ନୂଆଦିଲ୍ଲୀ: ସଂସଦ ଓ ରାଜ୍ୟ ବିଧାନସଭାରେ ମହିଳାମାନଙ୍କ ପାଇଁ ୩୩ ପ୍ରତିଶତ ଆସନ ସଂରକ୍ଷଣ ଏବଂ ନିର୍ବାଚନମଣ୍ଡଳୀ ସୀମା ପୁନଃନିର୍ଦ୍ଧାରଣ  ସଂକ୍ରାନ୍ତ ବହୁପ୍ରତୀକ୍ଷିତ ଏବଂ ବିତର୍କିତ ୧୩୧ ସମ୍ବିଧାନ ସଂଶୋଧନ ବିଲ୍ ଆଜି ଲୋକସଭାରେ କାଟ୍ ଖାଇଯାଇଛି । ସରକାର ପାଖରେ ଆବଶ୍ୟକ ସଂଖ୍ୟା ନଥିବା ସତ୍ତ୍ବେ ଏହି ବିଲ୍ ଆଗତ କରାଯାଇଥିଲା ଏବଂ ବିରୋଧୀ ଦଳ ଏହାର ଜୋରଧାର ବିରୋଧ କରିଥିଲେ । ବିରୋଧୀ ଦଳମାନଙ୍କୁ ମନାଇବା ଲାଗି ସରକାର ଶେଷ ମୁହୂର୍ତ୍ତ ପର୍ଯ୍ୟନ୍ତ ଉଦ୍ୟମ କରିଥିଲେ ମଧ୍ୟ ସଫଳ ହୋଇନଥିଲେ । ବିଲ୍ କାଟ୍ ଖାଇଯିବା ଯୋଗୁଁ କେନ୍ଦ୍ର ସରକାର ସଂସଦରେ ଅପ୍ରୀତିକର ପରିସ୍ଥିତିର ସମ୍ମୁଖୀନ ହୋଇଛନ୍ତି । କେନ୍ଦ୍ରରେ ମୋଦୀ ସରକାର ଅମଳରେ କୌଣସି ବିଲ୍ ଗୃହରେ କାଟ ଖାଇବାରେ ଏହା ପ୍ରଥମ ଘଟଣା ବୋଲି କୁହାଯାଉଛି ।

ଏହି ବିଲ୍ ଉପରେ ଆଲୋଚନା ଏବଂ ଅନୁମୋଦନ ପାଇଁ ଗତକାଲି ଠାରୁ ଆରମ୍ଭ ହୋଇଛି ସଂସଦର ସ୍ବତନ୍ତ୍ର ଅଧିବେଶନ । ଆଜି ଆେଲାଚନା ଶେଷ ହେବାପରେ ସନ୍ଧ୍ୟାରେ ବିଲ୍ ଉପରେ ମତଦାନ କରାଯାଇଥିଲା । ପ୍ରଥମେ ମହିଳା ସଂରକ୍ଷଣ ବିଲ୍ (ନାରୀ ଶକ୍ତି ବନ୍ଦନ ଅଧିନିୟମ) ଉପରେ ମତଦାନ ହୋଇଥିଲା । ମତଦାନ ବେଳେ ଲୋକସଭାରେ ୫୨୮ ସଭ୍ୟ ଉପସ୍ଥିତ ଥିବା ବେଳେ ଏହା ସପକ୍ଷରେ ୨୯୮ ଜଣ ଭୋଟ୍ ଦେଇଥିଲେ । ୨୩୦ ଜଣ ସାଂସଦ ଏହାର ବିରୋଧ କରିଥିଲେ । ଏହି ସମ୍ବିଧାନ ସଂଶୋଧନ ବିଲ୍ ଅନୁମୋଦନ ପାଇଁ ଉପସ୍ଥିତ ସାଂସଦମାନଙ୍କ ମଧ୍ୟରୁ ଦୁଇ ତୃତୀୟାଂଶ ସଭ୍ୟଙ୍କ (୩୫୨)  ସମର୍ଥନ ଦରକାର ଥିବା ବେଳେ ଏଥିରୁ ୫୪ ଭୋଟ୍ କମ୍ ପଡ଼ିଥିଲା । ଫଳରେ ବିଲ୍ କାଟ୍ ଖାଇଯାଇଥିଲା ।  ବିଲ୍ କାଟ୍ ଖାଇଯିବା ପରେ ସରକାର ଆଉ ଅନ୍ୟ ଦୁଇଟି ବିଲ୍ ଉପରେ ମତଦାନ କରିବାରୁ ଓହରିଯାଇଥିଲେ । ସଂସଦୀୟ ବ୍ୟାପାର ମନ୍ତ୍ରୀ ରିଜିଜୁ କହିଥିଲେ ଯେ ମହିଳା ବିଲ୍ କାଟ୍ ଖାଇଯିଥିବାରୁ ଅନ୍ୟ ଦୁଇଟି ବିଲ୍ (ସୀମା ପୁନଃନିର୍ଦ୍ଧାରଣ ଏବଂ କେନ୍ଦ୍ର ଶାସିତ ଅଞ୍ଚଳ)କୁ ମତଦାନ ପାଇଁ ଆଗତ କରାଯିବ ନାହିଁ । କାରଣ  ଏହି ଦୁଇଟି ବିଲ୍ ସମ୍ବିଧାନ ସଂଶୋଧନ ବିଲ୍ ସହିତ ଯୋଡ଼ି ହୋଇ ରହିଥିଲା । ଏହାପରେ ବାଚସ୍ପତି ଗୃହକୁ ମୁଲତବୀ କରିଦେଇଥିଲେ ।

ମହିଳା ସଂରକ୍ଷଣ ସହିତ ସୀମା ପୁନଃନିର୍ଦ୍ଧାରଣ ଯୋଡ଼ି ସରକାର ୧୩୧ତମ ସମ୍ବିଧାନ ସଂଶୋଧନ ବିଲ୍ ଆଣିଥିଲେ । ସରକାର ଏହି ବିଲ୍ ଜରିଆରେ ପ୍ରସ୍ତାବ ଦେଇଥିଲେ ଯେ ସୀମା ପୁନଃନିର୍ଦ୍ଧାରଣ ଦ୍ବାରା ଲୋକସଭା ସଭ୍ୟସଂଖ୍ୟା ୫୪୩ରୁ ୮୫୦କୁ ବୃଦ୍ଧି ପାଇବ । ଏଥିରେ ମହିଳାମାନଙ୍କ ପାଇଁ ୩୩ ପ୍ରତିଶତ ଆସନ ସଂରକ୍ଷିତ ରହିବ୤ ଏହା ଆଜି ଅନୁମୋଦିତ ହୋଇଥିଲେ ୨୦୨୯ ସାଧାରଣ ନିର୍ବାଚନରୁ କାର୍ଯ୍ୟକାରୀ ହୋଇଥାଆନ୍ତା୤ କିନ୍ତୁ ବିରୋଧୀ ଦଳ ଏହି ଦୁଇଟି ବିଲକୁ ଯୋଡ଼ାଯାଇଥିବାରୁ ଏହାର ବିରୋଧ କରିଥିଲେ । ସେମାନେ ମହିଳା ସଂରକ୍ଷଣ ବିଲକୁ ସମର୍ଥନ କରିଥିଲେ ମଧ୍ୟ ସୀମା ପୁନଃନିର୍ଦ୍ଧାରଣକୁ ବିରୋଧ କରିଥିଲେ । ୨୦୧୧  ଜନଗଣନାକୁ ଆଧାର କରି ସୀମା ପୁନଃନିର୍ଦ୍ଧାରଣ କରାଯାଇପାରିବ ନାହିଁ ଏବଂ ଏଥିପାଇଁ ୨୦୨୭ ଜନଗଣନା ପର୍ଯ୍ୟନ୍ତ ଅପେକ୍ଷା କରିବାକୁ ସେମାନେ ଦାବି କରିଥିଲେ ।
 
