ନୂଆଦିଲ୍ଲୀ: ପଶ୍ଚିମ ଏସିଆ ବିବାଦରେ ଏ ଯାଏ ପଡିନି ପୂର୍ଣ୍ଣଛେଦ। ଫେବୃଆରୀ ଶେଷ ଭାଗରୁ ଆରମ୍ଭ ହୋଇଥିବା ଏହି ବିବାଦ ସାରା ବିଶ୍ୱରେ ଶକ୍ତି ବଜାରକୁ ବିପର୍ଯ୍ୟସ୍ତ କରିଦେଇଛି। ହେଲେ ଭାରତୀୟ ପରିବାରଗୁଡିକୁ ଗ୍ୟାସ ସିଲିଣ୍ଡର ଆକାରରେ ଏହାର ଝଟ୍‌କା  ଅନୁଭୂତ ହେଉଛି। ମେ’ ମାସ ଆସିବା ସହିତ, ଏଲ୍‌ପିଜି ବୁକିଂ ଏବଂ ବିତରଣ ନିୟମରେ ଆହୁରି ପରିବର୍ତ୍ତନ ଆଶା କରାଯାଉଛି। ସଙ୍କଟ ଆରମ୍ଭ ହେବା ପରଠାରୁ କାର୍ଯ୍ୟକାରୀ ହୋଇଥିବା ପଦକ୍ଷେପଗୁଡ଼ିକର ଏହା ଆଉ ଏକ ପଦକ୍ଷେପ ହେବ। 

ଆମେରିକା-ଇସ୍ରାଏଲ-ଇରାନ ଯୁଦ୍ଧ ଆରମ୍ଭ ହେବା ପରଠାରୁ, ତୈଳ ବିପଣନକାରୀ  କମ୍ପାନୀଗୁଡ଼ିକ ୧୪.୨ କିଲୋଗ୍ରାମ ଘରୋଇ ଏଲପିଜି ସିଲିଣ୍ଡରର ମୂଲ୍ୟ ୬୦ ଟଙ୍କା ବୃଦ୍ଧି କରିଛନ୍ତି। ମାତ୍ର ଗୋଟିଏ ମାସରେ ୧୯ କିଲୋଗ୍ରାମ ବାଣିଜ୍ୟିକ ସିଲିଣ୍ଡରର ମୂଲ୍ୟ ତିନିଥର ବୃଦ୍ଧି ହୋଇଛି। ରିପୋର୍ଟ ଅନୁଯାୟୀ, ମେ’ ପହିଲାରୁ ଏଲ୍‌ପିଜି ସିଲିଣ୍ଡର ମୂଲ୍ୟରେ ଆଉ ଏକ ବଡ଼ ପରିବର୍ତ୍ତନ ଆଶଙ୍କା କରାଯାଉଛି। ରିପୋର୍ଟ ଅନୁଯାୟୀ, ଇଣ୍ଡିଆନ୍ ଅଏଲ୍, ବିପିସିଏଲ୍‌ ଏବଂ ଏଚ୍‌ପିସିଏଲ୍‌ ମଧ୍ୟ ନୂତନ ଡେଲିଭରି ଏବଂ ବୁକିଂ ନିୟମକୁ ନେଇ କିଛି ନୂଆ ନିୟମ ଆଣିପାରେ।  ଓଟିପି ଜରିଆରେ ଗ୍ୟାସ୍‌ ସିଲିଣ୍ଡର ଡେଲିଭରି ସ୍ଥାୟୀ ହୋଇପାରେ। ପେଟ୍ରୋଲିୟମ୍ ଏବଂ ପ୍ରାକୃତିକ ଗ୍ୟାସ ମନ୍ତ୍ରଣାଳୟ ପୂର୍ବରୁ ବୁକିଂ ନିୟମକୁ କଡ଼ାକଡ଼ି କରିସାରିଛି। ସହରାଞ୍ଚଳରେ ଦୁଇଟି ବୁକିଂ ମଧ୍ୟରେ ସମୟ ୨୧ ଦିନରୁ ୨୫ ଦିନକୁ ବୃଦ୍ଧି କରାଯାଇଛି। ସେହିପରି, ଗ୍ରାମାଞ୍ଚଳରେ ଏହାକୁ ୪୫ ଦିନକୁ ବୃଦ୍ଧି କରାଯାଇଛି। ବର୍ତ୍ତମାନର ଓଟିପି-ଆଧାରିତ ଡେଲିଭରି ପ୍ରମାଣୀକରଣ ବ୍ୟବସ୍ଥା ବର୍ତ୍ତମାନ ସ୍ଥାୟୀ ଭାବରେ କାର୍ଯ୍ୟକାରୀ ହେବ ବୋଲି ଆଶା କରାଯାଉଛି।

ନୂଆଦିଲ୍ଲୀ: ନୂତନ ଆର୍ଥିକବର୍ଷ ଏପ୍ରିଲ ପହିଲାରୁ ଆରମ୍ଭ ହେଉଛି, ଯାହା ସାଧାରଣ ଲୋକଙ୍କ ପକେଟ୍‌ ଉପରେ ବଡ଼ ପ୍ରଭାବ ପକାଇବ। ଏଥର, ସରକାର ଟିକଟଠାରୁ ଟିକସ ପର୍ଯ୍ୟନ୍ତ ୧୦ଟି ଗୁରୁତ୍ୱପୂର୍ଣ୍ଣ ପରିବର୍ତ୍ତନ କରିବାକୁ ଯାଉଛନ୍ତି। ଏହି ସମୟରେ, ଏପ୍ରିଲ ପହିଲାରୁ କାର୍ଯ୍ୟକାରୀ ହେବାକୁ ଥିବା ବ୍ୟାଙ୍କିଙ୍ଗ ଏବଂ ରେଳବାଇର ନିୟମ ସାଧାରଣ ଲୋକଙ୍କ ଚିନ୍ତାକୁ ବଢ଼ାଇଦେଇଛି।  କରିଛି। ଟ୍ରେନ୍ ଟିକଟ୍ ବାତିଲ୍ ପାଇଁ ରିଫଣ୍ଡ ନିୟମ ଆହୁରି କଠୋର ହେବ ଏବଂ ଏଟିଏମ୍‌ରୁ ଟଙ୍କା ଉଠାଇବା ମଧ୍ୟ ମହଙ୍ଗା ହୋଇପାରେ। ପାନ୍ କାର୍ଡ ପାଇଁ କଠୋର ଡକ୍ୟୁମେଣ୍ଟେସନ୍ ଆବଶ୍ୟକତା ଏବଂ ରନ୍ଧନ ଗ୍ୟାସ୍ ମୂଲ୍ୟରେ ସମ୍ଭାବ୍ୟ ପରିବର୍ତ୍ତନ ସିଧାସଳଖ ଆପଣଙ୍କ ପରିବାରର ବଜେଟ ଉପରେ ପ୍ରଭାବ ପକାଇବ। 

