ଭାରତୀୟ ସ୍ୱତନ୍ତ୍ର ପରିଚୟ ପ୍ରାଧିକରଣ ବା ୟୁଆଇଡିଏଆଇ (UIDAI) ପକ୍ଷରୁ ଆଧାର କାର୍ଡ ୟୁଜର୍ସଙ୍କ ପାଇଁ ଏକ ବଡ଼ ଖବର ସାମ୍ନାକୁ ଆସିଛି। ମାଗଣାରେ ଆଧାର କାର୍ଡ ଅପଡେଟ୍ କରିବାର ସମୟସୀମାକୁ ପୁଣି ଥରେ ବୃଦ୍ଧି କରାଯାଇଛି। ନୂଆ ନିର୍ଦ୍ଦେଶାବଳୀ ଅନୁଯାୟୀ, ବର୍ତ୍ତମାନ ଦେଶର ନାଗରିକମାନେ ୧୪ ଜୁନ୍ ୨୦୨୬ ପର୍ଯ୍ୟନ୍ତ ନିଜର ଆଧାର କାର୍ଡକୁ ସମ୍ପୂର୍ଣ୍ଣ ମାଗଣାରେ ଅପଡେଟ୍ କରିପାରିବେ।

କାହିଁକି ଜରୁରୀ ଆଧାର ଅପଡେଟ୍?

ୟୁଆଇଡିଏଆଇ ଅନୁଯାୟୀ, ଯେଉଁମାନେ ନିଜର ଆଧାର କାର୍ଡ ୧୦ ବର୍ଷ ପୂର୍ବେ ତିଆରି କରିଥିଲେ ଏବଂ ଏହି ସମୟ ମଧ୍ୟରେ କୌଣସି ଥର ଅପଡେଟ୍ କରିନାହାଁନ୍ତି, ସେମାନଙ୍କ ପାଇଁ ନିଜର ପରିଚୟ ପ୍ରମାଣ (Proof of Identity) ଏବଂ ଠିକଣା ପ୍ରମାଣ (Proof of Address) ଅପଡେଟ୍ କରିବା ବାଧ୍ୟତାମୂଳକ ଅଟେ। ଏହା ଦ୍ୱାରା ଠକେଇ ରୋକାଯିବା ସହ ଆଧାର ସମ୍ବନ୍ଧୀୟ ତଥ୍ୟକୁ ସଠିକ୍ ରଖିବାରେ ସାହାଯ୍ୟ ମିଳିବ।

କେବଳ ଅନଲାଇନ୍ ସେବା ମାଗଣା

ମାଗଣା ଆଧାର ଅପଡେଟ୍ ସେବା କେବଳ myAadhaar ପୋର୍ଟାଲ୍ (myAadhaar portal) ରେ ଅନଲାଇନ୍ ମାଧ୍ୟମରେ ଉପଲବ୍ଧ ଅଟେ। ଯଦି କୌଣସି ବ୍ୟକ୍ତି ସିଧାସଳଖ ଆଧାର ସେବା କେନ୍ଦ୍ରକୁ ଯାଇ ଏହି ଅପଡେଟ୍ କରନ୍ତି, ତେବେ ତାଙ୍କୁ ୫୦ ଟଙ୍କା ଫିସ୍ ବାବଦକୁ ଦେବାକୁ ପଡିବ। ଏହା ସହିତ ନିଜର ମୋବାଇଲ୍ ନମ୍ବର, ଇମେଲ୍ ଆଇଡି, ଫଟୋ କିମ୍ବା ବାୟୋମେଟ୍ରିକ୍ସ (ଆଖି ଏବଂ ଫିଙ୍ଗରପ୍ରିଣ୍ଟ) ଅପଡେଟ୍ କରିବା ପାଇଁ ଆଧାର ସେବା କେନ୍ଦ୍ରକୁ ଯିବା ଜରୁରୀ ଅଟେ, ଯେଉଁଥିପାଇଁ ନିର୍ଦ୍ଧାରିତ ଶୁଳ୍କ ଲାଗୁ ହେବ।

କିପରି କରିବେ ଅନଲାଇନ୍ ଅପଡେଟ୍?

ପ୍ରଥମେ ୟୁଆଇଡିଏଆଇର ଅଫିସିଆଲ୍ ୱେବସାଇଟ୍ myaadhaar.uidai.gov.in କୁ ଯାଆନ୍ତୁ। ନିଜର ଆଧାର ନମ୍ବର ଏବଂ ରେଜିଷ୍ଟର୍ଡ ମୋବାଇଲ୍ ନମ୍ବରକୁ ଆସିଥିବା ଓଟିପି (OTP) ଦେଇ ଲଗଇନ୍ କରନ୍ତୁ। ଏହାପରେ 'ଡକ୍ୟୁମେଣ୍ଟ ଅପଡେଟ୍' ବିକଳ୍ପ ଉପରେ କ୍ଲିକ୍ କରନ୍ତୁ। ନିଜର ତଥ୍ୟ ଯାଞ୍ଚ କରିବା ପରେ ପରିଚୟ ପ୍ରମାଣ ଏବଂ ଠିକଣା ପ୍ରମାଣର ସ୍କାନ୍ କପି (୨ MB ରୁ କମ୍ ସାଇଜ୍) ଅପଲୋଡ୍ କରନ୍ତୁ। ସବମିଟ୍ କରିବା ପରେ ଏକ ସର୍ଭିସ୍ ରିକ୍ୱେଷ୍ଟ ନମ୍ବର ବା ୟୁଆରଏନ (URN) ନମ୍ବର ମିଳିବ, ଯାହା ଦ୍ୱାରା ଆପଣ ନିଜ ଅପଡେଟର ଷ୍ଟାଟସ୍ ଚେକ୍ କରିପାରିବେ।

