ଇରାନର ପୂର୍ବତନ ସର୍ବୋଚ୍ଚ ନେତା ଆୟାତୁଲ୍ଲା ଅଲି ଖାମେନେଇଙ୍କ ଅନ୍ତିମ ସଂସ୍କାରରେ ପ୍ରାୟ ୧୩ଟି ଦେଶ ଅଂଶଗ୍ରହଣ କରିନାହାଁନ୍ତି କିମ୍ବା ସେମାନଙ୍କ ପ୍ରତିନିଧି ଦଳର ସ୍ତରକୁ ହ୍ରାସ କରିଛନ୍ତି। ଇରାନୀ ମିଡିଆ ଦାବି କରିଛି ଯେ ଏହା ପଛରେ ଆମେରିକାର କୂଟନୈତିକ ଚାପ ରହିଛି। ଆମେରିକାର ଏକ ବୃହତ୍ କୂଟନୈତିକ ଅଭିଯାନ କାରଣରୁ ଅନେକ ଦେଶ ତେହେରାନରେ ଆୟୋଜିତ ଏହି କାର୍ଯ୍ୟକ୍ରମରୁ ଦୂରେଇ ରହିବାକୁ ବାଧ୍ୟ ହୋଇଥିବା ଇରାନର ନ୍ୟୁଜ୍ ଏଜେନ୍ସି ଦାବି କରିଛି।

ଆମେରିକାର କୂଟନୈତିକ ଚାପ

ଇରାନର ସରକାରୀ ନ୍ୟୁଜ୍ ଏଜେନ୍ସି ତସନିମ (Tasnim) ଏକ ରିପୋର୍ଟରେ ଦର୍ଶାଇଛି ଯେ, ଅନ୍ତିମ ସଂସ୍କାର ପୂର୍ବରୁ ଆମେରିକା ଏକ ଯୋଜନାବଦ୍ଧ କୂଟନୈତିକ ଅଭିଯାନ ଆରମ୍ଭ କରିଥିଲା। ଜୁନ୍ ୨୬ ତାରିଖରେ ଆମେରିକାର ବୈଦେଶିକ ସଚିବ ମାର୍କୋ ରୁବିଓ (Marco Rubio) ବିଭିନ୍ନ ଦେଶରେ ଥିବା ଆମେରିକୀୟ ଦୂତାବାସ ଏବଂ କୂଟନୈତିକ ମିଶନଗୁଡ଼ିକୁ ଗୋପନୀୟ ନିର୍ଦ୍ଦେଶ ଦେଇଥିଲେ। ଏଥିରେ କୁହାଯାଇଥିଲା ଯେ ଯେଉଁ ଦେଶଗୁଡ଼ିକ ଏହି ଅନ୍ତିମ ସଂସ୍କାରରେ ସାମିଲ ହେବେ, ତାହାକୁ ଆମେରିକା ଏକ "ଅମିତ୍ର ସୁଲଭ ଆଚରଣ" ଭାବରେ ଗ୍ରହଣ କରିବ, ଯାହାର ପ୍ରଭାବ ଆମେରିକା ସହ ସେମାନଙ୍କ ଦ୍ୱିପାକ୍ଷିକ ସମ୍ପର୍କ ଉପରେ ପଡ଼ିପାରେ।

ସହାୟତା ବନ୍ଦ କରିବାକୁ ଧମକ

ରିପୋର୍ଟ ଅନୁଯାୟୀ, ଆମେରିକା ପକ୍ଷରୁ କେତେକ ଦେଶକୁ ବିକାଶମୂଳକ ସହାୟତା ବନ୍ଦ କରିଦେବାର ଧମକ ମଧ୍ୟ ଦିଆଯାଇଥିଲା। ବିଶେଷକରି ଆଫ୍ରିକାର ଅନେକ ଦେଶରେ ଥିବା ଆମେରିକୀୟ ରାଷ୍ଟ୍ରଦୂତମାନେ ଚେତାବନୀ ଦେଇଥିଲେ ଯେ ଯଦି ସେମାନେ ତେହେରାନରେ ହେବାକୁ ଥିବା କାର୍ଯ୍ୟକ୍ରମରେ ଭାଗ ନିଅନ୍ତି, ତେବେ ଆମେରିକା ପକ୍ଷରୁ ମିଳୁଥିବା ଆର୍ଥିକ ଅନୁଦାନ କାଟ୍ କରାଯାଇପାରେ। ଏହାଛଡ଼ା ମାର୍କୋ ରୁବିଓ ବ୍ୟକ୍ତିଗତ ଭାବେ ଅତି କମରେ ୫ଟି ଆରବ ଦେଶର ପ୍ରତିନିଧିମାନଙ୍କ ସହ ଏହି ପ୍ରସଙ୍ଗରେ ଆଲୋଚନା କରିଥିବା ଦୁଇ ଜଣ ଅଜ୍ଞାତ ଆରବ କୂଟନୀତିଜ୍ଞ ସୂଚନା ଦେଇଛନ୍ତି।

୧୩ ଦେଶଙ୍କ ଓହରିବା ନିଷ୍ପତ୍ତି

ଆମେରିକାର ଏହି ଚାପ ଫଳରେ ଅତିକମରେ ୧୩ଟି ଦେଶ ଏହି ଅନ୍ତିମ ସଂସ୍କାରରୁ ଓହରି ଯାଇଛନ୍ତି କିମ୍ବା ସେମାନଙ୍କ ଉପସ୍ଥିତିକୁ ସୀମିତ କରିଛନ୍ତି। ଏହି ତାଲିକାରେ ପୂର୍ବ ୟୁରୋପର ୩ଟି ଦେଶ, ଆଫ୍ରିକାର ୫ଟି ଦେଶ, ପାରସ୍ୟ ଉପସାଗରୀୟ ୨ଟି ଆରବ ଦେଶ ଏବଂ ପୂର୍ବ ଏସିଆର ୨ଟି ବଡ ଦେଶ ସାମିଲ ଅଛନ୍ତି ବୋଲି ରିପୋର୍ଟରେ କୁହାଯାଇଛି। ସୂତ୍ରରୁ ପ୍ରକାଶ ଯେ, କେତେକ ଦେଶ କୂଟନୈତିକ ମାଧ୍ୟମରେ ସେମାନଙ୍କ ଅନୁପସ୍ଥିତିର କାରଣ ଦର୍ଶାଇବାକୁ ଚେଷ୍ଟା କରିଥିଲେ। ଅନ୍ୟ କେତେକ ଦେଶ ନିମ୍ନ ସ୍ତରର ପ୍ରତିନିଧିମାନଙ୍କୁ ପଠାଇବାକୁ ଚାହିଁଥିଲେ ମଧ୍ୟ ଇରାନ କର୍ତ୍ତୃପକ୍ଷ ତାହା ଗ୍ରହଣ କରିନଥିଲେ।

ୟୁକ୍ରେନର ରାଜଧାନୀ କିଭ୍ (Kyiv) ଉପରେ ରୁଷ ପୁଣିଥରେ ଏକ ବଡ଼ ଧରଣର ଆକ୍ରମଣ କରିଛି। ଗୁରୁବାର ଭୋରରୁ କିଭ୍ ଉପରେ ଏକାଧିକ ମିସାଇଲ୍ ଓ ଡ୍ରୋନ୍ ମାଡ଼ ହୋଇଛି, ଯାହା ଫଳରେ ସହରର ବିଭିନ୍ନ ସ୍ଥାନରେ ପ୍ରଚଣ୍ଡ ବିସ୍ଫୋରଣର ଶବ୍ଦ ଶୁଣିବାକୁ ମିଳିଛି। ଏହି ଭୟଙ୍କର ଆକ୍ରମଣ ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କି (Volodymyr Zelenskyy) ଙ୍କ ଚେତାବନୀର କିଛି ଘଣ୍ଟା ପରେ ହିଁ ଘଟିଛି।

କ୍ଷୟକ୍ଷତି ଏବଂ ଉଦ୍ଧାର କାର୍ଯ୍ୟ

ମିଳିଥିବା ସୂଚନା ଅନୁଯାୟୀ, ରୁଷର ଏହି ଘନଘନ ଆକ୍ରମଣରେ ଅନେକ ଆବାସିକ କୋଠାଗୁଡ଼ିକ କ୍ଷତିଗ୍ରସ୍ତ ହୋଇଛି ଏବଂ ସହରର ବିଭିନ୍ନ ସ୍ଥାନରେ ନିଆଁ ଲାଗିଯାଇଛି। କିଭ୍ ମେୟର ଭିଟାଲି କ୍ଲିଚକୋ (Vitali Klitschko) ଏହି ଘଟଣାକୁ ନିଶ୍ଚିତ କରିବା ସହ ଲୋକଙ୍କୁ ସୁରକ୍ଷିତ ଆଶ୍ରୟସ୍ଥଳୀରେ ରହିବାକୁ ନିବେଦନ କରିଛନ୍ତି। ବିସ୍ଫୋରଣ ପରେ ତୁରନ୍ତ ଉଦ୍ଧାରକାରୀ ଦଳ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି। କିଛି ସ୍ଥାନରେ କୋଠା ଭୁଶୁଡ଼ି ପଡ଼ିଥିବାରୁ ଭଗ୍ନାବଶେଷ ତଳେ ଲୋକମାନେ ଚାପି ହୋଇ ରହିଥିବା ଆଶଙ୍କା କରାଯାଉଛି।

