ନୂଆଦିଲ୍ଲୀ: ଦିଲ୍ଲୀ ହାଇକୋର୍ଟ ବୁଧବାର ଦିନ ଏକ ଗୁରୁତ୍ୱପୂର୍ଣ୍ଣ ଶୁଣାଣି କରି ଜାତୀୟ ରାଜଧାନୀରେ ହେଉଥିବା କକରୋଚ୍ ଜନତା ପାର୍ଟି (CJP) ର ବିକ୍ଷୋଭ ସମୟରେ ପୋଲିସ କାର୍ଯ୍ୟାନୁଷ୍ଠାନ ସହ ଜଡିତ ସମସ୍ତ ସିସିଟିଭି ଫୁଟେଜ୍, ଭିଡିଓଗ୍ରାଫି ଏବଂ ଅନ୍ୟାନ୍ୟ ପ୍ରାସଙ୍ଗିକ ରେକର୍ଡ ସଂରକ୍ଷିତ ରଖିବାକୁ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଛନ୍ତି। ଏହି ଘଟଣାରେ କୋର୍ଟ ତଦାରଖରେ ସ୍ୱତନ୍ତ୍ର ତଦନ୍ତକାରୀ ଦଳ (SIT) ଗଠନ ଦାବି କରି ଦାୟର ହୋଇଥିବା ଆବେଦନ ଉପରେ କୋର୍ଟ କେନ୍ଦ୍ର ସରକାର ଏବଂ ଦିଲ୍ଲୀ ପୋଲିସକୁ ନୋଟିସ ଜାରି କରିଛନ୍ତି।

ମୁଖ୍ୟ ବିଚାରପତି ଡି.କେ. ଉପାଧ୍ୟାୟ ଏବଂ ବିଚାରପତି ତେଜସ୍ କାରିଆଙ୍କୁ ନେଇ ଗଠିତ ଖଣ୍ଡପୀଠ ଦିଲ୍ଲୀ ପୋଲିସ କିମ୍ବା କେନ୍ଦ୍ର ସରକାରଙ୍କ ଦ୍ୱାରା ଜାରି କରାଯାଇଥିବା ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର (SOP) ଅନୁଯାୟୀ ସମସ୍ତ ପ୍ରାସଙ୍ଗିକ ସାମଗ୍ରୀ ସଂରକ୍ଷଣ କରିବାକୁ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଛନ୍ତି। ବିକ୍ଷୋଭ ସମୟରେ ପୋଲିସର ଅତ୍ୟଧିକ ବଳ ପ୍ରୟୋଗର ଏକ ନିରପେକ୍ଷ ଏସଆଇଟି ତଦନ୍ତ ଦାବି ସହ ଦୋଷୀ ପୋଲିସ କର୍ମଚାରୀଙ୍କ ବିରୋଧରେ ଏଫଆଇଆର (FIR) ରୁଜୁ କରିବାକୁ ଆବେଦନରେ ଦାବି କରାଯାଇଛି। ଆସନ୍ତା ସେପ୍ଟେମ୍ବର ୧୧ ତାରିଖରେ ମାମଲାର ପରବର୍ତ୍ତୀ ଶୁଣାଣି ହେବ।

ଆବେଦନକାରୀଙ୍କ ପକ୍ଷରୁ ହାଜର ହୋଇ ବରିଷ୍ଠ ଆଇନଜୀବୀ ଏନ. ହରିହରନ ଏବଂ ବିକାଶ ସିଂହ ଯୁକ୍ତି ବାଢ଼ିଥିଲେ ଯେ ଯନ୍ତରମନ୍ତରରେ ବିକ୍ଷୋଭ ଶାନ୍ତିପୂର୍ଣ୍ଣ ଭାବରେ ଆରମ୍ଭ ହୋଇଥିଲା, କିନ୍ତୁ ପୋଲିସ ବିନା ପୂର୍ବ ସୂଚନାରେ ଆକ୍ରମଣ କରିଥିଲା। ଏହି ପୋଲିସ କାର୍ଯ୍ୟାନୁଷ୍ଠାନରେ ୯୦ ରୁ ଅଧିକ ଲୋକ ଆହତ ହୋଇଛନ୍ତି ଏବଂ ମହିଳା ଅଂଶଗ୍ରହଣକାରୀଙ୍କ ସହ ଦୁର୍ବ୍ୟବହାର କରାଯାଇଛି। ସେହିପରି ଅନ୍ୟତମ ବରିଷ୍ଠ ଆଇନଜୀବୀ ଗୋପାଳ ଶଙ୍କରନାରାୟଣନ ଦର୍ଶାଇଥିଲେ ଯେ ପୋଲିସ ଅପରେସନରେ ସାମିଲ ଥିବା କିଛି ବ୍ୟକ୍ତି ୟୁନିଫର୍ମରେ ନଥିଲେ। ସେମାନେ ଲୁହବୁହା ଗ୍ୟାସ, ଲାଠିଚାର୍ଜ ଏବଂ ଶାରୀରିକ ବଳର ଆଖିବୁଜା ବ୍ୟବହାର କରିଥିଲେ ବୋଲି ସେ ଅଭିଯୋଗ କରିଛନ୍ତି।

ଅନ୍ୟପକ୍ଷରେ ଦିଲ୍ଲୀ ପୋଲିସ ବର୍ବରତା ଅଭିଯୋଗକୁ ଖଣ୍ଡନ କରି ବିକ୍ଷୋଭ ହିଂସାତ୍ମକ ରୂପ ନେଇଥିଲା ବୋଲି କହିଛି। ପୋଲିସ ପକ୍ଷରୁ ହାଜର ହୋଇ ବରିଷ୍ଠ ଆଇନଜୀବୀ ଏସ.ଭି. ରାଜୁ ଯୁକ୍ତି ବାଢ଼ିଥିଲେ ଯେ ଆନ୍ଦୋଳନକାରୀମାନେ ଉତ୍ତେଜିତ ହୋଇ ପୋଲିସ ଉପରକୁ ପଥର ମାଡ଼ କରିଥିଲେ। କେନ୍ଦ୍ର ପକ୍ଷରୁ ସଲିସିଟର ଜେନେରାଲ ତୁଷାର ମେହେଟ୍ଟା ଏବଂ ଅତିରିକ୍ତ ସଲିସିଟର ଜେନେରାଲ ଚେତନ ଶର୍ମା ମଧ୍ୟ ଏହି ଆବେଦନକୁ ବିରୋଧ କରିଥିଲେ। ତେବେ ଖଣ୍ଡପୀଠ କହିଛନ୍ତି ଯେ ଏହା କୌଣସି ବିଚ୍ଛିନ୍ନ ବ୍ୟକ୍ତିଗତ ଘଟଣା ନୁହେଁ ଏବଂ ଅଭିଯୋଗର ବ୍ୟାପକ ସାର୍ବଜନୀନ ପ୍ରକୃତିକୁ ବିଚାରକୁ ନେଇ କୋର୍ଟ କେନ୍ଦ୍ର ଓ ଦିଲ୍ଲୀ ପୋଲିସଠାରୁ ଜବାବ ମାଗିଛନ୍ତି।

ସୋନମ ୱାଙ୍ଗଚୁକ୍ଙ୍କ ଅନିର୍ଦ୍ଦିଷ୍ଟ କାଳ ପାଇଁ ଆମରଣ ଅନଶନ ନୂଆଦିଲ୍ଲୀର ଯନ୍ତର ମନ୍ତରଠାରେ ୨୦ ଦିନରେ ପହଞ୍ଚିଥିବା ବେଳେ ତାଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ହେବାରେ ଲାଗିଛି। ନିଟ୍ (NEET) ପ୍ରଶ୍ନପତ୍ର ଲିକ୍ ଏବଂ ଅନ୍ୟାନ୍ୟ ପରୀକ୍ଷାଗତ ଅନିୟମିତତା ପ୍ରତିବାଦରେ କକରୋଚ୍ ଜନତା ପାର୍ଟି (CJP) ପକ୍ଷରୁ ଆୟୋଜିତ ଏହି ଆନ୍ଦୋଳନରେ ସାମିଲ ହୋଇଥିବା ପ୍ରସିଦ୍ଧ ପରିବେଶବିତ୍ ତଥା ଶିକ୍ଷାବିତ୍ ୱାଙ୍ଗଚୁକ୍ ଏବେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବିରେ ଅଡ଼ି ବସିଛନ୍ତି।

ସ୍ୱାସ୍ଥ୍ୟାବସ୍ଥା ଉପରେ ହାଇକୋର୍ଟଙ୍କ କଡ଼ା ନିର୍ଦ୍ଦେଶ

ଦୀର୍ଘ ଦିନର ଅନଶନ କାରଣରୁ ସୋନମ ୱାଙ୍ଗଚୁକ୍‌ଙ୍କ ଓଜନ ୯ କିଲୋଗ୍ରାମରୁ ଅଧିକ ହ୍ରାସ ପାଇଥିବା ବେଳେ ବର୍ତ୍ତମାନ ତାଙ୍କ ଓଜନ ମାତ୍ର ୫୬.୬୫ କିଲୋଗ୍ରାମ ରହିଛି। ଚିକିତ୍ସକ ଡା. ସତୀଶ ଲାମ୍ବାଙ୍କ କହିବା ଅନୁଯାୟୀ ତାଙ୍କ ଶରୀରରେ ୟୁରିକ୍ ଏସିଡ୍ ମାତ୍ରା ବଢ଼ିବାରେ ଲାଗିଛି ଏବଂ ଆଗକୁ ଏହା ବହୁ-ଅଙ୍ଗ ବିଫଳତା (multi-organ complications) ଆଡ଼କୁ ଗତି କରିପାରେ। ଏହି ସମ୍ବେଦନଶୀଳ ସ୍ଥିତିକୁ ଦୃଷ୍ଟିରେ ରଖି ପ୍ରଧାନ ବିଚାରପତି ମନମୋହନଙ୍କ ନେତୃତ୍ୱରେ ଗଠିତ ଦିଲ୍ଲୀ ହାଇକୋର୍ଟଙ୍କ ଖଣ୍ଡପୀଠ ଉଭୟ କେନ୍ଦ୍ର ଏବଂ ଦିଲ୍ଲୀ ସରକାରଙ୍କୁ ତାଙ୍କ ସ୍ୱାସ୍ଥ୍ୟର ଦୈନିକ ତଦାରଖ କରିବାକୁ ନିର୍ଦ୍ଦେଶ ଦେଇଛନ୍ତି। "ପ୍ରତ୍ୟେକ ନାଗରିକଙ୍କ ଜୀବନ ମୂଲ୍ୟବାନ," ବୋଲି ହାଇକୋର୍ଟ ଏକ ଜନସ୍ୱାର୍ଥ ମାମଲାର ଶୁଣାଣି ବେଳେ ଟିପ୍ପଣୀ ଦେଇଛନ୍ତି।

