ଭାରତୀୟ ଅଲିମ୍ପିକ୍ ପଦକ ବିଜେତା ବକ୍ସର ଲଭଲିନା ବରଗୋହାଇଁ ସ୍କଟଲ୍ୟାଣ୍ଡର ଏକ ରେଷ୍ଟୁରାଣ୍ଟରେ ଭାରତର ଏକ ତ୍ରୁଟିପୂର୍ଣ୍ଣ ମାନଚିତ୍ର ଦେଖିବା ପରେ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି। ଏହି ମାନଚିତ୍ରରେ ଭାରତର ଉତ୍ତର-ପୂର୍ବାଞ୍ଚଳକୁ ବାଦ୍ ଦିଆଯାଇଥିଲା। ଏହି ଘଟଣା ସାମ୍ନାକୁ ଆସିବା ପରେ ସ୍କଟଲ୍ୟାଣ୍ଡରେ ଥିବା ଭାରତୀୟ ଦୂତାବାସ ମଧ୍ୟ ଉଦବେଗ ପ୍ରକାଶ କରିବା ସହ ରେଷ୍ଟୁରାଣ୍ଟ କର୍ତ୍ତୃପକ୍ଷଙ୍କୁ ଦୃଢ଼ ନିନ୍ଦା କରିଛି।

ରେଷ୍ଟୁରାଣ୍ଟରେ ଭାରତର ତ୍ରୁଟିପୂର୍ଣ୍ଣ ମାନଚିତ୍ର

କମନୱେଲଥ ଗେମ୍ସ ୨୦୨୬ ରେ ଐତିହାସିକ ସଫଳତା ପରେ ଭାରତୀୟ ବକ୍ସିଂ ଦଳ ସ୍କଟଲ୍ୟାଣ୍ଡର ଗ୍ଲାସଗୋ ସହରରେ ଥିବା 'ମିଷ୍ଟର ସିଂହସ୍ ଇଣ୍ଡିଆ' (Mister Singh's India) ନାମକ ଏକ ରେଷ୍ଟୁରାଣ୍ଟକୁ ରାତ୍ରୀଭୋଜନ ପାଇଁ ଯାଇଥିଲେ। ସେଠାରେ ଆସାମର ଷ୍ଟାର୍ ବକ୍ସର ଲଭଲିନା ବରଗୋହାଇଁ ରେଷ୍ଟୁରାଣ୍ଟର ଲୋଗୋ ଏବଂ ନାପକିନରେ ଥିବା ଭାରତର ମାନଚିତ୍ର ଉପରେ ନଜର ପକାଇଥିଲେ। ସେ ଦେଖିବାକୁ ପାଇଥିଲେ ଯେ, ସେଥିରେ ଉତ୍ତର-ପୂର୍ବ ଭାରତକୁ ସମ୍ପୂର୍ଣ୍ଣ ରୂପେ କାଟି ଦିଆଯାଇଛି। ଏହାକୁ ନେଇ ସେ ସୋସିଆଲ ମିଡିଆରେ ଏକ ଭିଡିଓ ସେୟାର କରି ନିଜର ଦୁଃଖ ପ୍ରକାଶ କରିଥିଲେ। ସେ କହିଥିଲେ ଯେ ଉତ୍ତର-ପୂର୍ବାଞ୍ଚଳର ଜଣେ ବାସିନ୍ଦା ଭାବରେ ଏହି ଘଟଣା ତାଙ୍କୁ ଗଭୀର ଆଘାତ ଦେଇଛି।

#GlasgowRestaurant Mister Singh’s India has sparked outrage after serving CWG athletes napkin featuring #incompleteMap of India,omitting the #Northeast &parts of J&K.Olympic medallist #LovlinaBorgohain called out the error,saying every part of #India matters&must be represented pic.twitter.com/D90efHhilp

