ବଲାଙ୍ଗୀର : ବହୁ ଚର୍ଚ୍ଚିତ ମମିତା ହତ୍ୟାକାଣ୍ଡ ପ୍ରସଙ୍ଗରେ ପୁଲିସ ତାର କର୍ତ୍ତବ୍ୟ ସଂପାଦନ କରିବାରେ କୌଣସି ହେଳା କରିନାହିଁ । ତଦନ୍ତରେ ସଂପୂର୍ଣ ସ୍ଵଚ୍ଛତା ଅବଲମ୍ବନ କରାଯାଇଛି । ଆଉ ପୁଲିସର ତଦନ୍ତ ନେଇ ଉଠିଥିବା ସମସ୍ତ ଅଭିଯୋଗ ନିରାଧାର ବୋଲି ଆଜି ଉତ୍ତରାଞ୍ଚଳ ଡିଆଇଜି ଡ . ଦୀପକ କୁମାର ଏକ ସାମ୍ବାଦିକ ସମ୍ମିଳନୀରେ କହିଛନ୍ତି। ପୁଲିସ ପ୍ରଫେସନାଲ କାର୍ଯ୍ୟ କରୁଛି।ଘଟଣାକୁ ଗୁରୁତ୍ୱର ସହ ନେଇଛି ଏବଂ ତଦନ୍ତ ଯେଉଁ ଦିଗରେ ଯିବା କଥା ପୁଲିସ ତାର କର୍ତ୍ତବ୍ୟ ସୂଚାରୁ ରୂପେ ନିଭାଇଛି ।ବର୍ତ୍ତମାନ ପର୍ଯ୍ୟନ୍ତ ପୁଲିସ ଜାରି ରଖିଥିବା ତଦନ୍ତରେ କେବଳ ଦୁଇ ଜଣ ଦୋଷୀ ରହିଛନ୍ତି । ମମିତା ମେହେରକୁ ହତ୍ୟା କରିବାରେ ଯେଉଁ ଦୁଇ ଜଣଙ୍କ ସମ୍ପୃକ୍ତି ରହିଛି, ତାଙ୍କୁ ପୁଲିସ ଗିରଫ କରିଛି  ଏବଂ ଆଇନ ଅନୁଯାୟୀ ଯାହା କରିବା ପୁଲିସର ଉତ୍ତରଦାୟିତ୍ୱ ତାହା ପୁଲିସ କରିଛି ।

ପ୍ରେସମିଟରେ ଉତ୍ତରାଞ୍ଚଳ ଡିଆଇଜି ଆହୁରି ମଧ୍ୟ କହିଛନ୍ତି ଯେ ମମିତା ହତ୍ୟାକାଣ୍ଡ ଘଟଣାରେ ପୁଲିସ ଏତଲା ରଖିନଥିବା ଅଭିଯୋଗ ଭିତ୍ତିହୀନ । ପୁଲିସ ତୁରନ୍ତ ଏତଲା ରଖିବା ସହିତ ଏତଲାକାରୀଙ୍କୁ ଏହାର କପି ବି ନିର୍ଧାରିତ ସମୟରେ ପ୍ରଦାନ କରିଛି । ଏହା ପୁଲିସ ବିଭାଗର ସରକାରୀ ପୋର୍ଟାଲ୍ ସିସିଟିଏନଏସରେ ମଧ୍ୟ ସୁପ୍ରିମକୋର୍ଟଙ୍କ ନିୟମ ଅନୁଯାୟୀ ୨୪ ଘଣ୍ଟା ମଧ୍ୟରେ ଅପଲୋଡ ହୋଇଛି । ଆଉ ଏହାକୁ ସର୍ବସାଧାରଣ ଯେତେବେଳେ ଚାହିଁବେ ଦେଖିପାରିବେ । ଏଫଆଇଆରରେ କୌଣସି ପ୍ରକାର ହେରଫେରର ସାମାନ୍ୟତମ ବି ସୁଯୋଗ ନାହିଁ ବୋଲି ଡ . କୁମାର ସ୍ପଷ୍ଟ କରିଛନ୍ତି ।

