ଭାରତୀୟ ରିଜର୍ଭ ବ୍ୟାଙ୍କ (RBI) ରେ ଚାକିରି କରିବାକୁ ସ୍ୱପ୍ନ ଦେଖୁଥିବା ଯୁବପିଢ଼ିଙ୍କ ପାଇଁ ଏକ ବଡ଼ ସୁଯୋଗ ଆସିଛି। ଆରବିଆଇ ପକ୍ଷରୁ 'ଆସିଷ୍ଟାଣ୍ଟ' ପଦବୀ ପାଇଁ ନିଯୁକ୍ତି ବିଜ୍ଞପ୍ତି (RBI Assistant Recruitment 2026) ପ୍ରକାଶ ପାଇଛି। ଏହି ନିଯୁକ୍ତି ପ୍ରକ୍ରିୟା ମାଧ୍ୟମରେ ସମୁଦାୟ ୬୫୦ଟି ପଦବୀ ପୂରଣ କରାଯିବ। ଇଚ୍ଛୁକ ଓ ଯୋଗ୍ୟ ପ୍ରାର୍ଥୀମାନେ ଅଫିସିଆଲ୍ ୱେବସାଇଟ୍‌କୁ ଯାଇ ଅନ୍‌ଲାଇନ୍ ଆବେଦନ କରିପାରିବେ।

ଗୁରୁତ୍ୱପୂର୍ଣ୍ଣ ତାରିଖ

ଆରବିଆଇର ଅଫିସିଆଲ୍ ବିଜ୍ଞପ୍ତି ଅନୁଯାୟୀ, ଏହି ପଦବୀ ପାଇଁ ଆବେଦନ ପ୍ରକ୍ରିୟା ୧୬ ଫେବୃଆରୀ ୨୦୨୬ ରୁ ଆରମ୍ଭ ହୋଇଯାଇଛି। ଆବେଦନ କରିବାର ଶେଷ ତାରିଖ ୮ ମାର୍ଚ୍ଚ ୨୦୨୬ ଧାର୍ଯ୍ୟ କରାଯାଇଛି। ପ୍ରାର୍ଥୀମାନେ ଶେଷ ତାରିଖ ପୂର୍ବରୁ ଆବେଦନ କରିବାକୁ ପରାମର୍ଶ ଦିଆଯାଇଛି। ଏହାର ପ୍ରାଥମିକ ପରୀକ୍ଷା (Prelims) ସମ୍ଭାବତଃ ୧୧ ଏପ୍ରିଲ ୨୦୨୬ ରେ ଏବଂ ମୁଖ୍ୟ ପରୀକ୍ଷା (Mains) ୭ ଜୁନ୍ ୨୦୨୬ ରେ ଅନୁଷ୍ଠିତ ହେବ।

ଶିକ୍ଷାଗତ ଯୋଗ୍ୟତା ଓ ବୟସ ସୀମା

ଏହି ପଦବୀ ପାଇଁ ଆବେଦନ କରୁଥିବା ପ୍ରାର୍ଥୀ ଯେକୌଣସି ସ୍ୱୀକୃତିପ୍ରାପ୍ତ ବିଶ୍ୱବିଦ୍ୟାଳୟରୁ ସ୍ନାତକ (Graduation) ଡିଗ୍ରୀ ହାସଲ କରିଥିବା ଆବଶ୍ୟକ। ସାଧାରଣ ବର୍ଗର ପ୍ରାର୍ଥୀଙ୍କ ପାଇଁ ସ୍ନାତକରେ ଅତିକମରେ ୫୦% ମାର୍କ ରହିବା ଜରୁରୀ, ଯେବେକି SC/ST/PwBD ପ୍ରାର୍ଥୀଙ୍କ ପାଇଁ କେବଳ ପାସ୍ ମାର୍କ ଯଥେଷ୍ଟ। ବୟସ ସୀମା ବିଷୟରେ କହିଲେ, ପ୍ରାର୍ଥୀଙ୍କ ବୟସ ୨୦ ରୁ ୨୮ ବର୍ଷ ମଧ୍ୟରେ ହେବା ଆବଶ୍ୟକ। ସରକାରୀ ନିୟମ ଅନୁଯାୟୀ ସଂରକ୍ଷିତ ବର୍ଗଙ୍କୁ ବୟସ କୋହଳ ମିଳିବ।