ରାଜନୈତିକ ଏବଂ ସାମାଜିକ ସମର୍ଥନ

ଏହି ଆନ୍ଦୋଳନକୁ ବିଭିନ୍ନ ମହଲରୁ ବିପୁଳ ସମର୍ଥନ ମିଳିବାରେ ଲାଗିଛି। ଆମ୍ ଆଦ୍‌ମୀ ପାର୍ଟି (AAP) ମୁଖ୍ୟ ତଥା ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଯନ୍ତର ମନ୍ତରରେ ପହଞ୍ଚି ସୋନମ ୱାଙ୍ଗଚୁକ୍‌ଙ୍କୁ ଭେଟିବା ସହ ତାଙ୍କୁ ଦେଶର ପରବର୍ତ୍ତୀ ଶିକ୍ଷା ମନ୍ତ୍ରୀ କରାଯିବା ଉଚିତ ବୋଲି ପ୍ରସ୍ତାବ ଦେଇଛନ୍ତି। ଏହାସହ ସେ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ମଧ୍ୟ ଦାବି କରିଛନ୍ତି। ସେହିପରି ପ୍ରସିଦ୍ଧ କୃଷକ ନେତା ରାକେଶ ଟିକାୟତ ପ୍ରାୟ ୫୦୦ ଚାଷୀଙ୍କ ସହ ଆନ୍ଦୋଳନସ୍ଥଳରେ ପହଞ୍ଚି ନିଜର ସମର୍ଥନ ଜଣାଇଛନ୍ତି।

ଅନ୍ୟପକ୍ଷରେ କଂଗ୍ରେସ ନେତା କେ. ସି. ବେଣୁଗୋପାଳ ଏବଂ ସଚିନ ପାଇଲଟ୍ ମଧ୍ୟ ଛାତ୍ରଛାତ୍ରୀମାନଙ୍କୁ ନ୍ୟାୟ ମିଳିବା ନେଇ ସ୍ୱର ଉତ୍ତୋଳନ କରିଛନ୍ତି ଏବଂ ୱାଙ୍ଗଚୁକ୍‌ଙ୍କୁ ନିଜର ଅନଶନ ଭାଙ୍ଗିବାକୁ ଅନୁରୋଧ କରିଛନ୍ତି।

କ’ଣ ଏହି କକରୋଚ୍ ଜନତା ପାର୍ଟି (CJP)?

ଅନ୍‌ଲାଇନ୍ ବ୍ୟଙ୍ଗାତ୍ମକ (satirical) ଆନ୍ଦୋଳନ ଭାବେ ଆରମ୍ଭ ହୋଇଥିବା କକରୋଚ୍ ଜନତା ପାର୍ଟି ବର୍ତ୍ତମାନ ଦେଶର ଶିକ୍ଷା ବ୍ୟବସ୍ଥାରେ ସୁଧାର ଦାବିରେ ଏକ ବଡ଼ ଆନ୍ଦୋଳନର ରୂପ ନେଇଛି। ଅଭିଜିତ୍ ଦିପ୍‌କେଙ୍କ ନେତୃତ୍ୱରେ ଜୁନ୍ ମାସରୁ ଯନ୍ତର ମନ୍ତରଠାରେ ଏହି ବିକ୍ଷୋଭ ଜାରି ରହିଛି ଏବଂ ଜୁନ୍ ୨୮ ତାରିଖରୁ ଏଥିରେ ସୋନମ ୱାଙ୍ଗଚୁକ୍ ଯୋଗ ଦେଇଛନ୍ତି। ଦେଶବ୍ୟାପୀ ଶିକ୍ଷା ବ୍ୟବସ୍ଥାରେ ସ୍ୱଚ୍ଛତା ଏବଂ ଜବାବଦେହିତା ଦାବି କରି ଶହ ଶହ ଛାତ୍ରଛାତ୍ରୀ, ଅଭିଭାବକ ଏବଂ ବରିଷ୍ଠ ନାଗରିକ ଏଥିରେ ସାମିଲ ହୋଇଛନ୍ତି। ସରକାର ଏବଂ ଆନ୍ଦୋଳନକାରୀଙ୍କ ମଧ୍ୟରେ ଏହି ଅସ୍ୱାଭାବିକ ଛକାପଞ୍ଝା କେବେ ଶେଷ ହେବ, ତାହା ଦେଖିବାକୁ ବାକି ରହିଲା।

ଦିଲ୍ଲୀର ଜନ୍ତରମନ୍ତର ଠାରେ ଅନଶନରେ ବସିଥିବା ପ୍ରସିଦ୍ଧ ଶିକ୍ଷାବିତ୍ ତଥା ପରିବେଶ କର୍ମୀ ସୋନମ ୱାଙ୍ଗଚୁକଙ୍କ ସ୍ୱାସ୍ଥ୍ୟାବସ୍ଥାକୁ ନେଇ ଦିଲ୍ଲୀ ହାଇକୋର୍ଟ ଚିନ୍ତା ବ୍ୟକ୍ତ କରିଛନ୍ତି। ତାଙ୍କ ସ୍ୱାସ୍ଥ୍ୟର ପ୍ରତିଦିନ ଯାଞ୍ଚ କରିବା ସହ ଆବଶ୍ୟକ ଥିଲେ ତୁରନ୍ତ ଚିକିତ୍ସା ସୁବିଧା ଯୋଗାଇ ଦେବାକୁ କୋର୍ଟ କେନ୍ଦ୍ର ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। "ପ୍ରତ୍ୟେକ ନାଗରିକଙ୍କ ଜୀବନ ମୂଲ୍ୟବାନ", ଏହା ଦର୍ଶାଇ କୋର୍ଟ ଆବଶ୍ୟକୀୟ ପଦକ୍ଷେପ ଗ୍ରହଣ କରିବାକୁ କହିଛନ୍ତି।

ହାଇକୋର୍ଟଙ୍କ ଗୁରୁତ୍ୱପୂର୍ଣ୍ଣ ଶୁଣାଣି

ମୁଖ୍ୟ ବିଚାରପତି ଦେବେନ୍ଦ୍ର କୁମାର ଉପାଧ୍ୟାୟ ଏବଂ ବିଚାରପତି ତେଜସ କାରିଆଙ୍କୁ ନେଇ ଗଠିତ ଖଣ୍ଡପୀଠ ଆଇନଜୀବୀ ରାକେଶ କୁମାର ସାଇନିଙ୍କ ଦ୍ୱାରା ଦାୟର ଏକ ଜନସ୍ୱାର୍ଥ ମାମଲା (PIL) ର ଶୁଣାଣି କରୁଥିଲେ। ଶୁଣାଣି ସମୟରେ କେନ୍ଦ୍ର ସରକାରଙ୍କ ପକ୍ଷରୁ ସଲିସିଟର ଜେନେରାଲ ତୁଷାର ମେହେଟ୍ଟା କୋର୍ଟଙ୍କୁ ଆଶ୍ୱାସନା ଦେଇଥିଲେ ଯେ ସରକାରୀ ଡାକ୍ତର ଏବଂ ବିଶେଷଜ୍ଞଙ୍କ ଦ୍ୱାରା ୱାଙ୍ଗଚୁକଙ୍କ ସ୍ୱାସ୍ଥ୍ୟ ଉପରେ ନିୟମିତ ନଜର ରଖାଯାଉଛି ଏବଂ ଆବଶ୍ୟକ ପଡ଼ିଲେ ଉପଯୁକ୍ତ ଚିକିତ୍ସା କରାଯିବ। କୋର୍ଟ ଏହି ପ୍ରତିଶ୍ରୁତିକୁ ଗ୍ରହଣ କରି ମାମଲାର ନିଷ୍ପତ୍ତି ଶୁଣାଇଥିଲେ।

୧୯ ଦିନରେ ଅନଶନ ଏବଂ ବିଗୁଡୁଛି ସ୍ୱାସ୍ଥ୍ୟ

ନିଟ୍ (NEET-UG) ପରୀକ୍ଷା ପ୍ରଶ୍ନପତ୍ର ଲିକ୍ ପ୍ରସଙ୍ଗରେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବି କରି ୱାଙ୍ଗଚୁକ ଗତ ଜୁନ୍ ୨୮ ତାରିଖରୁ ଅନିର୍ଦ୍ଦିଷ୍ଟ କାଳ ପାଇଁ ଭୋକ ହରତାଳରେ ବସିଛନ୍ତି। ଅଭିଜିତ୍ ଦିପକେଙ୍କ ନେତୃତ୍ୱାଧୀନ କକରୋଚ୍ ଜନତା ପାର୍ଟି (CJP) ସହିତ ମିଶି ସେ ଏହି ଆନ୍ଦୋଳନ ଚଳାଇଛନ୍ତି। ବର୍ତ୍ତମାନ ସୁଦ୍ଧା ତାଙ୍କ ଓଜନ ୯ କିଲୋଗ୍ରାମରୁ ଅଧିକ ହ୍ରାସ ପାଇ ୫୬.୯ କେଜିରେ ପହଞ୍ଚିଛି। ରକ୍ତଚାପ ଏବଂ ବ୍ଲଡ୍ ସୁଗାର ମଧ୍ୟ ବିପଦଜନକ ସ୍ତରକୁ ଖସି ଆସିଛି, ଯାହା ଫଳରେ ତାଙ୍କୁ ଠିଆ ହେବା ଏବଂ ଚାଲିବାରେ କଷ୍ଟ ଅନୁଭବ ହେଉଛି। ଡାକ୍ତରମାନେ ସତର୍କ କରିଛନ୍ତି ଯେ ସ୍ଥିତି ଏପରି ଲାଗି ରହିଲେ ଆଗକୁ ଶରୀରର ବିଭିନ୍ନ ଅଙ୍ଗ ଉପରେ ଏହାର ଗୁରୁତର ପ୍ରଭାବ ପଡ଼ିପାରେ।