ବର୍ତ୍ତମାନ ସମୟରେ ବ୍ୟାଙ୍କିଙ୍ଗ୍, ଶିକ୍ଷା ଏବଂ ସରକାରୀ ଯୋଜନା ଭଳି ପ୍ରତ୍ୟେକ କ୍ଷେତ୍ରରେ ଆଧାର କାର୍ଡ ଏକ ଅତ୍ୟାବଶ୍ୟକ ନଥିପତ୍ର ପାଲଟିଛି। ତେଣୁ ସରକାରଙ୍କ ଏହି ମାଗଣା ସୁବିଧାର ଲାଭ ଉଠାଇ ନିଜର ନଥିପତ୍ର ଯଥାଶୀଘ୍ର ଅପଡେଟ୍ କରିବାକୁ ପରାମର୍ଶ ଦିଆଯାଇଛି।

ନୂଆଦିଲ୍ଲୀ: ବର୍ତ୍ତମାନ ସମୟରେ ଆଧାର ବେଶ ଜରୁରୀ ଡକ୍ୟୁମେଣ୍ଟ। ବିନା ଆଧାରରେ ସବୁ କାମ ବନ୍ଦ। ଏଣୁ ଏଭଳି  ଜରୁରୀ ଡକ୍ୟୁମେଣ୍ଟର ହୋଇଥିବା ବେଳେ ଏହାର ଭୁଲ ଉପଯୋଗର ବିପଦ ମଧ୍ୟ ରହୁଛି। ଏହି ବିପଦର ଆଶଙ୍କା ଆଧାରକୁ ଆହୁରି ସୁରକ୍ଷିତ କରିବା ପାଇଁ ସରକାର ପୁଣି ଥରେ ଏଥିରେ ପରିବର୍ତ୍ତନ କରିବାକୁ ଯାଉଛନ୍ତି। ଆସିବାକୁ ଥିବା ନୂଆ ଆଧାର କାର୍ଡରେ କେବଳ ଜଣଙ୍କର ଫଟୋ ଓ ଏକ କ୍ୟୁଆର କୋଡ୍‌ ରହିବ। ଏଥିରେ ପୂର୍ବ ଭଳି ଲିଖିତ ଆପଣଙ୍କ ନାମ, ଠିକଣା ଓ ଆଧାରକାର୍ଡ ନମ୍ବର ହଟାଇ ଦିଆଯିବ। ୟୁନିକ୍ ଆଇଡେଣ୍ଟିଫିକେସନ ଅଥରିଟି ଅଫ ଇଣ୍ଡିଆ (ୟୁଆଇଡିଏଆଇ) ଲୋକଙ୍କ ସମ୍ପର୍କିତ ସୂଚନାର ଦୂରୁପଯୋଗ ରୋକିବା ପାଇଁ ଓ ଅଫ୍‌ଲାଇନ୍‌ ଭେରିଫିକେସନକୁ ହତୋତ୍ସାହିତ କରିବା ପାଇଁ କାର୍ଡଧାରୀଙ୍କ ଫଟୋ ଓ କ୍ୟୁଆର କୋଡ ସହିତ ଆଧାରକାର୍ଡ ଜାରି କରିବାକୁ ବିଚାର କରୁଛି। ଆଧାର ଉପରେ ଆୟୋଜିତ ଏକ ସମ୍ମିଳନୀରେ ୟୁଆଇଡିଏଆଇ ମୁଖ୍ୟକାର୍ଯ୍ୟକାରୀ ଅଧିକାରୀ (ସିଇଓ) ଭୁବନେଶ କୁମାର କହିଛନ୍ତି ଯେ ପ୍ରାଧିକରଣ ଡିସେମ୍ବରରେ ଏକ ନୂଆ ନିୟମ ଆଣିବା ପାଇଁ ବିଚାର କରୁଛନ୍ତି।