ନୂଆ ଆୟକର ଆଇନ କାର୍ଯ୍ୟକାରୀ
ପୁରୁଣା ଆୟକର ଆଇନ ୧୯୬୧ ଏବେ ଇତିହାସ ହୋଇଯିବ। ନୂତନ ଆୟକର ଆଇନ  ଏପ୍ରିଲ ପହିଲାରୁ କାର୍ଯ୍ୟକାରୀ ହେବ। ପୂର୍ବରୁ ବ୍ୟବହୃତ ମୂଲ୍ୟାୟନ ବର୍ଷ ଏବଂ ପୂର୍ବ ବର୍ଷ ଶବ୍ଦଗୁଡ଼ିକ ବର୍ତ୍ତମାନ ଗୋଟିଏ ଟିକସ ବର୍ଷ ଦ୍ୱାରା ବଦଳାଯିବ। ଏହା ଟିକସ ଦାଖଲ ଏବଂ ବୁଝାମଣାକୁ ସରଳ କରିବ। ଆଇନରେ ଆହୁରି ଅନେକ ପରିବର୍ତ୍ତନ ମଧ୍ୟ କରାଯାଇଛି ଯାହା କରଦାତାଙ୍କ ପାଇଁ ସହଜ ହେବ।

ଅଧିକ ଟିକସ ରିଆତିର ଲାଭ
ନୂତନ ଟିକସ ବ୍ୟବସ୍ଥା ଅଧୀନରେ ବାର୍ଷିକ ୧୨ ଲକ୍ଷ ପର୍ଯ୍ୟନ୍ତ ଆୟ କରୁଥିବା ବ୍ୟକ୍ତିମାନେ ଏବେ ଶୂନ୍ ଟିକସ ଦେବେ। ଧାରା ୮୭ଏ ଅଧୀନରେ ରିଆତିରେ ବୃଦ୍ଧି କରାଯାଇଛି, ଯାହା ମଧ୍ୟବିତ୍ତ ବର୍ଗକୁ ଗୁରୁତ୍ୱପୂର୍ଣ୍ଣ ଆଶ୍ୱସ୍ତି ପ୍ରଦାନ କରିବ। ପୂର୍ବରୁ, ଏହି ସୀମା କମ୍ ଥିଲା, କିନ୍ତୁ ବର୍ତ୍ତମାନ ୧୨ ଲକ୍ଷ ଟଙ୍କା ପର୍ଯ୍ୟନ୍ତ ଆୟ କରମୁକ୍ତ ହେବ। 

ଟିଡିଏସ୍‌ ଫର୍ମରେ ପରିବର୍ତ୍ତନ
ଏପ୍ରିଲରୁ ଫର୍ମ ୧୬ ଏବଂ ଫର୍ମ ୧୬ଏ ବନ୍ଦ ହୋଇଯିବ। ଫର୍ମ ୧୩୦ ଏବଂ ଫର୍ମ ୧୩୧ ସେଗୁଡ଼ିକ ସ୍ଥାନ ନେବ। ଫର୍ମ ୧୩୦ ବେତନଭୋଗୀଙ୍କ ଟିଡିଏସ୍‌ ପ୍ରମାଣପତ୍ର ପାଇଁ ହେବ, ଯେତେବେଳେ କି ଫର୍ମ ୧୩୧ ଅଣ-ବେତନପ୍ରାପ୍ତ ପେମେଣ୍ଟ ପାଇଁ ହେବ। ଅନୁପାଳନକୁ ସରଳ କରିବା ଏବଂ ଟିକସ ଦାଖଲରେ ସ୍ପଷ୍ଟତା ବଜାୟ ରଖିବା ପାଇଁ ଜାରି ସମୟସୀମାରେ ମଧ୍ୟ ପରିବର୍ତ୍ତନ କରାଯିବ।

ଏଲ୍‌ପିଜି ସିଲିଣ୍ଡର ମୂଲ୍ୟ ସଂଶୋଧନ
ଘରୋଇ ଏଲ୍‌ପିଜି ସିଲିଣ୍ଡର ମୂଲ୍ୟ ଏପ୍ରିଲ ପହିଲାରେ ସଂଶୋଧନ କରାଯାଇପାରେ। ଆମେରିକା, ଇସ୍ରାଏଲ ଏବଂ ଇରାନ ମଧ୍ୟରେ ଚାଲିଥିବା ଯୁଦ୍ଧ ବିଶ୍ୱସ୍ତରୀୟ ଆହ୍ବାନକୁ ବୃଦ୍ଧି କରିଛି, ଯାହା ଯୋଗାଣକୁ ପ୍ରଭାବିତ କରୁଛି। ଏହି ମୂଲ୍ୟ ପରିବର୍ତ୍ତନ ସାଧାରଣ ପରିବାରର ରୋଷେଇ ଘର ଖର୍ଚ୍ଚକୁ ପ୍ରଭାବିତ କରିବ।

ସିଏନ୍‌ଜି, ପିଏନ୍‌ଜି, ଏଟିଏଫ୍‌ ମୂଲ୍ୟରେ ପରିବର୍ତ୍ତନ
ସିଏନ୍‌ଜି, ପିଏନ୍‌ଜି ଏବଂ ବିମାନ ଟର୍ବାଇନ୍ ଇନ୍ଧନ (ଏଟିଏଫ୍‌) ମୂଲ୍ୟ ମଧ୍ୟ ସଂଶୋଧନ ହେବ। ଏହା ବିମାନ ଭଡ଼ା ବୃଦ୍ଧି କରିପାରେ ଏବଂ ଦୈନନ୍ଦିନ ପରିବହନକୁ ପ୍ରଭାବିତ କରିପାରେ। 

