ବିଶ୍ୱର ସବୁଠାରୁ ଲୋକପ୍ରିୟ ଇନଷ୍ଟାଣ୍ଟ ମେସେଜିଂ ଆପ୍ ହ୍ୱାଟ୍ସଆପ୍ (WhatsApp) ବ୍ୟବହାରକାରୀଙ୍କ ପାଇଁ ଏକ ବଡ଼ ଖବର । ଆଗାମୀ ସେପ୍ଟେମ୍ବର ୮, ୨୦୨୬ ଠାରୁ କୋଟି କୋଟି ପୁରୁଣା ଆଣ୍ଡ୍ରଏଡ୍ ସ୍ମାର୍ଟଫୋନରେ ହ୍ୱାଟ୍ସଆପ୍ କାମ କରିବା ବନ୍ଦ କରିଦେବ । ମେଟା (Meta) ମାଲିକାନାରେ ଥିବା ଏହି କମ୍ପାନୀ ସୁରକ୍ଷା ବ୍ୟବସ୍ଥାକୁ ମଜବୁତ କରିବା ଏବଂ ନୂଆ ଫିଚର ପ୍ରଦାନ କରିବା ଉଦ୍ଦେଶ୍ୟରେ ଏଭଳି ନିଷ୍ପତ୍ତି ନେଇଛି ।

କେଉଁ ଫୋନରେ ବନ୍ଦ ହେବ ହ୍ୱାଟ୍ସଆପ୍?

ରିପୋର୍ଟ ଅନୁଯାୟୀ, ଯେଉଁ ୟୁଜର୍ସଙ୍କ ସ୍ମାର୍ଟଫୋନ୍ ଆଣ୍ଡ୍ରଏଡ୍ ୬.୦ (Android 6.0) ରୁ ପୁରୁଣା ଅପରେଟିଂ ସିଷ୍ଟମରେ ଚାଲୁଛି, ସେମାନେ ଆଉ ଏହି ଆପ୍ ବ୍ୟବହାର କରିପାରିବେ ନାହିଁ । ଏହାର ଅର୍ଥ ହେଉଛି, ଆଣ୍ଡ୍ରଏଡ୍ ୫.୦ (Android 5.0) ଏବଂ ଆଣ୍ଡ୍ରଏଡ୍ ୫.୧ (Android 5.1) ଭର୍ସନରେ ଚାଲୁଥିବା ଡିଭାଇସ୍‌ଗୁଡ଼ିକରେ ଆସନ୍ତା ସେପ୍ଟେମ୍ବର ୮ ତାରିଖ ପରେ ହ୍ୱାଟ୍ସଆପ୍ ସମ୍ପୂର୍ଣ୍ଣ ଭାବେ ବନ୍ଦ ହୋଇଯିବ । ତେବେ, ଆଇଓଏସ (iOS 15.1) କିମ୍ବା ତା'ଠାରୁ ନୂଆ ଅପଡେଟ୍ ବ୍ୟବହାର କରୁଥିବା ଆଇଫୋନ୍ ୟୁଜର୍ସଙ୍କ ଉପରେ ଏହାର କୌଣସି ପ୍ରଭାବ ପଡ଼ିବ ନାହିଁ ।

କାହିଁକି ନିଆଗଲା ଏହି ନିଷ୍ପତ୍ତି?

ହ୍ୱାଟ୍ସଆପ୍ ସମୟ ସମୟରେ ନିଜର ନିରାପତ୍ତା (Security), ଭିଡିଓ କଲିଂ, ଏଣ୍ଡ୍-ଟୁ-ଏଣ୍ଡ୍ ଏନକ୍ରିପସନ୍ ଏବଂ ଅନ୍ୟାନ୍ୟ ନୂଆ ଫିଚରଗୁଡ଼ିକୁ ଅପଡେଟ୍ କରିଥାଏ । ପୁରୁଣା ସ୍ମାର୍ଟଫୋନ୍‌ର ହାର୍ଡୱେର୍ ଏବଂ ସଫ୍ଟୱେର୍ ଏହି ଆଧୁନିକ ଫିଚରଗୁଡ଼ିକୁ ସପୋର୍ଟ କରିବାରେ ଅସମର୍ଥ । ତେଣୁ, ଆପ୍‌ର କାର୍ଯ୍ୟକ୍ଷମତା ଏବଂ ବ୍ୟବହାରକାରୀଙ୍କ ଡାଟା ସୁରକ୍ଷାକୁ ଦୃଷ୍ଟିରେ ରଖି କମ୍ପାନୀ ପୁରୁଣା ଅପରେଟିଂ ସିଷ୍ଟମରୁ ସପୋର୍ଟ ପ୍ରତ୍ୟାହାର କରୁଛି । ଏହାଦ୍ୱାରା ବିଶ୍ୱବ୍ୟାପୀ ପ୍ରାୟ ୩ ନିୟୁତ (3 million) ବ୍ୟବହାରକାରୀ ପ୍ରଭାବିତ ହେବାର ଆଶଙ୍କା ରହିଛି ।

ୟୁଜର୍ସ ଏବେ କ'ଣ କରିବେ?

ହ୍ୱାଟ୍ସଆପ୍ ପକ୍ଷରୁ ପ୍ରଭାବିତ ହେବାକୁ ଥିବା ୟୁଜର୍ସଙ୍କୁ ଆପ୍ ଖୋଲିବା ମାତ୍ରେ ଏକ ଆଲର୍ଟ ନୋଟିଫିକେସନ୍ ଦିଆଯାଉଛି । ଯଦି ଆପଣଙ୍କ ଫୋନ୍ ବହୁତ ପୁରୁଣା, ତେବେ ତୁରନ୍ତ ନିଜର ଜରୁରୀ ଚାଟ୍ ଏବଂ ମିଡିଆ ଫାଇଲ୍‌କୁ ଗୁଗୁଲ୍ ଡ୍ରାଇଭ୍ (Google Drive) କିମ୍ବା ଲୋକାଲ୍ ଷ୍ଟୋରେଜ୍‌ରେ ବ୍ୟାକଅପ୍ ନେଇଯାଆନ୍ତୁ । ହ୍ୱାଟ୍ସଆପ୍ ସେବା ଅବ୍ୟାହତ ରଖିବା ପାଇଁ ୟୁଜର୍ସଙ୍କୁ ନିଜ ଫୋନ୍‌ର ସଫ୍ଟୱେର୍ ଅପଡେଟ୍ କରିବାକୁ ପଡ଼ିବ କିମ୍ବା ଏକ ନୂଆ ସ୍ମାର୍ଟଫୋନ୍ କିଣିବାକୁ ପଡ଼ିବ ।

