ମହାରାଷ୍ଟ୍ରର ନାଗପୁରରୁ ଏକ ହୃଦୟବିଦାରକ ଘଟଣା ସାମ୍ନାକୁ ଆସିଛି। ଏଠାରେ ସୋସିଆଲ ମିଡିଆରେ ବ୍ୟାପୁଥିବା ଏକ ମିଥ୍ୟା ଗୁଜବ ଯୋଗୁଁ ଜଣେ ନିରୀହ ୬୦ ବର୍ଷୀୟା ବୃଦ୍ଧାଙ୍କୁ ଉତ୍ତ୍ୟକ୍ତ ଲୋକେ 'ପିଲାଚୋର' ସନ୍ଦେହରେ ନିର୍ମମ ଭାବେ ପିଟିଛନ୍ତି। ତେବେ ପୋଲିସର ତ୍ୱରିତ ପଦକ୍ଷେପ ଯୋଗୁଁ ବୃଦ୍ଧାଙ୍କ ଜୀବନ ବଞ୍ଚିଯାଇଛି।

ଗୁଜବ କିପରି ଆରମ୍ଭ ହେଲା?

ସୂଚନା ଅନୁଯାୟୀ, ଶୁକ୍ରବାର ସକାଳ ପ୍ରାୟ ୧୦ଟା ସମୟରେ ହିଙ୍ଗଣା ଥାନା ଅନ୍ତର୍ଗତ ରାୟପୁର ଅଞ୍ଚଳରେ ଏହି ଘଟଣା ଘଟିଛି। ଇସାସନି ଅଞ୍ଚଳର ଏହି ବୃଦ୍ଧା ଜଣକ ୱାନାଡୋଙ୍ଗରୀ ସ୍ଥିତ ଶାଳିନୀତାଇ ମେଘେ ଡାକ୍ତରଖାନାକୁ ଔଷଧ ଆଣିବାକୁ ଯାଇଥିଲେ। ଫେରିବା ବାଟରେ ସେ ରାସ୍ତା ଭୁଲି ରାୟପୁର ଅଞ୍ଚଳରେ ପହଞ୍ଚିଯାଇଥିଲେ। ଥକିପଡ଼ିଥିବା ବୃଦ୍ଧା ଜଣକ ରାସ୍ତାରେ ଯାଉଥିବା ଏକ ୪ ବର୍ଷର ଛୋଟ ଝିଅକୁ ପାଣି ମାଗିଥିଲେ ବା କଥା ହେବାକୁ ଚେଷ୍ଟା କରିଥିଲେ। କିନ୍ତୁ ବୃଦ୍ଧାଙ୍କ ପାଖରେ ଥିବା ଏକ ବଡ଼ ପ୍ଲାଷ୍ଟିକ ବ୍ୟାଗ୍ ଦେଖି ଝିଅଟିର ମା' ଓ ସ୍ଥାନୀୟ ମହିଳାମାନେ ସନ୍ଦେହ କରିଥିଲେ। ହଠାତ୍ ଜଣେ ମହିଳା ପାଟି କରି କହିଥିଲେ ଯେ ବୃଦ୍ଧା ଜଣକ ଝିଅଟିକୁ ବ୍ୟାଗରେ ଭର୍ତ୍ତି କରି ଅପହରଣ କରିବାକୁ ଚେଷ୍ଟା କରୁଛନ୍ତି।

ଉତ୍ତ୍ୟକ୍ତ ଲୋକଙ୍କ ଆକ୍ରମଣ ଓ ଭାଇରାଲ ଭିଡିଓ

ଏହି ଅଭିଯୋଗ ଶୁଣିବା ମାତ୍ରେ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଥିଲା। ବିନା କୌଣସି ସତ୍ୟାସତ୍ୟ ଯାଞ୍ଚ କରି କିଛି ମହିଳା ଓ ସ୍ଥାନୀୟ ଲୋକେ ବୃଦ୍ଧାଙ୍କୁ ଘେରିଯାଇ ଅମାନୁଷିକ ଭାବେ ମାଡ଼ ମାରିଥିଲେ। ନିଜକୁ ରକ୍ଷା କରିବାକୁ ଅସମର୍ଥ ଥିବା ବୃଦ୍ଧା ଜଣକ ତଳେ ପଡ଼ିଯାଇଥିଲେ। ଏହି ସମୟରେ କିଛି ବ୍ୟକ୍ତି ଘଟଣାର ଭିଡିଓ ରେକର୍ଡ କରି ଏହାକୁ 'ପିଲାଚୋର' ମାମଲା ବୋଲି ଦର୍ଶାଇ ସୋସିଆଲ ମିଡିଆରେ ଭାଇରାଲ କରିଦେଇଥିଲେ।