ଏଟିଏମ୍‌ ଉଠାଣ ଶୁଳ୍କ ବଢ଼ିବ
ନୂଆ ମାସରୁ  ଏଚ୍‌ଡିଏଫ୍‌ସି ବ୍ୟାଙ୍କରୁ ୟୁପିଆଇ ଏଟିଏମ୍ ଉଠାଣ ମାଗଣା ସୀମାରେ ଅନ୍ତର୍ଭୁକ୍ତ ହେବ। ଯଦି ଆପଣ ପ୍ରତି ମାସରେ ୫ଟି କାରବାର ଅତିକ୍ରମ କରନ୍ତି, ତେବେ ପ୍ରତ୍ୟେକ ପରବର୍ତ୍ତୀ କାରବାର ପାଇଁ ୨୩ ଟଙ୍କା ଶୁଳ୍କ ଲାଗୁ ହେବ। 

ପାନ୍‌ କାର୍ଡ ନିୟମ କଡ଼ାକଡ଼ି
ପ୍ୟାନ୍ କାର୍ଡ ତିଆରି କିମ୍ବା ଅପଡେଟ୍ କରିବା ପାଇଁ ନିୟମ ଏବେ କଡ଼ାକଡ଼ି ହେବ। ଆୟକର ବିଭାଗ ଆଉ ଜନ୍ମ ତାରିଖର ଏକମାତ୍ର ପ୍ରମାଣ ଭାବରେ ଆଧାରକୁ ଗ୍ରହଣ କରିବ ନାହିଁ। ପାନ୍‌ କାର୍ଡ କ୍ଷେତ୍ରରେ ଏଣିକି ୧୦ମ ଶ୍ରେଣୀ ପ୍ରମାଣପତ୍ର, ପାସପୋର୍ଟ, ଜନ୍ମ ପ୍ରମାଣପତ୍ର ଏବଂ ଭୋଟର ପରିଚୟପତ୍ର ଭଳି ଡକ୍ୟୁମେଣ୍ଟ ଆବଶ୍ୟକ ହେବ। 

ଟ୍ରେନ ଟିକଟ ବାତିଲ ନିୟମ କଡ଼ାକଡ଼ି
ରେଳବାଇ ଏବେ ଟ୍ରେନ ଛାଡିବାର ୮ ଘଣ୍ଟା ମଧ୍ୟରେ ଟିକଟ ବାତିଲ ପାଇଁ ଶୂନ୍ୟ ରିଫଣ୍ଡ ପ୍ରଦାନ କରିବ। ପୂର୍ବରୁ, ଏହି ସମୟ ସୀମା ୪ ଘଣ୍ଟା ଥିଲା। ଶେଷ ମୁହୂର୍ତ୍ତରେ ବାତିଲ କରିବା ଦ୍ୱାରା ଆଉ କୌଣସି ରିଫଣ୍ଡ ମିଳିବ ନାହିଁ, ଯାହା ଫଳରେ ଯାତ୍ରୀମାନଙ୍କୁ ପୂର୍ବରୁ ଯୋଜନା କରିବାକୁ ପଡିବ।

ମାର୍ଚ୍ଚ ମାସ ଶେଷ ହେବାକୁ ଯାଉଛି ଏବଂ ଏପ୍ରିଲ୍ ୧, ୨୦୨୬ ରୁ ନୂତନ ଆର୍ଥିକ ବର୍ଷ ଆରମ୍ଭ ହେବ। ପ୍ରତ୍ୟେକ ମାସ ଭଳି ଏଥର ମଧ୍ୟ ଏପ୍ରିଲ୍ ପହିଲାରୁ ଦେଶରେ ଅନେକ ଗୁରୁତ୍ୱପୂର୍ଣ୍ଣ ଆର୍ଥିକ ପରିବର୍ତ୍ତନ ହେବାକୁ ଯାଉଛି। ଏଲପିଜି (LPG) ଦରଠାରୁ ଆରମ୍ଭ କରି ଆୟକର ନିୟମ, ପ୍ୟାନ୍ କାର୍ଡ, ଏବଂ ଏଟିଏମ୍ (ATM) ଟ୍ରାଞ୍ଜାକ୍ସନ୍ ନିୟମରେ ବଡ଼ ଧରଣର ପରିବର୍ତ୍ତନ ହେବ, ଯାହାର ସିଧାସଳଖ ପ୍ରଭାବ ସାଧାରଣ ଲୋକଙ୍କ ପକେଟ୍ ଉପରେ ପଡ଼ିବ। ଆସନ୍ତୁ ଜାଣିବା ସେହି ୫ଟି ବଡ଼ ପରିବର୍ତ୍ତନ ବିଷୟରେ।

୧. ଏଲପିଜି ଏବଂ ସିଏନଜି-ପିଏନଜି ଦରରେ ପରିବର୍ତ୍ତନ

ପ୍ରତ୍ୟେକ ମାସର ପହିଲା ଭଳି ଏପ୍ରିଲ୍ ୧, ୨୦୨୬ ରୁ ଏଲପିଜି ସିଲିଣ୍ଡର ଦରରେ ପରିବର୍ତ୍ତନ ଦେଖିବାକୁ ମିଳିବ। ମଧ୍ୟପ୍ରାଚ୍ୟରେ ଲାଗିରହିଥିବା ଯୁଦ୍ଧ ଏବଂ ତୈଳ ସଙ୍କଟ ଯୋଗୁଁ ତୈଳ କମ୍ପାନୀଗୁଡ଼ିକ ପୂର୍ବରୁ ହିଁ ଦର ବୃଦ୍ଧି କରିସାରିଛନ୍ତି। ଏହା ସହିତ ଏଟିଏଫ୍ (ATF), ସିଏନଜି (CNG) ଏବଂ ପିଏନଜି (PNG) ଗ୍ୟାସ୍‌ର ନୂତନ ଦର ମଧ୍ୟ ଘୋଷଣା କରାଯାଇପାରେ।