ଆଗାମୀ ସଂସଦ ମାର୍ଚ୍ଚ ଯୋଜନା

ଅନ୍ୟପକ୍ଷରେ, ପ୍ରଶ୍ନପତ୍ର ଲିକ୍ କାରଣରୁ ଆତ୍ମହତ୍ୟା କରିଥିବା ଛାତ୍ରଛାତ୍ରୀଙ୍କ ପରିବାରକୁ ୧ କୋଟି ଟଙ୍କା ଲେଖାଏଁ କ୍ଷତିପୂରଣ ଦେବାକୁ ଆନ୍ଦୋଳନକାରୀମାନେ ଦାବି କରିଛନ୍ତି। ଆସନ୍ତା ଜୁଲାଇ ୨୦ ତାରିଖରେ, ଅର୍ଥାତ୍ ମୌସୁମୀ ଅଧିବେଶନର ପ୍ରଥମ ଦିନରେ ପ୍ରତିବାଦକାରୀମାନେ ସଂସଦ ଅଭିମୁଖେ ଏକ ଶାନ୍ତିପୂର୍ଣ୍ଣ ପଦଯାତ୍ରା କରିବାକୁ ଘୋଷଣା କରିଛନ୍ତି |

ଚେକ୍ ବାଉନ୍ସ ମାମଲାରେ ବଲିଉଡର ଲୋକପ୍ରିୟ ହାସ୍ୟ ଅଭିନେତା ରାଜପାଲ ଯାଦବଙ୍କୁ ଶକ୍ତ ଝଟକା ଲାଗିଛି। ଦିଲ୍ଲୀ ହାଇକୋର୍ଟ ତାଙ୍କ ଦୋଷୀ ସାବ୍ୟସ୍ତ ରାୟକୁ କାୟମ ରଖିବା ସହ ତାଙ୍କ ଜେଲ ଦଣ୍ଡାଦେଶକୁ ୩ ମାସକୁ ହ୍ରାସ କରିଛନ୍ତି। ପୂର୍ବରୁ ଏକ ନିମ୍ନ ଅଦାଲତ ତାଙ୍କୁ ୬ ମାସର ଜେଲ ଦଣ୍ଡ ଶୁଣାଇଥିଲେ। ବାରମ୍ବାର କୋର୍ଟଙ୍କ ନିର୍ଦ୍ଦେଶ ତଥା ଦେଇଥିବା ପ୍ରତିଶ୍ରୁତି ଉଲ୍ଲଂଘନ କରିବା କାରଣରୁ ତାଙ୍କୁ ଏହି ଦଣ୍ଡ ଭୋଗିବାକୁ ପଡିବ।

କୋର୍ଟଙ୍କ ରାୟ ଓ ଜୋରିମାନା

ଦିଲ୍ଲୀ ହାଇକୋର୍ଟର ବିଚାରପତି ଜଷ୍ଟିସ ସ୍ୱର୍ଣ୍ଣା କାନ୍ତା ଶର୍ମା ଏହି ମାମଲାର ଶୁଣାଣି କରି ରାଜପାଲ ଯାଦବଙ୍କୁ ମୋଟ ୭ଟି ମାମଲାରୁ ପ୍ରତ୍ୟେକରେ ୩ ମାସ ଲେଖାଏଁ ସାଧାରଣ ଜେଲ ଦଣ୍ଡ ଶୁଣାଇଛନ୍ତି। ତେବେ ସମସ୍ତ ଦଣ୍ଡାଦେଶ ଏକାସାଙ୍ଗରେ ଚାଲିବ ବୋଲି କୋର୍ଟ ସ୍ପଷ୍ଟ କରିଛନ୍ତି। ଏହା ସହିତ ଅଭିଯୋଗକାରୀ କମ୍ପାନୀ ମେସର୍ସ ମୁରଲୀ ପ୍ରୋଜେକ୍ଟସ ପ୍ରାଇଭେଟ୍ ଲିମିଟେଡ୍ଙ୍କୁ ପ୍ରତି ମାମଲାରେ ୧.୦୫ କୋଟି ଟଙ୍କା ଏବଂ ରାଜ୍ୟ ସରକାରଙ୍କୁ ୨୫,୦୦୦ ଟଙ୍କା ଲେଖାଏଁ ଜୋରିମାନା ଦେବାକୁ ନିର୍ଦ୍ଦେଶ ଦିଆଯାଇଛି। ସେହିପରି ତାଙ୍କ ପତ୍ନୀ ରାଧା ଯାଦବଙ୍କୁ ମଧ୍ୟ ପ୍ରତି ମାମଲାରେ ୫ କୋଟିରୁ ଅଧିକ ଟଙ୍କା ଦେବାକୁ କୁହାଯାଇଛି। ତେବେ ଅଭିନେତାଙ୍କ ଦ୍ୱାରା ପୂର୍ବରୁ ଜମା କରାଯାଇଥିବା ପ୍ରାୟ ୨.୨୫ କୋଟି ଟଙ୍କା ଚୂଡ଼ାନ୍ତ ରାଶିରୁ କାଟ୍ କରାଯିବ ବୋଲି କୋର୍ଟ ସ୍ପଷ୍ଟ କରିଛନ୍ତି। ଉପର କୋର୍ଟରେ ଆବେଦନ କରିବା ପାଇଁ ରାଜପାଲଙ୍କୁ ଦୁଇ ମାସର ସମୟ ମିଳିଛି।

ବାରମ୍ବାର ଚୁକ୍ତି ଉଲ୍ଲଂଘନ କରିଥିଲେ ଅଭିନେତା

ସୂଚନାଯୋଗ୍ୟ ଯେ, ରାଜପାଲ ଯାଦବ ଏକ ଚଳଚ୍ଚିତ୍ର ନିର୍ମାଣ ପାଇଁ ଉକ୍ତ କମ୍ପାନୀଠାରୁ ଋଣ ନେଇଥିଲେ। କିନ୍ତୁ ଫିଲ୍ମଟି ବକ୍ସ ଅଫିସରେ ଫ୍ଲପ୍ ହେବା କାରଣରୁ ସେ ବହୁତ ବଡ଼ ଆର୍ଥିକ କ୍ଷତି ସହିଥିଲେ ଏବଂ ଋଣ ପରିଶୋଧ କରିପାରିନଥିଲେ। ଏହାପରେ କମ୍ପାନୀ ଚେକ୍ ବାଉନ୍ସ ମାମଲା ରୁଜୁ କରିଥିଲା। ଏହି ମାମଲାରେ କୋର୍ଟ ରାଜପାଲଙ୍କୁ ବାରମ୍ବାର ସୁଯୋଗ ଦେବା ସତ୍ତ୍ୱେ ସେ କମ୍ପାନୀକୁ ଟଙ୍କା ଫେରାଇବାରେ ବିଫଳ ହୋଇଥିଲେ। କୋର୍ଟ କହିଛନ୍ତି ଯେ ଅଭିନେତାଙ୍କୁ ଆପୋଷ ବୁଝାମଣା ଏବଂ ଟଙ୍କା ଜମା କରିବା ପାଇଁ ବହୁବାର ସୁଯୋଗ ଓ କୋହଳ ମନୋଭାବ ପ୍ରଦର୍ଶନ କରାଯାଇଥିଲା, କିନ୍ତୁ ସେ ନ୍ୟାୟାଳୟଙ୍କୁ ଦେଇଥିବା ପ୍ରତିଶ୍ରୁତି ପୂରଣ କରିନଥିଲେ। କୌଣସି ବ୍ୟକ୍ତି ଏକ ନିର୍ଦ୍ଦିଷ୍ଟ ପେଶା କିମ୍ବା ଗ୍ଲାମର ଇଣ୍ଡଷ୍ଟ୍ରିରୁ ଆସିଥିଲେ ମଧ୍ୟ ତାଙ୍କ ପାଇଁ କୋର୍ଟ କୌଣସି ସ୍ୱତନ୍ତ୍ର ନିୟମ ବା ପରିସ୍ଥିତି ସୃଷ୍ଟି କରିପାରିବେ ନାହିଁ ବୋଲି କଡ଼ା ଟିପ୍ପଣୀ ଦେଇଛନ୍ତି ହାଇକୋର୍ଟ।

ଲୋକପ୍ରିୟ ୟୁଟ୍ୟୁବର ଧ୍ରୁବ ରାଠୀ (Dhruv Rathee) ଙ୍କ ଏକ ବିବାଦୀୟ ଭିଡିଓକୁ ନେଇ ଦିଲ୍ଲୀ ହାଇକୋର୍ଟ (Delhi High Court) କଡ଼ା ଆଭିମୁଖ୍ୟ ଗ୍ରହଣ କରିଛନ୍ତି। ଏହି ଭିଡିଓରେ ହିନ୍ଦୁ ଦେବଦେବୀଙ୍କ ସମ୍ପର୍କରେ ଆପତ୍ତିଜନକ ଟିପ୍ପଣୀ ଦିଆଯାଇଥିବା ଅଭିଯୋଗ ହୋଇଛି। ଭିଡିଓକୁ ୟୁଟ୍ୟୁବରୁ ହଟାଇବା ଦାବିରେ ହୋଇଥିବା ଆବେଦନ ଉପରେ ଆସନ୍ତା ୧୫ ଦିନ ମଧ୍ୟରେ ଫଇସଲା ଶୁଣାଇବାକୁ କୋର୍ଟ ସରକାରଙ୍କ ଅଭିଯୋଗ ଅପିଲ୍ କମିଟି (Grievance Appellate Committee-GAC) କୁ ନିର୍ଦ୍ଦେଶ ଦେଇଛନ୍ତି।

ଭିଡିଓରେ କ'ଣ ଥିଲା?

