ବଲାଙ୍ଗିର : ବହୁ ଚର୍ଚ୍ଚିତ ମମିତା ମେହେର ହତ୍ୟା ମାମଲାର ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁ ଗତକାଲି ଜେଲରେ ଆତ୍ମହତ୍ୟା କରିଥିଲା। ମଙ୍ଗଳବାର ତାଙ୍କୁ କୋର୍ଟରେ ହାଜର ଲାଗି ନେବା ନିମନ୍ତେ ଜେଲ କର୍ମଚାରୀମାନେ ତାଙ୍କ କୋଠରୀରେ ପହଞ୍ଚିବା ବେଳେ ସେ ବେକରେ ଗାମୁଛା ବାନ୍ଧି ଝୁଲି ପଡ଼ିଥିବା ଦେଖା ଯାଇଥିଲା। ଜେଲ କର୍ତ୍ତୃପକ୍ଷ ତୁରନ୍ତ ତାଙ୍କୁ କଣ୍ଟାବାଞ୍ଝି ଡାକ୍ତରଖାନାକୁ ସ୍ଥାନାନ୍ତର କରିଥିଲେ, ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ସ୍ଥାନୀୟ ପୁଲିସ ଏହି ଘଟଣାକୁ ନେଇ ଏକ ଅପମୃତ୍ୟୁ ମାମଲା ରୁଜୁ କରିଛି। ଘଟଣାର ଗୁରୁତ୍ୱ ଦୃଷ୍ଟିରୁ ଗୋବିନ୍ଦ ଆତ୍ମହତ୍ୟା ମାମଲାର କ୍ରାଇମବ୍ରାଞ୍ଚ ତଦନ୍ତ ନିମନ୍ତେ ପୁଲିସ ଡ଼ିଜି ସୁନୀଲ ବଂଶଲ ନିର୍ଦ୍ଦେଶ ଦେଇଛନ୍ତି। ଅନ୍ୟପକ୍ଷରେ ସମ୍ବଲପୁର ରେଞ୍ଜ ଜେଲ ଆଇଜି କଣ୍ଟାବାଞ୍ଝି ଜେଲ ପରିଦର୍ଶନ କରି ଘଟଣାର ଅନୁସନ୍ଧାନ ଆରମ୍ଭ କରିଛନ୍ତି। ସେହିପରି ଡ଼ିଜିଙ୍କ ନିର୍ଦ୍ଦେଶ ପରେ କ୍ରାଇମବ୍ରାଞ୍ଚର ଏକ ୧୦ ଜଣିଆ ଅଧିକାରୀ ଦଳ କଣ୍ଟାବାଞ୍ଝି ଜେଲରେ ପହଞ୍ଚିଥିବା ସୂଚନା ମିଳିଛି। ଅନ୍ୟପକ୍ଷରେ କାର୍ଯ୍ୟରେ ଅବହେଳା ପ୍ରଦର୍ଶନ ଅଭିଯୋଗରେ କଣ୍ଟାବାଞ୍ଝି ଉପ କାରାଗାର ୱାର୍ଡ଼ର ଅକ୍ଷୟ ମହାନ୍ତିଙ୍କୁ ତୁରନ୍ତ ନିଲମ୍ବନ କରାଯାଇଛି। ରିପୋର୍ଟ ମିଳିବା ପରେ ଅନ୍ୟ ଅଧିକାରୀଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜଣାପଡ଼ିଛି।

ତେବେ ଗୋବିନ୍ଦର ଆତ୍ମହତ୍ୟା ପରେ ମମିତା ମେହେରଙ୍କ ପରିବାର ଲୋକ ମୁହଁ ଖୋଲିଛନ୍ତି। ମମିତାଙ୍କ ମାଆ ତୁଳସୀ ମେହେର କହିଛନ୍ତି ଯେ ଆମେ ଚାହୁଁଥିଲୁ ମମିତାର ଯେମିତି ଛଟପଟ ହୋଇ ଜୀବନ ଗଲା, ଗୋବିନ୍ଦର ମଧ୍ୟ ସେମିତି ଜୀବନ ଯାଉ। ଗୋବିନ୍ଦ ଆତ୍ମହତ୍ୟା କରିଛି। ଭଗବାନ ତାକୁ ଦଣ୍ଡ ଦେଇଛନ୍ତି।

ଅନ୍ୟପଟେ ମମିତାଙ୍କ ବଡ଼ବାପା କୌଶିକ ମେହର କହିଛନ୍ତି ଯେ ଆମ ଝିଅ ମମିତା ହତ୍ୟା ଘଟଣାରେ ଗୋବିନ୍ଦ ମୁଖ୍ୟ ନାୟକ। ଷଡ଼ଯନ୍ତ୍ର କରି ସେ ମମିତାକୁ ହତ୍ୟା କରିଥିଲା। ତାକୁ ଦଣ୍ଡ ଦେବା ପାଇଁ ଆମେ ପୁଲିସ କର୍ତ୍ତୃପକ୍ଷଙ୍କ ଦ୍ୱାରସ୍ଥ ହୋଇଥିଲୁ, ସରକାରଙ୍କୁ ଅନୁରୋଧ କରିଥିଲୁ, ଭଗବାନଙ୍କୁ ପ୍ରାର୍ଥର୍ନା କରୁଥିଲୁ। ସେ ଦଣ୍ଡ ପାଇବା ଏକ ପ୍ରକାର ନିଶ୍ଚିତ ଥିଲା। ମାତ୍ର ଆଇନରେ ଦଣ୍ଡ ପାଇବା ପୂର୍ବରୁ ସେ ନିଜକୁ ନିଜେ ଦଣ୍ଡ ଦେଇ ନିଜର ଅପରାଧ ସ୍ୱୀକାର କରିଛି। ଏହି ମାମଲାରେ ଆଉ କିଛି ବ୍ୟକ୍ତି ମଧ୍ୟ ଅଭିଯୁକ୍ତ ଅଛନ୍ତି। ଆଇନ ସେମାନଙ୍କୁ ଉପଯୁକ୍ତ ଦଣ୍ଡ ଦେବ ବୋଲି ଆମେ ଆଶାବାଦୀ ବୋଲି କହିଛନ୍ତି ମମିତାଙ୍କ ବଡ଼ବାପା କୌଶିକ ମେହର।

ସେ କହିଛନ୍ତି ଯେ ମମିତା ନିଖୋଜ ହେବା ଠାରୁ ଗୋବିନ୍ଦ ସାହୁ ଗିରଫ ହେବା ପର୍ଯ୍ୟନ୍ତ ପ୍ରଶାସନ, ପୁଲିସ, ଗଣମାଧ୍ୟମ, ସ୍ଥାନୀୟ ଲୋକଙ୍କ ଅନେକ ସହଯୋଗ ରହିଥିଲା। ଫଳରେ ଗୋବିନ୍ଦ ସାହୁ ଭଳି ଏକ ହତ୍ୟାକାରୀ ଶେଷରେ ଗିରଫ ହୋଇଥିଲା। ଗିରଫ ହେବା ପରେ ଅଦାଲତରେ ସାକ୍ଷ୍ୟ ଦେଇଥିବା ସମସ୍ତ ସାକ୍ଷୀ ଗୋବିନ୍ଦ ବିରୋଧରେ ଦେଇଥିଲେ। ଏପରିକି ତାଙ୍କ ଗାଁ ଲୋକ ମଧ୍ୟ ଗୋବିନ୍ଦ ବିରୋଧରେ ଯାଇଥିଲେ। ଗୋବିନ୍ଦର କିଛି ସମର୍ଥକ ସାକ୍ଷୀ ମାନଙ୍କୁ ଧମକ ଚମକ ମଧ୍ୟ ଦେଇଥିଲେ। ତଥାପି ଆଇନ ଉପରେ ଆମର ସମ୍ପୂର୍ଣ୍ଣ ଭରସା ରହିଥିଲା। କିନ୍ତୁ ଆଇନ ଫାଶୀଦଣ୍ଡ ଦେବା ପୂର୍ବରୁ ଭଗବାନ ନିଜେ ଆତ୍ମହତ୍ୟା ରୂପରେ ଦଣ୍ଡ ଦେଇଛନ୍ତି। ଆତ୍ମହତ୍ୟା କରି ଗୋବିନ୍ଦ ନିଜେ କରିଥିବା ଭୁଲକୁ ସ୍ୱୀକାର କରିଥିବା ତାହାର ଆତ୍ମହତ୍ୟା ଘଟଣାରୁ ସ୍ପଷ୍ଟ ହୋଇଛି। ନ୍ୟାୟ ବ୍ୟବସ୍ଥା ଉପରେ ଆମର ସମ୍ପୂର୍ଣ୍ଣ ଭରସା ରହିଛି। ଏହି ମାମଲାରେ ସମ୍ପୃକ୍ତ ଥିବା ସମସ୍ତ ଅଭିଯୁକ୍ତ ନିଶ୍ଚିତ ଦଣ୍ଡ ପାଇବେ ବୋଲି କୌଶିକ କହିଛନ୍ତି।

କଣ୍ଟାବାଞ୍ଜି : ବହୁଚର୍ଚ୍ଚିତ ଶିକ୍ଷୟିତ୍ରୀ ମମିତା ମେହେର ହତ୍ୟାକାଣ୍ଡ ଘଟଣାରେ ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁଙ୍କୁ କଣ୍ଟାବାଞ୍ଜି ଅତିରିକ୍ତ ଦୌରାଜଜ୍‍ ଶୁକ୍ରବାରଠାରୁ ଆସନ୍ତା ୧୪ଦିନ ପାଇଁ ସର୍ତ୍ତମୂଳକ ଜାମିନ ପ୍ରଦାନ କରିଛନ୍ତି। ମାନ୍ୟବର ହାଇକୋର୍ଟଙ୍କ ନିଷ୍ପତି ଅନୁସାରେ ଆନ୍ତରୀଣ ଜାମିନ ଦେଇଛନ୍ତି କଣ୍ଟାବାଞ୍ଜି ଅତିରିକ୍ତ ଜିଲ୍ଲା ଦୌରା ଜଜ୍‍। ୫୦ ହଜାର ଟଙ୍କା ଲେଖାଏଁ ୨ ଟି ବ୍ୟକ୍ତିଗତ ମୁଚଲିକାରେ ସର୍ତ୍ତମୂଳକ ଜାମିନ ପ୍ରଦାନ କରାଯାଇଛି।

ସେ ପ୍ରତିଦିନ ତଦନ୍ତକାରୀ ପୁଲିସ ଅଧିକାରୀଙ୍କୁ ଦେଖାକରିବା, ସ୍ତ୍ରୀ, ପୁଅ,ଝିଅଙ୍କ ଯେଉଁ ଠାରେ ଚିକିତ୍ସା କରାଇବେ ତଦନ୍ତକାରୀଅଧିକାରୀଙ୍କୁ ଜଣାଇବେ, କୋର୍ଟର ବିନା ଅନୁମତିରେ ସେ ନିଜ ଅଞ୍ଚଳ ଛାଡି ବାହାରକୁ ଯାଇପାରିବେ ନାହିଁ ବୋଲି ନିର୍ଦ୍ଦେଶ ରହିଛି। ଆଜି ମାମଲାର ଏଡିଜେ କୋର୍ଟରେ ପେସି ଥିବାରୁ ଉଭୟଙ୍କୁ କଡ଼ା ସୁରକ୍ଷା ମଧ୍ୟରେ ହାଜର କରାଯାଇଥିଲା। ଅଭିଯୁକ୍ତଙ୍କ ତରଫରୁ କେଶ ଲଡ଼ୁଥିବା ଓକିଲ ଦୁର୍ଗାପାଢ଼ୀ ଜାମିନ ପାଇଁ ଆବଶ୍ୟକ ପ୍ରକ୍ରିୟା କଲାପରେ ୧୪ଦିନିଆ ଜାମିନରେ ଜେଲରୁ ବାହାରି ଥିବା କହିଛନ୍ତି।

