ରାଜସ୍ଥାନର ଚିତ୍ତୋରଗଡ଼ରେ ଜଣେ ୧୨ ବର୍ଷର ନାବାଳିକା ଏବଂ ତାଙ୍କ ମା'ଙ୍କ ଉପରେ ଏସିଡ୍ ଆକ୍ରମଣ କରିଥିବା ଦୋଷୀକୁ ଆଜମେର ମହିଳା ନିର୍ଯାତନା ଅଦାଲତ ଏକ ଐତିହାସିକ ଦଣ୍ଡ ଶୁଣାଇଛନ୍ତି। ବିଚାରପତି ଉତ୍ତମା ମାଥୁର ଏହି ମାମଲାର ବିଚାର କରି ଦୋଷୀ ମହମ୍ମଦ ଇସମାଇଲକୁ ଆଜୀବନ କାରାଦଣ୍ଡରେ ଦଣ୍ଡିତ କରିବା ସହ ୨ ଲକ୍ଷ ଟଙ୍କାର ଆର୍ଥିକ ଜୋରିମାନା ଲଗାଇଛନ୍ତି।

କ'ଣ ଥିଲା ପୂରା ଘଟଣା?

ଗତବର୍ଷ ପୀଡ଼ିତା ଏବଂ ତାଙ୍କ ୧୨ ବର୍ଷର ଝିଅ ଆଜମେରରୁ ଚିତ୍ତୋରଗଡ଼ ଯାଇଥିଲେ। ସକାଳ ସମୟରେ ସେମାନେ ଚିତ୍ତୋରଗଡ଼ ରେଳ ଷ୍ଟେସନର ପ୍ଲାଟଫର୍ମ ନମ୍ବର ଏକ ନିକଟରେ ଥିବା ବେଳେ ମଧ୍ୟପ୍ରଦେଶ ଇନ୍ଦୋରର ବାସିନ୍ଦା ଅଭିଯୁକ୍ତ ମହମ୍ମଦ ଇସମାଇଲ ନାବାଳିକା ଉପରକୁ ଏସିଡ୍ ଫିଙ୍ଗିଥିଲା। ନିଜ ଝିଅକୁ ବଞ୍ଚାଇବାକୁ ଚେଷ୍ଟା କରିବା ବେଳେ ଅଭିଯୁକ୍ତ ମା'ଙ୍କ ଉପରେ ମଧ୍ୟ ଏସିଡ୍ ଆକ୍ରମଣ କରିଥିଲା। ଏହି ବର୍ବର ଆକ୍ରମଣ ଯୋଗୁଁ ନାବାଳିକା ଜଣକ ନିଜର ଦୃଷ୍ଟିଶକ୍ତି ସବୁଦିନ ପାଇଁ ହରାଇ ବସିଥିଲେ।

ସିସିଟିଭି ଫୁଟେଜ୍‌ରୁ ଧରାପଡ଼ିଲା ଅଭିଯୁକ୍ତ

ଏହି ଘଟଣାର ପରଦିନ ହିଁ ପୋଲିସ ସିସିଟିଭି ଫୁଟେଜ୍ ଏବଂ ଅଭୟ କମାଣ୍ଡ ସେଣ୍ଟରର ସହାୟତାରେ ଅଭିଯୁକ୍ତକୁ ଗିରଫ କରିବାରେ ସଫଳ ହୋଇଥିଲା। ସ୍ୱତନ୍ତ୍ର ସରକାରୀ ଓକିଲ ନରେଶ କୁମାର ଧୂତଙ୍କ ସୂଚନା ଅନୁଯାୟୀ, ଅଦାଲତରେ ଦୋଷ ପ୍ରମାଣିତ କରିବା ପାଇଁ ଅଭିଯୋଗକାରୀଙ୍କ ପକ୍ଷରୁ ୧୭ ଜଣ ସାକ୍ଷୀଙ୍କ ବୟାନ ରେକର୍ଡ କରାଯିବା ସହ ୫୭ଟି ପ୍ରାମାଣିକ ଦସ୍ତାବିଜ୍ କୋର୍ଟରେ ଉପସ୍ଥାପନ କରାଯାଇଥିଲା।

