ଭୁବନେଶ୍ୱର: ଆଜି ପବିତ୍ର ବଡ଼ଦିନ । ଧରାବତରଣ କରିଛନ୍ତି ପ୍ରଭୁ ଯୀଶୁ । ସାରା ବିଶ୍ବରେ ହେଉଛି ସେଲିବ୍ରେସନ । ମଧ୍ୟରାତ୍ରରେ ଯୀଶୁଙ୍କ ଧରାବତରଣକୁ ନେଇ ଉତ୍ସବମୁଖର ହୋଇଛି ରାଜ୍ୟର ସବୁ ଚର୍ଚ୍ଚ । ରଙ୍ଗବେରଙ୍ଗର ଆଲୋକମାଳାରେ ସୁସଜ୍ଜିତ ହୋଇଛି ଚର୍ଚ୍ଚ । ଖ୍ରୀଷ୍ଟ ଧର୍ମାବଲମ୍ବୀ ମାନେ ଚର୍ଚ୍ଚକୁ ଆସି ପ୍ରଭୁ ଯୀଶୁଙ୍କ ଉଦ୍ଦେଶ୍ୟରେ ପ୍ରାର୍ଥନା କରିଛନ୍ତି । ପରସ୍ପରକୁ ଶୁଭେଚ୍ଛା ଜଣାଉଛନ୍ତି ଖ୍ରୀଷ୍ଟ ଧର୍ମାବଲମ୍ବୀ । ବଡ଼ ଦିନ ପାଇଁ ଚର୍ଚ୍ଚ କର୍ତ୍ତୃପକ୍ଷ ଓ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି ।

ଭୁବନେଶ୍ୱରର ସତ୍ୟନଗର କ୍ୟାଥୋଲିକ୍ ଚର୍ଚ୍ଚ ଓ ୟୁନିଟ୍-୪ ୟୁନିଅନ ଚର୍ଚ୍ଚ ସମେତ ୩୫ରୁ ଅଧିକ ଚର୍ଚ୍ଚରେ ଯୀଶୁଙ୍କ ଜନ୍ମଦିନକୁ ଖୁବ ଧୁମଧାମରେ ପାଳିତ କରିଛନ୍ତି ଶ୍ରଦ୍ଧାଳୁ । କ୍ୟାଥୋଲିକ୍ ଚର୍ଚ୍ଚରେ ପ୍ରଭୁ ଯୀଶୁଙ୍କ ଜନ୍ମବିଧି ପାରମ୍ପରିକ ଭାବରେ ସମ୍ପନ୍ନ ହୋଇଥିଲା । ଯୀଶୁଙ୍କ ଜନ୍ମ ପୂର୍ବରୁ ବଳିଦାନ ଯଜ୍ଞ ହେବା ପରେ ପରିସରରେ ନିର୍ମିତ ଅସ୍ଥାୟୀ ମେଣ୍ଢାଶାଳରୁ ଫାଦର୍ ନବଜାତ ଯୀଶୁଙ୍କ ମୂର୍ତ୍ତିକୁ ଆଣିଥିଲେ । ଖ୍ରୀଷ୍ଟଧର୍ମାବଲମ୍ବୀ ଶ୍ରଦ୍ଧାଳୁମାନେ ଉତ୍ସାହିତ ହୋଇଯାଇଥିଲେ । ସମସ୍ତ ଭାଷାରେ ବାଇବେଲ ପଢ଼ାଯାଇଥିଲା । ଶିଶୁ ଯୀଶୁଙ୍କୁ ଗୋଲାପ ଫୁଲ ଦିଆଯାଇଥିବା ଓ ମହମବତୀ ଜାଳି ତାଙ୍କ ସ୍ୱାଗତ କରାଯାଇଥିଲା । 