୨. ନୂଆ ଆୟକର ନିୟମ

ଏପ୍ରିଲ୍ ୧ରୁ ଦେଶରେ ସବୁଠାରୁ ବଡ଼ ପରିବର୍ତ୍ତନ ଆୟକର କ୍ଷେତ୍ରରେ ହେବାକୁ ଯାଉଛି। ୧୯୬୧ ମସିହାର ଆୟକର ଆଇନ ବଦଳରେ ନୂତନ ଆୟକର ଆଇନ, ୨୦୨୫ ଲାଗୁ ହେବ। ଏହି ନୂତନ ଆଇନ ଅନୁଯାୟୀ କରଦାତାଙ୍କ ପାଇଁ ଅନେକ ନିୟମ ସହଜ କରାଯାଇଛି। ଆଇଟିଆର୍ (ITR) ଦାଖଲ ପାଇଁ ବ୍ୟବହୃତ ହେଉଥିବା ଫର୍ମ-୧୬ (Form 16) ବଦଳରେ ଏବେ ଏକ ନୂତନ ଫର୍ମ ପ୍ରଦାନ କରାଯିବ। ସେହିପରି ନନ୍-ସାଲାରୀ (ଅଣ-ଦରମା) ଆୟ ପାଇଁ ଉଦ୍ଦିଷ୍ଟ ଫର୍ମ-୧୬ଏ (Form 16A) ର ନାମ ପରିବର୍ତ୍ତନ କରାଯାଇ ଫର୍ମ-୧୩୧ (Form 131) ରଖାଯିବ। ଟିଡିଏସ୍ (TDS) ବିବରଣୀ ପ୍ରଦାନ କରିବାର ୧୫ ଦିନ ମଧ୍ୟରେ ଏହାକୁ ଜାରି କରିବା ବାଧ୍ୟତାମୂଳକ ହେବ।

୩. ଏଚଡିଏଫସି, ପିଏନବି ଏବଂ ବନ୍ଧନ ବ୍ୟାଙ୍କର ନିୟମ

ଯଦି ଆପଣଙ୍କର ଆକାଉଣ୍ଟ୍ ଏଚଡିଏଫସି (HDFC), ପଞ୍ଜାବ ନ୍ୟାସନାଲ ବ୍ୟାଙ୍କ (PNB) କିମ୍ବା ବନ୍ଧନ ବ୍ୟାଙ୍କ (Bandhan Bank) ରେ ଅଛି, ତେବେ ବ୍ୟାଙ୍କିଙ୍ଗ୍ ସେବାରେ କିଛି ପରିବର୍ତ୍ତନ ହେବ। ଏହି ବ୍ୟାଙ୍କଗୁଡ଼ିକରେ ଏଟିଏମ୍ (ATM) ରୁ ଟଙ୍କା ଉଠାଣ, ସର୍ବନିମ୍ନ ବାଲାନ୍ସ (Minimum Balance) ରଖିବାର ନିୟମ ଏବଂ ଅନ୍ୟାନ୍ୟ ସର୍ଭିସ୍ ଚାର୍ଜରେ ନୂଆ ପରିବର୍ତ୍ତନ ଘଟିବାକୁ ଯାଉଛି।

୪. ପ୍ୟାନ୍ କାର୍ଡ ନିୟମ

ପ୍ୟାନ୍ କାର୍ଡ (PAN Card) ସହିତ ଜଡ଼ିତ ନିୟମରେ ମଧ୍ୟ ଏପ୍ରିଲ୍ ୧ରୁ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ହେବ। ଆଧାର ସହିତ ପ୍ୟାନ୍ କାର୍ଡ ଲିଙ୍କ୍ ହୋଇନଥିଲେ କିମ୍ବା ପ୍ୟାନ୍ କାର୍ଡ ନିଷ୍କ୍ରିୟ ଥିଲେ, ବ୍ୟାଙ୍କିଙ୍ଗ୍ କାରବାର ବେଳେ ଗ୍ରାହକଙ୍କୁ ସମସ୍ୟାର ସମ୍ମୁଖୀନ ହେବାକୁ ପଡ଼ିବ। ଏହା ଉପରେ କିଛି ନୂଆ ଫାଇନ୍ କିମ୍ବା ଜରିମାନା ସମ୍ବନ୍ଧୀୟ ନିୟମ କଡ଼ାକଡ଼ି ହୋଇପାରେ।

୫. ରେଳ ଟିକେଟ୍ ନିୟମ

ଭାରତୀୟ ରେଳବାଇ (Indian Railways) ପକ୍ଷରୁ ଟିକେଟ୍ ବୁକିଂ ଏବଂ ବାତିଲ୍ ନିୟମରେ ମଧ୍ୟ କିଛି ଅପଡେଟ୍ ଲାଗୁ କରାଯାଇପାରେ। ଯାତ୍ରୀଙ୍କ ସୁବିଧା ଏବଂ ଟିକେଟ୍ କଳାବଜାରୀ ରୋକିବା ପାଇଁ ତତ୍କାଳ ଟିକେଟ୍ (Tatkal Ticket) ଏବଂ ରିଫଣ୍ଡ୍ ପଲିସିରେ କେତେକ ପରିବର୍ତ୍ତନ ଆସିବାର ସମ୍ଭାବନା ରହିଛି।

ନୂଆଦିଲ୍ଲୀ: ଡିସେମ୍ବର ମାସ ଶେଷ ହେବାକୁ ଯାଉଛି ଏବଂ ନୂଆ ବର୍ଷ ଆସିବାକୁ ଆଉ ମାତ୍ର କିଛି ଦିନ ବାକି ଅଛି। ନୂଆ ବର୍ଷର ଆଗମନ ସହିତ ଅନେକ ଗୁରୁତ୍ୱପୂର୍ଣ୍ଣ ନିୟମରେ ମଧ୍ୟ ପରିବର୍ତ୍ତନ ଦେଖିବାକୁ ମିଳିବ, ଯାହାର ସିଧାସଳଖ ପ୍ରଭାବ ସାଧାରଣ ଲୋକଙ୍କ ପକେଟ୍ ଉପରେ ପଡ଼ିବ। ବ୍ୟାଙ୍କିଙ୍ଗ୍ ନିୟମଠାରୁ ଆରମ୍ଭ କରି ଟିକସ, ୟୁପିଆଇ ଏବଂ ଡିଜିଟାଲ୍ ପେମେଣ୍ଟ ପର୍ଯ୍ୟନ୍ତ ଅନେକ କ୍ଷେତ୍ରରେ ପରିବର୍ତ୍ତନ ହେବାର ସମ୍ଭାବନା ରହିଛି। ଚାଷୀ, ଯୁବବର୍ଗ, ସରକାରୀ କର୍ମଚାରୀ ଏବଂ ମଧ୍ୟବିତ୍ତ ପରିବାର ଉପରେ ଏହାର ପ୍ରଭାବ ଦେଖିବାକୁ ମିଳିବ। ତେବେ ଆସନ୍ତୁ ଜାଣିବା ନୂଆ ବର୍ଷ ଆରମ୍ଭ ସହିତ କେଉଁ ସବୁ ନିୟମ ବଦଳିବାକୁ ଯାଉଛି।

