ଭୁବନେଶ୍ୱର: ପୁଣି ବସ୍‌ ଭଡ଼ା ବଢ଼ାଇଲେ ରାଜ୍ୟ ସରକାର । ଡିଜେଲ ଦରରେ ଅହେତୁକ ବୃଦ୍ଧି ପରେ ଓଡ଼ିଶା ସରକାର ରାଜ୍ୟରେ ସମସ୍ତ ବର୍ଗର ବସ୍ ଭଡ଼ା ବୃଦ୍ଧି କରିଛନ୍ତି। ସାଧାରଣ ଓ ଏକ୍ସପ୍ରେସରେ କିଲୋମିଟର ପିଛା ଭଡ଼ା ୨ ପଇସା ବୃଦ୍ଧି ହୋଇଛି । ଡିଲକ୍ସ, ଏସି ଡିଲକ୍ସ ବସରେ କିଲୋମିଟର ପିଛା ୪ ପଇସା ଭଡ଼ା ବଢିଛି । ସେହିପରି ସୁପର ଡିଲକ୍ସ ବସ ଭଡା କିଲୋମିଟର ପିଛା ୬ ପଇସା ବଢିଛି । ଜୁନ୍ ୨ ତାରିଖରେ ରାଜ୍ୟ ପରିବହନ କର୍ତ୍ତୃପକ୍ଷ (STA) ପକ୍ଷରୁ ଜାରି କରାଯାଇଥିବା ଏକ ନିର୍ଦ୍ଦେଶନାମା ଅନୁଯାୟୀ ଏହି ନୂତନ ଦର ଲାଗୁ ହୋଇଛି। ତେବେ ଟାଉନ୍ ବସ୍ ଗୁଡ଼ିକୁ ବାଦ୍ ଦେଲେ ରାଜ୍ୟରେ ଚଳାଚଳ କରୁଥିବା ଅନ୍ୟ ସମସ୍ତ ଷ୍ଟେଜ୍ କ୍ୟାରେଜ୍ କ୍ଷେତ୍ରରେ ଏହି ବର୍ଦ୍ଧିତ ଭଡ଼ା ଲାଗୁ ହେବ।

ବିଗତ କିଛି ଦିନ ମଧ୍ୟରେ ଡିଜେଲ ଦରରେ ବ୍ୟାପକ ବୃଦ୍ଧି ଘଟିଛି। ଗତ ମେ ୧୫ ତାରିଖରେ ଡିଜେଲ ଦର ଲିଟର ପିଛା ୯୫.୮୭ ଟଙ୍କା ଥିବାବେଳେ ମେ ୩୧, ୨୦୨୬ ସୁଦ୍ଧା ଏହା ୧୦୦.୬୮ ଟଙ୍କାରେ ପହଞ୍ଚିଥିଲା। ଫଳରେ ଲିଟର ପିଛା ପ୍ରତ୍ୟକ୍ଷ ଭାବେ ୪.୮୧ ଟଙ୍କା ବୃଦ୍ଧି ପାଇବା କାରଣରୁ ବସ୍ ମାଲିକମାନଙ୍କ ଉପରେ ଆର୍ଥିକ ବୋଝ ପଡ଼ିଥିଲା। ଏହାକୁ ଦୃଷ୍ଟିରେ ରଖି ରାଜ୍ୟ ସରକାର ବସ୍ ଭଡ଼ା ବୃଦ୍ଧି କରିବାକୁ ନିଷ୍ପତ୍ତି ନେଇଛନ୍ତି।

ସଂଶୋଧିତ ତାଲିକା ଅନୁଯାୟୀ, ବର୍ତ୍ତମାନ ସାଧାରଣ ବା ଅର୍ଡିନାରୀ ବସ୍ ଭଡ଼ା କିଲୋମିଟର ପିଛା ୯୦ ପଇସା ବଦଳରେ ୯୨ ପଇସା ଆଦାୟ କରାଯିବ। ସେହିପରି ଏକ୍ସପ୍ରେସ୍ ବସ୍ ଗୁଡ଼ିକରେ କିଲୋମିଟର ପିଛା ଭଡ଼ା ୯୪ ପଇସାରୁ ବୃଦ୍ଧି ପାଇ ୯୬ ପଇସା ହୋଇଛି।

ଅନ୍ୟପକ୍ଷରେ ଡିଲକ୍ସ ଏବଂ ଏସି ବସ୍ ଗୁଡ଼ିକର ଭଡ଼ା ମଧ୍ୟ ସମାନୁପାତିକ ଭାବେ ବୃଦ୍ଧି ପାଇଛି। ଡିଲକ୍ସ ବସ୍ ଭଡ଼ା କିଲୋମିଟର ପିଛା ୧.୩୧ ଟଙ୍କାରୁ ବଢ଼ି ୧.୩୫ ଟଙ୍କା ହୋଇଥିବା ବେଳେ, ଏସି ଡିଲକ୍ସ ଭଡ଼ା ୧.୫୯ ଟଙ୍କାରୁ ୧.୬୩ ଟଙ୍କା ଏବଂ ସୁପର୍ ଡିଲକ୍ସ ବସ୍ ଭଡ଼ା ୨.୪୭ ଟଙ୍କାରୁ ବୃଦ୍ଧି ପାଇ ୨.୫୩ ଟଙ୍କାରେ ପହଞ୍ଚିଛି।

ପରିବହନ ଅଧିକାରୀଙ୍କ ସୂଚନା ଅନୁଯାୟୀ, ଇନ୍ଧନ ମୂଲ୍ୟରେ କ୍ରମାଗତ ବୃଦ୍ଧି ଏବଂ ବସ୍ ମାଲିକମାନଙ୍କ ବ୍ୟବସାୟିକ ସ୍ଥିରତାକୁ ଦୃଷ୍ଟିରେ ରଖି ଏହି ସମନ୍ୱୟ ରକ୍ଷା କରାଯାଇଛି। ନିର୍ଦ୍ଦେଶନାମା ପ୍ରକାଶ ପାଇବା କ୍ଷଣି ଏହି ନୂତନ ଭଡ଼ା ତୁରନ୍ତ ଲାଗୁ ହେବ ବୋଲି ବିଭାଗ ପକ୍ଷରୁ ସ୍ପଷ୍ଟ କରାଯାଇଛି।

