ନରୱେ ରାଜାଙ୍କ ଅନ୍ତିମ ସଂସ୍କାରରେ ଯୋଗଦେବା ପାଇଁ ଯାଉଥିବା ବେଳେ ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ଏକ ବଡ଼ ଧରଣର ଦୁର୍ଘଟଣାରୁ ଅଳ୍ପକେ ବର୍ତ୍ତି ଯାଇଛନ୍ତି। ମାଲଡୋଭାରୁ ଉଡ଼ାଣ ଭରିବା ସମୟରେ ତାଙ୍କ ବିମାନ ଏକ ଡ୍ରୋନ୍ ସହ ଧକ୍କା ହେବାରୁ ଅଳ୍ପକେ ରକ୍ଷା ପାଇଥିଲା। ନରୱେର ପ୍ରଧାନମନ୍ତ୍ରୀ ଜୋନାସ୍ ଗାହର ଷ୍ଟୋରି ଏହି ସୂଚନା ପ୍ରଦାନ କରିଛନ୍ତି।

ବୁଧବାର ଦିନ ନରୱେର ରାଜା ହାରାଲ୍ଡ ପଞ୍ଚମଙ୍କ ଅନ୍ତିମ ସଂସ୍କାରରେ ଯୋଗ ଦେବାକୁ ଜେଲେନସ୍କି ଓସଲୋ ଯାଇଥିଲେ। ତେବେ ଏହି ଡ୍ରୋନ୍‌ଟି ଜେଲେନସ୍କିଙ୍କ ବିମାନର କେତେ ନିକଟତର ଥିଲା, ସେ ନେଇ ନରୱେ ପ୍ରଧାନମନ୍ତ୍ରୀ କୌଣସି ସ୍ପଷ୍ଟ ତଥ୍ୟ ଦେଇନାହାନ୍ତି।

ଉଡ଼ାଣରେ ବିଳମ୍ବ ଓ ଆକାଶମାର୍ଗ ବନ୍ଦ

ମାଲଡୋଭାର ସରକାରୀ ମୁଖପାତ୍ର ଡୁମିଟ୍ରି ଚିଓରିସିଙ୍କ କହିବା ଅନୁଯାୟୀ, ଦେଶ ଉପରେ ଉଡୁଥିବା ବିମାନଗୁଡ଼ିକୁ ସୁରକ୍ଷା ଦେବା ପାଇଁ ସେହି ସମୟରେ ଆକାଶମାର୍ଗ ବନ୍ଦ କରିଦିଆଯାଇଥିଲା। ଫଳରେ ଜେଲେନସ୍କିଙ୍କ ବିମାନ ସମେତ ମୋଟ ୩ଟି ବିମାନର ଉଡ଼ାଣ ବିଳମ୍ବ ହୋଇଥିଲା। ପରିସ୍ଥିତି ସ୍ୱାଭାବିକ ହେବା ପରେ ନିର୍ଦ୍ଧାରିତ ସମୟ ଠାରୁ ବିଳମ୍ବରେ ୟୁକ୍ରେନ ରାଷ୍ଟ୍ରପତିଙ୍କ ବିମାନ ଉଡ଼ାଣ ଆରମ୍ଭ କରିଥିଲା।

ନାଟୋ ସୀମାରେ ଡ୍ରୋନ୍ ପ୍ରବେଶ

ଅଧିକାରୀଙ୍କ ସୂଚନା ଅନୁଯାୟୀ, ଏହି ଡ୍ରୋନ୍‌ଟି ପ୍ରଥମେ ନାଟୋ ସଦସ୍ୟ ଥିବା ରୋମାନିଆର ଆକାଶମାର୍ଗରେ ପ୍ରବେଶ କରିଥିଲା। ଏହା ଉପରେ ନଜର ରଖିବା ପାଇଁ ସ୍ପେନର ବାୟୁସେନାର ଦୁଇଟି ଏଫ-୧୮ (F-18) ଲଢୁଆ ବିମାନକୁ ମଧ୍ୟ ପଠାଯାଇଥିଲା। ଏହାପରେ ଡ୍ରୋନ୍‌ଟି ମାଲଡୋଭା ଆକାଶମାର୍ଗରେ ପୁନର୍ବାର ପ୍ରବେଶ କରିଥିଲା।