କିଛି ଦିନ ପୂର୍ବେ ନୂତନ ଆଧାର ଆପ୍ ଲଞ୍ଚ କରିବା ପରେ, ୟୁଆଇଡିଏଆଇ ଆଉ ଏକ ଗୁରୁତ୍ୱପୂର୍ଣ୍ଣ ଆପ୍ ପ୍ରଚଳନ କରିବାକୁ ପ୍ରସ୍ତୁତ ହେଉଛି।   ଏକ ରିପୋର୍ଟ ଅନୁଯାୟୀ, ଏହି ଆପ୍ ଅଫଲାଇନ୍ ଯାଞ୍ଚକୁ ସରଳ କରିବା ପାଇଁ ଅଣାଯିବ।  ଏହାପରେ, ଆଧାର ବ୍ୟବହାର ସମ୍ପୂର୍ଣ୍ଣ ଅନଲାଇନ୍ ହୋଇଯିବ ଏବଂ କାହାକୁ କୌଣସି ସ୍ଥାନରେ ଆଧାରର ଭୌତିକ କିମ୍ବା ଫଟୋକପି ବ୍ୟବହାର କରିବାକୁ ପଡ଼ିବନାହିଁ। ରିପୋର୍ଟ ଅନୁଯାୟୀ, ଏହି ଆପ୍ ଡିଜିୟାତ୍ରୀ ଆପ୍ ପରି କାମ କରିବ, ଯାହା କେବଳ ଏକ କ୍ୟୁଆର୍‌ କୋଡ୍ ସ୍କାନ କରି ବ୍ୟବହାରକାରୀ ଯାଞ୍ଚକୁ ଅନୁମତି ଦେବ। ଫଟୋକପି ବ୍ୟବହାରକୁ ଦୂର କରିବା ପାଇଁ ୟୁଆଇଡିଏଆଇ ଏହି ଆପ୍ ଆଣିବାକୁ ଯାଉଛି।  ଶ୍ରୀ କୁମାର କହିଛନ୍ତି ଯେ ଏହି ଆପ୍ ବର୍ତ୍ତମାନ ପରୀକ୍ଷଣାଧୀନ ଅଛି ଏବଂଖୁବ୍‌  ଶୀଘ୍ର ବ୍ୟବହାର ପାଇଁ ଉପଲବ୍ଧ ହେବ। କିଛି ଦିନ ପୂର୍ବରୁ, ରିପୋର୍ଟ ଅନୁଯାୟୀ, ଏହି ଆପ୍ ଅଫଲାଇନରେ ମଧ୍ୟ କାମ କରିବ। ଏହାର ଅର୍ଥ ହେଉଛି ଆଗାମୀ ନୂତନ ଆପ୍ ଇଣ୍ଟରନେଟ୍ ବିନା ଯେ କୌଣସି ବ୍ୟକ୍ତିଙ୍କ ପରିଚୟକୁ ଅଫଲାଇନ୍‌ରେ ଯାଞ୍ଚ କରିବାକୁ ଅନୁମତି ଦେବ। ଏହା ଉଲ୍ଲେଖନୀୟ ଯେ ଆଧାର ମାଧ୍ୟମରେ ପରିଚୟ ଯାଞ୍ଚ କରିବା ପାଇଁ ବିଭିନ୍ନ ସ୍ଥାନରେ ଆଧାର କାର୍ଡର ଫଟୋକପି ସଂଗ୍ରହ କରାଯାଏ। ଆଗାମୀ ନୂତନ ଆପ୍ ଏହି ପ୍ରକ୍ରିୟାକୁ ପରିବର୍ତ୍ତନ କରିବ, ଆଧାର କ୍ୟୁଆର୍‌ କୋଡ୍ ଅଫଲାଇନରେ ସ୍କାନ କରି ଯେକୌଣସି ବ୍ୟକ୍ତିଙ୍କ ପରିଚୟ ଯାଞ୍ଚ କରିବାକୁ ଅନୁମତି ଦେବ। ତଥାପି, ଏଥିପାଇଁ ବ୍ୟକ୍ତିଙ୍କ ସମ୍ମତି ଆବଶ୍ୟକ ହେବ।

ଏହି ଆପ୍ ବ୍ୟବହାର କରାଯିବ ସେଠାରେ ଯେଉଁଠାରେ ଆଧାର ଯାଞ୍ଚ ଆବଶ୍ୟକ, ଯେପରିକି ହୋଟେଲରେ। ଏହି ଆପ୍ ମାଧ୍ୟମରେ, ଉପଯୋଗକର୍ତ୍ତାଙ୍କ ଆଧାର ଯାଞ୍ଚ ସେମାନଙ୍କର କ୍ୟୁଆର୍‌ କୋଡ୍ ସ୍କାନ୍ କରି ସମାପ୍ତ ହେବ। ସେମାନଙ୍କର ଆଧାର କାର୍ଡର ଏକ ଭୌତିକ କପି କିମ୍ବା ଫଟୋକପି ପ୍ରଦାନ କରିବା ପରିବର୍ତ୍ତେ, ବ୍ୟବହାରକାରୀଙ୍କୁ କେବଳ କ୍ୟୁଆର୍‌ କୋଡ୍ ଦେଖାଇବାକୁ ପଡିବ। ଏହି କ୍ୟୁଆର୍‌ କୋଡ୍ ୟୁଆଇଡିଏଆଇର ସଦ୍ୟ ଲଞ୍ଚ ହୋଇଥିବା ଆଧାର ଆପ୍ ମାଧ୍ୟମରେ ସେୟାର କରାଯାଇପାରିବ। ରିପୋର୍ଟ ଅନୁଯାୟୀ, ୟୁଆଇଡିଏଆଇ ଆଧାର କାର୍ଡର ଭୌତିକ ରୂପ ପରିବର୍ତ୍ତନ କରିବା ବିଷୟରେ ମଧ୍ୟ ବିଚାର କରୁଛି। ଏହା ସମ୍ଭବ ଯେ ଭବିଷ୍ୟତରେ, ଆଧାର କାର୍ଡର ଭୌତିକ କପିରେ କେବଳ ୟୁଆଇଡିଏଆଇ କୋଡ୍ ଏବଂ ଧାରକଙ୍କ ଫଟୋ ରହିବ। ଏହା ଆଧାର ଧାରକଙ୍କ ଗୋପନୀୟତା ବଜାୟ ରଖିବ ଏବଂ କାର୍ଡରେ ଅନାବଶ୍ୟକ ସୂଚନାର ଅପବ୍ୟବହାରକୁ ରୋକିବ।

