୍ତ ବିକେଶ ବରେଠଙ୍କ ସହ ହୋଇଥିଲା। ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ି ଉଠିବା ପରେ ସେମାନେ କିରୋଡିମଲନଗର ଅଞ୍ଚଳରେ ଏକାଠି ରହୁଥିଲେ। ଧନେଶ୍ୱରୀଙ୍କର ସ୍ୱାମୀଙ୍କ ସହ ଛାଡ଼ପତ୍ର ନହୋଇଥିବାରୁ ବିକେଶ ଓ ତାଙ୍କ ମଧ୍ୟରେ ଅନେକ ସମୟରେ ଝଗଡ଼ା ହେଉଥିଲା।

ମଙ୍ଗଳସୂତ୍ର ପାଲଟିଲା ମୃତ୍ୟୁର ଫାଶ

ଗତ ଏପ୍ରିଲ ୧ ତାରିଖ ଦିନ ବିକେଶଙ୍କ ଆଈ ସେମାନଙ୍କ ଘରକୁ ଆସିଥିଲେ। ଧନେଶ୍ୱରୀ ଠିକ୍ ସମୟରେ ଖାଦ୍ୟ ପ୍ରସ୍ତୁତ ନକରିବାରୁ ଏବଂ ନିଜର ଔଷଧ ନଖାଇବାରୁ ଉଭୟଙ୍କ ମଧ୍ୟରେ ପ୍ରବଳ ବଚସା ହୋଇଥିଲା। ରାଗରେ ବିକେଶ ତାଙ୍କୁ ଚାପୁଡ଼ା ମାରିଥିଲେ। ଏଥିରେ ଉତ୍‌କ୍ଷିପ୍ତ ହୋଇ ଧନେଶ୍ୱରୀ ଘର ଛାଡ଼ି ପଳାଇଯିବାକୁ ବାହାରିଥିଲେ। ଠିକ୍ ଏତିକିବେଳେ ବିକେଶ ପଛପଟୁ ଧନେଶ୍ୱରୀଙ୍କ ମଙ୍ଗଳସୂତ୍ରକୁ ଟାଣି ଧରିଥିଲେ, ଯାହା ଫଳରେ ତାଙ୍କର ତଣ୍ଟି ଚିପି ହୋଇଯାଇଥିଲା ଏବଂ ସେ ଚେତାଶୂନ୍ୟ ହୋଇ ତଳେ ପଡ଼ିଯାଇଥିଲେ।

ପୋଷ୍ଟମର୍ଟମ ରିପୋର୍ଟରୁ ଖୋଲିଲା ଗୁମର

ଏହି ଘଟଣା ପରେ ଅଭିଯୁକ୍ତ ପ୍ରେମିକ ଧନେଶ୍ୱରୀଙ୍କୁ ଏକ ଘରୋଇ ଡାକ୍ତରଖାନାକୁ ନେଇଥିଲେ ଏବଂ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଅଭିଯୁକ୍ତ ଜଣକ ଏହାକୁ ଏକ ସ୍ୱାଭାବିକ ମୃତ୍ୟୁ ବୋଲି ପ୍ରମାଣିତ କରିବାକୁ ଚେଷ୍ଟା କରିଥିଲା, କିନ୍ତୁ କୋତରାରୋଡ୍ ପୋଲିସ ଶବ ବ୍ୟବଚ୍ଛେଦ କରାଇବାରୁ ମୃତ୍ୟୁର ପ୍ରକୃତ କାରଣ ଜଣାପଡ଼ିଥିଲା। ପୋଲିସର କଡ଼ା ଜେରା ଆଗରେ ବିକେଶ ନିଜର ଦୋଷ ସ୍ୱୀକାର କରିଛି। ପୋଲିସ ହତ୍ୟା ମାମଲା ରୁଜୁ କରି ଅଭିଯୁକ୍ତକୁ ଗିରଫ କରିବା ସହ ଜେଲ୍ ପଠାଇଛି।