ଭୁବନେଶ୍ୱର: ପୁଣି ଥରେ ମହଙ୍ଗା ହୋଇଛି ପେଟ୍ରୋଲ ଓ ଡିଜେଲ। ସୋମବାର ତୈଳ ଦରରେ ବୃଦ୍ଧି ଘଟିବା ସହ ଗତ ୧୦ ଦିନ ମଧ୍ୟରେ ଏହା ହେଉଛି ଚତୁର୍ଥ ବୃଦ୍ଧି। ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ବୃଦ୍ଧି ଏବଂ ପଶ୍ଚିମ ଏସିଆରେ ଜାରି ରହିଥିବା ଉତ୍ତେଜନା କାରଣରୁ ତୈଳ କମ୍ପାନୀଗୁଡ଼ିକ ଉପରେ ଏହି ଚାପ ପଡ଼ିଛି। ନୂଆ ରେଟ୍ ଅନୁଯାୟୀ, ଡିଜେଲ ଦର ଲିଟର ପିଛା ୨.୭୧ ଟଙ୍କା ଏବଂ ପେଟ୍ରୋଲ ଦର ଲିଟର ପିଛା ୨.୬୧ ଟଙ୍କା ବୃଦ୍ଧି ପାଇଛି।

ରାଜଧାନୀ ଭୁବନେଶ୍ୱରରେ ସୋମବାର ପେଟ୍ରୋଲ ଓ ଡିଜେଲ ଦରରେ ବିପୁଳ ବୃଦ୍ଧି ଦେଖିବାକୁ ମିଳିଛି। ଡିଜେଲ ଦର ପ୍ରଥମ ଥର ପାଇଁ ଲିଟର ପିଛା ୧୦୦ ଟଙ୍କା ପାର୍ କରିଛି। ଏଠାରେ ଡିଜେଲ ୧୦୦.୮୧ ଟଙ୍କାରେ ବିକ୍ରି ହେଉଥିବା ବେଳେ ପେଟ୍ରୋଲ ଦର ୧୦୯.୧୬ ଟଙ୍କାରେ ପହଞ୍ଚିଛି। ସେହିପରି ଦିଲ୍ଲୀରେ ମଧ୍ୟ ଡିଜେଲ ଲିଟର ପିଛା ୯୫.୨୦ ଟଙ୍କା ଏବଂ ପେଟ୍ରୋଲ ୧୦୨.୧୨ ଟଙ୍କାକୁ ବୃଦ୍ଧି ପାଇଛି।

ଗତ ଦୁଇ ସପ୍ତାହରୁ କମ୍ ସମୟ ମଧ୍ୟରେ ଏହା ହେଉଛି ଚତୁର୍ଥ ଦର ବୃଦ୍ଧି। ଏହା ପୂର୍ବରୁ ମେ' ୧୫ରେ ଉଭୟ ପେଟ୍ରୋଲ ଓ ଡିଜେଲ ଦର ଲିଟର ପିଛା ୩ ଟଙ୍କା ଲେଖାଏଁ ବୃଦ୍ଧି ପାଇଥିଲା। ପରେ ମେ' ୧୯ରେ ୯୦ ପଇସା ଏବଂ ମେ' ୨୩ରେ ପେଟ୍ରୋଲ ଦର ୮୭ ପଇସା ଓ ଡିଜେଲ ଦର ୯୧ ପଇସା ବଢ଼ିଥିଲା। ଅନ୍ୟପକ୍ଷରେ ଦିଲ୍ଲୀରେ ସିଏନଜି (CNG) ଦର ମଧ୍ୟ କେଜି ପିଛା ୧ ଟଙ୍କା ବଢ଼ିଛି, ଯାହା ଫଳରେ ନୂଆ ଦର ୮୧.୦୯ ଟଙ୍କାରେ ପହଞ୍ଚିଛି। ୧୦ ଦିନ ମଧ୍ୟରେ ସିଏନଜି ଦରରେ ମଧ୍ୟ ଏହା ତୃତୀୟ ବୃଦ୍ଧି ଅଟେ।

ଲଗାତାର ଦର ବୃଦ୍ଧିକୁ ନେଇ ଗ୍ରାହକଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି। କିଛି ଲୋକ ଇସ୍ରାଏଲ ଯୁଦ୍ଧକୁ ଏହାର କାରଣ ବୋଲି ମାନୁଥିବା ବେଳେ, ଆଉ କିଛି ଲୋକ ସାଧାରଣ ଜନତାଙ୍କ ଉପରେ ପଡ଼ୁଥିବା ପ୍ରଭାବ କଥା ଉଠାଇ ସରକାରଙ୍କ ହସ୍ତକ୍ଷେପ ଲୋଡ଼ିଛନ୍ତି। ଏସବୁ ମଧ୍ୟରେ ଭାରତ ପେଟ୍ରୋଲିୟମ କର୍ପୋରେସନ ଲିମିଟେଡ୍ (BPCL)ର ପୂର୍ବତନ ମାର୍କେଟିଂ ନିର୍ଦ୍ଦେଶକ ସୁଖମଲ କୁମାର ଜୈନ ସ୍ପଷ୍ଟ କରିଛନ୍ତି ଯେ ଦେଶରେ ପେଟ୍ରୋଲ କିମ୍ବା ଡିଜେଲର କୌଣସି ଅଭାବ ନାହିଁ। ରାଷ୍ଟ୍ରାୟତ୍ତ ତୈଳ ମାର୍କେଟିଂ କମ୍ପାନୀଗୁଡ଼ିକ ଉତ୍ତମ ଭାବେ ଇନ୍ଧନର ଯୋଗାଣ କରୁଛନ୍ତି। ପଶ୍ଚିମ ଏସିଆରେ ବିଶେଷକରି ହରମୁଜ୍ ପ୍ରଣାଳୀ ନିକଟରେ ଦେଖାଦେଇଥିବା ଅସ୍ଥିରତା କାରଣରୁ ଅନ୍ତର୍ଜାତୀୟ ବଜାରରେ ଏହିଭଳି ପରିସ୍ଥିତି ସୃଷ୍ଟି ହୋଇଛି ବୋଲି ସେ ପ୍ରକାଶ କରିଛନ୍ତି।