ପୋଲିସର ହସ୍ତକ୍ଷେପ ଓ ସାମ୍ନାକୁ ଆସିଲା ସତ୍ୟ

ଖବର ପାଇବା ମାତ୍ରେ ହିଙ୍ଗଣା ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ବୃଦ୍ଧାଙ୍କୁ ଉତ୍ତ୍ୟକ୍ତ ଲୋକଙ୍କ କବଳରୁ ଉଦ୍ଧାର କରି ସୁରକ୍ଷିତ ଭାବେ ଥାନାକୁ ନେଇଥିଲା। ପୋଲିସ ବୃଦ୍ଧାଙ୍କ ପରିବାର ଲୋକଙ୍କୁ ଖବର ଦେବା ପରେ ତାଙ୍କର ୩ ପୁଅ ଏବଂ ବୋହୂ ଥାନାରେ ପହଞ୍ଚିଥିଲେ। ପରିବାର ପକ୍ଷରୁ ସ୍ପଷ୍ଟ କରାଯାଇଥିଲା ଯେ ବୃଦ୍ଧା ଜଣକ ମାନସିକ ସ୍ତରରେ ଅସୁସ୍ଥ ଏବଂ ତାଙ୍କର ଚିକିତ୍ସା ଚାଲିଛି। ସେ ସମ୍ପୂର୍ଣ୍ଣ ନିର୍ଦ୍ଦୋଷ ବୋଲି ପ୍ରମାଣିତ ହେବା ପରେ ପୋଲିସ ତାଙ୍କୁ ପରିବାର ଲୋକଙ୍କୁ ହସ୍ତାନ୍ତର କରିଥିଲା।

ପୋଲିସର ନିବେଦନ

ନାଗପୁରରେ ଗତ କିଛି ଦିନ ହେବ ସୋସିଆଲ ମିଡିଆରେ 'ପିଲାଚୋର ଗ୍ୟାଙ୍ଗ' ବୁଲୁଥିବାର ମିଥ୍ୟା ଗୁଜବ ବ୍ୟାପିବାରେ ଲାଗିଛି। ପୋଲିସ ନାଗରିକମାନଙ୍କୁ ନିବେଦନ କରିଛି ଯେ, ଏଭଳି ଗୁଜବରେ ବିଶ୍ୱାସ ନକରିବାକୁ ଏବଂ ଆଇନକୁ ନିଜ ହାତକୁ ନନେବାକୁ। ଏଥିସହ ସୋସିଆଲ ମିଡିଆରେ ମିଥ୍ୟା ଖବର ପ୍ରସାରଣ କରୁଥିବା ବ୍ୟକ୍ତିଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପୋଲିସ ଚେତାବନୀ ଦେଇଛି।

ନୂଆଦିଲ୍ଲୀ: ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ (ପୂର୍ବରୁ ଟୁଇଟର) ଆଜି ସକାଳୁ ଏକ ଭିଡିଓ ଖୁବ୍ ଜୋରରେ ଭାଇରାଲ ହେବାରେ ଲାଗିଛି। ଏହି ୨୪ ସେକେଣ୍ଡର ଭିଡିଓରେ ଏକ ଅଦ୍ଭୁତ ଏବଂ ଭୟଙ୍କର ଜୀବକୁ ପାଣି ଭିତରୁ ବାହାରୁଥିବା ଦେଖିବାକୁ ମିଳୁଛି। ମାତ୍ର ୧୨ ଘଣ୍ଟା ମଧ୍ୟରେ ଏହି ଭିଡିଓକୁ ୬୦ ଲକ୍ଷରୁ ଅଧିକ ଲୋକ ଦେଖିସାରିଲେଣି। ଭିଡିଓରେ ଦେଖାଯାଉଥିବା ଜୀବଟିର ଶରୀର ସାପ ଭଳି ଲମ୍ବା ଏବଂ ଏଥିରେ କଣ୍ଟା ଭଳି ଅନେକ ଅଂଶ ରହିଛି। ତେବେ ଏହି ଭିଡିଓର ସତ୍ୟତା କିନ୍ତୁ ସମ୍ପୂର୍ଣ୍ଣ ଭିନ୍ନ।

