ଭୁବନେଶ୍ୱର : ସ୍ୱୟଂ ସହାୟକ ଗୋଷ୍ଠୀରୁ ଉଦ୍ୟୋଗ ଦିଗରେ ଯାତ୍ରା ଆରମ୍ଭ କରିଛି ‘ମିଶନ ଶକ୍ତି’। ମା’ ମାନଙ୍କୁ ଅଧିକ ଆର୍ଥିକ ସଶକ୍ତ ଓ ସ୍ୱାବଲମ୍ବୀ କରାଯିବା ନିମନ୍ତେ ସେମାନଙ୍କର ଦକ୍ଷତା ବିକାଶ ନିମନ୍ତେ ପଦକ୍ଷେପ ଗ୍ରହଣ ପାଇଁ କାର୍ଯ୍ୟ ଆରମ୍ଭ କରିଛି।ମହିଳାମାନେ କେବଳ ସ୍ୱୟଂ ସହାୟକ ଗୋଷ୍ଠୀରେ ସୀମିତ ନ ରହି କିପରି ଉଦ୍ୟୋଗୀ ଭାବରେ ପରିଚିତି ଓ ପ୍ରତିଷ୍ଠା ପାଇବେ ସେଥିପାଇଁ ଯୋଜନା ପ୍ରସ୍ତୁତ ହୋଇଛି। ଏଥିପାଇଁ ଦିଲ୍ଲୀର ଏକ ସଂସ୍ଥା ସହ ମିଶନ ଶକ୍ତି ବିଭାଗ ବୁଝାମଣା କରିଛି। ବୁଝାମଣା ଅନୁସାରେ ଆସନ୍ତା ୧୮ ମାସରେ ୧୦ ହଜାର ମହିଳାଙ୍କ ଦକ୍ଷତା ବିକାଶ କରାଯାଇ ସେମାନଙ୍କୁ ଉଦ୍ୟୋଗୀରେ ପରିଣତ କରାଯିବ। ଏସ୍‍ଏଚ୍‍ଜିରୁ ଯେଉଁ ଯାତ୍ରା ମହିଳାମାନେ ଆରମ୍ଭ କରିଛନ୍ତି ତାହାକୁ ଉଦ୍ୟୋଗରେ ରୂପାନ୍ତରିତ କରାଯିବ। ରାଜ୍ୟର ମହିଳମାନଙ୍କୁ ଆର୍ଥିକ ସମ୍ପନ୍ନ ଓ ସ୍ୱାବଲମ୍ବୀ କରିବା ନିମନ୍ତେ ମୁଖ୍ୟମନ୍ତ୍ରୀ ଯେଉଁ ସ୍ୱପ୍ନ ଦେଖିଛନ୍ତି ତାହାକୁ ପୂର୍ଣ୍ଣତଃ କାର୍ଯ୍ୟକାରୀ କରିବାକୁ ମିଶନ ଶକ୍ତି ପଦକ୍ଷେପ ଗ୍ରହଣ କରିଛି। ଏସ୍‍ଏଚ୍‍ଜିରୁ ଏମ୍‍ଏସ୍‍ଏମ୍‍ଇ ଦିଗକୁ ଏକ ବୈପ୍ଲବିକ ଯାତ୍ରା ଆରମ୍ଭ କରିଛି।

୨୨ବର୍ଷ ଧରି ଏକ ବିପ୍ଳବରେ ପରିଣତ ହୋଇଥିବା ମହିଳା ସ୍ୱୟଂ ସହାୟକ ଗୋଷ୍ଠୀରୁ ମା’ମାନଙ୍କୁ କ୍ଷୁଦ୍ର ମଧ୍ୟମ ବ୍ୟବସାୟୀରେ ପରିଣତ କରିବାପାଇଁ ଲକ୍ଷ୍ୟ ରଖାଯାଇଛି। ମହିଳାମାନେ ବଡ଼ ବ୍ୟବସାୟ କରି ରୋଜଗାରକ୍ଷମ ହେବାସହ ଅନ୍ୟମାନଙ୍କ ପାଇଁ ପ୍ରେରଣା ପାଲଟିଛନ୍ତି। ୨ବର୍ଷ ମଧ୍ୟରେ ହଜାର ହଜାର ଏମ୍‍ଏସ୍‍ଏମ୍‍ଇ ଗଠନ କରିବାପାଇଁ ଲକ୍ଷ୍ୟ ରଖାଯାଇଛି। ମହିଳାମାନେ କେବଳ ଏସ୍‍ଏଚ୍‍ଜିରେ ସୀମିତ ନ ରହି ଉଦ୍ୟୋଗୀ ହେବେ। ସେହି କ୍ରମରେ ମିଶନ୍‍ ଶକ୍ତି ମହିଳା ସ୍ୱୟଂ ସହାୟକ ଗୋଷ୍ଠୀଙ୍କ ଦ୍ୱାରା କ୍ଷୁଦ୍ର ଉଦ୍ୟୋଗ ପ୍ରତିଷ୍ଠା ସାଙ୍ଗକୁ ମହିଳା ଉଦ୍ୟୋଗୀ ସୃଷ୍ଟି କରିବା ପାଇଁ ପ୍ରତିଶ୍ରୁତିବଦ୍ଧ। ଏଥିପାଇଁ ମିଶନ ଶକ୍ତି ବିଭାଗ ଓ ନୂଆଦିଲ୍ଲୀ ଆପାରେଲ ମେଡ଼୍‍- ଅପ୍‍ସ ଆଣ୍ଡ ହୋମ୍‍ ଫର୍ଣ୍ଣିସିଂ ସେକ୍ଟର ସ୍କିଲ କାଉନ୍‍ସିଲ ମଧ୍ୟରେ ଚୁକ୍ତିନାମା ସ୍ୱାକ୍ଷରିତ ହୋଇଛି। ଫଳରେ ମିଶନ ଶକ୍ତି ମହିଳା ସ୍ୱୟଂ ସହାୟକ ଗୋଷ୍ଠୀର ସଦସ୍ୟାଙ୍କୁ ସିଲେଇ ମେସିନ୍‍ ଅପରେଟର ଭାବେ ଦକ୍ଷତାଭିତ୍ତିକ ତାଲିମ ଦିଆଯିବ।

Mission Shakti endeavours to transform SHG activities into micro-enterprises. This partnership will facilitate industry tie-ups where SHGs/PGs can be connected with large retailers or export houses for feasible job orders. pic.twitter.com/mCgUKvjyqK

— Mission Shakti (@mission_shakti) June 18, 2022

ଏହାଦ୍ୱାରା ମହିଳାମାନେ ଅଧିକ ସ୍ୱାବଲମ୍ବୀ ହେବା ସହ ଆତ୍ମନିର୍ଭରଶୀଳ ହୋଇପାରିବ। ଏହାସହ ପୋଷାକ ଶିଳ୍ପ କ୍ଷେତ୍ରରେ ମହିଳା କ୍ଷୁଦ୍ର ଉଦ୍ୟୋଗୀ ସୃଷ୍ଟି ହୋଇପାରିବେ। ମହିଳାଙ୍କ ଦ୍ୱାରା ପ୍ରସ୍ତୁତ ସାମଗ୍ରୀକୁ ବଜାରାଭିମୁଖୀ କରିବା ପାଇଁ ବିଭାଗ ପକ୍ଷରୁ ବିଭିନ୍ନ ପଦକ୍ଷେପ ନିଆଯିବ। ଏହି ଚୁକ୍ତିନାମା ମହିଳା ସ୍ୱୟଂ ସହାୟକ ଗୋଷ୍ଠୀର ସଦସ୍ୟାଙ୍କ ସିଲେଇ ଦକ୍ଷତାର ବିକାଶ କରିବା ସହିତ ସେମାନଙ୍କର ଆତ୍ମନିଯୁକ୍ତି କ୍ଷେତ୍ରରେ ମଧ୍ୟ ସହାୟକ ହେବ। ଏହି ଦକ୍ଷତାଭିତ୍ତିକ ତାଲିମ, ମିଶନ ଶକ୍ତି ସ୍ୱୟଂ ସହାୟକ ତଥା ଉତ୍ପାଦକ ଗୋଷ୍ଠୀମାନଙ୍କ ଦ୍ୱାରା ପରିଚାଳିତ ଟେଲରିଂ ୟୁନିଟ୍‍ ଗୁଡିକର କାର୍ଯ୍ୟଦକ୍ଷତାକୁ ଦୀର୍ଘ ସମୟ ପାଇଁ ସୁନିଶ୍ଚିତ କରିବା ପାଇଁ ଆବଶ୍ୟକୀୟ ଜ୍ଞାନକୌଶଳ ଓ ସୁଯୋଗ ଯୋଗାଇଦେବ। ମହିଳାମାନଙ୍କ ଦ୍ୱାରା ଜିଲ୍ଲା ତଥା ବ୍ଲକସ୍ତରରେ ଆହୁରି ଅଧିକ ୟୁନିଟ ଗଠନ କରାଯିବ। ୧୮ମାସ ମଧ୍ୟରେ ଏହି ତାଲିମକୁ କାର୍ଯ୍ୟକାରୀ କରାଯିବ। ଏହି ପ୍ରକଳ୍ପ ମାଧ୍ୟମରେ ତାଲିମପ୍ରାପ୍ତ ସଦସ୍ୟାମାନଙ୍କୁ ଆପାରେଲ୍‍ ମେଡ଼୍‍ ଅପସ୍‍ ଆଣ୍ଡ ହୋମ୍‍ ଫର୍ଣ୍ଣିସିଂ ସେକ୍ଟର ସ୍କିଲ କାଉନ୍‍ସିଲ୍‍ ସେମାନଙ୍କର ଟେଲରିଂ ୟୁନିଟ୍‍ ପ୍ରତିଷ୍ଠା କରିବାରେ ସାହାଯ୍ୟ କରିବ ସହ ଆବଶ୍ୟକୀୟ ସହାୟତା ଯୋଗାଇ ଦେବ। ଏହାଦ୍ୱାରା ପୋଷାକ ଶିଳ୍ପ କ୍ଷେତ୍ରରେ ସମ୍ଭାବ୍ୟ ସହଭାଗିତା ସୃଷ୍ଟି ଦିଗରେ ମାର୍ଗଦର୍ଶକ ଭାବେ କାର୍ଯ୍ୟ କରିବ।

ପୂର୍ବରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିଷ୍ପତ୍ତି କ୍ରମେ ବିଭିନ୍ନ ଜିଲ୍ଲାରେ ଥିବା ମହିଳା ସ୍ୱୟଂ ସହାୟକ ଗୋଷ୍ଠୀ ଏବଂ ଉତ୍ପାଦକ ଗୋଷ୍ଠୀର ସଦସ୍ୟାମାନେ ଅଙ୍ଗନବାଡି କେନ୍ଦ୍ର ଓ ସ୍କୁଲକୁ ପୋଷାକ ପ୍ରସ୍ତୁତ କରି ବର୍ଷକୁ ଲକ୍ଷାଧିକ ଟଙ୍କା ରୋଜଗାର କରି ସ୍ୱାବଲମ୍ବୀ ହୋଇପାରିଛନ୍ତି। ସେହିପରି କୋଭିଡ଼ ସମୟରେ ମାସ୍କ ପ୍ରସ୍ତୁତ କରି ମିଶନଶକ୍ତି ସହ ଜଡ଼ିତ ମହିଳାମାନେ ମଧ୍ୟ ଆର୍ଥିର୍କ ଦୃଷ୍ଟିରୁ ଲାଭାନ୍ୱିତ ହୋଇଛନ୍ତି। ଏଦିଗରେ ମହିଳାମାନଙ୍କ ଦକ୍ଷତା ବିକାଶ ସହିତ ପୋଷାକ ଶିଳ୍ପ କ୍ଷେତ୍ରରେ ମହିଳା ଉଦ୍ୟୋଗୀ ସୃଷ୍ଟି କରିବା ପାଇଁ ମିଶନ୍‍ ଶକ୍ତି ବିଭାଗ ପକ୍ଷରୁ ପଦକ୍ଷେପ ନିଆଯାଇଛି। ଏଥିରେ ଗ୍ରାମାଞ୍ଚଳ ଓ ସହରାଞ୍ଚଳର ମହିଳା ଏସ୍‍ଏଚ୍‍ଜି ସଦସ୍ୟାମାନେ ଉପକୃତ ହୋଇପାରିବେ। ପ୍ରତ୍ୟେକଟି ମହିଳାଙ୍କୁ ପରିଚୟ ଦେବା ପାଇଁ ବିଭାଗ କାର୍ଯ୍ୟରତ ରହିଛି। ଆଗକୁ ଏହା ମାଧ୍ୟମରେ ଅଧିକରୁ ଅଧିକ ମହିଳାଙ୍କୁ ସାମିଲ କରାଯିବ ବୋଲି ସୂଚନା ମିଳିଛି।

ଭୁବନେଶ୍ୱର : ମିଶନ ଶକ୍ତିର ମା’ମାନଙ୍କ ହାତରେ ଏବେ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାର ଦାୟିତ୍ୱ। ଗ୍ରାମାଞ୍ଚଳଠାରୁ ଆରମ୍ଭ କରି ସହରାଞ୍ଚଳ ପର୍ଯ୍ୟନ୍ତ ମୁଖ୍ୟମନ୍ତ୍ରୀଙ୍କ ‘ପ୍ରତ୍ୟେକ ଜୀବନ ମୂଲ୍ୟବାନ’ ମନ୍ତ୍ରକୁ କାର୍ଯ୍ୟକାରୀ କରିବାର ଦାୟିତ୍ୱ ଏହି ମା’ମାନଙ୍କ ଉପରେ ନ୍ୟସ୍ତ ହୋଇଛି। ବିଶେଷକରି ରାଜ୍ୟର ଆର୍ଥିକ ଦୃଷ୍ଟିରୁ ଦୁର୍ବଳ ଏବଂ ଦଳିତ ଲୋକଙ୍କୁ ସ୍ୱାସ୍ଥ୍ୟସେବା ଯୋଗାଇଦେବା ପାଇଁ ଆରମ୍ଭ ହୋଇଥିବା ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ ‘ସ୍ମାର୍ଟ କାର୍ଡ଼’ ଘରେ ଘରେ ପହଞ୍ଚାଇବାର ମଙ୍ଗ ଧରିଛନ୍ତି ମିଶନ ଶକ୍ତିର ମହିଳା ସ୍ୱୟଂ ସହାୟକ ଗୋଷ୍ଠୀ। ଏଥିପାଇଁ ସେମାନଙ୍କୁ ଦିଆଯାଇଛି ସ୍ୱତନ୍ତ୍ର ପ୍ରଶିକ୍ଷଣ। ବିଜୁ ସ୍ୱାସ୍ଥ୍ୟ କଲ୍ୟାଣ ସମ୍ପର୍କରେ ସଚେତନତା ସୃଷ୍ଟି କରିବା ଉଦ୍ଦେଶ୍ୟରେ ସାରା ରାଜ୍ୟରେ ଥିବା ମିଶନ ଶକ୍ତି ବିଭାଗ ଅଧିନରେ ଥିବା ୭୦ଲକ୍ଷ ମହିଳା ଏସ୍‍ଏଚ୍‍ଜି ସଦସ୍ୟା ଲାଗିପଡ଼ିଛନ୍ତି। ଏଥିପାଇଁ ଜିଲ୍ଲା, ପଞ୍ଚାୟତ, ବ୍ଲକ ଏବଂ ୱାର୍ଡସ୍ତରରେ ମହିଳାମାନଙ୍କୁ ପ୍ରଶିକ୍ଷଣ ଦିଆଯାଇଛି। ୩୦ଜିଲ୍ଲାର ପ୍ରତି ଗ୍ରାମ ପଞ୍ଚାୟତର ୩୧୪ଟି ବ୍ଲକରେ ଏବେ ଏହି ସଚେତନତା ପ୍ରଶିକ୍ଷଣ ଦିଆଯାଇ ମା’ମାନଙ୍କୁ ସ୍ୱାସ୍ଥ୍ୟ କଲ୍ୟାଣର ସୁବିଧା ସମ୍ପର୍କରେ ସୂଚାଇଦିଆଯାଇଛି।