ସେହିପରି ଅକ୍ଟୋବର ୧୩ ତାରିଖରେ ଏଫ୍‌ଆଇଆର ପଞ୍ଜିକୃତ ହୋଇ ସେହିଦିନ ହିଁ କୋର୍ଟକୁ ପଠାଯାଇଥିଲା । ହେଲେ ଦଶହରା ଛୁଟି ପାଇଁ ୧୬ ତାରିଖରେ ଏହା ମାଜିଷ୍ଟ୍ରେଟ୍‌ଙ୍କ ଠାରେ ଦାଖଲ ହୋଇଥିଲା । ତେଣୁ , ଏହି କ୍ଷେତ୍ରରେ ମଧ୍ୟ ଆଦୌ ଅବହେଳା ପ୍ରଦର୍ଶନ କରାଯାଇନାହିଁ ବୋଲି ସେ ପ୍ରକାଶ କରିଛନ୍ତି । ସେହିପରି ତଦନ୍ତରେ କୌଣସି ଅବହେଳା ହୋଇନଥିବା ନେଇ ସେ ପ୍ରକାଶ କରିଛନ୍ତି । ଧାରା ୧୬୪ ସିଆର୍‌ପିସିରେ ଶହେରୁ ଅଧିକ ସାକ୍ଷୀଙ୍କ ବୟାନ ରେକର୍ଡ କରାଯାଇଥିବା ବେଳେ ବର୍ତ୍ତମାନ ସୁଦ୍ଧା ସମସ୍ତ ତଥ୍ୟ ପ୍ରମାଣ ଯୋଗାଡରେ ପୁଲିସ ସଫଳ ହୋଇଛି । ଆଉ ଏହି ସବୁ ପ୍ରମାଣ ସାକ୍ଷ୍ୟ ଅଭିଯୁକ୍ତକୁ ଦୋଷୀ ସାବ୍ୟସ୍ତ କରିବାରେ ପର୍ଯ୍ୟାପ୍ତ ବୋଲି ଆମର ବିଶ୍ଵାସ ରହିଛି ବୋଲି ସେ କହିଛନ୍ତି । ଏହାଛଡା ପୁଲିସ ତାର ସମସ୍ତ ସାଧ୍ୟ ଲଗାଇ ସଂପୂର୍ଣ ସ୍ଵଚ୍ଛତାର ସହ ଏହାର ତଦନ୍ତ କରିଛି ବୋଲି ଡ . କୁମାର କହିଛନ୍ତି । ଆଉ ଅଭିଯୁକ୍ତର ସିନ୍ ରିକ୍ରିଏସନ୍‌କୁ ପୁଲିସର ନାଟକବାଜି ବୋଲି ହୋଇଥିବା ଅଭିଯୋଗକୁ ସେ ଖଣ୍ଡନ କରିବା ସହିତ ତଦନ୍ତକୁ ପ୍ରଫେସନାଲ୍ ଭାବେ କରାଯାଇଛି ବୋଲି ସେ ସ୍ପଷ୍ଟୀକରଣ ଦେଇଛନ୍ତି । ଏହାବାଦ୍ ଅଭିଯୁକ୍ତକୁ ତ୍ଵରିତ ଦଣ୍ଡ ଦେବା ଦିଗରେ ପୁଲିସ କୌଣସି ଅବହେଳା କରିନାହିଁ କି କରିବ ନାହିଁ ବୋଲି ସେ ରୋକଠୋକ୍‌ ଶୁଣାଇଛନ୍ତି ।