ରାସନ କାର୍ଡ ନିୟମ

ସର୍ବପ୍ରଥମେ ରାସନ କାର୍ଡ ସହ ଜଡିତ ବଡ଼ ନିୟମ ବିଷୟରେ ଜାଣିବା ଜରୁରୀ। ୨୦୨୬ ନିୟମ ଅନୁଯାୟୀ, ରାସନ କାର୍ଡ ପାଇଁ ଏକ ଅନଲାଇନ୍ ଆବେଦନ ବ୍ୟବସ୍ଥା ଆରମ୍ଭ ହୋଇଛି। ଏହାଦ୍ୱାରା ଚାଷୀ ଏବଂ ଗ୍ରାମାଞ୍ଚଳର ଲୋକମାନଙ୍କୁ ଆଶ୍ୱସ୍ତି ମିଳିବ ଏବଂ ସେମାନେ ସହଜରେ କାର୍ଡ ପାଇଁ ଆବେଦନ କରିପାରିବେ।

 ଚାଷୀଙ୍କ ପାଇଁ ନୂଆ ଅପଡେଟ୍

ପିଏମ କିଷାନ ଯୋଜନାରେ ମଧ୍ୟ କିଛି ପରିବର୍ତ୍ତନ ହେବାକୁ ଯାଉଛି। ଉତ୍ତରପ୍ରଦେଶ ସମେତ ଅନେକ ରାଜ୍ୟରେ 'ଫାର୍ମର ଆଇଡି' ବା କୃଷକ ପରିଚୟ ପତ୍ର ବାଧ୍ୟତାମୂଳକ କରାଯାଉଛି। ବିନା କୃଷକ ଆଇଡିରେ ପିଏମ କିଷାନର କିସ୍ତି ଅଟକି ଯାଇପାରେ। ଏହା ବ୍ୟତୀତ, ପିଏମଏଫବିୱାଇ (PMFBY) ଅର୍ଥାତ୍ ଫସଲ ବୀମା ଯୋଜନାରେ ବନ୍ୟଜନ୍ତୁଙ୍କ ଦ୍ୱାରା ଫସଲ ନଷ୍ଟ ହେଲେ ମଧ୍ୟ ଏବେ ବୀମା କଭର ମିଳିବ। ତେବେ କ୍ଷତି ହେବାର ୭୨ ଘଣ୍ଟା ମଧ୍ୟରେ ଏହାର ରିପୋର୍ଟ କରିବା ଜରୁରୀ ହେବ।

 ବ୍ୟାଙ୍କିଙ୍ଗ୍ ଓ ଆୟକର ନିୟମ

ବ୍ୟାଙ୍କିଙ୍ଗ୍ ଏବଂ ଟ୍ୟାକ୍ସ ନିୟମରେ ମଧ୍ୟ ପରିବର୍ତ୍ତନ ହେବାର ସମ୍ଭାବନା ରହିଛି। ଜାନୁଆରୀରୁ ଆୟକର ରିଟର୍ଣ୍ଣ (ITR) ଫର୍ମରେ ପରିବର୍ତ୍ତନ କରାଯାଇପାରେ, ଯେଉଁଥିରେ ଅଧିକ ଡାଟା ଭିତ୍ତିକ ରିପୋର୍ଟିଂ ରହିବ। ସେହିପରି ଏପ୍ରିଲରୁ କ୍ରେଡିଟ୍ ସ୍କୋର ଅପଡେଟ୍ ନିୟମ ବଦଳିବ। ପୂର୍ବରୁ କ୍ରେଡିଟ୍ ସ୍କୋର ଅପଡେଟ୍ ହେବାକୁ ୧୫ ଦିନ ଲାଗୁଥିବା ବେଳେ ଏବେ ତାହା ମାତ୍ର ୭ ଦିନ ମଧ୍ୟରେ ଅପଡେଟ୍ ହେବ। ଏହାଛଡା ଏସବିଆଇ ଭଳି ବ୍ୟାଙ୍କଗୁଡିକ ଲୋନ୍ ସୁଧ ହାର ଏବଂ ଏଫଡି ଦରରେ ଯେଉଁ ପରିବର୍ତ୍ତନ କରିଛନ୍ତି, ତାହାର ପ୍ରଭାବ ନୂଆ ବର୍ଷରେ ଦେଖିବାକୁ ମିଳିବ।

 ଏଲପିଜି ଦରରେ ପରିବର୍ତ୍ତନ

ତୈଳ ବିପଣନ କମ୍ପାନୀଗୁଡିକ ପ୍ରତି ମାସର ପ୍ରଥମ ତାରିଖରେ ଏଲପିଜି ଗ୍ୟାସ ସିଲିଣ୍ଡର ଏବଂ ବିମାନ ଇନ୍ଧନ (ATF) ଦର ସଂଶୋଧନ କରନ୍ତି। ଡିସେମ୍ବର ମାସରେ ସରକାର କମର୍ସିଆଲ ସିଲିଣ୍ଡର ଦରରେ ୧୦ ଟଙ୍କା ହ୍ରାସ କରିଥିଲେ। ତେଣୁ ନୂଆ ବର୍ଷରେ ଘରୋଇ ଗ୍ୟାସ ସିଲିଣ୍ଡର ଦରରେ କିଛି ଆଶ୍ୱସ୍ତି ମିଳିବାର ଆଶା କରାଯାଉଛି।

