ନୂଆଦିଲ୍ଲୀ: ଦେଶରେ ସମ୍ପ୍ରତି ଖାଇବା ତେଲ ଦର ବଢିଚାଲିଥିବାରୁ ଖାଉଟିଙ୍କ ଚିନ୍ତା ବଢିଯାଇଛି। ଖାଇବା ତେଲର ଉଚ୍ଚ ଦର ମୁଦ୍ରାସ୍ଫୀତିକୁ ଉପରମୁହାଁ କରୁଛି। ଇତିମଧ୍ୟରେ ଗ୍ରାହକଙ୍କ ପାଇଁ ଆସିଛି ଏକ ଆଶ୍ୱସ୍ତିକର ଖବର। ଆଗାମୀ ଦିନରେ ଦେଶରେ ଖାଇବା ତେଲ ମୂଲ୍ୟରେ କେତେକାଂଶରେ ହ୍ରାସ ଦେଖିବାକୁ ମିଳିପାରେ । ଏହାର କାରଣ ହେଉଛି ଇଣ୍ଡୋନେସିଆ ସରକାର ପାମୋଲିନ୍‌ ତେଲ ରପ୍ତାନୀ ଉପରେ ଲାଗୁ କରିଥିବା କଟକଣା ହଟାଇବାକୁ ନିଷ୍ପତ୍ତି ନେଇଛନ୍ତି। ମେ’ ୨୩ରୁ ପାମୋଲିନ୍‌ ତେଲ ରପ୍ତାନୀ ଉପରେ ଲାଗୁ କରାଯାଇଥିବା କଟକଣାକୁ ଇଣ୍ଡୋନେସିଆ ପ୍ରତ୍ୟାହାର କରିନେବ। ଇଣ୍ଡୋନେସିଆର ରାଷ୍ଟ୍ରପତି ଜୋକୋ ୱିଡୋଡୋ ଏହି ଘୋଷଣା କରିଛନ୍ତି।ଇଣ୍ଡୋନେସିଆ ସରକାର ଏହି ନିଷ୍ପତ୍ତି ଦେଶର ପାମୋଲିନ୍‌ ତୈଳ ଉଦ୍ୟୋଗରେ କାମ କରୁଥିବା ୧୭ ନିୟୁତ ଅର୍ଥାତ ୧.୭୦ କୋଟି ଲୋକଙ୍କ ହିତକୁ ନଜରରେ ରଖି ନିଷ୍ପତ୍ତି ନିଆଯାଇଥିବା ସେ କହିଛନ୍ତି।

ସୂଚନାଯୋଗ୍ୟ ଯେ, ଭାରତ ନିଜ ଖାଇବା ତେଲ ଆବଶ୍ୟକତାର ଦୁଇ ତୃତୀୟାଂଶ ବିଦେଶରୁ ଆମଦାନୀ କରିଥାଏ। ରୁଷ-ୟୁକ୍ରେନ ଯୁଦ୍ଧ ଓ ଇଣ୍ଡୋନେସିଆ ଦ୍ୱାରା ରପ୍ତାନି କଟକଣା ଲାଗୁ ଯୋଗୁଁ ଦେଶରେ ଖାଇବା ତେଲ ଦର ହଠାତ୍‌ ବଢିଯାଇଛି । ଭାରତ ପ୍ରତିବର୍ଷ ପ୍ରାୟ ୧୩ ରୁ ୧୩.୫୦ ନିୟୁତ ଟନ ଖାଇବା ତେଲ ଆମଦାନୀ କରିଥାଏ। ଏଥିରୁ ୬୩ ପ୍ରତିଶତ ଅର୍ଥାତ ୮ରୁ ୮.୫୦ ନିୟୁତ ଟନ୍‌ ତେଲ ହେଉଛି ପାମୋଲିନ୍‌ ତେଲ। ଆମଦାନୀ କରାଯାଉଥିବା ୬୩ ପ୍ରତିଶତ ପାମୋଲିନ୍‌ ତେଲ ମଧ୍ୟରୁ ୪୫ ପ୍ରତିଶତ ଇଣ୍ଡୋନେସିଆରୁ ଆମଦାନୀ କରାଯାଇଥାଏ। ଦରବୃଦ୍ଧି ଯୋଗୁଁ ଦେଶର ତେଲ ଆମଦାନୀ ୧.