ବଲାଙ୍ଗୀର : ବହୁ ଚର୍ଚ୍ଚିତ ମମିତା ହତ୍ୟାକାଣ୍ଡ ପ୍ରସଙ୍ଗରେ ପୁଲିସ ତାର କର୍ତ୍ତବ୍ୟ ସଂପାଦନ କରିବାରେ କୌଣସି ହେଳା କରିନାହିଁ । ତଦନ୍ତରେ ସଂପୂର୍ଣ ସ୍ଵଚ୍ଛତା ଅବଲମ୍ବନ କରାଯାଇଛି । ଆଉ ପୁଲିସର ତଦନ୍ତ ନେଇ ଉଠିଥିବା ସମସ୍ତ ଅଭିଯୋଗ ନିରାଧାର ବୋଲି ଆଜି ଉତ୍ତରାଞ୍ଚଳ ଡିଆଇଜି ଡ . ଦୀପକ କୁମାର ଏକ ସାମ୍ବାଦିକ ସମ୍ମିଳନୀରେ କହିଛନ୍ତି। ପୁଲିସ ପ୍ରଫେସନାଲ କାର୍ଯ୍ୟ କରୁଛି।ଘଟଣାକୁ ଗୁରୁତ୍ୱର ସହ ନେଇଛି ଏବଂ ତଦନ୍ତ ଯେଉଁ ଦିଗରେ ଯିବା କଥା ପୁଲିସ ତାର କର୍ତ୍ତବ୍ୟ ସୂଚାରୁ ରୂପେ ନିଭାଇଛି ।ବର୍ତ୍ତମାନ ପର୍ଯ୍ୟନ୍ତ ପୁଲିସ ଜାରି ରଖିଥିବା ତଦନ୍ତରେ କେବଳ ଦୁଇ ଜଣ ଦୋଷୀ ରହିଛନ୍ତି । ମମିତା ମେହେରକୁ ହତ୍ୟା କରିବାରେ ଯେଉଁ ଦୁଇ ଜଣଙ୍କ ସମ୍ପୃକ୍ତି ରହିଛି, ତାଙ୍କୁ ପୁଲିସ ଗିରଫ କରିଛି  ଏବଂ ଆଇନ ଅନୁଯାୟୀ ଯାହା କରିବା ପୁଲିସର ଉତ୍ତରଦାୟିତ୍ୱ ତାହା ପୁଲିସ କରିଛି ।

ପ୍ରେସମିଟରେ ଉତ୍ତରାଞ୍ଚଳ ଡିଆଇଜି ଆହୁରି ମଧ୍ୟ କହିଛନ୍ତି ଯେ ମମିତା ହତ୍ୟାକାଣ୍ଡ ଘଟଣାରେ ପୁଲିସ ଏତଲା ରଖିନଥିବା ଅଭିଯୋଗ ଭିତ୍ତିହୀନ । ପୁଲିସ ତୁରନ୍ତ ଏତଲା ରଖିବା ସହିତ ଏତଲାକାରୀଙ୍କୁ ଏହାର କପି ବି ନିର୍ଧାରିତ ସମୟରେ ପ୍ରଦାନ କରିଛି । ଏହା ପୁଲିସ ବିଭାଗର ସରକାରୀ ପୋର୍ଟାଲ୍ ସିସିଟିଏନଏସରେ ମଧ୍ୟ ସୁପ୍ରିମକୋର୍ଟଙ୍କ ନିୟମ ଅନୁଯାୟୀ ୨୪ ଘଣ୍ଟା ମଧ୍ୟରେ ଅପଲୋଡ ହୋଇଛି । ଆଉ ଏହାକୁ ସର୍ବସାଧାରଣ ଯେତେବେଳେ ଚାହିଁବେ ଦେଖିପାରିବେ । ଏଫଆଇଆରରେ କୌଣସି ପ୍ରକାର ହେରଫେରର ସାମାନ୍ୟତମ ବି ସୁଯୋଗ ନାହିଁ ବୋଲି ଡ . କୁମାର ସ୍ପଷ୍ଟ କରିଛନ୍ତି ।

ସେହିପରି ଅକ୍ଟୋବର ୧୩ ତାରିଖରେ ଏଫ୍‌ଆଇଆର ପଞ୍ଜିକୃତ ହୋଇ ସେହିଦିନ ହିଁ କୋର୍ଟକୁ ପଠାଯାଇଥିଲା । ହେଲେ ଦଶହରା ଛୁଟି ପାଇଁ ୧୬ ତାରିଖରେ ଏହା ମାଜିଷ୍ଟ୍ରେଟ୍‌ଙ୍କ ଠାରେ ଦାଖଲ ହୋଇଥିଲା । ତେଣୁ , ଏହି କ୍ଷେତ୍ରରେ ମଧ୍ୟ ଆଦୌ ଅବହେଳା ପ୍ରଦର୍ଶନ କରାଯାଇନାହିଁ ବୋଲି ସେ ପ୍ରକାଶ କରିଛନ୍ତି । ସେହିପରି ତଦନ୍ତରେ କୌଣସି ଅବହେଳା ହୋଇନଥିବା ନେଇ ସେ ପ୍ରକାଶ କରିଛନ୍ତି । ଧାରା ୧୬୪ ସିଆର୍‌ପିସିରେ ଶହେରୁ ଅଧିକ ସାକ୍ଷୀଙ୍କ ବୟାନ ରେକର୍ଡ କରାଯାଇଥିବା ବେଳେ ବର୍ତ୍ତମାନ ସୁଦ୍ଧା ସମସ୍ତ ତଥ୍ୟ ପ୍ରମାଣ ଯୋଗାଡରେ ପୁଲିସ ସଫଳ ହୋଇଛି । ଆଉ ଏହି ସବୁ ପ୍ରମାଣ ସାକ୍ଷ୍ୟ ଅଭିଯୁକ୍ତକୁ ଦୋଷୀ ସାବ୍ୟସ୍ତ କରିବାରେ ପର୍ଯ୍ୟାପ୍ତ ବୋଲି ଆମର ବିଶ୍ଵାସ ରହିଛି ବୋଲି ସେ କହିଛନ୍ତି । ଏହାଛଡା ପୁଲିସ ତାର ସମସ୍ତ ସାଧ୍ୟ ଲଗାଇ ସଂପୂର୍ଣ ସ୍ଵଚ୍ଛତାର ସହ ଏହାର ତଦନ୍ତ କରିଛି ବୋଲି ଡ . କୁମାର କହିଛନ୍ତି । ଆଉ ଅଭିଯୁକ୍ତର ସିନ୍ ରିକ୍ରିଏସନ୍‌କୁ ପୁଲିସର ନାଟକବାଜି ବୋଲି ହୋଇଥିବା ଅଭିଯୋଗକୁ ସେ ଖଣ୍ଡନ କରିବା ସହିତ ତଦନ୍ତକୁ ପ୍ରଫେସନାଲ୍ ଭାବେ କରାଯାଇଛି ବୋଲି ସେ ସ୍ପଷ୍ଟୀକରଣ ଦେଇଛନ୍ତି । ଏହାବାଦ୍ ଅଭିଯୁକ୍ତକୁ ତ୍ଵରିତ ଦଣ୍ଡ ଦେବା ଦିଗରେ ପୁଲିସ କୌଣସି ଅବହେଳା କରିନାହିଁ କି କରିବ ନାହିଁ ବୋଲି ସେ ରୋକଠୋକ୍‌ ଶୁଣାଇଛନ୍ତି ।

ଏଥି ସହିତ ମମିତା ମେହେର ଗୋବିନ୍ଦ ସାହୁଙ୍କ ସହ ରାୟପୁର ଯାଇଥିବା ପ୍ରଶ୍ନକୁ ନେଇ ସ୍ପଷ୍ଟିକରଣ ରଖିଛନ୍ତି ଡିଆଇଡି । ସେ କହିଛନ୍ତି ପୋଲିସର ତଦନ୍ତ ଭିତ୍ତିରେ ବର୍ତ୍ତମାନ ପର୍ୟ୍ୟନ୍ତ ସେପରି କିଛି ସନ୍ଦେଶ କିମ୍ବା ପ୍ରମାଣ ମିଳିନାହିଁ ଯେ, ଅଭିଯୁକ୍ତ ସହ ପିଡ଼ିତା ରାୟପୁର ଯାଇଛନ୍ତି । ଅର୍ଥାତ ରାୟପୁର ଲିଙ୍କରେ କୌଣସି ସତ୍ୟତା ନଥିବା କହିଛନ୍ତି ଡିଆଇଡି ଦୀପକ କୁମାର ।

ଭୁବନେଶ୍ବର : କଳାହାଣ୍ଡି ଜିଲ୍ଲା ମହାଲିଙ୍ଗସ୍ଥିତ ସନ୍‌ସାଇନ୍‌ ପବ୍ଲିକ୍‌ ସ୍କୁଲର ଅଧ୍ୟକ୍ଷା ମମିତା ମେହେର ମୃତ୍ୟୁ ଘଟଣାରେ ରାଜନୀତି କରୁଛନ୍ତି ବିରୋଧୀ। ଏନେଇ ସାମ୍ବାଦିକ ସମ୍ମିଳନୀ କରି ବିଜେଡ଼ି ସାଂସଦ ସସ୍ମିତ ପାତ୍ର ବିରୋଧୀଙ୍କ ଉପରେ ବର୍ଷିବା ସହ ତଦନ୍ତ ପ୍ରକ୍ରିୟା ଉପରେ ପ୍ରଶ୍ନବାଚୀ ଉଠାଇଥିବା କଂଗ୍ରେସ ନେତା ଭକ୍ତ ଦାଶଙ୍କୁ ୫ଟି ପ୍ରଶ୍ନ ପଚାରିଛନ୍ତି।

ବିଜେଡି ସାଂସଦ ସସ୍ମିତ୍ ପାତ୍ର ପ୍ରେସମିଟ୍ କରି ଭକ୍ତଙ୍କୁ ପ୍ରଶ୍ନ ବାଣରେ ଘାଇଲା କରିଛନ୍ତି ।ସାସଂଦ ସସ୍ମିତ ପାତ୍ର କିଛି ଦୃଢ ତଥ୍ୟ ସହ ସାମ୍ବାଦିକ ସମ୍ମିଳନୀରେ ସବିଶେଷ ତଥ୍ୟ ପ୍ରଦାନ କରିଥିଲେ । ମହାଲିଙ୍ଗ କଲେଜର ରେଜିଷ୍ଟର ଦସ୍ତାବିଜକୁ ଖୁଲାସା କରିଥିଲେ । ଯେଉଁଥିରେ ଫାଉଣ୍ଡର ମେମ୍ବର ତାଲିକାରେ ରହିଛନ୍ତି କଂଗ୍ରେସ ନେତା ଭକ୍ତ ଦାସଙ୍କ ପୁଅ କ୍ରାନ୍ତି ଦାସ । କ୍ରାନ୍ତି ଦାସ ସେହି ରେଜିଷ୍ଟରର ଦ୍ୱିତୀୟ ନମ୍ବରରେ ରହିଥିବା ଉଲ୍ଲେଖ ରହିଛି । ଯେଉଁ ସମୟରେ ସଂସ୍ଥା ରେଜିଷ୍ଟର ହୋଇଥିଲା ସେଥିରେ ଥିବା କ୍ରାନ୍ତି ଦାସଙ୍କ ବୟସ ୨୩ ଥିବା ବେଳେ ତାଙ୍କ ବାପାଙ୍କ ଭକ୍ତ ଚରଣ ଦାସ ଉଲ୍ଲେଖ ରହିଛି ।ସବୁଠାରୁ ବଡ଼ ପ୍ରଶ୍ନ ହେଉଛି ଏହି ଗଭର୍ଣ୍ଣିଙ୍ଗ ବଡ଼ି କମିଟିରେ ଗୋବିନ୍ଦ ସାହୁ ଚେୟାରମେନ ଥିବାବେଳେ ଭକ୍ତ ଦାସଙ୍କ ପୁଅ କ୍ରାନ୍ତି ଦାସ ରହିଥିଲେ ଅଧ୍ୟକ୍ଷ । ମହାଲିଙ୍ଗ କଲେଜର ଫାଉଣ୍ଡର ଟ୍ରଷ୍ଟି ହେଉଛନ୍ତି ଗୋବିନ୍ଦ ସାହୁ । କଲେଜର ଦ୍ୱିତୀୟ ଟ୍ରଷ୍ଟି ହେଉଛନ୍ତି ଭକ୍ତ ଦାସଙ୍କ ପୁଅ କ୍ରାନ୍ତି । ଏ ନେଇ ଭକ୍ତ ଦାସ ସ୍ପଷ୍ଟ କରନ୍ତୁ ବୋଲି ବିଜେଡି ଆହ୍ୱାନ ଦେଇଛି ।

1. ମହାଲିଙ୍ଗ କଲେଜର ପ୍ରତିଷ୍ଠାତା ଟ୍ରଷ୍ଟି ଭାବେ ତାଙ୍କ ପୁଅ କ୍ରାନ୍ତି ଦାସ ଥିଲେ କି ନାହିଁ?
2. ମହାଲିଙ୍ଗ କଲେଜର ଗୋବିନ୍ଦ ସାହୁଙ୍କ ସହ ଭକ୍ତଙ୍କ ସମ୍ପର୍କ କଣ ?
3. ୨୫ ଜାନୁଆରୀ ୨୦୨୦ରେ ଭକ୍ତ ସେଠାକୁ ପାନୀୟ ଜଳ ପ୍ରକଳ୍ପ ଉଦଘାଟନ ପାଇଁ ଯାଇଥିଲେ କି ନାହିଁ?
4. ତେଲେଙ୍ଗାନା ଓ ବିହାରରେ କଂଗ୍ରେସ ଦଳର ନେତା ଓ କର୍ମୀ ଆଣିଥିବା ଭକ୍ତ ଦାସଙ୍କ ବିରୋଧରେ ଦୁର୍ନୀତି ଅଭିଯୋଗ ସତ ନା ନାହିଁ?
5. ବିହାରରେ ମହାଗଠବନ୍ଧନ ମେଂଟ ଭାଙ୍ଗିବା ଘୋଷଣା କରି ବିଜେପିକୁ ସାହାଯ୍ୟ କରିଥିବା ଭକ୍ତ ଦାସ, କଳାହାଣ୍ଡିରେ ବିଜେପିକୁ ସାହାଯ୍ୟ କରୁଛନ୍ତି ନା ନାହିଁ ?