ମହିଳାମାନଙ୍କ ସ୍ବାର୍ଥ ପାଇଁ ୩୩ ଭାଗ ସଂରକ୍ଷଣ ଜରୁରୀ ଏବଂ ସୀମା ପୁନଃନିର୍ଦ୍ଧାରଣ ପ୍ରକ୍ରିୟାରେ କୌଣସି ଦକ୍ଷିଣ ରାଜ୍ୟର ପ୍ରତିନିଧିତ୍ବ କମିବ ନାହିଁ ବୋଲି ସରକାର ବିରୋଧୀଙ୍କୁ ଆଶ୍ବାସନା ଦେଇଥିଲେ । ଏପରିକି ଏଥିପାଇଁ ଲିଖିତ ପ୍ରତିଶ୍ରୁତି ଦେବାକୁ ମଧ୍ୟ ସ୍ବରାଷ୍ଟ୍ର ମନ୍ତ୍ରୀ ଅମତି ଶାହ କହିଥିଲେ । ସେହିଭଳି ନାରୀମାନଙ୍କ ସ୍ବାର୍ଥ ଦୃଷ୍ଟିରୁ ଏଭଳି ଐତିହାସିକ ସୁଯୋଗ ହାତଛଡ଼ା ନକରିବା ଲାଗି ପ୍ରଧାନମନ୍ତ୍ରୀ ମୋଦୀ ସମସ୍ତ ସାଂସଦଙ୍କୁ ବ୍ୟକ୍ତିଗତ ଭାବେ ଅନୁରୋଧ କରିଥିଲେ ।  ତେବେ ବିଲ୍ କାଟ ଖାଇଲା ପରେ ସରକାର ବିରୋଧୀଙ୍କର ତୀବ୍ର ସମାଲୋଚନା କରି ସେମାନଙ୍କୁ ନାରୀ ସଂରକ୍ଷଣ ବିରୋଧୀ ବୋଲି କହିଛନ୍ତି । ବିଲ୍ ପରାଜୟ ଲାଗି ଅମିତ ଶାହ କଂଗ୍ରେସ, ଟିଏମସି, ଡିଏମକେ ଏବଂ ସମାଜବାଦୀ ପାର୍ଟିକୁ ଦାୟୀ କରି କହିଛନ୍ତି ଯେ ମହିଳାଙ୍କ ସମ୍ମାନ ଲାଗି ସରକାର ଉଦ୍ୟମ ଜାରି ରଖିବେ ।

 ଅନ୍ୟପକ୍ଷେରେ ବିରୋଧୀ ଦଳର ନେତା ରାହୁଲ ଗାନ୍ଧୀ କହିଛନ୍ତି ଯେ ମହିଳାଙ୍କ ନାମରେ ସମ୍ବିଧାନକୁ ଭାଙ୍ଗିବା ଲାଗି ସରକାର ଅସାମ୍ବିଧାନିକ କାର୍ଯ୍ୟ କରୁଥିଲେ ଏବଂ ବିରୋଧୀ ସେହି ଚକ୍ରାନ୍ତକୁ ବ୍ୟର୍ଥ କରିଦେଇଛନ୍ତି । ଏହି ବିଲ୍‌ ଜରିଆରେ ସରକାର ଦେଶର ନିର୍ବାଚନ ଚିତ୍ର ବଦଳାଇବାକୁ ଉଦ୍ୟମ କରିଥିଲେ ।  ମହିଳାମାନଙ୍କ ବିକାଶ ଏହି ବିଲ୍‌ର ଉଦ୍ଦେଶ୍ୟ ନଥିଲା । ମହିଳାଙ୍କ ସ୍ବାର୍ଥର ସୁରକ୍ଷା ପାଇଁ ଯଦି ସରକାରଙ୍କର ଆନ୍ତରିକତା ରହିଛି, ତାହାେହଲେ  ମହିଳା ସଂରକ୍ଷଣ ବିଲ୍-୨୦୨୩କୁ କାର୍ଯ୍ୟକାରୀ କରନ୍ତୁ ଏବଂ ସମଗ୍ର ବିରୋଧୀ ଦଳ ଏଥିରେ ପୂର୍ଣ୍ଣମାତ୍ରାରେ ସହଯୋଗ କରିବାକୁ ପ୍ରସ୍ତୁତ ଅଛନ୍ତି ବୋଲି ରାହୁଲ କହିଛନ୍ତି ।
 
ଇତିମଧ୍ୟରେ ବିଜେପି ପକ୍ଷରୁ ଘୋଷଣା କରାଯାଇଛି ଯେ ମହିଳା ସଂରକ୍ଷଣ ବିଲକୁ ପରାଜିତ କରିଥିବା କଂଗ୍ରେସ ବିରୋଧରେ ଦେଶବ୍ୟାପୀ ପ୍ରତିବାଦ କରାଯିବ । ବିଲ୍ କାଟ୍ ଖାଇବା ପରେ ଏନଡିଏର ମହିଳା ସାଂସଦ ସଂସଦ ପରିସରରେ ଧାରଣା ଦେଇଥିଲେ ।

ଭୁବନେଶ୍ୱର: ଲୋକସଭାରେ ସମ୍ବିଧାନ ସଂଶୋଧନ ବିଲ୍‌ କାଟ୍‌ ଖାଇବା ପରେ ସତ୍ୟର ଜୟ ହୋଇଛି ବୋଲି କହିଛନ୍ତି ବିଜେଡି ସଂସଦୀୟ ଦଳ ନେତା ମାନସ ରଞ୍ଜନ ମଙ୍ଗରାଜ।  ସାମାଜିକ ଗଣମାଧ୍ୟମ ‘ଏକ୍ସ’ରେ ସେ କହିଛନ୍ତି ଯେ ସଂସଦରେ ମହିଳା ସଂରକ୍ଷଣ ବିଲ୍‌ ନୁହେଁ; ବରଂ ବିବାଦିତ ଡିଲିମିଟେସନ ବିଲ୍‌ (୧୩୧ତମ ସମ୍ବିଧାନ ସଂଶୋଧନ) କାଟ୍‌ ଖାଇଛି। ଏହି ବିବାଦୀୟ ଡିଲିମିଟେସନ ବିଲ୍‌ରେ ଓଡ଼ିଶା ଭଳି ରାଜ୍ୟ ନିଜ ହକ୍‌ ଅଂଶ ପାଇବାରୁ ବଞ୍ଚିତ ହେବାର ଆଶଙ୍କା ଥିଲା। ଆମ ନେତା ନବୀନ ପଟ୍ଟନାୟକ ଏହି ବିଷୟରେ ଦୃଢ଼ ଏବଂ ସକ୍ରିୟ ଭୂମିକା ଗ୍ରହଣ କରିଥିଲେ। ସେ କେବଳ ଏହା ବିରୋଧରେ ଦୃଢ଼ ଆପତ୍ତି ଉଠାଇ ନ ଥିଲେ;  ଓଡ଼ିଶାର ମୁଖ୍ୟମନ୍ତ୍ରୀ ଓ ସମସ୍ତ ସାଂସଦଙ୍କୁ ଚିଠି ଲେଖି ଏକତ୍ରିତ ହୋଇ ଓଡ଼ିଶାର ହିତକୁ  ସୁରକ୍ଷିତ ରଖିବାକୁ ଅନୁରୋଧ କରିଥିଲେ। ମାତ୍ର ଦୁଃଖଦାୟକ କଥା ହେଉଛି ଯେ ଓଡ଼ିଶାର ୨୦ ଜଣ ବିଜେପି ସାଂସଦ ଏହି ସମୟରେ ସଠିକ୍‌ ଭୂମିକା ନିର୍ବାହ କଲେ ନାହିଁଁ। ସେମାନେ ରାଜ୍ୟର ଅଧିକାର ପାଇଁ ଠିଆ ହେବା ପରିବର୍ତ୍ତେ, ଦଳୀୟ ନିର୍ଦ୍ଦେଶକୁ ଅନୁସରଣ କରିଥିଲେ। ଏହାସତ୍ତ୍ବେ ସତ୍ୟର ଜୟ ହୋଇଛି ଏବଂ ନ୍ୟାୟ ସ୍ଥାପିତ ହୋଇଛି। ସଂସଦରେ ସୀମିତ ପ୍ରତିନିଧିତ୍ୱ ଥିଲେ ମଧ୍ୟ ଆମେ ଆମ ନେତାଙ୍କ ଅତୁଟ ପ୍ରତିବଦ୍ଧତା ପାଇଁ ଗର୍ବିତ। ନବୀନ ପଟ୍ଟନାୟକ ସର୍ବଦା ଓଡ଼ିଶା ଓ ଓଡ଼ିଆ ଲୋକମାନଙ୍କ ପାଇଁ ଲଢ଼ି ଆସୁଛନ୍ତି ବୋଲି ଶ୍ରୀ ମଙ୍ଗରାଜ କହିଛନ୍ତି। 

ଲୋକସଭାରେ ମହିଳା ସଂରକ୍ଷଣ ବିଲ୍ ଉପରେ ଚାଲିଥିବା ବିତର୍କ ସମୟରେ ବିଜେପି ସାଂସଦ ତଥା ବଲିଉଡ୍ ଅଭିନେତ୍ରୀ କଙ୍ଗନା ରଣାୱତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭୂୟସୀ ପ୍ରଶଂସା କରିଛନ୍ତି। ସେ ପ୍ରଧାନମନ୍ତ୍ରୀଙ୍କୁ 'ନାରୀବାଦର ଧ୍ୱଜାଧାରୀ' ବୋଲି ଅଭିହିତ କରିବା ସହ ଏହି ବିଲ୍‌କୁ ମହିଳାମାନଙ୍କ ପାଇଁ ଏକ ବଡ଼ ଉପହାର ବୋଲି ବର୍ଣ୍ଣନା କରିଛନ୍ତି। ଏହା ସହିତ ସେ ଦୀର୍ଘ ଦଶନ୍ଧି ଧରି ମହିଳା ସଂରକ୍ଷଣ ବିଲ୍‌କୁ ଝୁଲାଇ ରଖିଥିବାରୁ କଂଗ୍ରେସକୁ କଡ଼ା ସମାଲୋଚନା କରିଛନ୍ତି।

ପ୍ରଧାନମନ୍ତ୍ରୀଙ୍କୁ କଲେ ପ୍ରଶଂସା

ସଂସଦର ନିମ୍ନ ଗୃହରେ ସମ୍ବିଧାନ (୧୩୧ତମ ସଂଶୋଧନ) ବିଲ୍, ୨୦୨୬ ଉପରେ ଆଲୋଚନା ବେଳେ କଙ୍ଗନା କହିଛନ୍ତି ଯେ, "ଆଜି ଭାରତର କନ୍ୟାମାନେ ବିଶ୍ୱାସ କରୁଛନ୍ତି ଯେ ପ୍ରଧାନମନ୍ତ୍ରୀଙ୍କଠାରୁ ବଡ଼ ନାରୀବାଦୀ କେହି ନାହାନ୍ତି"। ମହିଳାମାନଙ୍କ ସଶକ୍ତୀକରଣ ଏବଂ ରାଜନୀତିରେ ସେମାନଙ୍କ ଅଂଶଗ୍ରହଣ ସୁନିଶ୍ଚିତ କରିବା ଦିଗରେ ଏହି ବିଲ୍ ଏକ ଐତିହାସିକ ପଦକ୍ଷେପ ବୋଲି ସେ ଦର୍ଶାଇଛନ୍ତି।

ହିମାଚଳ ପ୍ରଦେଶର ଉଦାହରଣ ଦେଇ ସେ କହିଛନ୍ତି ଯେ ୬୮ଟି ଆସନ ମଧ୍ୟରୁ ବର୍ତ୍ତମାନ କେବଳ ଜଣେ ମହିଳା ବିଧାୟକ ଅଛନ୍ତି। ଏହିଭଳି ଅସମାନତାକୁ ଦୂର କରିବା ପାଇଁ ପ୍ରଧାନମନ୍ତ୍ରୀ ସଂକଳ୍ପ ନେଇଛନ୍ତି। ୩୩ ପ୍ରତିଶତ ସଂରକ୍ଷଣ ମହିଳାମାନଙ୍କ ମଧ୍ୟରେ ଆତ୍ମବିଶ୍ୱାସ ବୃଦ୍ଧି କରିବ ଏବଂ ସେମାନଙ୍କୁ ସୁରକ୍ଷିତ ଅନୁଭବ କରାଇବ ବୋଲି ସେ କହିଛନ୍ତି।

କଂଗ୍ରେସକୁ କଲେ ଟାର୍ଗେଟ୍

କଙ୍ଗନା ରଣାୱତ ନିଜ ଭାଷଣରେ ବିରୋଧୀ ଦଳ, ବିଶେଷକରି କଂଗ୍ରେସ ଉପରେ ବର୍ଷିଛନ୍ତି। କଂଗ୍ରେସ କ୍ଷମତାରେ ଥିବା ବେଳେ ଦୀର୍ଘ ଦଶନ୍ଧି ଧରି ମହିଳା ସଂରକ୍ଷଣ କାହିଁକି ଲାଗୁ କରିନଥିଲା ବୋଲି ସେ ପ୍ରଶ୍ନ କରିଛନ୍ତି। କଂଗ୍ରେସ ନେତ୍ରୀ ସୋନିଆ ଗାନ୍ଧୀଙ୍କ ଏକ ମନ୍ତବ୍ୟର ଉତ୍ତର ଦେଇ କଙ୍ଗନା କହିଛନ୍ତି, "ସୋନିଆ ଗାନ୍ଧୀ ପଚାରୁଛନ୍ତି ଯେ ବିଜେପି ଏତେ ତରବର ହୋଇ କାହିଁକି ବିଲ୍ ଆଣୁଛି। ତେବେ ଆମେ କ'ଣ ଆପଣଙ୍କ ପରି ଏହି ବିଲ୍‌କୁ ୩୦ ବର୍ଷ ପର୍ଯ୍ୟନ୍ତ ଝୁଲାଇ ରଖିବୁ କି?"।

କ'ଣ ରହିଛି ବିଲ୍‌ରେ?

ସଂସଦ ଏବଂ ରାଜ୍ୟ ବିଧାନସଭାଗୁଡ଼ିକରେ ମହିଳାମାନଙ୍କ ପାଇଁ ୩୩ ପ୍ରତିଶତ ସଂରକ୍ଷଣ ବ୍ୟବସ୍ଥା ଲାଗୁ କରିବା ଉଦ୍ଦେଶ୍ୟରେ ସରକାର ସମ୍ବିଧାନ (୧୩୧ତମ ସଂଶୋଧନ) ବିଲ୍, ୨୦୨୬ ଆଗତ କରିଛନ୍ତି। ଏଥିସହିତ, ପରିସୀମନ ପ୍ରକ୍ରିୟାରୁ ମହିଳା କୋଟାକୁ ଅଲଗା କରିବା ପାଇଁ ପରିସୀମନ ବିଲ୍ ଏବଂ କେନ୍ଦ୍ରଶାସିତ ଅଞ୍ଚଳ (ଦିଲ୍ଲୀ, ପୁଡୁଚେରୀ, ଜାମ୍ମୁ-କାଶ୍ମୀର) ଆଇନ (ସଂଶୋଧନ) ବିଲ୍ ମଧ୍ୟ ଉପସ୍ଥାପନ କରାଯାଇଛି।

ତାମିଲନାଡୁ ମୁଖ୍ୟମନ୍ତ୍ରୀ ଏମକେ ଷ୍ଟାଲିନ (MK Stalin) ବୁଧବାର ଦିନ କେନ୍ଦ୍ର ସରକାରଙ୍କ ପ୍ରସ୍ତାବିତ ସୀମା ନିର୍ଦ୍ଧାରଣ ବା ଡିଲିମିଟେସନ (Delimitation) ପ୍ରକ୍ରିୟାକୁ ତୀବ୍ର ବିରୋଧ କରିଛନ୍ତି। ନିଜ ପାର୍ଟି ଡିଏମକେ (DMK) ର ସାଂସଦ ଏବଂ ଜିଲ୍ଲାସ୍ତରୀୟ ନେତାମାନଙ୍କ ସହିତ ଏକ ଜରୁରୀକାଳୀନ ବୈଠକ କରିବା ପରେ ସେ କେନ୍ଦ୍ର ସରକାରଙ୍କୁ କଡ଼ା ଚେତାବନୀ ଦେଇଛନ୍ତି। "ଜଣେ ଆତ୍ମସମ୍ମାନୀ ତାମିଲ ଭାବେ ମୁଁ କେନ୍ଦ୍ର ସରକାରଙ୍କୁ ଚେତାବନୀ ଦେଉଛି," ବୋଲି ସେ ସ୍ପଷ୍ଟ ଭାବରେ କହିଛନ୍ତି।

କଳା ପତାକା ପ୍ରଦର୍ଶନ ପାଇଁ ଆହ୍ୱାନ

ଏହି ସୀମା ନିର୍ଦ୍ଧାରଣ ବିଲ୍‌କୁ 'ଏକ ବିରାଟ ଐତିହାସିକ ଅନ୍ୟାୟ' ବୋଲି ଅଭିହିତ କରି ଷ୍ଟାଲିନ ସମଗ୍ର ରାଜ୍ୟରେ ଏକ ବ୍ୟାପକ ଆନ୍ଦୋଳନର ଡାକରା ଦେଇଛନ୍ତି। ଗୁରୁବାର ଅର୍ଥାତ ଏପ୍ରିଲ ୧୬ ତାରିଖରେ ତାମିଲନାଡୁର କୋଣ ଅନୁକୋଣରେ ଥିବା ଘର ଓ ସାର୍ବଜନୀନ ସ୍ଥାନମାନଙ୍କରେ କଳା ପତାକା (Black Flag) ଉତ୍ତୋଳନ କରି ପ୍ରତିବାଦ ଜଣାଇବାକୁ ସେ ଆହ୍ୱାନ ଦେଇଛନ୍ତି। ଏହି ଜରୁରୀକାଳୀନ ବୈଠକ ଭିଡିଓ କନଫରେନ୍ସିଂ ମାଧ୍ୟମରେ ଧର୍ମପୁରୀ (Dharmapuri) ରୁ ପରିଚାଳିତ ହୋଇଥିଲା।

ଦକ୍ଷିଣ ରାଜ୍ୟଗୁଡ଼ିକ ପ୍ରତି ଅନ୍ୟାୟର ଅଭିଯୋଗ

ସଂସଦର ସ୍ୱତନ୍ତ୍ର ଅଧିବେଶନରେ ଲୋକସଭା ଆସନ ସଂଖ୍ୟା ବର୍ତ୍ତମାନର ୫୪୩ ରୁ ୮୫୦ କୁ ବୃଦ୍ଧି କରିବା ପାଇଁ କେନ୍ଦ୍ର ସରକାର ଏକ ବିଲ୍ ଆଣିବାକୁ ଯାଉଛନ୍ତି ବୋଲି ଚର୍ଚ୍ଚା ହେଉଛି। ଏହାଦ୍ୱାରା ଦକ୍ଷିଣ ଭାରତୀୟ ରାଜ୍ୟଗୁଡ଼ିକର ରାଜନୈତିକ ପ୍ରଭାବ କମିଯିବ ବୋଲି ଷ୍ଟାଲିନ ଆଶଙ୍କା ପ୍ରକାଶ କରିଛନ୍ତି। ସେ ପ୍ରଶ୍ନ କରିଛନ୍ତି ଯେ, "ଭାରତର ପ୍ରଗତି ପାଇଁ ଦକ୍ଷିଣ ରାଜ୍ୟଗୁଡ଼ିକ ଯେଉଁ ଅବଦାନ ଦେଇଛନ୍ତି, ତାହା କ'ଣ ସେମାନଙ୍କ ପାଇଁ ଏକ ଅପରାଧ? ଏହା କ'ଣ ତାର ଶାସ୍ତି"?

