ନୂଆଦିଲ୍ଲୀ:ନୂତନ ଆର୍ଥିକ ବର୍ଷ ଏପ୍ରିଲ ପହିଲାରୁ କାର୍ଯ୍ୟକାରୀ ହେବାକୁ ଯାଉଥିବା ଅନେକ ପ୍ରମୁଖ ଆୟକର ଏବଂ ଆର୍ଥିକ ନିୟମାବଳୀ ସରକାର କେତେକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଘୋଷଣା କରିଛନ୍ତି। ୨୦୨୬ ବଜେଟରେ ପାନ୍‌ କାର୍ଡ ବ୍ୟବହାର, ନଗଦ କାରବାର, ପିଲାମାନଙ୍କ ଶିକ୍ଷା ପାଇଁ ଟିକସ ଛାଡ଼, ନିବେଶ-ସଂଯୁକ୍ତ ଟିକସ ଏବଂ ସେୟାର ବଜାର ନିୟମାବଳୀ ସମେତ ଅନେକ ପରିବର୍ତ୍ତନ ଘୋଷଣା କରାଯାଇଛି। ଏହି ପରିବର୍ତ୍ତନଗୁଡ଼ିକର ଲକ୍ଷ୍ୟ ହେଉଛି ଛୋଟ କାରବାରରେ ଜନସାଧାରଣଙ୍କୁ ଆଶ୍ୱସ୍ତି ପ୍ରଦାନ କରିବା ଏବଂ ବଡ଼ କାରବାର ଉପରେ ସରକାରୀ ତଦାରଖକୁ ସୁଦୃଢ଼ ​​କରିବା। 

ପାନ କାର୍ଡ ଝାମେଲା କମିବ
ଏଣିକି ଛୋଟ ଛୋଟ ଆର୍ଥିକ କାରବାର ପାଇଁ ପାନ କାର୍ଡ ଆବଶ୍ୟକ କରିବାର ଝାମେଲା ହ୍ରାସ ପାଇବ। ବର୍ଷସାରା ବ୍ୟାଙ୍କ କିମ୍ବା ଡାକ ଘରୁ ୧୦ ଲକ୍ଷ ଟଙ୍କା ପର୍ଯ୍ୟନ୍ତ ନଗଦ ଜମା କିମ୍ବା ଉଠାଣ ପାଇଁ ପାନ ପ୍ରଦାନ କରିବା ଆଉ ବାଧ୍ୟତାମୂଳକ ହେବ ନାହିଁ। ହୋଟେଲ, ରେସ୍ତୋରାଁ କିମ୍ବା କାର୍ଯ୍ୟକ୍ରମରେ ୧ ଲକ୍ଷ ଟଙ୍କା ପର୍ଯ୍ୟନ୍ତ ବିଲ୍ ପାଇଁ ପାନ୍‌ ବିବରଣୀ ପ୍ରଦାନ କରିବା ଆଉ ଆବଶ୍ୟକ ହେବ ନାହିଁ। ୫ ଲକ୍ଷ ଟଙ୍କା ପର୍ଯ୍ୟନ୍ତ ମୂଲ୍ୟର ନୂତନ କାର କିମ୍ବା ମୋଟରସାଇକେଲ କ୍ରୟ ପାଇଁ ଆଉ ପାନ୍‌ ଦରକାର ହେବ ନାହିଁ। ସେହିପରି, ଘର କିମ୍ବା ଫ୍ଲାଟ କିଣିବା ସମୟରେ, ୨୦ ଲକ୍ଷ ଟଙ୍କା ପର୍ଯ୍ୟନ୍ତ କାରବାର ପାଇଁ ଆଉ ପାଡ଼୍‌ କାର୍ଡ ଆବଶ୍ୟକ ହେବ ନାହିଁ। ଏନ୍‌ଆର୍‌ଆଇଙ୍କଠାରୁ ସମ୍ପତ୍ତି କିଣିବାରେ ମଧ୍ୟ ପ୍ରକ୍ରିୟା ସରଳ କରିବାକୁ ଯାଇ ଟାନ୍‌ ବଦଳରେ ପାନ୍‌ ବ୍ୟବହାର କରାଯିବ।