ବିସ୍ଫୋରଣ ଏବଂ ରୁଷର 'ଜେରାନ' ଡ୍ରୋନ୍ ସନ୍ଦେହ

ମାଲଡୋଭା ପୋଲିସର ସୂଚନା ଅନୁଯାୟୀ, ରାଜଧାନୀ ଚିସିନାଉର ଅନ୍ତର୍ଜାତୀୟ ବିମାନବନ୍ଦରରୁ ପ୍ରାୟ ୧୬୦ କିଲୋମିଟର ଦୂର ରିସକାନି ଜିଲ୍ଲାର ଏକ ସୂର୍ଯ୍ୟମୁଖୀ କ୍ଷେତରେ ଏହି ଡ୍ରୋନ୍‌ଟି ଦୁର୍ଘଟଣାଗ୍ରସ୍ତ ହୋଇ ବିସ୍ଫୋରଣ ହୋଇଥିଲା। ଏହାଫଳରେ ଚାରୋଟି ସ୍ଥାନରେ ନିଆଁ ଲାଗିଯାଇଥିଲା। ତେବେ ଏଥିରେ କୌଣସି ମୃତାହତର ଖବର ମିଳିନାହିଁ।

ତଦନ୍ତ ପରେ ବିଶେଷଜ୍ଞମାନେ ଜାଣିବାକୁ ପାଇଛନ୍ତି ଯେ, ଘଟଣାସ୍ଥଳରୁ ମିଳିଥିବା ଡ୍ରୋନ୍‌ର ଅଂଶବିଶେଷ ରୁଷର ଜେରାନ (Geran) ଡ୍ରୋନ୍ ସହିତ ମେଳ ଖାଉଛି। ୟୁକ୍ରେନ ବିରୋଧରେ ଯୁଦ୍ଧରେ ରୁଷ ଏହି ପ୍ରକାରର ଡ୍ରୋନ୍‌କୁ ବହୁଳ ଭାବରେ ବ୍ୟବହାର କରୁଛି। ୨୦୨୨ରେ ରୁଷ ଆକ୍ରମଣ ପରଠାରୁ ୟୁକ୍ରେନର ପଡ଼ୋଶୀ ରୋମାନିଆ ଏବଂ ମାଲଡୋଭାରେ ଏଭଳି ବହୁ ଡ୍ରୋନ୍ ଆକ୍ରମଣ ଘଟଣା ସାମ୍ନାକୁ ଆସିଛି।