ଭୁବନେଶ୍ୱର: ଖରାଛୁଟିରେ ପାଠ ପଢିବେ ପିଲା । ଅଭିଭାବକଙ୍କ ହ୍ବାଟ୍ସଆପ୍‌ରେ ଦିଆଯିବ ପାଠ । ଏଥର ଖରା ଛୁଟିରେ ପିଲାଙ୍କୁ ହ୍ବାଟ୍ସଆପ୍‌ରେ ସମର ଲର୍ଣ୍ଣିଂ ବ୍ୟବସ୍ଥା । ବାପା ମାଆଙ୍କ ହ୍ୱାଟ୍ସଆପ୍‌ ଜରିଆରେ ଛାତ୍ରଛାତ୍ରୀଙ୍କୁ ଦିଆଯିବ ଆସାଇନ୍‌ମେଣ୍ଟ । ଶିଶୁ ବାଟିକାରୁ ଅଷ୍ଟମ ଶ୍ରେଣୀ ପିଲାଙ୍କ ପାଇଁ ବ୍ୟବସ୍ଥା ନେଇ ସବୁ ଡିଇଓଙ୍କୁ ଚିଠି ଲେଖିଛି ଓସେପା । ସବୁ ଜିଲ୍ଲା ଶିକ୍ଷା ଅଧିକାରୀଙ୍କୁ ଆସନ୍ତା ୨୫ ସୁଦ୍ଧା ହ୍ବାଟ୍ସଆପ ଗ୍ରୁପ୍‌ ପାଇଁ ନିର୍ଦ୍ଦେଶ ଦିଆଯାଇଛି। 

ଶିଶୁ ବାଟିକାଠାରୁ କ୍ଲାସ୍-୮ ପର୍ଯ୍ୟନ୍ତ ଛାତ୍ରଛାତ୍ରୀଙ୍କ ପାଇଁ ବର୍ଗ ଓ ବିଷୟ ଅନୁସାରେ ଅଭ୍ୟାସ ପତ୍ର ପ୍ରସ୍ତୁତ କରାଯାଇଛି, ଯାହା ଗ୍ରୀଷ୍ମ ଛୁଟି ସମୟରେ ଅଭ୍ୟାସ ପାଇଁ ଛାତ୍ରଛାତ୍ରୀଙ୍କୁ ଦିଆଯିବ। ଏହା ସହିତ, କ୍ଲାସ୍-୮ ପର୍ଯ୍ୟନ୍ତ ଅଡିଓ-ଭିଜୁଆଲ୍ ତଥ୍ୟ ସହ ଲିଙ୍କ୍ ଯୁକ୍ତ ଅଭ୍ୟାସ ପତ୍ର ଛାତ୍ରଛାତ୍ରୀଙ୍କ ଅଭିଭାବକଙ୍କ ହ୍ୱାଟ୍ସଆପ୍ ଗ୍ରୁପ୍ ମାଧ୍ୟମରେ ସିଧାସଳଖ ଛାତ୍ରଛାତ୍ରୀଙ୍କୁ ପଠାଯିବ ।

ଲୋକପ୍ରିୟ ମେସେଜିଂ ଆପ୍ WhatsApp ବ୍ୟବହାର କରୁଥିବା ଅନେକ ୟୁଜର୍ସଙ୍କୁ ବର୍ତ୍ତମାନ ଏକ ବଡ଼ ସମସ୍ୟାର ସମ୍ମୁଖୀନ ହେବାକୁ ପଡୁଛି। କେବଳ ଭାରତରେ ନୁହେଁ, ସାରା ବିଶ୍ୱରେ ଅନେକ ୟୁଜର୍ସ ଏହି ସମସ୍ୟା ଭୋଗୁଥିବା ଜଣାପଡ଼ିଛି। ରିପୋର୍ଟ ଅନୁଯାୟୀ, ହ୍ୱାଟ୍ସଆପ୍‌ରେ ନା ମେସେଜ୍ ଆସୁଛି, ନା ଯାଉଛି। ଏପରିକି ଆପ୍ ହଠାତ୍ ହ୍ୟାଙ୍ଗ୍ (କାମ ନକରିବା) ହୋଇଯାଉଥିବା ନେଇ ଅନେକ ବ୍ୟବହାରକାରୀ ଅଭିଯୋଗ କରିଛନ୍ତି।

ହଠାତ୍ ହ୍ୟାଙ୍ଗ୍ ହେଉଛି ଆପ୍

ୟୁଜର୍ସଙ୍କ କହିବା ଅନୁଯାୟୀ, ସେମାନେ ନିଜ ହ୍ୱାଟ୍ସଆପ୍ ଆକାଉଣ୍ଟରେ ଅନେକ ଅସୁବିଧା ଦେଖିବାକୁ ପାଉଛନ୍ତି। ବିଶେଷ କରି ମେସେଜ୍ ପଠାଇବା କିମ୍ବା ଗ୍ରହଣ କରିବା ସମୟରେ ଆପ୍ ଅଟକି ଯାଉଛି। ସୋସିଆଲ ମିଡିଆ ପ୍ଲାଟଫର୍ମ ରେଡିଟ୍ (Reddit) ରେ ଜଣେ ୟୁଜର୍ ଏହି ସମସ୍ୟାକୁ ନେଇ ଏକ ପୋଷ୍ଟ କରିଥିଲେ। ସେ ଉଲ୍ଲେଖ କରିଛନ୍ତି ଯେ, ତାଙ୍କର ମେସେଜିଂ ଆପ୍ କିଛି ଦିନ ହେବ ସଠିକ୍ ଭାବେ କାମ କରୁନାହିଁ। ମେସେଜ୍ ରିସିଭ୍ କରିବା କିମ୍ବା ସେଣ୍ଡ୍ କରିବା ପରେ ହଠାତ୍ କିଛି ସେକେଣ୍ଡ୍ ପାଇଁ ଆପ୍ କାମ କରିବା ବନ୍ଦ କରିଦେଉଛି ବା ଅଟକି ଯାଉଛି।