ଚଳିତ ବର୍ଷ ମାର୍ଚ୍ଚ ୨୧ ତାରିଖରେ ଧ୍ରୁବ ରାଠୀ ତାଙ୍କ ୟୁଟ୍ୟୁବ୍ ଚ୍ୟାନେଲରେ 'କ'ଣ ହିନ୍ଦୁମାନେ ବିଫ୍ ଖାଇପାରିବେ? କେରଳ ଷ୍ଟୋରୀ ୨ ର ପର୍ଦ୍ଦାଫାଶ' ଶୀର୍ଷକ ଏକ ଭିଡିଓ ଅପଲୋଡ୍ କରିଥିଲେ। ଆବେଦନକାରୀ ତଥା ଆଇନଜୀବୀ ଅମିତା ସଚଦେବା ଅଭିଯୋଗ କରିଛନ୍ତି ଯେ, ଏହି ଭିଡିଓରେ ଭଗବାନ ରାମ, ମାତା ସୀତା ଏବଂ ଭଗବାନ କୃଷ୍ଣ ମାଂସ ଓ ମଦ୍ୟପାନ କରୁଥିଲେ ବୋଲି ଦାବି କରାଯାଇଛି। ଏଭଳି ବିବୃତ୍ତି କୋଟି କୋଟି ହିନ୍ଦୁଙ୍କ ଧାର୍ମିକ ଭାବନାକୁ ଆଘାତ ପହଞ୍ଚାଇଛି।

କେନ୍ଦ୍ର ସରକାରଙ୍କ ଯୁକ୍ତି

ଶୁଣାଣି ସମୟରେ କେନ୍ଦ୍ର ସରକାରଙ୍କ ପକ୍ଷରୁ ଅତିରିକ୍ତ ସଲିସିଟର ଜେନେରାଲ (ASG) ଚେତନ ଶର୍ମା ଉପସ୍ଥିତ ରହି ଏହି ଭିଡିଓକୁ ସମାଜରେ ବିଭାଜନ ସୃଷ୍ଟି କରୁଥିବା ବିଷୟବସ୍ତୁ ବୋଲି ବର୍ଣ୍ଣନା କରିଥିଲେ। ସେ କହିଥିଲେ ଯେ, ୟୁଟ୍ୟୁବ୍ ଭଳି ପ୍ଲାଟଫର୍ମଗୁଡ଼ିକ ଉପଯୁକ୍ତ ସତର୍କତା ଅବଲମ୍ବନ କରିବା ଉଚିତ୍ ଏବଂ ସଂଖ୍ୟାଗରିଷ୍ଠ ସମ୍ପ୍ରଦାୟର ଧାର୍ମିକ ଭାବନାକୁ ଆଘାତ ଦେଉଥିବା ତଥା ଘୃଣା ବିସ୍ତାର କରୁଥିବା କଣ୍ଟେଣ୍ଟକୁ ତୁରନ୍ତ ହଟାଇବା ଦରକାର। ଗୁଗଲ୍ ନିଜେ ଏହି ଭିଡିଓକୁ ହଟାଉ କିମ୍ବା କୋର୍ଟ ଏନେଇ ଉପଯୁକ୍ତ ଆଦେଶ ପ୍ରଦାନ କରନ୍ତୁ ବୋଲି ସେ ଯୁକ୍ତି ବାଢ଼ିଥିଲେ।

ହାଇକୋର୍ଟଙ୍କ କଡ଼ା ନିର୍ଦ୍ଦେଶ

ବିଚାରପତି ସ୍ୱର୍ଣ୍ଣକାନ୍ତା ଶର୍ମା ଙ୍କ ଖଣ୍ଡପୀଠ ଏହି ମାମଲାର ଶୁଣାଣି କରି ଜିଏସି (GAC) କୁ ୧୫ ଦିନର ମହଲତ ଦେଇଛନ୍ତି। ଗୁଗଲ୍ ପକ୍ଷରୁ କୋର୍ଟଙ୍କୁ ଅବଗତ କରାଯାଇଥିଲା ଯେ ଏହି ମାମଲା ବର୍ତ୍ତମାନ ଜିଏସିରେ ବିଚାରାଧୀନ ରହିଛି। ଏହାପରେ କୋର୍ଟ ସ୍ପଷ୍ଟ କରିଥିଲେ ଯେ, ୧୫ ଦିନ ମଧ୍ୟରେ ନିଷ୍ପତ୍ତି ନିଆଯିବା ଆବଶ୍ୟକ ଏବଂ ଏହି ଆଦେଶର ଅବମାନନା କରାଗଲେ ଏହାକୁ ଅତ୍ୟନ୍ତ ଗୁରୁତ୍ୱର ସହ ଗ୍ରହଣ କରାଯିବ।

ବଲିଉଡର ସୁପରଷ୍ଟାର ସଲମାନ ଖାନଙ୍କୁ ନେଇ ଆଧାରିତ ବୋଲି କୁହାଯାଉଥିବା ଫିଲ୍ମ 'କାଲା ହିରଣ: ଦ ବ୍ୟାଟେଲ ଫର୍ ଲିଗାସି' ବିବାଦକୁ ନେଇ ବୁଧବାର ଦିନ ଦିଲ୍ଲୀ ହାଇକୋର୍ଟରେ ଏକ ଗୁରୁତ୍ୱପୂର୍ଣ୍ଣ ଶୁଣାଣି ହୋଇଛି। ଏହି ଫିଲ୍ମ ଉପରେ ରୋକ ଲଗାଇବା ପାଇଁ ସଲମାନ ଖାନ ଅଦାଲତରେ ଆବେଦନ କରିଥିଲେ। ତେବେ ଫିଲ୍ମ ନିର୍ମାତାଙ୍କ ପକ୍ଷରୁ କୋର୍ଟଙ୍କୁ ପ୍ରତିଶ୍ରୁତି ଦିଆଯାଇଛି ଯେ ବର୍ତ୍ତମାନ ସୁଦ୍ଧା ଫିଲ୍ମଟିକୁ ସେନ୍ସର ବୋର୍ଡ ବା ସିବିଏଫସି (CBFC) ନିକଟକୁ ପ୍ରମାଣପତ୍ର ପାଇଁ ପଠାଯାଇନାହିଁ।

ସେନ୍ସର ବୋର୍ଡକୁ ଯାଇନାହିଁ ଫିଲ୍ମ

ବୁଧବାର ଦିନ ଜଷ୍ଟିସ୍ ଜ୍ୟୋତି ସିଂହଙ୍କ ଖଣ୍ଡପୀଠରେ ଏହି ମାମଲାର ଶୁଣାଣି ହୋଇଥିଲା। ଶୁଣାଣି ସମୟରେ ଫିଲ୍ମ ନିର୍ମାତାଙ୍କ ଓକିଲ ଅଦାଲତଙ୍କୁ କହିଥିଲେ ଯେ ବଜାରରେ କେବଳ ଫିଲ୍ମର ଟିଜର୍ ରିଲିଜ୍ ହୋଇଛି ଏବଂ ଏହାର ରିଲିଜ୍ ହେବାରେ ଏବେ ବି ଅନେକ ସମୟ ବାକି ଅଛି। ଏହା ସହିତ ନିର୍ମାତାମାନେ ଲିଖିତ ଭାବେ କୋର୍ଟଙ୍କୁ ଆଶ୍ୱାସନା ଦେଇଛନ୍ତି ଯେ ଆସନ୍ତା ସୋମବାର ପର୍ଯ୍ୟନ୍ତ ଏହି ଫିଲ୍ମକୁ ପ୍ରମାଣପତ୍ର ପାଇଁ କେନ୍ଦ୍ରୀୟ ଫିଲ୍ମ ପ୍ରମାଣନ ବୋର୍ଡ (CBFC) ନିକଟକୁ ପଠାଯିବ ନାହିଁ କିମ୍ବା ଏହାର କୌଣସି ନୂଆ ଟ୍ରେଲର ମଧ୍ୟ ରିଲିଜ୍ କରାଯିବ ନାହିଁ।

ସଲମାନଙ୍କ ଆବେଦନ ଓ ବ୍ୟକ୍ତିଗତ ଅଧିକାର

ସଲମାନ ଖାନ ନିଜ ଆବେଦନରେ ଅଭିଯୋଗ କରିଛନ୍ତି ଯେ ଏହି ଫିଲ୍ମଟି ତାଙ୍କର 'ପର୍ସନାଲିଟି ରାଇଟ୍ସ' (ବ୍ୟକ୍ତିଗତ ଅଧିକାର) ର ଉଲ୍ଲଂଘନ କରୁଛି। ତାଙ୍କ ବିନା ଅନୁମତିରେ ଏହି ଫିଲ୍ମ ନିର୍ମାଣ କରାଯାଇଛି, ଯାହାକି ୧୯୯୮ ମସିହାର ବିବାଦୀୟ କୃଷ୍ଣସାର ମୃଗ ଶିକାର ମାମଲା (Blackbuck Poaching Case) ଉପରେ ଆଧାରିତ। ସଲମାନ ଫିଲ୍ମର ପ୍ରମୋସନ, ପ୍ରଡକ୍ସନ ଏବଂ ରିଲିଜ୍ ଉପରେ ତୁରନ୍ତ ସ୍ଥଗିତାଦେଶ ଲଗାଇବାକୁ ଦାବି କରିଛନ୍ତି। ଅନ୍ୟପଟେ ନିର୍ମାତାଙ୍କ ଓକିଲ ଯୁକ୍ତି ବାଢ଼ିଥିଲେ ଯେ ସଲମାନଙ୍କ ତରଫରୁ କରାଯାଇଥିବା ଆବେଦନ କେବଳ ଗୋଟିଏ ପୋଷ୍ଟର ଆଧାରରେ କରାଯାଇଛି।