ଏହାସହିତ ସହରାଞ୍ଚଳର ୱାର୍ଡସ୍ତରରେ ଥିବା ମିଶନ ଶକ୍ତିର ମହିଳା ସ୍ୱୟଂ ସହାୟକ ଗୋଷ୍ଠୀମାନଙ୍କୁ ଏନେଇ ତଥ୍ୟ ପ୍ରଦାନ କରାଯାଇଛି। ନିଜ ଗାଁ, ସହର ତଥା ପରିବାରର ସ୍ୱାସ୍ଥ୍ୟ ରକ୍ଷା ପାଇଁ ମୁଖ୍ୟମନ୍ତ୍ରୀଙ୍କ ପାଇଲଟ୍‍ ପ୍ରକଳ୍ପର କିପରି ସୁବିଧା ହାତ ପାହାନ୍ତାରେ ପାଇପାରିବେ, ସେନେଇ ପ୍ରଶିକ୍ଷଣ ଦିଆଯାଇଛି। ପ୍ରତି ଜିଲ୍ଲାରେ ଥିବା ପ୍ରତି ବିଏଲଏଫ ୍‍(ବ୍ଲକସ୍ତରୀୟ ମହିଳା ମହାସଂଘ) ଏବଂ ଏଏଲ୍‍ଏଫ୍‍(ଆଞ୍ଚଳିକସ୍ତରୀୟ ମହିଳା ମହାସଂଘ)ର ଲିଡର୍‍ମାନଙ୍କୁ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାର ସଚେତନତା ପାଇଁ ଶିକ୍ଷା ଦିଆଯାଇଛି। ପ୍ରତି ଗ୍ରାମପଞ୍ଚାୟତରେ ଥିବା ବିଏଲ୍‍ଏଫର ୩ଜଣ ମହିଳା ସଦସ୍ୟାଙ୍କୁ ସ୍ୱାସ୍ଥ୍ୟ ବିଭାଗର ଅଧିକାରୀମାନେ ଶିକ୍ଷା ଦେଇଛନ୍ତି।

ସେହିମାନେ ଅନ୍ୟ ମହିଳା ସ୍ୱୟଂ ସହାୟିକା ଗୋଷ୍ଠୀର ମହିଳା ସଦସ୍ୟାମାନଙ୍କୁ ପ୍ରଶିକ୍ଷଣ ନେଇଥିବା ତଥ୍ୟ ପହଞ୍ଚାଉଛନ୍ତି। ସେହିପରି ସହରାଞ୍ଚଳରେ ଥିବା ଆଞ୍ଚଳିକ ମହିଳା ମହାସଂଘର ସଦସ୍ୟାଙ୍କୁ ପ୍ରଶିକ୍ଷଣ ଦେଉଛନ୍ତି। ବିଶେଷ କରି ରାଜ୍ୟର ସମସ୍ତ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ ସ୍ମାର୍ଟ କାର୍ଡଧାରୀ ପରିବାର ସରକାରଙ୍କ ବିଜୁ ସ୍ୱାସ୍ଥ୍ୟ କଲ୍ୟାଣରେ ପଞ୍ଜିକୃତ ଘରୋଇ ଚିକିତ୍ସାଳୟରେ ବାର୍ଷିକ ପରିବାର ପିଛା ୫ଲକ୍ଷ ଟଙ୍କା ଏହି ଅର୍ଥ ରାଶିର ଉପଯୋଗ ହୋଇଗଲାପରେ ପରିବାରର ମହିଳାସଦସ୍ୟାମାନେ ଅତିରିକ୍ତ ୫ଲକ୍ଷ ଟଙ୍କାର ଚିକିତ୍ସା