ନୂଆଦିଲ୍ଲୀ: ଏକ ଗୁରୁତ୍ବପୂର୍ଣ୍ଣ ଘଟଣାକ୍ରମେ କେନ୍ଦ୍ର ସରକାର ମାଗଣା ଆଧାର ଅପ୍‌ଡେଟ୍ ସମୟ ସୀମାରେ ବୃଦ୍ଧି କରିଛନ୍ତି। ଏହି ଅନୁଯାୟୀ, ଭାରତୀୟ ସ୍ବତନ୍ତ୍ର ପରିଚୟ କର୍ତ୍ତୃପକ୍ଷ (ୟୁଆଇଡିଏଆଇ) ମାଗଣା ଅନଲାଇନ୍ ଆଧାର ଡକ୍ୟୁମେଣ୍ଟ ଅପଡେଟ୍ ସମୟ ସୀମା ଏକ ବର୍ଷ ବଢ଼ାଇ ଦେଇଛନ୍ତି। ଏହା ଲୋକମାନଙ୍କୁ ସେମାନଙ୍କର ଆଧାରରେ ସଠିକ୍ ସୂଚନା ଅପଡେଟ୍ କରିବାରେ ସାହାଯ୍ୟ କରିବ। ଯେଉଁମାନେ ବିବାହ, ଠିକଣା ପରିବର୍ତ୍ତନ କିମ୍ବା ଅନ୍ୟ କୌଣସି କାରଣରୁ ସେମାନଙ୍କର ଡକ୍ୟୁମେଣ୍ଟ ଅପଡେଟ୍ କରିବାକୁ ଚାହୁଛନ୍ତି, ସେମାନେ ଏବେ ଏହି କାମ ମାଗଣାରେ କରିପାରିବେ। ଏହି ମାଗଣା ସେବା କେବଳ ‘ମାଇଁଆଧାର’ ପୋର୍ଟାଲରେ ଉପଲବ୍ଧ, ଯାହା ଫଳରେ ଲୋକମାନେ ସହଜରେ ସେମାନଙ୍କର ସ୍ମାର୍ଟଫୋନ୍ କିମ୍ବା କମ୍ପ୍ୟୁଟରରୁ ଡକ୍ୟୁମେଣ୍ଟ ଦାଖଲ କରିପାରିବେ। ତେବେ ମାଗଣା ଆଧାର ଡକ୍ୟୁମେଣ୍ଟ ଅପଡେଟ୍ କରିବାର ଶେଷ ତାରିଖ ୨୦୨୫ ଜୁନ୍ ୧୪ରୁ ୨୦୨୬ ଜୁନ୍ ୧୪ ପର୍ଯ୍ୟନ୍ତ ବୃଦ୍ଧି କରାଯାଇଛି।

ଏହି ସମୟ ମଧ୍ୟରେ ଲୋକମାନେ ସେମାନଙ୍କର ଡକ୍ୟୁମେଣ୍ଟ ଅପଲୋଡ୍ କରି ଆଧାର କାର୍ଡରେ ଜନସଂଖ୍ୟାଗତ ସୂଚନା ଅପଡେଟ୍ କରିପାରିବେ ଏବଂ ଏଥିପାଇଁ, ଠିକଣା ପ୍ରମାଣ ଏବଂ ପରିଚୟ ପ୍ରମାଣ ସହିତ ଜଡିତ ଡକ୍ୟୁମେଣ୍ଟ ଅପଲୋଡ୍ କରିବାକୁ ପଡିବ। ୟୁଆଇଡିଏଆଇ ପକ୍ଷରୁ ଏକ୍ସ’ ରେ ଏହି ସୂଚନା ଦେଇଛି।

ପୋଷ୍ଟ ଅନୁଯାୟୀ, ଏହି ମାଗଣା ସେବା ଲକ୍ଷ ଲକ୍ଷ ଆଧାର କାର୍ଡ ଧାରକଙ୍କୁ ଲାଭ ପହଞ୍ଚାଇବା ପାଇଁ ହୋଇଛି। ଏହି ସମୟ ମଧ୍ୟରେ ଏହି ସେବା କେବଳ ‘ମାଇଁଆଧାର’ ଅନଲାଇନ୍ ପୋର୍ଟାଲ୍ ମାଧ୍ୟମରେ ମାଗଣାରେ ଉପଲବ୍ଧ। ନିଜର ପରିଚୟ କିମ୍ବା ଠିକଣା ପ୍ରମାଣିତ କରିବା ପାଇଁ ଭୋଟର ପରିଚୟ ପତ୍ର, ବିଦ୍ୟୁତ୍ ବିଲ୍, ରାସନ୍ କାର୍ଡ ଏବଂ ପାସପୋର୍ଟ ଭଳି ଡକ୍ୟୁମେଣ୍ଟଗୁଡ଼ିକୁ ଅପଲୋଡ୍ କରାଯାଇପାରିବ। ଡକ୍ୟୁମେଣ୍ଟ ଗୁଡ଼ିକ ପିଡିଏଫ୍‌, ପିଏନ୍‌ଜି, କିମ୍ବା ଜେପିଇଜି ଫର୍ମାଟରେ ହେବା ଉଚିତ ଏବଂ ସେଗୁଡିକର ଆକାର ୨ ଏମ୍‌ବିରୁ କମ୍ ହେବା ଜରୁରୀ।