ସେ ଆହୁରି ମଧ୍ୟ କହିଛନ୍ତି ଯେ, ଓଡ଼ିଶା କଂଗ୍ରେସ ଓ ଓଡ଼ିଶା ବିଜେପି ମଧ୍ୟରେ ମଧୁଚନ୍ଦ୍ରିକା ରହିଛି । ଓଡ଼ିଶା ବିଜେପିର ବି ଟିମ୍ ହେଉଛି ଓଡ଼ିଶା କଂଗ୍ରେସ । ବିଜେପି ପ୍ରରୋଚନାରେ ଆଜି ପ୍ରେସମିଟ୍ କରିଛନ୍ତି ଭକ୍ତ ଦାସ । ଭକ୍ତ ଦାସଙ୍କ ପୁଅ ମହାଲିଙ୍କ କଲେଜ ଟର୍ଷ୍ଟିର ସଭାପତି ଥିଲେ କି ନାହିଁ ବୋଲି ସ୍ପଷ୍ଟ କରନ୍ତୁ ବୋଲି ବିଜେଡି ଆହ୍ୱାନ କରିଛି । ସୋସିଆଲ ମିଡିଆରେ ବୁଲୁଥିବା ଫଟୋ ବି ଦେଖାଇଛନ୍ତି ସସ୍ମିତ । ଫଟୋରେ ଭକ୍ତଙ୍କ ସହ ଗୋବିନ୍ଦ ଓ ମମିତାଙ୍କୁ ଦେଖିବାକୁ ମିଳିଛି । ଗୋବିନ୍ଦଙ୍କ ସହ ସଂପର୍କ କଣ ବୋଲି ଭକ୍ତ ଦାସଙ୍କୁ ପ୍ରେସମିଟରେ ପ୍ରଶ୍ନ କରିଛି ବିଜେଡି ।  ତେବେ ଭକ୍ତ ଦାସ ରାଜ୍ୟ ବାସୀଙ୍କୁ ମିଥ୍ୟା କହୁଛନ୍ତି ନା ସତ ତାହା ସର୍ବ ସମ୍ମୁଖରେ ସ୍ପଷ୍ଟ କରନ୍ତୁ ବୋଲି ଆହ୍ୱାନ ଦେଇଛନ୍ତି ବିଜେଡ଼ି ସାସଂଦ ସସ୍ମିତ ପାତ୍ର ।

ଭକ୍ତ ଦାସ ୨୦୧୪ ମସିହାରେ ଶେଷ ଥର ପାଇଁ ମହାଲିଙ୍ଗ କଲେଜ ଯାଇଥିବା ନେଇ ବାରମ୍ବାର କହୁଥିବାବେଳେ ସେଠାରେ ଥିବା ନାମ ଫଳକରେ ୨୦୨୦ ମସିହାରେ ଯାଇଥିବା ଉଲ୍ଲେଖ ରହିଛି । ୨୫ ଜାନୁଆରୀ ୨୦୨୦ ମସିହାରେ ଭକ୍ତ ଦାସ ସେ କଲେଜ ଯାଇଥଲେ ସେଠି ସେ ହଷ୍ଟେଲର ଉଦଘାଟନ କରିଥିଲେ । ଭକ୍ତ ବାବୁ ଯେଉଁ ଅଭିଯୋଗ କରିଛନ୍ତି ମନ୍ତ୍ରୀଙ୍କ ସମ୍ପୃକ୍ତି ଅଛି କାହିଁକି ନା ସେ କଲେଜ ଯାଇ କାର୍ଯ୍ୟକ୍ରମରେ ଭାଗ ନେଇ ଥିଲେ। ତେଣୁ ଭକ୍ତ ଦାସ ମଧ୍ୟ ଏହି କଲେଜର କାର୍ଯ୍ୟକ୍ରମରେ ଯୋଗଦେଇ ସେ ମଧ୍ୟ ଅଭିଯୁକ୍ତ। ଭକ୍ତ ବାବୁଙ୍କ ବିରୋଧରେ ତାଙ୍କ ଦଳ ପକ୍ଷରୁ ବହୁବାର ଅନେକ ଅଭିଯୋଗ ଅଛି। ଏପରିକି ତେଲେଙ୍ଗାନାରେ ଟିକେଟ ଦେବା ପାଇଁ ଭକ୍ତ ବାବୁ ୩ ଲକ୍ଷ ଟଙ୍କା ନେଇଛନ୍ତି ବୋଲି ମଧ୍ୟ ଅଭିଯୋଗ ଅଛି। ଏପରିକି ବିହାର ପ୍ରଭାରୀ ଭାବେ ଭକ୍ତ ମଧ୍ୟ ଟିକେଟ ବିକ୍ରି କରିବା ନେଇ ଅଭିଯୋଗ ଆସିଛି। ଭକ୍ତ ଭାରତୀୟ ଜନତା ପାର୍ଟିର ଏଜେଣ୍ଟ ସାଜିଛନ୍ତି। ବିହାର ଆରଜେଡି ସହ ବିହାରରେ କଂଗ୍ରେସ ସମ୍ପର୍କ ତୁଟାଇବା ପଛରେ ଭକ୍ତଙ୍କ ସମ୍ପୂର୍ଣ ହାତ। ଯେଉଁଥିରେ ବଜେପି ଫାଇଦା ପାଇଚି , ତେଣୁ ବିଜେଡିକୁ ଆଙ୍ଗୁଠି ଉଠେଇବା ଆଗରୁ ନିଜକୁ ଦେଖନ୍ତୁ ।

ବଲାଙ୍ଗିର/ କଣ୍ଟାବାଞ୍ଜି: ‘ମମିତା’ର ମୃତ୍ୟୁ ପରେ ବାପା ସୁଚନ୍ଦ୍ର ମେହେରଙ୍କ ପରିବାର ଉପରେ ଭାଙ୍ଗି ପଡ଼ିଛି ଆକାଶ । ବାପା-ମା’ଙ୍କ ଆଖିରୁ ଲୁହ ଶୁଖୁ ନାହିଁ । ଝିଅକୁ ଝୁରିଝୁରି ହୃଦ୍‌ରୋଗ ପୀଡ଼ିତା ମା’ ଘଡ଼ିକୁ ଘଡ଼ି ବେହୋସ ହୋଇ ଯାଉଛନ୍ତି। ମାତ୍ର ମମିତାର ମୃତ୍ୟୁ ଓ ତାଙ୍କର ପରିବାରର ଲୁହକୁ ନେଇ ରାଜନୀତି କରିବାକୁ ବାହାରି ପଡ଼ିଛନ୍ତି କିଛି ବିରୋଧୀ ଦଳ । ବନ୍ଦ ଡାକରା ଦେଉଛନ୍ତି, ଥାନା ଘେରାଉ କରୁଛନ୍ତି।

ଅନ୍ୟପଟେ ନିଜ କାଗଜର ବିକ୍ରି ବଢ଼ାଇବାକୁ କିଛି ଖବରକାଗଜ, ଦର୍ଶକ ସଂଖ୍ୟା ବଢ଼ାଇବାକୁ କିଛି ବୈଦ୍ୟୁତିକ ଗଣମାଧ୍ୟମ ମମିତାଙ୍କ ମୃତ୍ୟୁକୁ ନେଇ ମସଲାଦାର ଖବର ପରିବେଷଣ କରି ଆତ୍ମତୃପ୍ତି ଲାଭ କରୁଛନ୍ତି । ମାତ୍ର ପୀଡ଼ିତାଙ୍କ ପରିବାର ଏଥିରୁ କେତେ କଷ୍ଟ ପାଉଛନ୍ତି ତାହା କେହି ବୁଝିପାରୁ ନାହାନ୍ତି। ବିରୋଧୀଙ୍କ କଳରବ ଓ ନିର୍ଦ୍ଦିଷ୍ଟ ଗଣମାଧ୍ୟମର ଏତାଦୃଶ ଆଚରଣ ମମିତାଙ୍କ ପରିବାରର ଧୈର୍ଯ୍ୟର ବନ୍ଧ ଭାଙ୍ଗି ଦେଇଛି।

ବାରମ୍ବାର ପୁଲିସ ତଦନ୍ତ ପ୍ରକ୍ରିୟାରେ କୌଣସି ଆପତ୍ତି ନ ଥିବା କହି ଆସୁଥିବା ମମିତାଙ୍କ ବାପା ସୁଚନ୍ଦ୍ର ମେହେର ଆଜି ଏକ ଭିଡ଼ିଓ ବାର୍ତ୍ତାରେ ତାଙ୍କ ଝିଅ ମମିତାର ହତ୍ୟାକାଣ୍ଡ ଓ ତାଙ୍କ ପରିବାରର ଲୁହକୁ ନେଇ ରାଜନୀତି ନ କରିବାକୁ ଓ ଝିଅ ସଂକ୍ରାନ୍ତ ଖବର ପରିବେଷଣ ନ କରିବାକୁ ଗଣମାଧ୍ୟମକୁ ଅନୁରୋଧ କରିଛନ୍ତି। ସୁଚନ୍ଦ୍ର କହିଛନ୍ତି ଯେ ‘ମୋ ଝିଅ ଗୋଟିଏ ଭଲ ଝିଅ
ଥିଲା। ତା’ର ମୃତ୍ୟୁ ଆମକୁ ଭୀଷଣ କଷ୍ଟ ଦେଇଛି । ଆମେ ଘରୁ ବାହାରକୁ ବାହାରୁ ନାହୁଁ । ଘର ଭିତରେ ରହୁଛୁ। ପୁଲିସ ତଦନ୍ତରେ ଆମେମାନେ ଖୁସି ଅଛୁ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆମକୁ ନ୍ୟାୟ ଦେବେ ବୋଲି ଭରସା ରଖିଛୁ । ଗଣମାଧ୍ୟମ ଓ ରାଜନୈତିକ ଦଳଗୁଡ଼ିକୁ ଆମେ ହାତ ଯୋଡ଼ି ଅନୁରୋଧ କରୁଛୁ ଯେ ଆମ ଝିଅ ନାଁରେ ଅପପ୍ରଚାର କରନ୍ତୁ ନାହିଁ ।’

