ହାଇଦ୍ରାବାଦ: ସୃଜନଶୀଳତାର କୌଣସି ସୀମା ନାହିଁ । ଏହାକୁ ପ୍ରମାଣ କରିଛନ୍ତି ତାମିଲନାଡୁର ଜଣେ ବ୍ୟକ୍ତି । ବ୍ୟକ୍ତି ଜଣକ ନିଜ ବିବାହକୁ ସ୍ମରଣୀୟ କରିବା ପାଇଁ ‘ଔଷଧ ଖୋଳ’ ଭଳି ଡିଜାଇନ୍‌ କରିଛନ୍ତି ନିଜ ବିବାହ କାର୍ଡ । ଯାହାକୁ ନେଇ ସେ ଏବେ ଖୁବ ଚର୍ଚ୍ଚାରେ । ନିଜ ବିବାହ କାର୍ଡରେ ସେ ଅଜବ ସୃଜନଶୀଳତା ପ୍ରଦର୍ଶନ କରିଛନ୍ତି । ସୋସିଆଲ ମିଡିଆରେ ତାଙ୍କ ବିବାହର ଏହି ନିଆରା ନିମନ୍ତ୍ରଣ କାର୍ଡ ଚର୍ଚ୍ଚାର ବିଷୟ ହୋଇଛି । ବ୍ୟକ୍ତିଜଣକ ନିଜ ବିବାହ କାର୍ଡକୁ ‘ଔଷଧ ଖୋଳ’ ଭଳି ଡିଜାଇନ୍‌ କରାଇଛନ୍ତି, ଯାହାକୁ ଦେଖି ଲୋକେ ଆଚମ୍ବିତ ହେଉଛନ୍ତି ।

ଯିଏବି ଏହାକୁ ପ୍ରଥମେ ଦେଖିବ ଏହା ଏକ ନିମନ୍ତ୍ରଣ କାର୍ଡ ନୁହେଁ, ବରଂ ଏକ ଔଷଧ ଖୋଳ ଭଳି ମନେହେବ । କିନ୍ତୁ ଧ୍ୟାନର ସହ ଏହା ଉପରେ ଲେଖାଯାଇଥିବା ଅକ୍ଷରକୁ ପଢ଼ିଲେ, ଜାଣିପାରିବେ ଯେ ଏହା ଏକ ବିବାହ କାର୍ଡ । କାର୍ଡରେ ବ୍ୟକ୍ତି ନିଜର ଓ ନିଜ ଭାବୀ ପତ୍ନୀଙ୍କ ନାମ, ବିବାହ ତାରିଖ, ଭୋଜି ସମୟ ସହିତ ଅନେକ କାର୍ଯ୍ୟକ୍ରମ ବିଷୟରେ ଉଲ୍ଲେଖ କରିଛନ୍ତି ।

ଔଷଧ ଫତା ରୂପକ ଏହି ନିମନ୍ତ୍ରଣ କାର୍ଡ ଏବେ ସୋସିଆଲ ମିଡିଆରେ ଭାଇରାଲ ହେଉଛି । ଏଥିରେ ଉଲ୍ଲେଖ ହୋଇଛି- ଏଜିଲାରାସନ୍‌ ୱେଡ୍‌ସ ବସନ୍ତକୁମାରୀ । ବିବାହ ତାରିଖ ସେପ୍ଟେମ୍ବର ୫ ତାରିଖ । ସମସ୍ତ ବନ୍ଧୁ ଓ ପରିଜନ ବିବାହରେ ଆସିବାକୁ ଭୁଲିବେ ନାହିଁ ବୋଲି ମଧ୍ୟ ଉଲ୍ଲେଖ ହୋଇଛି । ମାମଲାଟି ତାମିଲନାଡୁର । ବ୍ୟକ୍ତିଜଣକ ଫାର୍ମାସି ସହ ସଂଶ୍ଳିଷ୍ଟ ବୋଲି ଚର୍ଚ୍ଚା ହେଉଛି । କାର୍ଡକୁ ଦେଖି ଯେ କେହି ଧୋକା ଖାଇଯିବ ବୋଲି ୟୁଜର୍‌ ପ୍ରତିକ୍ରିୟା ଦେଇଛନ୍ତି ।

ସମସ୍ତେ ନିଜ ବିବାହକୁ ସ୍ମରଣୀୟ କରିବା ପାଇଁ କିଛି ଅଲଗା କରିଥାନ୍ତି। ଅନେକ ଲୋକ ନିଜ ବିବାହ ନିମନ୍ତ୍ରଣ ପତ୍ରରେ ସୃଜନଶୀଳତା ପ୍ରଦର୍ଶନ କରୁଥିବା ଅନନ୍ୟ ବାର୍ତ୍ତା ମଧ୍ୟ ଲେଖନ୍ତି । ଏଭଳି କିଛି ନିଆରା ନିମନ୍ତ୍ରଣ ପତ୍ର ଛାପିଛନ୍ତି ଆସାମର ଗୌହାଟି ଅଞ୍ଚଳର ଜଣେ ଓକିଲ। ସେ ନିଜ ବିବାହ ନିମନ୍ତ୍ରଣ ପତ୍ରକୁ ସମ୍ବିଧାନ ଥିମ୍‌ରେ ଛାପିଛନ୍ତି । ଭାରତୀୟ ସମ୍ବିଧାନର ଧାରାଗୁଡ଼ିକ ସହିତ ଏବଂ ବିବାହ ସମ୍ପର୍କିତ ଆଇନଗୁଡ଼ିକ ସେ ନିମନ୍ତ୍ରଣ ପତ୍ରରେ ଉଲ୍ଲେଖ କରିଛନ୍ତି । ଏହି କାର୍ଡରେ ସମାନତାକୁ ପ୍ରତିପାଦିତ କରି ନ୍ୟାୟର ତରାଜୁର ଉଭୟ ପାର୍ଶ୍ଵରେ ବର ଏବଂ କନିଆଁଙ୍କ ନାମ ମୁଦ୍ରଣ କରାଯାଇଛି। ଏହି ଅନନ୍ୟ ନିମନ୍ତ୍ରଣ ପତ୍ରରେ ଭାରତୀୟ ସମ୍ବିଧାନର ଧାରା ୨୧ ବିଷୟରେ ଉଲ୍ଲେଖ କରାଯାଇଛି । ଏହି ନିଆରା ବିବାହ କାର୍ଡ ଏବେ ସୋସିଆଲ୍ ମିଡ଼ିଆରେ ଭାଇରାଲ୍ ହେବାରେ ଲାଗିଛି ଏବଂ ୟୁଜର୍ସମାନେ ଏଥିରେ ମଜାଳିଆ ମନ୍ତବ୍ୟ ମଧ୍ୟ ଦେଉଛନ୍ତି।