ଭୁବନେଶ୍ୱର: ଏଣିକି ଦ୍ୱିତୀୟ ବିବାହ ହେବନି ସହଜ। ପୁରୁଷ ହୁଅନ୍ତୁ ଅବା ମହିଳାମାନେ ପ୍ରଥମ ବିବାହ ପରେ ପତି କିମ୍ବା ପତ୍ନୀ ଥାଇ ଯଦି ଦ୍ୱିତୀୟ ବିବାହ କରିବାକୁ ଚାହୁଁଥିବେ ସେମାନେ ଭୋଗିପାରନ୍ତି ଆଇନଗତ ଦଣ୍ଡ। ଏକାଧିକ ବିବାହ ରୋକିବାକୁ ଆଗକୁ ଆସିବ ନୂଆ ନିୟମ। ଆଧାର କାର୍ଡ ସହ ସଂଯୋଗ ହେବ ବିବାହ ପ୍ରମାଣପତ୍ର ବା ସାର୍ଟିଫିକେଟ୍‌‌। ଏହା ପ୍ରତ୍ୟେକ ବିବାହିତ ବ୍ୟକ୍ତିଙ୍କ ପାଇଁ ହେବ ଏକମାତ୍ର ପ୍ରମାଣପତ୍ର ଏବଂ ଯେକୌଣସି ସ୍ଥାନରେ ଆଧାର ନମ୍ବରରେ ମିଳିପାରିବ ବିବାହର ତଥ୍ୟ। ଏଭଳି ଏକ ବ୍ୟବସ୍ଥା ଆଣିବାକୁ ଯୋଜନା କରିଛନ୍ତି ରାଜ୍ୟ ମହିଳା ଆୟୋଗ।

ବିଭିନ୍ନ ସମୟରେ ପ୍ରଥମ ପତ୍ନୀ କିମ୍ୱା ପତି ଥାଇ ଅନେକ ଦମ୍ପତି ଲୁଚି ଲୁଚି ଅନ୍ୟତ୍ର ବିବାହ କରୁଥିବା ଅଭିଯୋଗ ହେଉଛି। ଏହି ସତ୍ୟ ସାମ୍ନାକୁ ଆସିବା ପରେ ଉଭୟ ପରିବାର ମଧ୍ୟରେ ପାରିବାରିକ ସମସ୍ୟା ସୃଷ୍ଟି ହେବା ସହ ବିଶ୍ୱାସଘାତକତାର ଶିକାର ହେଉଛନ୍ତି ଅନେକ ଦମ୍ପତି। ଡେଟିଂ ଆପ୍‌‌ ଦ୍ୱାରା ହେଉ କିମ୍ବା ବିବାହ ଆପ୍‌‌ ମାଧ୍ୟରେ ଅନେକ ନିଜ ନିଜର ଫେକ୍‌‌ ଆକାଉଣ୍ଟ ଖୋଲି ନିଜକୁ ଅବିବାହିତ ଦର୍ଶାଇ ଅନ୍ୟ ଯୁବକ ଯୁବତୀଙ୍କ ସହ ସମ୍ପର୍କ ଯୋଡ଼ିବାକୁ ଚେଷ୍ଟା କରିଥାନ୍ତି। ସେହିପରି ଅନେକଙ୍କ ବିବାହ ବିଚ୍ଛେଦ ମାମଲା ଚାଲୁଥିବା ବେଳେ ସେମାନେ ମଧ୍ୟ ଏସମ୍ପର୍କରେ ଲୁଚାଇ ରଖି ଅନ୍ୟତ୍ର ବିବାହ କରୁଥିବା ଖବର ଗଣମାଧ୍ୟମର ସିରୋନାମା ପାଲଟୁଛି। କେତେକ କ୍ଷେତ୍ରରେ ଏହା ସଫଳ ହେଉଥିବା ବେଳେ ଆଉ କେତେକ ବିଫଳ ହେଉଛନ୍ତି। ଏବଂ ଯେଉଁମାନେ କିଛି ତଥ୍ୟ ସଂଗ୍ରହ ନ କରି ବିବାହ କରିବାକୁ ନିଷ୍ପତ୍ତି ନେଉଛନ୍ତି। ପରବର୍ତ୍ତୀ ସମୟରେ ସେମାନଙ୍କ ବୈବାହିକ ଜୀବନରେ ଫାଟ ସୃଷ୍ଟି ହେଉଛି। ବାହାରୁ ବିବାହ ପ୍ରସ୍ତାବ ଆସିଲେ ସବୁ ତଥ୍ୟ ଜାଣିବା କଷ୍ଟକର ହୋଇପଡୁଛି। ରାଜ୍ୟ ବାହାରେ ବିବାହ କରି ଅନେକ ଝିଅ ଓ ଝିଅ ହଇରାଣ ହେଉଥିବା ମାମଲା ସାମ୍ନାକୁ ଆସୁଛି। ବାଧ୍ୟହୋଇ ଉଭୟ ଆଇନର ଦ୍ୱାରସ୍ଥ ହେଉଥିବା ଦେଖିବାକୁ ମିଳିଛି। ତେଣୁ ଏଭଳି ଏକାଧିକ ବିବାହ ରୋକିବାକୁ ଆସିପାରେ ନୂଆ ନିୟମ।