ଭୁବନେଶ୍ୱର: ରାଜଧାନୀ ଭୁବନେଶ୍ୱରରେ ହତ୍ୟା । ସ୍ତ୍ରୀର ତଣ୍ଟି କାଟି ବିଭତ୍ସ ଭାବେ ହତ୍ୟା କଲା ସ୍ୱାମୀ । ଏୟାରଫିଲଡ଼ ଥାନା କୁହା ଅନ୍ତର୍ଗତ ସ୍ୱସ୍ତିକ ନଗରରେ ଘଟିଛି ଏପରି ହତ୍ୟାକାଣ୍ଡ । ମୃତ ମହିଳା ହେଉଛନ୍ତି ପ୍ରିୟମ୍ବଦା ଷଡଙ୍ଗୀ । ତେବେ ହତ୍ୟାକାଣ୍ଡର କାରଣ ଅସ୍ପଷ୍ଟ ରହିଥିବାବେଳେ ସ୍ୱାମୀ ଦେବରାଜ ଷଡଙ୍ଗୀଙ୍କୁ ଅଟକ ରଖିଛି ପୋଲିସ । ଘଟଣାସ୍ଥଳରେ ଏୟାରଫିଲ୍ଡ ଥାନା ପୋଲିସ ଓ ସାଇଣ୍ଟିଫିକ୍‌ ଟିମ୍‌ ପହଞ୍ଚି ତଦନ୍ତ ଜାରି ରଖିଛନ୍ତି ।

ଝାଡ଼ଖଣ୍ଡର ହଜାରିବାଗ ଜିଲ୍ଲାରୁ ଏକ ହୃଦୟ ବିଦାରକ ଏବଂ ଲୋମହର୍ଷକ ଘଟଣା ସାମ୍ନାକୁ ଆସିଛି। ପୁଅର ରୋଗ ଭଲ କରିବା ପାଇଁ ଜଣେ ମା' ଅନ୍ଧବିଶ୍ୱାସର ବଶବର୍ତ୍ତୀ ହୋଇ ନିଜ ୧୩ ବର୍ଷୀୟା ଝିଅକୁ ବଳି ଦେଇଛି। ଏହି ବର୍ବର କାଣ୍ଡରେ ମହିଳା ଜଣକ ନିଜ ପ୍ରେମିକ ଏବଂ ଜଣେ ତାନ୍ତ୍ରିକଙ୍କ ସାହାଯ୍ୟ ନେଇଥିବା ପୋଲିସ ତଦନ୍ତରୁ ଜଣାପଡ଼ିଛି। ପୋଲିସ ଏହି ଘଟଣାର ପର୍ଦ୍ଦାଫାଶ କରିବା ସହ ଅଭିଯୁକ୍ତ ମା', ତା'ର ପ୍ରେମିକ ଏବଂ ତାନ୍ତ୍ରିକକୁ ଗିରଫ କରିଛି।

ଅନ୍ଧବିଶ୍ୱାସର ଜାଲରେ ମା'

ପୋଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ହଜାରିବାଗର କୁସୁମ୍ଭା ଗାଁର ବାସିନ୍ଦା ରେଶମୀ ଦେବୀଙ୍କ ସାନ ପୁଅ ଦୀର୍ଘ ଦିନ ଧରି ଶାରୀରିକ ଏବଂ ମାନସିକ ରୋଗରେ ପୀଡ଼ିତ ଥିଲା। ପୁଅର ଆରୋଗ୍ୟ ପାଇଁ ସେ ସେହି ଗାଁର ଜଣେ ୫୫ ବର୍ଷୀୟା ମହିଳା ତାନ୍ତ୍ରିକ ଶାନ୍ତି ଦେବୀ ଓରଫ୍ ଭଗତିନୀଙ୍କ ସମ୍ପର୍କରେ ଆସିଥିଲେ। ଭଗତିନୀ ତାଙ୍କୁ ବିଶ୍ୱାସ ଦେଇଥିଲା ଯେ ଏକ କୁମାରୀ କନ୍ୟାର ବଳି ଦେଲେ ତାଙ୍କ ପୁଅ ସମ୍ପୂର୍ଣ୍ଣ ସୁସ୍ଥ ହୋଇଯିବ ଏବଂ ପରିବାରର ସମସ୍ତ ସମସ୍ୟା ଦୂର ହେବ। ଏହି ଅନ୍ଧବିଶ୍ୱାସରେ ପଡ଼ି ରେଶମୀ ଦେବୀ ନିଜର ନିଷ୍ପାପ ଝିଅକୁ ବଳି ଦେବା ପାଇଁ ଯୋଜନା କରିଥିଲେ।

କେମିତି ହେଲା ହତ୍ୟାକାଣ୍ଡ?