ଜେଲେନସ୍କିଙ୍କ ପୂର୍ବ ସତର୍କ ସୂଚନା

ଏହି ଆକ୍ରମଣ ପୂର୍ବରୁ ଗୁଇନ୍ଦା ବିଭାଗର ସୂଚନା ଆଧାରରେ ରାଷ୍ଟ୍ରପତି ଜେଲେନସ୍କି ଦେଶବାସୀଙ୍କୁ ସତର୍କ କରାଇଥିଲେ। ରୁଷ ଏକ ବିରାଟ ଆକ୍ରମଣ ପାଇଁ ପ୍ରସ୍ତୁତ ହେଉଥିବା ନେଇ ସେ ସତର୍କ ସୂଚନା ଦେଇଥିଲେ। ବୁଧବାର ବିଳମ୍ବିତ ରାତିରୁ ସାରା ସହରରେ ସାଇରନ୍ ବାଜିବା ଆରମ୍ଭ ହୋଇଥିଲା। ଭୟଭୀତ ଲୋକମାନେ ନିଜର ପୋଷା ଜନ୍ତୁ ଏବଂ ଶୋଇବା ସାମଗ୍ରୀ ଧରି ଅଣ୍ଡରଗ୍ରାଉଣ୍ଡ ମେଟ୍ରୋ ଷ୍ଟେସନ ଏବଂ ଅନ୍ୟାନ୍ୟ ସୁରକ୍ଷିତ ସ୍ଥାନରେ ଆଶ୍ରୟ ନେଇଥିଲେ।

ଯୁଦ୍ଧର ନୂଆ ମୋଡ଼

ରୁଷ ଏବଂ ୟୁକ୍ରେନ ମଧ୍ୟରେ ଲାଗି ରହିଥିବା ଏହି ଯୁଦ୍ଧ ବର୍ତ୍ତମାନ ଏକ ଭୟଙ୍କର ସ୍ଥିତିରେ ପହଞ୍ଚିଛି। ୟୁକ୍ରେନ ମସ୍କୋ ଉପରେ ଡ୍ରୋନ୍ ଆକ୍ରମଣ ବୃଦ୍ଧି କରିଥିବା ବେଳେ ପ୍ରତିକ୍ରିୟା ସ୍ୱରୂପ ରୁଷ ଏବେ କିଭ୍ ଉପରେ ବାଲିଷ୍ଟିକ୍ ମିସାଇଲ୍ (Ballistic Missiles) ଏବଂ ଘାତକ ଡ୍ରୋନ୍ ଜରିଆରେ ଲଗାତାର ହମଲା କରୁଛି। ବର୍ତ୍ତମାନର ଏହି ଉତ୍ତେଜନାପୂର୍ଣ୍ଣ ସ୍ଥିତିରେ ସାଧାରଣ ନାଗରିକମାନେ ସବୁଠାରୁ ଅଧିକ ପ୍ରଭାବିତ ହେଉଛନ୍ତି।

ନୂଆଦିଲ୍ଲୀ: ଭେନେଜୁଏଲାରେ ଲଗାତାର ଦୁଇଟି ଶକ୍ତିଶାଳୀ ଭୂମିକମ୍ପ ଅନୁଭୂତ ହୋଇଛି। ଏହି ପ୍ରାକୃତିକ ବିପର୍ଯ୍ୟୟରେ ବ୍ୟାପକ କ୍ଷୟକ୍ଷତି ଘଟିଥିବା ବେଳେ ବହୁ କୋଠା ଭୁଶୁଡ଼ି ପଡ଼ିଛି। ଯୁକ୍ତରାଷ୍ଟ୍ର ଆମେରିକାର ଭୂବିଜ୍ଞାନ ସର୍ବେକ୍ଷଣ ସଂସ୍ଥା (USGS) ଅନୁଯାୟୀ, ପ୍ରଥମ ଭୂମିକମ୍ପଟି ୭.୨ ତୀବ୍ରତା ରହିଥିଲା ଏବଂ ଏହା ରାଜଧାନୀ କାରାକାସ୍ ଠାରୁ ୨୮୪ କିଲୋମିଟର ପଶ୍ଚିମରେ ଥିବା ସାନ୍ ଫେଲିପେ ନିକଟରେ ଅନୁଭୂତ ହୋଇଥିଲା। ଏହାର ଠିକ୍ ପରେ ପରେ ୭.୫ ତୀବ୍ରତାର ଅନ୍ୟ ଏକ ଭୂମିକମ୍ପ ରାଜଧାନୀରୁ ୨୯୩ କିଲୋମିଟର ଦୂର ୟୁମାରେ ଅଞ୍ଚଳରେ ଅନୁଭୂତ ହୋଇଥିଲା। USGS ଆକଳନ ଅନୁଯାୟୀ ଏହି ବିପର୍ଯ୍ୟୟରେ ମୃତ୍ୟୁସଂଖ୍ୟା ୧୦,୦୦୦ ରୁ ୧,୦୦,୦୦୦ ମଧ୍ୟରେ ରହିପାରେ।

ଏହି ଘଟଣାରେ ଗଭୀର ଶୋକ ପ୍ରକାଶ କରିଛନ୍ତି ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ସେ ସୋସିଆଲ୍ ମିଡିଆ ପ୍ଲାଟଫର୍ମ 'X' ରେ ଲେଖିଛନ୍ତି ଯେ, ଏହି କଷ୍ଟକର ସମୟରେ ଭାରତବାସୀ ଭେନେଜୁଏଲାର ଲୋକଙ୍କ ସହ ଛିଡ଼ା ହୋଇଛନ୍ତି। ପ୍ରାଣ ହରାଇଥିବା ଲୋକଙ୍କ ପରିବାର ପ୍ରତି ସମବେଦନା ଜଣାଇବା ସହ ଭାରତ ସମସ୍ତ ପ୍ରକାର ସମ୍ଭାବ୍ୟ ସହାୟତା ଯୋଗାଇଦେବାକୁ ପ୍ରସ୍ତୁତ ଥିବା ପିଏମ୍ ମୋଦୀ ପ୍ରତିଶ୍ରୁତି ଦେଇଛନ୍ତି।

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ତୁରନ୍ତ ସହାୟତା ଯୋଗାଇଦେବାକୁ ଘୋଷଣା କରିଛନ୍ତି। ଟ୍ରୁଥ୍ ସୋସିଆଲ୍ (Truth Social)ରେ ଏକ ପୋଷ୍ଟ କରି ସେ କହିଛନ୍ତି ଯେ ଆମେରିକୀୟ ସରକାରୀ ସଂସ୍ଥାଗୁଡ଼ିକୁ ତୁରନ୍ତ ଉଦ୍ଧାର କାର୍ଯ୍ୟରେ ସାହାଯ୍ୟ କରିବା ପାଇଁ ନିର୍ଦ୍ଦେଶ ଦିଆଯାଇଛି। ଅନ୍ୟପକ୍ଷରେ, ଭେନେଜୁଏଲାର କାର୍ଯ୍ୟକାରୀ ରାଷ୍ଟ୍ରପତି ଡେଲସି ରୋଡ୍ରିଗେଜ୍ (Delcy Rodriguez) ଦେଶରେ ଜରୁରୀକାଳୀନ ପରିସ୍ଥିତି ଘୋଷଣା କରିଛନ୍ତି ଏବଂ ମୃତକଙ୍କ ପରିବାରକୁ ସମବେଦନା ଜଣାଇଛନ୍ତି। ଉଦ୍ଧାରକାରୀ ଦଳ ଭଗ୍ନାବଶେଷ ତଳେ ଚାପି ହୋଇ ରହିଥିବା ଲୋକଙ୍କୁ ଉଦ୍ଧାର କରିବା ପାଇଁ ଅଭିଯାନ ଜାରି ରଖିଛନ୍ତି।

ଆମେରିକା ଏବଂ ଇରାନ ମଧ୍ୟରେ ସ୍ୱାକ୍ଷରିତ ହୋଇଥିବା ମଧ୍ୟବର୍ତ୍ତୀକାଳୀନ ଚୁକ୍ତି (US-Iran Interim Deal) ପରେ ଏବେ ଏକ ବଡ଼ ପଦକ୍ଷେପ ନିଆଯିବାକୁ ଯାଉଛି। ଆନ୍ତର୍ଜାତୀୟ ପରମାଣୁ ଶକ୍ତି ଏଜେନ୍ସି (IAEA) ର ମୁଖ୍ୟ ରାଫେଲ ମାରିଆନୋ ଗ୍ରୋସି ସ୍ପଷ୍ଟ ସଙ୍କେତ ଦେଇଛନ୍ତି ଯେ, ତାଙ୍କ ଟିମ୍ ଖୁବ୍ ଶୀଘ୍ର ଇରାନର ପରମାଣୁ ଏନରିଚମେଣ୍ଟ୍ ସାଇଟ୍ (ପରମାଣୁ କେନ୍ଦ୍ର) ଗୁଡ଼ିକର ଯାଞ୍ଚ କରିବ। ଯୁଦ୍ଧ ପରିସ୍ଥିତିକୁ ଶାନ୍ତ କରିବା ପାଇଁ ହୋଇଥିବା ଏହି ଚୁକ୍ତିର ଏହା ଏକ ପ୍ରମୁଖ ଅଂଶ ବୋଲି ବିବେଚନା କରାଯାଉଛି।