ଜୟପୁର: ରାଜସ୍ଥାନରେ ୫୦୦ ଟଙ୍କାରେ ମିଳିବ ଗ୍ୟାସ୍ ସିଲିଣ୍ଡର । ଏପ୍ରିଲ ପହିଲାରୁ ରାଜସ୍ଥାନରେ ରନ୍ଧନ ଗ୍ୟାସ୍‌ ବା ଏଲ୍‌ପିଜି ଦର ୫୦୦ ଟଙ୍କା ହେବ । ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ ଏହି ଘୋଷଣା କରିଛନ୍ତି । ସାରା ଦେଶରେ ଗ୍ୟାସ ଦର ଲୋକଙ୍କୁ କନ୍ଦାଇ ଦେଇଥିବାବେଳେ ରାଜସ୍ଥାନ ସରକାର ରାଜ୍ୟବାସୀଙ୍କୁ ଦେଇଛନ୍ତି ଏହି ଖୁସି ଖବର। ଏବେ ସାରା ଦେଶରେ ତଥା ଆମ ରାଜ୍ୟରେ ଗ୍ୟାସ୍ ଦର ହଜାରେ ଟଙ୍କା ପରେ ରହିଥିବା ବେଳେ ରାଜସ୍ଥାନରେ ଏପ୍ରିଲ୍‌ରୁ ୫୦୦ ଟଙ୍କାରେ ମିଳିବ ଗ୍ୟାସ । ତେବେ ଏହି ଘୋଷଣା ସମସ୍ତଙ୍କ ପାଇଁ ନୁହେଁ । ଏହା କେବଳ ଗରିବ ଏବଂ ଉଜ୍ଜଳା ଗ୍ୟାସ ଯୋଜନାର ହିତାଧିକାରୀଙ୍କ ପାଇଁ ଉପଲବ୍ଧ ବୋଲି ମୁଖ୍ୟମନ୍ତ୍ରୀ ଗେହଲଟ କହିଛନ୍ତି ।

ରାଜସ୍ଥାନ ମୁଖ୍ୟମନ୍ତ୍ରୀ ଭାରତ ଯୋଡ଼ୋ ଯାତ୍ରାର ଅବସରରେ ନିଜର ସମ୍ବୋଧନରେ ଗ୍ୟାସ ଟାଙ୍କି ମୂଲ୍ୟ ଅଧା କରିଦେବେ ବୋଲି ପ୍ରତିଶ୍ରୁତି ଦେଇଛନ୍ତି । ଆଜି ଅଲୱର ଜିଲ୍ଲାର ମାଲାଖେଡାରେ ଏକ ସଭାକୁ ସମ୍ବୋଧିତ କରି ମୁଖ୍ୟମନ୍ତ୍ରୀ ଅଶୋକ ଗେହଲଟ ଘୋଷଣା କରିଛନ୍ତି ଯେ, ଆମେ ଏକ କ୍ୟାଟେଗୋରୀ ବନାଉଛୁ । ଏହି କ୍ୟାଟେଗୋରୀର ଲୋକଙ୍କୁ ୧୦୫୦ ଟଙ୍କାର ଘରୋଇ ରନ୍ଧନ ଗ୍ୟାସ ସିଲିଣ୍ଡର ୫ଶହ ଟଙ୍କାରେ ଦେବୁ ।

ଆଗାମୀ ମାସରେ ଆମେ ବଜେଟ୍ ପ୍ରସ୍ତୁତ କରିବୁ, ସେଥିରେ ରୋସେଇରୁ ମହଙ୍ଗାର ବୋଝ଼ କମ୍ କରିବା ପାଇଁ କିଟ୍ ବାଣ୍ଚିବାର ଯୋଜନା ଆଣିବୁ । ସେ କହିଛନ୍ତି, ପୂର୍ବରୁ ଇନକମ୍ ଟ୍ୟାକ୍ସ, ଇଡିକୁ ନେଇ ଡରୁଥିଲେ, ଏବେ ଏମାନେ ନିଜ ଡରି ହୋଇ ରହିଛନ୍ତି । ଦେଶରେ ଲୋକତତନ୍ତ୍ରର ଚେର କମଜୋର ନୁହେଁ । ରାହୁଲ ଗାନ୍ଧି ଏକ ଉଦ୍ଦେଶ୍ୟ ନେଇ ଚାଲୁଛନ୍ତି । ସ୍ୱାଧିନତା ପରେ ପ୍ରଥମଥର ଭାରତ ଯୋଡୋ ଯାତ୍ରା ହେଉଛି ।

ନୂଆଦିଲ୍ଲୀ: ପେଟ୍ରୋଲ ଏବଂ ଡିଜେଲ ପରେ ରନ୍ଧନ ଗ୍ୟାସ୍ ଦରକୁ ନେଇ ଏବେ ଖାଉଟି ବେଶ ଚିନ୍ତିତ । ବଢ଼ିଲାଣି ହାଣ୍ଡିଶାଳ ବଜେଟ୍। ଏହାକୁ ନେଇ ଏବେ ଚାରିଆଡୁ କେନ୍ଦ୍ର ସରକାର ସଂଡ଼ଧୁଆସି ଆକ୍ରମଣର ଶିକାର ହେଉଛନ୍ତି । ଅପରପକ୍ଷେ ଉଚ୍ଚ ରନ୍ଧନ ଗ୍ୟାସ ଦରକୁ ନେଇ ଖାଉଟିଙ୍କ ଅସନ୍ତୋଷ ଚରମସୀମାରେ ପହଞ୍ଚିଛି । ଖାଉଟିଙ୍କୁ ଆଉ ପୂର୍ବଭଳି ଏଲ୍‌ପିଜି ସବ୍‌ସିଡି ବା ରିଆତି ଅର୍ଥ ମିଳୁନାହିଁ । ତେଣୁ ଗ୍ୟାସ୍ ତାତିରେ କେନ୍ଦ୍ର ସରକାର ହଡ଼ବଡ଼ । ଏହାକୁ ନଜରରେ ରଖି କେନ୍ଦ୍ର ସରକାର ଏବେ ନୂଆ ଏଲ୍‌ପିଜି ସବ୍‌ସିଡି ନୀତି ଆଣିବାକୁ ଯୋଜନା କରୁଥିବା ଜଣାଯାଇଛି। ଏ ନେଇ ଏବେ ବିଚାରବିମର୍ଶ ଜୋରସୋର ଚାଲିଛି। ରିପୋର୍ଟ ଅନୁଯାୟୀ ନୂଆ ଏଲ୍‌ପିଜି ନୀତିରେ ସିଲିଣ୍ଡର ରିହାତି ପାଇବାକୁ ହେଲେ ହିତାଧିକାରୀଙ୍କ ବାର୍ଷିକ ଆୟ ୧୦ ଲକ୍ଷରୁ କମ୍ ହୋଇଥିବା ଆବଶ୍ୟକ।