କୋର୍ଟଙ୍କ କଡ଼ା ଟିପ୍ପଣୀ ଏବଂ କ୍ଷତିପୂରଣ ନିର୍ଦ୍ଦେଶ

ସଜା ଶୁଣାଇବା ବେଳେ କୋର୍ଟ ଅତ୍ୟନ୍ତ କଡ଼ା ଟିପ୍ପଣୀ ଦେଇ କହିଛନ୍ତି ଯେ ଏସିଡ୍ ଆକ୍ରମଣ କେବଳ ଶରୀରକୁ ଜାଳିନଥାଏ, ବରଂ ପୀଡ଼ିତାଙ୍କ ଭବିଷ୍ୟତ, ତାଙ୍କ ସ୍ୱପ୍ନ ଏବଂ ପୂରା ପରିବାରର ଖୁସିକୁ ମଧ୍ୟ ପାଉଁଶ କରିଦେଇଥାଏ। ପୀଡ଼ିତାଙ୍କର ଏଭଳି ଗୁରୁତର ଅବସ୍ଥାକୁ ଦୃଷ୍ଟିରେ ରଖି ଅଦାଲତ ଆଜମେର ଜିଲ୍ଲା ଆଇନ ସେବା ପ୍ରାଧିକରଣକୁ ସେମାନଙ୍କର ଉପଯୁକ୍ତ ଚିକିତ୍ସା ଏବଂ ଥଇଥାନ ନିମନ୍ତେ ଅଧିକ ଆର୍ଥିକ ସହାୟତା ଯୋଗାଇ ଦେବାକୁ ସୁପାରିଶ କରିଛନ୍ତି。

ଝାରସୁଗୁଡ଼ା: ଜଣେ ଦୃଷ୍ଟିହୀନ ନାବାଳିକାଙ୍କୁ ଯୌନ ନିର୍ଯାତନା ଦେବା ଭଳି ଏକ ସମ୍ବେଦନଶୀଳ ମାମଲାର ବିଚାର କରି  ଝାରସୁଗୁଡ଼ା ଜିଲ୍ଲା ପୋକ୍ସୋ କୋର୍ଟ ର ଅତିରିକ୍ତ ବିଚାରପତି ଅଭିଯୁକ୍ତକୁ ଆଜୀବନ କାରାଦଣ୍ଡାଦେଶ ପ୍ରଦାନ କରିଛନ୍ତି ।

ସୂଚନାଯୋଗ୍ୟ ଯେ, ମାତ୍ର  ୯୯ ଦିନରେ ଅଭିଯୁକ୍ତକୁ ଦୋଷୀ ସାବ୍ୟସ୍ତ  କରିବାରେ  ଝାରସୁଗୁଡା ପୋଲିସ ଉଲ୍ଲେଖନୀୟ ଭୁମିକା ଗ୍ରହଣ କରିଥିଲା।

ମାମଲାର ବିବରଣୀ ଅନୁଯାୟୀ, ଗତ ମେ ମାସ ୦୨ ତାରିଖରେ ପୀଡିତା ନାବାଳିକା ଜଣକ ଅଭିଯୁକ୍ତଙ୍କ ଘରକୁ ଟେଲିଭିଜନ ଶୁଣିବାକୁ ଯାଇଥିଲେ। ଏହି ସମୟରେ ଅଭିଯୁକ୍ତଙ୍କ ପରିବାରର ସମସ୍ତ ସଦସ୍ୟ ଶୋଇ ପଡ଼ିଥିବା ସମୟରେ ଅଭିଯୁକ୍ତ ନାବାଳିକାଙ୍କୁ ଦୁଷ୍କର୍ମ କରିଥିଲେ।   ଏହା ସହ ଘଟଣା ସଂକ୍ରାନ୍ତରେ ପ୍ରକାଶ କଲେ ପୀଡ଼ିତାଙ୍କୁ ହତ୍ୟା କରିବାକୁ ମଧ୍ୟ ଅଭିଯୁକ୍ତ ଧମକ ଦେଇଥିଲେ। ପରେ ନାବାଳିକା ଜଣକ ଘଟଣା ସଂକ୍ରାନ୍ତରେ ପରିବାର ଲୋକଙ୍କୁ କହିବା ପରେ  ତାଙ୍କ ବାପା ରେଙ୍ଗାଲି ଥାନାରେ ଅଭିଯୋଗ କରିଥିଲେ।