ତୁରେକେଲା ଥାନା ଝରଣୀ ଗାଁର ଘରୋଇ ସ୍କୁଲ ଶିକ୍ଷୟିତ୍ରୀ ମମିତା ମେହେରଙ୍କ ହତ୍ୟା ମାମଲା ସାମ୍ନାକୁ ଆସିବା ପରେ ବିରୋଧୀ ନେତାଙ୍କ ରାଜନୀତିର ଆଖଡ଼ାଘର ପାଲଟିଛି ଝରଣୀ ଗାଁ । ପ୍ରତିଦିନ କୌଣସି ରାଜନୈତିକ ଦଳର କେହି ନା କେହି ଆସି ମମିତାଙ୍କ ପରିବାର ସଦସ୍ୟଙ୍କୁ ଭେଟୁଛନ୍ତି ଏବଂ ଘଟଣାକୁ ନେଇ ନିଜକୁ ସୁହାଇବା ପରି ଗଣମାଧ୍ୟମରେ ପ୍ରତିକ୍ରିୟା ରଖୁଛନ୍ତି। ବାରମ୍ବାର ଏପରି ନାଟକକୁ ନେଇ ପରିବାର ଲୋକ ଅସନ୍ତୋଷ ଜାହିର କରିବା ଆରମ୍ଭ କରିଛନ୍ତି। ନିଜ ଝିଅକୁ ହରାଇଥିବା ପରିବାରଙ୍କୁ ସମବେଦନା ଜଣାଇବାକୁ ଆସୁଥିବା ଏହି ନେତାମାନେ ନିଜ ରାଜନୈତିକ ଫାଇଦା ନେବା ପାଇଁ ଚେଷ୍ଟା କରୁଥିବା ପୀଡିତାଙ୍କ ସମ୍ପର୍କୀୟମାନେ କହିଛନ୍ତି। ମମିତାଙ୍କ ପରିବାର ଲୋକଙ୍କ କହିବା ଅନୁସାରେ ଝିଅ ହତ୍ୟା ଘଟଣାକୁ ନେଇ ସେମାନେ ସମ୍ପୂର୍ଣ ଭାଙ୍ଗି ପଡ଼ିଛନ୍ତି । ତେଣୁ ମମିତାଙ୍କୁ ବଦନାମ ନ କରିବାକୁ ସେମାନେ ଅନୁରୋଧ କରିଛନ୍ତି।

ମମିତାଙ୍କ ବାପା ସୁଚନ୍ଦ୍ର ପୁଣି କହିଛନ୍ତି ଯେ ଅଭିଯୁକ୍ତ ଗୋବିନ୍ଦ ସହ ମମିତା କେବେ ବି ରାୟପୁର ଯାଇ ନ ଥିଲା । ତେଣୁ ତାହାର ଚରିତ୍ର ସଂହାର କରନ୍ତୁ ନାହିଁ। ଏହା ଆମକୁ ବହୁତ କଷ୍ଟ ଦେଉଛି । ପୁଲିସ ତଦନ୍ତ ଉପରେ ଆମର ସମ୍ପୂର୍ଣ୍ଣ ବିଶ୍ବାସ ଅଛି । ହତ୍ୟାକାରୀ ଗୋବିନ୍ଦ ସାହୁ ଧରାପଡ଼ିଛି । ଆମ ଝିଅକୁ ଯିଏ ଆମ ପାଖରୁ ଛଡ଼ାଇ ନେଇଛି, ହତ୍ୟା କରିଛି, ତାକୁ ଫାଶୀ ଦଣ୍ଡ ମିଳିବା ଦରକାର । ମାତ୍ର ଏହାକୁ ନେଇ ଆମ ଘରକୁ ବାରମ୍ବାର ଆସି ଆମକୁ କଷ୍ଟ ଦିଅନ୍ତୁ ନାହିଁ ବୋଲି ଗଣମାଧ୍ୟମ ଓ ରାଜନୈତିକ ଦଳଗୁଡ଼ିକୁ ଅନୁରୋଧ କରିଛନ୍ତି ସୁଚନ୍ଦ୍ର। ସେହିପରି ମମିତାଙ୍କ ମା’ ଜଣେ ହୃଦ୍‌ରୋଗୀ ହୋଇଥିବାବେଳେ ତାଙ୍କ ପାଇଁ ମଧ୍ୟ ଏହା କଷ୍ଟଦାୟକ ବୋଲି ମମିତାଙ୍କ ବାପା କହିଛନ୍ତି ।

ମମିତା ହତ୍ୟାକାଣ୍ଡ ସମ୍ପର୍କରେ ପୁଲିସ ପ୍ରାଥମିକ ତଦନ୍ତ ଶେଷ କରିଛି। ଅଭିଯୁକ୍ତଙ୍କୁ ଗିରଫ କରି ଜେଲ୍ ପଠାଇସାରିଛି I ତାକୁ ସହଯୋଗ କରିଥିବା କିଛି ବ୍ୟକ୍ତି ବିଶେଷ ମଧ୍ୟ ଗିରଫ ହୋଇଛନ୍ତି। ଏ ସମ୍ପର୍କରେ ଗଣମାଧ୍ୟମ ସାମ୍ନାରେ ମମିତାଙ୍କ ପରିବାର ଲୋକ ପୁଲିସ ଉପରେ ଖୋଲାଖୋଲି ଭାବରେ ସନ୍ତୁଷ୍ଟ ଥିବା କହୁଥିବାବେଳେ ବିଜେପି ଓ ଅନ୍ୟ ବିରୋଧୀ ନେତା ଏଥିରେ ଯେଉଁ ରାଜନୀତି କରୁଛନ୍ତି ତାହା ସ୍ଥାନୀୟ ଜନସାଧାରଣଙ୍କୁ ବି କ୍ଷୁବ୍ଧ କରିଛି। ତାଙ୍କ ଗାଁକୁ ରାଜନୈତିକ ପର୍ଯ୍ୟଟନସ୍ଥଳରେ ପରିଣତ ନ କରିବାକୁ ଗ୍ରାମବାସୀ ସ୍ପଷ୍ଟ ଭାବରେ କହିଛନ୍ତି। ସମବେଦନା ଅଳରେ ମମିତାଙ୍କ ପରିବାରକୁ ଯେପରି ବାରମ୍ବାର ବିଭିନ୍ନ ଦଳର ନେତାମାନେ ଯାତାୟାତ କରୁଛନ୍ତି ତାହାକୁ ନେଇ ସ୍ଥାନୀୟ ଅଂଚଳରେ ଅସନ୍ତୋଷ କୁହୁଳିବା ଆରମ୍ଭ କରିଛି ।

କଳାହାଣ୍ଡି : ମମିତା ମେହେର ହତ୍ୟା ମାମଲାରେ ରାଜ୍ୟ ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କୁ ଟାଣିଓଟାରି ଘଟଣା ସହ ଯୋଡ଼ିବାକୁ ଚେଷ୍ଟା କରୁଛନ୍ତି କଣ୍ଟାବାଞ୍ଜି ବିଧାୟକ ସନ୍ତୋଷ ସିଂହ ସାଲୁଜାଙ୍କ। ବାରମ୍ବାର ମନ୍ତ୍ରୀଙ୍କ ନାଁରେ ମିଥ୍ୟା ଆକ୍ଷେପ କରୁଥିବା ସାଲୁଜାଙ୍କ ଅଭିଯୋଗକୁ ନେଇ ପ୍ରତିକ୍ରିୟା ରଖିଛନ୍ତି ରାଜ୍ୟ ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ର। କଣ୍ଟାବାଞ୍ଜି ବିଧାୟକ ସନ୍ତୋଷ ସିଂହ ସାଲୁଜାଙ୍କ ଅଭିଯୋଗ ଅତ୍ୟନ୍ତ ହାସ୍ୟାସ୍ପଦ ଓ ଦୁଃଭାର୍ଗ୍ୟଜନକ । ମୋ ବିରୋଧରେ ଏକ ଷଡଯନ୍ତ୍ର ହେଉଛି। ମମିତା ମେହେର ହତ୍ୟା ଘଟଣାରେ ମୋର କୌଣସି ସମ୍ପର୍କ ନାହିଁ, ବାରମ୍ବାର କହୁଛି ସବୁବେଳେ କହିବି ବୋଲି ମନ୍ତ୍ରୀ ଶ୍ରୀମିଶ୍ର କହିଛନ୍ତି।

ମନ୍ତ୍ରୀ ଦିବ୍ୟଶଙ୍କର ମିଶ୍ର ଆହୁରି ମଧ୍ୟ କହିଛନ୍ତି ଯେ କଣ୍ଟାବାଞ୍ଜି ବିଧାୟକ ସନ୍ତୋଷ ସିଂହ ସାଲୁଜା ଯେଉଁ ଅଭିଯୋଗ ଆଣିଛନ୍ତି ଯେ ସେପ୍ଟେମ୍ବର  ୨୦ରୁ ୨୩ ମୁଁ ରାୟପୁରରେ ଥିଲି। କିନ୍ତୁ ବିଧାୟକ ସାଲୁଜା ଜାଣିବା ଉଚିତ ମୁଁ ୨୧ ତାରିଖରେ ତାଙ୍କ ନିର୍ବାଚନ ମଣ୍ଡଳୀ କଣ୍ଟାବାଞ୍ଜିରେ ଥିଲି। ୨୨ ତାରିଖରେ ମାନ୍ୟବର ମୁଖ୍ୟମନ୍ତ୍ରୀଙ୍କ ମଞ୍ଚରେ ପାଟଣାଗଡରେ ଉଦବୋଧନ ଦେଇଛି ଏବଂ ୨୫ ତାରିଖ ପର୍ଯ୍ୟନ୍ତ ମୁଁ ତାଙ୍କରି ଘରେ ତାଙ୍କରି ଗାଁରେ କଣ୍ଟାବାଞ୍ଜି ବଙ୍ଗୋମୁଣ୍ଡାରେ ପ୍ରତ୍ୟେକ ପଞ୍ଚାୟତରେ ଭ୍ରମଣ କରି ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାର ସ୍ମାର୍ଟ କାର୍ଡ ବାଣ୍ଟୁଥିଲି ବୋଲି ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ର କହିଛନ୍ତି।

ସୂଚନାଯୋଗ୍ୟ ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ରାୟପୁର ଘର ବାବଦରେ ସାଂଘାତିକ ଅଭିଯୋଗ କରିଥିଲେ କଂଗ୍ରେସ ବିଧାୟକ ସନ୍ତୋଷ ସିଂ ସାଲୁଜା । ସନ୍ତୋଷ ସିଂ ସାଲୁଜା କହିଥିଲେ ଯେ ମନ୍ତ୍ରୀ ଦିବ୍ୟଶଙ୍କର ମିଶ୍ର ଗୋବିନ୍ଦ ଓ ମମିତାଙ୍କ ଭିତରେ ବୁଝାମଣା କରିବାକୁ ରାୟପୁରରେ ନେଇଥିଲେ। ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ର ରାୟପୁରେ ଥିବା କୁଲ ହୋମ ଆପାର୍ଟମେଣ୍ଟରେ ସେପ୍ଟେମ୍ବର  ୨୦ରୁ ୨୩ ବୁଝାମଣା କରିବାକୁ ଚେଷ୍ଟା କରିଥିଲେ।

ଭୁବନେଶ୍ବର : ମମିତାଙ୍କ ପରିବାର ଲୁହକୁ ନେଇ ରାଜନୀତି କରୁଛି ବିଜେପି। ନ୍ୟାୟ ଦେବା ଲାଗି ନାଟକ କରି ଦେଉଛି ମାନସିକ ନିର୍ଯାତନା। ଦଳ ଦଳ ହୋଇ ବିଜେପି ନେତାମାନେ ମମିତାଙ୍କ ଘରକୁ ଯାଇ ତାଙ୍କ ପରିବାରର ମାନସିକ ଶାନ୍ତିକୁ ନଷ୍ଟ କରୁଛନ୍ତିି। ଡାହା ମିଛ କହିବାକୁ ବି ଲଜ୍ଜାବୋଧ କରୁନାହାନ୍ତି ଦଳୀୟ ନେତା। ମମିତା ହତ୍ୟା ମାମଲାକୁ ନେଇ ବିଜେପି କରୁଥିବା ରାଜନୀତି ଓଡ଼ିଶାବାସୀ ବୁଝି ସାରିଲେଣି । ବିଜେପିର ଏହି ମାଇଲେଜ ନେବା ରାଜନୀତିକୁ ପସନ୍ଦ କରୁନାହାନ୍ତି ସାଧାରଣ ଜନତା । ବିକ୍ଷୋଭରେ ଲୋକଙ୍କୁ ଏକାଠି କରିବାକୁ ବିଜେପିକୁ ମିଳୁନାହାନ୍ତି ଲୋକ । ଟଙ୍କା ଦେଇ ଲୋକଙ୍କୁ ବିକ୍ଷୋଭରେ କରୁଛି ସାମିଲ । ବିଜେପିର ଏହି ଟଙ୍କା ବଣ୍ଟା ଧରାପଡ଼ିଛି କ୍ୟାମେରାରେ ।