ପ୍ରଭୁ ଯୀଶୁଖ୍ରୀଷ୍ଟଙ୍କ ଧରାବତରଣ ଖୁସିରେ ଖ୍ରୀଷ୍ଟମାସ ତଥା ପବିତ୍ର ବଡ଼ଦିନକୁ ଖ୍ରୀଷ୍ଟଧର୍ମାବଲମ୍ବୀମାନେ ବଡ଼ ଧୂମଧାମ୍‌ରେ ପାଳନ କରିଥାନ୍ତି । ପବିତ୍ର ଗ୍ରନ୍ଥ ବାଇବେଲ୍‌ରେ ଯୀଶୁଙ୍କ ଜନ୍ମଦିନକୁ ନେଇ ସଠିକ୍ ତାରିଖ ଉଲ୍ଲେଖ ନ ଥିଲେ ମଧ୍ୟ ଏହି ଦିନକୁ ସାରା ବିଶ୍ୱରେ କ୍ରିସ୍‌ମାସ୍‌ ଭାବେ ପାଳନ କରାଯାଇଥାଏ। ବାଇବେଲ ଅନୁସାରେ, ଭଗବାନ ଯୀଶୁ ହେଉଛନ୍ତି ଈଶ୍ୱରଙ୍କ ସନ୍ତାନ । ପୃଥିବୀରେ ପ୍ରେମ ଏବଂ ଶ୍ରଦ୍ଧାର ବାର୍ତ୍ତା ପ୍ରଚାର କରିବା ପାଇଁ ସେ ଧରାବତରଣ କରିଥିଲେ । ଖ୍ରୀଷ୍ଟ ଧର୍ମରେ ଏହି ଦିନକୁ ସବୁଠାରୁ ପବିତ୍ର ମନେ କରାଯାଇଥାଏ। ଦୟା, କ୍ଷମା, କରୁଣାର ଅବତାର ଥିଲେ ପ୍ରଭୁ ଯୀଶୁ। ମାନବ ସମାଜକୁ ଦିଗ୍‌ଦର୍ଶନ ଦେବା ଲାଗି ପରମେଶ୍ବରଙ୍କ ନିର୍ଦ୍ଦେଶରେ ସେ ଧରାବତରଣ କରିଥିଲେ। ସମାଜର ମଙ୍ଗଳ ପାଇଁ ସେ ହସିହସି ପ୍ରାଣବଳି ଦେଇଥିଲେ। 

ପ୍ରଭୁ ଯୀଶୁ ମାନବ ସମାଜକୁ ପ୍ରେମ ଏବଂ ମାନବିକତା ଶିକ୍ଷା ଦେଇଥିଲେ। ସେ ଜଗତର ଲୋକଙ୍କୁ ପ୍ରେମ ଏବଂ ଭାଇଚାରା ସହିତ ବଞ୍ଚିବାକୁ ବାର୍ତ୍ତା ଦେଇଥିଲେ।  ଏହି ଦିନଟିକୁ ଇଉରୋପୀୟ ରାଷ୍ଟ୍ରରେ ଖୁବ୍ ଜାକଜମକରେ ପାଳନ କରାଯାଉଥିଲାବେଳେ ଆଜିକାଲି ପ୍ରାୟତଃ ସବୁସ୍ଥାନରେ ଏହି ଦିବସ ପାଳନ କରାଯାଉଛି।

ଡିସେମ୍ବର ମାସ ଆରମ୍ଭ ହେବା ମାତ୍ରେ ବଡ଼ଦିନ ପାଳନ ପାଇଁ ପ୍ରସ୍ତୁତି ଆରମ୍ଭ ହୋଇଯାଏ। ଖ୍ରୀଷ୍ଟ ଧର୍ମାବଲମ୍ବୀଙ୍କ ପାଇଁ ଏହା ଏକ ବଡ଼ ପର୍ବ। ଏହାକୁ ବଡ଼ଦିନ ମଧ୍ୟ କୁହାଯାଏ। ପ୍ରତିବର୍ଷ ଡିସେମ୍ବର ୨୫ ତାରିଖରେ ଧୁମ୍‌ଧାମ୍‌ରେ ବଡ଼ଦିନ ପାଳନ କରାଯାଏ। ଆମ ଦେଶରେ ବେଶ୍‌ ଆନନ୍ଦ ଉଲ୍ଲାସ ମଧ୍ୟରେ ବଡ଼ଦିନ ପାଳନ କରାଯାଏ। କ୍ରିସ୍‌ମାସ୍‌କୁ ଅଧିକ ରଙ୍ଗିନ କରିଥାଏ କ୍ରିସମାସ୍‌ ଟ୍ରି, କେକ୍‌ ଓ ଉପହାର। ଏହି ପରିପ୍ରେକ୍ଷୀରେ ଏବେ ସବୁଠୁ ଅଧିକ ଟ୍ରେଣ୍ଡ୍‌ରେ ରହିଛି ସିକ୍ରେଟ୍‌ ସାଣ୍ଟା। ତେବେ ଆପଣ ଜାଣନ୍ତି କି କିଏ ସେହି ସିକ୍ରେଟ୍‌ ସାଣ୍ଟା? କଣ ପାଇଁ ସାନ୍ତାକ୍ଲଜ୍‌ ଲାଲ୍‌ ରଙ୍ଗର ପୋଷାକ ପିନ୍ଧନ୍ତ? କଣ ପାଇଁ ସାନ୍ତାକ୍ଲଜ୍ ଉପଦାର ବାଣ୍ଟନ୍ତି? ତେବେ ଆସନ୍ତୁ ଜାଣିବା ସେହି ସମସ୍ତ ବିଷୟରେ କଣ ରହିଛି କାହାଣୀ…..