ଏଥି ସହିତ ମମିତା ମେହେର ଗୋବିନ୍ଦ ସାହୁଙ୍କ ସହ ରାୟପୁର ଯାଇଥିବା ପ୍ରଶ୍ନକୁ ନେଇ ସ୍ପଷ୍ଟିକରଣ ରଖିଛନ୍ତି ଡିଆଇଡି । ସେ କହିଛନ୍ତି ପୋଲିସର ତଦନ୍ତ ଭିତ୍ତିରେ ବର୍ତ୍ତମାନ ପର୍ୟ୍ୟନ୍ତ ସେପରି କିଛି ସନ୍ଦେଶ କିମ୍ବା ପ୍ରମାଣ ମିଳିନାହିଁ ଯେ, ଅଭିଯୁକ୍ତ ସହ ପିଡ଼ିତା ରାୟପୁର ଯାଇଛନ୍ତି । ଅର୍ଥାତ ରାୟପୁର ଲିଙ୍କରେ କୌଣସି ସତ୍ୟତା ନଥିବା କହିଛନ୍ତି ଡିଆଇଡି ଦୀପକ କୁମାର ।

ବଲାଙ୍ଗିର/ କଣ୍ଟାବାଞ୍ଜି: ‘ମମିତା’ର ମୃତ୍ୟୁ ପରେ ବାପା ସୁଚନ୍ଦ୍ର ମେହେରଙ୍କ ପରିବାର ଉପରେ ଭାଙ୍ଗି ପଡ଼ିଛି ଆକାଶ । ବାପା-ମା’ଙ୍କ ଆଖିରୁ ଲୁହ ଶୁଖୁ ନାହିଁ । ଝିଅକୁ ଝୁରିଝୁରି ହୃଦ୍‌ରୋଗ ପୀଡ଼ିତା ମା’ ଘଡ଼ିକୁ ଘଡ଼ି ବେହୋସ ହୋଇ ଯାଉଛନ୍ତି। ମାତ୍ର ମମିତାର ମୃତ୍ୟୁ ଓ ତାଙ୍କର ପରିବାରର ଲୁହକୁ ନେଇ ରାଜନୀତି କରିବାକୁ ବାହାରି ପଡ଼ିଛନ୍ତି କିଛି ବିରୋଧୀ ଦଳ । ବନ୍ଦ ଡାକରା ଦେଉଛନ୍ତି, ଥାନା ଘେରାଉ କରୁଛନ୍ତି।

ଅନ୍ୟପଟେ ନିଜ କାଗଜର ବିକ୍ରି ବଢ଼ାଇବାକୁ କିଛି ଖବରକାଗଜ, ଦର୍ଶକ ସଂଖ୍ୟା ବଢ଼ାଇବାକୁ କିଛି ବୈଦ୍ୟୁତିକ ଗଣମାଧ୍ୟମ ମମିତାଙ୍କ ମୃତ୍ୟୁକୁ ନେଇ ମସଲାଦାର ଖବର ପରିବେଷଣ କରି ଆତ୍ମତୃପ୍ତି ଲାଭ କରୁଛନ୍ତି । ମାତ୍ର ପୀଡ଼ିତାଙ୍କ ପରିବାର ଏଥିରୁ କେତେ କଷ୍ଟ ପାଉଛନ୍ତି ତାହା କେହି ବୁଝିପାରୁ ନାହାନ୍ତି। ବିରୋଧୀଙ୍କ କଳରବ ଓ ନିର୍ଦ୍ଦିଷ୍ଟ ଗଣମାଧ୍ୟମର ଏତାଦୃଶ ଆଚରଣ ମମିତାଙ୍କ ପରିବାରର ଧୈର୍ଯ୍ୟର ବନ୍ଧ ଭାଙ୍ଗି ଦେଇଛି।