ଖୋର୍ଦ୍ଧା-ବଲାଙ୍ଗିର ୫୭ ନମ୍ବର ଜାତୀୟ ରାଜପଥରେ ବିଜେପି କର୍ମୀ ବିକ୍ଷୋଭ ପାଇଁ ଆଣିଥିବା ଲୋକଙ୍କୁ ଟଙ୍କା ବାଣ୍ଟୁଥିବାର ଭିଡିଓ ହେଉଛି ଭାଇରାଲ ।ବିକ୍ଷୋଭ ପ୍ରଦର୍ଶନ ପାଇଁ ଦଳୀୟ କର୍ମୀ ଯଥେଷ୍ଟ ହେଉ ନଥିବାରୁ ଟଙ୍କା ପାଇସା ଦେଇ ବିଭିନ୍ନ ଲୋକଙ୍କୁ ବିକ୍ଷୋଭରେ ସାମିଲ କରାଉଛି । ବିକ୍ଷୋଭରେ ସାମିଲ ହେଉଥିବା ଲୋକ କେଉଁଥି ପାଇଁ ବିକ୍ଷୋଭ କରାଯାଉଛି, ତାହା ଜାଣନ୍ତି ନାହିଁ । କେବଳ ଟଙ୍କା ପାଇଁ କିଛି ଲୋକ ବିକ୍ଷୋଭରେ ସାମିଲ ହେଉଛନ୍ତି । ବିଜେପିର ଏହି ବିକ୍ଷୋଭ ଓ ମାଇଲେଜ ରାଜନୀତିକୁ ସାଧାରଣରେ ନିନ୍ଦା କରାଯାଇଛି । ମମତା ମାମଲାର ମୁଖ୍ୟ ଅଭିଯୁକ୍ତ ଏବଂ ସହଯୋଗୀ ଗିରଫ ହୋଇ ସାରିଲେଣି । ତଥାପି ବିଜେପିର ଏଭଳି ବିକ୍ଷୋଭ ବେଳେ ଗୁଣ୍ଡାଗର୍ଦ୍ଦି ସମସ୍ତଙ୍କୁ ଚକିତ କରିଛି । ଏପରିକି କିଛି ସ୍ଥାନରେ ବିକ୍ଷୋଭକାରୀମାନେ ଆମ୍ବୁଲାନ୍‌ସକୁ ମଧ୍ୟ ଛା଼ଡୁ ନଥିବା ସମସ୍ତଙ୍କୁ ବ୍ୟଥିତ କରିଛି ।

ଆଜି ଜଗତସିଂହପୁର ଡ଼ାକବଙ୍ଗଳା ଛକରେ ବିଜେପି ରାସ୍ତାରୋକ କରିଥିଲା । ଏହି ସମୟରେ ପ୍ରମିଳା ସାହୁ ନାମକ ଜଣେ ବୃଦ୍ଧା ଏକ ଅଟୋରେ ମେଡିକାଲ ଯାଉଥିଲେ । ତାଙ୍କ ମୁଣ୍ଡ ବୁଲାଇ ପକାଇବାରୁ ପ୍ରେସକ୍ରିପସନ୍ ଧରି ଯାଉଥିବା ବେଳେ ଡାକବଙ୍ଗଳା ଛକରେ ରାସ୍ତାରୋକ କରୁଥିବା ବିଜେପି କର୍ମୀ ତାଙ୍କ ବାଟ ଓଗାଳି ଥିଲେ । ଜଗତସିଂହପୁର ଜିଲ୍ଲା ବିଜେପି ସଭାପତି ମଧ୍ୟ ଉପସ୍ଥିତ ଥିଲେ । ବୃଦ୍ଧା ଓ ଅଟୋ ଡ୍ରାଇଭର ଯେତେ କାକୁତି ମିନତି ହେଲେ ବି ଏହି ହୃଦୟହୀନ କ୍ଷମତା ଲୋଭି ବିଜେପି ଦଳର ନେତା ଓ କର୍ମୀ ତାଙ୍କ କଥା ଶୁଣି ନଥିଲେ କି ମେଡ଼ିକାଲ ଯିବାକୁ ଦିଆଯାଇ ନଥିଲା । ଶେଷରେ ବାଧ୍ୟ ହୋଇ ଡ୍ରାଇଭର ଅଟୋକୁ ପଛକୁ ହଟାଇ ଥିଲେ ଓ ବୃଦ୍ଧାଙ୍କୁ ଡାକ୍ତରଖାନା ବଦଳରେ ଘରକୁ ଫେରିବାକୁ ପଡ଼ିଥିଲା ।

ଭୁବନେଶ୍ୱର: ମହାଲିଙ୍ଗ ମମିତା ମେହେର ହତ୍ୟା ମାମଲାରେ ବିବୃତ୍ତି ରଖିଛନ୍ତି ମନ୍ତ୍ରୀ ଦିବ୍ୟଶଙ୍କର ମିଶ୍ର । ମମିତାଙ୍କ ମୃତ୍ୟୁରେ ଗଭୀର ଭାବେ ଦୁଃଖିତ ଓ ମର୍ମାହତ ହୋଇଥିବା କହିଛନ୍ତି ମନ୍ତ୍ରୀ । ପରିବାର କିଭଳି ଯନ୍ତ୍ରଣାରେ ଅଛି ମୁଁ ବୁଝିପାରୁଛି । ଆଇନ୍ ଅନୁଯାୟୀ ଦୋଷୀଙ୍କୁ କଠୋର ଦଣ୍ଡ ମିଳୁ ବୋଲି ଗୃହ ରାଷ୍ଟ୍ର ମନ୍ତ୍ରୀ ଦିବ୍ୟଶଙ୍କର ମିଶ୍ର କହିଛନ୍ତି ।

ତିନିଟି ନିର୍ଦ୍ଦିୃଷ୍ଟ ଗଣମାଧ୍ୟମ ମୋର ଚରିତ୍ର ସଂହାର କରିଛନ୍ତି । ସେମାନଙ୍କ ବିରୋଧରେ ମାନହାନୀ ମକଦ୍ଦମା କରିଛି । ରାଜନୀତି ପାଇଁ ମନଗଢ଼ା କାହାଣୀ ଦେଖାଇଛନ୍ତି । ବଦନାମ୍‌ କରିବାକୁ ଅଭିଯାନ ଚଳାଇଛନ୍ତି । ମୁଁ ବିଧାୟକ ଭାବେ ଶିକ୍ଷାନୁଷ୍ଠାନକୁ ଯାଏ । ପରେ ଅପରାଧ ଘଟିଲେ ମୁଁ କେମିତି ଦାୟୀ ?

ପ୍ରମାଣ ଥିଲେ କୋର୍ଟ କି ଥାନାରେ ଦାଖଲ କରନ୍ତୁ । ନିର୍ଦ୍ଦିଷ୍ଟ ମିଡିଆକୁ ମନ୍ତ୍ରୀ ଚ୍ୟାଲେଞ୍ଜ ଦେଇଛନ୍ତି । ଅପରାଧକୁ ବ୍ୟକ୍ତିଗତ ଏଜେଣ୍ଡା ନକରି ନୈତିକତାର ସାମ୍ବାଦିକତା କରିବାକୁ ଅନୁରୋଧ କରିଛନ୍ତି ଦିବ୍ୟଶଙ୍କର । ଲୋକଙ୍କ ସେବା ପାଇଁ ରାଜନୀତିରେ ଯୋଗ ଦେଇଛି । କଳାହାଣ୍ଡିବାସୀଙ୍କର ମୋ ଉପରେ ଗଭୀର ବିଶ୍ୱାସ ରହିଛି । ଅପରାଧ ସହିତ କୌଣସି ସମ୍ପର୍କ ନଥିବା କହିଛନ୍ତି ମନ୍ତ୍ରୀ ।

ଭୁବନେଶ୍ୱର : ଉତ୍ତରପ୍ରଦେଶର ଖେରୀ ହେଉ କି ହାଥରସ୍‌।  ଅପରାଧ ପରେ ଘଟଣାସ୍ଥଳରେ ବିରୋଧୀ ଦଳକୁ ମିଳେନି ଏଣ୍ଟ୍ରି। ନା ପୀଡିତାକୁ ନା ପୀଡିତାର ପରିବାରକୁ ଭେଟିବାକୁ ମିଳେ କାହାକୁ ଅନୁମତି। ଏପରିକି ଘଟଣାସ୍ଥଳକୁ ବି ବିରୋଧୀ ଦଳଙ୍କୁ ଯିବାକୁ ଅନୁମତି ମିଳେନି। ୧୪୪ ଧାରା ଲାଗୁ ସହ ଗଣମାଧ୍ୟମକୁ ମଧ୍ୟ ଯିବାକୁ ଦିଆଯାଏନି। କିନ୍ତୁ ଆମ ରାଜ୍ୟରେ ମୁଖ୍ୟବିରୋଧୀ ଦଳ ଥିବା ବିଜେପି ପାଇଁ ତାଙ୍କ ସରକାର ଥିବା ୟୁପିରେ ଗୋଟିଏ ଆଉ ଓଡିଶା ପାଇଁ ଗୋଟିଏ ଆଭିମୁଖ୍ୟ। ଅପରାଧ ପରେ ଦୋଷୀକୁ ଗିରଫ କରାଯାଇସାରିବା ପରେ ମଧ୍ୟ ନିଇତି ପୀଡିତାଙ୍କ ପରିବାରକୁ ଭେଟି ମାଇଲେଜ୍ ପଲିଟିକ୍ସ କରୁଛନ୍ତି ବିରୋଧୀ। ସମବେଦନା ଆଳରେ ରାଜନୀତି କରୁଛି ବିଜେପି।

ସେଇଥିପାଇଁ ମମିତାଙ୍କ ଗାଁକୁ ରାଜନୈତିକ ପର୍ଯ୍ୟଟନସ୍ଥଳରେ ପରିଣତ କରିଛି ବିଜେପି। ଦୁଇ ଦଫାରେ ବିଜେପି ନେତାମାନେ ମମିତାଙ୍କ ଘରକୁ ଯାଇ ବୁଲି ଆସିଲେଣି; ଆଜି ଆଉ ଦଳେ ନେତା ତାଙ୍କ ଘରକୁ ଯାଇଛନ୍ତି। ମମିତା ପରିବାରକୁ ସମବେଦନା ନାଁରେ ନିଇତି ପଲିଟିକାଲ ଷ୍ଟଣ୍ଟ କରୁଛି ବିଜେପି। କ୍ରାଇମସ୍ପଟ ଓ ପରିବାରର ଫଟୋ ସେସନ୍‌ କରୁଛି ବିଜେପି। ମମିତା ମୃତ୍ୟୁପରେ ପରିବାର ଆଖିରୁ ଲୁହ ଶୁଖୁନି, ହେଲେ ଘଟଣା ଅଞ୍ଚରେ ରାଜନୈତିକ ରୁଟି ସେକିବା ପାଇଁ ବିଜେପି ଖୁବ୍‌ ପ୍ରାୟାସ କରୁଛି। ପରିବାରକୁ ନ୍ୟାୟ ନୁହେଁ ବରଂ ନିଜ ରାଜନୈତିକ ଫାଇଦା ପାଇଁ ମମିତା ଘରକୁ ଛୁଟୁଛି ନେତାଙ୍କ ସୁଅ। ଆଜି ଜଣେ କାଲି ଆଉ ଜଣେ ନେତା ଯାଇ ମମିତା ପରିବାର ସଦସ୍ୟଙ୍କୁ ଅଯଥା ପ୍ରଶ୍ନରେ ଅଥୟ କରୁଛନ୍ତି। ଏପରିକି ବାରମ୍ବାର ପ୍ରଶ୍ନରେ ଅସ୍ତବ୍ୟସ୍ତ ହୋଇ ମମିତାଙ୍କ ମା ବେହୋସ ହୋଇଯାଉଛନ୍ତି। ତଥାପି ଅଟକୁନି ପ୍ରଶ୍ନ। ,ଏସପୁ ପରେ କୋହଭରା କଣ୍ଠରେ ହାତଯୋଡି ତାଙ୍କ ଝିଅର ମୃତ୍ୟୁକୁ ନେଇ ରାଜନୀତି ନକରିବାକୁ ଅନୁରୋଧ କରିଛନ୍ତି ମମିତାଙ୍କ ବାପା।  ପୁଲିସର ତଦନ୍ତରେ ସେ ସନ୍ତୁଷ୍ଟ ଏବଂ ଦୋଷୀ ଗୋବିନ୍ଦଙ୍କୁ ଫାଶୀ ଦେବାକୁ ମମିତାଙ୍କ ବାପା ଦାବି କରିଛନ୍ତି।