କିଏ ସେହି ସିକ୍ରେଟ୍‌ ସାଣ୍ଟା ?

କ୍ରିସମାସ୍‌ ଉତ୍ସବ ପାଶ୍ଚାତ୍ୟ ଜଗତରୁ ଆସିଥିଲେ ମଧ୍ୟ ଆମ ଦେଶରେ ମଧ୍ୟ ଏହାକୁ ଅନୁସରଣ କରାଯାଉଛି। ବିଶେଷକରି କୁନି କୁନି ପିଲାମାନେ ସିକ୍ରେଟ୍‌ ସାଣ୍ଟାଙ୍କଠାରୁ ଉପହାର ପାଇବା ପାଇଁ ବ୍ୟଗ୍ର ଥାଆନ୍ତି। ସିକ୍ରେଟ୍‌ ସାଣ୍ଟା ପଛରେ ରହିଛି ଭିନ୍ନ ଭିନ୍ନ କାହାଣୀ। ସବୁଠୁ ଅଧିକ ଚର୍ଚ୍ଚିତ କାହାଣୀ ହେଉଛି ଚତୁର୍ଥ ଶତାବ୍ଦୀରେ ତୁର୍କୀରେ ସେଣ୍ଟ ନିକୋଲସ ନାମକ ଜଣେ ବୃଦ୍ଧ ଥିଲେ। ତାଙ୍କୁ ଲୋକେ ‘ଫାଦର କ୍ରିସ୍‌ମାସ୍‌’ ତଥା ‘ଓଲ୍ଡ ମ୍ୟାନ୍‌ କ୍ରିସ୍‌ମାସ୍‌’ ନାମରେ ସମ୍ବୋଧନ କରୁଥିଲେ। ନିକୋଲାସ୍‌ଙ୍କ ପାଖରେ ବହୁତ ଧନ ସମ୍ପତ୍ତି ଥିଲା। କିନ୍ତୁ ତାଙ୍କ ମାତା ପିତାଙ୍କର ଦେହାନ୍ତ ହୋଇଯାଇଥିଲା।

ସେଣ୍ଟ ନିକୋଲାସ୍‌ ଗରିବ ଲୋକଙ୍କୁ ଲୁଚିଲୁଚି ସାହାଯ୍ୟ କରୁଥିଲେ। କିନ୍ତୁ ଏକଥା କେହି ଜାଣିପାରୁନଥିଲେ। ଥରେ ନିକୋଲସ୍‌ ଜଣେ ଗରିବ ବାପ ଅର୍ଥ ଅଭାବରୁ ତା’ର ତିନିଜଣ ଝିଅଙ୍କୁ ବିବାହ କରାଇ ପାରୁନଥିବାର ଜାଣିବାକୁ ପାଇଲେ । ତେଣୁ ଉକ୍ତ ବ୍ୟକ୍ତିଙ୍କୁ ସାହାଯ୍ୟ କରିବାକୁ ଯାଇ ନିକୋଲାସ୍‌ ଲୁଚି କରି ଛାତ ଉପରୁ ସୁନାଭର୍ତ୍ତି ବ୍ୟାଗ୍‌କୁ ଚିମିନି ମଧ୍ୟରୁ ଘର ଭିତରକୁ ଫିଙ୍ଗିଥିଲେ। ଲଗାତାର ତିନିଦିନ ଏପରି କରିବା ପରେ ପରେ ଉକ୍ତ ବ୍ୟକ୍ତି ନିକୋଲସ୍‌ଙ୍କୁ ଦେଖିଦେଇଥିଲେ। ଏହି କଥା ପ୍ରଘଟ ନ କରିବାକୁ ନିକୋଲାସ୍‌ ତାଙ୍କୁ କହିଥିଲେ। ହେଲେ ସେ ଏହି ପ୍ରଘଟ କରିବା ପରେ ସେହି ସମୟରେ ଯାହାକୁ କିଛି ଗୁପ୍ତରେ ଉପହାର ମିଳୁଥିଲା ନିକୋଲାସ୍‌ ଦେଉଛନ୍ତି ବୋଲି ଲୋକଙ୍କର ଏକ ଧାରଣା ଥିଲା। ସେବେଠାରୁ ସାରା ବିଶ୍ବରେ କ୍ରିସ୍‌ମାସ୍‌ ଦିନ ସିକ୍ରେଟ୍‌ ସାଣ୍ଟା ହୋଇ ଉପହାର ଦେବା ପ୍ରଚଳନ ରହିଛି।