ଅନ୍ୟ ୟୁଜର୍ସଙ୍କ ପ୍ରତିକ୍ରିୟା

ଏହି ପୋଷ୍ଟ ପରେ ଅନ୍ୟ ଅନେକ WhatsApp ୟୁଜର୍ସ ମଧ୍ୟ ନିଜର ଅନୁଭୂତି ସେୟାର କରିଛନ୍ତି। ସେମାନେ ମଧ୍ୟ ସମାନ ସମସ୍ୟାର ସମ୍ମୁଖୀନ ହେଉଥିବା ମାନିଛନ୍ତି। ହ୍ୱାଟ୍ସଆପ୍ ବାରମ୍ବାର କ୍ରାସ୍ କିମ୍ବା ହ୍ୟାଙ୍ଗ୍ ହେଉଥିବାରୁ ଏହାକୁ ବ୍ୟବହାର କରିବାରେ ବହୁତ ଅସୁବିଧା ହେଉଛି। ତେବେ, ଏହି ସମସ୍ୟା କାହିଁକି ଉପୁଜିଛି ସେ ନେଇ ବର୍ତ୍ତମାନ ସୁଦ୍ଧା କୌଣସି ସ୍ପଷ୍ଟ ସୂଚନା ମିଳିପାରି ନାହିଁ।

ସମସ୍ତ ୟୁଜର୍ସଙ୍କ ପାଇଁ ନୁହେଁ ଏହି ସମସ୍ୟା

ଧ୍ୟାନ ଦେବାର କଥା ହେଉଛି, ଏହି ଅସୁବିଧା ସମସ୍ତ ହ୍ୱାଟ୍ସଆପ୍ ୟୁଜର୍ସଙ୍କ ସହ ହେଉନାହିଁ। କେବଳ କିଛି ନିର୍ଦ୍ଦିଷ୍ଟ ବ୍ୟବହାରକାରୀ ଏହି ବୈଷୟିକ ତ୍ରୁଟି (Technical Glitch) ର ସମ୍ମୁଖୀନ ହେଉଛନ୍ତି। ଏଭଳି ସ୍ଥିତିରେ ଯଦି ଆପଣଙ୍କର ବି ଆପ୍ ହ୍ୟାଙ୍ଗ୍ କରୁଛି କିମ୍ବା ମେସେଜ୍ ଯିବା-ଆସିବାରେ ବିଳମ୍ବ ହେଉଛି, ତେବେ ଆପ୍‌କୁ ଅପଡେଟ୍ କରିବା କିମ୍ବା ଫୋନ୍ ରିଷ୍ଟାର୍ଟ କରିବା ଏକ ସାଧାରଣ ପ୍ରତିକାର ହୋଇପାରେ ବୋଲି କୁହାଯାଉଛି।

ଭୁବନେଶ୍ୱର: ଏଣିକି ହ୍ୱାଟସଆପରେ ମିଳିବ ରାଜସ୍ବ ସେବା । ଆଉ ବାରମ୍ବାର ତହସିଲକୁ ଦୌଡ଼ିବାକୁ ପଡ଼ିବ ନାହିଁ । 'ଆମ ସାଥୀ ୟୁନିଫାଏଡ୍‌ ହ୍ବାଟ୍ସଆପ୍‌ ବଟ’ ଉନ୍ମୋଚନ କରିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ଏହାସହ ୫୭ଟି ଉପ ନିବନ୍ଧନ କାର୍ଯ୍ୟାଳୟର ମଧ୍ୟ ଉଦଘାଟନ କରିଛନ୍ତି ମୁଖ୍ୟମନ୍ତ୍ରୀ । 9437292000 ହ୍ବାଟ୍ସଆପ୍‌ ନଂରେ ରାଜସ୍ବ ସେବା ପାଇହେବ । ୨୪ ଘଣ୍ଟିଆ ସେବା ଯୋଗାଇବ ରାଜସ୍ୱ ବିଭାଗ । ଜମି ଜମା ବାବଦରେ ସମସ୍ତ ଅଭିଯୋଗ ଓ ଆବେଦନ ଏଥିରେ ଗ୍ରହଣ କରାଯିବ । 

ଲୋକସେବା ଭବନରେ ଆମ ସାଥି ସହାୟକ ୟୁନିଫାଏଡ୍ ହ୍ୱାଟସଆପ୍‌ ବଟ ର ଉନ୍ମୋଚନ କରିଛନ୍ତି ମୁଖ୍ୟମନ୍ତ୍ରୀ । ଆଜିଠୁ ହ୍ୱାଟସଆପ୍‌ ମେସେଜରେ ମିଳିବ ରାଜସ୍ବ ସେବା । 9437292000 WhatsApp ନଂରେ ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗର ମୁଖ୍ୟ ନାଗରିକ କୈନ୍ଦିକ ସେବା ଗୁଡ଼ିକ ସହ ୧୭୦ରୁ ଅଧିକ ଜରୁରୀ ସରକାରୀ ସେବା ମିଳିବ । ସେବା ପାଇବାରେ ବ୍ୟାଘାତ ହେଲେ ରାଜସ୍ବ ବିଭାଗରେ ଅଭିଯୋଗ କରିପାରିବେ ଆବେଦନକାରୀ । ଏଥିସହ ୫୭ଟି ଉପ-ନିବନ୍ଧନ କାର୍ଯ୍ୟାଳୟର ଉଦଘାଟନ କରିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ ।

ନୂଆଦିଲ୍ଲୀ: ବିପଦରେ ବିଶ୍ବର ୩.୫ ବିଲିୟନ ଅର୍ଥାତ୍‌ ୩୫୦ କୋଟିରୁ ଅଧିକ ହ୍ୱାଟ୍ସଆପ୍ ବ୍ୟବହାରକାରୀଙ୍କ ବ୍ୟକ୍ତିଗତ ତଥ୍ୟ। ଏଥିରେ କେବଳ ଭାରତର ସର୍ବାଧିକ ୭୪.୯ କୋଟି ବ୍ୟବହାରକାରୀଙ୍କ ଆକାଉଣ୍ଟ ରହିଛି। ସୁରକ୍ଷାରେ ବଡ଼ ତ୍ରୁଟି ଯୋଗୁ ହ୍ୱାଟ୍ସଆପ୍‌ରେ ବ୍ୟବହାରକାରୀଙ୍କ ପ୍ରୋଫାଇଲ୍ ପିକ୍ଚର ଏବଂ ଷ୍ଟାଟସ୍ ଆଦିରେ ଥିବା ତଥ୍ୟ ଲିକ୍ ହୋଇଯାଇପାରେ। ଭିଏନା ବିଶ୍ୱବିଦ୍ୟାଳୟର ଗବେଷକମାନେ ଏହି ତ୍ରୁଟିକୁ ଧରିଛନ୍ତି।