ରେଙ୍ଗାଲି ଥାନାରେ ଏହି ମାମଲା ନଂ–୧୦୫ ଭାବେ ପଞ୍ଜିକୃତ ହୋଇଥିଲା। ପୋଲିସର ତ୍ୱରିତ କାର୍ଯ୍ୟାନୁଷ୍ଠାନ ଫଳରେ  ଅଭିଯୁକ୍ତକୁ ୮ ତାରିଖରେ ଗିରଫ କରାଯାଇଥିଲା। ଏହା ସହ ୨୮ ମଇ ରେ ଚାର୍ଜସିଟ୍ ଦାଖଲ କରାଗଲା।

ଅଭିଯୁକ୍ତକୁ ଦୋଷୀ ସାବ୍ୟସ୍ତ କରିବାକୁ ପୋଲିସ ପକ୍ଷରୁ ଡିଏନଏ ବିଶ୍ଳେଷଣ ଏବଂ ଫୋରେନସିକ୍ ପ୍ରମାଣ ଭଳି ଅତ୍ୟାଧୁନିକ ବୈଜ୍ଞାନିକ କୌଶଳର ବ୍ୟବହାର କରାଯାଇଥିଲା।

ଆଜି, କୋର୍ଟ ଏହି ଐତିହାସିକ ରାୟ ପ୍ରକାଶ କରି, ଭାରତୀୟ ନ୍ୟାୟ ସଂହିତା (BNS) ର ଧାରା ୬୪(୨)(k) ଏବଂ ଯୌନ ଅପରାଧରୁ ଶିଶୁ ସୁରକ୍ଷା (POCSO) ଆଇନର ଧାରା ୬  ଅନୁଯାୟୀ ଅଭିଯୁକ୍ତକୁ ଦୋଷୀ ସାବ୍ୟସ୍ତ କରାଯାଇ ଦୋଷୀକୁ ଆଜୀବନ କାରାଦଣ୍ଡ ଏବଂ ୧୦,୦୦୦ ଟଙ୍କା  ଜରିମାନା ଦଣ୍ଡିତ କରିଛନ୍ତି।

ଏହା ସହ  କ୍ଷତିପୂରଣ ଯୋଜନା ଅଧୀନରେ, ପୀଡିତାଙ୍କୁ ୧୦,୫୦,୦୦୦ ଟଙ୍କା କ୍ଷତିପୂରଣ ପ୍ରଦାନ କରିବାକୁ କୋର୍ଟ ଆଦେଶ ଦେଇଛନ୍ତି। ଝାରସୁଗୁଡା ଏସପି ଶ୍ରୀ ସ୍ମିଥ ପି. ପରମାରଙ୍କ ପ୍ରତ୍ୟକ୍ଷ ତତ୍ୱାବଧାନରେ ରେଙ୍ଗାଲି  ଥାନା OIC ସମରେନ୍ଦ୍ର ନାୟକ ଏହି ମାମଲାର ତଦନ୍ତ କରିଥିଲେ। ସରକାରୀ ଓକିଲ ପି. ଆର ସିଂହ ଦେଓ ଏହି ମାମଲା ପରିଚାଳନା କରିଥିଲେ। ଓଡ଼ିଶା ପୋଲିସର ତଦନ୍ତ, ବୃତ୍ତିଗତ ଦକ୍ଷତା,  ପୀଡିତା ଓ ପରିବାରବର୍ଗଙ୍କ ସମର୍ଥନ ଏବଂ ସାକ୍ଷୀଙ୍କ ବୟାନ ଯୋଗୁଁ ଏହି ଐତିହାସିକ ସଫଳତା ମିଳିଛି। ଏହି ସଫଳତା ସମାଜର ସବୁଠାରୁ ଦୁର୍ବଳ ବ୍ୟକ୍ତି ବିଶେଷ ମାନଙ୍କ ପାଇଁ ଓଡିଶା ପୋଲିସ ନ୍ୟାୟ ପ୍ରଦାନ କରିବାର ପ୍ରତିବଦ୍ଧତାକୁ ପ୍ରକାଶ କରେ।