ଦରମା ଓ ଚୟନ ପ୍ରକ୍ରିୟା

ଚୟନ ହୋଇଥିବା ପ୍ରାର୍ଥୀମାନଙ୍କୁ ଆକର୍ଷଣୀୟ ଦରମା ମିଳିବ। ସୂଚନା ଅନୁଯାୟୀ, ଆରବିଆଇ ଆସିଷ୍ଟାଣ୍ଟଙ୍କ ମାସିକ ଗ୍ରସ୍ ଦରମା (Gross Salary) ପ୍ରାୟ ୫୮,୫୧୪ ଟଙ୍କା ହେବ। ପ୍ରାର୍ଥୀମାନଙ୍କ ଚୟନ ତିନୋଟି ପର୍ଯ୍ୟାୟରେ କରାଯିବ - ପ୍ରାଥମିକ ପରୀକ୍ଷା, ମୁଖ୍ୟ ପରୀକ୍ଷା ଏବଂ ଭାଷା ଦକ୍ଷତା ପରୀକ୍ଷା (Language Proficiency Test)।

କିପରି କରିବେ ଆବେଦନ?

୧. ପ୍ରଥମେ ଆରବିଆଇର ଅଫିସିଆଲ୍ ୱେବସାଇଟ୍ www.rbi.org.in କୁ ଯାଆନ୍ତୁ।

୨. 'Opportunities@RBI' ସେକ୍ସନ୍‌ରେ 'Current Vacancies' ଉପରେ କ୍ଲିକ୍ କରନ୍ତୁ।

୩. 'Recruitment for the post of Assistant - 2026' ଲିଙ୍କ୍ ଚୟନ କରନ୍ତୁ।

୪. ନିଜର ବିବରଣୀ ପୂରଣ କରି ରେଜିଷ୍ଟ୍ରେସନ୍ କରନ୍ତୁ ଓ ଫି’ ପୈଠ କରନ୍ତୁ।

୫. ଆବେଦନ ଫର୍ମ ସବମିଟ୍ କରି ଏହାର ଏକ ପ୍ରିଣ୍ଟ୍ ଆଉଟ୍ ରଖନ୍ତୁ।

ନୂଆଦିଲ୍ଲୀ: ଚଳିତବର୍ଷ ଡିସେମ୍ବର ପହିଲା ସୁଦ୍ଧା ଦେଶର ସରକାରୀ କ୍ଷେତ୍ରର ବ୍ୟାଙ୍କଗୁଡିକରେ ୪୧,୧୭୭ ପଦବୀ କିମ୍ବା ମୋଟ ଅନୁମୋଦିତ ପଦବୀ ମଧ୍ୟରୁ ୫ ପ୍ରତିଶତ ଖାଲିପଡିଥିବା କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି। ରାଷ୍ଟ୍ରାୟତ୍ତ ବ୍ୟାଙ୍କ (ପିଏସ୍‌ବି) ରେ ୮,୦୫, ୯୮୬ରୁ ଅଧିକ ମଞ୍ଜୁରୀପ୍ରାପ୍ତ ପଦବୀ ରହିଛି । ସରକାରୀ ତଥ୍ୟ ଅନୁଯାୟୀ ବ୍ୟାଙ୍କଗୁଡିକ ମଧ୍ୟରେ ଷ୍ଟେଟ ବ୍ୟାଙ୍କ ଅଫ୍ ଇଣ୍ଡିଆ (ଏସବିଆଇ) ର ସର୍ବାଧିକ ଖାଲି ପଦବୀ ୮୫୪୪ ରହିଥିଲା ।