ଗବେଷକଙ୍କ ଅନୁଯାୟୀ, ଏହି ଦୁର୍ବଳତା ଯେକୌଣସି ବ୍ୟକ୍ତିଙ୍କୁ ଯାଞ୍ଚ କରିବାକୁ ଅନୁମତି ଦିଏ ଯେ ଜଣେ ବ୍ୟକ୍ତି ହ୍ୱାଟ୍ସଆପ୍‌ରେ ସକ୍ରିୟ ଅଛନ୍ତି କି ନାହିଁ୤ ତା’ପରେ ସେମାନଙ୍କ ପ୍ରୋଫାଇଲ୍ ପିକ୍ଚର ଓ ଷ୍ଟାଟସ୍‌ର ବିବରଣୀ ସହଜରେ ବାହାର କରାଯାଇପାରିବ। ପରେଏହାର ସମ୍ଭାବ୍ୟ ଅପବ୍ୟବହାର କରାଯାଇପାରେ ବୋଲି ଗବେଷକମାନେ କହିଛନ୍ତି। ଏହି ସମସ୍ୟାଟି ହ୍ୱାଟ୍ସଆପ୍‌ର କନେକ୍ଟ ଡିସ୍‌କଭରି ଫିଚରର ବୈଶିଷ୍ଟ୍ୟରେ ରହିଛି। ଏହା ବ୍ୟବହାରକାରୀଙ୍କ ଫୋନ୍ ଠିକଣା ପୁସ୍ତିକାକୁ ସିଙ୍କ୍ କରି ଲୋକଙ୍କୁ ସର୍ଚ୍ଚ ସହଜ କରିବା ପାଇଁ ଡିଜାଇନ୍ କରାଯାଇଥିଲା, କିନ୍ତୁ ଏହା ଅଜାଣତରେ ୟୁଜରଙ୍କ ଡାଟାର ବଡ଼ ପରିମାଣରେ ଚୋରି ପାଇଁ ଦ୍ୱାର ଖୋଲି ଦେଇଥିଲା। ଗବେଷକମାନେ ରିପୋର୍ଟ କରିଛନ୍ତି ଯେ ଏଥିରେ ବିଶ୍ବର ୩୫୦ କୋଟି ବ୍ୟବହାରକାରୀଙ୍କ ମଧ୍ୟରୁ ଭାରତର ୭୪.୯ କୋଟି (୨୧.୬୭%), ଇଣ୍ଡୋନେସିଆର ୨୩୫ନିୟୁତ (୬.୮୧%), ବ୍ରାଜିଲର ୨୦୭ ନିୟୁତ (୫.୯୯%), ଯୁକ୍ତରାଷ୍ଟ୍ରରେ ୧୩୮ ନିୟୁତ (୩.୯୯%) ଏବଂ ରୁଷରେ ୧୩୩ ନିୟୁତ (୩.୮୪%) ରହିଛି। ଏଥିରେ ୮୧% ଆଣ୍ଡ୍ରଏଡ୍ ଏବଂ ୧୯% ଆଇଓଏସ୍‌ ବ୍ୟବହାରକାରୀ ଅନ୍ତର୍ଭୁକ୍ତ। ଏହାସହିତ, ୯% ବ୍ୟବସାୟିକ ଆକାଉଣ୍ଟ ମଧ୍ୟ ଏଥିରେ ରହିଛି।

ନୂଆଦିଲ୍ଲୀ: ହ୍ବାଟ୍ସଆପ୍‌ ବିଭିନ୍ନ ସମୟରେ ତା’ର ବ୍ୟବହାରକାରୀଙ୍କୁ ନୂଆ ସୁବିଧା ପ୍ରଦାନ କରିବା ଲାଗି ଭିନ୍ନ ଭିନ୍ନ ଫିଚର୍‌କୁ ପରିଚିତ କରାଏ। ଏହି କ୍ରମରେ ଏବେ ଭଏସ୍ ମେସେଜ୍‌କୁ ଟେକ୍ସଟ୍‌ରେ ରୂପାନ୍ତରିତ କରିବା ଲାଗି ନୂଆ ଫିଚର୍‌ ଆସିଛି। ଏହାର ନାଁ ‘ମେସେଜ ଟ୍ରାନ୍ସକ୍ରିପ୍ଟ ଫିଚର୍’। ତେବେ ସବୁ ସମୟରେ ଜଣେ ଭଏସ୍‌ ମେସେଜ ଶୁଣିବାକୁ ସକ୍ଷମ ନ ଥାନ୍ତି। ବେଳେ ବେଳେ ପରିବେଶ ମଧ୍ୟ ଭଏସ୍‌ ମେସେଜ ଲାଗି ଉପଯୁକ୍ତ ହୋଇ ନ ଥାଏ। ଏହାକୁ ଦୃଷ୍ଟିରେ ରଖି ହ୍ବାଟ୍ସଆପ୍‌ ଏବେ ମେସେଜ ଶୁଣିବା ପରିବର୍ତ୍ତେ ଏହାକୁ ପଢ଼ିବାର ସୁବିଧା ପ୍ରଦାନ କରିବ। ଯେଉଁଥିରେ ହ୍ବାଟ୍ସଆପ୍‌ର ମେସେଜ ଟ୍ରାନ୍ସକ୍ରିପ୍ଟ ଫିଚର୍ ଅଡିଓ ମେସେଜକୁ ଟେକ୍ସଟ୍‌ରେ ରୂପାନ୍ତରିତ କରିଥାଏ। ଟ୍ରାନ୍ସକ୍ରିପ୍ଟ ସିଧା ଫୋନ୍‌ରେ ହିଁ ତିଆରି ହୁଏ। ଏହାର ଅର୍ଥ ହେଉଛି, ହ୍ବାଟ୍ସଆପ୍‌ ମଧ୍ୟ ଭଏସ୍ ମେସେଜକୁ ଶୁଣି କିମ୍ବା ପଢ଼ି ପାରିବ ନାହିଁ। ଏହି ଫିଚର୍‌କୁ ଉପଯୋଗ କରିବା ପାଇଁ ଏହାର ସେଟିଂକୁ ଯାଇ ଚାଟ୍‌କୁ ଯିବାକୁ ପଡ଼ିବ। ଏହାପରେ ଭଏସ୍ ମେସେଜ ଟ୍ରାନ୍ସକ୍ରିପ୍ଟକୁ ଅନ୍ କରିବାକୁ ପଡ଼ିବ। ଏଠାରେ ନିଜ ପସନ୍ଦର ଭାଷା ଚୟନର ସୁବିଧା ମିଳେ। ଭଏସ୍ ମେସେଜକୁ ଟେକ୍ସଟ୍‌ରେ ଦେଖିବା ଲାଗି ଭଏସ୍ ମେସେଜ ଉପରେ ଦୀର୍ଘ ସମୟ ପ୍ରେସ୍‌ କରି ରଖିବାକୁ ହେବ ଏବଂ ଏହାପରେ ଟ୍ରାନ୍ସକ୍ରିବ୍‌ ଉପରେ ଟ୍ୟାପ୍ କରିବାକୁ ହୁଏ।