ବିଜେପି (BJP) ନେତୃତ୍ୱାଧୀନ କେନ୍ଦ୍ର ସରକାର ନିଆଁ ସହ ଖେଳୁଛନ୍ତି ବୋଲି ଅଭିଯୋଗ କରି ଡିଏମକେ ମୁଖ୍ୟ ଆହୁରି ମଧ୍ୟ କହିଛନ୍ତି ଯେ, ଯଦି କେନ୍ଦ୍ର ସରକାର ଏହି ବିଲ୍ ପ୍ରତ୍ୟାହାର ନକରନ୍ତି, ତେବେ ଏହାର ଭୟଙ୍କର ପରିଣାମ ଭୋଗିବାକୁ ପଡ଼ିବ ଏବଂ ଏଥିପାଇଁ ବହୁତ ବଡ଼ ମୂଲ୍ୟ ଦେବାକୁ ପଡ଼ିବ। ତାମିଲନାଡୁ ଏବଂ ପଶ୍ଚିମବଙ୍ଗ ନିର୍ବାଚନ ମଝିରେ କେନ୍ଦ୍ର ଏହି ସ୍ୱତନ୍ତ୍ର ଅଧିବେଶନ ଡାକିବା ଏକ ବଳପୂର୍ବକ ପ୍ରୟାସ ବୋଲି ମଧ୍ୟ ସେ ସମାଲୋଚନା କରିଛନ୍ତି।

ଗଣତନ୍ତ୍ର ଓ ରାଜ୍ୟ ଅଧିକାରର ସୁରକ୍ଷା ପାଇଁ ଏକଜୁଟ୍ ହେବାକୁ ନିବେଦନ

ଏହି ପ୍ରସଙ୍ଗରେ କେବଳ ତାମିଲନାଡୁ ନୁହେଁ, ବରଂ ଅନ୍ୟ ରାଜ୍ୟଗୁଡ଼ିକର ସାଂସଦମାନଙ୍କ ସହିତ ଯୋଗାଯୋଗ କରି ଏକ ମିଳିତ ରଣନୀତି ପ୍ରସ୍ତୁତ କରିବାକୁ ଦଳ ପ୍ରୟାସ କରୁଛି। "ଏହା କୌଣସି ଦଳ ବା ବ୍ୟକ୍ତିବିଶେଷର କଥା ନୁହେଁ। ଏହା ଆମ ଲୋକଙ୍କ ଅଧିକାର ଓ ଗଣତନ୍ତ୍ରକୁ ରକ୍ଷା କରିବାର ସମୟ," ବୋଲି ଏମକେ ଷ୍ଟାଲିନ ସମସ୍ତ ବିରୋଧୀ ଦଳଗୁଡ଼ିକୁ ଏକାଠି ହେବାକୁ ଆହ୍ୱାନ ଦେଇଛନ୍ତି।

ନୂଆଦିଲ୍ଲୀ: କେନ୍ଦ୍ର ସରକାର ଲୋକସଭା ଆସନ ସଂଖ୍ୟା ୫୪୩ରୁ ୮୫୦ କୁ ବୃଦ୍ଧି କରିବା ପାଇଁ ଏକ ପ୍ରସ୍ତାବ ଆଣିଛନ୍ତି। ଏହି ପଦକ୍ଷେପ ଦୀର୍ଘ ଦିନ ଧରି ପଡ଼ି ରହିଥିବା ମହିଳା ସଂରକ୍ଷଣ ଆଇନ ଲାଗୁ କରିବା ଏବଂ ନୂତନ ସୀମା ନିର୍ଦ୍ଧାରଣ ପ୍ରକ୍ରିୟା ପାଇଁ ବାଟ ଫିଟାଇବ। ସୂତ୍ରରୁ ପ୍ରକାଶ ଯେ, ଆସନ ସମ୍ପ୍ରସାରଣର ଏକ ଚିଠା ବିଲ୍ ସାଂସଦମାନଙ୍କୁ ପ୍ରଦାନ କରାଯାଇଛି। ସରକାର ସଂସଦର ଏକ ସ୍ୱତନ୍ତ୍ର ତିନି ଦିନିଆ ଅଧିବେଶନରେ ଗୁରୁତ୍ୱପୂର୍ଣ୍ଣ ସାମ୍ବିଧାନିକ ସଂଶୋଧନ ଆଣିବାକୁ ଯୋଜନା କରୁଛନ୍ତି। ସଂସଦ ଏବଂ ରାଜ୍ୟ ବିଧାନସଭାରେ ମହିଳାମାନଙ୍କ ପାଇଁ ୩୩ ପ୍ରତିଶତ କୋଟା ଏବଂ ୨୦୧୧ ଜନଗଣନା ଉପରେ ଆଧାର କରି ନିର୍ବାଚନମଣ୍ଡଳୀ ଗୁଡ଼ିକର ସୀମା ନିର୍ଦ୍ଧାରଣ ପାଇଁ ଏହି ସ୍ୱତନ୍ତ୍ର ଅଧିବେଶନ ଡକାଯାଇଛି। ନିର୍ବାଚନମଣ୍ଡଳୀର ପୁନଃଗଠନ ଦ୍ୱାରା ମହିଳା କୋଟାକୁ ସୁଗମ ଭାବରେ ଲାଗୁ କରିବା ପାଇଁ ଆସନ ସଂଖ୍ୟା ବୃଦ୍ଧି କରିବାକୁ ଲକ୍ଷ୍ୟ ରଖାଯାଇଛି।

ନୂତନ ପ୍ରସ୍ତାବ ଅନୁଯାୟୀ, ବିଭିନ୍ନ ରାଜ୍ୟଗୁଡ଼ିକୁ ୮୧୫ ଆସନ ମିଳିବାକୁ ଥିବାବେଳେ କେନ୍ଦ୍ରଶାସିତ ଅଞ୍ଚଳଗୁଡ଼ିକ ପାଇଁ ୩୫ଟି ଆସନ ସଂରକ୍ଷିତ ରହିବ, ଯାହାଦ୍ୱାରା ଲୋକସଭାର ସମୁଦାୟ ସଦସ୍ୟ ସଂଖ୍ୟା ୮୫୦ ରେ ପହଞ୍ଚିବ। ଏହି ପରିବର୍ତ୍ତନଗୁଡ଼ିକ ଆଗାମୀ ୨୦୨୯ ଲୋକସଭା ନିର୍ବାଚନ ଠାରୁ ଲାଗୁ ହେବାର ସମ୍ଭାବନା ରହିଛି।

ସରକାରଙ୍କ ଏହି ସୀମା ନିର୍ଦ୍ଧାରଣ ପଦକ୍ଷେପ, ବିଶେଷ କରି ୨୦୧୧ ଜନଗଣନା ତଥ୍ୟର ବ୍ୟବହାରକୁ ଚ୍ୟାଲେଞ୍ଜ କରିବାକୁ ବିରୋଧୀ ଦଳଗୁଡ଼ିକ ପ୍ରସ୍ତୁତି ଆରମ୍ଭ କରିଛନ୍ତି। ଆପ୍ (AAP), ଆରଜେଡି (RJD) ଏବଂ ଡିଏମକେ (DMK) ଭଳି ଦଳଗୁଡ଼ିକ ଏହି ପ୍ରକ୍ରିୟାକୁ ୨୦୨୧ ଜନଗଣନା ରିପୋର୍ଟ ଉପରେ ଆଧାର କରିବା ଉଚିତ୍ ବୋଲି ଯୁକ୍ତି ବାଢ଼ିବେ ବୋଲି ଆଶା କରାଯାଉଛି। ପଛୁଆ ବର୍ଗର ମହିଳାମାନଙ୍କ ପାଇଁ କୋଟା ଭିତରେ କୋଟା ପ୍ରସଙ୍ଗରେ ଇଣ୍ଡିଆ (INDIA) ମେଣ୍ଟର ଅନେକ ଦଳ ସରକାରଙ୍କ ଠାରୁ ସ୍ପଷ୍ଟୀକରଣ ମାଗିପାରନ୍ତି। ଏହାକୁ ନେଇ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ୍‌ଗେଙ୍କ ଦିଲ୍ଲୀ ବାସଭବନରେ ବିରୋଧୀ ନେତା ଏବଂ ସହଯୋଗୀ ଦଳମାନଙ୍କର ଏକ ରଣନୀତି ପ୍ରସ୍ତୁତି ବୈଠକ ହେବାର କାର୍ଯ୍ୟକ୍ରମ ରହିଛି।