ସହାୟତା ସମ୍ପର୍କରେ ସଚେତନାର ବାର୍ତ୍ତା ଦେଉଛନ୍ତି। ଏହି ପ୍ରଶିକ୍ଷଣ ମାଧ୍ୟମରେ ମହିଳା ସ୍ୱୟଂ ସହାୟିକା ଗୋଷ୍ଠୀର ସଦସ୍ୟାମାନେ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା କ’ଣ, ଏଥିପାଇଁ କିଏ ଯୋଗ୍ୟ, ଏଥିରେ ମିଳୁଥିବା ସୁବିଧା, କେଉଁଠାରେ ହିତାଧିକାରୀମାନେ ମାଗଣାରେ ଚିକିତ୍ସା ସେବା ମିଳିପାରିବ, ପରିବାରର କେତେଜଣ ଜରୁରୀକାଳିନ ସମୟରେ କାର୍ଡ ନ ଥିଲେ କିପରି ସୁବିଧା ପାଇପାରିବେ, ବାର୍ଷିକ କେତେ ଟଙ୍କାର ଚିକିତ୍ସା ସୁବିଧା ପାଇପାରିବେ ଆଦି ସମ୍ପର୍କରେ ସୂଚନା ଦେଉଛନ୍ତି। ବର୍ତ୍ତମାନ ଗ୍ରାମାଞ୍ଚଳ ଏବଂ ସହରାଞ୍ଚଳରେ ପ୍ରଶିକ୍ଷଣ ନେଇଥିବା ସଦସ୍ୟାମାନେ ଏସ୍‍ଏଚ୍‍ଜି ସଦସ୍ୟାମାନଙ୍କୁ ସଚେତନତାର ବାର୍ତ୍ତା ଦେଉଛନ୍ତି। ସମ୍ପୂର୍ଣ୍ଣ ଦେୟମୁକ୍ତ ସ୍ୱାସ୍ଥ୍ୟସେବା ସମସ୍ତ ସରକାରୀ ଉପକେନ୍ଦ୍ରଠାରୁ ଆରମ୍ଭ କରି ଜିଲ୍ଲା ମୁଖ୍ୟ ଚିକିତ୍ସାଳୟ, ସମସ୍ତ ସରକାରୀ ମେଡ଼ିକାଲ କଲେଜ ହସ୍ପିଟାଲ ଓ ସରକାରୀ ବ୍ଲଡ୍‍ ବ୍ୟାଙ୍କ୍‍ମାନଙ୍କରେ ଏହି ଯୋଜନାର କାର୍ଡ କାମ ଦେବ।

କେବଳ ସେତିକି ନୁହେଁ ସରକାରୀ ଚିକିତ୍ସାଳୟ ବ୍ୟତୀତ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ ପଞ୍ଜିକୃତ ଘରୋଇ ଚିକିତ୍ସାଳୟ ମାଧ୍ୟମରେ ଗରିବ ଅସହାୟ ପରିବାରର ବାର୍ଷିକ ୫ଲକ୍ଷ ଟଙ୍କା ପର୍ଯ୍ୟନ୍ତ ଦେୟମୁକ୍ତ ସ୍ୱାସ୍ଥ୍ୟସେବା ଉପଲବ୍ଧ ରହିଛି ବୋଲି ଘରେ ଘରେ ଏବେ ମୁଖ୍ୟମନ୍ତ୍ରୀଙ୍କ ଏହି ଯୋଜନାର ବାର୍ତ୍ତା ପହଞ୍ଚାଉଛନ୍ତି। ଏସମ୍ପର୍କରେ ମିଶନ ଶକ୍ତି ବିଭାଗର ଉପଦେଷ୍ଟା ଲୋପାମୁଦ୍ରା ବକ୍ସି ପାତ୍ର କହିଛନ୍ତି, ପ୍ରତି ଜିଲ୍ଲା ତଥା