୫ ନିୟୁତ ଟନରୁ ହ୍ରାସ ଘଟି ୧.୩ ନିୟୁତ ଟନ୍‌ ରହିଛି। ଏହାପରେ ବି ମହଙ୍ଗା ମାଡ ଯୋଗୁଁ ୨୦୨୧-୨୨ରେ ଖାଇବା ତେଲ ଆମଦାନୀ ପାଇଁ କେନ୍ଦ୍ର ସରକାରଙ୍କୁ ୧.୪ ଲକ୍ଷ କୋଟି ଟଙ୍କା ଖର୍ଚ୍ଚ କରିବାକୁ ପଡିଛି। ଏହାର ପୂର୍ବବର୍ଷରେ ତେଲ ଆମଦାନୀରେ କେନ୍ଦ୍ର ସରକାରଙ୍କୁ ୮୨,୧୨୩ କୋଟି ଟଙ୍କା ଖର୍ଚ୍ଚ କରିବାକୁ ପଡିଥିଲା।

ଉଲ୍ଲେଖଯୋଗ୍ୟ ଯେ, ସାରା ବିଶ୍ୱରେ ଖାଇବା ତେଲ ବାବଦରେ ପାମୋଲିନ୍‌ ତେଲର ସବୁଠୁ ଅଧିକ ବ୍ୟବହାର କରାଯାଏ। ବୈଶ୍ୱିକ ତୈଳ ବଜାରରେ ଏହାର ଚାହିଦା ପ୍ରାୟ ୪୦ ପ୍ରତିଶତ। ଏହାପରେ ସୋୟାବିନ୍‌ ତେଲ ୪୨ ପ୍ରତିଶତ ଏବଂ ସୋରିଷ ତେଲର ବ୍ୟବହାର ୧୫ ପ୍ରତିଶତ ରହିଛି। ଏଠାରେ ସୂଚନାଯୋଗ୍ୟ ଯେ, ଏପ୍ରିଲ ୨୮ରେ ଇନଣ୍ଡୋନେସିଆ ସରକାର ପାମୋଲିନ୍‌ ତେଲର ରପ୍ତାନୀ ଉପରେ ପ୍ରତିବନ୍ଧକ ଲାଗୁ କରିବାକୁ ନିଷ୍ପତ୍ତି ନେଇଥିଲେ। ଯେହେତୁ ଇଣ୍ଡୋନେସିଆ ସରକାର ସେଠାକାର ଘରୋଇ ବଜାରରେ ମୂଲ୍ୟକୁ ନିୟନ୍ତ୍ରଣ କରିବା ପାଇଁ ଅନ୍ୟ ଦେଶକୁ ପାମୋଲିନ୍‌ ତେଲ ରପ୍ତାନି କରିବାକୁ ମନା କରିଦେଇଥିଲେ ସେଥିପାଇଁ ଖାଇବା ତେଲ ମୂଲ୍ୟ ବଢିଯାଇଥିଲା। ବର୍ତ୍ତମାନ ସ୍ଥିତିରେ ସୁଧାର ଆସିବା ପରେ ଇଣ୍ଡୋନେସିଆ ଚଳିତମାସ ୨୩ରୁ ପାମ ତେଲ ରପ୍ତାନି ଉପରେ ପ୍ରତିବନ୍ଧକ ଉଠାଇବାକୁ ଘୋଷଣା କରିଛି। ଏହାପରେ ଭାରତର ଘରୋଇ ବଜାରରେ ପାମୋଲିନ୍‌ ତେଲ ଦରରେ ବୃଦ୍ଧି ଘଟିଥିଲା। ଏବେ ଇଣ୍ଡୋନେସିଆର ଏହି ନିଷ୍ପତ୍ତି ଭାରତରେ ଖାଉଟିଙ୍କୁ ଆଶ୍ୱସ୍ତ କରିଛି।