ମୃତ୍ୟୁ ଚିରନ୍ତନ ସତ୍ୟ । ଯିଏ ଜନ୍ମ ହୋଇଛି ତା’ର ମୃତ୍ୟୁ ସୁନିଶ୍ଚିତ । କିନ୍ତୁ ଏହି ପୃଥିବୀରେ ମଧ୍ୟ ଏପରି ଏକ ଦେଶ ଅଛି, ଯେଉଁଠାରେ ମୃତ୍ୟୁ ଉପରେ ଲଗାଯାଇଛି ପ୍ରତିବନ୍ଧକ | ନରୱେର ଲଙ୍ଗଇୟରବେନ୍ ସହରରେ ଏଭଳି ଅଜବ ଆଇନ ଦେଖିବାକୁ ମିଳେ। ଏହା ନରୱେର ଉତ୍ତର ଦିଗରେ ଅବସ୍ଥିତ। ମୃତ୍ୟୁ ଉପରେ ଏଠାକାର ସ୍ଥାନୀୟ ପ୍ରଶାସନ କଡ଼ା ପ୍ରତିବନ୍ଧକ ଲଗାଇଛନ୍ତି । ଏଠାରେ ବିଗତ ୭୦ ବର୍ଷ ହେଲାଣି କାହାରି ମୃତ୍ୟୁ ହୋଇନାହିଁ । କେବଳ ସେତିକି ନୁହେଁ, ଏହି ସହରରେ ଯଦି କାହାର ମୃତ୍ୟୁ ସମୟ ପାଖେଇ ଆସେ ବା କାହାର ଗୁରୁତର ସ୍ବାସ୍ଥ୍ୟ ସଙ୍କଟ ଉପୁଜେ ତେବେ ସେହି ଲୋକଙ୍କୁ ତୁରନ୍ତ ହେଲିକପ୍ଟର ଯୋଗେ ଦେଶର ଅନ୍ୟ ସ୍ଥାନକୁ ନିଆଯାଏ | ତାଙ୍କର ମୃତ୍ୟୁ ପରେ ସେହିଠାରେ ହିଁ ତାଙ୍କର ଅନ୍ତିମ ସଂସ୍କାର କରାଯାଏ ।

ସ୍ଥାନୀୟ ପ୍ରଶାସନ ଏଭଳି ଏକ ଆଇନ ପ୍ରଚଳନ କରିବା ପଛରେ ମୁଖ୍ୟ କାରଣ ହେଉଛି, ଏହି ଅଞ୍ଚଳରେ ସବୁବେଳେ ବରଫ ଆଚ୍ଛାଦିତ ହୋଇ ରହିଥାଏ । ଶୀତଦିନେ ଏଠାକାର ତାପମାତ୍ରା ଏତେ କମ୍ ହୋଇଯାଏ ଯେ, ଜୀବନଯାତ୍ରା ଗଭୀର ଭାବେ ପ୍ରଭାବିତ ହୋଇଥାଏ । ଏପରି ପରିସ୍ଥିତିରେ ଯଦି ଏଠାରେ କୌଣସି ବ୍ୟକ୍ତିଙ୍କର ମୃତ୍ୟୁ ହୋଇଯାଏ, ଶବକୁ କବର ଦେଲେ ମଧ୍ୟ ବର୍ଷ ବର୍ଷ ଧରି ଏହା ସତେଜ ରହିଥାଏ। ଅନ୍ୟପକ୍ଷରେ ମୃତ ବ୍ୟକ୍ତିର ଯଦି କୌଣସି ରୋଗଥାଏ, ତେବେ ସେହି ଜୀବାଣୁ ମଧ୍ୟ ଦୀର୍ଘଦିନ ପର୍ଯ୍ୟନ୍ତ ଜୀବିତ ରହିଥାନ୍ତି। ଫଳରେ ସଂକ୍ରମଣ ହେବାର ଆଶଙ୍କା ବଢ଼ି ଯାଇଥାଏ | ଏଠାରେ ୧୯୧୭ ମସିହାରେ ଜଣେ ବ୍ୟକ୍ତିଙ୍କର ଇନ୍‌ଫ୍ଲୁଏଞ୍ଜାରେ ମୃତ୍ୟୁ ହୋଇଥିଲା। ସେତେବେଳେ ସେହି ବ୍ୟକ୍ତିଙ୍କ ଶବକୁ ସହରରେ ପୋତି ଦିଆଯାଇଥିଲା, କିନ୍ତୁ ସେହି ବ୍ୟକ୍ତିଙ୍କ ଶବରେ ଆଜି ବି ଭୂତାଣୁ ମହଜୁଦ ଅଛନ୍ତି । ତେଣୁ ସହରକୁ ମହାମାରୀରୁ ରକ୍ଷା କରିବା ପାଇଁ ପ୍ରଶାସନ ଲୋକଙ୍କ ମୃତ୍ୟୁ ଉପରେ ପ୍ରତିବନ୍ଧକ ଲଗାଇଛି ।