ଗୁଣୁପୁର: ୨୮ ବର୍ଷ ପରେ ଗର୍ଭବତୀ ପତ୍ନୀଙ୍କୁ ମିଳିଲା ନ୍ୟାୟ । ପତ୍ନୀ ହନ୍ତା ବିଧାୟକଙ୍କୁ ଆଜୀବନ କାରା ଦଣ୍ଡ ଶୁଣାଇଲେ ସ୍ୱତନ୍ତ୍ର ଏଡିଜେ -୩ ଏମ ଲଏ /ଏମପି କୋର୍ଟ । ପୂର୍ବତନ ଗୁଣୁପୁର ବିଧାୟକ ରାମ ମୂର୍ତ୍ତି ଗମାଙ୍ଗଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି କୋର୍ଟ । ଦଫା ୩୦୨ପାଇଁ ଆଜୀବନ କାରଦଣ୍ଡ ୫୦ହଜାର ଜୋରିମାନା ଅନାଦେୟ ୧ ବର୍ଷ ଜେଲ ଦଣ୍ଡ ସହିତ ଦଫା ୨୦୧ପ୍ରମାଣ ନଷ୍ଟ ପାଇଁ ୧୦ହଜାର ଟଙ୍କା ଫାଇନ ଅନାଦେୟ ୬ ମାସ ଜେଲ ଜେଲ ଦଣ୍ଡ ଶୁଣାଇଛନ୍ତି କୋର୍ଟ ।

ଭୁବନେଶ୍ୱର କୋର୍ଟରେ ଅଭିଯୁକ୍ତ ହାଜର ହେବା ପରେ ଆଜି ହେଲା ଦଣ୍ଡ ବିଧାନର ସୁଣାଣୀ ହୋଇଛି।  ସ୍ୱତନ୍ତ୍ର ଏମଏଲଏ,ଏମପି କୋର୍ଟ ହତ୍ୟା କାଣ୍ଡର ଦଫା ୩୦୨, ପ୍ରମାଣ ନଷ୍ଟ କରିବା ର ଦଫା ୨୦୧ରେ ପୂର୍ବରୁ ଦୋଷୀ ସାବ୍ୟସ୍ଥ ହୋଇଥିଲେ ପୂର୍ବତନ ବିଧାୟକ ରାମ ମୂର୍ତ୍ତି ଗମାଙ୍ଗ ।  ଏହି ଘଟଣାରେ ୧୧ଜଣ ସାକ୍ଷୀ ଓ ୧୫ଟି ତଥ୍ୟ, ପ୍ରମାଣ ଆଧାରରେ ଦୋଷୀ ସାବ୍ୟସ୍ତ ହୋଇଛନ୍ତି ପୂର୍ବତନ ବିଧାୟକ ରାମ ମୂର୍ତ୍ତି ଗମାଙ୍ଗ ।

ଅଗଷ୍ଟ ୨୯,୧୯୯୫ ରେ ଗର୍ଭବତୀ ସ୍ତ୍ରୀଙ୍କୁ ହତ୍ୟାକାଣ୍ଡ ନେଇ ଖାରବେଳ ନଗର ଥାନାରେ ହୋଇଥିଲା ମାମଲା । ଭୁବନେଶ୍ୱର ଏମଏଲଏ କୋଲୋନୀରେ ଥିବା ସରକାରୀ ବାସ ଭଵନ DS -୧୮/୧ ସକାଳ ୯ ଟା ହୋଇଥିଲା ହତ୍ୟା କାଣ୍ଡ । ଗର୍ଭବତୀ ପତ୍ନୀ ଶଶୀ ରେଖା ଗମାଙ୍ଗଙ୍କୁ ନିର୍ମମ ଭାବେ ହତ୍ୟା କରି ଆତ୍ମ ହତ୍ୟାର ରୂପ ଦେବା ସହ ପ୍ରମାଣ ନଷ୍ଟ କରିଥିଲେ ଅଭିଯୁକ୍ତ ବିଧାୟକ ।  ୧୬ରୁ ୧୭ ସପ୍ତାହର ଗର୍ଭବତୀ ଥିବା ଶଶୀ ରେଖାଙ୍କୁ ବାର୍ଥରୁମରେ ହତ୍ୟା କରିଥିଲା ଏହି ପତ୍ନୀ ହନ୍ତା । ପୂର୍ବରୁ କୋର୍ ରେ ଦୋଷୀ ସାବ୍ୟସ୍ତ ହୋଇଥିଲା