ଗତ ମାର୍ଚ୍ଚ ୨୪ ତାରିଖ ରାତିରେ ଗାଁରେ ରାମ ନବମୀ ଉପଲକ୍ଷେ ମଙ୍ଗଳା ଜୁଲୁସ ଚାଲିଥିବା ସମୟରେ ଏହି ଜଘନ୍ୟ କାଣ୍ଡ ଘଟିଥିଲା। ପୋଲିସର କହିବା ଅନୁଯାୟୀ, ପୂଜା କରିବା ବାହାନାରେ ରେଶମୀ ନିଜ ଝିଅକୁ ତାନ୍ତ୍ରିକ ଶାନ୍ତି ଦେବୀଙ୍କ ଘରକୁ ନେଇଯାଇଥିଲେ। ସେଠାରେ ତାଙ୍କ ପ୍ରେମିକ ୪୦ ବର୍ଷୀୟ ଭୀମ ରାମ ମଧ୍ୟ ଉପସ୍ଥିତ ଥିଲେ। ପ୍ରାଥମିକ ପୂଜାପାଠ ପରେ ସେମାନେ ଝିଅଟିକୁ ଏକ ବାଉଁଶ ବୁଦା ନିକଟକୁ ନେଇଯାଇଥିଲେ। ସେଠାରେ ରେଶମୀ ନିଜ ଝିଅର ଗୋଡ଼କୁ ଧରି ରଖିଥିବା ବେଳେ ପ୍ରେମିକ ଭୀମ ରାମ ତଣ୍ଟି ଚିପି ନିର୍ମମ ଭାବେ ହତ୍ୟା କରିଥିଲା। ପରଦିନ ସକାଳେ ଗାଁର ମିଡିଲ ସ୍କୁଲ ପଛପଟୁ ଝିଅଟିର ମୃତଦେହ ଉଦ୍ଧାର କରାଯାଇଥିଲା।

ପୋଲିସକୁ ବିଭ୍ରାନ୍ତ କରିବାର ପ୍ରୟାସ ଏବଂ ଗିରଫ

ଘଟଣା ପରେ ମା' ରେଶମୀ ଦେବୀ ପୋଲିସକୁ ବିଭ୍ରାନ୍ତ କରିବା ପାଇଁ ଗାଁର ଅନ୍ୟ କିଛି ବ୍ୟକ୍ତିଙ୍କ ନାମରେ ଏତଲା ଦେଇଥିଲେ। ପ୍ରାରମ୍ଭରେ ପୋଲିସ ପୋକ୍ସୋ ଆକ୍ଟ ଏବଂ ବିଏନଏସ (BNS) ଆଧାରରେ ଏକ ମାମଲା ରୁଜୁ କରିଥିଲା। ତେବେ ଘଟଣାର ଗୁରୁତ୍ୱକୁ ଦୃଷ୍ଟିରେ ରଖି ଝାଡ଼ଖଣ୍ଡ ପୋଲିସ ଡିଜିପି ଏବଂ ହଜାରିବାଗ ଏସପି ଅଞ୍ଜନି ଅଞ୍ଜନଙ୍କ ନିର୍ଦ୍ଦେଶରେ ମାର୍ଚ୍ଚ ୨୬ ତାରିଖରେ ଏକ ସ୍ୱତନ୍ତ୍ର ତଦନ୍ତକାରୀ ଦଳ (SIT) ଗଠନ କରାଯାଇଥିଲା। ବୈଷୟିକ ପ୍ରମାଣ ଏବଂ କଡ଼ା ପଚରାଉଚରା ପରେ ପ୍ରକୃତ ସତ୍ୟ ସାମ୍ନାକୁ ଆସିଥିଲା। ପୋଲିସ ଅଭିଯୁକ୍ତ ମା' ରେଶମୀ ଦେବୀ, ପ୍ରେମିକ ଭୀମ ରାମ ଏବଂ ତାନ୍ତ୍ରିକ ଶାନ୍ତି ଦେବୀଙ୍କୁ ଗିରଫ କରି କୋର୍ଟ ଚାଲାଣ କରିଛି। ଘଟଣାର ଗମ୍ଭୀରତାକୁ ନେଇ ଝାଡ଼ଖଣ୍ଡ ହାଇକୋର୍ଟ ମଧ୍ୟ ସ୍ୱତଃପ୍ରବୃତ୍ତ ମାମଲା ରୁଜୁ କରିଛନ୍ତି।

