ଭୁବନେଶ୍ୱର: ପାର୍ବଣ ସରିଛି। ମା’ ଦୁର୍ଗତିନାଶିନୀଙ୍କ ମେଲାଣି ପରେ ଏବେ ମା’ ଧନଦାତ୍ରୀ ଗଜଲକ୍ଷ୍ମୀ ଧରାବତରଣ କରିବେ ।ଆଜି କୁମାରୋତ୍ସବ ଓ ଗଜଲକ୍ଷ୍ମୀ ପୂଜା। ସୁଖ, ସମୃଦ୍ଧି, ଐଶ୍ୱର୍ଯ୍ୟର ଭଣ୍ଡାର ନେଇ ଆଜି ବିରାଜିବେ ମା’ ଗଜଲକ୍ଷ୍ମୀ । ଘଣ୍ଟ ଘଣ୍ଟା, ଶଙ୍ଖନାଦ ଓ ହୁଳହୁଳିରେ ପୁଣି କମ୍ପିବ ରାଜଧାନୀ । ଏଥିପାଇଁ ବିଭିନ୍ନ ସ୍ଥାନରେ ପାରମ୍ପରିକ ରୀତିରେ ଆୟୋଜିତ ହେଉଛି କୁମାରୋତ୍ସବ ଓ ଗଜଲକ୍ଷ୍ମୀ ପୂଜା। ଏଥିପାଇଁ ଆଲୋକମାଳାରେ ଝଲସି ଉଠୁଛି ରାଜଧାନୀ। ଚଳିତବର୍ଷ ସହରର ବିଭିନ୍ନ ସ୍ଥାନରେ ଆଡ଼ମ୍ବରରେ ଅନୁଷ୍ଠିତ ହେଉଛି ଗଜଲକ୍ଷ୍ମୀ ପୂଜା। ୟୁନିଟ୍‍-୯, ୟୁନିଟ୍‍-୮, ବାପୁଜୀ ନଗର, ବାୟାବାବା ମଠ ଲେନ୍‍, ସହିଦ୍‍ ନଗର, ନୂଆପଲ୍ଲୀ, ଲକ୍ଷ୍ମୀସାଗର ଓ ଚନ୍ଦ୍ରଶେଖରପୁର ଆଦି ଅଞ୍ଚଳରେ ମା’ ଗଜଲକ୍ଷ୍ମୀଙ୍କ ମୃଣ୍ମୟ ପ୍ରତିମା ପୂଜା ପାଇଁ ଆୟୋଜନ ଅନ୍ତିମ ପର୍ଯ୍ୟାୟରେ ପହଞ୍ଚିଛି।

ଆଜି ସନ୍ଧ୍ୟାରେ କଳସ ଯାତ୍ରା ଆରମ୍ଭ ହେବାପରେ ମା’ଙ୍କ ପୂଜା ଆରମ୍ଭ ହେବ। ରାଜଧାନୀରେ ପ୍ରାୟ ୨୫ରୁ ଅଧିକ ସ୍ଥାନରେ ମା’ ଲକ୍ଷ୍ମୀଙ୍କ ପୂଜା ପାଇଁ ଆୟୋଜନ ଶେଷ ହୋଇଛି। ଆସନ୍ତା ୭ଦିନ ଧରି ଏଠାରେ ପୂଜା ସହ ସାଂସ୍କୃତିକ କାର୍ଯ୍ୟକ୍ରମ ସହ ବିଭିନ୍ନ ପ୍ରତିଯୋଗିତା ଅନୁଷ୍ଠିତ ହେବ। ଚନ୍ଦ୍ରଶେଖରପୁର ହାଉସିଂବୋର୍ଡ କଲୋନୀ ବ୍ୟବସାୟୀ ସଂଘ ପକ୍ଷରୁ ଏଥର ଗଜଲକ୍ଷ୍ମୀ ପୂଜା ୩୨ବର୍ଷରେ ପହଞ୍ଚିଛି। କିଛି ସ୍ଥାନରେ ୧୦ଦିନ ପୂଜା ମଧ୍ୟରୁ ୫ଦିନ ମେଲୋଡି କାର୍ଯ୍ୟକ୍ରମ ଆୟୋଜନ କରାଯିବ। ବାପୁଜୀ ନଗରରେ ପ୍ରତିବର୍ଷ ବହୁ ଆଡ଼ମ୍ବରରେ ଗଜଲକ୍ଷ୍ମୀ ପୂଜା ପାଳନ ହୋଇଥାଏ। ଚଳିତବର୍ଷ କମିଟି ପକ୍ଷରୁ ପଶ୍ଚିମବଙ୍ଗର ମାୟାପୁରୀ ମନ୍ଦିର ସଦୃଶ ହେବ ତୋରଣ ପ୍ରସ୍ତୁତ କରାଯାଇଛି। ଝୋଟି ଓ ଚିତାରେ ସଜ୍ଜା ହୋଇଛି ପୂଜା ମଣ୍ଡପ। ୟୁନିଟ୍‍-୯ ଫ୍ରେଣ୍ଡସ୍‍ କ୍ଲବ୍‍ ପକ୍ଷରୁ ହୋଇଥିବା ପୂଜାମଣ୍ଡପରେ ମା’ ଗହଣାରେ ଛାଇ ହେବେ। ପ୍ରତିବର୍ଷ କ୍ଲବ୍‍ ପକ୍ଷରୁ ମା’ଙ୍କୁ ଗହଣାରେ ସଜ୍ଜାଇବାକୁ ଗୁରୁତ୍ୱ ଦେଉଥିବାବେଳେ ଚଳିତବର୍ଷ ମଧ୍ୟ ଗହଣାରେ ଛାଇ ହେବେ ମା’ ଗଜଲକ୍ଷ୍ମୀ। ସେହିପରି ବିଭିନ୍ନ ପୂଜା କମିଟି ପକ୍ଷରୁ ମା’ଙ୍କ ନିକଟରେ ଖେଟୁଡି, ପଣା, ଖିରୀ, ପୁରି ଆଦି ଭୋଗ ଲାଗି ହେବ। ଏଥିପାଇଁ ବଜାରରେ ଭିଡ଼ ହୋଇଥିଲା। ମା’ଙ୍କ ମୂର୍ତ୍ତି କିଣିବା ପାଇଁ ଗହଳି ହୋଇଥିଲା।

ଭୁବନେଶ୍ୱର: ମା’ ଦୁର୍ଗତିନାଶିନୀଙ୍କ ମେଲାଣି ପରେ ଏବେ ମା’ ଧନଦାତ୍ରୀ ଗଜଲକ୍ଷ୍ମୀ ଧରାବତରଣ କରିବେ । କିନ୍ତୁ କରୋନା କଟକଣା ମଧ୍ୟରେ କେବଳ ମା’ଙ୍କ ରୀତିନୀତି ଅନୁଯାୟୀ ପୂଜାର୍ଚ୍ଚନା କରାଯିବାର ବ୍ୟବସ୍ଥା କରାଯାଇଛି। ରାଜଧାନୀର ବିଭିନ୍ନ ପୂଜାମଣ୍ଡପ ଓ ବ୍ୟବସାୟୀ ସଂଘ ପକ୍ଷରୁ କଟକଣା ମଧ୍ୟରେ ମା’ ଲକ୍ଷ୍ମୀଙ୍କ ପୂଜାର୍ଚ୍ଚନା କରାଯିବ। ରାତିପାହିଲେ ଗଜଲକ୍ଷ୍ମୀ ପୂଜା ଅନୁଷ୍ଠିତ ହେବ। ମା’ଙ୍କ ମୂର୍ତ୍ତି ନିର୍ମାଣରେ ଶେଷ ସ୍ପର୍ଶ ଦିଆଯାଇଛି। ମହାମାରୀର କଟକଣା ଥିବା ଯୋଗୁଁ ମା’ ଧନଦାତ୍ରୀଙ୍କର ପୂଜା କେବଳ ୭ଜଣ କର୍ମକର୍ତ୍ତାଙ୍କ ମଧ୍ୟରେ ସମାପନ ହେବ। ନା ବାହାର ଭକ୍ତଙ୍କୁ ମା’ଙ୍କୁ ଦର୍ଶନ କରିବାର ଅବକାଶ ଅଛି ନା ଆଡ଼ମ୍ବରରେ ମା’ଙ୍କ ଆବାହନର କୌଣସି ବ୍ୟବସ୍ଥା ହୋଇଛି। ୪ଫୁଟ୍ ଉଚ୍ଚତା ବିଶିଷ୍ଟ ମା’ଙ୍କ ମୂର୍ତ୍ତିରେ ଚାନ୍ଦି ହାର ଓ ମୁକୁଟ ଅନାବରଣ ନାହିଁ କି ଆଉ କେହି