ବିଜାତଳା: ବିଶୋଇ ଥାନା ବାଢୁଣିଆ ଗାଁରେ ବଧୁ ହତ୍ୟା ଅଭିଯୋଗରେ ଗାଁର ରଥ ନାଏକ(୨୭)କୁ କୋର୍ଟ ଆଜୀବନ କାରାଦଣ୍ଡାଦେଶ ଶୁଣାଇଛନ୍ତି। ଘଟଣା କ୍ରମରେ ଗତ ୧. ୮. ୨୦୧୬ ରାତିରେ ଅଭିଯୁକ୍ତ ରଥ ନାଏକ ତାର ସ୍ତ୍ରୀ ରାଣୀ ସିଂକୁ ହାତ ଗୋଡ଼ ବାନ୍ଧି କିରୋସିନ ଢାଳି ନିଆଁ ଲଗାଇ ଦେଇଥିଲା । ସେ କୌଶଳ କ୍ରମେ ବାହାରକୁ ଚାଲି ଆସିବା ପରେ ପଡୋଶୀ ଲୋକେ ୧୦୮ଯୋଗେ ମେଡିକାଲ ପଠାଇଥିଲେ । ଚିକିତ୍ସାଧୀନ ଅବସ୍ଥାରେ ତାର ମୃତ୍ୟୁ ଘଟିଥିଲା। ଜମାନ ବନ୍ଦୀରେ ମାଜିଷ୍ଟ୍ରେଟ ଉପସ୍ଥିତିରେ ରାଣୀ ତାର ଶାଶୁ ଉପସ୍ଥିତିରେ ସ୍ୱାମୀ ଏହି କାଣ୍ଡ କରିଥିବା କହିଥିଲା। ସ୍ୱାମୀ ଓ ଶାଶୁ ଉଚ୍ଚ ଶିକ୍ଷିତା ରାଣୀର ଚରିତ୍ର ଉପରେ ସନ୍ଦେହ କରୁଥିଲେ। ଏନେଇ ରାଣୀର ବାପା ନନ୍ଦ ସିଂ ୩. ୮.୨୦୧୬ ରେ ଥାନାରେ ଲିଖିତ ଅଭିଯୋଗ କରିଥିଲେ। ବିଶୋଇ ପୁଲିସ କେସ ନଂ ୭୩/୧୬ ଏବଂ ଏସଟି କେସ ନଂ ୧୦/୧୭ର ବିଚାର କରି ଧାରା ୩୦୨ ମୂଳେ ରାଇରଙ୍ଗପୁର ଅତିରିକ୍ତ ଜିଲ୍ଲା ଓ ଦୌରାଜଜ ଅନୁପ ରଞ୍ଜନ ପଟ୍ଟନାୟକ ସ୍ୱାମୀ ରଥ ନାଏକକୁ ଆଜୀବନ କାରାଦଣ୍ଡାଦେଶ ସହ ୧୦ହଜାର ଟଙ୍କା ଜୋରିମାନା ଅନାଦେୟ ୬ମାସ ସଶ୍ରମ କାରାଦଣ୍ଡ ଶୁଣାଇଛନ୍ତି। ସରକାରଙ୍କ ପକ୍ଷରୁ ଏପିପି ପଙ୍କଜ ଦାସ ମାମଲା ପରିଚାଳନା କରୁଥିଲେ।