ଯାଞ୍ଚ ନେଇ ଆଇଏଇଏ ମୁଖ୍ୟଙ୍କ ଦୃଢୋକ୍ତି

ବୁଧବାର ଟୋକିଓରେ ଗଣମାଧ୍ୟମକୁ ପ୍ରତିକ୍ରିୟା ଦେଇ ରାଫେଲ ଗ୍ରୋସି କହିଛନ୍ତି ଯେ, ଇରାନର ପରମାଣୁ କେନ୍ଦ୍ରଗୁଡ଼ିକର ଯାଞ୍ଚ ନିଶ୍ଚିତ ଭାବରେ ହେବ। "ଏହା ଆସନ୍ତାକାଲି, ଏକ ସପ୍ତାହ କିମ୍ବା ଦଶ ଦିନ ମଧ୍ୟରେ ହୋଇପାରେ, କିନ୍ତୁ ଏହା ନିଶ୍ଚିତ ଭାବେ ହେବାକୁ ଯାଉଛି" ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି। ସୂଚନାଯୋଗ୍ୟ ଯେ, ଗତ ଜୁନ୍ ୨୩ ତାରିଖରେ ଏହି ପ୍ରସଙ୍ଗରେ ଆମେରିକା ଏବଂ ଇରାନ ପକ୍ଷରୁ ପରସ୍ପର ବିରୋଧୀ ବୟାନ ସାମ୍ନାକୁ ଆସିଥିଲା। ଆମେରିକା ଦାବି କରିଥିଲା ଯେ ଇରାନ ଯାଞ୍ଚ ପାଇଁ ଅନୁମତି ଦେଇଛି, କିନ୍ତୁ ଇରାନ ଏହାକୁ ଖଣ୍ଡନ କରିଥିଲା। ତେବେ ଗ୍ରୋସିଙ୍କ ଏହି ବୟାନ ପରେ ସମସ୍ତ ଦ୍ୱନ୍ଦ୍ୱ ଦୂର ହୋଇଛି।

ପୃଷ୍ଠଭୂମି ଏବଂ ପରମାଣୁ ଅସ୍ତ୍ର ଆଶଙ୍କା

ଗତ ୨୦୨୫ ମସିହାରେ ଇସ୍ରାଏଲ ଏବଂ ଇରାନ ମଧ୍ୟରେ ୧୨ ଦିନ ଧରି ଚାଲିଥିବା ଯୁଦ୍ଧ ସମୟରେ ଇରାନର ପରମାଣୁ କେନ୍ଦ୍ରଗୁଡ଼ିକୁ ଟାର୍ଗେଟ କରାଯାଇଥିଲା। ଏହାସହ ଆମେରିକା ମଧ୍ୟ ନିଜର ବି-୨ (B-2) ବୋମାବର୍ଷକ ବିମାନ ମାଧ୍ୟମରେ ଇରାନର ଫୋର୍ଦୋ, ନତାଞ୍ଜ ଏବଂ ଇସ୍ଫାହାନ ପରମାଣୁ କେନ୍ଦ୍ର ଉପରେ ଆକ୍ରମଣ କରିଥିଲା। ଏହି ଆକ୍ରମଣ ପରେ ଇରାନ ଉତକ୍ଷିପ୍ତ ହୋଇ ଆଇଏଇଏ (IAEA) ଟିମକୁ ନିଜର ପରମାଣୁ କେନ୍ଦ୍ରଗୁଡ଼ିକରେ ପ୍ରବେଶ ଉପରେ ରୋକ୍ ଲଗାଇଥିଲା। ବିଶେଷଜ୍ଞଙ୍କ ଅନୁମାନ ଅନୁଯାୟୀ, ଇରାନ ପାଖରେ ବର୍ତ୍ତମାନ ୬୦ ପ୍ରତିଶତ ପର୍ଯ୍ୟନ୍ତ ଉଚ୍ଚ ସମୃଦ୍ଧ ୟୁରେନିୟମ (Highly Enriched Uranium) ମହଜୁଦ ରହିଛି, ଯାହାଦ୍ୱାରା ସେ ଚାହିଁଲେ ପ୍ରାୟ ୧୦ଟି ପରମାଣୁ ବୋମା ପ୍ରସ୍ତୁତ କରିପାରିବ।

ଯଦିଓ ଇରାନ କ୍ରମାଗତ ଭାବରେ ଦାବି କରିଆସୁଛି ଯେ ତାର ପରମାଣୁ କାର୍ଯ୍ୟକ୍ରମ ସମ୍ପୂର୍ଣ୍ଣ ଶାନ୍ତିପୂର୍ଣ୍ଣ, ତଥାପି ବିଶ୍ୱସ୍ତରରେ ଏହାକୁ ନେଇ ଆଶଙ୍କା ଲାଗିରହିଛି। ଏହି ପରିପ୍ରେକ୍ଷୀରେ, ଆମେରିକା-ଇରାନ ମଧ୍ୟବର୍ତ୍ତୀକାଳୀନ ଚୁକ୍ତି ଆଧାରରେ ମିଳିତ ଜାତିସଂଘର ଏହି ପରମାଣୁ ଏଜେନ୍ସି ଦ୍ୱାରା ହେବାକୁ ଥିବା ଯାଞ୍ଚ, ବିଶ୍ୱ ଶାନ୍ତି ଏବଂ ମଧ୍ୟପ୍ରାଚ୍ୟରେ ସ୍ଥିରତା ଆଣିବା ଦିଗରେ ଏକ ନିର୍ଣ୍ଣାୟକ ପଦକ୍ଷେପ ସାବ୍ୟସ୍ତ ହେବ।

ଆମେରିକା ଏବଂ ଇରାନ ମଧ୍ୟରେ ଦୀର୍ଘ ସାଢେ ତିନି ମାସ ଧରି ଚାଲିଥିବା ଯୁଦ୍ଧର ଅନ୍ତ ଘଟିବାକୁ ଯାଉଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ (Donald Trump) ଏବଂ ଇରାନ ମଧ୍ୟରେ ଏକ ପ୍ରାଥମିକ ବୁଝାମଣା ସ୍ୱାକ୍ଷରିତ ହୋଇଛି, ଯାହା ବିଶ୍ୱ ଶାନ୍ତି ଏବଂ ଅର୍ଥନୀତି ପାଇଁ ଏକ ବଡ଼ ଆଶ୍ୱସ୍ତି ଆଣିଦେଇଛି। ଏହି ଚୁକ୍ତି ମୁଖ୍ୟତଃ ଇରାନର ପରମାଣୁ କାର୍ଯ୍ୟକ୍ରମ ଉପରେ କଟକଣା ଲଗାଇବା ଏବଂ ବିଶ୍ୱ ବାଣିଜ୍ୟ ପାଇଁ ଗୁରୁତ୍ୱପୂର୍ଣ୍ଣ ହରମୁଜ୍ ପ୍ରଣାଳୀ (Strait of Hormuz) କୁ ପୁଣିଥରେ ଖୋଲିବା ଉପରେ କେନ୍ଦ୍ରିତ ଅଟେ।

ହରମୁଜ୍ ପ୍ରଣାଳୀ ଖୋଲିବା ଏବଂ ତୈଳ ବଜାର

ଏହି ଚୁକ୍ତିର ସବୁଠାରୁ ବଡ଼ ଫାଇଦା ହେଉଛି ହରମୁଜ୍ ପ୍ରଣାଳୀର ପୁନଃ ଖୋଲିବା, ଯାହାଦ୍ୱାରା ବିଶ୍ୱର ପ୍ରାୟ ଏକ-ପଞ୍ଚମାଂଶ ତୈଳ ଏବଂ ଗ୍ୟାସ ଯୋଗାଣ ସ୍ୱାଭାବିକ ହୋଇପାରିବ। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଘୋଷଣା କରିଛନ୍ତି ଯେ ଶୁକ୍ରବାର ସୁଦ୍ଧା ଏହି ପ୍ରଣାଳୀ ସମ୍ପୂର୍ଣ୍ଣ ରୂପେ ଖୋଲିଯିବ ଏବଂ ଏଥିପାଇଁ କୌଣସି ଶୁଳ୍କ ଲାଗିବ ନାହିଁ। ଏହି ଖବର ପ୍ରକାଶ ପାଇବା ପରେ ଅନ୍ତର୍ଜାତୀୟ ବଜାରରେ ତୈଳ ଦର ହ୍ରାସ ପାଇବା ସହ ସେୟାର ବଜାରରେ ବୃଦ୍ଧି ଦେଖିବାକୁ ମିଳିଛି।