— Anamika Dutta (@AnamikaDutta77) August 2, 2026

ଦୂତାବାସ ଏବଂ ବକ୍ସିଂ ଫେଡେରେସନର ପଦକ୍ଷେପ

ଲଭଲିନାଙ୍କ ଭିଡିଓ ଭାଇରାଲ ହେବା ପରେ ସ୍କଟଲ୍ୟାଣ୍ଡରେ ଥିବା ଭାରତୀୟ ଦୂତାବାସ ଏହି ଘଟଣାକୁ ଗୁରୁତ୍ୱର ସହ ନେଇଥିଲା। ଏକ ବିବୃତ୍ତି ଜାରି କରି ଦୂତାବାସ ପକ୍ଷରୁ କୁହାଯାଇଥିଲା ଯେ, ଭାରତୀୟ ଖେଳାଳିମାନେ ଯାଇଥିବା ରେଷ୍ଟୁରାଣ୍ଟରେ ଦେଶର ଭୁଲ୍ ମାନଚିତ୍ର ପ୍ରଦର୍ଶନକୁ ସେମାନେ ନିନ୍ଦା କରୁଛନ୍ତି। ଦୂତାବାସ ତୁରନ୍ତ ରେଷ୍ଟୁରାଣ୍ଟ ମାଲିକଙ୍କ ସହ କଥା ହୋଇଥିଲା। ସେହିପରି ଭାରତୀୟ ବକ୍ସିଂ ଫେଡେରେସନ୍ (BFI) ର ସଭାପତି ଅଜୟ ସିଂହ ମଧ୍ୟ ଉକ୍ତ ଆପତ୍ତିଜନକ ସାମଗ୍ରୀକୁ ତୁରନ୍ତ ହଟାଇବାକୁ ଦାବି କରିଥିଲେ।

ରେଷ୍ଟୁରାଣ୍ଟର କ୍ଷମା ପ୍ରାର୍ଥନା

ବିବାଦ ବଢ଼ିବା ପରେ 'ମିଷ୍ଟର ସିଂହସ୍ ଇଣ୍ଡିଆ' ରେଷ୍ଟୁରାଣ୍ଟ ପକ୍ଷରୁ କ୍ଷମା ପ୍ରାର୍ଥନା କରାଯାଇଛି। ସେମାନେ ସ୍ପଷ୍ଟ କରିଛନ୍ତି ଯେ କାହାର ଭାବନାକୁ ଆଘାତ ଦେବା ସେମାନଙ୍କର ଉଦ୍ଦେଶ୍ୟ ନଥିଲା। ଭାରତୀୟ ଦଳକୁ ଆତିଥ୍ୟ ପ୍ରଦାନ କରିବା ସେମାନଙ୍କ ପାଇଁ ଗର୍ବର ବିଷୟ ଥିଲା। ତେବେ ତ୍ରୁଟିକୁ ସ୍ୱୀକାର କରି ସେମାନେ ତୁରନ୍ତ ଉକ୍ତ ଭୁଲ୍ ମାନଚିତ୍ର ଥିବା ସମସ୍ତ ସାମଗ୍ରୀକୁ ପ୍ରତ୍ୟାହାର କରିନେଇଛନ୍ତି ଏବଂ ରେଷ୍ଟୁରାଣ୍ଟର ଲୋଗୋ ବଦଳାଇବାକୁ ପ୍ରତିଶ୍ରୁତି ଦେଇଛନ୍ତି। ଏହି ଘଟଣା ପରେ ରେଷ୍ଟୁରାଣ୍ଟ ନିଜର ଇନଷ୍ଟାଗ୍ରାମ ଆକାଉଣ୍ଟକୁ ମଧ୍ୟ ଡିଲିଟ୍ କରିଦେଇଥିବା ଦେଖିବାକୁ ମିଳିଛି।