ଲୋକସଭାରେ ଏକ ପ୍ରଶ୍ନ ଉତ୍ତରରେ ସରକାର କହିଛନ୍ତି ଯେ, ପିଏସ୍‌ବିଗୁଡ଼ିକରେ କର୍ମଚାରୀଙ୍କ ଅଭାବ ଦେଖାଦେଇଛି, ଯେଉଁଥିପାଇଁ ସେମାନେ ନିଜ କର୍ତ୍ତବ୍ୟକୁ ଠିକ୍ ଭାବରେ ପାଳନ କରିବାରେ ଅସମର୍ଥ । ଚଳିତବର୍ଷ ଡିସେମ୍ବର ପହିଲା ସୁଦ୍ଧା ଅନୁମୋଦିତ ପଦବୀ ତୁଳନାରେ ୯୫ ପ୍ରତିଶତ କର୍ମଚାରୀ ଅଛନ୍ତି । ବହୁ ସଂଖ୍ୟାରେ କର୍ମଚାରୀ ଅବସର ଗ୍ରହଣ କରିବା ଏବଂ ଅନ୍ୟ କାରଣଯୋଗୁଁ କେତେକ ପଦବୀ ଖାଲି ପଡ଼ିଛି । ଚଳିତମାସ ପହିଲା ସୁଦ୍ଧା ସରକାରୀ ବ୍ୟାଙ୍କ ଗୁଡିକରେ ୮,୦୫, ୯୮୬ ମଞ୍ଜୁରୀପ୍ରାପ୍ତ ପଦବୀ ଏବଂ ୪୧,୧୭୭ ଟି ଖାଲି ପଦବୀ ରହିଥିବା ସୀତାରମଣ ଏକ ଲିଖିତ ଉତ୍ତରରେ କହିଛନ୍ତି ।

ଏହି ଖାଲି ପଦବୀଗୁଡିକ ତିନୋଟି ବର୍ଗରେ ରହିଛି । ସେଗୁଡିକ ହେଉଛି ଅଧିକାରୀ, କିରାଣୀ ଏବଂ ଉପ କର୍ମଚାରୀ। ସମ୍ପ୍ରତି ଦେଶରେ ୧୨ ଟି ରାଷ୍ଟ୍ରାୟତ୍ତ ବ୍ୟାଙ୍କ ରହିଛି । ଏସବିଆଇରେ ୮୫୪୪ ଖାଲି ପଦବୀ ରହିଥିବାବେଳେ ପଞ୍ଜାବ ନ୍ୟାସନାଲ ବ୍ୟାଙ୍କ(ପିଏନ୍‌ବି)ରେ ୬,୭୪୩ ପଦ ଖାଲିପଡ଼ିଛି। ସେହିଭଳି ସେଣ୍ଟ୍ରାଲ ବ୍ୟାଙ୍କ ଅଫ୍ ଇଣ୍ଡିଆରେ ୬୨୯୫ଟି ଖାଲି ପଦବୀ ରହିଥିବାବେଳେ ଇଣ୍ଡିଆନ୍ ଓଭରସିଜ୍ ବ୍ୟାଙ୍କରେ ୫୧୧୨ ଏବଂ ବ୍ୟାଙ୍କ ଅଫ୍ ଇଣ୍ଡିଆରେ ୪୯୪୮ ପଦ ଖାଲି ପଡ଼ିଛି।

ଏସବିଆଇରେ ଅଧିକାରୀମାନଙ୍କ ପାଇଁ ୩୪୨୩ ଟି ପଦବୀ ଏବଂ କିରାଣୀ ସ୍ତରରେ ୫୧୨୧ଟି ପଦବୀ ଖାଲି ପଡିଛି। ସୀତାରମଣ ଏହା ମଧ୍ୟ କହିଛନ୍ତି ଯେ, ପିଏସ୍‌ବିଗୁଡ଼ିକରେ ଗତବର୍ଷ ମଧ୍ୟରେ କୌଣସି ପଦ ଖାଲି କରାଯାଇନାହିଁ । ସେମାନଙ୍କ ଆବଶ୍ୟକତା ଅନୁଯାୟୀ ଖାଲିଥିବା ପଦବୀ ପୂରଣ ପାଇଁ କର୍ମଚାରୀ ନିଯୁକ୍ତି ଦିଅନ୍ତୁ ବୋଲି ସେ କହିଛନ୍ତି।