ମମିତା ପରିବାରକୁ ସମବେଦନା ଓ ହତ୍ୟାକାରୀକୁ ଦଣ୍ଡ ଦେବା ଅପେକ୍ଷା ରାଜ୍ୟ ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କୁ ଟାଣିଓଟାରି ଘଟଣା ସହ ଯୋଡ଼ିବାକୁ ଲାଗିପଡ଼ିଛି ବିଜେପି। କୌଣସି ଅଭିଯୁକ୍ତ ସହ ସମ୍ପର୍କ ଥିଲେ କାହାରିକୁ ଦୋଷୀ କୁହାଯାଇ ପାରିବ ନାହିଁ। ଏ କଥା ବିଜେପି ନେତାମାନେ ଠିକ୍‍ ବୁଝିଛନ୍ତି। ମମିତାଙ୍କ ଘର ବୁଲି ଆସିବା ପରେ ବିଜେପି ନେତା ଥିବା ଜଣେ ଅବସରପ୍ରାପ୍ତ ବରିଷ୍ଠ ପୁଲିସ ଅଧିକାରୀ ଓ ଜଣେ ଆଇନଜୀବୀ ଏ କଥା ମଧ୍ୟ ଗଣମାଧ୍ୟମରେ ସ୍ୱୀକାର କରି ସାରିଛନ୍ତି। ଘଟଣାରେ ସମ୍ପୃକ୍ତି ନେଇ ଦିବ୍ୟଶଙ୍କରଙ୍କ ବିରୋଧରେ କୌଣସି ପ୍ରମାଣ ନାହିଁ। କେବଳ ଅଭିଯୁକ୍ତ ଗୋବିନ୍ଦ ସାହୁଙ୍କ ସହ ତାଙ୍କର ବ୍ୟକ୍ତିଗତ ସମ୍ପର୍କ ଆଧାରରେ ତାଙ୍କ ଇସ୍ତଫା ଦାବି କରୁଛି ବିଜେପି। ଯଦି ମମିତା ପ୍ରସଙ୍ଗରେ ଦିବ୍ୟଶଙ୍କରଙ୍କ ଇସ୍ତଫା ଯଦି ନ୍ୟାୟୋଚିତ, ତେବେ ଲଖିମପୁର ଖେରି ଚାଷୀ ମୃତ୍ୟୁ ଘଟଣାରେ କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀ ଅଜୟ ମିଶ୍ର କାହିଁକି ଇସ୍ତଫା ଦେଲେ ନାହିଁ ବୋଲି ବିଭିନ୍ନ ମହଲରେ ଏହାକୁ ନେଇ ପ୍ରଶ୍ନ ଉଠିଛି।

କୁହାଯାଉଛି, ରାଜନୀତି ଓ କ୍ଷମତା ଲିପ୍ସା ରାଜ୍ୟ ବିଜେପି ନେତାମାନଙ୍କୁ ଅନ୍ଧ କରି ଦେଇଛି। ଦରଦାମ ବୃଦ୍ଧି ଜନିତ ସାଧାରଣରେ ଦଳ ପ୍ରତି ସୃଷ୍ଟି ହୋଇଥିବା ରୋଷକୁ ଏଡ଼ାଇବା ପାଇଁ ଯେନତେଣ ପ୍ରକାର ମମିତା ପ୍ରସଙ୍ଗକୁ ବଞ୍ଚାଇ ରଖିବା ପାଇଁ ବିଜେପି ନିଜର ପୁରା ଦମ୍‍ ଲଗାଇ ଦେଇଛି। ଗଣମାଧ୍ୟମରେ ଚର୍ଚ୍ଚାରେ ରହି ପଞ୍ଚାୟତ ନିର୍ବାଚନ ପର୍ଯ୍ୟନ୍ତ ଉଷ୍ଣତା ବଜାୟ ରଖିବା ପାଇଁ କସରତ ଆରମ୍ଭ କରିଛି। ରୋଜଗାରିଆ ଝିଅକୁ ହରାଇ ମାନସିକ ଅସୁସ୍ଥତା ମଧ୍ୟରେ ଗତି କରୁଥିବା ମମିତା ମେହେରଙ୍କ ପରିବାରକୁ ସମବେଦନା ଜଣାଇବା ବାହାନାରେ ତାଙ୍କ ଘରକୁ ରାଜନୈତିକ ପର୍ଯ୍ୟଟନକ୍ଷେତ୍ରରେ ପରିଣତ କରିଛନ୍ତି କ୍ଷମତା ମଦମତ୍ତ ବିଜେପି ନେତା। ପ୍ରଥମ ଦଫାରେ ଜିଲ୍ଲା ନେତାମାନେ ମମିତାଙ୍କ ଘରେ ପହଞ୍ଚିଥିବାବେଳେ ଦ୍ୱିତୀୟ ଦଫାରେ ରାଜ୍ୟ ସଭାପତିଙ୍କ ନେତୃତ୍ୱରେ ୧୫ ଜଣ ନେତା ପହଞ୍ଚିଥିଲେ। ସେହିପରି ଆଜି ଦୁଇ ଜାତୀୟ ନେତାଙ୍କ ସହ କଂଗ୍ରେସ ବିଧାୟକ ଦଳ ନେତା ମଧ୍ୟ ମମିତାଙ୍କ ପରିବାରକୁ ଭେଟିଛନ୍ତି। ଆସନ୍ତାକାଲି ବିଜେପିର କେନ୍ଦ୍ରୀୟ କମିଟିର ୩ ଜଣିଆ ମହିଳା ପ୍ରତିନିଧିମଣ୍ଡଳୀ ମମିତାଙ୍କ ଘରକୁ ଯିବେ ବୋଲି ଦଳ ପକ୍ଷରୁ କୁହାଯାଇଛି। ଏହି ଘଟଣା ଜାତୀୟ ପ୍ରସଙ୍ଗ କରିବା ପାଇଁ ବିଜେପି ନକ୍ସା ପ୍ରସ୍ତୁତ କରିଛି। ଦଳ ପକ୍ଷରୁ ଦିଲ୍ଲୀରେ ସାମ୍ବାଦିକ କରାଯାଇଛି, ଜାତୀୟ ମହିଳା କମିଶନ ପକ୍ଷରୁ ଏହି ଘଟଣାରେ ହସ୍ତକ୍ଷେପ କରି ମନ୍ତ୍ରୀଙ୍କ ଇସ୍ତଫା ଦାବି କରାଯାଇଛି। ବିଜେପି ଓ ଏହାର ନେତାମାନେ ମମିତା ପ୍ରସଙ୍ଗକୁ ଯେତିକି ଗୁରୁତ୍ୱ ଦେଉଛନ୍ତି; ଲଖିମପୁର ଖେରି କୃଷକ ମୃତ୍ୟୁ ଘଟଣାରେ କାହିଁକି ଚୁପ୍‍ ରହିଲେ ତାହା ପ୍ରଶ୍ନବାଚୀ ସୃଷ୍ଟି କରିଛି।

ଏକ ଘରୋଇ ସ୍କୁଲରେ ଚାକିରି କରୁଥିଲେ ମମିତା। ପରିବାର ପାଇଁ ସିଏ ଥିଲେ ବଡ଼ ସମ୍ପଦ, ଆୟର ମୁଖ୍ୟ ସ୍ରୋତ। ଝିଅକୁ ହରାଇ ମମିତାଙ୍କ ପରିବାର ଦୁଃଖରେ ଭାଙ୍ଗି ପଡ଼ିଛନ୍ତି। ପରିବାର ସଦସ୍ୟଙ୍କ ଆଖିରୁ ଲୁହ ଶୁଖିନାହିଁ। ଝିଅକୁ ବାହୁନିବାହୁନି ତାଙ୍କ ମା’ଙ୍କ ଘଡ଼ିକୁ ଘଡ଼ି ଚେତା ହରାଉଛନ୍ତି। ଝିଅକୁ ଯିଏ ହତ୍ୟା କରିଛି ତାକୁ ଫାଶୀ ଦଣ୍ଡ ମିଳୁ ବୋଲି ମମିତାଙ୍କ ପରିବାର ଦାବି କରିଛନ୍ତି। ରାଜ୍ୟ ସରକାରଙ୍କ ନିର୍ଦେଶକ୍ରମେ ଜଣେ ବରିଷ୍ଠ ଅଧିକାରୀଙ୍କ ତତ୍ତ୍ୱାବଧାନରେ ମମିତା ହତ୍ୟା ଘଟଣାର ତଦନ୍ତ ଚାଲିଛି। ଅଭିଯୁକ୍ତ ଗୋବିନ୍ଦ ସାହୁକୁ ପୁଲିସ ଗିରଫ କରିଛି ଏବଂ ଏହି ମାମଲାର ତଦନ୍ତ ଫାଷ୍ଟ ଟ୍ରାକ୍‍ କୋର୍ଟରେ କରାଯିବାକୁ ପୁଲିସ ପଦକ୍ଷେପ ଗ୍ରହଣ କରିଛି। ପୁଲିସର କାର୍ଯ୍ୟାନୁଷ୍ଠାନକୁ ନେଇ କୌଣସି ସନ୍ଦେହ ନାହିଁ ବୋଲି ତାଙ୍କ ପରିବାର ସ୍ପଷ୍ଟ କରିଛନ୍ତି। ମମିତାଙ୍କର ବଡ଼ବାପା, ଭାଇ ଓ ଅନ୍ୟ ସମ୍ପର୍କୀୟମାନେ ପୁଲିସ ତଦନ୍ତକୁ ନେଇ ସନ୍ତୋଷ ବ୍ୟକ୍ତ କରିଛନ୍ତି।

ଛାତି ଉପରେ ପଥର ଲଦି, ମନରେ ଉଠୁଥିବା କୋହକୁ ଚାପି ମମିତାଙ୍କ ପରିବାର ତାଙ୍କର କ୍ରିୟାକର୍ମ କାମରେ ଲାଗିଛନ୍ତି। ମାତ୍ର ବିଜେପି ଓ ବିରୋଧୀ ନେତାମାନେ ସେତକ ବି ସୁରୁଖୁରୁରେ କରିବାକୁ ଦେଉ ନାହାନ୍ତି। ଦଳଦଳ ହୋଇ ତାଙ୍କ ଘରେ ପହଞ୍ଚି ଯାଉଛନ୍ତି। ଶୁଖି ଆସୁଥିବା ଘା’କୁ ଉଖୁରାଇ ଲହୁଲୁହାଣ କରି ଦେଉଛନ୍ତି। ମମିତାଙ୍କ ମା’, ବାପା, ଭାଇ ଓ ସମ୍ପର୍କୀୟଙ୍କୁ ଗୁଡ଼େଇ ତୁଡ଼େଇ ମମିତା ଓ ଗୋବିନ୍ଦ ସାହୁଙ୍କ ସମ୍ପର୍କ ନେଇ ପ୍ରଶ୍ନ ଉଠାଉଛନ୍ତି। କଟା ଘା’ରେ ଲୁଣ ମାରି ଅଧିକ ଯନ୍ତ୍ରଣା ଦେଉଛନ୍ତି। ମହାଲିଙ୍ଗ କଲେଜର ଛାତ୍ରୀ ଓ ଅଧ୍ୟାପିକାଙ୍କ ଚରିତ୍ର ସଂହାର କରୁଛନ୍ତି। ସମବେଦନା ଜଣାଇବା ଆଳରେ ବିଜେପି ନେତାମାନେ ଯେଉଁ ମାନସିକ ନିର୍ଯ୍ୟାତନା ଦେଉଛନ୍ତି ସେଥିରେ ମମିତାଙ୍କ ପରିବାର ମର୍ମାହତ ହୋଇଛନ୍ତି। ତଥାପି ନିଜ ରାଜନୈତିକ ଫାଇଦା ଓ ଦରବୃଦ୍ଧି ଆଦି ପ୍ରସଙ୍ଗକୁ ନେଇ କେନ୍ଦ୍ର ସରକାର ଓ ବିଜେପି ପ୍ରତି ସାଧାରଣର ସୃଷ୍ଟି ହୋଇଥିବା ଅସନ୍ତୋଷକୁ ଏଡ଼ାଇବା ନିମନ୍ତେ ବିଜେପି ମମିତା ହତ୍ୟା ଘଟଣାକୁ ରାଜନୈତିକ ରଙ୍ଗ ବୋଳି ଆନ୍ଦୋଳନ ଆରମ୍ଭ କରିଛି।