Omg... what is that? 😳 pic.twitter.com/V6VnezsiaX

— Crazy Moments (@Crazymoments01) March 7, 2026

ଏହି ଭିଡିଓ ଭାଇରାଲ ହେବା ମାତ୍ରେ ଅନେକ ସଚେତନ ୟୁଜର୍ ଏହାର ସତ୍ୟତା ପଦାକୁ ଆଣିଥିଲେ। ଭିଡିଓଟି ବାସ୍ତବ ନୁହେଁ ବରଂ ଏହା ‘ଆର୍ଟିଫିସିଆଲ ଇଣ୍ଟେଲିଜେନ୍ସ’ ବା ଏଆଇ (AI) ଦ୍ୱାରା ପ୍ରସ୍ତୁତ କରାଯାଇଛି। ଅନେକ ଲୋକ ଏହାକୁ ‘AI Slop’ ବୋଲି କହିଥିବାବେଳେ କିଛି ଲୋକ ଏହାକୁ ଭିଡିଓ ଗେମ୍‌ର କାଳ୍ପନିକ ଜୀବ ସହ ତୁଳନା କରିଛନ୍ତି। ଏପରିକି ‘ଏକ୍ସ’ର ନିଜସ୍ୱ ଏଆଇ ‘ଗ୍ରୋକ୍’ ମଧ୍ୟ ଏହାକୁ ଏକ କାଳ୍ପନିକ ଡିଜିଟାଲ୍ ସୃଷ୍ଟି ବୋଲି ଚିହ୍ନଟ କରିଛି।

ଏଆଇ ଡିପଫେକ୍‌ର ବଢୁଥିବା ବିପଦ

ବିଶେଷଜ୍ଞମାନଙ୍କ ମତରେ, ୨୦୨୫ ଶେଷ ଭାଗରୁ ଏଭଳି ନକଲି ବନ୍ୟଜନ୍ତୁ ଭିଡିଓର ପ୍ରଚାର ବୃଦ୍ଧି ପାଇଛି। ଏହା କେବଳ ମନୋରଞ୍ଜନ ପାଇଁ ନୁହେଁ, ବରଂ ଲୋକଙ୍କ ମନରେ ଭୟ ସୃଷ୍ଟି କରିବା ଏବଂ ଭୁଲ୍ ସୂଚନା ପ୍ରସାର କରିବା ପାଇଁ ବ୍ୟବହାର କରାଯାଉଛି। ଏହି ଭିଡିଓରେ କୌଣସି ନିର୍ଦ୍ଦିଷ୍ଟ ସ୍ଥାନ କିମ୍ବା ତାରିଖର ଉଲ୍ଲେଖ ନାହିଁ ଏବଂ ଜୀବଟିର ଚଳପ୍ରଚଳ ସ୍ୱାଭାବିକ ନୁହେଁ, ଯାହା ଏହା ଏକ ଏଆଇ ଜେନେରେଟେଡ୍ ଭିଡିଓ ବୋଲି ପ୍ରମାଣିତ କରୁଛି।

ବୈଜ୍ଞାନିକମାନେ କ’ଣ କହୁଛନ୍ତି?

ସାମୁଦ୍ରିକ ଜୀବ ବିଜ୍ଞାନୀଙ୍କ ଅନୁଯାୟୀ, ମ୍ୟାନଗ୍ରୋଭ କିମ୍ବା ହେନ୍ତାଳ ବଣ ପରିବେଶରେ ଏଭଳି କୌଣସି ଜୀବର ଅସ୍ତିତ୍ୱ ନାହିଁ। ବାସ୍ତବରେ ମ୍ୟାନଗ୍ରୋଭରେ ମଡସ୍କିପର୍ କିମ୍ବା ଷ୍ଟୋନ୍‌ଫିସ୍ ଭଳି ଜୀବ ରହିଥାନ୍ତି, କିନ୍ତୁ ଭିଡିଓରେ ଦେଖାଯାଉଥିବା ଜୀବ ସମ୍ପୂର୍ଣ୍ଣ କାଳ୍ପନିକ। ତେଣୁ ଏଭଳି ଭିଡିଓ ଦେଖି ଭୟଭୀତ ନହୋଇ ଏହାର ସତ୍ୟତା ଯାଞ୍ଚ କରିବା ଜରୁରୀ।