ସାଧାରଣ ଜନତାଙ୍କ ପାଇଁ ପୁଣି ଏକ ଖରାପ ଖବର । ଲଗାତାର ଭାବେ ବୃଦ୍ଧି ପାଉଥିବା ଅତ୍ୟାବଶ୍ୟକ ସାମଗ୍ରୀର ଦରବୃଦ୍ଧି ମଧ୍ୟରେ ଏବେ ଇନ୍ଧନ ଦର ସାଧାରଣ ଲୋକଙ୍କ ଉପରେ ଏକ ବଡ଼ ପ୍ରହାର କରିଛି । କେବଳ ୪ ଦିନ ମଧ୍ୟରେ ଦେଶରେ ଦ୍ୱିତୀୟ ଥର ପାଇଁ ପେଟ୍ରୋଲ ଏବଂ ଡିଜେଲ ଦର ବୃଦ୍ଧି ପାଇଛି, ଯାହା ଗ୍ରାହକଙ୍କୁ ଚିନ୍ତାରେ ପକାଇଛି ।

କେତେ ବଢ଼ିଲା ତେଲ ଦର?

ଆଜି ଦେଶର ବିଭିନ୍ନ ପ୍ରମୁଖ ସହରରେ ପେଟ୍ରୋଲ ଏବଂ ଡିଜେଲ ମୂଲ୍ୟରେ ଉଲ୍ଲେଖନୀୟ ବୃଦ୍ଧି ଦେଖିବାକୁ ମିଳିଛି । ରିପୋର୍ଟ ଅନୁଯାୟୀ, ପେଟ୍ରୋଲ ଲିଟର ପିଛା ୮୨ ରୁ ୯୬ ପଇସା ମହଙ୍ଗା ହୋଇଥିବାବେଳେ, ଡିଜେଲ ଦର ଲିଟର ପିଛା ୮୬ ରୁ ୯୪ ପଇସା ପର୍ଯ୍ୟନ୍ତ ବୃଦ୍ଧି ପାଇଛି ।

ଅନ୍ତର୍ଜାତୀୟ ବିବାଦର ସିଧାସଳଖ ପ୍ରଭାବ

ବିଶ୍ୱ ବଜାରରେ ଦେଖାଦେଇଥିବା ଅସ୍ଥିରତା ହିଁ ଏହି ଦରବୃଦ୍ଧିର ମୁଖ୍ୟ କାରଣ ପାଲଟିଛି । ମୁଖ୍ୟତଃ ଇରାନ ସହ ଲାଗିରହିଥିବା ଯୁଦ୍ଧ ପରିସ୍ଥିତି ଏବଂ ଆମେରିକା-ଇସ୍ରାଏଲ ବିବାଦ ଯୋଗୁଁ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ମୂଲ୍ୟ ଉପରେ ବ୍ୟାପକ ପ୍ରଭାବ ପଡ଼ିଛି । ଏହାର ସିଧାସଳଖ ପ୍ରଭାବ ଏବେ ଭାରତର ସାଧାରଣ ନାଗରିକଙ୍କ ପକେଟ ଉପରେ ପଡ଼ୁଛି ।

ସିଏନଜି (CNG) ମଧ୍ୟ ବାଦ୍ ପଡ଼ିନାହିଁ

ପେଟ୍ରୋଲ ଏବଂ ଡିଜେଲ ପରେ ଏବେ ସିଏନଜି (CNG) ମଧ୍ୟ ମହଙ୍ଗା ହୋଇଛି । ସିଏନଜି କିଲୋ ପିଛା ଏକାଥରକେ ୨ ଟଙ୍କା ବଢ଼ିଯାଇଛି । ଏହି ତେଲ ସଂକଟ ଓ ଦରବୃଦ୍ଧି ଯୋଗୁଁ ଗ୍ରାହକମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ପେଟ୍ରୋଲ ପମ୍ପଗୁଡ଼ିକରେ ଲୋକଙ୍କ ଲମ୍ବା ଧାଡ଼ି ଦେଖିବାକୁ ମିଳିଥିବା ବେଳେ ଏହି ମହଙ୍ଗା ମାଡ଼ ଯାନବାହାନ ଚାଳକ ଏବଂ ପରିବହନ ବ୍ୟବସ୍ଥାକୁ ବିଶେଷ ଭାବରେ ପ୍ରଭାବିତ କରିଛି ।

ଗତ ପାଞ୍ଚ ଦିନ ମଧ୍ୟରେ ଦେଶରେ ଲଗାତାର ଦ୍ୱିତୀୟ ଥର ପାଇଁ ତୈଳ ଦର ବୃଦ୍ଧି ହୋଇଛି। ମଙ୍ଗଳବାର, ୧୯ ମେ ୨୦୨୬ ରେ ପେଟ୍ରୋଲ ଏବଂ ଡିଜେଲ ଦର ଲିଟର ପିଛା ୯୦ ପଇସା ବୃଦ୍ଧି କରାଯାଇଛି। ଲଗାତାର ଏହି ଦର ବୃଦ୍ଧି ପରେ ଖାଉଟିମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିବା ବେଳେ ତୈଳ କମ୍ପାନୀଗୁଡ଼ିକ ଏହି ପ୍ରସଙ୍ଗରେ ସ୍ପଷ୍ଟୀକରଣ ଦେଇଛନ୍ତି। ଇଣ୍ଡିଆନ ଅଏଲ କର୍ପୋରେସନ (IOCL) ର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ଖାଉଟିଙ୍କ ଉପରେ ଏକାଥରକେ ବୋଝ ନ ପକାଇବା ପାଇଁ ଧୀରେ ଧୀରେ ଦର ବୃଦ୍ଧି କରାଯାଉଛି।