ଦେହରାଦୁନରେ ଏକ ଅଭାବନୀୟ ତଥା ସାଂଘାତିକ ଘଟଣା ସାମ୍ନାକୁ ଆସିଛି। ଏଠାକାର ରାଜପୁର ରୋଡ୍ ଅଞ୍ଚଳରେ ମର୍ଣ୍ଣିଂ ୱାକ୍ (ପ୍ରାତଃ ଭ୍ରମଣ) କରୁଥିବା ବେଳେ ଜଣେ ଅବସରପ୍ରାପ୍ତ ଆର୍ମି ବ୍ରିଗେଡିୟରଙ୍କୁ ଗୁଳି କରି ହତ୍ୟା କରାଯାଇଛି। ମୃତକଙ୍କ ନାମ ଭି.କେ. ଯୋଶୀ (୭୦ ବର୍ଷ) ବୋଲି ଜଣାପଡ଼ିଛି। ସୋମବାର ସକାଳ ପ୍ରାୟ ୬:୪୫ ରୁ ୭:୦୦ଟା ମଧ୍ୟରେ ଏହି ହତ୍ୟାକାଣ୍ଡ ଘଟିଛି। ଏହି ଘଟଣା ସମଗ୍ର ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି।

ଦୁଇ ଗୋଷ୍ଠୀ ମଧ୍ୟରେ ଗୁଳିବିନିମୟର ଶିକାର ହେଲେ ବ୍ରିଗେଡିୟର

ମିଳିଥିବା ସୂଚନା ଅନୁଯାୟୀ, ରାସ୍ତାରେ ଦୁଇଟି କାରରେ ଯାଉଥିବା କିଛି ଲୋକଙ୍କ ମଧ୍ୟରେ ବିବାଦ ସୃଷ୍ଟି ହୋଇଥିଲା। ଏହି 'ରୋଡ୍ ରେଜ୍' ବା ରାସ୍ତା କଳି ଏତେ ଉଗ୍ର ରୂପ ନେଇଥିଲା ଯେ, ଉଭୟ ଗୋଷ୍ଠୀ ପରସ୍ପରକୁ ଗୋଡ଼ାଇବା ସହ ଗୁଳିମାଡ଼ ଆରମ୍ଭ କରିଦେଇଥିଲେ। ଦୁର୍ଭାଗ୍ୟବଶତଃ, ରାସ୍ତା କଡ଼ରେ ଚାଲୁଥିବା ବ୍ରିଗେଡିୟର ଭି.କେ. ଯୋଶୀ ଏହି ଘଟଣା ସହ କୌଣସି ସମ୍ପର୍କ ନଥାଇ ମଧ୍ୟ ସେମାନଙ୍କ ଗୁଳିର ଶିକାର ହୋଇଥିଲେ। ଗୋଟିଏ ଲକ୍ଷ୍ୟଭ୍ରଷ୍ଟ ଗୁଳି (ଷ୍ଟ୍ରେ ବୁଲେଟ୍) ତାଙ୍କ ଦେହରେ ବାଜିଥିଲା ଏବଂ ସେ ଘଟଣାସ୍ଥଳରେ ଟଳି ପଡ଼ିଥିଲେ।