ଐତିହାସିକ ଚୁକ୍ତିର ସ୍ୱାକ୍ଷର

ପାକିସ୍ତାନ ଏବଂ କତାରର ମଧ୍ୟସ୍ଥତାରେ ହୋଇଥିବା ଏହି ଚୁକ୍ତିକୁ ବିଧିବଦ୍ଧ ଭାବରେ ଆସନ୍ତା ଶୁକ୍ରବାର ଦିନ ସ୍ୱିଜରଲ୍ୟାଣ୍ଡର ଜେନେଭା ନିକଟରେ ସ୍ୱାକ୍ଷର କରାଯିବ। ଏହି ସମାରୋହରେ ଆମେରିକାର ଉପ-ରାଷ୍ଟ୍ରପତି ଜେଡି ଭାନ୍ସ (JD Vance), ମଧ୍ୟପ୍ରାଚ୍ୟର ସ୍ୱତନ୍ତ୍ର ଦୂତ ଷ୍ଟିଭ୍ ୱିଟକଫ୍, ଏବଂ ଇରାନର ସଂସଦ ବାଚସ୍ପତି ମହମ୍ମଦ ବାକେର୍ ଗାଲିବାଫ୍ (Mohammad Bagher Ghalibaf) ଉପସ୍ଥିତ ରହିବେ।

ପରମାଣୁ କାର୍ଯ୍ୟକ୍ରମ ଉପରେ ରୋକ ଏବଂ ଭବିଷ୍ୟତର ରୂପରେଖ

ବର୍ତ୍ତମାନର ବୁଝାମଣା ପରେ ଉଭୟ ଦେଶ ମଧ୍ୟରେ ଆଗାମୀ ୬୦ ଦିନ ପର୍ଯ୍ୟନ୍ତ ବ୍ୟାପକ ଆଲୋଚନା ହେବ। ଏଥିରେ ଇରାନର ଉଚ୍ଚ ମାନର ୟୁରାନିୟମ (HEU) ସଂଗ୍ରହ ଏବଂ ଆର୍ଥିକ କଟକଣା ପ୍ରତ୍ୟାହାର ପ୍ରସଙ୍ଗ ସାମିଲ ରହିବ। ଟ୍ରମ୍ପ ଦାବି କରିଛନ୍ତି ଯେ ଇରାନ କେବେବି ପରମାଣୁ ଅସ୍ତ୍ରଶସ୍ତ୍ର ହାସଲ କରିବ ନାହିଁ ବୋଲି ସମ୍ମତି ଜଣାଇଛି। ଅନ୍ୟପକ୍ଷରେ, ଯଦି ଇରାନ ନିଜର ପ୍ରତିଶ୍ରୁତି ପାଳନ କରେ, ତେବେ ଆମେରିକା ଏବଂ ଏହାର ସହଯୋଗୀ ରାଷ୍ଟ୍ରମାନେ ଇରାନର ଅର୍ଥନୈତିକ ପୁନର୍ନିର୍ମାଣ ପାଇଁ ପ୍ରାୟ ୩୦୦ ବିଲିୟନ ଡଲାର ର ସହାୟତା ପ୍ୟାକେଜ୍ ପ୍ରଦାନ କରିପାରନ୍ତି ବୋଲି ରିପୋର୍ଟରୁ ଜଣାପଡିଛି।

ମଧ୍ୟପ୍ରାଚ୍ୟରେ ଯୁଦ୍ଧ ପରିସ୍ଥିତି ଏବେ ଅଧିକ ଭୟଙ୍କର ରୂପ ନେଇଛି। ହର୍ମୁଜ ପ୍ରଣାଳୀ (Strait of Hormuz) ନିକଟରେ ଏକ ଆମେରିକୀୟ ସେନା ହେଲିକପ୍ଟର ଖସିପଡ଼ିବା ପରେ ଆମେରିକା ଇରାନ ଉପରେ ବଡ଼ ଧରଣର ଏୟାର ଷ୍ଟ୍ରାଇକ୍ (ବିମାନ ଆକ୍ରମଣ) କରିଛି। ହେଲିକପ୍ଟରକୁ ଇରାନ ଖସାଇଥିବା ନେଇ ଆମେରିକା ଅଭିଯୋଗ କରିବା ସହ ଏହାର କଡ଼ା ଜବାବ ସ୍ୱରୂପ ଏହି ଆକ୍ରମଣ କରିଛି। ଆମେରିକୀୟ ସେନା ଇରାନର ବାୟୁ ପ୍ରତିରକ୍ଷା ବ୍ୟବସ୍ଥା, ଗ୍ରାଉଣ୍ଡ କଣ୍ଟ୍ରୋଲ୍ ଷ୍ଟେସନ୍ ଏବଂ ରାଡାର୍ ସାଇଟ୍ ଗୁଡ଼ିକୁ ଟାର୍ଗେଟ୍ କରିଛି।

ଟ୍ରମ୍ପଙ୍କ କଡ଼ା ଚେତାବନୀ

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନକୁ ଏକ ନୂଆ ଚେତାବନୀ ଦେଇଛନ୍ତି। ସୋସିଆଲ ମିଡିଆରେ ଏକ ପୋଷ୍ଟ କରି ସେ କହିଛନ୍ତି ଯେ ଇରାନର ସେନା ସମ୍ପୂର୍ଣ୍ଣ ରୂପେ ପରାସ୍ତ ହୋଇଛି। ସେ ଲେଖିଛନ୍ତି, "ଇରାନ ସେନାର ଅବସ୍ଥା ଏବେ ବହୁତ ଖରାପ। ସେମାନଙ୍କର ନୌସେନା ଓ ବାୟୁସେନାର ଅଧିକାଂଶ ଭାଗ ଏବେ ଆଉ ନାହିଁ। ମଧ୍ୟପ୍ରାଚ୍ୟର ଗୁଣ୍ଡା (Bully of the Middle East) ଏବେ ମୃତ"। ସେ ଆହୁରି ମଧ୍ୟ କହିଛନ୍ତି ଯେ ଚୁକ୍ତି ଆଲୋଚନା ବିଳମ୍ବ କରିବାର ପରିଣାମ ଇରାନକୁ ଭୋଗିବାକୁ ପଡ଼ିବ।

ଇରାନର ପଲଟାବାର ଏବଂ ଆକ୍ରମଣ

ଆମେରିକାର ଏହି ଆକ୍ରମଣ ପରେ ଇରାନ ମଧ୍ୟ ଚୁପ୍ ବସିନାହିଁ। ଜୋର୍ଡାନର ମୁୱାଫାକ୍ ସଲ୍ଟି ଏୟାରବେସ୍ (Muwaffaq Salti Air Base), ଯେଉଁଠାରେ ଆମେରିକୀୟ ସେନା ମୁତୟନ ଅଛନ୍ତି, ସେଠାରେ ଇରାନ ମିସାଇଲ୍ ମାଡ଼ କରିଥିବା ସୂଚନା ମିଳିଛି। ଏହା ବ୍ୟତୀତ ବାହାରିନ୍ ଏବଂ କୁଏତରେ ମଧ୍ୟ ଇରାନ ପକ୍ଷରୁ ଆକ୍ରମଣ କରାଯାଇଛି, ଯାହା ଫଳରେ ସେହି ଦେଶଗୁଡ଼ିକ ନିଜର ବାୟୁ ପ୍ରତିରକ୍ଷା ବ୍ୟବସ୍ଥାକୁ ସକ୍ରିୟ କରିବା ସହ ଆଲର୍ଟ ଜାରି କରିଛନ୍ତି।

ଆମେରିକାକୁ ଆରାଘଚିଙ୍କ ଚେତାବନୀ

ଇରାନର ବୈଦେଶିକ ମନ୍ତ୍ରୀ ଅବ୍ବାସ ଆରାଘଚି ଆମେରିକାକୁ କଡ଼ା ଭାଷାରେ ସତର୍କ କରାଇ ଦେଇଛନ୍ତି। ସେ କହିଛନ୍ତି ଯେ ଯଦି ଆମେରିକୀୟ ସେନା ସୁରକ୍ଷିତ ରହିବାକୁ ଚାହୁଁଛନ୍ତି, ତେବେ ସେମାନେ ତୁରନ୍ତ ପାରସ୍ୟ ଉପସାଗର (Persian Gulf) ଅଞ୍ଚଳ ଛାଡ଼ିଦେବା ଉଚିତ୍। ଆରାଘଚି କହିଛନ୍ତି ଯେ ଏହି ଅଞ୍ଚଳ ଆମେରିକା ଠାରୁ ହଜାର ହଜାର ମାଇଲ ଦୂରରେ ଅବସ୍ଥିତ, ତେଣୁ ବିପଦ କମାଇବା ପାଇଁ ସେମାନେ ଏଠାରୁ ଚାଲିଯିବା ହିଁ ସବୁଠାରୁ ଭଲ ବିକଳ୍ପ ଅଟେ।

ଆଫଗାନିସ୍ତାନ ଏବଂ ପାକିସ୍ତାନ ମଧ୍ୟରେ ପୁଣିଥରେ ଉତ୍ତେଜନା ଦେଖାଦେଇଛି। ପାକିସ୍ତାନ (Pakistan) ପକ୍ଷରୁ ଆଫଗାନିସ୍ତାନ (Afghanistan) ଉପରେ କରାଯାଇଥିବା ଏକାଧିକ ଏୟାରଷ୍ଟ୍ରାଇକ ବା ବୈମାନିକ ଆକ୍ରମଣରେ ଅତିକମରେ ୧୩ ଜଣଙ୍କର ମୃତ୍ୟୁ ଘଟିଥିବା ବେଳେ ୧୪ ଜଣ ଆହତ ହୋଇଛନ୍ତି।