ନିୟମ ଅନୁଯାୟୀ, ପ୍ରତ୍ୟେକ ବିବାହ ପଞ୍ଜୀକରଣ କରାଇବାକୁ କରାଯିବ ଯୋଜନା। ଏଥିପାଇଁ ଜିଲ୍ଲାସ୍ତରରେ ରହିବ ବିବାହ ପଞ୍ଜୀକରଣ କାର୍ଯ୍ୟାଳୟ। କେନ୍ଦ୍ର ମହିଳା ଓ ଶିଶୁ ବିକାଶ ମନ୍ତ୍ରାଳୟ ଏବଂ ଜାତୀୟ ମହିଳା ଆୟୋଗ ସହ ଏସମ୍ପର୍କରେ ରାଜ୍ୟ ମହିଳା ଆୟୋଗ ପ୍ରସ୍ତବା ଦେବା ସହ ଆଲୋଚନା କରିଛି। ଏକାଧିକ ବିବାହ ରୋକିବାକୁ ଏଭଳି ଉପାୟ ଆପଣାଇବାକୁ କେନ୍ଦ୍ରକୁ ପ୍ରସ୍ତାବ ଦିଆଯାଇଥିବା ଜଣାପଡ଼ିଛି। ତେବେ ବିବାହକୁ ସୁରକ୍ଷିତ କରିବା ପାଇଁ ରାଜ୍ୟ ମହିଳା ଆୟୋଗଙ୍କ ଏହି ପ୍ରସ୍ତାବକୁ ଜାତୀୟ ମହିଳା କମିସନ୍‌‌ ସ୍ୱାଗତ କରିଥିବା ଜଣାପଡ଼ିଛି। ଯଦି ଓଡ଼ିଶାରେ ଏହି ନିୟମ କାର୍ଯ୍ୟକାରୀ ହୁଏ ତେବେ ଏକାଧିକ ବିବାହ ସମ୍ପର୍କରେ ଜଣାପଡ଼ିବା ସହ ଜାଲ୍‌‌ ବିବାହ ରୋକାଯିବା ଦିଗରେ ଏହା ଏକ ଅସ୍ତ୍ର ପାଲଟିବ ବୋଲି ମହିଳା ଆୟୋଗ ଅଧ୍ୟକ୍ଷା ଡ. ମିନତୀ ବେହେରା କହିଛନ୍ତି। ଏହି ପ୍ରସ୍ତାବ ଅନୁସାରେ, ଦେଶ ପାଇଁ ଏକକ ବିବାହ ପ୍ରମାଣପତ୍ର ବ୍ୟବସ୍ଥା ରହିବା ଦରକାର। ଫଳରେ ଯେକୌଣସି ସ୍ଥାନରେ ବିବାହିତ ବ୍ୟକ୍ତିଙ୍କ ସଠିକ୍‌‌ ତଥ୍ୟ ଉପଲବ୍ଧ ହୋଇପାରିବ। ଏହି ପ୍ରସ୍ତାବ ସମ୍ପର୍କରେ ପୁନର୍ବାର ଆଲୋଚନା କରାଯାଇ ନିଷ୍ପତ୍ତି ନିଆଯିବ। ସରକାରଙ୍କ ତରଫରୁ ପ୍ରତି ଜିଲ୍ଲାପାଳଙ୍କ କାର୍ଯ୍ୟାଳୟରେ ପଞ୍ଜୀକରଣ ସେଲ୍‌ଫ ଖୋଲାଯାଇ ଦମ୍ପତିମାନେ ସେଠାରେ ନିଜର ଆଧାରକାର୍ଡ ଦେଖାଇ ବିବାହ ସାର୍ଟିଫିକେଟ୍‌‌ ପାଇଁ ଆବେଦନ କରିପାରିବେ। ପରବର୍ତ୍ତୀ ସମୟରେ ଆଧାରକାର୍ଡ ଓ ବିବାହ ପଞ୍ଜିକୃତ ସାର୍ଟିଫିକେଟ୍‌‌ ଲିଙ୍କ୍‌‌ କରି ଗୋଟିଏ ପ୍ଲାଟଫର୍ମରେ ରଖାଯିବାକୁ ପ୍ରସ୍ତାବ ଦିଆଯାଇଥିବା ଶ୍ରୀମତୀ ବେହେରା କହିଛନ୍ତି।

ନୂଆଦିଲ୍ଲୀ: ୧୦ ବର୍ଷରୁ ଅଧିକ ପୁରୁଣା ଆଧାରକାର୍ଡର ଅପଡେଟ୍‌ କରିବା ଲାଗି କେନ୍ଦ୍ର ଇଲେକ୍ଟ୍ରୋନିକ୍ସ ଏବଂ ଆଇଟି ମନ୍ତ୍ରାଳୟ ପକ୍ଷରୁ ପରାମର୍ଶ ଜାରି କରି କୁହାଯାଇଛି। ଜଣଙ୍କର ଡାଟାବେସ୍‌ରେ ଦିଆଯାଇଥିବା ସୂଚନାର ସଠିକତା ଏବଂ ସର୍ବଶେଷ ତଥ୍ୟ ଉଲ୍ଲେଖ କରିବା ଉଦ୍ଦେଶ୍ୟରେ ଏହାକୁ ଅପଡେଟ୍‌ କରାଯିବା ଦରକାର ବୋଲି ଭାରତୀୟ ସ୍ବତନ୍ତ୍ର ପରିଚୟପତ୍ର କର୍ତ୍ତୃପକ୍ଷ (ୟୁଆଇଡିଏଆଇ) ପରାମର୍ଶ ଦେଇଛନ୍ତି। ଅନଲାଇନରେ ‘ମାଇଁ ଆଧାର ପୋର୍ଟାଲ’ରେ ଆବଶ୍ୟକ ଦସ୍ତାବିଜ୍‌ (ପରିଚୟ ପ୍ରମାଣପତ୍ର ଏବଂ ଠିକଣା ପ୍ରମାଣପତ୍ର) ଅ‌ପଲୋଡ କରି କିମ୍ବା ନିକଟସ୍ଥ ଆଧାର କେନ୍ଦ୍ରକୁ ଯାଇ ଲୋକମାନେ ଏହି କାର୍ଯ୍ୟ କରିପାରିବେ।