ନୂଆଦିଲ୍ଲୀ: ମିଛ ଖବର ବା ଫେକ୍ ନ୍ୟୁଜ୍ ପରିବେଷଣ ଗଣତନ୍ତ୍ର ଓ ଆଇନ୍‌‌ ବ୍ୟବସ୍ଥା ପ୍ରତି ବିପଦ। ଏହାକୁ ରୋକିବା ଲାଗି ଠୋସ ଓ କଡ଼ା ପଦକ୍ଷେପ ନେବାର ଆବଶ୍ୟକତା ରହିଛି। ଗଣମାଧ୍ୟମ ସଂସ୍ଥା ଏଥିପାଇଁ ଫ୍ୟାକ୍ଟ ଚେକିଂ ବ୍ୟବସ୍ଥା କରନ୍ତୁ। ମିଛ ବା ଫେକ୍ ଖବର ପରିବେଷଣ କରୁଥିବା ଗଣମାଧ୍ୟମ ସଂସ୍ଥା ପାଇଁ ଦଣ୍ଡ ବ୍ୟବସ୍ଥା ମଧ୍ୟ ହେଉ। ସୂଚନା ଓ ପ୍ରଯୁକ୍ତିବିଦ୍ୟା ସଂକ୍ରାନ୍ତ ସଂସଦୀୟ କମିଟି ସରକାରଙ୍କୁ ଏଭଳି ସୁପାରିସ କରିଛି। କମିଟି ଏହାର ରିପୋର୍ଟ ଲୋକସଭା ବାଚସ୍ପତିଙ୍କୁ ଦେଇଛି ଏବଂ ସଂସଦର ଆଗାମୀ ଅଧିବେଶନରେ ଏସଂପର୍କରେ ସରକାର ବିଲ ଆଗତ କରିପାରନ୍ତି ବୋଲି ଖବର ମିଳିଛି।

କମିଟିର ଅଧ୍ୟକ୍ଷ ବିଜେପି ସାଂସଦ ନିଶିକାନ୍ତ ଦୁବେ ଏହି ସୂଚନା ଦେଇଛନ୍ତି। ସେ କହିଛନ୍ତି ଯେ ଏହି ସୁପାରିସ କମିଟି ବୈଠକରେ ସର୍ବସମ୍ମତକ୍ରମେ ଗୃହୀତ ହୋଇଛି। ସାମାଜିକ ଗଣମାଧ୍ୟମ ‘ଏକ୍ସ’ରେ ଏହି ସୂଚନା ଦେଇ ସେ ଏକ ମିଥ୍ୟା ଖବରର କ୍ଲିପ୍ ମଧ୍ୟ ଲଗାଇଛନ୍ତି, ଯେଉଁଥିରେ ମିଥ୍ୟା ଖବର ଜରିଆରେ ସରକାରୀ ଦଳକୁ ଟା॥େର୍ଗଟ କରାଯାଇଛି। ଏହାର ଉଦାହରଣ ଦେଇ ସେ କହିଛନ୍ତି ଯେ ଏହା ଏକ ଗୁରୁତର ପ୍ରସଙ୍ଗ ହୋଇଥିବାରୁ ଏହାକୁ ନିୟନ୍ତ୍ରଣ କରାଯିବାର ଆବଶ୍ୟକତା ରହିଛି। ଦୁବେ ‘ଏକ୍ସ’ରେ କହିଛନ୍ତି ଆହୁରି ଯେ ଭାରତକୁ ବାଂଲାଦେଶ, ନେପାଳ, ଶ୍ରୀଲଙ୍କା ଓ ଥାଇଲାଣ୍ଡରେ ପରିଣତ ହେବାକୁ ଦିଆଯିବ ନାହିଁ। ଲୋକମାନଙ୍କୁ ବିଭ୍ରାନ୍ତ କରିବା ଲାଗି ଯେଉଁମାନେ ରାଷ୍ଟ୍ର-ବିରୋଧୀ ଏଜେଣ୍ଡା ଚଳାଇଛନ୍ତି, ସେମାନଙ୍କ ବିରୋଧରେ କଠୋର କାର୍ଯ୍ୟାୁଷ୍ଠାନ ଗ୍ରହଣ କରାଯିବ। ଖବର ସତ୍ୟ ଉପରେ ଆଧାରିତ ହେବା ଜରୁରୀ।