ନୂଆ ପେଟ୍ରୋଲ ଏବଂ ଡିଜେଲ ଦର

ଦ୍ୱିତୀୟ ଥର ଦର ବୃଦ୍ଧି ପରେ ଜାତୀୟ ରାଜଧାନୀ ଦିଲ୍ଲୀରେ ପେଟ୍ରୋଲ ଲିଟର ପିଛା ୯୮.୬୪ ଟଙ୍କା ଏବଂ ଡିଜେଲ ୯୧.୫୮ ଟଙ୍କାରେ ପହଞ୍ଚିଛି। ସେହିପରି ଦେଶର ଆର୍ଥିକ ରାଜଧାନୀ ମୁମ୍ବାଇରେ ପେଟ୍ରୋଲ ଦର ୧୦୭.୫୯ ଟଙ୍କା ଏବଂ ଡିଜେଲ ଦର ୯୪.୦୮ ଟଙ୍କା ଛୁଇଁଛି। ଦୈନନ୍ଦିନ ଖର୍ଚ୍ଚ ଏବଂ ମୁଦ୍ରାସ୍ଫୀତି ବୃଦ୍ଧି ଆଶଙ୍କାକୁ ଦୃଷ୍ଟିରେ ରଖି ତୈଳ କମ୍ପାନୀଗୁଡ଼ିକ ପ୍ରତିଦିନ ସାମାନ୍ୟ ପରିମାଣରେ ଦର ବଢ଼ାଉଥିବା ସୂଚନା ଦେଇଛନ୍ତି।

କାହିଁକି ବଢ଼ୁଛି ତୈଳ ଦର?

IOCL ଅଧିକାରୀ ସ୍ପଷ୍ଟ କରିଛନ୍ତି ଯେ ଆନ୍ତର୍ଜାତୀୟ ବଜାର ସ୍ଥିତି କାରଣରୁ ପେଟ୍ରୋଲ-ଡିଜେଲ ଦର ବଢ଼ାଇବାକୁ ନିଷ୍ପତ୍ତି ନିଆଯାଇଛି। ବିଶେଷକରି ମଧ୍ୟପ୍ରାଚ୍ୟରେ ଯୁଦ୍ଧ ଏବଂ ହରମୁଜ୍ ପ୍ରଣାଳୀ ବନ୍ଦ ହେବା କାରଣରୁ ବିଶ୍ୱ ବଜାରରେ ଅଶୋଧିତ ତୈଳ ଦର ଲଗାତାର ଭାବେ ବୃଦ୍ଧି ପାଉଛି। ତେବେ ଗ୍ରୀଷ୍ମ ଋତୁରେ ତୈଳ ଚାହିଦା ଅଧିକ ରହୁଥିବାରୁ ଏହି ଦର ବୃଦ୍ଧି ଯୋଗୁଁ ତୈଳ ବ୍ୟବହାର କମିବାର କୌଣସି ସମ୍ଭାବନା ନାହିଁ ବୋଲି ଅଧିକାରୀ ଆକଳନ କରିଛନ୍ତି।

୨୦୨୨ ଭଳି ପୁଣି ବଢ଼ିବ କି ଦର?

ଗ୍ରାହକମାନଙ୍କ ମନରେ ଏବେ ପ୍ରଶ୍ନ ଉଠୁଛି ଯେ କଣ ୨୦୨୨ ମସିହା ଭଳି ପୁଣିଥରେ ତୈଳ ଦର ଆକାଶଛୁଆଁ ହେବ? ସୂଚନାଯୋଗ୍ୟ ଯେ, ରୁଷ-ୟୁକ୍ରେନ ଯୁଦ୍ଧ ସମୟରେ ମାର୍ଚ୍ଚ-ଏପ୍ରିଲ ୨୦୨୨ ରେ ତୈଳ କମ୍ପାନୀଗୁଡ଼ିକ ୧୫ ଦିନ ମଧ୍ୟରେ ଲଗାତାର ୧୩ ଥର ଦର ବଢ଼ାଇଥିଲେ, ଯାହାଫଳରେ ତୈଳ ଦର ପ୍ରାୟ ୧୦ ଟଙ୍କା ବୃଦ୍ଧି ପାଇଥିଲା। ଏହି ପ୍ରଶ୍ନର ଉତ୍ତରରେ ଅଧିକାରୀ କହିଛନ୍ତି ଯେ ବର୍ତ୍ତମାନ ସୁଦ୍ଧା ସମୁଦାୟ କେତେ ଟଙ୍କା ବୃଦ୍ଧି କରାଯିବ ସେ ନେଇ କୌଣସି ଲକ୍ଷ୍ୟଧାର୍ଯ୍ୟ କରାଯାଇନାହିଁ। ଖାଉଟିମାନଙ୍କୁ ସମ୍ଭାବ୍ୟ ମୂଲ୍ୟ ବୃଦ୍ଧିରୁ ରକ୍ଷା କରିବା ପାଇଁ କମ୍ପାନୀ ସମ୍ପୂର୍ଣ୍ଣ ପ୍ରୟାସ କରୁଥିବା ସେ ପ୍ରକାଶ କରିଛନ୍ତି।

ନୂଆଦିଲ୍ଲୀ: ମଧ୍ୟପ୍ରାଚ୍ୟ ଯୁଦ୍ଧରେ ଭାରତକୁ ଖୁବ୍ ଶୀଘ୍ର ବଡ଼ ଝଟକା ଲାଗିବାକୁ ଯାଉଛି। କାରଣ ଘରୋଇ ବଜାରରେ ମହଙ୍ଗା ହେବାକୁ ଯାଉଛି ପେଟ୍ରୋଲ ଏବଂ ଡିଜେଲ। ପେଟ୍ରୋଲ ଓ ଡିଜେଲ ମୂଲ୍ୟରେ ଏକାଥରକେ ବଡ଼ ଧରଣର ବୃଦ୍ଧି ଖାଉଟିଙ୍କ ସ୍ଥିତି ଦୋହଲାଇ ଦେବାକୁ ଯାଉଛି। ଏଥିରେ ପେଟ୍ରୋଲ ଲିଟର ପିଛା ୧୮ ଟଙ୍କା ଏବଂ ଡିଜେଲ ୩୫ ଟଙ୍କା ମହଙ୍ଗା ହୋଇପାରେ । ପଶ୍ଚିମବଙ୍ଗ ଓ ତାମିଲନାଡୁରେ ନିର୍ବାଚନ ଶେଷ ହେବା ପରେ ପେଟ୍ରୋଲ-ଡିଜେଲ ମୂଲ୍ୟରେ ଏଭଳି ବୃଦ୍ଧି ଘଟାଇବାକୁ ଯାଉଛନ୍ତି କେନ୍ଦ୍ର ସରକାର ।  