ହ୍ବାଟସ୍‌ଆପ୍‌ ତା’ର ବ୍ୟବହାରକାରୀଙ୍କ ପାଇଁ ନୂଆ ନୂଆ ଫିଚର୍‌ ବିଭିନ୍ନ ସମୟରେ ଜାରି କରିଥାଏ। ଏହି କ୍ରମରେ ଏବେ କମ୍ପାନି ଏକ ବଡ଼ ଫିଚର୍‌ ଆଣିବା ଦିଗରେ କାର୍ଯ୍ୟ କରୁଛି। ଏହି ନୂଆ ଫିଚର୍‌ ମାଧ୍ୟମରେ ବ୍ୟବହାରକାରୀ କୌଣସି ଭାଷାରେ ଲିଖିତ ମେସେଜ୍‌କୁ ସହଜରେ ଅନୁବାଦ କରିପାରିବେ। କହିବାକୁ ଗଲେ ଅଲଗା ଭାଷାରେ ଆସୁଥିବା ମେସେଜ୍‌କୁ ପଢ଼ିବା ପାଇଁ ଆଉ ଟ୍ରାନ୍ସଲେସନ୍‌ ଆପ୍‌ ଦରକାର ପଡ଼ିବ ନାହିଁ।

ବ୍ୟବହାରକାରୀ କେଉଁ ମେସେଜକୁ ଟ୍ରାନ୍ସଲେସନ କରିବେ କି ନାହିଁ, ତାହା ଏହି ଫିଚର୍‌ ମାଧ୍ୟମରେ ଚୟନ କରିପାରିବେ। ତେବେ ଏହି ଫିଚର୍‌ ପାଇଁ ହ୍ବାଟ୍ସଆପ୍‌କୁ ଲାଙ୍ଗୁଏଜ୍‌ ପ୍ୟାକ୍‌ ଡାଉନଲୋଡ୍ କରିବାକୁ ହେବ। ପ୍ରାରମ୍ଭିକ ପର୍ଯ୍ୟାୟରେ କିଛି ଭାଷାକୁ ଏଥିରେ ସମର୍ଥନ ମିଳିବ। ବ୍ୟବହାରକାରୀଙ୍କୁ ମୁଖ୍ୟତଃ ଇଂରାଜୀ, ହିନ୍ଦୀ, ସ୍ପେନିସ୍‌, ରୁଷୀୟ ଭାଷା ଅନୁବାଦ କରିବାର ସୁବିଧା ପ୍ରଦାନ କରାଯିବ। ଅବଶ୍ୟ ଏହି ଫିଚର୍‌ ବ୍ୟବହାରକାରୀଙ୍କ ପାଇଁ ଖୁବ୍ ଉପକାରୀ ସାବ୍ୟସ୍ତ ହେବ ବୋଲି କୁହାଯାଉଛି।

ନୂଆଦିଲ୍ଲୀ: ୟୁଜରମାନଙ୍କ ଚାହିଦାକୁ ଦୃଷ୍ଟିରେ ରଖି ଲଗାତାର ନୂଆ ଅପଡେଟ୍‌ ଆଣୁଛି ସୋସିଆଲ ମିଡିଆ ପ୍ଲାଟଫର୍ମ ହ୍ୱାଟ୍ସଆପ୍। ଏବେ ଅଜଣା ନମ୍ବରରେ କଥା ହେବା ସମୟରେ ୟୁଜରଙ୍କ ମୋବାଇଲ ନମ୍ବର ଚୋରି ହୋଇପାରିବନାହିଁ। ଅନେକ ସମୟରେ ହ୍ୱାଟ୍ସଆପରେ କୌଣସି ଅଜଣା ବ୍ୟକ୍ତିଙ୍କୁ କିଛି ମେସେଜ୍‌ କରିବାକୁ ହେଲେ ତାଙ୍କ ନମ୍ବର ସେଭ୍ କରିବାକୁ ବାଧ୍ୟ ହୋଇଥାନ୍ତି ୟୁଜର, କିନ୍ତୁ ସେହି ବ୍ୟକ୍ତିଙ୍କ ନମ୍ବର ସେଭ କରିବାକୁ ଇଚ୍ଛା ନ ଥିଲେ ମଧ୍ୟ ଏମିତି କରିବାକୁ ଜଣେ ୟୁଜର ବାଧ୍ୟ ହୋଇଥାନ୍ତି। ତେବେ ଏହି ସମସ୍ୟାର ସମାଧାନ ପାଇଁ ହ୍ୱାଟ୍ସଆପ୍ ଆଣୁଛି ନୂଆ ଫିଚର। ହ୍ୱାଟ୍ସଆପରେ ବର୍ତ୍ତମାନ ଏକ ନୂଆ ଦମଦାର ଫିଚର ଆସିବାକୁ ଯାଉଛି। ଅଜଣା ବ୍ୟକ୍ତିଙ୍କ ନମ୍ବର ସେଭ ନ କରି ତାଙ୍କୁ ମେସେଜ କରିବା ଏବେ ସମ୍ଭବ ହୋଇପାରିବ। ଏଥିପାଇଁ ହ୍ୱାଟ୍ସଆପର ଏହି ଫିଚର ଖୁବ ସହାୟକ ହେବ ବୋଲି ଆଶା କରାଯାଉଛି।