ପୋଲିସର ତଦନ୍ତ ଜାରି

ଘଟଣା ସମ୍ପର୍କରେ ଖବର ପାଇ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲା। ଦେହରାଦୁନର ସିଟି ଏସପି ପ୍ରମୋଦ କୁମାର କହିଛନ୍ତି ଯେ, ଏହି ଗୁଳିକାଣ୍ଡରେ ଅବସରପ୍ରାପ୍ତ ବ୍ରିଗେଡିୟରଙ୍କର ଘଟଣାସ୍ଥଳରେ ହିଁ ମୃତ୍ୟୁ ହୋଇଛି। ହତ୍ୟାକାରୀମାନେ ନିଜର ଗୋଟିଏ କାରକୁ କିଛି ଦୂରରେ ଛାଡ଼ି ଫେରାର୍ ହୋଇଯାଇଛନ୍ତି। ଘଟଣାସ୍ଥଳରେ ଫୋରେନ୍ସିକ୍ ଟିମ୍ ମଧ୍ୟ ପହଞ୍ଚି ପ୍ରମାଣ ସଂଗ୍ରହ କରୁଛନ୍ତି। ବର୍ତ୍ତମାନ ପୋଲିସ ଏକ ମାମଲା (FIR) ରୁଜୁ କରିବା ସହ ଫେରାର୍ ଅଭିଯୁକ୍ତମାନଙ୍କୁ ଧରିବା ପାଇଁ ବ୍ୟାପକ ଖାନତଲାସୀ ଆରମ୍ଭ କରିଛି।

ଝାଡ଼ଖଣ୍ଡର ସଢ଼େଇକଳା-ଖରସୁଆଁ ଜିଲ୍ଲାରୁ ଏକ ଅତ୍ୟନ୍ତ ହୃଦୟବିଦାରକ ଘଟଣା ସାମ୍ନାକୁ ଆସିଛି। ଏଠାରେ ଜଣେ ମା' ନିଜର ୪ ବର୍ଷର ନିଷ୍ପାପ ଝିଅକୁ ତଣ୍ଟିଚିପି ହତ୍ୟା କରିଛି। ଏହି ଅଭାବନୀୟ ଘଟଣା ସମଗ୍ର ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି। ଜଣେ ମା' କିପରି ଏତେ ନିର୍ଦ୍ଦୟ ହୋଇପାରେ, ତାହାକୁ ନେଇ ସ୍ଥାନୀୟ ଲୋକେ ଆଶ୍ଚର୍ଯ୍ୟ ପ୍ରକଟ କରିଛନ୍ତି।

ଶବକୁ ପୋତି ରଚିଥିଲା ଅପହରଣର ନାଟକ

ନିଜ ଝିଅକୁ ହତ୍ୟା କରିବା ପରେ ଅଭିଯୁକ୍ତ ମା' ପ୍ରମାଣ ନଷ୍ଟ କରିବା ଉଦ୍ଦେଶ୍ୟରେ ଶବକୁ ଘର ପଛପଟେ ଥିବା ଅଗଣାରେ ପୋତି ଦେଇଥିଲା। ଘଟଣା ସମ୍ପର୍କରେ ପୋଲିସ ତଦନ୍ତ ଆରମ୍ଭ କରିବା ବେଳେ ମହିଳା ଜଣକ ପୋଲିସକୁ ବିଭ୍ରାନ୍ତ କରିବାକୁ ଚେଷ୍ଟା କରିଥିଲା। ସେ କହିଥିଲା ଯେ କେହି ଦୁର୍ବୃତ୍ତ ତାର ଝିଅକୁ ଅପହରଣ କରି ନେଇଛନ୍ତି ଏବଂ ସେ ନିଜେ ମଧ୍ୟ ତାକୁ ଖୋଜୁଛି। କିନ୍ତୁ ମହିଳାଙ୍କ କଥାବାର୍ତ୍ତାରେ ପୋଲିସର ସନ୍ଦେହ ବଢ଼ିଥିଲା।