ବୀମା ଏବଂ କ୍ଷତିପୂରଣ ନିୟମ
ବୀମା କ୍ଷେତ୍ରରେ ପ୍ରତ୍ୟେକ ପଲିସି କ୍ରୟ ପାଇଁ ଏବେ ପାନ୍‌ ପ୍ରଦାନ କରିବା ବାଧ୍ୟତାମୂଳକ ହେବ। ଆହୁରିମଧ୍ୟ ମୋଟର ଦୁର୍ଘଟଣା କ୍ଲେମ୍‌ ଉପରେ ସୁଧ ଏବେ କରମୁକ୍ତ ହେବ ଏବଂ ସେଥ଄ରୁ ଟିଡିଏସ୍‌ କଟାଯିବନାହିଁ। ଏହା ଦୁର୍ଘଟଣା ପୀଡିତଙ୍କ ପାଇଁ ସମ୍ପୂର୍ଣ୍ଣ କ୍ଷତିପୂରଣ ସୁନିଶ୍ଚିତ କରିବ ଏବଂ ପ୍ରଶାସନିକ କାର୍ଯ୍ୟକୁ ସରଳ କରିବ।

ଶିଶୁ ଶିକ୍ଷା ଉପରେ ବର୍ଦ୍ଧିତ ଟିକସ କାଟ 
ପୂର୍ବରୁ, ପିଲାମାନଙ୍କ ଶିକ୍ଷା ଭତ୍ତା ଉପରେ ଟିକସ ଛାଡ ପ୍ରତି ମାସରେ କେବଳ ୧୦୦ ଟଙ୍କା ଥିଲା, କିନ୍ତୁ ଏବେ ପ୍ରତି ପିଲା ପାଇଁ ଏହାକୁ ପ୍ରତି ମାସରେ  ୩୦୦୦ ଟଙ୍କାକୁ ବୃଦ୍ଧି କରାଯାଇଛି। ପୂର୍ବରୁ ୩୦୦ ଟଙ୍କା ଥିବା ହଷ୍ଟେଲ ଭତ୍ତା ଛାଡକୁ ଏବେ ପ୍ରତି ପିଲା ପାଇଁ ପ୍ରତି ମାସରେ  ୯୦୦୦ ଟଙ୍କା କୁ ବୃଦ୍ଧି କରାଯାଇଛି। ଏହା ସାଧାରଣ ପରିବାରକୁ ପିଲାମାନଙ୍କ ଶିକ୍ଷା ଏବଂ ହଷ୍ଟେଲ ଖର୍ଚ୍ଚ ଉପରେ ଯଥେଷ୍ଟ ଆଶ୍ୱସ୍ତି ପ୍ରଦାନ କରିବ।

ସେୟାର ବଜାର ନିୟମରେ ପରିବର୍ତ୍ତନ
ସେୟାର ବାଇବ୍ୟାକ୍‌ରୁ ପ୍ରାପ୍ତ ଆୟକୁ ଏବେ ପୁଞ୍ଜି ଲାଭ ଭାବରେ କର ଦିଆଯିବ। ଫ୍ୟୁଚର୍ସ ଟ୍ରେଡିଂ ଉପରେ ଏସ୍‌ଟିଟି ୦.୦୫% ଏବଂ ଅପ୍ସନ ପ୍ରିମିୟମ ଉପରେ ୦.୧୫% କୁ ବୃଦ୍ଧି କରାଯାଇଛି, ଯାହା ଦ୍ବାରା ଟ୍ରେଡିଂ ଖର୍ଚ୍ଚ ବୃଦ୍ଧି ପାଇଛି। ଅଡିଟ୍ ହୋଇନଥିବା ବ୍ୟବସାୟ ଏବଂ ବୃତ୍ତିଗତଙ୍କ ପାଇଁ ଆଇଟିଆର୍‌ ଫାଇଲ କରିବାର ଶେଷ ତାରିଖ ଅଗଷ୍ଟ ୩୧ ପର୍ଯ୍ୟନ୍ତ ବୃଦ୍ଧି କରାଯାଇଛି। ତଥାପି, ସାଧାରଣ ବେତନଭୋଗୀ ବ୍ୟକ୍ତି ଏବଂ ଆଇଟିଆର୍‌-୧/୨  ଫାଇଲ କରୁଥିବା ବ୍ୟକ୍ତିମାନଙ୍କୁ ଜୁଲାଇ ୩୧ ସୁଦ୍ଧା ଟିକସ ରିଟର୍ଣ୍ଣ ଫାଇଲ କରିବାକୁ ପଡିବ।