ନୂଆଦିଲ୍ଲୀ: ଲୋକସଭା ବାଚସ୍ପତି ଓମ୍ ବିର୍ଲା ଗୁରୁବାର ଏକ ଗୁରୁତ୍ୱପୂର୍ଣ୍ଣ ସୂଚନା ଦେଇଛନ୍ତି। ସେ କହିଛନ୍ତି ଯେ, ସମ୍ଭାବ୍ୟ ବିଶୃଙ୍ଖଳା ଏବଂ ଅପ୍ରୀତିକର ପରିସ୍ଥିତିକୁ ଦୃଷ୍ଟିରେ ରଖି ସେ ନିଜେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଗୃହକୁ ନ ଆସିବା ପାଇଁ ପରାମର୍ଶ ଦେଇଥିଲେ। ବାଚସ୍ପତିଙ୍କ କହିବା ଅନୁଯାୟୀ, କଂଗ୍ରେସ ସାଂସଦମାନେ ପ୍ରଧାନମନ୍ତ୍ରୀଙ୍କ ଆସନ ନିକଟରେ କୌଣସି 'ଅନୁଚିତ ଘଟଣା' ଘଟାଇବାର ଯୋଜନା କରିଥିଲେ।

ବାଚସ୍ପତି ବିର୍ଲା ସ୍ପଷ୍ଟ କରିଛନ୍ତି ଯେ, ଯେତେବେଳେ ପ୍ରଧାନମନ୍ତ୍ରୀ ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବର ଉତ୍ତର ଦେବାକୁ କାର୍ଯ୍ୟକ୍ରମ ସ୍ଥିର ହୋଇଥିଲା, ସେତେବେଳେ ତାଙ୍କୁ ସୂଚନା ମିଳିଥିଲା ଯେ କିଛି ବିରୋଧୀ ଦଳ ସାଂସଦ ପ୍ରଧାନମନ୍ତ୍ରୀଙ୍କ ଚେୟାର ପାଖରେ ବିଶୃଙ୍ଖଳା ସୃଷ୍ଟି କରିପାରନ୍ତି। ସେ କହିଛନ୍ତି, "ଯଦି ଏଭଳି ଘଟଣା ଘଟିଥାନ୍ତା, ତେବେ ଏହା ଦେଶର ଗଣତାନ୍ତ୍ରିକ ପରମ୍ପରାକୁ କ୍ଷୁଣ୍ଣ କରିଥାନ୍ତା। ଏହାକୁ ରୋକିବା ପାଇଁ ମୁଁ ପ୍ରଧାନମନ୍ତ୍ରୀଙ୍କୁ ଗୃହକୁ ନ ଆସିବାକୁ ଅନୁରୋଧ କରିଥିଲି।" ପ୍ରଧାନମନ୍ତ୍ରୀ ବାଚସ୍ପତିଙ୍କ ଅନୁରୋଧ ରକ୍ଷା କରି ଗୃହରେ ଅନୁପସ୍ଥିତ ରହିଥିଲେ, ଯାହା ଫଳରେ ଏକ ବଡ଼ ଅପ୍ରୀତିକର ଘଟଣା ଟଳି ଯାଇଥିଲା।

ଅନ୍ୟପଟେ କଂଗ୍ରେସ ନେତା ପବନ ଖେଡ଼ା ଏହି ଅଭିଯୋଗକୁ ଖଣ୍ଡନ କରିବା ସହ ସରକାରଙ୍କ ଉପରେ ବର୍ଷିଛନ୍ତି। ବାଚସ୍ପତିଙ୍କ କାର୍ଯ୍ୟାଳୟରୁ ଗଣମାଧ୍ୟମରେ ମିଥ୍ୟା ରିପୋର୍ଟ ପ୍ରଚାର କରାଯାଉଥିବା ସେ ଅଭିଯୋଗ କରିଛନ୍ତି। ଖେଡ଼ା ସୋସିଆଲ ମିଡିଆରେ ଲେଖିଛନ୍ତି ଯେ, "ମହିଳା ସାଂସଦମାନେ ପ୍ରଧାନମନ୍ତ୍ରୀଙ୍କୁ ଆକ୍ରମଣ କରିବାକୁ ଯୋଜନା କରୁଥିଲେ ବୋଲି କହିବା କ’ଣ ଯୁକ୍ତିଯୁକ୍ତ? ଜଣେ ଦଳିତ ମହିଳା ସାଂସଦ ନିଜର ଦାବି ଉପସ୍ଥାପନ କରିବା କ’ଣ ଆତଙ୍କବାଦ?" ଏଭଳି ମନ୍ତବ୍ୟ ପାଇଁ ସରକାର ଦେଶର ମହିଳା, ବିଶେଷକରି ଦଳିତ ମହିଳାଙ୍କୁ କ୍ଷମା ମାଗିବା ଉଚିତ ବୋଲି ସେ ଦାବି କରିଛନ୍ତି।

ନୂଆଦିଲ୍ଲୀ: ମଙ୍ଗଳବାର ଲୋକସଭାରେ ବଜେଟ ଅଧିବେଶନ ଚାଲିଥିବା ବେଳେ ଗୃହର କାର୍ଯ୍ୟଧାରାରେ ବାଧା ସୃଷ୍ଟି କରିବା ଏବଂ ନିୟମ ଉଲ୍ଲଂଘନ ଅଭିଯୋଗରେ ୮ ଜଣ ବିରୋଧୀ ସାଂସଦଙ୍କୁ ଅଧିବେଶନର ବାକି ସମୟ ପାଇଁ ନିଲମ୍ବିତ କରାଯାଇଛି। କଂଗ୍ରେସ ନେତା ରାହୁଲ ଗାନ୍ଧୀ ପୂର୍ବ ଲଦାଖରେ ୨୦୨୦ ଚୀନ୍ ବିବାଦ ପ୍ରସଙ୍ଗ ଉଠାଇବାକୁ ଜିଦ୍ ଧରିବା ପରେ ଗୃହରେ ଅଶାନ୍ତି ଦେଖାଦେଇଥିଲା, ଯାହା ପରେ ଏହି ନିଷ୍ପତ୍ତି ନିଆଯାଇଛି।

ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ଆଲୋଚନା ବେଳେ ବିରୋଧୀ ଦଳର ନେତା ରାହୁଲ ଗାନ୍ଧୀ କୈଳାଶ ରେଞ୍ଜ ବିବାଦ ଏବଂ ଚୀନ୍ ସେନାର କାର୍ଯ୍ୟକଳାପ ବିଷୟରେ କହିବାକୁ ଚାହିଁଥିଲେ। ତେବେ ସରକାରୀ ପକ୍ଷ ଏହାକୁ ବିରୋଧ କରି କହିଥିଲେ ଯେ କୌଣସି ଅପ୍ରକାଶିତ ରିପୋର୍ଟ କିମ୍ବା ପୁସ୍ତକ ଉପରେ ଆଧାରିତ ତଥ୍ୟ ଗୃହରେ ରଖାଯାଇପାରିବ ନାହିଁ। ବାଚସ୍ପତିଙ୍କ ବାରମ୍ବାର ଅନୁରୋଧ ସତ୍ତ୍ୱେ ହଟ୍ଟଗୋଳ ଜାରି ରହିଥିଲା। ସ୍ଥିତି ଏତେ ଜଟିଳ ହୋଇଯାଇଥିଲା ଯେ କିଛି ସାଂସଦ ବାଚସ୍ପତିଙ୍କ ଆସନ ଆଡକୁ କାଗଜପତ୍ର ଫିଙ୍ଗିଥିଲେ, ଫଳରେ ଗୃହକୁ ମୁଲତବୀ ରଖିବାକୁ ପଡିଥିଲା।

ଗୃହ ପୁନର୍ବାର ଆରମ୍ଭ ହେବା ପରେ ଅଧ୍ୟକ୍ଷତା କରୁଥିବା ବିଜେପି ସାଂସଦ ଦିଲୀପ ସାଇକିଆ ବିଶୃଙ୍ଖଳିତ ଆଚରଣ ପାଇଁ ୮ ଜଣ ସାଂସଦଙ୍କ ନାମ ଘୋଷଣା କରିଥିଲେ। ସଂସଦୀୟ ବ୍ୟାପାର ମନ୍ତ୍ରୀ କିରେନ୍ ରିଜିଜୁ ସେମାନଙ୍କ ନିଲମ୍ବନ ପାଇଁ ପ୍ରସ୍ତାବ ଆଗତ କରିଥିଲେ, ଯାହା ଗୃହୀତ ହୋଇଥିଲା। ନିଲମ୍ବିତ ସାଂସଦମାନଙ୍କ ମଧ୍ୟରେ କଂଗ୍ରେସର ହିବି ଇଡେନ୍, ଅମରିନ୍ଦର ସିଂ ରାଜା ୱାରିଂ, ମାଣିକମ୍ ଟାଗୋର, ଗୁରଜିତ୍ ସିଂ ଔଜଲା, ପ୍ରଶାନ୍ତ ଯାଦବରାଓ ପଡୋଲେ, ଚାମଲା କିରଣ କୁମାର ରେଡ୍ଡୀ, ଡିନ୍ କୁରିଆକୋସ୍ ଏବଂ ସିପିଆଇ(ଏମ୍) ସାଂସଦ ଏସ୍. ଭେଙ୍କଟେଶନ୍ ସାମିଲ ଅଛନ୍ତି।