ନିର୍ମାତା ଅମିତ ଜାନିଙ୍କ ବଡ଼ ଅଭିଯୋଗ

ଅନ୍ୟପଟେ ଫିଲ୍ମର ପ୍ରଯୋଜକ ଅମିତ ଜାନି ସଲମାନଙ୍କ ଆବେଦନକୁ ବିରୋଧ କରିଛନ୍ତି। ସେ ଦାବି କରିଛନ୍ତି ଯେ କୋର୍ଟରେ କୌଣସି ବ୍ୟକ୍ତିଙ୍କ ଲୋକପ୍ରିୟତା କାମ ଆସିବ ନାହିଁ ଏବଂ ନ୍ୟାୟାଳୟ କେବଳ ତଥ୍ୟ ଓ ଆଇନ ଆଧାରରେ ରାୟ ଶୁଣାଇବେ। ଏହାଛଡ଼ା ଅମିତ ଜାନି ଗୁରୁତର ଅଭିଯୋଗ ଆଣି କହିଛନ୍ତି ଯେ ତାଙ୍କୁ ପାକିସ୍ତାନରୁ ଧମକପୂର୍ଣ୍ଣ କଲ୍ ଆସୁଛି ଏବଂ ଏହି ମାମଲାକୁ ରଫାଦଫା କରିବା ପାଇଁ ସଲମାନ ଖାନଙ୍କ ସହ ସାକ୍ଷାତ କରିବାକୁ ଚାପ ପକାଯାଉଛି।

ଦିଲ୍ଲୀ ହାଇକୋର୍ଟ ଉଭୟ ପକ୍ଷଙ୍କ ଯୁକ୍ତି ଶୁଣିବା ପରେ ଏହି ମାମଲାର ପରବର୍ତ୍ତୀ ଶୁଣାଣି ଆସନ୍ତା ସୋମବାର, ଅର୍ଥାତ ୬ ଜୁଲାଇକୁ ଧାର୍ଯ୍ୟ କରିଛନ୍ତି। ସେପର୍ଯ୍ୟନ୍ତ ଏହି ଫିଲ୍ମକୁ କୌଣସି ପ୍ରମାଣପତ୍ର ମିଳିବାର ସମ୍ଭାବନା ନାହିଁ |

ନୂଆଦିଲ୍ଲୀ: ଦେଶରେ ହେବାକୁ ଥିବା ନିଟ୍ ୟୁଜି ୨୦୨୬ (NEET-UG 2026)ର ରି-ଟେଷ୍ଟ ପୂର୍ବରୁ କେନ୍ଦ୍ର ସରକାର ମେସେଜିଂ ଆପ୍ ଟେଲିଗ୍ରାମ ଉପରେ ଲଗାଇଥିବା ଅସ୍ଥାୟୀ ପ୍ରତିବନ୍ଧକକୁ ଦିଲ୍ଲୀ ହାଇକୋର୍ଟ କାଏମ୍ ରଖିଛନ୍ତି। ଶୁକ୍ରବାର ଦିନ ଏହି ମାମଲାର ଶୁଣାଣି କରି ଅଦାଲତ ଟେଲିଗ୍ରାମର ଆବେଦନକୁ ଖାରଜ କରିଦେଇଛନ୍ତି। 

ବିଚାରପତି ତେଜସ କାରିଆ ଟେଲିଗ୍ରାମର ଆବେଦନକୁ ଖାରଜ କରି କହିଛନ୍ତି ଯେ କେନ୍ଦ୍ର ସରକାରଙ୍କ ଆଦେଶ ସମ୍ପୂର୍ଣ୍ଣ ଯୁକ୍ତିଯୁକ୍ତ। ସୂଚନା ପ୍ରଯୁକ୍ତିବିଦ୍ୟା ଆଇନର ଧାରା ୬୯ଏ ଅନୁଯାୟୀ କୌଣସି ପ୍ଲାଟଫର୍ମକୁ ବ୍ୟାନ୍ କରାଯାଇପାରିବ ବୋଲି ସେ ସ୍ପଷ୍ଟ କରିଛନ୍ତି। ଜୁନ୍ ୨୧ରେ ଅନୁଷ୍ଠିତ ହେବାକୁ ଥିବା ନିଟ୍ ପରୀକ୍ଷା ପୂର୍ବରୁ ଗୁଜବ ଏବଂ ପରୀକ୍ଷା ଜାଲିଆତିକୁ ରୋକିବା ପାଇଁ ନ୍ୟାସନାଲ ଟେଷ୍ଟିଂ ଏଜେନ୍ସି (NTA) ର ସୁପାରିଶ କ୍ରମେ କେନ୍ଦ୍ର ସରକାର ଏହି ଅସ୍ଥାୟୀ କଟକଣା ଲଗାଇଥିଲେ। ଏହି ପ୍ରତିବନ୍ଧକ ଜୁନ୍ ୨୨ ପର୍ଯ୍ୟନ୍ତ ବଳବତ୍ତର ରହିବ।

ଅଦାଲତରେ କେନ୍ଦ୍ର ସରକାରଙ୍କ ପକ୍ଷରୁ ଆଟର୍ଣ୍ଣି ଜେନେରାଲ୍ ଆର୍ ଭେଙ୍କଟରମଣୀ ଏହି ପ୍ଲାଟଫର୍ମର ସ୍ୱତନ୍ତ୍ର ଆର୍କିଟେକ୍ଚରକୁ ଏକ "ଫ୍ରାଙ୍କେନଷ୍ଟାଇନ୍" ବୋଲି ଅଭିହିତ କରିଥିଲେ। ସଲିସିଟର ଜେନେରାଲ୍ ତୁଷାର ମେହେଟ୍ଟା ଯୁକ୍ତି ବାଢ଼ିଥିଲେ ଯେ ଟେଲିଗ୍ରାମରେ ଜଣେ ୟୁଜର ୪୦ ଟି ବଟ୍ (40 bots) ତିଆରି କରିପାରିବେ ଏବଂ ଏହା କ୍ଲାଉଡ୍ ମାଧ୍ୟମରେ କାର୍ଯ୍ୟ କରୁଥିବାରୁ ଆଇନ ଶୃଙ୍ଖଳା ରକ୍ଷାକାରୀ ସଂସ୍ଥା ପ୍ରକୃତ ବ୍ୟବହାରକାରୀଙ୍କ ନିକଟରେ ପହଞ୍ଚିବା କଷ୍ଟକର। ଏଥିସହ, ଜାଲିଆତିକୁ ରୋକିବା ପାଇଁ ଟେଲିଗ୍ରାମର 'ମେସେଜ୍ ଏଡିଟିଂ' ଫିଚରକୁ ଭାରତରେ ଜୁନ୍ ୩୦ ପର୍ଯ୍ୟନ୍ତ ବନ୍ଦ ରଖାଯିବ ବୋଲି କେନ୍ଦ୍ର କୋର୍ଟଙ୍କୁ ଜଣାଇଛି।

ସୂଚନାଯୋଗ୍ୟ ଯେ, ପ୍ରଶ୍ନପତ୍ର ଲିକ୍ ପ୍ରମାଣ ମିଳିବା ପରେ କର୍ତ୍ତୃପକ୍ଷ ମୂଳ ନିଟ୍ ୟୁଜି ପରୀକ୍ଷାକୁ ବାତିଲ୍ କରିଥିଲେ ଏବଂ ପ୍ରଭାବିତ ଛାତ୍ରଛାତ୍ରୀଙ୍କ ପାଇଁ ଜୁନ୍ ୨୧ ରେ ପୁନଃ ପରୀକ୍ଷା ଧାର୍ଯ୍ୟ ହୋଇଥିଲା। ଅଧିକାରୀଙ୍କ ସୂଚନା ଅନୁଯାୟୀ, ଟେଲିଗ୍ରାମରେ ଥିବା ବିଭିନ୍ନ ଚ୍ୟାନେଲ୍ ଟଙ୍କା ବିନିମୟରେ ପୁନଃ ପରୀକ୍ଷା ପ୍ରଶ୍ନପତ୍ର ଯୋଗାଇଦେବାର ଦାବି କରିଥିଲେ। ତେଣୁ ଏଭଳି ସଙ୍ଗଠିତ ଜାଲିଆତି ରାକେଟ୍ ଗୁଡ଼ିକୁ ରୋକିବା ପାଇଁ ସରକାର ଏହି ପଦକ୍ଷେପ ନେଇଛନ୍ତି।

ଜୁନ୍ ୨୧ ତାରିଖରେ ହେବାକୁ ଥିବା ନିଟ୍-ୟୁଜି (NEET-UG) ପୁନଃ ପରୀକ୍ଷା ପୂର୍ବରୁ ଲୋକପ୍ରିୟ ମେସେଜିଂ ଆପ୍ ଟେଲିଗ୍ରାମ୍ (Telegram) ଉପରେ କେନ୍ଦ୍ର ସରକାର ଲଗାଇଥିବା ଅସ୍ଥାୟୀ ପ୍ରତିବନ୍ଧକକୁ ନେଇ ଆଜି ଦିଲ୍ଲୀ ହାଇକୋର୍ଟ (Delhi High Court) କଡ଼ା ପ୍ରଶ୍ନ କରିଛନ୍ତି। କୋର୍ଟ କହିଛନ୍ତି ଯେ କେବଳ ଗୋଟିଏ ପରୀକ୍ଷା ପାଇଁ ଦେଶର ୧୫ କୋଟି ବା ୧୫୦ ମିଲିୟନ୍ ଟେଲିଗ୍ରାମ୍ ୟୁଜରଙ୍କ ଅଧିକାରକୁ କିପରି କ୍ଷୁଣ୍ଣ କରାଯାଇପାରିବ?