ବର୍ତ୍ତମାନ ମହଙ୍ଗା ମାଡ଼ରେ ସାଧାରଣ ଲୋକ ଆଶା କରୁଛନ୍ତ ଯେ ଏଲ୍‌ପିଜି ସିଲିଣ୍ଡର କ୍ରୟ ଉପରେ କେନ୍ଦ୍ର ସରକାର ରିହାତି ପ୍ରଦାନ ଆରମ୍ଭ କରିବେ । ନିକଟରେ କେନ୍ଦ୍ର ସରକାର ପେଟ୍ରୋଲ ଏବଂ ଡିଜେଲ ଉପରେ ଉତ୍ପାଦ ଶୁଳ୍କ ଯଥାକ୍ରମେ ୫ ଏବଂ ୧୦ ଟଙ୍କା ହ୍ରାସ କରିଛନ୍ତି। ଏଥିରେ ଅନେକ ଏବେ ଆଶା କରୁଛନ୍ତି ଯେ ସରକାର ଏଲ୍‌ପିଜି ସିଲିଣ୍ଡର ଉପରେ ରିହାତି ପ୍ରଦାନ ଆରମ୍ଭ କରିପାରିବେ । ଏବେ ଘରୋଇ ବଜାରରେ ଏଲ୍‌ପିଜି ସିଲିଣ୍ଡରର ମୂଲ୍ୟ ୧୦୦୦ ଟଙ୍କା ଛୁଇଁବାକୁ ଯାଉଛି ।

ସରକାରଙ୍କ ଆଭ୍ୟନ୍ତରୀଣ ଆକଳନ ଅନୁଯାୟୀ ଗ୍ରାହକମାନେ ସିଲିଣ୍ଡର ପାଇଁ ୧୦୦୦ ଟଙ୍କା ଦେବାକୁ ପ୍ରସ୍ତୁତ ଅଛନ୍ତି । ତେବେ ଏକ ରିପୋର୍ଟ ଅନୁଯାୟୀ, କେନ୍ଦ୍ର ସରକାର ଦୁଇଟି ଉପାୟରେ ସିଲିଣ୍ଡର ବିକ୍ରି କରିବାକୁ ଯୋଜନା କରୁଛନ୍ତି । ଗୋଟିଏ ଉପାୟ ହେଉଛି ସରକାର ବିନା ରିହାତିରେ ଏଲପିଜି ସିଲିଣ୍ଡର ବିକ୍ରି ଜାରି ରଖିପାରିବେ। ଦ୍ଵିତୀୟତଃ ଗ୍ରାହକ ଚୟନ କରିବା ପାଇଁ ସରକାର ରନ୍ଧନ ଗ୍ୟାସ ସିଲିଣ୍ଡର କ୍ରୟ ଉପରେ ରିଆତି ପ୍ରଦାନ କରି ପାରନ୍ତି । ବର୍ତ୍ତମାନ ସୁଦ୍ଧା ସରକାର ଏଲପିଜି ସବସିଡି ସହ ଜଡିତ କୌଣସି ନିଷ୍ପତ୍ତି ନେଇନାହାଁନ୍ତି । ତେବେ ବାର୍ଷିକ ୧୦ ଲକ୍ଷ ଟଙ୍କାରୁ କମ୍ ଆୟ କରୁଥିବା ଗ୍ରାହକଙ୍କୁ ସରକାର ସବସିଡି ପ୍ରଦାନ କରିପାରନ୍ତି ବୋଲି ରିପୋର୍ଟରେ ଦର୍ଶାଯାଇଛି । ଆହୁରି ମଧ୍ୟ, ଉଜ୍ଜ୍ଵଳା ଯୋଜନାର ହିତାଧିକାରୀମାନେ ଏଲ୍‌ପିଜି କ୍ରୟ ଉପରେ ସବସିଡି ପାଇପାରିବେ ।

ମେ ୨୦୨୦ରୁ ଏଲପିଜି ଗ୍ୟାସ ସିଲିଣ୍ଡର ଉପରେ ଗ୍ରାହକଙ୍କୁ ସିଧାସଳଖ ସବସିଡି ପ୍ରଦାନ ବନ୍ଦ ହୋଇଥିଲା ଯେଉଁ ସମୟରେ କୋଭିଡ୍ ମହାମାରୀ କାରଣରୁ ରନ୍ଧନ ମୂଲ୍ୟ ଢେର ହ୍ରାସ ପାଇଥିଲା। ସେତେବେଳେ ତୈକ ଓ ଗ୍ୟାସର ଆନ୍ତର୍ଜାତୀୟ ମୂଲ୍ୟ ଗୁରୁତର ଭାବେ ହ୍ରାସ ପାଇଥିଲା । ତେବେ ସରକାର ପରୋକ୍ଷରେ ସବସିଡି ପ୍ରଦାନ ଜାରି ରଖିଛନ୍ତି । ଉଦାହରଣ ସ୍ଵରୂପ, ୨୦୨୧ ଆର୍ଥିକବର୍ଷରେ ରନ୍ଧନ ଗ୍ୟାସ ସବସିଡି ବାବଦ କେନ୍ଦ୍ର ସରକାର ୩୫୫୯ କୋଟି ଟଙ୍କା ବ୍ୟୟ କରିଛନ୍ତି। ୨୦୨୦ ଆର୍ଥିକବର୍ଷରେ ଏହି ଖର୍ଚ୍ଚ ୨୪, ୪୬୮ କୋଟି ଟଙ୍କା ରହିଥିଲା ।

ଭୁବନେଶ୍ୱର: ଦୀର୍ଘ ଦିନ ପରେ ପେଟ୍ରୋଲ ଓ ଡିଜେଲ ଦର କମିଛି। ରନ୍ଧନ ଗ୍ୟାସ ଦର ହ୍ରାସ ପାଇଁ ବିଜେଡି ପକ୍ଷରୁ ଗୁରୁବାର ଦାବି କରାଯାଇଛି। ଏଥିପାଇଁ ବିଜେଡି ପକ୍ଷରୁ ୧୦ ଦିନିଆ ଡେଡ୍ ଲାଇନ୍ ଦିଆଯାଇଛି । ୧୦ ଦିନ ମଧ୍ୟରେ ଏଲପିଜି ରେଟ୍ ହ୍ରାସ ନକଲେ ବିଜେଡି ଆନ୍ଦୋଳନ କରିବ ବୋଲି ଚେତାବନୀ ଦେଇଛି । ବିଜେଡି ପକ୍ଷରୁ ଯୁବ ବିଜେଡି ସଭାପତି ବ୍ୟୋମକେଶ ରାୟ ଏ ନେଇ ଏକ ସାମ୍ବାଦୀକ ସମ୍ମିଳନୀ କରିଛନ୍ତି ।