ମମିତା ହତ୍ୟାକାଣ୍ଡ ପ୍ରସଙ୍ଗରେ ବିିଜେପି ଓ ବିରୋଧୀଦଳଗୁଡ଼ିକର ଆଭିମୁଖ୍ୟକୁ ନେଇ ଦୁଃଖ ପ୍ରକାଶ କରିଛନ୍ତି ତାଙ୍କର ବାପା। ଝିଅ ମୃତ୍ୟୁ ଦୁଃଖରେ ମ୍ରିୟମାଣ ବାପା ବିଜେପି ନେତାମାନଙ୍କ ତୁହାକୁ ତୁହା ଗସ୍ତ, ଅସରନ୍ତି ପ୍ରଶ୍ନବାଣରେ ଭାଙ୍ଗି ପଡ଼ିଛନ୍ତି। ରାଜନୈତିକ ଦଳଗୁଡ଼ିକ ତାଙ୍କ ଘରକୁ ନ ଆସିବାକୁ ସେ ହାତଯୋଡ଼ି ଅନୁରୋଧ କରିଛନ୍ତି। ତଥାପି ବିଜେପି ଚେତୁନାହିଁ; ସମବେଦନା ଆଳରେ ମମିତାଙ୍କ ପରିବାରକୁ ମାନସିକ ନିର୍ଯାତନା ଦେବା ଉଦ୍ୟମରୁ ବିରତ ହେଉନାହିଁ।

ବଲାଙ୍ଗିର: ବହୁ ଚର୍ଚ୍ଚିତ ମମିତା ମେହେର ହତ୍ୟା ଘଟଣାର ଛାନଭିନ ପାଇଁ ରାଜ୍ୟ ମହିଳା କମିଶନ ଅଧ୍ୟକ୍ଷା ଡ. ମୀନତି ବେହେରାଙ୍କ ନେତୃତ୍ବରେ ଏକ ୪ଜଣିଆ ଟିମ ବଲାଙ୍ଗିରରେ ପହଞ୍ଚିଛନ୍ତି। ଶୁକ୍ରବାର ଅଧ୍ୟକ୍ଷା ଶ୍ରୀମତୀ ବେହେରା ଏସପି ନୀତିନ କୁଶଲକରଙ୍କୁ ଭେଟି ମାମଲାର ତଦନ୍ତ ବିଷୟରେ ଆଲୋଚନା କରିଥିଲେ। ସୂଚନା ଅନୁସାରେ ବଲାଙ୍ଗିର ଝରଣୀ ଗାଁର ମମିତା ମେହେରଙ୍କ ହତ୍ୟା ଘଟଣା ସାରା ରାଜ୍ୟରେ ଚର୍ଚ୍ଚା ସୃଷ୍ଟି କରିଥିବା ବେଳେ ପରିବାର ଲୋକଙ୍କ ନ୍ୟାୟ ପ୍ରଦାନ ଦାବିରେ ଆନ୍ଦୋଳନ, ପ୍ରତିବାଦ କରାଯାଉଛି। ଏହା ଏକ ସମ୍ବେଦନଶୀଳ ଘଟଣା ହୋଇଥିବା ବେଳେ ଏହି ଘଟଣାରେ କିଛି ବଡବଡିଆ ନେତାଙ୍କ ନାମ ମଧ୍ୟ ସାମ୍ନାକୁ ଆସିଛି । ଏହି ଘଟଣାର ତଦନ୍ତ ସହିତ ଅସଲ ସତ୍ୟ ଛାନଭିନ କରିବା ପାଇଁ ବଲାଙ୍ଗିରରେ ଶୁକ୍ରବାର ରାଜ୍ୟ ମହିଳା କମିଶନ ଡ. ମିନତି ବେହେରାଙ୍କ ନେତୃତ୍ବରେ ଏକ ଚାରି ଜଣିଆ ଟିମ ପହଞ୍ଚିଥିଲେ ।

ପ୍ରଥମେ ଏହି ଟିମ ବଲାଙ୍ଗିର ଏସପିଙ୍କ କାର୍ଯ୍ୟାଳକୁ ଯାଇ ସେଠାରେ ଘଟଣା ଓ ତଦନ୍ତ ବିଷୟରେ ଆଲୋଚନା କରିଥିଲେ । ଆଜି ଏହି ଟିମ ତୁରେକେଲା ବ୍ଲକ ଝରଣୀ ଗାଁକୁ ଯାଇ ପରିବାର ଲୋକଙ୍କ ସହ ଆଲୋଚନା କରିବା ପରେ ମହାଲିଙ୍ଗ କଲେଜ ଯିବେ ବୋଲି ଜଣାପଡ଼ିଛି। ପୂର୍ବରୁ ଏହି ମାମଲାରେ ଜାତୀୟ ମହିଳା କମିଶନ ରିପୋର୍ଟ ତଲବ କରିସାରିଛନ୍ତି। ତେବେ ରାଜ୍ୟ ମହିଳା କମିଶନ ନିଜ ରିପୋର୍ଟରେ କଣ ଦର୍ଶାଇବେ ତାହା ଉପରେ ମଧ୍ୟ ସମସ୍ତଙ୍କ ନଜର ରହିବ।

ଅନ୍ୟପକ୍ଷରେ ଉକ୍ତ କଲେଜରେ ଛାତ୍ରୀମାନଙ୍କୁ ଶାରୀରିକ ସମ୍ପର୍କ ରଖିବାକୁ ବାଧ୍ୟ କରାଯାଉଥିବା ନେଇ ଯେଉଁ ଅଭିଯୋଗ ଆସିଛି ସେ ଉପରେ ମଧ୍ୟ ଉକ୍ତ ଟିମ ଛାନଭିନ କରିବ ବୋଲି ଅଧ୍ୟକ୍ଷା ସୂଚନା ଦେଇଛନ୍ତି। ଏହା ସହିତ ପୀଡିତା ପରିବାରଙ୍କୁ ଶୀଘ୍ର ଯେପରି ନ୍ୟାୟ ମିଳିବ ସେଥିପ୍ରତି କମିଶନ ଦୃଷ୍ଟିଦେବ ବୋଲି କମିଶନ ଅଧ୍ୟକ୍ଷା ଡ. ମୀନତି ବେହେରା ଗଣମାଧ୍ୟମକୁ ସୂଚନା ଦେଇଛନ୍ତି। ଏହି ଚାରିଜଣିଆ ଟିମରେ ଅଧ୍ୟକ୍ଷାଙ୍କ ସହିତ ଅତିରିକ୍ତ ଏସପି ବିଜୟା ବରୁଆ, ଇନ୍ସପେକ୍ଟର ସସ୍ମିତା ଦାଶ ଓ ଆଇନ ଅଧିକାରୀ ଅରବିନ୍ଦ ପଟ୍ଟନାୟକ ରହିଛନ୍ତି।

ଭୁବନେଶ୍ବର : କଳାହାଣ୍ଡି ମହାଲିଙ୍ଗ ସନସାଇନ୍ ସ୍କୁଲ ଅଧ୍ୟକ୍ଷା ମମିତା ମେହେର ହତ୍ୟା ମାମଲାରେ  ସାମ୍ବାଦିକ ସମ୍ମିଳନୀ କରିଛି ବିଜେଡି । ଏହି ଘଟଣାରେ ଦୋଷୀଙ୍କୁ ନିଶ୍ଚୟ ଦଣ୍ଡ ମିଳିବ ଓ ମମିତାଙ୍କ ପରିବାରକୁ ନ୍ୟାୟ ମିଳିବ ବୋଲି କହିଛନ୍ତି ବିଜେଡି ଉପ ସଭାନେତ୍ରୀ ତଥା ବିଧାୟିକା ପ୍ରମିଳା ମଲ୍ଲିକ । ତାଙ୍କ କହିବା ମୁତାବକ, ଏହି ଘଟଣାରେ ଏବେ ଜଣେ ଦୁଇଜଣ ଅଭିଯୁକ୍ତ ଗିରଫ ହୋଇସାରିଛନ୍ତି । ଖୁବଶୀଘ୍ର ଅନ୍ୟ ଅଭିଯୁକ୍ତ ମଧ୍ୟ ଗିରଫ ହେବେ । ହେଲେ ବିରୋଧୀ ନେତାମାନେ ଅଯଥାରେ ରାଜନୀତି କରନ୍ତୁ ନାହିଁ ବୋଲି ସେ କହିଛନ୍ତି ।

ସାମ୍ବାଦିକ ସମ୍ମିଳନୀରେ ବିଧାୟିକା ପ୍ରମିଳା ମଲ୍ଲିକ କହିଛନ୍ତି ଯେ ମମିତାଙ୍କ ମୃତ୍ୟୁ ସମାଜର ଓ ପରିବାରର କ୍ଷତି ହୋଇଛି, ଆମେ ସମାବେଦନା ଜଣାଉଛୁ।  ଏହି ମାମଲାର ତଦନ୍ତ ଦାୟିତ୍ବ ଏନ୍‌ଆଇଏ (NIA)ରେ କାମ କରିଥିବା ଜଣେ ଅଧିକାରୀଙ୍କୁ ଦିଆଯାଇଛି । ଅଭିଯୁକ୍ତ ନିଶ୍ଚୟ ଦଣ୍ଡ ପାଇବେ । ଅନ୍ୟ ଯେଉଁମାନେ ବି ସମ୍ପୁକ୍ତ ସେମାନେ ବି ଦଣ୍ଡ ପାଇବେ।  ଉକ୍ତ ଶିକ୍ଷାନୁଷ୍ଠାନରେ ବହୁ ଛାତ୍ରଛାତ୍ରୀ , ଶିକ୍ଷକ ମାନେ କାମ କରୁଛନ୍ତି । କିଛି ଜଣଙ୍କ ପାଇଁ ପୁରାଶିକ୍ଷାନୁଷ୍ଠାନକୁ ବଦନାମ କରା ନ ଯାଉ । ଅନ୍ୟମାନେ ବି ସେଠାରେ ଅଛନ୍ତି ।ଛାତ୍ରଛାତ୍ରୀ ଭଲ ପାଠ ପଢନ୍ତୁ । ଅନୁଷ୍ଠାନ ଅଛି ମାନେ ମନ୍ତ୍ରୀ, ନେତା ଯିବେ । କିଏ ଫଟ ଉଠେଇଲା, ସିଏ ଦୋଷୀ ହେବା ଠିକ ନୁହଁ । ମନ୍ତ୍ରୀ ଆର୍ଥିକ ଅନୁଦାନ ଦେଲେ ଦୋଷୀ ହେବେ ନାହିଁ । ମନ୍ତ୍ରୀ ସେଠାକୁ ଯାଉ ଥିଲେ କି ନାହିଁ , ତଦନ୍ତ ପରେ ଜଣା ପଡିବ।

ଅନ୍ୟପଟେ ନେତା, ମନ୍ତ୍ରୀମାନେ କୌଣସ ଅନୁଷ୍ଠାନକୁ ଯିବା ନୂଆ କଥା ନୁହେଁ । କୌଣସି ବେସରକାରୀ ଶିକ୍ଷାନୁଷ୍ଠାନ ସରକାରୀ ଅନୁଦାନ ପାଇବା ମଧ୍ୟ ନୂଆ କଥା ନୁହେଁ । ସେହିପରି ଅପରାଧୀଙ୍କ ସହିତ ବିଭିନ୍ନ ସମୟରେ ନେତା ମନ୍ତ୍ରୀଙ୍କ ଫଟୋ ରହିଥାଏ । ହେଲେ ଏହାକୁ ନେଇ ରାଜନୀତି କରିବା ଠିକ୍ ନୁହେଁ ବୋଲି କହିଛନ୍ତି ବିଜେଡି ବିଧାୟିକା । ବିଜେପିର ବହୁ ନେତାଙ୍କ ଫଟୋ ଅପରାଧୀଙ୍କ ସହ ରହିଛି । । ଉତ୍ତର ପ୍ରଦେଶର ଖେରୀରେ ଯେଉଁ ଭଳି ଭାବେ କୃଷକଙ୍କୁ ଗାଡି ଚଢାଇ ହତ୍ୟା କରାଗଲା ସେଥିରେ କେନ୍ଦ୍ର ମନ୍ତ୍ରୀଙ୍କ ନାଁ ଚର୍ଚା ହେଲା ଏବଂ ମୁଖ୍ୟ ଅଭିଯୁକ୍ତ ତାଙ୍କ ପୁଅ ଗିରଫ ମଧ୍ୟ ହେଲା ସେଥିରେ ବଜେପି ନେତା କଣ ପାଇଁ ସିବିଆଇ ତଦନ୍ତ ପାଇଁ ଦାବି କଲେନି ବୋଲି ପ୍ରଶ୍ନ କରିଛନ୍ତି ପ୍ରମିଳା ମଲ୍ଲିକ।