ଦିଲ୍ଲୀ ହାଇକୋର୍ଟଙ୍କ ପ୍ରଶ୍ନ

ଜଷ୍ଟିସ୍ ତେଜସ୍ କାରିଆ (Justice Tejas Karia) ଙ୍କ ଅଧ୍ୟକ୍ଷତାରେ ଗଠିତ ଏକ ଅବକାଶକାଳୀନ ଖଣ୍ଡପୀଠ ଏହି ମାମଲାର ଶୁଣାଣି କରିଥିଲେ। ଟେଲିଗ୍ରାମ୍ ପକ୍ଷରୁ କରାଯାଇଥିବା ଆବେଦନର ଶୁଣାଣି କରି ଖଣ୍ଡପୀଠ କେନ୍ଦ୍ର ସରକାରଙ୍କୁ ପ୍ରଶ୍ନ କରିଥିଲେ ଯେ, "କେବଳ ଏକ ନିର୍ଦ୍ଦିଷ୍ଟ ବର୍ଗର ଲୋକ ପରୀକ୍ଷା ଦେଉଥିବା କାରଣରୁ ଆମେ କିପରି ୧୫ କୋଟି ଲୋକଙ୍କ ଅଧିକାରକୁ ଛଡ଼ାଇ ନେଇପାରିବା?" ଟେଲିଗ୍ରାମ୍ ନିଜ ଆବେଦନରେ ଦର୍ଶାଇଥିଲା ଯେ ଏହି କଟକଣା ବେଆଇନ୍ ଏବଂ ଏହା ଦ୍ୱାରା ଦେଶର ବହୁସଂଖ୍ୟକ ବ୍ୟବହାରକାରୀ ପ୍ରଭାବିତ ହେଉଛନ୍ତି। ଏଥିସହ ବେଆଇନ୍ ବିଷୟବସ୍ତୁକୁ ହଟାଇବା ପାଇଁ ଆପ୍ କର୍ତ୍ତୃପକ୍ଷ ତୁରନ୍ତ ପଦକ୍ଷେପ ନେଉଛନ୍ତି ବୋଲି ମଧ୍ୟ ଯୁକ୍ତି ବାଢ଼ିଥିଲା।

କେନ୍ଦ୍ର ସରକାରଙ୍କ ଯୁକ୍ତି

କେନ୍ଦ୍ର ସରକାରଙ୍କ ପକ୍ଷରୁ ହାଜର ହୋଇଥିବା ସଲିସିଟର ଜେନେରାଲ (SG) ତୁଷାର ମେହେଟ୍ଟା (Tushar Mehta) କୋର୍ଟରେ ଏହି କଟକଣାକୁ ସମର୍ଥନ କରିଥିଲେ। ସେ ଯୁକ୍ତି କରିଥିଲେ ଯେ, ଟେଲିଗ୍ରାମରେ ଏକାଧିକ ବେଆଇନ୍ ଗ୍ରୁପ୍ ଏବଂ ଚ୍ୟାନେଲ୍ ସକ୍ରିୟ ଅଛନ୍ତି, ଯାହା ଅନ୍ୟ କୌଣସି ପ୍ଲାଟଫର୍ମରେ ଦେଖିବାକୁ ମିଳେ ନାହିଁ। ସେ ଏହା ମଧ୍ୟ ଦର୍ଶାଇଥିଲେ ଯେ ଏହି ପ୍ଲାଟଫର୍ମରେ ଚାଲିଥିବା କାର୍ଯ୍ୟକଳାପ ଅତ୍ୟନ୍ତ ଆଶ୍ଚର୍ଯ୍ୟଜନକ ଏବଂ ଅଭିଯୋଗ ପରେ ମଧ୍ୟ ଆପ୍ କର୍ତ୍ତୃପକ୍ଷ ଏହାକୁ ହଟାଉନାହାନ୍ତି। ଟେଲିଗ୍ରାମ୍ କ୍ଲାଉଡ୍-ବେସଡ୍ (cloud-based) ହୋଇଥିବାରୁ, ବେଆଇନ୍ କାର୍ଯ୍ୟକଳାପ ପଛରେ ଥିବା ପ୍ରକୃତ ବ୍ୟବହାରକାରୀଙ୍କୁ ଠାବ କରିବାରେ ଆଇନ ଶୃଙ୍ଖଳା ଏଜେନ୍ସିଗୁଡ଼ିକୁ ବହୁ ଅସୁବିଧାର ସମ୍ମୁଖୀନ ହେବାକୁ ପଡ଼ୁଛି। ଏକ ଆକାଉଣ୍ଟକୁ ବ୍ଲକ୍ କରାଗଲେ ମଧ୍ୟ ସେହି ବ୍ୟକ୍ତିଙ୍କୁ ଚିହ୍ନଟ କରିବା କଷ୍ଟକର ହୋଇପଡ଼ୁଛି।

କାହିଁକି ବ୍ୟାନ୍ ହେଲା ଟେଲିଗ୍ରାମ୍?

ଆସନ୍ତା ଜୁନ୍ ୨୧ ତାରିଖରେ ହେବାକୁ ଥିବା ନିଟ୍ (NEET) ପୁନଃ ପରୀକ୍ଷାର ଗୋଟିଏ ଦିନ ପରେ ଅର୍ଥାତ୍ ଜୁନ୍ ୨୨ ତାରିଖ ପର୍ଯ୍ୟନ୍ତ ଭାରତରେ ଟେଲିଗ୍ରାମ୍ ବ୍ୟବହାର ଉପରେ ଜାତୀୟ ପରୀକ୍ଷା ଏଜେନ୍ସି (NTA) ପ୍ରତିବନ୍ଧକ ଲଗାଇଥିଲେ। ନିକଟରେ ହୋଇଥିବା ପରୀକ୍ଷା ପ୍ରଶ୍ନପତ୍ର ଲିକ୍ ବିବାଦ ଏବଂ ଅନ୍ୟାନ୍ୟ ଅନିୟମିତତାକୁ ରୋକିବା ତଥା ପରୀକ୍ଷାକୁ ସ୍ୱଚ୍ଛତାର ସହ ପରିଚାଳନା କରିବା ପାଇଁ ଏହି ପଦକ୍ଷେପ ନିଆଯାଇଛି। ବର୍ତ୍ତମାନ ଏହି ମାମଲାରେ ହାଇକୋର୍ଟଙ୍କ ପରବର୍ତ୍ତୀ ଶୁଣାଣି ଉପରେ ସମସ୍ତଙ୍କ ନଜର ରହିଛି।

ଲୋକପ୍ରିୟ ମେସେଜିଂ ଆପ୍ ଟେଲିଗ୍ରାମ (Telegram) କୁ ନେଇ ଭାରତରେ ବିବାଦ ତୀବ୍ର ହେବାରେ ଲାଗିଛି। ଭାରତରେ ଏହି ଆପ୍‌କୁ ସାମୟିକ ଭାବେ ବ୍ୟାନ୍ କରାଯିବା ନିଷ୍ପତ୍ତିକୁ ବିରୋଧ କରି ଟେଲିଗ୍ରାମ କୋର୍ଟର ଦ୍ୱାରସ୍ଥ ହୋଇଛି। ତେବେ ଏହି ବିବାଦ ମଧ୍ୟରେ କେନ୍ଦ୍ର ସରକାର ଦିଲ୍ଲୀ ହାଇକୋର୍ଟରେ ଏକ ବଡ଼ ଦାବି ଉପସ୍ଥାପନ କରିଛନ୍ତି। ସରକାରଙ୍କ କହିବା ଅନୁଯାୟୀ, ଟେଲିଗ୍ରାମ ଏବେ ଆତଙ୍କବାଦୀ ଗତିବିଧି ପାଇଁ ସବୁଠାରୁ ସହଜ ଏବଂ ସୁବିଧାଜନକ ପ୍ଲାଟଫର୍ମରେ ପରିଣତ ହୋଇଛି।

ନିଟ୍ (NEET) ପରୀକ୍ଷା ପାଇଁ ଲାଗିଥିଲା କଟକଣା

ସୂଚନାଯୋଗ୍ୟ ଯେ, ଆଗାମୀ ଦିନରେ ହେବାକୁ ଥିବା ନିଟ୍ (NEET) ୨୦୨୬ ରି-ଏକ୍ସାମ୍ ପୂର୍ବରୁ ପ୍ରଶ୍ନପତ୍ର ଲିକ୍ ଆଶଙ୍କା କରି ଭାରତ ସରକାର ଏହି ସିକ୍ୟୁର୍ ମେସେଜିଂ ଆପ୍‌ ଉପରେ ସପ୍ତାହେ ପାଇଁ କଟକଣା ଲଗାଇଥିଲେ। ସରକାରଙ୍କ ଏହି ଅସ୍ଥାୟୀ ବ୍ୟାନ୍ ନିଷ୍ପତ୍ତି ବିରୋଧରେ ଟେଲିଗ୍ରାମ ତୁରନ୍ତ ଦିଲ୍ଲୀ ହାଇକୋର୍ଟଙ୍କ ଆଶ୍ରୟ ନେଇଥିଲା। ଆପ୍ ପକ୍ଷରୁ ଏହି କଟକଣାକୁ ଚ୍ୟାଲେଞ୍ଜ କରାଯିବା ପରେ ମାମଲାର ଶୁଣାଣି ଆରମ୍ଭ ହୋଇଛି।

କୋର୍ଟରେ କେନ୍ଦ୍ର ସରକାରଙ୍କ ଦଲିଲ୍

ମାମଲାର ଶୁଣାଣି ପୂର୍ବରୁ ସଲିସିଟର ଜେନେରାଲ ଅଦାଲତଙ୍କୁ ଅବଗତ କରାଇଛନ୍ତି ଯେ, ଏହି ପ୍ରସଙ୍ଗରେ ସରକାରଙ୍କ ପକ୍ଷରୁ ଏକ ବିସ୍ତୃତ ଜବାବ କୋର୍ଟ ରେଜିଷ୍ଟ୍ରିରେ ଦାଖଲ କରାଯାଇଛି। ରେକର୍ଡକୁ ଆସିବା ମାତ୍ରେ ଏହି ମାମଲାର ପରବର୍ତ୍ତୀ ଶୁଣାଣି ଆରମ୍ଭ ହେବ। କେନ୍ଦ୍ର ସରକାର ସ୍ପଷ୍ଟ କରିଛନ୍ତି ଯେ, କେବଳ ପରୀକ୍ଷା ପରିଚାଳନାରେ ଅନିୟମିତତା ନୁହେଁ, ବରଂ ଜାତୀୟ ସୁରକ୍ଷା ଦୃଷ୍ଟିରୁ ମଧ୍ୟ ଏହି ଆପ୍‌ର ବ୍ୟାପକ ଦୁରୁପଯୋଗ କରାଯାଉଛି। ଟେଲିଗ୍ରାମର ସୁରକ୍ଷା ବ୍ୟବସ୍ଥା ଏବଂ ଏନ୍‌କ୍ରିପ୍ସନ୍ କାରଣରୁ ଏହା ଆତଙ୍କବାଦୀ ସଙ୍ଗଠନଗୁଡ଼ିକ ପାଇଁ ଯୋଗାଯୋଗର ଏକ ପ୍ରମୁଖ ମାଧ୍ୟମ ପାଲଟିଛି ବୋଲି ସରକାର ନିଜ ଯୁକ୍ତିରେ ଦର୍ଶାଇଛନ୍ତି।