ସାନ୍ତାକ୍ଲଜ୍‌ର ପୋଷାକ ଲାଲ୍ ରଙ୍ଗ କାହିଁକି?

ବଡ ଦିନର ସବୁଠୁ ଗୁରୁତ୍ୱପୂର୍ଣ୍ଣ ହେଉଛି ସାନ୍ତା କ୍ଲଜ୍ ଯାହାଙ୍କୁ ପ୍ରଭୁ ଯିଶୁଙ୍କ ଶାନ୍ତି ଦୂତ କୁହାଯାଏ । ଲାଲ ପୋଷାକ , ସେଥିରେ ଧଳା ରଙ୍ଗର ଲାଇନିଙ୍ଗ, ପିଠିରେ ଉପହାର ଭରା ବ୍ୟାଗ୍, ହାତରେ କ୍ରିସମାସ୍ ବେଲ୍, ପାଦରେ ଧଳା ଯୋତା, ମୁହଁରେ ଧଳା ରଙ୍ଗର ଶ୍ମଶ୍ରୁ ସମସ୍ତଙ୍କ ଦୃଷ୍ଟି ଆକର୍ଷଣ କରେ ।ହେଲେ ମନରେ ପ୍ରଶ୍ନ ଉଠେ ସାନ୍ତା କ୍ଲଜର ପୋଷାକ ଲାଲ କାହିଁକି ? ଏହା ପଛରେ ରହିଛି କିଛି କାହାଣୀ ଓ ବିଶ୍ୱାସ । ଏପରି କୁହାଯାଏ ଯେ, ଲାଲ ରଙ୍ଗ ଖୁସି ଓ ଶ୍ରଦ୍ଧାର ପ୍ରତୀକ । ଏହା ବ୍ୟତୀତ ଲାଲ ରଙ୍ଗ ପ୍ରଭୁ ଯିଶୁଙ୍କ ରକ୍ତର ପ୍ରତୀକ । ତାଙ୍କର ଏହି ଲାଲ ରକ୍ତ ସାରା ମାନବିକତା ପ୍ରତି ପ୍ରେମ , କ୍ଷମା ଓ ଆଶିଷକୁ ଦର୍ଶାଏ । ବିଶ୍ୱାସ ରହିଛି , ପ୍ରଭୁ ଯିଶୁ ସାରା ମାନବ ଜାତିକୁ ନିଜ ସନ୍ତାନ ଭଳି ଭଲ ପାଆନ୍ତି । ଏହି କାରଣରୁ ଯିଶୁ ଲାଲ ରଙ୍ଗର ପୋଷାକ ମାଧ୍ୟମରେ ସମାଜକୁ ମାନବିକତାର ଶିକ୍ଷା ଦେଇଥାନ୍ତି ।

ଆଉ ଏକ ବିଶ୍ୱାସ ଓ ଲୋକକଥା ମୁତାବକ, ମଧ୍ୟଯୁଗରେ ୟୁରୋପର ଅନେକ ପ୍ରାନ୍ତରେ ବଡ ଦିନର ଦିନକୁ ପୂର୍ବରୁ ସନ୍ଧ୍ୟା ସମୟରେ ପାରାଡାଇଜ୍ ପ୍ଲେ ( ନାଟକ)ର ଆୟୋଜନ କରାଯାଉଥିଲା । ଏହି ଅବସରରେ ବଗିଚାରେ ଏକ ଖ୍ରୀଷ୍ଟମାସ ଟ୍ରିରେ ଲାଲ ରଙ୍ଗର ଆପଲ ସଜା ହୋଇଥାଏ ଯାହା ଯୁଗ ଆରମ୍ଭର ପ୍ରଥମ ମାନବ ଆଦମଙ୍କ ପ୍ରତୀକ ଯିଏ ବିଶ୍ୱାସ ଓ ପବିତ୍ରତାର ପ୍ରତୀକ । ଏହି ଲକ୍ଷ୍ୟରେ ଆଜି ମଧ୍ୟ ଏହି ଧାରଣାକୁ ନେଇ ଲୋକଙ୍କ ମନରେ ପବିତ୍ର ମନୋଭାବ ସୃଷ୍ଟି କରିବା ଲକ୍ଷ୍ୟରେ ସାନ୍ତା କ୍ଲଜ୍ ଲାଲ ରଙ୍ଗର ପୋଷାକ ପିନ୍ଧି ଖୁସି ବାଣ୍ଟିବାକୁ ଆସିଥାନ୍ତି ।