ନୂଆଦିଲ୍ଲୀ: ଲୋକସଭାରେ ଆଜି ପୁଣି ଥରେ ପ୍ରବଳ ହଟ୍ଟଗୋଳ ଦେଖିବାକୁ ମିଳିଛି। ବିରୋଧୀ ଦଳ ନେତା ରାହୁଲ ଗାନ୍ଧୀ ଚୀନ ପ୍ରସଙ୍ଗ ଉଠାଇବା ସହ ପୂର୍ବତନ ସେନା ମୁଖ୍ୟଙ୍କ ଏକ ଅପ୍ରକାଶିତ ପୁସ୍ତକ ବିଷୟରେ ଆଲୋଚନା କରିବା ପରେ ଶାସକ ଦଳର ସାଂସଦମାନେ ଏହାକୁ ଦୃଢ଼ ବିରୋଧ କରିଥିଲେ। ଫଳସ୍ୱରୂପ, ବାଚସ୍ପତି ଗୃହ କାର୍ଯ୍ୟକୁ ଅପରାହ୍ନ ୩ଟା ପର୍ଯ୍ୟନ୍ତ ମୁଲତବୀ ଘୋଷଣା କରିଥିଲେ।

ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ଆଲୋଚନା ବେଳେ ରାହୁଲ ଗାନ୍ଧୀ ପୂର୍ବତନ ସେନା ମୁଖ୍ୟ ଜେନେରାଲ ଏମଏମ ନରୱଣେ (ଅବସରପ୍ରାପ୍ତ)ଙ୍କ ଏକ ଅପ୍ରକାଶିତ ସ୍ମୃତିଚିତ୍ର (Memoir) ବିଷୟରେ ଉଲ୍ଲେଖ ଥିବା ଏକ ପତ୍ରିକାର ଆର୍ଟିକିଲକୁ ଉଦ୍ଧୃତ କରିଥିଲେ। ରାହୁଲ ଗାନ୍ଧୀ କହିଥିଲେ ଯେ, "ରାଷ୍ଟ୍ରପତିଙ୍କ ଭାଷଣରେ ଜାତୀୟ ସୁରକ୍ଷା ଏକ ଗୁରୁତ୍ୱପୂର୍ଣ୍ଣ ବିଷୟ। ପାକିସ୍ତାନ ଏବଂ ଚୀନ ସହ ଆମର ସମ୍ପର୍କ ଏବଂ ପ୍ରଧାନମନ୍ତ୍ରୀଙ୍କ ପ୍ରତିକ୍ରିୟା ବିଷୟରେ ଏହି ଆର୍ଟିକିଲରେ ଗୁରୁତ୍ୱପୂର୍ଣ୍ଣ ତଥ୍ୟ ରହିଛି।"

ରାହୁଲଙ୍କ ଏହି ବୟାନ ପରେ ବିଜେପି ସାଂସଦମାନେ ତୀବ୍ର ଆପତ୍ତି ଉଠାଇଥିଲେ। ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ ରାହୁଲଙ୍କ ଭାଷଣକୁ ବିରୋଧ କରି କହିଥିଲେ ଯେ, ବାଚସ୍ପତି ଓମ ବିର୍ଲା ସୋମବାର ଦିନ ଏହି ବିଷୟରେ ରୁଲିଂ ଦେଇସାରିଛନ୍ତି। ତେଣୁ ସମାନ ବିଷୟକୁ ପୁନର୍ବାର ଉଲ୍ଲେଖ ନକରିବାକୁ ସେ ଅନୁରୋଧ କରିଥିଲେ। ଅନ୍ୟପକ୍ଷରେ କଂଗ୍ରେସ ସାଂସଦ କେସି ଭେନୁଗୋପାଳ ଅଭିଯୋଗ କରିଥିଲେ ଯେ ସରକାର ଗୃହକୁ ବିଭ୍ରାନ୍ତ କରୁଛନ୍ତି।

ସୂଚନାଯୋଗ୍ୟ ଯେ, ସୋମବାର ଦିନ ମଧ୍ୟ ୨୦୨୦ ମସିହାର ସୀମା ବିବାଦ ଓ ଚୀନ ପ୍ରସଙ୍ଗକୁ ନେଇ ଲୋକସଭାରେ ଅଚଳାବସ୍ଥା ସୃଷ୍ଟି ହୋଇଥିଲା।

ନୂଆଦିଲ୍ଲୀ: ପୂର୍ବତନ ସେନା ମୁଖ୍ୟଙ୍କ ପୁସ୍ତକକୁ ନେଇ ସଂସଦରେ ହଙ୍ଗାମା । ସୋମବାର ଲୋକସଭାରେ ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ଆଲୋଚନା ବେଳେ ଏକ ବଡ଼ ଧରଣର ହଟ୍ଟଗୋଳ ଦେଖିବାକୁ ମିଳିଛି। ବିରୋଧୀ ଦଳ ନେତା ରାହୁଲ ଗାନ୍ଧୀ ପୂର୍ବତନ ସେନା ମୁଖ୍ୟ ଜେନେରାଲ ଏମ.ଏମ. ନରୱଣେଙ୍କ ଏକ ଅପ୍ରକାଶିତ ପୁସ୍ତକର କିଛି ଅଂଶ ଉଦ୍ଧୃତ କରିବା ପରେ ଗୃହରେ ତୀବ୍ର ଉତ୍ତେଜନା ସୃଷ୍ଟି ହୋଇଥିଲା। ଏହାକୁ ନେଇ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଏବଂ ଗୃହମନ୍ତ୍ରୀ ଅମିତ ଶାହ କଡ଼ା ବିରୋଧ କରିଥିଲେ।

ରାଜନାଥ ସିଂ ଏବଂ ଅମିତ ଶାହ ଯୁକ୍ତି ବାଢ଼ିଥିଲେ ଯେ, ଯେହେତୁ ପୁସ୍ତକଟି ଆନୁଷ୍ଠାନିକ ଭାବେ ପ୍ରକାଶିତ ହୋଇନାହିଁ, ତେଣୁ ଗୃହରେ ଏହାର ଉଲ୍ଲେଖ କରାଯାଇପାରିବ ନାହିଁ। ତେବେ ରାହୁଲ ଗାନ୍ଧୀ ଦାବି କରିଥିଲେ ଯେ ତାଙ୍କ ପାଖରେ ଥିବା ଦସ୍ତାବିଜ ପ୍ରାମାଣିକ । ବିଜେପି ସାଂସଦ ତେଜସ୍ୱୀ ସୂର୍ଯ୍ୟ କଂଗ୍ରେସର ଦେଶପ୍ରେମ ଉପରେ ପ୍ରଶ୍ନ ଉଠାଇବା ପରେ ସେ ଏହି ପ୍ରସଙ୍ଗ ଉଠାଇବାକୁ ବାଧ୍ୟ ହୋଇଥିବା ରାହୁଲ କହିଥିଲେ।

ଗୃହମନ୍ତ୍ରୀ ଅମିତ ଶାହ ରାହୁଲଙ୍କ ଅଭିଯୋଗକୁ ଖଣ୍ଡନ କରି କହିଥିଲେ ଯେ, ତେଜସ୍ୱୀ ସୂର୍ଯ୍ୟ ବିରୋଧୀ ଦଳର ରାଷ୍ଟ୍ରବାଦ କିମ୍ବା ଚରିତ୍ର ଉପରେ କୌଣସି ପ୍ରଶ୍ନ ଉଠାଇ ନାହାନ୍ତି। ସେ କେବଳ ୨୦୦୪ରୁ ୨୦୧୪ ମଧ୍ୟରେ ୟୁପିଏ ସରକାରର କାର୍ଯ୍ୟକାଳ ବିଷୟରେ କହିଥିଲେ। ଏହା ସହିତ ବିରୋଧୀ ଦଳ ନେତା ଗୃହର ନିୟମ ୩୮୯ ଉଲ୍ଲଂଘନ କରୁଥିବା ଶାହ ଅଭିଯୋଗ କରିଥିଲେ।

ଲୋକସଭା ବାଚସ୍ପତି ଓମ ବିର୍ଲା ହସ୍ତକ୍ଷେପ କରି କହିଥିଲେ ଯେ ଆଲୋଚନା ପାଇଁ ତାଲିକାଭୁକ୍ତ ବିଷୟବସ୍ତୁରେ ଭାରତ କିମ୍ବା ଚୀନ୍ ସମ୍ପର୍କ ଅନ୍ତର୍ଭୁକ୍ତ ନୁହେଁ। ଦେଶର ସମ୍ମାନ ହାନି ହେବା ଭଳି ପ୍ରସଙ୍ଗ ନ ଉଠାଇବାକୁ ସେ ପରାମର୍ଶ ଦେଇଥିଲେ। ତେବେ ରାହୁଲ ଗାନ୍ଧୀ ଓ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବଙ୍କ ସମେତ ବିରୋଧୀ ସଦସ୍ୟମାନେ କହିବାକୁ ସୁଯୋଗ ଦିଆଯାଉନଥିବା ଅଭିଯୋଗ କରି ହଟ୍ଟଗୋଳ କରିବାରୁ ଗୃହକୁ ମୁଲତବୀ ଘୋଷଣା କରାଯାଇଥିଲା।

ଜେନେରାଲ ମନୋଜ ମୁକୁନ୍ଦ ନରୱଣେ କିଏ?