ପଞ୍ଚାୟତରେ ଏହି ପ୍ରଶିକ୍ଷଣ ଶେଷ ହୋଇଗଲାଣି। ସେହିପରି ୱାର୍ଡସ୍ତରରେ ମଧ୍ୟ ଶେଷ ହୋଇଛି। ପ୍ରତି ବିଏଲ୍‍ଏଫ୍‍ ମାନଙ୍କର ଏହି ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା କାର୍ଡ ସମ୍ପର୍କରେ ମିଶନ ଶକ୍ତି ଓ ସ୍ୱାସ୍ଥ୍ୟ ବିଭାଗର ଅଧିକାରୀମାନଙ୍କ ତତ୍ତ୍ୱାବଧାନରେ ଏହି ପ୍ରଶିକ୍ଷଣ ପ୍ରଦାନ କରାଯାଇଛି। ଉପାନ୍ତ ଅଞ୍ଚଳଠାରୁ ଆରମ୍ଭ କରି ସହରାଞ୍ଚଳରେ ଥିବା ଗରିବ ଅସହାୟଙ୍କ ପାଖରେ କିପରି ଏହି ଯୋଜନା ପହଞ୍ଚାଇପାରିବ, ଏଥିପାଇଁ ମା’ମାନଙ୍କୁ ଏହି ଗୁରୁ ଦାୟିତ୍ୱ ଦିଆଯାଇଛି।

କେନ୍ଦ୍ରାପଡା/ଗରଦପୁର : ସ୍ୱୟଂ ସହାୟିକା ଗୋଷ୍ଠୀର ମହିଳାମାନଙ୍କୁ ସ୍ୱାବଲମ୍ବୀ କରିବାକୁ ମିଶନ ଶକ୍ତି ଓ ଓଡିଶା ଜୀବିକା ମିଶନ ପକ୍ଷରୁ କେନ୍ଦ୍ରାପଡା ଗରଦପୁର ବ୍ଲକ ଅଧିନ ବ୍ରହ୍ମପୁର ଅଞ୍ଚଳରେ ଆରମ୍ଭ ହୋଇଛି ପ୍ରୟାସ । ବିଭିନ୍ନ ପ୍ରକାରର ଆଚାର, ମସଲା ଗୁଣ୍ଡ, ବଢି ଆଉ ପାମ୍ପଡ଼ ଇତ୍ୟାଦି ପ୍ରସ୍ତୁତି ଆରମ୍ଭ ହୋଇଛି । ଏହାକୁ ପ୍ରସ୍ତୁତି କରି ବଜାରରେ ବିକ୍ରି କରିବାକୁ ପ୍ରଶାସନ ପକ୍ଷରୁ ସମସ୍ତ ପ୍ରକାରର ସହଯୋଗ କରାଯିବାକୁ କୁହାଯାଇଛି । ଏହି ୨୦ ଜଣ ମହିଳାଙ୍କୁ ଉତ୍ପାଦ କରିବାକୁ ଗ୍ରାମାଞ୍ଚଳ ଆତ୍ମନିଯୁକ୍ତି ତାଲିମ ଅନୁଷ୍ଠାନରୁ ଟ୍ରେନିଂ ଦିଆଯିବା ପରେ ଉତ୍ପାଦ ଗ୍ରୁପ ଗଠନ କରଯାଇ କାର୍ଯ୍ୟ ଆରମ୍ଭ କରାଯାଇଛି ।

ଏହି ଉତ୍ପାଦ ଗ୍ରୁପ ମାଧ୍ୟମରେ ନିଜେ ଶିଖିବା ସହ ଅନ୍ୟ ମହିଳାଙ୍କୁ ଶିଖାଇ ଆତ୍ମନିର୍ଭରଶୀଳ କରାଇବା ହେଉଛି ପ୍ରଶାସନର ଲକ୍ଷ । ମହିଳାମାନେ କିଛି ଉପାର୍ଜନ କରିବା ସହିତ ଅନ୍ୟ ବେରୋଜଗାର ମହିଳାଙ୍କୁ ଚିହ୍ନଟ କରି ଆତ୍ମନିର୍ଭର