ବିଭିନ୍ନ ଡିଜାଇନ୍‌ର ତୋରଣ ନିର୍ମାଣ କରି ସେଥିରେ ମା’ଙ୍କୁ ବିରାଜିତ କରାଯିବ ନାହିଁ। ଏମିତିକି ରାଜଧାନୀ ଭୁବନେଶ୍ଵରର କୌଣସି ସ୍ଥାନରେ ବି କଟକଣାକୁ ଦୃଷ୍ଟିରେ ରଖି ମିନାବଜାରର ଆୟୋଜନ କରାଯିବ ନାହିଁ। ଏଥିପାଇଁ ବାପୁଜୀନଗର, ନହରକଣ୍ଟା, ୟୁନିଟ୍-୮, ପୁରୁଣା ଭୁବନେଶ୍ଵର, ଖଣ୍ଡଗିରି ଆଦିରେ ବିଭିନ୍ନ ପୂଜା କମିଟି ପକ୍ଷରୁ ନିରାଡ଼ମ୍ବରରେ ମା’ଙ୍କ ପୂଜା କରାଯିବ। କିଛିସ୍ଥାନରେ କୋଭିଡ୍ କଟକଣାକୁ ଦୃଷ୍ଟିରେ ରଖି ମା’ ଗଜଲକ୍ଷ୍ମୀଙ୍କ ପୂଜାକୁ ସ୍ଥଗିତ ରଖାଯାଇଛି।

ବାପୁଜୀନଗର ୟୁଥ୍ ଆସୋସିଏସନ୍ ପକ୍ଷରୁ ୫୬ବର୍ଷରେ ପଦାର୍ପଣ କରିଛି ଗଜଲକ୍ଷ୍ମୀ ପୂଜା। ଆସନ୍ତାକାଲି ସକାଳେ ପୂଜା ପାଇଁ ପାଣି ଅଣାଯିବାପରେ ସନ୍ଧ୍ୟା ୭ଟାରେ ପୂଜାର୍ଚ୍ଚନା ଆରମ୍ଭ ହେବ । ଏଥିପାଇଁ ମା’ଙ୍କ ପାଖରେ ସ୍ୱତନ୍ତ୍ରଭାବେ ଖିରି ଓ ରସଗୋଲା ଭୋଗ ଲାଗିହେବ ବୋଲି ଆସୋସିଏସନ୍‌ ପକ୍ଷରୁ ଆଶିଷ୍ ପଟ୍ଟନାୟକ ସୂଚନା ଦେଇଛନ୍ତି।

ସେହିପରି ୟୁନିଟ୍-୯ ସ୍ଥିତ ଭୁବନେଶ୍ବର ଫ୍ରେଣ୍ଡସ୍ କ୍ଲବ୍ ପକ୍ଷରୁ ନିଡ୍ଡମ୍ବର ଭାବେ ମା’ ଧନଦାତ୍ରୀଙ୍କର ଆବାହନ କରାଯିବ। ଏଥର ମା’ଙ୍କ ମୁଣ୍ଡରେ ଶୋଭା ପାଇବନି ସୁନା ରୁପାର ମୁକୁଟ ସାଙ୍ଗକୁ ପାଦରେ ପାଉଁଜି। ପ୍ରତିବର୍ଷ ୧୨ଦିନ ଧରି ଚାଲୁଥିବା ମା’ଙ୍କ ପୂଜାର୍ଚ୍ଚନା ଏଥର କେବଳ ୩ଦିନ ମଧ୍ୟରେ ସୀମିତ ରହିବ। ଆସନ୍ତାକାଲି ସନ୍ଧ୍ୟା ୫ଟାରୁ କଳସ ଯାତ୍ରାରୁ ପୂଜା କାର୍ଯ୍ୟକ୍ରମ ଆରମ୍ଭ କରାଯାଇ ୭ଟାରେ ମା’ଙ୍କ ଆରାଧନା କରାଯିବ। ସନ୍ଧ୍ୟାରେ ସାଂସ୍କୃତିକ କାର୍ଯ୍ୟକ୍ରମ ଓ ମେଲୋଡି କାର୍ଯ୍ୟକ୍ରମ ମଧ୍ୟ ହେବ ନାହିଁ ବୋଲି କ୍ଲବ୍ ପକ୍ଷରୁ ସୂଚନା ଦିଆଯାଇଛି।