ନୂଆଦିଲ୍ଲୀ: ତେଲ ତାତିରେ ଖାଉଟି ଛଟପଟ। ବଜାରରେ ମହଙ୍ଗା ମାଡ଼ ୨୪ ବର୍ଷର ରେକର୍ଡ ଭାଙ୍ଗିଛି। ସମ୍ପ୍ରତି ଦେଶରେ ପେଟ୍ରୋଲ ଏବଂ ଡିଜେଲ ଦର ଏହାର ସର୍ବକାଳୀନ ରେକର୍ଡ ସ୍ତରରେ ପହଞ୍ଚିଛି। ଅତ୍ୟଧିକ ତେଲ ଦର ଯୋଗୁଁ ଦେଶର ରାଷ୍ଟ୍ରାୟତ୍ତ ତୈଳ ବିପଣନକାରୀ କମ୍ପାନୀଙ୍କୁ ଘୋର ଆର୍ଥିକ କ୍ଷତି ସହିବାକୁ ପଡ଼ୁଥିବା କେନ୍ଦ୍ର ସରକାର ଡିଣ୍ଡିମ ପିଟୁଛନ୍ତି। ଏଥଯୋଗୁ କମ୍ପାନୀଗୁଡିକୁ ଲିଟର ପିଛା ପେଟ୍ରୋଲ ଏବଂ ଡିଜେଲରେ ୯ ଟଙ୍କା ପର୍ଯ୍ୟନ୍ତ ଆର୍ଥିକ କ୍ଷତି ହେଉଥିବା ସରକାର କହୁଛନ୍ତି। ବାସ୍ତବ ସ୍ଥିତି କିନ୍ତୁ ବିପରୀତ। ମହଙ୍ଗା ତେଲ ଦରରେ ବିଚରା ଖାଉଟି ଛଟପଟ ହେଉଥିବାବେଳେ ସରକାରୀ ତେଲ କମ୍ପାନୀ ମୁନାଫା କମାଇବାରେ ବ୍ୟସ୍ତ। ଆଶ୍ଚର୍ଯ୍ୟର କଥା ହେଉଛି, ଉଚ୍ଚ ତେଲ ଦର ଯୋଗୁଁ ଅତ୍ୟାବଶ୍ୟକ ସାମଗ୍ରୀ ମହଙ୍ଗା ହୋଇଛି, ଯାହା ଖାଉଟିଙ୍କ ପାଇଁ ଦୁର୍ଦ୍ଦିନ ଆଣିଦେଇଛି। ସେହି ସମୟରେ ତେଲ କମ୍ପାନୀ କିନ୍ତୁ ମାଲେମାଲ। ଦେଶର ବୃହତ୍‌ ରାଷ୍ଟ୍ରାୟତ୍ତ ତୈଳ କମ୍ପାନୀ ଇଣ୍ଡିଆନ୍‌ ଅଏଲ ରେକର୍ଡ ୨୪,୦୦୦ କୋଟି ଟଙ୍କାର ଲାଭ କରିବା ଏହାର ଏକ ଜ୍ବଳନ୍ତ ଊଦାହରଣ। ବର୍ଷକ ମଧ୍ୟରେ ତେଲ ଦର ୬୬ ପ୍ରତିଶତ ମହଙ୍ଗା ହୋଇଥିବାବେଳେ ଇଣ୍ଡିଆନ୍‌ ଅଏଲ ଏହି ସମୟରେ ୧୧ ପ୍ରତିଶତ ଲାଭ ଅର୍ଜନ କରିଥିବା କମ୍ପାନୀର ତ୍ରୈମାସିକ ଫଳାଫଳ ରିପୋର୍ଟରୁ ଜଣାଯାଇଛି।