ସେ ସାମ୍ବାଦୀକ ସମ୍ମିଳନୀ କହିଛନ୍ତି ଯେ,  ‘ଦୀର୍ଘ ଦିନର ବ୍ୟବଧାନ ପରେ କେନ୍ଦ୍ର ସରକାର ଏକସାଇଜ୍ ଡ୍ୟୁଟି ହ୍ରାସ କରିଛନ୍ତି। ବିଜେଡି ଆନ୍ଦୋଳନ ତୀବ୍ର ହେବାରୁ କେନ୍ଦ୍ର ଏହି ନିଷ୍ପତ୍ତି ନେଇଛନ୍ତି। ତେବେ ଏହି ଦର ହ୍ରାସରେ ୩୩ ପ୍ରତିଶତ ଓଡ଼ିଶା ସରକାର ବହନ କରୁଛନ୍ତି। ପେଟ୍ରଲରେ ୩.୩୦ ଟଙ୍କା ଓ ଡିଜେଲରେ ୧.୬୫ ଟଙ୍କା ରାଜ୍ୟ ଭାଗ ରହିଛି।  ଏହି ହିସାବ ବାଦ ଭାଟ୍ ହ୍ରାସ ହୋଇଛି।   ଯାହାକି ଗରିବଙ୍କ ପାଇଁ ଦୀପାବଳିରେ ଏକ ବଡ଼ ଖୁସି ଖବର। ଓଡ଼ିଶା ସରକାର ପେଟ୍ରୋଲରେ ୬.୩୦ ଟଙ୍କା ଓ ଡିଜେଲରେ ୪.୬୫ ଟଙ୍କା କମାଇଛନ୍ତି। ଏହି ଦର ହ୍ରାସ ପରେ ରାଜ୍ୟର ୨ ହଜାର କୋଟି ଟଙ୍କା କ୍ଷତି ହେବ । କିନ୍ତୁ ଖୁସିର କଥା ଯେ ସାରା ଦେଶରେ ତେଲ ଦର ଓଡ଼ିଶାରେ ସବୁଠାରୁ କମ।  ହେଲେ ଦୁର୍ଭାଗ୍ୟଜନକ କେନ୍ଦ୍ର ଯେଉଁ ସେସ ଆଦାୟ କରୁଛି, ତାହା କେନ୍ଦ୍ର ଓ ରାଜ୍ୟ ସରକାରଙ୍କ ଭିତରେ ଭାଗ ହେବା କଥା ବା ଉଛେଦ ହେବା କଥା। ଏହା ସଂଘୀୟ ବ୍ୟବସ୍ଥା ବିରୋଧୀ। କେନ୍ଦ୍ର ସରକାର ଖଚଏ ଦର ଉପରୁ  ଏକ୍ସାଇଜ ଓ ଅନ୍ୟ ଟ୍ୟାକ୍ସକୁ ତୁରନ୍ତ ହ୍ରାସ କରନ୍ତୁ।’

ବ୍ୟୋମକେଶ ଧମକ ଦେଇ କହିଛନ୍ତି ଯେ, ଦରଦାମ ବୃଦ୍ଧି ପ୍ରତିବାଦରେ ଯୁବ ଓ ଛାତ୍ର ଆନ୍ଦୋଳନ ଆସନ୍ତାକାଲିଠାରୁ ୧୦ ଦିନ ପାଇଁ ସ୍ଥଗିତ ରହିଛି। ଏହି ୧୦ ଦିନ ଭିତରେ ଏଲପିଜି ରେଟ ଯଦି କେନ୍ଦ୍ର ସରକାର ହ୍ରାସ ନ କରନ୍ତି ତେବେ ଆନ୍ଦୋଳନ ଆହୁରି ତୀବ୍ରତର ହେବ। ପଞ୍ଚାୟତ ଯାଏ ଚାଲି କେନ୍ଦ୍ର ସରକାରଙ୍କୁ ଦୃଢ଼ ଜବାବ ଦିଆଯିବ।

ସୂଚନାଯୋଗ୍ୟ ଯେ, ପେଟ୍ରୋଲ ଓ ଡିଜେଲ ଦର ବୃଦ୍ଧିକୁ ନେଇ କେନ୍ଦ୍ର ସରକାରଙ୍କ ବିରୋଧରେ ବିଜେଡ ରାସ୍ତାକୁ ଓହ୍ଲାଇଥିଲା । ତେବେ ଗତକାଲି (ବୁଧବାର) ରାତିରେ କେନ୍ଦ୍ର ସରକାର ପେଟ୍ରୋଲ ଓ ଡିଜେଲ ଉପରୁ ପେଟ୍ରୋଲ ଉପରୁ ୫ଟଙ୍କା ଓ ଡିଜେଲ ଉପରୁ ୧୦ ଟଙ୍କାର ଏକସାଇଜ୍ ଡ୍ୟୁଟି ହ୍ରାସ କରିଥିଲେ।ଫଳେ ଭୁବନେଶ୍ୱରରେ ପେଟ୍ରୋଲ ଲିଟର ପିଛା ୬ଟଙ୍କା ୧୫ପଇସା ଓ ଡିଜେଲ ଲିଟର ପିଛା ୧୨ ଟଙ୍କା ୮୮ ପଇସା କମିଥିଲା । ପରେ ଗୁରୁବାର ଦିନ ରାଜ୍ୟ ସରକାର ଉଭୟ ପେଟ୍ରୋଲ ଓ ଡିଜେଲ ଉପରୁ ୩ ଟଙ୍କା ଭାଟ୍ ହ୍ରାସ କରିଛନ୍ତି । ଯାହାର ସୁଫଳ ଖାଉଟି ପାଇବେ । ଏହି ନୂଆ ଦର ଆସନ୍ତାକାଲି ମଧ୍ୟରାତ୍ରୀରୁ ଲାଗୁ ହେବ ।