ନୂଆଦିଲ୍ଲୀ: ଆଧାର କାର୍ଡ଼ର ଅପବ୍ଯବହାର ରୋକିବା ପାଇଁ କେନ୍ଦ୍ର ସରକାର ପକ୍ଷରୁ ଏକ ନୂତନ ପରାମର୍ଶଦା  ଜାରି କରାଯାଇଛି। ସରକାର ଦେଶର ନାଗରିକମାନଙ୍କୁ ନିବେଦନ କରିଛନ୍ତି ଯେ ଆପଣ ଆପଣଙ୍କର ଆଧାର କାର୍ଡ଼ର ଫଟୋ କାହା ସହିତ ସେୟାର କରନ୍ତୁ ନାହିଁ। ଏହି କାରଣରୁ ଆପଣଙ୍କ ଆଧାର କାର୍ଡ଼ର ଅପବ୍ୟବହାର ହେବାର ସମ୍ଭାବନା ଅଛି ବୋଲି ସରକାର କହିଛନ୍ତି। ଆପଣଙ୍କର ଆଧାର କାର୍ଡ଼ର ଫଟୋ କପିର ଅପବ୍ୟବହାରକୁ ରୋକିବା ପାଇଁ, ଯେଉଁଠାରେ ଆବଶ୍ୟକ କେବଳ ଆଧାର କାର୍ଡ଼ର ମାସ୍କେଡ୍ ଫଟୋ କପି ସେୟାର କରନ୍ତୁ। ଏହା ବ୍ୟତୀତ ପ୍ରେସ ବିଜ୍ଞପ୍ତିରେ କୁହାଯାଇଛି ଯେ, ହୋଟେଲ କିମ୍ବା ଚଳଚ୍ଚିତ୍ର ପରି ଘରୋଇ ଅନୁଷ୍ଠାନ ଆଧାର କାର୍ଡ଼ର କପି ରଖିବା ପାଇଁ ହକଦାର ନୁହଁନ୍ତି।

ମାସ୍କେଡ୍ ଆଧାର କାର୍ଡ଼ ବ୍ୟବହାର କରନ୍ତୁ:

ଆଧାର କାର୍ଡ଼ର ଜାଲିଆତିରୁ ରକ୍ଷା ପାଇବା ପାଇଁ କେବଳ ମାସ୍କେଡ୍ ଆଧାର କାର୍ଡ ବାଣ୍ଟିବାକୁ ଦେଶର ଲୋକଙ୍କୁ କେନ୍ଦ୍ର ସରକାର ପରାମର୍ଶ ଦେଇଛନ୍ତି। ମାସ୍କେଡ୍ ଆଧାର କାର୍ଡ଼ରେ କେବଳ ଆଧାର ନମ୍ବରର ଶେଷ ୪ ଅଙ୍କ ଦୃଶ୍ୟମାନ ହୁଏ। ଏହାଦ୍ୱାରା ଆପଣଙ୍କ ଆଧାର କାର୍ଡ଼ ଜାଲିଆତି ହେବାର ସମ୍ଭାବନା କମିଯାଏ।

କିପରି ଡାଉନଲୋଡ୍ କରିବେ ମାସ୍କେଡ୍ ଆଧାର କାର୍ଡ଼

• ପ୍ରଥମେ https://myaadhaar.uidai.gov.in/  ୱେବସାଇଟକୁ ଓପନ କରନ୍ତୁ।
• ୱେବସାଇଟ ଓପନ ହେବାପରେ ଆଧାରକାର୍ଡ ନମ୍ବର ସହ ସିକ୍ଯୁରିଟି କ୍ଯାପଚା ଓ ଓଟିପି ଦେଇ ଲଗଇନ କରନ୍ତୁ।
• ଲଗ-ଇନ କଲାପରେ ଡାଉନଲୋଡ ଆଧାରକାର୍ଡ ବିକଳ୍ପ ଆସିବ ।
• ଏହା ପରେ ମାସ୍କେଡ୍ ଆଧାର କାର୍ଡ଼ ଉପରେ କ୍ଲିକ କରି ଡାଉନ ଲୋଡ୍ କରନ୍ତୁ।
• ଡାଉନ ଲୋଡ୍ ହେବା ପରେ କ୍ଯାପିଟାଲ ଲେଟରରେ ଆପଙ୍କ ନାଁର ପ୍ରଥମ ୪ଟି ୱାର୍ଡ ଓ ଜନ୍ମ ବର୍ଷ ଦେଇ ଓକେ କରନ୍ତୁ ।
• ଆପଣ ଏବେ ମାସ୍କେଡ୍ ଆଧାର କାର୍ଡ଼ ଦେଖିପାରିବେ।

ଆଜି ଭାରତର ୯୦ ପ୍ରତିଶତରୁ ଅଧିକ ଲୋକଙ୍କର ନିଜସ୍ୱ ଆଧାର କାର୍ଡ ଅଛି। ଆଧାର ହେଉଛି ବ୍ୟକ୍ତିର ପରିଚୟର ପ୍ରମାଣ । ଏହାର ଆଗମନ ସହିତ ଦେଶରେ ସ୍ୱଚ୍ଛତା ଦେଖାଦେଇଛି ଏବଂ ଅନେକ ସରକାରୀ କାର୍ଯ୍ୟରେ ମଧ୍ୟ ଉନ୍ନତି ଆସିଛି । ବିଭିନ୍ନ ସରକାରୀ ଯୋଜନା, ବ୍ୟାଙ୍କିଙ୍ଗ୍ ସମ୍ବନ୍ଧୀୟ କାର୍ଯ୍ୟ, ଚାକିରି ଇତ୍ୟାଦିରେ ଆମର ଆଧାର କାର୍ଡର ଏକ ବିଶେଷ ଆବଶ୍ୟକତା ଅଛି | ଏହି କାରଣରୁ, ଭାରତରେ ବହୁ ସଂଖ୍ୟକ ଲୋକ ଆଧାର କାର୍ଡ ତିଆରି କରୁଛନ୍ତି। ତେବେ ଆପଣ ଜାଣିଛନ୍ତି କି ଦେଶର ପ୍ରଥମ ଆଧାର କାର୍ଡ କେବେ ତିଆରି ହୋଇଥିଲା ଏବଂ ପ୍ରଥମ ଆଧାର କାର୍ଡ କିଏ ପାଇଥିଲେ।