ମିଳିଥିବା ରିପୋର୍ଟ ଅନୁଯାୟୀ ମିଥ୍ୟା ଖବର ପରିବେଷଣ କରୁଥିବା ଗଣମାଧ୍ୟମଗୁଡିକୁ ଏଥର ଜରିମାନା ଦେବାକୁ ହେବ। ଦେଶର ସମସ୍ତ ପ୍ରିଣ୍ଟ, ଇଲେକଟ୍ରୋନିକ ଏବଂ ଡିଜିଟାଲ ମିଡିଆ ପାଇଁ ଫାକ୍ଟ ଚେକିଂ ବ୍ୟବସ୍ଥା ବାଧ୍ୟତାମୂଳକ କରାଯିବାକୁ ସୁପାରିସ କରାଯାଇଛି। ସଂପାଦକ ଏବଂ ସଂପାଦକୀୟ ବିଭାଗର କଣ୍ଟେଣ୍ଟ ହେଡ୍‌ଙ୍କୁ ମିଥ୍ୟା ଖବର ପାଇଁ ଉତ୍ତରଦାୟୀ କରିବା ଲାଗି ରିପୋର୍ଟରେ କୁହାଯାଇଛି। ବିଫଳତା ପାଇଁ ସଂସ୍ଥାର ମାଲିକ ଓ ପ୍ରକାଶକଙ୍କୁ ମଧ୍ୟ ଦାୟୀ କରାଯାଉ। ସମ୍ବାଦପତ୍ର ଓ ଇଲେକଟ୍ରୋନିକ ଗଣମଧ୍ୟମ ଉପରେ ନଜର ରଖିବା ଲାଗି ଆଇନରେ ଆବଶ୍ୟକ ସଂଶୋଧନ କରାଯିବାର ମଧ୍ୟ ଆବଶ୍ୟକତା ରହିଛି। ଆର୍ଟିଫିସିଆଲ ଇଣ୍ଟେଲିଜେନ୍ସ ଦ୍ୱାରା ପ୍ରସ୍ତୁତ କେଣ୍ଟଣ୍ଟକୁ ରୋକିବା ମଧ୍ୟ ଜରୁରି। ତେେବ ଗଣମାଧ୍ୟମ ଓ ଅନ୍ୟ ସଂସ୍ଥା ସହିତ ବ୍ୟାପକ ବିଚାର ଆଲୋଚନା କରାଯାଇ ସହମତି ଭିତ୍ତିରେ ଏଭଳି କଟକଣା କରାଯାଉ ବୋଲି ରିପୋର୍ଟରେ କୁହାଯାଇଛି।