ଆମେରିକା ଏବଂ ଇରାନ୍ ମଧ୍ୟରେ ଚାଲିଥିବା ଯୁଦ୍ଧର ପ୍ରଭାବ ଏବେ ଭାରତୀୟ ତୈଳ ବିପଣନକାରୀ କମ୍ପାନୀଗୁଡ଼ିକ ଉପରେ ପଡିବାରେ ଲାଗିଛି।  ବିଶ୍ବ ବଜାରରେ ଅଶୋଧିତ ତୈଳ ମୂଲ୍ୟରେ ବୃଦ୍ଧି ଯୋଗୁ ତୈଳ କମ୍ପାନୀଗୁଡ଼ିକ ପ୍ରତି ଲିଟର ପେଟ୍ରୋଲରେ ପ୍ରାୟ ୧୮ ଏବଂ ଡିଜେଲରେ ୩୫ ଟଙ୍କା କ୍ଷତି ସହୁଛନ୍ତି। ଗତ ମାସରେ ତିନି କମ୍ପାନୀ ତେଲ ବିକ୍ରିରେ ପ୍ରାୟ ୨୪୦୦ କୋଟି ଟଙ୍କା କ୍ଷତି ସହିଛନ୍ତି। ସରକାରଙ୍କ ଦ୍ବାରା ଉତ୍ପାଦ ଶୁଳ୍କରେ  ୧୦ ଟଙ୍କା ଛାଡ଼ ପରେ ଏହି କ୍ଷତି ୧୬୦୦ କୋଟି ଟଙ୍କାକୁ ହ୍ରାସ ହୋଇଛି। ଅପରପକ୍ଷେ ଅଶୋଧିତ ତୈଳ ମୂଲ୍ୟରେ ବ୍ୟାରେଲ ପ୍ରତି ୧୦ ଡଲାର ବୃଦ୍ଧି ଘଟିେଲ ପେଟ୍ରୋଲ ଲିଟରରେ ପ୍ରାୟ ୬ ଟଙ୍କାର ଅତିରିକ୍ତ ଚାପ ପଡ଼ୁଛି । ତୈଳ କମ୍ପାନୀଗୁଡ଼ିକ ସମ୍ମୁଖୀନ ହେଉଥିବା ଆର୍ଥିକ କ୍ଷତି ଭରଣା କରିବା ପାଇଁ କେନ୍ଦ୍ର ସରକାର ବିଧାନସଭା ନିର୍ବାଚନ ପରେ ପେଟ୍ରୋଲ ଏବଂ ଡିଜେଲ ମୂଲ୍ୟ ବୃଦ୍ଧି କରିପାରନ୍ତି । ମ୍ୟାକ୍ୱାରି ଗ୍ରୁପର ଏକ ରିପୋର୍ଟ ଅନୁଯାୟୀ, ଏପ୍ରିଲ ପରେ ପେଟ୍ରୋଲ ବୃଦ୍ଧି ସୁନିଶ୍ଚିତ । ଏହାକୁ କେହି ଅଟକାଇପାରିବେ ନାହିଁ । 

ନୂଆଦିଲ୍ଲୀ: ବଢ଼ିବ ପେଟ୍ରୋଲ ଓ ଡିଜେଲ ଦର। ପେଟ୍ରୋଲ ଓ ଡିଜେଲ ଉପରେ ଉତ୍ପାଦ ଶୁଳ୍କ ( ଏକ୍ସାଇଜ୍ ଡ୍ୟୁଟି )  ବୃଦ୍ଧି କରିଛନ୍ତି କେନ୍ଦ୍ର ସରକାର। ୨ ଟଙ୍କା ଉତ୍ପାଦ ଶୁଳ୍କ ବୃଦ୍ଧି ନେଇ ସୂଚନା । ନୂତନ ଦାମ ଆଜି ରାତି ୧୨ଟାରୁ ଲାଗୁ ହେବ। ଏପର୍ଯ୍ୟନ୍ତ ସରକାର ପେଟ୍ରୋଲ୍ ଉପରେ ୧୯ ଟଙ୍କା ୯୦ ପଇସା ପ୍ରତି ଲିଟର୍ ଓ ଡିଜେଲ୍ ଉପରେ ୧୫ ଟଙ୍କା ୮୦ ପଇସା ପ୍ରତି ଲିଟର୍ ଏକ୍ସାଇଜ୍ ଡ୍ୟୁଟି ଆଦାୟ କରୁଥିଲେ। ଏହି ବୃଦ୍ଧି ପରେ ପେଟ୍ରୋଲ୍ ଉପରେ ୨୧ ଟଙ୍କା ୯୦ ପଇସା ଏବଂ ଡିଜେଲ୍ ଉପରେ ୧୭ ଟଙ୍କା ୮୦ ପଇସା  ଏକ୍ସାଇଜ୍ ଡ୍ୟୁଟି ହେବ।

ଭାରତରେ କିପରି ନିର୍ଦ୍ଧାରିତ ହୁଏ ପେଟ୍ରୋଲ୍-ଡିଜେଲ୍ ଦାମ ?