ଆଜି ଆମେ ଆପଣଙ୍କୁ ଏହି ବିଷୟରେ କହିବୁ। ୟୁପିଏ ସରକାରଙ୍କ ସମୟରେ ଦେଶରେ ଆଧାର କାର୍ଡ କାର୍ଯ୍ୟକାରୀ କରାଯାଇଥିଲା। ଇନଫୋସିସ୍ ସହ-ପ୍ରତିଷ୍ଠାତା ନନ୍ଦନ ନିଲେକାନି ଆଧାର ପ୍ରକଳ୍ପର ନେତୃତ୍ୱ ନେଇଥିଲେ। ଏହି ସମୟରେ ଦେଶର ପ୍ରତେକ ଲୋକଙ୍କ ପାଖରେ କିପରି ଆଧାର କାର୍ଡ ପହଞ୍ଚବ ସେ ନେଇ କାର୍ଯ୍ୟ କରାଯାଉଥିଲା। ଆଧାର କାର୍ଡର ଆଗମନ ଭାରତରେ ଅନେକ ପରିବର୍ତ୍ତନ ଆଣିଛି। ଜାନୁଆରୀ ୨୦୦୯ରେ, ଭାରତ ସରକାର ଭାରତର ସ୍ୱତନ୍ତ୍ର ପରିଚୟ ପ୍ରାଧିକରଣ ଗଠନ କରିଥିଲେ। ଏହି ପ୍ରାଧିକରଣ ଗଠନ ପରେ, ସେପ୍ଟେମ୍ବର ୨୦୧୦ ରୁ ଆଧାର କାର୍ଡ ତିଆରି କାର୍ଯ୍ୟ ଆରମ୍ଭ ହୋଇଥିଲା । ଏହା ପରେ ଭାରତର ଲୋକଙ୍କ ଆଧାର କାର୍ଡ ତିଆରି ହେବା ଏବଂ ସେମାନଙ୍କୁ ଆଧାର କାର୍ଡ ବଣ୍ଟନ କରିବା ଆରମ୍ଭ କରାଯାଇଥିଲା।

ତେବେ ଦେଶର ପ୍ରଥମ ଆଧର କାର୍ଡ ୨୯ ସେପ୍ଟେମ୍ବର ୨୦୧୦ରେ ତିଆରି ହୋଇଥିଲା। ପ୍ରଥମ ଆଧାର କାର୍ଡ ଥିଲା ରଞ୍ଜନା ସୋନାୱାନେଙ୍କ ନାମରେ । ରଞ୍ଜନା ମହାରାଷ୍ଟ୍ରର ଜଣେ ମହିଳା। ତାଙ୍କ ଘର ପୁଣେ ଠାରୁ ପ୍ରାୟ ୪୭୦ କିଲୋମିଟର ଦୂରରେ ଅବସ୍ଥିତ ମହାରାଷ୍ଟ୍ରର ନନ୍ଦୁବର ଜିଲ୍ଲାର ତାମ୍ବଲିରେ । ୟୁପିଏ ସରକାର ସମୟରେ ମହାରାଷ୍ଟ୍ରର ନନ୍ଦୁବର ଜିଲ୍ଲାର ତାମ୍ବଲି ଗାଁରୁ ଆଧାର କାର୍ଡ ତିଆରି ଆରମ୍ଭ ହୋଇଥିଲା। ସୋନିଆ ଗାନ୍ଧୀ ଏବଂ ତତ୍କାଳୀନ ପ୍ରଧାନମନ୍ତ୍ରୀ ମନମୋହନ ସିଂଙ୍କ ଉପସ୍ଥିତିରେ ରଞ୍ଜନା ସୋନାୱାନେଙ୍କୁ ତାଙ୍କର ପ୍ରଥମ ଆଧାର କାର୍ଡ ଦିଆଯାଇଥିଲା।

ଏଭଳି ପରିସ୍ଥିତିରେ ରଞ୍ଜନା ସୋନାୱାନେ ଭାରତର ପ୍ରଥମ ମହିଳା ହୋଇଥିଲେ, ଯିଏକି ଭାରତରେ ପ୍ରଥମ ଆଧାର କାର୍ଡ ପାଇଥିଲେ। ଆଜି ଭାରତରେ ବହୁ ସଂଖ୍ୟକ ଲୋକଙ୍କର ଆଧାର କାର୍ଡ ଅଛି । ସରକାରଙ୍କ ଅନେକ ଜନ କଲ୍ୟାଣ ଯୋଜନାର ଲାଭ ଉଠାଇବା ପାଇଁ ଆମ ସମସ୍ତଙ୍କୁ ଏହା ଆବଶ୍ୟକ । ଆଧାର କାର୍ଡର ଆଗମନ ସହିତ ଦେଶ ଭିତରେ ଏକ ସ୍ୱଚ୍ଛତା ଦେଖାଦେଇଛି ।