ନୂଆଦିଲ୍ଲୀ: ନଭେମ୍ବର ମାସ ଶେଷ ହେବାକୁ ଆଉ କିଛି ଦିନ ବାକି ଅଛି। ପରବର୍ତ୍ତୀ ମାସ ଅର୍ଥାତ୍ ଡିସେମ୍ବରରେ ଏହାସହିତ ଅନେକ ପରିବର୍ତ୍ତନ ଆସିବ। ଏମିତିକି ବର୍ତ୍ତମାନ ରନ୍ଧନ ଗ୍ୟାସ୍‌ ବା ଏଲ୍‌ପିଜି ସିଲିଣ୍ଡରର ଉଚ୍ଚ ଦର ପାଇଁ ପ୍ରଭାବିତ ଖାଉଟିଙ୍କ ପାଇଁ ପହିଲାରୁ ଆଶ୍ବସ୍ତି କଲା ଭଳି ଖବର ଆସିପାରେ। କାରଣ ଏଲ୍‌ପିଜି ସିଲିଣ୍ଡର ମୂଲ୍ୟରେ ହ୍ରାସର ଯଥେଷ୍ଟ ସମ୍ଭାବନା ରହିଛି। ଡିସେମ୍ବର ୧ରୁ ବ୍ୟାଙ୍କିଙ୍ଗ୍ ଏବଂ ଇପିଏଫ୍ଓ ସହିତ ଅନେକ ନିୟମରେ ପରିବର୍ତ୍ତନ ହେବାକୁ ଯାଉଛି। ଏହା ସାଧାରଣ ଲୋକଙ୍କୁ ପ୍ରଭାବିତ କରିବ। ଏହିପରି ଭାବେ ନୂଆ ମାସରୁ ୫ଟି ବଡ ପରିବର୍ତ୍ତନ ଆଶା କରାଯାଉଛି।

୧ :- ଗ୍ୟାସ ସିଲିଣ୍ଡର ମୂଲ୍ୟ ହ୍ରାସ ହୋଇପାରେ

ଦେଶର ରାଷ୍ଟ୍ରାୟତ୍ତ ତୈଳ କମ୍ପାନୀଗୁଡିକ ପ୍ରତ୍ୟେକ ମାସର ପ୍ରଥମ ଦିନରେ ଏଲପିଜି ସିଲିଣ୍ଡରର ମୂଲ୍ୟ ସମୀକ୍ଷା କରିଥାନ୍ତି। ବର୍ତ୍ତମାନ ଘରୋଇ ବଜାରରେ ଏଲ୍‌ପିଜି ଦର ଆକାଶଛୁଆଁ ହେଉଥିବା ଯୋଗୁଁ କେନ୍ଦ୍ର ସରକାର ଏବେ ଏହାର ସମୀକ୍ଷା କରିପାରନ୍ତି ବୋଲି ଆଶା କରାଯାଉଛି। କାରଣ ନିକଟରେ ଉତ୍ପାଦ ଶୁଳ୍କରେ ହ୍ରାସ ଘଟାଇ ତୈଳ ତାତିକୁ କିଛି ମାତ୍ରାରେ କମାଇପାରିଛନ୍ତି। ଯାହା ଅନୁମାନ କରାଯାଉଛି ସରକାର ପେଟ୍ରୋଲ ଏବଂ ଡିଜେଲ ଭଳି ଏଲ୍‌ପିଜି ଦରରେ ହ୍ରାସ କରିପାରନ୍ତି।

୨ :- ଆଧାର ୟୁଏଏନ୍‌ ଲିଙ୍କ୍ ନ ହେଲେ ପିଏଫ୍‌ ଟଙ୍କା ବନ୍ଦ

ନଭେମ୍ବର ୩୦ ସୁଦ୍ଧା ୟୁନିଭର୍ସାଲ୍ ଆକାଉଣ୍ଟ ନମ୍ବର (ୟୁଏଏନ୍‌)କୁ ଆଧାର କାର୍ଡ ସହିତ ଲିଙ୍କ୍ କରିବା ଆବଶ୍ୟକ। ଏପରି ପରିସ୍ଥିତିରେ, ଯଦି ଆପଣ ନଭେମ୍ବର ୩୦ ସୁଦ୍ଧା ତାହା କରିବାକୁ ସକ୍ଷମ ନ ହୁଅନ୍ତି, ତେବେ ଡିସେମ୍ବର ୧ ରୁ କମ୍ପାନୀରୁ ଆସୁଥିବା ଯୋଗଦାନ ବାବଦ ଅର୍ଥ ଆପଣଙ୍କ ଆକାଉଣ୍ଟରେ ବନ୍ଦ ହୋଇଯିବ। ଏହାବ୍ୟତୀତ ଯଦି ଆପଣ ଆଧାର କାର୍ଡକୁ ଲିଙ୍କ୍ କରନ୍ତି ନାହିଁ, ତେବେ ଆପଣ ଇପିଏଫ୍‌ ଆକାଉଣ୍ଟରୁ ଟଙ୍କା ଉଠାଇବାରେ ମଧ୍ୟ ଅସୁବିଧାର ସମ୍ମୁଖୀନ ହୋଇପାରନ୍ତି।