ନୂଆଦିଲ୍ଲୀ: ବିଶ୍ବର ସବୁଠାରୁ ବଡ଼ ସୋସିଆଲ ମିଡିଆ ପ୍ଲାଟଫର୍ମ ଫେସବୁକ୍ ଏବେ ବିବାଦରେ ରହିଛି। ମିଥ୍ୟା ଖବର, ଉତ୍ତେଜନା ସୃଷ୍ଟିକାରୀ ପୋଷ୍ଟ, ମାନବ ଚାଲାଣ ଭଳି ଅନେକ ଦାଗ ଏହା ଉପରେ ଲାଗି ସାରିଛି । ଏବେ ଫେସବୁକ ଗତ ଦୁଇ ବର୍ଷର ମଲ୍ଟିପୁଲ ଇଣ୍ଟରନାଲ ରିପୋର୍ଟସରେ କିଛି ଚକିତ କଲାଭଳି ଖୁଲାସା କରିଛି। ୨୦୧୯ ଲୋକସଭା ନିର୍ବାଚନ ସମୟରେ ବିଜେପି-ରାଷ୍ଟ୍ରୀୟ ସ୍ବୟଂ ସେବକ ସଂଘ(ଆରଏସଏସ) ମିଥ୍ୟା ଖବର ପ୍ରଚାରପ୍ରସାର କରିଥିଲେ ବୋଲି କୁହାଯାଇଛି। ନିର୍ବାଚନ ସମୟରେ ‘ସଂଖ୍ୟାଲଘୁ ବିରୋଧୀ’ ଏବଂ ‘ମୁସଲମାନ ବିରୋଧୀ’ ମନ୍ତବ୍ୟ ଦିଆଯାଇଥିଲା। ୨୦୨୦ର ଏକ ରିପୋର୍ଟରେ ଏହା ଲୋକଙ୍କ ସମ୍ମୁଖକୁ ଅଣାଯାଇଛି। ଗତ ୧୮ ମାସ ମଧ୍ୟରେ ଏଭଳି ପୋଷ୍ଟ ଅହେତୁକ ବୃଦ୍ଧି ପାଇଥିଲା। ଏହା ବ୍ୟତୀତ ପଶ୍ଚିମବଙ୍ଗ ସହିତ ବିଧାନସଭା ନିର୍ବାଚନରେ ଏଭଳି ପୋଷ୍ଟ ମାଧ୍ୟମରେ ଲୋକଙ୍କ ଭାବନାକୁ ଆଘାତ ଦିଆଯାଇପାରେ ବୋଲି ଆଶଙ୍କା କରାଯାଇଥିଲା। ହିଂସା ସୃଷ୍ଟିକାରୀ ପୋଷ୍ଟକୁ ଫେସବୁକ ରେଡଫ୍ଲାଗ ଦିଆଯାଇଥାଏ । କାରଣ ଏହା ଦ୍ଵାରା ବିପଦ ଆଶଙ୍କା ଥାଏ। ଏଭଳି ପୋଷ୍ଟରୁ ଦୂରେଇ ରହିବା ପାଇଁ ଲୋକଙ୍କୁ ଚେତାବନୀ ଦିଆଯାଏ। ଫେସବୁକ ପ୍ରାୟ ସମସ୍ତ ରିପୋର୍ଟରେ ଭାରତକୁ ଅଧିକ ବିପଦ ଥିବା ଦେଶ(ଏଆରସି) ଶ୍ରେଣୀରେ ରଖୁଛି। ଏହାର ଅର୍ଥ ହେଲା ଅନ୍ୟ ଦେଶ ତୁଳନାରେ ଭାରତରେ ସୋସିଆଲ ମିଡିଆ ପୋଷ୍ଟକୁ ନେଇ ସାମାଜିକ ହିଂସା ହେବାର ସର୍ବାଧିକ ବିପଦ ରହିଛି।

ୟୁନାଇଟେଡ ଷ୍ଟେଟେସ ସିକ୍ୟୁରିଟିଜ ଆଣ୍ଡ ଏକ୍ସଚେଞ୍ଜ କମିଶନ( ଏସଇସି)ଙ୍କୁ କୁହାଯାଇଛି ଯେ ଦଲିଲରେ ଅନେକ ପ୍ରସଙ୍ଗ ଉଲ୍ଲେଖ କରାଯାଇଛି। ଫେସବୁକର ପୂର୍ବତନ କର୍ମଚାରୀ ତଥା ହ୍ବିସିଲ୍‌ବ୍ଲୋୟର ଫ୍ରାନ୍ସେସ ହୋଗେନଙ୍କ ଆଇନ ପରାମର୍ଶଦାତାଙ୍କ ଦ୍ବାରା ସଂଶୋଧିତ ଏହି ରିପୋର୍ଟକୁ ଆମେରିକା କଂଗ୍ରେସକୁ ପ୍ରଦାନ କରାଯାଇଛି। ଏଥିରେ କୁହାଯାଇଛି ଯେ ହିଂସା ବିପଦକୁ ବଢାଇବା ନେଇ ହେଟ୍ ସ୍ପିଚ(ଘୃଣାସୃଷ୍ଟିକାରୀ ମନ୍ତବ୍ୟ) ଏବଂ ଆପତ୍ତିଜନକ ପୋଷ୍ଟ ସେୟାର କରାଯାଉଥିଲା। ଏଥିରେ ସଂଖ୍ୟାଲଘୁ ଗୋଷ୍ଠୀକୁ କରୋନା ସମ୍ବନ୍ଧିତ ଭୁଲ ସୂଚନା ପ୍ରଚାରପ୍ରସାରରେ ସାମିଲ କରାଯାଇଥିଲା। ଅନେକ ସମାଚାର ଏଜେନ୍ସି ଆମେରିକା କଂଗ୍ରେସକୁ ଦିଆଯାଇଥିବା ରିପୋର୍ଟର ସମୀକ୍ଷା କରିଛନ୍ତି । ଆସାମ ବିଧାନସଭା ନିର୍ବାଚନ ପୂର୍ବରୁ ୨୦୨୧ର ଏକ ଅନ୍ତରୀଣ ରିପୋର୍ଟରେ ଦାବି କରାଯାଇଥିଲା ଯେ ମୁଖ୍ୟମନ୍ତ୍ରୀ ହିମନ୍ତ ବିଶ୍ବଶର୍ମା ଫେସବୁକରେ ଉତ୍ତେଜନା ସୃଷ୍ଟିକାରୀ ମନ୍ତବ୍ୟ ଦେଇଛନ୍ତି। ତାଙ୍କ ପୋଷ୍ଟକୁ ରେଡ୍‌ଫ୍ଲାଗରେ ଚିହ୍ନଟ କରାଯାଇଛି। ଏଥିରେ ମୁସଲମାନ ଆସାମର ଲୋକଙ୍କ ଉପରେ ଜୈବିକ ଆକ୍ରମଣ କରିପାରନ୍ତି ବୋଲି କୁହାଯାଇଛି। ଏହା ଦ୍ଵାରା ଯକୃତ, କିଡନୀ ଏବଂ ହୃଦୟ ସମ୍ବନ୍ଧିତ ରୋଗ ସୃଷ୍ଟି ହୋଇପାରେ। ଏ ବିଷୟରେ ଶ୍ରୀ ଶର୍ମାଙ୍କୁ ପଚରା ଯିବାରୁ ସେ କିଛି ଜାଣି ନଥିବା କହିଥିଲେ।