ବାରମ୍ବାର ପୁଲିସ ତଦନ୍ତ ପ୍ରକ୍ରିୟାରେ କୌଣସି ଆପତ୍ତି ନ ଥିବା କହି ଆସୁଥିବା ମମିତାଙ୍କ ବାପା ସୁଚନ୍ଦ୍ର ମେହେର ଆଜି ଏକ ଭିଡ଼ିଓ ବାର୍ତ୍ତାରେ ତାଙ୍କ ଝିଅ ମମିତାର ହତ୍ୟାକାଣ୍ଡ ଓ ତାଙ୍କ ପରିବାରର ଲୁହକୁ ନେଇ ରାଜନୀତି ନ କରିବାକୁ ଓ ଝିଅ ସଂକ୍ରାନ୍ତ ଖବର ପରିବେଷଣ ନ କରିବାକୁ ଗଣମାଧ୍ୟମକୁ ଅନୁରୋଧ କରିଛନ୍ତି। ସୁଚନ୍ଦ୍ର କହିଛନ୍ତି ଯେ ‘ମୋ ଝିଅ ଗୋଟିଏ ଭଲ ଝିଅ
ଥିଲା। ତା’ର ମୃତ୍ୟୁ ଆମକୁ ଭୀଷଣ କଷ୍ଟ ଦେଇଛି । ଆମେ ଘରୁ ବାହାରକୁ ବାହାରୁ ନାହୁଁ । ଘର ଭିତରେ ରହୁଛୁ। ପୁଲିସ ତଦନ୍ତରେ ଆମେମାନେ ଖୁସି ଅଛୁ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆମକୁ ନ୍ୟାୟ ଦେବେ ବୋଲି ଭରସା ରଖିଛୁ । ଗଣମାଧ୍ୟମ ଓ ରାଜନୈତିକ ଦଳଗୁଡ଼ିକୁ ଆମେ ହାତ ଯୋଡ଼ି ଅନୁରୋଧ କରୁଛୁ ଯେ ଆମ ଝିଅ ନାଁରେ ଅପପ୍ରଚାର କରନ୍ତୁ ନାହିଁ ।’

ତୁରେକେଲା ଥାନା ଝରଣୀ ଗାଁର ଘରୋଇ ସ୍କୁଲ ଶିକ୍ଷୟିତ୍ରୀ ମମିତା ମେହେରଙ୍କ ହତ୍ୟା ମାମଲା ସାମ୍ନାକୁ ଆସିବା ପରେ ବିରୋଧୀ ନେତାଙ୍କ ରାଜନୀତିର ଆଖଡ଼ାଘର ପାଲଟିଛି ଝରଣୀ ଗାଁ । ପ୍ରତିଦିନ କୌଣସି ରାଜନୈତିକ ଦଳର କେହି ନା କେହି ଆସି ମମିତାଙ୍କ ପରିବାର ସଦସ୍ୟଙ୍କୁ ଭେଟୁଛନ୍ତି ଏବଂ ଘଟଣାକୁ ନେଇ ନିଜକୁ ସୁହାଇବା ପରି ଗଣମାଧ୍ୟମରେ ପ୍ରତିକ୍ରିୟା ରଖୁଛନ୍ତି। ବାରମ୍ବାର ଏପରି ନାଟକକୁ ନେଇ ପରିବାର ଲୋକ ଅସନ୍ତୋଷ ଜାହିର କରିବା ଆରମ୍ଭ କରିଛନ୍ତି। ନିଜ ଝିଅକୁ ହରାଇଥିବା ପରିବାରଙ୍କୁ ସମବେଦନା ଜଣାଇବାକୁ ଆସୁଥିବା ଏହି ନେତାମାନେ ନିଜ ରାଜନୈତିକ ଫାଇଦା ନେବା ପାଇଁ ଚେଷ୍ଟା କରୁଥିବା ପୀଡିତାଙ୍କ ସମ୍ପର୍କୀୟମାନେ କହିଛନ୍ତି। ମମିତାଙ୍କ ପରିବାର ଲୋକଙ୍କ କହିବା ଅନୁସାରେ ଝିଅ ହତ୍ୟା ଘଟଣାକୁ ନେଇ ସେମାନେ ସମ୍ପୂର୍ଣ ଭାଙ୍ଗି ପଡ଼ିଛନ୍ତି । ତେଣୁ ମମିତାଙ୍କୁ ବଦନାମ ନ କରିବାକୁ ସେମାନେ ଅନୁରୋଧ କରିଛନ୍ତି।