ତେବେ ବର୍ତ୍ତମାନ ‘ହ୍ୱାଟ୍ସଆପ୍ ସର୍ଚ୍ଚ ୟୁଜରନେମ୍ ଫିଚର’ ମଧ୍ୟ ୱେବ କ୍ଲାଏଣ୍ଟସଙ୍କ ପାଇଁ ଉପଲବ୍ଧ ହୋଇପାରିବ। ବର୍ତ୍ତମାନ ହ୍ୱାଟ୍ସଆପର ଏହି ନୂଆ ଫିଚର ବିକାଶ ପର୍ଯ୍ୟାୟରେ ରହିଛି। ତେବେ ବର୍ତ୍ତମାନ ଏହି ଫିଚର ଆଣ୍ଡ୍ରଏଡ ପାଇଁ ହ୍ୱାଟ୍ସଆପ ବିଟାରେ ଦେଖିବାକୁ ମିଳିଛି। ୟୁଜରମାନଙ୍କ ଗୋପନୀୟତା ଏବଂ ସୁରକ୍ଷାକୁ ବଢାଇବା ପାଇଁ ଏହି ଫିଚରକୁ ବିକାଶ କରାଯାଉଛି। ଏହି ନୂଆ ଫିଚର ହ୍ୱାଟ୍ସଆପ୍ କମ୍ୟୁନିଟି ବ୍ୟବହାର କରୁଥିବା ୟୁଜରମାନଙ୍କ ପାଇଁ ପ୍ରଥମରୁ ଉପଲବ୍ଧ ରହିଛି। ଏହା ୟୁଜରମାନଙ୍କୁ ନିଜ ୟୁଜରନେମ୍ ସାହାଯ୍ୟରେ କଣ୍ଟାକ୍ଟସକୁ ଦେଖିବା ପାଇଁ ଅନୁମତି ଦେଇଥାଏ। ୱେବ୍ କ୍ଲାଏଣ୍ଟ ପାଇଁ ହ୍ୱାଟ୍ସଆପ୍ ୟୁଜର୍ ନେମ୍ ଫିଚର ଲୋକପ୍ରିୟ ହ୍ୱାଟ୍ସଆପ୍ ବିଟା ଅପଡେଟ୍ ଟ୍ରାକିଂ ପ୍ଲାଟଫର୍ମରେ ଦେଖିବାକୁ ମିଳିଛି। ହ୍ୱାଟ୍ସଆପ୍ ୱେବ୍ କ୍ଲାଏଣ୍ଟ ୟୁଜରମାନଙ୍କୁ ପ୍ଲାଟଫର୍ମରେ ସେମାନଙ୍କର ୟୁନିକ୍‌ ୟୁଜର ନେମ୍ ବ୍ୟବହାର କରି ସେମାନଙ୍କ ବନ୍ଧୁମାନଙ୍କ ସହିତ ସଂଯୋଗ କରିଥାଏ।

ନୂଆଦିଲ୍ଲୀ: ଆଉ ମାଗଣା ସେବା ଦେବ ନାହିଁ ହ୍ୱାଟ୍ସଆପ୍ । ଏଣିକି ହ୍ୱାଟ୍ସଆପ୍ ପେଡ୍ ସବସ୍କ୍ରିପସନ୍ । ଗତ କିଛି ମାସ ପୂର୍ବରୁ ସୋସିଆଲ ମିଡିଆ ପ୍ଲାଟଫର୍ମରେ ଅନେକ ପ୍ରକାର ପରିବର୍ତ୍ତନ ଦେଖିବାକୁ ମିଳିଥିଲା । ଯେଉଁଥିରେ ପେଡ୍ ସବସ୍କ୍ରିପସନ୍ ମଧ୍ୟ ଅନ୍ତର୍ଭୁକ୍ତ ।

ଗୋଟିଏ ପଟେ ଏକ୍ସ( ଟ୍ବିଟର) ଏହାର ସେବା ପାଇଁ ଟଙ୍କା ଚାର୍ଜ କରିବାକ ଆରମ୍ଭ କରିଥିବା ବେଳେ ଇନଷ୍ଟାଗ୍ରାମ ବର୍ତ୍ତମାନ ବ୍ଲୁଟିକ୍ ପାଇଁ ଟଙ୍କା ଆଦାୟ କରୁଛି । ବହୁଳ ବ୍ୟବହାର ହେଉଥିବା ଆପ୍ ବା ଚାର୍ଟିଂ ପ୍ଲାଟଫର୍ମ ‘ହ୍ୱାଟ୍ସଆପ୍’ ମଧ୍ୟ ଖୁବ୍ ଶୀଘ୍ର ଏହି ସମାନ ମାର୍ଗ ଆପଣାଇବାକୁ ଯାଉଛି ।

କୁହାଯାଉଛି କି , ଆଉ କିଛି ଦିନ ପରେ ହ୍ୱାଟ୍ସଆପରେ ସବସ୍କ୍ରିବସନ୍ ପ୍ଲାନ୍ ଆସିବାକୁ ଯାଉଛି, ଯେଉଁରେ ବ୍ୟବହାରକାରୀଙ୍କୁ ଏକ ନିର୍ଦ୍ଦିଷ୍ଟ ଦେୟ ଭରିବାକୁ ପଡିବ ।

ଆପଣଙ୍କୁ କହି ରଖୁଛୁ ଯେ, ନିକଟରେ ହ୍ୱାଟ୍ସଆପ୍ ତରଫରୁ ଏହା ନେଇ ଆଲୋଚନା କରାଯାଇଛି ଏପରି ନିଷ୍ପତି ନିଆଯାଇଛି ବୋଲି ଜଣାପଡିଛି । ଯାହା କି, କମ୍ପାନୀ ଆଉ ବେଶିଦିନ ଯାଏଁ ମାଗଣା ସେବା ଦେବ ନାହିଁ ବରଂ ୟୁଜର୍ସ ମାନଙ୍କ ଠାରୁ ଦେୟ ନେଇ ସେବା ଯୋଗାଇବ ବୋଲି କମ୍ପାନୀ ପକ୍ଷରୁ କୁହାଯାଇଛି । ଏହି କଥା ସବୁ ୟୁଜର୍ସଙ୍କୁ ଚିନ୍ତାରେ ପକାଇବ ଦେବ କାରଣ ଏପରି କେହି ବ୍ୟକ୍ତି ନଥିବେ ଯାହାଙ୍କ ସ୍ମାର୍ଟଫୋନରେ ହ୍ୱାଟ୍ସଆପ୍ ନଥିବ ।