ଜୁନ୍ ୨୦୧୦ ପର୍ଯ୍ୟନ୍ତ ସରକାର ପେଟ୍ରୋଲ୍ ଦାମ ନିର୍ଦ୍ଧାରଣ କରୁଥିଲେ ଏବଂ ପ୍ରତି ୧୫ ଦିନରେ ଏହାକୁ ପରିବର୍ତ୍ତନ କରାଯାଉଥିଲା। ୨୬ ଜୁନ୍ ୨୦୧୦ ପରେ ସରକାର ପେଟ୍ରୋଲ୍ ଦାମ ନିର୍ଦ୍ଧାରଣର ଦାୟିତ୍ୱ ତୈଳ କମ୍ପାନୀମାନଙ୍କୁ ଛାଡ଼ିଦେଲେ। ଏହିପରି ଅକ୍ଟୋବର ୨୦୧୪ ପର୍ଯ୍ୟନ୍ତ ଡିଜେଲ୍ ଦାମ ସରକାର ନିର୍ଦ୍ଧାରଣ କରୁଥିଲେ। ୧୯ ଅକ୍ଟୋବର ୨୦୧୪ ରୁ ଏହି କାମ ମଧ୍ୟ ତୈଳ କମ୍ପାନୀମାନଙ୍କୁ ଦିଆଯାଇଛି। ବର୍ତ୍ତମାନ ତୈଳ କମ୍ପାନୀମାନେ ଆନ୍ତର୍ଜାତୀୟ ବଜାରରେ କ୍ରୁଡ ଅଏଲ, ଏକ୍ସଚେଞ୍ଜ୍ ରେଟ୍,  ଟ୍ୟାକ୍ସ , ପେଟ୍ରୋଲ୍-ଡିଜେଲ୍ ପରିବହନ ଖର୍ଚ୍ଚ ଓ ଅନ୍ୟାନ୍ୟ କିଛି ଦିଗକୁ ଧ୍ୟାନ ଦେଇ ପ୍ରତିଦିନ ପେଟ୍ରୋଲ୍-ଡିଜେଲ୍ ଦାମ ନିର୍ଦ୍ଧାରଣ କରନ୍ତି।

ନୂଆଦିଲ୍ଲୀ: ପେଟ୍ରୋଲ ଓ ଡିଜେଲ ଦାମ୍‌ କମିଲା । ସାରା ଦେଶରେ ଲିଟର ପିଛା ୨ ଟଙ୍କା କମିଥିବା ନେଇ ସୂଚନା । ନୂଆ ଦର ଆସନ୍ତାକାଲି ସକାଳ ୬ଟାରୁ ଲାଗୁ ହେବ । ଏ ନେଇ ସାମାଜିକ ଗଣମାଧ୍ୟମ  ‘ଏକ୍ସ’ରେ ସୂଚନା ଦେଇଛନ୍ତି କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ହରଦୀପ ସିଂହ ପୁରୀ ।

ନୂଆଦିଲ୍ଲୀ: ଅନ୍ତର୍ଜାତୀୟ ତୈଳ ବଜାରରେ ଅଶୋଧିତ ତୈଳ ଦର କ୍ରମାଗତ ଭାବେ ହ୍ରାସ ପାଇବାରେ ଲାଗିଛି। ଏକ ହିସାବ ଅନୁଯାୟୀ ମାତ୍ର ସପ୍ତାହକ ମଧ୍ୟରେ ବଜାରେରେ ଅଶୋଧିତ ତୈଳ ଦର ଅନୁନ୍ୟ ୭ ପ୍ରତିଶତ ହ୍ରାସ ଘଟିଲାଣି। ହେଲେ ତୈଳ କମ୍ପାନୀମାନେ ଏ ପର୍ଯ୍ୟନ୍ତ ପେଟ୍ରୋଲ ମୂଲ୍ୟ ସଂଶୋଧନ କରୁନାହାନ୍ତି। ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ହ୍ରାସ ଯୋଗୁ ତୈଳ କମ୍ପାନୀମାନେ ଚଳିତମାସ ୧୮ରୁ ୨୦ ମଧ୍ୟରେ କେବଳ ଡିଜେଲ ମୂଲ୍ୟରେ ସାମାନ୍ୟ ସୁଧାର ଘୋଷଣା କରିଥିଲେ। ଫଳରେ ଡିଜେଲ ପ୍ରତି ଲିଟର ପିଛା ୬୦ ପଇସା ପର୍ଯ୍ୟନ୍ତ ହ୍ରାସ ଘଟିଛି।

ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ଢ଼େର ହ୍ରାସ ଘଟିଛି। ବ୍ରେଣ୍ଟ କ୍ରୁଡ ଦର ଏବେ ୪ ମାସର ସର୍ବନିମ୍ନ ସ୍ତରରେ କାରବାର ହେଉଛି। କେବଳ ଚଳିତ ସପ୍ତାହରେ ବ୍ରେଣ୍ଟ କ୍ରୁଡ୍‌ ମୂଲ୍ୟରେ ୭ ପ୍ରତିଶତ ପର୍ଯ୍ୟନ୍ତ ହ୍ରାସ ଘଟିଛି। ଶୁକ୍ରବାର କାରବାର ବନ୍ଦ ହେବା ବେଳକୁ ବ୍ରେଣ୍ଟ କ୍ରୁଡ ପ୍ରତି ବ୍ୟାରେଲ ପିଛା ୧.୩୭ ଡଲାର  ହ୍ରାସ ଘଟି ବ୍ୟାରେଲ ପିଛା ୬୫.୧୮ ଡଲାରରେ ବିକ୍ରି ହୋଇଛି। ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ହ୍ରାସ ଭାରତୀୟ ତୈଳ କମ୍ପାନୀଙ୍କ ଭଲ ଖବର ହୋଇପାରେ କିନ୍ତୁ ଖାଉଟିଙ୍କ ପାଇଁ ନୁହେଁ। କାରଣ ଅଗଷ୍ଟ ୧୮ ଓ ୨୦ ତାରିଖରେ ହୋଇଥିବା ମୂଲ୍ୟ ସଂଶୋଧନରେ ତୈଳ କମ୍ପାନୀଗୁଡିକ କେବଳ ଡିଜେଲ ଦର ସଂଶୋଧନ କରିଥିଲେ। ଏଥିରେ ଲିଟର ପିଛା ପ୍ରାୟ ୬୦ ପଇସା ହ୍ରାସ କରିଛନ୍ତି। ହେଲେ କମ୍ପାନୀଗୁଡିକ ଏ ପର୍ଯ୍ୟନ୍ତ ପେଟ୍ରୋଲ ଦର ଅପରିବର୍ତ୍ତିତ ରଖିଛନ୍ତି। ରାଜଧାନୀ ନୂଆଦିଲ୍ଲୀରେ ଶନିବାର ଡିଜେଲ ପ୍ରତି ଲିଟର ୮୯ଟଙ୍କା ୨୭ ପଇସା ଦରରେ ବିକ୍ରି ହୋଇଥିବାବେଳେ ପୂର୍ବ ପରି ପେଟ୍ରୋଲ ଲିଟର ପିଛା ୧୦୧ ଟଙ୍କା ୮୪ ପଇସା ମୂଲ୍ୟରେ ବିକ୍ରି ହେଉଛି। ନୂଆଦିଲ୍ଲୀ ଭଳି ଆଜି ମୁମ୍ବାଇରେ ମଧ୍ୟ ପେଟ୍ରୋଲ ଲିଟର ପିଛା ୧୦୭ଟଙ୍କା ୮୩ ପଇସା ଦରରେ ବିକ୍ରି ହେଉଥିବାବେଳେ ଡିଜେଲ ୯୬ ଟଙ୍କା ୮୪ ପଇସା ଦରରେ ବିକ୍ରି ହେଉଛି। ସେହିପରି କଲକାତାରେ ପେଟ୍ରୋଲ ଲିଟର ପିଛା ୧୦୨ ଟଙ୍କା ୮ ପଇସା ମୂଲ୍ୟରେ ବିକ୍ରି ହେଉଥିବାବେଳେ ଡିଜେଲ ୯୨ଟଙ୍କା ୩୨ ପଇସା ଦରରେ ବିକ୍ରି ହେଉଛି।  ନିକଟରେ ତାମିଲନାଡୁ ସରକାର ପେଟ୍ରୋଲ ଲିଟର ପିଛା ୩ ଟଙ୍କା ହ୍ରାସ କରିଥିଲେ। ଏଣୁ ଚେନ୍ନାଇରେ ପେଟ୍ରୋଲ ପ୍ରତି ଲିଟର ୯୯ଟଙ୍କା ୪୭ ପଇସା ଓ ଡିଜେଲ ୯୩ ଟଙ୍କା ୮୪ ପଇସା ଦରରେ ବିକ୍ରି ହେଉଛି।

ନୂଆଦିଲ୍ଲୀ : ପୁଣି ବଢ଼ିଲା ପେଟ୍ରୋଲ ଓ ଡିଜେଲ୍ ଦର । ଆଜି ପେଟ୍ରୋଲ ଲିଟର ପିଛା ୩୫ ପଇସା ବୃଦ୍ଧି ପାଇଥିବା ବେଳେ ଡିଜେଲ୍ ଲିଟର ପିଛା ୯ ପଇସା ମହଙ୍ଗା ହୋଇଛି । ଭୁବନେଶ୍ୱରରେ ପେଟ୍ରୋଲ ଲିଟର ପିଛା ୧୦୧ ଟଙ୍କା ୩୭ ପଇସା ଥିବା ବେଳେ ଡିଜେଲ୍ ଲିଟର ପିଛା ୯୭ ଟଙ୍କା ୬୭ ପଇସା ରହିଛି । ଦିଲ୍ଲୀରେ ପେଟ୍ରୋଲ ଲିଟର ପିଛା ୧୦୦ ଟଙ୍କା ୫୬ ପଇସା ରହିଥିବା ବେଳେ ଡିଜେଲ ଦର ୮୯ ଟଙ୍କା ୬୨ ପଇସା ରହିଛି । କୋଲକାତାରେ ପେଟ୍ରୋଲ୍ ଲିଟର ପିଛା ଦର ରହିଛି ୧୦୦ ଟଙ୍କା ୬୨ ପଇସା । ଚେନ୍ନାଇ ଓ ମୁମ୍ବାଇରେ ପୂର୍ବରୁ ପେଟ୍ରୋଲ୍ ଦର ସେଞ୍ଚୁରୀ ମାରି ସାରିଛି । ମୁମ୍ବାଇରେ ମେ ୨୯କୁ ପେଟ୍ରୋଲ ଲିଟର ପିଛା ଶହେ ଟଙ୍କା ପାର୍ କରିଥିବା ବେଳେ ଏବେ ଲିଟର ପିଛା ୧୦୬ ଟଙ୍କା ୫୯ ପଇସାରେ ବିକ୍ରି ହେଉଛି । ଦେଶର ସମସ୍ତ ବଡ଼ ସହରରେ ପେଟ୍ରୋଲ୍ ଦର ଶହେ ପାର୍ କରିଛି ।

ନୂଆଦିଲ୍ଲୀ : ଦେଶରେ ବଢ଼ିବାରେ ଲାଗିଛି ତେଲ ଦର। ପ୍ରତ୍ୟେକ ଅଳ୍ପ ଦିନର ବ୍ୟବଧାନରେ ବ୍ରେକ୍‌ ଲାଗି ପୁଣି ବଢ଼ୁଛି ପେଟ୍ରୋଲ ଏବଂ ଡିଜେଲ ମୂଲ୍ୟ। ଦର ବୃଦ୍ଧି ଯୋଗୁ ଖାଉଟି ଅତିଷ୍ଠ। ଦିନକୁ ଦିନ ଲଗାମ୍‌ହୀନ ହୋଇପଡିଥିବା ତେଲ ଦର ଏବେ ସରକାରଙ୍କ ନିୟନ୍ତ୍ରଣ ବାହାରକୁ ଚାଲିଯାଇଛି। ଯାହାଫଳରେ ଦର ଏବେ ଶହେ ଛୁଇଁବାକୁ ବସିଛି। ତେବେ ଉଭୟ ପେଟ୍ରୋଲ ଏବଂ ଡିଜେଲକୁ ଦ୍ରବ୍ୟ ଏବଂ ସେବା ଟିକସ(ଜିଏସ୍‌ଟି) ପରିସରଭୁକ୍ତ କରାଯିବା ଜରୁରୀ। ଏହାହେଲେ ତେଲ ଦରରେ ବହୁ ମାତ୍ରାରେ ହ୍ରାସ ଘଟିବ। ଏ ସମ୍ପର୍କରେ ଏସ୍‌ବିଆଇର ଅର୍ଥନୀତିଜ୍ଞ ମତ ହେଉଛି, ପେଟ୍ରୋଲ ଏବଂ ଡିଜେଲକୁ ଜିଏସ୍‌ଟି ପରିସରଭୁକ୍ତ କରାଗଲେ ପେଟ୍ରୋଲ ଲିଟର ପିଛା ୭୫ ଟଙ୍କା ଏବଂ ଡିଜେଲ ୬୮ ଟଙ୍କାକୁ ହ୍ରାସ ଘଟିବ।