୩ :- ଏସବିଆଇ କ୍ରେଡିଟ କାର୍ଡରେ କ୍ରୟ ପାଇଁ ଦେବେ ଚାର୍ଜ

ଯଦି ଆପଣଙ୍କର ଏକ ଏସ୍‌ବିଆଇ କ୍ରେଡିଟ୍ କାର୍ଡ ଅଛି, ତେବେ ଆସନ୍ତା ମାସରୁ ଏହା ମାଧ୍ୟମରେ କ୍ରୟ କରିବା ଆପଣଙ୍କ ପାଇଁ ମହଙ୍ଗା ହେବ। ପ୍ରତ୍ୟେକ କ୍ରୟ ଉପରେ କାର୍ଡଧାରୀ ୯୯ ଟଙ୍କା ଏବଂ ଟିକସ ଅଲଗା ଅଲଗା ଦେବାକୁ ପଡିବ। ଏହା ଏକ ପ୍ରେସେସିଂ ଫି ହେବ। ଏସ୍‌ବିଆଇ ଅନୁଯାୟୀ, ଡିସେମ୍ବର ପହିଲାରୁ ସମସ୍ତ ବ୍ୟବସାୟୀ ଇଏମ୍‌ଆଇ କାରବାରକୁ ପ୍ରକ୍ରିୟାକରଣ ଚାର୍ଜ ଏବଂ ଟିକସ ଭାବରେ ୯୯ ଟଙ୍କା ଦେବାକୁ ପଡିବ। ପ୍ରଥମେ ଏସବିଆଇ କ୍ରେଡିଟ୍ କାର୍ଡ ଏହା ଆରମ୍ଭ କରିଛି।

୪ :- ବଦଳିବ ପିଏନ୍‌ବି ସୁଧ ହାର

ଦେଶର ଦ୍ୱିତୀୟ ବୃହତ୍ତମ ବ୍ୟାଙ୍କ ପଞ୍ଜାବ ନ୍ୟାସନାଲ ବ୍ୟାଙ୍କ (ପିଏନବି) ଆକାଉଣ୍ଟଧାରୀଙ୍କୁ ଚକିତ କରିଛି। ସଞ୍ଚୟ ଖାତାରେ ସୁଧ ହାର ହ୍ରାସ କରିବାକୁ ବ୍ୟାଙ୍କ ନିଷ୍ପତ୍ତି ନେଇଛି। ବ୍ୟାଙ୍କ ସଞ୍ଚୟ ଖାତା ସୁଧ ହାରକୁ ବାର୍ଷିକ ୨.୯୦ ରୁ ୨.୮୦ ପ୍ରତିଶତକୁ ହ୍ରାସ କରିବାକୁ ନିଷ୍ପତ୍ତି ନେଇଛି। ଡିସେମ୍ବର ପହିଲାଠାରୁ ନୂତନ ସୁଧ ହାର ଲାଗୁ ହେବ।

୫ :- ଦିଆସିଲି ମୂଲ୍ୟ ଦୁଇଗୁଣ ହେବ

ଦୀର୍ଘ ୧୪ ବର୍ଷ ପରେ ଦେଶରେ ଦିଆସିଲି ମୂଲ୍ୟ ବଦଳିବ। ଡିସେମ୍ବର ପହିଲାଠାରୁ ଦିଆସିଲି ମୂଲ୍ୟ ଦ୍ୱିଗୁଣିତ ହେବାକୁ ଯାଉଛି। ତେଣୁ ଆସନ୍ତାମାସରୁ ଆପଣଙ୍କୁ ମ୍ୟା ଏକ ଦିଆସିଲି ବକ୍ସ ପାଇଁ ୧ ଟଙ୍କା ବଦଳରେ ୨ ଟଙ୍କା ଖର୍ଚ୍ଚ କରିବାକୁ ପଡିବ। ଶେଷ ଥର ପାଇଁ ୨୦୦୭ରେ ଦିଆସିଲିର ମୂଲ୍ୟ ୫୦ ପଇସାରୁ ୧ଟଙ୍କାକୁ ବୃଦ୍ଧି କରାଯାଇଥିଲା। ମୂଲ୍ୟ ବୃଦ୍ଧି ହେବାର କାରଣ ହେଉଛି ଦିଆସିଲି ତିଆରି ପାଇଁ ବ୍ୟବହୃତ କଞ୍ଚାମାଲ ମୂଲ୍ୟରେ ବୃଦ୍ଧି।