ପେଟ୍ରୋଲ ଏବଂ ଡିଜେଲ ମହଙ୍ଗା ହେବା କାରଣରୁ ଖୁଚୁରା ବଜାରରେ ଆଳୁଠାରୁ ଆରମ୍ଭ କରି ପନିପରିବା, ତେଜରାତି ସାମଗ୍ରୀ ଏବଂ ଦୁଗ୍‌ଧ ଜାତ ଦ୍ରବ୍ୟ ସବୁକିଛି ମହଙ୍ଗା ହୋଇଛି। ପରିସ୍ଥିତି ଏମିତି ହୋଇଛି ଯେ, କେବଳ ପନିପରିବା ଦରରେ ୨୩.୨୪ ପ୍ରତିଶତ ବୃଦ୍ଧି ଘଟିଛି। ଏହି ଉଚ୍ଚ ବଜାର ଦରକୁ ନେଇ ଖାଉଟି ଅତିଷ୍ଠ। ମଙ୍ଗଳବାର ପ୍ରକାଶ ପାଇଛି ଇଣ୍ଡିଆନ୍ ଅଏଲର ଜାନୁଆରୀ-ମାର୍ଚ୍ଚ ତ୍ରୈମାସ ଆର୍ଥିକ ଫଳାଫଳ ରିପୋର୍ଟ। ଏଥିରେ କମ୍ପାନୀ ଲାଭ କ୍ଷେତ୍ରରେ ତା’ର ପୂର୍ବ ସମସ୍ତ ରେକର୍ଡ ଭାଙ୍ଗିଥବା ଦର୍ଶାଯାଇଛି। ଜାନୁଆରୀରୁ ମାର୍ଚ୍ଚ ମଧ୍ୟରେ ତୈଳ କମ୍ପାନୀଗୁଡିକ ଲିଟର ପିଛା ପେଟ୍ରୋଲ ଏବଂ ଡିଜେଲରେ ୯ ଟଙ୍କା ପର୍ଯ୍ୟନ୍ତ କ୍ଷତି ସହୁଥିବା କୁହାଯାଉଥିବାବେଳେ ବାସ୍ତବରେ କମ୍ପାନୀ ଉକ୍ତ ତ୍ରୈମାସରେ ୬,୦୨୧.୮୮ କୋଟି ଟଙ୍କା ଲାଭ କରିଛି।

ଆର୍ଥିକ ଫଳାଫଳ ଅନୁଯାୟୀ, ୨୦୨୦-୨୧ ରେ କମ୍ପାନୀର ମୋଟ ଆୟ ୭.୩୬ ଲକ୍ଷ କୋଟି ଟଙ୍କାରେ ପହଞ୍ଚିଛି। ସମାନ ଆର୍ଥିକ ବର୍ଷରେ ଏହା କୌଣସି ବି କମ୍ପାନୀର ଆୟଠାରୁ ଅଧିକ ବୋଲି ଇଣ୍ଡିଆନ୍‌ ଅଏଲର ନିର୍ଦ୍ଦେଶକ (ଅର୍ଥ) ସନ୍ଦୀପ ଗୁପ୍ତା କହିଛନ୍ତି। ଏହି ସମୟ ମଧ୍ୟରେ କମ୍ପାନୀ ୨୪,୧୮୪.୧୦ କୋଟି ଟଙ୍କା ନିଟ୍ ଲାଭ କରିଛି, ଯାହା ଆଜି ପର୍ଯ୍ୟନ୍ତ ଏକ ରେକର୍ଡ। ଗତ ଆର୍ଥିକବର୍ଷରେ ଇଣ୍ଡିଆନ୍ ଅଏଲ୍ ରପ୍ତାନି ସହିତ ମୋଟ ୮୬୪.୦୭ ଲକ୍ଷ ଟନ୍ ଉତ୍ପାଦ ବିକ୍ରି କରିଥିଲା। ଜାନୁଆରୀ ୧ ରୁ ମାର୍ଚ୍ଚ ୨୧ ପର୍ଯ୍ୟନ୍ତଦେଶରେ ପେଟ୍ରୋଲ ଏବଂ ଡିଜେଲ ମୂଲ୍ୟ ସ୍ଥିର ରହିଥିଲା। ମାର୍ଚ୍ଚ ମାସର ଶେଷ ୧୦ ଦିନ ମଧ୍ୟରୁ ନଅ ଦିନ ଧରି ମୂଲ୍ୟରେ ବୃଦ୍ଧି ଘଟିଥିଲା। ତେଣୁ ତେଲ ଦର ବଢ଼ିବା ଯୋଗୁ ମୁଦ୍ରାସ୍ଫୀତି ସହ ତାଳ ଦେଇ ବଜାର ଦର ଉର୍ଦ୍ଦ୍ବଗାମୀ ହେଉଛି। ଏଥିରେ ଲୋକଙ୍କ ପକେଟ୍‌ ଖାଲି ହେଉଥÒବାବେଳେ ତେଲ କମ୍ପାନୀ ମାଲେମାଲ ହେଉଛନ୍ତି। ଏଭଳି ସ୍ଥିତି ସିଧାସଳଖ ଭାବେ କେନ୍ଦ୍ର ସରକାରଙ୍କ ଖାଉଟି ମାରଣ ନୀତିକୁ ପ୍ରତିପାଦିତ କରୁଛି।