ପୋଲିସର ତଦନ୍ତ ଓ ଗିରଫଦାରୀ

ଚାଣ୍ଡିଲ ଥାନା ଅଧିକାରୀ ଡିଲସନ ବିରୁଆଙ୍କ ସୂଚନା ଅନୁଯାୟୀ, ଶିଶୁକନ୍ୟାର ବାପା ସୋନାରାମ ଲୋହାର ଘରୁ ବାହାରକୁ ଯାଇଥିବା ବେଳେ ଏହି ଘଟଣା ଘଟିଥିଲା। ବାପାଙ୍କ ଅଭିଯୋଗ ଆଧାରରେ ପୋଲିସ ତଲାସି ଅଭିଯାନ ଆରମ୍ଭ କରିଥିଲା। ତଦନ୍ତ ବେଳେ ଘର ପଛପଟୁ ପୋଲିସ ଝିଅଟିର ମୃତଦେହ ଉଦ୍ଧାର କରିଥିଲା। ମୃତଦେହ ମିଳିବା ପରେ ଅଭିଯୁକ୍ତ ମା' ଘଟଣାସ୍ଥଳରୁ ଫେରାର ହେବାକୁ ଚେଷ୍ଟା କରିଥିଲା, କିନ୍ତୁ ପୋଲିସ ତାକୁ ଧରିବାରେ ସଫଳ ହୋଇଥିଲା। ସୋମବାର ଦିନ ମହିଳାଙ୍କୁ ଗିରଫ କରାଯାଇ ବିଚାର ବିଭାଗୀୟ ହେପାଜତକୁ ପଠାଇ ଦିଆଯାଇଛି।

ପଡ଼ୋଶୀଙ୍କ ପ୍ରତିକ୍ରିୟା ଓ ହତ୍ୟାର କାରଣ

ପୋଲିସ ଶବକୁ ଜବତ କରି ବ୍ୟବଚ୍ଛେଦ (Post-mortem) ପାଇଁ ପଠାଇଛି ଏବଂ ହତ୍ୟା ପଛର ପ୍ରକୃତ କାରଣ ଜାଣିବା ପାଇଁ ପୋଲିସର ତଦନ୍ତ ଜାରି ରହିଛି। ମହିଳାଙ୍କ ମାନସିକ ସ୍ଥିତି ସମ୍ପର୍କରେ ପଚରାଯିବାରୁ, ତାଙ୍କର କୌଣସି ମାନସିକ ସମସ୍ୟା ଥିବା ପରି ଜଣାପଡ଼ୁନାହିଁ ବୋଲି ପୋଲିସ କହିଛି। ତେବେ ସ୍ଥାନୀୟ ପଡ଼ୋଶୀଙ୍କ କହିବା ଅନୁଯାୟୀ, ଅଭିଯୁକ୍ତ ମା' ପ୍ରାୟତଃ ଝିଅଟିକୁ ମାଡ଼ ମାରୁଥିଲା ଏବଂ ପଡ଼ୋଶୀମାନଙ୍କ ସହ ମଧ୍ୟ ତାର ସମ୍ପର୍କ ଭଲ ନଥିଲାା

ତାମିଲନାଡୁର ତିରୁନେଲଭେଲି ଅଞ୍ଚଳରେ ଏକ ଅଭାବନୀୟ ତଥା ହୃଦୟବିଦାରକ ଘଟଣା ଦେଖିବାକୁ ମିଳିଛି। ପତ୍ନୀଙ୍କ ଚରିତ୍ର ଉପରେ ସନ୍ଦେହ କରି ଜଣେ ବ୍ୟକ୍ତି ତାଙ୍କୁ ବସ୍ ଷ୍ଟାଣ୍ଡରେ ଦିନଦ୍ୱିପ୍ରହରରେ ଗୋଡ଼ାଇ ଗୋଡ଼ାଇ ଅତି ନିର୍ମମ ଭାବେ ହାଣି ହତ୍ୟା କରିଛନ୍ତି। ଏହି ଘଟଣା ସମଗ୍ର ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି।