ଭାରତୀୟ ସେନା ବାହିନୀର ପୂର୍ବତନ ମୁଖ୍ୟ ଜେନେରାଲ ମନୋଜ ମୁକୁନ୍ଦ ନରୱଣେ ନିଜର ବୀରତ୍ୱ ଏବଂ ନେତୃତ୍ୱ ପାଇଁ ବେଶ୍ ଜଣାଶୁଣା। ନିକଟରେ ତାଙ୍କର ବହୁ ପ୍ରତୀକ୍ଷିତ ଆତ୍ମଜୀବନୀ ‘ଫୋର୍ ଷ୍ଟାର୍ସ ଅଫ୍ ଡେଷ୍ଟିନି’ (Four Stars of Destiny) କୁ ନେଇ ଚର୍ଚ୍ଚା ଜୋର ଧରିଛି। ଆସନ୍ତୁ ଜାଣିବା ତାଙ୍କ ଜୀବନ, ସାମରିକ କ୍ୟାରିୟର ଏବଂ ଏହି ପୁସ୍ତକ ସମ୍ପର୍କିତ କିଛି ଗୁରୁତ୍ୱପୂର୍ଣ୍ଣ ତଥ୍ୟ।

ଜେନେରାଲ ନରୱଣେ ୨୨ ଏପ୍ରିଲ, ୧୯୬୦ ମସିହାରେ ପୁଣେରେ ଜନ୍ମଗ୍ରହଣ କରିଥିଲେ। ତାଙ୍କ ପିତା ଭାରତୀୟ ବାୟୁସେନାର ଜଣେ ଅଧିକାରୀ ଥିଲେ, ଯାହା ତାଙ୍କୁ ଦେଶସେବା ପାଇଁ ଅନୁପ୍ରାଣିତ କରିଥିଲା। ସେ ପୁଣେସ୍ଥିତ ନ୍ୟାସନାଲ ଡିଫେନ୍ସ ଏକାଡେମୀ (NDA) ଏବଂ ଡେରାଡୁନ୍‌ର ଇଣ୍ଡିଆନ ମିଲିଟାରୀ ଏକାଡେମୀ (IMA) ର ଜଣେ ପୁରାତନ ଛାତ୍ର। ଏହା ବ୍ୟତୀତ ସେ ଡିଫେନ୍ସ ଷ୍ଟଡିଜ୍‌ରେ ଏମ.ଫିଲ୍ (M.Phil) ଡିଗ୍ରୀ ମଧ୍ୟ ହାସଲ କରିଛନ୍ତି।

ଜେନେରାଲ ନରୱଣେ ଜୁନ୍ ୧୯୮୦ ରେ ଶିଖ୍ ଲାଇଟ୍ ଇନଫାଣ୍ଟ୍ରିର ୭ମ ବାଟାଲିୟନରେ କମିଶନ ପାଇଥିଲେ। ନିଜର ୪ ଦଶନ୍ଧିର କ୍ୟାରିୟର ମଧ୍ୟରେ ସେ ଅନେକ ଗୁରୁତ୍ୱପୂର୍ଣ୍ଣ ଦାୟିତ୍ୱ ତୁଲାଇଛନ୍ତି:

*   ଜାମ୍ମୁ ଓ କାଶ୍ମୀରରେ ରାଷ୍ଟ୍ରୀୟ ରାଇଫଲ୍ସର ଦ୍ୱିତୀୟ ବାଟାଲିୟନର ନେତୃତ୍ୱ ନେଇଥିଲେ।
*   ଉତ୍ତର-ପୂର୍ବ ଭାରତରେ ଆସାମ ରାଇଫଲ୍ସ ଏବଂ କାଶ୍ମୀରରେ ଆତଙ୍କବାଦ ବିରୋଧୀ ଅପରେସନରେ ସକ୍ରିୟ ଭୂମିକା ଗ୍ରହଣ କରିଥିଲେ।
*   ୧୬ ଡିସେମ୍ବର, ୨୦୧୯ ରେ ଜେନେରାଲ ବିପିନ ରାୱତଙ୍କ ପରେ ସେ ଭାରତୀୟ ସେନାର ୨୮ତମ ସେନାଧ୍ୟକ୍ଷ (COAS) ଭାବେ ଦାୟିତ୍ୱ ଗ୍ରହଣ କରିଥିଲେ ଏବଂ ଏପ୍ରିଲ ୨୦୨୨ ରେ ଅବସର ନେଇଥିଲେ।

ଜେନେରାଲ ନରୱଣେଙ୍କ ଆତ୍ମଜୀବନୀ ‘ଫୋର୍ ଷ୍ଟାର୍ସ ଅଫ୍ ଡେଷ୍ଟିନି’ ୨୦୨୪ ରେ ପ୍ରକାଶିତ ହେବାର ଥିଲା, କିନ୍ତୁ ବର୍ତ୍ତମାନ ଏହା ସରକାରୀ ଅନୁମୋଦନ ଅପେକ୍ଷାରେ ଅଟକି ରହିଛି। ପେଙ୍ଗୁଇନ୍ ଦ୍ୱାରା ପ୍ରକାଶିତ ହେବାକୁ ଥିବା ଏହି ପୁସ୍ତକରେ ସେ ଗଲୱାନ ଘାଟି ସଂଘର୍ଷ, ପାକିସ୍ତାନ ସହ ଅସ୍ତ୍ରବିରତି ଚୁକ୍ତି ଏବଂ ଚୀନ୍ ସହ ମୁକାବିଲା ଭଳି ଗୁରୁତ୍ୱପୂର୍ଣ୍ଣ ଘଟଣା ବିଷୟରେ ଉଲ୍ଲେଖ କରିଛନ୍ତି। ଏହି ପୁସ୍ତକରେ ସେନା ବାହିନୀର ରଣନୀତି, ନେତୃତ୍ୱ ଏବଂ ଯବାନମାନଙ୍କ କାର୍ଯ୍ୟ-ଜୀବନ ସନ୍ତୁଳନ ଉପରେ ମଧ୍ୟ ଆଲୋକପାତ କରାଯାଇଛି।

ନୂଆଦିଲ୍ଲୀ: ହୋ ହଲ୍ଲା ଭିତରେ ଲୋକସଭାରେ VB-G RAM-G ବିଲ୍‌ ପାରିତ । ବିରୋଧୀଙ୍କ ପ୍ରବଳ ହଟ୍ଟଗୋଳ ଭିତରେ ଲୋକସଭାରେ ପାରିତ ହେଲା VB–G RAM-G ବିଲ୍‌ । MGNREGA ବଦଳରେ ସରକାର ଆଣିଥିଲେ VB–G RAM-G ବିଲ୍‌ । ବିରୋଧୀ ସାଂସଦମାନଙ୍କ ନାରାବାଜି ସତ୍ତ୍ୱେ ଧ୍ୱନିମତରେ ଏହି ବିଲ୍ ଗୃହୀତ ହୋଇଛି । କେନ୍ଦ୍ର କୃଷି ମନ୍ତ୍ରୀ ଗୃହରେ ଅଭିଭାଷଣ ରଖିବା ବେଳେ ବିରୋଧୀ ସାଂସଦମାନେ ଗୃହ ମଧ୍ୟ ଭାଗକୁ ଆସି ପ୍ରବଳ ହୋହଲ୍ଲା କରିଥିଲେ। ବିଲର କପି ଚିରି ଫିଙ୍ଗିଥିଲେ। ଏହି ହଟ୍ଟଗୋଳ ପରିସ୍ଥିତି ପରେ ଗୃହର କାର୍ଯ୍ୟବାହୀକୁ ଆସନ୍ତାକାଲି ପର୍ଯ୍ୟନ୍ତ ମୁଲତବୀ ଘୋଷଣା କରାଯାଇଛି। 