ଯଦି ଏପରି ପ୍ଲାନ୍ ହ୍ୱାଟ୍ସଆପ୍ ପକ୍ଷରୁ ଆରମ୍ଭ ହେବ ତେବେ ମାସିକିଆ ବା ବର୍ଷିକିଆ ସବସ୍କ୍ରିବସନ୍ ପ୍ଲାନ୍ ରହିପାରେ ବୋଲି ଆଲୋଚନା କରାଯାଉଛି ।

ସୂଚନା ଅନୁଯାୟୀ, ଏହି ଦେୟ ଯୁକ୍ତ ପ୍ଲାନ୍ ଲାଗୁ ହେବା ପାଇଁ କିଛି ମାସ ଅବା ଆସନ୍ତା ବର୍ଷର ପ୍ରଥମ ମାସରୁ ଲାଗୁ ହୋଇପାରେ । ଯଦି ଆପଣଙ୍କୁ ହ୍ୱାଟ୍ସଆପରେ ବିଜ୍ଞାପନରୁ ମୁକ୍ତି ପାଇବା ପାଇଁ ଚାହୁଁଛନ୍ତି , ତେବେ ଆପଣଙ୍କୁ ଅଲଗା ଏକ ସବସ୍କ୍ରିବସନ୍ ପ୍ଲାନ୍ କିଣିବାକୁ ପଡିବ । କମ୍ପାନୀ ଅନ୍ୟ କୌଣସି ସେବା ପାଇଁ ଦେୟ ଚାର୍ଜ ନ କଲେ ବି ଆପଣଙ୍କୁ ବିଜ୍ଞାପନ ବିହୀନ ହ୍ୱାଟ୍ସଆପ୍ ଚଲାଇବାକୁ ହେଲେ ଏହି ପ୍ଲାନ୍ ପାଇଁ ଟଙ୍କା ଦେବାକୁ ପଡିପାରେ । ଏହି ପ୍ଲାନ୍ ପ୍ରଥମେ ଆମେରିକା ଏବଂ କାନାଡାରୁ ଆରମ୍ଭ ହେବ ବୋଲି ଅନୁମାନ କରାଯାଉଛି ।

ନୂଆଦିଲ୍ଲୀ: ହ୍ବାଟ୍‌ସ୍‌ଆପ୍‌ ଖୁବ୍‌ଶୀଘ୍ର ବ୍ୟବହାରକାରୀଙ୍କ ପାଇଁ ଏଚ୍‌ଡି ଭିଡିଓ ସୁବିଧା ଉପଲବ୍ଧ କରାଇବ। ଏହି ଫିଚର୍‌ ଦ୍ବାରା ବ୍ୟବହାରକାରୀ ଯେକୌଣସି ଭିଡିଓ ଫାଇଲ୍‌କୁ ବାସ୍ତବିକ ରିଜୋଲ୍ୟୁସନ ସହ ସେୟାର୍‌ କରିପାରିବେ। ପୂର୍ବରୁ ବ୍ୟବହାରକାରୀଙ୍କ ଡାଟା ବଞ୍ଚାଇବା ଏବଂ ଫାଇଲ ଟ୍ରାନ୍ସଫର ପ୍ରକ୍ରିୟାକୁ ଶୀଘ୍ର ବା ତ୍ବରିତ କରିବା ପାଇଁ ଭିଡିଓ ଫାଇଲକୁ କମ୍ପ୍ରେସ୍ କରି ଦିଆଯାଉଥିଲା। ଯାହାକି ଭିଡିଓର କ୍ବାଲିଟି ଉପରେ ପ୍ରଭାବ ପକାଉଥିଲା। ତେବେ ଏଚ୍‌ଡି ଭିଡିଓ ସେୟାର୍‌ ଦ୍ବାରା ଭିଡିଓର ମାନ ଉନ୍ନତଧରଣର ହେବ। ଏହାକୁ ବ୍ୟବହାର କରିବା ପାଇଁ ବ୍ୟବହାରକାରୀ ସେୟାର୍ କରିବାକୁ ଚାହୁଁଥିବା ଚାଟ୍‌ ଉପରେ ଓପନ୍‌ କରି ଆଟାଚ୍‌ମେଣ୍ଟ ଆଇକନ୍ ଉପରେ କ୍ଲିକ୍‌ କରି ଗ୍ୟାଲେରିକୁ ଯିବାକୁ ହେବ। ଏହା ପରେ ଯେଉଁ ଭିଡିଓ ପଠାଇବାକୁ ଚାହୁଁଛନ୍ତି, ସେଥିରେ କ୍ଲିକ୍‌ କରିବାକୁ ପଡ଼ିବ। ସେଇଠୁ ବାମପାର୍ଶ୍ବରେ ଏଚ୍‌ଡି ଆଇକନ୍‌ ଦୃଷ୍ଟିଗୋଚର ହେବ। ଏହାର କ୍ବାଲିଟି ସେଟ୍‌ କରି ସେହି ଭିଡିଓ ଫାଇଲକୁ ପଠାଇପାରିବେ। ସେହିପରି ଡାଟା ବଞ୍ଚାଇବା ପାଇଁ ଏଚ୍‌ଡି ଭିଡିଓ ସେୟାର୍‌ କରିବାକୁ ଚାହୁଁ ନ ଥିଲେ, ଏବେ ବି କମ୍ପ୍ରେସ୍ ଭିଡିଓ ବିକଳ୍ପ ବାଛିପାରିବେ। ଏବେ ଏହା ଆଣ୍ଡ୍ରଏଡ୍‌ ବ୍ୟବହାରକାରୀଙ୍କ ପାଇଁ ଉଦ୍ଦିଷ୍ଟ। ଖୁବ୍‌ଶୀଘ୍ର ଏହାକୁ ଆଇଓଏସ୍‌ ବ୍ୟବହାରକାରୀଙ୍କ ପାଇଁ ଉପଲବ୍ଧ କରାଯିବ।