ଆକ୍ରମଣର ନିଶାନା ଏବଂ ମୃତାହତ

ତାଲିବାନର ମୁଖ୍ୟ ମୁଖପାତ୍ର ଜବିହୁଲ୍ଲା ମୁଜାହିଦ (Zabihullah Mujahid) ବୁଧବାର ଦିନ ସୂଚନା ଦେଇଛନ୍ତି ଯେ, ପାକିସ୍ତାନୀ ସେନା ଆଫଗାନିସ୍ତାନର ଖୋଷ୍ଟ, କୁନାର ଏବଂ ପାକତିକା (Khost, Kunar and Paktika) ପ୍ରଦେଶକୁ ଟାର୍ଗେଟ କରି ଏହି ଆକ୍ରମଣ କରିଛି। ଏହି ଆକ୍ରମଣରେ ସାଧାରଣ ନାଗରିକଙ୍କ ଘରଗୁଡ଼ିକ ଉପରେ ବୋମାମାଡ଼ କରାଯାଇଛି। ସବୁଠାରୁ ଦୁଃଖଦାୟକ ବିଷୟ ହେଉଛି, ମୃତକଙ୍କ ମଧ୍ୟରେ ୧୧ ଜଣ ଶିଶୁ, ଜଣେ ମହିଳା ଏବଂ ଜଣେ ବୃଦ୍ଧ ସାମିଲ ଅଛନ୍ତି। ଅବଶ୍ୟ, ପାକିସ୍ତାନ ପକ୍ଷରୁ ଏହି ଆକ୍ରମଣକୁ ନେଇ ଏପର୍ଯ୍ୟନ୍ତ କୌଣସି ଆନୁଷ୍ଠାନିକ ପ୍ରତିକ୍ରିୟା ମିଳିପାରି ନାହିଁ।

ଉଭୟ ଦେଶ ମଧ୍ୟରେ ବଢୁଛି ବିବାଦ

ଗତ ଫେବୃଆରୀ ମାସଠାରୁ ଆଫଗାନିସ୍ତାନ ଏବଂ ପାକିସ୍ତାନ ମଧ୍ୟରେ ସୀମା ବିବାଦକୁ ନେଇ କ୍ରମାଗତ ଭାବେ ସଂଘର୍ଷ ଲାଗିରହିଛି। ଯେଉଁଥିରେ ଶହ ଶହ ଲୋକଙ୍କର ଜୀବନ ଗଲାଣି। ମଙ୍ଗଳବାର ଦିନ ପାକିସ୍ତାନର ଖାଇବର ପାଖ୍ତୁନଖ୍ୱା (Khyber Pakhtunkhwa) ପ୍ରଦେଶରେ ଥିବା ଏକ ସୁରକ୍ଷା ପୋଷ୍ଟ ଉପରେ ଆତଙ୍କବାଦୀମାନେ ଆକ୍ରମଣ କରିଥିଲେ। ଏଥିରେ ୬ ଜଣ ପାକିସ୍ତାନୀ ସୁରକ୍ଷାକର୍ମୀଙ୍କ ମୃତ୍ୟୁ ହୋଇଥିଲା ବେଳେ ପାଲଟା ଜବାବରେ ସେନା ୮ ଜଣ ଆତଙ୍କବାଦୀଙ୍କୁ ନିପାତ କରିଥିଲା। ଏହି ଘଟଣାର ଠିକ୍ ପରେ ପରେ ଆଫଗାନିସ୍ତାନ ଉପରେ ଏହି ଏୟାରଷ୍ଟ୍ରାଇକ୍ ହୋଇଥିବା କୁହାଯାଉଛି।

ଆତଙ୍କବାଦକୁ ନେଇ ପାକିସ୍ତାନର ଅଭିଯୋଗ

ପାକିସ୍ତାନର କହିବା ଅନୁଯାୟୀ, ଆଫଗାନିସ୍ତାନ ନିଜ ମାଟିରେ ତେହେରିକ୍-ଇ-ତାଲିବାନ ପାକିସ୍ତାନ (TTP) ଆତଙ୍କବାଦୀଙ୍କୁ ଆଶ୍ରୟ ଦେଉଛି, ଯେଉଁମାନେ ପାକିସ୍ତାନ ଭିତରେ ପଶି ଆକ୍ରମଣ କରୁଛନ୍ତି। ଯଦିଓ ଟିଟିପି ଏବଂ ଆଫଗାନିସ୍ତାନର ତାଲିବାନ ଦୁଇଟି ଅଲଗା ସଂଗଠନ, ତଥାପି ସେମାନଙ୍କ ମଧ୍ୟରେ ସମ୍ପର୍କ ରହିଛି ବୋଲି ପାକିସ୍ତାନ ଅଭିଯୋଗ କରୁଛି। ତେବେ ୨୦୨୧ ମସିହାରୁ ଆଫଗାନିସ୍ତାନରେ କ୍ଷମତାକୁ ଆସିଥିବା ତାଲିବାନ ସରକାର ଏହି ଅଭିଯୋଗକୁ ସମ୍ପୂର୍ଣ୍ଣ ଭାବେ ଖଣ୍ଡନ କରିଆସୁଛି। ଆଫଗାନିସ୍ତାନ ମାଟିକୁ କୌଣସି ଦେଶ ବିରୋଧରେ ବ୍ୟବହାର କରିବାକୁ ଦିଆଯିବ ନାହିଁ ବୋଲି ତାଲିବାନ ପକ୍ଷରୁ ସ୍ପଷ୍ଟ କରାଯାଇଛି।

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁଙ୍କ ମଧ୍ୟରେ ତିକ୍ତତା ବଢ଼ିବାରେ ଲାଗିଛି। ଉଭୟ ନେତା ନିଜ ନିଜର ରାଜନୈତିକ ଅସ୍ତିତ୍ୱ ବଞ୍ଚାଇ ରଖିବା ପାଇଁ ଏବେ ସଂଘର୍ଷ କରୁଛନ୍ତି। ନିକଟରେ ଟ୍ରମ୍ପ ନେତନ୍ୟାହୁଙ୍କ ସହ ଫୋନ୍‌ରେ କଥା ହୋଇ ଇରାନ ଉପରେ ହେଉଥିବା ଆକ୍ରମଣକୁ ତୁରନ୍ତ ବନ୍ଦ କରିବାକୁ କହିଛନ୍ତି। ଏପରିକି, ଯଦି ସେ ଆକ୍ରମଣ ବନ୍ଦ ନକରନ୍ତି, ତେବେ ଖୁବ୍ ଶୀଘ୍ର ଇସ୍ରାଏଲକୁ ନିଜ ଲଢ଼େଇ ଏକାକୀ ଲଢ଼ିବାକୁ ପଡ଼ିବ ବୋଲି ଟ୍ରମ୍ପ ଚେତାବନୀ ଦେଇଛନ୍ତି।

ରାଜନୈତିକ ଚାପରେ ଉଭୟ ନେତା

ବର୍ତ୍ତମାନ ସମୟରେ ଉଭୟ ଟ୍ରମ୍ପ ଏବଂ ନେତନ୍ୟାହୁ ନିଜ ଦେଶରେ ରାଜନୈତିକ ଚାପର ସମ୍ମୁଖୀନ ହେଉଛନ୍ତି। ଟ୍ରମ୍ପ ନିଜର ଶାସନ କାଳରେ ବିଶ୍ୱସ୍ତରରେ ଜଣେ 'ଶାନ୍ତି ପ୍ରତିଷ୍ଠାତା' ଭାବରେ ନିଜର ଭାବମୂର୍ତ୍ତି ଗଠନ କରିବାକୁ ଚାହୁଁଛନ୍ତି ଏବଂ ମଧ୍ୟପ୍ରାଚ୍ୟରେ ଅଧିକ ଯୁଦ୍ଧକୁ ଏଡ଼ାଇବାକୁ ପ୍ରୟାସ କରୁଛନ୍ତି। ଅନ୍ୟପକ୍ଷରେ, ଇସ୍ରାଏଲ୍ ପ୍ରଧାନମନ୍ତ୍ରୀ ନେତନ୍ୟାହୁ ନିଜ ଦେଶରେ ଦକ୍ଷିଣପନ୍ଥୀ ସହଯୋଗୀଙ୍କ ଚାପରେ ଅଛନ୍ତି, ଯେଉଁମାନେ ସୁରକ୍ଷା ପ୍ରସଙ୍ଗରେ କୌଣସି ପ୍ରକାର ସାଲିସ୍ କରିବାକୁ ପ୍ରସ୍ତୁତ ନୁହଁନ୍ତି। ଏହି ପରିସ୍ଥିତିରେ ଉଭୟଙ୍କ ପାଇଁ ନିଜର ରାଜନୈତିକ କ୍ୟାରିୟର ବଞ୍ଚାଇବା ଏକ ବଡ଼ ଆହ୍ୱାନ ପାଲଟିଛି।

ଫୋନ୍ କଲ୍‌ରେ ମତଭେଦ

ରିପୋର୍ଟ ଅନୁଯାୟୀ, ଉଭୟ ନେତାଙ୍କ ମଧ୍ୟରେ ହୋଇଥିବା ଫୋନ୍ କଲ୍‌ରେ ତୀବ୍ର ମତଭେଦ ଦେଖିବାକୁ ମିଳିଥିଲା। ଟ୍ରମ୍ପ ସିଧାସଳଖ ଭାବେ ନେତନ୍ୟାହୁଙ୍କୁ କହିଥିଲେ ଯେ, 'ବିବି, ତୁମକୁ ସାବଧାନ ରହିବାକୁ ପଡ଼ିବ'। ଇରାନ ଉପରେ ଇସ୍ରାଏଲର କାର୍ଯ୍ୟାନୁଷ୍ଠାନକୁ ନେଇ ଆମେରିକାର ଅସନ୍ତୋଷ ଏଥିରୁ ସ୍ପଷ୍ଟ ବାରି ହୋଇପଡ଼ୁଛି। ଇସ୍ରାଏଲ୍ ସୂତ୍ରରୁ ମଧ୍ୟ ପ୍ରକାଶ ପାଇଛି ଯେ, ଏହି କଥାବାର୍ତ୍ତା ସମୟରେ ଅନେକ ପ୍ରସଙ୍ଗରେ ଉଭୟଙ୍କ ମଧ୍ୟରେ ସହମତି ହୋଇପାରିନଥିଲା।

ଆଗକୁ ଏହାର ପ୍ରଭାବ କ'ଣ ହେବ?