କରିବାକୁ ଲକ୍ଷ ରଖାଯାଇଛି । ଏନେଇ ଗରଦପୁର ବ୍ଲକ ଅଧିନ ବ୍ରହ୍ମପୁରରେ ସ୍ୱାବଲମ୍ବିନୀ ଗୃହରେ ଉତ୍ପାଦ କାର୍ଯ୍ୟ ଆରମ୍ଭ ହୋଇଛି । ଏହି କାର୍ଯ୍ୟ କରିବାକୁ ଗରଦପୁର ପଞ୍ଚାୟତର ସିଆରପି, ୧୨ ଜଣ ଏମ୍ବିକେ, ମହାସଂଘର ସଭାପତି ସସ୍ମିତା ରାୟ, ସେକ୍ରେଟାରୀ ଅଞ୍ଜନା ନାୟକଙ୍କ ନେତୃତ୍ୱରେ ଆରମ୍ଭ ହୋଇଛି ।

ଏନେଇ ଆତ୍ମନିଯୁକ୍ତି ତାଲିମ ଅନୁଷ୍ଠାନର ନିର୍ଦେଶକ ପ୍ରତାପ ଚନ୍ଦ୍ର ଦାସ କହିଛନ୍ତି ଆଜି ଉଦଘାଟନ ହୋଇଥିବା ଉତ୍ପାଦ ଗ୍ରୁପରେ ବଢି, ପାମ୍ପଡ଼,ଆଚାର, ମସଲା ଗୁଣ୍ଡ ପ୍ରସ୍ତୁତି ଆରମ୍ଭ ହୋଇଛି । ତେବେ ଏହିସବୁର ମାନ ବଢିବା ପରେ ରାଜ୍ୟ ସରକାରଙ୍କ ଓରମାସରେ ସାମିଲ କରାଯାଇ ବିଭିନ୍ନ ମେଳା,ପ୍ରଦର୍ଶନକୁ ଉତ୍ପାଦ ସାମଗ୍ରୀ ନିଆଯିବାର ବ୍ୟବସ୍ଥା କରାଯିବ । ଏହାଛଡା ବଜାର ଚାହିଦା ବଢ଼ିବା ପରେ ଉତ୍ପାଦ ପରିମାଣ ମଧ୍ୟ ବଢ଼ିବା ନେଇ ଗରଦପୁର ପଞ୍ଚାୟତ ସ୍ତରୀୟ ସଙ୍ଘ ପକ୍ଷରୁ କୁହାଯାଇଛି ।ବୈଷୟିକ ଜ୍ଞାନ କୌଶଳରେ ଏହିସବୁ ସାମଗ୍ରୀ ପ୍ରସ୍ତୁତି କରାଯିବାକୁ ଗରଦପୁର ମହାସଂଘ ପକ୍ଷରୁ ଉତ୍ପାଦ ଗ୍ରୁପକୁ ୫୦ ହଜାର ଟଙ୍କା ଋଣ ଯୋଗାଇ ଦିଆଯାଇଛି । ମହିଳାମାନେ ନିଜେ ଆତ୍ମନିର୍ଭରଶୀଳ ହେବା ସହିତ ଘରେ ବସି ରହିଥିବା ମହିଳାଙ୍କୁ ପ୍ରଶିକ୍ଷଣ ଦେଇ ସେମାନଙ୍କୁ ମଧ୍ୟ ଆତ୍ମନିର୍ଭର କରିବାକୁ ଆଜିର ଉଦଘାଟନ ଉତ୍ସବରେ ଗରଦପୁର ବ୍ଲକ ବିଡ଼ିଓ ରଞ୍ଜିତ କୁମାର ମଲ୍ଲିକ, ବିପିଏମ ସୁସ୍ନତା ରାୟ, ବିଏଲସି ରଶ୍ମିରେଖା ସାହୁ, ଗ୍ରାମାଞ୍ଚଳ ଆତ୍ମନିଯୁକ୍ତି ତାଲିମ ଅନୁଷ୍ଠାନର ନିର୍ଦେଶକ ପ୍ରତାପ ଚନ୍ଦ୍ର ଦାସ ପ୍ରମୁଖ ଯୋଗଦେଇ ଏହି ମହିଳାମାନଙ୍କୁ ଉତ୍ସାହିତ କରିଥିଲେ ।