ଲୋକପ୍ରିୟ ତେଲୁଗୁ ଅଭିନେତା ନାଗା ଚୈତନ୍ୟଙ୍କୁ ଏକ ବଡ଼ ଆଶ୍ୱସ୍ତି ମିଳିଛି। ତାଙ୍କ ନାମ, ଛବି ଏବଂ ସ୍ୱରକୁ ବ୍ୟବହାର କରି ତିଆରି କରାଯାଇଥିବା ଅଶ୍ଳୀଳ, ଡିପଫେକ୍ ଏବଂ ଏଆଇ (AI) କଣ୍ଟେଣ୍ଟକୁ ଇଣ୍ଟରନେଟରୁ ତୁରନ୍ତ ହଟାଇବାକୁ ଦିଲ୍ଲୀ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। କୋର୍ଟ ବିଭିନ୍ନ ୱେବସାଇଟ୍ ଏବଂ ଅନଲାଇନ୍ ପ୍ଲାଟଫର୍ମଗୁଡ଼ିକୁ ଏହି ଆଦେଶ ପାଳନ କରିବା ପାଇଁ ମାତ୍ର ୨୪ ଘଣ୍ଟାର ସମୟସୀମା ଦେଇଛନ୍ତି।

ବ୍ୟକ୍ତିଗତ ଅଧିକାରର ସୁରକ୍ଷା

ଦିଲ୍ଲୀ ହାଇକୋର୍ଟର ବିଚାରପତି ଜଷ୍ଟିସ୍ ଜ୍ୟୋତି ସିଂହଙ୍କ ଖଣ୍ଡପୀଠ ଏହି ମାମଲାର ଶୁଣାଣି କରି ଅଭିନେତାଙ୍କ ସପକ୍ଷରେ ଅନ୍ତରୀଣ ସୁରକ୍ଷା ପ୍ରଦାନ କରିଛନ୍ତି। ନାଗା ଚୈତନ୍ୟଙ୍କ ବିନା ଅନୁମତିରେ ତାଙ୍କର ବ୍ୟକ୍ତିଗତ ପରିଚୟ, ଛବି, ସ୍ୱର ଏବଂ ଷ୍ଟାଇଲକୁ ପର୍ଣ୍ଣୋଗ୍ରାଫିକ୍ ୱେବସାଇଟ୍, ୟୁଟ୍ୟୁବ୍ ଚ୍ୟାନେଲ୍ ଏବଂ ଅନ୍ୟାନ୍ୟ ଅନଲାଇନ୍ ସପିଂ ପ୍ଲାଟଫର୍ମରେ ବ୍ୟବହାର କରାଯାଉଥିଲା। କୋର୍ଟ ଏହାକୁ ଦୃଷ୍ଟିରେ ରଖି କହିଛନ୍ତି ଯେ, ଅଭିନେତାଙ୍କର ଏକ ସୁଦୀର୍ଘ ୧୫ ବର୍ଷରୁ ଅଧିକ ସମୟର କ୍ୟାରିୟର ରହିଛି। ଯଦି ଏହିପରି ନକଲି ଏବଂ ମାନହାନିକାରକ କଣ୍ଟେଣ୍ଟକୁ ନରୋକାଯାଏ, ତେବେ ତାଙ୍କ ସମ୍ମାନ ଏବଂ ବୃତ୍ତିଗତ ଭାବମୂର୍ତ୍ତି ଉପରେ ଗଭୀର ପ୍ରଭାବ ପଡ଼ିବ।

କ'ଣ ଥିଲା ମାମଲା?

ନାଗା ଚୈତନ୍ୟ ନିଜର "ପର୍ସନାଲିଟି ରାଇଟ୍ସ" ବା ବ୍ୟକ୍ତିଗତ ଅଧିକାରର ସୁରକ୍ଷା ଦାବି କରି ଦିଲ୍ଲୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ତାଙ୍କ ପକ୍ଷରୁ ବରିଷ୍ଠ ଆଇନଜୀବୀ ବୈଭବ ଗଗ୍ଗର କୋର୍ଟରେ ଯୁକ୍ତି ବାଢ଼ିଥିଲେ ଯେ, ଏଆଇ ଟେକ୍ନୋଲୋଜି ମାଧ୍ୟମରେ ଅଭିନେତାଙ୍କୁ ଆପତ୍ତିଜନକ ସ୍ଥିତିରେ ଦର୍ଶାଉଥିବା ଡିପଫେକ୍ ଭିଡିଓ ଭାଇରାଲ୍ କରାଯାଉଛି। କେବଳ ସେତିକି ନୁହେଁ, ତାଙ୍କର ପୂର୍ବତନ ପତ୍ନୀଙ୍କ ସହିତ ଯୋଡ଼ି ଅନେକ ମିଥ୍ୟା ଏବଂ ମାନହାନିକାରକ ତଥ୍ୟ ମଧ୍ୟ ପ୍ରଚାର କରାଯାଉଛି, ଯାହା ତାଙ୍କ ବ୍ୟକ୍ତିଗତ ଜୀବନକୁ କ୍ଷତି ପହଞ୍ଚାଉଛି।

କୋର୍ଟଙ୍କ କଡ଼ା ନିର୍ଦ୍ଦେଶ

ଏହି ସମସ୍ତ ତଥ୍ୟକୁ ଭିତ୍ତି କରି କୋର୍ଟ ସମ୍ପୃକ୍ତ ୱେବସାଇଟ୍, ୟୁଟ୍ୟୁବ୍ ଏବଂ ଅନ୍ୟାନ୍ୟ ପ୍ଲାଟଫର୍ମକୁ କଡ଼ା ନିର୍ଦ୍ଦେଶ ଦେଇଛନ୍ତି। ନାଗା ଚୈତନ୍ୟଙ୍କ ନାମ ଓ ଛବି ବ୍ୟବହାର କରି ବିକ୍ରି ହେଉଥିବା ଅନଧିକୃତ ସାମଗ୍ରୀ ତଥା ଅଶ୍ଳୀଳ ଏଆଇ ଭିଡିଓଗୁଡ଼ିକୁ କୋର୍ଟର ଆଦେଶ ମିଳିବାର ୨୪ ଘଣ୍ଟା ମଧ୍ୟରେ ବ୍ଲକ୍ କିମ୍ବା ଡିଲିଟ୍ କରିବାକୁ ବାଧ୍ୟତାମୂଳକ କରାଯାଇଛି। ସାଇବର ଅପରାଧ ଏବଂ ଡିପଫେକ୍ ଭଳି ଆଧୁନିକ ସମସ୍ୟା ବିରୋଧରେ କୋର୍ଟଙ୍କ ଏହି ପଦକ୍ଷେପକୁ ଏକ ଗୁରୁତ୍ୱପୂର୍ଣ୍ଣ ରାୟ ଭାବେ ଗ୍ରହଣ କରାଯାଉଛି।

ଭାରତୀୟ କୁସ୍ତି ମହାସଂଘ (ଡବ୍ଲ୍ୟୁଏଫଆଇ) ଏବଂ ଷ୍ଟାର୍ ରେସଲର ବିନେଶ ଫୋଗାଟଙ୍କ ମଧ୍ୟରେ ଲାଗି ରହିଥିବା ବିବାଦରେ ଦିଲ୍ଲୀ ହାଇକୋର୍ଟ ହସ୍ତକ୍ଷେପ କରିଛନ୍ତି। ୨୦୨୬ ଏସୀୟ କ୍ରୀଡ଼ା ଟ୍ରାଏଲ୍‌ରୁ ବିନେଶଙ୍କୁ ବାଦ୍ ଦେବା ଏବଂ ତାଙ୍କୁ ଅଯୋଗ୍ୟ ଘୋଷଣା କରିବା ନିଷ୍ପତ୍ତିକୁ ନେଇ କୋର୍ଟ ଡବ୍ଲ୍ୟୁଏଫଆଇକୁ କଡ଼ା ଭାଷାରେ ସମାଲୋଚନା କରିଛନ୍ତି। ଖେଳାଳି ଏବଂ ପ୍ରଶାସନ ମଧ୍ୟରେ ଚାଲିଥିବା ବିବାଦ ଯୋଗୁଁ "କୁସ୍ତି କାହିଁକି କ୍ଷତି ସହିବ?" ବୋଲି କୋର୍ଟ ପ୍ରଶ୍ନ କରିଛନ୍ତି।

ମାତୃତ୍ୱ କୌଣସି ଖେଳାଳିଙ୍କ ପାଇଁ ବାଧକ ନୁହେଁ

ଗତ ଜୁଲାଇ ୨୦୨୫ରେ ବିନେଶ ଏକ ସନ୍ତାନର ମା' ହୋଇଥିଲେ। ମାତୃତ୍ୱ ଅବକାଶ ପରେ ସେ ପୁଣିଥରେ କୁସ୍ତିକୁ ଫେରିବା ପାଇଁ ପ୍ରସ୍ତୁତି କରୁଛନ୍ତି। ତେବେ ଡବ୍ଲ୍ୟୁଏଫଆଇ ତାଙ୍କୁ ଟ୍ରାଏଲ୍‌ରୁ ବାଦ୍ ଦେବା ଘଟଣାରେ ଅସନ୍ତୋଷ ବ୍ୟକ୍ତ କରି ଖଣ୍ଡପୀଠ କହିଛନ୍ତି ଯେ, "ଦେଶରେ ମାତୃତ୍ୱକୁ ସମ୍ମାନ ଦିଆଯାଏ, ଏହା କୌଣସି ବ୍ୟକ୍ତିଙ୍କ କ୍ୟାରିଅର୍ ପାଇଁ କ୍ଷତିକାରକ ହେବା ଉଚିତ ନୁହେଁ।" ସଂଘ ନିଜର ପୁରୁଣା ଚୟନ ନିୟମରେ ଆଣିଥିବା ପରିବର୍ତ୍ତନ ଉପରେ କୋର୍ଟ ପ୍ରଶ୍ନ ଉଠାଇବା ସହ ଏହା ପ୍ରତିଶୋଧ ମୂଳକ ନହେବା ଉଚିତ ବୋଲି ଚେତାବନୀ ଦେଇଛନ୍ତି।