ଯଦିଓ ଦୀର୍ଘ ଦିନରୁ ଆମେରିକା ଏବଂ ଇସ୍ରାଏଲ୍ ମଧ୍ୟରେ ଘନିଷ୍ଠ ବନ୍ଧୁତା ରହିଆସିଛି, ତଥାପି ବର୍ତ୍ତମାନର ଏହି ତିକ୍ତତା ଦୁଇ ଦେଶର ସମ୍ପର୍କରେ ଫାଟ ସୃଷ୍ଟି କରିପାରେ। ଯଦି ନେତନ୍ୟାହୁ ଆମେରିକାର ଚେତାବନୀକୁ ଅଣଦେଖା କରନ୍ତି, ତେବେ ଇସ୍ରାଏଲକୁ ଆମେରିକାର ସାମରିକ ତଥା କୂଟନୈତିକ ସହାୟତାରୁ ବଞ୍ଚିତ ହେବାକୁ ପଡ଼ିପାରେ। ମଧ୍ୟପ୍ରାଚ୍ୟରେ ଶାନ୍ତି ପ୍ରତିଷ୍ଠା ଏବଂ ଏହି ଦୁଇ ନେତାଙ୍କ 'ରାଜନୈତିକ ଜୀବନ' ବଞ୍ଚାଇବା ଲଢ଼େଇ ଆଗାମୀ ଦିନରେ ବିଶ୍ୱ ରାଜନୀତିର ଏକ ନୂଆ ମୋଡ଼ ନେବ ବୋଲି ବିଶେଷଜ୍ଞମାନେ ମତବ୍ୟକ୍ତ କରୁଛନ୍ତି।

ଆମେରିକା ସପ୍ତାହନ୍ତରେ ଇରାନର ଗୋରୁକ୍ ଏବଂ କେଶମ୍ ଦ୍ୱୀପ ଠାରେ ଥିବା ରାଡାର୍ ଏବଂ ଡ୍ରୋନ୍-ନିୟନ୍ତ୍ରଣ କେନ୍ଦ୍ରଗୁଡ଼ିକ ଉପରେ ଆକ୍ରମଣ କରିଛି। ଆମେରିକୀୟ ସେନା ଏହାକୁ ଆତ୍ମରକ୍ଷାମୂଳକ ଆକ୍ରମଣ ବୋଲି ବର୍ଣ୍ଣନା କରିଛି। ତେହେରାନର ଆକ୍ରାମକ ବ୍ୟବହାରର ଜବାବରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ବୋଲି ଆମେରିକା ପକ୍ଷରୁ ରବିବାର ଦିନ ସ୍ପଷ୍ଟ କରାଯାଇଛି। ଆନ୍ତର୍ଜାତୀୟ ଜଳରାଶି ଉପରେ ଉଡ଼ାଣ ଭରୁଥିବା ଏକ ଆମେରିକୀୟ ଏମକ୍ୟୁ-୧ (MQ-1) ଡ୍ରୋନ୍ କୁ ଇରାନ ଗୁଳି କରି ଖସାଇ ଦେବା ପରେ ଏହି ତିକ୍ତତା ଦେଖାଦେଇଛି।

ଆମେରିକା ସେଣ୍ଟ୍ରାଲ୍ କମାଣ୍ଡ (CENTCOM) ର ସୂଚନା

ଏକ୍ସ (X) ରେ ଏକ ପୋଷ୍ଟ କରି ଆମେରିକା ସେଣ୍ଟ୍ରାଲ୍ କମାଣ୍ଡ (CENTCOM) ସୂଚନା ଦେଇଛି ଯେ, ଆମେରିକୀୟ ଯୁଦ୍ଧବିମାନଗୁଡ଼ିକ ଜବାବରେ ଇରାନର ବାୟୁ-ପ୍ରତିରକ୍ଷା ବ୍ୟବସ୍ଥା, ଏକ ଗ୍ରାଉଣ୍ଡ-କଣ୍ଟ୍ରୋଲ୍ ଷ୍ଟେସନ୍ ଏବଂ ଦୁଇଟି ୱାନ୍-ୱେ ଆଟାକ୍ ଡ୍ରୋନ୍ କୁ ନଷ୍ଟ କରିଦେଇଛନ୍ତି। ସେଣ୍ଟକମ୍ ସ୍ପଷ୍ଟ କରିଛି ଯେ ଏହି ଆକ୍ରମଣରେ କୌଣସି ଆମେରିକୀୟ ସୈନିକ ମୃତାହତ ହୋଇନାହାଁନ୍ତି। ଚାଲିଥିବା ଯୁଦ୍ଧବିରତି ସମୟରେ ଇରାନର ଅଯୌକ୍ତିକ ଆକ୍ରମଣର ଜବାବ ଦେବା ସହିତ ଆମେରିକାର ସମ୍ପତ୍ତି ଏବଂ ସ୍ୱାର୍ଥର ସୁରକ୍ଷା ଜାରି ରହିବ ବୋଲି ସେଣ୍ଟକମ୍ ଦୃଢ଼ୋକ୍ତି ପ୍ରକାଶ କରିଛି।

ଇରାନର ପାଲଟା ଜବାବ

ଅନ୍ୟପକ୍ଷରେ, ଇରାନର ଇସଲାମିକ୍ ରିଭୋଲ୍ୟୁସନାରୀ ଗାର୍ଡ କର୍ପସ୍ (IRGC) ସୋମବାର ଦିନ ଦାବି କରିଛି ଯେ ଏହାର ଏରୋସ୍ପେସ୍ ଫୋର୍ସ ଏକ ବିମାନ ଘାଟି ଉପରେ ଆକ୍ରମଣ କରିଛି, ଯାହା ଆମେରିକାର ବୋଲି ସନ୍ଦେହ କରାଯାଉଛି। ଇରାନର ହରମୋଜଗାନ୍ ପ୍ରଦେଶ ଅନ୍ତର୍ଗତ ସିରିକ୍ ଦ୍ୱୀପ ରେ ଥିବା ଏକ ଟେଲିକମ୍ୟୁନିକେସନ୍ ଟାୱାର ଉପରେ ଆମେରିକା ଆକ୍ରମଣ କରିଥିଲା, ଯାହାର ପାଲଟା ଜବାବରେ ଇରାନ ଏହି ବିମାନ ଘାଟି ଉପରେ ଆକ୍ରମଣ କରିଛି ବୋଲି ଇରାନ ଇଣ୍ଟରନ୍ୟାସନାଲ୍ ରିପୋର୍ଟ କରିଛି। ତେବେ ଇରାନ ଏହି ଆକ୍ରମଣ ହୋଇଥିବା ବିମାନ ଘାଟିର ନିର୍ଦ୍ଦିଷ୍ଟ ସ୍ଥାନ ସମ୍ପର୍କରେ କୌଣସି ସୂଚନା ଦେଇନାହିଁ।

ନୂଆଦିଲ୍ଲୀ: ଉତ୍ତର ଚୀନର ଏକ କୋଇଲା ଖଣିରେ ଭୟାବହ ଗ୍ୟାସ ବିସ୍ଫୋରଣ ଘଟି ଅତି କମରେ ୯୦ ଜଣଙ୍କର ମୃତ୍ୟୁ ଘଟିଛି। ଶତାଧିକ ଉଦ୍ଧାରକାରୀ ଘଟଣାସ୍ଥଳରେ ନିୟୋଜିତ ହୋଇ ଉଦ୍ଧାର କାର୍ଯ୍ୟ ଜାରି ରଖିଛନ୍ତି। ବିସ୍ଫୋରଣ ବେଳେ କାମ କରୁଥିଲେ ପ୍ରାୟ ୨୪୭ ଶ୍ରମିକ । ଏବେ ବି ଅନେକ ଶ୍ରମିକ ଫସି ରହିଥିବା ସୂଚନା ରହିଛି ।