ନୂଆଦିଲ୍ଲୀ: ସ୍କଟଲ୍ୟାଣ୍ଡର ଗ୍ଲାସଗୋରେ ଆୟୋଜିତ ବିଶ୍ବ ଜଳବାୟୁ ସମ୍ମିଳନୀରେ ଉପସ୍ଥିତ ନେତାମାନଙ୍କୁ ୧୪ ବର୍ଷୀୟା ଭାରତୀୟ ଛାତ୍ରୀ ଭିନିଶା ଜୟଶଙ୍କର ଚମକାଇ ଦେଇଛନ୍ତି। ନିଜର ତଥ୍ୟମୂଳକ ଓଜସ୍ବିନୀ ଭାଷଣରେ ସେ ସାରା ବିଶ୍ବକୁ ସ୍ତବ୍ଧ କରିଦେଇଛନ୍ତି। ଜଳବାୟୁ ପରିବର୍ତ୍ତନକୁ ନେଇ ଆନ୍ତର୍ଜାତିକ ସ୍ତରରେ ଭିନ୍ନ ସମୟରେ ବହୁ କାର୍ଯ୍ୟକ୍ରମ ଅନୁଷ୍ଠିତ ହେଉଛି। ସାରା ବିଶ୍ବରୁ ମଧ୍ୟ ନେତାମାନେ ଏଥିରେ ଯୋଗ ଦେଇ ପଦକ୍ଷେପ ନେବାକୁ କହୁଛନ୍ତି । ହେଲେ ବାସ୍ତବରେ ଏହି ସମସ୍ୟା ରୋକିବାକୁ କିଛି ବି ହେଉନାହିଁ । ନେତାମାନେ କେବଳ ଫମ୍ପା ଭାଷଣ ଦେଇ କାର୍ଯ୍ୟକ୍ରମ ସାରି ଦେଉଛନ୍ତି। ଏହାକୁ ନେଇ ଭିନିଶା ନିଜ କ୍ଷୋଭ ଏବଂ ଅସନ୍ତୋଷ ବ୍ୟକ୍ତ କରିବା ସହିତ ଯଦି ଆପଣମାନେ ପାରୁ ନାହାନ୍ତି ତେବେ ଆମ ପିଢି ଏହା କରି ଦେଖାଇବ ବୋଲି କହିଛନ୍ତି। ବର୍ତ୍ତମାନ ସମସ୍ତେ ଆଲୋଚନା ନ କରି ଯାହା କରାଯିବା ଉଚିତ ତାହାକୁ କରିବାକୁ ହେବ ଏବଂ ଏହା ଅତି ବିନିତ ଏବଂ ସମ୍ମାନର ସହ ଦାବି କରୁଛି ବୋଲି ସେ କହିଛନ୍ତି।

୧୪ ବର୍ଷୀୟା ଭିନିଶା ‘ଇକୋ ଓସ୍କାର’ ( ପରିବେଶ କ୍ଷେତ୍ରରେ ଓସ୍କାର ପୁରସ୍କାର ଭଳି) ନାମରେ ଜଣାଶୁଣା ଆର୍ଥସଟ୍ ପୁରସ୍କାରର ଚୁଡ଼ାନ୍ତ ପ୍ରତିଯୋଗୀ ମାନଙ୍କ ମଧ୍ୟରୁ ଅନ୍ୟତମ ଥିଲେ । ଜଳବାୟୁ ସମ୍ମିଳନୀର ‘କ୍ଲିନ୍ ଟେକ୍ନୋଲୋଜି ଏବଂ ଇନୋଭେସନ୍’ ଶୀର୍ଷକ ଆଲୋଚନାଚକ୍ରରେ ବକ୍ତବ୍ୟ ରଖିବା ପାଇଁ ବ୍ରିଟେନର ପ୍ରିନ୍ସ ୱିଲିୟମ୍ ଭିନିଶାଙ୍କୁ ନିମନ୍ତ୍ରଣ କରିଥିଲେ। ତାମିଲନାଡୁର ଭିନିଶା ବିଶ୍ଵ ନେତାଙ୍କ ସାମ୍ନାରେ କହିଛନ୍ତି ଯେ ଚାଲନ୍ତୁ କଥା କହିବା ବନ୍ଦ କରିବା ଏବଂ ପ୍ରକୃତରେ କାର୍ଯ୍ୟ କରିବା । ଆମେ ଧୂଆଁ ପ୍ରଦୂଷଣ ଏବଂ ଜୀବାଶ୍ମ ଇନ୍ଧନ ଅଧାରିତ ଅର୍ଥନୀତି ଅପେକ୍ଷା ଆମର ଉଦ୍ଭାବନ, ପ୍ରକଳ୍ପ ଏବଂ ସମାଧାନରେ ଆପଣଙ୍କର ସହଯୋଗ ଆଶା କରୁଛୁ । ଆମକୁ ପୁରୁଣା ବିତର୍କ ବାବଦରେ ଚିନ୍ତା କରିବା ବନ୍ଦ କରିବାକୁ ପଡିବ କାରଣ ଭବିଷ୍ୟତ ପାଇଁ ଏକ ନୂତନ ଦୃଷ୍ଟିକୋଣ ସୃଷ୍ଟି କରିବା ଆବଶ୍ୟକ ରହିଛି। ତେଣୁ ଆମର ଭବିଷ୍ୟତ ପ୍ରସ୍ତୁତ କରିବାକୁ ଆପଣଙ୍କୁ ଅର୍ଥ ସମୟ ଏବଂ ପରିଶ୍ରମ ଦେବାକୁ ପଡିବ।