ସେ ଆହୁରି ମଧ୍ୟ କହିଛନ୍ତି ଯେ ପୁଲିସ ସବୁବେଳେ ନିରପେକ୍ଷ ଭାବେ କାମ କରୁଛି । ରାଜ୍ୟରେ କୌଣସି ନାରୀ ନିର୍ଯ୍ୟାତନା ମାମଲା ଲୁଚାଇ ରଖା ଯାଉନାହିଁ । ନାରୀ ନିର୍ଯ୍ୟାତନା ଅଭିଯୋଗ ଆସିଲେ ମାମଲା ରୁଜୁ କରାଯାଉଛି । ଆମର ନ୍ୟାୟ ପାଳିକା, ପୁଲିସ ଉପରେ ଭରସା ଅଛି । ବିଜେପି ଶସ୍ତା ରାଜନୀତି କରୁଛି । ମମିତା ନ୍ୟାୟ ପାଇବା ଦରକାର । ଅଭିଯୁକ୍ତକୁ ତୁରନ୍ତ ଗିରଫ କରାଯାଇଛି, ଅନ୍ୟମାନେ ସମ୍ପୃକ୍ତ ଥିଲେ ଗିରଫ ହେବେ । ଯଦି ମନ୍ତ୍ରୀଙ୍କ ସମ୍ପୃକ୍ତି ଥିବ ସେ ଗିରଫ ହେବେ, ଦଣ୍ଡ ପାଇବେ । ମନ୍ତ୍ରୀ ଇସ୍ତଫା ଦେଇ ଦେଲେ କଣ ନ୍ୟାୟ ମିଳି ଯିବ କି ? ତଦନ୍ତ ବନ୍ଦ ହେବ କି ?  ବୋଲି ପ୍ରଶ୍ନ କରିଛନ୍ତି ପ୍ରମିଳା।

ବଲାଙ୍ଗିର : କଳାହାଣ୍ଡି ମହାଲିଙ୍ଗ ସନସାଇନ୍ ସ୍କୁଲ ଅଧ୍ୟକ୍ଷା ମମିତା ମେହେର ମର୍ଡର ମିଷ୍ଟ୍ରିର ଖୁଲାସା କରିଛନ୍ତି ଉତ୍ତରାଞ୍ଚଳ ଡିଆଇଜି ଦୀପକ କୁମାର । ଗୋବିନ୍ଦ ସାହୁ ହିଁ ହତ୍ୟାକାରୀ । ଯୋଜନାବଦ୍ଧ ଭାବେ ଗୋବିନ୍ଦ ମମିତାଙ୍କୁ ହତ୍ୟା କରିଛି । ଏନେଇ ବଲାଙ୍ଗୀର ପ୍ରେସମିଟ୍ ଜରିଆରେ ଅନେକ ଗୁରୁତ୍ବପୂର୍ଣ୍ଣ ତଥ୍ୟ ଗଣମାଧ୍ୟମ ସମ୍ମୁଖରେ ରଖିଛନ୍ତି ଉତ୍ତରାଞ୍ଚଳ ଡିଆଇଜି ଦୀପକ କୁମାର।

ଏନେଇ ଡିଆଜି କହିଛନ୍ତି ଯେ ଗୋବିନ୍ଦର ପରକୀୟା ସଂପର୍କ ନେଇ ମମିତା ଜାଣିଥିଲେ। ଏହାକୁ ପ୍ରଘଟ କରିବା ନେଇ ମମିତା ତାଙ୍କୁ ଧମକ ଦେଇଥିଲେ। ଏହି ଘଟଣାକୁ ନେଇ ମମିତାଙ୍କୁ ହତ୍ୟା କରିବ ବେଲି ଗୋବିନ୍ଦ ଯୋଜନା କରିଥିଲା।ମମିତାଙ୍କୁ ପୂର୍ବ ଯୋଜନା ମୁତାବକ ଭବାନୀପାଟଣା ଡାକିଥିଲେ ଗୋବିନ୍ଦ । ଆଉ ୮ ତାରିଖ ଦିନ ଭବାନୀପାଟଣାରୁ କେ ଗାଁକୁ ଫେରୁଥିବା ରାସ୍ତାରେ ମମିତାଙ୍କୁ ହତ୍ୟା କରାଯାଇଥିଲା । ତେବେ ତଣ୍ଟି ଚିପି ହତ୍ୟା କରାଯାଇଛି କି ନାହିଁ ତାହା ଏଯାଏଁ ସ୍ପଷ୍ଟ ହୋଇନାହିଁ । ଗୋବିନ୍ଦଙ୍କ କାରରେ କଟା ଦାଗ ଥିବାରୁ ମମିତାଙ୍କୁ ମାରିବା ପାଇଁ ଛୁରୀ ବ୍ୟବହାର ହୋଇଥିବା ପୁଲିସ ସନ୍ଦେହ କରୁଛି । ହତ୍ୟା କରିବା ପରେ ମମିତାଙ୍କ ମୃତଦେହକୁ କାର୍‌ରେ ସାଥୀରେ ନେଇଯାଇଥିଲା ଗୋବିନ୍ଦ । ହତ୍ୟା ପରେ ଅନ୍ଧାର ହେଲା ପରେ ମୃତଦେହକୁ ମହାଲିଙ୍ଗ ଷ୍ଟାଡିୟମକୁ ନେଇ କାର୍ଡ ବୋର୍ଡ ଓ ଟାୟାର ଜାଳି ପୋଡିଥିଲେ ଗୋବିନ୍ଦ । ପରଦିନ ସକାଳେ ଜେସିବି ମେସିନରେ ଉକ୍ତ ପୋଡା ମୃତଦେହକୁ ପୋତାଯାଇଥିଲା ।

ମମିତା ନିଖୋଜ ନେଇ ଅଭିଯୋଗ ମିଳିବା ପରେ ତଦନ୍ତ କରିଥିଲା ପୁଲିସ୍ । ମମିତା ନିଖୋଜ ମାମଲାର ଖୋଳତାଡ କରୁଥିଲା ପୋଲିସ୍ ଆଉ ଗୋବିନ୍ଦ ସାହୁଙ୍କୁ ହେପାଜତକୁ ନେଇଥିଲା ସେତେବେଳେ କୌଶଳ କରି ପୁଲିସ ହେପାଜତରୁ ଚମ୍ପଟ ମାରିଥିଲା । ପରେ ପୁଲିସ ଗୋବିନ୍ଦକୁ ଖୋଜିବା ପାଇଁ ଲାଗିପଡିଥିଲା । ଗୋବିନ୍ଦକୁ ଧରାଇ ଦେଲେ ୨୦ହଜାର ଟଙ୍କାର ପୁରସ୍କାର ରାଶୀ ପ୍ରଥମେ ଘୋଷଣା କରିଥିଲା ପୁଲିସ । ପରେ ଏହି ପୁରସ୍କାର ରାଶୀକୁ ବଢାଇ ୧ଲକ୍ଷ ଟଙ୍କା କରିଥିଲା ପୁଲିସ । ତଦନ୍ତ ବେଳେ ପାଖାପାଖି ୧୭ ଘଣ୍ଟାର ସିସିଟିଭି ଫୁଟେଜ ପୁଲିସ ସଂଗ୍ରହ କରିଥିଲା । ପୁଲିସ ପକ୍ଷରୁ ୯ଟି ଟିମ ଗଠନ କରାଯାଇ ବିଭିନ୍ନ ସାକ୍ଷୀମାନଙ୍କୁ ପଚରାଉଚୁରା କରାଯାଇଥିଲା।

ଭବାନୀପାଟଣା ସ୍ଥାନୀୟ ଅଞ୍ଚଳରେ ୪୫ରୁ ୬୦ କିମି ଯାଏ ସିସିଟିଭି ଯାଞ୍ଚ କରିଥଲା ପୁଲିସ । ସିସିଟିଭି ଫୁଟେଜ ଜରିଆରେ ଅନେକ ତଥ୍ୟ ହାସଲ ହୋଇଛି । ପୁଲିସ ହେପାଜତରୁ ଚମ୍ପଟ ମାରିବା ପରେ ଗୋବିନ୍ଦକୁ ଧରିବା ପାଇଁ ପୁଲିସ ପକ୍ଷରୁ ବିଭିନ୍ନ ସ୍ଥାନରେ ଚଡାଉ କରାଯିବା ସହ ତାର ସମ୍ପର୍କୀୟଙ୍କ ଉପରେ ମଧ୍ୟ ନଜର ରଖାଯାଇଥିଲା। ଗୋବିନ୍ଦର ସାନ ଭଉଣୀ ଘର ଉପରେ ନଜର ରଖିଥିଲା ପୁଲିସ । ଗୋବିନ୍ଦ ସାନ ଭଉଣୀ ଘରକୁ ଲୁଚିବା ପାଇଁ ଯାଇଥିଲା ସେଠାରେ ସାନ ଭଉଣୀର ସାଶୁଘର ଲୋକେ ଗୋବିନ୍ଦକୁ ଘରେ ଆଶ୍ରୟ ଦେଇନଥିଲେ । ଘର ବାରି ପଛପଟେ ଥିବା ଏକ ଆଖୁ କିଆରିରେ ଲୁଚିବାକୁ କହିଥିଲେ । ଆଉ ଗୋବିନ୍ଦ ଆଖୁ କିଆରି ଭିତରେ ଲୁଚିଥିଲା । ସେଠାରେ ତା’ ପାଖରେ ଖାଇବା ପିଇବା ପହଞ୍ଚାଯାଉଥିଲା । ଯାହା ଉପରେ କିଛି ସ୍ଥାନୀୟ ଲୋକଙ୍କ ନଜର ରହିଥିଲା । ଆଉ ସ୍ଥାନୀୟ ଲୋକଙ୍କ ସହାୟତାରେ ହିଁ ଗୋବିନ୍ଦକୁ ଧରିବାରେ ସଫଳ ହୋଇଥିଲା ପୁଲିସ।

ଅନ୍ୟପଟେ ଗୋବିନ୍ଦଙ୍କ ସହ ସିନ୍ଧେକେଲା ଥାନାରେ ଅଟକ ଥିବା ଜେସିବି ଡ୍ରାଇଭର ପୁଷ୍କର ଭୋଇ, କଲେଜର ରାତ୍ରି ଜଗୁଆଳି ଗୁପ୍ତେ ତାଣ୍ଡି ଓ କଲେଜ ଅଧ୍ୟକ୍ଷ ରଞ୍ଜିତ ସାହୁଙ୍କୁ ମୁହାଁମୁହିଁ ଜେରା କରିଛି ବଲାଙ୍ଗୀର ପୁଲିସ । ଅନ୍ୟପଟେ ଘଟଣା ପରେ ସୋସିଆଲ ମିଡିଆରେ ପ୍ରତିକ୍ରିୟା ରଖିଛନ୍ତି ମହାଲିଙ୍ଗ କଲେଜର କିଛି ଛାତ୍ରଛାତ୍ରୀ । କଲେଜରେ ଅସାମାଜିକ କାର୍ଯ୍ୟ ଚାଲିଥିଲା ବୋଲି ଛାତ୍ରଛାତ୍ରୀ ଅଭିଯୋଗ କରିଛନ୍ତି । କଲେଜରେ ବେଆଇନ କାର୍ଯ୍ୟ ଚାଲୁଥିବା ବେଳେ, ହଷ୍ଟେଲରେ ଛାତ୍ରମାନଙ୍କୁ ନିସ୍ତୁକ ମାଡ଼ ମରାଯାଉଥିବା ଅଭିଯୋଗ ହୋଇଛି । ତେଣୁ ମହାଲିଙ୍ଗ କଲେଜ ଅଧ୍ୟକ୍ଷ ରଞ୍ଜିତ ସାହୁଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଦାବି ହୋଇଛି ।