ଗତ ଶୁକ୍ରବାର ଦିନ ଚୀନର ଶାନସି ପ୍ରଦେଶର (Shanxi Province) କିନ୍‌ୟୁଆନ୍ କାଉଣ୍ଟିରେ ଥିବା ଲିୟୁଶେନୟୁ କୋଇଲା ଖଣିରେ (Liushenyu coal mine) ଏହି ବିସ୍ଫୋରଣ ଘଟିଥିଲା। ଶନିବାର ସୁଦ୍ଧା ଚୀନର ଜରୁରୀକାଳୀନ ପରିଚାଳନା ମନ୍ତ୍ରଣାଳୟ ପକ୍ଷରୁ ୬ଟି ଜାତୀୟ ଖଣି ଜରୁରୀକାଳୀନ ଉଦ୍ଧାରକାରୀ ଦଳର ମୋଟ ୩୪୫ ଜଣ କର୍ମଚାରୀଙ୍କୁ ସହାୟତା ପାଇଁ ମୁତୟନ କରାଯାଇଛି। ବର୍ତ୍ତମାନ ସୁଦ୍ଧା ୧୦୦ରୁ ଅଧିକ ଲୋକଙ୍କୁ ଉଦ୍ଧାର କରାଯାଇ ଡାକ୍ତରଖାନାରେ ଭର୍ତ୍ତି କରାଯାଇଛି ଏବଂ ଯୁଦ୍ଧକାଳୀନ ଭିତ୍ତିରେ ଉଦ୍ଧାର କାର୍ଯ୍ୟ ଜାରି ରହିଛି। 

ଏହି ମର୍ମନ୍ତୁଦ ଦୁର୍ଘଟଣାକୁ ନେଇ ଚୀନ୍ ରାଷ୍ଟ୍ରପତି ସି ଜିନପିଙ୍ଗ ତୁରନ୍ତ ପ୍ରତିକ୍ରିୟା ରଖିଛନ୍ତି। ଫସି ରହିଥିବା ଶ୍ରମିକମାନଙ୍କୁ ଉଦ୍ଧାର କରିବା ପାଇଁ ସମସ୍ତ ପ୍ରକାର ପ୍ରୟାସ କରିବାକୁ ଅଧିକାରୀମାନଙ୍କୁ ସେ କଡ଼ା ନିର୍ଦ୍ଦେଶ ଦେଇଛନ୍ତି। ଆହତମାନଙ୍କୁ ଉପଯୁକ୍ତ ଚିକିତ୍ସା ଯୋଗାଇଦେବା ସହ ଏହି ବିସ୍ଫୋରଣର ପୁଙ୍ଖାନୁପୁଙ୍ଖ ତଦନ୍ତ କରିବାକୁ ସେ ଆହ୍ୱାନ ଦେଇଛନ୍ତି। ଦୋଷୀ ସାବ୍ୟସ୍ତ ହେଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ରାଷ୍ଟ୍ରପତି ସ୍ପଷ୍ଟ କରିଛନ୍ତି।

ଶାନସି ପ୍ରଦେଶ ହେଉଛି ଚୀନର କୋଇଲା ଶିଳ୍ପର କେନ୍ଦ୍ରସ୍ଥଳ ଏବଂ ଏଠାରେ ଖଣି ଦୁର୍ଘଟଣାର ଏକ ଲମ୍ବା ଇତିହାସ ରହିଛି। ଗତ କିଛି ବର୍ଷ ମଧ୍ୟରେ ସୁରକ୍ଷା ମାନଦଣ୍ଡକୁ ଅଧିକ କଡ଼ାକଡ଼ି କରାଯାଇଥିଲେ ମଧ୍ୟ ଏଭଳି ପ୍ରାଣଘାତୀ ଘଟଣା ବାରମ୍ବାର ସାମ୍ନାକୁ ଆସୁଛି। ଏହା ପୂର୍ବରୁ ୨୦୨୫ ମସିହା ଆରମ୍ଭରେ ସାନ୍ସି ପ୍ରଦେଶର ଝେନପିଙ୍ଗ କାଉଣ୍ଟିରେ ମଧ୍ୟ ଏକ ଭୂଗର୍ଭସ୍ଥ ଟନେଲ୍ ଭୁଶୁଡ଼ି ପଡ଼ିବାରୁ ୩ ଜଣ ଶ୍ରମିକ ଫସି ଯାଇଥିଲେ। ସମ୍ପ୍ରତି ଘଟିଥିବା ଏହି କିନ୍‌ୟୁଆନ୍ ଦୁର୍ଘଟଣାକୁ ସାମ୍ପ୍ରତିକ ବର୍ଷଗୁଡ଼ିକରେ ଚୀନର ଅନ୍ୟତମ ବଡ଼ ଖଣି ଦୁର୍ଘଟଣା ବୋଲି କୁହାଯାଉଛି। ଭୂଗର୍ଭରେ ଫସି ରହିଥିବା ଅନ୍ୟମାନଙ୍କୁ ନକାଢିବା ପର୍ଯ୍ୟନ୍ତ ମୃତାହତଙ୍କ ପ୍ରକୃତ ସଂଖ୍ୟା ଆକଳନ କରିବା କଷ୍ଟକର ହେବ ବୋଲି ଅଧିକାରୀମାନେ ପ୍ରକାଶ କରିଛନ୍ତି।

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବଡ଼ ଝିଅ ଇଭାଙ୍କା ଟ୍ରମ୍ପଙ୍କୁ ହତ୍ୟା କରିବା ପାଇଁ ହୋଇଥିବା ଏକ ଭୟଙ୍କର ଷଡ଼ଯନ୍ତ୍ରର ପର୍ଦ୍ଦାଫାଶ ହୋଇଛି। ଇରାନର ସାମରିକ ବାହିନୀ 'ଇସଲାମିକ୍ ରିଭୋଲ୍ୟୁସନାରୀ ଗାର୍ଡ କର୍ପସ' (IRGC) ଠାରୁ ତାଲିମ ପ୍ରାପ୍ତ ଜଣେ ବିପଜ୍ଜନକ ଆତଙ୍କବାଦୀ ଏହି ହତ୍ୟା ଯୋଜନା ପ୍ରସ୍ତୁତ କରିଥିଲା।

ନିକଟରେ ତୁର୍କୀରୁ ଗିରଫ ହୋଇଥିବା ଏହି ଆତଙ୍କବାଦୀକୁ ଆମେରିକାକୁ ପ୍ରତ୍ୟର୍ପଣ କରାଯାଇଛି। ମିଳିଥିବା ତଥ୍ୟ ଅନୁଯାୟୀ, ସେ ୨୦୨୦ ମସିହାରେ ଆମେରିକୀୟ ଡ୍ରୋନ୍ ଆକ୍ରମଣରେ ନିହତ ହୋଇଥିବା ଇରାନୀୟ ସାମରିକ କମାଣ୍ଡର କାସିମ୍ ସୁଲେମାନୀଙ୍କ ମୃତ୍ୟୁର ପ୍ରତିଶୋଧ ନେବା ଉଦ୍ଦେଶ୍ୟରେ ଏହି ଷଡ଼ଯନ୍ତ୍ର ରଚିଥିଲା।

ସନ୍ଦିଗ୍ଧ ଆତଙ୍କବାଦୀର ପରିଚୟ ଏବଂ ଯୋଜନା

ଗିରଫ ହୋଇଥିବା ୩୨ ବର୍ଷୀୟ ସନ୍ଦିଗ୍ଧ ଆତଙ୍କବାଦୀର ନାମ ମହମ୍ମଦ ବାକିର ସାଦ ଦାଉଦ ଅଲ-ସାଦି ବୋଲି ଜଣାପଡିଛି। ସେ ଇରାକର ନାଗରିକ ଏବଂ ଇରାନ ସମର୍ଥିତ ଆତଙ୍କବାଦୀ ଗୋଷ୍ଠୀ କତାଏବ ହିଜବୁଲ୍ଲା ସହ ଜଡିତ ଥିଲା। ଆମେରିକୀୟ ଗଣମାଧ୍ୟମ 'ଦି ନ୍ୟୁୟର୍କ ପୋଷ୍ଟ'ର ରିପୋର୍ଟ ଅନୁଯାୟୀ, ଅଲ-ସାଦି ପାଖରୁ ଇଭାଙ୍କା ଟ୍ରମ୍ପଙ୍କ ଫ୍ଲୋରିଡା ସ୍ଥିତ ବାସଭବନର ଏକ ବ୍ଲୁପ୍ରିଣ୍ଟ ଜବତ କରାଯାଇଛି।

ସେ ସୋସିଆଲ ମିଡିଆରେ ଆମେରିକୀୟମାନଙ୍କୁ ଧମକ ଦେଇ ଲେଖିଥିଲା ଯେ, "ତୁମର ବିଳାସପୂର୍ଣ୍ଣ ପ୍ରାସାଦ କିମ୍ବା ସିକ୍ରେଟ୍ ସର୍ଭିସ୍ କେହି ବି ତୁମକୁ ରକ୍ଷା କରିପାରିବେ ନାହିଁ।"