ଭାରତରେ ପେଟ୍ରୋଲ ଏବଂ ଡିଜେଲ ଦର ସମ୍ପ୍ରତି ବିଶ୍ବରେ ସର୍ବାଧିକ ରହିଛି। ଏହି ଦୁଇ ଉତ୍ପାଦକୁ ଜିଏସ୍‌ଟି ପରିସରଭୁକ୍ତ କରାଗଲେ ଦର ଅନେକାଂଶରେ ହ୍ରାସ ଘଟିବ। ଏକ ହିସାବ ଅନୁଯାୟୀ,ଯଦି ଡିଜେଲ ମୂଲ୍ୟ ଲିଟର ପିଛା ୬୮ ଟଙ୍କା ସ୍ତରକୁ ହ୍ରାସ କରାଯାଏ ତେବେ ଉଭୟ କେନ୍ଦ୍ର ଏବଂ ରାଜ୍ୟ ରାଜସ୍ବ ବାବଦରେ ୧ ଲକ୍ଷ କୋଟି ହରାଇବେ ଯାହା ଦେଶର ମୋଟ ଘରୋଇ ଉତ୍ପାଦ(ଜିଡିପି)ର ୦.୪% ହେବ। ଏଥିରେ ଅଶୋଧିତ ତୈଳ ଦର ବ୍ୟାରେଲ ପିଛା ୬୦ ଡଲାର ଏବଂ ଆମେରିକୀୟ ଡଲାର ତୁଳନାରେ ଭାରତୀୟ ମୁଦ୍ରାର ବିନିୟମ ମୂଲ୍ୟ ୭୩ ଟଙ୍କା ଧରାଯାଇଛି। ସମ୍ପ୍ରତି ଦେଶର ଅନେକ ଭାଗରେ ପେଟ୍ରୋଲ ଦର ଲିଟର ପିଛା ୧୦୦ ଟଙ୍କା ଛୁଇଁଥିବାବେଳେ ତେଲ ଉପରେ ଲାଗୁ କରାଯାଇଥିବା ଅତ୍ୟଧିକ ଟିକସ ଯୋଗୁ ବଜାରରେ ତେଲ ଅଧିକ ମହଙ୍ଗା ହୋଇଛି।

କେନ୍ଦ୍ର ସରକାରେ ଯେେତବେଳେ ଜିଏସ୍‌ଟି ବ୍ୟବସ୍ଥାର ରୂପରେଖ ପ୍ରସ୍ତୁତ କରିଥିଲେ ସେତେବେଳେ ପେଟ୍ରୋଲ ଏବଂ ଡିଜେଲକୁ ଜିଏସ୍‌ଟି ବାହାରେ ରଖିବା ଏକ ଅସମାପ୍ତ ଏଜେଣ୍ଡା ବୋଲି ଏସ୍‌ବିଆଇ ଅର୍ଥନୀତିଜ୍ଞ କହିଛନ୍ତି। ବିକ୍ରି ଟିକସ/ଜିଏସ୍‌ଟି ଉଭୟ କେନ୍ଦ୍ର ଏବଂ ରାଜ୍ୟ ପାଇଁ ଏକ ନିଜସ୍ବ ଟିକସ ଉତ୍ସ ହୋଇଥିବା ଦୃଷ୍ଟିରୁ କେହି ଏହି ଦୁଇ ଉତ୍ପାଦକୁ ଜିଏସ୍‌ଟି ପରିସରଭୁକ୍ତ କରିବାକୁ ଚାହୁଁନାହାନ୍ତି। ତେବେ ଏ କ୍ଷେତ୍ରରେ ଏକ ରାଜନୈତିକ ଇଚ୍ଛାଶକ୍ତିର ଅଭାବ ରହିଥିବା ଜଣାଯାଇଛି। ପେଟ୍ରୋଲ ଉପଯୋଗିତାରେ ୧୫% ବଢ଼ିଥିବାବେଳେ ଡିଜେଲରେ ୧୦% ବଢ଼ିଛି।

ଅଶୋଧିତ ତୈଳ ମୂଲ୍ୟରେ ୧ ଡଲାର ବୃଦ୍ଧି ଘଟିବା ପେଟ୍ରୋଲ ମୂଲ୍ୟରେ ୫୦ ପଇସା ଏବଂ ଡିଜେଲରେ ପାଖପାଖି ୧ ଟଙ୍କା ୫୦ ପଇସା ବୃଦ୍ଧି କରିଥାଏ। ପେଟ୍ରୋଲ ଏବଂ ଡିଜେଲ ଜିଏସ୍‌ଟି ପରିସରଭୁକ୍ତ ହେବା ଦ୍ବାରା ସର୍ବାଧିକ ଟିକସ ଅଂଶ ପାଉଥିବା ରାଜ୍ୟ ଅଧିକ କ୍ଷତିଗ୍ରସ୍ଥ ହେବ ବୋଲି ଏସ୍‌ବିଆଇର ଅର୍ଥନୀତିଜ୍ଞ ମତ ଦେଇଛନ୍ତି।