ଏହି ନୂତନ ଆଇନ ୨୦ ବର୍ଷ ପୁରୁଣା ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଆଇନ (MGNREGA)ର ସ୍ଥାନ ନେଇଛି । ଏହା ଅଧୀନରେ ଗ୍ରାମାଞ୍ଚଳର ପରିବାରଗୁଡ଼ିକୁ ବର୍ଷକୁ ୧୨୫ ଦିନର ନିଶ୍ଚିତ କର୍ମନିଯୁକ୍ତି ପ୍ରଦାନ କରିବାକୁ ବ୍ୟବସ୍ଥା ରହିଛି। ତେବେ ବିରୋଧୀ ଦଳ ଏହି ବିଲ୍ ଉପରେ ଅଧିକ ତର୍ଜମା ଦାବି କରିଥିଲେ ଏବଂ ଏହାକୁ ଯୁଗ୍ମ ସଂସଦୀୟ କମିଟି (JPC) କିମ୍ବା ଷ୍ଟାଣ୍ଡିଂ କମିଟିକୁ ପଠାଇବାକୁ କହିଥିଲେ, କିନ୍ତୁ ସରକାର ଏହି ଦାବିକୁ ଖାରଜ କରିଦେଇଥିଲେ।

ବିରୋଧୀ ମନରେଗା ନାମ ପରିବର୍ତ୍ତନକୁ ଆଦୌ ଗ୍ରହଣ କରୁ ନାହାନ୍ତି। ଯୋଜନା ସହ ମହାତ୍ମା ଗାନ୍ଧୀଙ୍କ ନାମ ଜଡ଼ିତ ଥିଲା। ହେଲେ ସେମାନେ ଗାନ୍ଧୀଙ୍କ ନାଁ ହଟାଇବାକୁ ଚାହୁଛନ୍ତି। ଏହା ମହାତ୍ମା ଗାନ୍ଧୀଙ୍କ ପ୍ରତି ବଡ଼ ଅପମାନ ବୋଲି ବିରୋଧୀ ଅଭିଯୋଗ କରିଛନ୍ତି। 

ସରକାରଙ୍କ ପକ୍ଷରୁ କେନ୍ଦ୍ରମନ୍ତ୍ରୀ ଶିବରାଜ ସିଂ ଚୌହାନ ବିରୋଧୀ ଦଳ, ବିଶେଷକରି କଂଗ୍ରେସର ସମାଲୋଚନାକୁ କଡ଼ା ଜବାବ ଦେଇଥିଲେ। ହଟ୍ଟଗୋଳ ମଧ୍ୟରେ ସେ କହିଥିଲେ ଯେ, କଂଗ୍ରେସ ଦଳ ବାପୁଙ୍କ ଆଦର୍ଶକୁ ହତ୍ୟା କରିବା ପାଇଁ କାମ କରିଛି, କିନ୍ତୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବାପୁଙ୍କ ଆଦର୍ଶକୁ ବଞ୍ଚାଇ ରଖିବା ପାଇଁ କାର୍ଯ୍ୟ କରୁଛନ୍ତି।

ମହାତ୍ମା ଗାନ୍ଧୀଙ୍କ ଦର୍ଶନକୁ ଉଲ୍ଲେଖ କରି ଚୌହାନ କହିଥିଲେ ଯେ ମୋଦୀ ସରକାରଙ୍କ ଜନକଲ୍ୟାଣକାରୀ ଯୋଜନାରେ ଗାନ୍ଧୀବାଦୀ ମୂଲ୍ୟବୋଧ ପ୍ରତିଫଳିତ ହେଉଛି। ସେ ଯୁକ୍ତି ବାଢିଥିଲେ ଯେ ପ୍ରଧାନମନ୍ତ୍ରୀ ଆବାସ ଯୋଜନା, ଜଳ ଜୀବନ ମିଶନ, ସ୍ୱଚ୍ଛ ଭାରତ ମିଶନ, ଉଜ୍ଜ୍ୱଳା ଯୋଜନା ଏବଂ ଆୟୁଷ୍ମାନ ଭାରତ ଭଳି ଯୋଜନା ମାଧ୍ୟମରେ ଗରିବଙ୍କ ସେବା କରି ବାପୁଙ୍କ ସ୍ୱପ୍ନକୁ ସାକାର କରାଯାଉଛି।

ଭୁବନେଶ୍ବର: ଭୁବନେଶ୍ବରରେ କଂଗ୍ରେସ ନେତା ରାହୁଲ ଗାନ୍ଧୀ । ସ୍ବତନ୍ତ୍ର ବିମାନରେ ଆସି ଭୁବନେଶ୍ବରରେ ପହଞ୍ଚିଛନ୍ତି। ବିମାନବନ୍ଦରରେ ଜୋରଦାର ସ୍ବାଗତ କରାଯାଇଛି। ବରମୁଣ୍ଡା ପଡ଼ିଆରେ ସମାବେଶରେ ଯୋଗ ଦେବେ। ସମ୍ବିଧାନ ବଞ୍ଚାଅ ମହା ସମାବେଶକୁ ସମ୍ବୋଧନ କରିବେ। ସଭା ଶେଷ ପରେ ମଧ୍ୟାହ୍ନ ଭୋଜନ ସାରି ସେ ଅପରାହ୍ଣ ୩ଟାରେ କଂଗ୍ରେସ ଭବନରେ ପହଞ୍ଚିବେ। ପ୍ରଥମେ ରାଜନୈତିକ ବ୍ୟାପାର କମିଟି ଏବଂ ପରେ ବିଧାୟକ ଓ ପିସିସି କାର୍ଯ୍ୟକର୍ତ୍ତାଙ୍କ ସହ ରାହୁଲ ଆଲୋଚନା କରିବାର କାର୍ଯ୍ୟକ୍ରମ ରହିଛି। ରାହୁଲଙ୍କ ସହ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ୍‌ ଖଡ୍‌ଗେ, ଜାତୀୟ ସଂଗଠନ ସମ୍ପାଦକ କେସି ବେଣୁଗୋପାଳ ପ୍ରମୁଖ ମଧ୍ୟ ଆସିଛନ୍ତି।

ନୂଆଦିଲ୍ଲୀ: ଆଜି ବହୁ ଚର୍ଚ୍ଚିତ ଏକ ରାଷ୍ଟ୍ର ଏକ ନିର୍ବାଚନ ବିଲ୍‌ ଲୋକସଭାରେ ଉପସ୍ଥାପନ କରାଯିବ। ଏଥିପାଇଁ କେନ୍ଦ୍ର ସରକାର ସ୍ପଷ୍ଟ କରିଛନ୍ତି। ଏକ ରାଷ୍ଟ୍ର ଏକ ନିର୍ବାଚନ ବିଲ୍‌ ସହିତ ଓଏନଓପି ବିଲ୍‌ ମଧ୍ୟ ଆସିବ। କେନ୍ଦ୍ର ଆଇନମନ୍ତ୍ରୀ ଅର୍ଜ୍ଜୁନ ମେଘୱାଲ ଏହି ଦୁଇଟି ବିଲ୍‌କୁ ଲୋକସଭାରେ ଉପସ୍ଥାପନ କରିବେ ବୋଲି କେନ୍ଦ୍ର ସରକାର ସ୍ପଷ୍ଟ କରିଛନ୍ତି। ଗତ ସପ୍ତାହରେ ଏହି ବିଲ୍‌କୁ କ୍ୟାବିନେଟ୍‌ ଅନୁମୋଦନ ମିଳିବା ପରେ ଚଳିତ ଶୀତ ଅଧିବେଶନର କୌଣସି ଦିନରେ ଏହାକୁ ସଂସଦରେ ଉପସ୍ଥାପନ କରାଯିବା ନେଇ ସୂଚନା ମିଳିଥିଲା। କିନ୍ତୁ ଏହି ଅଧିବେଶନ ଶେଷ ହେବାକୁ ଆଉ ମାତ୍ର ୪ ଦିନ ରହିଥିବାରୁ ବିଲ୍‌ ଉପସ୍ଥାପନ କରାଯିବ କି ନାହିଁ ତାହା ସନ୍ଦେହ ଭିତରେ ରହିଥିଲା। କିନ୍ତୁ ସୋମବାର ଏହି ବିଲକୁ ତାଲିକାଭୁକ୍ତ କରାଯିବା ପରେ ଆସନ୍ତାକାଲି ଏହାକୁ ଲୋକସଭାରେ ଉପସ୍ଥାପନ କରାଯିବା ସ୍ପଷ୍ଟ ହୋଇଛି। କେନ୍ଦ୍ରମନ୍ତ୍ରୀ ମେଘୱାଲ ଏହି ବିଲ୍‌କୁ ଉପସ୍ଥାପନ କରିବା ପରେ ସେ ଏହା ଉପରେ ସବିଶେଷ ଆଲୋଚନା କରିବା ନେଇ ବିଲ୍‌କୁ ସଂସଦୀୟ ଯୁଗ୍ମ କମିଟି ନିକଟକୁ ପଠାଇବାକୁ ବାଚସ୍ପତି ଓମ୍‌ ବିର୍ଲାଙ୍କୁ ଅନୁରୋଧ କରିବେ ବୋଲି କୁହାଯାଇଛି। ଏହି ବିଲ୍‌ ଗୃହରେ ଉପସ୍ଥାପନ କରାଯିବା ବେଳେ ଯେଭଳି ବିଜେପିର ସମସ୍ତ ସଦସ୍ୟ ଉପସ୍ଥିତ ରହିବେ ସେଥିପାଇଁ ଦଳ ପକ୍ଷରୁ ସୋମବାର ହ୍ବିପ୍‌ ଜାରି କରାଯାଇଛି।