ପ୍ରତିଶୋଧ ନେବାର ଥିଲା ଜିଦ୍

ପୂର୍ବତନ ଇରାକୀ କୂଟନୀତିଜ୍ଞ ଏଣ୍ଟିଫାଦ କାନବାର ଗଣମାଧ୍ୟମକୁ କହିଛନ୍ତି ଯେ, ସୁଲେମାନୀଙ୍କ ମୃତ୍ୟୁ ପରେ ଅଲ-ସାଦି ଲୋକମାନଙ୍କୁ କହୁଥିଲା, "ସେମାନେ ଯେପରି ଆମ ଘର ଜାଳିଦେଲେ, ଆମକୁ ମଧ୍ୟ ଟ୍ରମ୍ପଙ୍କ ଘର ସେହିଭଳି ଜାଳିବାକୁ ପଡିବ ଏବଂ ଏଥିପାଇଁ ଇଭାଙ୍କାଙ୍କୁ ହତ୍ୟା କରିବା ଜରୁରୀ।"

ଗତ ମେ ୧୫ ତାରିଖରେ ଅଲ-ସାଦିକୁ ତୁର୍କୀରେ ଗିରଫ କରାଯିବା ପରେ ଆମେରିକାକୁ ହସ୍ତାନ୍ତର କରାଯାଇଥିଲା। ତା' ନାମରେ ୟୁରୋପ ଏବଂ ଉତ୍ତର ଆମେରିକାରେ ୧୮ଟି ଆକ୍ରମଣ ଏବଂ ଆକ୍ରମଣ ଉଦ୍ୟମର ଅଭିଯୋଗ ରହିଛି, ଯେଉଁଥିରେ ଇହୁଦୀ ପ୍ରତିଷ୍ଠାନ ଏବଂ ଆମେରିକୀୟ କୂଟନୈତିକ କାର୍ଯ୍ୟାଳୟକୁ ଟାର୍ଗେଟ କରାଯାଇଥିଲା। ଏହି ଘଟଣା ସାମ୍ନାକୁ ଆସିବା ପରେ ଇଭାଙ୍କା ଟ୍ରମ୍ପ ଏବଂ ତାଙ୍କ ପରିବାରର ସୁରକ୍ଷା ବ୍ୟବସ୍ଥାକୁ ନେଇ ଆମେରିକା ପ୍ରଶାସନ ଅଧିକ ସତର୍କ ହୋଇପଡିଛି।

ନୂଆଦିଲ୍ଲୀରେ ଅନୁଷ୍ଠିତ ବ୍ରିକ୍ସ (BRICS) ବୈଦେଶିକ ମନ୍ତ୍ରୀ ସ୍ତରୀୟ ବୈଠକରେ ପାକିସ୍ତାନକୁ ଏକ ବଡ଼ ଝଟକା ଲାଗିଛି। ଆମେରିକା ଏବଂ ଇରାନ ମଧ୍ୟରେ ଲାଗି ରହିଥିବା ତିକ୍ତତା ମଧ୍ୟରେ ରୁଷର ବୈଦେଶିକ ବ୍ୟାପାର ମନ୍ତ୍ରୀ ସର୍ଗେଇ ଲାଭରୋଭ (Sergey Lavrov) ଏକ ବଡ଼ ବୟାନ ଦେଇଛନ୍ତି। ସେ କହିଛନ୍ତି ଯେ ଭାରତ ଆଗାମୀ ଦିନରେ ଏହି ବିବାଦର ସମାଧାନ ପାଇଁ ଏକ 'ଦୀର୍ଘକାଳୀନ ମଧ୍ୟସ୍ଥକାରୀ' ଭାବରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରିବ।

ପାକିସ୍ତାନ ପାଇଁ ଏକ ବଡ଼ ଝଟକା

ଦୀର୍ଘ ଦିନ ଧରି ପାକିସ୍ତାନ ନିଜକୁ ୱାଶିଂଟନ୍ ଏବଂ ତେହେରାନ ମଧ୍ୟରେ ମୁଖ୍ୟ ମଧ୍ୟସ୍ଥକାରୀ ଭାବେ ଉପସ୍ଥାପନ କରିବାକୁ ଚେଷ୍ଟା କରୁଛି। ଲାଭରୋଭ ସ୍ୱୀକାର କରିଛନ୍ତି ଯେ ତୁରନ୍ତ ସମସ୍ୟାର ସମାଧାନ ପାଇଁ ଆମେରିକା ଏବଂ ଇରାନ ମଧ୍ୟରେ ଆଲୋଚନା ଆରମ୍ଭ କରିବାରେ ପାକିସ୍ତାନ ବର୍ତ୍ତମାନ ସାହାଯ୍ୟ କରୁଛି। କିନ୍ତୁ ଯଦି ଏହି ଦୁଇ ଦେଶ ଏବଂ ଆରବ ରାଷ୍ଟ୍ରମାନଙ୍କ ମଧ୍ୟରେ ଏକ ବିଶ୍ୱାସଯୋଗ୍ୟ ତଥା ଦୀର୍ଘକାଳୀନ ମଧ୍ୟସ୍ଥକାରୀର ଆବଶ୍ୟକତା ପଡ଼େ, ତେବେ ଭାରତର ବିଶାଳ କୂଟନୈତିକ ଅଭିଜ୍ଞତା ଏହି ଦିଗରେ ଅଧିକ ପ୍ରଭାବଶାଳୀ ସାବ୍ୟସ୍ତ ହେବ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି।

ଭାରତର କୂଟନୈତିକ ଅଭିଜ୍ଞତା ଉପରେ ରୁଷର ଭରସା

ବ୍ରିକ୍ସ ବୈଠକ ପରେ ଏକ ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରି ରୁଷ ବୈଦେଶିକ ମନ୍ତ୍ରୀ କହିଛନ୍ତି ଯେ, ଭାରତର କୂଟନୈତିକ ଅଭିଜ୍ଞତା ଏବଂ ବିଶ୍ୱସ୍ତରରେ ଏହାର ବଢ଼ୁଥିବା ପ୍ରତିପତ୍ତି ଯୋଗୁଁ ଏହା ପଶ୍ଚିମ ଏସିଆରେ ଶାନ୍ତି ପ୍ରତିଷ୍ଠା ପାଇଁ ଏକ ଆଦର୍ଶ ଦେଶ। ବର୍ତ୍ତମାନ ଭାରତ ବ୍ରିକ୍ସର ସଭାପତି ପଦବୀରେ ରହିଥିବା ବେଳେ ଏହି ଅଞ୍ଚଳରୁ ତୈଳ ଆମଦାନୀ କରୁଥିବା ଏକ ପ୍ରମୁଖ ଗ୍ରାହକ ଅଟେ। ତେଣୁ ଆଞ୍ଚଳିକ ସ୍ଥିରତା ବଜାୟ ରଖିବାରେ ଭାରତର ସିଧାସଳଖ ସ୍ୱାର୍ଥ ଜଡ଼ିତ ରହିଛି। ସେ ପରାମର୍ଶ ଦେଇଛନ୍ତି ଯେ, ଭାରତ ନିଜର ପ୍ରଭାବ ଖଟାଇ ଇରାନ ଏବଂ ସଂଯୁକ୍ତ ଆରବ ଏମିରେଟ୍ସ (UAE) କୁ ଆଲୋଚନା ଟେବୁଲକୁ ଆଣିପାରିବ।

ପାକିସ୍ତାନର ବିଶ୍ୱସନୀୟତା ଉପରେ ଉଠିଲା ପ୍ରଶ୍ନ

ରୁଷର ଏହି ବୟାନ ଏପରି ଏକ ସମୟରେ ଆସିଛି, ଯେତେବେଳେ ଆମେରିକା ଓ ଇରାନ ମଧ୍ୟରେ ମଧ୍ୟସ୍ଥତା କରିବାକୁ ନେଇ ପାକିସ୍ତାନର ବିଶ୍ୱସନୀୟତା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି। ଆମେରିକୀୟ ସିନେଟର ଲିଣ୍ଡସେ ଗ୍ରାହାମ ନିକଟରେ ଖୋଲାଖୋଲି ଭାବେ କହିଥିଲେ ଯେ ପାକିସ୍ତାନର ମଧ୍ୟସ୍ଥତା ଉପରେ ତାଙ୍କର ଭରସା ନାହିଁ। ଏହା ସହିତ ଆମେରିକୀୟ ଗଣମାଧ୍ୟମ ରିପୋର୍ଟ ଅନୁଯାୟୀ, ଇରାନର ସାମରିକ ବିମାନଗୁଡ଼ିକୁ ପାକିସ୍ତାନ ନିଜ ନୁର ଖାନ ଏୟାରବେସରେ ରଖିବାକୁ ଅନୁମତି ଦେଇଥିବା ନେଇ ଦାବି କରାଯାଇଛି, ଯାହା ପାକିସ୍ତାନର ଦ୍ୱୈତ ନୀତିକୁ ପଦାରେ ପକାଇଛି।

ଏହି ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ UAE ସମେତ ଅନ୍ୟ ଦେଶ ଗସ୍ତରେ ଅଛନ୍ତି, ଯାହାକି ଭାରତର ବୈଶ୍ୱିକ କୂଟନୀତିକୁ ଅଧିକ ମଜବୁତ କରୁଛି। ସାମଗ୍ରିକ ଭାବେ ରୁଷର ଏହି ସମର୍ଥନ ପଶ୍ଚିମ ଏସିଆର ଭବିଷ୍ୟତ ନିର୍ଦ୍ଧାରଣରେ ଭାରତର ବୃଦ୍ଧି ପାଉଥିବା କ୍ଷମତାକୁ ପ୍ରମାଣିତ କରୁଛି。