କେନ୍ଦ୍ରକୁ ବିଶେଷଜ୍ଞ କମିଟି ଗଠନ ପାଇଁ ନିର୍ଦ୍ଦେଶ

ଦିଲ୍ଲୀ ହାଇକୋର୍ଟ କେନ୍ଦ୍ର ସରକାରଙ୍କୁ ଏକ ବିଶେଷଜ୍ଞ କମିଟି ଗଠନ କରିବାକୁ ନିର୍ଦ୍ଦେଶ ଦେଇଛନ୍ତି। ଏହି କମିଟି ବିନେଶ ଫୋଗାଟଙ୍କ ଫିଟନେସ୍ ଏବଂ ଯୋଗ୍ୟତା ଯାଞ୍ଚ କରିବ। ଆସନ୍ତା ମେ ୩୦ ଏବଂ ୩୧ ତାରିଖରେ ହେବାକୁ ଥିବା ଏସୀୟ କ୍ରୀଡ଼ା ଟ୍ରାଏଲ୍‌ରେ ବିନେଶଙ୍କ ଅଂଶଗ୍ରହଣ ସୁନିଶ୍ଚିତ କରିବାକୁ କୋର୍ଟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ବିବାଦ ଯୋଗୁଁ କୌଣସି ପ୍ରତିଭାବାନ ଖେଳାଳିଙ୍କ ଭବିଷ୍ୟତ ନଷ୍ଟ ହେବା ଅନୁଚିତ ବୋଲି କୋର୍ଟ ସ୍ପଷ୍ଟ କରିଛନ୍ତି।

କ’ଣ ଥିଲା ସମ୍ପୂର୍ଣ୍ଣ ବିବାଦ?

ଗତ ମେ ୯ ତାରିଖରେ ଡବ୍ଲ୍ୟୁଏଫଆଇ ବିନେଶ ଫୋଗାଟଙ୍କୁ ଏକ ୧୫-ପୃଷ୍ଠାର କାରଣ ଦର୍ଶାଅ ନୋଟିସ୍ ଜାରି କରିଥିଲା। ଏଥିରେ ତାଙ୍କ ବିରୋଧରେ ବିଶୃଙ୍ଖଳା, ଆଣ୍ଟି-ଡୋପିଂ ପ୍ରକ୍ରିୟା ଉଲ୍ଲଂଘନ ଏବଂ ପ୍ୟାରିସ୍ ଅଲିମ୍ପିକ୍ସରେ ଭାରତୀୟ କୁସ୍ତିକୁ ବଦନାମ କରିଥିବା ଅଭିଯୋଗ ହୋଇଥିଲା। ଏହା ସହ ଆଣ୍ଟି-ଡୋପିଂ ନିୟମ ଅଧୀନରେ ଥିବା ୬ ମାସିଆ ନୋଟିସ୍ ଅବଧିକୁ ଦର୍ଶାଇ ଜୁନ୍ ୨୬, ୨୦୨୬ ପର୍ଯ୍ୟନ୍ତ ତାଙ୍କୁ ସମସ୍ତ ଘରୋଇ ପ୍ରତିଯୋଗିତାରୁ ବାସନ୍ଦ କରାଯାଇଥିଲା। ଏହା ବିରୋଧରେ ବିନେଶ ହାଇକୋର୍ଟଙ୍କ ଦ୍ୱାରସ୍ଥ ହୋଇ ଅଭିଯୋଗ କରିଥିଲେ ଯେ, କେବଳ ତାଙ୍କୁ ଟ୍ରାଏଲ୍‌ରୁ ବାହାର କରିବା ଉଦ୍ଦେଶ୍ୟରେ ଡବ୍ଲ୍ୟୁଏଫଆଇ ଘରୋଇ ପଦକ ବିଜେତାଙ୍କୁ ସୁଯୋଗ ଦେବା ନେଇ ଚୟନ ପ୍ରକ୍ରିୟାରେ ଅଚାନକ ପରିବର୍ତ୍ତନ କରିଛି।

ପ୍ରସିଦ୍ଧ ର‍୍ୟାପର୍ ୟୋ ୟୋ ହନି ସିଂହ ଏକ ବଡ଼ ବିବାଦକୁ ନେଇ ନିଜର ପ୍ରତିକ୍ରିୟା ରଖିଛନ୍ତି। ଦିଲ୍ଲୀ ହାଇକୋର୍ଟରେ ସେ ସ୍ପଷ୍ଟ କରିଛନ୍ତି ଯେ, ସେ କୌଣସି ଅଶ୍ଳୀଳ ଗୀତ ବିଶେଷକରି ୨୦୦୬ ମସିହାର ବିବାଦୀୟ ଟ୍ରାକ୍ 'ଭଲ୍ୟୁମ୍-୧' (Vol. 1) ଗାଇନାହାନ୍ତି। ଏହି ଗୀତଟି ତାଙ୍କ ଏବଂ ବାଦଶାହଙ୍କ ସହଭାଗିତାରେ ଗଠିତ 'ମାଫିଆ ମୁଣ୍ଡିର୍' ନାମକ ବ୍ୟାଣ୍ଡ ଦ୍ୱାରା ରିଲିଜ୍ କରାଯାଇଥିବା ନେଇ ଅଭିଯୋଗ ହୋଇଥିଲା। ଏହି ମାମଲାକୁ ନେଇ ଏବେ କୋର୍ଟରେ ଶୁଣାଣି ଚାଲିଛି।

ହିନ୍ଦୁ ଶକ୍ତି ଦଳର ପିଟିସନ୍ ଓ ଅଭିଯୋଗ

ଏହି ମାମଲାଟି ହିନ୍ଦୁ ଶକ୍ତି ଦଳ ନାମକ ଏକ ସଂଗଠନ ପକ୍ଷରୁ କୋର୍ଟରେ ଦାଖଲ କରାଯାଇଥିଲା। ସମସ୍ତ ଅନଲାଇନ୍ ପ୍ଲାଟଫର୍ମରୁ ଏହି ଅଶ୍ଳୀଳ ଗୀତକୁ ହଟାଇବା ପାଇଁ ସେମାନେ ନିବେଦନ କରିଥିଲେ। ପିଟିସନରରେ ଅଭିଯୋଗ କରାଯାଇଥିଲା ଯେ, ମାର୍ଚ୍ଚ ୧, ୨୦୨୫ ତାରିଖରେ ଦିଲ୍ଲୀର ଇନ୍ଦିରା ଗାନ୍ଧୀ ଇନଡୋର୍ ଷ୍ଟାଡିୟମରେ ଅନୁଷ୍ଠିତ ଏକ କାର୍ଯ୍ୟକ୍ରମରେ ହନି ସିଂହ ଏହି ଗୀତର କିଛି ଧାଡ଼ି ଗାଇଥିଲେ, ଯେଉଁଠାରେ ୫୦,୦୦୦ ରୁ ଅଧିକ ଦର୍ଶକ ଉପସ୍ଥିତ ଥିଲେ।

ଅଭିଯୋଗକୁ ଖଣ୍ଡନ କଲେ ହନି ସିଂହ

ଏହି ଅଭିଯୋଗକୁ ହନି ସିଂହଙ୍କ ଓକିଲ ସମ୍ପୂର୍ଣ୍ଣ ଭାବରେ ଖଣ୍ଡନ କରିଛନ୍ତି। ସେ କୋର୍ଟରେ କହିଛନ୍ତି ଯେ, "ଏପରି କୌଣସି ଘଟଣା ଘଟିନାହିଁ। ମୁଁ ସେହି ଗୀତ ଗାଇନାହିଁ। ଯଦି ୫୦ ହଜାର ଦର୍ଶକଙ୍କ ସାମ୍ନାରେ ଏଭଳି କିଛି ଘଟିଥାନ୍ତା, ତେବେ ନିଶ୍ଚିତ ଭାବରେ ଏହାର ଗୋଟିଏ ହେଲେ ଭିଡିଓ କ୍ଲିପ୍ ଥାଆନ୍ତା"। ତାଙ୍କ ଓକିଲ ଆହୁରି ମଧ୍ୟ କହିଛନ୍ତି ଯେ, ଏହି ଗୀତ ଉପରୁ ନିଜର ନାମ ହଟାଇବା ଏବଂ କୋର୍ଟଙ୍କୁ ସହଯୋଗ କରିବା ପାଇଁ ହନି ସିଂହ ସର୍ବସାଧାରଣରେ ମଧ୍ୟ ଏହା ତାଙ୍କ ଗୀତ ନୁହେଁ ବୋଲି ସ୍ପଷ୍ଟ କରିସାରିଛନ୍ତି।

କୋର୍ଟଙ୍କ ନିର୍ଦ୍ଦେଶ ଓ ପରବର୍ତ୍ତୀ ପଦକ୍ଷେପ

ଏହି ମାମଲାର ଶୁଣାଣି କରୁଥିବା ବିଚାରପତି ପୁରୁଷେନ୍ଦ୍ର କୁମାର କୌରବ ଏହାକୁ ଏକ 'ଗମ୍ଭୀର ମାମଲା' ବୋଲି କହିଛନ୍ତି। କୋର୍ଟ ହନି ସିଂହଙ୍କୁ ଏହି ପ୍ରସଙ୍ଗରେ ନିଜର ପକ୍ଷ ରଖି ଏକ ସତ୍ୟପାଠ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି। ଏଥିସହିତ ସହ-ଗାୟକ ବାଦଶାହଙ୍କୁ ମଧ୍ୟ ନୋଟିସ୍ ପଠାଇବା ପାଇଁ ନିର୍ଦ୍ଦେଶ ଦିଆଯାଇଛି। ଆସନ୍ତା ମେ' ୧୯ ତାରିଖରେ ଏହି ମାମଲାର ପରବର୍ତ୍ତୀ ଶୁଣାଣି ହେବ। ସୂଚନାଯୋଗ୍ୟ ଯେ, ଗତ ଏପ୍ରିଲ୍ ୨ ତାରିଖରେ କୋର୍ଟ ଏହି ଅଶ୍ଳୀଳ ଗୀତକୁ ସମସ୍ତ ପ୍ଲାଟଫର୍ମରୁ ହଟାଇବାକୁ କଡ଼ା ନିର୍ଦ୍ଦେଶ ଦେଇଥିଲେ ।