ସନ୍ଦେହରୁ ଗଲା ଜୀବନ

ମିଳିଥିବା ସୂଚନା ଅନୁଯାୟୀ, ତିରୁନେଲଭେଲି ଜିଲ୍ଲାର ପାଲାମାଡାଇ ଅଞ୍ଚଳର ବାସିନ୍ଦା ସୁଧାକରଙ୍କ ସହ ପେଚିୟମ୍ମଲଙ୍କ ବିବାହ ହୋଇଥିଲା। ଉଭୟଙ୍କର ଦୁଇଟି ସନ୍ତାନ ମଧ୍ୟ ଅଛନ୍ତି। ତେବେ ଗତ କିଛି ଦିନ ହେବ ସ୍ୱାମୀ ଓ ସ୍ତ୍ରୀଙ୍କ ମଧ୍ୟରେ ପାରିବାରିକ ବିବାଦ ଲାଗି ରହିଥିଲା। ନିଜ ପତ୍ନୀଙ୍କର ଅନ୍ୟ କାହା ସହିତ ଅବୈଧ ସମ୍ପର୍କ ଥିବା ନେଇ ସୁଧାକର ସବୁବେଳେ ସନ୍ଦେହ କରୁଥିଲେ। ଏହି କାରଣରୁ ଉଭୟଙ୍କ ମଧ୍ୟରେ ଝଗଡ଼ା ହେଉଥିଲା ଏବଂ ବିବାଦ ବଢ଼ିବାରୁ ପେଚିୟମ୍ମଲ ନିଜ ସ୍ୱାମୀଙ୍କଠାରୁ ଅଲଗା ରହୁଥିଲେ।

କିପରି ଘଟିଲା ଘଟଣା?

ସୁଧାକର ନିଜ ସ୍ତ୍ରୀଙ୍କ ଉପରେ ରାଗ ରଖିଥିବା ବେଳେ ତାଙ୍କୁ ହତ୍ୟା କରିବା ପାଇଁ ଯୋଜନା କରିଥିଲେ। ଘଟଣା ଦିନ ପେଚିୟମ୍ମଲ ଘରୁ ବାହାରି ଏକ ବସ୍ ଷ୍ଟାଣ୍ଡରେ ଛିଡ଼ା ହୋଇଥିଲେ। ସେହି ସମୟରେ ସୁଧାକର ଏକ ଧାରୁଆ ଅସ୍ତ୍ର (ଦାଆ) ଧରି ସେଠାରେ ପହଞ୍ଚିଥିଲେ। ଦିନଦ୍ୱିପ୍ରହରରେ ସର୍ବସମ୍ମୁଖରେ ସେ ନିଜ ସ୍ତ୍ରୀଙ୍କୁ ଗୋଡ଼ାଇ ଗୋଡ଼ାଇ ଆକ୍ରମଣ କରିଥିଲେ। ରକ୍ତ ଜୁଡୁବୁଡୁ ଅବସ୍ଥାରେ ଘଟଣାସ୍ଥଳରେ ହିଁ ପେଚିୟମ୍ମଲଙ୍କର ମୃତ୍ୟୁ ହୋଇଯାଇଥିଲା।

ଥାନାରେ ସ୍ୱାମୀର ଆତ୍ମସମର୍ପଣ

ଏହି ବର୍ବରକାଣ୍ଡ ଭିଆଇବା ପରେ ଅଭିଯୁକ୍ତ ସ୍ୱାମୀ ଘଟଣାସ୍ଥଳରୁ ଫେରାର ହେବା ପରିବର୍ତ୍ତେ ସିଧାସଳଖ ନିକଟସ୍ଥ ପୋଲିସ୍ ଷ୍ଟେସନରେ ପହଞ୍ଚିଥିଲେ। ସେଠାରେ ସେ ନିଜର ଦୋଷ ସ୍ୱୀକାର କରିବା ସହ ଆତ୍ମସମର୍ପଣ କରିଥିଲେ। ପୋଲିସ୍ ତୁରନ୍ତ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ (ପୋଷ୍ଟମର୍ଟମ) ପାଇଁ ପଠାଇଛି। ବର୍ତ୍ତମାନ ପୋଲିସ୍ ଏହି ହତ୍ୟାକାଣ୍ଡର ଅଧିକ ତଦନ୍ତ ଜାରି ରଖିଥିବା ସୂଚନା ମିଳିଛି।