ନୂଆଦିଲ୍ଲୀ: ଆଜିକାଲି ଲୋକମାନେ ସବୁଠୁ ଅଧିକ ବ୍ୟବହାର କରୁଛନ୍ତି ଲୋକପ୍ରିୟ ମେସେଜିଂ ଆପ୍‌ ହ୍ବାଟସ୍ଆପ୍‌। ବ୍ୟବହାରକାରୀଙ୍କ ସୁବିଧାକୁ ଦୃଷ୍ଟିରେ ରଖି କମ୍ପାନି ନୂଆ ନୂଆ ଫିଚର୍‌ ମାନ ଆଣୁଛି। ତେବେ ଏବେ ହ୍ବାଟ୍ସଆପ୍‌ ବ୍ୟବହାରକାରୀଙ୍କ ପାଇଁ ଆଉ ଏକ ନୂଆ ଫିଚର୍‌ ଆଣିଛି। ଏଥିରେ ଏବେ ୧୫ ଜଣଙ୍କ ସହ ଲୋକେ ଗ୍ରୁପ୍‌ କଲ୍‌ କରିପାରିବେ। ଏହା ଦ୍ବାରା ବହୁ ସଂଖ୍ୟକ ବ୍ୟବହାରକାରୀ ଉପକୃତ ହେବା ଆଶା କରାଯାଉଛି।

ଗତ ବର୍ଷ ଯଦିଓ ୩୨ ଜଣ ଗ୍ରୁପ୍‌ କଲ୍‌ରେ ଯୋଡ଼ି ହେବେ ବୋଲି କମ୍ପାନି ପକ୍ଷରୁ ଘୋଷଣା କରାଯାଇଥିଲା, ତଥାପି ସାତ ଜଣ ହିଁ ଏଥିରେ ସାମିଲ ହୋଇପାରୁ ଥିଲେ। ଏବେ କମ୍ପାନି ଏହାର ସଂଖ୍ୟାକୁ ବଢ଼ାଇ ୧୫ଜଣ କରିଛି। ଏହି ଫିଚର୍‌ ଦ୍ବାରା ଲୋକଙ୍କ ସମୟ ସଞ୍ଚୟ ହେବ। ଅବଶ୍ୟ ପରବର୍ତ୍ତୀ ସମୟରେ କମ୍ପାନି ଏହାର ସଂଖ୍ୟା ୩୨ଜଣକୁ ବଢ଼ାଇପାରେ ବୋଲି ଆଶା କରାଯାଉଛି। ଏହି ନୂଆ ଫିଚର ବିଟା ଭର୍ସନ ପାଇଁ ଜାରି କରାଯାଇଛି। ଭି୨, ୨୩, ୧୫, ୧୪ ପାଇଁ ଏହି ଫିଚର୍‌ ଉଦ୍ଦିଷ୍ଟ ଥିବା ବେଳେ ଆଗକୁ ଏହା ସମସ୍ତଙ୍କ ପାଇଁ ଜାରି କରାଯିବ।

ନୂଆଦିଲ୍ଲୀ: ହ୍ୱାଟ୍ସଆପ୍ ବ୍ୟବହାରକାରୀଙ୍କ ପାଇଁ ପ୍ରତିଦିନ ନୂଆ ଫିଚର ଯୋଗ କରୁଛି। ବର୍ତ୍ତମାନ ମେସେଜିଂ ସେବା ଏହାର ଆପ୍‌ରେ ଏକ ନୂତନ ବୈଶିଷ୍ଟ୍ୟ ‘ପିନ୍ ଅବଧି’ ଆଣିବାକୁ କାର୍ଯ୍ୟ କରୁଛି। ହ୍ବାଟ୍ସଆପ୍ ଇନ୍‌ଫୋ ଏହି ଫିଚର ବିଷୟରେ ସୂଚନା ଦେଇଛି ଏବଂ କହିଛି ଯେ, ବର୍ତ୍ତମାନ ଏହି ଫିଚର ବିକାଶ ପର୍ଯ୍ୟାୟରେ ରହିଛି। ଏହା ଆଣ୍ଡ୍ରଏଡ୍ ବିଟା ୨.୨୩.୧୨.୧୧ ଅପଡେଟ୍ରେ ଉପଲବ୍ଧ ହେବ।

ଏହି ଫିଚର ଅନୁଯାୟୀ, ଚାଟ୍‌ରେ କେତେ ଦିନ ପର୍ଯ୍ୟନ୍ତ ଏକ ବାର୍ତ୍ତା ପିନ୍ ହେବା ଉଚିତ୍, ଉପଭୋକ୍ତାମାନେ ବାଛିବାରେ ସକ୍ଷମ ହେବେ। ଡବ୍ଲ୍ୟୁବି ଏକ ସ୍କ୍ରିନ୍‌ସଟ୍ ମଧ୍ୟ ସେୟାର କରିଛି ଯେଉଁଥିରେ ଦର୍ଶକମାନେ କିପରି ଏକ ନିର୍ଦ୍ଦିଷ୍ଟ ସମୟ ବାଛିବା ପାଇଁ ସୁବିଧା ପାଇବେ, ଯାହା ପରେ ପିନ୍ ହୋଇଥିବା ବାର୍ତ୍ତା ସ୍ୱୟଂଚାଳିତ ଭାବରେ ଅନ୍-ଅଫ୍‌ ହେବ। ଏହା କୁହାଯାଇଛି ଯେ, ବର୍ତ୍ତମାନ ଉପଭୋକ୍ତାମାନେ ଏହି ବୈଶିଷ୍ଟ୍ୟରେ ତିନୋଟି ଭିନ୍ନ ଅବଧି ପାଆନ୍ତି – ୨୪ ଘଣ୍ଟା, ୭ ଦିନ ଏବଂ ୩୦ ଦିନ। ଏଥିରୁ ଏକ ସମୟ ଚୟନ କରି, ସେ ଏକ ନିର୍ଦ୍ଦିଷ୍ଟ ସମୟ ପାଇଁ ଯେକୌଣସି ବାର୍ତ୍ତା ପିନ୍ କରିପାରିବେ। ବ୍ୟବହାରକାରୀମାନେ ଯେ କୌଣସି ସମୟରେ ପିନ୍ ହୋଇଥିବା ମେସେଜ୍ ଅନ୍-ଅପ୍ କରିବାର ବିକଳ୍ପ ପାଇବେ।