ନୂଆଦିଲ୍ଲୀ: ଖାଉଟିଙ୍କ ପାଇଁ ଖୁସିଖବର । ଖାଇବା ତେଲଦରରୁ ଏବେ ଖାଉଟିଙ୍କୁ ମିଳିବ ଆସ୍ୱସ୍ତି । ଶସ୍ତା ହେବ ଖାଇବା ତେଲ । ତେଲ ଦାମର ରାହାଜାନି ଭିତରେ ସାଧାରଣ ଗରିବୀ, ଖଟିଖିଆ ଖାଉଟି ଲୋକ ଅସ୍ତବ୍ୟସ୍ତ ହୋଇପଡ଼ିଥିଲେ । ବଜାରକୁ ଗଲେ ତେଲ ନକିଣି ଫେରୁଥିଲେ ଖାଉଟି । ପ୍ରଥମେ ପେଟ୍ରୋଲ, ଡ଼ିଜେଲରୁ ସେସ କମାଇବା ପରେ ଏବେ ଖାଇବା ତେଲ ଦାମ କମ କରିଛନ୍ତି କେନ୍ଦ୍ର ସରକାର । କେନ୍ଦ୍ର ସରକାର ଖାଇବା ତେଲ ଉପରୁ ଶୁଳ୍କ ହ୍ରାସ କରିବା ପରେ ଖାଇବା ତେଲଦର ହ୍ରାସ ପାଇବ ବୋଲି ସୂଚନା ମିଳିଛି ।

ଖାଇବା ତେଲରୁ ସେସ୍‌ କମାଇଛି କେନ୍ଦ୍ର । ଯହାଦ୍ୱାରା ସନଫ୍ଲାଓ୍ବାର, ପାମ୍‌, ସୋୟାବିନ୍‌ ତେଲ ଆଦି ଖାଇବା ତେଲ ଦାମ କମ ହୋଇଛି । ଏପରି ସ୍ଥିତିରେ ଖାଉଟି ସାମାନ୍ୟ ଆସ୍ୱସ୍ଥି ଅନୁଭବ କରିଛନ୍ତି । ଦୁଇ ଦିନତଳେ କେନ୍ଦ୍ର ସରକାର ପେଟ୍ରୋଲ ଏବଂ ଡିଜେଲ ଦାମ ଯଥାକ୍ରମେ ୫ ଏବଂ ୧୦ ଟଙ୍କା ହ୍ରାସ କରିଥିଲେ । ସେପଟେ ଓଡ଼ିଶା ସରକାର ମଧ୍ୟ ଡିଜେଲ ଏବଂ ପେଟ୍ରୋଲରୁ ୩ ଟଙ୍କା ଲେଖାଏଁ ଭାଟ ଛାଡ଼ କରିଛନ୍ତି । ସୋୟାବିନ୍ ଓ ସୂର୍ଯ୍ୟମୁଖୀ ତେଲରୁ କେନ୍ଦ୍ର ସରକାର କୃଷି ସେସ୍ ୫ ପ୍ରତିଶତକୁ ହ୍ରାସ ପାଇଛି । ଯାହା ଫଳରେ ବିଭିନ୍ନ ତେଲଦର ଲିଟର ପିଛା ଦାମ ୪ରୁ ୭ ଟଙ୍କା ପର୍ଯ୍ୟନ୍ତ ହ୍ରାସ ପାଇବ ବୋଲି କୁହାଯାଇଛି ।