ୱାଶିଂଟନ୍: ଆଗକୁ ଆସୁଛି ଖ୍ରୀଷ୍ଟମାସ ଦିନ । ଏଥିପାଇଁ ଖ୍ରୀଷ୍ଟମାସ ପରେଡ୍‌ରେ ଲୋକମାନେ ବାଜା ବଜେଇ ନାଚ ଗୀତରେ ମସ୍‌ଗୁଲ୍ ହୋଇ ରାସ୍ତାରେ ଯାଉଥିଲେ। ଏହି ସମୟରେ ଘଟିଲା ଏକ ବଡ ଅଘଟଣ। ପରେଡ୍‌ କରୁଥିବା ଲୋକଙ୍କ ଉପରେ ମାଡିଗଲା ଏକ ଏସ୍‌ୟୁଭି କାର୍‌। ଫଳରେ ୨୦ ରୁ ଅଧିକ ଲୋକ ଆହତ ହୋଇଥିବା ବେଳେ ଅନେକ ଲୋକଙ୍କର ମୃତ୍ୟୁ ହୋଇଥିବା ଆଶଙ୍କା କରାଯାଉଛି । ଆମେରିକାର ୱିସକନସିନ୍ ୱାଉକେଶା ସହରରେ ଘଟିଛି ଏଭଳି ଦୁଃଖଦ ଘଟଣା । ୱାଉକେଶାର ମିଲ୍‌ୱାକିରେ ଘଟିଥିବା ଏହି ଘଟଣାର ତଦନ୍ତ ଜାରି ରହିଛି। ବାର୍ଷିକ ସମାରୋହ ଦେଖିବା ପାଇଁ ବହୁ ସଂଖ୍ୟାରେ ଲୋକ ମିଲୱାକ୍, ୱାଉକେଶାରେ ରୁଣ୍ଡ ହୋଇଥିବା ବେଳେ ସ୍ଥାନୀୟ ସମୟ ଅପରାହ୍ନ ପ୍ରାୟ ୪:୩୦ ରେ ଏହି ଘଟଣା ଘଟିଥିଲା ​​।

ପୁଲିସ କର୍ତ୍ତୃପକ୍ଷଙ୍କ ସୂଚନା ଅନୁସାରେ, ଏକ ନାଲି ଏସୟୁଭି ଖ୍ରୀଷ୍ଟମାସ ପରେଡ୍ ବେଳେ ଭିଡ଼ ଭିତରକୁ ପଶିଯାଇଥିଲା। ଦ୍ରୁତଗତିରେ ମାଡ଼ି ଆସୁଥିବା ଗାଡ଼ିଟିକୁ ଅଟକାଇବାକୁ ଉଦ୍ୟମ କରି ପୁଲିସ ଗୁଳି ମଧ୍ୟ ଚଳାଇଥିଲା। କିନ୍ତୁ ତାହା ଅଟକି ନଥିଲା। ଏବଂ ଲୋକଙ୍କ ଉପରକୁ ମାଡିଯାଇଥିଲା। ଏହି ସମୟ ମଧ୍ୟରେ କାରଟି କିଛି ପିଲାଙ୍କ ସମେତ ୨୦ରୁ ଅଧିକ ଲୋକଙ୍କୁ ଧକ୍କା ଦେଇଥିଲା। ଏହି ଘଟଣାରେ ଅନେକ ଲୋକଙ୍କର ମୃତ୍ୟୁ ବି ହୋଇଛି। ଆହତଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି ।

ଏହି ଘଟଣା ପାଇଁ ଜଣେ ଯୁବକଙ୍କୁ ଗିରଫ କରାଯାଇଛି ଏବଂ ଅଧିକାରୀମାନେ ଗାଡିଟିକୁ ଜବତ କରିଛନ୍ତି।