ଅନ୍ୟ ଏକ ଅନ୍ତରୀଣ ରିପୋର୍ଟ ‘ଭାରତରେ ସାମ୍ପ୍ରଦାୟିକ ସଂଘର୍ଷ’ରେ କୁହାଯାଇଛି ଯେ ଇଂରାଜୀ, ବଙ୍ଗାଳୀ ଏବଂ ହିନ୍ଦୀରେ ଉତ୍ତେଜନା ସୃଷ୍ଟିକାରୀ ପୋଷ୍ଟ କରାଯାଇଥିଲା। ୨୦୧୯ ଡିସେମ୍ବର ଏବଂ ୨୦୨୦ ମାର୍ଚ୍ଚରେ ଏହି ପୋଷ୍ଟ ହୋଇଥିଲା। ଫେସବୁକ ମଧ୍ୟ ଏହାକୁ ଆଗକୁ ବଢାଇ ଥିଲା। ୨୦୨୧ର ଫେସବୁକର ଅନ୍ୟ ଏକ ଅନ୍ତରୀଣ ରିପୋର୍ଟ ଅନୁଯାୟୀ ‘ଇଣ୍ଡିଆ ହାର୍ମଫୁଲ ନେଟୱର୍କ(ଭାରତର ବିପଜ୍ଜନକ ନେଟୱର୍କ)’ ଶୀର୍ଷକରେ ଟିଏମସି ସହ ସମ୍ବନ୍ଧ ରଖିଥିବା ଏକ ଗୋଷ୍ଠୀ ଉତ୍ତେଜନା ସୃଷ୍ଟିକାରୀ ପୋଷ୍ଟ କରିଥିଲା । ଅନ୍ୟପକ୍ଷରେ ଆରଏସଏସ ଏବଂ ବିଜେପି ସହ ସମ୍ପର୍କ ରଖିଥିବା ଗ୍ରୁପର ପୋଷ୍ଟରେ ‘ଲଭ୍ ଜିହାଦକୁ’ ହ୍ୟାସଟ୍ୟାଗ କରାଯାଇଥିଲା । ଇସ୍‌ଲାମ ବିରୋଧ ବିଷୟବସ୍ତୁ ଥିବା ପୋଷ୍ଟରେ ମଧ୍ୟ ହ୍ୟାସଟ୍ୟାଗ ବ୍ୟବହାର ହୋଇଥିଲା। ଏହାକୁ ନେଇ ବିଜେପ- ଆରଏସଏସ ଏବଂ ଟିଏମ୍‌ସିକୁ ପଚରା ଯିବାରୁ କୌଣସି ଉତ୍ତର ମିଳିନଥିଲା ।