ମମିତାଙ୍କ ବାପା ସୁଚନ୍ଦ୍ର ପୁଣି କହିଛନ୍ତି ଯେ ଅଭିଯୁକ୍ତ ଗୋବିନ୍ଦ ସହ ମମିତା କେବେ ବି ରାୟପୁର ଯାଇ ନ ଥିଲା । ତେଣୁ ତାହାର ଚରିତ୍ର ସଂହାର କରନ୍ତୁ ନାହିଁ। ଏହା ଆମକୁ ବହୁତ କଷ୍ଟ ଦେଉଛି । ପୁଲିସ ତଦନ୍ତ ଉପରେ ଆମର ସମ୍ପୂର୍ଣ୍ଣ ବିଶ୍ବାସ ଅଛି । ହତ୍ୟାକାରୀ ଗୋବିନ୍ଦ ସାହୁ ଧରାପଡ଼ିଛି । ଆମ ଝିଅକୁ ଯିଏ ଆମ ପାଖରୁ ଛଡ଼ାଇ ନେଇଛି, ହତ୍ୟା କରିଛି, ତାକୁ ଫାଶୀ ଦଣ୍ଡ ମିଳିବା ଦରକାର । ମାତ୍ର ଏହାକୁ ନେଇ ଆମ ଘରକୁ ବାରମ୍ବାର ଆସି ଆମକୁ କଷ୍ଟ ଦିଅନ୍ତୁ ନାହିଁ ବୋଲି ଗଣମାଧ୍ୟମ ଓ ରାଜନୈତିକ ଦଳଗୁଡ଼ିକୁ ଅନୁରୋଧ କରିଛନ୍ତି ସୁଚନ୍ଦ୍ର। ସେହିପରି ମମିତାଙ୍କ ମା’ ଜଣେ ହୃଦ୍‌ରୋଗୀ ହୋଇଥିବାବେଳେ ତାଙ୍କ ପାଇଁ ମଧ୍ୟ ଏହା କଷ୍ଟଦାୟକ ବୋଲି ମମିତାଙ୍କ ବାପା କହିଛନ୍ତି ।

ମମିତା ହତ୍ୟାକାଣ୍ଡ ସମ୍ପର୍କରେ ପୁଲିସ ପ୍ରାଥମିକ ତଦନ୍ତ ଶେଷ କରିଛି। ଅଭିଯୁକ୍ତଙ୍କୁ ଗିରଫ କରି ଜେଲ୍ ପଠାଇସାରିଛି I ତାକୁ ସହଯୋଗ କରିଥିବା କିଛି ବ୍ୟକ୍ତି ବିଶେଷ ମଧ୍ୟ ଗିରଫ ହୋଇଛନ୍ତି। ଏ ସମ୍ପର୍କରେ ଗଣମାଧ୍ୟମ ସାମ୍ନାରେ ମମିତାଙ୍କ ପରିବାର ଲୋକ ପୁଲିସ ଉପରେ ଖୋଲାଖୋଲି ଭାବରେ ସନ୍ତୁଷ୍ଟ ଥିବା କହୁଥିବାବେଳେ ବିଜେପି ଓ ଅନ୍ୟ ବିରୋଧୀ ନେତା ଏଥିରେ ଯେଉଁ ରାଜନୀତି କରୁଛନ୍ତି ତାହା ସ୍ଥାନୀୟ ଜନସାଧାରଣଙ୍କୁ ବି କ୍ଷୁବ୍ଧ କରିଛି। ତାଙ୍କ ଗାଁକୁ ରାଜନୈତିକ ପର୍ଯ୍ୟଟନସ୍ଥଳରେ ପରିଣତ ନ କରିବାକୁ ଗ୍ରାମବାସୀ ସ୍ପଷ୍ଟ ଭାବରେ କହିଛନ୍ତି। ସମବେଦନା ଅଳରେ ମମିତାଙ୍କ ପରିବାରକୁ ଯେପରି ବାରମ୍ବାର ବିଭିନ୍ନ ଦଳର ନେତାମାନେ ଯାତାୟାତ କରୁଛନ୍ତି ତାହାକୁ ନେଇ ସ୍ଥାନୀୟ ଅଂଚଳରେ ଅସନ୍ତୋଷ କୁହୁଳିବା ଆରମ୍ଭ କରିଛି ।