ଭିନିଶା ତାଙ୍କ ବକ୍ତବ୍ୟରେ ବିଶ୍ବ ନେତାମାନଙ୍କୁ ଆହ୍ବାନ ଦେଇ କହିଛନ୍ତି ଯେ ଯଦି ବି ଆପଣ ଆମ ପଦକ୍ଷେପର ନେତୃତ୍ବ ନ ନିଅନ୍ତି, ତଥାପି ଆମେ ଏହାକୁ କରି ଦେଖାଇବୁ । ଯଦି ବି ଆପଣମାନେ ବିଳମ୍ବ କରନ୍ତି ତଥାପି ଆମେ ଆଗକୁ ବଢ଼ିବୁ। କିନ୍ତୁ ଦୟାକରି ଆମକୁ ସମର୍ଥନ କରିବାକୁ ଆମନ୍ତ୍ରଣ ଗ୍ରହଣ କରନ୍ତୁ, ଆପଣଙ୍କୁ ଅନୁତାପ କରିବାକୁ ପଡିବ ନାହିଁ । ମୁଁ କେବଳ ଭାରତର ଝିଅ ନୁହେଁ, ବରଂ ସାରା ବିଶ୍ବର ଝିଅ, ଆଉ ଏଥ୍‌ପାଇଁ ମୁଁ ଗର୍ବିତ । ଭିନିଶାଙ୍କ ସମ୍ବୋଧନ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ବୋରିସ୍ ଜନସନ, ଜୋ ବାଇଡେନଙ୍କ ସମେତ ଅନ୍ୟମାନେ ଉପସ୍ଥିତ ଥିଲେ। ସୂଚନାଯୋଗ୍ୟ ଯେ, ତିନିଶା ଆର୍ଥସଟ୍ ପୁରସ୍କାର ପ୍ରତିଯୋଗିତାରେ ଭାଗ ନେବା ପାଇଁ ଏକ ସୌର ଚାଳିତ ଆଇରନିଂ କାର୍ଟ ତିଆରି କରିଥିଲେ। ଦୂଷିତ ଅଙ୍ଗାରକୁ ସୌର ଶକ୍ତିରେ ବଦଳାଇବା ଏହି ମଡେଲର ଉଦ୍ଦେଶ୍ୟ ରହିଥିଲା। ଏଥିପାଇଁ ସେ ଉକ୍ତ ପ୍ରତିଯୋଗିତାର ଚୁଡାନ୍ତ ପର୍ଯ୍ୟାୟରେ ସ୍ଥାନ ପାଇଥିଲେ।